\id 1PE - MAZATECO DE SAN PEDRO IXCATLÁN
\h 1 XO̱JO̱O̱N PEÉ
\mt1 Xo̱jo̱n xi tjón xi kats'én'indó apostro̱ Peé
\c 1
\s Bi ts'én kats'éntinde Peé xta̱ na̱ngo̱xi̱i̱
\p
\v 1 An Peé, nda̱ apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱, ts'entindejnú'un ngayejejnú xta̱ xi Néná je ja'ájinjnú xi xín nangui ndokjo̱a̱nijnú xi tindyiónjnú ngu̱i̱ndie xi 'mí Ponto̱, Galasia̱, Kapadosia̱, Asia̱ ko̱jo Bitinia̱.
\v 2 Xikó ts'én índa Néná xi na̱'miná nga kamámejeén ja'ájinjnú jún, tsi̱'e̱ nga xta̱ na̱xi̱ńdá xi tsi̱'e̱ ka̱majnú. Kó nga ngat'aa̱ A̱sién Ni̱xtjii̱n ko̱jo ngat'aa̱ nga k'ien Jesukristoo̱ nga kats'éntsjiejónjnú ngayeje jéjnú, tsi̱'e̱ nga ko̱nda'yá'énjnú. Ngatama tsie kjo̱a̱nda ko̱jo kjo̱a̱xió xi tsja̱ajnú Néná.
\s Bi ts'én íni̱jmi Peé kjo̱a̱a̱ nga sa̱kóná ñá ni̱xtjin xi fet'aa̱
\p
\v 3 Nga ni'ántsjaá Néná, kui xi Na̱'mii̱ Ndi̱a̱ná Jesukristoo̱, kui xi tangat'anii̱ kjo̱a̱ni̱ma̱takón jee̱ nga kats'éntsen nguiníná nga ndyi̱chiyáa̱ nga ko̱jo ñá k'uiéná ngo kjo̱a̱mindyion, tangat'anii̱ nga ja'á'yaá Jesukristoo̱ ngu̱i̱jii̱n xta̱ xi je jesoón.
\v 4 Néná boá xi sa̱'ín nga sa̱kóná kui ni xi je tikóndaa̱ ki̱a̱ ndi'ak'ajmii̱ nga tsja̱aná, kui ni xi nguiti ka̱majiín kjo̱tson, ti nde jmíjiín ni xi ndándí, ti nde kamájiín xi̱'niú.
\v 5 Nga'niuú tjíts'énkjién nga ts'énkoón jún, tangat'anii̱ nga s'ijinjnú, tsi̱'e̱ nga Néná k'o̱xié'á kjin kjin xta̱ xi tsi̱'e̱ xikó ts'én je tikóndaa̱ ni̱xtjin xi kjifet'aa̱.
\p
\v 6 Tangat'anii̱ kui nii̱ nga jún tsja ngat'iéjnú nda tsi ngui chiboa tsi ni̱xtjin nga ku̱i̱tjatiojnú kjín to̱ko̱ya kjo̱a̱chjat'ayákón,
\v 7 tsi̱'e̱ nga chját'ayákón kjo̱a̱s'ijinjnú, nga̱t'a̱ kuí xí chjí ngasenii̱ ta bo̱a̱jiín to̱nsinieé, kui xi máa̱ fotson kó ndi'í chít'ani. Kó bo̱a̱ ts'én kui kjo̱a̱s'ijii̱n xcha̱ nga k'uieé kjo̱a̱ni'ántsja, kjo̱a̱je ko̱jo kjo̱a̱yandikón kji'a nga ko̱kó yojoo̱ Jesukristoo̱.
\p
\v 8 Jesukristoo̱ xí ndyi̱ni'ántjójnú nda tsi kamáyajínjnú kó kis'ie kje̱n, kó tjis'ijinjnú nda tsi ngot'e̱ yajínjnú kje̱n, achichí kjo̱a̱tsja xi 'niú je tjínjnú kó ngaskande nde yajín kóts'en k'uiyá kuí nii̱,
\v 9 tjínjnú kui nii̱ nga̱t'a̱ je ndyi̱fóchot'ajnúu̱ kjo̱a̱'naxié'ájnú, kó kui nii̱ ki̱a̱ ndibánií kjo̱a̱s'ijinjnú.
\p
\v 10 Já chji̱ni̱e̱'e̱én Néná xi kis'ie ngas'e̱ kamámejeén sku̱i̱e̱ ko̱jo tsangase ndi̱ya sen see̱n kjo̱a̱a̱ kui kjo̱a̱'naxié'aá kji'a nga katsáyatjón nga Néná tsja̱ajnú kui kjo̱a̱ndaa̱.
\v 11 Kamámejeén kamábe 'yá xta̱ ko̱jo mí ni̱xtjin xi íjñá tsijen A̱sién Ni̱xtjii̱n Kristoo̱ xi tikónjii̱n kui já chji̱ni̱e̱'e̱én, kui A̱sién Ni̱xtjii̱n xi katsáyá nga tsie kjo̱a̱ni̱ma̱ kjo̱a̱'atio Kristoo̱ ko̱jo kui kjo̱a̱je xi jaskan kji̱ndi̱baá.
\v 12 Néná akoó kui já chji̱ni̱e̱'e̱én tanga jmí tsi kjo̱a̱a̱ nganda ti kuii̱ tsi̱'e̱, nganda tsa̱jún boá nga akakoo̱. Kuí bí kui én xi katse'éjnú ngot'e̱ jún xi je ik'íni̱jmijnú kui éntjatsi̱e̱e̱, tangat'anii̱ nga'niuú A̱sién Ni̱xtjii̱n Néná xi kananguiyani ndi'ak'ajmi ján, kui ni xi ngaskande ndítsjiee̱ kamámejeén kamábe.
\s Bi ts'én íni̱jmi Peé nga tsjie ts'en ku̱i̱ndyión nga̱t'a̱ je Ndi̱a̱ná ndokjo̱a̱ ñá
\p
\v 13 Kuíni nga ti̱ndyiondajnú nga k'uiéjnú kjo̱a̱kjínkón, kó nda ti'ankjójnú ni xi si̱'ánjnú, kó chiyá ndo̱jo ndo̱jojnúu̱ kjo̱a̱nda xi kjo̱e̱'éjo̱jnú kji'a nga ko̱kó yojoo̱ Jesukristoo̱.
\v 14 Ngatamajnú xikoó ndí xí nt'ié'eén na̱'mii̱, jmí tsi bo̱a̱ ts'én ku̱i̱ndyionjnú xikoó ngas'e̱ kji'a nga kji̱e̱ yajínjnú Néná nga taxkiya kini'ánkjatjosónjnúu̱ ni xi kamámejénjnú kini'ánjnú.
\v 15 Tasá tsjie ts'en ti̱ndyiónjnú, xikó ts'én tsjie kui xi tsíchji̱a̱jnú.
\v 16 Nga̱t'a̱ je kjit'a xo̱jo̱n eén Néná nínga bi tsoó: “Tsjie ngatamajnú jún, nga̱t'a̱ tsjie an.”
\p
\v 17 Kó nga “Na̱'mi” ndyi̱'míjnúu̱ kui Néná xi ta són ts'énjo̱ xtaa̱ nga tsáyá tsi nda ko̱jo tsi ndajín ni xi kats'én, chjiénga xcha̱ndíkónjnú ngatsjé ni̱xtjin nga ku̱i̱ṉtsomajnú kui nga̱sondiee̱.
\v 18 Nga̱t'a̱ je yajnú nga Néná íchjítjéjnú tsi̱'e̱ nga ka̱mandéjnú kjo̱a̱a̱ kui kjo̱a̱mindyion taxkiya xi kis'iejnú xi íjñájnú xta̱ xi xchájnú, kó nga ka'naxié'ájnú jún jmí tsi ni xi fotson xi kamáchjíní, xikoó tsi to̱nsinié ko̱jo tsi to̱ntiboa.
\v 19 Tasá jiín Kristoo̱ xi kini'ánchjién kuí xí 'niú chjí ngasenii̱. Kristoo̱ kui boá xi xikoó ngo cho̱tsa̱nga̱ xi nda ko̱jo xi onjiín.
\v 20 Néná índa ndeskande koó nguindiee̱ nga kamánda nga̱sondiee̱ nga bo̱a̱ kji'i ni xi ka̱maa̱, tanga kui ni̱xtjin xi kjifet'aa̱ tjibóko tangat'anii̱ nganda tsa̱jún.
\v 21 Kó tangat'anii̱ Kristoo̱ nga jún s'ijinjnú Néná, kui Néná xi kats'énkja'á'yaá Kristoo̱ ngu̱i̱jii̱n xta̱ xi je jesoón kó katsjaá kjo̱a̱je, tsi̱'e̱ nga s'i̱jinjnú ko̱jo ka̱ma'niátakónjnú Néná.
\p
\v 22 Ngot'e̱ 'ne̱ nga je kini'ántsjiejnú yojojnú tangat'anii̱ nga kanda'yá'énjnúu̱ én xí ja̱koxi̱i̱ kó nga je tjó ja̱koxi̱jnú xingu̱i̱jnú xikoó tsi ṉts'iéjnú. Ngayeje ini̱ma̱jnú 'niú ti'antjójnú ja̱ k'i̱e̱ ja̱ ngaján xingu̱i̱jnú.
\v 23 Nga̱t'a̱ jún je katsen nguiníjnú, kó ngot'e̱ jmí tsi xta̱ xi fesón xi katsennijnú, eén Néná xi kats'éntsen nguiníjnú, kui én xi fejiín, nga̱t'a̱ tikón ta kji'ánií.
\v 24 Nga̱t'a̱ bi tsó xo̱jo̱n eén Néná:
\q Ngayeje xta̱ xi tjín nga̱sondiee̱ xikónií ngo k'ijñá,
\q kó ngayeje kjo̱a̱jee̱ xtaa̱ xikónií ngo naxoó kui k'ijñaá.
\q Xí k'ijñaá, kó 'bókanguí naxoó.
\q
\v 25 Tanga eén Ndi̱a̱ná, tikón ta kji'ánií.
\m Kó kui eén, kui boá kui éntjatsi̱e̱e̱ Néná xi je ik'íni̱jmijnú.
\c 2
\p
\v 1 Kuíni nga chjiénga chja̱'áxínjnúu̱ yojojnú ngayeje to̱ko̱ya ni xi ndajín, ngayeje kjo̱a̱maña, kjo̱a̱jókje̱n, ko̱jo kjo̱a̱'ontakón, ko̱jo ngayeje to̱ko̱ya énya.
\v 2 Ngatamajnú xikoó ndí xi s'e̱ katsen xi mamejeén ndáchíkií na̱aa̱, bo̱a̱ ts'én ngatamamejénjnú eén Néná, xikoó xi mejeén k'uí tsjén xí kui soboá, tsi̱'e̱ nga nda ts'én ka̱maxchájnú kó kjo̱tjo'a kjin kjinjnú,
\v 3 nga̱t'a̱ je kichit'ajnú kóts'en nga nda ts'énjo̱ná Ndi̱a̱ná.
\s Bi ts'én íni̱jmi Peé nga Jesukristoo̱ xí xikoó ngo ndi̱jo̱ xi 'niú chjínií kamá
\p
\v 4 Kristoo̱ boá xi xikoó ngo ndi̱jo̱ xi tikón xi kats'énch'ó xtaa̱, tanga Néná xikoó ngo ndi̱jo̱ xi je katjo'ójin xi achichí chjínií máa kui, kó nga ndyi̱ni'ántiñat'ajnúu̱ yojojnú Kristoo̱,
\v 5 ko̱jo jún kjimajnú xikoó ndi̱jo̱ xi síndo tikón, kó Néná boá xi iskjinink'ajnú xikoó ngo na̱ngo̱xi̱ xi jmí tsi kui nga̱sondiee̱ chji̱a̱ni, bo̱a̱ ts'en nga jún boá xi kini'ánjnú xikoó chiná'mi tsjiee̱ Néná, xi ts'énk'ás'ieén kjo̱a̱tjó xi tsja maa̱ Néná ngat'aa̱ Jesukristoo̱.
\v 6 Nga̱t'a̱ bi tsó xo̱jo̱n eén Néná:
\q Jé'e̱n k'i̱e̱ k'uijñá an nangui Sio̱n ngo ndi̱jo̱ xi ja'ajin an xi 'niú chjínií,
\q kuí ndi̱jo̱o̱ xi s'i̱tjats'ennii̱ ndi'aa̱,
\q kó xi sa̱'íns'ijin kui ndi̱jo̱o̱, jmí kjo̱a̱soboá ko̱e̱'éjiín.
\m
\v 7 Jún xi je s'ijinjnú Ndi̱a̱ná, achichí chjínií majnú jún, tanga xta̱ xi s'ijinjiín kui, ki̱a̱ boá nga fotjosón ni xi tsó xo̱jo̱n eén Néná:
\q Kui ndi̱jo̱ xi kats'énch'ó já chji̱ni̱e̱xo̱ó,
\q kui boá xi ndi̱jo̱ xi s'i̱tjats'ennii̱ ndi'aa̱ kamá.
\m
\v 8 Ko̱jo ti bi ti tsó nga:
\q Kui boá kui ndi̱jo̱o̱, ngo ndi̱jo̱ xi stinguí xtaa̱.
\m Kó k'o̱jmi nga sti̱nguí xtaa̱ nga̱t'a̱ tsint'ié'énjín kui eén, nga̱t'a̱ je bo̱a̱ ts'én tikón nga bo̱a̱ ka̱ma.
\s Bi ts'én íni̱jmi Peé kjo̱a̱a̱ xta̱ xi je xta̱ na̱xi̱ńdaá Néná je kamá
\p
\v 9 Tanga jún boá xi xta̱ tji̱e̱ xi je kachja'ájii̱n, jún boá xi chiná'mi xi ndyi̱ts'enseén kui Ree̱ xi botixómá ndi'ak'ajmi ján, jún boá xi xta̱ na̱xi̱ńdá tsjie, jún boá xi xta̱ na̱xi̱ńdá xi je tsi̱'e̱ Néná, tsi̱'e̱ nga jún xi ko̱ndókjo̱a̱jnú ni nda xi kats'én Néná, kui Néná xi tsíchji̱a̱jnú tsi̱'e̱ nga jatjojnú nínga jñoó kó ikitjas'i̱e̱njnú nínga ts'entsíjen kjo̱a̱jee̱ ndi'ií.
\v 10 Jún xi kje̱'e ni̱xtjin nde ngo xta̱ na̱xi̱ńdá kamájínjnú, tanga ngot'e̱ 'ne̱ xta̱ na̱xi̱ńdaá Néná boá jún. Néná ni̱ma̱jín kamaá jún ngas'e̱, tanga ngot'e̱ 'ne̱ Néná ni̱ma̱ máa jún.
\s Bi ts'én íni̱jmi Peé tsi̱'e̱ nga ku̱i̱ndyionjnú xikoó xta̱ xi mosoo̱ Néná
\p
\v 11 Jún ṉts'ie xi tjóna, 'niú mí'ájnú'un xikoó xta̱ xi xín nangui ko̱jo xikoó xta̱ xi ndyi̱foa'a kui nga̱sondiee̱, nga ngata̱ boe'éjínjnúu̱ ngu̱i̱ndie ni nga̱sondie xi mejeén ini̱ma̱jnú, nga̱t'a̱ kuí nii̱ xi sa̱'ínchajajnú,
\v 12 nda ti'ánjnú xikó ts'én tindyiónjnú ngu̱i̱jii̱n xta̱ xi bejín Néná, bo̱a̱ ti'ánjnú nda tsi kui xtaa̱ ngot'e̱ ndajín ts'én chji̱a̱ kjo̱a̱a̱ jún, tanga nga sku̱i̱e̱ ni nda xi ndyi̱ni'ánjnú, sa̱'íntsjaá Néná ni̱xtjin nga Néná sa̱'ínjo̱ xki̱ ngayeje xtaa̱.
\p
\v 13 Tangat'anii̱ nga Ndi̱a̱ná ndokjo̱a̱nijnú, cha̱ndikónjnú ngayeje xta̱xá xi chji̱a̱ni kui nga̱sondiee̱, xikoó nda̱ ree̱ xi 'niú nk'a xaá,
\v 14 ko̱jo xtitjón xi tsanguiya kui ree̱ xi ts'énjeé xta̱ xi ndajín ts'eén, kó nda ts'én chji̱a̱ kjo̱a̱a̱ xta̱ xi nda ts'eén.
\v 15 Nga̱t'a̱ kuí nii̱ xi mejeén Néná: Kji'a nga nda si̱'ánjnú, kji'a boá nga kjókjojnú ts'oa xta̱ xi bejín Néná kó makjínjiín ni xi tsi̱'e̱.
\p
\v 16 Xta̱ ndéjnú nguindyi̱ko̱n Néná, tanga ngata̱ kuijín kjo̱a̱ndeé ni'ánkjiénjnú tsi̱'e̱ nga si̱'ánjnú ngo ni xi ndajín kji'i, tasá ti̱ndyiónjnú xikoó xta̱ xi mosoo̱ Néná.
\v 17 Cha̱ndikónjnú ngayeje xta̱. Ti'antjójnú ngayeje ṉts'ié ko̱jo ndichjá. Ngatamandikónjnú Néná. Cha̱ndikónjnú nda̱ Ree̱.
\s Bi ts'én íni̱jmi Peé ni xi chjiénga sa̱'ín moso̱ xi kastiñaá
\p
\v 18 Jún xi moso̱ xi kastiñájnú, cha̱ndikónjnú xta̱ xi ndi̱a̱jnú kó nda'yá'énjnúu̱, jmí tsi ta kuí tsi xi ndaxtaa̱ ko̱jo xi makjiín, bo̱a̱ ti ti'anjo̱jnú kui ndi̱a̱ xi ndajín ts'énjo̱jnú nga.
\v 19 Nga̱t'a̱ nda ts'én tikón nguindyi̱ko̱n Néná nga ts'enchíkjo̱a̱ kjo̱a̱ni̱ma̱ xi foa'ajin kui moso̱ xi kastiñaá, nda tsi chjiénjín nga kui nii̱ kjo̱a̱'ajin, tanga chíkjo̱a̱rií nga̱t'a̱ je be nga Néná chji̱a̱ni.
\v 20 Nga̱t'a̱ ¿mí ni xi 'niú je kjimajnú, tsi kji'a nga ndajín si̱'ánjnú ndi̱a̱jnú sa̱'ínjéjnú, kó xchikjoajnú? Tanga tsi ni xi nda ndyi̱ni'ánjnú kó ku̱i̱tjatiojnú kjo̱a̱ni̱ma̱ kó tsi xchikjoajnú, ja̱koxi̱ nga kui nii̱ xi nda nguindyi̱ko̱n Néná.
\v 21 Nga̱t'a̱ tangat'anií kui nii̱ nga Néná tsíchji̱a̱nijnú, nga̱t'a̱ bo̱a̱ ti ts'én Kristoo̱ ja'atio kjo̱a̱ni̱ma̱ tangat'anii̱ jún, kó íjñájnú ngo chi̱bo̱a̱ tsi̱'e̱ nga konguíntji̱nguíjnú chi̱bo̱a̱ se.
\v 22 Kristoo̱ ngojín jé kats'én, ti nde jmí ni̱xtjin tjín xí ts'aṉcha̱jo nga tsíchji̱a̱,
\v 23 kui xi kji'a nga ch'o ki'mií, jmí ni ch'o katsójín, kó kji'a nga kini'ánkja'atio kjo̱a̱ni̱ma̱, indyiándikónjín, tasá ngu̱i̱ya tsja Néná kis'ijñaya, kui Néná xi kixi̱ tsáyá tsi nda ko̱jo tsi ndajín ndyi̱ts'en xtaa̱.
\v 24 Kuí Kristoo̱ xi kijíjo̱ jéná ngu̱i̱jin yojoo̱ ki̱a̱ t'a kroo̱, tsi̱'e̱ nga ñá ko̱ya kjo̱a̱a̱ jé xi kini'án, kó ku̱i̱ndyión kjo̱a̱a̱ kjo̱a̱kixi̱i̱. Kó tangat'anii̱ nga kini'án'oón Kristoo̱ nga jún je kamándayajnú.
\v 25 Nga̱t'a̱ jún ngas'e̱ kis'iṉtso̱majnú xikoó cho̱tsa̱nga̱ xi kichajá, tanga ngot'e̱ 'ne̱ je je'echon nguiníjnú Kristoo̱, nda̱ xi kondajnú kui xi xikoó nda̱ xi konda cho̱tsa̱nga̱a̱.
\c 3
\s Bi ts'én íni̱jmi Peé xikó ts'én chjiénga k'uíndojo̱ xkjín xta̱ xi je ixaán
\p
\v 1 Bo̱a̱ ti ts'én ndatsa jún ínchjín xi je ikixánjnú, cha̱ndikónjnú xi̱'injnú, tsi̱'e̱ nga kui xi̱'in xi s'ijinjiín Néná, sa̱'íns'ijin kó nde jmí én ka̱machjiénjiín, nga̱t'a̱ nda ndyi̱ni'ánjnú jún,
\v 2 kó sku̱i̱e̱ nga nda ndyi̱monguínjo̱jnú yojojnú ko̱jo nga ndyi̱yandikonjnú Néná.
\v 3 Nga kuijín ni xi tsjats'én ts'énbónda yojojnú xtji̱e̱e̱n ndi̱tsen xi chjiénga ku̱i̱ndyi̱sejnú, xikoó nga ndikón ts'én ko̱sijee̱n tsja̱jnú, xikoó nga x'i̱a̱jnú ni to̱nsinié ko̱jo tsi ṉjño xi 'niú chjí xcha̱jajnú.
\v 4 Tasá ngu̱i̱jii̱n ini̱ma̱jnú ngat'íjñaá ngo kjo̱a̱fonda xi kjo̱tsonjín nga k'uiéjnú ngo a̱sién ni̱xtjin xi nda ko̱jo xi xió. Kuí kjo̱a̱tsjakji'ii̱ xi 'niú chjínií nguindyi̱ko̱n Néná.
\v 5 Nga̱t'a̱ bi ts'én yínda yojoo̱ kui ínchjín tsjie xi askoyaá Néná ni̱xtjin xchá ján, nga kamábendikón xi̱'ii̱n,
\v 6 xikoó na̱ Saraa̱ nga tsint'ié'eén Abraa̱m, kó “ndi̱a̱na” katsoó. Jún boá xi ndí ínchjiín na̱ Saraa̱, tsi nda kji'i ni xi ndyi̱ni'ánjnú ko̱jo tsi ko̱ndakonjínjnú ni xi ka̱mata'injnú.
\p
\v 7 Kó jún xi xi̱'injnú, ti bo̱a̱ ti ts'én ngat'iéjnú kjo̱a̱kjíntakón nga nda ts'én ku̱i̱ndyionjo̱jnú chjónjnú, cha̱ndikónjnú nga̱t'a̱ ínchjiín jmí tsi bo̱a̱ ts'en 'niú xikoó jún, nga̱t'a̱ ngo chjoón ngo xi̱'in xi je síndojo̱ xkjín, nijan sa̱kórií kjo̱a̱ndaa̱ kjo̱a̱mindyion xi tsjá Néná, tsi̱'e̱ nga jmí ni sa̱'ínni'ínjiín nga ku̱i̱chji̱a̱a̱ Néná.
\s Bi ts'én íni̱jmi Peé kjo̱a̱a̱ xikó ts'én chjiénga ku̱i̱ndyión
\p
\v 8 Kó nga fet'a, ngayejejnú tsjats'én tindyionjinjnúu̱ xingu̱i̱jnú, tasíko̱jojnú xingu̱i̱jnú, tjó ti'ánjnú xingu̱i̱jnú xikoó tsi ngo ṉts'iéjnú, ndaxta̱ ko̱jo ni̱ma̱kjo̱a̱ ngatamajnú.
\v 9 Tsi ngo xta̱ xi ndajín kji'i ni xi kats'énjo̱jnú, ngata̱ ni'ánngojojínjnú, kó ti tsi tjín xi ch'o ka̱tso̱jnú, ngata̱ ch'ojín 'míjnú ndatsa jún nga, tasá chji̱a̱'ajnúu̱ Néná nga sa̱'ínchikonñé, nga̱t'a̱ je yajnú nga Néná tsíchji̱a̱nijnú tsi̱'e̱ nga sa̱kójnú kjo̱a̱ni'ánchikonñeé kui.
\v 10 Nga̱t'a̱ bi tsó xo̱jo̱n eén Néná:
\q Xi mejeén tjó sa̱'ín kjo̱a̱mindyioo̱n,
\q kó mejeén sku̱i̱e̱ ni̱xtjin xi nda,
\q nga koo̱n naje̱n nga ch'ojín ts'én ku̱i̱chji̱a̱,
\q kó nga koo̱n ts'oa nga jmí én ndiso ku̱i̱chji̱a̱jín.
\q
\v 11 Ngatangaa̱ ni xi ndajiín, kó ni xi ndaa̱ xi nga ts'én,
\q ngatangase kjo̱a̱xioó kó kui nii̱ xi ngatjítji̱ngui.
\q
\v 12 Nga̱t'a̱ Ndi̱a̱ná koo̱n xta̱ xi kixii̱,
\q kó nda bosienníjoón nga chji̱a̱ kui xtaa̱,
\q tanga kje̱n Ndi̱a̱ná kondra̱ tikónnii̱ xta̱ xi ndajín ndyi̱ts'e̱én.
\s Bi ts'én íni̱jmi Peé kjo̱a̱a̱ xikó ts'én kjójintakón kji'a nga kjo̱a̱ni̱ma̱ ku̱i̱tjatió
\p
\v 13 ¿'Yá xi ndajín kji'i ni xi sa̱'ínjo̱jnú, tsi ngongá ni xi ndaa̱ xi ndyi̱ni'ánjnú jún?
\v 14 Tanga nda tsi kjo̱a̱ni̱ma̱ ku̱i̱tjatiojnú tangat'anii̱ kjo̱a̱kixi̱i̱, achichí ra tsjajnú nga bo̱a̱ ka̱majnú. Kuíni nga ngata̱ 'yájín xi mindyiandikónjnú, ti nde ngata̱ nda̱jín majnú jún.
\v 15 Tasá cha̱ndikónjnú Kristoo̱ ngu̱i̱jii̱n ini̱ma̱jnú nga kui xi Ndi̱a̱jnú ma, kó ngatsjé ni̱xtjin ti̱ndyiondajnú nga ka̱majnú k'uiyájnúu̱ nga tjín xi ko̱síyajnú ngo ni kjo̱a̱a̱ kui kjo̱a̱chiyá xi tjínjnú jún.
\v 16 Tanga ngat'iéjnú kjo̱a̱ni̱ma̱kjo̱a̱ ko̱jo kjo̱a̱yandikón nga bo̱a̱ si̱'ánjnú. Ti̱'ánjnú kui nii̱ nga nda ts'én k'uijñá kjo̱a̱kjíntakónjnú nguindyi̱ko̱n Néná, ki̱a̱ ka̱maa̱ nga kui xta̱ xi ndyi̱chji̱a̱ta'ínjnú xi ndyi̱tsó nga ndajínjnú xta̱, soboá ka̱maa̱ nga sku̱i̱e̱ nga nda ndyi̱ni'ánjnú nga̱t'a̱ s'ijinjnú Kristoo̱.
\v 17 Tasá nda tsi kjo̱a̱ni̱ma̱ ku̱i̱tjatiojnú nga ni xi ndaa̱ xi si̱'ánjnú, tsi Néná xí bo̱a̱ ts'én mejeén, ta bo̱a̱jiín tsi kjo̱a̱ni̱ma̱ ku̱i̱tjatiojnú nga ni xi ndajiín xi si̱'ánjnú.
\p
\v 18 Nga̱t'a̱ Kristoo̱ ti bo̱a̱ ti ts'én ja'atio kjo̱a̱ni̱ma̱ kó ta ngo tsi ndi̱ya k'ien nga kats'énkjié jeé xtaa̱. Nda̱ xi kixii̱, xta̱ xi kixi̱jiín k'ientjé, tsi̱'e̱ nga kjo̱joná nguindyi̱ko̱n Néná. Nga ja̱koxi̱ kini'ánk'ién nga xta̱, tanga kini'ánkja'á'yaá nga a̱sién ni̱xtjii̱n.
\v 19 Kó nga a̱sién ni̱xtjin kijí nga kijík'ini̱jmi̱í a̱sién ni̱xtjin xi síndo'yá'niuú,
\v 20 kui xi tsint'ié'énjín ni̱xtjin nga kis'ijña Noée̱, kji'a nga Néná askoyá sakon sakoo̱n nga sa̱'ínk'oyá yojoo̱ xtaa̱ tji̱e̱nga kjimanda tjotso jee̱. Jin ma xta̱ xi jatjo'aa̱ yojoo̱ nga jesón ngándájín ngu̱i̱jin ndójoaa̱.
\v 21 Kuí ndójoaa̱ xi akó tjón tjón xikó ts'én ts'axié'ájnú ndójoaa̱, nga̱t'a̱ kji'a nga satíndá ngu̱i̱jin ndójoaa̱ fotjo'a ñá tangat'anií nga ja'á'yaá Jesukristoo̱. Kjo̱a̱botíndaá jmí tsi kui xi ts'éntsjie yojoná, tasá tsi̱'e̱ nga ndyi̱mindyisé nga nda k'uijñá kjo̱a̱kjíntakónná nguindyi̱ko̱n Néná.
\v 22 Jesukristoo̱ kijínijínguí ndi'ak'ajmi ján kó ki̱a̱ tikón nga fojnií Néná, kó kui boá xi ts'énbotixómaá ndítsjiee̱ ko̱jo a̱sién ni̱xtjin xi tjiín xá ko̱jo nga'niuú.
\c 4
\s Bi ts'én íni̱jmi Peé kjo̱a̱a̱ ni xi nguiti si̱'ánjín ñá
\p
\v 1 Xikó ts'én Kristoo̱ ja'atio kjo̱a̱ni̱ma̱ nga kini'án'oón yojoo̱, ti bo̱a̱ ti ts'en tjajintakónjnú nga ko̱e̱'énga'niújnúu̱ yojojnú, nga̱t'a̱ xta̱ xi ja'atio kjo̱a̱ni̱ma̱ nga kini'án'oón yojoo̱, je íjñámasien jeé,
\v 2 tsi̱'e̱ nga xikó kji'i ni̱xtjin xi chaja ngasee̱ nga k'uijñá nga̱sondiee̱, k'uijñá xikó ts'én mejeén Néná kó jmí tsi xikó ts'én mejeén kjo̱a̱ni'ánkjoó xtaa̱.
\v 3 Je ja'a ni̱xtjin xikó ts'én kixindyionjnú ngas'e̱, kji'a nga kini'ánjnú ni xi tsja máa xta̱ xi s'ijinjiín Néná, nga kini'ánjnú ni xi ndajín, ko̱jo ni xi ndajín xi mejeén yojojnú, ko̱jo kjo̱a̱ch'i̱, ko̱jo nga ch'o kini'ánjo̱xtinjnú yojo ndikónjnú, ko̱jo nga ikitjatjónjnúu̱ nga kini'ánjnú s'ué, ko̱jo nga kini'ántsjajnúu̱ a̱sie̱én ne xi ts'énda xtaa̱ kui xi achichí ch'okoón.
\v 4 Tanga ngot'e̱ 'ne̱ nga nguiti ndyi̱ni'án kamajo̱jínjnú kui xta̱ xi ndyi̱ts'en ni xi ndajiín, kuíni nga ta bi ta máa kó ch'otsójnú,
\v 5 tanga kui xtaa̱, chjiénga ki̱a̱ kjo̱chótsjaá xki̱ kui xi je tikóndaa̱ nga ko̱tso̱ya tsi nda ko̱jo tsi ndajín kats'én xta̱ xi síndo ko̱jo xi je jesoón.
\v 6 Nga̱t'a̱ kuíni nga ngaskande xta̱ xi je jesón ngot'e̱ ik'íni̱jmi̱í kui éntjatsi̱e̱e̱ Néná, tsi̱'e̱ nga nguije Néná katsáyá tsi nda ko̱jo tsi ndajín kats'én nga kis'iṉdo nga̱sondie, k'uíndo nga a̱sién ni̱xtjin xikó ts'én mejeén Néná nga k'uíndo.
\s Bi ts'én íni̱jmi Peé kjo̱a̱a̱ nga nda si̱'anxájo̱ ni xi katsjáná Néná
\p
\v 7 Je kjimatiñaa̱ nga kju̱i̱e̱ ngayeje ni xi tjiín, kuíni nga nda ts'én ti'ankjójnú nga ndokjo̱a̱jnúu̱ Néná kó nda chónjnúu̱ nga si̱'ánjnú kui nii̱.
\v 8 Tsie kjo̱a̱tjó ngat'iéjnú ngu̱i̱jinjnú, nga̱t'a̱ kjo̱a̱tjoó achichí jé sa̱'ínkjié.
\v 9 Ja̱ k'i̱e̱ ja̱ ngaján te'éndiéjnúu̱ nga k'uíndo ndi'ajnú xingu̱i̱jnú, kó tsja ngat'iéjnú nga bo̱a̱ si̱'ánjnú.
\v 10 Nga ngo nga ngojnú xi tjínjnú ngo kjo̱a̱nda xi katsjájnú Néná, ti'ankjiénjnú kui nii̱ ngandaa̱ xta̱ xi ngasee̱, bo̱a̱ ti'ánjnú xikoó xta̱ xi nda ts'énxájo̱ ngayeje to̱ko̱ya kjo̱a̱nda xi tsjá Néná ngandaa̱ xta̱ xi ngasee̱.
\v 11 Tsi tjín xi ku̱i̱chji̱a̱, ngatíchji̱a̱ én xi ts'éntsjaá Néná nga ku̱i̱chji̱a̱. Tsi tjín xi ko̱síko̱jo xtaa̱, bo̱a̱ nga ts'én xikó kji'i nga'niú xi ts'éntsjaá Néná, tsi̱'e̱ nga Néná ko̱e̱'eé kjo̱a̱je kjo̱a̱a̱ ngayeje nii̱ ngat'aa̱ Jesukristoo̱, kuí xí tsi̱'e̱ ngayeje kjo̱a̱jee̱ ko̱jo ngayeje nga'niuú ngatsjé ni̱xtjin. Bo̱a̱ kji'i.
\s Bi ts'én íni̱jmi Peé kjo̱a̱a̱ nga 'niú ku̱i̱ndyiajin ñá ni xi tsi̱'e̱ Kristoo̱
\p
\v 12 Jún ṉts'ie xi tjóna, ngata̱ fíndikónjínjnú kjo̱a̱a̱ kjo̱a̱chjat'ayákón xi ndyi̱bitjajinjnú, xikoó tsi ngo ni xi yajínjnú ka̱majnú.
\v 13 Tasá tsja ngatamajnú nga ko̱jo jún ku̱i̱tjatiojnú kjo̱a̱ni̱ma̱ xi ja'atio Kristoo̱, tsi̱'e̱ nga tsja ka̱majnú kji'a nga kji̱ndi̱bá nguiní Kristoo̱ nga ko̱kó kjo̱a̱jee̱.
\v 14 Achichí ra tsjajnú tsi ch'o tjí'míjnú tangat'anii̱ nga Kristoo̱ timatji̱nguijnú, nga̱t'a̱ A̱sién Ni̱xtjii̱n Néná xi tjiín kjo̱a̱jee̱ ngatsjé ni̱xtjin nga ki̱a̱ tikónjo̱jnú jún.
\v 15 Nga ngojín jún xi ku̱i̱tjatiojnú kjo̱a̱ni̱ma̱ tangat'anii̱ nga ini̱ma̱ sa̱'ínk'ién, ko̱jo tsi kjo̱a̱a̱ nga sa̱'ínchéjé, ko̱jo tsi kjo̱a̱a̱ nga ndajín xta̱, ko̱jo tsi kjo̱a̱a̱ nga ni xi tsi̱'e̱jín xi skongájin,
\v 16 tanga tsi ngo jún xi si̱'ankja'atio kjo̱a̱ni̱ma̱ kjo̱a̱a̱ nga Kristoo̱ chji̱a̱ni, ngata̱ soboájín máa, tasá nga tsjaá kjo̱a̱je Néná kjo̱a̱a̱ kui nii̱.
\p
\v 17 Je jachó chi̱bo̱a̱ nga Néná ku̱i̱'ítsi̱yanii̱ nga ko̱tso̱ya tsi nda ko̱jo tsi ndajín kats'én xta̱ xi tsi̱'e̱, kó tsi ñá tjón ku̱i̱'ítsi̱yanii̱ nga bo̱a̱ kats'én, ¿kókji'i ni xi ka̱maa̱ xta̱ xi nt'ié'énjiín éntjatsi̱e̱e̱ Néná?
\v 18 Kó tsi ni'in kjo̱tjo'a xta̱ xi kixii̱, ¿kókji'i ni xi ka̱maa̱ xta̱ xi bendikónjín Néná ko̱jo xi ndyi̱ts'enjeé?
\v 19 Kó kuíni nga xi ndyi̱foa'atio kjo̱a̱ni̱ma̱ nga̱t'a̱ bo̱a̱ ts'én kamámejeén Néná, ngats'énk'ás'iee̱n ini̱ma̱a̱ Néná nga nda sa̱'ín, nga̱t'a̱ kui boá Néná xi 'niátakón ñá nga kats'énda ngayeje nii̱.
\c 5
\s Bi ts'én íni̱jmi Peé xikó ts'én xchoón xta̱ na̱ngo̱xi̱i̱ Néná
\p
\v 1 Xta̱ xi xchá an ngu̱i̱jii̱n xta̱ na̱ngo̱xi̱i̱, kó chistiko̱ an kjo̱a̱a̱ kjo̱a̱ni̱ma̱ xi ja'ajin Kristoo̱, ko̱jo nga be an nga ti sa̱kó chiína kjo̱a̱je xi s'e̱ s'i̱jñatsijee̱n, kuíni nga 'niú mí'áa̱ xta̱ xi xchaá na̱ngo̱xi̱i̱ xi síndojinjnú nga bi xiáan.
\v 2 Chónjnú xta̱ na̱ngo̱xi̱i̱ xi Néná kats'énk'indajnú xikoó ngo nda̱ xi koo̱n cho̱tsa̱nga̱, chónjnú, kó jmí tsi kjo̱a̱'niú nga bo̱a̱ si̱'ánjnú, tasá ngayeje takónjnú xikó ts'én mejeén Néná, jmí tsi kjo̱a̱a̱ kjo̱a̱xkéto̱n, tasá kjo̱a̱a̱ nga tsja majnú nga ni'ánjnú kui xaá.
\v 3 Ngata̱ tajájín ni'ánjo̱jnú xikoó tsi jún xi ndi̱a̱a̱ kui xta̱ xi ndyi̱chonjnú, tasá takójnúu̱ ngo chi̱bo̱a̱ xi nda xikó ts'én k'uíndo xta̱ xi tsi̱'e̱ Néná.
\v 4 Kó bo̱a̱ ts'én kji'a nga kji̱ndi̱bá nda̱ xi 'niú nk'a xaá xi koo̱n cho̱tsa̱nga̱a̱, jún sa̱kójnú chjií kjo̱a̱je xi jmí ni̱xtjin fotsoo̱n.
\p
\v 5 Kó ti ts'en mí'ájnú'un jún xi xo̱ngojnú nga cha̱ndikónjnú xta̱ xi xchaá, kó ngayejejnú ja̱ k'i̱e̱ ja̱ ngaján ni̱ma̱kjo̱a̱ ngatamajnú, nga̱t'a̱ bi tsó xo̱jo̱n eén Néná:
\q Néná kondra̱ tikónnii̱ xta̱ xi je 'boxié yojoo̱,
\q kó tsjaá kjo̱a̱nda xta̱ xi ni̱ma̱kjo̱a̱ síndo.
\m
\v 6 Kuíni nga ni̱ma̱kjo̱a̱ ti̱'ánjnú yojojnú nguindie nga'niú jee̱ Néná, tsi̱'e̱ nga kui skinínk'ájnú kji'a ma nga kjo̱chó chi̱bo̱a̱.
\v 7 Ngayeje ni xi nda̱jnú, Néná t'íjñájnúu̱, nga̱t'a̱ kuí xí ts'énkoón jún.
\p
\v 8 Nda ti'ankjójnú ni xi si̱'ánjnú, kó ti̱ndyiondajnú, nga̱t'a̱ kondra̱jnú kui xi xindajín diabloo̱, tso'bá xikó maá ngo xandi̱je̱ xi tamá, nga ts'énmongase 'yání xi sa̱'ínk'ién nga skji̱ni̱e̱.
\v 9 Kondra̱ ti̱ndyiónjnúu̱ kui xindajiín nga 'niú si̱'ans'ijinjnú Néná, nga̱t'a̱ je yajnú nga ngayeje nga̱sondiee̱ ṉts'ié ko̱jo ndichjá ti bo̱a̱ ti ts'én ndyi̱foa'atio kjo̱a̱ni̱ma̱ kjo̱a̱a̱ ti kuii̱ ni xi ndyi̱bitjatiójnú jún.
\v 10 Kó nguije ikitjatiójnú chií kjo̱a̱ni̱ma̱ chiboa ni̱xtjin, kui Néná xi tsi̱'e̱ ngayeje kjo̱a̱ndaa̱, kui xi Jesukristoo̱ kats'énkjién nga tsíchji̱a̱ná tsi̱'e̱ nga sa̱kóná kjo̱a̱je xi fejiín, kui nga ts'én xi chjiénga ka̱majnú, nga tsjanga'niújnú, 'niú ngat'ijñájnú, ko̱jo ngatsjandiéjín nga jó nga ján k'uijñaá ini̱ma̱jnú.
\v 11 Néná xí Na̱'mii̱ kui tsi̱'e̱ ngatama kjo̱a̱jee̱ ngatsjé ni̱xtjin. Bo̱a̱ kji'i.
\s Peé bi ts'én kats'énkjiet'a xo̱jo̱o̱n
\p
\v 12 Silbanoo̱ kui nda̱ xi ngo nda̱ ṉts'ié xi tanisién 'niátakón an asíko̱jona nga kats'endajnú'un kui xo̱jo̱o̱n. Chiboa ma ni xi it'ajnú'un nga ts'énbotixomájnú'un kó ts'énxiya kixi̱jnú'un nga ni xi tjít'a k'i̱e̱e̱ kui boá xi kjo̱a̱ndaa̱ Néná. 'Niú tindyionjinjnú kui nii̱.
\p
\v 13 Tinde xó bo̱a̱ tsó xtaa̱ na̱ngo̱xi̱ xi tikón Babilonia̱ kui xi Néná ja'ájin xikoó jún. Ko̱jo tinde xó bo̱a̱ tsó Markoo̱ kui xi ndína xiáa̱n.
\v 14 Ti'antindejnú ja̱ k'i̱e̱ ja̱ ngaján xingu̱i̱jnú.
\p Ngat'iéjnú kjo̱a̱xió ngayejejnú xi ndokjo̱a̱nijnú Kristoo̱.