\id 2PE - MAZATECO DE SAN PEDRO IXCATLÁN
\h 2 XO̱JO̱O̱N PEÉ
\mt1 Xo̱jo̱n xi ma jó xi kats'én'indó apostro̱ Peé
\c 1
\s Bi ts'én kats'éntinde Peé xta̱ na̱ngo̱xi̱i̱
\p
\v 1 An Ximo̱ Peé, nda̱ moso̱ ko̱jo nda̱ apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱, ts'entindejnú'un jún xta̱ xi je kasakojnú ngo kjo̱a̱s'ijin xi bo̱a̱ ts'én chjínií xikoó xi tsa̱ji̱n, tangat'anii̱ kjo̱a̱kixi̱i̱ Jesukristoo̱, kui xi Néná xi ts'axié'áná.
\v 2 Ngatama tsie kjo̱a̱nda ko̱jo kjo̱a̱xió xi k'uiéjnú nga xcha̱jnú Néná ko̱jo Ndi̱a̱ná Kjisoo̱.
\s Bi ts'én íni̱jmi Peé kjo̱a̱a̱ xikó ts'én chjiénga k'uíndo xta̱ xi tsi̱'e̱ Néná
\p
\v 3 Néná kats'énkjién nga'niuú nga katsjáná ngayeje ni xi chjiénná kó takó ts'éntsjáná tsi̱'e̱ nga ku̱i̱ndyión xikó ts'én mejeén kui, kó katsjáná ngayeje kui nii̱ kji'a nga kamáya Jesukristoo̱. Nga̱t'a̱ nga tsíchji̱a̱ná, bo̱a̱ kats'én tsi̱'e̱ nga ki̱a̱ ko̱ndókjo̱a̱ ñá nínga botixómá kui.
\v 4 Kó ti katsjáná kjo̱a̱nda xi chjínií ko̱jo xi tsjakon xi katsáyatjón nga tsja̱aná. Tangat'anii̱ kui nii̱ nga jún ka̱ma ku̱i̱ndyionjnú xikó ts'én tikón Néná, nga je ikiyojnúu̱ ni xi ndajín xi chji̱a̱ni kui nga̱sondiee̱, kui ni xi mejeén ini̱ma̱a̱ kui xtaa̱.
\v 5 Kuíni nga chjiénga si̱'ánjnú ngo kjo̱a̱'niú tsi̱'e̱ nga kjo̱a̱s'ijinjnú tjasonjnúu̱ nga nda si̱'ánjnú. Kó kui kjo̱a̱ndani'aán, tjasonjnúu̱ kjo̱a̱kjíntakón.
\v 6 Kó kui kjo̱a̱kjíntakoón, tjasonjnúu̱ nga kamá'niújnú yojojnú. Kó kui kjo̱a̱a̱ nga ma 'niújnú yojojnú, tjasonjnúu̱ kjo̱a̱chiyákjo̱a̱. Kó kui kjo̱a̱chiyákjo̱a̱a̱, tjasonjnúu̱ nga si̱'andíkónjnú Néná.
\v 7 Kó kui kjo̱a̱yandikoón Néná, tjasonjnúu̱ nga tjó si̱'ánjnú xingu̱i̱jnú xikoó tsi ṉts'iéjnú, kó kui kjo̱a̱a̱ nga ni'ántjó xingu̱i̱jnú xikoó tsi ṉts'ié, tjasonjnúu̱ ngase kjo̱a̱tjó.
\p
\v 8 Nga̱t'a̱ tsi bo̱a̱ ndyi̱ni'ánjnú kó tsi 'niú tikónjinjnú kui nii̱, nda si̱'ánjnú ni xi si̱'ánjnú, kó kjo̱a̱a̱ nga je yajnú Ndi̱a̱ná Jesukristoo̱ tsi'éjín ka̱majnú.
\v 9 Tanga xta̱ xi ts'énjín kui nii̱, xikónií ngo xta̱ xi ti̱ka̱ ko̱jo xi kjinjín be, nga̱t'a̱ je kichíyaá nga kini'ántsjie jé xi kats'én ngas'e̱.
\v 10 Kuíni ṉts'ie, nga Néná je tsíchji̱a̱jnú ko̱jo nga je ja'ájinjnú, chónjnú nga kui nii̱ 'niú k'uíjinjnú, nga̱t'a̱ tsi bo̱a̱ si̱'ánjnú jmí ni̱xtjin k'o̱kajnú nguindie ján.
\v 11 Nga̱t'a̱ bo̱a̱ ts'én nga tsjats'én ko̱e̱'éndiéjnú nga ku̱i̱tjás'i̱e̱njnú ngu̱i̱ndie nínga botixómá ngatsjé ni̱xtjin Ndi̱a̱ná kui xi ts'axié'áná, kui xi Jesukristoo̱.
\s Bi ts'én íni̱jmi Peé mí kjo̱a̱a̱ nga takó ts'énbokoyaá xta̱ na̱ngo̱xi̱i̱
\p
\v 12 Kuíni nga ngatsjé ni̱xtjin sa̱'inkja'átsjienjnú'un ni xi tjíts'en'indójnú'un, nda tsi je yajnú kó nda tsi 'niú tindyiajnú ngu̱i̱yaa̱ ja̱koxi̱ xi je akakoyájnú.
\v 13 Kuí nii̱ xi kixi̱ kjimana, tji̱e̱nga tikón an ngu̱i̱jii̱n kui yojoo̱ nga tjínna ngo kjo̱a̱'niú nga kotixomajnú'un.
\v 14 Je be an nga ngui chiboa ni̱xtjin tikónna nga k'uijñá masien an kui yojoo, xikó katsóna Ndi̱a̱ná Jesukristoo̱.
\v 15 Kó ti sa̱'in an ngo kjo̱a̱'niú tsi̱'e̱ nga nguije k'ien an ngatsjé ni̱xtjin kjo̱a̱'átsjienjnú kui ni xi'bi̱.
\p
\v 16 Kji'a nga ki'míyajne̱ nga kji̱ndi̱bá nguiní Ndi̱a̱ná Jesukristoo̱ nga kjo̱e̱'éjo̱ nga'niuú, jmí tsi én xchá maña̱ xi ta kini'ánda xí tsanguintjinguijne̱, tasá ki'míyajne̱ nga̱t'a̱ ji̱n ma xi kamáyajne̱ nga'niuú Ndi̱a̱ná.
\v 17 Nga̱t'a̱ kji'a nga Jesukristoo̱ iskjíbé kjo̱a̱yandikón ko̱jo kjo̱a̱je xi katsjaá Néná xí Na̱'mii̱, kananguiyaa̱ ngo nda̱ xi kanda'yá xi tjiín kjo̱a̱je xi bi katsó: “Kuí xi'bi̱ xi ndí tjóna, 'niú tsjatjínna kjo̱a̱a̱ kui.”
\v 18 Kó ji̱n ma xi kanda'yájne̱ kui nda̱ xi kjindibáni ndi'ak'ajmi ján, kji'a nga tindyionjo̱jne̱ Jesukristoo̱ ki̱a̱ tji̱ngu̱i̱ nínga kamá kui kjo̱a̱ndikoón.
\p
\v 19 Kó bo̱a̱ ts'én nga jatjo kixi̱ én xí tsíchji̱a̱ já chji̱ni̱e̱'e̱én Néná. Nda ndyi̱ni'ánjnú tsi ndyi̱bosiénnijonjnúu̱ kui eén, nga̱t'a̱ kui boá xi kjima xikoó ngo ndi'í xí ts'entsíjen nga jñoó, ngaskande nga sisi̱én nga kamánguindyiojón kó ṉño tsiee̱ kjo̱tjo tsi̱'e̱ nga sa̱'íntsijee̱n ini̱ma̱jnú.
\v 20 Tjón ngatamakjínjnú kui nii̱, nga ngojín én xí Néná tsáyá xi kjit'a kui xo̱jo̱n eén Néná xi ka̱ma si̱'ankjién xikó ts'én mejénná ñá.
\v 21 Nga̱t'a̱ én xí katsáyá Néná jmí tsi xta̱ nga̱sondiee̱ kjindibánii̱, tasá já chji̱ni̱e̱'e̱én Néná xi tsíchji̱a̱ eén Néná, nga̱t'a̱ A̱sién Ni̱xtjii̱n Néná boá xi kats'énkíchji̱a̱ én xí Néná kjindibánii̱.
\c 2
\s Bi ts'én íni̱jmi Peé kjo̱a̱a̱ ni xi ts'en já mostro̱ ndiso xi síndojin ngu̱i̱jii̱n xta̱ na̱ngo̱xi̱i̱
\r (Xo̱jo̱o̱n Judaa̱ 3-13)
\p
\v 1 Ngu̱i̱jii̱n xta̱ judíoo̱ kis'ie já chji̱ni̱e̱'én ndiso xi ts'aṉcha̱, kó ti bo̱a̱ ti ts'én k'uié mostro̱ xi k'o̱ṉcha̱ ngu̱i̱jii̱n jún. Kui jaá kui boá xi 'ma 'ma ko̱kóyajnú kje̱'e ni xi sa̱'ínkjatsónjnú. Sa̱'ínkiejín yojoo̱ kjo̱a̱a̱ kui Ndi̱a̱ná xi ts'axié'á. Kuí nii̱ xi sa̱'ín nga kui xtaa̱ tsá si̱'ankjie.
\v 2 Achichí ka̱ma xta̱ xi ko̱e̱je̱tji̱nguii̱ ni xi ndajín xi tsjá kjo̱a̱soboá xi kats'én kui jaá, kó kuí nii̱ xi sa̱'ín nga ch'o ts'én ko̱ndókjo̱a̱ kjo̱a̱a̱ ndi̱ya xí ja̱koxi̱i̱.
\v 3 Kó tangat'anii̱ kjo̱a̱xkétoo̱n nga ko̱kóya ni ndiso tsi̱'e̱ nga k'o̱xiéjnú to̱n. Tanga Néná je bo̱a̱ katsó nga tsá sa̱'ínkjié, kó kuí kjo̱a̱ni'ánkjieé je tsá ndibá.
\p
\v 4 Ngas'e̱ Néná kats'énjetakónjiín ndítsjie xi kats'énjeé, kó tasá ki̱a̱ ts'ajmijin ndo̱bo̱a̱ ṉk'i̱e̱e̱n nga índo nínga tikón ndo̱bo̱a̱ya xi jñoó, ngaskande ni̱xtjin nga Néná ko̱tso̱ya tsi nda ko̱jo tsi ndajín kji'i ni xi kats'én xtaa̱.
\v 5 Kó Néná ti kats'énjetakónjiín xta̱ xi kis'iṉdo ni̱xtjii̱n Noée̱, tasá katsanguiyaa̱ stsé 'niú kó ngayejee̱ nga jesón. Néná ts'axié'á Noée̱, nda̱ xi akóyaá xtaa̱ nga kixi̱ ts'én k'uíndo, kó jatjo'a Noée̱ ko̱jo ngui yito xta̱.
\v 6 Néná ti kats'énjeé nga kats'énkjié na̱xi̱ńdá Sodoma̱ ko̱jo Gomorra̱, kó ítí ngaskande nga ndiso kamá, tsi̱'e̱ nga kui nii̱ xi chi̱bo̱a̱ kamaá xta̱ xi bendikónjín Néná.
\v 7 Tanga ts'axié'á Lo̱t, nda̱ xi kixii̱, kui xi on kamaá nga kamábe nga kui xta̱ xi ndajiín kats'én tajmí niní.
\v 8 Nga̱t'a̱ kui nda̱ kixii̱ ki̱a̱ kis'ijña kui na̱xi̱ńdaá, kó achichí on kamaá ini̱ma̱ kixii̱ nga kamábe ko̱jo nga tsint'ié ni xi ndajín xi kats'én kui xtaa̱.
\v 9 Ngayeje kui nii̱ xi bokó nga Ndi̱a̱ná marií 'boxiéjin ngu̱i̱jii̱n kjo̱a̱chjat'ayákón xi 'beé xta̱ xi bendikón Néná, kó ti tjínrií nga'niú nga ko̱tíjeé xta̱ xi kixi̱jiín nga kjo̱chó ni̱xtjin nga Néná ko̱tso̱ya tsi nda ko̱jo tsi ndajín kji'i ni xi kats'én xtaa̱.
\p
\v 10 Ngase ma ni xi ka̱maa̱ xta̱ xi ni xi mejeén yojoo̱ ndyi̱ts'en ko̱jo xi ni xi ndándí xi mejeén ini̱ma̱a̱ ndyi̱ts'en ko̱jo xi ndyi̱ts'ench'ó xi tjiín xá ndi'ak'ajmi ján.
\p Ndasenjiín kó ta ni xi mejénrií xi ndyi̱ts'en, kó tsakjónjín ma nga ch'o ndyi̱tsoó nga'niú xi 'niú nk'aá.
\v 11 Kó nda tsi ndítsjiee̱ tjín ngasee̱ nga'niú ko̱jo xá, majín kon nga ch'o ka̱tso̱o̱ kui já mostro̱ ndisoo̱ nga ko̱tíjétá'ín nguindyi̱ko̱n Ndi̱a̱ná.
\p
\v 12 Tanga kui jaá, ch'o ts'én chji̱a̱ kjo̱a̱a̱ ni xi makjínjiín, xikónií cho̱ xi ts'énkjójín kui xi ta tjimá tsi tsi̱'e̱ nga ko̱ndo̱bo̱a̱ ko̱jo si̱'ank'ien. Kuíni nga ko̱ya kui jaá tangat'anii̱ ni xi ndajín xi ndyi̱ts'en.
\v 13 Sa̱kó nguinií chjií ni xi kixi̱jín xi ndyi̱ts'en. S'ijinrií nga tsjakji'i ni xi ndyi̱ts'en nga ndyi̱tsja̱á kjo̱a̱tsja ini̱ma̱a̱ kjo̱a̱a̱ ni xi ndyi̱ts'en nga ni̱xtjii̱n. Ni xi tanisién ndajín boá kui nii̱ ko̱jo ni xi ts'éndándíná. Kó ngaskande tsja máa̱ kjo̱a̱a̱ ni xi ndajín xi ndyi̱ts'en kji'a nga nda ndyi̱kjinie ṉño̱ nga síndojinjnú.
\p
\v 14 Nde majín nda be ngo na̱ nga ja̱ kamá ts'énkjó nga sa̱'íntsjajo̱, jmí ni̱xtjin fenda nga ndyi̱ts'en jé, 'boṉcha̱jo xta̱ xi kji̱e̱ 'niújín ndyi̱a̱, achichí kjo̱a̱xkéto̱n tjíjin ini̱ma̱a̱, xta̱ xi 'niú ndajín boá nguindyi̱ko̱n Néná.
\v 15 Je íjñámasien ndi̱ya xí kixii̱, kó je kichajá nga bo̱a̱ ndyi̱ts'en xikoó nda̱ xi 'mí Balaa̱m, ndií Beoo̱r, kui xi to̱n kamámejeén kó kats'én ni xi kixi̱jiín.
\v 16 Kó kini'ánxchánjo̱ tangat'anii̱ jeé. Ngo bórró, cho̱ ch'ia xi majiín chji̱a̱, tsíchji̱a̱jo Balaa̱m xikó ts'én chji̱a̱ ngo xta̱, kó íchjaá tsi̱'e̱ nga nguiti kats'énjín kui kjo̱a̱tsabeé.
\p
\v 17 Kui já xi ndyi̱'boṉchaa̱ xikónií ndańch'i xi je kixíyá ko̱jo xikónií ṉdi̱ xi taxkiya fíjo̱ tjo̱o̱. Néná je íjñandaa̱ ngo ngu̱i̱ndie nínga 'niú jñó tsi̱'e̱ nga ki̱a̱ k'uíndo.
\v 18 Nga̱t'a̱ achichí nk'a chji̱a̱ tanga én xi jmí ni chjíjiín boá xi chji̱a̱. 'Boṉcha̱jo xtaa̱ tsi̱'e̱ nga sa̱'ín ni xi ndajínts'eén ko̱jo ni xi ndajín xi mejeén yojoo̱, kó 'boṉcha̱jo xta̱ xi s'e̱ tsi ndyi̱ts'en ngo kjo̱a̱'niú nga ndyi̱mongaa̱ ni xi ndajiín xi ni'aán.
\v 19 Bo̱a̱ ndyi̱tsoó xtaa̱ nga s'i̱ṉdondé, kó kuí síndo xikoó moso̱ xi kastiñaá ni xi fotsoo̱n. Nga̱t'a̱ ngayeje ni xi ts'énná xi ts'enchajáná, kuí nii̱ xi 'bíndo'niúná.
\v 20 Tsi je ya ñá nga Jesukristoo̱ xi Ndi̱a̱ná ko̱jo nga kui xi ts'axié'áná, kó tsi kuíni nga je ikiyóo̱ ni xi ndándií kui nga̱sondiee̱, kó tsi ti bo̱a̱ ti si̱'an nguiní ñá xikó kini'án ngas'e̱, kó tsi kui nii̱ xi ti sa̱'ín nguiníná nga sa̱'ínchajaná, bo̱a̱ ts'én nga ch'o ngase ts'én ku̱i̱ndyión ta bo̱a̱jiín ngas'e̱.
\v 21 Nga̱t'a̱ tasá ra nda tsi kamábejín kui jaá ndi̱ya xí kixii̱, ta bo̱a̱jiín tsi nguije kamábe, xín sa̱'ínkja'aa̱ yojoo̱ kui kjo̱a̱botíxoma tsjie xi je katse'eé.
\v 22 Tanga kui jaá je bo̱a̱ kamaá xikó tsó kui én xchá xí ja̱koxi̱i̱: “Ńñaá kjinie nguiní ni xi fosoó, kó chi̱nga̱ xi je tsjiee̱ fí ts'én ndáse nguiní yojoo̱ ngu̱i̱jin ndásee̱.”
\c 3
\s Bi ts'én íni̱jmi Peé kjo̱a̱a̱ ni̱xtjin nga kji̱ndi̱bá nguiní Ndi̱a̱ná
\p
\v 1 Jún ṉts'ie xi tjóna, kuí bí xi ma jó xo̱jo̱n xi kats'endajnú'un, kó nga jó kui xo̱jo̱o̱n nga ts'enkja'átsjienjnú'un ni xi je akoyájnú'un tsi̱'e̱ nga kixi̱ ts'én k'uijñá kjo̱a̱kjíntakónjnú nguindyi̱ko̱n Néná.
\v 2 Ngatja'átsjienjnú ni xi katsó já chji̱ni̱e̱'én tsjiee̱ Néná ngas'e̱, ko̱jo kjo̱a̱botíxoma xi akóyájnú já apostroo̱ kjo̱a̱a̱ Ndi̱a̱ná Jesukristoo̱ kui xi ts'axié'áná.
\p
\v 3 Tjón kui nii̱ xi 'niú tjajintakónjnú, nga ni̱xtjin xi kju̱i̱e̱t'aa̱, k'uié xta̱ xi k'uíndo xikó ts'én mejeén ini̱ma̱a̱ nga k'uíndo, kó ko̱jno̱kie ni xi je akakoyájnú,
\v 4 kó bi ka̱tso̱ nga ko̱síya: “¿Ánní nga jatjosónjín ni xi ki'mí nga kji̱ndi̱bá nguiní Kristoo̱? Nga̱t'a̱ ndeskande nga jesón xta̱ tji̱e̱ xcháná, ngaskande ngot'e̱ takó bo̱a̱ ts'én síndo nii̱, xikoó nga ítjats'ennii̱ nga kamánda kui nga̱sondiee̱.”
\v 5 Kui xtaa̱ ngayeje kon nga mejénjiín sku̱i̱e̱ nga ndeskande koó ngas'e̱ nga tangat'anii̱ eén Néná nga kamánda ndi'ak'ajmii̱ ko̱jo t'ananguii̱, kui t'anangui xi kis'ijñaa̱ xi ngu̱i̱jin ndójoaa̱ kjindibánii̱.
\v 6 Nga̱t'a̱ ndójoaa̱ kui stsé 'niú xi tsa'aa̱ kini'ánkjiéni xta̱ xi kis'iṉdo kui ni̱xtjin ján.
\v 7 Tanga kui ndi'ak'ajmi ko̱jo t'anangui xi síndo ngot'ee̱, tangat'anii̱ kui eén Néná nga, nga je síndondani tsi̱'e̱ nga ndi'í sa̱'ínkjié nga kjo̱chó ni̱xtjin nga Néná ko̱tso̱ya tsi nda ko̱jo tsi ndajín kji'i ni xi kats'én xtaa̱, kó kji'a boá nga kju̱i̱e̱ xta̱ xi bendikónjín Néná nga.
\p
\v 8 Jún ṉts'ie xi tjóna, mejénna nga xcha̱jnú nga Ndi̱a̱ná nga ngo ni̱xtjin xikónií tsi ngo mi̱ nó máa kui, kó nga ngo mi̱ nó xikónií tsi ngo ni̱xtjin máa kui.
\v 9 Ndi̱a̱ná ts'énk'andíyájiín nga sa̱'ínkjatjosón ni xi katsáyatjón nga sa̱'ín, xikó ts'én bee̱ kon kjín xta̱ nga ts'énk'andíyá. Tasá koyakjo̱a̱jnú nga̱t'a̱ mejénjiín nga tjín xi xcha̱ja, tasá mejeén nga ngayeje xtaa̱ sa̱'ínk'oyá yojoo̱.
\p
\v 10 Tanga nga kjo̱e̱'e Ndi̱a̱ná xikónií tsi ngo chejé xi foe'e nga jñoó nga kjo̱e̱'e, kó kui ni̱xtjii̱n ndi'ak'ajmii̱ achichí 'niú kjo̱ni̱e̱ nga kju̱i̱e̱, kó ngayeje nii̱ ndi'í si̱'ankjieni, kó t'ananguii̱ ko̱jo ngayeje ni xi tjiín, ku̱i̱ti.
\p
\v 11 Kó nga ngayeje kui nii̱ bo̱a̱ ts'én kju̱i̱e̱, ¿a chjiénjín nga tsjie ts'en ku̱i̱ndyionjnú ko̱jo nga xcha̱ndíkónjnú Néná,
\v 12 kó nga si̱'anmejénjnú nga kjo̱chó ni̱xtjin nga sa̱'ín Néná ni xi katsó nga sa̱'ín? Kui ni̱xtjii̱n ndi'ak'ajmii̱ kju̱i̱e̱ kó ngayeje ni xi tjiín ka̱mańdá nga ku̱i̱ti.
\v 13 Tanga ñá ndyi̱chiyáa̱ ndi'ak'ajmi tja̱tsi̱e̱e̱ ko̱jo t'anangui tja̱tsi̱e̱e̱, xikó ts'én katsáyatjónná Néná, ki̱a̱ nínga kixi̱ ku̱i̱ndyión.
\p
\v 14 Kuíni nga jún ṉts'ie xi tjóna, tji̱e̱nga ndyi̱chiyájnúu̱ nga kjo̱e̱'e Ndi̱a̱ná, ti'ánjnú ngo kjo̱a̱'niú tsi̱'e̱ nga k'uiéjnú kjo̱a̱xió nguindyi̱ko̱n Néná, ko̱jo nga jmí kjo̱a̱ndándí k'uiéjínjnú ko̱jo nga jmíjín xi ka̱maa̱ ch'o ts'én ku̱i̱chji̱a̱ta'injnú.
\v 15 Kó ngatamakjínjnú nga kui kjo̱a̱chiyákjo̱a̱ xi tjiín Ndi̱a̱ná, tsi̱'e̱ nga kjo̱tjo'a ñá boá, xikó ts'én nda̱ ṉts'ie xi tjóná xi 'mí Pabloo̱, ít'ajnú xo̱jo̱n, xikó kji'i kjo̱a̱kjínkón xi katsjaá Néná.
\v 16 Nga ngo nga ngo xo̱jo̱n xi katsanguiya Pabloo̱ katsáyájnú kjo̱a̱a̱ kui nii̱, nda tsi tjín nii̱ xi ni'in makjínná. Kuíni nga xta̱ xi ndajín makjiín ko̱jo xi 'niújín síndojin kjo̱a̱s'ijii̱n kje̱'e ts'én 'bijñaá ni xi je tjít'a kui xo̱jo̱n. Bo̱a̱ ti ts'eén ni xi ngase xi kjit'a xo̱jo̱n eén Néná nga, kó bo̱a̱ ts'én nga ti kuii̱ ndyi̱ts'enkjí yojoo̱ nínga xcha̱ja.
\s Peé bi ts'én kats'énkjiet'a xo̱jo̱o̱n
\p
\v 17 Kuíni nga jún ṉts'ie xi tjóna, nga je yajnú jún kui nii̱, chónjnú yojojnú tsi̱'e̱ nga takó 'niú k'uijñá kjo̱a̱a̱ nga s'ijinjnú Néná kó nga k'o̱ṉcha̱jojínjnú xta̱ xi 'niú ndajiín nga skjiénjnú
\v 18 Tasá 'niú tanguíntjinguíjnú kjo̱a̱ndaa̱ ko̱jo nga nda xcha̱ ngasejnú Ndi̱a̱ná Jesukristoo̱, kui xi ts'axié'áná. ¡Kui boá xi ngot'e̱ ko̱jo ta kji'ání nga ngas'iee̱ kjo̱a̱je! Bo̱a̱ kji'i.