\id 1JN - MAZATECO DE SAN PEDRO IXCATLÁN
\h 1 XO̱JO̱O̱N JUAA̱
\mt1 Xo̱jo̱n xi tjón xi kats'én'indó apostro̱ Juaa̱
\c 1
\s Bi ts'én íni̱jmi Juaa̱ kjo̱a̱a̱ 'yání xi Eén kjo̱a̱mindyioo̱n
\p
\v 1 Ndyi̱'bíni̱jmijne̱ jún kjo̱a̱a̱ kui xi tikón ndeskande koó nga íts'i̱yanii̱ nii̱, kui xi je kanda'yájne̱ nga tsíchji̱a̱jojne̱, ko̱jo kui xi ndyikón ma ji̱n xi je kamábe, kui xi je kamáya cha̱n cha̱n ji̱n, ko̱jo kui xi ndsa̱ ma ji̱n xi je kats'énjo̱. Kui boá xi Én xí tikoón kui xi tsjaá kjo̱a̱mindyion xtaa̱.
\v 2 Kui kjo̱a̱mindyioo̱n xi je akakoo̱ xtaa̱ kó ji̱n ma xi kamáya ji̱n kó chistiko̱ ji̱n, kó ndyi̱'bíni̱jmijne̱ kjo̱a̱a̱ kui kjo̱a̱mindyion ngatsjé ni̱xtjii̱n, kui xi tikónjii̱n Na̱'mii̱ kó je akakoná.
\v 3 Kuí xí je kamáya ji̱n ko̱jo kuí xí je kanda'yá ji̱n xi ndyi̱'bíni̱jmijne̱ jún, tsi̱'e̱ nga jún ko̱jo ji̱n ngo ka̱ma ñá. Kó bo̱a̱ ts'én nga ja̱koxi̱ nga ñá je kini'ángojo̱ yojoná Na̱'mii̱ ko̱jo Jesukristoo̱, kui xi ndií ma.
\v 4 Kó kui nii̱ xi ndyi̱'bít'ajne̱ xo̱jo̱n tsi̱'e̱ nga ka̱ma ndo̱jo kjo̱a̱tsjaná.
\s Bi ts'én íni̱jmi Juaa̱ kjo̱a̱a̱ nga ni xi ni'án boá xi bokó tsi s'ijinná Néná
\p
\v 5 Kuí bí kui én xi je kanda'yájne̱ nga akóyájne̱ Jesukristoo̱, kó kuí xí ndyi̱'bíni̱jmijne̱ nga Néná boá kui ndi'í xi ts'entsíjenná kó nga kui jmíjiín nínga jñó.
\v 6 Tsi ndyi̱'mí nga je kini'ángo yojoná ñá ko̱jo Néná, kó tsi takó nínga jñoó tindyión nga ndyi̱ni'ánjé, ndyi̱'bindisó ñá, kó jmí tsi ni xi ja̱koxi̱i̱ xi ndyi̱ni'án.
\v 7 Tanga tsi nínga tikón ndi'í xí ts'entsíjee̱n tima, xikó ts'én Néná tikón nínga tikón ndi'í xí ts'entsíjee̱n, kji'a boá nga ja̱ k'i̱e̱ ja̱ ngaján ndyi̱ni'ángo yojoná, kó jiín Jesukristoo̱ ts'éntsjiejón ngayeje jéná.
\p
\v 8 Tsi jmí jéjínná tsi k'uín, ti ñání xi ndyi̱ch'íṉcha̱jó yojoná kó jmíjínná ja̱koxi̱i̱.
\v 9 Tanga tsi ndyi̱ni'ánkié yojoná nga tjínná jé, ka̱ma ka̱ma'niátakón ñá nga kixi̱ Néná tsi̱'e̱ nga sa̱'ínjetakón jéná ko̱jo nga sa̱'íntsjiejónná ngayeje ni xi ndajín xi tikónjinná.
\v 10 Kó tsi ndyi̱'mí nga kji̱e̱ ni'ánjéján, xikónií tsi ndyi̱'naxié ndiso Néná, kó ja̱ kji̱e̱ tikónjinjínná kui én xi tikoón tsobo̱a̱.
\c 2
\p
\v 1 Jún ndí ndí tsa'a̱n, kui nii̱ tjíts'en'indójnú'un tsi̱'e̱ nga si̱'anjéjínjnú, tanga tsi tjín xí kats'énjé, tikónná ngo nda̱ xi k'o̱xié'aná nguindyi̱ko̱n Na̱'mii̱, kó Jesukristoo̱ nda̱ xi kixii̱ boá.
\v 2 Jesukristoo̱ boá xi katsjá yojoo̱ xikoó ngo kjo̱a̱tjó nga ja'atio kjo̱a̱ni̱ma̱ tangat'anii̱ nga íchjítjé jéná ñá xi je kis'ijinná Néná. Kó jmí tsi ta jéná tsi, ko̱jo jeé ngayeje xta̱ xi tjín nga̱sondiee̱ boá nga.
\p
\v 3 Tsi ndyi̱ni'ánkjatjosón kjo̱a̱botíxomaa̱ Néná, kuí nii̱ xi bokó nga je ya Néná.
\v 4 Kui xta̱ xi: “Je be an kui” tsó, kó tsi ts'enkjátjosónjín kjo̱a̱botíxomaa̱, ndiso kuí xtaa̱, kó jmíjiín ni xi ja̱koxi̱i̱.
\v 5 Tanga kui xta̱ xi ts'enkjátjosón eén Néná, kui boá xi ja̱koxi̱ nga ts'éntjó Néná xikó ts'én chjiénga sa̱'íntjó, kó kui nii̱ xi bokó nga je tindyionjíi̱n Néná.
\v 6 Kui xta̱ xi tsó nga je tikónjii̱n Néná, chjiénga bo̱a̱ ts'én ko̱e̱je̱tji̱ngui xikó kats'én Jesukristoo̱.
\s Juaa̱ bi ts'én atíxomaa̱ xta̱ na̱ngo̱xi̱i̱
\p
\v 7 Jún ndí ṉts'ie, jmí tsi ngo kjo̱a̱botíxoma tja̱tsi̱e̱ xi tjíts'en'indójnú'un. Ni xi tjíts'en'indójnú'un kui boá kjo̱a̱botíxoma xchá xi kis'iejnú ndeskande koó nga ítjats'ennii̱ nii̱. Kui kjo̱a̱botíxoma xchaá kui boá kui én xi tikón xi je kanda'yájnú ndeskande koó ngas'e̱.
\v 8 Tanga tikónrií ngo ni xi tja̱tsi̱e̱ kui kjo̱a̱botíxoma xi tjíts'en'indójnú'un, nga̱t'a̱ xikó kats'en Kristoo̱ ko̱jo xikó ts'én tindyiónjnú jún tjiyá nga ja̱koxi̱ boá kui kjo̱a̱botíxomaa̱. Kjo̱a̱jñoó ni xi ndajín ni'aán je tjichája, kó je tjíts'éntsíjen ndi'í xí ja̱koxi̱i̱.
\p
\v 9 Xta̱ xi bo̱a̱ ka̱tso̱ nga nínga tikón ndi'í xí ts'entsíjee̱n tikón, tanga tsi ch'oo̱ xta̱ xi ngasee̱, takó nínga jñoó boá nínga tikón.
\v 10 Kui xta̱ xi tjoó xta̱ xi ngasee̱, nínga tikón ndi'í xí ts'entsíjee̱n boá nínga tikón, kó bo̱a̱ ts'én nga nde ngojín ni xi 'boṉcha̱jo nga ts'énjé.
\v 11 Tanga xi ch'oo̱ xta̱ xi ngasee̱, ngu̱i̱jin nínga jñoó boá nínga tikón, kó nínga jñoó boá nínga tso'bá, kó nde bejín nínga ts'énfí, nga̱t'a̱ kui kjo̱a̱jñoó je kats'énti̱ka̱.
\p
\v 12 Jún ndí ndí tsa'a̱n, tjíts'en'indójnú'un kui xo̱jo̱o̱n jún nga̱t'a̱ tangat'aa̱ ni xi kats'én Jesukristoo̱ nga je kini'ánjetakoón jéjnú.
\v 13 Jún xi xi xchájnú, tjíts'en'indójnú'un kui xo̱jo̱o̱n jún nga̱t'a̱ je kamáyajnú kui xi ja̱ bo̱a̱ tikón ndeskande koó nga ítjats'ennii̱ nii̱. Jún xi xo̱ngojnú, tjíts'en'indójnú'un kui xo̱jo̱o̱n jún nga̱t'a̱ je kini'ánjnúu̱ nga kini'ánchajajnú xindajiín.
\p Tjíts'en'indójnú'un kui xo̱jo̱o̱n jún xi ndí ndína jún, nga̱t'a̱ je kamáyajnú Na̱'mii̱.
\v 14 Tjíts'en'indójnú'un jún xi xi xchájnú, nga̱t'a̱ je kamáyajnú kui xi takó tikón ndeskande koó nga ítjats'ennii̱ nii̱. Tjíts'en'indójnú'un kui xo̱jo̱o̱n jún xi xo̱ngojnú, nga̱t'a̱ tjínjnú nga'niú kó eén Néná je tikónjinjnú, nga̱t'a̱ je kini'ánjnúu̱ nga kini'ánchajajnú xindajiín.
\p
\v 15 Ngata̱ ni'ántjójínjnú ni xi ndajín xi tjiín kui nga̱sondiee̱, ko̱jo ni xi ni'án xi ndajín xi tjiín nga. Tsi tjín xi ts'én kuí nii̱, tikónjinjiín kjo̱a̱tjoó Néná xí Na̱'mii̱.
\v 16 Nga̱t'a̱ ngojín ni xi tjín kuí nga̱sondiee̱ xi Na̱'mii̱ ndibánií, xikoó ni xi ndajín xi mejeén yojoná, ko̱jo ni xi ya xi mejénná si̱'antsa̱ñá, ko̱jo kjo̱a̱nk'atakón xi tsjáná nga ts'atio ni xi machjiénná 'béná. Ngayeje kui nii̱ nga̱sondiee̱ ndibánií.
\v 17 Je kjife kui nga̱sondiee̱ ko̱jo ngayeje ni xi mejeén ini̱ma̱a̱ xtaa̱. Tanga kui xta̱ xi ndyi̱ts'en ni xi mejeén Néná, kuí xí ngatsjé nga ni̱xtjin k'uíndo.
\s Bi ts'én akóyá Juaa̱ nga xchóo̱n yojoná kjo̱a̱a̱ kondraa̱ Kristoo̱
\p
\v 18 Jún ndí ndí tsa'a̱n, kuí bí xi'bi̱ ni̱xtjin xi je kjifet'aa̱, kó jún je kanda'yájnú nga ndibá kondraa̱ Kristoo̱, kó ngot'e̱ achichí je kjín ma kondraa̱ Kristoo̱ xi je jatokjá, kuíni nga je ya ñá nga kuí ni̱xtjii̱n xi je kjifet'aa̱.
\v 19 Kui já boá k'i̱e̱ jatjojinná, tanga nga ja̱koxi̱ xta̱nájín bo̱a̱, nga̱t'a̱ tsi xta̱ná kamá, nijan síndojo̱na tsobo̱a̱, tanga bo̱a̱ kamá tsi̱'e̱ nga xcha̱ cha̱n cha̱n nga tjín xta̱ xi jmí tsi xta̱ xi tsa̱ñá boá.
\p
\v 20 Tanga jún je tikónjnú A̱sién Ni̱xtjii̱n Néná xi katsjájnú Kristoo̱, kó je yajnú ni xi ja̱koxi̱i̱.
\v 21 Tjíts'en'indójnú'un kui xo̱jo̱o̱n, jmí tsi kjo̱a̱a̱ nga yajínjnú ni xi ja̱koxi̱i̱, kjo̱a̱a̱ nga yajnú kuíni nga tjíts'en'indójnú'un, kó jún je yajnú nga nde ngojín kjo̱a̱ndisoo̱ xi ni xi ja̱koxi̱i̱ ndibánií.
\p
\v 22 ¿'Yání xi ndiso? Kui boá xi tsó nga Kjisoo̱jín xó xi Kristoo̱. Kó kui boá xi'ba̱ xi kondraa̱ Kristoo̱, nga̱t'a̱ ts'enjó'ojín Néná xí Na̱'mii̱ ko̱jo ndií.
\v 23 Kó ta 'yání xi ts'enjó'ojín ndií, tikónjinjiín Na̱'mii̱. Tanga ta 'yání xi ko̱tso̱ya nga Kjisoo̱ xi ndií Néná, ti tikónjii̱n Na̱'mii̱ nga.
\p
\v 24 Kuíni nga t'íjñajinjnú ngu̱i̱jin ini̱ma̱jnú kui ni xi je kanda'yájnú jún ndeskande koó ngas'e̱. Kó tsi k'uijñájinjnú kui ni xi je kanda'yájnú ndeskande koó ngas'e̱, ti bo̱a̱ ti ts'én jún ku̱i̱ndyionjinjnúu̱ ndií ko̱jo Na̱'mii̱.
\v 25 Kjo̱a̱mindyion ngatsjé ni̱xtjii̱n boá xi katsáyatjónná Jesukristoo̱ nga tsja̱aná.
\p
\v 26 Kuí nii̱ tjíts'en'indójnú'un kjo̱a̱a̱ kui xta̱ xi mejeén k'o̱ṉcha̱jojnú.
\v 27 Tanga kui A̱sién Ni̱xtjii̱n Néná xi katsjájnú Jesukristoo̱ je tikónjinjnú, kó nde chjiénjín nga tjín xi ko̱kóyajnú, nga̱t'a̱ kui A̱sién Ni̱xtjii̱n kui boá xi bokoyá kjo̱a̱a̱ ngayeje nii̱, kó ja̱koxi̱ boá ni xi bokoyá, jmí tsi kjo̱a̱ndiso. Xikó ts'én je akóyájnú kui A̱sién Ni̱xtjii̱n Néná, bo̱a̱ ts'én tindyionjinjnúu̱ Jesukristoo̱ ngatsjé ni̱xtjin.
\p
\v 28 Kó ngot'e̱ 'ne̱ ndí ndí tsa'a̱n, tindyionjinjnúu̱ Jesukristoo̱, tsi̱'e̱ nga kji'a nga ko̱kó yojoo̱, tji̱e̱nda̱jín ka̱maná nga konguínchóo̱n nguindyi̱ko̱n, kó kjinjín si̱'áa̱n yojoná nga soboá ka̱maná nga kjo̱e̱'e kuí.
\v 29 Tsi je yajnú nga kixi̱ Jesukristoo̱, ja̱ ti chjiénga xcha̱jnú nga ngayeje xta̱ xi ndyi̱ts'en ni xi kixii̱, kui boá xi je ndií Néná.
\c 3
\s Bi ts'én íni̱jmi Juaa̱ nga Néná, ndií kats'énná
\p
\v 1 Tsitsíjenjnúu̱ kókji'i tsie kjo̱a̱tjó xi ts'éntsjáná Néná xí Na̱'mii̱, nga xtaa̱, ndií Néná tsóná ñá, kó ndií Néná boá ñá. Kuíni nga xtaa̱ kui nga̱sondiee̱ bejínná ñá, nga̱t'a̱ kui bejín Néná.
\v 2 Jún ṉts'ie xi tjóna, ngot'e̱ 'ne̱ je ndií Néná ñá, kó nda tsi kji̱e̱ yajín ñá mí ni xi ka̱ma ñá jaskan, je ya ñá nga kji'a nga kjo̱e̱'e Jesukristoo̱ xikó maá kui nga bo̱a̱ kon ka̱ma, nga̱t'a̱ xcha̱ cha̱n cha̱n ñá xikó ma kji'i kui.
\v 3 Kó ngayeje xta̱ xi ndyi̱koyaa̱ kui, ndyi̱ts'entsjie yojoo̱ nguindyi̱ko̱n Néná, xikó ts'én tsjie Jesukristoo̱.
\p
\v 4 Ta'yaní xi tjíts'énjé, ts'énmonganié kjo̱a̱kitii̱ Néná, nga̱t'a̱ nga ni'ánjeé, miyonié kjo̱a̱kitii̱ Néná.
\v 5 Kó jún je yajnú nga Jesukristoo̱ je'e kui nga̱sondiee̱ tsi̱'e̱ nga ja'áxín jéná, kó kui jmí jé kis'iejiín.
\v 6 Kuíni nga ngayeje xta̱ xi je tikónjii̱n Jesukristoo̱, je nguiti ts'énjéjín, tanga ngayeje xta̱ xi ndyi̱ts'enjeé, kji̱e̱ bejín ko̱jo kji̱e̱ makjínjiín 'yání xi Jesukristoo̱.
\v 7 Jún bo̱a̱ ndí ndí tsa'a̱n, ngata̱ ngojín xi 'boṉcha̱jojnú, nga̱t'a̱ xta̱ xi ndyi̱ts'en ni xi kixii̱, kixi̱ tjimá, xikó ts'én kixi̱ Jesukristoo̱.
\v 8 Tanga kui xta̱ xi ndyi̱ts'enjeé, xta̱ xi tsi̱'e̱ xindajín diabloo̱ boá, nga̱t'a̱ xindajiín ndeskande koó nga ítjats'ennii̱ nii̱ nga tjíts'énjé. Kuíni nga jatokjání ndií Néná tsi̱'e̱ nga sa̱'ínkjié ni xi ndajín xi ts'én xindajiín.
\p
\v 9 Ngayeje xta̱ xi Néná je katsjaá nga ndií kui ka̱ma, ngájiín nga ts'énjé, nga̱t'a̱ Néná je íjñajii̱n ngo xojmá, kó kui nguiti majín ts'énjé, nga̱t'a̱ je ndií Néná ma.
\v 10 Bi ts'én nga ya 'yání bo̱a̱ xi ndií Néná kó 'yání bo̱a̱ xi ndií xindajín diabloo̱. Ta'ya xta̱ní xi ts'enkjátjosónjín kjo̱a̱kixi̱i̱ Néná ko̱jo xi tjójiín xta̱ xi ngasee̱, jmí tsi Néná chji̱a̱ni.
\s Bi ts'én akóyá Juaa̱ nga chjiénga tjó si̱'án xingu̱i̱
\p
\v 11 Kuí bí én xi je kanda'yájnú ndeskande koó ngas'e̱. Nga tjó si̱'án ja̱ k'i̱e̱ ja̱ ngaján xingu̱i̱.
\v 12 Jmí tsi bo̱a̱ si̱'án xikoó Kaii̱n nga xindajín tsíchji̱a̱ni kó kats'énk'ién ṉts'i̱e̱. ¿Kó mí kjo̱a̱a̱ nga kats'énk'ién? Nga̱t'a̱ ndajín kji'i ngayeje ni xi kats'én kui, kó kixi̱ kamá ngayeje ni xi kats'én Abe̱ ṉts'i̱e̱.
\p
\v 13 Ndí já ṉts'ie, ngata̱ fíndikónjínjnú tsi xtaa̱ kui nga̱sondiee̱ sa̱'ínch'ójnú.
\v 14 Ñá je ya nga je nguiti ki̱a̱jín tindyionjín kjo̱a̱bo̱yaa̱ nga̱t'a̱ je ngu̱i̱jii̱n kjo̱a̱mindyion xi tsi̱'e̱ Néná je tindyión, nga̱t'a̱ tjóná xta̱ xi ngasee̱. Xi tjójiín xta̱ xi ngasee̱, takó ki̱a̱ tikónjin kjo̱a̱bo̱yaa̱.
\v 15 Ngayeje xta̱ xi ch'oo̱ xta̱ xi ngasee̱, xta̱ xi ts'enk'ién ini̱ma̱ boá xi'ba̱, kó jún je yajnú nga nde ngojín xta̱ xi ts'enk'ién ini̱ma̱ xi k'uieé kjo̱a̱mindyion ngatsjé ni̱xtjii̱n Néná.
\v 16 Kuí nii̱ xi ya ñá kjo̱a̱tjoó, nga Jesukristoo̱ katsjá kjo̱a̱mindyioo̱n tangat'anii̱ ñá, bo̱a̱ ti ts'én ñá chjiénga ko̱e̱'é kjo̱a̱mindyionná tangat'anii̱ xta̱ xi ngasee̱.
\v 17 Ta'ya xta̱ní xi ts'atio nga tjiín ni xi machjieén, kó tsi be nga ngo xta̱ ts'énfoa'atio ngo kjo̱a̱ni̱ma̱ nga chjieén ngo ni, kó tsi ka̱mani̱ma̱jiín nga tsja̱á, ¿a tikónjinrií kjo̱a̱tjoó Néná kui xtaa̱?
\v 18 Jún ndí ndí tsa'a̱n, nga jmí tsi ta én tsi xi ko̱ndókjo̱a̱jnú nga xcha̱ nga tjínjnú kjo̱a̱tjó. Chjiénga ko̱kójnú kjo̱a̱tjójnú kjo̱a̱a̱ ni nda xi ndyi̱ni'ánjnú.
\p
\v 19 Bi ts'én nga ya ñá nga ja̱koxi̱i̱ ndokjo̱a̱ ñá, kó nga 'niú k'uijñá ini̱ma̱ná nguindyi̱ko̱n Néná.
\v 20 Nda tsi ini̱ma̱ná ts'énbonguíta'inná nga tjínná jé, tanga Néná je ngase ta bo̱a̱jiín ini̱ma̱na, kó kuí be ngayeje ni xi kjimaná.
\v 21 Jún ṉts'ie xi tjóna, tsi ini̱ma̱ná ts'énbonguíta'injínná nga tjínná jé, ka̱ma ku̱i̱ndyión nguindyi̱ko̱n Néná nga̱t'a̱ 'niátakón kui.
\v 22 Kó ngayeje ni xi chji̱a̱'áa̱ Néná tsja̱aná, nga̱t'a̱ ndyi̱ni'ánkjatjosón kjo̱a̱botíxomaa̱ kó ndyi̱ni'án ni xi tsja máa kui.
\v 23 Nga si̱'ans'ijin Jesukristo̱ kui xi ndií Néná, ko̱jo nga si̱'antjó ja̱ k'i̱e̱ ja̱ ngaján xingu̱i̱ xikó ts'én íjñá Néná nga si̱'án, kuí bí kui nii̱ xi kjo̱a̱botíxomaa̱ Néná.
\v 24 Xi tjíts'énkjatjosón kjo̱a̱botíxomaa̱ Néná, je tikónjii̱n Néná, kó Néná tikónjii̱n kui, kó kui nii̱ xi ya ñá nga Néná je tikónjinná ñá, ngat'aa̱ kui A̱sién Ni̱xtjin xi je katsjáná.
\c 4
\s Bi ts'én íni̱jmi Juaa̱ kjo̱a̱a̱ 'yání xi A̱sién Ni̱xtjii̱n Néná
\p
\v 1 Jún ṉts'ie xi tjóna, ngata̱ ni'áns'ijinjínjnúu̱ ngayeje xta̱ xi bo̱a̱ ka̱tso̱ nga Néná kats'énkíchji̱a̱, tasá chját'ayákónjnú kui A̱sién Ni̱xtjii̱n tsi tsi̱'e̱ Néná, nga̱t'a̱ achichí ma já chji̱ni̱e̱'én ndiso xi je jatokjá kuí nga̱sondiee̱.
\v 2 Bi ts'én nga ka̱ma xcha̱jnú jún 'yání xi tikoón A̱sién Ni̱xtjii̱n Néná. Ngayeje xta̱ xi tsáyá nga Jesukristoo̱ je'e kui nga̱sondiee̱ nga jín nga yojo, kui boá xi tikónjii̱n A̱sién Ni̱xtjii̱n Néná.
\v 3 Kó kui xta̱ xi ts'enjó'ojín nga Jesukristoo̱ je'e nga jín nga yojo, jmí tsi A̱sién Ni̱xtjii̱n Néná tikónjii̱n, kui boá xi'ba̱ xi tikónjii̱n a̱sién ni̱xtjii̱n kondraa̱ Kristoo̱, kui kondra̱ xi jún je kanda'yájnú nga kji̱ndi̱bá, kó ngot'e̱ 'ne̱ je tikón kui nga̱sondiee̱.
\p
\v 4 Jún ndí ndí tsa'a̱n, Néná ndokjo̱a̱nijnú kó je kini'ánjnúu̱ nga kini'ánchajajnú kui já chji̱ni̱e̱'én ndisoo̱, nga̱t'a̱ kui xi tikónjinjnú tjín ngasee̱ nga'niú ta bo̱a̱jiín kui xi tikónjii̱n xta̱ nga̱sondiee̱.
\v 5 Kui xtaa̱, ni xi ndajiín kui nga̱sondiee̱ chji̱a̱ni, kuíni nga nii̱ nga̱sondiee̱ xi chji̱a̱, kó xta̱ xi chji̱a̱ni ni xi ndajiín kui nga̱sondiee̱ xí nt'ieé.
\v 6 Tanga ji̱n Néná ndokjo̱a̱jne̱, kó kui xta̱ xi je be Néná kui boá xi nt'iéjne̱, tanga kui xta̱ xi Nénájín chji̱a̱ni nt'iéjínjne̱. Bo̱a̱ ts'én nga ka̱ma xcha̱ ñá 'yání xi tikoón a̱sién ni̱xtjin xi ja̱koxi̱i̱, kó 'yání xi tikoón a̱sién ni̱xtjin xi 'boṉchaa̱.
\s Bi ts'én íni̱jmi Juaa̱ kjo̱a̱a̱ mí ni xi ya'anii̱ kjo̱a̱tjoó
\p
\v 7 Jún ndí ṉts'ie xi tjóna, ja̱ k'i̱e̱ ja̱ ngaján si̱'antjó xingu̱i̱, nga̱t'a̱ kjo̱a̱tjoó tsi̱'e̱ Néná boá. Ngayeje xta̱ xi tjiín kjo̱a̱tjó, kui boá xi Néná je katsjaá nga ndií kui ka̱ma, kó kui boá xi be Néná.
\v 8 Xta̱ xi jmíjiín kjo̱a̱tjoó, bejín Néná, nga̱t'a̱ kjo̱a̱tjó boá Néná.
\v 9 Kuí nii̱ xi akó nga Néná tjoó ñá, nga katsanguiya ndí ngototoo̱ kui nga̱sondiee̱, tsi̱'e̱ nga ngat'aa̱ kui ndií nga k'uiéná kjo̱a̱mindyion.
\v 10 ¿Kóts'en akako kjo̱a̱tjoó? Nga jmí tsi ñá xí kini'ántjó Néná, tasá kjo̱a̱a̱ nga Néná xi kats'éntjóná ñá kó katsanguiyaná ndií xikoó ngo kjo̱a̱tjó xi ni'ánk'as'ien tsi̱'e̱ nga kini'ánjetakoón jéná. Kuí ni xi'bi̱ xi akó kjo̱a̱tjoó.
\p
\v 11 Jún ndí ṉts'ie xi tjóna, tsi bo̱a̱ ts'én kats'éntjóná Néná, ti chjiénga ti bo̱a̱ ti ts'én ja̱ k'i̱e̱ ja̱ ngaján si̱'antjó xingu̱i̱.
\v 12 Kji̱e̱ ngo xi je kamábe kókji'i Néná, tanga tsi ja̱ k'i̱e̱ ja̱ ngaján tjóná xingu̱i̱, kji'a boá nga Néná tikónjinná kó kjo̱a̱tjoó kjimando̱jo kjin kjin ngu̱i̱jinná.
\v 13 Nga̱t'a̱ Néná katsjáná A̱sién Ni̱xtjii̱n, kuíni nga ya nga Néná tindyionjíi̱n, kó nga kui tikónjinná ñá.
\v 14 Kó ji̱n je kamáya ji̱n kó chistiko̱ ji̱n nga Néná xí Na̱'mii̱ xi katsanguiya ndií, tsi̱'e̱ nga k'o̱xié'á xta̱ xi tjín kuí nga̱sondiee̱.
\v 15 Ngayeje xta̱ xi ko̱tso̱ya nga Kjisoo̱ xi ndií Néná, Néná tikónjii̱n xi bo̱a̱ ka̱tso̱o̱, kó kui tikónjii̱n Néná.
\p
\v 16 Kó ñá je ya ko̱jo s'ijinná nga Néná tjoó ñá. Kjo̱a̱tjó boá Néná, kó kui xta̱ xi síndo ngu̱i̱jii̱n kjo̱a̱tjoó Néná, Néná tikónjii̱n kui, kó kui tikónjii̱n Néná.
\v 17 Kuí nii̱ xi ya nga kjimando̱jo kjin kjin kjo̱a̱tjoó ngu̱i̱jii̱n ñá, nga ka̱ma'niátakón ni̱xtjin nga k'uiyá tsi nda ko̱jo tsi ndajín kini'án, nga̱t'a̱ bo̱a̱ kon ñá xikoó Jesukristoo̱ kui nga̱sondie xi tindyión.
\v 18 Kjo̱a̱tjoó jmíjiín kjo̱a̱tsiendikón, nga̱t'a̱ kjo̱a̱tjó xi je kamá xi chjiénga ka̱maa̱ 'boxié kjo̱a̱tsiendikoón. Nga̱t'a̱ xi ts'énkoyaa̱ kjo̱a̱botíjeé, ts'éntsakjón, kó kui xta̱ xi ts'éntsakjoón, kji̱e̱ ma ndo̱jo kjin kjinjín kjo̱a̱tjó xi tikónjii̱n.
\p
\v 19 Ñá ndyi̱ni'ántjó Néná, nga̱t'a̱ kuí xí tjón kats'éntjóná ñá.
\v 20 Tsi tjín xi: “tjóna Néná” ka̱tso̱, kó tsi ch'oo̱ xta̱ xi ngasee̱, xta̱ ndiso boá. Nga̱t'a̱ tsi tjójínná xta̱ xi ngasee̱ xi ya kókji'i kje̱n, ¿ja̱ kóts'en ka̱ma tjóná Néná nga yajín ñá kje̱n kui?
\v 21 Xta̱ xi tjoó Néná, chjiénga ti nga ts'éntjó xta̱ xi ngasee̱ nga. Kuí bí kjo̱a̱botíxoma xi je tikónná xi katsjáná Néná.
\c 5
\s Bi ts'én akóyá Juaa̱ ni xi ts'én xi ndií Néná
\p
\v 1 Ngayeje xta̱ xi s'ijii̱n nga Kjisoo̱ xi Kristoo̱, Néná je katsjaá nga ndií kui ka̱ma. Ngayeje xta̱ xi tjoó Néná xí Na̱'mii̱, ti tjoó ngayeje ndií kui Na̱'mii̱ nga.
\v 2 Kji'a nga tjóná Néná ko̱jo kji'a nga ni'ánkjatjosón kjo̱a̱botíxomaa̱, kuí nii̱ xi bokó nga tjóná xta̱ xi je ndií Néná.
\v 3 Nga̱t'a̱ kuí nii̱ xi bokó nga tjóná Néná, kji'a nga si̱'ankjatjosón kjo̱a̱botíxomaa̱. Ni'ínjín ni'ánkjatjosón kjo̱a̱botíxomaa̱ kui.
\v 4 Nga̱t'a̱ ngayeje xta̱ xi Néná je katsjaá nga ndií kui ka̱ma, ts'énrií nga ts'enchája kui nga̱sondiee̱, kó kjo̱a̱s'ijinná boá xi ts'eén nga ts'enchája kui nga̱sondiee̱.
\v 5 Xi s'ijii̱n nga Kjisoo̱ xi ndií Néná, kui boá xi ts'eén nga ts'enchája kui nga̱sondiee̱.
\s Bi ts'én akóyá Juaa̱ kjo̱a̱a̱ xikó ts'én Néná akó Kjisoo̱
\p
\v 6 Ndójoa ko̱jo jín akakoni Jesukristoo̱, kó jmí tsi ta ndójoa tsi, ndójoa ko̱jo jín boá. Kó A̱sién Ni̱xtjii̱n Néná boá xi chistiko̱, nga̱t'a̱ ja̱koxi̱ boá kui A̱sién Ni̱xtjii̱n.
\v 7 Ján ma xi chistikoo̱,
\v 8 kó nga jaán nga ndse̱je̱n ma. A̱sién Ni̱xtjii̱n, ndójoaa̱ ko̱jo jiín.
\v 9 Tsi ni'ánjo̱'ó én xi chji̱a̱ ngo xta̱ xi chistiko̱, chjí ngasenii̱ ni xi chji̱a̱ Néná, nga̱t'a̱ kuí nii̱ xi ts'énchji̱a̱ Néná nga chistiko̱ kjima nga chji̱a̱ kjo̱a̱a̱ ndií.
\v 10 Xi s'ijii̱n ndií Néná, ngu̱i̱jin ini̱ma̱a̱ be nga ja̱koxi̱ boá kui nii̱. Xi s'ijinjiín Néná, ndiso tjíts'én Néná, nga̱t'a̱ kji̱e̱ s'ijinjiín ni xi katsó Néná kjo̱a̱a̱ ndií.
\v 11 Néná katsjáná kjo̱a̱mindyion ngatsjé ni̱xtjii̱n, kó ngat'aa̱ ndií kui nga sa̱kóná kui kjo̱a̱mindyioo̱n. Kuí bí ni xi katsó Néná nga tsíchji̱a̱.
\v 12 Xi tikónjii̱n ndií Néná, ti tikoón kui kjo̱a̱mindyioo̱n nga, tanga xi tikónjinjiín ndií Néná, ti jmíjiín kui kjo̱a̱mindyioo̱n nga.
\s Juaa̱ bi ts'én kats'énkjiet'a xo̱jo̱o̱n
\p
\v 13 Jún xi s'ijinjnú ndií Néná, jún xí tjíts'en'indójnú'un kui xo̱jo̱o̱n, tsi̱'e̱ nga xcha̱jnú nga tikónjnú kui kjo̱a̱mindyion ngatsjé ni̱xtjii̱n.
\p
\v 14 Kó kuí bí kjo̱a̱'niátakón xi tikónná nga ni'ántiñáa̱ yojoná Néná, nga̱t'a̱ nt'iéná kji'a nga chji̱a̱'áa̱ ngo ni xikó ts'én mejeén kui nga chji̱a̱'áa̱.
\v 15 Kó tsi ya nga kui nt'ié ta ni xi ndyi̱chjiá'áñáa̱, ja̱ je ya nga je katsjáná ni xi kichjiá'áa̱.
\p
\v 16 Tsi tjín xi be nga ngo ṉts'i̱e̱ tjíts'én ngo jé xi ts'enk'iénjínná nguindyi̱ko̱n Néná, chjiénga ku̱i̱chji̱a̱a̱ Néná nga ku̱i̱chji̱a̱tjé, kó bo̱a̱ ts'én nga Néná tsja̱á kjo̱a̱mindyion kui ṉts'iee̱. Kjo̱a̱a̱ ngo je xi ts'enk'iénjínná nguindyi̱ko̱n Néná xi t'íxian an. Ti tjín jé xi ts'enk'iénná nguindyi̱ko̱n Néná, kó kjo̱a̱a̱ kui jeé xianjín an nga ko̱ndókjo̱a̱jnúu̱ Néná nga chji̱a̱'atjejnú xta̱ xi sa̱'ín kui jeé.
\v 17 Ngayeje ni xi kixi̱jín jé boá, tanga tjín jeé xi ts'enk'iénjínná nguindyi̱ko̱n Néná.
\p
\v 18 Je ya nga ngayeje xta̱ xi Néná je katsjaá nga ndií kui ka̱ma, ngájiín nga ts'énjé, nga̱t'a̱ ndií kui Na̱'mii̱ ts'énkoón kui xta̱ xi'ba̱, kó xindajín ts'énjo̱jín.
\p
\v 19 Je ya nga Néná ndokjo̱a̱ ñá, kó nga xta̱ xi ngasee̱ xindajín boá xi ts'énbotixómaá.
\p
\v 20 Tanga ti je ya nga ndií Néná je je'e kó katsjáná kjo̱a̱kjíntakón tsi̱'e̱ nga xcha̱ kui Néná xí ja̱koxi̱i̱, kó je tindyionjo̱ kui xi ja̱koxi̱i̱, ndií Néná xi 'mí Jesukristoo̱. Kuí bí xi'bi̱ xi Néná xi ja̱koxi̱i̱ ko̱jo xi tsjá kjo̱a̱mindyion ngatsjé ni̱xtjii̱n.
\v 21 Jún ndí ndí tsa'a̱n, chja̱'áxínjnúu̱ ngu̱i̱jin ini̱ma̱jnú ngayeje ni xi kjo̱a̱'áxiín ngu̱i̱ndie xi tsi̱'e̱ Néná. Bo̱a̱ kji'i.