\id 2JN - MAZATECO DE SAN PEDRO IXCATLÁN
\mt 2 XO̱JO̱O̱N JUAA̱
\cl Capitulo 1 2 XO̱JO̱O̱N JUAA̱
\p
\v 1 An, ngo nda̱ xi xta̱ xi xchaá na̱ngo̱xi̱i̱ ts'entindejnú'un jún xi xta̱ na̱ngo̱xi̱ xi je ja'ájinjnú Néná, kui xta̱ xi ja̱koxi̱ nga tjóna, kó jmí tsi ta an tsi xi tjóna, ti tjórií jún ngayeje xta̱ xi je kamábe ni xi ja̱koxi̱i̱ nga.
\v 2 Tangat'anii̱ kui ni ja̱koxi̱ xi tikónjin ngatsjé ni̱xtjin ini̱ma̱ná, kui xi k'uijñájinná ta kji'ání.
\v 3 Jún xi je tindyionjinjnú ni xi ja̱koxi̱i̱ ko̱jo kjo̱a̱tjoó Néná, ngas'iejnú kjo̱a̱ndaa̱, kjo̱a̱ni̱ma̱takoón ko̱jo kjo̱a̱xioó Néná xi Na̱'mii̱, ko̱jo xi tsi̱'e̱ Ndi̱a̱ná Jesukristoo̱ kui xi ndií Na̱'mii̱.
\v 4 Achichí tsja kamána nga tjín jún xi kasakona nga ndyi̱ni'ánjnú ni xi ja̱koxi̱i̱, xikó kji'i kjo̱a̱botíxoma xi je katsanguiyaná Néná xi Na̱'mii̱.
\v 5 Kó ngot'e̱ 'ne̱, já ṉts'ie, 'niú mí'ájnú'un nga ja̱ k'i̱e̱ ja̱ nga ján si̱'antjó xingu̱i̱. Jmí tsi xikoó tsi ngo kjo̱a̱botíxoma tja̱tsi̱e̱ xi tjíts'en'indó an, tasá kui boá kui kjo̱a̱botíxoma xi tikónná ndeskande koó ngas'e̱.
\v 6 Chjiénga bo̱a̱ ts'én ku̱i̱ndyión xikó tsó kjo̱a̱botíxomaa̱ Néná, nga̱t'a̱ kuí bí kui nii̱ xi kjo̱a̱tjoó. Ngu̱i̱jii̱n kui kjo̱a̱tjoó tiṉtjajnú, nga̱t'a̱ kuí bí kui nii̱ xi kjo̱a̱botíxomaa̱ Néná, xikó ts'én je kanda'yájnú ndeskande koó ngas'e̱.
\v 7 Achichí ma xta̱ ndiso xi je jatokjá kui nga̱sondiee̱ xi ts'enjó'ojín nga Jesukristoo̱ je'e nga jín nga yojo. Kui boá kui xtaa̱ xi ndyi̱'boṉcha̱ ko̱jo kui boá xi kondraa̱ Kristoo̱.
\v 8 Chónjnú yojojnú tsi̱'e̱ nga kjo̱tsonjín xá xi kini'ánjne̱ ngu̱i̱jinjnú. Ta̱sá ti̱ndyi̱sejnú nga sa̱kó ndo̱jo ndo̱jojnú ni xi je tikóndaa̱ Néná nga tsja̱ajnú.
\v 9 Ta'yaní xi kjo̱a̱'atjoón ni xi akóyá Kristoo̱ kó ki̱a̱jín k'uijñájin kui nii̱, tikónjinjiín Néná ngu̱i̱jin ini̱ma̱a̱. Tanga kui xta̱ ta kuí tsi kjo̱a̱bokoyaá Kristoo̱ xi ts'énbokoyá, kui boá xi'ba̱ xi tikónjii̱n ngu̱i̱jin ini̱ma̱a̱ Néná xi Na̱'mii̱ ko̱jo Ndií.
\v 10 Tsi tjín xi kjo̱chókónjnú jún kó kuijín kjo̱a̱bokoyaá Kristoo̱ xi ko̱kóyajnú, ngata̱ ni'ánk'as'ienjínjnú ndi'ajnú, ti nde “¡A ta bo̱a̱ nda jé'e̱jnú!” Ngata̱ 'míjínjnúu̱.
\v 11 Nga̱t'a̱ kui xta̱ xi “¡A ta bo̱a̱ nda jé'e̱jnú!” Ka̱tso̱o̱, ko̱jo kui nijan kjima kjo̱a̱a̱ ni xi ndajín xi ndyi̱ts'én kui xtaa̱.
\v 12 Achichí ni xi tikónna xi kuichjiájojnú'un, tanga mejénjínna nga xo̱jo̱n ko̱jo tinta̱ sa̱'inkjien an. Nga̱t'a̱ tasá skoyáa̱ nga tsi ta'a ka̱ma kjuinkátsijenjnú'un nga an ma, tsi̱'e̱ nga ka̱ma tíkje̱n tíkje̱n xchi̱boáni̱jmi, kó bo̱a̱ ts'én ka̱ma ndo̱jo kjo̱a̱tsjaná.
\v 13 Tinde xó bo̱a̱ tsó xta̱ na̱ngo̱xi̱ xi je kis'ijii̱n xikoó jún, xi síndo k'i̱e̱e̱ kui xi Néná ti je ja'ájin nga. Bo̱a̱ kji'i.