\id 3JN - MAZATECO DE SAN PEDRO IXCATLÁN
\mt 3 XO̱JO̱O̱N JUAA̱
\cl Capitulo 1 3 XO̱JO̱O̱N JUAA̱
\p
\v 1 An, ngo nda̱ xi xta̱ xi xchaá na̱ngo̱xi̱i̱, ts'entinde an ndí ṉts'ié an Gayoo̱, kui nda̱ xi ja̱koxi̱ nga tjóna.
\v 2 Ji ndí ṉts'ie xi tjóna, mí'áa̱ Néná tsi̱'e̱ nga nda ko̱e̱je̱e̱ kjo̱a̱a̱ ngayeje nii̱, kó nga nda ku̱i̱ndyin, xikó ts'én nda tjis'íjñá ini̱máa̱ nguindyi̱ko̱n Néná.
\v 3 Nga̱t'a̱ achichí tsja kamána nga kjindibákónna já ṉts'iee̱ kó katsáyána nga takó kjima'niátakón ji Néná, ko̱jo kóts'en nga ni xi ja̱koxi̱i̱ tiṉtje̱jin.
\v 4 Nga nt'ié an nga kui xta̱ xi xikoó ndína nga ngu̱i̱jii̱n ni xi ja̱koxi̱i̱ tjimájin, jmíjínna ingo kjo̱a̱tsja xi je ngase ta bo̱a̱jiín kui ni xi'bi̱.
\v 5 Ji ndí ṉts'ie xi tjóna, tanisién 'niátakón kjima ji kji'a nga tini'ínsée̱n ṉts'ié xi ngasee̱, ngase ma nga tibosíke̱je kui xi xín nangui chji̱a̱ni.
\v 6 Kui boá xi katsáyá nguindyi̱ko̱n xta̱ na̱ngo̱xi̱i̱ kjo̱a̱a̱ kjo̱a̱tjó xi tjiín ji, kó nda kji'i ni xi si̱'in ji nga ko̱sike̱je nga sa̱'ín ngase xaá Néná, tsi̱'e̱ nga takó ko̱e̱je̱ ra nínga ndyi̱fí.
\v 7 Nga̱t'a̱ kui xtaa̱ ndyi̱fí ja̱ k'i̱e̱ ja̱ ngaján ngu̱i̱ndie tangat'anii̱ nga ndyi̱'bíni̱jmi eén Jesukristoo̱, kó jmí nii̱ xta̱ xi s'ijinjiín Néná kats'énjo̱'ojín.
\v 8 Kuíni nga ñá chjiénga ko̱e̱'éndiée̱ ndi'aná kui ṉts'ie xi xikoó xi'ba̱. Kó bo̱a̱ ts'én nga ko̱siko̱jó nga ku̱i̱'íni̱jmi én xi ja̱koxi̱i̱ Néná.
\v 9 An, je kats'en'indóo̱ ngo xo̱jo̱n xta̱ na̱ngo̱xi̱i̱, tanga Diótrefee̱ kamámejénjiín sku̱i̱e̱ndíkón xájne̱, nga̱t'a̱ ngatsjé ni̱xtjin mejeén nga kui xi nguito̱ko̱o̱ na̱ngo̱xi̱i̱ ka̱ma.
\v 10 Kuíni nga, tsi an xi kjuin an, sa̱'inkja'átsjiée̱n ni xi ndajín xi ts'én nga ch'o tsóná nga ndajín chji̱a̱ kondra̱ tsa̱ñá. Kó jmí tsi ta kuí tsi nii̱ xi ts'én, ngaskande tsjandiéjín nga ṉts'ie xi xín nangui fochokoón, kó 'bíchjaá xta̱ na̱ngo̱xi̱ xi mejeén nga kjo̱chókoón kui já ṉts'iee̱, kó mongatji̱nguii̱ na̱ngo̱xi̱i̱.
\v 11 Ji ndí ṉts'ie xi tjóna, ngata̱ ki̱a̱jín chja'ánguíjnúu̱ xta̱ xi ni xi ndajiín ndyi̱ts'e̱én, tasá ki̱a̱ chja̱'ánguíjnúu̱ xta̱ xi ndyi̱ts'én ni xi ndaa̱. Xta̱ xi ni xi nda ts'én, xta̱ xi tsi̱'e̱ Néná boá, tanga xta̱ xi ndajín ndyi̱ts'e̱én, kji̱e̱ bejín Néná.
\v 12 Ngayeje xtaa̱ chji̱a̱ kjo̱a̱a̱ nga ndaxta̱ Demetrioo̱, kó ja̱koxi̱ boá ni xi chji̱a̱. Ngaskande ji̱n nda ndokjo̱a̱jne̱ kjo̱a̱a̱ kui, kó jún je yajnú nga ja̱koxi̱ boá ni xi ni'ánjne̱ ko̱jo ni xi ndokjo̱a̱jne̱.
\v 13 Achichí ni xi tikónna xi kuichjiájoo̱ ji, tanga mejénjínna nga xo̱jo̱n ko̱jo tinta̱ sa̱'inkjien an.
\v 14 Nga̱t'a̱ tasá skoyáa̱ nga tsá skuiee̱ ji tsi̱'e̱ nga ka̱ma tíkje̱n tíkje̱n xchi̱boáni̱jmi.
\v 15 Ngat'ieé kjo̱a̱xió. Xta̱ xi amingoo̱ tsó tinde. Ngo kjo̱a̱nda kuí'aá, tinde bo̱a̱ t'ín ji nga ngo nga ngo amingo̱na xi síndo ki̱a̱a̱.