\id JUD - MAZATECO DE SAN PEDRO IXCATLÁN
\mt XO̱JO̱O̱N JUDAA̱
\cl Capitulo 1 XO̱JO̱O̱N JUDAA̱
\p
\v 1 An Judaa̱, mosoo̱ Jesukristoo̱ ko̱jo ṉts'i̱e̱ Sandiyaá, ts'entindejnú'un ngayejejnú jún xta̱ xi Néná xi Na̱'mii̱ tjoó ko̱jo xi je tsíchji̱a̱a̱, kui xta̱ xi Jesukristoo̱ ts'énkoón.
\v 2 Ngatama tsie kjo̱a̱ni̱ma̱takón, kjo̱a̱xió ko̱jo kjo̱a̱tjó xi tsja̱ajnú Néná.
\v 3 Jún ṉts'ie xi tjóna, achichí kamámejeén ini̱ma̱na nga sa̱'in'indójnú'un kjo̱a̱a̱ kui kjo̱a̱'naxié'á xi je katsjáná Néná, tanga ngot'e̱ ts'en'indójnú'un kui xo̱jo̱o̱n nínga ts'énmí'ájnú'un nga ku̱i̱xkántjéjnú kui kjo̱a̱s'ijin xi ngatsjé ni̱xtjin katse'eé xta̱ na̱xi̱ńdá tsjiee̱ Néná.
\v 4 Bo̱a̱ t'íxian an nga̱t'a̱ tjín ka'a xta̱ xi tangat'anii̱ kjo̱a̱mañaa̱ nga ki̱a̱ ts'as'ienjinjnú, kui xi ndeskande koó ngas'e̱ ki'míyatjón nga ka̱majeé, xta̱ xi 'niú ndajín boá xi'ba̱, kui xi kjíbé kjo̱a̱ndaa̱ Néná tsi̱'e̱ nga ta ni xi mejénrií kui sa̱'in, kó ts'énkiejín yojoo̱ nga Jesukristoo̱ boá kui Ndi̱a̱ná xi ngototoo̱ xi ts'énbotixómáná.
\v 5 Tanga nda tsi je yajnú kui nii̱, mejénna nga sa̱'inkja'átsjienjnú'un nga Néná nguije ts'axié'á xta̱ na̱xi̱ńdaá nga ts'axiéni nangui Ejipto̱, jaskan kats'énkjié xta̱ xi kis'ijinjiín.
\v 6 Ti bo̱a̱ ti kats'énjo̱ kui ndítsjie xi kixi̱jín kats'énkjatjosón xaá, kui xi tasá índomasien ngu̱i̱ndiee̱, Néná síndo'niuú ngu̱i̱ya ndo̱bo̱a̱ya xi jñó ko̱jo xi ngatsjé ni̱xtjin, tsi̱'e̱ nga ka̱majeé ni̱xtjin je nga k'uiyá tsi nda ko̱jo tsi ndajín kats'én xtaa̱.
\v 7 Xikó kats'én kui ndítsjiee̱ ti bo̱a̱ ti kats'én xta̱ na̱xi̱ńdá Sodoma̱ ko̱jo Gomorra̱ ko̱jo kui xta̱ na̱xi̱ńdá xi síndot'aa̱ kui ngu̱i̱ndiee̱, nga taxkiya kats'éntsjajo̱ yojo ndikoón nga kondra̱ kijínii̱ ni xi íjñá Néná, kuíni nga ja'atio kjo̱a̱ni̱ma̱ nga kamájénií ngu̱i̱jii̱n ndi'í xi jmí ni̱xtjin k'o̱o̱. Bo̱a̱ kamá tsi̱'e̱ nga kui nii̱ xi chi̱bo̱a̱ kamáná ñá.
\v 8 Ti bo̱a̱ ti ka̱maa̱ kui já xi ts'as'ienjin maña̱jnú nga̱t'a̱ xta̱ xi ndyi̱fítji̱ngui chinii̱ boá nga ndyi̱ts'énndándí yojoo̱ nguindyi̱ko̱n Néná, kó ndyi̱ts'énch'ó xi tjiín xá ko̱jo ch'o ndyi̱tsoó nga'niú xi tanisién nk'aa̱.
\v 9 Ngaskande ndítsjie nguito̱ko̱ Miyee̱ bo̱a̱jín kats'én kji'a nga askjanjo̱ xindajín diabloo̱ nga askjantjéni yojoo̱ Moisee̱, kamájín kon nga kui xi kats'énjeé nga ch'o katsoó, tasá bi katsoó: “¡Ndi̱a̱ná ngats'énxchánjoo̱ ji!”
\v 10 Tanga kui já xi ts'as'ienjin maña̱jnú taxkiya ch'o ts'én chji̱a̱ kjo̱a̱a̱ ni xi kji̱e̱ makjínjiín. Kó ni xi makjiín xikó ts'én bee̱ kon, taxkiya kjíbé. Kui jaá xikónií cho̱ xi ts'énkjójín. Kó tangat'anii̱ kui nii̱ nga ti kuii̱ ndyi̱ts'énkjátsón yojoo̱.
\v 11 ¡Ni̱ma̱ xó kui jaá! Nga̱t'a̱ ndajín ndyi̱ts'én xikó kats'én Kaii̱n, kó tangat'anii̱ nga tsie to̱n mejeén nga ndyi̱ts'én ni xi ndajín xikó kats'én Balaa̱m. Xikoó Koree̱ nga ko̱ya nga̱t'a̱ bendikónjín xi botixómaá.
\v 12 Kui jaá, kui boá xi ts'énndándí ni xi ni'ánjnú kji'a nga matikójnú nga ni'ánkja'átsjienjnú kjo̱a̱tjó xi Néná katsjájnú, nga̱t'a̱ tsja máa̱ nga kjinie ko̱jo 'bi nga ndasenjiín ni xi ndyi̱ni'ánjnú. Kui jaá xikónií xta̱ nguito̱ko̱ xi ta ni xi nda maá kuí tsi xi ndyi̱mongase. Ko̱jo xikónií ṉdi̱ xi jmí stséjiín xi ja̱ k'i̱e̱ ja̱ nga ján fíjo̱ tjo̱o̱. Ko̱jo xikónií yá xi jmí to tsjájín nga fochó ni̱xtjii̱n, kui boá xi je ka'naxiénijín ndeskande ja̱maa̱, je tanisién 'niú je jesón.
\v 13 Xikónií nga 'boxié xó nga'niuú ndáchíkoón, bo̱a̱ ts'én bokó kui jaá ni xi ndajín xi ts'én xi chjiénga tsja̱á kjo̱a̱soboaá katsaki. Kui jaá xikónií ṉño xi je kichajá ndi̱ya̱á. Je ki̱a̱ chji̱a̱ni nínga 'niú jñoó ta kji'ání.
\v 14 Kó ko̱jo Eno̱k, kui xi ma yitoni nda̱ xi kis'ijña kui nga̱sondiee̱ jaskan nguije kis'ijña Adaa̱n, tsíchji̱a̱ xikoó ngo chji̱ni̱e̱'e̱én Néná kjo̱a̱a̱ kui xtaa̱ nga bi katsó: “Jé'e̱n, Ndi̱a̱ná ts'éndibá, kó achichí kjín mi̱ ma ndítsjie xi ts'éndibájo,
\v 15 tsi̱'e̱ nga ko̱tso̱yaa̱ ngayeje xtaa̱ kui nga̱sondiee̱ tsi nda ko̱jo tsi ndajín kats'én ko̱jo tsi̱'e̱ nga ko̱tíjeé ngayeje xta̱ xi ndajiín, kjo̱a̱a̱ ngayeje ni xi ndajín xi kats'én ko̱jo kjo̱a̱a̱ ngayeje én ch'o tsó xi katsoó Néná.”
\v 16 Kuí jaá xi chji̱a̱ta'in xtaa̱ kó jmíjín ni xi nda maá kui. Ni xi mejeén ini̱ma̱a̱ xi ndyi̱mongase. Je 'boxié yojoo̱ nga chji̱a̱. Nda ts'én chji̱a̱ kjo̱a̱a̱ xtaa̱ tanga ta tsi̱'e̱ nga sa̱kórií ni xi mejeén kui.
\v 17 Tanga jún ṉts'ie xi tjóna, ngatja'átsjienjnú én xi katsó já apostroo̱ Ndi̱a̱ná Jesukristoo̱,
\v 18 nga bi katsó: “Nga kju̱i̱e̱t'a ni̱xtjii̱n k'uié xta̱ xi ko̱jno̱kie ni xi tsi̱'e̱ Néná, kó ki̱a̱ k'uíndojin ni xi ndajín xi mejeén sa̱'ín.”
\v 19 Kui boá kui xtaa̱ xi bokjángá xta̱ na̱ngo̱xi̱i̱ kui xi ts'én ni xi ndajín xi chji̱a̱ ini̱ma̱a̱, nga̱t'a̱ tikónjinjiín A̱sién Ni̱xtjii̱n Néná.
\v 20 Tanga jún, ndí ṉts'ie xi tjóna, 'niú ti̱ndyiajinjnú xikó ts'én je s'ijinjnú, nga̱t'a̱ 'niú tsjie kui nii̱ nguindyi̱ko̱n Néná, kó ndokjo̱a̱jnúu̱ Néná xikó ts'én bokoyájnú A̱sién Ni̱xtjii̱n.
\v 21 Ti̱ndyiajinjnú kjo̱a̱tjoó Néná, kó chiyájnúu̱ ni̱xtjin nga Ndi̱a̱ná Jesukristoo̱ k'uieé kjo̱a̱ni̱ma̱takón nga tsja̱aná kjo̱a̱mindyion ngatsjé ni̱xtjii̱n.
\v 22 Tsi tjín xi jó xi ján síndonii̱ ini̱ma̱a̱, ni̱ma̱ ngatamajnú kó ndokjo̱a̱jojnú tsi̱'e̱ nga 'niú k'uíndo.
\v 23 'Na̱xié'ájnú kje̱'e xta̱ nga ko̱'na̱xiéjinjnú ngu̱i̱jin ndi'ií, kó ti kje̱'e xta̱ xi ni̱ma̱ ngatamajnú, tanga chónjnú yojojnú nga bo̱a̱ si̱'ánjnú tsi̱'e̱ nga ko̱jo júnjín sa̱'ínkjatsónjnú ni xi ndajín xi kats'én kui xtaa̱.
\v 24 Néná tjiín nga'niú nga skónjnú tsi̱'e̱ nga k'o̱kajínjnú, ko̱jo tsi̱'e̱ nga ndándíjín ka̱majnú nga konguínjnú nguindyi̱ko̱n kui, kó nga 'niú tsja k'uiéjnú nga kjóchojnú nínga tikón kjo̱a̱jee̱,
\v 25 kui Néná xi ngototoo̱ kui xi 'boxié'áná tangat'anii̱ Ndi̱a̱ná Jesukristoo̱, ngas'iee̱ kjo̱a̱je, kjo̱a̱botíxoma, nga'niú, ko̱jo xá, ndeskande koó ngas'e̱, ngot'e̱, ko̱jo ta kji'ání. Bo̱a̱ kji'i.