\id REV - MAZATECO DE SAN PEDRO IXCATLÁN
\h Ni xi akó Jesukristoo̱
\mt1 Ni xi akó Jesukristoo̱
\c 1
\s Ni xi akó Néná Jesukristoo̱
\p
\v 1 Kuí bí ni xi akó Jesukristoo̱, kui ni xi Néná katsjaá, tsi̱'e̱ nga kui ko̱ko̱ó mosoo̱ kjo̱a̱a̱ ni xi s'e̱ je tsá ka̱ma, Jesukristoo̱ katsanguiya ngo ndítsjiee̱ tsi̱'e̱ nga akoó mosoo̱ xi 'mí Juaa̱ ni xi s'e̱ je tsá ka̱ma,
\v 2 kuí Juaa̱ xi katsáyá eén Néná ko̱jo kui boá xi chistikoo̱ Jesukristoo̱ ko̱jo ngayeje ni xi je kamábe.
\p
\v 3 Achichí ra tsjaa̱ xi ts'enyá, ko̱jo xi nt'ié nga tjíni'ánya kui én xi tsáyá ni xi s'e̱ ka̱maa̱, ko̱jo xi ts'enkjátjosón én xí Néná tsáyá xi kjit'a kui xo̱jo̱o̱n, nga̱t'a̱ je kjimatiña ni̱xtjii̱n.
\s Juaa̱ ts'entínde nga yito xta̱ na̱ngo̱xi̱i̱
\p
\v 4 Juaa̱ ts'entínde nga yito na̱ngo̱xi̱ xi chji̱a̱ni nangui Asia̱: Chjábejnú kjo̱a̱nda ko̱jo kjo̱a̱xió xi katsanguiyajnú kui xi je kuii̱, kui xi kui kamaá ko̱jo kui xi s'e̱ ndibaá, ko̱jo xi katsanguiyajnú nga yito a̱sién ni̱xtjin xi síndo kje̱n nínga tikón Néná xi botixómaá,
\v 5 ko̱jo xi katsanguiya Jesukristoo̱, chistiko̱ xi 'niátakoón, kui boá ndí tjón xi ja'á'yaá ko̱jo xi tjiín xá nga botixómaá ngayeje re xi chji̱a̱ni t'ananguii̱. Kristoo̱ tjoó ñá, kó kui boá xi índondéná kjo̱a̱a̱ jéná nga iskjitjón jiín,
\v 6 kó kui boá xi botixómáná, ko̱jo xi kats'énná chiná'mi xi ts'én xaá Nee̱ kui xi Na̱'mii̱. ¡Kjo̱a̱jee̱ Néná ko̱jo nga'niuú kui tsi̱'e̱ ngatama ngatsjé ni̱xtjin! Bo̱a̱ kji'i.
\p
\v 7 K'i̱e̱ ts'éndibájin ngu̱i̱jin ṉdi̱i̱, kó ngayeje ndyikon xi sku̱i̱e̱, ngaskande xta̱ xi kats'én'oón, ko̱jo ngayeje tji̱e̱e̱ xta̱ xi tjín kuí t'ananguii̱, kó ska̱ndá tangat'anii̱ kui. Jo̱o̱n, bo̱a̱ kji'i.
\p
\v 8 “An boá xi alfaa̱ ko̱jo xi omegaa̱, xi tjón ko̱jo xi fet'aa̱, xi kui ko̱jo xi kui kamaá, ko̱jo xi jaskan ndibaá”, tsó Ndi̱a̱ná xi tsi̱'e̱ ngayeje nga'niuú.
\s Ngo ni xi akako kjo̱a̱a̱ ndií nda̱ xi̱'ii̱n
\p
\v 9 An, Juaa̱, ṉts'iéjnú, kó tangat'anii̱ nga nijan ikitjatió kui kjo̱a̱ni̱ma̱a̱ ngu̱i̱yaa̱ nínga botixómá Néná ko̱jo tangat'anii̱ kjo̱a̱chiyákoón Jesukristoo̱ nga ki̱a̱ kis'ijña an tji̱ngu̱i̱ xi 'mí Patmo̱, tangat'anii̱ eén Néná xi chji̱a̱ kjo̱a̱a̱ Jesukristoo̱.
\v 10 Kó ngo ndi̱ya nga ni̱xtjin nga ni'ándikón Ndi̱a̱ná, A̱sién Ni̱xtjii̱n Néná kis'ijñajo̱na, kó nga̱xto̱n an tsint'ie an ngo nda̱ xi 'niú tsíchji̱a̱ xikó maá ngo tjio,
\v 11 xi bi katsóna:
\p –Ngo xo̱jo̱n tít'e ji kui ni xi tiye ji, kó nanguíyée̱ nga yito na̱ngo̱xi̱ xi chji̱a̱ni nangui Asia̱: Kui xi Éfeso̱, Esmirna̱, Pérgamo̱, Tiatira̱, Sardi̱, Filadelfia̱ ko̱jo Laodisea̱.
\p
\v 12 Kats'enk'afóya an tsi̱'e̱ skuie an 'yá kuií bo̱a̱ nda̱ xi ts'énchji̱a̱jona, kó bo̱a̱ ts'én kamábe an yito ni xi 'bítíyá ndi'í xí ts'entsíjee̱n xi to̱nsinié,
\v 13 kó ngamasiee̱n nga yito kui ni xi 'bítíyá ndi'í xí ts'entsíjee̱n kamábe an ngo xi ja̱ kji'i ndií nda̱ xi̱'ii̱n ma kji'i, xi yajá ngo ṉjño ndio xi fochó ngaskande se, kó ngo tji̱xi̱n xí to̱nsinié tjíkjaá xtji̱e̱e̱n ni̱se̱e̱n,
\v 14 tsja̱a̱ tiboa xó xó xikoó tsa̱nga̱a̱ ko̱jo xikoó ṉch'aán, kó ndyi̱ko̱n xikó maá ndi'í,
\v 15 se ja'at'e 'na̱ 'na̱ xikó maá ki̱cha̱ bronse̱ xi kini'án'na̱, xikó maá nga tjíni'ánńdá ngu̱i̱yaa̱ ngo orjno̱, kó nda̱a̱ achichí 'niú kanda'yá xikó maá nga fonie ngo ngu̱i̱ndie nínga 'bóka ndójoaa̱,
\v 16 ngu̱i̱ya tsja kixi̱ ts'énya'a yito ṉño, kó ngu̱i̱ya ts'oa jatjo ngo ki̱cha̱ xi yojó nga jó ngoboaá, kó kje̱n bo̱a̱ ma kji'i xikó maá nga 'niú tíngá ndoboaá.
\p
\v 17 Nga kamábe an, ts'ákatójó an nguindie se xikó maá tsi k'ien an, tanga kui íjñasónna tsja kixi̱, kó bi katsóna:
\p –Ngata̱ ndakinjín ma, an boá xi tjón an ko̱jo xi fet'a an,
\v 18 ko̱jo an boá xi tikón an, k'ien an ngas'e̱, tanga ngot'e̱ tikón an ngatsjé ni̱xtjin, kó an boá xi tikónna yibii̱ nínga botíxomaa̱ kjo̱a̱bo̱yaa̱.
\v 19 Ti'in'indé ji ni xi je kamáye: Ni xi tikón ngot'e̱ ko̱jo ni xi k'uié jaskan.
\v 20 Kuí bí ni xi tji'maá nga yito ṉño xi je kamáye ji ngu̱i̱ya ndsa̱ an, ko̱jo nga yito ni xi 'bítíyá ndi'í xí ts'entsíjee̱n xi to̱nsinié xi je kamáye: nga yito ṉñóo kui boá xi ndítsjiee̱ nga yito na̱ngo̱xi̱i̱, kó nga yito ni xi 'bítíyá ndi'í xí ts'entsíjee̱n kui boá xi yito na̱ngo̱xi̱i̱.
\c 2
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Éfeso̱
\p
\v 1 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Éfeso̱: “Kui nii̱ xi tsó kui xi tikoón nga yito ṉñóo ngu̱i̱ya tsja kixi̱ ko̱jo xi tso'bá ngamasiee̱n nga yito ni xi 'bítíyá ndi'í xí ts'entsíjee̱n xi to̱nsinieé:
\v 2 Je be yeje an ngayeje ni xi ni'ín, be an xá 'niú xi ni'ín ko̱jo nga tjiín kjo̱a̱chiyákón, kó be an nga ni'ínchíkjo̱e̱jíi̱n xta̱ xi ndajín, kó ti be an nga kachjat'eyékín ji kui xi apostro̱ tsoó yojoo̱ kó kuijín bo̱a̱, kó je kasakoseé nga xta̱ ndiso boá,
\v 3 kó tjiín kjo̱a̱chiyákón, kó tjíchikjoáa̱ tangat'anii̱ ja'énna, kó kji'meyájín ji.
\v 4 Tanga ngo ni tikónna kondra̱ tse̱: nga je ik'íjñímasien ji kui xi kini'íntjé ji nga tjón tjón.
\v 5 Kuíni nga, ngatja'átsjiee̱n kóts'en kixindyin ji ngas'e̱, ti'ink'oyé ji yojóo kjo̱a̱a̱ ni xi ndajín xi tini'ín, kó ti'in ni xi tjón kini'ín, nga̱t'a̱ tsi jmí, tsá kjuinkoón nínga tindyin, kó kjo̱a̱'áxiín ni xi 'bítíyá ndi'í xí ts'entsíjee̱n xi tse̱ tsi kji̱e̱ ni'ínk'oyejín ji yojóo.
\v 6 Tanga nda kji'i nga ch'oo̱ ni xi ndyi̱ts'en xta̱ nikolaitaa̱, kui xi ko̱jo an ch'ona nga.
\v 7 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱. Kui xi sa̱'iín, tsjáa̱ nga skji̱ni̱e̱ too̱ yá xi tsjá kjo̱a̱mindyioo̱n xi tikón ngu̱i̱ndie tsjachoo̱n Néná.”
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Esmirna̱
\p
\v 8 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Esmirna̱: “Kui nii̱ xi tsó kui xi tjoón ko̱jo kui xi fet'ani, kui xi je k'ien kó ti ja'á'yá nguinií:
\v 9 Be an kjo̱a̱ni̱ma̱ xi tibitjatí ko̱jo kjo̱a̱ni̱ma̱ xi tindyinjin, nda tsi nga ja̱koxi̱ cho̱n ji, kó ti be an kóts'en ch'o chji̱a̱ kjo̱a̱a̱ ji kui xi xta̱ judío̱ tsoó yojoo̱, tanga judío̱jín, tasá kui boá xi xta̱ xi chji̱a̱ni ndi'a nínga ndokjo̱a̱ eén xindajín Satanaa̱.
\v 10 Ngata̱ ndakinjín ma kjo̱a̱a̱ kjo̱a̱ni̱ma̱ xi ku̱i̱tjetí. Tsitsíjin nga̱t'a̱ xindajín diabloo̱ ndo̱bo̱a̱ya sa̱nguís'ién chiboajnú, tsi̱'e̱ nga xchít'ayákónjnú jún, kó bo̱a̱ ts'én ku̱i̱tjatiojnú kjo̱a̱ni̱ma̱ tie ni̱xtjin. 'Niú tindyin ji ngaskande nda tsi ko̱ye, kó an tsjaa ngo chjí, kó kuí boá xi kjo̱a̱mindyioo̱n.
\v 11 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱. Kui xi sa̱'iín, jmí ni ka̱majiín nga kji̱ndi̱bá kjo̱a̱bo̱ya xi ma joó.”
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Pérgamo̱
\p
\v 12 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Pérgamo̱: “Kui nii̱ tsó xi tikoón ki̱cha̱ xi yojó nga jó ngoboaá:
\v 13 Je be an nga ki̱a̱ tindyin ji nínga tikón ngu̱i̱ndie nínga botixómá xindajín Satanaa̱, tanga takó 'niú ti'mitji̱ngui ji ja'énna, kó jmí ni̱xtjin nga s'ijinjínna kase ji kjo̱a̱a̱ nga s'ijii̱n an, ti nde bo̱a̱jín kase ni̱xtjin nga Antipaa̱ kui nda̱ xi chistiko̱ xi 'niátakón an kini'ánk'ién ngu̱i̱jinjnú ki̱a̱ na̱xi̱ńdá 'niú nínga tikón xindajín Satanaa̱.
\v 14 Tanga tikón chiboana ni kondra̱ tse̱: nga ki̱a̱ síndoo̱ chiboa xta̱ xi mejénjiín nga kjo̱taxiín kjo̱a̱bokoyaá Balaa̱m, kui xi atíxomaa̱ Balaa̱k tsi̱'e̱ nga kats'énjé xta̱ xi chji̱a̱ni Israe̱l, tsi̱'e̱ nga iskjinie ni xi je kini'ánk'as'iee̱n ngo a̱sie̱én ngo ne xi ts'énda xtaa̱ ko̱jo kjo̱a̱a̱ nga kats'én kjo̱a̱tondo̱.
\v 15 Ti bo̱a̱ ti ts'én ki̱a̱ síndoo̱ ji chiboa xta̱ xi mejénjiín sa̱'ínkjii̱n yojoo̱ ni xi akóyá xta̱ nikolaitaa̱, ni xi ch'ona an.
\v 16 Kuíni nga ti'ink'oyé ji yojóo, nga̱t'a̱ tsi jmí, tsá kjuinkoón ji, kó kui ki̱cha̱ xi fotjoni ndso̱'boa an kuí xí sa̱'inkjien an nga skjanjo̱ an kui xtaa̱.
\v 17 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱. Kui xi sa̱'iín, tsjáa̱ nga skji̱ni̱e̱ ni xi 'mí manaa̱ xi tikón'má, kó ti tsjáa̱ ngo ndí ndi̱jo̱ tiboa, kui xi kjit'aa̱ ngo ja'én tja̱tsi̱e̱ xi nde kji̱e̱ ngo xi be, ta kuí tsi xta̱ xi kjíbé kui ndí ndi̱jo̱o̱.”
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Tiatira̱
\p
\v 18 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Tiatira̱: “Kui nii̱ xi tsó ndií Néná, kui xi ndyi̱ko̱n xikó maá ndi'ií, kó se xikó maá ki̱cha̱ bronse̱ xi tjíni'ánńdá:
\v 19 An je be an ngayeje ni xi tini'ín, be an kjo̱a̱tjóo̱, kjo̱a̱s'ijíi̱n, xáa̱, ko̱jo kjo̱a̱chiyákóo̱n, kó be an nga ngot'e̱ tsie ngase ni xi tini'ín ji ta bo̱a̱jiín nga ik'ítjats'ée̱n.
\v 20 Tanga tikónna ngo ni kjo̱a̱a̱ kondra̱ tse̱: nga tini'ínchíkjoée̱ kui xta̱chjo̱ón xi 'mí na̱ Jesabee̱, kui xi na̱ chji̱ni̱e̱'e̱én Néná tjítsoó yojoo̱, tanga ts'én 'boṉcha̱jo moso̱na tsi̱'e̱ nga sa̱'ín kjo̱a̱tondo̱ ko̱jo nga skji̱ni̱e̱ ni chinie xi je kini'ánk'as'iee̱n a̱sie̱én ngo ne xi ts'énda xtaa̱.
\v 21 An je katsjandiée̱ tsi̱'e̱ nga sa̱'ínk'oyá yojoo̱, tanga kui kamámejénjiín nga sa̱'ínk'oyá yojoo̱ kjo̱a̱a̱ xá xi ts'én nga na̱ masien tjíts'én yojoo̱.
\v 22 Kuíni nga, an xí sa̱'in'óo̱n kui, kó kui xta̱ xi ndyi̱ts'ent'aa̱ kjo̱a̱ Néná tsie kjo̱a̱ndasen tsjáa̱, tanga jmí ni sa̱'ínjáa̱n tsi sa̱'ínk'oyá yojoo̱ kjo̱a̱a̱ ni xi kats'én,
\v 23 kó sa̱'ínk'ién an ndií, kó ngayeje xta̱ na̱ngo̱xi̱i̱ sku̱i̱e̱ nga an be an kókji'i ngu̱i̱jii̱n kjo̱a̱kjíntakoón ko̱jo ngu̱i̱jin ini̱ma̱a̱ xtaa̱, kó nga ngo nga ngo xtaa̱ tsjáa̱ ta xikó kji'i ni xi kats'én.
\v 24 Kjo̱a̱ ngaá jún, xta̱ xi tindyiónjnú Tiatira̱ tanga nga ki̱a̱jín ndyi̱monguíntji̱nguíjnú kui kjo̱a̱bokoyaá, ti nde kji̱e̱ yajínjnú ni xi tji'maá xindajín Satanaa̱, xikó tsó xtaa̱, xiyájnú'un nga k'uijñájínjnú'un ingo ni xi é,
\v 25 tanga chónjnú ni xi je tikónjnú, ngaskande nga kjoé'e̱ nguiñá an.
\v 26 Kó kui xi sa̱'iín kó sa̱'ínkjatjosón ngaskande nga kju̱i̱e̱t'a ni xi mejénna nga sa̱'ín, tsjáa̱ xá, tsi̱'e̱ nga kui ko̱tíxomaa̱ na̱xi̱ńdaá,
\v 27 kó tajá ts'én ko̱tíxomaa̱ na̱xi̱ńdaá, kó bo̱a̱ ka̱maa̱ xtaa̱ xikó maá nga bokjan ngo ti̱ji xí ṉdie kamándani, xikó ts'én Na̱'mina je katsjána kui nii̱,
\v 28 kó tsjáa̱ ṉño tsie xi s'ijña nga ndibá'ásie̱én.
\v 29 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱.”
\c 3
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Sardi̱
\p
\v 1 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Sardi̱: “Kui nii̱ xi tsó kui xi tikoón nga yito A̱sién Ni̱xtjii̱n Néná ko̱jo xi tikoón nga yito ṉñóo: An je be an ngayeje ni xi ni'ín, kó je be an nga tikoón ja'én nga tindyin, tanga je k'ien ji.
\v 2 Ti'inkje'ée̱ yojóo, kó te'ée̱ nga'niú ni xi je mején tjichájaá, nga̱t'a̱ je kamábe an nga ndajín kji'i ni xi ni'ín ji nguindyi̱ko̱n Néná,
\v 3 ngatja'átsjiee̱n, kui kjo̱a̱bokoyá xi je katse'eé ko̱jo xi je kanda'yé ji, ti'inkjatjosén kó ti'ink'oyé yojóo. Tsi tsjáfé ji, tsá kjuinkoón ji, xikoó ngo chejé kó nde xche̱jín ji chi̱bo̱a̱ nga kjócho an.
\v 4 Tanga ki̱a̱ Sardi̱ tjiín chiboa xta̱ xi kji̱e̱ ts'éndándíjín ṉjñoo̱, kuí boá kui xtaa̱ xi kjótso'bájo̱na nga ko̱a̱ja̱ ṉjño tiboaa̱, nga̱t'a̱ tsoboárií nga bo̱a̱ sa̱'ín.
\v 5 Kui xi sa̱'iín, ṉjño tiboa ko̱a̱ja̱, kó sa̱'inkjiéjín an ja'eén nga kjit'a xo̱jo̱n nínga tjít'a ja'eén xta̱ xi k'uíndo ngatsjé ni̱xtjii̱n, tasá xiyá an nga be an kui nguindyi̱ko̱n Na̱'mina ko̱jo nguindyi̱ko̱n ndítsjiee̱.
\v 6 ¡Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱!”
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Filadelfia̱
\p
\v 7 Bi ts'én ti'in'indée̱ ndítsjiee̱ xta̱ na̱ngo̱xi̱i̱ Filadelfia̱: “Kui nii̱ xi tsó kui xi tsjie ko̱jo xi ja̱koxi̱i̱, kui xi tikoón yibii̱ nda̱ re Ndabii̱, kui xi kji'a nga tjín xi kjíx'á ta'yajín xi ka̱maa̱ ku̱i̱'íchjá, kó kji'a nga tjín xi 'bíchjá ta'yajín xi ka̱maa̱ skjíx'á:
\v 8 An je be an ngayeje ni xi ni'ín, tsitsíjin ji, nguindyikin je íjñá an ngo nga̱ntjo̱a̱ xi tji̱e̱ntixa̱ xi ta'yajín xi máa̱ 'bíchjá, kó nda tsi chiboa tsi nga'niú tjiín ji, kini'ín ji xki̱ énna kó tini'ínkie ji yojóo nga yení.
\v 9 An boá xi sa̱'in an, nga kui xta̱ xi chji̱a̱ni ndi'a nínga ndokjo̱a̱ eén xindajín Satanaa̱, kui xi xta̱ judío̱ tsoó yojoo̱ kó kuijín bo̱a̱, nga ko̱e̱je̱ kasiént'aa ji tikoó nguindie ndsa̱ki, tsi̱'e̱ nga sku̱i̱e̱ nga tjóna ji.
\v 10 Nga̱t'a̱ nga je kini'ínkjatjosén ji eén kjo̱a̱chiyákjo̱a̱na, ti bo̱a̱ ti ts'en an skoon ji nga kjo̱chó chi̱bo̱a̱a̱ kjo̱a̱chjat'ayákón xi kji̱ndi̱bánié ngayeje nga̱sondiee̱, tsi̱'e̱ nga xchít'ayákón ngayeje xta̱ xi síndo t'ananguii̱.
\v 11 Tsá kji̱ndi̱bá an, 'niú chje̱'étjé ni xi tikoón tsi̱'e̱ nga ta'yajín xi kjo̱a̱'áxiín kui chjí xi je kini'ín.
\v 12 Kui xi sa̱'iín, kuí xí tsjáa̱ nga kui xi ka̱ma yáseé na̱ngo̱xi̱i̱ Ne xi tsa'a̱n, kó jmí ni̱xtjin kjo̱tjo kui ngu̱i̱ndiee̱, kó nga̱són yojoo̱ sa̱'in'indó an ja'eén Ne xi tsa'a̱n ko̱jo ja'eén na̱xi̱ńdaá Ne xi tsa'a̱n, kui xi na̱xi̱ńdá Jerusale̱n xi tja̱tsi̱e̱e̱ xi ndibaní ndi'ak'ajmii̱ Ne xi tsa'a̱n, kó ti bo̱a̱ ti ts'én k'uijñáa̱ yojoo̱ ja'én tja̱tsi̱e̱na.
\v 13 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱.”
\s Én xí Jesukristoo̱ katsanguiyaa̱ xta̱ na̱ngo̱xi̱i̱ Laodisea̱
\p
\v 14 Kó ti bi ts'én ti'in'indée̱ ndítsjiee̱ xta̱ na̱ngo̱xi̱i̱ Laodisea̱: “Bi tsó kui xi 'mí Bo̱a̱kji'ii̱, kui xi chistiko̱ xi 'niátakón ko̱jo xi ja̱koxi̱i̱, kui xi tangat'anii̱ kui nga Néná íts'i̱yanii̱ nga kats'énda ngayeje nii̱:
\v 15 Je be an ngayeje ni xi ni'ín, nga ti nde ṉch'ánjín ji, ti nde sibéjín ji. ¡Achichí ra nda kji'i tsi ṉch'án jí ko̱jo tsi sibé ji!
\v 16 Tanga nga ta asont'é jí, kó nga jmí tsi ṉch'án jí ti nde jmí tsi sibé ji, kuíni nga sa̱'inkjasóñaa̱ ndso̱'boa an.
\v 17 Nga̱t'a̱ bi t'íse ji: cho̱n an, kó je kamácho̱n an, kó nde ngojín ni chajana, kó nde yejín ji nga ta soboá ni xi ndajín xí kjimaa̱, nga ni̱ma̱ ji, nga jmíjiín to̱n, nga ti̱ka̱ ji ko̱jo nga tindyin kji'ixtí ji.
\v 18 Kuíni nga bo̱a̱ t'íxiaán nga an ts'i̱tsiení to̱nsinié xi je kini'ánchoo̱n ngu̱i̱jin ndi'ií, tsi̱'e̱ nga ja̱koxi̱ nga cho̱n ka̱ma ji, kó an ts'i̱tsiení ṉjño tiboa xi xche̱je kó kjo'má kjo̱a̱soboáa̱ nga titsjaxtí, ko̱jo ndiki kolirio̱ tindyiée̱ ndyikin tsi̱'e̱ nga ka̱matsijeen.
\v 19 An ts'énxchánjo̱ an kó ts'enchji̱ni̱e̱ an ngayeje xi tjóna, kuíni nga che̱ndikín ji ni xi tsi̱'e̱ Néná kó ti'ink'oyé yojóo kjo̱a̱a̱ ni xi ndajín kji'i xi tini'ín ji.
\v 20 Tsitsíjin, k'i̱e̱ tikón an t'a nga̱ntjo̱a̱a̱ kó ts'énchji̱a̱ an, tsi tjín xí ku̱i̱nt'ie nda̱na kó tsi skjíx'á nga̱ntjo̱a̱a̱, k'os'i̱e̱n an ndi'aa̱, kó an skjíni̱e̱jo an ṉño̱, kó kui skji̱ni̱e̱jona an.
\v 21 Kui xi sa̱'iín, ngo ngu̱i̱ndie tsjáa̱ nínga ts'énbotixoma an kó ki̱a̱ k'uijñát'ana, xikó ts'én je kats'en an, kó k'i̱e̱ tikónt'áa̱ an Na̱'mina nínga ts'énbotixómá.
\v 22 Xi tjín tji̱bo̱a̱nijon nga ku̱i̱nt'ie, ngatint'ié ni xi A̱sién Ni̱xtjii̱n tsoó xta̱ na̱ngo̱xi̱i̱.”
\c 4
\s Bi ts'én kini'ántsjaá Néná ndi'ak'ajmii̱
\p
\v 1 Nguije kamá kui nii̱, askotsijen an kó kamábe an ngo nga̱ntjo̱a̱ xi tji̱e̱ntixa̱ ki̱a̱ ndi'ak'ajmii̱, kó kui nda̱ xi tjón tsint'ie an kuí xí xikó maá ngo tjio, xi bi katsóna:
\p –Ndibénijínguí ji k'i̱e̱e̱, kó an kokóo̱ ni xi jaskan ka̱ma.
\p
\v 2 Ti kji'aa̱ kis'ijñajinna A̱sién Ni̱xtjii̱n kó kamábe an ndi'ak'ajmi ján ngo nínga botíxoma, kó ngo xi tikónsón kui ngu̱i̱ndiee̱,
\v 3 kó nínga tikón xi botixómaá 'na̱ xikoó ngo ndi̱jo̱ xi 'mí jaspe̱ ko̱jo tsi xikoó ndi̱jo̱ xi 'mí kornalina̱, kó nga ngo foa'atjiyajoo̱n xi botixómaá tikón ngo ndi̱'a̱ xi 'na̱ xikoó ngo ndi̱jo̱ xi 'mí esmeralda̱.
\v 4 Kó nga ngo foa'atjiyajoo̱n xi botixómaá kamábe an ngui kan nijún ngu̱i̱ndie nínga botíxoma, nínga síndosón kan nijún xta̱ xi xchá, xi ndyi̱yajá ṉjño tiboa, kó ngo korona̱ to̱nsinié síndo'á to̱ko̱,
\v 5 kó nínga tikón kui xi botixómaá jatjoni nda̱, cho̱'o̱n ko̱jo ja'at'e, kó kje̱n kui xi botixómaá tjítí yito ndi'ixó, kó kui boá xi nga yito A̱sién Ni̱xtjii̱n Néná.
\v 6 Kó kje̱n nínga tikón kui xi botixómaá ti tikón ngo ni xi ja̱ kji'i ndáchíkón ma kji'i, xi tikón 'na̱ 'na̱ xikó maá ngo chi̱tsen, kó ngamasiee̱n kui ngu̱i̱ndiee̱, ko̱jo nga ngo foa'atjiyajoo̱n, kis'iṉdo nijún xi síndo, xi tjikítsie maá ndyi̱ko̱n yojoo̱, xtji̱e̱e̱n kje̱n ko̱jo xtji̱e̱e̱n nga̱xto̱n.
\v 7 Kui xi tjoón mején ja̱ kji'i xandi̱je̱ ma kji'i, kó xi ma joó ja̱ kji'i cho̱yojo chichí ma kji'i, xi ma jaán kje̱n mejeén ja̱ kji'i kje̱n xta̱ ma kji'i, kó xi ma nijuún ja̱ kji'i ngo ja̱ xi ts'énfítji̱e̱n ma kji'i.
\v 8 Kó nga ngo nga ngo nga nijún kui xi síndoo, jun nga̱ kis'iee̱, kó xtji̱e̱e̱n ndi̱tsen ko̱jo xtji̱e̱e̱n ngu̱i̱yaa̱ kui nga̱a̱ kis'iee̱ ndyi̱ko̱n, kó nga jñó ko̱jo nga ni̱xtjii̱n nga bi katsó:
\q ¡Tsjie, tsjie, tsjie Ndi̱a̱ná,
\q kui Néná xi tjiín nga'niuú,
\q kui xi takó kui ngas'e̱, kui xi kui ngot'e̱ kó kui xi s'e̱ ndibaá!
\p
\v 9 Kó xki̱ nga kui xi síndoo tsjaá kjo̱a̱je ko̱jo bendikón kó tsjaá ndok'óchji kui xi botixómaá, kui xi tikón ngatsjé ni̱xtjii̱n,
\v 10 nga kan nijún xta̱ xi xchaá bosiént'aa̱ tikoó kje̱n nínga tikón xi botixómaá kó ts'endíkón xí tikón ngatsjé ni̱xtjii̱n, kó kje̱n nínga tikón xi botixómaá botitsójo koronaa̱ nga bi tsó:
\p
\v 11 Ndi̱a̱ xi tsa̱ji̱n, jí xi sa̱ko̱ó nga chjábe jí
\q ngayeje kjo̱a̱je, kjo̱a̱yandikón ko̱jo nga'niú,
\q nga̱t'a̱ jí xi kini'índe ngayeje nii̱,
\q nga̱t'a̱ tangat'anií nga ji xi bo̱a̱ ts'én mejeén nga tjínní kui nii̱, ko̱jo nga kamánda.
\c 5
\s Ch'o̱ xo̱jo̱n xi kjit'a eén ko̱jo cho̱tsa̱nga̱a̱
\p
\v 1 Kó kamábe an nga tsja kixi̱ xi botixómaá ts'énya'a ngo ch'o̱ xo̱jo̱n xi kamá'indó nga jó ngoboaá, kó yito seyo̱ tjí'niúní kui ch'o̱ xo̱jo̱o̱n.
\v 2 Kó kamábe an ngo ndítsjie xi tjiín nga'niú xi 'niú askandáyá nga bi katsó nga asíyá:
\p –¿'Yání xi ka̱ma kon nga skjíndokjáyá kui ch'o̱ xo̱jo̱o̱n ko̱jo nga ka̱maa̱ skjíndiyá kui seyo̱ xi tjí'niúní?
\p
\v 3 Tanga ti nde ndi'ak'ajmii̱, ti nde t'ananguii̱, ti nde nguindie t'ananguii̱ jmíjín ngo xi kamaá iskjíndokjáya kui ch'o̱ xo̱jo̱o̱n, ti nde kamájín askotsijee̱n.
\v 4 Kó an achichí askandá an, nga̱t'a̱ ta'yajín xi kasako xi kamákón nga iskjíndokjáya kui ch'o̱ xo̱jo̱o̱n, ti nde kamájín askotsijee̱n.
\v 5 Tanga ngo kui xta̱ xi xchaá xi bi katsóna:
\p –Nguiti che'éjín ngase, nga̱t'a̱ je kats'én xi k'uijñásón nínga botixómá Ndabii̱, kui xi 'mií xandi̱je̱ xi chji̱a̱ni Judáa̱, ta kuí tsi tjiín xá nga ka̱maa̱ skjíndokjáyá ko̱jo nga ka̱maa̱ skjíndiyá nga yito seyoo̱ kui ch'o̱ xo̱jo̱o̱n.
\p
\v 6 Kós'e̱, ngamasiee̱n nínga tikón xi botixómaá ko̱jo nga nijún kui xi síndoo, ko̱jo ngamasiee̱n xta̱ xi xchaá, kamábe an ngo cho̱tsa̱nga̱ xi sikón kixi̱, xikoó tsi je kini'ánk'ién, kó yito ndi̱ja̱ ko̱jo yito ndyi̱ko̱n kis'iee̱, kó kui boá xi nga yito A̱sién Ni̱xtjii̱n Néná, kui xi kananguiya ngayeje t'ananguii̱.
\v 7 Kui cho̱tsa̱nga̱a̱ kijí kó iskjíbé kui ch'o̱ xo̱jo̱n xi tjiyátsjani tsja kixii̱ kui xi botixómaá.
\v 8 Kó nguije iskjíbé kui ch'o̱ xo̱jo̱o̱n, nga nijún kui xi síndoo ko̱jo nga kan nijún kui xta̱ xi xchaá, asién tikoó kje̱n cho̱tsa̱nga̱a̱, kó ngayejee̱ nga ndyi̱ya'a ngo arpa̱ kó ndyi̱ya'a chi̱tsen to̱nsinié xi tjiín ni sije̱n xi ni'ánkjién nga ni'ándikón Néná, kó kui boá xi bokó nga xta̱ na̱xi̱ńdá tsjiee̱ Néná, ndyi̱chji̱a̱a̱ Néná.
\v 9 Kó ndyi̱sie ngo só tja̱tsi̱e̱ xi bi tsoó:
\q Jí xi tsoboaá nga chjábe jí kui ch'o̱ xo̱jo̱o̱n ko̱jo nga chjándiyé ji seyoo̱,
\q nga̱t'a̱ jí boá xi kini'ánk'ieén, kó nga katjon jíi̱n, ka'naxié'é nga tsi̱'e̱ Néná kamá
\q ngayeje tji̱e̱e̱ xta̱, én, nangui ko̱jo na̱xi̱ńdá,
\q
\v 10 kó kuí xtaa̱ xi kini'ín ji re xi tsi̱'e̱ Néná, kini'ín ji chiná'mi tsi̱'e̱ Néná,
\q kó kuí xí ko̱tíxoma ngayeje t'ananguii̱.
\p
\v 11 S'e̱ askotsijen an, kó tsint'iée̱ nda̱a̱ kjín ndítsjie xi síndo nga ngo foa'atjiyajoo̱n kui xi botixómaá, ko̱jo xi síndoo ko̱jo xta̱ xi xchaá, achichí kjín miyo̱n kamá,
\v 12 kó 'niú tsíchji̱a̱ nga bi katsó:
\q ¡Kui cho̱tsa̱nga̱ xi je kini'ánk'ieén,
\q kui boá xi tsoboaá nga si̱'ank'as'iee̱n nga'niú nga ko̱tíxoma ko̱jo kjo̱a̱cho̱n,
\q kjo̱a̱kjínkón ko̱jo nga'niú, kjo̱a̱yandikón, kjo̱a̱je ko̱jo kjo̱a̱ni'ántsja!
\p
\v 13 Kó ti tsint'ie an nga ngayeje ni xi kats'énda Néná ndi'ak'ajmi ján, t'ananguii̱, nguindie t'ananguii̱ ko̱jo ngu̱i̱jin ndáchíkoón, nga bi katsó:
\q ¡Kui xi botixómaá ko̱jo cho̱tsa̱nga̱a̱,
\q kui ngate'eé kjo̱a̱ni'ántsjaá, kjo̱a̱yandikón,
\q kjo̱a̱je ko̱jo nga'niú tsi̱'e̱ nga ko̱tíxoma ngatsjé ni̱xtjin!
\p
\v 14 Nga nijún kui xi síndoo bi katsó:
\p –¡Bo̱a̱ kji'i! Kó nga kan nijún xta̱ xi xchaá asién tikoó kó kats'éndikón kui xi tikón ngatsjé ni̱xtjii̱n.
\c 6
\s Nga nijún seyo̱ xi tjoón
\p
\v 1 Kó kamábe an cho̱tsa̱nga̱a̱ nga iskjíndiyá seyo̱ xi tjoón nga yito kui seyoo̱, kó tsint'ie an nga ngo kui xi síndoo xi xikó maá cho̱'o̱n nda̱a̱ nga bi katsó:
\p –¡Ja̱bí'i̱n!
\p
\v 2 Kó kamábe an, ngo ndi̱je̱ tiboa, kó kui xi tikónsoón ngo arko̱ tjiyá tsja, kó kui katse'eé ngo korona̱, kó jatjo nga kui xi kats'én ko̱jo nga sa̱'ín.
\p
\v 3 Kó kji'a nga kui cho̱tsa̱nga̱a̱ iskjíndiyá xi ma jó seyoo̱, tsint'ie an xi ma jó kui xi síndoo nga bi katsó:
\p –¡Ja̱bí'i̱n!
\p
\v 4 Kó jatjo ngo ndi̱je̱ iní, kó kui xi tikónsoón katse'eé nga'niú tsi̱'e̱ nga kui xi kjo̱a̱'áxín kjo̱a̱xioó t'ananguii̱ ko̱jo tsi̱'e̱ nga sa̱'ín nga ngayeje xtaa̱ kui nga̱sondiee̱ sa̱'ínk'ién ja̱ k'i̱e̱ ja̱ ngaján xkjín, kó katse'eé ngo ki̱cha̱ xi tanisién je.
\p
\v 5 Kó kji'a nga cho̱tsa̱nga̱a̱ iskjíndiyá xi ma ján seyoo̱, tsint'ie an xi ma ján kui xi síndoo nga bi katsó:
\p –¡Ja̱bí'i̱n!
\p Kó kamábe an ngo ndi̱je̱ jmá, kó kui xi tikónsoón ngo nisochi̱bo̱a̱ tjiyá tsja.
\v 6 Kó ngamasiee̱n nga nijún kui xi síndoo tsint'ie an ngo nda̱ xi bi katsó:
\p –Ta ngo tsi kilo̱ to ndso̱ko̱a̱n ṉño̱ ko̱jo tsi ján kilo̱ sebada̱ xi ku̱i̱e̱nje̱nnii̱ to̱n xi ni'án nga ngo ni̱xtjii̱n, tanga nga ni'ínkjatsenjín ji istii̱ ko̱jo binoo̱.
\p
\v 7 Kó kji'a nga cho̱tsa̱nga̱a̱ iskjíndiyá xi ma nijún seyoo̱, tsint'ie an xi ma nijún kui xi síndoo nga bi katsó:
\p –¡Ja̱bí'i̱n!
\p
\v 8 Kó kamábe an ngo ndi̱je̱ sinié, kó kui xi tikónsoón kuí xí ki'mí kjo̱a̱bo̱ya, kó nga̱xto̱n kui, kjindibá kui xi botixómaá ngu̱i̱ndiee̱ kjo̱a̱bo̱yaa̱, kó kui xi katse'eé nga'niú tsi̱'e̱ nga ko̱tíxoma ngo nga nijún tjiín t'ananguii̱, tsi̱'e̱ nga ki̱cha̱, ko̱jo kjindiá, ko̱jo chi'in ko̱jo cho̱ tamá xí tjín nga̱sondiee̱ sa̱'ínk'iénni xtaa̱.
\p
\v 9 Kó kji'a nga cho̱tsa̱nga̱a̱ iskjíndiyá xi ma ún seyoo̱, kamábe an nguindie ṉcha̱n ndikoón ngayeje xta̱ xi kini'ánk'ién tangat'anii̱ nga tsíchji̱a̱ eén Néná ko̱jo kjo̱a̱a̱ nga chistiko̱ kamá kjo̱a̱a̱ nii̱ Néná.
\v 10 Kó kui xtaa̱ bi katsó nga 'niú askandáyá:
\p –¿Ngaskande kji'ání Ndi̱a̱ tsjie ko̱jo ja̱koxi̱, nga si̱'injée̱ xtaa̱ kui t'ananguii̱ ko̱jo nga si̱'ingojo ji nga kini'ánk'iénjne̱?
\p
\v 11 Kó katse'eé ṉjño tiboa, kó bo̱a̱ ki'mií nga sa̱'ínkja'yá ngui chiboa ni̱xtjin, ngaskande nga ka̱ma ndo̱jo xikó tjín moso̱ ko̱jo ṉts'ie xi tangat'anii̱ xaá Néná nga si̱'ank'ien xikoó kui xtaa̱.
\p
\v 12 Kó kamábe an nga kachjándiyá xi ma jun seyoo̱, kó kjindibá ngo kjo̱a̱ndi̱ko̱n 'niú, kó ndoboaá kamájñó, xikoó ngo ṉjño xa̱'ya̱, ngayeje saá kamá'iní xikoó jín,
\v 13 kó ṉñóo ixónguíni ndi'ak'ajmi ján nga ixó t'ananguii̱, xikó ma ts'en bixónguí to igoo̱ xi taá kji'a ngo tjo̱'niú 'bítsanie yaá,
\v 14 kó ndi'ak'ajmii̱ kichajá ngu̱i̱jin a̱sie̱én xikoó ngo xo̱jo̱n xi foch'o̱, kó ngayeje na̱xii̱ ko̱jo ngayeje tji̱ngu̱i̱i̱ kamátíyaá ngu̱i̱ndie nínga síndo.
\v 15 Kó ree̱ t'ananguii̱ kis'iṉdo'má nga kijí ngu̱i̱ya tixa̱na̱xi̱ ko̱jo nínga síndo ndi̱jo̱ yi'ii̱ na̱xii̱, ko̱jo xta̱ xi nk'a xaá, nguito̱ko̱o̱ jajuún, xta̱ xi cho̱n, xta̱ xi tjiín nga'niú ko̱jo ngayeje moso̱ ko̱jo ngayeje xta̱ xi tjimándé, ti bo̱a̱ ti ts'én kis'iṉdo'má,
\v 16 kó bi katsoó na̱xii̱ ko̱jo ndi̱jo̱o̱:
\p Tichíjminiéjne̱ yojojnú kó t'íjña'majne̱ tsi̱'e̱ nga sku̱i̱e̱jínjne̱ kui xi botixómaá, ko̱jo nga xcha̱jínjne̱ kjo̱a̱xcha̱án cho̱tsa̱nga̱a̱,
\v 17 nga̱t'a̱ je jachó kui ni̱xtjin je nga ka̱majeé, ¿kó 'yá xi kjo̱chíkjo̱a̱a̱?
\c 7
\s Kui xi úchán ko̱jo yichán nijún mi̱ xta̱ xi yaját'aa̱ chi̱bo̱a̱a̱
\p
\v 1 Nguije kamá kui nii̱, kamábe an nijún ndítsjie xi ndyi̱a̱ kixi̱ nga nijún tji̱ngu̱i̱i̱ nga̱sondiee̱, nga ndyi̱'bíchjaá nga nijún tjo̱o̱ tsi̱'e̱ nga nguiti ko̱ótsiejín nga̱són t'ananguii̱, ti nde nga̱soón ndáchíkoón, ti nde nga̱soón ngo yá xi tjín kuí nga̱sondiee̱.
\v 2 Ti kamábe an ingo ndítsjie xi kjindibáni xtji̱e̱e̱n nínga fotjo ts'ueé xi tikoón chi̱bo̱a̱a̱ seyoo̱ kui Néná xi tikoón, kó kui ndítsjiee̱ 'niú askandáyá nga tsíchji̱a̱a̱ xi ngui nijún ndítsjie xi je katse'eé nga'niú tsi̱'e̱ nga sa̱'ín'oón t'ananguii̱ ko̱jo ndáchíkoón kó bi katsoó:
\p
\v 3 –¡Ngata̱ ni'án'onjínjnúu̱ t'ananguii̱, ko̱jo ndáchíkoón, ko̱jo yaá, tji̱e̱nga kji̱e̱ 'bíjñájiín chi̱bo̱a̱a̱ seyoo̱ xtjien xta̱ xi mosoo̱ Néná!
\p
\v 4 Kó tsint'ie an kótjín kamá xi kini'ánka'a kui chi̱bo̱a̱a̱: úchán ko̱jo yichán nijún mi̱ ma xi chji̱a̱ni tji̱e̱e̱ xta̱ xi chji̱a̱ni Israe̱l.
\v 5 Akjat'aa̱ chi̱bo̱a̱a̱ kui seyoo̱ tiejó mi̱ tji̱e̱e̱ xta̱ xi chji̱a̱ni Judáa̱, tiejó mi̱ tji̱e̱e̱ xta̱ xi chji̱a̱ni Rubee̱n, tiejó mi̱ tji̱e̱e̱ xta̱ xi chji̱a̱ni Gaa̱d,
\v 6 tiejó mi̱ tji̱e̱e̱ xta̱ xi chji̱a̱ni Asee̱r, tiejó mi̱ tji̱e̱e̱ xta̱ xi chji̱a̱ni Neftalii̱, tiejó mi̱ tji̱e̱e̱ xta̱ xi chji̱a̱ni Manasee̱,
\v 7 tiejó mi̱ tji̱e̱e̱ xta̱ xi chji̱a̱ni Simeoo̱n, tiejó mi̱ tji̱e̱e̱ xta̱ xi chji̱a̱ni Lebii̱, tiejó mi̱ tji̱e̱e̱ xta̱ xi chji̱a̱ni Isakaa̱r,
\v 8 tiejó mi̱ tji̱e̱e̱ xta̱ xi chji̱a̱ni Sabuloo̱n, tiejó mi̱ tji̱e̱e̱ xta̱ xi chji̱a̱ni Kosiee̱, ko̱jo tiejó mi̱ tji̱e̱e̱ xta̱ xi chji̱a̱ni Benjaa̱.
\s Xta̱ kjín xi ndyi̱yajá ṉjño tiboaa̱
\p
\v 9 Nguije kamá kui nii̱, askotsijen an kó kamábe an achichí 'niú kjín xta̱ xi ngaskande nde ta'yajín xi kamaá íxki̱, xta̱ xi chji̱a̱ni ngayeje na̱xi̱ńdá, ngayeje xtín xta̱, ngayeje to̱ko̱ya én ko̱jo ngayeje nangui, ndyi̱a̱ kixi̱ kui xtaa̱ kje̱n nínga tikón xi botixómaá ko̱jo kje̱n cho̱tsa̱nga̱a̱, nga ndyi̱yajá ṉjño tiboa, kó xka̱jén ndyi̱ya'a ngu̱i̱ya tsja.
\v 10 Kó ngayejee̱ nga 'niú tsíchji̱a̱ nga bi katsó:
\q ¡Néná ko̱jo cho̱tsa̱nga̱a̱ kuí xí botixómá, kó kuí xí 'boxié'áná!
\m
\v 11 Kó ngayeje ndítsjie xi ndyi̱a̱ kixi̱ nga ngo foa'atjiyajoo̱n kje̱n nínga tikón xi botixómaá ko̱jo xta̱ xi xchaá ko̱jo kui xi síndoo, kixindyiaxtien nínga tikón xi botixómaá ngaskande nga kisit'aa̱ xtjien t'ananguii̱, kó kats'éndikón Néná,
\v 12 nga bi katsó:
\q ¡Bo̱a̱ kji'i!, Kjo̱a̱ni'ánchikonñeé, kjo̱a̱jee̱, kjo̱a̱kjínkoón, kjo̱a̱ndok'óchjií,
\q kjo̱a̱yandikoón, nga'niuú nga botíxoma ko̱jo nga'niuú ngate'eé Néná ngatsjé ni̱xtjin. ¡Bo̱a̱ kji'i!
\p
\v 13 Kós'e̱ ngo kui xta̱ xi xchaá bi katsó nga asíyána:
\p –Kui xta̱ xi ndyi̱yajá ṉjño tiboaa̱, ¿'yá kuí bo̱a̱, kó ñá kjindibáni?
\p
\v 14 –Jí xi ye ji, Ndi̱a̱
\p Kixiáa̱n.
\p Kó bi katsóna kui:
\p –Kuí bí xta̱ xi je ja'ajin nga kamá kui kjo̱a̱ni̱ma̱a̱, kó kui je anié ṉjñoo̱ kó jiín cho̱tsa̱nga̱a̱ kats'éntiboani.
\v 15 Kuíni nga ki̱a̱ síndo kje̱n nínga tikón kui Néná xi botixómaá, kó nga jñó nga ni̱xtjin nga ndyi̱ts'enseén Néná ki̱a̱ na̱ngo̱xi̱i̱, kó kui xi botixómaá skoón nga ki̱a̱ k'uijñájo̱ ngu̱i̱ndie ndikoón.
\v 16 Nguiti jmí kjo̱a̱ni̱ma̱ kjo̱a̱'atiojín nga ka̱ma bojó ka̱ma xíndaá, ti nde sa̱'ínchjánjiín ndoboaá, ti nde sa̱'ínni'ínjiín sibeé,
\v 17 nga̱t'a̱ kui cho̱tsa̱nga̱ kui xi botixómaá, kui boá xi nda̱ xi koo̱n cho̱tsa̱nga̱a̱ ka̱ma, kó kui boá xi kjo̱jo nínga tjitjó ndójoaa̱ kjo̱a̱mindyioo̱n, kó Néná sa̱'ínxíjón ngayeje ndándyíkon xi kjo̱tjoo̱ ndyi̱ko̱n.
\c 8
\s Xi ma yito seyoo̱
\p
\v 1 Kó kji'a nga cho̱tsa̱nga̱a̱ iskjíx'aá seyo̱ xi ma yitoo̱ kui ch'o̱ xo̱jo̱o̱n, masien ora̱ kis'ie xió xió ndi'ak'ajmi ján.
\v 2 Kó kamábe an nga yito ndítsjie xi ndyi̱a̱ kixi̱ kje̱n Néná, kó kui katse'eé yito tjio.
\v 3 Kó kjindibá ingo ndítsjie, xi kasasien t'a ṉcha̱n ndikoón xi ya'a ngo ni xi 'bítíyá ni sije̱n xi to̱nsinié, kó achichí ni sije̱n xi tí katse'eé, tsi̱'e̱ nga ki̱a̱ sa̱nguínjii̱n kjo̱a̱ndokjo̱a̱a̱ Néná xi tsi̱'e̱ ngayeje xta̱ tsjiee̱, ki̱a̱ nga̱soón ṉcha̱n ndikón xí to̱nsinié xi tikón kje̱n nínga tikón xi botixómaá.
\v 4 Tsja kui ndítsjiee̱ kats'énkijinni ngaskande nínga tikón Néná ṉdi̱i̱ kui ni sije̱n xi tjítií ko̱jo kui kjo̱a̱ndokjo̱a̱a̱ xta̱ na̱xi̱ńdá tsjiee̱ Néná.
\v 5 Kó kui ndítsjiee̱ iskjíbé kui ni xi 'bítíyá ni sije̱e̱n kó íkitsie ma nga indyiá x'ueé ndi'ií kui ṉcha̱n ndikoón, kó ts'ajmisón nga̱són t'ananguii̱, kó kis'ie cho̱'o̱n, kjo̱a̱foa'at'e ko̱jo ngo kjo̱a̱ndikón xí 'niú.
\s Tjioo̱
\p
\v 6 Kó nga yito kui ndítsjie xi síndoo̱ nga yito tjioo̱, kis'iṉdonda tsi̱'e̱ nga je sa̱'ínkjanie.
\p
\v 7 Ndítsjie xi tjoón kats'énkjanie tjioo̱, kó kis'ie t'ananguii̱ ndókoá xi ndi'í ko̱jo xi jín ts'ájinni, kó kití ngo nga ján tjiín nga̱sondiee̱, ko̱jo ngo nga ján tjiín ngayeje yá xi tjín ko̱jo ngayeje xka̱ xi sa̱si̱e̱.
\p
\v 8 Ndítsjie xi ma joó kats'énkjanie tjioo̱, kó xikó maá tsi ngo na̱xi̱ xi tjítíngá ikichijmijin ngu̱i̱jin ndáchíkoón, kó ngo nga ján tjiín xikó kji'i ndáchíkoón nga jín kamá,
\v 9 kó ngo nga ján tjiín ngayeje xi síndo ngu̱i̱jii̱n ndáchíkoón xi jesón, kó ngo nga ján tjiín ngayeje tjotso yi'i xi tjín ngu̱i̱jin ndáchíkoón xi kini'ánkjié.
\p
\v 10 Ndítsjie xi ma jaán kats'énkjanie tjioo̱, kó ngo ṉño xi xikó maá ngo yá xi tjítokó ndi'í xi tjítí xi kjindibáni ndi'ak'ajmii̱ xi ts'ákajin ngo nga ján tjiín ngayeje ndeje' xi tjín ko̱jo ngayeje nínga síndo ndańch'i.
\v 11 Kui ṉñóo xi sa ki'mí, kó ngo nga ján tjiín ndójoa xi tjín nga̱sondiee̱ xi kamása, kó tangat'anii̱ kui ndójoa saa̱ nga achichí xta̱ jesón.
\p
\v 12 Ndítsjie xi ma nijuún kats'énkjanie tjioo̱, kó kini'ánkjatsón ngo nga ján tjiín ts'ueé, ngo nga ján tjiín saá, ko̱jo ngo nga ján tjiín ṉño xi yajá nk'a ján, tsi̱'e̱ nga kamájñó ngo nga ján tjiín kui nii̱, kó nguiti kats'éntsijenjín ngo nga ján tjiín nga ni̱xtjii̱n ko̱jo nga jñoó.
\p
\v 13 Kó kamábe an, kó tsint'iée̱ ngo ja̱ xi tso'bátji̱e̱n ngamasiee̱n ndi'ak'ajmii̱ kó achichí 'niú askandáyá nga bi katsó:
\p –¡Ni̱ma̱ xó, ni̱ma̱ xó, ni̱ma̱ xó xta̱ xi chji̱a̱ni t'ananguii̱, kji'a nga kjo̱ni̱e̱ tjio xi sa̱'ínkjanie xi ngui ján ndítsjiee̱!
\c 9
\p
\v 1 Ndítsjie xi ma uún kats'énkjanie tjioo̱, kó kamábe an ngo ṉño xi kjindibáni ndi'ak'ajmi ján kó ts'áka t'ananguii̱, kó kuí xí katse'eé yibii̱ tixa̱ na̱ngaa̱ t'ananguii̱.
\v 2 Kó iskjíx'á kui tixa̱ na̱ngaa̱ t'ananguii̱, kó ki̱a̱ jatjo ngo ṉdi̱ xi xikó maá ṉdi̱i̱ ngo orjno̱ xi tanisién je, kó ṉdi̱i̱ kui tixa̱a̱ xi kats'énjñó ts'ueé ko̱jo tjo̱o̱.
\v 3 Kó ngu̱i̱jii̱n kui ṉdi̱i̱ jatjoni chjo̱bo̱a̱ xi kis'ikitsieni nga̱són t'ananguii̱, kó kui katse'eé nga'niú xikoó cho̱ndáyaá.
\v 4 Kó akatíxomaa̱ tsi̱'e̱ nga sa̱'ín'onjiín ngayeje xka̱ xi tjín t'ananguii̱, ti nde jmí ni sa̱'ínjiín ngayeje ni xi sa̱si̱e̱ ko̱jo yá, ta kuí tsi xta̱ xi ndyi̱ya'ajín xtjien chi̱bo̱a̱a̱ seyoo̱ Néná.
\v 5 Tanga katse'éndiejiín nga sa̱'ínk'ién xtaa̱, ta sa̱'ínkja'atio tsi kjo̱a̱ni̱ma̱ nga sa̱'ín'oón ún sá, kó kui kjo̱a̱ni̱ma̱ xi katse'eé xikó maá nga kjiniená cho̱ndáyaá.
\v 6 Kó kui ni̱xtjin ján, xtaa̱ ko̱ngase kjo̱a̱bo̱yaa̱, tanga sa̱kójiín, ka̱mamejeén ko̱ya, tanga kjo̱a̱bo̱yaa̱ ko̱ngat'axiín.
\p
\v 7 Kui chjo̱bo̱a̱a̱ kuí xí xikó maá ndi̱je̱ xi je síndonda nga ko̱e̱je̱ kjo̱a̱xchán, to̱ko̱ kui choo̱ tji'á ngo ni xi xikó maá ngo korona̱ to̱nsinié, kó kje̱n mején xi kókón kje̱n xta̱ kon,
\v 8 kó tsja̱ xi tjiín xikó maá tsja̱a̱ ínchjín, kó ṉ'ni̱u̱ xikó ma kon ṉ'ni̱u̱ xandi̱je̱ kon,
\v 9 kó yojoo̱ kjijon ngo ni xi xikoó tsi ki̱cha̱, kó nga janie nga̱a̱ kui choo̱ bo̱a̱ ma ts'én fonie xikó ts'én fonie kjín karreta̱ xi ndyi̱kjien ndi̱je̱e̱ kji'a nga fí kjo̱a̱xchán.
\v 10 Ńts'en bo̱a̱ ma kon kamá xikoó tsi̱'e̱ cho̱ndáyaá, kó nda'yá kis'iee̱, kó nda'yá ńts'en kis'iee̱ nga'niú tsi̱'e̱ nga sa̱'ín'oón xtaa̱ ún sá.
\v 11 Nguito̱ko̱o̱ chjo̱bo̱a̱a̱, kui boá xi ndítsjiee̱ tixa̱ na̱ngaa̱ t'ananguii̱, kó kui boá xi 'mí Abado̱n nga én ebreo̱, kó Apolio̱n 'mí nga én griego̱.
\p
\v 12 Je ja'a kui ni xi ndajín xi tjoón, tanga chaja ngui jó.
\p
\v 13 Ndítsjie xi ma juu̱n kats'énkjanie tjioo̱, kó tsint'ie an ngo nda̱ xi kjindibáni ngamasiee̱n nga nijún ndi̱ja̱ xi síndo t'a ṉcha̱n ndikón xí to̱nsinié xi tikón kje̱n nínga tikón Néná,
\v 14 kó bi katsoó xi ma jun ndítsjie xi tikoón tjioo̱:
\p –Chjánde ji nga nijún ndítsjie xi síndota'niú t'a ndeje' je xi 'mí Éufratee̱.
\p
\v 15 Kó kachjándó nga nijún ndítsjiee̱ tsi̱'e̱ nga sa̱'ínk'ién ngo nga ján tjiín ngayeje xta̱ xi tjín nga̱sondiee̱, nga̱t'a̱ kuí xá ik'índondani nga kjo̱chó kui chi̱bo̱a̱a̱, kui ni̱xtjii̱n, kui saá ko̱jo kui noó.
\v 16 Kó tsint'ie an kótjín ma kui jajún ndi̱je̱e̱: jó úchán miyo̱n ma.
\p
\v 17 Kó bi ts'én kamábe an kui ndi̱je̱e̱ ko̱jo xi síndosoón nga akakona: ni xi kjijon yojoo̱ iní xikó maá ndi'ií, aso xikó maá ndi̱jo̱ safiroo̱ ko̱jo sinié xikó maá ndso̱ko̱a̱n asufree̱, kó to̱ko̱ ndi̱je̱e̱ bo̱a̱ ma kon xikoó to̱ko̱ xandi̱je̱e̱, kó ts'oa kui choo̱ jatjoni ndi'í, ṉdi̱ ko̱jo asufre̱.
\v 18 Kó ngo nga ján tjiín xta̱ xi tjín nga̱sondiee̱ jesón tangat'anii̱ kui ndi'í, kui ṉdi̱ ko̱jo kui asufre̱ xi jatjoni ts'oa kui choo̱.
\v 19 Nga̱t'a̱ ts'oa ko̱jo ńts'en kui ndi̱je̱e̱ boá nínga kis'ijñaa̱ nga'niú, nga̱t'a̱ ńts'en xikó ma kon ye̱e̱ bo̱a̱ ma kon kamá, kó to̱ko̱ boá xi kats'én'ónnii̱ xtaa̱.
\p
\v 20 Kó xta̱ xi ngasee̱, kui xi jesónjínni kui kjo̱a̱ni̱ma̱a̱, kui xi ti nde bo̱a̱ ts'én kats'énk'oyájín yojoo̱, kó ti nde íjñámasienjín nga kats'éndikón xindajín, ko̱jo a̱sie̱én ngo ne xi ts'énda xtaa̱ xi to̱nsinié, xi to̱ntiboa, xi ki̱cha̱, xi ndi̱jo̱ ko̱jo xi yá, kui ni xi nde majiín be nde majín fií,
\v 21 kó kui xtaa̱ ti nde kats'énk'oyájín yojoo̱ kjo̱a̱a̱ nga kats'énk'ién xta̱, ti nde íjñámasienjín nga kats'én kjo̱a̱tji'e, ti nde íjñámasienjín kjo̱a̱tondo̱, ti nde íjñámasienjín nga kats'énchejé.
\c 10
\s Ndítsjiee̱ ko̱jo ndí xo̱jo̱o̱n
\p
\v 1 Kó kamábe an ingo ndítsjie xi tjiín nga'niú, xi ts'éndibájén ndi'ak'ajmii̱ nga tikónjin ngo ṉdi̱, kó ngo ndi̱'a̱ tikoón nga̱són to̱ko̱, kó kje̱n 'na̱ xikó maá ts'ueé, kó ti'mi̱í ja̱ kon yásé xi tjítí ma kon,
\v 2 kó ngu̱i̱ya tsja ts'énya'a ngo ndí ch'o̱ xo̱jo̱n xi kji'itie, kó se xi kixii̱ asiénsón nga̱soón ndáchíkoón, s'e̱ se xi skoón asiénsón nga̱soón t'ananguii̱,
\v 3 kó 'niú askandáyá, xikó maá ngo xandi̱je̱ xi kjandayá, kó nga askandáyá, yito cho̱'o̱n kats'énkjanie nda̱a̱.
\v 4 Kó nguije kanda'yá nda̱a̱ kui cho̱'o̱o̱n, je kuit'a an xo̱jo̱n katsaki, tanga ngo nda̱ tsint'ie an xi chji̱a̱ni ndi'ak'ajmi ján xi bi katsóna:
\p –Chje̱'étjé 'ma ji ni xi katsó nga yito cho̱'o̱o̱n, kó ngata̱ 'bít'ejín ji xo̱jo̱n.
\p
\v 5 Kó kui ndítsjie xi kamábe an nga sikón són ndáchíkoón ko̱jo t'ananguii̱, iskjinink'a tsja kixi̱ xtji̱e̱e̱n ndi'ak'ajmii̱,
\v 6 kó nguiboanéná katsó nga kats'énkjién ja'eén kui Néná xi tikón ngatsjé ni̱xtjii̱n, kui xi kats'énda ndi'ak'ajmii̱, t'ananguii̱, ndáchíkoón ko̱jo ngayeje ni xi tjín ngu̱i̱jii̱n, kó bi katsó:
\p –Je nguiti jmíjín ngase ni̱xtjin,
\v 7 nguije kjo̱chó chi̱bo̱a̱ nga kui ndítsjie xi ma yitoo̱ sa̱'ínkjanie tjioo̱, kjo̱tjosón kui ni xi tji'maá Néná, xi katsáyatjoón já chji̱ni̱e̱'e̱én, kui xi mosoo̱.
\p
\v 8 Kui nda̱ xi tsint'ie an kui xi kjindibáni ndi'ak'ajmi ján, ti tsíchji̱a̱jo nguinína, kó bi katsóna:
\p –T'en ji kó chjábe kui ndí ch'o̱ xo̱jo̱n xi kji'itiee̱ kui xi tjiyá tsja ndítsjie xi sikón kixi̱ nga̱soón ndáchíkoón ko̱jo nga̱soón t'ananguii̱.
\p
\v 9 Kijíkóo̱n kui ndítsjiee̱ kó tsí'áa̱ tsi̱'e̱ nga tsja̱ana kui ndí ch'o̱ xo̱jo̱o̱n, kó bi katsóna:
\p –Chjábe kó chini̱ ji, ngu̱i̱ya ndso̱'boe ixi xikoó ntsjieén ka̱ma, tanga ngu̱i̱ya nga̱nts'oe ka̱ma sa.
\p
\v 10 Kó iskjíbé an kui ndí ch'o̱ xo̱jo̱o̱n nga tjiyá tsja kui ndítsjiee̱, kó iskjinie an, kó ngu̱i̱ya ndso̱'boa an ixi kamá xikoó ntsjieén, tanga nguije iskjíni̱e̱ an, kamása ngu̱i̱ya nga̱nts'o̱a̱ an.
\v 11 Kó bi katsóna:
\p –Chjiénga k'uiyé nguiníi̱ ingo ndi̱ya xtaa̱ kjo̱a̱a̱ ni xi ko̱tso̱yaa ji Néná, ni xi sa̱'ínjo̱ tajñá nanguiní, tajñá ngu̱i̱ndiení, tajñá énní ko̱jo já ree̱.
\c 11
\s Nga jó chistikoo̱
\p
\v 1 Kó ngo yáxá katse'éna xikoó ngo yá xi ch'íchi̱bo̱a̱ni, kó bi ki'mína:
\p –Ti̱sítji̱n kó ch'i̱chi̱bo̱e̱ ji na̱ngo̱xi̱i̱ Néná, ko̱jo ṉcha̱n ndikoón, kó t'íxki̱ ji kui xi ki̱a̱ ndyi̱ts'endikón Néná.
\v 2 Tanga ngata̱ ch'íchi̱bo̱e̱jín ji ndi̱tsee̱n na̱ngo̱xi̱i̱, nga̱t'a̱ kui ngu̱i̱ndiee̱ xta̱ xi judío̱jín boá xi je kini'ánk'as'iee̱n, kó kui boá xi tsja̱nié tsja̱fe kui na̱xi̱ńdá tsjiee̱ yichán jó sá.
\v 3 Kó an sanguiya an jó chistiko̱ xi ko̱a̱ja̱ ṉjño tokjuie, nga ko̱tso̱ya én xi an katsjáa̱ ngo mi̱ jó úchán ichítié ko̱jo tie ni̱xtjin.
\p
\v 4 Nga jó kui chistikoo̱ kui boá nga jó yá olibo̱ ko̱jo nga jó ni xi 'bítíyá ndi'í xí ts'entsíjee̱n xi síndo kje̱n nínga tikón kui Néná xi tsi̱'e̱ t'ananguii̱.
\v 5 Kó tsi tjín xi mejeén sa̱'ín'oón, kui chistikoo̱ ndi'í 'boxiéni ts'oa, kó kui ndi'ií ts'enkjiéni ngayeje kondraa̱, kó bo̱a̱ ts'én nga ko̱ya ta 'yání xi mejeén tsi tjín xi ni sa̱'iín.
\v 6 Kui chistikoo̱ tjiín nga'niú tsi̱'e̱ nga ku̱i̱'íchjá ndi'ak'ajmii̱, tsi̱'e̱ nga ko̱a̱'ájín stseé kui ni̱xtjin nga ndyi̱tsáya én xi kixiyáa̱, kó ti tjiín nga'niú tsi̱'e̱ nga ndójoaa̱ jín sa̱'ín, ko̱jo tsi̱'e̱ nga sa̱'ínkja'atio kjo̱a̱ni̱ma̱ xtaa̱ kui t'ananguii̱ nga kji̱ndi̱bá ngayeje to̱ko̱ya ni xi ndajín, ta xikó tjín ndi̱ya mejénrií.
\v 7 Tanga nguije kamá xaá nga chistiko̱, kui cho̱ ch'o kji'i xi kjo̱tjoni tixa̱ na̱ngaa̱ t'ananguii̱ skjánjo̱, sa̱'iín s'e̱ sa̱'ínk'ién.
\v 8 Kó yojo k'iee̱n ki̱a̱ kjoyójo ngu̱i̱ya ndi̱yatieé kui na̱xi̱ńdá 'niú kui xi nga eén a̱sién ni̱xtjii̱n Sodoma̱ ko̱jo Ejipto̱ 'mí, nínga kini'ánk'ién Ndi̱a̱ná nga akjat'a kro̱.
\v 9 Kó xta̱ xi chji̱a̱ni kjín nangui, kjín xtín xta̱, én ko̱jo na̱xi̱ńdá xi ján ni̱xtjin masien sku̱i̱e̱ yojo k'iee̱n, kó tsja̱ndiéjín nga kjónijín.
\v 10 Kó kui xta̱ xi síndo t'ananguii̱ tsja ka̱maa̱ nga kju̱i̱e̱són kui chistikoo̱, achichí tsja k'uieé, kó ngaskande ni tsja̱á xkjín, nga̱t'a̱ nga jó kui já chji̱ni̱e̱'e̱én Néná boá xi tsie kjo̱a̱ni̱ma̱ kats'énkja'atio xtaa̱ kui nga̱sondiee̱.
\v 11 Kó nguije ja'a xi ján ni̱xtjin masiee̱n, Néná katsjaá ngo a̱sién ni̱xtjin xi tikón kó ti jastjíe̱n nguiní, kó ngayeje xta̱ xi kamábe, achichí katsakjónní.
\v 12 Kó nga jó chistikoo̱ tsint'ié ngo nda̱ xi 'niú kanda'yáni xi kjindibáni ndi'ak'ajmi ján xi bi katsoó:
\p –¡Ndibánijínguíjnú k'i̱e̱e̱!
\p Kó ngo ṉdi̱ kis'ijña són nga kijínijínguí ndi'ak'ajmii̱, kó kondraa̱ kamábe.
\v 13 Ti kuii̱ chi̱bo̱a̱ kis'ie ngo kjo̱a̱ndi̱ko̱n xi tanisién 'niú xi kats'énkixóndó ngo nga xki̱ tie ndi'a xi tjín kui na̱xi̱ńdaá, kó yito mi̱ xta̱ xi jesón, kó kui xta̱ xi takó kis'iṉdoo̱ achichí katsakjónní kó katsjaá kjo̱a̱je Néná xi tikón ndi'ak'ajmii̱.
\p
\v 14 Ja'a kui kjo̱a̱ni̱ma̱ xi ma joó, tanga tsá ndibá xi ma jaán.
\s Tjio xi ma yitoo̱
\p
\v 15 Kó xi ma yito ndítsjiee̱ kats'énkjanie tjioo̱ s'e̱ 'niú kanda'yá kjín nda̱ ki̱a̱ ndi'ak'ajmii̱ xi bi katsó:
\q Ngayeje nga̱sondiee̱ je Ndi̱a̱ná ko̱jo Kristoo̱ ko̱tíxomaa̱,
\q kó kuí xí ko̱tíxoma ngatsjé ni̱xtjii̱n.
\m
\v 16 Nga kan nijún xta̱ xi xchaá xi síndo kje̱n nínga tikón Néná xi botixómaá, kasaxixtien t'ananguii̱ kó kats'éndikón Néná,
\v 17 kó bi katsó:
\q Ndyi̱boe'éjne̱ ndok'óchji,
\q ji xi Ndi̱a̱a̱, kui Néná xi tjiín nga'niuú,
\q ji xi kui ji ko̱jo ji xi kamá ji,
\q nga̱t'a̱ je akake ji nga'niúu̱,
\q kó je ik'íts'i̱yée̱ nga tibotíxome.
\p
\v 18 Na̱xi̱ńdáa̱ je kats'énxchán,
\q tanga je jachó ni̱xtjin nga si̱'inxchín,
\q kui ni̱xtjin nga ji si̱'injée̱ xi je jesoón,
\q kó ko̱e̱'ée̱ ni xi sa̱ko̱ó mosóo̱ ko̱jo já chji̱ni̱e̱'ée̱n,
\q na̱xi̱ńdá tsjiée̱ ko̱jo xi ndyi̱bendikón ja'ée̱n,
\q tsi xchá ko̱jo tsi xi̱xi̱,
\q kó si̱'inkjatsén jí kui xi ndyi̱ts'enkjátsón t'ananguii̱.
\p
\v 19 Kó katjox'a na̱ngo̱xi̱i̱ Néná xi tikón ndi'ak'ajmii̱, kó ki̱a̱ na̱ngo̱xi̱i̱ kamáya kui koxa̱ xi índajo̱ni Néná ko̱jo xta̱ xi tsi̱'e̱, kó ja'at'e, kanda'yá nda̱, kanda'yá cho̱'o̱n, kjindibá ngo kjo̱a̱ndikón xí 'niú, kó ixó ndókoá.
\c 12
\s Naa̱ ko̱jo cho̱ tamá xí yito to̱koo̱
\p
\v 1 Kó kamáya ndi'ak'ajmi ján ngo chi̱bo̱a̱ xi tanisién je: ngo na̱ xi tjítsakjájón ts'ueé xikoó tsi chi̱nga̱a̱, kó saá nguindie se kui naa̱ kis'ijña, kó ngo korona̱ xi tjiín tiejó ṉño kis'ijñaa̱ to̱ko̱,
\v 2 kó kui naa̱ ndí ya'a, kó achichí askandáyajo̱ tsi̱ndi̱o̱o̱ ndií, nga̱t'a̱ tsie kjo̱a̱ni̱ma̱ ja'atio nga je stse̱n ndií.
\v 3 Kó kamáya ndi'ak'ajmi ján ingo chi̱bo̱a̱: ngo cho̱ tamá xi yito to̱ko̱ xi iní xi tie ndi̱ja̱ tjiín kó ngo korona̱ tji'á nga ngo nga ngo to̱ko̱ xi yitoo̱,
\v 4 kó ńts'en kui choo̱ iskjiféni ngo nga ján bo̱a̱ kji'i xikó kji'i ma ṉño xi tjín ndi'ak'ajmii̱, kó ki̱a̱ atítsojo nga̱soón t'ananguii̱, kó kui cho̱ tamá xí yito to̱koo̱ ki̱a̱ kasasien kje̱n nínga tikón kui na̱ xi je stse̱n ndií, tsi̱'e̱ nga skji̱ni̱e̱ kui ndií nguije katsen.
\v 5 Kó kui naa̱ ngo ndí xi̱'in kis'iee̱, kui xi tajá ts'én ko̱tíxomaa̱ ngayeje na̱xi̱ńdá xi tjín kuí nga̱sondiee̱, kó kachja'áxiín ndií kó tsanguínjo̱ nguindyi̱ko̱n Néná xi botixómaá.
\v 6 Kó kui naa̱ tsanga nínga tikón nangui kixií, nínga Néná íjñandaa̱ ngo ngu̱i̱ndie tsi̱'e̱ nga ki̱a̱ ko̱e̱'eé ni xi skji̱ni̱e̱ ngo mi̱ jó úchán ichítié ko̱jo tie ni̱xtjin.
\p
\v 7 Kó jaskan íts'i̱yanii̱ ngo kjo̱a̱xchán ndi'ak'ajmii̱: Ndítsjie nguito̱ko̱ xi 'mí Miyee̱ ko̱jo ndítsjie xi tjimájo̱ askjanjo̱ kui cho̱ tamá xí yito to̱koo̱. Kó kui cho̱ tamá xí yito to̱koo̱ nijan askjan ko̱jo ndítsjiee̱,
\v 8 tanga kamájiín kats'eén, kó nguiti jmí ngu̱i̱ndie kis'iejiín kui choo̱ ko̱jo ndítsjiee̱ ki̱a̱ ndi'ak'ajmii̱.
\v 9 Kó bo̱a̱ ts'én ikiyotji̱nguii̱ kui cho̱ tamá xí yito to̱koo̱ ki̱a̱ ndi'ak'ajmii̱, kui ye̱ xchaá xi 'mí xindajín diabloo̱ ko̱jo Satanaa̱, kui xi 'boṉcha̱jo ngayeje xtaa̱, kui choo̱ ko̱jo ndítsjiee̱ ki̱a̱ akatítsojosón nga̱són t'ananguii̱.
\p
\v 10 Kó tsint'ie an ngo nda̱ xi 'niú tsíchji̱a̱ ndi'ak'ajmii̱ xi bi katsó:
\p –Je je'e kjo̱a̱'naxié'aá, nga'niuú ko̱jo kjo̱a̱botíxomaa̱ Néná ko̱jo xaá Kristoo̱, nga̱t'a̱ je ikiyotji̱nguii̱ kui xi ts'énbonguíta'in ṉts'ié, kui xi nga ni̱xtjin ko̱jo nga ni̱xtji̱e̱n nga yínguíta'in nguindyi̱ko̱n Néná.
\v 11 Kó kui ṉts'ié je kats'eén ngat'aa̱ kui jín xi iskjitjón cho̱tsa̱nga̱a̱ ko̱jo kui én xí tsíchji̱a̱a̱, katsakjónjín nga xcha̱ja kjo̱a̱mindyioo̱n, tasá kamámejeén nga ngaskande jesón.
\v 12 Kuíni nga tsja ngatamaa̱ ndi'ak'ajmii̱, ko̱jo jún xi ki̱a̱ tindyiónjnú, tanga ni̱ma̱ xó kui xta̱ xi síndo t'ananguii̱ ko̱jo xi síndo ngu̱i̱jin ndáchíkoón, nga̱t'a̱ xindajín diabloo̱ je jachókónjnú nga 'niú tjíts'énxchán kó nga je be nga ta chiboa tsi ni̱xtjin tikoón.
\p
\v 13 Kó kui cho̱ tamá xí yito to̱koo̱ nga kamábe nga je akjajmisón t'ananguii̱, tsangatji̱nguii̱ kui na̱ xi je kis'iee̱ ngo ndí xi̱'ii̱n.
\v 14 Kó kui naa̱ jó nga̱a̱ ja̱ xi tanisién yi'i katse'eé, tsi̱'e̱ nga kjo̱tji̱e̱n kje̱n kui ye̱e̱ nga ko̱e̱je̱ nínga tikón ngu̱i̱ndiee̱ kui naa̱ ki̱a̱ nangui kixií, nínga ko̱e̱'eé ni xi skji̱ni̱e̱ ján nó masien.
\v 15 Kó kui ye̱e̱ achichí ndójoa kats'énkjasó, tsi̱'e̱ nga ngo ndeje' sa̱'índa xi kjo̱tjiboajo̱ kui naa̱.
\v 16 Kó t'ananguii̱ asíko̱jo kui naa̱, nga̱t'a̱ ngo tixa̱ iskjíx'á xikoó tsi ts'oa t'ananguii̱ kó katjéjén kui ndeje' xi kats'énkjasóni kui cho̱ tamá xí yito to̱koo̱.
\v 17 Kó tangat'anii̱ kui nii̱ nga kui cho̱ tamá xí yito to̱koo̱ achichí kats'énxchán kjo̱a̱a̱ kui xta̱chjo̱ón kó kijíkjánjo̱ ngayeje ndí xi ngasee̱ kui naa̱ kui xi ndyi̱nt'ié'én nga ndyi̱ts'enkjátjosón kjo̱a̱botíxomaa̱ Néná ko̱jo kui xi 'niátakón ni xi kats'én Jesukristoo̱,
\v 18 kó kui cho̱ tamá xí yito to̱koo̱ ki̱a̱ kis'ijñat'a ndáchíkoón.
\c 13
\s Nga jó cho̱ ch'o kji'ii̱
\p
\v 1 Kó kamábe an nga jatjo ngu̱i̱jin ndáchíkoón ngo cho̱ ch'o kji'i xi tjiín yito to̱ko̱ ko̱jo tie ndi̱ja̱, kó nga ngo nga ngo ndi̱ja̱a̱ ngo korona̱ kis'ijñaa̱ kó nga ngo nga ngo to̱ko̱ kis'iṉdoo̱ ja'én xi ch'o katsoó Néná.
\v 2 Kui cho̱ ch'o kji'i xi kamábe an, ja̱ kji'i xa sinié kji'i, kó se ja̱ kon se oso̱ kon, kó ts'oa xikó maá ts'oa xandi̱je̱. Kó kui cho̱ tamá xí yito to̱koo̱ katsjaá nga'niuú ko̱jo nga atíxoma ko̱jo achichí tsie xá katsjaa̱.
\v 3 Kó ngo to̱ko̱ kui cho̱ ch'o kji'ii̱ je mejeén ma k'ien, tanga kamándaya, kó ngayeje xtaa̱ t'ananguii̱ nga kijíndikoón kó kijítji̱nguii̱ kui cho̱ ch'o kji'ii̱,
\v 4 kó kats'éndikón kui cho̱ tamá xí yito to̱koo̱, nga̱t'a̱ kui xi katsjaá xá kui cho̱ ch'o kji'ii̱, kó ti kats'éndikón kui cho̱ ch'o kji'ii̱ nga bi katsó:
\p –¿'Yá xi bo̱a̱ kon xikoó kui cho̱ ch'o kji'ii̱, kó 'yá xi sa̱'iín nga skjánjo̱?
\p
\v 5 Kó katse'éndieé kui cho̱ ch'o kji'ii̱ tsi̱'e̱ nga nk'a tsíchji̱a̱ ko̱jo nga ch'o katsoó Néná, ko̱jo nga kis'iee̱ xá yichán jó sá.
\v 6 Kó ch'o katsoó Néná, kó ch'o katsoó ja'eén ko̱jo ngu̱i̱ndie ndikoón Néná ko̱jo ngayeje xi síndo ndi'ak'ajmii̱.
\v 7 Kó katse'éndieé tsi̱'e̱ nga skjánjo̱ xta̱ na̱xi̱ńdá tsjiee̱ Néná, ngaskande nga sa̱'iín. Ti katse'eé xá kjo̱a̱a̱ ngayeje xtín xta̱, nangui xi tjín, tajñá én xi tjín ko̱jo na̱xi̱ńdá xi tjín.
\v 8 Kó kui cho̱ ch'o kji'ii̱ xi sa̱'índíkón ngayeje xtaa̱ kui nga̱sondiee̱ xi kjit'ajín ja'eén xo̱jo̱n nínga tjít'a ja'eén xta̱ xi k'uíndo ngatsjé ni̱xtjin xi tsi̱'e̱ cho̱tsa̱nga̱ xi kini'ánk'ieén, xi je kjit'a ndeskande nga íts'i̱yanii̱ nga kamánda nga̱sondiee̱.
\p
\v 9 Tsi tjín xi tjín tji̱bo̱a̱nijon, ngatasienníjón kui eén:
\v 10 Tsi tjín xi ko̱e̱je̱ ndo̱bo̱a̱ya, ndo̱bo̱a̱ya konguínjo̱, kó xi ki̱cha̱ sa̱'ínk'iénni, ti chjiénga ki̱cha̱ ko̱yaní nga. K'i̱e̱ bí nga xcha̱ kjo̱a̱chiyákjo̱a̱a̱ ko̱jo kjo̱a̱s'ijii̱n xta̱ na̱xi̱ńdá tsjiee̱.
\p
\v 11 S'e̱ jaskan kamábe an ingo cho̱ ch'o kji'i xi jatjojin t'ananguii̱, kó jó ndi̱ja̱ yajaá xikoó ndi̱ja̱a̱ cho̱tsa̱nga̱a̱, tanga xikó maá cho̱ tamá xí yito to̱koo̱ bo̱a̱ ma ts'én tsíchji̱a̱.
\v 12 Kó kis'iee̱ xá xi katse'eé cho̱ ch'o kji'i xi tjoón, nguindyi̱ko̱n kui. Kó kui boá xi kats'eén kjo̱a̱'niú xtaa̱ kui t'ananguii̱ nga kats'éndikón kui cho̱ ch'o kji'i xi tjoón, kui xi kamándaya nga oo̱n to̱ko̱.
\v 13 Kó ti bo̱a̱ ti ts'én kats'én chi̱bo̱a̱ ko̱jo kjo̱a̱ndikón xi yi'i, ngaskande ndi'í kats'énkixó t'ananguii̱ xi kji̱ndi̱báni ndi'ak'ajmii̱, nguindyi̱ko̱n xtaa̱.
\v 14 Kó ts'aṉcha̱jo xtaa̱ t'ananguii̱ kjo̱a̱a̱ kui chi̱bo̱a̱ xi katse'eé nga sa̱'ín nguindyi̱ko̱n kui cho̱ ch'o kji'i xi tjoón, nga bo̱a̱ katsoó xtaa̱ tsi̱'e̱ nga sa̱'índa ngo a̱sie̱én kui cho̱ ch'o kji'i xi takó tikoón nda tsi je kini'án'ónnii̱ ngo ki̱cha̱ yojó.
\v 15 Kó kui cho̱ ch'o kji'i xi ma joó, katse'eé nga'niú tsi̱'e̱ nga tsja̱á kjo̱a̱mindyion a̱sie̱én kui cho̱ ch'o kji'i xi tjoón, tsi̱'e̱ nga kui a̱sie̱én xi ku̱i̱chji̱a̱ kó ka̱maa̱ sa̱'ínk'ién ngayeje xta̱ xi sa̱'índíkónjín.
\v 16 Kó kui boá xi kats'én nga si̱t'aa̱ ngo chi̱bo̱a̱ tsja kixi̱ ko̱jo tsi xtjien ngayeje xta̱ xi xchá xi kjindí, xi cho̱n ko̱jo xi ni̱ma̱, xi tjimándé ko̱jo xi moso̱ xi kastiñá,
\v 17 kó nde ngojín xi kamaá ts'atsie ko̱jo tsi atíñá ngo ni tsi jmíjiín chi̱bo̱a̱a̱ ko̱jo tsi ja'eén kui cho̱ ch'o kji'ii̱, ko̱jo tsi xki̱i̱ ja'eén.
\v 18 K'i̱e̱ tikón kui kjo̱a̱kjínkoón. Xi tjiín kjo̱a̱kjíntakón ngatamakjiín xki̱i̱ kui cho̱ ch'o kji'ii̱, kui xi xki̱i̱ xta̱ boá. Kui xki̱i̱ kui boá xi jun úchán ichítié ko̱jo tji'ún ngoo̱.
\c 14
\s Só xi kisie nga úchán ko̱jo yichán nijún mi̱ xtaa̱
\p
\v 1 Kó kamábe an cho̱tsa̱nga̱a̱ nga sikón són nga̱soón tji̱ngu̱i̱ Sioo̱n xi tikón Jerusale̱n, kó ki̱a̱ síndojo̱ úchán ko̱jo yichán nijún mi̱ xta̱ xi síndoo̱ xtjien ja'eén cho̱tsa̱nga̱a̱ ko̱jo ja'eén Na̱'mii̱.
\v 2 Kó tsint'ie an ngo nda̱ xi kjindibáni ndi'ak'ajmii̱, xi kanda'yá xikó ma ts'en fonie nga 'bóka nínga nk'aa̱ ndójoaa̱ ngo ndeje', xikó ma ts'en fonie ngo cho̱'o̱n, nda̱ xi tsint'ie an xikó maá tsi kjín xta̱ xi ndyi̱ts'enkjánié arpa̱.
\v 3 Kó ngo só tja̱tsi̱e̱ kisie kje̱n nínga tikón xi botixómaá ko̱jo kje̱n nínga síndo nga nijún kui xi síndoo ko̱jo kje̱n xta̱ xi xchaá, kó nde ngojín xta̱ xi kis'ijinkon nga kamaá kui soó, ta kuí tsi nga úchán ko̱jo yichán nijún mi̱ xta̱ xi je ik'íchjítjé nga ka'naxié'á ngu̱i̱jii̱n xta̱ xi síndo kui t'ananguii̱.
\v 4 Kuí bí xta̱ xi kats'éndándíjín yojoo̱ tsi ínchjín kis'iee̱, nga̱t'a̱ síndo xo̱ngo. Kuí bí xi kijítji̱nguii̱ cho̱tsa̱nga̱a̱ ta nínga kijí. Kuí bí xi ik'íchjítjé nga ka'naxié'á ngu̱i̱jii̱n já xi̱'in xi xikoó tsi ngo ni xi tjón xi kini'ánk'as'iee̱n Néná ko̱jo cho̱tsa̱nga̱a̱,
\v 5 kó nde ngo kjo̱a̱ndiso tsíchji̱a̱jín ts'oa, nga̱t'a̱ tanisién tsjie síndo nguindyi̱ko̱n xi botixómaá.
\s Eén nga ján ndítsjiee̱
\p
\v 6 Kó kamábe an ingo ndítsjie xi tso'bátji̱e̱n ngamasiee̱n ndi'ak'ajmii̱, kó ngo éntjatsi̱e̱ xi majiín fe ts'énya'a tsi̱'e̱ nga ku̱i̱'íni̱jmi̱í ngayeje xta̱ xi síndo t'ananguii̱, na̱xi̱ńdá, xtín xta̱, én ko̱jo xta̱ na̱xi̱ńdá,
\v 7 kó bi katsó nga 'niú tsíchji̱a̱:
\p –Cha̱ndikónjnú Néná kó te'éjnúu̱ kjo̱a̱je, nga̱t'a̱ je jachó oraa̱ nga kui xi ko̱tíjeé xta̱ nga̱sondiee̱, kó ti'andikónjnú kui xi kats'énda ndi'ak'ajmii̱, t'ananguii̱, ndáchíkoón ko̱jo ndańch'ií.
\p
\v 8 Kó kijítji̱nguii̱ ingo ndítsjie xi bi katsó:
\p –¡Je kini'ánkjatsón, je kini'ánkjatsón na̱xi̱ńdá Babilonia̱, kui xi kats'énch'i̱ ngayeje xta̱ na̱xi̱ńdá nga katsjaá binoo̱ kjo̱a̱tondoo̱!
\p
\v 9 Kó kui ndítsjie xi ma jaán jaskan kijítji̱nguii̱, kó achichí 'niú tsíchji̱a̱ nga bi katsó:
\p –Tsi tjín xi sa̱'índíkón kui cho̱ ch'o kji'ii̱ ko̱jo a̱sie̱én, kó tsi tsja̱ndié nga s'i̱jñaa̱ chi̱bo̱a̱a̱ xtjien ko̱jo tsi tsja,
\v 10 Néná sa̱'ínxchán kó 'niú sa̱'ínjeé, ngo kjo̱a̱ni̱ma̱ xi 'niú sa̱'ínkja'a ngu̱i̱jin ndi'í ko̱jo ngu̱i̱jin asufre̱ xi tjítí nguindyi̱ko̱n ndítsjiee̱ ko̱jo cho̱tsa̱nga̱a̱.
\v 11 Kó ṉdi̱i̱ kui kjo̱a̱ni̱ma̱ xi kjo̱a̱'atio, ngatsjé ni̱xtjin nga ko̱e̱je̱ nijínguí. Kó sa̱'ínkja'yájín nga ni̱xtjin ko̱jo nga ni̱xtji̱e̱n kui xi kats'éndikón kui cho̱ ch'o kji'ii̱ ko̱jo a̱sie̱én ko̱jo xi iskjíbé chi̱bo̱a̱a̱ ja'eén.
\p
\v 12 K'i̱e̱ bí nínga xcha̱ kjo̱a̱chiyákoón xta̱ na̱xi̱ńdá tsjiee̱, kui xi ts'enkjátjosón kjo̱a̱botíxomaa̱ Néná ko̱jo xi s'ijii̱n Kjisoo̱.
\p
\v 13 Kó tsint'ie an ngo nda̱ xi kjindibáni ndi'ak'ajmii̱ xi bi katsóna:
\p –Tít'e ji xo̱jo̱n kui nii̱: “Achichí ra tsjaa̱ kui xta̱ xi ko̱ya nga je kats'éngojo̱ yojoo̱ Ndi̱a̱ná ngayeje kui ni̱xtjin xi fií.”
\p “Jo̱o̱n, tsó A̱sién Ni̱xtjii̱n, sa̱'ínkja'yájo̱ kjo̱a̱ni̱ma̱ ko̱jo kjo̱a̱ni'ii̱n, nga̱t'a̱ Néná tsja̱á ngo chjí kjo̱a̱a̱ ni nda xi je kats'én.”
\s T'ananguii̱ je ikichá ni xi kamátji̱e̱e̱
\p
\v 14 Kó kamábe an ngo ṉdi̱ tiboa, kó nga̱soón kui ṉdi̱i̱ tikónsón ngo xi ja̱ kji'i ndií nda̱ xi̱'ii̱n ma kji'i, kui xi tikoón ngo korona̱ xi to̱nsinié to̱ko̱ kó ngo ki̱cha̱ ṉt'i̱u̱a̱ kjiya tsja.
\v 15 Kó ingo ndítsjie jataxieni ngu̱i̱ya na̱ngo̱xi̱i̱ xi 'niú askandáyaá nga tsíchji̱a̱jo kui xi tikónsón ṉdi̱i̱ kó bi katsoó:
\p –¡Je kamáxchá ni xi tjitji̱e̱ t'ananguii̱, tichéje̱ni ji ki̱cha̱ ṉt'i̱u̱a̱a̱, nga̱t'a̱ je jachó oraa̱, je kichjí!
\p
\v 16 Kó kui xi tikónsón ṉdi̱i̱ kats'énkja'a ki̱cha̱ ṉt'i̱u̱a̱a̱ t'ananguii̱, kó ja'á'yá ni xi kamáxchá kui nga̱sondiee̱.
\p
\v 17 Kó ingo ndítsjie jataxie na̱ngo̱xi̱ xi tikón ndi'ak'ajmii̱, kó ti ngo ki̱cha̱ ṉt'i̱u̱a̱ xi yojó tjiyá tsja.
\v 18 Kó ingo ndítsjie jatjoni ki̱a̱ nínga tikón ṉcha̱n ndikoón kui xi tjiín xá nga ko̱tíxomaa̱ ndi'ií kó 'niú tsíchji̱a̱jo kui ndítsjie xi ya'a ki̱cha̱ ṉt'i̱u̱a̱ xi yojoó kó bi katsoó:
\p –¡Tichéje̱ni ji ki̱cha̱ ṉt'i̱u̱a̱ yojóo én tostsi̱je xi tjín t'ananguii̱, nga̱t'a̱ je kichjí tostsi̱je̱é!
\p
\v 19 Kó kui ndítsjiee̱ kats'énkja'a ki̱cha̱ ṉt'i̱u̱a̱a̱ nga̱són t'ananguii̱ kó tsatie tostsi̱je xi tjitji̱e̱ nínga maxchá tostsi̱je̱é k'i̱e̱ t'ananguii̱, s'e̱ jaskan indyiá ngo ni xi tanisién je, kui xi ni'ánts'inguíni kui too̱ kó kui nii̱ xi bokó kjo̱a̱xcha̱án Néná.
\v 20 Kó kajnánié ndi̱tsee̱n na̱xi̱ńdaá ki̱a̱ nínga kini'ánts'inguí tostsi̱je̱é, kó kui ni xi tjinguií nínga kji'bóka ndójoaa̱, jín jatjo, kó ngaskande nínga tikón ki̱cha̱ xi foa'a ts'oa ndi̱je̱e̱ ki̱a̱ kjin jachó kui jiín, kó ján úchán kilometro̱ nínga kixindyia.
\c 15
\s Ndítsjie xi ndyi̱ya'a yito kjo̱a̱ni̱ma̱a̱
\p
\v 1 Kó kamábe an ndi'ak'ajmi ján ingo chi̱bo̱a̱ xi je ko̱jo xi kijíndikónna: Yito ndítsjie xi ndyi̱ya'a nga yito kjo̱a̱ni̱ma̱ xi fet'aa̱, kui xi fet'ani kjo̱a̱xcha̱án Néná.
\p
\v 2 Kamábe an ngo ni xi ja̱ kji'i ngo ndáchíkón xi chi̱tsen xi ts'ájinni ndi'í kji'i, kó kui xta̱ xi kats'eén cho̱ ch'o kji'ii̱ ko̱jo a̱sie̱én ko̱jo chi̱bo̱a̱a̱ ja'eén ko̱jo xki̱i̱, ki̱a̱ ndyi̱a̱ kixi̱ t'a kui ndáchíkón xi chi̱tse̱én nga ndyi̱ya'a arpa̱ xi Néná katsjaá.
\v 3 Kó kisie soó Moisee̱, mosoo̱ Néná, ko̱jo soó cho̱tsa̱nga̱a̱. Bi tsó kui soó:
\q Achichí je ko̱jo fíndikónná ngayeje ni xi kini'índe,
\q jí xí Ndi̱a̱ná kui xi Néná xi tjiín nga'niuú,
\q kixi̱ ko̱jo ja̱koxi̱ boá ndi̱yáa̱,
\q jí xí Ree̱ ngayeje xta̱ na̱xi̱ńdá tsjie.
\q
\v 4 ¿'Yá xi stsa̱kjonjiín, Ndi̱a̱?
\q ¿'Yá xi tsja̱ajiín kjo̱a̱je ja'ée̱n?
\q Nga̱t'a̱ ta jí tsi xi tsjie ji,
\q kuíni nga ngayeje na̱xi̱ńdá kji̱ndi̱bá kó sa̱'índíkoón,
\q nga̱t'a̱ je akake ji nga tanisién kixi̱ ji.
\p
\v 5 Kó jaskan nguije kamá kui nii̱ askotsijen an kó kamábe an ndi'ak'ajmii̱ nga katjox'a ngu̱i̱ndie ndikoón Néná, nínga tikón ṉcha̱n ndikón chistikoo̱,
\v 6 kó ki̱a̱ kui na̱ngo̱xi̱i̱ jatjo kui xi yito ndítsjie xi ndyi̱ya'a nga yito kjo̱a̱ni̱ma̱a̱, nga ndyi̱yajá ṉjño nda xi tsjie ko̱jo xi 'na̱, kó tji̱xi̱n xí to̱nsinié ndyi̱ya'a xtji̱e̱e̱n ni̱se̱e̱n.
\v 7 Kó ngo kui xi síndoo katsjaá nga ngo nga ngo kui ndítsjiee̱ ngo chi̱tsen xí to̱nsinié xi tjikítsie ma kjo̱a̱xcha̱án Néná, kui Néná xi tikón ngatsjé ni̱xtjii̱n.
\v 8 Kó kui ndo̱bo̱a̱néná kis'ikitsie ma ṉdi̱ xi kji̱ndi̱báni kjo̱a̱a̱ kjo̱a̱jee̱ ko̱jo nga'niuú Néná, kó nde ngojín xi kamaá ts'as'ien ki̱a̱a̱ ngaskande nga jatjosón nga kamá nga yito kui kjo̱a̱ni̱ma̱ xi ndyi̱ya'a kui ndítsjiee̱.
\c 16
\s Chi̱tsen xi ndyi̱a̱ kjo̱a̱xcha̱án Néná
\p
\v 1 Kó tsint'ie an ngo nda̱ xi 'niú tsíchji̱a̱ xi jatjoni na̱ngo̱xi̱i̱, kó bi katsoó nga yito kui ndítsjiee̱:
\p –Tanguínjnú kó chjatjónjnú nga̱soón t'ananguii̱ nga yito kui chi̱tse̱én nínga ndyi̱a̱ kjo̱a̱xcha̱án Néná.
\p
\v 2 Kui ndítsjie xi tjoón kijí kó iskjitjónjón nga̱soón t'ananguii̱ ni xi ndyi̱a̱ chi̱tse̱én, kó ngayeje kui xta̱ xi ndyi̱ya'a chi̱bo̱a̱a̱ kui cho̱ ch'o kji'ii̱ ko̱jo xi kats'éndikón a̱sie̱én, ṉdo̱ xi ndajín ko̱jo xi on jatjoo̱ ngayeje yojoo̱.
\p
\v 3 Kó ndítsjie xi ma joó, iskjitjónjón nga̱soón ndáchíkoón ni xi ndyi̱a̱ chi̱tse̱én, kó ndójoaa̱ ndáchíkoón jín kamá, xikó maá jiín ngo nda̱ xi kini'ánk'ién, kó ngayeje cho̱, xta̱ ko̱jo xka̱ xi tjín ngu̱i̱jin ndáchíkoón jesón.
\p
\v 4 Kó ndítsjie xi ma jaán, iskjitjónjón nga̱soón ngayeje xo̱nga ko̱jo ndańch'i ni xi ndyi̱a̱ chi̱tse̱én kó jín kamá kui ndójoaa̱.
\v 5 Kó tsint'ie an nga ndítsjie xi tsi̱'e̱ ndójoaa̱ bi katsó:
\p –Jí xi kixi̱ ji, jí xi ji, Ndi̱a̱, jí xi kamá ji ngas'e̱, jí xi tsjie ji, nga̱t'a̱ jí xi kini'ínjée̱ kui nii̱,
\v 6 nga̱t'a̱ kuí jaá xi iskjitjón jiín xta̱ na̱xi̱ńdá tsjiée̱, ko̱jo já chji̱ni̱e̱'ée̱n, kó ngot'e̱ 'ne̱ jí xi tiboe'ée̱ nga jín ndyi̱'bi. ¡Nda kamaá!
\p
\v 7 Kó ti tsint'ie an nga tsíchji̱a̱ ngo xi tikón ṉcha̱n ndikoón xi bi katsó:
\p –Jo̱o̱n, jí xi Ndi̱a̱ná xi tjiín nga'niú, jí xi ja̱koxi̱ ji ko̱jo jí xi kixi̱ ni'ínjé ji.
\p
\v 8 Kó ndítsjie xi ma nijuún iskjitjónjón ts'ueé ni xi ndyi̱a̱ chi̱tse̱én, kó katsjaá nga'niú ts'ueé tsi̱'e̱ nga ka̱ma sa̱'ínchjaán xtaa̱.
\v 9 Kó ngayeje xtaa̱ nga kats'énchjaán sibeé ts'ueé, tanga kui xtaa̱ ti kuí xí kats'énk'oyájín yojoo̱, ti nde katsjájiín kjo̱a̱je Néná, tasá ch'o katsoó ja'eén kui Néná xi tjiín nga'niuú kjo̱a̱a̱ kui kjo̱a̱ni̱ma̱a̱.
\p
\v 10 Kó ndítsjie xi ma uún iskjitjónjón nínga botixómá kui cho̱ ch'o kji'ii̱ ni xi ndyi̱a̱ chi̱tse̱én, kó ngayeje nínga botixómá kamájñó, kó kui xtaa̱ ngaskande iskjinieya ma naje̱n nga on kamaá,
\v 11 tanga nde bo̱a̱ ts'én kats'énk'oyájín yojoo̱ nga kats'én ni xi ndajín, tasá ma tangat'anii̱ nga on kamaá ko̱jo kjo̱a̱a̱ kui ṉdo̱ xi tsajaá nga ch'o katsoó kui Néná xi tsi̱'e̱ ndi'ak'ajmii̱.
\p
\v 12 Kó ndítsjie xi ma juu̱n iskjitjónjón ndeje' xi 'mí Éufratee̱ ni xi ndyi̱a̱ chi̱tse̱én, kó ndójoaa̱ kui ndejeé' kixí, tsi̱'e̱ nga ka̱ma kjo̱a̱'a kui já ree̱ xi ndibání xtji̱e̱e̱n nínga fotjo ts'ueé.
\p
\v 13 Kó kamábe an nga ki̱a̱ ts'oa cho̱ tamá xí yito to̱koo̱, ts'oa cho̱ ch'o kji'ii̱, ko̱jo ts'oa nda̱ chji̱ni̱e̱'én ndisoó, jatjoni ján a̱sién ni̱xtjin xi ndajín xi ja̱ kon xkji̱e̱ ma kon,
\v 14 nga̱t'a̱ a̱sién ni̱xtjii̱n xindajín boá, xi kats'én kjo̱a̱ndikón kó kijík'ítikó ngayeje já re xi chji̱a̱ni kui nga̱sondiee̱ tsi̱'e̱ nga skjánjo̱ kui Néná xi tjiín nga'niuú. Bo̱a̱ sa̱'ín nga kjo̱chó ni̱xtjin nga Néná ko̱tíjeé ngayeje xta̱ nga̱sondiee̱.
\v 15 “Tsitsíjenjnúu̱, nga an kji̱ndi̱bá an xikoó ngo nda̱ xi chejé. Achichí ra tsjaa̱ xi kjóféjín ko̱jo xi ndyi̱yajá ṉjñoo̱, tsi̱'e̱ nga kjótso'bá kji'ixtíjín kó xcha̱jín kjo̱a̱soboaá kjo̱a̱kji'ixtií.”
\v 16 Kó kui a̱sién ni̱xtjii̱n xindajiín ítikó ngayeje já re ki̱a̱ ngu̱i̱ndie xi 'mí Armajedoo̱n nga én ebreo̱.
\p
\v 17 Kó ndítsjie xi ma yitoo̱ iskjitjón ngu̱i̱jin a̱sie̱én ni xi ndyi̱a̱ chi̱tse̱én, kó ndeskande nínga tikón na̱ngo̱xi̱ ndikoón Néná xi botixómaá jatjo ngo nda̱ xi 'niú tsíchji̱a̱ xi bi katsó:
\p –¡Je kamá!
\p
\v 18 Kó ja'at'e, kanda'yá nda̱, janie cho̱'o̱n, kó jatsié t'ananguii̱ tangat'anii̱ ngo kjo̱a̱ndikón xi tanisién 'niú xí kamá, xi kji̱e̱ ngo ndi̱ya ma ndeskande koó nga tjín xta̱ kui nga̱sondiee̱.
\v 19 Kó kui na̱xi̱ńdá 'niuú ján tjín kamá, kó ngayeje na̱xi̱ńdá xí tjín nga̱sondiee̱ ixóndó, kó Néná ja'átsjiee̱n kui na̱xi̱ńdá 'niú xi 'mí Babilonia̱, tsi̱'e̱ nga sa̱'ínk'i binoo̱ kjo̱a̱xchán 'niuú Néná.
\v 20 Kó ngayeje tji̱ngu̱i̱ ko̱jo ngayeje k'ijñá ko̱jo na̱xi̱ kichajá.
\v 21 Kó ndi'ak'ajmi ján kjindibáni nga ixó nga̱soón xtaa̱ ndókoá xi ts'atio yichán kilo̱ eé, kó xtaa̱ ch'o katsoó Néná kjo̱a̱a̱ kui kjo̱a̱ni̱ma̱ xi'bi̱, nga̱t'a̱ tanisién 'niú je kui kjo̱a̱ni̱ma̱ xi kamaá.
\c 17
\s Nga kini'ánjeé na̱ masiee̱n
\p
\v 1 Kó ngo kui ndítsjie xi yitoo̱, kui xi ndyi̱ya'a nga yito chi̱tse̱én, kjindibákónna, kó bi katsóna:
\p –Ja̱bí'i̱n, tsi̱'e̱ nga kokóo̱ xikó ts'én ka̱majeé kui na̱ masien xi tikónsón nga̱són ndójoaa̱,
\v 2 kui xi ngayeje já ree̱ kui t'ananguii̱ je kis'iejo̱, kó ngayeje xtaa̱ kui t'ananguii̱ je kats'ejo̱ binoo̱ kjo̱a̱tondoo̱.
\p
\v 3 Kó jaskan kui ni xi akóna kui A̱sién Ni̱xtjii̱n Néná, kui ndítsjiee̱ kijíjo̱na ngo nangui kixí, kó ki̱a̱ kamábe an ngo na̱ xi tikónsoón ngo cho̱ ch'o kji'i xi iní a̱sie̱én, kui xi ngayeje yojoo̱ nga kjit'aa̱ ja'én nínga ch'o tjítsoó Néná. Yito ma to̱ko̱ ko̱jo tie ndi̱ja̱ xi tjiín kui choo̱.
\v 4 Kó kui naa̱ ṉjño xi iní 'niú ko̱jo xi iní nda yajá, kó yajáyaá ni xi to̱nsinié, xi ndi̱jo̱ tsjakon ko̱jo to ixkí', kó ngu̱i̱ya tsja ts'énya'a ngo chi̱tsen xí to̱nsinié xi tjikítsie ma ni xi tanisién 'niú ch'o kji'i ko̱jo ni xi ndándií kjo̱a̱tondoo̱,
\v 5 kó xtjien kjit'aa̱ ngo ja'én xi tji'má xi bi tsó: “BABILONIA̱ NA̱XI̱ŃDÁ XI JE, KUI BOÁ XI NA̱AA̱ NGAYEJE ÍNCHJÍNMASIEN KO̱JO NGAYEJE NI XI TANISIÉN 'NIÚ CH'O KJI'I XI TJÍN KUÍ NGA̱SONDIEE̱.”
\v 6 Kó kamábe an nga kui naa̱ kamá ch'i̱ni jiín xta̱ na̱xi̱ńdá tsjiee̱ Néná ko̱jo jiín xta̱ xi jesónni tangat'aa̱ nga chistikoo̱ Kjisoo̱ kamá. Nga kamábe an, achichí kijíndikónna.
\v 7 Kó kui ndítsjiee̱ bi katsóna:
\p –¿Mí kjo̱a̱a̱ nga fíndikoón ji? K'i̱e̱ xiyaá kjo̱a̱a̱ ni xi tji'maá kui naa̱ ko̱jo kui cho̱ ch'o kji'i xi tikónsoón, kui xi tjiín yito to̱ko̱ ko̱jo tie ndi̱ja̱a̱.
\v 8 Kui cho̱ ch'o kji'i xi je kamáye ji, kui boá xi kis'ijña ngas'e̱, tanga je nguiti jmíjín ngot'e̱, tanga ki̱a̱ kjo̱tjoni tixa̱ na̱ngaa̱ t'ananguii̱ nga kji̱ndi̱bá nguindiee̱ nga xcha̱ja, kó xtaa̱ kui nga̱sondiee̱ kui xi kjit'ajín ja'eén xo̱jo̱n nínga tjít'a ja'eén xta̱ xi k'uíndo ngatsjé ni̱xtjin ndeskande koó nga ítjats'ennii̱ kui nga̱sondiee̱, achichí ko̱e̱je̱ndikoón nga sku̱i̱e̱ kui cho̱ ch'o kji'ii̱ xi kis'ijñaa̱, kui xi nguiti jmíjín ngot'e̱, tanga kji̱ndi̱bá nguiní.
\p
\v 9 Tsi̱'e̱ nga ka̱makjínná kui nii̱ kjo̱a̱kjínkón chjieén: Nga yito to̱koo̱, kuí xí tsoó nga yito na̱xi̱ nínga tikónsón kui naa̱, kó ti kuíni nga yito ree̱,
\v 10 ún kui ree̱ xi je jesón, ngo xi je ts'énbotixómá kó xi ingoo̱ kji̱e̱ foe'ejín, tanga nguije kjo̱e̱'e, tsiejín k'o̱ndíyaá.
\v 11 Kó kui cho̱ ch'o kji'ii̱ kui xi kui kamaá tanga kuijín, kui boá xi ma jii̱n, nda tsi ti kui boá ngo xi yitoo̱, kó ki̱a̱ ts'énfí nínga xcha̱ja ngatsjé ni̱xtjin.
\p
\v 12 Kó nga tie ndi̱ja̱ xi je kamáye ji, kui boá nga tie já ree̱ xi kji̱e̱ 'bítsi̱yajiín nga ko̱tíxoma, tanga ta ngo tsi oraa̱ nga sa̱ko̱ó xá nga xikoó ree̱, kui ko̱jo kui cho̱ ch'o kji'ii̱.
\v 13 Nga tie kui já ree̱ je nijan síndo nga índa nga tsja̱á nga'niuú ko̱jo xaá kui cho̱ ch'o kji'ii̱.
\v 14 Kuii̱ xi skjánjo̱ cho̱tsa̱nga̱a̱, tanga cho̱tsa̱nga̱a̱ sa̱'iín, nga̱t'a̱ kui boá xi Ndi̱a̱a̱ ndi̱a̱ ko̱jo Ree̱ re, kó kui xta̱ xi ki̱a̱ nijan síndojo̱ kui boá xi Néná tsíchji̱a̱a̱ nga xta̱ xi 'niátakón.
\p
\v 15 Kó kui ndítsjiee̱ ti bi ti katsóna nga:
\p –Ndeje' xi kamáye ji, nínga tikónsón kui na̱ masiee̱n, kui boá xi nangui, xi xta̱, xi én ko̱jo xi na̱xi̱ńdá.
\v 16 Kó nga tie kui ndi̱ja̱a̱ kui cho̱ ch'o kji'i xi je kamáye ji, kui boá xi sa̱'ínch'ó na̱ masiee̱n, kó ku̱i̱'íjñámasien kó ku̱i̱'íjñá kji'ixtí, skji̱ni̱e̱ yojoo̱, kó ngu̱i̱jin ndi'í ku̱i̱'ítí.
\v 17 Nga̱t'a̱ Néná je íjii̱n ngu̱i̱jin ini̱ma̱a̱ tsi̱'e̱ nga sa̱'ín ni xi mejeén kui: índa tsi̱'e̱ nga sa̱'ínk'as'iee̱n ngu̱i̱ndie nínga botixómá kui cho̱ ch'o kji'ii̱, ngaskande nga kjo̱tjosón ni xi katsó Néná.
\v 18 Kó kui na̱ xi je kamáye ji, kui boá kui na̱xi̱ńdá 'niú xi botixómaá ngayeje já ree̱ kui t'ananguii̱.
\c 18
\s Nga kini'ánkjatsón na̱xi̱ńdá Babilonia̱
\p
\v 1 Nguije kamá kui nii̱, kamábe an ingo ndítsjie xi ts'éndibájáyani ndi'ak'ajmii̱ xi achichí nga'niú tjiín, kó kjo̱a̱jee̱ kats'éntsijenni ngayeje t'ananguii̱.
\v 2 Kó 'niú askandáyá nga bi katsó:
\p –Je kini'ánkjatsón, je kini'ánkjatsón na̱xi̱ńdá 'niú Babilonia̱, kui xi ndi'aa̱ xindajín je kamá, ko̱jo ngu̱i̱ndie nínga síndo ngayeje to̱ko̱ya a̱sién ni̱xtjin xi ndándí, ndo̱bo̱a̱a̱ ngayeje to̱ko̱ya cho̱ xi tjiín nga̱ ko̱jo tixa̱a̱ cho̱ tamá xi ch'o xi ka̱majín xi̱ni̱e̱,
\v 3 nga̱t'a̱ ngayeje na̱xi̱ńdá nga ti bo̱a̱ ti kats'én nga kats'éntsjajo̱ ne xi kats'énda xtaa̱, já re xi chji̱a̱ni t'ananguii̱ ti bo̱a̱ ti kats'én, kó xta̱ xi botiñá ni xi chji̱a̱ni t'ananguii̱ kamácho̱nni tangat'anii̱ nga kui naa̱ taxkiya kats'énkjién too̱n nga ts'atsie ni nga kats'énkjatjosón ni xi ndajín xi kamámejeén.
\p
\v 4 Kó tsint'ie an ingo nda̱ ki̱a̱ ndi'ak'ajmii̱ xi bi katsó:
\p –Tja̱tjójnú kui na̱xi̱ńdaá, jún xi xta̱ na̱xi̱ńdána jún, tsi̱'e̱ nga ko̱jo júnjín nijan si̱'anjéjo̱jnú, ti nde ko̱jo júnjín sa̱kójnú kjo̱a̱ni̱ma̱ xi kjo̱a̱'ajin,
\v 5 nga̱t'a̱ jeé je jachó ngaskande ndi'ak'ajmii̱, kó Néná je ja'átsjiee̱n ni xi ndajín xi ndyi̱ts'en.
\v 6 Te'éjnúu̱ ti kuii̱ ni xi katsjaá kje̱'e, kó jó bo̱a̱ kji'i t'íchjíjnúu̱ xikó kji'i ni xi je kats'én, jó bo̱a̱ kji'i ti'ank'ájinjnúu̱ kui ni xi k'uí, xikó kji'i kats'énk'ájii̱n xi katsjaá kje̱'e.
\v 7 Ti'ankja'atiojnú kjo̱a̱ni̱ma̱ ko̱jo nga kjandá xikó ts'én tsja kamaá nga je kamaá yojoo̱ ko̱jo nga katse'eé kjo̱a̱je nga kats'énkjién too̱n. Nga̱t'a̱ bi tsó ini̱ma̱a̱: K'i̱e̱ tikón an xikoó ngo na̱ reina̱, chjoón k'án xi je k'ien xi̱'ii̱njín an, kó jmí xa̱'ya̱ skuiejín an,
\v 8 kuíni nga ta ngo tsi ni̱xtjin nga sa̱ko̱ó ngayeje kui kjo̱a̱ni̱ma̱a̱: xikoó kjo̱a̱bo̱yaa̱, kjo̱a̱ndasen ko̱jo kjindiaá, kó ngu̱i̱jin ndi'ií ku̱i̱ti, nga̱t'a̱ achichí nga'niú tjiín Néná, kui Ndi̱a̱ xi botíjeé.
\p
\v 9 Kó kui já ree̱ t'ananguii̱ xi kats'éntsjajo̱ yojoo̱ ko̱jo kui naa̱ ko̱jo xi taxkiya kats'énkjién too̱n, ska̱ndá kó ni̱ma̱ ka̱tso̱ tangat'anii̱ kui, kji'a nga sku̱i̱e̱ ṉdi̱i̱ nga ku̱i̱ti,
\v 10 kjin k'uíndonii̱ tangat'anii̱ nga tsakjoón jeé, kó bi ka̱tso̱:
\p –¡Ni̱ma̱ xó, Ni̱ma̱ xó ji, na̱xi̱ńdá 'niú, Babilonia̱, na̱xi̱ńdá xi tjiín nga'niú! Nga̱t'a̱ nga ta ngo tsi ora̱ ja'a nga akatíjeé.
\p
\v 11 Kó ngayeje xtaa̱ kui t'ananguii̱ xi botiñá nii̱ xi ska̱ndá ko̱jo ni̱ma̱ ku̱i̱chji̱a̱ tangat'anii̱ kui na̱xi̱ńdaá, nga̱t'a̱ nguiti jmíjín xi k'o̱tsiee̱ ni xi ko̱tíñá, xikoó:
\v 12 ni xi to̱nsinieé, to̱ntiboaa̱, ndi̱jo̱ tsjakoo̱n, to ixkií', ṉjño xi nda ko̱jo ṉjño xiraa̱, ṉjño xi iní 'niú ko̱jo xi iní nda, ko̱jo ngayeje to̱ko̱ya yásije̱n, ni xi kamándani ndi̱ja̱a̱ ki̱ña̱, yá, bronse̱, ki̱cha̱ ko̱jo ndi̱jo̱ mármo̱l,
\v 13 tji̱bo̱a̱ kanera̱ ko̱jo tosije̱n, ni sije̱n xi ni'ánkjién nga ni'ándikón Néná, ndasíje̱n chjí xi 'mí mirra̱, ndasíje̱n xi kje̱'e, bino̱, isti̱, ndso̱ko̱a̱n ṉño̱ xi kix'i ko̱jo to ndso̱ko̱a̱n ṉño̱, cho̱ xi 'biñájanjo̱ ch'ia, cho̱tsa̱nga̱, ndi̱je̱, karro̱, ko̱jo ngaskande moso̱ xi stiñá, ko̱jo ini̱ma̱a̱ xta̱.
\v 14 Kó bi ka̱tso̱o̱ nangui Babilonia̱:
\p –¡Je nguiti jmíjiín kjo̱a̱cho̱n xi achichí kamátsjaá! ¡Je kichajá ngayeje ni tsjakon xi kis'iee̱! ¡Kó nguinijánjín sa̱ko̱ó kui nii̱!
\p
\v 15 Kui xta̱ xi atíñá ko̱jo xi ts'atsie nii̱ ko̱jo xi kamácho̱n ndok'óchjinií na̱xi̱ńdaá, kjin k'uíndonii̱ nga ska̱ndá ko̱jo nga ni̱ma̱ ka̱tso̱ tangat'anii̱ nga stsa̱kjonní nga sa̱tíjeé kui na̱xi̱ńdaá,
\v 16 kó bi ka̱tso̱:
\p –¡Ni̱ma̱ xó, ni̱ma̱ xó ji, na̱xi̱ńdá 'niú! Kui xi yajá ṉjño nda, ṉjño xi iní 'niú ko̱jo xi iní nda, xi kini'ánchonnii̱ ni to̱nsinié, to ixkí' ko̱jo ndi̱jo̱ xi tsjakon,
\v 17 nga̱t'a̱ nga ta ngo chií ora̱ nga kichajá ngayeje kui kjo̱a̱cho̱o̱n.
\p Kó ngayeje já xi ts'énxájo̱ tjotso yi'i ngu̱i̱jin ndáchíkoón ko̱jo ngayeje xta̱ xi ndyi̱ts'enxájin ngu̱i̱jin ndáchíkoón kjin kis'iṉdoni,
\v 18 nga kamábe ṉdi̱i̱ nga kití kui na̱xi̱ńdaá, bi katsó nga askandáyá:
\p –¿Ñá na̱xi̱ńdá xi bo̱a̱ ma kji'i xikoó xi'bi̱?
\p
\v 19 Kó xa̱ iskjitjónjón to̱ko̱, askandá ko̱jo ni̱ma̱ katsó, kó bi katsó nga askandáyá:
\p –¡Ni̱ma̱ xó, ni̱ma̱ xó ji, na̱xi̱ńdá 'niú! Kjo̱a̱cho̱n xi kamácho̱nni ngayeje xi kis'iee̱ tjotso yi'i ngu̱i̱jin ndáchíkoón, kó ta ngo tsi ora̱ nga kini'ánkjié.
\v 20 Ji, ndi'ak'ajmi, tsja ngatamaa̱ tangat'anii̱ ni xi kamaá kui na̱xi̱ńdaá, kó tsja ngatamajnú jún xi xta̱ na̱xi̱ńdá tsjiee̱, ko̱jo já apostro̱ ko̱jo já chji̱ni̱e̱'én, nga̱t'a̱ Néná nguije kixi̱ ts'én atíjeé, je kats'éngojo̱ ni xi kini'ánjo̱jnú jún.
\p
\v 21 Kó ngo ndítsjie xi 'niú tjiín nga'niú iskjinink'a ngo ndi̱jo̱ xi ja̱ kji'i ndi̱jo̱ jee̱ molino̱ ma kji'i, kó ts'ajmijin ngu̱i̱jin ndáchíkoón kó bi katsó:
\p –Bi ts'én si̱'ankjatsoón jí na̱xi̱ńdá 'niú Babilonia̱, kó nguinijánjín xcha̱ ngasee̱.
\v 22 Kó nguinijánjín ko̱nda'yá ngu̱i̱ya ndi̱yatiée̱ soó arpa̱, yánaxo̱ ko̱jo tjio, ti nde nguiti k'uiéjiín xta̱ xi sa̱'ín ngo xá, ti nde nguiti ko̱nda'yájín ndi̱jo̱o̱ molino̱,
\v 23 kó nguinijánjín sa̱'íntsijee̱n ndi'í xí ts'entsíjen, ti nde nguiti ko̱nda'yájín nda̱a̱ nda̱ xi ku̱i̱xaa̱n ko̱jo nda̱a̱ na̱ xi ku̱i̱xaa̱n, nga̱t'a̱ xta̱ xi botiñá ko̱jo xi 'botsie nii̱ kui boá xi kis'iee̱ nga'niú xi chji̱a̱ni t'ananguii̱ kó kich'íṉche̱je ngayeje na̱xi̱ńdá tangat'anii̱ kjo̱a̱tji'ée.
\v 24 Nga̱t'a̱ ki̱a̱ kui na̱xi̱ńdaá kasako jiín já chji̱ni̱e̱'e̱én Néná ko̱jo xta̱ na̱xi̱ńdá tsjiee̱, ko̱jo ngayeje xta̱ xi kini'ánk'ién ngayeje t'ananguii̱.
\c 19
\s Bi ts'én akakoo̱ Juaa̱ kóts'en kini'ántsjaá Néná ndi'ak'ajmi ján
\p
\v 1 Jaskan nguije kamá kui nii̱, tsint'ie an ngo nda̱ xi 'niú askandáyá xi kjindibáni ndi'ak'ajmii̱ xi xikoó tsi nda̱a̱ kjín xta̱ xi bi katsó:
\p ¡Nga ni'ántsjaá Ndi̱a̱ná! Kjo̱a̱'naxié'aá, kjo̱a̱jee̱ ko̱jo nga'niuú tsi̱'e̱ Néná boá.
\p
\v 2 Nga̱t'a̱ kui boá xi kixi̱ ko̱jo xi ja̱koxi̱ nga ts'énjéná,
\q nga̱t'a̱ je kats'énjeé na̱ masiee̱n,
\q kui xi tangat'anii̱ kjo̱a̱tondoo̱ nga kats'énkjatsón ngayeje t'ananguii̱,
\q kó Néná je kats'éngojo̱ jiín nga kini'ánk'ién mosoo̱.
\p
\v 3 S'e̱ ti bi ti katsó nguiní ingo ndi̱ya:
\p –¡Nga ni'ántsjaá Néná! Kó ṉdi̱i̱ kui naa̱ ngatsjé ni̱xtjin nga ko̱e̱je̱nijínguí nk'a ján.
\p
\v 4 Kó nga kan nijún xta̱ xi xchaá ko̱jo nga nijún kui xi síndoo̱ kixindyiaxtien ngaskande t'ananguii̱ kó kats'éndikón Néná xi botixómaá, kó bi katsó nga tsíchji̱a̱:
\p –¡Bo̱a̱ kji'i! ¡Nga ni'ántsjaá!
\p
\v 5 Kó kje̱n nínga tikón xi botixómaá kanda'yáni ngo nda̱ xi bi katsó:
\q ¡Ti'antsjajnúu̱ Néná,
\q ngayeje xi mosoo̱ ko̱jo xi bendikón,
\q xi xchá xi kjindí!
\p
\v 6 Ti tsint'ie an ngo ni xi xikoó nda̱a̱ kjín xta̱, xikó ma ts'en fonie ndójoaa̱ ndejeé' nga 'bóka, ko̱jo tsi xikó ts'én 'niú fonie cho̱'o̱o̱n, xi bi katsó: ¡Nga ni'ántsjaá Néná! Nga̱t'a̱ je íts'i̱yanii̱ nga ko̱tíxoma Ndi̱a̱ná, Néná xi tjiín nga'niuú.
\q
\v 7 Tsja ngatamaná, ngatsie maná kjo̱a̱tsja kó ko̱e̱'ée̱ kjo̱a̱je,
\q nga̱t'a̱ je jachó chi̱bo̱a̱a̱ nga ku̱i̱xan ndií cho̱tsa̱nga̱a̱,
\q kó chjo̱ón je tikónda:
\q
\v 8 Je katse'éndieé tsi̱'e̱ nga ko̱a̱ja̱ ṉjño xi nda, xi tsjie ko̱jo xi 'na̱.
\m Nga̱t'a̱ kuí ṉjño ndaa̱ xi bokó nga ni xi kixi̱ kats'eén xta̱ na̱xi̱ńdá tsjiee̱.
\s Nga xi̱ni̱e̱ ṉño̱ ndi'ibixaa̱n cho̱tsa̱nga̱a̱
\p
\v 9 Kó kui ndítsjiee̱ bi katsóna:
\p –Tít'e ji xo̱jo̱n kui nii̱: Achichí ra tsjaa̱ kui xi ki'míyaá tsi̱'e̱ nga ko̱e̱je̱ ndi'ibixaa̱n cho̱tsa̱nga̱a̱.
\p Kó bi katsó ngase:
\p –Én xí ja̱koxi̱i̱ Néná boá xi'bi̱.
\p
\v 10 Kó asient'áa̱ tikóna ngu̱i̱ndie se kui ndítsjiee̱, tsi̱'e̱ nga sa̱'indíkón an, tanga kui bi katsóna:
\p –Jmí ngata̱ bo̱a̱jín ni'ín, nga̱t'a̱ mosoo̱ Néná boá an nga, xikoó ji, ko̱jo xikoó ṉts'ie xi 'niú 'niátakón ni xi kats'én Kjisoo̱. ¡Néná boá xi ti'indikín jí!
\p Nga̱t'a̱ én xi akóyá Kjisoo̱ kui boá xi ts'énkíchji̱a̱ chji̱ni̱e̱'e̱én Néná.
\s Nda̱ xi tjísón ndi̱je̱e̱ tiboaa̱
\p
\v 11 Kó kamábe an nga tji̱e̱ntixa̱ ndi'ak'ajmii̱, kó ngo ndi̱je̱ tiboa tikón ki̱a̱a̱, kó kui nda̱ xi tikónsoón kuí xí 'mí xi 'Niátakón ko̱jo xi Ja̱koxi̱i̱, nga̱t'a̱ nga kixi̱ atíxoma nga askjantjé.
\v 12 Ndyi̱ko̱n 'na̱ kamá xikoó tsi ngo ndi'í, kó achichí kjín korona̱ kis'iṉdoo̱ to̱ko̱, kó ngo ja'én kisit'aa̱ xi ta ngototo kui xi be,
\v 13 kó ngo ṉjño ts'ényajá xi jín kats'eni, kó ja'eén kuí xí 'mí: EÉN NÉNÁ.
\v 14 Kó ki̱a̱ kijítji̱nguii̱ ngayeje jajuún ndi'ak'ajmii̱, xi ndyi̱yajá ṉjño nda xi tiboa ko̱jo xi tsjie, kó ndi̱je̱ tiboa síndosoón ngayejee̱.
\v 15 Kó ts'oa jatjoni ngo ki̱cha̱ xi yojó, tsi̱'e̱ nga sa̱'ín'oón xta̱ na̱xi̱ńdaá, kó kui boá xi tajá ts'én ko̱tíxomaa̱ xtaa̱, kó sa̱'ínkjindibánié kjo̱a̱xcha̱án Néná xi tjiín nga'niuú.
\v 16 Kó nga̱són ṉjñoo̱ ko̱jo nga̱són ti'mi̱í kjit'a ngo ja'én xi bi tsó: REE̱ RE KO̱JO NDI̱A̱A̱ NDI̱A̱.
\p
\v 17 Kó kamábe an ngo ndítsjie xi sikón kixi̱són nga̱soón ts'ueé, kó bi katsó nga 'niú askandáyaá ngayeje ni̱sie xi fítjíe̱n ndi'ak'ajmii̱:
\p –¡Ja̱bíjnú'un kó ngatamatikójnú kui s'ueé tsi̱'e̱ nga xi̱ni̱e̱jnú ni chinie xi tsja̱ajnú Néná,
\v 18 tsi̱'e̱ nga xi̱ni̱e̱jnú yojoo̱ já ree̱, yojoo̱ nguito̱ko̱o̱ jajuún, yojoo̱ xta̱ xi 'niú, yojoo̱ ndi̱je̱ ko̱jo xi 'bíndosoón, yojoo̱ ngayeje xta̱ xi tjimándé ko̱jo xi moso̱ xi kastiñá, xi xchá xi kjindí!
\p
\v 19 Kó kamábe an cho̱ ch'o kji'ii̱ ko̱jo ngayeje já re xi chji̱a̱ni t'ananguii̱ ko̱jo jajuún, xi kamátikó tsi̱'e̱ nga skjánjo̱ kui xi tikónsoón ndi̱je̱e̱ ko̱jo jajuún.
\v 20 Kó kui cho̱ ch'o kji'ii̱ kandobá, ko̱jo kui nda̱ chji̱ni̱e̱'én ndisoó kui xi kjín kjo̱a̱ndikón kats'én nguindyi̱ko̱n, kui kjo̱a̱ndikón xi kats'énkjién kui nda̱ chji̱ni̱e̱'e̱én ndisoó nga índisojo̱ xta̱ xi katsjandié nga ik'íjñaá chi̱bo̱a̱a̱ kui cho̱ ch'o kji'ii̱ ko̱jo nga kats'éndikón a̱sie̱én, kó kui cho̱ ch'o kji'ii̱ ko̱jo nda̱ chji̱ni̱e̱'e̱én ndisoó, ikichijmijin tikón ngu̱i̱jii̱n ndáchíkón ndi'í xi tanisién 'niú je nínga tjítíngajo̱ ndso̱ko̱a̱n asufree̱.
\v 21 Kó xi ngasee̱ ki̱cha̱ xi jatjo ts'oa kui xi tjísoón ndi̱je̱e̱ kini'ánkjiesónni, kó ngayeje ni̱sie xi kjinie yojo siee̱n, ngaskande ts'ajon maá nga iskjinie yojoo̱ kui xtaa̱.
\c 20
\s Nga ngo mi̱ noó
\p
\v 1 Kó kamábe an ngo ndítsjie xi ts'énfotjajen ndi'ak'ajmii̱ xi ya'a yibii̱ tixa̱ na̱ngaa̱ t'ananguii̱ kó ngo ń'niú ki̱cha̱ je tjiyá tsja.
\v 2 Kó katsoboá kui cho̱ tamá xí yito to̱koo̱, kui ye̱ xchá xi xindajín kui xi 'mí diabloo̱ ko̱jo Satanaa̱, kó ngo mi̱ nó ít'a ń'niú ki̱cha̱,
\v 3 kó ts'ajmiyá tixa̱ na̱ngaa̱ t'ananguii̱ nínga íchjá'yá, kó ngo seyo̱ íjñaá nga̱ntjo̱a̱a̱ tsi̱'e̱ nga nguiti k'o̱ṉcha̱jojín ngase na̱xi̱ńdaá ngaskande nguije kjo̱a̱'a nga ngo mi̱ noó, kó nguije kjo̱a̱'a kui noó chjándo nguiní ngui chiboa ni̱xtjin.
\p
\v 4 Kó kamábe an nínga botíxoma, kó ki̱a̱ kis'iṉdosón kui xi katse'eé xá tsi̱'e̱ nga ko̱tíjeé, kó ti kamábe an a̱sién ni̱xtjii̱n kui xta̱ xi ikichásén to̱ko̱ tangat'anii̱ nga jmí ni̱xtjin íjñámasien ni xi akóyá Kjisoo̱ ko̱jo eén Néná, kuí xtaa̱ xi kats'éndikónjín cho̱ ch'o kji'ii̱ ko̱jo a̱sie̱én, ti nde katsjandiéjín nga ik'íjñaá chi̱bo̱a̱a̱ kui choo̱ xtjien ko̱jo tsja, kó kui xtaa̱ ja'á'yá nguinií kó nijan atíxomajo̱ Kristoo̱ ngo mi̱ nó.
\v 5 Tanga xta̱ xi jesón xi ngasee̱ nguiti kis'iṉdojín ngaskande nguije ja'a xi ngo mi̱ noó. Kó kuí bí kjo̱a̱foa'á'yá xi tjoón.
\v 6 ¡Achichí ra tsjaa̱ ko̱jo achichí ra tsjie kui xta̱ xi tjón kjo̱a̱'á'yaá, nga̱t'a̱ ki̱a̱ chji̱a̱ni xta̱ na̱xi̱ńdá tsjiee̱ Néná! Kjo̱a̱bo̱ya xi ma joó, jmí nga'niújiín kjo̱a̱a̱ kui xtaa̱, tasá chiná'mii̱ Néná ko̱jo chiná'mii̱ Kristoo̱ ka̱ma, kó ki̱a̱ nijan ko̱tíxomajo̱ nga ngo mi̱ noó.
\p
\v 7 Kó nguije ja'a xi ngo mi̱ noó, xindajín Satanaa̱ ko̱'na̱xié ndo̱bo̱a̱ya xí tikón,
\v 8 kó kjo̱tjo tsi̱'e̱ nga k'o̱ṉcha̱jo xi botixómaá na̱xi̱ńdá Goo̱j ko̱jo Magoo̱j, kui xi tajñá nanguiní tsoó, tsi̱'e̱ nga ku̱i̱'ítikó nga skja̱n juún, kui xi tanisién kjín ma xikó maá tsomií ndáchíkoón.
\v 9 Kó kijí ngayeje xikó kji'i nga tiyaá t'ananguii̱ kó ki̱a̱ kixindyia nga ngo foa'atjiyajoo̱n nínga síndo xta̱ tsjiee̱ Néná ko̱jo na̱xi̱ńdá xi tjoó kui, tanga ndi'í ixóni ndi'ak'ajmii̱ kó ítí,
\v 10 kó kui xindajín diabloo̱ kui xi ts'aṉcha̱jo, ki̱a̱ ikichijmijin ndáchíkón ndi'í xi tanisién 'niú jee̱ ko̱jo ndso̱ko̱a̱n asufree̱, nínga ikichijmijin cho̱ ch'o kji'ii̱ ko̱jo nda̱ chji̱ni̱e̱'én ndisoó, kó ki̱a̱ boá nínga si̱'ankja'atio kjo̱a̱ni̱ma̱ nga ni̱xtjin ko̱jo nga ni̱xtji̱e̱n ngatsjé ni̱xtjin.
\s Kjo̱a̱botíjé xi tikón kje̱n xi botixómaá
\p
\v 11 Kó kamábe an xi botixómaá, tiboa ko̱jo je ngu̱i̱ndie nínga tikón, nguindyi̱ko̱n kui kichajá ngayeje nga̱sondiee̱ ko̱jo ndi'ak'ajmii̱, kó nguinijánjín kamáya tsi tjín nínga kis'ijña.
\v 12 Kó kamábe an ngayeje xta̱ xi jesón xi xchá xi kjindí nga ndyi̱a̱ kixi̱ kje̱n nínga tikón xi botixómaá, kó katjox'a kjín ch'o̱ xo̱jo̱o̱n ko̱jo ingo xo̱jo̱n, kui xi xo̱jo̱o̱n kjo̱a̱mindyioo̱n, kó xta̱ xi je jesoón akatíjeé ta xikó kji'i ni xi kats'én ko̱jo xikó kji'i ni xi kjit'a kui xo̱jo̱n nínga tjít'a ja'eén xta̱ xi k'uíndo ngatsjé ni̱xtjin.
\v 13 Kó ndáchíkoón kats'énk'as'ien xta̱ xi je jesón xi síndoo̱, kó kjo̱a̱bo̱yaa̱ ko̱jo nínga 'bíndo xta̱ xi je jesoón kats'énk'as'ien xta̱ xi jesón xi síndo ngu̱i̱ndiee̱, kó ngayejee̱ nga akatíjeé, nga ngo nga ngo ta xikó kji'i ni xi kats'én.
\v 14 Kó kjo̱a̱bo̱yaa̱ ko̱jo ngu̱i̱ndie nínga 'bíndo xta̱ xi je jesoón kini'ánkja'ajin ndáchíkón ndi'í xi tanisién 'niú jee̱. Kuí bí kui ngu̱i̱jin ndi'ií xi kjo̱a̱bo̱ya xi ma joó.
\v 15 Kó kui xta̱ xi kjit'ajín ja'eén ki̱a̱ xo̱jo̱n nínga tjít'a ja'eén xta̱ xi k'uíndo ngatsjé ni̱xtjin, ti ki̱a̱ ikichijmijin ndáchíkón ndi'í xí tanisién 'niú jee̱.
\c 21
\s Ndi'ak'ajmi tja̱tsi̱e̱e̱ ko̱jo nga̱sondie tja̱tsi̱e̱e̱
\p
\v 1 Kó kamábe an ngo ndi'ak'ajmi xi tja̱tsi̱e̱ ko̱jo ngo nga̱sondie xi tja̱tsi̱e̱, nga̱t'a̱ ndi'ak'ajmi ko̱jo nga̱sondie xi tjoón je nguiti jmíjín, kó ndáchíkoón je kichajá.
\v 2 Kó kamábe an na̱xi̱ńdá tsjiee̱, na̱xi̱ńdá Jerusale̱n tja̱tsi̱e̱e̱, xi ts'énfotjajenni ndi'ak'ajmii̱ nguindyi̱ko̱n Néná, nga je tikónda nga kini'ánchoo̱n xikoó ngo na̱ xi ku̱i̱xan nga je tikónda nga ku̱i̱xanjo̱ xi̱'ii̱n.
\v 3 Kó tsint'ie an ngo nda̱ xi 'niú askandáyá xi kjindibáni nínga tikón xi botixómaá, xi bi katsó:
\p K'i̱e̱ tikón kui ngu̱i̱ndie ndikón nínga Néná tikónjo̱ xtaa̱, kó kui ki̱a̱ k'uijñájo̱, kó kui boá xi xta̱ na̱xi̱ńdaá ka̱ma, kó ti kuíni Néná xi k'uijñájo̱ nga xikoó nga kui xi Nee̱ ka̱ma.
\v 4 Kó kui boá xi sa̱'ínxíjón ngayeje ndándyíkon xi kjo̱tjoo̱ ndyi̱ko̱n kui xtaa̱, kó nguiti jmíjín xi ko̱ya ngase, ti nde nguiti jmíjín xi ska̱ndá ngase, ti nde nguiti jmíjín xi ni̱ma̱ ka̱tso̱ ngase, ti nde nguiti jmíjín xi on ka̱ma ngasee̱, nga̱t'a̱ ni xi kis'ie ngas'e̱ je nguiti jmíjín.
\p
\v 5 Kó kui xi botixómaá bi katsó:
\p –Ngayeje nii̱ xi tjíts'en tja̱tsi̱e̱ an.
\p Kó ti bi ti katsóna nga:
\p –Tít'e xo̱jo̱n, nga̱t'a̱ ja̱koxi̱ kuí eén kó ka̱ma si̱'an'niátakón.
\p
\v 6 Kó bi katsóna:
\p –Je kamá ngayeje nii̱. An boá xi alfaa̱ ko̱jo xi omegaa̱, xi tjón ko̱jo xi fet'aa̱. Kó xi xíndaá, an xí ta tsjá ñáa̱ nga k'uí ndójoaa̱ kjo̱a̱mindyioo̱n.
\v 7 Kui xi sa̱'iín, sa̱ko̱ó ngayeje kui nii̱, kó an xí ka̱ma an Nee̱, kó kuí ndína ka̱ma.
\v 8 Tanga kui xta̱ xi tsiendíkoón, ko̱jo kui xi s'ijinjiín Néná, xi ch'okoo̱n, ko̱jo xi ts'enk'ién ini̱ma̱a̱, ko̱jo xi tondoo̱, ko̱jo xi ndyi̱ts'en kjo̱a̱tji'e, ko̱jo xi ndyi̱ts'entsjájo a̱sie̱én ngo ne xi ts'énda xtaa̱ ko̱jo ngayeje xta̱ xi ndiso, kui xi'ba̱ ki̱a̱ stso̱bo̱a̱a̱ nga ko̱e̱je̱ ngu̱i̱jin ndáchíkón ndi'í xi tanisién 'niú jee̱ nínga tjítí ndso̱ko̱a̱n asufree̱, kuí ni xi'bi̱ xi xi ma jó kjo̱a̱bo̱yaa̱.
\s Na̱xi̱ńdá Jerusale̱n tja̱tsi̱e̱e̱
\p
\v 9 Kó kjindibákónna ngo kui xi yito ndítsjie xi ndyi̱ya'a chi̱tsen xi tjikítsie ma kjo̱a̱ni̱ma̱ xi fet'aa̱, kó bi katsóna:
\p –Ja̱bí'i̱n, kokóo̱ chjoón xí ku̱i̱xanjo̱ cho̱tsa̱nga̱a̱.
\p
\v 10 Kó A̱sién Ni̱xtjii̱n Néná kijíjo̱na ngo tji̱ngu̱i̱ xi je ko̱jo xi nk'a, kó akóna na̱xi̱ńdá tsjie xi 'mí Jerusale̱n, kui xi ts'énfotjajenni ndi'ak'ajmii̱, nguindyi̱ko̱n Néná,
\v 11 kui na̱xi̱ńdaá 'na̱ kamá tangat'anii̱ kjo̱a̱jee̱ Néná, 'na̱ kamáya xikó maá ngo ndi̱jo̱ xi tsjakji'i, xikoó ngo ndi̱jo̱ xi 'mí jaspe̱, 'na̱ kamá xikoó ngo chi̱tsen,
\v 12 nga ngo foa'atjiyajoo̱n kui na̱xi̱ńdaá kis'ijñaa̱ ngo xó xi je ko̱jo xi nk'a xi kis'ijñaa̱ tiejó nga̱ntjo̱a̱, kó nga ngo nga ngo kui nga̱ntjo̱a̱a̱ kis'ijña ngo ndítsjie, kó ki̱a̱ nga̱ntjo̱a̱a̱ kisit'aa̱ ja'eén nga tiejó tji̱e̱e̱ xta̱ xi chji̱a̱ni Israe̱l.
\v 13 Ján nga̱ntjo̱a̱a̱ kis'ijña xtji̱e̱e̱n nínga fotjo ts'ueé, ján kis'ijña xtji̱e̱e̱n nínga ta'in, ján nga̱ntjo̱a̱a̱ kis'ijña xtji̱e̱e̱n nínga na̱ngui kó ti ján kis'ijña xtji̱e̱e̱n nínga 'bos'ien ts'ueé.
\v 14 Kó xoó kui na̱xi̱ńdaá tiejó ndi̱jo̱ kis'ijña nguindiee̱, kó ki̱a̱ kisit'a ja'eén nga tiejó já apostroo̱ cho̱tsa̱nga̱a̱.
\p
\v 15 Kui xi ts'énchji̱a̱jona ngo yáxá xí to̱nsinié ya'a xi ch'íchi̱bo̱a̱joni na̱xi̱ńdaá, nga̱ntjo̱a̱a̱ ko̱jo xoó.
\v 16 Ta ngo chi̱bo̱a̱ kamá kui na̱xi̱ńdaá nga tiyá ko̱jo nga ndojó, kó kui yáxaá ts'achi̱bo̱a̱joni kui na̱xi̱ńdaá: kó jó mi̱ jó úchán kilometro̱ kamá, kó ti bo̱a̱ ti kji'i nga tiyaá, nga ndojoó ko̱jo nga nk'aa̱.
\v 17 Kó ti ts'achi̱bo̱a̱ xoó na̱xi̱ńdaá: kó ichítié ko̱jo tji'ún metro̱ kamá, nga chi̱bo̱a̱a̱ xta̱ xi kats'énkjién kui ndítsjiee̱.
\p
\v 18 Kó xoó kui na̱xi̱ńdaá ndi̱jo̱ xi 'mí jaspe̱ xi kamándani, kó na̱xi̱ńdaá to̱nsinié soboá soboá xi kamándani, xikó maá ngo chi̱tsen xí kui soboá.
\v 19 Ndi̱jo̱ xi kamándani nguindiee̱ xoó kui na̱xi̱ńdaá ngayeje to̱ko̱ya ndi̱jo̱ xi tsjakon xi ik'índoo̱: Ndi̱jo̱ xi tjoón ndi̱jo̱ jaspe̱ ik'íjñaá, xi ma jó ndi̱jo̱ safiro̱, xi ma ján ndi̱jo̱ ágata̱, xi ma nijún ndi̱jo̱ esmeralda̱,
\v 20 xi ma ún ndi̱jo̱ ónise̱, xi ma jun ndi̱jo̱ kornalina̱, xi ma yito ndi̱jo̱ krisólito̱, xi ma jin ndi̱jo̱ berilo̱, xi ma nijan ndi̱jo̱ topasio̱, xi ma tie ndi̱jo̱ krisópraso̱, xi ma tiengo ndi̱jo̱ jasinto̱, kó xi ma tiejó ndi̱jo̱ amatista̱.
\v 21 Kó nga tiejó nga̱ntjo̱a̱a̱ kui boá xi tiejó to ixkií', nga ngo nga ngo nga̱ntjo̱a̱a̱ ngo to ixkí' kamándani. Kó ndi̱yatieé kui na̱xi̱ńdaá to̱nsinié soboá soboá xi kamándani, xikoó tsi ngo chi̱tsen xí 'na̱.
\p
\v 22 Kó nde ngo na̱ngo̱xi̱ kamábejín an ki̱a̱ na̱xi̱ńdaá, nga̱t'a̱ Ndi̱a̱ná xi tjiín nga'niuú kui boá xi na̱ngo̱xi̱ ko̱jo xi cho̱tsa̱nga̱a̱.
\v 23 Kó kui na̱xi̱ńdaá jmí ts'ué ti nde jmí sá chjiénjiín xi sa̱'íntsijee̱n, nga̱t'a̱ ndi'ií kjo̱a̱jee̱ Néná xí tjíts'éntsíjee̱n, kó cho̱tsa̱nga̱a̱ boá xi ndi'í xí ts'entsíjee̱n.
\v 24 Kó ngayeje xta̱ na̱xi̱ńdaá k'uitsóma nga sa̱'íntsijee̱n ndi'í xi fotjoni kui na̱xi̱ńdá ján, kó ngayeje ree̱ t'ananguii̱ kjo̱e̱'éjoo̱ kjo̱a̱jee̱ kui na̱xi̱ńdaá.
\v 25 Kó nga̱ntjo̱a̱a̱ jmí ni̱xtjin si̱chjá nga ni̱xtjii̱n, kó ka̱ma jñójín,
\v 26 kó kjo̱a̱jee̱ ko̱jo kjo̱a̱yandikoón ngayeje na̱xi̱ńdá kjo̱joo̱ kui.
\v 27 Kó jmíjín kóts'en nga k'o̱s'ien ni xi ndajín, ti nde ka̱majín k'o̱s'ien xta̱ xi ndyi̱ts'en ni xi tanisién 'niú ch'o kji'i ko̱jo tsi kjo̱a̱ndiso, ta kuí tsi xi k'o̱s'ien kui xi kjit'a ja'eén xo̱jo̱n nínga tjít'a ja'eén xta̱ xi k'uíndo ngatsjé ni̱xtjin xi tikoón cho̱tsa̱nga̱a̱.
\c 22
\p
\v 1 Kó akóna ngo ndeje' xi tsjie, kui xi tjiín ndójoaa̱ kjo̱a̱mindyioo̱n xi tikón 'na̱ 'na̱ xikoó ngo chi̱tsen, kó ki̱a̱ jatjoni nínga tikón kui Néná xi botixómaá ko̱jo cho̱tsa̱nga̱a̱.
\v 2 Ngamasiee̱n ndi̱yatié xi jee̱ kui na̱xi̱ńdaá ko̱jo nga̱ndee̱ kui ndejeé', kamáxchá ngo yaá kjo̱a̱mindyioo̱n, kui xi xki̱ sá tsjá to, tiejó ndi̱ya nga ngo nó, kó xka̱a̱ kui yaá kui boá xi ts'endáya chi'ii̱n xta̱ na̱xi̱ńdá xí tjín nga̱sondiee̱.
\v 3 Kó nguinijánjín k'uié ki̱a̱a̱ ngo xi ch'o ka̱tso̱o̱ Néná. Kó Néná xi botixómaá ko̱jo cho̱tsa̱nga̱a̱ ki̱a̱ k'uijñá na̱xi̱ńdaá, kó mosoo̱ ki̱a̱ sa̱'ínseén,
\v 4 kó sku̱i̱e̱ kje̱n, kó ja'eén ki̱a̱ kjót'aa̱ xtjien.
\v 5 Kó kui ngu̱i̱ndiee̱ nguinijánjín ka̱majñó, kó xi k'uíndo ki̱a̱a̱ nguiti ka̱machjiénjiín ndi'í xí ts'entsíjen ko̱jo tsi ndi'ií ts'ueé, nga̱t'a̱ Néná kui xi Ndi̱a̱ná tsja̱á ndi'ií, kó kuí xta̱ xi'ba̱ xi ko̱tíxoma ngatsjé ni̱xtjin.
\s Je tikón tiña ni̱xtjin nga kji̱ndi̱bá Kristoo̱
\p
\v 6 Kó kui ndítsjiee̱ bi katsóna:
\p –Kui eén, én xí 'niátakón ko̱jo én xí ja̱koxi̱ boá, kó Ndi̱a̱ná kui Néná kui xi a̱sién ni̱xtjii̱n já chji̱ni̱e̱'e̱én kuí boá xi katsanguiya ndítsjiee̱ tsi̱'e̱ nga ko̱ko̱ó mosoo̱ ni xi je tsá ka̱ma.
\p
\v 7 –¡Je tsá ndibá an!
\p ¡Achichí ra tsjaa̱ kui xi sa̱'ínseén kui én xí Néná tsáyá xi kjit'a kui xo̱jo̱o̱n!
\p
\v 8 Juaa̱ boá an, kó an boá xi kamábe an kó tsint'ie an kui nii̱. Kó nguije kamábe an ko̱jo nguije tsint'ie an, asient'áa̱ tikóna t'a se kui ndítsjie xi akóna kui nii̱ tsi̱'e̱ nga sa̱'indíkón an.
\v 9 Tanga kui bi katsóna:
\p –Jmí ngata̱ bo̱a̱jín ni'ín, nga̱t'a̱ ti mosoo̱ Néná boá an nga xikoó ji ko̱jo já ṉts'ie xi já chji̱ni̱e̱'e̱én ko̱jo xikoó ngayeje xta̱ xi ts'enseén ni xi kjit'a kui xo̱jo̱o̱n. ¡Néná boá xi ti'indikín!
\p
\v 10 Kó ti bi katsóna nga:
\p –Ngata̱ chje'étje'májín ji kui én xí Néná tsáyá xi kjit'a kui xo̱jo̱o̱n, nga̱t'a̱ je makjachó ni̱xtjin nga kjo̱tjosón ni xi kjit'a.
\v 11 Xió chíi̱n xta̱ xi kixi̱jiín, kixi̱jín ngatama ra, kó xta̱ xi ni xi tsjiejín ndyi̱ts'e̱én nga ts'énrá ni xi tsjiejín, tanga kui xi kixii̱, nga ts'én rá kjo̱a̱kixi̱i̱ ko̱jo kui xta̱ xi tsjiee̱ ngats'éntsjie ra ngase yojoo̱.
\p
\v 12 Tsitsíjin, je ts'éndibá an, kó je ya'a an ni xi je kats'en an, tsi̱'e̱ nga tsjáa̱ nga ngo nga ngo xtaa̱ ta xikó kji'i ni xi kats'én.
\v 13 An boá xi alfaa̱ ko̱jo xi omegaa̱, xi tjón an ko̱jo xi fet'a an, xi ítjats'ennii̱ ko̱jo xi fet'a.
\p
\v 14 Achichí ra tsjaa̱ xi ndyi̱monié ṉjñoo̱ tsi̱'e̱ nga k'uieé kjo̱a̱nda nga ka̱ma skji̱ni̱e̱ too̱ yaá kjo̱a̱mindyioo̱n kó ka̱maa̱ k'o̱s'ienni nga̱ntjo̱a̱a̱ na̱xi̱ńdaá.
\v 15 Tanga ndi̱tsen ján k'uíndo ngayeje xta̱ xi ndajín, ko̱jo xi ndyi̱ts'en kjo̱a̱tji'e, kui xi taxkiya ndyi̱ts'entsjájo yojoo̱, xi ndyi̱ts'enk'ién ini̱ma̱, xi ndyi̱ts'entsjájo a̱sie̱én ngo ne xi ts'énda xtaa̱ ko̱jo kui xi ndyi̱ts'entjó ko̱jo xi ndyi̱ts'en kjo̱a̱ndiso.
\p
\v 16 –An, Kjisoo̱, katsanguiya an ndítsjiena tsi̱'e̱ nga ko̱tso̱yaa̱ ngayeje kui nii̱ ngayeje xta̱ na̱ngo̱xi̱i̱. An boá xi ja̱maa̱ ko̱jo xi xta̱ tji̱e̱e̱ Ndabii̱, an boá xi ṉño 'na̱ xi 'bíjñá nga ndibá'ásie̱én.
\p
\v 17 Kó A̱sién Ni̱xtjii̱n Néná ko̱jo chjo̱ón cho̱tsa̱nga̱a̱ bi tsó:
\p –¡Ja̱bí'i̱n!
\p Kó xi ku̱i̱nt'ie̱é bi nga tsó:
\p –¡Ja̱bí'i̱n!
\p Kó xi xíndaá, ngatjandiba, kó xi mejeén, ta ngatja'ekja'a ndójoaa̱ kjo̱a̱mindyioo̱n.
\p
\v 18 Ngayeje xi ndyi̱nt'ie kui én xí Néná tsáyá xi kjit'a kui xo̱jo̱o̱n, ts'énxiyáa̱ kui nii̱: Tsi tjín xi ko̱ósoón ngasee̱ kui nii̱, Néná ko̱ósoón tsi̱'e̱ nga sa̱'ín'oón kui ngayeje kjo̱a̱ni̱ma̱ xi kjit'a kui xo̱jo̱o̱n,
\v 19 kó tsi tjín xi kjo̱a̱'áxín chií én xí Néná tsáyá xi kjit'a kui xo̱jo̱o̱n, Néná kjo̱a̱'áxiín ngu̱i̱ndie xi tsoboaá kui, ki̱a̱ xo̱jo̱n nínga tjít'a ja'eén xta̱ xi k'uíndo ngatsjé ni̱xtjin ko̱jo na̱xi̱ńdá tsjie xi kjit'a kui xo̱jo̱o̱n.
\p
\v 20 Kui xi ts'éntsáyá kui nii̱ bi tsó:
\p –Jo̱o̱n, je tsá ndibá an.
\p Bo̱a̱ kji'i. ¡Ja̱bí'i̱n, Ndi̱a̱ Kjisoo̱!
\p
\v 21 Ndi̱a̱ná Jesukristoo̱ nga tsjajnú ngayeje kjo̱a̱ndaa̱. Bo̱a̱ kji'i.