\id LEV
\h LEVÍTICO
\mt Levítico
\c 1
\s Nopa tlacajcahualistli tlatlatili
\p
\v 1 TOTECO quinotzqui Moisés tlen nopa yoyon tiopamitl campa mopantiyayaj huan quiilhui:
\p
\v 2 “Xiquinilhuiti nopa israelitame ni miyac tlanahuatili. Quema se quinequis nechhualiquilis se tlacajcahualistli na, niimoTECO, monequi nechhualiquilis se tlen ihuacaxhua, o se tlen iborregojhua o se tlen ichivojhua.
\p
\v 3 “Intla elis se tlacajcahualistli tlatlatili tlen ihuacaxhua, huajca monequi nechmacas se becerro tlen ax quipiya niyon se tlamantli tlen ax cuali ipan itlacayo. Monequi quihuicas nopa tlapiyali noixtla hasta campa ipuerta nopa yoyon tiopamitl campa timopantíaj para na, niimoTECO, nijselis.
\v 4 Huan nopa tlacatl tlen quihualica quitlalis ima ipan itzonteco nopa tlapiyali, huan queja nopa, nopa tlapiyali elis ipatlaca nopa tlacatl. Huan na nijselis nopa tlacajcahualistli huan niquitas para mijqui ipampa nopa tlacatl para quiixtzacuilis itlajtlacolhua noixtla.
\v 5 Huan nopa tlacatl quimictis nopa tlapiyali nopona noixtla, niimoTECO. Huan itelpocahua Aarón, nopa totajtzitzi, quiijtzelose ieso nopa tlapiyali yahualtic nopa tlaixpamitl tlen eltoc nechca ipuerta nopa yoyon tiopamitl huan queja nopa nechmacase.
\v 6 Huan nopa tlacatl quiquixtilis icuetlaxo nopa tlapiyali tlen elis para se tlacajcahualistli tlatlatili huan quihuejhuelos itlacayo.
\v 7 Teipa itelpocahua Aarón, nopa totajtzitzi, quitlipichise huan quitlalise miyac cuahuitl ipan nopa tlaixpamitl.
\v 8 Huan teipa itelpocahua Aarón quitlalise nochi nacatl tlahuejhueloli tlen nopa tlapiyali ihuaya itzonteco huan ichiyajca ipan nopa cuahuitl tlen lementos.
\v 9 Pero achtohui quipajpacase icuitlaxcol huan imetzcuayohua nopa tlapiyali huan teipa nopa totajtzitzi quitlalise icuitlaxcol huan imetzcuayohua ipan nopa tlaixpamitl para ma tlatla. Huan ni elis se tlacajcahualistli tlatlatili tlen mijmiyotis nelía ajhuiyac noixtla huan nechyolpactis, niimoTECO.
\p
\v 10 “Huan intla nopa tlapiyali tlen temacas para se tlacajcahualistli tlatlatili elis se borrego o se chivo, huajca monequi elis se oquichtli tlen ax quipiya niyon se tlamantli tlen ax cuali ipan itlacayo.
\v 11 Huan nopa tlacatl tlen quihualica nopa tlacajcahualistli moquetzas nechca iquespa nopa tlaixpamitl ipan nopa lado norte huan quimictis nopa tlapiyali noixtla, na niimoTECO. Huan itelpocahua Aarón, nopa totajtzitzi, quicuise ieso nopa tlapiyali huan ica quiatzejtzelhuise yahualtic nopa tlaixpamitl.
\v 12 Huan nopa tlacatl tlen temaca nopa tlacajcahualistli, quihuejhuelos, huan nopa totajtzi quicuis nopa tlapiyali itzonteco huan ichiyajca, huan quitlalise ipan tlitl.
\v 13 Pero nopa tlacatl tlen temacas nopa tlapiyali monequi achtohui quipajpacas icuitlaxcol huan imetzcuayohua. Huan teipa quema ya quipajpactos, nopa totajtzitzi quitlatise ipan nopa tlaixpamitl. Huan elis se tlacajcahualistli tlatlatili tlen mijmiyotis nelía ajhuiyac huan nechyolpactis, niimoTECO.
\p
\v 14 “Pero intla acajya quinequi nechmacas na, niimoTECO, se tototl para se tlacajcahualistli, huajca hueli temacas se paloma o se pichontzi.
\p
\v 15 “Huan nopa totajtzi quihuicas nopa paloma o nopa pichontzi campa nopa tlaixpamitl huan quiquechilacatzos hasta quicotonas itzonteco huan quitlatis itzonteco ipan tlaixpamitl. Teipa quicahuilis ma quisa ieso nopa paloma ielchiquitipa nopa tlaixpamitl.
\v 16 Huan teipa nopa totajtzi quicuis iapompo huan iijhuiyo nopa piltototzi huan quinmajcahuas ielchiquitipa nopa tlaixpamitl ica campa quisa tonati campa eltoc nopa cuanextli.
\v 17 Teipa quiitzquis ipan ieltlapalhua huan quitlajcotequis, pero ax quicotonas. Teipa nopa totajtzi temacas nopa paloma para se tlacajcahualistli huan quitlatis ipan tlitl tlen eltoc ipan nopa tlaixpamitl. Huan elis se tlacajcahualistli tlatlatili tlen mijmiyotis ajhuiyac huan nechyolpactis, niimoTECO.
\c 2
\s Nopa tlacajcahualistli tlen harina tlen trigo huan cebada
\p
\v 1 “Quema se tlacatl quinequis nechmacas na, niimoTECO, se
tlacajcahualistli tlen harina tlen trigo o cebada, monequi
quicuechtilis iyol hasta mochihuas se harina tlen nelía cuechtic.
Nojquiya monequis quitequilis aceite huan copali ipan nopa harina.
\v 2 Teipa quimacas se itelpoca Aarón huan nopa totajtzi quicuis se
quentzi nopa harina ica ima huan quitlatis ipan nopa tlaixpamitl
queja se tlanextilijcayotl para ipan nopa tlalochtli nechmaca nochi
nopa tlacajcahualistli. Huan ni elis se tlacajcahualistli tlatlatili
tlen mijmiyotis ajhuiyac noixtla na, niimoTECO, huan nechyolpactis.
\v 3 Huan nochi nopa harina tlen mocahuas tlen nopa
tlacajcahualistli tlatlatili elis iniaxca Aarón huan itelpocahua,
nopa totajtzitzi para quicuase. Huan nochi elis se tlacajcahualistli
tlen tlahuel tlatzejtzeloltic para na, niimoTECO.
\p
\v 4 “Huan intla acajya quinequi nechmacas se tlacajcahualistli
tlen harina tlen tlaicxitili ipan horno, huajca monequi
quicuechtilis iyol hasta mochihuas se harina tlen nelía cuechtic,
huan quimanelos ica aceite para quichihuas se pantzi, pero ax hueli
quipiyas tlasonejcayotl. Nojquiya se tlacatl hueli nechmacas pantzi
tlen queja se tlaxcali huan cacatztic tlen ax quipiya tlasonejcayotl
huan san tlaajaloli ica aceite.
\p
\v 5 “Huan intla nopa tlacajcahualistli tlen harina eli tlaicxitili
ipan se comali, huajca nojquiya monequi elis tlachihuali ica harina
tlen nelía cuechtic tlen ax quipiyas tlasonejcayotl huan tlen
tlamaneloli ica aceite.
\v 6 Huan teipa monequi quihuejhuelos nopa pantzi huan ipani
quitoyahuas aceite. Huan ya ni nojquiya elis se tlacajcahualistli
tlen harina.
\p
\v 7 “Huan intla nopa tlacajcahualistli tlen harina elis se pantzi
tlen tlaicxitili ipan sartén, huajca nojquiya monequi elis
tlachijchihuali ica harina tlen nelía cuechtic huan tlamaneloli ica
aceite.
\v 8 Huan quema se tlacatl quihualicas se tlacajcahualistli para na,
niimoTECO, tlen tlaicxitili ipan horno, comali o sartén, monequi
quimactilis nopa totajtzi huan yajaya quihuicas campa nopa
tlaixpamitl.
\p
\v 9 “Huan nopa totajtzi quicuis san se quentzi tlen nopa
tlacajcahualistli tlen harina para quitlatis para na ipan nopa tlitl
ipan tlaixpamitl. Huan nopa poctli tlen nopa tlitl mijmiyotis
ajhuiyac huan nechyolpactis, niimoTECO.
\v 10 Huan nochi tlen mocahua tlen nopa tlacajcahualistli tlatlatili
elis iniaxca nopa totajtzitzi, Aarón huan itelpocahua, para
quicuase. Huan nochi elis se tlacajcahualistli tlahuel
tlatzejtzeloltic para na, niimoTECO.
\p
\v 11 “Niyon se tlacajcahualistli tlen harina tlen
innechhualiquilise, ax quema huelis quipiyas tlasonejcayotl, niyon
sayolnectli. Pampa ax tleno tlen inquitlatise ipan tlaixpamitl para
innechmacase ax hueli quipiyas tlasonejcayotl, niyon sayolnectli.
\v 12 Pero quema ajsis nopa ilhuitl quema inquipixcase imomil,
huelis intemacase tlacajcahualistli tlen harina tlen quipiya
tlasonejcayotl huan sayolnectli. Pero intla quipiya tlasonejcayotl o
sayolnectli, ax hueli inquitlatise queja se tlacajcahualistli tlen
ajhuiyac mijmiyotis noixtla.
\p
\v 13 “Nojquiya monequi inquitlalise istatl ipan nochi
tlacajcahualistli tlen tlasencahuali ica harina, pampa istatl eli se
tlanextilijcayotl tlen inmechilnamiquiltía tlen nopa tlajtoli tlen
na, niimoTeco Dios, nijchijqui imohuaya. Huajca nochipa monequi
innechmacase istatl ica imotlacajcahualis.
\p
\v 14 “Intla inquinequij innechmacase, se tlacajcahualistli tlen
nopa tlen achtohui inquipixcaque ipan mili, huelis se tlamantli
queja trigo o cebada iyol, monequi xijyolquixtica huan
xijcacatztilica ipan tlitl.
\v 15 Huan ipan nopa tlacajcahualistli xijteca aceite huan copali.
Ya nopa nojquiya elis se tlacajcahualistli tlen harina.
\v 16 Huan nopa totajtzitzi quicuise se quentzi tlen nopa
tlacajcahualistli tlen tlamaneloli ica aceite huan copali para
quitlatise noixtla para nechmacase. Huan quema quichihuase ya nopa,
quiixnextise para nochi nopa tlacajcahualistli eli tlatzejtzeloltic
huan noaxca na, niimoTECO.
\c 3
\s Nopa tlacajcahualistli para ma onca tlayoltlalili ica TOTECO
\p
\v 1 “Intla se tlacatl quinequis nechmacas na, niimoTECO, se
tlacajcahualistli para ma onca tlayoltlalili nohuaya, huelis
nechmacas se toro o se huacax. Pero nopa tlapiyali monequi elis
tlapajpactic. Ax quipiyas niyon se tlamantli tlen ax cuali ipan
itlacayo.
\v 2 Huan nopa tlacatl tlen quihualicas nopa tlacajcahualistli
quitlalis ima ipan nopa tlapiyali itzonteco huan quimictis nopona
nechca puerta tlen nopa yoyon tiopamitl. Huan itelpocahua Aarón,
nopa totajtzitzi, quicuise nopa estli huan ica quiatzejtzelhuise
yahualtic nopa tlaixpamitl.
\p
\v 3 “Huan tlen nopa tlacajcahualistli quicuise tlen nechmacase na,
niimoTECO ipan tlitl. Quicuise nopa tlachiyajcayotl tlen eltoc ipan
iijtico, huan nopa tlachiyajcayotl tlatlajco icuitlaxcol.
\v 4 Huan quicuise nopa ome ieyo ica nochi ichiyajca, huan nopa
parte tlen más hueyi tlen ieltapach huan quiquixtise san sejco ica
ieyo.
\v 5 Huan nochi ya ni itelpocahua Aarón, nopa totajtzitzi,
quitlatise para na, niimoTECO, ipan nopa tlitl ipan tlaixpamitl.
Huan elis se tlacajcahualistli tlen ajhuiyac mijmiyotis huan
nechyolpactis.
\p
\v 6 “Huan intla se tlacatl quinequis nechmacas tlacajcahualistli
para ma onca tlayoltlalili nohuaya, monequi nechmacas se chivo o se
borrego. Huelis nechmacase se sihuatzi o se oquichtli. Pero monequi
nopa tlapiyali elis tlapajpactic. Ax hueli nechmacas niyon se
tlapiyali tlen quipiya se tlamantli ax cuali ipan itlacayo.
\v 7 Huan san se quichihuas intla nopa tlacajcahualistli tlen
nechmacas elis se pilborregojtzi.
\v 8 Nopa tlacatl tlen temacas, quitlalis ima ipan nopa tlapiyali
itzonteco, huan quimictis nopona campa ipuerta nopa yoyon tiopamitl.
Teipa nopa totajtzitzi quicuise se quentzi estli huan ica
quiatzejtzelhuise yahualtic nopa tlaixpamitl.
\p
\v 9 “Huan ipan nopa tlaixpamitl quitlalise nochi ichiyajca.
Quitlalise icuitlapil tlen quipiya miyac ichiyajca huan quicotonase
nechca icuitlapa nopa tlapiyali. Nojquiya quitlalise nochi ichiyajca
tlen mopantía ipan iijtic huan tlatlajco icuitlaxcol.
\v 10 Quitlatis ieyo ica nochi ichiyajca huan nopa parte tlen más
hueyi tlen ieltapach tlen quiquixtise san sejco ica ieyo.
\v 11 Huan nochi ni tlamantli nopa totajtzi quitlatis ipan nopa
tlaixpamitl, huan ni elis se tlacajcahualistli tlen tlacualistli
tlen nechmacase, na niimoTECO, ipan tlitl.
\p
\v 12 “Intla se acajya quinequi quihualicas se sihua chivo para
nechmacas,
\v 13 huajca nopa tlacatl quitlalis ima ipan nopa tlapiyali
itzonteco, huan teipa quimictis nopona nechca ipuerta nopa yoyon
tiopamitl campa timopantíaj. Huan nopa totajtzitzi quicuise se
quentzi ieso nopa tlapiyali huan ica quiatzejtzelhuise yahualtic
nopa tlaixpamitl.
\p
\v 14 “Huan quiquixtilise nopa tlapiyali nopa tlachiyajcayotl ipan
iijtico, huan nochi nopa tlachiyajcayotl tlatlajco icuitlaxcol, huan
quitlalise ipan nopa tlaixpamitl para nechmacase ipan tlitl.
\v 15 Nojquiya quitlalise nopa ome ieyo huan nopa tlachiyajcayotl
tlen eltoc ipani. Huan quitlalise nopa parte tlen más hueyi tlen
ieltapach tlen quiquixtise ihuaya ieyo.
\v 16 Huan ya ni elis se tlacajcahualistli tlen nopa totajtzi
nechmacas, niimoTECO, ipan tlitl huan mijmiyotis ajhuiyac huan
nechyolpactis. Nochi tlachiyajcayotl mocahua noaxca na, niimoTECO.
\p
\v 17 “Quena, ya ni elis se tlanahuatili tlen monequi
inquitlepanitase, imojuanti huan nochi imoixhuihua yonque campa
hueli inmopantíaj: Amo xijcuaca estli, niyon tlachiyajcayotl.”
\c 4
\s Tlacajcahualistli para tlajtlacoli
\p
\v 1 Huan teipa TOTECO quiilhui Moisés:
\p
\v 2 “Xiquinilhui nopa israelitame ni miyac tlanahuatili. Intla se
tlen imojuanti tlajtlacolchihuas huan quiixpanos se notlanahuatil
na, niimoTECO, huan ax quimati intla tlaixpano, ya ni tlen monequi
quichihuas.
\p
\v 3 “Intla elis nopa hueyi totajtzi tlen tlajtlacolchihuas yonque
ax quimatiyaya, quinchihuas para nopa sequinoc tlacame nojquiya ma
quihuicaca tlajtlacoli huan monequi nopa hueyi totajtzi temacas
noixtla se becerro tlen ax tleno quipiya tlen ax cuali ipan
itlacayo. Ya nopa elis se tlacajcahualistli para nopa tlajtlacoli
tlen ya quichijtoc.
\v 4 Huan monequi nopa hueyi totajtzi quihuicas nopa tlapiyali campa
ipuerta nopa yoyon tiopamitl campa timopantíaj, huan nopona
quitlalis ima ipan itzonteco nopa tlapiyali huan quimictis nopona
noixtla.
\v 5 Huan teipa nopa hueyi totajtzi quicuis se quentzi nopa
tlapiyali ieso huan quihuicas ipan nopa yoyon tiopamitl.
\v 6 Huan nopa totajtzi quixolonis imacpil ipan nopa estli huan
quiatzejtzelhuis chicome hueltas noixtla nopona iixmelac nopa
cortina tlen quitzacua nopa cuarto campa Más Tlatzejtzeloltic.
\v 7 Teipa nojquiya nopa hueyi totajtzi quiajalos estli nopa nahui
icuacua nopa tlaixpamitl campa quitlatíaj copali tlen mocahua yoyon
tiopan calijtic noixtla. Huan nopa estli tlen noja mocahua,
quitoyahuas tlalchi itzintla nopa tlaixpamitl para tlacajcahualistli
tlatlatili tlen eltoc nechca ipuerta nopa yoyon tiopamitl.
\v 8 Teipa quiquixtilis nochi nopa tlachiyajcayotl tlen eltoc ipan
iijtico nopa becerro huan nochi tlen eltoc tlatlajco icuitlaxcol.
\v 9 Nojquiya quiquixtis nopa ome ieyo ihuaya ininchiyajca huan nopa
parte tlen más hueyi tlen ieltapach tlen quiquixtis san sempa ica
nopa ieyo.
\v 10 Huan nochi ni tlamantli nopa totajtzi nechmacas na, niimoTeco,
ipan nopa tlaixpamitl para tlacajcahualistli tlatlatili.
Quiijtosnequi quichihuas san se queja quichijqui ica nopa becerro
tlen nechmacas queja se tlacajcahualistli para ma onca tlayoltlalili
nohuaya.
\v 11 Pero icuetlaxo nopa becerro, huan inacayo, itzonteco,
iicxihua, icuitlaxcol huan icuitl,
\v 12 quinequi quiijtos nochi tlen mocahua, monequi quicahuatij ipan
se lugar tlen tlapajpactic noixtla huan tlen mopantía huejca tlen
nopa yoyon caltini campa inmochijtoque. Quena, quihuicase campa
concahuaj nopa cuanextli tlen nopa tlacajcahualistli tlen
quitlatíaj ipan tlaixpamitl. Huan nopona quitlatise ipan cuahuitl
tlen mocahua tlen nopa becerro tlen elqui nopa tlacajcahualistli
ipampa tlajtlacoli tlen nopa totajtzi quichijqui.
\p
\v 13 “Intla nochi israelitame quichihuase se tlajtlacoli, o intla
quichihuase se tlamantli tlen na, niimoTECO, niquinnahuatijtoc ma ax
quichihuaca, yonque niyon se tlen inijuanti ax momacayaya cuenta
tlen nopa tlajtlacoli, nochi nopa tlacame quihuicase tlajtlacoli
noixtla.
\v 14 Huajca quema momacase cuenta para quichijtoque tlajtlacoli,
monequi quihualicase se becerro huan nechmacase queja se
tlacajcahualistli ipampa tlajtlacoli. Nopa becerro quihualicase
iixpa nopa yoyon tiopamitl,
\v 15 huan noixtla nopa huehue tlacame tlen quinyacanaj israelitame
quitlalise ininma ipan nopa tlapiyali itzonteco huan nopona
quimictise.
\v 16 Teipa nopa hueyi totajtzi quicuis quentzi ieso nopa tlapiyali
huan quihuicas ipan nopa yoyon tiopamitl.
\v 17 Huan teipa quixolonis imacpil ipan nopa estli huan
quiatzejtzelhuis chicome hueltas noixtla iixmelac nopa cortina.
\v 18 Huan nojquiya ica nopa estli quiajalos nopa nahui icuacua nopa
tlaixpamitl tlen eltoc noixtla tiopan calijtic. Huan nopa estli tlen
noja mocahuas quitoyahuas tlalchi itzintla nopa tlaixpamitl campa
temaca tlacajcahualistli tlatlatili. Nopa tlaixpamitl mocahua nechca
ipuerta nopa yoyon tiopamitl.
\v 19 Huan nojquiya quiquixtilis nopa becerro nochi ichiyajca, huan
quitlatis ipan nopa tlaixpamitl.
\v 20 Huan san se quichihuas nopa totajtzi ica ni becerro tlen
temacaj queja quichijqui ica nopa becerro para nopa
tlacajcahualistli ipampa tlajtlacoli. Huan queja nopa quichihuas
nopa totajtzi para quiixtzacuas nochi nopa tlajtlacoli tlen
quichijque nopa israelitame, huan niquintlapojpolhuis.
\v 21 Teipa tlen mocahuas tlen ni becerro nopa totajtzi quihuicas
quentzi huejca tlen campa inmochijtoque. Nopona quitlatis queja
niquijto quitlatisquía ne seyoc becerro. Ya ni elis se
tlacajcahualistli para nochi inintlajtlacolhua nochi israelitame.
\p
\v 22 “Intla se tlayacanquetl ipan nopa israelitame quichihuas se
tlajtlacoli huan quiixpanos se notlanahuatil, niimoTECO Dios, yonque
ax quimatqui, huajca yajaya quihuica tlajtlacoli noixtla.
\v 23 Huajca quema ya quimachilijtos para quichijtoc se tlajtlacoli,
nimantzi ma quihuicas se oquich chivo para nechmacas queja se
tlacajcahualistli. Nopa tlapiyali monequi elis tlapajpactic. Ax
quipiyas tlen ax cuali ipan itlacayo.
\v 24 Huan nopa tlacatl quitlalis ima ipan nopa oquich chivo
itzonteco huan quimictis campa quinmictíaj tlapiyalime para
tlacajcahualistli tlatlatili. Huan teipa nechmactilis na, niimoTECO,
huan elis se tlacajcahualistli para itlajtlacol.
\v 25 Teipa nopa totajtzi ica imacpil quicuis se quentzi ieso nopa
tlapiyali tlen quitencajque queja se tlacajcahualistli ipampa
tlajtlacoli huan quiajalos nopa nahui icuacua nopa tlaixpamitl para
tlacajcahualistli tlatlatili. Huan nochi nopa estli tlen noja
mocahuas quitoyahuas itzintla nopa tlaixpamitl.
\v 26 Huan nochi ichiyajca nopa oquich chivo nojquiya monequi
nechmacase ipan tlitl queja quitlatíaj ichiyajca nopa tlapiyali
tlen se tlacajcahualistli para ma onca tlayoltlalili nohuaya,
niimoTECO. Huan quema quichijtos nochi ya ni, teipa nijtlapojpolhuis
nopa tlayacanquetl.
\p
\v 27 “Intla aqui hueli israelita quichihuas se tlajtlacoli, yajaya
quihuica tlajtlacoli yonque ax quimatqui para na, niimoTECO,
nitlanahuatijtoya axaca ma quichihua nopa tlamantli.
\v 28 Huan teipa quema ya quimachilijtos para quichijtoc nopa
tlajtlacoli, nimantzi monequi quihuicas se chivo tlen sihuatzi tlen
ax quipiya niyon se tlamantli tlen ax cuali ipan itlacayo. Huan ya
nopa elis se tlacajcahualistli para nopa tlajtlacoli tlen
quichijqui.
\v 29 Huan quihuicas nopa tlapiyali campa quinmictíaj nopa
tlapiyalime para tlacajcahualistli tlatlatili. Huan nopona quitlalis
ima ipan nopa tlapiyali itzonteco tlen elis se tlacajcahualistli
ipampa tlajtlacoli huan teipa quimictis.
\v 30 Huan nopa totajtzi quicuis ica imacpil se quentzi ieso huan
quiajalos ipan nopa nahui icuacua nopa tlaixpamitl para
tlacajcahualistli tlatlatili. Huan nopa estli tlen noja mocahuas,
quitoyahuas tlalchi itzintla nopa tlaixpamitl.
\v 31 Nojquiya nopa tlacatl monequi quiquixtilis nochi ichiyajca
nopa tlapiyali. Quena, san se quichihuas queja quichihua ica se
tlacajcahualistli para ma onca tlayoltlalili nohuaya. Huan teipa
nopa totajtzi quitlalis nopa tlachiyajcayotl ipan nopa tlaixpamitl
huan quitlatis. Huan elis se tlacajcahualistli tlen mijmiyotis
ajhuiyac huan nechpactis na, niimoTECO. Huan queja nopa, quichihuas
nopa totajtzi para nechixtzacuilis itlajtlacol nopa tlacatl. Huan
nijtlapojpolhuis.
\p
\v 32 “Pero intla nopa tlacatl quinequi nechmacas se pilborregojtzi
para se tlacajcahualistli ipampa tlajtlacoli, hueli quihualicas se
pilsihua borregojtzi tlen ax quipiya ipan itlacayo niyon se
tlamantli tlen ax cuali.
\v 33 Huan quitlalis ima ipan itzonteco nopa tlapiyali huan
quimictis campa quinmictíaj nopa tlapiyalime tlen quintequihuíaj
para tlacajcahualistli tlatlatili.
\v 34 Huan nopa totajtzi quicuis se quentzi ieso nopa tlapiyali ica
imacpil huan quiajalos ipan icuacua nopa tlaixpamitl para
tlacajcahualistli tlatlatili. Huan nopa estli tlen noja mocahuas
quitoyahuas tlalchi itzintla nopa tlaixpamitl.
\v 35 Teipa quiquixtilis nochi ichiyajca nopa pilsihua borregojtzi.
Quena, san se quichihuas queja quichijqui ica nopa pilborregojtzi
tlen nechtencahuilijque queja se tlacajcahualistli para ma onca
tlayoltlalili nohuaya. Huan nopa totajtzi quitlatis nochi nopa
tlachiyajcayotl ipan nopa tlaixpamitl huan nechmacas na, niimoTECO,
ica nopa tlitl. Huan ica tlen quichihua nopa totajtzi
nechixtzacuilis nopa tlajtlacoli tlen nopa tlacatl quichijqui, huan
nijtlapojpolhuis.
\c 5
\s Tlajtlacoli tlen monequi se tlacajcahualistli
\p
\v 1 “Intla se acajya quiitztoc quema panoc se tlamantli ax cuali,
o quicactoc se tlajtoli ax cuali, huan teipa tequitini quitemohuaj
se testigo tlen quiitztoc nopa tlamantli o quicactoc nopa tlajtoli,
huajca monequi teyolmelahuas tlen nelía quiitztoc o quicactoc.
Pampa intla ax teyolmelahuas tlen panoc, yajaya quihuicas
tlajtlacoli noixtla huan monequi nechhualiquilis se
tlacajcahualistli.
\p
\v 2 “Nojquiya monequi quihualicas se tlacajcahualistli intla se
acajya quiitzquis se tlamantli tlen ax tlapajpactic. Intla mictoc se
tlapiyali tlen ax tlapajpactic para inquicuase yonque teaxca o ehua
cuatitla, huan se tlacatl quiitzquis itlacayo, monequi
nechhualiquilis se tlacajcahualistli. Nojquiya mochihuas ax
tlapajpactic noixtla tlen quiitzquis itlacayo piltlapiyaltzi tlen
mohuahuatatza tlalchi yonque tlen quiitzqui ax quimatiyaya intla
quiitzqui. Pero temachtli mochijtoc ax tlapajpactic huan monequi
nechhualiquilis se tlacajcahualistli.
\p
\v 3 “O intla quiitzquis cuitlatl o tlen hueli atl tlen quistoc
ipan itlacayo se tlacatl, ayoc tlapajpactic noixtla. Huan quema
momacas cuenta para quichijtoc nopa tlamantli huan quihuica
tlajtlacoli noixtla, monequi quihualicas se tlacajcahualistli.
\p
\v 4 “Intla se acajya tlatestigojquetzas para quichihuas se
tlamantli tlen cuali o ax cuali, huan teipa motejtemos huan momacas
cuenta para achi cuali ax camatitosquía, yajaya quihuicas
tlajtlacoli noixtla huan monequi quihualicas se tlacajcahualistli.
\p
\v 5 “Intla se acajya quichihuas tlen hueli tlen ni tlamantli,
huajca monequi nechilhuis na, niimoTECO, tlaque quichijtoc,
\v 6 huan monequi quihualicas noixtla nopa tlacajcahualistli para
nopa tlajtlacoli tlen quihuica. Huelis quihualicas se sihua borrego
o se sihua chivo. Huan nopa totajtzi nechmacas para nechixtzacuilis
itlajtlacol nopa tlacatl noixtla.
\p
\v 7 “Pero intla nopa tlacatl ax quipiya miyac tomi para quicohuas
se pilborregojtzi, huajca hueli nechmacas ome palomas o ome
pichontzitzi. Huan ni totome elise tlacajcahualistli para nopa
tlajtlacoli tlen quihuica. Nechmacas se queja se tlacajcahualistli
ipampa tlajtlacoli huan nopa seyoc nechmacas queja se
tlacajcahualistli tlatlatili.
\v 8 Huan nopa totome quinhualicas campa nopa totajtzi huan yajaya
temacas nopa achtohui piltototzi queja se tlacajcahualistli ipampa
tlajtlacoli. Achtohui quipilquechilacatzos pero ax quicahuilis ma
cotoni itzonteco.
\v 9 Teipa quicuis se quentzi ieso huan ica quiatzejtzelhuis se
ielchiqui nopa tlaixpamitl. Huan nopa estli tlen noja mocahuas
quitoyahuas tlalchi itzintla nopa tlaixpamitl. Huan ya ni elis se
tlacajcahualistli ipampa tlajtlacoli.
\v 10 Huan nopa ompa piltototzi nechmacas queja se tlacajcahualistli
tlatlatili, huan quichihuas san se queja quiijtohua nopa
tlanahuatili. Huajca queja nopa quichihuas nopa totajtzi para
nechixtzacuilis itlajtlacol nopa tlacatl noixtla. Huan na,
niimoTECO, nijtlapojpolhuis.
\p
\v 11 “Huan intla itomi se acajya noja ax quiaxilía para
quincohuas ome palomas o ome pichones, hueli quihuicas ome kilo
harina para nechmacas queja se tlacajcahualistli ipampa
itlajtlacolhua. Pero ax quitlalilis aceite, niyon copali, pampa ni
elis se tlacajcahualistli ipampa tlajtlacoli.
\v 12 Huan monequi quihualicas nopa harina campa nopa totajtzi, huan
nopa totajtzi quicuis se quentzi tlen nopa tlacajcahualistli queja
se tlanextilijcayotl para nechmaca nochi nopa harina. Huan quitlatis
ne quentzi ipan nopa tlaixpamitl queja quitlatía nochi sequinoc
tlacajcahualistli para na. Ya ni elis se tlacajcahualistli ipampa
tlajtlacoli.
\v 13 Huan ica nochi ya ni nopa totajtzi quiixtzacuilis itlajtlacol
tlen quichijtoc nopa tlacatl, huan na nijtlapojpolhuis nopa
tlajtlacoli tlen quichijtoc. Huan nopa harina tlen noja mocahuas
elis para nopa totajtzitzi inintlacualis queja nojquiya mochihua ica
nochi tlen mocahua quema temacaj tlacajcahualistli tlen harina.”
\s Tlacajcahualistli para tlen tlajtlacole noixtla
\p
\v 14 Nojquiya TOTECO quiilhui Moisés:
\p
\v 15 “Intla se tlacatl quichihuas tlen ax cuali, huan
quisoquihuijtos tlamantzitzi tlen tlatzejtzeloltique, huan ax momaca
cuenta quema quichihua, teipa quema quimatis, monequi quihualicas se
tlacajcahualistli pampa tlajtlacole noixtla. Huan nopa
tlacajcahualistli elis se oquich chivo tlen ax quipiya niyon se
tlamantli tlen ax cuali ipan itlacayo. Huan nopa tlapiyali monequi
elis ipati queja ome plata tomi tlen motequihuía ipan nopa yoyon
tiopamitl o achi más. Ni elis se tlacajcahualistli para tlen
quihuica tlajtlacoli noixtla.
\v 16 Huan nopa tlacatl monequi quiixtlahuas tlen ipati nopa
tlamantli tlen quisoquihuijtoc tlen achtohui eliyaya
tlatzejtzeloltic. Huan nojquiya quitlalis seyoc 20 por ciento más.
Queja nopa, nopa totajtzi nechixtzacuilis itlajtlacol nopa tlacatl
noixtla, huan na, niimoTECO, nijtlapojpolhuis.
\p
\v 17 “Aqui hueli tlacatl tlen quiixpanos notlanahuatil, niimoTECO,
yonque ax momaca cuenta, quihuica tlajtlacoli noixtla huan monequi
quiselis itlatzacuiltilis.
\v 18 Huan monequi quihuicas se tlacajcahualistli campa nopa
totajtzi. Huan nopa tlacajcahualistli elis se oquich borrego tlen
ipati queja tlen ta, Moisés, tiquijtos. Huan nopa oquich borrego ax
quipiyas niyon se tlamantli tlen ax cuali ipan itlacayo. Huan nopa
totajtzi nechmacas nopa tlacajcahualistli para nechixtzacuilis
itlajtlacol nopa tlacatl pampa ax quimatqui intla quichihuayaya
tlajtlacoli. Huan na, niimoTECO, nijtlapojpolhuis.
\v 19 Ya ni elis se tlacajcahualistli para tlen quihuica tlajtlacoli
pampa tlajtlacolchijtoc noixtla.”
\c 6
\s Tlacajcahualistli para tlen ax quichijqui tlen temachtli
\p
\v 1 Huan TOTECO quiilhui Moisés:
\p
\v 2 “Intla se acajya tlajtlacolchihuas huan quicajcayahuas seyoc
pampa ax quineltocac notlajtol, niimoTECO, monequi quihualicas se
tlacajcahualistli. Huelis ya ax quimocuitlahui cuali tlen ihuampo
quicahuili imaco para quimocuitlahuis, o huelis quiichtequilijtoc, o
quiquixtilijtoc se tlenijqui pampa yajaya más tetic, o huelis ax
tlacuepqui tlen quitlanejtijque.
\v 3 O huelis se tlacatl quipantis tlen seyoc quipolojtoya, huan
istlacatis o tlatestigojquetzas ica tlen ax melahuac huan quiijtos
ax quiitztoc. Nochi ya ni se tlajtlacoli. Nojquiya tlajtlacoli tlen
hueli tlamantli ax cuali tlen se tlacatl quichihua ica tlamantzitzi
tlen seyoc iaxca.
\v 4 Huan quema mopantis o seyoc quipantis para tlajtlacolchijtoc
huan quihuica tlajtlacoli noixtla pampa quipiya tlen ax iaxca, o
tlatestigojquetztoc ica tlen ax melahuac, huajca nimantzi monequi ma
quicuepas nopa tlamantli.
\v 5 Huan iyoca monequi noja temacas seyoc 20 por ciento queja
elisquía se multa. Nochi temacas ipan san se tonal quema ipan nopa
yoyon tiopamitl nechmacas se tlacajcahualistli para nopa tlajtlacoli
tlen quihuica.
\v 6 Monequi nechhualiquilis se oquich borrego tlen tlapajpactic
huan senquistoc cuali itlacayo huan tlen cuali ipati.
\v 7 Huan nopa totajtzi nechmacas nopa tlapiyali huan
nechixtzacuilis itlajtlacol nopa tlacatl tlen na. Huan na, quena,
nijtlapojpolhuis tlen hueli tlen quichijtoc.”
\s Quejatza ma temaca tlacajcahualistli tlatlatili tlen namajtic
\p
\v 8 Huan TOTECO quiilhui Moisés:
\p
\v 9 “Xiquinilhuiti Aarón huan itelpocahua para quej ni eltoc
tlanahuatili para se tlacajcahualistli tlatlatili. Nopa
tlacajcahualistli monequi eltos ipan nopa tlitl seyohual hasta
ijnaloc huan nopa tlitl mocahuas lementoc.
\v 10 Huan hualmostla nopa totajtzi moquentis itlatzintlanyoyo tlen
lino nechca itlacayo huan teipa iyoyo huehueyac tlen lino. Huan
quiquixtis nopa cuanextli tlen mocahua tlen nopa tlacajcahualistli
huan quitlalis ipan se lado nopa tlaixpamitl.
\v 11 Teipa quiquixtis nopa iyoyo huan moquentis ne seyoc tlamantli
iyoyo huan quihuicas nopa cuanextli hasta se lugar tlen tlapajpactic
noixtla tlen mocahua huejca tlen campa inmochijtoque, huan nopona
quicahuas.
\p
\v 12 “Nochipa monequi lementos se tlitl ipan tlaixpamitl. Ma ax
quicahuase ma sehui. Huan sese ijnaloc nopa totajtzi monequi
quitlalilis cuahuitl nopa tlaixpamitl huan teipa quitlalis nopa
tlapiyali para nopa tlacajcahualistli tlatlatili tlen monequi
mojmostla. Nojquiya nopona quitlatis nopa tlachiyajcayotl tlen nopa
tlacajcahualistli tlen tlacame temacaj para ma moyoltlalica nohuaya,
niimoTECO.
\v 13 Quena, ax quema hueli quicahuase para sehuis nopa tlitl ipan
tlaixpamitl. Monequi nochipa lementos.
\s Quejatza ma temaca tlacajcahualistli tlen harina
\p
\v 14 “Ya ni nopa miyac tlanahuatili para tlacajcahualistli tlen
harina. Itelpocahua Aarón monequi moquetzase iixmelac nopa
tlaixpamitl para nechmacase nopa tlacajcahualistli noixtla na,
niimoTECO.
\v 15 Se tlacajcahualistli tlen harina elis tlen se harina tlen
quicuechtilijtoque nelcuechtic huan quimanelojtoque ica aceite huan
copali. Huan se tlen nopa totajtzitzi quicuis ica ima se quentzi
tlen nopa tlacajcahualistli tlen harina huan quitlatis ipan nopa
tlaixpamitl para quinextis nechtencahuilijtoc nochi noixtla. Huan
mijmiyotis ajhuiyac noixtla na, niimoTECO.
\v 16 Huan ica nopa harina tlen mocahua tlen nopa tlacajcahualistli,
Aarón huan itelpocahua, nopa totajtzitzi, quichihuase pantzi para
quicuase, pero ax huelis quitlalilise tlasonejcayotl ipani. Huan
monequi quicuase nopona campa tlatzejtzeloltic ipan nopa calixpamitl
ipan nopa yoyon tiopamitl.
\v 17 Ma quipiyaca cuidado ma ax quiicxitica ica tlasonejcayotl.
Niquinmacatoc ni harina para elis iniaxca tlen nochi nopa
tlacajcahualistli tlen nechmacaj ica tlitl. Eltoc tlahuel
tlatzejtzeloltic queja nojquiya tlatzejtzeloltic nopa tlapiyalime
tlen nechmacaj para tlacajcahualistli ipampa tlajtlacoli huan para
tlen quihuica tlajtlacoli.
\v 18 Nochi itlaca conehua huan itlaca ixhuihua Aarón hueli
quicuase tlen mocahuas tlen nochi nopa tlacajcahualistli tlen
nechmaca ica tlitl. Huan quej ni elis tlanahuatili para iteipa
ixhuihua tlen oquichpilme tlen tlacajtiyase ipan ifamilia Aarón
teipa. Pero san inijuanti hueli quicuase pampa inijuanti
tlaiyocatlalilme para na. Mochihuas tlatzejtzeloltic aqui hueli
tlacatl tlen quiitzquis nopa pantzi tlen quichijtoque ica harina
tlen mocajqui tlen nopa tlacajcahualistli. Nojquiya mochihuas
tlatzejtzeloltic tlen hueli tlacatl o tlamantli tlen quitoxomas.”
\s Quejatza ma temaca tlacajcahualistli para totajtzitzi
\p
\v 19 Huan TOTECO nojquiya quiilhui Moisés:
\p
\v 20 “Ipan nopa tonal quema Aarón o iteipa ixhuihua
moiyocatlalise para ma elica totajtzitzi, sesen monequi quihualicas
para na, niimoTECO, ni tlacajcahualistli. Nechmacas se
tlacajcahualistli tlen quipiya ome kilos tlen harina nelcuechtic.
Huan tlajco tlen nopa tlacajcahualistli nechmacase ica ijnaloc huan
nopa seyoc tlajco nechmacase ica tiotlac.
\v 21 Nopa tlacajcahualistli monequi elis tlaicxitili ipan se comali
huan cuali tlamaneloli ica aceite. Huan quema ya icsitoc,
quihuejhuelos nopa pantzi tlen quichijtoque ica nopa
tlacajcahualistli tlen harina huan nechmacas. Huan mijmiyotis nelía
ajhuiyac para na.
\v 22 Huan san se nechmacas nopa itelpoca tlen se tonal calaquis
queja nopa yancuic hueyi totajtzi ipatlaca Aarón. Huan ni
tlacajcahualistli elis noaxca na, niimoTECO, huan monequi quitlatise
nochi nopa tlacajcahualistli para nechmacase ipan poctli pampa quej
nopa nimechnahuatía.
\v 23 Huajca monequi quitlatis senquistoc nochi nopa
tlacajcahualistli tlen harina tlen nopa totajtzi nechmacas para ya
iselti. Niyon quentzi axaca hueli quicuas.”
\s Quejatza ma quimaca tlacajcahualistli ipampa tlajtlacoli
\p
\v 24 Huan TOTECO quiilhui Moisés:
\p
\v 25 “Xiquinilhui Aarón huan itelpocahua ni miyac tlanahuatili
para nopa tlacajcahualistli ipampa tlajtlacoli. Ni tlacajcahualistli
tlen tlahuel tlatzejtzeloltic huan nopa tlapiyali monequi quimictise
campa quinmictíaj tlapiyalime para tlacajcahualistli tlatlatili.
\v 26 Huan nopa nacatl tlen mocahuas elis iaxca nopa totajtzi tlen
nechmacas nopa tlacajcahualistli ipampa tlajtlacoli para quicuas,
pero monequi quicuas campa tlatzejtzeloltic nopona ipan calixpamitl,
iixpa nopa yoyon tiopamitl campa timopantíaj.
\v 27 Tlen hueli tlamantli o tlacatl tlen quitoxomas quentzi nopa
nacatl mochihuas tlatzejtzeloltic, tlaiyocatlalili para
nechtequipanos na. Huan intla se quentzi tlen ieso quiajsis iyoyo,
nopa tlacatl monequi quichicuenis iyoyo nopona campa
tlatzejtzeloltic.
\v 28 Intla quiicxitía nopa nacatl ipan se comitl tlachijchihuali
ica soquitl, monequi quitlapanas teipa. Pero intla quiicxitía nopa
nacatl ipan se tlamantli tlachijchihuali ica nopa tepostli bronce,
san monequi quipajpacas ica miyac cuidado teipa.
\p
\v 29 “San totajtzitzi huan inioquichpilhua hueli quicuase se
tlacajcahualistli ipampa tlajtlacoli, pampa ni nopa
tlacajcahualistli tlen tlahuel tlatzejtzeloltic.
\v 30 Pero intla ieso nopa tlapiyali ya quihuicatoque tiopan
calijtic campa nopa cuarto tlen Más Tlatzejtzeloltic para
quiixtzacuase inintlajtlacol tlacame, huajca axaca hueli quicuas
inacayo. Nochi itlacayo nopa tlacajcahualistli monequi inquitlatise
noixtla.
\c 7
\s Quejatza ma temaca tlacajcahualistli para tlen tlajtlacole
\p
\v 1 “Ya ni nopa tlanahuatili para nopa tlacajcahualistli para tlen
quihuica tlajtlacoli noixtla, niimoTECO. Nopa tlacajcahualistli elis
tlahuel tlatzejtzeloltic.
\v 2 Nopa tlapiyali tlen quitencajtoque queja se tlacajcahualistli
para tlen quihuica tlajtlacoli, monequi quimictise ipan nopa lugar
campa quinmictíaj nopa tlapiyalime tlen quintequihuíaj para
tlacajcahualistli tlatlatili. Huan ica ieso nopa tlapiyali
quiatzejtzelhuise yahualtic nopa tlaixpamitl itzintla.
\v 3 Huan nopa totajtzi nechmacas nochi ichiyajca yonque tlen
mopantía campa tlatzquitoc icuitlapil o ipan icuitlaxcol.
\v 4 Huan temacas nopa ome ieyo ihuaya nopa tlachiyajcayotl tlen
mopantía ininpani. Nojquiya temacas nopa parte hueyi tlen ieltapach
tlen quiquixtis ihuaya ieyo.
\v 5 Teipa nopa totajtzi quitlatis nochi nopa partes ipan
tlaixpamitl, huan elis se tlacajcahualistli para tlen quihuica
tlajtlacoli. Elis se tlacajcahualistli tlen nechmacase niimoTECO ica
tlitl huan mijmiyotis ajhuiyac noixtla.
\v 6 Nochi totajtzitzi hueli quicuase nopa nacatl tlen mocahua tlen
se tlacajcahualistli para tlen quihuica tlajtlacoli, pero monequi
quicuase campa tlatzejtzeloltic pampa ni se tlacajcahualistli
tlahuel tlatzejtzeloltic.
\p
\v 7 “San se tlanahuatili eltoc para nopa nacatl tlen mocahua tlen
nopa tlacajcahualistli ipampa tlajtlacoli huan nojquiya para nopa
tlacajcahualistli para tlen quihuica tlajtlacoli. Nopa nacatl
iniaxca nopa totajtzitzi tlen temacase nopa tlacajcahualistli para
nechixtzacuilise nopa tlajtlacoli noixtla huan inijuanti ma
quicuaca.
\v 8 Pero quema se totajtzi nechmacas se tlacajcahualistli
tlatlatili para se tlacatl, nopa totajtzi san quiselis nopa
tlapiyali icuetlaxo.
\v 9 Huan nojquiya nochi tlacajcahualistli tlen harina tlen
tlaicxitili ipan horno, comali o sartén, elis para ma quitequihui
nopa totajtzi tlen nechmacas.
\v 10 Pero nochi tlacajcahualistli tlen harina yonque tlamaneloli
ica aceite o axtle, elis san se iniaxca nochi Aarón iixhuihua. Huan
monequi quinmajmacase sesen inijuanti san se imiyaca.
\s Quejatza ma temaca tlacajcahualistli para ma onca tlayoltlalili
\p
\v 11 “Ya ni nopa tlanahuatili para nopa tlacajcahualistli para ma
onca tlayoltlalili nohuaya tlen tlacame temacaj.
\v 12 Intla eli se tlacajcahualistli para tlascamatili, monequi
temacase ihuaya pantzi tlen quipiya aceite, pero ax quipiyas
tlasonejcayotl. Nojquiya monequi temacas ihuaya pantzi sepantic huan
cacatztic tlen ax quipiya tlasonejcayotl huan tlen tlaajaloli ica
aceite. Nojquiya monequi temacas pantzi tlen harina tlen tlahuel
tlatzatzaltili huan tlen quihuica aceite.
\v 13 Pero ica ni tlacajcahualistli para tlascamatili monequi
quihualicas pantzi tlen, quena, quipiya tlasonejcayotl.
\v 14 Se quentzi tlen sesen tlamantli tlen ni tlacajcahualistli nopa
totajtzi quitlejcoltis huejcapa huan quihuisos noixtla para
nechmacas. Huan teipa ni elis iaxca nopa totajtzi tlen tlapalehuía
huan quiatzejtzelhuía estli tlen nopa tlapiyali ipan tlaixpamitl.
\p
\v 15 “Huan tlen quitencajqui nopa tlapiyali queja se
tlacajcahualistli para ma onca tlayoltlalili nohuaya huan para
nechtlascamatis monequi quicuas inacayo nopa tlapiyali ihuaya
ifamilia ipan san se nopa tonali quema nechmacas. Ax tleno huelis
quicahuase para seyoc tonali.
\p
\v 16 “Pero intla se tlacatl quihualicas se tlacajcahualistli para
ma onca tlayoltlalili nohuaya pampa tlatestigojquetza tlen
quichihuas o tlen ax quichihuas, o intla quihualica san ica
ipaquilis, huajca quena, nopa nacatl tlen mocahuas elis iaxca tlen
quihualicac. Huan inijuanti quicuase nopa tonal o hasta hualmostla.
\v 17 Huan intla ipan eyi tonali noja eltos nopa nacatl, huajca
monequi quitlatis nochi.
\v 18 Pero intla se tlacatl quicuasquía nacatl ipan eyi tonali tlen
quisqui tlen se tlacajcahualistli para ma onca tlayoltlalili nohuaya
tlen yajaya nechmacac, nopa tlacajcahualistli ayoc elis se tlamantli
tlen nechpactis na. Ax nijselis nopa tlacajcahualistli huan niquitas
para se tlamantli fiero noixtla huan ax nijselis yajaya tlen
nechmacac. Huan nopa tlacatl tlen quicuajqui ipan eyi tonali
quihuicas itlajtlacol noixtla.
\p
\v 19 “Nojquiya intla quentzi nopa nacatl huetzis ipan se tlamantli
tlen ax tlapajpactic noixtla, huajca ayoc aca huelis quicuas.
Monequi quitlatise nochi.
\p “Pero nopa nacatl tlen ax quiajsis tlen ax tlapajpactic, quena,
aqui hueli tlacatl tlen ax tlapajpactic hueli quicuas.
\p
\v 20 “Huan intla aqui hueli tlacatl tlen ax tlapajpactic quicuas
se quentzi inacayo nopa tlapiyali tlen noaxca na, niimoTECO, pampa
se nechmacatoc queja se tlacajcahualistli para ma onca tlayoltlalili
nohuaya, monequi xijquixtica tlen imojuanti para ayoc quema huelis
itztos ica inisraelitame.
\p
\v 21 “Mahuilili intla se tlacatl quitoxomas tlen ax tlapajpactic,
yonque tlen quisa ipan inintlacayohua tlacame, o se tlapiyali tlen
ax tlapajpactic, o tlen hueli tlamantli tlen ax tlapajpactic
noixtla. Tlen quitoxomas tlen ax tlapajpactic huan teipa quicuas
quentzi nacatl tlen se tlacajcahualistli para ma onca tlayoltlalili
nohuaya tlen ya o seyoc nechmacatoc, monequi xijquixtica tlen
imojuanti para ayoc quema huelis itztos ica inisraelitame.”
\s Axaca hueli quicuas estli niyon tlachiyajcayotl
\p
\v 22 Huan teipa TOTECO quiilhui Moisés:
\p
\v 23 “Xiquinilhui nopa israelitame ni tlanahuatili. Axaca huelis
quicuas niyon se tlamantli tlachiyajcayotl, yonque ininchiyajca
huacaxme, borregojme o chivojme.
\v 24 Pero ininchiyajca tlapiyalime tlen mijque ica ininselti o tlen
quinmictijque sequinoc tecuanime, hueli xijtequihuica ininchiyajca
ica tlen hueli tequitl, pero amo xijcuaca.
\p
\v 25 “Huan intla aqui hueli tlacatl quicuas ichiyajca se tlapiyali
tlen quitencajtoque queja se tlacajcahualistli para na ipan tlitl,
monequi xijquixtica tlen imojuanti para ayoc quema huelis itztos ica
inisraelitame.
\p
\v 26 “Yonque campa hueli inmochansehuíaj, amo quema xijcuaca
estli. Amo xijcuaca inieso totome tlen patlanij, niyon sequinoc
tlamantli tlapiyalime.
\v 27 Intla se tlacatl quicuas estli, monequi xijquixtica tlen
imojuanti para ayoc quema huelis itztos ica inisraelitame.”
\s Tlen quintocarohua nopa totajtzitzi para ma quicuaca
\p
\v 28 Huan TOTECO quiilhui Moisés:
\p
\v 29 “Xiquinilhui nopa israelitame ni miyac tlanahuatili. Quema se
acajya quinequis nechmacas na, niimoTECO, se tlacajcahualistli para
ma onca tlayoltlalili nohuaya, monequi quihualicas nopa partes tlen
monequi quitlatis noixtla.
\v 30 Quena, monequi ya iselti quihualicas ica ima nopa
tlachiyajcayotl ihuaya iyolixpa tlen nopa tlacajcahualistli para
quitlatise noixtla. Pero achtohui nopa tlapiyali iyolixpa monequi
quihuisos nopa totajtzi noixtla campa tlaixpamitl.
\v 31 Huan teipa iyolixpa nopa tlapiyali elis iniaxca Aarón huan
itelpocahua para ma quicuaca. Pero nopa totajtzi nechmacas nochi
nopa tlachiyajcayotl ipan tlitl ipan tlaixpamitl.
\v 32 Nojquiya quema se nechmacas se tlacajcahualistli para ma onca
tlayoltlalili nohuaya, monequi nechmacas nopa tlapiyali imetzcuayo
nejmatl para elis iaxca nopa totajtzi.
\v 33 Quema se israelita temacas se tlacajcahualistli para ma onca
tlayoltlalili nohuaya, nopa totajtzi tlen nechmacas ieso huan
ichiyajca nopa tlapiyali quiselis imetzcuayo nopa tlapiyali para
iaxca.
\v 34 Pampa na nijquixtilijtoc iyolixpa huan imetzcuayo nejmatl tlen
nopa tlapiyali tlen quihuisohua noixtla para nechmacase, huan
nijmacatoc Aarón huan itelpocahua para elis iniaxca nochipa.
\v 35 Quena, ipan nopa tonal quema Aarón huan itelpocahua
monextijque noixtla para mochihuase totajtzitzi, niquiniyocatlali ni
partes para ma quicuaca tlen nochi tlacajcahualistli tlatlatili tlen
tlacame nechmacase na, niimoTECO.
\v 36 Huan ipan nopa tonali quema niquintequitlali para ma elica
totajtzitzi nitlanahuati para israelitame ma quinmacaca totajtzitzi
ni partes pampa quintocarohua. Huan ya nopa monequi nopa totajtzitzi
quiselise hasta ininteipa ixhuihua tlacajtiyase huan para nochipa.”
\p
\v 37 Huajca nica eltoc nopa miyac tlanahuatili para quejatza ma
tijmacaca TOTECO se tlacajcahualistli tlen harina, se
tlacajcahualistli ipampa tlajtlacoli huan se tlacajcahualistli para
tlen quihuica tlajtlacoli iixtla, huan se tlacajcahualistli para ma
onca tlayoltlalili ihuaya. Nojquiya techilhuía catlía
tlacajcahualistli monequi temacas se totajtzi para moiyocatlalis
quema quiselía itequi para TOTECO.
\v 38 Nochi ni miyac tlanahuatili TOTECO quimacac Moisés ipan nopa
tepetl Sinaí quema nopa israelitame noja itztoyaj ipan nopa huactoc
tlali, pampa nopona TOTECO techilhui para monequi ma tijhuicaca
tlacajcahualistli iixtla.
\c 8
\s Moisés quiniyocatlali Aarón huan itelpocahua
\r (Éx. 29:1-37)
\p
\v 1 Teipa TOTECO quiilhui Moisés:
\p
\v 2 “Ama xiquinhuica Aarón huan itelpocahua hasta campa ipuerta
nopa yoyon tiopamitl. Huan xijhuica ininyoyo nopa totajtzitzi huan
nopa aceite para tiquinaltis. Nojquiya xijhuica nopa becerro tlen
nechmacase queja se tlacajcahualistli ipampa tlajtlacoli. Huan
xijhuica nopa ome oquich borregojme huan nopa chiquihuitl ica pantzi
tlen ax quipiya tlasonejcayotl.
\v 3 Huan xiquinilhui nochi nopa israelitame nojquiya ma mosentilica
nopona.”
\p
\v 4 Huajca Moisés quichijqui nochi senquistoc queja TOTECO
quinahuati. Huan quema mosentilijtoyaj nochi israelitame campa
ipuerta nopa yoyon tiopamitl,
\v 5 Moisés quinilhui: “Ya ni tlen TOTECO tlanahuatijtoc ma
tijchihuaca.”
\v 6 Huan teipa Moisés quichijqui ma monechcahuica Aarón huan
itelpocahua huan quinpajpajqui ica atl.
\v 7 Huan teipa quiquenti Aarón itlatzintlanyoyo tlen huehueyac,
huan quitlalili itzinquechilpica huan nojquiya quitlalili
ipantzajca. Huan ipan nopa pantzajcayotl quitlali nopa seyoc
ipantzajca tlen ax quipixqui ima.
\v 8 Teipa Moisés quitlalili nopa yolixpantzajcayotl tlen quipixqui
ibolsa huan nopona quitlalili nopa Urim huan nopa Tumim, nopa dados
tlatzejtzeloltic tlen Toteco.
\v 9 Huan teipa ipan itzonteco Aarón quitlalili icuatzajca tlen eli
queja se tzonyahuali. Huan ipan icuaixco quitlalili nopa piltepos
patlactzi tlen tlatzejtzeloltic huan tlen tlachijchihuali ica oro
tlen quiixnextía para yajaya nopa hueyi totajtzi. Queja nopa TOTECO
quinahuati ma quitlalili Aarón.
\p
\v 10 Teipa Moisés quicuic nopa aceite tlen quitequihuíaj para ica
tlaiyocatlalíaj para elis iaxca Toteco, huan quipolo nochi
tlamantli tlen onca ipan nopa yoyon tiopamitl huan queja nopa
quiniyocatlali para elise senquistoc para TOTECO iaxca.
\v 11 Huan quiijtzelo nopa aceite ipan nopa tlaixpamitl chicompa
hueltas para quiiyocatlalis para elis iaxca Toteco nopa tlaixpamitl
huan nochi tlamantzitzi tlen motequihuíaj ipan nopa yoyon
tiopamitl. Nojquiya quiijtzelo ipan nopa hueyi paila huan tlen ipan
moquetzaj huan queja nopa quintlatzejtzelolchijqui.
\v 12 Huan teipa nojquiya quitequili quentzi aceite ipan Aarón
itzonteco para quiiyocatlalis para itequi.
\v 13 Huan teipa Moisés sampa quinnotzqui ma monechcahuica Aarón
itelpocahua huan quinquenti ininyoyo tlen huehueyac, huan
quintlalili inintzinquechilpijca, huan nojquiya quintlalili
inintzontzajcayohua. Huan nochi quichijqui queja TOTECO
quinahuatijtoya.
\p
\v 14 Teipa quicuic nopa becerro para nopa tlacajcahualistli ipampa
tlajtlacoli, huan Aarón huan itelpocahua quitlalijque ininma ipan
itzonteco nopa tlapiyali.
\v 15-16 Huan Moisés quimicti nopa tlapiyali huan ica imacpil
quicuic se quentzi estli huan quiajalo nopa nahui icuacua nopa
tlaixpamitl tlen mocahuayaya campa inacastla. Huan nojquiya
quiatzejtzelhui nopa tlaixpamitl para quitlatzejtzelolchihuas. Huan
nopa estli tlen mocajqui quitoyajqui tlalchi itzintla nopa
tlaixpamitl. Teipa quicuic nopa tlachiyajcayotl tlen mopantía ipan
icuitlaxcol ihuaya nopa parte tlen más hueyi tlen ieltapach, huan
iome sosone ihuaya inintlachiyajcayo, huan quitencajqui iixpa TOTECO
ipan tlitl ipan nopa tlaixpamitl.
\v 17 Huan nopa becerro inacayo huan icuetlaxo, huan icuitlaxcol ica
icuitl, quitlatito ipan se lugar tlen mocahua huejca tlen campa
mochijtoyaj. Quichijqui senquistoc queja quinahuatijtoya TOTECO.
\p
\v 18 Teipa quihualicac nopa oquich borrego para nopa
tlacajcahualistli tlatlatili iixtla TOTECO. Huan Aarón huan
itelpocahua quitlalijque ininma ipan itzonteco nopa tlapiyali,
\v 19 huan Moisés quiquechtzontejqui huan quiatzejtzelhui yahualtic
nopa tlaixpamitl ica ieso.
\v 20 Teipa quihuejhuelo nopa oquich borrego. Huan nopa nacatl
tlatectli ihuaya itzonteco huan ichiyajca quitlati ipan nopa
tlaixpamitl para quimacas TOTECO ipan poctli.
\v 21 Pero achtohui quipajpajqui icuitlaxcol huan imetzcuayo ica
atl, huan teipa quitlati ipan nopa tlaixpamitl. Huan queja nopa,
nochi nopa oquich borrego nejmajtic tlatlac iixpa TOTECO. Huan nopa
tlapiyali elqui se tlacajcahualistli tlatlatili tlen mijmiyoti
ajhuiyac para ya. Huan Moisés quimacac TOTECO nopa
tlacajcahualistli ipan tlitl senquistoc queja quinahuatijtoya.
\p
\v 22 Teipa Moisés quiixnexti nopa seyoc oquich borrego tlen elqui
se tlacajcahualistli para quiniyocatlalis Aarón huan itelpocahua,
huan inijuanti quitlalijque ininma ipan itzonteco.
\v 23 Huan teipa Moisés quiquechtzontejqui nopa tlapiyali, huan
quicuic se quentzi ieso huan quitlali Aarón ipan inacas nejmatl.
Huan nojquiya quitlalili ipan ihueyi xocpil tlen inejmatl huan ipan
ihueyi macpil tlen inejmatl.
\v 24 Teipa Moisés quinilhui itelpocahua Aarón ma monechcahuise
huan nojquiya san se quitlali ipan ininnacas nejmatl huan
ininxocpilhua tlen hueyi tlen ininnejmatl huan ipan ininmacpil tlen
hueyi tlen nojquiya ininnejmatl. Huan nopa estli tlen mocajqui
quiatzejtzelhui itzintla huan yahualtic nopa tlaixpamitl.
\p
\v 25 Teipa quicuic nopa tlachiyajcayotl huan icuitlapil tlen
quipixqui ichiyajca. Nojquiya quicuic nopa tlachiyajcayotl tlen
mopantía ipan icuitlaxcol, ieltapach, huan nopa ome ieyo huan
imetzcuayo tlen inejmatl.
\v 26 Huan tlen nopa chiquihuitl tlen quipixqui pantzi tlen ax
quipixqui tlasonejcayotl tlen eltoc iixtla TOTECO, Moisés quiquixti
se pantzi, huan se pantzi tlen tlamaneloli ica aceite, huan se
pantzi tlen sepantic huan cacatztic. Huan nochi ya ni quitlali
ininpani nopa partes tlen quisqui ipan nopa oquich borrego.
\v 27 Huan nochi ni tlamantli quitlali imaco Aarón huan ipan ininma
itelpocahua para inijuanti ma quihuisoca iixtla TOTECO para
quimacase.
\v 28 Huan teipa sampa quicuic nopa tlamantli tlen ininma, huan
quitlati ipan nopa tlaixpamitl ihuaya nopa tlacajcahualistli
tlatlatili para quimacas TOTECO. Huan ya ni, quena, elqui se
tlacajcahualistli para quiniyocatlalis Aarón huan itelpocahua para
inintequi tlen totajtzitzi. Huan mijmiyoti ajhuiyac para TOTECO. Ya
ni elqui tlacajcahualistli tlen quimacac TOTECO ipan tlitl.
\v 29 Huan teipa Moisés quicuic nopa oquich borrego iyolix huan
quimacac TOTECO queja se tlacajcahualistli tlahuisoli iixtla, pampa
quihuiso iixtla nopona campa nopa tlaixpamitl. Huan teipa iyolix
nopa tlapiyali mocajqui iaxca Moisés pampa queja nopa tlanahuati
TOTECO.
\p
\v 30 Teipa quicuic quentzi nopa aceite para teiyocatlalise huan
quentzi nopa estli tlen eltoya ipan tlaixpamitl huan ica
quiatzejtzelhui iyoyo Aarón. Huan nojquiya quiatzejtzelhui ininyoyo
itelpocahua Aarón. Huan queja nopa quichijqui ma elica
tlaiyocatlalilme Aarón huan itelpocahua para quitequipanose TOTECO,
huan nojquiya ininyoyo quiiyocatlalili para TOTECO.
\p
\v 31 Huan Moisés nojquiya quinilhui Aarón huan itelpocahua:
“Xiquicxitica nopa nacatl ipan atl nechca ipuerta ni yoyon
tiopamitl. Nopona calixpamitl, xijcuaca ihuaya nopa pantzi tlen
eltoc ipan nopa chiquihuitl tlen quipiya nopa tlacajcahualistli para
inmechiyocatlalise para TOTECO. Quena, xijchihuaca queja
niquijtojtoc pampa nimechnahuatía para monequi imojuanti xijcuaca.
\v 32 Huan nopa nacatl huan pantzi tlen noja mocahuas, monequi
inquitlatise.
\v 33 Huan ax hueli inquistehuase tlen ipuerta nopa yoyon tiopamitl
para chicome tonali, pampa monequi chicome tonali para tlamis nochi
tlen monequi para nimechiyocatlalis para TOTECO.
\v 34 Huan nochi ni tlamantli tlen tijchijtoque, tijchijque pampa
TOTECO queja nopa quinequiyaya ma tijchihuaca para quiixtzacuas
imotlajtlacolhua iixtla.
\v 35 Huan sampa nimechnahuatía, monequi para chicome tonali,
tonaya huan tlayohua ximocahuase nechca ipuerta nopa yoyon
tiopamitl. Quena, queja nopa TOTECO inmechnahuatijtoc para ax
inmiquise.”
\p
\v 36 Huan Aarón huan itelpocahua quichijque nochi tlen TOTECO
quinahuatijtoya Moisés.
\c 9
\s Totajtzitzi quipehualtijque inintequi
\p
\v 1 Panoc nopa chicome tonali para moiyocatlalise para TOTECO huan
ipan ne chicueyi tonal Moisés quinnotzqui Aarón huan itelpocahua
huan nochi nopa huehue tlacame tlen tlayacanque ica israelitame.
\v 2 Huan quiilhui Aarón: “Xijcui se becerro para tijmacas TOTECO
queja se tlacajcahualistli ipampa tlajtlacoli para ta. Huan nojquiya
xijcui se oquich borrego para elis se tlacajcahualistli tlatlatili.
Huan ni tlapiyalime monequi elise tlapajpacme. Ax quipiyase ipan
inintlacayo niyon se tlamantli tlen ax cuali.
\v 3 Huan xiquinilhuica nopa israelitame ma quicuica se oquich chivo
para ma quimacaca queja se tlacajcahualistli ipampa tlajtlacoli.
Huan nojquiya ma quicuica se becerro huan se pilborregojtzi tlen
sanoc quiaxitijtoque sesen xihuitl para quinmacase queja se
tlacajcahualistli tlatlatili. Ni tlapiyalime monequi elise
tlapajpacme. Ax quipiyase niyon se tlamantli tlen ax cuali ipan
inintlacayo.
\v 4 Huan nojquiya xiquinilhui monequi quicuise se toro tlen
tlaxahua huan se oquich borrego para ma quimacaca queja se
tlacajcahualistli para ma onca tlayoltlalili ihuaya TOTECO. Nojquiya
monequi quihualicase se tlacajcahualistli tlen harina tlen
quicuechtilijtoque huan quichijtoque se harina huan quimanelojtoque
ica aceite. Quena, nochi ya ni monequi xijchihuaca pampa ama TOTECO
monextis ica imojuanti.”
\p
\v 5 Huajca nochi israelitame quihuicaque ni tlamantli tlen
quinnahuatijtoya Moisés campa nopa yoyon tiopamitl icalixpa. Huan
nochi nopa israelitame monechcahuijque huan ijcatoyaj nopona iixpa
TOTECO.
\p
\v 6 Huajca Moisés quinilhui: “Quema ya inquichijtose nochi tlen
tlanahuatía TOTECO, monextis ihueyitilis ica imojuanti.”
\p
\v 7 Teipa Moisés quiilhui Aarón: “Ximonechcahui campa nopa
tlaixpamitl huan xijmaca TOTECO nopa tlacajcahualistli ipampa
tlajtlacoli tlen elis para ta motlajtlacolhua. Huan xijtencahua nopa
tlacajcahualistli tlatlatili tlen quiixtzacuas motlajtlacolhua
iixtla. Teipa xijmaca TOTECO nopa tlacajcahualistli para
quiixtzacuas inintlajtlacolhua nochi israelitame iixtla queja yajaya
tlanahuatijtoc.”
\p
\v 8 Huajca Aarón monechcahui campa nopa tlaixpamitl huan quimicti
nopa becerro para se tlacajcahualistli ipampa tlajtlacoli ipampa ya
itlajtlacol.
\v 9 Huan itelpocahua quihualiquilijque nopa estli, huan Aarón
quicuic se quentzi nopa estli ica imacpil huan quiajalo nopa nahui
icuacua nopa tlaixpamitl. Huan nopa estli tlen noja mocajqui
quitoyajqui tlalchi itzintla nopa tlaixpamitl.
\v 10 Huan teipa quitlati nochi nopa tlapiyali ichiyajcayo, ieyo
huan nopa parte tlen más hueyi tlen ieltapach. Nochi quimacac
TOTECO ipan poctli queja yajaya quinahuatijtoya ma quichihuaca.
\v 11 Pero inacayo nopa tlapiyali huan icuetlaxo quitlati ipan se
lugar huejca tlen campa timochijtoyaj.
\p
\v 12 Huan teipa Aarón quimicti nopa tlapiyali tlen elqui para
tlacajcahualistli tlatlatili, huan itelpocahua quihuiquilijque nopa
estli. Huan quiatzejtzelhui ica nopa estli yahualtic ipan nochi
ielchiqui nopa tlaixpamitl.
\v 13 Huan quihuejhuelojque nopa tlapiyali huan quihuiquilijque
Aarón itzonteco huan sesen tlatectli.
\v 14 Teipa quipajpajqui icuitlaxcol huan imetzcuayo huan nojquiya
quitencajqui ipan tlitl ipan nopa tlaixpamitl ihuaya nopa
tlacajcahualistli tlatlatili.
\p
\v 15 Teipa quihualicac nopa oquich chivo tlen quihualicatoyaj nopa
israelitame. Huan quimicti huan quitencajqui queja se
tlacajcahualistli ipampa tlajtlacoli para nopa israelitame
inintlajtlacolhua. Nochi quichijque queja achtohui quichijqui ica
nopa seyoc tlacajcahualistli ipampa tlajtlacoli ipampa ya.
\v 16 Huan teipa quihualicac nopa tlacajcahualistli tlatlatili. Huan
quitencajqui iixtla TOTECO senquistoc queja quiijto itlanahuatil.
\p
\v 17 Teipa quihualicac nopa tlacajcahualistli tlen harina. Huan
quicuic se quentzi nopa harina tlen quicuechtilijtoyaj tlen nopa
tlacajcahualistli tlen quihualicatoyaj, huan quitlati ipan nopa
tlaixpamitl ihuaya nopa tlacajcahualistli tlatlatili tlen
quitencajque ica ijnaloc.
\p
\v 18 Teipa quiquechtzontejqui nopa toro tlen quimati tlapoxahua
huan nopa oquich borrego tlen quimacayayaj nopa israelitame queja se
tlacajcahualistli para ma onca tlayoltlalili ica TOTECO. Huan
itelpocahua Aarón quihuiquilijque nopa estli, huan yajaya
quiatzejtzelo yahualtic huan itzintla nopa tlaixpamitl.
\v 19 Teipa quicuic nopa toro ichiyajca huan ichiyajca nopa oquich
borrego. Huan quicuic nopa tlachiyajcayotl tlen mopantía ipan
inincuitlapil huan tlen mopantía ipan inincuetlaxcol. Huan quicuic
ininsosone huan nopa parte tlen inieltapach tlen quipixqui
ininchiyajca.
\v 20 Huan nochi nopa partes itelpocahua quitlalijque ipan nopa
tlapiyalime ininyolix para quimacase Aarón. Huan nochi nopa
tlachiyajcayotl quitlati ipan nopa tlaixpamitl para quimacas TOTECO
ipan poctli.
\v 21 Pero ininyolix huan ininmetzcuayo tlen inejmatl, Aarón
quitencajqui iixtla TOTECO queja se tlacajcahualistli tlahuisoli.
Huan nochi Aarón quichijqui queja Moisés quinahuatijtoya.
\s TOTECO ihueyitilis monexti iniixtla nochi israelitame
\p
\v 22 Huan Aarón quitlejcolti ima para campa itztoyaj nopa
israelitame huan quintiochijqui. Huan quema ya quitencajtoya nopa
tlacajcahualistli ipampa tlajtlacoli, huan nopa tlacajcahualistli
tlatlatili, huan nopa tlacajcahualistli para ma onca tlayoltlalili
ica TOTECO, Aarón temoc tlen campa nopa tlaixpamitl.
\v 23 Huan Moisés huan Aarón calajque calijtic ipan nopa yoyon
tiopamitl. Huan teipa quisque huan quintiochijque nopa israelitame,
huan TOTECO ihueyitilis monexti iniixtla nochi nopa israelitame tlen
mosentilijtoyaj nopona.
\v 24 Huan TOTECO quititlanqui tlitl tlen iixtla huan nimantzi
quitlamitlati nochi nopa tlacajcahualistli huan nopa tlachiyajcayotl
tlen eltoya ipan nopa tlaixpamitl.
\p Huan quema nopa israelitame quiitaque ya nopa, quitzajtzilijque
TOTECO ica paquilistli huan motlancuaquetzque huan mopachojque ica
ininxayac hasta tlalchi.
\c 10
\s Tlajtlacolchijque Nadab huan Abiú
\p
\v 1 Se tonal ome itelpocahua Aarón, inijuanti tlen inintoca
eliyaya Nadab huan Abiú, quicuique sese popochcomitl huan ipan
quitlalijque tlitl tlen ax tlatzejtzeloltic ihuaya copali huan
quitlatijque iixtla TOTECO. Pero tlen quichijque ax elqui queja
TOTECO quinnahuatijtoya ma quichihuaca.
\v 2 Huan TOTECO quititlanqui se tlitl huan quintlamitlati huan
mijque nopona iixtla.
\v 3 Huan teipa Moisés quiilhui Aarón:
\p ―TOTECO quinequiyaya techilhuis para quej ni panos quema
quiijto:
\q ‘Niquinnextilis para nitlatzejtzeloltic,
\q nochi tlen monechcahuíaj campa na.
\q Huan nochi israelitame nechhueyitlalise.’
\p Huan Aarón ax molini.
\p
\v 4 Huan Moisés quinotzqui Misael huan Elzafán tlen eliyayaj
itelpocahua Uziel, itío Aarón, huan quinilhui:
\p ―Xihualaca huan xiquinhuicaca imoteixmatcahua ininmijcatzitzi.
Xiquinquixtica tlen nopa calixpamitl tlen iixtla ni yoyon tiopamitl
huan xiquinhuicaca huejca tlen campa timochijtoque.
\p
\v 5 Huan monechcahuijque huan quinhuicaque ininteixmatcahua
ininmijcatzitzi, huan noja moquentijtoyaj ininyoyo tlen huehueyac
tlen totajtzitzi. Huan quinhuicaque huejca tlen campa timochijtoque
queja Moisés quinnahuatijtoya.
\s Quejatza monemiltise totajtzitzi
\p
\v 6 Teipa Moisés quincamahui Aarón huan nopa ome itelpocahua tlen
inintoca eliyaya Eleazar huan Itamar, huan quinilhui:
\p ―Amo xichocaca niyon amo ximocuesoca. Amo xijcahuaca imotzoncal
ma nesis fiero, niyon amo xijtzayanaca imoyoyo. Pampa intla
inmocuesose, TOTECO nojquiya inmechtzontlamiltis huan yajaya nelía
cualanis ihuaya nochi ni israelitame. Pero moicnihua, nochi nopa
sequinoc israelitame, quena, hueli quinchoquilise Nadab huan Abiú
huan hueli mocuesose ipampa nopa tlitl tlen TOTECO quititlanqui.
\v 7 Pero ax hueli inquisase tlen nopona campa nopa yoyon tiopamitl.
Intla inquisase, inmiquise, pampa intlaiyocatlalilme para TOTECO
ipampa nopa aceite tlen nimechajalti.
\p Huan Aarón huan nopa ome itelpocahua quichijque nochi queja
quinnahuati Moisés.
\p
\v 8 Teipa TOTECO quicamahui Aarón huan quiilhui:
\v 9 “Ta huan motelpocahua ax hueli inquiise vino o tlen hueli
tlamantli tlailistli tlen cococ quema incalaquise ipan nopa yoyon
tiopamitl. Intla inquiise, inmiquise. Ni tlanahuatili monequi
inquitoquilise imojuanti huan nochi imoteipa ixhuihua tlen
tlacajtiyase para nochipa.
\v 10 Monequi inquimachilise catlía tlamantzitzi tlatzejtzeloltic
para na huan catlía amo, huan catlía tlapajpactic noixtla huan
catlía ax tlapajpactic.
\v 11 Huan monequi inquinmachtise nopa israelitame nochi
notlanahuatilhua tlen na, niimoTECO, nimechmacatoc ica Moisés.”
\p
\v 12 Teipa Moisés quincamahui Aarón huan nopa ome itelpocahua
tlen noja itztoyaj tlen inintoca eliyaya Eleazar huan Itamar.
Quinilhui:
\p ―Xijcuica nopa harina tlen noja mocahua tlen nopa
tlacajcahualistli tlen inquimacaque TOTECO ipan tlitl. Xijpiyaca
cuidado para ax quipiyas tlasonejcayotl huan xijcuaca nechca
ielchiqui nopa tlaixpamitl, pampa ya ni elis se tlacajcahualistli
tlen tlahuel tlatzejtzeloltic.
\v 13 Huan monequi xijcuica huan xijcuaca nopona yoyon tiopan
calijtic campa tlatzejtzeloltic. Huan nopa tlen mocahua tlen nopa
tlacajcahualistli tlen harina elis moaxca para motlacualis, Aarón,
huan para inintlacualis motelpocahua. Quena, ni parte tlen nopa
tlacajcahualistli tlen inquitlatise iixtla TOTECO elis imoaxca,
pampa queja nopa tlanahuatijtoc TOTECO ma nimechilhui.
\v 14 Pero iyolix nopa tlapiyali tlen inquihuisohuaj iixtla TOTECO
huan imetzcuayo tlen nojquiya inmechtocaros, hueli inquicuase ipan
tlen hueli lugar tlen tlapajpactic. Quena, imojuanti huan
imooquichpilhua huan imosihuapilhua hueli inquicuase nopa iyolix
huan imetzcuayo pampa imoaxca tlen nochi tlacajcahualistli para ma
onca tlayoltlalili ica TOTECO tlen israelitame temacaj.
\v 15 Nopa israelitame monequi quihualicase imetzcuayo nopa
tlapiyali tlen inquitlejcoltise huan iyolix tlen inquihuisose iixtla
TOTECO para intemacase quema nojquiya inquitlatise nopa
tlachiyajcayotl. Huan teipa nopa partes elis imoaxca. Quena, ni ome
tlamantli mocahuas para ta huan para moconehua para nochipa pampa
queja nopa tlanahuatijtoc TOTECO.
\p
\v 16 Huan teipa Moisés tlajtlanqui canque mocahua nopa oquich
chivo tlen quitencajque queja se tlacajcahualistli ipampa
tlajtlacoli huan quipanti para ya quitlatijtoyaj. Huan tlahuel
cualanqui ihuaya Eleazar huan Itamar, nopa ome itelpocahua Aarón
tlen noja itztoyaj. Huan quinilhui:
\p
\v 17 ―¿Para tlen ax inquicuajque nopa tlacajcahualistli ipampa
tlajtlacoli campa tlatzejtzeloltic tiopan calijtic? Pampa nelía
eliyaya tlatzejtzeloltic huan TOTECO inmechmacac para inquiquixtise
nopa tlajtlacoli tlen israelitame quihuicaj iixtla huan para
inquiixtzacuase inintlajtlacolhua.
\v 18 Monectoya inquicuajtosquíaj yoyon tiopan calijtic campa
tlatzejtzeloltic queja na nimechnahuatijtoya, pampa ax ya nopa
tlacajcahualistli tlen inquihuicaj ieso tiopan calijtic campa Más
Tlatzejtzeloltic tlen ax hueli inquicuase.
\p
\v 19 Pero Aarón quiilhui Moisés:
\p ―Inijuanti quitencajque inintlacajcahualis para tlajtlacoli huan
inintlacajcahualis tlatlatili iixtla TOTECO. Pero ica ininmiquilis
ne sequinoc notelpocahua, na nimoilhui intla tijcuasquíaj ama nopa
tlacajcahualistli ipampa tlajtlacoli, huelis ax quipactijtosquía
TOTECO. Yeca ax nijcuajqui.
\p
\v 20 Huan quema Moisés quicajqui ya nopa, ayoc cualanqui.
\c 11
\s Tlapiyalime tlen tlapajpacme huan tlen axtle
\r (Dt. 14:3-21)
\p
\v 1 Huajca TOTECO sampa quinilhui Moisés ihuaya Aarón:
\p
\v 2 “Xiquinilhuica nopa israelitame para san hueli quicuase ni
tlapiyalime tlen ama nimechilhuis.
\v 3 Hueli quicuase tlen quipiyaj iniisti maxaltic huan quicuajcuaj
inintlacualis ome huelta.
\v 4 Pero ax hueli inquincuase nopa camello,
\v 5 nopa cuatochi,
\v 6 huan nopa pesojtli, pampa yonque ni tlapiyalime quicuajcuaj
inintlacualis ome huelta, ax quipiyaj iniisti maxaltic.
\p
\v 7 “Nojquiya ax hueli inquicuase nopa pitzo, pampa yonque quipiya
iisti maxaltic, ax quicuajcua ome huelta itlacualis, huan huajca
niquita para ax tlapajpactic.
\p
\v 8 “Ax hueli inquicuase ininnacayo ni tlapiyalime niyon ax hueli
inquiitzquise se itlacayo quema mictoc pampa ax tlapajpactic.
\p
\v 9 “Huan tlen nochi michime huan tlapiyalime tlen itztoque ipan
atl, san hueli inquincuase tlen quipiyaj inieltlapal huan
ininpetlayo. Quena, yonque inquinitzquise ipan hueyi atl o ipan se
atlajtli san ni michime inquicuase.
\v 10 Ax hueli inquincuase niyon se tlamantli tlen itztoc ipan hueyi
atl o ipan atemitl intla ax quipiya ieltlapal huan ininpetlayo queja
quipiyaj michime.
\v 11 Nochi ni tlamantli inquiijiyase huan ax hueli inquinitzquise
inintlacayo tlen mictoque.
\v 12 Huan sampa nimechilhuía ya ni: Amo xijcuaca niyon se
tlamantli tlen itztoc ipan atl intla ax quipiya ieltlapal huan
ipetlayo queja quipiya se michi.
\p
\v 13 “Huan nojquiya itztoque totome tlen ax hueli inquincuase. Amo
xijcuaca niyon se hueyi cuajtli, niyon se huactzi, niyon tzopilotl
nechca atl,
\v 14 niyon se tlamantli tzopilotl,
\v 15 o niyon se tlamantli cacalotl.
\v 16 Niyon amo xijcuaca nopa huejcapantic tototl avestruz, niyon
nopa cuajtli tlen tlayohua, niyon nopa atototl tlen chipahuac, o
niyon se tlamantli cuajtli.
\v 17 Amo xijcuaca nopa tololojtli, niyon nopa cuamojmojtli tlen
hueyi, niyon nopa cuamojmojtli tlen ijcatoc iijhuiyo ipan itzonteco,
\v 18 niyon nopa cuamojmojtli chipahuac, niyon nopa tototl yayahuic
tlen quincua michime, niyon nopa pelícano, niyon nopa tzopilotl
tlen quincua tlapiyalime tlen mictoque.
\v 19 Niyon amo xijcuaca nopa astatl, niyon nopa cigüeña, niyon
totome tlen quipiyaj huejhueyi ininmetzhua, niyon tzotzome. Nochi ni
tlapiyalime ax hueli inquincuase.
\p
\v 20 “Nojquiya monequi xiquinijiyaca nochi tlamantli sayolime tlen
patlanij huan quipiyaj nahui ininmetz. Amo xiquincuaca.
\v 21 Pero itztoque sequin tlamantli tlen quipiyaj inieltlapal huan
nahui ininmetzhua tlen hueli inquicuase. Intla ipan ininmetzhua
quipiyaj inintlancuaco tlen quinpalehuíaj para huitonij, huajca
quena, hueli inquincuase.
\v 22 Hueli inquincuase nochi tlamantli pilchapoltzitzi, nochi
chapolime tlen huejhueyi, huan nochi chapolime tlen quicuaj xihuitl
huan quipiyaj inieltlapal.
\v 23 Pero nochi nopa sequinoc sayolime huan chapolime tlen quipiyaj
nahui iniicxi, ax hueli inquincuase.
\p
\v 24 “Ni tlamantli quichihua para se tlacatl elis ax tlapajpactic:
\p “Intla se tlacatl quiitzquis itlacayo se tlen ni totome o
sayolime tlen mictoque, mocahuas ax tlapajpactic hasta tlayohua.
\p
\v 25 “Huan intla se tlacatl quiitzquis itlacayo se tlen ni
tlamantli tlapiyalime quema ya mictoc, monequi nimantzi quichicuenis
iyoyo huan noja mocahuas ax tlapajpactic hasta tlayohua.
\p
\v 26 “Nojquiya inmochihuase ax intlapajpactique quema
inquiitzquise itlacayo se tlapiyali tlen ax senquistoc maxaltic
iisti o ax quicuajcua ome huelta itlacualis.
\p
\v 27 “Nojquiya ax huelis inquincuase tlapiyalime queja chichime
tlen ax quipiyaj senquistoc iniisti. Huan intla se tlacatl
quiitzquis itlacayo se tlen ni tlapiyali tlen mictoc mocahuas ax
tlapajpactic hasta tlayohua.
\v 28 Quena, quema se tlacatl quiitzquis itlacayo se tlen ni
tlapiyali tlen mictoc monequi nimantzi quichicuenis iyoyo, pero noja
mocahuas ax tlapajpactic hasta tlayohua.
\p
\v 29 “Huan tlen nopa tlapiyalime tlen motlalohuaj tlalchi, ya ni
tlen ax cuali para inquincuase: sehueme, quimichime, tamasolime,
tusame,
\v 30 cocodrilome, axilime, topitzitzi huan tzonpetlachiquime.
\p
\v 31 “Intla se tlacatl quiitzquis itlacayo se tlen ni tlapiyalime
tlen mictoc, mocahuas ax tlapajpactic hasta tlayohua.
\p
\v 32 “Nojquiya mocahuas ax tlapajpactic nochi tlamantli tlen ipan
huetzis nopa tlapiyali itlacayo. Quena, intla nopa tlapiyali tlen
mictoc huetzis ipan se tlamantli cuahuitl, o se yoyomitl, o se
cuetlaxtli o se coxtali, huajca nopa tlamantli mocahuas ax
tlapajpactic. Monequis inquitlalise ipan atl huan mocahuas ax
tlapajpactic hasta tlayohua, pero teipa elis tlapajpactic.
\p
\v 33 “Huan intla nopa tlapiyali huetzis ipan se tlamantli tlen
tlachijchihuali ica soquitl, huajca nochi tlamantzitzi tlen
quipixqui iijtico elise ax tlapajpactic, huan monequi inquitlapanase
nopa comitl.
\v 34 Huan intla nopa atl tlen ica quitlapajpacchihuaj tlen ax
tlapajpactic huetzis ipan se tlamantli tlacualistli o se tlamantli
tlailistli, nopa tlamantli nojquiya mochihuas ax tlapajpactic pampa
quiajsic nopa atl.
\p
\v 35 “Intla itlacayo se tlen ni tlapiyali tlen mictoc huetzis ipan
tlen hueli tlamantli horno tlen tlachijchihuali ica soquitl, huajca
nopa horno mocahuas ax tlapajpactic huan monequi inquixolehuase.
\p
\v 36 “Huan intla nopa tlapiyali huetzis ipan se ameli tlen quipiya
atl, huajca nopa atl mocahuas tlapajpactic, pero nopa tlacatl tlen
quiquixtis nopa tlapiyali itlacayo, yajaya, quena, mocahuas ax
tlapajpactic.
\p
\v 37 “Huan intla itlacayo nopa tlapiyali tlen mictoc huetzis ipan
xinachtli tlen quicajtoyaj para quitocase ipan mila, huajca nopa
xinachtli noja mochihuas tlapajpactic.
\v 38 Pero intla itlacayo nopa tlapiyali tlen mictoc huetzis ipan
xinachtli tlen xolontoc, huajca mocahuas ax tlapajpactic.
\p
\v 39 “Huan intla inquipiyaj se tlapiyali tlen cuali para
inquicuase pero nopa tlapiyali miquis ica cocolistli, huajca amo
xiquitzqui itlacayo. Pampa intla se tlacatl quiitzquis itlacayo,
nopa tlacatl mocahuas ax tlapajpactic hasta tlayohua.
\v 40 Huan intla se tlacatl quicuas inacayo o quihuicas itlacayo
nopa tlapiyali, monequi nimantzi quichicuenis iyoyo, pero noja
mocahuas ax tlapajpactic hasta tlayohua.
\p
\v 41 “Monequi xiquinijiyaca nochi tlapiyalime tlen mohuahuatatzaj
tlalchi huan ax hueli inquincuase.
\p
\v 42 “Ax hueli inquincuase nochi tlamantli tlen ica ininyolix
mohuahuatatzaj tlalchi, niyon nopa cohuame tlen nejnemij ica nahui
iniicxi. Nojquiya ax hueli inquincuase nopa tlapiyalime tlen
mohuahuatatzaj tlalchi huan quipiyaj miyac iniicxihua, pampa nelía
ax tlapajpactique noixtla.
\v 43 Amo xijtoxomaca niyon se tlen ni tlapiyalime pampa
inmechchihuas ax intlapajpactique.
\v 44 Na niimoTECO Dios. Nijnequi ximomocuitlahuica cuali huan
xielica intlatzejtzeloltique pampa na nitlatzejtzeloltic. Huajca amo
xiquitzquica niyon se ni tlapiyalime tlen mohuahuatatzaj tlalchi
pampa inmechchihuas ax intlapajpactique noixtla.
\v 45 Na niimoTECO tlen nimechquixti ipan tlali Egipto para nielis
niimoTeco Dios. Huajca ama, monequi inelise intlatzejtzeloltique
pampa na nitlatzejtzeloltic.
\p
\v 46 “Huajca nica nimechilhuijtoc nopa miyac tlanahuatili tlen
monequi inquitoquilise ica nochi totome, tlapiyalime, tlamantli tlen
itztoque ipan atl huan tlamantli tlen mohuahuatatzaj tlalchi.
\v 47 Ni tlanahuatili inmechpalehuise para inquimatise tlaque eli se
tlapiyali tlen tlapajpactic huan tlaque eli se tlapiyali tlen ax
tlapajpactic. Huan nojquiya inmechpalehuis para inquimatise tlaque
tlapiyali hueli inquicuase huan tlaque tlapiyali ax hueli
inquicuase.”
\c 12
\s Quejatza motlapajpacchihuas se sihuatl
\p
\v 1 Huan TOTECO nojquiya quiilhui Moisés:
\p
\v 2 “Xiquinilhui nopa israelitame ni miyac tlanahuatili. Quema se
sihuatl tlanemiltis huan quitlacatiltis se oquichpil, huajca nopa
sihuatl mocahuas ax tlapajpactic para chicome tonali. Monequi
quichihuas san se queja quichihua quema esotemo.
\v 3 Huan ipan nopa chicueyi tonal, quiyecapantequilise se quentzi
icuetlaxo ipan ipiltlacayo nopa piloquichpiltzi.
\v 4 Teipa nopa piloquichpiltzi inana ax huelis quiitzquis niyon se
tlamantli tlen tlatzejtzeloltic para seyoc 33 tonali pampa noja
quipiya esotemolistli. Niyon ax hueli calaquis tiopan calijtic hasta
tlamis nopa tonali para motlapajpacchijtos.
\p
\v 5 “Pero intla nopa sihuatl quitlacatiltis se sihuapil, huajca
mocahuas ax tlapajpactic para ome samanos. Huan monequi
quitlepanitas nopa tlanahuatili para quema esotemo. Huan teipa
quichiyas seyoc 66 tonali para motlapajpacchihuas.
\p
\v 6 “Huan quema ya quitlamiltijtos nopa tonali para
motlapajpacchihuas, huajca yonque tlacatqui oquichpil o sihuapil,
inana monequi quihuicas campa nopa totajtzi ipan ipuerta nopa yoyon
tiopamitl se pilborregojtzi tlen sanoc quipiya se xihuitl para
quimacas queja se tlacajcahualistli tlatlatili. Nojquiya monequi
quihuicas se paloma o se pichontzi para nechmacas queja se
tlacajcahualistli ipampa tlajtlacoli.
\p
\v 7 “Huan nopa totajtzi quintencahuas noixtla na, niimoTECO, huan
nechixtzacuilis itlajtlacol nopa sihuatl noixtla. Huan queja nopa,
nopa sihuatl motlapajpacchihuas tlen nopa esotemolistli. Quena, ya
ni eli nopa tlanahuatili tlen monequi quitoquilis quema
quitlacatiltijtos se conetl yonque oquichpil o sihuapil.
\p
\v 8 “Pero intla nopa sihuatl eli tlahuel teicneltzi huan ax
quipiya tomi para nechmacas se pilborregojtzi, huajca hueli
quinhuicas ome pichontzitzi o ome palomas. Se tlen nopa ome
nechmacas queja se tlacajcahualistli tlatlatili, huan nopa seyoc
nechmacas queja se tlacajcahualistli ipampa tlajtlacoli. Huan queja
nopa, nopa totajtzi nechixtzacuilis itlajtlacol nopa sihuatl, huan
ya mocahuas tlapajpactic noixtla.”
\c 13
\s Nopa tlacayo palanca cocolistli tlen tlamahua
\p
\v 1 TOTECO quinilhui Moisés ihuaya Aarón:
\p
\v 2 “Quema inquiitase pehua temi icuetlaxo se tlacatl, o nesi para
pehuas cocome, o nesi para pehuas mochihuas chipahuac icuetlaxo,
huelis quinequi pehuas nopa tlacayo palanca cocolistli tlen
tlamahua. Huajca monequi inquihuicase nopa tlacatl iixtla nopa
totajtzi Aarón o iixtla se tlen itelpocahua.
\v 3 Huan nopa totajtzi quitlachilis ica miyac cuidado campa
monextijtoc nopa cocolistli. Huan intla campa quipiya cocolistli,
itzoyo pejtoc mocuepa chipahuac huan intla nopa cocotl nesi para
pejtoc tlatzintla icuetlaxo, huajca xijmachilica cuali para quipiya
nopa tlacayo palanca cocolistli. Huan huajca nopa totajtzi monequi
teyolmelahuas para ax tlapajpactic nopa tlacatl.
\p
\v 4 “Huan intla iyoca ipan icuetlaxo nopa tlacatl quinpiya manchas
tlen chijchipahuac pero ax palantoc hasta más huejcatla, huan
itzoyo ax mocueptoc chipahuac, monequi nopa totajtzi quitzacuas nopa
tlacatl iselti para chicome tonali.
\v 5 Huan quema quiaxitis chicome tonali, nopa totajtzi sampa
quitlachilis. Huan intla nesis para nopa cocotl ax más
mohueyilijtoc ipan icuetlaxo, huajca quitzacuas para seyoc chicome
tonali.
\v 6 Huan quema sampa ajsis nopa chicompa tonal, monequi sampa
quitlachilis ica miyac cuidado, huan intla quiitas para nopa cocotl
ax más mohueyilía ipan icuetlaxo huan pejtoc pachihui, huajca nopa
totajtzi teyolmelahuas para nopa tlacatl eltoc tlapajpactic noixtla.
Pampa tlen quipixtoya eliyaya san tlen hueli cocotl. Huan nopa
tlacatl monequi quichicuenis iyoyo, huan queja nopa sampa elis
tlapajpactic.
\v 7 Pero intla nopa cocotl mohueyilis teipa quema nopa totajtzi
quiijto para tlapajpactic, huajca monequi sampa hualas iixtla nopa
totajtzi.
\v 8 Huan intla nopa totajtzi quiijtos para nopa cocotl
mohueyilijtoc, huajca teyolmelahuas para nopa tlacatl ax
tlapajpactic pampa quipiya tlacayo palanca cocolistli.
\p
\v 9 “Quema se tlacatl quinpiyas cocome ipan itlacayo, monequi
quihuicase iixtla totajtzi.
\v 10 Huan nopa totajtzi quitlachilis ica miyac cuidado, huan intla
quiitas para campa temitoc icuetlaxo pehua mocuepas chipahuac, huan
itzoyo mocueptoc chipahuac, huan intla tlanemijya nesi inacayo
tlapojtoc campa temitoc,
\v 11 huajca ya nopa eli nopa tlacayo palanca cocolistli tlen
huejcajquiya quiajsitoc ipan icuetlaxo. Huan huajca nopa totajtzi
monequi teyolmelahuas para nopa tlacatl ax tlapajpactic. Ax monequi
quitzacuas iselti, para más quitlachilise pampa quimati melahuac
quipiya nopa cocolistli.
\p
\v 12 “Pero intla nopa totajtzi quiitas para nopa mancha tlen nopa
tlacatl quipiya ya mohueyilijtoc huan ya ajsitoc campa hueli tlen
iicxihua huan hasta ipan itzonteco,
\v 13 huajca quiijtos para nopa tlacatl tlapajpactic, pampa nochi ya
mochijtoc chipahuac huan ya panotoc nopa palanca cocolistli.
\v 14 Pero intla ipan icuetlaxo quinpiya cocome tlapojtoc tlen nesi
inelnacayo, huajca ax tlapajpactic,
\v 15 pampa tlapojtoc icocohua huan nesi inelnacayo huan ya ni eltoc
tlacayo palanca cocolistli.
\p
\v 16 “Pero intla nopa tlacatl tlen quipixqui se cocotl tlapojtoc
huan nesiyaya inacayo teipa quipantis para icoco mocueptoc
chipahuac, huajca monequi sampa yas campa nopa totajtzi para ma
quitlachilis.
\v 17 Huan nopa totajtzi quitlachilis huan intla campa cocojtoc
nelía nesi chipahuac, huajca nopa totajtzi teyolmelahuas para
tlapajpactic nopa tlacatl tlen quinpixqui cocome.
\p
\v 18 “Quema icuetlaxo se tlacatl quipiyas se cocotl campa
temalquisayaya huan teipa mochicahuas,
\v 19 pero mocahuas temitoc huan nesis chipahuac, o nesi chichiltic
huan chipahuac, huajca nopa tlacatl monequi yas campa nopa totajtzi
para ma quitlachili.
\v 20 Huan intla nopa totajtzi quiitas para nopa cocotl ajsi
huejcatla, tlatzintla nopa cuetlaxtli, huan para itzoyo pehua para
elis chipahuac, huajca monequi teyolmelahuas para nopa tlacatl ax
tlapajpactic, pampa quipiya nopa tlacayo palanca cocolistli tlen
pejqui ica se cocotl ica temali.
\v 21 Pero intla nopa totajtzi quitlachilis huan ax quipantis itzoyo
tlen nesi chipahuac, huan intla nopa cocotl ax eltoc huejcatla, huan
san quentzi chipahuixtoc, huajca monequi quitzacuas iselti para
chicome tonali.
\v 22 Huan intla itlamiya nopa chicome tonali, nopa cocotl
mohueyilis achi más, huajca nopa totajtzi quiijtos para nopa
tlacatl ax tlapajpactic pampa quipiya se cocotl.
\v 23 Pero intla campa nesi chipahuac san se mocahua, huan ax más
mohueyilijtoc, huajca quimachilise para san mocahua lipintic
icuetlaxo campa pachijqui nopa cocotl. Huan nopa totajtzi quiijtos
para nopa tlacatl eli tlapajpactic noixtla.
\p
\v 24 “Intla se acajya motlatis ipan itlacayo ica tlen hueli
tlamantli, huan intla campa motlatijtoc teipa nesis chipahuac, o
nesis chichiltic huan chipahuac,
\v 25 huajca nopa totajtzi quitlachilis ica miyac cuidado campa
motlatijtoc nopa tlacatl. Huan intla quiitas para cocojtoc achi
huejcatla hasta tlatzintla cuetlaxtli huan itzoyo ya mocueptoc
chipahuac, huajca ya quipiya nopa tlacayo palanca cocolistli tlen
yolqui campa motlati. Huan nopa totajtzi monequi quiijtos para nopa
tlacatl ax tlapajpactic pampa quipiya nopa tlacayo palanca
cocolistli.
\v 26 Pero intla nopa totajtzi quiitas para nopa tlacatl ax quipiya
itzoyo chipahuac campa cocojtoc, huan ax más huejcatla, san ipan
nopa cuetlaxtli huan nesi para ya pachijtiya, huajca san quitzacuas
iselti para chicome tonali.
\v 27 Pero quema tlantos nopa chicome tonali, monequi sampa
quitlachilis nopa totajtzi. Intla quiitas para campa cocojtoya achi
más mohueyilijtoc, huajca nopa totajtzi quiijtos para, quena, nopa
tlacatl quipiya tlacayo palanca cocolistli.
\v 28 Pero intla campa cocojtoc ax más mohueyilijtoc huan nesi para
ya pachijtoc quentzi, huajca nopa totajtzi quiijtos para
tlapajpactic nopa tlacatl noixtla. San quipiya ya nopa pampa motlati
huan lipintic.
\p
\v 29 “Intla se tlacatl o se sihuatl quipiya se cocotl ipan
itzonteco o ipan itentzo,
\v 30 huajca monequi yas campa nopa totajtzi para ma quitlachili.
Huan intla nopa cocotl nesis para panotoc tlatzintla nopa
cuetlaxtli, huan intla quiitas para nopona quipiya itzoyo tlen nesi
costic huan pitzantzitzi, huajca nopa totajtzi quiijtos para nopa
tlacatl ax tlapajpactic pampa quipiya se tlamantli cocotl tlen
mochijtoc nopa tlacayo palanca cocolistli ipan itzonteco o ipan
itentzo.
\v 31 Pero intla nopa totajtzi quiitas para nopa cocotl ax ajsitoc
tlatzintla icuetlaxo huan noja quipiya itzoyo tlen yayahuic, huajca
nopa totajtzi san quitzacuas nopa tlacatl iselti para chicome
tonali.
\v 32 Huan quema tlantos nopa chicome tonali, nopa totajtzi monequi
sampa quitlachilis. Huan intla quiitas para nopa cocotl ax
mohueyilijtoc huan ax pejtoc quipiyas itzoyo tlen nesi costic huan
nesi para ax ajsitoc tlatzintla icuetlaxo nopa tlacatl,
\v 33 huajca nopa totajtzi quichihualtis ma quihuatani itentzo. Pero
yaja ax hueli quihuatanis campa cocojtoc. Quema tlami mohuatanis,
monequi noja mocahuas tzactoc para seyoc chicome tonali.
\v 34 Huan ipan nopa chicome tonal nopa totajtzi sampa quitlachilis.
Huan intla quiitas para nopa cocotl ax mohueyilijtoc, huan nesi para
ax ajsitoc huejcatla ipan icuetlaxo, huajca nopa totajtzi quiijtos
para nopa tlacatl eltoc tlapajpactic. Huan teipa quema ya
quichicuenijtos iyoyo, nopa tlacatl mocahuas tlapajpactic noixtla.
\v 35 Pero intla nopa cocotl mohueyilis quema ya quiijto para
tlapajpactic,
\v 36 huajca nopa totajtzi monequi sampa quitlachilis. Huan ama,
quena, intla mohueyilijtoc, ax monequi quipantis itzoyo tlen costic,
pampa ya nesi nopa tlacatl ax tlapajpactic.
\v 37 Pero intla quiitas para nopa cocotl ax mohueyilía huan ya
pejtoc para monextía itzoyo tlen yayahuic, huajca quiijtosnequi ya
pachijtoc nopa cocotl, huan tlapajpactic nopa tlacatl. Huajca nopa
totajtzi quiijtos para tlapajpactic.
\p
\v 38 “Huan quema se tlacatl o se sihuatl pehuas para quipiyas ipan
icuetlaxo cocome tlen nesi chipahuac,
\v 39 huajca nopa totajtzi quitlachilis icuetlaxo nopa tlacatl ica
miyac cuidado. Intla quiitas nopa cocotl san se quentzi chipahuac,
huajca ax ya nopa tlacayo palanca cocolistli. San quipiya tlen hueli
cocolistli tlen quiajsic ipan icuetlaxo huan tlapajpactic eli nopa
tlacatl noixtla.
\p
\v 40 “Intla se tlacatl tepehuis nochi itzoncal hasta ayoc mocahuas
niyon se, huajca nopa tlacatl ax quipiya tlacayo palanca cocolistli.
\v 41 Huan intla se tlacatl tepehuis itzoncal icuaixco huan mocahua
cuapejpetztic, huajca ya nojquiya tlapajpactic, ax quipiya
cocolistli.
\v 42 Pero intla campa tepehui itzoncal eltos se cocotl tlen nesis
chipahuac huan chichiltic, huajca quiijtosnequi pejtoc tlacayo
palanca cocolistli campa tepejtoc itzoncal.
\v 43 Huajca monequi nopa totajtzi quitlachilis campa yoli nopa
cocotl ipan itzonteco, o icuaixco. Intla quiitas para nesi chipahuac
huan chichiltic queja nopa tlacayo palanca cocolistli,
\v 44 huajca ya nopa quipiya huan ax tlapajpactic. Huan nopa
totajtzi monequi quiijtos para nopa tlacatl melahuac quipiya tlacayo
palanca cocolistli ipan itzonteco.
\s Tlanahuatili tlen yoyomitl tlen quipiya cocolistli
\p
\v 45 “Se tlacatl tlen quipiya tlacayo palanca cocolistli monequi
quihuicas iyoyo tzayantoc, huan ax huelis moxilhuis. Monequi
motentzacuas huan monequi tzajtzitinemis: ‘Ax nitlapajpactic. Ax
nitlapajpactic.’
\v 46 Huan yonque nopa cocolistli huejcahua ipan itlacayo, monequi
itztos iselti huejca tlen campa mochijtoque ne sequinoc tlacame.
\p
\v 47 “Huan intla se iyoyo o itlajque se tlacatl pojyajtoc, o
quipiya se mancha monequi quitlachilis nopa totajtzi, yonque eltoc
tlen tlachijchihuali ica lino o ica borregojme iniijhuiyo.
\v 48 Yonque nopa mancha eltoc ipan nopa icpatl tlen ijcatoc o
huetztoc ipan nopa yoyomitl, o yonque nopa yoyomitl, o tlamantli
tlen poyajtoc tlasencahuali ica tlapiyalime inincuetlaxo; intla yoli
se mancha, huajca xijhuicaca campa nopa totajtzi.
\v 49 Huan intla nesi quentzi xoxohuic o quentzi chichiltic nopa
mancha tlen yoli ipan nopa yoyomitl o nopa tlamantli tlen
quichijtoque ica cuetlaxtli, huajca campa nopa mancha ya pejtoc nopa
tlacayo palanca cocolistli, huan monequi quihuicase iixtla nopa
totajtzi para ma quitlachili.
\v 50 Huan nopa totajtzi quitlachilis nopa yoyomitl, o nopa
tlamantli, huan quiiyocatlalis para chicome tonali.
\v 51 Huan quema ajsis nopa chicompa tonal, nopa totajtzi sampa
quitlachilis nopa mancha. Huan intla quiitas para mohueyilijtoc ipan
nopa yoyomitl o ipan nopa cuetlaxtli, huajca quiijtosnequi para eli
se mancha tlen tlacayo palanca cocolistli tlen nelía fiero. Huajca
nopa tlamantli mocahuas ax tlapajpactic yonque tlaxinepaloli ipan
nopa yoyomitl, o mopantía ipan se tlamantli tlen cuetlaxtli.
\v 52 Huajca nopa yoyomitl tlen tlachijchihuali ica lino, o ica
borregojme iniijhuiyo, o nopa tlamantli tlen cuetlaxtli tlen quipiya
nopa mancha monequi quitlatise pampa quipiya nopa tlacayo palanca
cocolistli tlen nelía fiero.
\v 53 Pero intla quema tlamis chicome tonali, nopa totajtzi
quitlachilis huan quiitas para nopa mancha ax más mohueyilijtoc,
\v 54 huajca quinnahuatis tlen quihualicaque ma quichicuenica nopa
tlamantli tlen quipiya nopa mancha, huan sampa quiiyocatlalis seyoc
chicome tonali.
\p
\v 55 “Huan quema ya quipajpactose, nopa totajtzi quitlachilis
sampa, huan intla nesis para nopa mancha noja mocajtoc huan ax
quipatlatoc itlachiyalis, huajca nopa tlamantli monequi quitlatise
yonque ax mohueyilijtoc más pampa quipiya nopa tlacayo palanca
cocolistli. Yonque nopa mancha san ajsi ipan se lado o ajsi ipan
nochi ome lados, monequi xijtlatica.
\v 56 Pero intla nopa totajtzi sampa quitlachilis huan quiitas para
nopa mancha ayoc más nesi queja achtohui, huajca san quitejtequis
huan quiquixtis campa monextijtoc nopa mancha ipan nopa yoyomitl, o
cuetlaxtli o ipan nopa tlamantli tlen tlaxinepaloli.
\v 57 Pero intla nopa mancha sampa monextis campa hueli ipan nopa
yoyomitl, o ipan nopa tlamantli tlen cuetlaxtli, huajca nopa
tlamantli tlen quipiya mancha monequi quitlatise.
\v 58 Pero intla quema ya quichicuenijtose nopa yoyomitl o nopa
tlamantli tlen cuetlaxtli ayoc monextis nopa mancha, huajca san
monequi quichicuenise seyoc huelta, huan teipa mocahuas tlapajpactic
huan sampa huelis quitequihuise.
\p
\v 59 “Huajca ya ni elqui nopa tlanahuatili para nopa tlacayo
palanca cocolistli tlen monextía ipan yoyomitl tlen tlachijchihuali
ica lino, o ica borregojme iniijhuiyo, o ica cuetlaxtli, o
monextijtoc ipan sequinoc tlamantli tlen tlachijchihuali ica
tlapiyalime inincuetlaxo. Quena, ya ni nopa tlanahuatili tlen
quitequihuise para quiijtose intla nopa tlamantli eli tlapajpactic o
eli ax tlapajpactic.”
\c 14
\s Quejatza motlapajpacchihuase tlen quipixque cocolistli
\p
\v 1 Huan TOTECO quiilhui Moisés:
\v 2 “Ya ni nopa tlanahuatili para se tlacatl tlen quipixtoya nopa
tlacayo palanca cocolistli huan quinequi hualas campa nopa totajtzi
para motlapajpacchihuas.
\v 3 Nopa totajtzi monequi yas campa mocahua nopa cocoxquetl huejca
tlen campa inmochantijtoque para quitlachilis ica miyac cuidado.
Intla quiitas para ya pachijtoc campa quipixqui nopa cocotl,
\v 4 huajca tlajtlanis ma quihuiquilica ome totome tlen tlapajpactic
huan tlen cuali para inquicuase. Tlajtlanis ma quinhuiquilica nepa
campa itztoc nopa cocoxquetl ihuaya tiocuahuitl, se icpatl tlen
chichiltic huan se imacuayo nopa xihuitl tlen itoca hisopo.
\v 5 Teipa nopa totajtzi tlanahuatis ma quiquechtzontequica se tlen
nopa ome totome. Quena, monequi quiquechtzontequis ipan se comitl
tlen tlachijchihuali ica soquitl huan quipiya atl tlen se ameli.
\v 6 Huan quicuis ica nopa tiocuahuitl, huan nopa icpatl tlen
chichiltic huan imacuayo nopa hisopo xihuitl huan nopa seyoc
piltototzi tlen noja itztoc huan san sejco quinxolonis ica nopa
achtohui tlapiyali ieso ipan nopa comitl tlen quipiya atl tlen huala
tlen se ameli.
\v 7 Huan teipa ica nopa tlamantli tlen xolontoc quiatzejtzelhuis
nopa totajtzi chicome huelta nopa tlacatl tlen motlapajpacchihuas
tlen icocolis. Huan teipa quiijtos para tlapajpactic. Huan nopa
piltototzi tlen noja itztoc quimajcahuas para ma patlantinemi campa
cuatitlamitl.
\p
\v 8 “Teipa nopa tlacatl tlen ya motlapajpacchijtoc, monequi
quichicuenis iyoyo, huan quihuatanis itzoncal. Monequi maltis huan
sampa calaquis para itztos campa nochi sequinoc israelitame
mochijtoque. Pero noja aya huelis calaquis ipan ichaj tlen yoyomitl.
\v 9 Huan ipan nopa chicome tonal, nopa tlacatl monequi sampa
quitequis nochi itzoncal, itentzo huan iixtentzoyo. Teipa sampa
quichicuenis iyoyo huan maltis, huan ica ya nopa, motlapajpacchihuas
tlen nopa cocolistli tlen quipixtoya.
\p
\v 10 “Huan ipan tonali chicueyi, quincuis eyi pilborregojtzitzi
tlen quipiyaj sesen xihuitl huan niyon se tlamantli tlen ax cuali
quipiyaj ipan inintlacayo. Monequi ome oquichme huan se sihuatzi
tlen cuali inintlacayo. Nojquiya quicuis chicome litro harina tlen
nelcuechtic huan tlamaneloli ica aceite para se tlacajcahualistli
tlen harina, huan ihuaya quihuicas tlajco litro aceite.
\v 11 Huan nopa totajtzi tlen tetlapajpacchihua, quihuicas nopa
tlacatl tlen motlapajpacchihuas noixtla, niimoTECO. Huan ihuaya
quihualicas nochi nopa tlamantzitzi tlen motequihuis, huan temacas
noixtla na, niimoTECO nepa campa ipuerta nopa yoyon tiopamitl.
\v 12 Teipa nopa totajtzi quicuis se tlen nopa piloquich
borregojtzitzi huan nopa tlajco litro aceite huan quitencahuas
noixtla queja se tlacajcahualistli para nopa tlacatl tlen quihuica
tlajtlacoli. Huan para nechmacas monequi quinhuisos noixtla,
niimoTECO. Huan elis queja se tlacajcahualistli tlahuisoli.
\v 13 Huan teipa nopa totajtzi quiquechtzontequis nopa
pilborregojtzi nopona campa yoyon tiopan puerta campa quinmictíaj
nopa tlapiyalime para tlacajcahualistli ipampa tlajtlacoli huan para
tlacajcahualistli tlatlatili. Huan nopa tlacajcahualistli ipampa
tlajtlacoli huan ni tlacajcahualistli para tlen quihuica tlajtlacoli
noixtla elis iaxca nopa totajtzi para tlacualistli pampa tlahuel
tlatzejtzeloltic.
\p
\v 14 “Huan nopa totajtzi quicuis se quentzi ieso nopa tlapiyali
tlen quitencajtoc queja se tlacajcahualistli para tlen quihuica
tlajtlacoli noixtla huan nopa estli quiajalos ipan inacas nejmatl
nopa tlacatl tlen motlapajpacchihuas. Nojquiya quiajalos ipan
imacpil tlen hueyi tlen ima nejmatl huan ipan ixocpil tlen hueyi
tlen iicxi nejmatl.
\p
\v 15 “Teipa nopa totajtzi quicuis nopa aceite huan quitecas
quentzi ipan tlen ya ima arraves.
\v 16 Huan teipa nopa totajtzi quixolonis imacpil tlen ima nejmatl
ipan nopa aceite huan ica imacpil tlaatzejtzelhuis chicome huelta
noixtla na, niimoTECO.
\v 17 Huan ica nopa aceite tlen noja mocahuas ipan nopa totajtzi
ima, quiajalos se quentzi inacas nejmatl nopa tlacatl tlen
motlapajpacchihuas. Huan nojquiya quiajalos ipan imacpil tlen hueyi
tlen ima nejmatl huan ipan ixocpil tlen hueyi tlen iicxi nejmatl.
Huan nojquiya quitlalis aceite ipan nopa estli tlen nopa
tlacajcahualistli para tlen quihuica tlajtlacoli noixtla.
\v 18 Huan nopa aceite tlen noja mocahuas imaco nopa totajtzi
quitequihuis para quiajalos ipan itzonteco nopa tlacatl tlen
motlapajpacchihuas huan nechixtzacuilis itlajtlacolhua.
\p
\v 19 “Teipa nopa totajtzi nechmacas nopa tlacajcahualistli ipampa
tlajtlacoli para quiixtzacuas itlajtlacolhua nopa tlacatl tlen
quitlapajpacchihua tlen nopa cocolistli tlen quichijtoya ax
tlapajpactic. Huan teipa quimictis nopa tlapiyali tlen nechmacas
queja se tlacajcahualistli tlatlatili.
\v 20 Huan nechmacas ipan tlaixpamitl nopa tlacajcahualistli
tlatlatili ihuaya nopa tlacajcahualistli tlen harina. Huan ica nochi
ya ni, nopa totajtzi nechixtzacuilis nopa tlacatl itlajtlacolhua,
huan yajaya mocahuas tlapajpactic.
\p
\v 21 “Pero intla nopa tlacatl eli tlahuel teicneltzi huan ax
huelis quincohuas ome pilborregojtzitzi, huajca hueli nechmacas
setzi pilborregojtzi queja se tlacajcahualistli para tlen quihuica
tlajtlacoli, pero achtohui quihuisos noixtla, niimoTECO, para se
tlacajcahualistli majcahuali para nechixtzacuilis itlajtlacolhua.
Huan para nopa tlacajcahualistli tlen harina, san quihualicas ome
kilo huan tlajco harina tlen tlamaneloli ica aceite, ihuaya se
tlajco litro aceite.
\p
\v 22 “Nojquiya quinhuicas ome pichontzitzi o ome palomas queja
quiitas para quiaxilía itomi. Huan se tlen nopa ome totome elis
para nechmacas queja se tlacajcahualistli ipampa tlajtlacoli, huan
nopa seyoc nechmacas queja se tlacajcahualistli tlatlatili.
\v 23 Nochi ya nopa monequi quihuicas ipan nopa chicueyi tonal. Huan
quimactilis nopa totajtzi nopona noixtla campa ipuerta nopa yoyon
tiopamitl campa timopantíaj.
\v 24 Huan nopa totajtzi quicuis nopa pilborregojtzi tlen nechmacas
na, niimoTECO, queja se tlacajcahualistli para tlen quihuica
tlajtlacoli. Nojquiya quicuis nopa tlajco litro aceite, huan elis
queja se tlacajcahualistli tlen quihuijhuisos noixtla.
\v 25 Teipa quiquechtzontequis nopa pilborregojtzi para se
tlacajcahualistli para tlen quihuica tlajtlacoli, huan quicuis se
quentzi ieso huan quiajalos ipan inacas nejmatl nopa tlacatl tlen
quipajpaca huan quiajalos ipan imacpil tlen hueyi tlen ima nejmatl
huan ixocpil tlen hueyi tlen iicxi nejmatl.
\p
\v 26 “Teipa nopa totajtzi quicuis nopa aceite huan quitecas se
quentzi ipan ima tlen iarraves.
\v 27 Huan teipa quixolonis imacpil tlen ima nejmatl huan ica nopa
aceite tlaatzejtzelhuis chicome huelta noixtla, na niimoTECO.
\v 28 Nojquiya nopa totajtzi quicuis quentzi aceite tlen ipan ima
tlen iarraves huan quiajalos inacas nejmatl nopa tlacatl tlen
motlapajpacchihua. Nojquiya quiajalos ipan imacpil tlen hueyi tlen
ima nejmatl huan ipan ixocpil tlen hueyi tlen iicxi nejmatl. San se
quiajalos campa quiajalo ieso nopa tlapiyali tlen quitencajque para
tlacajcahualistli para tlen quihuica tlajtlacoli.
\v 29 Huan nopa aceite tlen noja mocahuas ipan ima nopa totajtzi,
quiajalos ipan itzonteco nopa tlacatl tlen motlapajpacchihua. Ya
nopa nechixtzacuilis itlajtlacol, na niimoTECO.
\p
\v 30 “Teipa nopa totajtzi nechmacas se tlen nopa palomas o nopa
pichontzitzi, tlen quiaxili itomi nopa tlacatl para quicohuas.
\v 31 Nechmacas se queja se tlacajcahualistli ipampa tlajtlacoli
huan nopa seyoc nechmacas queja se tlacajcahualistli tlatlatili,
huan ihuaya nechmacas nopa tlacajcahualistli tlen harina.”
\p
\v 32 Huajca ya ni elqui nopa tlanahuatili tlen monequi quitoquilis
se tlacatl tlen ayoc quipiya tlacayo palanca cocolistli huan ax
quiaxilis para temacas se tlacajcahualistli patiyo para ica
motlapajpacchihuas.
\s Quejatza ma quintlapajpacchihuaca caltini
\p
\v 33 Huan TOTECO quinilhui Moisés huan Aarón:
\p
\v 34 “Quema ya inajsitose ipan tlali Canaán tlen na nimechmacatoc
para imoaxca huan na nijtlalis ipan se cali se mancha tlen nesi para
ax san aquistoc pero quipiya se hueyi cocolistli,
\v 35 huajca nopa tlacatl tlen iaxca nopa cali monequi yas quiitati
nopa totajtzi huan quiilhuis: ‘Na niquita para ipan nochaj pejtoc
mopannextía se mancha tlen nopa hueyi cocolistli.’
\p
\v 36 “Huan quema nopa totajtzi aya calaqui ipan nopa cali,
tlanahuatis ma quisaca nochi tlen itztoque nopona huan ma
quiquixtica nochi tlamantzitzi tlen calijtic eltoc. Queja nopa ax
quiijtos para ax tlapajpactique nochi nopa tlacame huan nopa
tlamantzitzi tlen nopona onca. Huan teipa quema ya quistose, nopa
totajtzi calaquis huan quitlachilis nopa mancha tlen mopannextijtoc.
\p
\v 37 “Huan intla nopa totajtzi quiitas para nopona campa coyontoc
nopa tlapepecholme mopannextijtoque manchas tlen nesij chichiltique
o xoxohuique huan nesij para calactoque hasta huejcatla ipan
tlapepecholi,
\v 38 huajca nopa totajtzi quisas huan quitzacuas nopa cali para
chicome tonali.
\v 39 Huan quema ajsis nopa chicome tonal, nopa totajtzi monequi
sampa hualas quitlachiliqui. Intla quiitas para nopa mancha
mohueyilijtoc ipan nopa tlapepecholi,
\v 40 huajca tlanahuatis ma quiquixtica nopa tetini ipan
tlapepecholi campa mopannextijtoc nopa mancha, huan monequi
quimajcahuatij huejca tlen campa inmochijtoque ipan se lugar tlen ax
tlapajpactic.
\v 41 Huan nojquiya tlanahuatis ma quihuatanica nopa tlapepecholi
yahualtic campa eltoya nopa mancha. Huan nochi nopa soquitl huan
tlaltejpoctli quicahuatij huejca tlen campa inmochijtoque ipan se
lugar tlen ax tlapajpactic.
\v 42 Teipa nopa tlacame quicuise sequinoc tetini para quitlalise
ipan nopa lugar campa quiijcuenijque nopa tetini tlen quipiyayayaj
manchas. Huan nojquiya quitlalise yancuic soquitl para
quitlatzquiltise nopa tetl.
\p
\v 43 “Pero intla nopa mancha sampa mopannextis ipan nopa cali
quema ya quipatlatose nopa tetini, huan ya quihuatanijtose nopa
tlapepecholi huan ya quitlalilijtose soquitl tlen yancuic,
\v 44 huajca nopa totajtzi calaquis huan sampa quitlachilis ica
miyac cuidado. Huan intla quiitas para nopa mancha mohueyilijtoc
ipan nopa tlapepecholi, huajca quiijtosnequi ya pejtoc nopa hueyi
cocolistli tlen más fiero ipan nopa cali. Huan nopa cali elis ax
tlapajpactic huan queja nopa mocahuas.
\v 45 Huajca monequi ma quitlamiltica nopa cali huan nochi tetl huan
cuahuitl huan soquitl ma quicahuatij ipan se lugar campa ax
tlapajpactic tlen mocahua huejca tlen campa inmochijtoque.
\v 46 Huan intla acajya calaquis calijtic ipan nopa tonali quema
nopa totajtzi tlanahuati para eltos tzactoc, huajca ya mocahuas ax
tlapajpactic hasta tlayohua.
\v 47 Huan tlen hueli tlen tlacuas o motecas ipan nopa cali quema
tzactoc monequi quichicuenis iyoyo.
\p
\v 48 “Pero intla quema ya quipatlatoque nopa tetl huan soquitl, ax
tleno nesis quema sampa calaquis nopa totajtzi para quiitas nopa
mancha, huajca quiijtos para nopa cali tlapajpactic pampa nopa hueyi
cocolistli ya ixpolijtoc.
\v 49 Huan quema nopa totajtzi quitlapajpacchihuas nopa cali monequi
quintequihuis ome totome, tiocuahuitl, se icpatl tlen chichiltic
huan se imacuayo nopa cuahuitl tlen itoca hisopo.
\v 50 Huan quiquechtzontequis se tlen nopa ome totome ipan se
huajcali tlen tlachijchihuali ica soquitl tlen quipiyas atl tlen
huala ipan se ameli.
\v 51-52 Huan nopa totajtzi quicuis nopa tiocuahuitl, nopa hisopo
xihuitl imacuayo, nopa icpatl tlen chichiltic huan nopa seyoc tototl
tlen noja itztoc, huan san sejco quinxolonis ipan nopa achtohui
tototl ieso ihuaya nopa atl tlen ameli. Huan quinquixtis huan
quiatzejtzelhuis chicome huelta nopa cali. Huan queja nopa
quitlapajpacchihuas nopa cali.
\v 53 Teipa yas huejca tlen nopa altepetl huan quimajcahuas nopa
tototl tlen itztoc para ma patlani ipan cuatitlamitl. Huan quej nopa
ya quichijtos nochi tlen monequi para nechixtzacuilis nopa
tlajtlacoli tlen eltoya ipan nopa cali, huan nopa cali mocahuas
tlapajpactic.”
\p
\v 54-55 Nochi ya ni eli nopa tlanahuatili para campa hueli campa
quipantíaj manchas tlen nopa hueyi cocolistli yonque mopannextía
ipan se cali, o ipan se yoyomitl, o ipan icuetlaxo se tlacatl,
\v 56 o intla mopannextía campa semajtoc itlacayo se tlacatl, o
campa motlatijtoc, o campa iselti yoli se mancha.
\v 57 Huan ica ni tlanahuatili tlen cocolistli ipan tecuetlaxo o
tlen hueli tlamantli, inquimatise quema ax tlapajpactic se tlamantli
huan quema tlapajpactic.
\c 15
\s Tlamantli ax tlapajpactic ipan tlacame
\p
\v 1 Huan TOTECO quinilhui Moisés huan Aarón:
\p
\v 2 “Xiquinilhuica nopa israelitame ni miyac tlanahuatili. Quema
se tlacatl quipiya atl tlen mojmostla temo ipan itlacayo, ax
tlapajpactic nopa tlacatl.
\v 3 Huan yonque quisenhuiquilis toyahuis o motzacuas, nopa tlacatl
mocahuas ax tlapajpactic.
\p
\v 4 “Nochi tlapechtli tlen ipan motecas nopa tlacatl tlen aquisa
mochihuase ax tlapajpactique.
\p “Huan campa mosehuis, quichihuas para nopa siya o nopa tlamantli
elis ax tlapajpactic noixtla.
\p
\v 5 “Huan aqui hueli tlen quitoxomas nopa tlapechtli, monequi
quichicuenis iyoyo huan maltis, huan noja mocahuas ax tlapajpactic
hasta tlayohua.
\p
\v 6 “Huan intla se tlacatl mosehuis ipan nopa siya o nopa
tlamantli campa ipan mosehui nopa tlacatl tlen aquisa, huajca
monequi quichicuenis iyoyo huan maltis, huan noja mocahuas ax
tlapajpactic hasta tlayohua.
\p
\v 7 “Huan tlen hueli tlen quitoxomas nopa tlacatl tlen aquisa,
monequi quichicuenis iyoyo, huan maltis, huan noja mocahuas ax
tlapajpactic hasta tlayohua.
\p
\v 8 “Huan intla nopa tlacatl tlen aquisa chajchas ipan se tlacatl
tlen tlapajpactic, huajca elis ax tlapajpactic. Monequi nopa tlacatl
quichicuenis iyoyo huan maltis ica atl, huan mocahuas ax
tlapajpactic hasta tlayohua.
\p
\v 9 “Huan intla nopa tlacatl tlen atemo tlejcos ipan se cahuayo,
huajca nopa cahuajsiya mochihuas ax tlapajpactic.
\p
\v 10 “Tlen hueli tlen quitoxomas o quihuicas se tlamantli tlen
ipan mosehuijtoc, o motectoc nopa tlacatl tlen atemo, mocahuas ax
tlapajpactic hasta tlayohua.
\p “Huan nopa tlacatl monequi quichicuenis iyoyo huan maltis, huan
noja mocahuas ax tlapajpactic hasta tlayohua.
\p
\v 11 “Intla se tlacatl tlen atemo quiitzquis se acajya ica ima
huan ax momajtequijtoc, huajca nopa tlacatl tlen quiitzquili ima
monequi quichicuenis iyoyo huan maltis, huan noja mocahuas ax
tlapajpactic hasta tlayohua.
\p
\v 12 “Intla nopa tlacatl tlen atemo quiitzquis se comitl tlen
tlachijchihuali ica soquitl, huajca nopa comitl monequi
quitlapanase. Huan intla quinitzquis tlamantzitzi tlen
tlachijchihualme ica cuahuitl, huajca nopa tlamantzi san monequi
quinpajpacase ica atl.
\p
\v 13 “Intla ayoc atemos nopa tlacatl, huan quinequis pehuas
motlapajpacchihuas monequi achtohui quichiyas seyoc chicome tonali.
Huan intla quiitas ayoc atemo, huajca quichicuenis iyoyo huan
mopajpacas ica atl tlen ameli.
\v 14 Huan ipan tonali chicueyi quincuis ome pichontzitzi o ome
palomas huan monextis iixtla TOTECO campa ipuerta nopa yoyon
tiopamitl huan quinmacas nopa totajtzi.
\v 15 Huan nopa totajtzi nechmacas se queja se tlacajcahualistli
ipampa tlajtlacoli. Huan ne seyoc nechmacas queja se
tlacajcahualistli tlatlatili. Huan queja nopa, nopa totajtzi
nechixtzacuilis itlajtlacol nopa tlacatl ipampa nopa atemolistli
tlen quipixqui.
\p
\v 16 “Quema se tlacatl quitoyahuas ixinajcho, monequi quipajpacas
nochi itlacayo ica atl, huan noja mocahuas ax tlapajpactic hasta
tlayohua.
\p
\v 17 “Huan intla toyahuis se quentzi ipan se yoyomitl o ipan se
cuetlaxtli, huajca nopa tlamantli monequi quipajpacase ica atl huan
noja mocahuas ax tlapajpactic hasta tlayohua.
\p
\v 18 “Huan quema se tlacatl itztos ihuaya se sihuatl huan
quitoyahuas ixinajcho, huajca nochi ome monequi mopajpacase ica atl,
huan ax tlapajpactic mocahuase hasta tlayohua.
\s Tlamantli ax tlapajpactic ipan sihuame
\p
\v 19 “Huan quema se sihuatl esotemos, mocahuas ax tlapajpactic
para chicome tonali.
\p “Huan tlen quiitzquis nopa sihuatl, mocahuas ax tlapajpactic
hasta tlayohua.
\p
\v 20 “Nochi tlamantli tlen ipan motecas o mosehuis nopa sihuatl
ipan nopa chicome tonali, mocahuas ax tlapajpactic.
\p
\v 21 “Huan tlen hueli tlen quiitzquis itlapech nopa sihuatl tlen
esotemo, monequi quichicuenis iyoyo huan maltis, huan noja mocahuas
ax tlapajpactic hasta tlayohua.
\p
\v 22-23 “Huan tlen hueli tlen quiitzquis nopa tlapechtli, o nopa
siya, o tlen hueli tlamantli tlen ipan mosehui nopa sihuatl tlen
esotemo monequi quichicuenis iyoyo huan maltis, huan noja mocahuas
ax tlapajpactic hasta tlayohua.
\p
\v 24 “Intla se tlacatl cochis ihuaya nopa sihuatl ipan nopa tonali
quema esotemo huan ieso quiajsis, huajca nopa tlacatl mocahuas ax
tlapajpactic para chicome tonali. Huan tlen hueli tlapechtli tlen
ipan motecas nopa tlacatl nojquiya mocahuas ax tlapajpactic.
\p
\v 25 “Huan intla se sihuatl noja esotemos miyac tonali quema ayoc
ipohual, o pehuas esotemos ipan se tonali quema ax ipohual, huajca
ax tlapajpactic san se queja nelía ipohual.
\p
\v 26 “Huan nochi tlapechtli huan siyas tlen ipan mosehuis
mocahuase ax tlapajpactic san queja ax tlapajpactique eli quema
nelía ipohual para esotemos.
\p
\v 27 “Nojquiya tlen hueli tlen quiitzquis nopa tlapechtli campa
motejqui, o nopa siyas campa mosehui, mocahuas ax tlapajpactic.
Monequi quichicuenis iyoyo huan maltis, huan noja mocahuas ax
tlapajpactic hasta tlayohua.
\p
\v 28 “Huan quema ya tlantos esotemo, monequi quipohuas chicome
tonali huan teipa mocahuas tlapajpactic.
\v 29 Huan ipan tonali chicueyi nopa sihuatl tlen esotemoyaya quema
ax ipohual monequi quincuis ome pichontzitzi, o ome palomas, huan
quinhuicas campa nopa totajtzi huan quimactilis nechca ipuerta nopa
yoyon tiopamitl.
\v 30 Huan nopa totajtzi nechmacas se tlen nopa totome queja se
tlacajcahualistli ipampa tlajtlacoli, huan ne seyoc nechmacas queja
se tlacajcahualistli tlatlatili. Huan queja nopa, nopa totajtzi
nechixtzacuilis nopa esotemolistli tlen nopa sihuatl quipixqui tlen
quichihuayaya ax tlapajpactic noixtla.
\p
\v 31 “Monequi quej ni inquintlapajpacchihuase israelitame quema ax
tlapajpactique. Pampa intla ax motlapajpacchihuase, quichihuase ax
tlapajpactic nopa yoyon tiopamitl campa na nimocahua tlatlajco
imojuanti, huan queja nopa monequi miquise.
\p
\v 32 “Huajca nochi ya ni elqui nopa tlanahuatili para se tlacatl
tlen atemo o tlen toyahui ixinajcho huan yeca mocajqui ax
tlapajpactic.
\v 33 Huan sequin ni tlanahuatili nojquiya eli para sihuame quema
esotemoj quema ininpohual huan quema ax ininpohual. Nojquiya nica
eltoc nopa tlanahuatili para tlacame tlen cochij ihuaya se sihuatl
tlen ax tlapajpactic pampa esotemo.”
\c 16
\s Nopa Tonal Quema Quiixtzacuase Tetlajtlacolhua
\p
\v 1 TOTECO quicamahui Moisés quema ya mictoyaj nopa ome
itelpocahua Aarón. Mijque pampa monechcahuijque campa itztoc
TOTECO, pero ax queja quinamiqui.
\v 2 Huan TOTECO quiilhui:
\p “Xiquilhui moicni, Aarón, ax hueli calaquis tlen hueli hora
ipan nopa cuarto tlen Más Tlatzejtzeloltic tlen eltoc iica nopa
cortina campa mocahua nopa caxa. Intla calaquis nopona ipan se tonal
quema ax onca tlanahuatili para calaquis, miquis. Pampa itzonixco
itzajca nopa caxa campa nechixtzacuilis tetlajtlacolhua, na noselti
niitztos ipan nopa mixtli.
\v 3 Huajca quej ni monequi mocualtlalis Aarón, quema ajsis nopa
tonal sesen xihuitl quema monequi calaquis ipan nopa cuarto tlen
Más Tlatzejtzeloltic. Aarón monequi quihualicas se becerro para
nechmacas queja se tlacajcahualistli ipampa tlajtlacoli huan se
oquich borrego para nechmacas queja se tlacajcahualistli tlatlatili.
\v 4 Achtohui monequi maltis, huan teipa monequi moquentis
itlatzintlanyoyo tlen huehueyac huan tlen tlatzejtzeloltic, huan
monequi moquentis itlatzintlanyoyo tlen lino. Teipa motlalilis
itzinquechilpica, huan motlalilis icuatzajca pampa ya ni iyoyo tlen
tlatzejtzeloltic.
\p
\v 5 “Huan israelitame quihuiquilise ome oquich chivojme para
tlacajcahualistli ipampa tlajtlacoli. Huan quihuiquilise se oquich
borrego para elis se tlacajcahualistli tlatlatili.
\v 6 Pero achtohui monequi Aarón ma nechmaca nopa becerro para se
tlacajcahualistli ipampa tlajtlacoli tlen nechixtzacuilis tlen ya
iselti itlajtlacolhua huan tlen ya ifamilia inintlajtlacolhua.
\v 7 Huan teipa quincuis nopa ome oquich chivojme huan quinhualicas
noixtla campa ipuerta nopa yoyon tiopamitl.
\v 8 Huan teipa quichihuas suertes ica nopa ome oquich chivojme para
quiitas tlen elis para na, niimoTECO, huan tlen elis para quihuicas
tetlajtlacolhua hasta campa itoca Azazel ipan nopa tlahuel huactoc
tlali campa ayoc quema huelis mocuepas sampa.
\v 9 Huan Aarón quimictis nopa oquich chivo tlen elis para na huan
nechmacas queja se tlacajcahualistli ipampa tlajtlacoli.
\v 10 Pero nopa oquich chivo tlen elis para quihuicas
tetlajtlacolhua huejca, quiixnextis noja yoltoc noixtla, niimoTECO.
Huan teipa quitlalis tetlajtlacolhua ipan nopa chivo queja monequi
para nechixtzacuilis inintlajtlacol huan teipa quititlanis para yas
huejca ipan nopa huactoc tlali para quihuicas tetlajtlacolhua nopona
huan ayoc quema mocuepas sampa.
\p
\v 11 “Huan quema Aarón ya quimictijtos huan ya quitencajtos nopa
becerro para nechixtzacuilis itlajtlacolhua huan itlajtlacolhua
iteixmatcahua,
\v 12 monequi quicuis se popochcomitl tlen temitoc ica tlicoli
xahuantoc tlen eltoc ipan tlaixpamitl noixtla na, niimoTECO. Huan
nojquiya quicuis ome tlamajtzoli copali tlen tlatixtli nelía
cuechtic huan tlen mijmiyotía ajhuiyac, huan calaquis ipan nopa
cuarto iica nopa cortina.
\v 13 Huan nopona ipan nopa cuarto campa na, niimoTECO, niitztoc,
quitlalis nopa copali ipan nopa tlitl tlen quihualica ihuaya. Huan
quema quitlatis nopa copali, ipocyo quichihuas se mixtli para
quiixtzacuilis nopa caxa itzajca para Aarón ax quiitas huan ax
miquis. Pampa ipan itzajca nopa caxa eltoc campa nijnextis
tlasojtlacayotl para tlacame. Huan iijtic nopa caxa oncas nopa
tepatlactli ica nopa tlajtoli tlen nijchihua imohuaya.
\v 14 Teipa quihualicas se quentzi ieso nopa becerro huan ica
imacpil quiatzejtzelhuis chicome hueltas iixtla itzajca nopa caxa
ica campa quisa tonati pampa nopona nitetlasojtla. Nojquiya
tlaatzejtzelhuis ica imacpil seyoc chicome hueltas iixmelac nopa
caxa.
\p
\v 15 “Teipa quisas huan quimictis nopa oquich chivo tlen nechmacas
queja se tlacajcahualistli ipampa tlajtlacoli para israelitame
inintlajtlacolhua. Huan quihualicas quentzi ieso ipan nopa cuarto
tlen iica nopa cortina. Huan ica ya nopa, quiatzejtzelhuis iixco
itzajca nopa caxa campa onca tlasojtlacayotl para tlacame huan
nojquiya quiatzejtzelhuis iixtla. Quena, san se quichihuas queja
quichijqui ica nopa becerro ieso.
\v 16 Huan queja nopa nechixtzacuilis nopa tlajtlacoli tlen
israelitame quihuicaj tlen quichihuilijtoc ax ma eli tlapajpactic
nopa cuarto tlen Más Tlatzejtzeloltic. Teipa san se quiixtzacuas
nopa tlajtlacoli tlen quichihuilijtoc para nopa yoyon tiopamitl ax
ma eli tlapajpactic. Pampa nopa yoyon tiopamitl ica nopa cuarto tlen
Más Tlatzejtzeloltic mocahua tlatlajco campa mochijtoque nopa
tlajtlacolchijca israelitame tlen ax tlapajpactique noixtla. Yeca
inintlajtlacolhua quichihua ma eli ax tlapajpactic hasta calijtic
ipan nopa yoyon tiopamitl huan monequi inquitlapajpacchihuase.
\p
\v 17 “Huan quema Aarón panos calijtic Campa Más Tlatzejtzeloltic
para quiixtzacuas itlajtlacolhua, huan ifamilia inintlajtlacolhua,
huan inintlajtlacolhua israelitame, huan nochi nopa tlajtlacoli tlen
quichihuilijtoc nopa cuarto ax tlapajpactic, ax hueli itztos niyon
se tlacatl ipan nopa yoyon tiopamitl hasta ya quisas.
\v 18 Huan teipa yajaya monequi quisas huan yas campa nopa
tlaixpamitl tlen eltoc ipan calixpamitl noixtla na, niimoTECO, para
quiixtzacuas nopa tlajtlacoli tlen onca nopona. Huan quicuis se
quentzi ieso nopa becerro huan se quentzi ieso nopa oquich chivo
huan quiajalos ipan nopa nahui icuacua nopa tlaixpamitl tlen eltoque
ipan nahui inacastla.
\v 19 Huan ica imacpil quitzejtzelos nopa estli chicome hueltas ipan
nopa tlaixpamitl, huan ica ya nopa quitlapajpacchihuas israelitame
inintlajtlacolhua huan mocahuase tlaiyocatlalilme para Toteco.
\p
\v 20 “Huan quema Aarón tlantos quitlapajpacchihuas nopa cuarto
tlen Más Tlatzejtzeloltic, huan nopa yoyon tiopamitl huan nopa
tlaixpamitl, tlanahuatis ma quihualiquilica nopa oquich chivo tlen
itztoc.
\v 21 Huan Aarón quitlalis nochi ome ima ipan itzonteco nopa oquich
chivo tlen itztoc huan nechpohuilis nochi inintlajtlacolhua huan
inintlaixpanolhua israelitame. Huan quema quitenpojtos nochi
tetlajtlacolhua, huajca nochi tetlajtlacolhua mocahuase ipan nopa
tlapiyali. Huan teipa se tlacatl tlen yajaya quitlapejpenijtos, ma
quihuicas nopa tlapiyali huan ma quicahuati huejca ipan nopa huactoc
tlali huan ayoc quema mocuepas.
\v 22 Huan quema nopa tlacatl quimajcahuati nopa chivo, quihuicas
nochi tetlajtlacolhua más huejca ipan se tlahuel huactoc tlali huan
ax quema mocuepas.
\p
\v 23 “Huan teipa quema Aarón sampa calaquis yoyon tiopan calijtic
monequi moquixtilis iyoyo huehueyac tlen tlachijchihuali ica lino
tlen moquentijtoya para calaquis nopa cuarto Campa Más
Tlatzejtzeloltic huan quicahuas iyoyo nopona ipan nopa cuarto Campa
Tlatzejtzeloltic tlen nopa yoyon tiopamitl.
\v 24 Teipa mopajpacas ica atl nopona ipan calixpamitl ipan nopa
yoyon tiopamitl campa tlatzejtzeloltic, huan teipa sampa moquentis
iyoyo tlen huehueyac huan tlen ipa quitequihuía. Huan teipa hualas
huan nechmacas nopa tlacajcahualistli tlatlatili para ya huan
nojquiya nopa seyoc tlacajcahualistli para israelitame para
quiixtzacuas itlajtlacolhua huan israelitame inintlajtlacolhua.
\v 25 Huan ichiyajca nopa tlapiyali tlen quitencajqui queja se
tlacajcahualistli ipampa tlajtlacoli, quitlatis ipan nopa
tlaixpamitl.
\v 26 Huan nopa tlacatl tlen quitlapejpenijque para quihuicas nopa
oquich chivo huan quititlanis ipan nopa tlahuel huactoc tlali campa
itoca Azazel, quichihuas nopa tequitl huan teipa quichicuenis iyoyo
huan mopajpacas ica atl. Huan huajca, quena, huelis calaquis sampa
campa inmochijtoque.
\p
\v 27 “Huan inintlacayohua nopa becerro huan nopa oquich chivo tlen
elque tlacajcahualistli ipampa tlajtlacoli huan tlen inieso
quihuicac Campa Más Tlatzejtzeloltic para quiixtzacuas tlajtlacoli
nopona, monequi quihuicase tlahuel huejca tlen campa inmochijtoque.
Nopona quintlatise ihuaya inincuetlaxo, inincuitlaxcol, inincuitl
huan nochi tlen elqui iniijtico.
\v 28 Huan teipa yajaya tlen quinhuicac, monequi quichicuenis iyoyo,
huan mopajpacas ica atl, huan teipa sampa hueli mocuepas campa
inmochijtoque.
\p
\v 29 “Huajca ya ni nopa miyac tlanahuatili tlen monequi
inquitlepanitase nochipa: Ipan majtlactli itequi nopa chicompa
metztli ipan israelita calendario\f 16:29 Ipan septiembre o octubre
ipan tocalendario tlen ama.\f*, ax inquichihuase niyon se tlamantli
tequitl, pero monequi inmoechcapanose noixtla huan inmotejtemose. Ma
ax tequitica israelitame, niyon seyoc tlali ehuani tlen itztoque
imohuaya, pampa ya ni se tlanahuatili tlen monequi nochi
inquitlepanitase.
\v 30 Ipan ni tonal nopa totajtzi quiixtzacuas imotlajtlacolhua para
inmechtlapajpacchihuas huan yeca inmochihuase intlapajpactique tlen
nochi imotlajtlacolhua noixtla na, niimoTECO.
\v 31 Ipan nopa tonali monequi inmosiyajcahuase huan
inmoyoltlachilise para inmoechcapanose noixtla. Ya ni eli se
tlanahuatili tlen monequi inquitlepanitase para nochipa.
\v 32 Huan teipa quema itztos seyoc hueyi totajtzi tlen quiajaltise
huan quiiyocatlalise para quiixtzacuas tlajtlacoli ipatlaca inintata
Aarón, nopa yancuic totajtzi moquentis nopa yoyomitl
tlatzejtzeloltic tlen tlachijchihuali ica lino.
\v 33 Huan yajaya quiixtzacuas tlajtlacoli ipampa nopa cuarto Campa
Más Tlatzejtzeloltic huan ipampa nopa yoyon tiopamitl, huan ipampa
tlaixpamitl. Huan nojquiya quiixtzacuas inintlajtlacolhua nopa
totajtzitzi huan inintlajtlacolhua nochi israelitame.
\p
\v 34 “Huajca xijmatica ya ni se tlanahuatili tlen monequi
inquitlepanitase para nochipa: Se huelta ipan se xihuitl monequi
nechixtzacuilise inintlajtlacolhua israelitame.”
\p Huan Aarón quitoquili senquistoc nochi ni miyac tlanahuatili
tlen TOTECO quimacac Moisés.
\c 17
\s San hueli temacase tlacajcahualistli campa nopa yoyon tiopamitl
\p
\v 1 Teipa TOTECO quiilhui Moisés:
\p
\v 2 “Xiquinmaca Aarón huan nochi israelitame ni miyac
tlanahuatili.
\p
\v 3 “Tlen hueli israelita tlen quimictis se huacax, se
pilborregojtzi o se oquich chivo nechca ichaj o huejca tlen campa
inmochijtoque quihuicas tlajtlacoli noixtla.
\v 4 Nochi tlacajcahualistli huan nochi tlapiyalime tlen
inquinmictise para tlacualistli monequi achtohui xiquinhualicaca
campa ipuerta nopa yoyon tiopamitl para innechmacase na, niimoTECO.
Intla se tlacatl quihuicas se tlapiyali ipan seyoc lado huan
quimictis huan ax nechmacatoc na queja niquijto, huajca quihuica
tlajtlacoli pampa quitoyajqui estli. Huan nopa tlacatl monequi
inquiquixtise tlen campa imojuanti para ayoc quema huelis itztos
imohuaya.
\v 5 Nimechmaca ni tlanahuatili para israelitame ayoc quema ma
quimictica tlapiyalime ipan seyoc lado. Monequi ma quinhualicaca
campa ipuerta nopa yoyon tiopamitl para nechmacase na, niimoTECO. Ma
quimacaca nopa totajtzi huan nopona quinmictise nopa tlapiyali queja
se tlacajcahualistli para ma onca tlayoltlalili nohuaya na,
niimoTECO.
\v 6 Huan nopa totajtzi quiijtzelos nopa estli ipan nopa tlaixpamitl
tlen eltoc nechca ipuerta nopa yoyon tiopamitl. Huan nopa
tlachiyajcayotl quitlatis huan mijmiyotis ajhuiyac huan
nechyolpactis na, niimoTECO.
\v 7 Huan yeca israelitame ayoc quema hueli quinmacase
tlacajcahualistli nopa ajacame campa hueli. Queja se tlacanenca
sihuatl tlen quicajtejtoc ihuehue, nopa israelitame
tlajtlacolchijtoque miyac noixtla pampa nechcajtejtoque para
quintoquilise ajacame. Ni tlanahuatili para san nechca nopa yoyon
tiopamitl huelis quinmictise tlapiyalime monequi xijtlepanitaca
imojuanti huan imoteipa ixhuihua tlen tlacajtiyase teipa.
\p
\v 8 “Huajca xiquinilhui para niyon se israelita o seyoc tlali
ejquetl tlen itztoc imohuaya hueli quimictis se tlapiyali o
quitencahuas se tlacajcahualistli,
\v 9 huan ax quihualicas campa ipuerta nopa yoyon tiopamitl huan
nechmacas na, niimoTECO. Aqui hueli tlen quichihuas ya nopa, monequi
inquiquixtise tlen campa imojuanti para ayoc quema hueli itztos ica
inisraelitame. San nopona campa ipuerta nopa yoyon tiopamitl
nijtlapejpenijtoc para innechmacase tlacajcahualistli huan san
nopona inquinmictise tlapiyalime.
\s TOTECO quiijto ax hueli quicuase estli
\p
\v 10 “Nojquiya intla se israelita o se seyoc tlali ejquetl tlen
itztoc imohuaya quicuas estli, huajca na tlahuel nicualanis ica nopa
tlacatl huan nijquixtis tlen campa imojuanti para ayoc quema huelis
itztos ica inisraelitame.
\v 11 Pampa iyolis nopa tlapiyali mocahua ipan ieso tlen quipixtoc
ipan itlacayo. Huan nopa estli nimechmacatoc para inquiijtzelose
ipan nopa tlaixpamitl para ica intlaxtlahuase huan inquiixtzacuase
imotlajtlacolhua.
\p
\v 12 “Huajca nimechilhuía inisraelitame: Niyon se imojuanti huan
niyon se seyoc tlali ejquetl tlen itztoc imohuaya ax hueli quicuas
estli.
\v 13 Huan intla israelitame o seyoc tlali ehuani tlapehuatij huan
quimictise se tlamantli tlapiyali o tototl tlen tlapajpactic para
inquicuase, monequi nopona campa quimictise, quitoyahuase tlalchi
ieso huan ipani quitemilise tlali.
\v 14 Pampa ininyolis nochi tlamantli tlapiyalime eltoc ipan inieso
tlen quipixtoque ipan ininnacayo. Yeca niquinilhuijtoc ma ax
quicuaca estli, pampa inieso nochi totome huan tlapiyalime quihuica
ininyolis. Huajca tlen hueli tlen quicuas estli, monequi
inquiquixtise tlen campa imojuanti para ayoc quema huelis itztos ica
inisraelitame.
\p
\v 15 “Huan aqui hueli israelita o seyoc tlali ejquetl tlen quicuas
inacayo se tlapiyali tlen mijqui ica iselti, o tlen quimictijque
sequinoc tlapiyalime, monequi quichicuenis iyoyo huan mopajpacas ica
atl. Huan noja mocahuas ax tlapajpactic hasta tlayohua. Teipa quema
ajsis tlayohua, mochihuas tlapajpactic.
\v 16 Pero intla ax quichicuenis iyoyo, niyon ax mopajpacas ica atl,
huajca quihuicas tlajtlacoli.”
\c 18
\s Quejatza ma mocahua tlatzejtzeloltic se tlacatl ica se sihuatl
\p
\v 1 Huan TOTECO quiilhui Moisés:
\p
\v 2 “Xiquinilhui nopa israelitame ni miyac tlanahuatili.
\p “Na, niimoTECO Dios.
\p
\v 3 “Nimechilhuía amo xijchihuaca queja quichihuaj nopa tlacame
tlen ehuani ipan tlali Egipto campa achtohui initztoyaj.
\p “Niyon amo xijchihuaca queja quichihuaj nopa tlacame tlen
itztoque ipan nopa tlali Canaán campa nimechhuicas. Niyon ax
inquitoquilise inintlanahuatilhua.
\p
\v 4-5 “Monequi inquitoquilise senquistoc tlen quiijtohuaj
notlanahuatilhua huan inquichijtinemise nochi tlen na nimechilhuía,
pampa na niimoTECO Dios. Huan intla inquineltocase huan
inquichihuase senquistoc tlen quiijtohuaj notlanahuatilhua, huajca
inquipantise yolistli ipampa nopa miyac tlanahuatili. Na, niimoTECO,
nimechilhuía.
\p
\v 6 “Axaca hueli cochis ica seyoc tlen iteixmatca tlen san se
inieso. Na niimoTECO, nimechilhuía.
\p
\v 7 “Se ichpocatl ax hueli cochis ihuaya itata. Huan se telpocatl
ax hueli cochis ihuaya inana, pampa yajaya inana huan ax quinamiqui
para cochis ihuaya.
\p
\v 8 “Amo ximocuili se sihuatl tlen achtohui itztoya ihuaya motata.
\p
\v 9 “Amo xicochi ica se moicni o motepotz icni, yonque elis san
iichpoca motata, o san iichpoca monana. Ax hueli ticochis ihuaya
yonque nopa moicni tlacatqui ipan san se cali mohuaya o tlacatqui
sejcoyoc.
\p
\v 10 “Amo xicochi ihuaya se moixhui yonque icone moichpoca o
motelpoca. Elis queja timoixpanos ica moselti, pampa se moixhui eli
queja ta.
\p
\v 11 “Amo xicochi ihuaya se ichpocatl tlen motepotz icni, pampa
quitlacatilti motepotz nana. Yajaya eli moicni huan iichpoca motata.
\p
\v 12 “Amo xicochi ihuaya moahui tlen motata isihua icni, pampa
quipiya san se inieso ihuaya motata.
\p
\v 13 “Amo xicochi ihuaya moahui tlen monana isihua icni, pampa
quipiya san se inieso ihuaya monana.
\p
\v 14 “Amo xiquixpano motío tlen motata itlaca icni para ticochis
ihuaya isihua, pampa eli moahui.
\p
\v 15 “Amo xicochi ihuaya moyex, pampa eli motelpoca isihua.
\p
\v 16 “Amo xicochi ihuaya isihua motlaca icni pampa queja nopa
tiquixpanos motlaca icni.
\p
\v 17 “Amo xicochi ihuaya se sihuatl huan nojquiya ihuaya iichpoca.
Niyon amo xicochi ihuaya se sihuatl huan teipa ihuaya se iixhui,
pampa san se inieso huan niquita tlahuel fiero.
\p
\v 18 “Ax hueli timocuilis se sihuatl huan nojquiya timocuilis
iicni, pampa mocualancaitase. Pero intla mosihua miquis, huajca,
quena, hueli timocuilis mohuejpol.
\p
\v 19 “Amo xicochi ihuaya se sihuatl quema esotemo.
\p
\v 20 “Amo xicochi ihuaya mohuampo isihua para ax tiquixpanos.
\p
\v 21 “Amo xijmactili niyon se mocone queja se tlacajcahualistli
para se teteyotl queja nopa teteyotl Moloc, pampa elis queja
innechtelchihuaj na, niimoTECO.
\p
\v 22 “Se tlacatl ma ax quichihua tlamantli ihuaya seyoc tlacatl
queja elisquía isihua, pampa nopa se hueyi tlajtlacoli.
\p
\v 23 “Niyon se tlacatl ax hueli quichihuas tlamantli ihuaya se
tlapiyali pampa nelía tlahuel fiero. Huan se sihuatl nojquiya ax
hueli quichihuas tlamantli ihuaya se tlapiyali, pampa se hueyi
tlajtlacoli huan ax quinamiqui.
\p
\v 24 “Huajca amo xijchihuaca niyon se tlamantli tlen inmechcahuas
ax intlapajpactique. Nopa tlacame tlen itztoque ipan nopa tlali
campa nimechhuicas, quichijtoque miyac tlamantli huan tlahuel
mochijtoque ax tlapajpactique huan yeca niquintojtocas imoixtla.
\v 25 Quena, nochi nopa tlali mocajtoc ax tlapajpactic ica nopa
miyac tlamantli, huan yeca nochi nopa tlacame tlen itztoque nopona
niquintlatzacuiltis huan niquintojtocas.
\v 26 Pero monequi inquitlepanitase tlen nimechilhuijtoc huan
senquistoc inquichijtinemise notlanahuatilhua. Amo xijchihuaca niyon
se tlen nopa fiero tlamantli tlen inijuanti quichihuaj. Ni
tlanahuatili monequi nochi inisraelitame inquitlepanitase huan nochi
seyoc tlali ehuani tlen itztoque campa imojuanti.
\v 27 Pampa nochi ni tlamantli tlen tlahuel fiero quichijtoque nopa
tlacame tlen itztoque ipan nopa tlali campa nimechhuicas. Yeca nopa
tlali mocajtoc tlahuel ax tlapajpactic noixtla.
\v 28 Amo xijchihuaca nopa tlamantli tlen ax cuali para ax
nimechtojtocas queja niquintojtocac nopa tlacame tlen nopona
itztoque.
\v 29 Tlen hueli tlacatl tlen quichihuas nopa tlamantli tlen fiero
monequi inquiquixtise tlen campa imojuanti para ayoc quema huelis
itztos ica inisraelitame.
\v 30 Huajca xijpiyaca miyac cuidado para xijneltocatinemica tlen
nimechilhuijtoc. Amo ximochihuaca ax tlapajpactique noixtla ica nopa
fiero tlamantli tlen quichihuayayaj nopa tlacame tlen ama itztoque
campa nimechhuicas. Na niimoTECO Dios.”
\c 19
\s Quejatza ma monemiltica xitlahuac nopa israelitame
\p
\v 1 Huan TOTECO quiilhui Moisés:
\p
\v 2 “Xiquinilhui nochi israelitame ni miyac tlanahuatili.
\p “Xiitztoca intlatzejtzeloltique pampa na, niimoTECO Dios,
nitlatzejtzeloltic.
\p
\v 3 “Sese imojuanti monequi inquitlepanitase imotata huan imonana.
\p “Huan monequi ximosiyajcahuaca ipan nochi nopa tonali para
inmosiyajcahuase. Na, niimoTECO Dios, nimechilhuía.
\p
\v 4 “Ax quema sampa ximotemachica ipan teteyome huan totiotzitzi.
Na, niimoTECO Dios tlen nimechilhuía.
\p
\v 5 “Huan quema innechmacase se tlacajcahualistli para ma onca
tlayoltlalili ica na niimoTECO, monequi innechmacase queja
quinamiqui, pampa intla ax quinamiqui, ax nimechselilis.
\v 6 Nopa nacatl tlen nopa tlapiyali tlen innechmacase para nopa
tlacajcahualistli monequi inquicuase nopa tonali quema innechmacase
o tonili. Pero intla mocahuas nacatl hasta ihuiptlatica, monequi
inquitlatise.
\v 7 Huan intla inquicuase se quentzi hasta hualhuiptla, huajca ya
nopa elis se tlajtlacoli noixtla huan na ax nimechselilis
imotlacajcahualis.
\v 8 Intla aqui quicuas hasta hualhuiptla nopa tlacajcahualistli
tlen se nechmacas para ma oncas tlayoltlalili nohuaya, yajaya
quihuicas tlajtlacoli noixtla huan quiselis itlatzacuiltilis pampa
quichijtoc ax tlapajpactic nopa tlacajcahualistli tlen eltoya
tlatzejtzeloltic para na, niimoTECO. Nopa tlacatl monequi
inquiquixtise tlen campa imojuanti para ayoc quema itztos ica
inisraelitame.
\p
\v 9 “Quema ajsis nopa tonali para inpixcase ipan imomil, amo
xijcuica hasta campa miltlateno, niyon amo xijtemoca tlen mocajtoc,
niyon amo xijpejpenaca tlen tepejtoc.
\v 10 Huan san se inquichihuase ica imoxocomecamil. Amo xijtequica
hasta inacastla imomil, niyon amo xijtemoca tlen mocajtoc o
tepejtoc. Na niimoTECO Dios tlen nimechilhuía.
\p
\v 11 “Amo xitlaxtequica. Amo ximocajcayahuaca. Amo
ximoistlacahuica se ica seyoc.
\p
\v 12 “Amo xinechtestigojquetzaca na quema inquiijtohuaj
inquichihuase se tlamantli huan ya inquimatij ax inquichihuase.
Intla queja nopa inquichihuase, huajca inquiijtlacose notoca, na
niimoTECO Dios.
\p
\v 13 “Axaca xijtlaijiyohuiltica, niyon amo xitetlaxtequilica.
\p “Intla se tequitiquetl tequiti ipan mochaj, amo xijchiya hasta
seyoc tonali para tijmacas itlaxtlahuil.
\p
\v 14 “Amo xijtelchihua se tlacatl tlen ax hueli tlacaqui.
\p “Niyon amo xijtlali se tlamantli campa nejnemi se popoyotzi para
ax motepotlamis. Monequi xinechimacasica na, niimoTECO.
\p
\v 15 “Se tlen tequitiquetl monequi tetlajtolsencahuas xitlahuac.
Ax ma quichicoicneli tlen teicneltzi, niyon tlen rico o tlen hueyi.
Nochi monequi ma quinchihuili san se.
\p
\v 16 “Amo xiquijilnamiqui se tlacatl iniixtla sequinoc
ichampoyohua quema yajaya ax aqui.
\p “Amo xijteilhui se tlacatl ica se tlamantli tlen ax melahuac
pampa tijnequi ma miqui. Na niimoTECO tlen nimechilhuía.
\p
\v 17 “Amo xijcocoli seyoc ipan moyolo.
\p “Quema seyoc mitzchihuilijtoc tlen ax monequi, xiquilhui
xitlahuac tlen itlajtlacol para yajaya mocualtlalis huan para ax
tijhuicas tlajtlacoli nojquiya pampa ax tleno tiquilhui.
\p
\v 18 “Ax quema xijcuepili seyoc israelita tlen mitzchihuilijtoc
tlen ax cuali, niyon amo ximoyolilhui ajachica tlen mitzchihuilijtoc
para más timocualancamacas. Monequi xiquicneli seyoc queja ta
moselti timoicnelía. Na niimoTECO tlen nimechilhuía.
\p
\v 19 “Monequi xijtlepanitaca notlanahuatilhua.
\p “Amo xijmamalti mohuacax ica seyoc tlamantli tlapiyali.
\p “Ipan momila amo xijtoca ome tlamantli xinachtli.
\p “Niyon amo ximoquenti se yoyomitl tlen tlachijchihuali ica lino
icpatl huan ica ichcatl icpatl.
\p
\v 20 “Intla se tlacatl tlen hueli quichihuas ihuaya se ichpoca
tlatequipanojquetl tlen ya quiijtlantoc seyoc, pero noja iaxca iteco
huan aya itztoc majcajtoc, huajca monequi quiselis tlatzacuiltili
nopa tlacatl, pero ax para miquis pampa nopa ichpocatl noja eliyaya
se tlatequipanojquetl tlen tlacohuali.
\v 21 Huan nopa tlacatl tlen tlajtlacolchijqui monequi quihuicas se
oquich borrego campa ipuerta nopa yoyon tiopamitl para quimacas
TOTECO queja se tlacajcahualistli pampa quihuica tlajtlacoli.
\v 22 Huan ica nopa oquich borrego, nopa totajtzi quiixtzacuas
itlajtlacolhua nopa tlacatl, huan na, niimoTECO, nijtlapojpolhuis.
\p
\v 23 “Huan quema incalaquise ipan nopa tlali huan inquitocase
nochi tlamantli cuahuitl tlen temaca inintlajca, nopa achtohui eyi
xihuitl ax inquicuase niyon se itlajca pampa monequi inquiitase nopa
cuatlajcayotl para ax tlapajpactic.
\v 24 Huan ipan nopa najpa xihuitl, nochi nopa cuatlajcayotl elis
tlaiyocatlalili para na niimoTECO. Quena, nochi nopa cuatlajcayotl
innechmactilise para innechpaquilismacase.
\v 25 Pero ipan macuili xihuitl, quena, ya inhuelise inquicuase nopa
cuatlajcayotl, huan intla innechneltocase, nopa cuatini noja más
temacase inintlaca.
\p
\v 26 “Ax hueli inquicuase niyon se tlamantli nacatl ihuaya estli.
\p “Nojquiya ax quema xitetonalitaca, niyon xijcahuilica seyoc
inmechtonalitas. Amo xitetlajchihuica, niyon amo xijtlajtlanica
seyoc ma quitlajchihui seyoc mopampa ta.
\p
\v 27 “Amo ximoximaca campa imocuajtol, niyon amo xijhuatanica san
imotentzo inacastla queja sequinoc quichihuaj para quitlepanitase
inintlaixcopincayohua.
\p
\v 28 “Ax quema xijcococa imotlacayo queja inijuanti quichihuaj,
niyon amo xijtequica imotlacayo quema inchocaj ica tlen mictoque.
Amo xiquixcopinaca tlaixcopincayome ipan imotlacayo ica tinta. Na,
niimoTECO, nimechnahuatía.
\p
\v 29 “Amo xijchihua para moichpoca ma moichpocapolo pampa ta
tijtlacanemilti. Pampa queja nopa inquichihuase tlatelchihuali nopa
tlali tlen nimechmacas ica ahuilnencayotl huan tlafiero elis.
\p
\v 30 “Xijtlepanitaca nopa tonali tlen nijtlalijtoc para
inmosiyajcahuase. Huan xijtlepanitaca noyoyon tiopa. Na niimoTECO
Dios.
\p
\v 31 “Ax quema xijtemoca se tlen quincamahuía mijcatzitzi, niyon
tlen tetonalitaj. Niyon ax quema xijtemoca se tlamatquetl, niyon se
tlen mitzilhuis tlen motonal, pampa inmechchihuilis ax tlapajpactic
noixtla.
\p
\v 32 “Ximoquetzaca quema ajsi se huehuentzi o se nanatzi, huan
xijnextilica miyac tlatlepanitacayotl. Quema inquinextilíaj
tlatlepanitacayotl se huehuentzi o se nanatzi, intenextilíaj para
innechimacasij na, niimoTECO.
\p
\v 33 “Quema se seyoc tlali ejquetl hualas ipan imotlal para
mocahuas imohuaya, amo xijchihuilica tlen ax cuali.
\v 34 Intla se seyoc tlali ejquetl mocahuas imohuaya, monequi
inquiitase queja se nopona ejquetl. Quena, monequi xiquicnelica
queja inmoicnelíaj pampa nojquiya initztoyaj seyoc tlali ehuani
ipan tlali Egipto. Na, niimoTECO Dios, nimechnahuatía.
\p
\v 35 “Quema intetlajtolsencahuaj amo xitlacajcayahuaca.
Xijchihuaca san tlen xitlahuac. Quema inquiyejyecohuaj se tlali o
inquiyejyecohuaj se tlenijqui ica ietica o ica imiyaca, monequi
nochi nopa tlayejyecoli elis senquistoc xitlahuac.
\v 36 San xijtequihuica tlayejyecoli, tetini, barras huan cualitros
tlen senquistoc xitlahuac para intlayejyecose. Ax quema
xitecajcayahuaca niyon pilquentzi. Na, niimoTECO Dios, tlen
nimechquixti ipan tlali Egipto.
\p
\v 37 “Huajca xijpiyaca cuidado para inquintlepanitase nochi
notlanahuatilhua huan inquichijtinemise senquistoc nochi tlen
nimechnahuatía, pampa na, niimoTECO, tlen nimechilhuía.”
\c 20
\s Tlatzacuiltili para tlen ax quitlepanita tlanahuatili
\p
\v 1 Huan TOTECO quiilhui Moisés:
\p
\v 2 “Xiquinilhui nopa israelitame ni tlanahuatili.
\p “Tlen hueli tlen itztoc imohuaya, yonque se israelita o se seyoc
tlali ejquetl, intla temacas icone queja se tlacajcahualistli para
nopa teteyotl tlen itoca Moloc, monequi inisraelitame inquitepachose
hasta miquis.
\v 3 Na ihuaya nimotlalis huan ayoc nijcahuilis itztos pampa
quimacatoc icone nopa totiotzi. Ica ya nopa quichijtoc ax
tlapajpactic noyoyon tiopa huan nechpinahualtijtoc na tlen
nitlatzejtzeloltic, huan quipinahualtijtoc notoca.
\v 4 Huan intla israelitame ipan nopa tlali tlen nimechmacas ax
quichihuilise cuenta quema seyoc temaca icone ica se totiotzi huan
ax quinequij quitepachose huan quimictise,
\v 5 na nojquiya nimotlalis ihuaya tlen ax quichihuili cuenta huan
nimotlalis ininhuaya nochi ichampoyohua. Huan niquinquixtis tlen
inisraelitame para ayoc quema huelis itztose imohuaya pampa ax
quichihuili cuenta tlen nopa tlacatl quichijqui. Ax san
nijtlatzacuiltis yajaya tlen temaca icone, pero nojquiya
niquintlatzacuiltis nochi tlacame tlen yase queja ahuilnenca sihuame
huan quihueyichihuase nopa totiotzi Moloc. Nochi niquinquixtis tlen
campa imojuanti para ayoc quema huelise itztose ica inisraelitame.
\v 6 Intla tlen hueli tlacatl yas campa se tlen quiijtohua
quincamahuía mijcatzitzi o quiijtohua para tetonalita, huajca
nechcajtejtoc. Itztoc queja se tlacanenca sihuatl tlen momecatijtoc.
Huan na ihuaya nimotlalis huan nijquixtis tlen campa imojuanti para
ayoc quema itztos ica inisraelitame.
\p
\v 7 “Huajca ximoiyocatlalica tlen ni tlamantli huan xiitztoca
intlatzejtzeloltique, pampa na niimoTECO Dios tlen nimechnahuatía.
\v 8 Xiquinneltocaca notlanahuatilhua huan xiquinchijtinemica, pampa
na, niimoTECO, tlen nimechtlatzejtzelolchihua.
\p
\v 9 “Aqui quitelchihuas inana o itata, monequi xijmictica.
Quitelchijtoc inana o itata huan tlahuel quihuica tlajtlacoli
noixtla.
\p
\v 10 “Intla se tlacatl cochis ihuaya seyoc tlacatl isihua, huajca
nopa tlacatl huan nopa sihuatl monequi xiquinmictica.
\p
\v 11 “Intla se tlacatl cochis ihuaya itata isihua, huajca nopa
tlacatl quiixpano itata, huan nopa ome, sihuatl huan tlacatl,
monequi xiquinmictica pampa tlahuel quihuicaj tlajtlacoli noixtla.
\p
\v 12 “Huan intla se tlacatl cochis ihuaya iyex, huajca nopa ome
monequi xiquinmictica pampa tlahuel quiixpanotoque se ininteixmatca.
\p
\v 13 “Intla se tlacatl cochis ihuaya seyoc tlacatl huan
quichihuilis queja elisquía isihua, huajca nopa ome quichijtoque
tlen ax nijnequi niquitas huan monequi xiquinmictica. Quena, miquise
pampa tlahuel quihuicaj tlajtlacoli noixtla.
\p
\v 14 “Intla se tlacatl ihuaya itztos se ichpocatl huan nojquiya
mocuilis inana nopa ichpocatl, huajca fiero. Nopa eyi monequi
xiquinmictica huan xiquintlatica para inquiquixtise nopa hueyi
tlajtlacoli tlen campa imojuanti.
\p
\v 15 “Intla se tlacatl quichihuas tlen ax quinamiqui ihuaya se
tlapiyali, huajca nopa tlacatl huan nopa tlapiyali monequi
xiquinmictica.
\p
\v 16 “Huan intla se sihuatl quichihuas tlen ax quinamiqui ihuaya
se tlapiyali, huajca nopa sihuatl huan nopa tlapiyali monequi
xiquinmictica. Miquise pampa tlahuel quihuicaj tlajtlacoli noixtla.
\p
\v 17 “Intla se telpocatl cochis ihuaya se ichpocatl tlen
itepotzicni pampa yajaya itata iichpoca o huelis inana iichpoca,
huajca nopa ome monequi inquinhuicase iniixtla nochi israelitame
huan xiquinquixtica tlamiyacapa tlen campa inisraelitame huan
xiquinitaca para mictoque. Pampa intla se tlacatl cochis ihuaya
isihua icni eli se tlamantli tlen nelía monequi tlatzacuiltilistli.
\p
\v 18 “Intla se tlacatl cochis ihuaya se sihuatl ipan nopa tonali
quema esotemo, huajca nopa ome monequi xiquinquixtica tlen campa
imojuanti para ayoc quema itztose ica inisraelitame, pampa nopa
tlacatl quiixtlapo campa esotemo nopa sihuatl huan nopa sihuatl
quinexti ieso.
\p
\v 19 “Amo xijchihua tlen ax quinamiqui ihuaya moahui, niyon monana
isihua icni, niyon motata isihua icni. Pampa intla se tlacatl ya
nopa quichihuas ihuaya se iteixmatca tlen nechca, nochi ome
quihuicase tlajtlacoli huan quiselise inintlatzacuiltilis.
\p
\v 20 “Intla se cochis ihuaya itío isihua, quiixpanotoc itío.
Huan nopa ome quihuicase tlajtlacoli noixtla. Quema miquise, ax
quipixtehuase niyon se inincone.
\p
\v 21 “Intla se tlacatl quicuilis isihua itlaca icni, huajca
quichihua se hueyi tlajtlacoli huan quiixpano itlaca icni huan ax
quipixtehuase niyon se inincone.
\p
\v 22 “Monequi xijneltocaca huan xijchijtinemica nochi tlen
quiijtohua notlanahuatilhua para ax inmechisotlas nopa tlali campa
nimechhuica para initztotij.
\v 23 Amo xijchihuaca queja nopa tlacame tlen ama itztoque nopona
ipan nopa tlali huan monequi niquintojtocas imoixtla. Quena,
inijuanti quichijtinentoque nochi ni fiero tlamantli, huan yeca ax
nijnequi niquinitas.
\v 24 Huajca na nijcajtoc notlajtol para inmoaxcatise inintlal pampa
na nimechmactilía para imoaxca. Nopa tlali elis se cuali tlali tlen
temacas itlajca hasta mocahua.
\p “Na, niimoTECO Dios, tlen nimechiyocatlalijtoc tlen nochi
sequinoc tlacame.
\p
\v 25 “Huan yeca monequi inquiniyocatlalise nopa tlapiyalime tlen
niquinita para tlapajpactique para inquincuase huan inijuanti tlen
ax tlapajpactique huan ax cuali para inquincuase. Amo ximochihuaca
ax intlapajpactique noixtla ica niyon se tlapiyali o tototl tlen
niquijtojtoc ax tlapajpactic, o ica niyon se tlamantli tlen
mohuahuatatza tlalchi. Pampa na nimechiyocatlalijtoc tlen nopa
tlamantli tlen ax tlapajpactic.
\v 26 Monequi xiitztoca intlatzejtzeloltique noixtla, pampa na tlen
niimoTECO nitlatzejtzeloltic. Huan nimechiyocatlalijtoc tlen nopa
sequinoc tlacame para xielica innoaxcahua.
\p
\v 27 “Tlen hueli tlacatl o sihuatl tlen quiijtohua quincamahuía
inintonalhua mijcatzitzi o quicamahuía se tlen tetonalita, monequi
xijmictica ica tetl. Inijuanti quihuicase tlajtlacoli ininseltitzi
ipampa ininmiquilis.”
\c 21
\s Tlanahuatili para totajtzitzi
\p
\v 1 Huan TOTECO quiilhui Moisés:
\p “Xiquinilhui nopa totajtzitzi tlen itelpocahua Aarón, para ma
ax quiitzquica tlen hueli mijcatzi pampa quinchihuas ax
tlapajpactique noixtla.
\v 2 Huelis quiitzquise imijcatzi se ininteixmatca tlen nelía
nechca queja ininnana, inintata, inioquichpil, ininsihuapil,
inintlaca icni,
\v 3 o se ininsihua icni tlen noja itztoc ininmaco para
quimocuitlahuise pampa aya monamictía. Ica inijuanti quena, hueli
quiitzquise ininmijcatzitzi pampa ininteixmatcahua tlen nelnechca.
\v 4 Pero ax hueli mochihuase ax tlapajpactique ica se mijcatzi tlen
san mosejcotilijtoya ihuaya seyoc tlacatl tlen se ininteixmatca
queja sequinoc tlacame monequi quichihuase quema onca se mijcatzi.
\p
\v 5 “Nopa totajtzitzi ax hueli quinextise intla mocuesohuaj quema
miqui se tlacatl. Ax quinamiqui mohuatanise inacastla inintentzo,
niyon quitequise inintzoncal nechca inintzonteco, niyon ax
quinamiqui quitequise inincuetlaxo queja seyoc tlali ehuani
quichihuaj.
\v 6 Monequi elise senquistoc tlatzejtzeloltique para na, niimoTeco
Dios. Pampa inijuanti tlen nechmacase nopa tlacajcahualistli
tlatlatili huan nopa pantzi tlen noaxca na, niimoTECO. Yeca monequi
totajtzitzi elise tlatzejtzeloltique huan ax quiahuilmatise na
notoca.
\p
\v 7 “Se totajtzi ax hueli mocuilis se sihuatl tlen ahuilnentoc,
niyon ax hueli mocuilis se sihuatl tlen moamaxolejtoc ihuaya
ihuehue, pampa se totajtzi monequi mocahuas tlatzejtzeloltic para
na, niiTeco Dios.
\v 8 Se totajtzi monequi mocahuas tlaiyocatlalili pampa yajaya tlen
nechmacas nopa tlacajcahualistli noixtla na, niimoTeco Dios. Huajca
ma mocahuaca tlatzejtzeloltique nopa totajtzitzi, pampa na,
niimoTECO, nitlatzejtzeloltic, huan na tlen
nimechtlatzejtzelolchihua.
\p
\v 9 “Intla se totajtzi iichpoca mochihuas se ahuilnenca sihuatl,
moixpanotos huan quiixpanotos itata. Huan monequi inquitlatise hasta
miquis.
\s Nopa hueyi totajtzi
\p
\v 10 “Huan nopa hueyi totajtzi tlen ticajaltijtoque itzonteco ica
nopa aceite para quinyacanas nochi sequinoc totajtzitzi, huan tlen
tlaiyocatlalili para moquentis nopa yoyomitl tlen más
tlatzejtzeloltic, ax hueli tenextilis para tlahuel mocuesohua quema
quiajsis se cuesoli. Ax hueli quicahuas itzoncal ma elis fiero,
niyon ax huelis quitzayanas iyoyo queja quichihuaj sequinoc ica
cuesoli.
\v 11 Huan nopa hueyi totajtzi ax hueli monechcahuis campa eltoc se
mijcatzi itlacayo, yonque eli inana o itata. Ax hueli mochihuas ax
tlapajpactic noixtla.
\v 12 Huan quema quipiya tequitl ipan nopa yoyon tiopamitl, ax hueli
quisas pampa quipiya se cuesoli pampa quichihuas ax tlapajpactic
nopa yoyon tiopamitl. Tlaajaltili nopa hueyi totajtzi para ma eli
tlatzejtzeloltic huan tlaiyocatlalili san para na, niimoTECO.
\p
\v 13 “Nopa hueyi totajtzi monequi mocuilis para isihua se
ichpocatl tlen aya quiixmati se tlacatl.
\v 14 Ax hueli mocuilis se sihuatl tlen cahuali, o tlen quicajtoc
ihuehue, o tlen ahuilnentoc. Monequi mocuilis se ichpocatl tlen
nojquiya huala ipan nopa hueyi familia tlen totajtzitzi. Monequi
elis se tlen nelía cuali ichpocatl.
\v 15 Pampa monequi se totajtzi quitlepanitas TOTECO itlanahuatil
para iconehua ma elica tlapajpactique noixtla. Na niimoTECO tlen
nimechtlatzejtzelolchihua.”
\s Ajqueya ax hueli mochihuase totajtzi
\p
\v 16 Huan TOTECO quiilhui Moisés:
\p
\v 17 “Xiquilhui Aarón ni tlanahuatili. Ama huan teipa niyon se
moixhui tlen quipiyas se tlenijqui tlen ax cuali ipan itlacayo ax
huelis mochihuas totajtzi, niyon ax hueli monechcahuis para
nechmacas nopa pantzi tlen eltoc para na, niimoTeco Dios.
\v 18 Pampa niyon se tlacatl tlen ax ajsitoc itlacayo ax hueli
monechcahuis para quichihuas nopa tequitl. Huajca intla se tlacatl
eli popoyotzi, o metzcototic, o lipintic itlacayo, o intla quipiya
miyac ixocpilhua o imacpilhua,
\v 19 o intla quilecuenijtoc ima o iicxi,
\v 20 o intla cuitlapantomotztic, o tlahuel ax huejcapantic, o ax
cuali se iixtiyol, o sahuati, o cocoti, o intla quicocojtoc itequis,
ax hueli tequitis queja se totajtzi.
\v 21 Huajca yonque se itztoc se iixhui nopa totajtzi Aarón, ax
hueli nechmacas, niimoTECO, se tlacajcahualistli ipan tlitl intla ax
ajsitoc itlacayo. Niyon ax hueli nechmacas nopa pantzi tlen noaxca
na, niimoTeco Dios.
\v 22 Pero, quena, ininconehua totajtzitzi tlen ax ajsitoc
inintlacayo hueli quicuase nopa tlacualistli tlen huala tlen nopa
tlacajcahualistli, yonque se tlacualistli tlen tlatzejtzeloltic, o
tlen tlahuel tlatzejtzeloltic.
\v 23 San ax hueli calaquis para quinechcahuis nopa cortina pampa ax
ajsitoc itlacayo, niyon ax hueli monechcahuis campa nopa
tlaixpamitl. Melahuac ax hueli quichihuas nopa tequitl pampa
quichihuas notiopa ax tlapajpactic. Na, niimoTECO, tlen
niquiniyocatlalijtoc nopa totajtzitzi.”
\p
\v 24 Huajca Moisés quiilhui Aarón nochi ya ni huan nojquiya
quinilhui itelpocahua huan nochi nopa israelitame.
\c 22
\s Tlanahuatili para tlamantli tlatzejtzeloltic
\p
\v 1 Teipa TOTECO quiilhui Moisés:
\p
\v 2 “Xiquinilhui Aarón huan itelpocahua ma momocuitlahuica miyac
para ax ma quichihuaca ax tlapajpactic se tlacajcahualistli tlen
tlatzejtzeloltic tlen nechmacaj israelitame. Ax hueli quiahuilmatise
notoca na imoTECO Dios huan notlacajcahualis.
\p
\v 3 “Intla se totajtzi tlen ax tlapajpactic quinechcahuis se
tlapiyali, o seyoc tlamantli tlacajcahualistli tlen tlatzejtzeloltic
tlen se israelita quihualicatoc para nechmacas, huajca monequi
xijquixti nopa totajtzi para ayoc quema huelis itztos noixtla. Ni
tlanahuatili elis para totajtzitzi ama huan nojquiya para moteipa
ixhuihua tlen mochihuase totajtzitzi teipa. Na niimoTECO
nimechilhuía.
\p
\v 4 “Aarón, niyon se tlen moixhuihua tlen quipiya nopa tlacayo
palanca cocolistli, o tlen atemo ipan inintlacayo ax hueli quicuas
nopa tlacajcahualistli tlen tlatzejtzeloltic. Pero quema ya
mochicajtoc huajca, quena, huelis quicuas.
\p “Nojquiya elis ax tlapajpactic tlen hueli totajtzi tlen
quinechcahuis se mijcatzi, o temotos ixinajcho,
\v 5 o quiitzquis se tlapiyali tlen mohuahuatatza tlalchi, o
quiitzquis se tlacatl tlen ax tlapajpactic.
\v 6 Aqui hueli totajtzi tlen ax tlapajpactic ipampa tlen hueli
tlamantli mocahuas ax tlapajpactic noixtla, huan ax hueli quicuas
nopa tlacualistli tlatzejtzeloltic tlen huala tlen
tlacajcahualistli.
\v 7 Pero quema tlayohuas huan maltis, huajca motlapajpacchijtos.
Huan huajca, quena, hueli quicuas nopa tlacajcahualistli tlen
tlatzejtzeloltic pampa ya nopa itlacualis.
\v 8 Se totajtzi ax hueli quicuas inacayo se tlapiyali tlen mijqui
ica iselti, o tlen quimictijque sequinoc tlapiyalime, pampa intla
quicuas, huajca mochihuas ax tlapajpactic noixtla. Na niimoTECO
nimechilhuía.
\p
\v 9 “Huajca xiquinilhui nopa totajtzitzi ma quitoquilica nochi ni
tlanahuatili ica miyac cuidado para ax quiixpanose huan ax miquise
ipampa inintlajtlacol. Na niimoTECO tlen niquintlatzejtzelolchihua.
\p
\v 10 “Niyon se tlacatl tlen ax totajtzi ax huelis quicuas tlen
nopa tlacajcahualistli tlen tlatzejtzeloltic.
\p “Niyon ax hueli quicuas se tlacatl tlen san quipaxalohua se
totajtzi, o san quipalehuía se totajtzi se ome tonali.
\p
\v 11 “Pero intla nopa totajtzi quicohuas se tequitiquetl ica
itomi, huajca nopa tequitiquetl, quena, hueli quicuas nopa
tlacajcahualistli tlen tlatzejtzeloltic. Huan intla nopa
tlatequipanojquetl quinpiyas iconehua, huajca inijuanti nojquiya
huelise quicuase nopa tlacajcahualistli tlen tlatzejtzeloltic tlen
nopa totajtzi quinmacas.
\p
\v 12 “Huan intla iichpoca se totajtzi monamictis ihuaya se tlacatl
tlen ax totajtzi, huajca nopa ichpocatl ayoc huelis quicuas nopa
tlacajcahualistli tlen tlatzejtzeloltic.
\v 13 Pero intla miquis ihuehue o quicahuas ihuehue, huan ax
quinpiyas iconehua, huan sampa mocuepas ipan ichaj itata tlen eli se
totajtzi, huajca nopa ichpocatl sampa huelis quicuas itata
itlacualis queja quema eliyaya se pilsihuapiltzi. Pero se tlacatl
tlen ax quipiya tleno ica nopa totajtzi ax hueli quicuas nopa
tlacualistli.
\p
\v 14 “Intla se acajya mocuapolos huan quicuas nopa
tlacajcahualistli tlen tlatzejtzeloltic, huajca monequi quicuepas
san se imiyaca queja tlen quicuajqui, huan noja quitlalis seyoc 20
por ciento. Huan quihualicas huan quimacas nopa totajtzi.
\v 15 Huajca nopa totajtzitzi monequi ma quipiyase cuidado ica
ajqueya inijuanti quincahuilise ma quicuaca nopa tlacajcahualistli
para ax quichihuase ax tlapajpactic nopa tlacajcahualistli tlen
tlatzejtzeloltic tlen nopa israelitame nechiyocatlalilijtoque na,
niimoTECO.
\v 16 Pampa intla se quiixpanos ni tlanahuatili, quihuicas
tlajtlacoli huan monequi quiselis itlatzacuiltilis. Na niimoTECO
tlen nijtlatzejtzelolchihua nopa tlacajcahualistli.”
\s Tlaque tlamantli tlapiyalime ma temacaca queja tlacajcahualistli
\p
\v 17 Huan TOTECO quiilhui Moisés:
\p
\v 18 “Xiquilhui Aarón, huan iconehua, huan nochi sequinoc
israelitame ni miyac tlanahuatili. Quema quinequis quimacas
tlacajcahualistli tlen hueli israelita o tlen hueli seyoc tlali
ejquetl tlen itztoc campa imojuanti pampa tlatestigojquetztoc tlen
quichihuas para na, o pampa san ica ipaquilis quinequi nechmacas se
tlacajcahualistli,
\v 19 huajca para nijselis monequi elis se becerro, se oquich
borrego, o se oquich chivo tlen senquistoc cuali.
\v 20 Ax hueli nechmacas niyon se tlapiyali tlen quipiya ipan
itlacayo se tlamantli tlen ax cuali, pampa ax nijselis.
\p
\v 21 “Intla se quinequis nechmacas, niimoTECO, se
tlacajcahualistli para ma onca tlayoltlalili nohuaya pampa
tlatestigojquetztoc, o pampa san ica ipaquilis quinequi nechmacas se
tlacajcahualistli, huajca monequi elis se toro, o se borrego, tlen
ax tleno tlen ax cuali quipiya itlacayo para nijselilis.
\v 22 Amo xinechmacaca na, niimoTECO, se tlapiyali tlen ax tlachiya,
o mometzpostectoc, o cotontoc ima, o cocoti, o sahuati, o quipiya
seyoc tlamantli cocolistli. Se tlapiyali queja nopa ax quema
xijtlalica ipan notlaixpa, niimoTECO.
\v 23 Pero intla inquipiyaj se toro, o se pilborregojtzi tlen
quipiya miyac ixocpilhua o quentzi, o quipiya cototzi o huehueyac se
imetz, huajca quena, huelis innechmacase queja se tlacajcahualistli
tlen san innechmacaj ica imopaquilis. Pero ni tlamantli tlapiyalime
ax huelis innechmacase para se tlacajcahualistli quema monequi
tlacajcahualistli pampa intlatestigojquetztoque tlen inquichihuase.
\v 24 Nojquiya san se elis ni tlanahuatili quema inajsise ipan
imotlal. Para tlacajcahualistli, monequi se tlapiyali tlen
senquistoc cuali. Amo quema xinechmacaca se tlapiyali tlen cocojtoc
itequis, o motejtzontoc, o quihuahuatzojtoc o quiquixtilijtoque
itequis.
\v 25 Niyon amo xiquincahuilica nopa seyoc tlali ehuani ma
quitencahuaca se tlacajcahualistli queja nopa para elis tlacualistli
para na, niimoTeco Dios. Intla quihualicase se tlapiyali tlen ax
ajsitoc itlacayo huan quinequise nechmacase na, niimoTeco Dios, ax
niquinselilis pampa ax tlapajpactic. Ax cuali nochi itlacayo.”
\s Quejatza ma quinmictica tlapiyalime
\p
\v 26 Huan TOTECO quiilhui Moisés:
\p
\v 27 “Quema tlacatis se becerro, se pilborregojtzi, o se piloquich
chivojtzi monequi mocahuas ihuaya inana para chicome tonali. Pero
quema quipiyas chicueyi tonali, huelis inquitequihuise para se
tlacajcahualistli tlen inquitlatise para na, niimoTECO.
\p
\v 28 “Ipan san se tonali ax hueli inquimictise se huacax ihuaya
icone, o se sihua borrego ihuaya icone.
\p
\v 29 “Quema innechmacase se tlacajcahualistli para
innechtlascamatilise, monequi inquichihuase queja quinamiqui para
nijselis.
\v 30 Monequi inquicuase nopa tlapiyali inacayo ipan nopa tonali
quema innechmacase. Ax hueli inquicahuase se quentzi para inquicuase
hasta seyoc tonal. Na niimoTECO tlen nimechilhuía.
\p
\v 31 “Xijtlepanitaca notlanahuatil. Quena, xijtoquilijtinemica
senquistoc tlen quiijtohua pampa na, niimoTECO.
\p
\v 32 “Amo xijtequihuica notoca queja eliyaya tlen hueli tocayotl
pampa nitlatzejtzeloltic. Na niiyoca. Huan monequi nochi israelitame
ma nechiyocatlalica huan ma nechixmatica para niitztoc niiyoca,
pampa nitlatzejtzeloltic. Huan na niimoTECO tlen
nimechtlatzejtzelolchihua.
\v 33 Na tlen nimechmaquixti ipan tlali Egipto para nielis niimoTECO
huan niimoDios.”
\c 23
\s Nopa tonali para ilhuitl huan para mosiyajcahuase
\r (Nm. 28:16-25)
\p
\v 1 Huan TOTECO quiilhui Moisés:
\p
\v 2 “Xiquinilhuiti nopa israelitame ni miyac tlanahuatili. Ya ni
nopa tonali tlen monequi inquiiyocacahuase para na, niimoTECO para
inquichihuase ilhuitl huan nechhueyimatise. Xiquintocajtlalica
tonali para tlanechicoli tlen tlatzejtzeloltique. Huan ipan ni
tonali nochi israelitame ma mosentilica huan ma nechhueyitlalica.
Huan ni nopa tonali:
\p
\v 3 “Sesen samano para chicuase tonali intequitise, pero ipan
tonali chicome, ax inquichihuase niyon se tequitl. Senquistoc
inmosiyajcahuase ipan nopa chicompa tonali. Elis se tonali
tlatzejtzeloltic para inmosentilise huan innechhueyichihuase. Quej
ni inquichihuase ipan sesen samano. Nopa chicompa tonali elis
tlatzejtzeloltic huan tlaiyocatlalili para na, niimoTECO.
\s Nopa ilhuime ipan sesen xihuitl
\p
\v 4 “Huan ya ni nochi nopa tonali para inilhuichihuase ipan sesen
xihuitl huan nopa tonali para inquipiyase nopa tlasentililistli tlen
tlatzejtzeloltic para innechhueyichihuase na, niimoTECO:
\s Nopa ilhuitl tlen Pascua
\p
\v 5 “Nopa ilhuitl tlen Pascua monequi xijchihuaca ipan 14 itequi
nopa achtohui metztli ipan imoisraelita xihui\f 23:5 Quemantzi ni
tonal huetzis ipan itlamiya marzo huan quemantzi ipan ipejya abril
ipan tocalendario tlen ama.\f*, huan pehuas quema temo tonati ica
tiotlac.
\p
\v 6 “Ipan ne seyoc tonal, inpehuase inquichihuase nopa ilhuitl
tlen pantzi tlen ax quipiya tlasonejcayotl. Para chicome tonali san
hueli inquicuase pantzi tlen ax quipiya tlasonejcayotl.
\v 7 Ipan nopa achtohui tonali tlen nopa chicome tonali,
inmosentilise ipan se tlasentilistli tlatzejtzeloltic, huan ipan
nopa tonali ax inquichihuase niyon se tequitl.
\v 8 Huan ipan nochi nopa chicome tonali monequi inquitlatise
tlacajcahualistli para na. Huan ipan nopa tonal chicome nojquiya
inquipiyase se tlasentilistli tlatzejtzeloltic huan ax
intequitise.”
\s Nopa ilhuitl tlen nopa tlayacanca pixquistli
\r (Nm. 28:26-31)
\p
\v 9 Huan TOTECO quiilhui Moisés:
\p
\v 10 “Xiquinilhui israelitame ni miyac tlanahuatili. Quema ya
inajsitose ipan nopa tlali tlen nimechmacas huan ya inquipixcatose
cebada, monequi inquihuicase campa nopa totajtzi nopa achtohui
tlatequili tlen inquipixcase.
\v 11 inquihuicase ipan ne seyoc tonali quema ya panoc nopa tonal
quema inmosiyajcajque. Huan nopa totajtzi quihuisos noixtla
niimoTECO, huan na nijselis queja se tlacajcahualistli.
\v 12 Ipan nopa tonal nojquiya innechmacase se pilborregojtzi queja
se tlacajcahualistli tlatlatili. Monequi nopa pilborregojtzi
quipiyas san se xihuitl huan ax quipiyas ipan itlacayo niyon se
tlamantli tlen ax cuali.
\v 13 Huan ihuaya ni pilborregojtzi monequi innechmacase se
tlacajcahualistli tlen elis nahui kilos huan tlajco tlen harina tlen
tlamaneloli ica aceite. Monequi inquitlatise noixtla huan nelía
nechpactis. Nojquiya ihuaya monequi innechmacase se litro xocomeca
atl queja se tlacajcahualistli tlen inquitoyahuase noixtla.
\v 14 Huan quema aya inquihuicaj ni tlacajcahualistli, ax huelis
inquicuase niyon pilquentzi nopa cebada ipan imomil. Ax hueli
inquimacuise iyol, niyon inquicacatzchihuase iyol, niyon ax hueli
inquichihuase pantzi. Ya ni elis se tlanahuatili tlen monequi
inquitlepanitase para nochipa.
\s Nopa ilhuitl tlen pixquistli o tlen Pentecostés
\p
\v 15 “Huajca nopa achtohui tonal inmosiyajcahuase huan ne seyoc
tonal inquihualicase nopa tlatequili yancuic huan teipa xipehuaca
xijpohuaca chicome samanos.
\v 16 O huelis inquipohuase 50 tonali o chicome sábados tlen ipan
inmosiyajcahuaj, huan huajca inquihuicase seyoc tlacajcahualistli
tlen quisa tlen cebada para na, niimoTECO.
\v 17 Inquihualicase ome pantzi tlen imochajchaj para se
tlacajcahualistli tlen inquihuisose noixtla, niimoTECO. Nopa pantzi
monequi inquicualtlalise ica se nahui kilos tlen harina ica
tlasonejcayotl. Ya ni elis se tlacajcahualistli tlen nopa tlayacanca
pixquistli.
\v 18 Huan ica nopa pantzi nojquiya innechmacase chicome
pilborregojtzitzi tlen sanoc quipiyaj sese xihuitl tlen ax tleno
tlen ax cuali quipiyaj. Nojquiya xinechmacaca se becerro huan ome
oquich borregojme huan nochi elise tlacajcahualistli tlatlatili para
na, niimoTECO. Huan nojquiya xinechmacaca nopa tlacajcahualistli
tlen harina huan nopa tlacajcahualistli tlen tlatoyahuali noixtla
tlen monequi innechmacase ihuaya.
\p
\v 19 “Huan nojquiya innechmacase se oquich chivo para se
tlacajcahualistli ipampa tlajtlacoli, huan innechmacase ome
pilborregojtzitzi queja se tlacajcahualistli para ma onca
tlayoltlalili nohuaya.
\v 20 Huan nopa totajtzitzi quinhuisose nopa ome pilborregojtzitzi
noixtla, niimoTECO. Nojquiya quihuisose nopa ome pantzi tlen nopa
tlayacapan pixquistli. Nochi ni tlacajcahualistli elis
tlaiyocatlalili para na, niimoTECO, huan monequi inquinmactilise
nopa totajtzitzi para ma eli inintlacualis.
\p
\v 21 “Huan ipan san se nopa tonal inteyolmelahuase para oncas se
tlasentilistli tlen tlatzejtzeloltic para innechhueyichihuase. Ax
huelis inquichihuase niyon se tequitl ipan nopa tonali. Ya ni elis
se tlanahuatili tlen monequi nochi inisraelitame huan imoteipa
ixhuihua inquitlepanitase para nochipa.
\p
\v 22 “Huan quema inpixcase ipan imomila ipan nopa tlali, amo
xipixcaca hasta campa inacastla nopa mili, niyon amo xijpejpenaca
tlen tepejtoc tlalchi. Ya nopa xijcahuaca para ma quipejpenaca tlen
teicneltzitzi huan tlen seyoc tlali ehuani. Na niimoTECO Dios tlen
nimechilhuía.”
\s Nopa ilhuitl tlen tlapitzali
\r (Nm. 29:1-6)
\p
\v 23 Huan TOTECO quiilhui Moisés:
\p
\v 24 “Xiquinilhui israelitame ni miyac tlanahuatili. Nopa achtohui
tonal ipan nopa chicompa metztli ipan imoisraelita calendario\f 23:24
Quemantzi ni tonal huetzi ipan itlamiya septiembre huan quemantzi
ipan ipejya octubre ipan tocalendario tlen ama.\f*  elis
tlatzejtzeloltic. Monequi inquiilnamiquise queja se tonal para
inmosiyajcahuase. Pero monequi inmosentilise ipan se tlasentilistli
tlen tlatzejtzeloltic para innechhueyimatise. Huan inquinpitzase
tlapitzali para intenotzase ipan ni ilhuitl tlen tlapitzali.
\v 25 Huan ipan nopa tonal ax tleno tlen tequitl inquichihuase, san
innechmacase tlacajcahualistli ipan tlitl.”
\s Nopa Tonal Para Quiixtzacuas Tetlajtlacolhua
\r (Nm. 29:7-11)
\p
\v 26 Nojquiya TOTECO quiilhui Moisés:
\p
\v 27 “Huan ipan nopa majtlacpa tonal ipan nopa chicompa metztli
inquichihuase nopa Tonal para Quiixtzacuas Tetlajtlacolhua. Ipan ni
tonal inmosentilise ipan se tlasentililistli tlen tlatzejtzeloltic
para innechhueyimatise. Huan monequi inmosahuase, huan
inmoicnonequise ipampa imotlajtlacolhua. Huan inquitencahuase se
tlacajcahualistli ipan tlitl noixtla, niimoTECO.
\v 28 Ipan nopa tonal ax inquichihuase niyon se tequitl, pampa elis
nopa Tonal Para Quiixtzacuas Tetlajtlacolhua.
\v 29 Tlen hueli tlacatl tlen ax mosahuas huan ax moicnonequis
ipampa itlajtlacolhua ipan nopa tonal, monequi xijquixtica tlen
campa imojuanti para ayoc quema itztos ica inisraelitame.
\v 30 Huan tlen hueli tlen quichihuas tlen hueli tequitl ipan nopa
tonal, na nijtzontlamiltis para ayoc itztos ica inisraelitame.
\p
\v 31 “Quena, ax hueli inquichihuase niyon se tequitl. Ni
tlanahuatili monequi inquitlepanitase imojuanti huan imoteipa
ixhuihua para nochipa.
\v 32 Quena, ya ni elis se tonal para inmosiyajcahuase, huan monequi
inmosahuase huan inmoicnonequise noixtla ipampa imotlajtlacolhua. Ni
Tonal Para Quiixtzacuas Tetlajtlacolhua pehuas ica tiotlac ipan nopa
chicnajpa tonal ipan nopa metztli huan huejcahuas hasta ne seyoc
tonal ica tiotlac.”
\s Nopa ilhuitl quema quichihuase pilxajcaltzitzi
\r (Nm. 29:12-40)
\p
\v 33 Huan TOTECO quiilhui Moisés:
\p
\v 34 “Xiquinilhui israelitame ni tlanahuatili. Ipan 15 itequi nopa
chicompa metztli ipan imocalendario, inquipehualtise para
inquiilnamiquise nopa ilhuitl quema inquichihuase pilxajcaltzitzi.
Huan inilhuichihuase noixtla, niimoTECO, para chicome tonali.
\v 35 Ipan nopa achtohui tonal tlen nopa chicome tonali
inmosentilise ipan se tlasentilistli tlen tlatzejtzeloltic para
innechhueyichihuase. Ipan nopa tonal, ax hueli inquichihuase niyon
se tlamantli tequitl.
\v 36 Huan ipan nochi nopa chicome tonali, inquitlatise
tlacajcahualistli para na, niimoTECO. Huan ipan nopa chicueyi tonal
inmosentilise ipan seyoc tlasentilistli tlen tlatzejtzeloltic para
innechhueyichihuase. Ya ni itlamiya nopa tlasentililistli tlen ni
hueyi ilhuitl. Ipan nopa tonal nojquiya axaca hueli quichihuas niyon
se tequitl.
\p
\v 37 “Huajca nica nimechilhuijtoc nopa tonali ipan se xihuitl tlen
nijtlalijtoc para inmosentilise huan inilhuichihuase para na,
niimoTECO. Huan nojquiya ipan ni tonali inquintlatise miyac
tlacajcahualistli para na. Nojquiya inquitencahuase
tlacajcahualistli ipan tlitl para na. Innechmacase tlacajcahualistli
tlatlatili, tlacajcahualistli tlen harina, huan tlacajcahualistli
tlen tlapiyalime tlen inquinmictijtoque huan tlacajcahualistli tlen
inquitoyahuase noixtla. Sesen tlacajcahualistli innechmacase ipan
nopa tonali quema quinamiqui.
\v 38 Nochi ni tlacajcahualistli elis iyoca tlen nopa
tlacajcahualistli tlen monequi innechmacase ipan nopa tonal para
inmosiyajcahuase ipan sesen samano. Nojquiya nochi ya ni eltoc iyoca
tlen nopa tlacajcahualistli tlen innechmactilijtihualahuij, o nopa
tlacajcahualistli tlen innechmacase ica imoseltitzitzi quema
intlatestigojquetzase ica se tlenijqui tlen inquichihuase, o se
tlacajcahualistli tlen inquitencahuase noixtla pampa san ipan
imoyolo quisa para inquichihuase.
\p
\v 39 “Ipan 15 itequi nopa chicompa metztli, quema ya inpixcaque,
inquiilnamiquise ni ilhuitl noixtla, niimoTECO. Ni ilhuitl quema
inquichihuase pilxajcaltzitzi inquichihuase para chicome tonali.
Huan ipan nopa achtohui tonali huan ipan nopa chicueyi tonali,
monequi inmosiyajcahuase.
\v 40 Ipan iachtohui tonal ni ilhuitl inquicuise imacuayo cuatini
tlen yejyectzitzi huan tlen quipiyaj itlajca. Inquicuise imacuayo
apach cuatini huan ininmacuayo cuatini tlen quipiyaj ininxihuiyo
huan moscaltíaj campa atemitl. Huan ica ya nopa inquichihuase
pilxajcaltzitzi para ipan initztose para chicome tonali huan
inpaquise noixtla na, niimoTECO Dios.
\v 41 Sesen xihuitl inquichihuase ni ilhuitl para chicome tonali
para na. Ya ni eli se tlanahuatili tlen monequi inquitlepanitase
nochi inisraelitame tlen ama initztoque huan nochi tlen teipa
tlacatise.
\v 42 Ipan nopa chicome tonali nochi initztose ipan pilxajcaltzitzi.
\v 43 Ica ni ilhuitl, inquiilnamiquise quema nimechquixti ipan tlali
Egipto huan nimechchijqui initztose ipan pilxajcaltzitzi. Na
niimoTECO Dios tlen nimechilhuía.”
\p
\v 44 Huajca Moisés quinyolmelajqui nopa israelitame tlen nochi
nopa ilhuime tlen TOTECO quiixtlalijtoya para tiquilnamiquise.
\c 24
\s Nopa aceite para tlahuili ipan nopa yoyon tiopamitl
\r (Éx. 27:20-21)
\p
\v 1 Huan TOTECO quiilhui Moisés:
\p
\v 2 “Xiquinnahuati israelitame ma quihualicaca aceite tzalantic
para tlahuili ipan tiopamitl. Nopa aceite monequi hualas tlen olivas
tlen tlatejtepacholi. Ica nopa cuali aceite, nopa tlahuili ax quema
sehuise.
\v 3-4 Ma quinmocuitlahui miyac nopa tlahuili ipan nopa tlahuil
quetzali tlen senquistoc oro. Quena, nopa tlahuili iixmelac nopa
cortina tlen quitzacua campa nocaxa monequi tlatlatose nochipa
noixtla, niimoTECO. Huan elis Aarón itequi para quinpajpacas huan
quintequilis aceite nopa tlahuili ijnaloc huan tiotlac. Huan Aarón
iixhuihua monequi quitlepanitase ni tlanahuatili para nochipa.
\s Nopa pantzi tlen quinextía para TOTECO Itztoc Tohuaya
\p
\v 5-6 “Ipan sesen samano ipan nopa tonali para inmosiyajcahuase,
nopa totajtzi monequi quitlalis 12 pantzi ipan nopa mesa tlen oro
tlen eltoc noixtla, niimoTECO. Sesen tlen nopa pantzi monequi
quichihuase ica nahui kilos huan tlajco tlen harina tlen tlahuel
cuechtic. Huan quintecpanas ica ome tlatecpichtli. Sesen
tlatecpichtli quipiyas chicuase pantzi.
\v 7 Huan ipan sesen pamitl tlen nopa pantzi quitlalis copali tlen
nelía cuali. Ni copali teipa elis se tlacajcahualistli tlen
quitlatis ipan tlaixpamitl para nechmacas, na niimoTECO. Huan nopa
pilquentzi copali tlen quitlatis quinextis para nechmaca senquistoc
nochi nopa pantzi.
\v 8 Huan sesen samano ipan nopa tonali para inmosiyajcahuase, nopa
totajtzi monequi quitlalis nopa pantzi noixtla para se
tlanextilijcayotl tlen nopa tlajtoli tlen nijchijtoc ininhuaya nochi
israelitame.
\v 9 Huan nopa pantzi elis para Aarón huan iconehua ma quicuaca,
pero monequi quicuase campa tlatzejtzeloltic. Quena, nopona ma
quicuaca pampa nopa pantzi eltoc tlen más tlatzejtzeloltic tlen
nochi tlamantli tlacajcahualistli tlen nechmacatoque ipan tlitl.
Huan na, niimoTECO, niquinmaca ma quicuaca nopa totajtzitzi huan
ininconehua para nochipa.”
\s Tlatzacuiltili para tlen quitelchihuas o quiahuilmatis TOTECO
\p
\v 10 Itztoya se telpocatl tlen inana eliyaya se israelita sihuatl,
pero itata eliyaya se tlali Egipto ejquetl. Huan se tonal nopa
telpocatl mocualani ihuaya se israelita tlacatl nopona campa nochi
mochijtoyaj.
\v 11 Huan quema motehuiyayaj, nopa telpocatl quitelchijqui TOTECO.
Huan sequinoc quihuicaque iixtla Moisés para ma quitlajtolsencahua.
Inana nopa telpocatl eliyaya Selomit tlen eliyaya iichpoca Dibri
huan hualayaya ipan nopa hueyi familia Dan.
\v 12 Huan quitzajque nopa telpocatl huan quichixque para TOTECO ma
quiilhui Moisés tlaque tlatzacuiltili monequi quiselis.
\v 13 Huan TOTECO quiilhui Moisés:
\p
\v 14 “Xijquixti nopa telpocatl tlen nechtelchijqui huejca tlen
campa inmochijtoque. Huan ma hualaca nochi tlen quicajque quema
nechtelchijqui, huan ma quitlalica ininma ipan itzonteco. Huan teipa
nochi israelitame ma quimaquilica ica tetl hasta quimictise.
\v 15 Huan xiquinilhui israelitame intla acajya nechtelchihuas na,
niimoTECO, o quitelchihuas notoca, nojquiya quiselis nopa
tlatzacuiltili.
\v 16 Quena, aqui nechtelchihuas na, niimoTECO, monequi miquis, huan
monequi nochi israelitame quitepachose. Ni tlanahuatili elis san se
para israelitame huan para seyoc tlali ehuani. Intla se
nechtelchihuas monequi inquimictise.
\p
\v 17 “Nojquiya intla se tlacatl quimictis seyoc, nopa tlacatl tlen
temicti monequi nojquiya xijmictica.
\p
\v 18 “Tlen quimictis se tlapiyali tlen seyoc iaxca, monequi
quicuepilis seyoc tlapiyali tlen san se.
\p
\v 19 “Intla se acajya quicocos seyoc, monequi nojquiya san se
inquicocose.
\v 20 Intla se acajya quipostequilis seyoc iomiyo, huajca nojquiya
monequi inquipostequilise iomiyo. O intla se acajya
quiixtiyolquixtis seyoc, huajca nojquiya monequi
inquiixtiyolquixtise. Huan intla se acajya tetlancochtepehuas,
huajca nojquiya monequi inquitlancochtepehuase. Quena, queja se
acajya quichihuilijtoc seyoc, monequi nojquiya inquichihuilise.
\p
\v 21 “Tlen quimictis seyoc itlapiyal, monequi quicuepas seyoc
tlapiyali tlen san se. Pero intla aqui quimictis seyoc tlacatl,
monequi nojquiya xijmictica.
\p
\v 22 “Onca san se ni tlanahuatili para nochi tlacame, yonque
israelitame o seyoc tlali ehuani. Na, niimoTECO Dios, tlen
nimechnahuatía.”
\p
\v 23 Huajca teipa Moisés quincamahui israelitame. Huan quihuicaque
nopa telpocatl tlen quitelchijtoya TOTECO hasta huejca tlen campa
mochijtoyaj huan nopona nochi quimictijque ica tetl. Huajca nopa
israelitame quichijque senquistoc queja TOTECO quinahuatijtoya
Moisés.
\c 25
\s Nopa xihuitl quema mosiyajcahuas tlali
\p
\v 1 Quema Moisés itztoya ipan tepetl Sinaí, TOTECO quiilhui:
\p
\v 2 “Xiquinilhui nopa israelitame para quema ya inajsitose ipan
nopa tlali tlen nimechmacas, nopa tlali iselti monequi mosiyajcahuas
sesen huelta quema ajsis chicompa xihuitl. Huan ica ya nopa
inquinextise para nopa tlali noaxca na, niimoTECO.
\v 3 Para chicuase xihuitl hueli intlatojtocase ipan imomila.
Nojquiya hueli inquitzontequise nopa xocomecatl ininmacuayo para
más temacas, huan hueli inquitequise itlajca.
\v 4 Pero ipan nopa chicompa xihuitl, nopa tlali monequi
mosiyajcahuas huan elis se xihuitl tlaiyocatlalili para na para
intenextilise intechtlepanitaj. Amo xijtocaca niyon se xinachtli,
niyon amo xijtzontequica imacuayo nopa xocomecatl para ma chamani
más.
\v 5 Nopa tlen ixhuas ica iselti ipan imomila campa tepejtoc iyol,
amo xijpixcaca, niyon xicajcocuica. Huan itlajca nopa xocomecatl
tlen moscaltía iselti, amo xijtequilica queja ipa inquichijtoque,
pampa ipan nopa xihuitl, nopa tlali san mosiyajcahuas.
\v 6 Pero tlen ixhuas iselti ipan mila ipan nopa xihuitl quema nopa
tlali mosiyajcahuas elis tlacualistli para nochi hueli
quitequihuise. San se quitequihuise tlen iaxca nopa mila, o
itlatequipanojcahua tlen quincojtoc, o itlatequipanojcahua tlen
quipalehuíaj se ome tonali, o nopa seyoc tlali ehuani tlen itztoque
tlatlajco imojuanti. Nochi san se iniaxca elis para ma quicuaca,
pero axaca huelis quipixcas para quiajcocuis.
\v 7 Nojquiya imotlapiyalhua huan nopa tlapiyalime tlen itztoque
ipan cuatitlamitl san se hueli quicuase tlen nopona eltoc ipan mila.
\s Nopa xihuitl para nochi mochihuase majcajtoque o malacantoque
\p
\v 8 “Xijpohuaca hasta tlamis chicome xihuitl chicome hueltas, o 49
xihuitl. Huan quema ya tlantos huan ajsis ne seyoc tonali, campa
hueli inquipitzase icuacua se oquich borrego.
\v 9 Quena, campa hueli ipan nochi nopa tlali Israel monequi
inquipitzase tlapitzali quema ajsis nopa Tonali Para Quiixtzacuase
Tetlajtlacolhua ipan majtlactli itequi nopa chicompa metztli ipan 50
xihuitl.
\v 10 Pampa nopa xihuitl 50 elis tlatzejtzeloltic. Nopa xihuitl elis
se xihuitl quema nochi tlen tlahuicaj elise malacantoque tlen nopa
tlen tlahuicaj. Nojquiya ipan nopa xihuitl monequi inquinmajcahuase
nochi imoisraelita tlatequipanojcahua tlen monamacatoque para
inmechtequipanose. Quena, nochi israelita tlatequipanohuani
mocahuase majcajtoque. Huan nochi israelitame tlen quinamacaque
inintlal, nopa tlali sampa mochihuas iniaxca, o iniaxca iniixhuihua.
Huan sesen israelita monequi sampa yas campa quistoc ifamilia huan
campa eliyaya itlal para quiselis sampa nopa tlali tlen eliyaya
iaxca.
\v 11 Nopa xihuitl 50 elis se xihuitl quema inelise inmalacantoque
tlen nochi imotequi. Ax intlatojtocase, niyon ax inquipixcase
itlajca nopa tlatoctli tlen ixhuac ica iselti, niyon itlajca nopa
xocomecatl tlen ax inquimocuitlahuijtoque.
\v 12 Pampa nopa xihuitl elis tlatzejtzeloltic huan nochi
israelitame mochihuase majcajtoque o malacantoque. Ipan nopa xihuitl
quema inquicuase se tlamantli tlen iselti ixhuac, xijcuitehuaca
campa mila huan nimantzi xijcuaca, pero amo xipixcaca, niyon amo
xicajcocuica.
\p
\v 13 “Ipan nopa xihuitl quema inmochihuase inmalacantoque o
majcajtoque, sesen tlen imojuanti monequi mocuepas campa itlal huan
campa quisqui ifamilia. Huan yonque ya quinamacatose itlal, ipan
nopa tonali sampa quimactilise.
\v 14 Huajca quema inquicohuilíaj o inquinamaquiltíaj seyoc
israelita se tlali, amo ximocajcayahuaca.
\v 15 Xijpohuaca quesqui xihuitl mocahuas hasta nopa xihuitl quema
nochi mocahuas malacantoc, huan xijtlaxtlahui queja quesqui xihuitl
huelis temacas itlajca nopa tlali hasta ajsis nopa xihuitl quema
mocuepas ica tlen achtohui iaxca.
\v 16 Huan intla polihui miyac xihuitl para ajsis nopa 50 xihuitl
quema nochi mocahuas malacantoc, huajca más patiyo inquiixtlahuase
nopa tlali para inquicohuase. Pero intla pilquentzi xihuitl eltos
para sampa mocuepas moaxca, ax más patiyo xijnamaca. Pampa nelía
tlen inquinamacaj eltoc imiyaca nopa pixquistli tlen temacas nopa
tlali hasta sampa elis moaxca ta o tlen achtohui quipixqui. Quena,
quej nopa elis ipati nopa tlali quema inquinamacase.
\p
\v 17 “Huajca xinechimacasica na, niimoTECO Dios, huan amo
xijcajcayahuaca seyoc ica se tlaxtlahuili tlen ax ijqui.
\v 18 Monequi xiquintlepanitaca notlanahuatilhua huan
xiquintoquilijtinemica para queja nopa initztose ica temachili ipan
imotlal.
\v 19 Huan intla inquitoquilise ni tlanahuatili, nopa tlali temacas
miyac itlajca, huan inmechmacas para inquicuase hasta inixhuise
cuali. Huan initztose ica paquilistli ipan nopa tlali.
\p
\v 20 “Pero huelis imojuanti inmoilhuise ni: ‘¿Tlaque tijcuase
ipan nopa xihuitl chicome, pampa ax intechcahuilíaj para
titlatojtocase, niyon tipixcase?’
\v 21 Na nijtitlanis notlatiochihualis ipan nopa xihuitl chicuase,
huan yeca nopa tlen inquipixcase ipan nopa xihuitl, huejcahuas para
inmopanoltise hasta inpixcase sampa ipan nopa expa xihuitl.
\v 22 Quena, quema sampa ajsis tonali para intlatojtocase ipan
xihuitl chicueyi, noja inquicuajtiyase nopa pixquistli tlen
inquicuique ipan xihuitl chicuase. Huan inmechaxilis para ica
inmopanoltise hasta oncas nopa pixquistli ipan xihuitl chicnahui.
\s Sampa hueli se quicohuas tlali tlen quinamacac
\p
\v 23 “Xiquilnamiquica para nopa tlali noaxca. Yeca ax hueli
inquinamacase para mocahuas seyoc iaxca para nochipa. Imojuanti san
inajsini huan inpaxalohuani nica, huan eltoc queja san
nimechtlanejtía nopa tlali.
\v 24 Nochipa quema inquinamacaj se tlali, nopa amatl monequi
quiijtos para sampa hueli inquicohuase para imoaxca ipan tlen hueli
tonal.
\p
\v 25 “Huan quema se israelita mochihuas teicneltzi huan monequis
mitznamaquiltis se quentzi itlal, huajca se iteixmatca tlen
nelnechca hueli mitzcohuilis sampa nopa tlali tlen
mitznamaquiltijtoc.
\p
\v 26 “Huan intla nopa tlacatl ax quipiya niyon se iteixmatca tlen
quipalehuis, pero ya iselti quisentilis nopa tomi, huajca yajaya
sampa huelis quicohuas nopa tlali tlen quinamacac.
\v 27 Huan monequi ximoilhuica quesqui xihuitl tlen pixquistli nopa
tlacojquetl quiixtlajtoc para elisquía iaxca nopa tlali hasta nopa
xihuitl quema nochi elis malacantoc o majcajtoque. Huan quema nopa
tlacatl sampa quicohuas itlal, monequi quicuepilis itomi nopa
tlacatl para nochi nopa xihuitl tlen quicojtoya para quitequihuis
nopa tlali pero ama ayoc hueli quitequihuis pampa sampa quicojqui
tlen quinamacac. Pero quena, tlen iaxca eliyaya se tlali sampa hueli
quicohuas para elis iaxca intla quipiya nopa tomi.
\v 28 Pero intla ax quisentilis nopa tomi queja quinamiqui para
sampa quicohuas itlal, huajca nopa tlali eltos iaxca tlen quicojqui
hasta ajsis nopa xihuitl quema nochi tlali mocahuas malacantoc huan
mocuepas ica tlen achtohui eliyaya iaxca. Huan huajca ipan nopa
xihuitl, quena, nopa tlacatl tlen quinamacac nopa tlali, sampa
quiselis para iaxca.
\p
\v 29 “Intla se tlacatl quinamacas se cali ipan se altepetl tlen
moyahualojtoc ica tepamitl, yajaya huelis quicohuas sampa intla
quinequisquía para se xihuitl huan sampa elis iaxca tlen
quinamacac.
\v 30 Pero quema ya quiaxitijtos se xihuitl quinamacatoc, huajca
ayoc hueli quicohuas sampa nopa cali tlen eltoc ipan se altepetl
tlen moyahualojtoc ica tepamitl. Huan mocahuas nopa tlacatl tlen
quicojtoc iaxca huan iniaxca iixhuihua para nochipa. Niyon nopa cali
ax hueli mocuepas para elis iaxca iteco tlen achtohui ipan nopa
xihuitl quema nochi tlali mocahuas majcajtos. Queja nopa eltoc
tlanahuatili para caltini tlen mopantíaj ipan se altepetl tlen
moyahualojtoc ica tepamitl.
\v 31 Pero caltini tlen mopantíaj ipan pilaltepetzitzi tlen ax
moyahualojtoque ica tepamitl elise queja nopa tlaltini campa mila.
Quiijtosnequi iteco tlen quinamacac huelis quicohuas sampa ica tomi,
huan intla ax quicohuas nopa cali sampa, quema ajsis nopa xihuitl 50
elis malacantoc o majcajtoque huan mocuepas para elis iaxca tlen
achtohui.
\p
\v 32 “Pero nopa caltini tlen mopantíaj ipan inialtepehua
iixhuihua Leví, o nopa totajtzitzi, ax san se. Yonque moyahualojtoc
nopa inialtepe ica tepamitl, se levita tlacatl tlen quinamacas ichaj
sampa huelis quicohuas ipan tlen hueli tonali.
\v 33 Huan se cali tlen se iixhui Leví quinamacas, nojquiya
mocuepas iaxca nopa tlacatl ipan xihuitl 50 quema nochi tlali
mocahuas malacantoc. Pampa nopa levitame quiselijque ininchajchaj
ipatlaca nopa tlali campa hueltosquíaj tlatojtocasquíaj. Yeca
axaca hueli quincuilis ininchajchaj para nochipa.
\v 34 Huan nopa potreros tlen nechca inialtepehua iixhuihua Leví ax
hueli monamacase, pampa nopa piltlaltzitzi mocahuas iniaxca para
nochipa.
\p
\v 35 “Intla se israelita mochihuas teicneltzi huan yas campa ta,
monequi xijpalehui queja elisquía se nejnenquetl, o se seyoc tlali
ejquetl, huan xijcahua ma itzto mohuaya.
\v 36 Quena, xinechimacasica na, niimoTeco Dios, huan xijcahuilica
para imoicni ma itzto imohuaya. Huan amo xitlainamaca itlanca quema
inquitlanejtíaj imotomi.
\v 37 Ax tleno xitlainamaca quema intetlanejtíaj imotomi, niyon ax
xijtlanica tomi intla inquimacase tlacualistli.
\v 38 Pampa na, niimoTeco Dios tlen nimechilhuía. Na tlen
nimechquixti ipan tlali Egipto para nimechmactilis nopa tlali
Canaán huan para nielis niimoTeco Dios.
\p
\v 39 “Intla se moisraelita icni mocahuas nelteicneltzi huan
quinequis monamacas ica ta para mitztequipanos, huajca xijcohua,
pero amo xijtequihui queja elisquía se tequitiquetl tlen tijcojtoc
para moaxca tlen ax quipiya niyon se tequiticayotl.
\v 40 Monequi xiquitas queja elisquía se tepaxalojquetl o se cuali
tlatequipanojquetl tlen mitzpalehuía. Huan san huelis
mitztequipanos hasta ipan nopa xihuitl quema nochi mocahuas
malacantoc o majcajtoque.
\v 41 Huan ipan nopa xihuitl quema nochi mocahuas malacantoc yajaya
huelis quisas ihuaya iconehua huan mocuepas campa itatahua inintlal.
\v 42 Pampa inisraelitame innotlatequipanojcahua tlen nimechquixti
ipan tlali Egipto, huan ax quinamiqui inmonamacase para inelise
tlatequipanohuani tlen seyoc iaxca huan intequipanose san tlapic.
\v 43 Ax quema xijnahuati se israelita o xijtequihui chicahuac.
Monequi xinechimacasica na, niimoTeco Dios.
\p
\v 44 “Pero intla inquinequij inquincohuase tlatequipanohuani para
imoaxcahua para inmechtequipanose san tlapic, huajca huelis
inquincohuase tlacame huan sihuame tlen ehuani ipan sequinoc
tlaltini huan ax israelitame.
\v 45 Nojquiya hueli inquincohuase seyoc tlali ehuani ininconehua
tlen itztoque campa imojuanti yonque ininconehua tlacatque ipan
imotlal.
\v 46 Huan quema inmiquise, huajca ni tlatequipanohuani tlen ax
israelitame tlen inquincojtoque mocahuase iniaxcahua imoconehua,
huan quintequipanose para nochipa. Pero inisraelitame ax hueli
inquitequihuise seyoc israelita san tlapic o inquinahuatise
chicahuac.
\p
\v 47 “Intla se seyoc tlali ejquetl tlen itztoc ipan imotlal
mochihuas rico huan se israelita mochihuas teicneltzi huan quinequi
monamacas ica nopa seyoc tlali ejquetl,
\v 48 huajca cualtitoc. Pero yonque monamacatos, nopa israelita noja
quipiya tlanahuatili para se iteixmatca quicohuas sampa para
quimajcahuas. Quena, hueli quicohuas se iicni,
\v 49 se itío, o se imachicni, o aqui hueli tlen iteixmatca tlen
nelnechca. Huan intla ya iselti huelis quisentilis tomi para
quicuepilis iteco queja quicojqui, huajca nojquiya huelis momanahuis
ica iselti.
\v 50 Monequi quichihuase cuentas ihuaya iteco para quiitas quesqui
monequi tlaxtlahuas. Pehuase quipohuase tlen nopa xihuitl quema
monamacac huan quipohuase hasta nopa 50 xihuitl quema nochi mocahuas
malacantoc o majcajtoque. San tlaxtlahuas ipampa quesqui xihuitl
polihuis para ajsis nopa xihuitl quema elis malacantoc.
Quiijtosnequi quicuepilis iteco tlen monequisquía quitlaxtlahuis
seyoc tequitiquetl para tequitis ipatlaca hasta nopa 50 xihuitl
quema elisquía malacantoc.
\v 51 Intla noja polihui miyac xihuitl para mocahuas malacantoc,
huajca quitlaxtlahuis iteco nechca imiyaca tlen quiseli quema yajaya
monamacac ica ya.
\v 52 Pero intla ayoc miyac xihuitl polihui para mocahuas
malacantoc, huajca san quiixtlahuas nopa xihuitl tlen noja polihui.
\v 53 Intla nopa israelita monamacatoc ica se seyoc tlali ejquetl,
yaya mocahuas ihuaya queja se tequitiquetl tlen motemacas
tlatequipanos para se xihuitl. Huan nopa seyoc tlali ejquetl ax
hueli quinahuatis chicahuac, niyon ax hueli moaxcatis para nochipa.
\p
\v 54 “Huan intla nopa israelita tlacatl noja aya momanahuijtoc
huan ajsis nopa xihuitl 50, huajca mocahuas malacantoc o majcajtoque
ipan nopa xihuitl. Huan ya ica nochi iconehua quisase malacantoque
san sejco.
\v 55 Nochi inisraelitame innotlatequipanojcahua na. Na tlen
nimechquixti ipan tlali Egipto para innechtequipanose. Na niimoTECO
Dios.
\c 26
\s Nopa tlatiochihuali para tlen quitlepanita TOTECO
\r (Dt. 7:12-24; 28:1-14)
\p
\v 1 “Amo ximochijchihuilica totiotzitzi, niyon tlaixcopincayome,
niyon teteyome. Quema inajsise ipan imotlal amo xijquetzaca se tetl
tlen inquisencajtoque huan inquipajtoque para inquihueyichihuase,
pampa na niimoTECO Dios.
\v 2 Monequi xiquintlepanitaca notlanahuatilhua huan
ximosiyajcahuaca ipan nopa tonali quema nimechnahuatijtoc.
Xijtlepanitaca noyoyon tiopa. Na niimoTECO tlen nimechilhuía.
\p
\v 3 “Intla inquinneltocase notlanahuatilhua huan inquitoquilise
tlen niquijtohua,
\v 4 huajca nijchihuas para ma huetzis atl ipan imotlal quema
monequi huetzis atl. Huan nopa tlali temacas miyac pixquistli, huan
nopa cuatini temacase miyac itlajca hasta mocahuas.
\v 5 Quena, inquipiyase miyac trigo hasta noja inquipixcatose ipan
nopa tonal quema inpehuase inquitequise xocomecatl itlajca. Huan
noja inquitequihuijtose nopa xocomecatl itlajca hasta nopa tonal
quema sampa inquitocase trigo. Quena, inquicuase tlen nochi tlen
inquinequise hasta inixhuise cuali. Huan initztose ica paquilistli
ipan imotlal.
\v 6 Quena, na noselti nimechmacas tlasehuilistli. Huan yeca quema
incochise, ax inmajmahuise. Ax oncas niyon se tlamantli tlen
inmechmajmatis. Nijchihuas para nochi tlapiyalime tlen mosisiníaj
ma ixpolihuica. Huan nopona ayoc oncas tlatehuijcayotl.
\v 7 Inquintojtocase imocualancaitacahua huan inquintzontlamiltise
ica imomachete.
\v 8 Macuilti tlen imojuanti inquintojtocase cien
imocualancaitacahua. Huan cien tlen imojuanti inquintojtocase
majtlactli mil imocualancaitacahua. Huan queja nopa, nochi
imocualancaitacahua inquintzontlamiltise.
\v 9 Pampa na, nimechtiochihuas huan nimechmiyaquilis. Huan tlen
niquijtojtoc nijchihuas ica imojuanti, temachtli nijchihuas.
\v 10 Quena, inquicuase nopa trigo tlen huejcajquiya inquipixcaque.
Huan quema ajsis tonali para inquipixcase nopa tlen yancuic,
monequis inquiquixtise tlen inquipixcaque se xihuijtlaya para huelis
inquiajcocuise tlen yancuic.
\p
\v 11 “Na nimocahuas para niitztos tlatlajco tlen imojuanti huan ax
quema nimechcualancaitas.
\v 12 Niitztos campa imojuanti huan na nielis niimoTeco Dios huan
imojuanti inelise innotlacajhua.
\v 13 Na niimoTECO tlen nimechquixti ipan tlali Egipto para ayoc
intlatequipanose san tlapic. Na tlen nimechquixtili nopa cuahuitl
etic tlen eltoya ipan imoquejquespa para intlapoxonise queja
tlapiyalime, huan na nimechchijqui ximoquetzaca xitlahuac.
\s Nopa tlatzacuiltilistli para tlen ax quitlepanita TOTECO
\r (Dt. 28:15-68)
\p
\v 14 “Pero intla ax intechneltoquilise huan ax inquitlepanitase
nochi notlanahuatilhua,
\v 15 huan san inquihuejcamajcahuase huan ax inquinequise
inquicaquise tlen nimechilhuijtoc, huajca imojuanti inquixolehuase
nopa tlajtoli tlen nijchijtoc imohuaya.
\v 16 Huan huajca ya ni tlen nimechchihuilis. Nimechtitlanilis se
cocolistli tlen inmechcocoxcamacas huan se majmajtli tlen nimantzi
inmechajsis, huan inquipantise cocolistli tlen tlahuel tlamahua.
Nojquiya nimechmacas se cocolistli tlen tlatotonilotl tlen
inmechpopoyochihuas. Huan imotlacayohua pehuas para nenpolihuis.
Huan tlen inquitocase ipan imomila, elis san tlapic, pampa
imocualancaitacahua inmechichtequilise huan inijuanti quicuase.
\v 17 Na nielis niimocualancaitaca, huan sequinoc
imocualancaitacahua niquincahuilis ma inmechtlanica. Quena,
inijuanti inmechnahuatise. Huan incholojtehuase ica majmajtli yonque
axaca inmechtojtoca.
\p
\v 18 “Huan intla noja ax innechneltoquilise yonque ya
nimechtitlanilijtos nochi ya ni, huajca nimechtlatzacuiltis chicome
hueltas ipampa sese imotlajtlacolhua.
\v 19 Quena, nijtlamiltis nopa chicahualistli tlen ica
inmohueyimatij huan nijchihuas para nopa mixtli ma ayoc quitoyahua
atl. Huan ne tlali nijchihuas ma elis queja xali. Quena, nijchihuas
ma quipiyas itlachiyalis tlen cafentic queja nopa tepostli bronce.
\v 20 San tlapic inmosiyahuiltise para intlatojtocase pampa nopa
tlali ayoc tlaeliltis huan nopa cuatini ayoc temacase itlajca.
\p
\v 21 “Huan intla noja innechcualancaitase huan ax inquinequise
inquitlacaquilise tlen nimechilhuía, huajca nimechtlatzacuiltis
chicome hueltas más chicahuac. Quena, nopa tlatzacuiltili
nimechtitlanilis ipampa imotlajtlacolhua.
\v 22 Niquintitlanis tlapiyalime tlen mosisiníaj para
quintzontlamiltise imoconehua huan imohuacaxhua. Huan nojquiya
nimechtzontlamiltis huan ayoc initztose inmiyaqui huan yeca ipan
campa hueli ojtli ayoc itztose israelita tlacame.
\p
\v 23 “Pero intla teipa noja aya inmocualtlalise, huan aya
inquichijtinemise tlen na nijnequi huan san innechcualancaitase,
\v 24 huajca nimotlalis queja niimocualancaitaca huan
nimechtlatzacuiltis chicome hueltas más chicahuac para sese
imotlajtlacolhua.
\v 25 Huan nijchihuas para hualas se tlatehuijcayotl campa imojuanti
pampa inquixolejtoque nopa tlajtoli tlen nijchijqui imohuaya. Huan
intla inmochololtise huan inmotlatitij ipan imoaltepehua ica
tepamitl, huajca altepeijtic nijchihuas ma inmechajsi se cocolistli
tlen temictía. Huan nimantzi imocualancaitacahua inmechtlanise.
\p
\v 26 “Huan teipa nijchihuas ma huala se mayantli huan tlahuel
pilquentzi elis itlajca imomila. Majtlactli sihuame huelise
quiicxitise pantzi ipan san setzi horno. Huan teipa inquipohuase
nopa pantzi huan inmoxejxelhuilise para inmechaxilis miyac tonali.
Huan yonque inquicuase se quentzi, ax inixhuise.
\p
\v 27 “Huan intla ica ya nopa noja aya innechneltocase huan
inquisenhuiquilise inquichijtinemise tlen ax nijnequi na,
\v 28 huajca imohuaya nimotlalis na. Huan tlahuel miyac más
nicualanis imohuaya huan nimechtlatzacuiltis chicome hueltas más
chicahuac para sese imotlajtlacolhua.
\v 29 Huan inmayanase hasta inquincuase imoconehua tlen oquichpilme
huan tlen sihuapilme.
\v 30 Huan na nijxolehuas nopa tlaixpamitl campa inquinhueyichihuaj
totiotzitzi campa tlachiquiltipa. Nojquiya nijxolehuas imotlaixpa
campa inquitlatíaj copali para imotlaixcopincayohua. Imotlacayohua
tlen mictoque niquintlalis ipan imototiotzitzi tlen nojquiya
mictoque. Huan ayoc nijnequis nimechitas.
\v 31 Niquinxolehuas imoaltepehua huan mocahuas queja se huactoc
tlali, huan nijxolehuas campa inquinhueyichihuayayaj imototiotzitzi.
Yonque inquitlatisquíaj copali noixtla, ayoc nijselis.
\p
\v 32 “Nijxolehuas nochi nopa tlali. Huan quema imocualancaitacahua
hualase para moaxcatise, quiitase tlen nijchijtoc huan
quisentlachilise.
\v 33 Huan imojuanti nimechtitlanis campa hueli ipan sequinoc
tlaltini huan nimechtojtocas ica se machete nomaco. Huan imotlal
mocahuas queja se huactoc tlali, huan imoaltepehua mocahuas queja
tlasoli.
\v 34-35 Huan quema initztose ipan inintlal imocualancaitacahua,
nopa tlali tlen nimechmacac mosiyajcahuas. Quena, pampa ax
inquicahuiliyayaj nopa tlali ma mosiyajcahuas sesen chicome xihuitl
quema initztoyaj, nimechtojtocas huan yonque eltos tlaxolehuali,
nopa tlali mosiyajcahuas ica paquilistli queja quinamiquiyaya
mosiyajcahuas.
\p
\v 36 “Huan imojuanti tlen noja initztose ipan sequinoc tlaltini,
nimechchihuas para tlahuel ximajmahuica ipan imoyolo hasta quema
inquicaquise mojmolinía se tlasoli, incholose pampa inmoilhuise
acajya inmechsenpanohua ica machete. Quena, inmajmahuise hasta
inmotlalose huan inhuetzise. Quej ni imopantis inisraelitame quema
initztose ipan imocualancaitacahua inintlal.
\v 37 Hasta inmocuitiquisase se ica seyoc quema incholose queja
inmechsenpanosquíaj imocualancaitacahua ica machete, pero axtle.
Huan ayoc tleno huelis inquichihuase iniixtla imocualancaitacahua
pampa ayoc inquipiyase chicahualistli.
\v 38 Huan inixpolihuise nopona tlatlajco inijuanti. Quena, elis
queja inintlal inmechcuas.
\v 39 Huan imojuanti tlen noja initztose ipan nopa tlali tlen
imocualancaitacahua inmocuesojtinemise ipampa imotlajtlacol. Quena,
mojmostla inquipolojtiyase más imochicahualis ica nopa tlajtlacoli
tlen imojuanti huan imohuejcapan tatahua inquichijtoque.
\p
\v 40-41 “Pero teipa inquipannextise huan innechpohuilise nochi
imotlajtlacolhua, huan innechpannextilise nopa tlajtlacoli tlen
quichijque imohuejcapan tatahua. Quena, innechpohuilise queja
imohuejcapan tatahua ax nechneltoquilijque notlanahuatil huan san
quichijtinenque tlen na ax nijnequi niquitas. Huan yeca
niquinnextili nocualancayo huan niquinhuicac ipan inintlal
inincualancaitacahua. Huan quema imojuanti inmoechcapanose huan
inquiselise nopa tlatzacuiltilistli tlen quinamiqui para nochi
imotlajtlacolhua noixtla,
\v 42 huajca na niquilnamiquis nopa tlajtoli tlen nijchijqui ihuaya
Abraham, Isaac huan Jacob huejcajquiya. Huan niquilnamiquis nopa
tlali tlen niquinmacac huan quejatza ama mocahua tlasosolijtoc.
\v 43 Pampa monequi para nopa tlali ma mosiyajcahuas huan axaca
itztos nopona queja na niquijto quinamiqui para mosiyajcahuas. Huan
inisraelitame teipa inquiselise imotlatzacuiltilis pampa ax
inquitlepanitaque notlanahuatil, niyon ax inquinejque ma
nimechnahuati.
\p
\v 44 “Huan yonque inquichijtoque miyac tlajtlacoli huan initztose
ipan imocualancaitacahua inintlal, na nimechilnamiquis. Ax
nimechtlahuelcahuas, niyon ax nimechtzontlamiltis nochi imojuanti,
niyon ax nijxolehuas nopa tlajtoli tlen nijchijqui imohuaya. Na
niimoTECO Dios.
\v 45 Huan pampa nimechicnelía, niquilnamiquis nopa tlajtoli tlen
nijchihua ininhuaya imohuejcapan tatahua quema niquinquixti ipan
tlali Egipto quema nochi sequinoc tlaltini ehuani san
mosentlachiliyayaj. Quena, niquinquixti para nielis niininTECO
Dios.”
\p
\v 46 Huajca nica eltoc nochi nopa miyac tlanahuatili tlen TOTECO
quimacac Moisés ipan nopa tepetl Sinaí para ma quinilhuis
israelitame.
\c 27
\s Tlamantzitzi tlen tlaiyocatlalili para TOTECO
\p
\v 1 Huan TOTECO quiilhui Moisés:
\p
\v 2 “Xiquinilhui israelitame nochi ni tlanahuatili. Quema se
acajya ica iselti quinequis nechtestigojquetzas na para
moiyocacahuas para na, niimoTECO, o quiiyocacahuas se icone huan
teipa quinequis momanahuis para elis malacantoc o majcajtoc, quej ni
monequi tlaxtlahuas.
\v 3 Para se tlacatl tlen quipiya 20 xihuitl hasta tlen quipiya 60
xihuitl, tlaxtlahuas 50 plata tomi tlen quitequihuíaj ipan nopa
yoyon tiopamitl.
\v 4 Pero intla eli se sihuatl, huajca san tlaxtlahuas 30 plata
tomi.
\v 5 Huan para se oquichpil tlen quipiya macuili xihuitl hasta 20
xihuitl, tlaxtlahuase 20 plata tomi. Huan para se sihuapil tlen
quipiya 5 xihuitl hasta 20 xihuitl, tlaxtlahuase 10 plata tomi.
\v 6 Pero para se piloquichpiltzi tlen sanoc quipiya se metztli ica
tlacatqui huan hasta tlen quipiya macuili xihuitl, tlaxtlahuase
macuili plata tomi. Huan intla se pilsihuapiltzi tlen quipiya se
metztli hasta macuili xihuitl, tlaxtlahuase eyi plata tomi.
\v 7 Huan para se tlacatl tlen quipiya 60 xihuitl para huejcapa,
tlaxtlahuas 15 plata tomi. Huan intla eli se sihuatl tlen quipiya 60
xihuitl para huejcapa, tlaxtlahuas majtlactli plata tomi.
\v 8 Huan intla se tlacatl nelteicneltzi tlatestigojquetztoc para
motemacas ica na huan teipa quinequi sampa mocohuis pero ax huelis
quisentilis nopa tomi tlen monequi, huajca ma quihuicaca campa nopa
totajtzi. Huan nopa totajtzi quiixtlalis quesqui plata tomi monequi
tlaxtlahuas nopa tlacatl teicneltzi. Quena, quiixtlalis queja
quiitas para quiaxilis itlaxtlahuil nopa tlacatl tlen
tlatestigojquetztoc para motemactilis ica na, niimoTECO, huan
quinequi sampa mocohuis para mocahuas malacantoc o majcajtoc.
\p
\v 9 “Pero intla se acajya tlatestigojquetztoc para nechmacas na,
niimoTECO, se tlapiyali, huajca nopa tlacatl monequi nelía
nechmactilis nopa tlapiyali. Nochi nopa tlamantli tlen se quiijtos
para nechmacas elis tlatzejtzeloltic huan tlaiyocatlalili para na.
\v 10 Huan intla se tlatestigojquetztoc para nechmacas na,
niimoTECO, se ofrenda, ax hueli moyolcuepas. Huan intla moilhuijtoc
catlía tlapiyali nechmacas huan tlatestigojquetztoc para ya nopa
nechmacas, huajca nopa tlapiyali ayoc huelis quipatlas. Niyon ax
hueli nechmacas seyoc tlen más cuali o más fiero. Huan intla
nechmacasquía seyoc queja ipatlaca, huajca nochi nopa ome
tlapiyalime mocahuase tlaiyocatlalilme para na, niimoTECO, huan ax
hueli sampa quincohuas.
\p
\v 11 “Huan intla tlatestigojquetzas para nechmacas se tlapiyali
tlen ax tlapajpactic para elis tlacajcahualistli para na, niimoTECO,
huajca nopa tlacatl quihuicas campa nopa totajtzi nopa tlapiyali.
\v 12 Huan nopa totajtzi quitlachilis intla cuali o ax cuali, huan
tlen nopa totajtzi quiixtlalis para ipati, ya nopa monequi
quiixtlahuas ipan tiopamitl para sampa mocohuis nopa tlapiyali.
\v 13 Pero intla teipa quinequis sampa quicohuas nopa tlapiyali,
monequi tlaxtlahuas tlen ipati quiixtlalijtoc nopa totajtzi huan
nojquiya monequi quimiyaquilis seyoc 20 por ciento para queja nopa,
nopa tlapiyali sampa elis iaxca.
\p
\v 14-15 “Intla acajya quiiyocatlalis ichaj para elis
tlatzejtzeloltic para na, niimoTECO, huan teipa sampa quinequis
mocohuis para iaxca, huajca quej ni quichihuas. Monequi ma huala
nopa totajtzi ma quitlachiliqui nopa cali huan quiixtlalis quesqui
ipati. Huan nopa imiyaca tomi tlen nopa totajtzi quiixtlalis, huajca
ya nopa elis ipati. Huan iyoca tlen nopa ipati tlen quiixtlalijtoc
nopa totajtzi, nopa tlacatl monequi quimiyaquilis seyoc 20 por
ciento. Huan quema tlaxtlahuas nochi ya nopa, nopa cali sampa elis
iaxca.
\p
\v 16 “Huan intla se acajya quiiyocatlalis se quentzi tlali tlen
quiselijtoc tlen ihuejcapan tatahua para nechmacas para elis noaxca,
niimoTECO, huajca nopa totajtzi monequi quitlachilis quejatza
ihuexca nopa tlali huan quesqui litros tlen xinachtli monequi para
quitocas. Queja nopa quiixtlalis ipati. Intla quiitas para ipan nopa
tlali monequi 220 litros tlen cebada xinachtli para quitocas para 50
xihuitl huajca monequi tlaxtlahuas 50 plata tomi.
\v 17 Huan intla se tlacatl quiiyocatlalis itlal ipan nopa xihuitl
50 quema nochi mocahua malacantoc o majcajtoc, huajca nochi tlen
ipati monequi tlaxtlahuas ipan tiopamitl para mocohuis sampa nopa
tlali.
\v 18 Pero intla quiiyocatlalis nopa tlali quema ya panotoc nopa
xihuitl quema nochi mocahuas malacantoc, huajca nopa totajtzi
quipohuas quesqui xihuitl panotoc tlen nopa xihuitl huan
quiquixtilis tlen ipati elisquía para nejmajtic 50 xihuitl. San
monequi tlaxtlahuas para quesqui xihuitl polihui para sampa ajsis
nopa xihuitl quema mocahuas malacantoc.
\p
\v 19 “Huan intla nopa tlacatl tlen quiiyocatlali itlal sampa
quinequis quicohuas nopa tlali para iaxca, huajca monequi
tlaxtlahuas tlen nopa totajtzi quiixtlalis para ipati huan iyoca
monequi quimiyaquilis seyoc 20 por ciento. Huan queja nopa, nopa
tlali sampa elis iaxca.
\v 20 Pero intla ax quicohuas nimantzi para sampa elis iaxca huan
quinamaquiltis seyoc, huajca teipa ayoc quema sampa huelis quicohuas
para iaxca.
\v 21 Huan quema ajsis nopa xihuitl para nochi mocahuas malacantoc o
majcajtoc, nopa tlali nojquiya mocahuas malacantoc, huan elis
tlaiyocacahuali para na, niimoTECO, huan teipa elis para nopa
totajtzitzi iniaxca.
\p
\v 22 “Huan intla acajya nechiyocatlalilis na, niimoTECO, se
quentzi tlali tlen san quicojtoc huan ax quiselijtoc tlen ihuejcapan
tatahua,
\v 23 huajca nopa totajtzi quipohuas quesqui xihuitl polihui para
ajsis nopa xihuitl para nochi mocahuas malacantoc. Huan queja nopa
quiixtlalis ipati. Huan nopa tlacatl tlen quiiyocatlalijtoc itlal
para na, niimoTECO, monequi nimantzi tlaxtlahuas ipan nopa tonal.
\v 24 Huan quema ajsis nopa xihuitl para nochi mocahuas malacantoc,
nopa tlali sampa elis iaxca nopa achtohui tecojtli tlen nopa tlacatl
quicohuili.
\p
\v 25 “Ipan nochi tlamantli tlen inquiixtlalise ipati, monequi
inquitequihuise nopa tlayejyecoli para ietica nopa plata tomi tlen
motequihuía ipan nopa yoyon tiopamitl.
\s Tlamantli huan tlacame tlen senquistoque iaxcahua TOTECO
\p
\v 26 “Nochi huacaxme huan borregojme tlen achtohui tlacatij tlen
ininnana ax hueli inquiniyocatlalise para na, niimoTECO, pampa ya
eltoc noaxcahua tlen achtohui tlacatij.
\v 27 Pero intla inquinequij inquiiyocatlalise se tlapiyali tlen se
iachtohui ejca se tlapiyali tlen ax tlapajpactic para
tlacajcahualistli huan yeca ax noaxca, huajca nopa tlacatl tlen
iaxca huelis sampa mocohuis intla tlaxtlahuas queja quiixtlalijtoc
nopa totajtzi para ipati nopa tlapiyali. Huan iyoca monequi
quimiyaquilis seyoc 20 por ciento tlen ipati. Huan intla nopa
tlacatl ax quinequis quicohuas sampa nopa tlapiyali tlen nechmaca,
huajca nopa totajtzi quinamaquiltis nopa tlapiyali seyoc queja
quiixtlalijtoc para ipati pampa ax cuali para tlacajcahualistli.
\p
\v 28 “Pero se tlacatl, o se tlapiyali, o se tlali tlen se
quiselijtoc tlen ihuejcapan tatahua huan senquistoc nechmacatoc para
elis noaxca, ayoc aca huelis quicohuas o quinamacas ica seyoc, pampa
ya nopa senquistoc noaxca huan tlahuel tlatzejtzeloltic para na,
niimoTECO.
\v 29 Intla quiijtohua tlanahuatili para monequi miquis se tlacatl,
ax huelis tlaxtlahuas para momanahuis. Monequi miquis.
\p
\v 30 “Se diezmo tlen nochi tlen temaca momila eltoc noaxca. Quema
nopa tlali temacas xinachtli o nopa cuatini temaca itlajca, monequi
innechmacase na, niimoTECO, se tlayejyecoli tlen sesen majtlactli
tlayejyecoli. Pampa ya nopa eli noaxca huan tlatzejtzeloltic para
na.
\v 31 Huajca intla acajya quinequis sampa mocohuis nopa xinachtli
tlen imila o itlajca icuatlatochua, huajca monequi tlaxtlahuas tlen
ipati huan quimacas nopa totajtzi huan nojquiya monequi
quimiyaquilis seyoc 20 por ciento.
\p
\v 32 “Huan ipan sesen majtlactli tlapiyalime monequi inquiquixtise
se para innechmacase na, niimoTECO. Amo xiquintlapejpenica catlía
tlapiyalime elise noaxcahua. Quema nopa tlapiyalime motecpanaj para
calaquise ipan tlatzactli huan nopa tlamocuitlahuijquetl quinpohua
sesen quema panoj itzala icuatopil, sesen huelta quema quipohuas
hasta ipan majtlactli, huajca nopa tlapiyali elis noaxca na. Quena,
ya nopa se diezmo huan tlatzejtzeloltic para na nopa majtlacpa
tlapiyali.
\v 33 Ax quenijqui intla nopa tlapiyali tlen nechtocarohua elis
cuali o ax cuali, ax huelis quiixpatlas. Huan intla quipatlas,
huajca nochi ome tlapiyalime, nopa tlen eltoya noaxca huan nopa tlen
ipatlaca, nochi mocahuase tlaiyocatlalilme para na, niimoTECO. Huan
axaca hueli sampa quicohuas para iaxca.”
\p
\v 34 Huajca ya ni nopa miyac tlanahuatili tlen TOTECO quimacac
Moisés ipan nopa tepetl Sinaí para ma quinilhuis nochi
israelitame.