\id JOB
\h JOB
\mt Job
\c 1
\s Job se tlacatl tlen xitlahuac
\p
\v 1 Tlahuel huejcajquiya ipan tlali Uz, itztoya se tlacatl tlen itoca Job. Yajaya eltoya se tlacatl tlen xitlahuac huan tlen axaca huelqui quiteilhuis. Quiimacasiyaya huan quitlepanitayaya Toteco Dios huan mohuejcatlaliyaya tlen nochi tlen ax cuali.
\v 2 Job quinpixqui chicome itelpocahua huan eyi iichpocahua.
\v 3 Nojquiya quinpiyayaya chicome mil borregojme, eyi mil camellos, 500 pares huacaxme tlen quimatque tlapoxoníaj, 500 sihua burrojme huan miyac tequipanohuani. Job más tlapijpixtoya que nochi sequinoc tlacame tlen itztoyaj ipan nopa tlali campa quisa tonati.
\p
\v 4 Huan sesen xihuitl quema sese iconehua Job quiaxitiyaya ixihui, ilhuichihuayaya ipan ichaj. Huan nochipa quinnotzayaya itlaca icnihua huan nopa eyi isihua icnihua para sentic tlacuase.
\v 5 Quemantzi nopa ilhuime huejcahuayaya miyac tonali. Huan quema tlamiyaya sesen ilhuitl, Job nochipa quintlapajpacchihuayaya iconehua iixpa Toteco Dios. Ica ijnaloc mehuayaya nelcualca huan quitencahuayaya se tlacajcahualistli tlatlatili iixpa Toteco Dios ipampa sese icone. Job quichihuayaya ya ni pampa moilhuiyaya: “Huelis noconehua tlajtlacolchijtoque huan quitelchijtoque Toteco Dios ipan ininyolo.” Huan Job queja nopa nochipa quichihuayaya.
\p
\v 6 Se tonali ielhuicac ejcahua Toteco\f 1:6 Ni tlajtoli ipan hebreo quiijtohua “itelpocahua Toteco”. Quinequi quiijtos ángeles o ielhuicac ejcahua Toteco tlen tlatzejtzeloltique. Ipan sequin versículos huan nojquiya huelis nica, camati nojquiya tlen ielhuicac ejcahua tlen huejcajquiya tlajtlacolchijque huan mochijque ajacame pampa nica quiijtohua para Axcualtlacatl hualajqui ininhuaya. Xiquita nojquiya Gn. 6:2; Job 2:1, 38:7 huan Dn. 3:25.\f* hualajque para moixnextise iixpa TOTECO, huan ininhuaya nojquiya hualajqui Axcualtlacatl.
\p
\v 7 Huan TOTECO quitlajtlani Axcualtlacatl:
\p ―¿Canque tihuala?
\p Huan Axcualtlacatl quiilhui:
\p ―Na ninejnentihuala tlen iixco tlaltepactli campa nitlachixtiyohuiyaya nochi tlen panoyaya.
\p
\v 8 Huajca TOTECO quitlajtlani Axcualtlacatl:
\p ―¿Tiquitztoc notlatequipanojca Job? Ipan nochi tlaltepactli axaca seyoc queja ya. Axaca hueli quiteilhuis ica niyon se tlamantli tlen ax cuali. Quichihua nochi tlen xitlahuac. Yajaya nechimacasi huan nechtlepanita huan mohuejcatlalía tlen nochi tlamantli tlen ax cuali.
\p
\v 9 Pero nopa Axcualtlacatl quiilhui:
\p ―¿Ta tiquita Job mitztlepanita san pampa quinequi?
\v 10 ¡Ax neli! Yajaya san mitztlepanita pampa nochipa tijmocuitlahuijtoc iyolis, ifamilia huan nochi tlen quipiya. Ax tijcahuilijtoc ma quiajsi niyon se cuesoli. Tijchijtoc ma quisa cuali nochi tlamantli tlen quichihua huan tlahuel tijricojchijtoc. Yeca mitzhueyimati.
\v 11 Pero xijquixtili nochi tlen yajaya quipiya huan tiquitas intla ax mitztelchihuas moixpa.
\p
\v 12 Huajca TOTECO quiilhui Axcualtlacatl:
\p ―Nimitzmaca caquihuili xijchihua tlen ta tijnequis ica nochi tlen Job quipiya, pero ax tleno xijchihuili itlacayo.
\p Huajca nopa Axcualtlacatl quisqui iixpa TOTECO huan yajqui.
\p
\v 13 Huan se tonali quema nochi itelpocahua huan iichpocahua Job tlacuayayaj ipan ichaj iachtohui ejquetl, panoc se hueyi cuesoli.
\v 14 Huan ajsitihuetzico se tlayolmelajquetl ipan ichaj Job huan quiilhui:
\p ―Nochi mohuacaxhua tlapoxoniyayaj huan nopa burrojme tlacuajtinemiyayaj nopona ininnechca.
\v 15 Huan hualajque nopa sabeo tlacame huan quinichtejque. Quinhuicaque nochi nopa tlapiyalime huan quinmictijque nochi motlatequipanojcahua. Huan san na nimochololti para nimitzyolmelahuaqui.
\p
\v 16 Huan quema noja camatiyaya nopa tlacatl, ajsico seyoc tlayolmelajquetl huan quiilhui Job:
\p ―Ipan nopa lugar campa tiquinmocuitlahuiyayaj moborregojhua, huetzqui tlitl tlen Toteco Dios huan quintlati nochi nopa tlamocuitlahuiani huan nochi moborregojhua. San na nimochololti para nimitzyolmelajqui.
\p
\v 17 Huan quema noja camatiyaya ni tlacatl, ajsico seyoc tlayolmelajquetl huan quiilhui Job:
\p ―Hualajque eyi pamitl tlen caldeo soldados huan quinichtejque nochi mocamellos. Quinmictijque motlatequipanojcahua ica machete huan san na nimochololti para nimitzyolmelahuaqui.
\p
\v 18 Huan quema noja camatiyaya ni tlacatl, ajsico seyoc tlen quiilhui Job:
\p ―Motelpocahua huan moichpocahua ilhuichihuayayaj ipan ichaj mocone tlen achtohui ejquetl,
\v 19 huan hualajqui se ajacatl tlen tlahuel chicahuac tlen nopa huactoc tlali huan quitzohuitejqui nopa cali. Huan itzontzajca nopa cali huetzqui ipan moconehua huan nochi mijque. San na nimochololti para nimitzyolmelahuaqui.
\p
\v 20 Huajca Job moquetzqui huan quitzayanqui iyoyo huan quixinqui itzonteco para quinextis tlahuel mocuesohua. Huan motlancuaquetzqui huan quihueyichijqui Toteco.
\v 21 Huan teipa quiijto:
\p ―Nixolotic nitlacatqui ipan ni tlaltepactli huan nixolotl niyas quema nimiquis. TOTECO techmacatoya nochi tlen nijpixtoya. Huan ama yajaya techquixtilijtoc. Nijhueyichihua itoca TOTECO.
\p
\v 22 Ipan nochi ni tlamantli, Job ax quichijqui niyon se tlajtlacoli niyon ax quiteilhui TOTECO queja quichijtosquía se tlamantli ax cuali.
\c 2
\s Axcualtlacatl sampa quiyejyeco Job
\p
\v 1 Seyoc tonali quema ielhuicac ejcahua TOTECO\f 2:1 Xiquita Job
1:6.\f*  sampa hualajque para moixnextise iixpa, Axcualtlacatl
nojquiya hualajqui para moixnextis iixpa.
\v 2 Huan TOTECO quiilhui Axcualtlacatl:
\p ―¿Canque tihuala?
\p Huan Axcualtlacatl quiilhui:
\p ―Na ninejnentihuala tlen iixco tlaltepactli campa
nitlachixtiyohuiyaya nochi tlen panoyaya.
\p
\v 3 Huajca TOTECO quiilhui:
\p ―¿Tiquitztoc notlatequipanojca Job? Ipan nochi tlaltepactli
axaca seyoc queja ya. Axaca hueli quiteilhuis ica niyon se tlamantli
tlen ax cuali. Quichihua nochi tlen xitlahuac. Yajaya nechimacasi
huan nechtlepanita, huan mohuejcatlalía tlen nochi tlamantli tlen
ax cuali. Yajaya quisenhuiquilía quichihua tlen cuali yonque ta
tinechchihualti ma tijtlatzacuiltis quema ax tleno quichijtoya.
\p
\v 4 Huan Axcualtlacatl quiilhui:
\p ―Se tlacatl quichihuas miyac tlamantli para quimanahuis iyolis.
Mitzhueyitlalía san pampa tijmocuitlahuijtoc itlacayo.
\v 5 Pero intla nijmacas se cocolistli tlen chicahuac, yajaya
mitztelchihuas moixpa.
\p
\v 6 Huan TOTECO quiilhui Axcualtlacatl:
\p ―Cualtitoc, xijchihua ta tlen tijnequi ica itlacayo, pero amo
xijmicti.
\p
\v 7 Huajca Axcualtlacatl quisqui iixpa TOTECO huan quicoco Job tlen
itzonteco hasta iicxitla ica se sahua cocolistli tlen tlahuel fiero.
\v 8 Huajca Job mosehui ipan cuanextli huan quicuic se tepalcatl
para ica mohuahuanas.
\v 9 Huan hualajqui isihua huan quiilhui:
\p ―¿Noja timotemachía ipan Toteco Dios yonque tiquitztoc nochi
ya ni tlen mitzchihuilijtoc? ¡Xijtelchihua Toteco Dios para yajaya
ma mitzmicti!
\p
\v 10 Pero Job quiilhui:
\p ―Ticamatitoc queja se sihuatl tlen huihuitic. ¿Huelis tijselise
tlen cuali tlen Toteco Dios huan ax tijselise tlen ax cuali?
\p Huan ipan nochi ni tlamantli Job ax tlajtlacolchijqui, niyon ax
quitelchijqui Toteco Dios.
\s Ihuampoyohua Job quipaxalocoj
\p
\v 11 Huan Job quinpixtoya eyi ihuampoyohua, huan quema inijuanti
quicajque para Job quipantijtoya se hueyi tlaijiyohuilistli,
motlajtolmacaque para san sejco yase quiyoltlalitij huan
quiyolchicahuatij. Inijuanti inintoca eliyayaj: Elifaz tlen ehuayaya
Temán, Bildad tlen ehuayaya Súa, huan Zofar tlen ehuayaya Naamat.
\v 12 Huan ica huejca quitlachilijque Job, pero ax quiixmatque intla
eliyaya Job pampa tlahuel mopatlatoya itlachiyalis ica nopa
cocolistli. Huajca ihuampoyohua pejque chocaj huan quitzayanque
ininyoyo. Quimajcajque tlaltejpoctli ipan ajacatl huan motemilijque
tlali ipan inintzonteco para quinextise tlahuel mocuesohuaj.
\v 13 Teipa mosehuijque tlalchi ihuaya Job para chicome tonali huan
chicome yohuali. Huan niyon se tlen inijuanti ax quiilhui niyon se
tlajtoli pampa momacaque cuenta para tlahuel hueyi itlaijiyohuilis.
\c 3
\s Job quitelchijqui nopa tonali quema tlacatqui
\p
\v 1 Teipa Job quitelchijqui nopa tonali quema yajaya tlacatqui.
\v 2 Quiijto:
\p
\v 3 “Tlatelchihuali ma eli nopa tonali quema nitlacatqui huan nopa
yohuali quema tlayolmelajque para tlacajtoya se oquichpil.
\v 4 Más cuali ax panotosquía nopa tonali. Nochi tlacame ma
quiilcahuaca nopa tonali para nochipa. Huan Toteco Dios ma
quiixpolihuilti. Ma quiixtzacua nopa tonali ipan tzintlayohuilotl
para nochipa.
\v 5 Quena, ma Toteco Dios quitlali tzintlayohuilotl queja miquistli
ipan nopa tonali huan ma quiixtzacua se hueyi mixtli tlen tlahuel
yayahuic para ax quema panotosquía nopa tonali.
\v 6 Nipaquisquía intla hueli quiixpolojtosquía nopa tonali ipan
calendario, huan ma ax monextis ipan niyon se xihuitl o ipan niyon
se metztli.
\v 7 Más cuali eltosquía nopa yohuali intla niyon se conetl ax
tlacajtosquía. Más cuali intla ax oncatosquía paquilistli ipan
nopa tlayohua pampa tlacatqui se oquichpil.
\v 8 Tlacame tlen más quimatij tlatelchihuaj ma quitelchihuaca nopa
tonali. Ma quitelchihuaca nopa chicahuaque tlacame tlen motemacaj
para quiixitise nopa hueyi tlapiyali tlen temajmati tlen itoca
leviatán.
\v 9 Achi cuali intla tzintlayohuilijtosquía sitlalime ipan nopa
yohuali quema nitlacatqui. Más cuali intla nochi quichixtosquía
tlahuili nopa tonali, pero nopa tonali ax quema hualajtosquía.
Intla ax oncatosquía nopa tonali huan nopa tlahuili ax
tlahuijtosquía ica ijnaloc, ax nitlacajtosquía.
\v 10 ¿Para tlen Toteco Dios ax quitzajqui iijti nonana para ax
nitlacajtosquía? ¿Para tlen tinechcahuili ma nitlacati para ma
niquijiyohuis nochi ni tlen ama nechpano?
\p
\v 11 “¿Para tlen ax nimijqui iijtico nonana o quema san
niontlacajtoya?
\v 12 ¿Para tlen nopa tetlachicuenijquetl nechcahuili ma niitzto?
¿Para tlen nechchichiti nonana?
\v 13 Intla nimictosquía quema nitlacatqui, huajca amantzi
niitztosquía cuali. Niitztosquía nicochtoc huan nimosiyajcajtoc.
\v 14 Ama niitztosquía nimictoc ininhuaya tlanahuatiani huan
tetlalnamictiani tlen mochijchihuilijque inincaltlanahuatilhua tlen
ama ya tlaxolehuali.
\v 15 Niitztosquía ininhuaya tlayacanani tlen quipixque miyac oro
huan quipixtoyaj ininchaj temitoc ica plata.
\v 16 ¿Para tlen ax nechtlalpachojtosquíaj queja se conetl tlen
tlacatqui mictoc? Queja nopa ax niquitztosquía tlatlanextli.
\v 17 Tlacame tlen fiero ininyolis ayoc tecualancamacase nopona
campa mijcatzitzi huan nochi tlacame tlen siyajtoque mosiyajcahuase.
\v 18 Nopona tlen itztoyaj ipan tlatzactli ipan tlaltepactli
itztoque ica cuali pampa axaca se tetzajquetl para
quintlaijiyohuiltis.
\v 19 Itztoque san sejco tlen teicneltzitzi huan tlen tlapijpiyani.
Nopona tequipanohuani itztoque malacantoque tlen inintecohua.
\p
\v 20 “¿Para tlen Toteco Dios quinmaca tlahuili huan yolistli
tlacame queja na tlen titlaijiyohuíaj huan timocuesohuaj?
\v 21 ¿Para tlen titechcahuilía ma tiitztoca tojuanti tlen tlahuel
tijnequij timiquise huan miquistli ax ajsic? Huan tijtemohuaj
miquistli queja sequinoc quitemosquíaj tlacualistli o tomi, pero ax
hueli tijpantise.
\v 22 ¿Para tlen quinmaca yolistli tlacame tlen nelía yolpaquise
quema ajsis tonali para miquise huan quintlalpachose?
\v 23 ¿Para tlen Toteco Dios quicahuilía ma tlacati se tlacatl
huan teipa quitzacuas ipan se yolistli campa onca tlaijiyohuilistli
huan cuesoli?
\v 24 Ni tlacuajcualocayotl ax nechcahuilía ma nitlacua.
Nochoquilis motlalohua queja se atemitl.
\v 25 Nechajsitoc nopa tlamantli tlen nochipa niquimacasiyaya huan
tlen más nijmahuiliyaya.
\v 26 Ax nijpiya tlasehuilistli ipan noyolo. Noijti mojmolinía. Ax
hueli nimosiyajcahuas. San nijmati cuesoli.”
\c 4
\s Elifaz quiilhui Job san tlen ax cuajcualme tlaijiyohuíaj
\p
\v 1 Huajca Elifaz tlen ehuayaya Temán quiilhui Job:
\p
\v 2 “Xinechcahuili ma nicamatis se quentzi. Ax hueli san
nimitztlacaquilijtos huan ax nimitzilhuis niyon se tlajtoli.
\p
\v 3 “Xiquita, achtohuiya ta tiquintlalnamictiyaya miyac tlacame
tlen quipixque cuesoli para ma motemachica ipan Toteco Dios.
Nojquiya tiquinyolchicajqui tlen ax quipixque fuerza.
\v 4 Tiquinyolchicajqui tlen huetztoyaj ipan tlajtlacoli huan tlen
quinyoltilanayaya tlen ax cuali.
\v 5 Pero ama, ta moselti timocuesohua huan timotzinquixtía ipampa
ni tlaijiyohuilistli tlen mitzajsitoc.
\v 6 ¿Para tlen ax timotemachis más ipan Toteco Dios ipan ni
tlaijiyohuilistli? Tijmati Toteco Dios quinmocuitlahuía tlacame
tlen xitlahuaque.
\p
\v 7 “Ximoyolilhui tlen ya ni: Toteco Dios ax quitlatzacuiltía
huan ax quitzontlamiltía niyon se tlacatl tlen xitlahuac huan tlen
ax tleno quichijtoc.
\v 8 Queja na niquitztoc, tlacame tlen quichihuaj tlen fiero,
inijuanti quiselíaj tlen fiero.
\v 9 Pampa quema Toteco Dios cualanis, yajaya quintzontlamiltía ica
iijiyo.
\v 10 Nimantzi ajsi icualancayo huan ayoc itztoque nopa tlacame.
Yonque nopa fiero tlacame cualanisquíaj o mosisinisquíaj queja
huejhueyi tecuanime, Toteco Dios quintzacuas inincamac huan
quintzontlamiltis.
\v 11 Yonque inijuanti quipiyaj chicahualistli, miquise ica mayantli
huan ininconehua motlamisemanase.
\p
\v 12 “Se nechmacac ni tlamachtili ixtacatzi. Elqui queja se
nechixtacailhui ipan nonacas.
\v 13 Niquitac se tlanextili se tlayohua quema nochi tlacame
cochtoyaj.
\v 14 Ipan se tlalochtli nechitzqui majmajtli huan pejqui
nihuihuipica hasta mojmoliniyaya noomiyohua.
\v 15 Se ajacatl panoc noixtla, huan moquejquetzqui notzoyo ipan
nochi notlacayo.
\v 16 Teipa nijmachili para nopa ajacatl moquetzqui nonechca huan
huejcajqui, pero ax huelqui niquitac. Teipa nijcajqui itos tlen
nechixtacailhui:
\v 17 ‘¿Huelis se tlacatl itztoc xitlahuac iixpa Toteco Dios?
¿Huelis elis tlapajpactic iixpa yajaya tlen quichijchijqui?
\p
\v 18 “ ‘Xiquita, intla Toteco Dios ax hueli motemachía ipan
ielhuicac ejcahua huan quinteilhui ielhuicac ejcahua tlen
tlajtlacolchijtoque, quejatza huelis motemachis ipan tlacame tlen
tlachijchihuali san ica soquitl.
\v 19 Ax hueli niyon quentzi motemachis ipan tojuanti tlen tijpiyaj
totlatzinpehualtil ipan tlaltejpoctli huan ax ohui para yajaya
moquejquetzas topani huan techmictis queja tipapalome.
\v 20 Tlacame itztoque ipan ni tlaltepactli san se tlalochtli. Eltoc
queja ica ijnaloc yoltoque huan ica tiotlac miquij. Huan sequinoc
nimantzi quinilcahuaj. Polijtoque para nochipa.
\v 21 Yonque yejyectzi se tlacatl, tlami iyolis huan axaca mocuesos
ipampa ya. San miquij huan aya quipantijtoque tlalnamiquistli.’
\c 5
\p
\v 1 “Job, xijtzajtzili se ma mitzpalehuis intla tijnequi, pero
axaca mitznanquilis. Huelis tiquinnotzas ielhuicac ejcahua Toteco
Dios tlen tlatzejtzeloltique, pero ax mitzpalehuise.
\v 2 Se tlen huihuitic queja ta miqui pampa cualani huan pampa
quiixtoca tlen sequinoc quipiyaj.
\v 3 Niquinitztoc tlen huihuitique quema tlatlanij para se
tlalochtli, pero teipa quicahuaj Toteco Dios huan nimantzi huala
tlatzacuiltili huan quipolohuaj nochi.
\v 4 Mahuilili para ininconehua. Quincualancaitaj ipan tequicali
quema moquetzaj iixpa se juez, huan axaca quinmanahuía.
\v 5 Tlen quipiya se tlacatl tlen huihuitic ipan imila
quiichtequilíaj tlacame tlen mayancamictinemij yonque quipantíaj
huitzijtic. Huan nochi itomi sequinoc quiixtocaj huan quicuilíaj.
\v 6 Tlaohuijcayotl huan cuesoli ax moscaltíaj ininseltitzi queja
huitztli moscaltía ipan tlali, tlacame mohualiquilíaj cuesoli
ininpani.
\v 7 Tlacame quipantíaj tlaijiyohuilistli tlen quema tlacatij.
Temachtli techajsis cuesoli queja se tlipisili tlen quisa campa
tlitl temachtli patlanis ajacatipa.
\p
\v 8 “Huajca Job, nimitzilhuía: Xijtemo Toteco Dios huan xiquilhui
motlajtlacolhua.
\v 9 Pampa Toteco quichihua huejhueyi tlamantli tlen axaca huelis
quimachilis. Quinchihua tlahuel miyac tlanextili hasta axaca huelis
quinpohuas.
\v 10 Quichihua ma huetzi atl ipan tlaltepactli para quiatequis
nochi mili huan nochi cuatitlamitl.
\v 11 Yajaya quinhueyitlalía tlacame tlen moechcapanohuaj iixpa
huan quinmatilana tlen mocuesohuaj.
\v 12 Quincuapolohua inintlalnamiquilis tlacajcayahuani para ax
hueli quichihuase tlen fiero moyolilhuijtoque quichihuase.
\v 13 Toteco Dios quinchihua ma huetzica tlacame tlen mohueyimatij
ipan nopa tlaquetztli tlen san inijuanti quichijtoque. Ica tlen
moitaj para tlahuel tlalnamiquini, quinmasiltía ipan nopa tlamantli
fiero tlen quisencajtoque para quichihuase.
\v 14 Tonaya motepotlamíaj tlacajcayahuani queja elisquíaj
popoyotzitzi. Huan yonque tlajcotona, ax hueli tlachiyaj. Para
tlacajcayahuani tlajcotona eltoc queja elisquía tzintlayohua.
\p
\v 15 “Toteco Dios quinmanahuía tlen teicneltzitzi tlen tlacame
tlen quipiyaj chicahualistli. Quinquixtía ininmaco fiero tlacame
tlen tetlaijiyohuiltíaj.
\v 16 Huajca tlen teicneltzitzi hueli mochiyase ipan ya pampa Toteco
quincamatzacuas fiero tlacame tlen quinequij quintlamiltise.
\p
\v 17 “Pero se tlacatl tlen Toteco Dios quixitlahua quipiya hueyi
paquilistli. Huajca quema titlajtlacolchijtoc, amo ximocueso intla
mitztlatzacuiltis Toteco Tlen Quipiya Nochi Chicahualistli.
\v 18 Yonque yajaya mitzcocos, teipa mitzpajtis huan mitzchicahuas.
\v 19 Huan yajaya mitzmanahuis miyacapa para niyon se tlamantli tlen
ax cuali ax hueli mitzajsis.
\v 20 Ipan nopa tonali quema oncas mayantli, yajaya mitzmanahuis
para ax timayancamiquis. Ipan tlatehuijcayotl mitzmanahuis para ax
mitzcocos machete.
\v 21 Toteco mitzmanahuis tlen mitzistlacahuíaj. Huan ax monequi
xiquimacasis tlen panos teipa quema hualase tlen tlaxolehuase.
\v 22 Quema oncas mayantli huan tlaxolehualistli, ta san
tiquinhuetzquilis. Huan niyon se tecuani ax tiquimacasis.
\v 23 Nopa tetini ayoc mitztzacuilise quema titequitis ipan momila.
Huan nopa tecuanime tlen nemij cuatitla ayoc mitzcuatotonise.
\v 24 Mofamilia itztos temachtli huan ax timocuesos ininpampa
inijuanti quema huejca tinemis. Quema tiquinpaxalos motlapiyalhua,
niyon se ax mitztlaxtequilijtos.
\v 25 Tiquinpiyas miyac moconehua, huan moixhuihua
momiyaquilijtiyase queja xihuitl.
\v 26 Tiitztos miyac xihuitl huan noja tijpiyas chicahualistli quema
timiquis. Ax quipixcaj trigo quema aya ipohual, huan ta ax timiquis
quema aya tihuehuentzi.
\p
\v 27 “Nochi ya ni nimoyolilhuijtoc ica cuidado huan nijmati para
melahuac. Huajca xijtlacaquili, huan xijchihua tlen quinamiqui huan
mitzpalehuis miyac.”
\c 6
\s Job quinanquili Elifaz queja yajaya eliyaya nelxitlahuac
\p
\v 1 Huajca Job quiilhui:
\p
\v 2 “Cuali elisquía intla se quiyejyecojsquíaj nochi
notlaijiyohuilis ipan balanza para quiitase quesqui
niquijiyohuijtoc.
\v 3 Notlaijiyohuilis eltoc más etic que nopa xali tlen onca campa
atentli. Yeca nimantzi nicamatitoc chicahuac.
\v 4 Toteco Tlen Quipiya Nochi Chicahualistli nechmaquilijtoc ica
cuatlamintli. Eltoc queja itencococa nopa cuatlamintli ajsitoc ipan
noyolo huan ipan nochi notlacayo. Eltoc queja Toteco Dios
nechtehuía ica nochi ni hueyi tlaijiyohuilistli tlen nechajsitoc.
\v 5 Quinamiqui para na nijnextis nocuesol. Tzajtzi se burro intla
ax quipiya tlacualistli. Tzajtzi se huacax quema ax quipanti sacatl
para quicuas.
\v 6 Tlaijilnamiqui se tlacatl intla se tlacualistli ax cuali poyec.
Nochi cualanisquíaj intla monequisquía quicuase iistaca se
tecsistli pampa ax quipiya iajhuiyaca, san asejsec.
\v 7 Quema nijtlachilía iistaca se tecsistli, nimantzi nijmati ayoc
nimayana huan pehua nimisotlasnequi. Huan ama nocuesol eltoc noja
más fiero.
\p
\v 8 “Cuali elisquía intla Toteco Dios nechmacasquía tlen
nijnequi huan tlen nijchiya.
\v 9 Quena, cuali elisquía intla nechmictisquía para ayoc
nitlaijiyohuijtos imaco.
\v 10 Queja nopa noja nijpiyasquía ni paquilistli: Ax
nijtlailhuijtoc itlajtol Toteco Dios tlen Tlatzejtzeloltic yonque
nijpanotoc nochi ni tlacuajcualocayotl tlen ax nechcahua.
\v 11 Ayoc nihueli niquijiyohuis ni cocolistli pampa ax tleno tlen
cuali nijchiya. ¿Quejatza huelis niquijiyohuis hasta nimiquis?
\v 12 ¿Huelis nijpiya tetili queja se tetl? ¿O huelis nonacayo
mochijtoc ica nopa tepostli bronce?
\v 13 ¡Axtle! Ayoc nijpiya chicahualistli para nimopalehuis. Ayoc
tleno hueli nijchihuas para quisas cuali.
\p
\v 14 “Quinamiqui para se tlacatl quiicnelis ihuampo tlen itztoc
ipan tlaijiyohuilistli, pero ta tlahuel tinechtlateilhuijtoc. Niyon
ax tiquimacastoc Toteco Tlen Quipiya Nochi Chicahualistli.
\v 15 Pero tinoicni, timonextijtoc para ax titemachtli. Tiitztoc
queja se atlajtli tlen temi ica atl quema tlasejseltía cuatini,
\v 16 pampa temitoc ica setl huan sitlal setl tlen ya atiya.
\v 17 Pero ipan nopa tonali quema tlahuel tlatotoniya, nopa atlajtli
ayoc quipiyas atl huan nimantzi huaquis.
\v 18 Miyac tlacame tlen nemij san sejco ica inintlapiyalhua panoj
nopona nechca nopa atlajtli. Quicahuaj iniojhui huan yahuij para
moseseltisquíaj, pero ax quipantíaj atl para atlise. San miquij
ica amiquistli ipan nopa huactoc tlali.
\v 19 Quema hualahuij nopa miyac paxalohuani tlen sentic nemij tlen
tlali Temán huan Sabá huan moquetzaj nopona para atlise,
\v 20 quinechcahuíaj nopa atlajtli huan mopinahuaj pampa ax
quipantijque tlen tlahuel quichiyayayaj. San quipantíaj tlen
huactoc.
\v 21 Huan queja nopa nojquiya ta tiitztoc ica na. Ax
tinechpalehuijtoc queja nijchiyayaya. San tiquitztoc nococolis huan
timohuejcatlalijtoc tlen na.
\v 22 ¿Para tlen? ¿Huelis nimitztlajtlani ma tinechchihuili se
favor? ¿Huelis nimitztlajtlani se regalo tlen tomi? ¡Axtle! ¡Ax
quema nijchijtoc!
\v 23 Ax quema nimitztlajtlani se tlapalehuili para tinechmanahuis
tlen nocualancaitacahua o para tinechmanahuis ininmaco tlaxtequini.
\p
\v 24 “San nijnequi xinechnanquili xitlahuac huan teipa na ayoc
nimolinis. Xinechilhui tlaque ax cuali nijchijtoc.
\v 25 Yonque tlajtoli tlen melahuac achtohui tecocohua, teipa
tepalehuía. Pero ta motlajtol ax quiijtohua tlen melahuac.
\v 26 ¿Huelis tinechijilnamiquis san pampa nitzajtzic chicahuac
ipampa notlaijiyohuilis?
\v 27 Eltoc queja tijtlaijiyohuiltisquía se conetl tlen icnotzi, o
queja tijcajcayahuasquía huan tijnamacasquía se mohuampo.
\v 28 ¡Xinechtlachili! ¿Huelis timoilhuía quinamiqui
nimitzistlacahuis moixpa?
\v 29 Amo xijchihua tlen ax cuali. Amo xiquijto para nijhuica
tlajtlacoli. Ximomaca cuenta para nise tlacatl tlen nixitlahuac.
\v 30 ¿Inmoilhuíaj niistlacati? ¿Huelis inmoilhuíaj ax
niquixmati tlen cuali huan tlen ax cuali? Intla
nitlajtlacolchijtosquía, ¿huelis ax nimomacasquía cuenta?
\c 7
\s Job quinejqui miquis para ayoc tlaijiyohuis
\p
\v 1 “Tlahuel ohui iyolis se tlacatl ipan ni tlaltepactli. Quipano
miyac tlaohuijcayotl. Quipiya iyolis tlen ohui queja iyolis se tlen
tlatequipanohua chicahuac mojmostla.
\v 2 Niitztoc queja se tetequipanojquetl tlen tlahuel quinequi ma
ajsi hora para mosiyajcahuas o tlahuel quinequi nimantzi ma tlami
nopa tonal tlen tequitl huan quiselis itlaxtlahuil.
\v 3 Queja nopa nojquiya na nitlaijiyohuijtoc miyac metztli quema ax
tleno oncayaya temachtli. Huan sesen yohuali nijpanotoc miyac
tlacuajcualocayotl.
\v 4 Quema nimoteca, nimoilhuía: Cuali elisquía para nimantzi
tlanesisquía. Sesen yohuali nijmachilía nelhueyi. Huan san
nimocuejcuepa ajachica ipan notlapech pampa tlahuel nicuati. Huan
queja nopa nijchihua hasta tlanesi.
\v 5 Nochi nocuetlaxo ocuilojtoc huan yayahuic. Nococohua ajachica
tzayanij huan temalquisaj.
\p
\v 6 “Noyolis nimantzi tlantiya. Mojmostla moisihuiltía para
monechcahuis nopa tonal quema nimiquis. Ayoc nimochiya para
nimochicahuas.
\p
\v 7 “Toteco Dios, xiquilnamiqui para noyolis eltoc queja se
ijiyotl tlen panotehua. Ax quema sampa niquitas tlen cuali. Ayoc
quema nijpiyas paquilistli.
\v 8 Huan yonque amantzi tinechtlachilijtoc, ica se quentzi tonali
tinechitas nimictoc.
\v 9 Pampa queja se mixtli tlen ica se tlalochtli ixpolihui huan
ayoc nesi, queja nopa nojquiya ixpolihui para nochipa se tlen miqui
huan yahui campa mijcatzitzi. Ayoc quema mocuepa nica.
\v 10 Ayoc quema mocuepas ichaj, niyon ichaj ehuani ayoc quema
quiitase pampa ayoc quema monextis.
\p
\v 11 “Huajca monequi ama nijsenhuiquilis nicamatis tlen
notlaijiyohuilis pampa tlahuel hueyi ni tlacuajcualocayotl.
\v 12 ¡NoTeco Dios! ¿Huelis tinechita para na nieli se hueyi atl
tlen quichihua san tlen quinequi? ¿O huelis tinechita para nieli
nopa hueyi tlapiyali tlen temajmati ipan hueyi atl huan yeca
tinechtzacua?
\v 13 Ica tlayohua quema nimoteca ipan notlapech para nicochis,
nijchihua campeca para niquilcahuas notlaijiyohuilis,
\v 14 pero ta tinechmajmatía ica temictli tlen temajmati.
\v 15 Más cuali tinechilpisquía noquechtla para ayoc
nitlaijiyohuijtos huan queja nopa nimiquis.
\v 16 Nelía niquijiya noyolis pampa ax tleno ipati. Huajca NoTeco
Dios, xinechcahuili ma nijpiya tlasehuilistli ni se ome tonali tlen
noja polihui para niitztos.
\p
\v 17 “¿Tlaque ipati se tlacatl para timocuatotonis huan
timocuesos miyac ipampa ya?
\v 18 ¿Para tlen tijpaxalohua mojmostla ica ijnaloc? ¿Para tlen
tijyejyecohua ajachica?
\v 19 ¿Para tlen tlahuel tinechcuatotonía huan ax tinechcahuilía
se tlalochtli yonque san para nijtolos nochajcha?
\v 20 Intla nitlajtlacolchijtoc, ¿tlaque nimitzchihuilijtoc, ta
tlen tiquinsentlachilía nochi tlacame? ¿Para tlen tinechmelac
itztoc na ica mocuatlamin? ¿Noyolis eltoc se tlamamali tlen tlahuel
etic para ta?
\v 21 ¿Para tlen ax tinechtlapojpolhuía notlajtlacolhua huan
xiquixpolo nochi tlen nijchijtoc? Pampa nechcatitoc para nimiquis
huan nimotecas ipan tlaltejpoctli, huan quema tinechtemos, ayoc
tinechpantis.”
\c 8
\s Bildad quiilhui Job para ax neli motemachía ipan Toteco Dios
\p
\v 1 Bildad, tlen ehua ipan Súa, quiilhui Job:
\p
\v 2 “¿Job, hasta quema tijcahuas ticamatis? Motlajtol eltoc queja
se ajacatl tlen chicahuac huala.
\v 3 Tijmati para Toteco Tlen Quipiya Nochi Chicahualistli ax
quiilacatzohua tlen xitlahuac huan melahuac quema
tlatlajtolsencahua.
\v 4 Temachtli moconehua tlajtlacolchijque ica ya huan yeca
quintlatzacuilti queja quinamiqui.
\v 5 Pero intla ta tijtemos Toteco Tlen Quipiya Nochi Chicahualistli
huan timomaijtos ica ya, mitztlacaquilis.
\v 6 Intla tiitztos senquistoc cuali huan tijchihua san tlen
xitlahuac, yajaya temachtli mitznanquilis quema timomaijtos. Yajaya
mitztiochihuas miyac huan mitzmacas paquilistli ipan mochaj.
\v 7 Huan nochi tlen tijpiyayaya achtohuiya timomacas cuenta para
eliyaya pilquentzi, pampa teipa tijpiyas más miyac.
\p
\v 8 “Ximoyolilhui tlen nochi tlen panotoc hasta huejcajquiya huan
xijtlachili tlaque tlamantli quinpanti nopa tlacame.
\v 9 Xijtlachili pampa tojuanti sanoc yalohua titlacatque huan
pilquentzi tijmatij. Huan toyolis ipan ni tlaltepactli san
huejcahuas queja se ecahuilotl.
\v 10 Inijuanti tlen achtohuiya itztoyaj mitzmachtise miyac
tlamantli huan mitztlalnamictise ica tlajtoli tlen temachtli.
\p
\v 11 “Nochi tlen quiilcahuaj Toteco Dios, ayoc tleno hueli
quichiyase. Itztoque queja acatl tlen ax quipiya tlali campa
inelhuayo, o queja se xihuitl tlen ax quipiya atl para xoxohuixtos.
\v 12 Nimantzi pehua pilini huan huaqui quema noja aya
quintzontequij.
\v 13 Queja nopa pano ica tlen quiilcahua Toteco Dios. Se tlacatl
tlen ax quineltoca Toteco eltoc queja motemachía ipan se
tocatzahuali.
\v 14 Pero nochi nopa tlamantli tlen yajaya ipan motemachía,
huetzis hasta tlalchi.
\v 15 Huan queja nopa nojquiya itztoc se tlacatl tlen motemachía
ipan ichaj. Mocajcayahua pampa nopa cali ax moquetztos para nochipa.
Nimantzi tlamis.
\v 16 Nojquiya nopa tlacatl itztoc queja se cuahuitl tlen xoxohuic
tlen ica ijnaloc monextía para tlahuel quipiya chicahualistli huan
tetic. Huan imacuayohua yahuij campa hueli ipan nopa xochi mili.
\v 17 Inelhuayohua motlatzquilía campa onca miyac atl inintzala
tetini.
\v 18 Pero quema se acajya quihuihuitla, tlami ixpolihui. Ayoc aca
quipantis campa eltoya pampa ya tlanqui.
\v 19 Ayoc hueli tijchiyas itlajca nopa cuahuitl, huan seyoc
cuahuitl ixhuas campa eltoya.
\p
\v 20 “Pero xiquita. Toteco Dios ax quihuejcamajcahua se tlacatl
tlen xitlahuac, niyon ax quipalehuía tlen tlajtlacolchihua.
\v 21 Toteco Dios noja mitzchihuilis xihuetzca huan xitzajtzi ica
paquilistli.
\v 22 Huan nochi mocualancaitacahua mopinahualtise. Huan Toteco
quintzontlamiltis nochi tlajtlacolchihuani.”
\c 9
\s Job quiijto axaca huelis momanahuis iixpa Toteco
\p
\v 1 Job quiilhui Bildad:
\p
\v 2 “Na nijmati para melahuac Toteco ax quihuejcamajcahua tlen
xitlahuac. Pero ¿quejatza huelis se tlacatl mochihuas xitlahuac
iixpa Toteco Dios?
\v 3 Intla se tlacatl quinequisquía monajnanquilis ihuaya Toteco,
ax hueli quinanquilis se huelta ipan se mil itlajtlanijcahua.
\v 4 Pampa Toteco Dios tlahuel tlalnamiqui huan tlahuel quipiya
chicahualistli. ¿Ajqueya motehuijqui ihuaya huan tlatlanqui?
\p
\v 5 “Ica ihueyi cualancayo Toteco quinijcuenía tepeme.
Quinixcuepa ipan se tlalochtli quema axaca momaca cuenta.
\v 6 Quicocoxonía ni tlaltepactli hasta campa itzinpehualtil.
Quichihua ma tlahuel mojmolinica itlaquetzalhua.
\v 7 Intla Toteco quimaca tlanahuatili, tonati ax tlahuis, huan
sitlalime ax tlahuise.
\v 8 Toteco iselti quipatlajqui elhuicactli. Yajaya nejnemi ipan
hueyi atl tlen mocoxonijtihuala.
\v 9 Toteco quinchijchijqui nochi sitlalime hasta inijuanti tlen
nejnemij motzquitoque huan inintoca Osa Mayor, Orión huan nopa
Pléyades. Nojquiya quinchijchijqui nopa miyac sitlalime tlen
motzquitoque san sejco ica tlani ipan elhuicactli.
\v 10 Toteco quichihua huejhueyi tlamantli tlen axaca huelis
quimachilis. Quichihua tlahuel miyac chicahualis nescayotl hasta
axaca huelis quipohuas.
\p
\v 11 “Pero quema yajaya pano noixpa, ax niquita. Quema yajaya
nentinemi nonechca, ax nijmachilía.
\v 12 Quema Toteco quititlani miquistli para quiitzquis se tlacatl,
¿ajqueya hueli quitzacuilis para ma ax quichihua? O ¿ajqueya
mosemacas para quitlajtlanis: ‘¿Tlaque tijchihua?’
\v 13 Toteco Dios ax quitzacuilía icualancayo. Iixpa ya
moechcapanose nochi tlen mohueyimatij.
\p
\v 14 “Huajca ¿ajqueya na para nimonajnanquilis ihuaya Toteco Tlen
Quipiya Nochi Chicahualistli? ¿Ica tlaque tlajtoli huelis
nimomanahuis iixpa?
\v 15 Yonque ax tleno nijchijtoc, ax hueli nimomanahuis ica miyac
tlajtoli. San nijtlajtlanisquía ma nechtlasojtla huan ma quipiya
hueyi iyolo ica na, pampa yajaya Juez.
\v 16 Yonque nijnojnotzasquía huan yajaya nechnanquilisquía, ax
nijneltoca para nelía nechtlacaquilisquía.
\v 17 Yajaya quimiyaquilisquía notlaijiyohuilis huan
nechtzontlamiltisquía, yonque ax tleno nijchijtoc.
\v 18 Yajaya ax nechcahuilía ma nitlaijiyotilana. San onpano
nechtlaijiyohuiltía.
\v 19 Intla ticamati tlen tetili, Toteco Dios tlen más quipiya
fuerza. Intla ticamatisquía tlen ajqueya más xitlahuac, yajaya
tlatlanis. Axaca hueli quiteilhuis ica niyon se tlamantli.
\v 20 Yonque na niquijtosquía ax nijhuica tlajtlacoli, ica nocamac
nimoteilhuisquía. Huan yonque niquijtosquía para axaca huelis
nechteilhuis, Toteco Dios nechilhuisquía para senquistoc
nitlajtlacolchijquetl.
\p
\v 21 “Yonque ax tleno nijchijtoc, niquita para ax tleno ipati.
¡Niquijiya noyolis!
\v 22 Toteco quinita tlen xitlahuaque huan tlen tlajtlacolchihuaj
queja san se. Yeca niquijtohua para san se quintzontlamiltía tlen
cuali huan tlen ax cuali.
\v 23 Quema huala se fiero cocolistli ipan tlacame tlen ax tleno
quichijtoque, yajaya san huetzca.
\v 24 Quema se tlali huetzi ininmaco tlacame tlen mosisiníaj,
Toteco Dios quinixtzacua nopa tetlajtolsencahuani huan quincahua ma
quichihuaca tlen ax xitlahuac. Intla ax Toteco Dios tlen quincahua
ma quichihuaca tlen ax xitlahuac, huajca, ¿ajqueya quichihua?
\p
\v 25 “Noyolis panoti chicahuac queja se motlalojquetl. Quena,
nimantzi pano huan ax niquita se tlalochtli tlen paquilistli.
\v 26 Queja se pilcuaacaltzi yahui chicahuac ipan atl huan se
cuajtli chicahuac patlani para quiitzquis se piyo, queja nopa
nojquiya nimantzi panoti noyolis.
\v 27 Yonque nijchihuilía fuerza para niquilcahuas notlaijiyohuilis
huan nijcahuasquía nocuesol huan nijchihuasquía para niyolpactos,
ax nechpalehuisquía.
\p
\v 28 “Ta Toteco, noja más tlaijiyohuilistli tinechtitlanisquía,
pampa nijmati ta, tiToteco Dios, tinechita para ax nixitlahuac
moixpa.
\v 29 Yonque nijchihua tlen cuali o tlen ax cuali, ta temachtli
tinechtlatzacuiltis. Huajca ¿para tlen nijchihuas campeca?
\v 30 Yonque nimaltisquía ica atl huan nimomajtequisquía ica nopa
xapo tlen más tlapajpaca,
\v 31 ta tinechcalaquisquía ipan se soqui ostotl huan
tinechchihuilisquía nelía nisoquiyo hasta noyoyo nojquiya
nechijiyasquía.
\p
\v 32 “Toteco ax ya se tlacatl queja na para huelis
nimonajnanquilis ihuaya. Ax hueli nijhuicas iixpa se juez para
nijteilhuis.
\v 33 Nipaquisquía intla itztoya se tlen hueli motlajcoquetzas
tlatlajco na huan Toteco Dios para techyoltlalisquía, pero axaca.
\v 34 Intla itztosquía se tlen motlajcoquetza, quichihuasquía para
Toteco Dios ma ayoc nechtlaijiyohuiltisquía, huan ayoc
niquimacasisquía itlatzacuiltilis.
\v 35 Huajca nihuelisquía nijcamahuisquía Toteco huan ax
niquimacasisquía. Pero ax hueli nijchihuas san ica na
nochicahualis.
\c 10
\p
\v 1 “Ya nicuesijqui niitztoc. Yeca nijnequi xinechcahuilica para
nicamatis. Niitztoc ipan tlacuajcualocayotl huan ipan hueyi cuesoli.
\v 2 Huan niquilhuisquía Toteco Dios: ‘Amo xinechtlatzacuilti san
pampa tijnequi. Más cuali xinechilhui para tlen
tinechtlatzacuiltía.
\v 3 ¿Huelis tiquita cuali para tinechtlaijiyohuiltis huan
tinechcualancaitas na tlen tinechchijchijqui ica moma? ¿Para tlen
tiquinpaquilismaca fiero tlacame huan tiquinpalehuía ma quisaca
cuali?
\v 4 ¿Huelis tiquita tlamantli san queja tojuanti titlacame
tiquitaj?
\v 5 ¿Huelis moyolis nojquiya ax huejcahua queja toyolis?
\v 6 ¿Huelis yeca tijtemohua tlaixpanoli huan tlajtlacoli yonque
tijmati ax tleno nijchijtoc?
\v 7 ¿Huelis tinechtlatzacuiltía quema ax tleno nijchijtoc pampa
tijmati para axaca hueli nechmanahuis momaco?
\p
\v 8 “ ‘Ta tinechchijchijqui ica moma, pero ama timoyolpatlatoc
huan tinechtzontlamiltía.
\v 9 Xiquilnamiqui para ta tinechchijchijqui ica soquitl, huan ¿ama
sampa techchihuas ma nimocuepas tlaltejpoctli?
\v 10 Tlen ipejya noyolis ta tiitztoya nopona
tinechcualchijchihuayaya iijtico nonana.
\v 11 Ta tinechpijqui ica nocuetlaxo huan ica nonacayo.
Tiquinmotzquilti noomiyohua huan notlalohua.
\v 12 Ta tinechmacac yolistli huan tlahuel tinechicnelijtoc. Pampa
ta tinechmocuitlahuijtoc, yeca niyoltoc.
\p
\v 13 “ ‘Pero nijmati para nochipa ta tinechtlachilijtoc ixtacatzi
para tiquitas intla nitlajtlacolchihuas,
\v 14 para huelis tinechtlatzacuiltis huan ax tinechtlapojpolhuis
notlajtlacolhua.
\v 15 Huan teicnelti na intla nitlajtlacolchijtoc. Huan intla ax
tleno nijchijtoc, ax tleno ipati. ¡Ax tinechpalehuía! San tlahuel
nimopinahualtijtoc huan nitlaijiyohuijtoc.
\v 16 Huan intla nijchihuasquía campeca para nimotlalanas, ta
tihuitonisquía ipan na queja se hueyi tecuani huan tinechnextilis
mohueyi chicahualis para tinechcocos.
\v 17 Eltoc queja ajachica tiquinhualica más testigos para
tinechteilhuis huan para más tinechnextilis mohueyi cualancayo.
Eltoc queja tinechtitlanilía más soldados ajachica para
tinechtlaijiyohuiltis.
\p
\v 18 “ ‘¿Huajca para tlen tinechquixti iijtico nonana? Más cuali
nimictosquía quema san niontlacatqui huan axaca nechitztosquía.
\v 19 Queja nopa ax quema niitztosquía, niyon ax nijpanosquía ni
tlaijiyohuilistli. Más cuali san nionpanotosquía tlen iijti nonana
hasta campa nechtlalpachojtosquíaj.
\v 20 Ama san pilquentzi tonali mocahua para noja niitztos, huajca
xinechtlalcahui para nimoyoltlalis se quentzi.
\v 21 Nimantzi niyas ipan nopa tlali tlen miquistli campa onca
tzintlayohuilotl huan ayoc quema nimocuepas.
\v 22 Ipan nopa tlali onca se tzintlayohuilotl tlen más yayahuic
huan axaca quimati tlaque quichihuas. Nopona tlen inijuanti quiitaj
para tlatlanextli eltoc senquistoc tlayohuilotl nojquiya.’ ”
\c 11
\s Zofar quiilhui Job para Toteco quiita nochi tlaixpanoli
\p
\v 1 Zofar, tlen ehua Naamat, quiilhui Job:
\p
\v 2 “Monequi na nimitznanquilis ica nochi tlen tiquijtojtoc huan
nimitzquetzas. ¿Huelis itlajtol se tlacatl tlen camati miyac
quinextía para más quimati?
\v 3 Ax tleno huelis niquijtos quema ta ticamati tlahuel miyac.
Monequi para se acajya mitzpinahualtis pampa tijpinajtía Toteco
Dios.
\v 4 Ta tiquijtojtoc para motlamachtil nelxitlahuac huan para
timoilhuía tiitztoc xitlahuac iixpa Toteco.
\v 5 Cuali elisquía intla Toteco Dios camatisquía huan
mitzilhuisquía nochi tlen yajaya moilhuía ica ta.
\v 6 Cuali elisquía intla mitzchihuasquía titlalnamictoc pampa san
yajaya quimachilía sesen tlamantli ixtacatzi tlen tlalnamiquistli.
Tlahuel ohui para se tlacatl quipiyas tlalnamiquistli. Xijtlacaquili
ni: Toteco Dios mitztlatzacuiltijtoc nelpilquentzi huan ax queja
quinamiqui ipampa motlajtlacolhua.
\p
\v 7 “¿Tiquixmati nochi tlen ixtacatzi tlen Toteco? ¿Tijmachilía
nochi iyajatil Toteco Tlen Quipiya Nochi Chicahualistli huan hasta
canque ontlami tlen yajaya hueli quichihua? ¡Ax ta tijmati!
\v 8 Eltoc onpano hueyi nochi tlen ixtacatzi tlen Toteco huan
itlamatilis. Eltoc nelhuejcapa queja elhuicactli. Pero ¿ajqueya ta
para tijmachilis nochi tlen itlalnamiquilis? Itlalnamiquilis Toteco
eltoc tlahuel iyoca tlen nochi sequinoc tlalnamiquistli. Nojquiya
itlalnamiquilis Toteco yahui tlahuel huejcatla hasta campa más
tlatzintla. Ax tleno huelis tijmachilis queja yajaya tlamachilía.
\v 9 Huan itlalnamiquilis eltoc más hueyi que ni tlaltepactli huan
más patlahuac que hueyi atl.
\v 10 Intla Toteco Dios huala para quitzacuas se acajya ipan
tlatzactli o intla quinotzas se tlacatl iixpa se juez para
quiteilhuis, ta ax tihuelis tijtzacuilis para ma ax quichihua.
\v 11 Yajaya quinyolixmati tlen tlacajcayahuaj. Quiita nochi
tlajtlacoli huan sesen quichihuilía cuenta.
\v 12 Se huihui tlacatl ax hueli mochihuas se tlalnamijquetl, niyon
hueli se burro quitlacatiltis se tlacatl.
\p
\v 13 “Xijnextili Toteco Dios tlen eltoc ipan moyolo. Xijxitlahua
moma iixpa huan ximomaijto ica ya.
\v 14 Xijcahua nochi motlajtlacolhua huan ximoquixtili nochi
tlamantli tlen ax cuali ipan moyolo.
\v 15 Huajca quena, tiixhuetzcas pampa tiitztos cuali iixpa Toteco
huan ayoc tijmahuilis. Tijpiyas fuerza iixpa huan ayoc timopinahuas.
Ayoc tijpiyas niyon se motlajtlacol tlen mitzsoquihuisquía iixpa.
\v 16 Queja nopa tiquilcahuas nochi motlaijiyohuilis. Huan intla
tiquilnamiquis, timoilhuis san tlaloch panoc queja elisquía atl
tlen san panotiquisa moixpa.
\v 17 Nochi moyolis elis cuali. Tlahuis moyolis queja tonati ipan
tlajcotona. Tlen teipa timoilhuis para tzintlayohuilotl, elis queja
ama quema tlanestihuala pampa nochi moyolis elis queja tlatlanextli.
\v 18 Huan ta tiitztos temachtli pampa timotemachía ipan Toteco
Dios, huan yajaya mitzmocuitlahuijtos. Tijtlachilis tlen yahualtic,
huan tiquitas para eltoc cuali. Ticochis ica paquilistli.
\v 19 Quema timotecas, ax tleno mitzmajmatis. Huan miyac tlacame
quitemojtihualase motlapalehuil.
\v 20 Pero fiero tlacame ax huelise momanahuise niyon ax huelise
mochololtise. Inijuanti san hueli mochiyase para miquise.”
\c 12
\s Job quiilhui Zofar para iyolis se tlacatl eltoc imaco Toteco
\p
\v 1 Huan Job quiilhui Zofar:
\p
\v 2 “Temachtli imojuanti inquimatij nochi. Huan quema inmiquise,
ayoc itztos niyon se tlacatl tlen tlalnamiqui.
\v 3 Pero na nijpiya tlalnamiquistli nojquiya. Imojuanti ax más
incuajcualme que na. ¿Ajqueya ax quimati nochi tlen
intechilhuijtihualajtoque?
\v 4 Achtohuiya nimomaijtoyaya ica Toteco Dios huan yajaya
nechmacayaya tlen nijtlajtlaniyaya. Pero ama nochi nocalnechcahua
san nechhuetzquilíaj. Yonque na se nitlacatl tlen nixitlahuac, ama
nochi techpinajtíaj.
\v 5 Tlacame tlen nochi quipiyaj quinpinajtíaj tlacame tlen
tlaijiyohuíaj. Ax quinequij quinitase tlen motepotlamíaj.
\v 6 Toteco quincahua tlaxtequini ica tlasehuilistli, huan tlen
quicualancamacaj itztoque ica temachili. Nochi tlen inijuanti
quipiyaj Toteco quitlalijtoc ininmaco.
\p
\v 7 “Nochi quimatij para TOTECO quichijchijqui nochi tlamantli.
Xiquintlajtlani nopa tlapiyalime tlen más huihuitique huan
inijuanti mitzilhuise. Inijuanti quimatij para melahuac TOTECO
quinchijchijqui. Xiquintlajtlani nopa totome tlen patlantinemij.
Inijuanti quimatij.
\v 8 Nojquiya mitznextilis ni tlaltepactli o nopa michime tlen
itztoque ipan hueyi atl.
\v 9 Nochi quimatij para TOTECO quinchijchijtoc.
\v 10 Ininyolis nochi tlacame huan nochi tlamantli yoltoque eltoc
imaco TOTECO. Yajaya huelis quinquixtilis iniijiyo quema ya
quinequi.
\v 11 Queja tocamac quimachilía iajhuiyaca sesen tlamantli
tlacualistli, totlacaquilis hueli quicaqui huan quiyecohua catlía
tlajtoli eltoc cuali.
\v 12 Huan huehuentzitzi quipiyaj tlalnamiquistli huan quimachilíaj
miyac tlamantli.
\p
\v 13 “Pero san yajaya Toteco Dios quipiya nopa tlalnamiquistli
huan chicahualistli tlen nelía melahuac. San yajaya hueli
techconsejomaca tlen quinamiqui. San yajaya quimachilía nochi
tlamantli.
\p
\v 14 “Tlen Toteco Dios quixolehua, axaca hueli quicualtlalis
sampa. Huan intla yajaya quitzacuas se tlacatl, axaca huelis
quimajcahuas.
\v 15 Quema Toteco quichihua ma ax huetzi atl, huajca nochi huaqui
huan mocahua queja se huactoc tlali. Huan quema yajaya quichihua ma
huetzi atl chicahuac, nochi tlatemi huan tlahueloni.
\p
\v 16 “Yajaya quipiya nochi chicahualistli huan tlalnamiquistli.
Quipiya tlanahuatili ica nochi tlen tlacajcayahuaj huan nochi tlen
sequinoc quincajcayajtoque.
\v 17 Toteco quinhuihuitilía jueces. Quichihua tlen
teconsejomacayayaj ma quichihuaca tlamantli tlen ax quinamiqui queja
para quinmalacanise tlatequipanohuani para ma yaca malacantoque.
\v 18 Yajaya quinquixtía inintlanahuatil tlanahuatiani huan
quichihua ma quinhuicaca ilpitoque ica lazos ipan inintzinquechtla
para ma tlatequipanotij.
\v 19 Toteco quinquixti inintequi totajtzitzi huan quichijqui ma
quinhuicaca para tlatequipanotij san tlapic. Quinmajcahua nopa
tlacame tlen tlahuel chicahuaque.
\v 20 Yajaya quinchihua ma ayoc camatica tlen tlalnamiquij.
Quincuilía inintlalnamiquilis nopa huejhueyi tlacame para ayoc
teconsejomacase.
\v 21 Yajaya quinpinahualtía tlanahuatiani. Quinquixtilía
inintepos inijuanti tlen quipixque chicahualistli.
\p
\v 22 “Yajaya quitlamiltía tzintlayohuilotl huan miquistli ica
itlahuil.
\v 23 Toteco Dios quinchihua sequin tlaltini ma mochihuaca tlahuel
chicahuaque, huan Toteco Dios quintzontlamiltía nopa tlaltini tlen
quinequi. Quinhueyilía sequin tlaltini, huan sequin quinxolehua
huan quintlahuelcahua.
\v 24 Yajaya quinquixtilía inintlalnamiquilis tlanahuatiani ipan
tlaltepactli huan quinchihua ma mocuapolojtinemica ipan se huactoc
tlali campa ax onca ojtli.
\v 25 Quinchihua ma nejnemica ipan tzintlayohuilotl campa ax onca
niyon se tlahuili. Quinchihua ma mocuapoloca queja ihuintini.
\c 13
\s Job quitlajtlani Toteco para ayoc ma quitlaijiyohuilti
\p
\v 1 “Xiquita, nochi tlen imojuanti inquiijtohuaj ya niquitztoc ica
noixtiyol, huan ya nijcactoc ica nonacas. Nochi ya nopa
nijmachilía.
\v 2 Nochi tlen inquimatij, na nojquiya nijmati. Amo ximoilhuica se
nihuihui tlacatl. Ax más inquimatij que na.
\v 3 Pero na tlahuel nijnequisquía nicamatis ihuaya Toteco Tlen
Quipiya Nochi Chicahualistli. Nijnequi niquixnextis nochi ni
tlamantli para nimomanahuis.
\v 4 Pero imojuanti san innechtlaijilhuíaj ica istlacaticayotl.
Initztoque queja intepajtiani tlen ax hueli inquichicahuaj niyon se
tlacatl.
\v 5 Cuali elisquía intla ax tleno inquiijtosquíaj huan queja nopa
nelía innesisquíaj intlalnamiquij.
\v 6 Ama xinechtlacaquilica se quentzi. Xijchihuilica cuenta tlen
niquijtos para nimomanahuis.
\p
\v 7 “¿Inquisenhuiquilise incamatise queja inquipiyaj
itequihuejcayo Toteco Dios? Yajaya ax inmechilhuijtoc niyon se
tlajtoli. Nochi tlen inquiijtohuaj san istlacaticayotl huan
tlacajcayahuali.
\v 8 ¿Huelis Toteco Dios quinequi inistlacatise huan para queja
nopa inmonajnanquilise ipan ya itoca? Monequi axaca
inquichicoicnelise huan tiquicnelis más tlen sequinoc, niyon yaja
Toteco, niyon na.
\v 9 Xijpiyaca miyac cuidado para Toteco ma ax quipantis nochi tlen
inquichihuaj. ¿Huelis inmoilhuíaj inhuelise inquicajcayahuase
Toteco queja intlacajcayahuaj?
\v 10 ¡Axtle! Yajaya inmechtlatzacuiltis chicahuac intla
inquichicoicnelíaj ya huan ax inquichihuaj san tlen xitlahuac.
\v 11 ¿Ax inmechmajmatía ihuextilis Toteco Dios? ¿Para tlen ax
inquiimacasij?
\v 12 Nochi nopa tlajtoli tlen innechilhuijtoque ax tleno ipati.
Eltoc queja tlaltejpoctli. Huan nochi tlen inmoilhuíaj para ica
inquimanahuise eltoc queja se soqui comitl.
\p
\v 13 “Huajca ayoc ximolinica. Xinechcahuilica ma nicamati na. Ya
nimocualtlalijtoc para niquijiyohuis tlen hueli tlaijiyohuilistli
tlen hualas teipa.
\v 14 Nicamatis yonque na nijmati ica notlajtol Toteco huelis
nechmictis.
\v 15 Pero yonque Toteco Dios nechmictisquía, noja
nimotemachisquía ipan ya huan nimomanahuisquía iixpa.
\v 16 Huan ya ni huelis nechpalehuis para nijnextis ax tleno
nijchijtoc, pampa se tlacatl tlen ax cuali ax monechcahuis iixpa
Toteco Dios.
\p
\v 17 “Xijtlacaquilica cuali nochi tlen niquijtos. Quena,
xinechtlacaquilica.
\v 18 Xiquitaca, na nimocualtlalijtoc ica tlaque nimomanahuis pampa
nijmati para huelis nijnextilis para ax tleno nijchijtoc.
\v 19 ¿Ajqueya hueli nechteilhuis ica se tlamantli tlen ax cuali
tlen nijchijtoc? Intla imojuanti innechnextilisquíaj para melahuac
nijchijtoc tlen ax cuali, ayoc sampa nimomanahuisquía hasta
nimiquis.
\p
\v 20 “Toteco Dios, chicahuac nimitztlajtlanía para ayoc
xinechchihuilis ni ome tlamantli para huelis nicamatis mohuaya:
\v 21 Ayoc más xinechtlaijiyohuilti. Huan nojquiya amo
xinechmajmati quema niitztoc moixpa huan nijmachilía mohueyi
chicahualis.
\v 22 Huajca xinechnotza huan xinechtlajtlani, huan na
nimitznanquilis. O intla tijnequi, na nimitzcamahuis achtohui huan
ta tinechnanquilis.
\v 23 ¿Se favor, san xinechilhui tlaque tlamantli tlen ax cuali
nijchijtoc? Xinechnextili notlaixpanolhua huan notlajtlacolhua.
\v 24 ¿Para tlen timohuejcatlalía tlen na? ¿Para tlen tinechita
queja nielisquía nimocualancaitaca?
\v 25 ¿Tijtlaijiyohuiltisquía se xihuitl tlen huetzqui tlen se
cuahuitl huan quipatlanaltía ajacatl? ¿Tijtojtocasquía itlasolo
trigo tlen quihuica ajacatl huan ax tleno ipati? Huajca ¿para tlen
tinechtojtoca na tlen ax tleno nopati?
\p
\v 26 “Eltoc queja tiquijcuilojtoc miyac fiero tlamantli para ica
tinechteilhuisquía. Eltoc queja tinechilnamiquiltía tlen nochi
notlajtlacolhua tlen nijchijqui quema nieliyaya nitelpocatl.
\v 27 Eltoc queja tijcuapitztlatoc noicxihua ipan cuahuitl para ax
nicholosquía. Tinechtlachilijtinemi campa ninejnemi. Tijtlalijtoc
sellos tlatzintla noicxihua para campa hueli ninemis nijsellojhuis
nopa tlali huan tijmatis para naja.
\v 28 Na nieltoc queja se cuahuitl tlen huetztoc huan más palani
mojmostla. Niitztoc queja se yoyomitl tlen cuatzipime ya
quitlamicuajtoque.
\c 14
\s Job quiijto para nimantzi tlami iyolis se tlacatl
\p
\v 1 “Ax huejcahua iyolis niyon se tlacatl. Temitoc sesen tonali
tlen iyolis ica tlaijiyohuilistli.
\v 2 Titlacame tiitztoque queja se xochitl tlen cahuani se
tlalochtli huan teipa pilini. O tiitztoque queja iecahuil se mixtli
tlen san pano huan nimantzi ixpolihui.
\p
\v 3 “Toteco Dios, ¿para tlen tijtlatzquiltijtoc moixtiyol ipan na
para tinechtlajtlanis cuenta?
\v 4 Axaca huelis quipantis tlen tlapajpactic ipan se tlacatl queja
na tlen nitlacatqui ica tlajtlacoli.
\v 5 Toteco, ta tiquixtlalijtoc quesqui tonali sesen titlacame
tiitztose huan nelcototzi toyolis. Quena, ta tiquixtlalijtoc quesqui
metztli sesen tojuanti tiitztose huan axaca hueli quitlalilis niyon
se tonali más.
\v 6 Huajca xitechcahuili nochi titlacame se quentzi tonali para ma
timosiyajcahuaca. Xiquijcueni mohueyi cualancayo se tlalochtli para
ma caxani. Tiitztoque queja titlatequipanohuani. Xitechcahuili ma
tijtlamiltica nopa tequitl tlen titechmacac ma tijchihuaca.
\p
\v 7 “Quema tlacame quitzontequij se cuahuitl, noja onca pajtli
para chamanis huan sampa quipiyas imacuayohua tlen selic.
\v 8 Huan yonque inelhuayohua nopa cuahuitl huehuejtiyasquíaj
tlatzintla tlali huan icuatzonyo palanisquía,
\v 9 quema quiajsisquía atl, sampa chamanisquía. Quena, quema
inelhuayohua moxoxohuilisquíaj, yancuic ixhuatos.
\p
\v 10 “Pero quema se tlacatl miqui, ayoc onca chicahualistli ipani.
San tlami tlaijiyotilana huan ayoc itztoc.
\v 11 Queja apoctli tlejco tlen hueyi atl huan ax mocuepa, huan
queja se atemitl tlahuaqui huan san polihui,
\v 12 queja nopa nojquiya tlami se tlacatl tlen miqui. Ayoc
motlalanas hasta quema ayoc oncas elhuicactli, niyon ayoc isas.
\p
\v 13 “Toteco, cuali elisquía intla tinechtlatisquía ipan nopa
hueyi ostotl campa itztoque mijcatzitzi huan tinechilcahuasquía
hasta tlamisquía mohueyi cualancayo. Pero xiquixtlali se tonal
quema sampa tinechilnamiquis.
\v 14 Intla se tlacatl miquis, ¿sampa moyolcuis? Intla quena,
nelía nechpactisquía miyac. Huan mojmostla ipan noyolis nimochiyas
hasta ta tinechmajcahuasquía tlen ni tlaijiyohuilistli huan
tinechcahuilisquía ma nimiqui.
\v 15 Intla ta tinechnotzasquía, na niyasquía. Huan ta
tinechselisquía ica miyac tlaicnelijcayotl pampa tinechchijchijqui
ica moma.
\v 16 Huan ta tijpohuasquía sesen huelta canque nijtlali noicxi,
huan ax tijpohuasquía notlajtlacolhua.
\v 17 Tijtlatisquía nochi notlaixpanolhua ipan se coxtali. Huan
tiquixpolosquía nochi notlajtlacolhua.
\p
\v 18 “Ta tijtlamiltía tlen quichiya se tlacatl queja tepetini
huelonij huan mochihuaj cuechtic huan nopa tetini tepehuij tlen se
tepexitl.
\p
\v 19 “Tijtlamiltía nochi tlen quichiyaj tlacame queja miyac atl
quichihua nopa tetini ma mocuepaca xali, huan miyac atl tlen huetzi
quichihua ma mohuahuatatza miyac tlali.
\v 20 Nochipa tiquintlani tlacame huan teipa san ixpolijtehuaj.
Tiquinchihua tlacame ma huehuejtiyaca huan ma ixcuijcuilichihuica
huan teipa miquij.
\v 21 Huan quema mictoc se tlacatl, ayoc quema quimatis intla
iconehua moscaltise huan quiselise tlatlepanitacayotl o
pinahualistli.
\v 22 Yajaya san quimachilía tlacuajcualocayotl ipan itlacayo huan
mocuesohua ica nopa tlaijiyohuilistli.”
\c 15
\s Elifaz quiajhuac Job
\p
\v 1 Huajca, Elifaz tlen ehua Temán, quiilhui Job:
\p
\v 2 “Ax quinamiqui para se tlalnamijca tlacatl queja ta,
camatisquía queja tijchihua. Nochi tlajtoli tlen tiquijtojtoc san
eltoc queja ajacatl.
\v 3 Ax cuali para se tlacatl camatis tlen se huihuiyotl. Motlajtol
ax cuali huan ax mitzpalehuía.
\v 4 ¿Ax tiquimacasi Toteco Dios? ¿Ax tijtlepanita?
\v 5 Motlajtlacol mitzchihua xicamati queja nopa. Quena, ticamatqui
queja se tlacajcayajca tlacatl.
\v 6 Huajca ax monequi na nimitzteilhuis. ¡Axtle! Mocamac ta, ya
nopa mitzteilhuijtoc.
\p
\v 7 “¿Timoilhuía para ta tiachtohui tlacatl ipan ni
tlaltepactli? Huelis san ta tlen más titlalnamiqui tlen nochi
sequinoc. ¿Titlacatqui hasta quema aya oncayaya tepetini?
\v 8 Huelis ta tijcajqui nochi tlamantli tlen ixtacatzi tlen Toteco
moilhui quichihuas. Huelis san ta tijpiya nochi tlalnamiquistli.
\v 9 ¿Tlaque tijmati tlen tojuanti ax tijmatij? ¿Tlaque más
tijmachilía tlen tojuanti ax tijmachilíaj?
\v 10 Tlatlajco tojuanti itztoque huehue tlacame tlen cuaichejque
huan quipiyaj más xihuitl que motata.
\p
\v 11 “¿Huelis tiquita para ax tleno ipati para Toteco Dios
mitzyoltlalis ica nochi ni yejyectzi tlajtoli tlen tojuanti
timitzmacaj?
\v 12 ¿Para tlen timoyolpatlatoc huan ticualancatlachiya?
\v 13 ¿Para tlen tijcualancaita Toteco Dios huan tijtlaijilhuía
ica tlajtoli tlen fiero?
\v 14 ¿Quejatza huelis se tlacatl mochihuas tlapajpactic iixpa
Toteco? ¿Huelis se tlen tlacatqui tlen se sihuatl mochihuas
xitlahuac queja ta tiquijtohua?
\v 15 ¡Xiquita! Toteco Dios ax motemachía ipan ielhuicac ejcahua.
Niyon elhuicactli ax eltoc senquistoc tlapajpactic iixpa.
\v 16 Intla queja nopa eltoc, ¿quejatza huelis yajaya motemachis
ipan se tlacatl queja ta tlen mosisinía huan senquistoc
tlajtlacolchihua huan quinequi quichihuas miyac tlamantli tlen ax
cuali?
\p
\v 17 “Intla tinechtlacaquilis, nimitzpohuilis tlen nijmati huan
tlen niquitztoc.
\v 18 Nimitzpohuilis nopa tlamachtili tlen tlalnamijca tlacame
quiselijque tlen ininhuejcapan tatahua.
\v 19 Inintatahua elque tlen quiselijque nopa tlali huejcajquiya
quema aya ajsiyayaj tlacame tlen sequinoc tlaltini para
mosejcotilise ininhuaya.
\p
\v 20 “Se tlacatl tlen ax cuali huan tlen tlahuel mosisinía
quipantía tlaijiyohuilistli ipan nochi iyolis.
\v 21 Quema quicaqui tlahuelchihualistli, momajmatía. Quema nochi
eltoc cuali, hualahuij tlaxtequini huan quitlaxtequilíaj.
\v 22 Majmahui para quisas ica tlayohua. Moilhuía tlacame
quimictise.
\v 23 San motlajtlanijtinemij tlacualistli. Quiijtohua ¿canque onca
pantzi? Fiero tlacame quimatij nechca hualas ininmiquilis huan
inintlatzacuiltilis.
\v 24 Itztoque ipan majmajtli huan tlahuel mocuesohuaj queja se
tlanahuatijquetl tlen mocualtlalía para quintehuis
icualancaitacahua.
\v 25 Fiero tlacame quitlalanaj ininma iixpa Toteco Dios para
quimacase. Queja nopa quiixpanoj Toteco Tlen Quipiya Nochi
Chicahualistli.
\v 26 Motzacuaj ica ininyoltepostzajca tlen tilahuac para
quinmanahuisquía huan motlalohuaj campa ya.
\p
\v 27 “Nopa fiero tlacame motomajtoque huan moricojchijtoque,
\v 28 pero monequi itztose ipan altepetini tlen tlami sosolijtoque
huan ipan caltini tlen tlaxolehuali campa axaca mocahua pampa nochi
quintlamimictijque.
\v 29 Nopa tlacame ax elise ricos para nochipa, niyon ax
quisenhuiquilise moaxcatise tlamantzitzi para mochihuase huejhueyi
ipan inintlal.
\p
\v 30 “Fiero tlacame mocahuase ipan tzintlayohuilotl para nochipa
huan ax hueli cholose. Se tlitl quintzontlamiltis huan Toteco ica
iijiyo quintlamiltis.
\v 31 Huajca se tlacatl tlen ax cuali ma ayoc motemachi ipan
iricojyo pampa ax huejcahuas. Niyon ayoc más ma mocajcayahuas,
pampa nopa tomi ax hueli mocohuis tlen yajaya quiyoltemohua. Huan
teipa iyolo elis cactoc.
\v 32 Fiero tlacame miquij quema aya ajsi hora huan tlamis nochi
tlamantli tlen ipan motemachiyayaj.
\v 33 Inijuanti elise queja se xocomecatl tlen quitequilijtoque
itlajca quema aya icsiyaya. O elise queja se olivo cuahuitl quema
huetzij ixochiyo huan ayoc huelis temacas itlajca.
\v 34 Ininconehua ax cuajcualme ax momiyaquilíaj. Nopa tlacame san
quinpactíaj quiselise tomi ixtacatzi huan quitemitíaj ininchajchaj
ica miyac tlamantli. Huajca Toteco quintzontlamiltis ica tlitl.
\v 35 Inijuanti san huelij quiyolitíaj tlajtlacoli huan cuesoli.
Ipan ininyolo san moilhuíaj quejatza huelij tlacajcayahuase.”
\c 16
\s Job quiilhui Elifaz para ya quipiya Itlatempalehuijca
\p
\v 1 Huajca Job quiilhui Elifaz:
\p
\v 2 “Na nijcactoc miyac hueltas nochi ya nopa. Imojuanti ax nelía
intechyoltlalíaj. San achi más intechtlaijiyohuiltíaj.
\v 3 ¿Ax quema inmoquetzase incamatij? ¿Para tlen tlahuel
inhuejcahuaj ica tlajtoli tlen ax tleno ipati?
\v 4 Na nojquiya nihuelisquía nicamatisquía queja imojuanti intla
imojuanti inmopantisquíaj ipan tlaijiyohuilistli.
Nimechtlaijilhuisquía huan nicojolinisquía notzonteco huan
nimechpinajtisquía.
\v 5 Pero ax ya nopa nijchihuasquía. Nimechcamahuisquía para
nimechpalehuisquía huan nimechyoltlalisquía. Nijchihuasquía
campeca para xiquilcahuaca imotlaijiyohuilis.
\v 6 Pero ica na nijsenhuiquilía nitlaijiyohuía yonque
nicamatisquía para nimomanahuis o ax nicamatisquía.
\p
\v 7 “Toteco Dios, ta tinechtlaijiyohuiltijtoc huan
tinechquixtilijtoc nofamilia.
\v 8 Tinechchijtoc nicocoxquetzi huan niteicneltzi, huan ni tlacame
quiijtohuaj san nechajsi ni tlatzacuiltili ipampa notlajtlacolhua.
\p
\v 9 “Toteco tlahuel nechcualancaita. Yajaya quitzayanqui nonacayo.
Motlanhuehuechotza ica cualantli huan chicahuac nechsentlachilía.
\v 10 Nochi tlacame tlen hualahuij para nechyoltlalise
nechhuetzquilíaj huan san nechmaquilíaj ipan noxayac.
Nocualancaitacahua mosentilíaj para nechpinajtise.
\v 11 Huan Toteco Dios nechtemactilijtoc ininmaco tlajtlacolchihuani
huan ininmaco tlacame tlen fiero ininyolis.
\p
\v 12 “Na niitztoya cuali huan ica paquilistli huan Toteco Dios
pejqui nechtlaijiyohuiltía. Nechitzqui noquechtla huan
nechmajcajqui tlalchi huan quichijqui cuechtic nochi notlacayo.
Teipa nechcuahuiyoni huejcapa para nechmelac itas ica cuatlamintli.
\v 13 Isoldados nechyahualojque huan nechmajcahuilijque
cuatlamintli. Quitlamicocojtoque notlacayo huan ni tlali xolonqui
ica noeso. Niyon quentzi ax nechtlasojtlaque.
\v 14 Ajachica Toteco quisenhuiquilía nechmaquilijtoc.
Nechtojtocatihualajtoc queja se tlatehuijquetl.
\v 15 Huan nica nimosehuía huan nimoquentijtoc nopa fiero yoyomitl
tlen quinextía nocuesol. Ipan notzonteco nijtemilía cuanextli.
Yajaya nimotemacatoc iixpa.
\v 16 Noixtiyolhua nochi chichiltic pampa tlahuel nichocatoc.
Semajtoc huan yayahuic noixtencuetlaxo hasta nesi para
nimiquisnequi.
\v 17 Queja nopa nopantitoc, yonque ax quema nimosisinijtoc. Huan
nochi tlen niquilhuijtoc Toteco Dios quema nimomaijtojtoc ica ya
eltoya cuali.
\p
\v 18 “Ma ax quiis noeso ni tlali. Xijcahuili noeso ma
tlahuejchihua ipampa quinextis notlaijiyohuilis.
\v 19 Pero yajaya tlen noTestigo huan noTlatempalehuijca itztoc
huejcapa ipan elhuicac. Yajaya Toteco nechita huan quimati ax
nijhuica tlajtlacoli.
\v 20 Nohuampoyohua nechpinajtíaj, pero na nimochoquilía iixpa
Toteco.
\v 21 Cuali elisquía intla itztoya se tlen hueli motlajcoquetzas
ica Toteco Dios huan ica na queja quichihuas se tlacatl tlen
motlajcoquetza ica ome ihuampoyohua.
\v 22 Pampa ax huejcahuas para nimiquis huan niyas ipan nopa ojtli
campa ayoc quema nimocuepas.
\c 17
\p
\v 1 “Noyoltzi nechcocohua huan tlahuel nimocuesohua hasta nijmati
para nimiquis. Nopa tlacacahuaya eltoc tlasencahuali para ipan
nechtlalpachose.
\v 2 Nechyahualojtoque miyac tlacame tlen nechpinajtíaj. Campa
hueli itztoque tlen nechhuetzquilíaj.
\p
\v 3 “¡Ay Toteco Dios! Monequi ta tinechpalehuis huan tijnextis
para ax nijchijtoc tlen ax cuali pampa axaca más hueli
nechpalehuis.
\v 4 Ta tijtzactoc inintlalnamiquilis ni tlacame para ma ax
quimachilica, pero amo xiquincahuili ma nechtlanica.
\v 5 Fiero tlacame tlen quiselíaj tomi para quinteilhuise
ininhuampoyohua quipantise para ininconehua tlaijiyohuise huan
mocahuase popoyotzitzi.
\p
\v 6 “Yajaya Toteco Dios nechpinahualtijtoc tlamiyacapa. Quichijtoc
para ma nechhuetzquilica huan nechixchajchaj nochi tlacame.
\v 7 Nitlachiya queja tlamixtentoc pampa tlahuel nichocatoc. Noyolis
tlantiya queja se ecahuilotl.
\v 8 Cuajcualme momajmatíaj quema nechitaj.
\p “Huan se tonali inijuanti motlalanase huan quintlanise nopa
tlacame tlen ax tleno tlatlepanitaj.
\v 9 Quena, tlacame tlen xitlahuaque quisenhuiquilise nejnemij ipan
iniojhui tlen yahui huejcapa. Tlen yoltlapajpactique elise noja más
tetique huan quipiyase más chicahualistli.
\p
\v 10 “Pero xihualaca nochi imojuanti huan inquiitase para ax
mopantis niyon se tlalnamijquetl campa imojuanti.
\v 11 Pero ya panotoc nochi tonali tlen cuali para na. Ixpolijtoc
nochi tlen nijchiyayaya. Nochi tlen nimoilhuijtoya nijchihuas,
tlanqui.
\v 12 Huan imojuanti tlahuel inquielihuishuíaj tlen melahuac.
Inquiijtohuaj para yohuali eltoc tonaya huan tonaya eltoc yohuali.
\v 13 San nimochiya para nimiquis huan nimotecati campa
tzintlayohuilotl.
\v 14 Huan nipaquis ipan nopa tecacahuaya huan nijtocajtis notata.
Huan niquinselis nopa ocuilime ica paquilistli. Elis queja
niquintocajtis nonana huan nosihua icnihua.
\v 15 Huajca ¿tlaque paquilistli nechchiya? Axaca huelis quipantis
se tlamantli tlen nijchiya.
\v 16 Nochi tlen nijchiyayaya yas nohuaya ipan tecacahuaya. San
sejco timosiyajcahuatij ipan tlaltejpoctli.”
\c 18
\s Bildad sampa quiilhui Job para yajaya ax cuali
\p
\v 1 Huajca Bildad tlen ehua Súa quiilhui Job:
\p
\v 2 “¿Hasta quema timoquetzas ticamatis? Xicamati ica tlajtoli
tlen mitznextis para titlalnamiqui intla tijnequi ma
timitznanquilica.
\v 3 ¿Para tlen titechita queja titlapiyalime tlen tihuihuitique?
\v 4 Ta tlahuel timocualancamaca huan tijtzayana moyoyo.
¿Timoilhuía para ica ya nopa pehuas mojmolinis ni tlali huan
mijcuenise nochi tetini?
\p
\v 5 “Quema fiero iyolis se tlacatl queja ta, yajaya miquis huan
itlahuil sehuis. Ayoc tlatlas itli ipan icalijtic.
\v 6 Teipa oncas tzintlayohuili ipan nochi caltini campa onca
tlajtlacolotl, huan sehuise nopa tlahuili tlen eltoc ininnechca.
\v 7 Ax cuajcualme mohueyimatij huan moilhuíaj para huelis
tecajcayahuase, pero huetzise ipan tlaquetztli tlen san inijuanti
quisencajtoque.
\p
\v 8 “Campa ax cuajcualme nejnemij, quinpantía se matlatl. Huan
ilpitoque ipan nopa matlatl huetzij ipan se ostotl tlen
tlasencahuili.
\v 9 Eltoc queja se tlaquetztli quiitzquía iniicxihua huan se lazo
quintlamiilpía.
\v 10 Campa nejnentiyohuij ax cuajcualme quinchiya se tlaquetztli
para quinmasiltis. Pero inijuanti ax quiitaj intla eltoc tlalijtic.
\p
\v 11 “Tlahuel majmahuij ax cuajcualme campa hueli yahuij pampa
quimatij tlen fiero yahui inintepotzco.
\v 12 Ininchicahualis ax cuajcualme tlantiya ipampa mayantli. Nochi
tlacame quichiyaj para ma huetzica ipan tlajtlacoli.
\v 13 Cocolistli quipalanaltía inincuetlaxo ax cuajcualme. Huan
miquistli quitlamiltía inintlacayo.
\v 14 Yonque itztoyaj ica temachtli achtohui ipan inintlacayo,
miquistli quinquixtis ipan inintlacayo para ma temoca ipan nopa
hueyi ostotl campa itztoc nopa tlanahuatijquetl tlen más
temajmatíaj.
\v 15 Tlacame quitlatise ichaj se fiero tlacatl ica azufre huan
tlamis nochi tlen quipiya.
\v 16 Se fiero tlacatl elis queja se cuahuitl tlen huaquij
inelhuayohua tlalijtic, huan teipa huaquij imacuayohua huejcapa.
\v 17 Tlamis nochi tlen tlajtlacolchihuani quichijque ipan ni
tlaltepactli huan ayoc aca quinilnamiquis.
\v 18 Toteco Dios quinquixtis tlen campa onca tlahuili huan
quimajcahuas campa tzintlayohuilotl. Quintojtocas tlen ni
tlaltepactli.
\v 19 Huan ayoc mocahuas niyon se inincone, niyon se iniixhui huan
niyon se ininteixmatca ipan nopa tlali campa itztoyaj.
\v 20 Tlacame tlen itztoque campa quisa tonati hasta campa
oncalaqui, momajmatíaj ipampa tlen ininpantis nopa fiero tlacame.
\v 21 Quiijtose: ‘Ya ni elqui ichaj se tlen quihuejcamajcajqui
Toteco Dios huan ax quinejqui quiixmatis.’ ”
\c 19
\s Job quiijtohua para quipiya iTlamanahuijca
\p
\v 1 Job quiilhui Bildad:
\p
\v 2 “¿Hasta quema inquicahuase intechtlaijiyohuiltise? ¿Hasta
quema inquicahuase intechcocose ica imotlajtol?
\v 3 Majtlactli hueltas intechtlaijilhuijtoque para nitlaijiyohuía
nopampa na notlajtlacol. ¿Huelis ax inpinahuaj intechilhuise queja
nopa?
\v 4 Intla melahuac nitlajtlacolchijtosquía, huajca monequiyaya
intechnextilise canque nimocuapolojtoc.
\v 5 Inmoilhuíaj tlahuel inhuejhueyi huan innechpinahualtíaj pampa
innechicnotlalijtoque.
\v 6 Pero cuali xijmatica ya ni. Eltoc Toteco Dios tlen
nechchihuilijtoc tlen ax cuali. Yajaya tlen nechmasiltijtoc ipan
imatla.
\p
\v 7 “Na nitzajtzi chicahuac para yajaya nechchihuilijtoc tlen ax
cuali, pero axaca nechnanquilía para nechpalehuis. Yonque nichoca,
axaca nechchihuilía tlen xitlahuac.
\v 8 Toteco Dios quitzactoc noojhui para ax hueli nipanos. Huan
campa ninejnemi quicueptoc notlahuil ica tzintlayohuilotl.
\v 9 Yajaya nechcuili nochi tlen nijpixqui huan quichijtoc para ayoc
aca ma nechtlepanita.
\v 10 Nechtlaijiyohuiltijtoc campa hueli huan yeca ya nitlantinemi.
Quitlamilti nochi tlen cuali tlen nijchiyayaya.
\v 11 Yajaya tlahuel cualani nohuaya huan nechita queja se
niicualancaitaca.
\v 12 Quintitlanqui isoldados para ma nechtehuica. Inijuanti
mocualtlalíaj para nechitzquise huan para quiyahualose nochaj.
\p
\v 13 “Noteixmatcahua nechhuejcatlalijtoque huan nochi noicnihua
quichihuaj queja ax nechixmatij.
\v 14 Nochi nocalnechcahua huan nohuampoyohua tlen más nechca
nechtlahuelcajtoque.
\v 15 Nochi tlen itztoque ipan nochaj huan notlatequipanojcahua,
nechitaj queja niehua sejcoyoc.
\v 16 Quema nijnotza notlatequipanojca, yajaya ax nechnanquilía
huan ax huala yonque nijsenhuiquilía nijnotza.
\v 17 Nosihua quiijiya noijiyo. Noicnihua ax quinequij nechitase.
\v 18 Hasta tlen coneme nojquiya nechcualancaitaj. Quema nimoquetza
inijuanti nechtlaijilhuíaj.
\v 19 Tlen eliyayaj nocualhuampoyohua ama nechijiyaj. Huan nochi
tlen tlahuel niquinicnelía moicancueptoque ica na.
\v 20 San niomitl nimocajtoc. Nechca huala nopa tonal para nimiquis.
\p
\v 21 “Innohuampoyohua, xinechtlasojtlaca pampa yajaya Toteco Dios
tlen nechmacatoc.
\v 22 ¿Para tlen intechtoquilijtinemij queja Toteco Dios quichihua?
¿Ax inquiitaj para tlahuel nitlaijiyohuía?
\p
\v 23 “Cuali elisquía para se acajya quiijcuilosquía nochi
notlajtol para axaca quiilcahuasquía.
\v 24 Quitejtequisquía sesen tlajtoli ipan se hueyi tetl ica se
cincel huan quiixtemitisquía ica plomo para ax ixpolihuis para
nochipa.
\p
\v 25 “Na nijmati para itztoc noTlamanahuijca, huan ipan itlamiya
tonali yajaya moquetzas ipan ni tlaltepactli.
\v 26 Huan yonque palanis ni notlacayo, teipa ica notlacayo niquitas
Toteco.
\v 27 Huan nopampa na noselti niquitas. Quena, niquitas ica na
noixtiyol. Ica nochi noyolo nijnequisquía nimantzi ma ajsi nopa
tonali.
\p
\v 28 “¿Quejatza inmotemacaj para innechtlaijiyohuiltijtinemise?
Inquichihuaj queja elisquía inquimatij para elqui notlajtlacol,
pero ax neli.
\v 29 Huajca nimechilhuía, xijpiyaca cuidado pampa imoseltitzitzi
inmotemohuilíaj tlatzacuiltili ica tlen inquichihuaj. Huan se
tonali inquimatise para temachtli Toteco Dios tetlajtolsencahua.”
\c 20
\s Zofar quinanquili Job huan quiajhuac
\p
\v 1 Huajca Zofar, tlen ehua Naamat, quiilhui Job:
\p
\v 2 “Na nimoisihuiltía para nimitznanquilis pampa nelía
nicualani. Ax hueli niquijiyohuis motlajtol, huan ama nimoilhuijtoc
quejatza nimitznanquilis.
\v 3 Ica nochi tlen tiquijtojtoc titechpinahualtijtoc pampa
timitzilhuijtoque para tijchijtoc tlen ax cuali, pero ama
notlalnamiquilis nechchihualtía ma nimitznanquili.
\p
\v 4 “¿Ax tijmati para hasta quema Toteco Dios quintlali tlacame
ipan ni tlaltepactli huejcajquiya,
\v 5 ax huejcahua ipaquilis se tlacatl tlen ax cuali? Se fiero
tlacatl san hueli tlatlani para se tlalochtli.
\v 6 Yonque se tlacatl tlen ax quitlepanita Toteco Dios tlahuel
mohueyimati huan quimati itzonteco quiajsisquía ne mixtli,
\v 7 yajaya tlamis para nochipa. Huan tlacame quimajcahuase itlacayo
queja elisquía cuitlatl. Huan nochi tlen quiixmatque motlajtlanise
¿canque itztoc?
\v 8 Ixpolihuis queja se temictli, o queja se tlanextili tlen
monextía ica tlayohua huan ayoc aca huelis quipantis.
\v 9 Niyon ifamilia, niyon ihuampoyohua nopa tlacatl tlen ax
quitlepanitac Toteco, ayoc quema quiitase.
\v 10 Huan iconehua quitlajtlanise tlapalehuili ica tlen hueli
tlacatl yonque teicneltzitzi. Sequinoc quinchihualtise ma tequitica
nelchicahuac para quicuepase tlen inintata quinichtejqui.
\v 11 Huan nopa fiero tlacatl tlen san eltoya se telpocatl huan
eltoya tetic, ama mictoc huan iomiyohua mocueptoque tlaltejpoctli.
\p
\v 12 “Tlahuel quipacti nopa fiero tlacatl para quichihuas tlen ax
cuali hasta quimachili queja eltoya ajhuiyac ipan icamac.
\v 13 Quiajcocui icamaijtic huan ica yolic quitolohuayaya para ax
tlamis nimantzi.
\v 14 Pero ica se tlalochtli, eltos queja nochi nopa tlamantli tlen
quicuajtoc, xocoyas ipan iijti. Mochihuas queja inintencococa
cohuame iijtico.
\v 15 Huan quiisotlas nochi nopa ricojyotl tlen quiichtectoc pampa
Toteco Dios ax quicahuilis ma quipixto.
\v 16 Eltoc queja se fiero tlacatl quichichina inintencococa cohuame
huan se cohuatl quitzacanis huan quimictis.
\v 17 Yajaya quiichtejqui tlahuel miyac aceite, sayol nectli huan
queso, pero ama ayoc quema quicuas.
\v 18 Nopa tequitl tlen quichihuayaya para tlaxtequis elis san
tlapic. Tlen mocuilijtoc monequi quicuepas. Ax tleno mocahuas para
ica mopaquilismacas.
\v 19 Yajaya quintlaijiyohuilti tlen teicneltzitzi huan moaxcati
caltini tlen yajaya ax quichijqui. Ax tleno mocajqui ininmaco nopa
teicneltzitzi.
\v 20 Nochipa nopa fiero tlacatl quinequiyaya más tlamantli. Pero
yonque tlahuel quipacti moaxcatis tlamantli tlen ax iaxca, ama ax
tleno quipiya. Huan ica nochi tlen quinejqui quipiyas, ax huelis
momaquixtis ama.
\v 21 Yonque quitlamicuajqui nochi tlamantli, tlen quipiya ax
huejcahuas.
\p
\v 22 “Quema tlahuel moricojchijtoc nopa fiero tlacatl, quipantis
miyac tlaohuijcayotl, tlen quitzontlamiltis.
\v 23 Quema eltoc nechca para temis iijti ica nochi tlen cuali,
Toteco Dios quititlanis ihueyi cualancayo ipan ya.
\v 24 Intla quinequi mochololtis tlen Toteco, Toteco quitepotztocas
huan quiajsis ica icuatlami.
\v 25 Quiquixtía nopa cuatlamintli tlen quisentlapalo itlacayo huan
iyecapa quipiya ichichica. Se hueyi majmajtli quiitzquía huan
yajaya miqui.
\p
\v 26 “Nochi iricojyo tlami quema yajaya miqui huan yahui ipan nopa
hueyi ostotl campa tlahuel tzintlayohua. Se hueyi tlitl
quitlamitlatis ya huan nochi tlen quicajtejtoque ipan ichaj.
\v 27 Toteco Dios quipannextis itlajtlacolhua nopa tlacatl. Huan
tlacame tlen itztoque ipan ni tlaltepactli motlalanase para
quiteilhuise.
\v 28 Elis queja hualas miyac atl huan quihuicas ichaj huan nochi
iricojyo pampa Toteco Dios tlahuel cualantoc ihuaya.
\v 29 Yajaya ni tlen ininpantis ax cuajcualme pampa ya ni tlen
Toteco Dios quinajcocuilijtoc.”
\c 21
\s Job quinanquili Zofar queja yajaya cualani ica Toteco Dios
\p
\v 1 Huajca Job quiilhui:
\p
\v 2 “Xijtlacaquilica cuali tlen nimechilhuis huan san ya nopa
nechyoltlalis.
\v 3 Nimechtlajtlanía xinechcahuilica nicamatis huan quema
nitlamis, xijsenhuiquilica xinechpinajtica intla inquinequij.
\p
\v 4 “Na ax nicualani ica niyon se tlacatl. Yajaya Toteco Dios tlen
nijnequi nijtlajtlanis huan yeca notonaltzi tlahuel tlaijiyohuía.
\v 5 Xinechtlachilica huan ximomajmatica queja nieltoc, yonque
monequi xijtzacuaca imocamac ica imoma ipampa quejatza ninesi.
\v 6 Quema nimoilhuía tlen nijnequi niquijtos, nechitzquía se
hueyi majmajtli huan nihuihuipica.
\p
\v 7 “Na niquita para ax cuajcualme itztoque hasta huehuejtiyaj
huan moricojchihuaj.
\v 8 Quinitaj ininconehua moscaltíaj huan iniixhuihua nojquiya.
\v 9 Ininchajchaj ax cuajcualme eltoque temachtli, huan ax quinajsi
niyon se majmajtli. Niyon Toteco Dios ax quintlatzacuiltía.
\v 10 Nochi ininhuacaxhua momiyaquilíaj huan cuali
quintlacatiltíaj ininconehua. Ax quinmajcahuaj.
\v 11 Ininconehua senquistoc pactoque. Motlalojtinemij huan
tzicuintinemij queja pilborregojtzitzi.
\v 12 Ax cuajcualme mojmostla huicatinemij huan mijtotijtinemij ica
arpas, tambores huan flautas. Ax tleno quinpolohua pampa tlahuel
ricos.
\v 13 Ica se tlalochtli miquij niyon ax tlaijiyohuíaj. Ica
paquilistli yahuij ipan nopa hueyi ostotl campa mijcatzitzi.
\v 14 Inijuanti quitlahuelcahuaj Toteco Dios huan quiilhuíaj:
‘Xitechtlalcahui. Ax tleno tijnequij tijmatise tlen ta, niyon ax
tijnequij tijchihuase tlen tijnequi.’
\v 15 Huan ax cuajcualme quiijtohuaj: ‘¿Ajqueya yajaya tlen quipiya
nochi chicahualistli? ¿Para tlen monequi tijtlepanitase huan
tijtequipanose? ¿Tlaque tijtlanise intla timomaijtose ica ya?’
\v 16 Pero yonque quej ni quiijtohuaj huan nochi quisa cuali para ax
cuajcualme, ax inijuanti tlen nelía quipiyaj tlanahuatili para
quiijtose tlaque panos. Itztoque huejca tlen Toteco Dios huan yeca
na niquinhuejcamajcahua huan ax nijcaqui ininconsejo.
\p
\v 17 “Pero niquita para nelquentzi panoj tlaijiyohuilistli ax
cuajcualme. Huan Toteco Dios ica ihueyi cualancayo san quemantzi
quintitlanilía tlacuajcualocayotl huan miquistli.
\v 18 Ax cuajcualme quemantzi itztoque queja trigo itlasolo tlen
ajacatl quihuica. Itztoque queja sacatl huactoc tlen patlani.
\p
\v 19 “Miyac quiijtohuaj: ‘Toteco Dios quintlatzacuiltis iconehua
se tlacatl tlen tlajtlacolchijtoc.’ Pero na niquijtohua más cuali
para Toteco Dios ma quitlatzacuilti nopa tetaj tlen
tlajtlacolchijtoc huan ax iconehua. Huan quitlatzacuiltisquía ipan
itlacayo para yajaya quimatisquía tlaque quinamiqui para
itlajtlacolhua.
\v 20 Quena, ma quitzontlamilti nopa tlacatl ipampa ya
itlajtlacolhua. Nopa tlacatl ma quitlamimachili nochi ihueyi
cualancayo Toteco Tlen Quipiya Nochi Chicahualistli.
\v 21 Pampa quema se tlacatl mictos, ax momacas cuenta tlaque
ipantis isihua huan iconehua huan intla quiselise
tlatzacuiltilistli.
\p
\v 22 “Pero ¿ajqueya huelis quimachtis o quitlacahualtis Toteco,
yajaya tlen itztoc nopa Tetlajtolsencajquetl tlen más hueyi?
\v 23 Toteco quicahuilía se tlacatl ma miqui quema quipiya fuerza
huan tominpiya huan nochi yahui cuali para ya.
\v 24 Miqui quema quipiya nochi tlen cuali para quicuas, huan
tomahuac huan senquistoc yolpactoc.
\v 25 Huan Toteco quicahuilía seyoc tlacatl ma miqui tlen
tlaijiyohuía huan ax quema quipixqui niyon se tlamantli tlen cuali.
\v 26 Tlen tlapijpiya huan tlen teicneltzi miquij huan
quintlalpachohuaj ipan san se tlaltejpoctli huan san se tlamantli
ocuilime quicuaj inintlacayo.
\p
\v 27 “Cuali na nijmati tlaque inmoilhuíaj huan quejatza
inquinequij innechixpanose.
\v 28 Ajachica innechilhuíaj tlen nopa tominpiyani huan ax
cuajcualme tlen quiselijque tlatzacuiltili ipampa inintlajtlacolhua
huan ama senquistoc xolejtoque ininchajchaj.
\v 29 Pero na nimechilhuía: xiquintlajtlanica tlen hueli tlacatl
tlen miyac quimatij, huan tlen miyac tlapaxalojtoque huan inijuanti
inmechilhuise tlen melahuac.
\v 30 Ax cuajcualme nochipa momanahuíaj quema huala tlaohuijcayotl
huan cholohuaj quema Toteco Dios quinextía icualancayo.
\v 31 Axaca quinajhua tlamiyacapa, niyon axaca quintlatzacuiltía
ipampa tlen quichijtoque.
\v 32 Ica tlatlepanitacayotl quinhuicaj inintlacayo campa
tecacahuaya huan nopona mocahua se tlacatl para tlamocuitlahuis.
\v 33 Quema quinhuicaj para quintlalpachotij, yahuij tlahuel miyac
tlacame. Sequin tlayacanaj huan sequin yahuij inintepotzco para
quintlalpachotij ipan tlali tlen yamanic.
\p
\v 34 “Huajca ¿quejatza huelis imojuanti intechyoltlalise ica
tlajtoli tlen ax tleno ipati? Quema innechnanquilíaj, ax melahuac
tlen inquiijtohuaj.”
\c 22
\s Elifaz quinanquili Job ica expa
\p
\v 1 Huajca Elifaz, tlen ehua Temán, quiilhui Job:
\p
\v 2 “¿Timoilhuía para se tlacatl huelis quichihuas se tlenijqui
para quipalehuis Toteco Dios? Yonque se tlacatl itztoc tlalnamiqui
¿quejatza hueli quipalehuis?
\v 3 Intla tiitztosquía tixitlahuac, ¿para tlen quipactisquía
Toteco Tlen Quipiya Nochi Chicahualistli? ¿Tlaque quitlanis Toteco
mopampa ta intla timochihuas se tlacatl tlen cuali?
\v 4 ¿O timoilhuía para yajaya mitzajhua huan mitzteilhuía ama
pampa tixitlahuac?
\v 5 ¡Axtle! Yajaya mitztlatzacuiltijtoc ipampa nochi tlamantli
tlen ax cuali tlen tijchijtoc. Tijpiya tlahuel miyac motlajtlacolhua
hasta axaca hueli quinpohuas.
\p
\v 6 “Yonque tieliyaya tirico, huelis timocajqui ica inintlaque
nopa teicneltzitzi tlen tiquintlanejtiyaya tomi. Quena, huelis quema
hualayayaj para mitztlanehuiliquij tomi, tiquinilhuiyaya ma
mitzprendajcahuilica se ininyoyo huan tiquinchijqui ma mocahuaca
xolome.
\v 7 O huelis ax tiquinamacac tlen amiquiyayaj, o ax tiquintlamacac
tlen mayanayayaj.
\v 8 Yonque ta tijpixqui chicahualistli huan miyac tlali, huelis
timoilhui para nochi elqui san para ta.
\v 9 Huelis ax tiquinpalehui cahual sihuame huan tiquincuepqui san
quiaja. O huelis icnotzitzi tiquinpostequili iniajcol ica tlamamali.
\v 10 Yeca ama miyac tlaquetztli mitzyahualojtoque para mitzmasiltis
huan onca miyac tlamantli tlen tlahuel mitzmajmatía.
\v 11 Tzintlayohuilotl mitzyahualojtoc para ayoc titlachiyas huan
eltoc queja hualajtoc miyac atl huan mitzatzonpolihuiltijtoc.
\p
\v 12 “Toteco Dios itztoc hueyi. Itztoc más huejcapa que
elhuicactli huan más huejcapa que nopa sitlalime tlen más huejca.
\v 13 Huan ta tiquijtohua para yeca Toteco Dios ax hueli quiita tlen
tijchihua. Tiquijtohua para ax huelis mitztlajtolsencahuas Toteco
Dios pampa quitzacuilía se mixtli tlen nelyayahuic.
\v 14 Pampa miyac mixtli tlen tlahuel yayahuic quiyahualohua Toteco
Dios, huan yeca ax hueli techita. Yajaya itztoc huejca huan san
nentinemi nepa elhuicac. Queja nopa timoilhuía.
\p
\v 15 “¿Ta tijtoquilis nopa ojtli tlen tlajtlacoli tlen nochi ax
cuajcualme quitoquilíaj?
\v 16 Tlen quitoquilíaj nopa ojtli miquij quema noja telpocame huan
ininyolis ixpolihui para nochipa queja huala miyac atl huan
quinhuica.
\v 17 Inijuanti quiilhuijque Toteco Dios: ‘Xitechtlalcahui huan
xiya.’ Quiijtojque: ‘¿Tlaque hueli titechchihuilis ica tojuanti
Toteco Tlen Quipiya Nochi Chicahualistli?’
\v 18 Pero quiilcajtoque para elqui Toteco Dios tlen quintiochijqui
huan quinricojchijqui. Toteco ma nechpalehui para nijhuejcamajcahua
tlen queja nopa moilhuíaj.
\p
\v 19 “Tlacame tlen xitlahuaque quiitase nopa tlatzacuiltili tlen
quinajsis nopa tlajtlacolchihuani huan paquise. Nochi cuajcualme
huetzcase huan quinpinahualtise.
\v 20 Huan quiijtose: ‘Toteco Dios quintzontlamiltijtoc nochi
tocualancaitacahua huan quitlamitlatijtoc nochi ininricojyo.’
\p
\v 21 “Huajca Job, ximotemaca ica Toteco Dios. Ximoyoltlali ica ya
huan tijpiyas tlasehuilistli huan nochi tlen cuali.
\v 22 Xijtlacaquili nochi itlajtol huan xicajcocui ipan moyolo.
\v 23 Intla timocuepas ica Toteco Tlen Quipiya Nochi Chicahualistli
huan tijcahuas nochi tlen ax cuali, yajaya sampa mitztlalanas.
\v 24 Ayoc xiquixtocas tomi huan xijtepehuas nochi mooro campa
tetini ipan atlajtli,
\v 25 huajca Toteco Tlen Quipiya Nochi Chicahualistli elis tlen más
ipati ipan moyolis. Tiquitas para más ipati que oro o plata tomi
tlen más yejyectzi.
\p
\v 26 “Huan tijpantis paquilistli ipan Toteco Tlen Quipiya Nochi
Chicahualistli huan san ipan ya timotemachis.
\v 27 Timomaijtos ica ya huan yajaya mitztlacaquilis. Huan
tijtlamichihuas nochi tlen tijtlajtolcahuilis para tijchihuas.
\v 28 Huan nochi tlen tijnequis tijchihuas, tijtlamichihuas huan
quisas cuali. Huan nopa tlahuili tlen elhuicac mitztlahuilis ipan
moojhui campa tinejnentiyas.
\v 29 Pampa Toteco Dios quiechcapantlalía tlen mohueyimati huan
quimanahuía tlen moechcapanohua.
\v 30 Huan yajaya mitzmaquixtis intla ax tijhuica tlajtlacoli huan
intla tiitztoc titlapajpactic iixpa.”
\c 23
\s Job quiilhui Elifaz para iTetlajtolsencajca quimanahuis
\p
\v 1 Pero Job quiilhui:
\p
\v 2 “Ama sampa nicamatis ica cuesoli pampa Toteco nelchicahuac
nechtlatzacuiltía ica ima huan ax queja quinamiqui, yonque tlahuel
niayijti.
\v 3 Nijnequisquía nijmatis canque hueli nijpantis Toteco Dios.
Nijnequisquía niyasquía campa mosehuía huan nijcamahuisquía.
\v 4 Nijpohuilisquía nochi nocuesol huan teipa nijcaquisquía
tlaque nechilhuis.
\v 5 Huan nijmachilisquía tlaque quinequi ma nijchihuas.
\v 6 Toteco Dios ax nechnanquilisquía ica cualantli yonque quipiya
hueyi chicahualistli. Yajaya nechtlacaquilisquía huan ax
nechteilhuisquía.
\v 7 Tlacame tlen xitlahuaque huelisquíaj monajnanquilise ihuaya
para nechmanahuise, huan yajaya tlen noTetlajtolsencajca
quiijtosquía ax nijhuica tlajtlacoli.
\p
\v 8 “Intla nijtemohua Toteco Dios ica campa quisa tonati o campa
oncalaqui, ax nijpantía.
\v 9 Intla yajaya quichihua huejhueyi tequitl ica norte, ax
niquitas. Huan intla nimocuepa ica tlani campa yajaya motlatía, ax
hueli nijpantis.
\v 10 Pero yajaya cuali quiixmati noojhui huan sesen tlamantli tlen
nechpano. Huan quema tlami nechyejyecos, yajaya quiijtos para
nixitlahuac huan nitlapajpactic queja oro.
\p
\v 11 “Nochipa nijtoquilijtoc iojhui Toteco Dios huan ninejnentoc
iicxipa. Ax quema nimoiyocatlalijtoc.
\v 12 Ax nijcajtejtoc itlanahuatilhua tlen quisque ipan icamac. Achi
más nimopaquilismaca ipan itlajtol huan ax queja ipan notlacualis
tlen nijcua mojmostla.
\v 13 Pero intla yajaya moilhuijtoc para quichihuas se tlenijqui,
axaca huelis quiyolpatlas. Nochi tlen yajaya quinequi, ya nopa
quichihua.
\v 14 Huajca nochi tlen yajaya quisencajtoc para quichihuas ica na,
ya nopa quichihuas. Huan noja quichihuas ica na más tlamantli tlen
quisencajtoc.
\v 15 Huan yeca nimajmahui iixpa. Quema niquilnamiqui tlen yajaya
hueli quichihua, nihuihuipica.
\v 16 Toteco quiquixtilijtoc ichicahualis noyolo. Quena, Toteco Tlen
Quipiya Nochi Chicahualistli quichijtoc tlahuel ma nimajmahui.
\v 17 Pero yonque san tzintlayohuilotl niquita, nopa
tzintlayohuilotl tlen nechixtzactoc aya nechtzontlamiltijtoc.
\c 24
\s Job tlajtlanía para tlen Toteco ax tetlatzacuiltía
\p
\v 1 “¿Para tlen Toteco Tlen Quipiya Nochi Chicahualistli ax
quiixtlalía se tonal para quintlajtolsencahuas tlacame? ¿Para tlen
monequi tlacame tlen xitlahuaque ma quichiyaca mojmostla huan nopa
tonal ax quema ajsi?
\v 2 Pampa onca miyac tlamantli tlen ax cuali. Sequin tlacame
quiijcueníaj nepamitl huan quincuilíaj inintlal sequinoc.
Quinmocuitlahuíaj borregojme tlen teichtequilijtoque campa cuali
sacatl.
\v 3 Quinichtequilíaj ininburrojhua tlacame tlen teicneltzitzi huan
tlen icnotzitzi. Huan quema cahual sihuame quinequij motlanehuise
tomi, quintlajtlaníaj ma quiprendajcahuaca iniiyojtzi tlapiyal.
\v 4 Quinquixtilíaj tlacame tlen teicneltzitzi tlen iojhui.
Teicneltzitzi monequij motlatise quema inijuanti monechcahuíaj.
\v 5 Teicneltzitzi itztoque queja burrojme ipan se huactoc tlali
tlen mojmostla quitemojtinemij quentzi tlacualistli para inijuanti
huan ininconehua para ica mopanoltise.
\v 6 Quicuaj tlen hueli tlamantli tlen quipantíaj ipan cuatitla
huan quitejtemohuaj tlen mocajtoc ipan ininxocomecamil tlacame tlen
mosisiníaj.
\v 7 Tlayohua nopa teicneltzitzi itztoque xolome ipan nopa
tlasesecayotl pampa ax quipiyaj ininyoyo, niyon inintlaque, para ica
mopiquise.
\v 8 Nopa atl tlen huetzi ipan tepetini quinxolonía. Inijuanti
quinnajnahuaj nopa huejhueyi tetini tlen quentzi totonic pampa
tlaseseya huan ax quipiyaj ininchaj.
\p
\v 9 “Mosisinijca tlacame quiichtequij se cahual sihuatl icone tlen
noja chichi. Quichihuaj nopa tetajme tlen teicneltzitzi ma
quinprendajcahuaj ininconehua para quintlanejtise tomi.
\v 10 Teicneltzitzi nemij xolome pampa ax quipiyaj ininyoyo. Ax
cuajcualme quinchihualtíaj ma quimamaca trigo yonque inijuanti
mayancamictinemij.
\v 11 Quinfuerzajhuíaj tlen teicneltzitzi ma quipatzcaca olivos
ipan molino para quiquixtise aceite pero ax quincahuilíaj quiyecose
se quentzi. Ipan moquejquetzaj xocomecatl itlajca para quiquixtise
iayo, pero yonque tlahuel amictoque, ax quincahuilíaj quiise
niyon quentzi iayo.
\v 12 Tzajtzij chicahuac nopa tlacame tlen miquisnequij ipan nopa
altepetl. Tlen mococojtoque tlajtlanij tlapalehuili, pero Toteco
Dios mochihua queja ax quincaqui, niyon ax quinpalehuía.
\p
\v 13 “Mosisinijca tlacame quicualancaitaj tlahuili. Ax quiixmatij
tlen xitlahuac. San nemij ipan iniojhui tlen fiero.
\v 14 Temictiani mehuaj cualca para quimictise se tlen teicneltzi
tlen ax tleno quipiya. Ica tlayohua tlaxtequij.
\v 15 Tlen sihuanemij quichiyaj para más ma tzintlayohuiya pampa
quiijtohuaj: ‘Axaca nechitas.’ Quitzacuaj ininxayac ica se yoyomitl
para axaca huelis quinixmatis.
\v 16 Tlachtequini ica tlayohua calaquij ipan techaj. Tonaya cochij
pampa ax quinpactía tlatlanextli.
\v 17 Inijuanti quiitaj yohuali queja elisquía ijnaloc. Ica
tlayohua mosentilíaj para temajmatise.
\p
\v 18 “Pero ax cuajcualme tlaloch ixpolihuij ipan ni tlaltepactli
queja tlasoli tlen quihuica se atemitl. Nochi tlen quipiyaj ax
cuajcualme eltoc tlatelchihuali. Axaca tequitis ipan ininxocomeca
milhua.
\v 19 Miquistli quintzontlamiltía tlajtlacolchihuani queja
tlatotonilotl quiatilía setl.
\v 20 Hasta inana se tlajtlacolchijquetl quiilcahuas. Ocuilime
quicuase inacayo huan tlahuel ajhuiyac quimatise. Toteco Dios
quintzontlamiltis tlajtlacolchihuani queja huetzi se cuahuitl quema
tlaajaca chicahuac, huan ayoc aca quinilnamiquis.
\v 21 Nopa fiero tlacame tlen hueli quinchijtoque sihuame tlen ax
quipiyaj niyon se conetl para quinmanahuis. Ax quintlasojtlaque
cahual sihuame tlen tlaijiyohuíaj.
\p
\v 22 “Pero Toteco Dios ica ihueyi chicahualis quinhuahuatatza
tlapijpiyani huan quinquixtía tlen ni tlaltepactli. Yonque
inijuanti mochihuaj huejhueyi, huelis tlaloch miquise.
\v 23 Yonque Toteco quincahua ma itztoca ica temachili ama huan
quinmaca chicahualistli, quintlachilía ajachica.
\v 24 Yonque ama ax cuajcualme tlahuel mohueyichijtoque, ajsis se
tonal quema Toteco Dios quinechcapanos. Ica se tlalochtli
quintlamiixpolos san se queja panos ica sequinoc. Quintzontequis
queja quitzontequij itlajca nopa trigo.
\p
\v 25 “¿Hueli se acajya quiijtos para ya ni ax melahuac? ¿Ajqueya
hueli quiijtos para san niistlacati huan nimocuapolojtoc?”
\c 25
\s Bildad quiijto axaca huelis mochihuas xitlahuac iixpa Toteco
\p
\v 1 Huajca Bildad, tlen ehua altepetl Súa, quiilhui Job:
\p
\v 2 “Hueyi ichicahualis Toteco Dios huan tlahuel temajmati. Yajaya
quichihua ma onca tlasehuilistli ipan elhuicactli.
\v 3 Quinpiyaj tlahuel miyac ielhuicac ejcahua hasta axaca hueli
quinpohuas. Itlahuil ajsi ipan senquistoc nochi ni tlaltepactli.
\v 4 ¿Quejatza huelis se tlacatl moquetzas huan quiijtos para
itztoc xitlahuac iixpa Toteco Dios? Axaca ipan nochi tlaltepactli
itztoc senquistoc tlapajpactic.
\v 5 Toteco Dios itztoc onpano cuajcualtzi hasta eltoc queja nopa
metztli huan sitlalime ax quipiyaj iniyejyejca huan ax tleno
ininpati iixpa ya.
\v 6 Huajca se tlacatl ax hueli quipiya niyon quentzi ipati iixpa.
Pampa iixpa Toteco Dios, se tlacatl nesi san queja se pilocuiltzi.”
\c 26
\s Job quiilhui Bildad para Toteco nelía hueyi huan temajmati
\p
\v 1 Huajca Job quiilhui Bildad:
\p
\v 2 “Niyon quentzi ax quema tijpalehuijtoc tlen tlaijiyohuíaj. Ax
tijmaquixtijtoc se tlacatl tlen ax quipiya fuerza.
\v 3 ¿Tiquita para nelía tinechtlalnamictijtoc na tlen
nihuihuitic? ¿Tlaque tlen tlalnamiqui tiquijtojtoc?
\v 4 ¿Canque tijpantijtoc ni tlajtoli huan ni tlalnamiquistli tlen
ica ticamati? ¿Ajqueya iaxca nopa tonaltzi tlen mitzpalehuía para
ticamati quej ni?
\p
\v 5 “Mijcatzitzi huihuipicaj ica majmajtli. Tlen itztoque
tlatzintla huan ipan hueyi atl majmahuij.
\v 6 Toteco Dios quintlachilía nochi inijuanti huan quinixmati. Ax
hueli motlatíaj iixpa ya.
\v 7 Toteco quipatlajqui elhuicactli campa ax tleno oncayaya huan ni
tlaltepactli quicuapilo san ajacatipa.
\v 8 Yajaya quitzacua atl ica mixtli huan nopa mixtli ax tzayani
yonque tlahuel etic nopa atl.
\v 9 Quitzacua isiya ica mixtli.
\v 10 Yajaya quitlalilijtoc nopa nepamitl nopa hueyi atl para canque
nesis para panquisas tonati ica ijnaloc huan campa calaquis ica
tlayohua.
\v 11 Itzinpehualtil elhuicactli huihuipica quema Toteco Dios
cualani.
\v 12-13 Ica ihueyi chicahualis quinahuatía nopa hueyi atl tlaque
ma quichihua. Ica iyajatil quitzonpechi nopa hueyi cohuatl tlen
nopona mocahuayaya. Quena, ica ima quitzontlamilti nopa cohuatl tlen
chicahuac motlalohuayaya. Ica iijiyo quiyejyecchijqui elhuicactli.
\p
\v 14 “Nopa elqui itequi tlen más pilsiltzitzi tlen yajaya
quichijtoc. Nelquentzi quinextijtoc ichicahualis. Huajca ¿ajqueya
huelis quiijiyohuis quema Toteco Dios quichihua ma monextis nochi
ihueyi chicahualis huan ichicahualis chicahuac tlatomonis?”
\c 27
\s Job: Nopa tlatzacuiltilistli tlen quiselise ax cuajcualme
\p
\v 1 Job quisenhuiquili camatqui huan quiijto:
\p
\v 2 “Nitlatestigojquetza iixpa Toteco Dios tlen nechquixtilijtoc
nopa tlanahuatili tlen quinamiqui para sesen tlacatl ma quipiya.
Quena, nijtestigojquetza Toteco Tlen Quipiya Nochi Chicahualistli
tlen tlahuel nechyolcocojtoc.
\v 3 Niquijtohua para nochi tonali quema noja niitztos huan Toteco
Dios nechmacas yolistli,
\v 4 ax niquijtos tlen ax cuali, niyon ax niistlacatis.
\v 5 Ax quema niquijtos para xitlahuac tlen inquiijtohuaj hasta
nimiquis. Nijsenhuiquilis niquijtos ax tleno nijchijtoc.
\v 6 Quena, ajachica niquijtos para ax tleno nijchijtoc tlen ax
cuali. Huan noyolo elis tlapajpactic huan ax nechteilhuis nochi
tonali quema noja niitztos.
\p
\v 7 “Nochi nocualancaitacahua ma quiselica nopa tlatzacuiltilistli
tlen quinamiqui para ax cuajcualme.
\v 8 ¿Tlaque noja hueli quichiyas se fiero tlacatl quema Toteco
Dios quiquixtilis iyolis huan quitzontlamiltis?
\v 9 O yonque noja itztoque huan itztose ipan tlaijiyohuilistli,
Toteco Dios ax quinchihuilis cuenta quema quitlajtlanise ma
quinpalehui.
\v 10 Pampa nopa fiero tlacatl ax mopaquilismacac ipan Toteco Tlen
Quipiya Nochi Chicahualistli huan san quiilnamictoc Toteco Dios
quema itztoc ipan tlaohuijcayotl.
\p
\v 11 “Na nimechmachtis tlen ichicahualis Toteco Dios. Ax
nimechtlatilis niyon se tlamantli tlen Toteco Tlen Quipiya Nochi
Chicahualistli huan tlen yajaya quisencajtoc para quichihuas.
\v 12 Yonque ax monequi nimechmachtis ni tlamantli pampa ya cuali
inquimatij tlen ya san queja na. Pero yonque ya inquimatij, tlen
Toteco, intechpohuilíaj nochi ni tlajtoli tlen ax tleno ipati.
\p
\v 13 “Ya ni tlen Toteco Dios quisencajtoc para quinchiyas nochi ax
cuajcualme. Nochi ya ni quiselise fiero tlacame tlen Toteco Tlen
Quipiya Nochi Chicahualistli.
\v 14 Intla ax cuajcualme quinpiyaj miyac ininconehua, nochi
inijuanti miquise ipan tlatehuijcayotl o ica mayantli.
\v 15 Ininconehua tlen noja mocahuase miquise ica se hueyi
cocolistli huan axaca quinchoquilis. Niyon ininsihuajhua tlen
mocahuaj ax quinchoquilise.
\p
\v 16 “Se tlacatl tlen ax cuali hueli quisentilis tomi queja
imiyaca tlaltejpoctli huan quipiyas tlahuel miyac iyoyo.
\v 17 Pero nochi tlen quipiya quitequihuise tlacame tlen xitlahuaque
iixpa Toteco Dios. Tlen ax quichijtoque tlen fiero moxelhuilise
itomi.
\v 18 Huan nopa cali tlen quichijchijqui se fiero tlacatl eltos
queja se tocatzahuali tlen ax quipiya tetili. Tlatlapacatoc ichaj
queja se pilxajcaltzi tlen quichihuaj ipan mila.
\p
\v 19 “Yonque se fiero tlacatl moteca para cochis se
tlapijpixquetl, quema isas, quiitas para ayoc tleno quipiya.
\v 20 Yeca huala ipani se hueyi majmajtli. Huan se ajacatl tlen
tlahuel chicahuac quicuitiquisaqui ica tlayohua.
\v 21 Nopa ajacatl tlen huala ica campa quisa tonati quihuicas nopa
fiero tlacatl huan quiixpolihuiltis. Quihuicas ipan se lugar campa
itztoti para nochipa.
\v 22 Toteco Dios quiitzquis chicahuac huan ax quitlasojtlas yonque
nopa tlacatl quinequisquía mochololtis imaco.
\v 23 Tlacame tzajtzise ica paquilistli huan momatlajtlatzinise
quema miquis nopa fiero tlacatl. Quipinajtise quema Toteco
quimajcahuase para yas ipan nopa lugar campa itztoti para nochipa.
\c 28
\s Nopa tlalnamiquistli tlen melahuac
\p
\v 1 “Tlacame quimatij quejatza quiquixtise nopa plata tepostli
tlen iojhui tlalijtic. Huelij quimoloníaj oro para quichihuase se
oro tlen senquistoc tlapajpactic.
\v 2 Quiquixtíaj nopa hierro tepostli tlen tlalijtic huan
quinmoloníaj tetini para ma quisas tlen senquistoc cobre.
\v 3 Tlacame quimatij quitlahuilise nopa tzintlayohuilotl huan
tlacoyonise ipan tlacacahuaya tlen yahui hasta tlahuel huejcatla.
Nopona quiquixtíaj tepostli huan quitlachixcahuíaj huan quiijitaj
nochi tlamantli tlen onca nepa tlalijtic. Quena, yahuij huejca campa
axaca nemi.
\v 4 Quicoyoníaj se ostotl tlen tlahuel huejcatla huejca tlen
techaj. Moilpíaj ica lazo huan mohuiyonijtiyohuij nepa tlatzintla
ipan nopa ostotl yonque tlahuel mahuilili huan huelis miquise.
\v 5 Ni tlaltepactli iixco techmaca trigo para pantzi, pero nopona
tlatzintla huan tlalijtic eltoc queja panotoc se tlitl tlen nochi
quialtijtoc.
\p
\v 6 “Nopona mopantíaj yejyectzitzi piltetzitzi tlen itoca zafiro,
huan quipantíaj oro tlen maneltic ica tlaltejpoctli.
\v 7 Nelhuejcatla quipantíaj tlamantli tlen pajpatiyo tlen niyon se
tzopilotl o cuajtli ax quema quiitztoc yonque nelía hueli tlachiya
huejca.
\v 8 Niyon se tlapiyali tlen nemi cuatitla ax quema nejnentoc ipan
nopa tlamantli tlen pajpatiyo nepa. Niyon se león ax quema
moquetztoc ininpani.
\v 9 Tlacame ica ininma quitlapanase pedernal tetini tlen ica huelis
tijyolitis tlitl. Quimatij quihuelonise inintzinpehualtil nopa
tepetini.
\v 10 Quicoyoníaj miyac ojtli ipan nopa tetl nopona tlatzintla.
Nopona quipannextíaj nopa piltetzitzi tlen tlahuel pajpatiyo.
\v 11 Quitzacuaj campa pehua nochi atemitl nopona tlatzintla huan
nochi tlen motlatijtoc nopona quiquixtíaj hasta tlalixco campa
tlatlanextli.
\p
\v 12 “Pero yonque tlacame huelij quichihuaj nochi ni tlamantli, ax
quimatij canque quipantise tlalnamiquistli huan tlamachilistli.
\v 13 Tlacame ax quimatij para tlahuel ipati tlalnamiquistli huan ax
mopantía ipan ni tlaltepactli.
\v 14 Nojquiya nopa ostotl tlen tlahuel huejcatla quiijtohua: ‘Nica
ax onca tlalnamiquistli.’ Huan nopa hueyi atl quiijtohua: ‘Niyon
nica ax onca.’
\p
\v 15 “Axaca huelis quicohuas tlalnamiquistli ica miyac tomi tlen
oro o tlen plata.
\v 16 Niyon ax huelis mocohuis tlalnamiquistli ica miyac oro tlen
Ofir, niyon ica miyac tetini tlen pajpatiyo queja ónice huan
zafiro.
\v 17 Tlalnamiquistli tlahuel ipati huan ax queja oro o queja se
diamante tlen más patiyo. Niyon ax huelis tijcohuas ica tetini
patiyo tlen quiquetztoque ipan tlen senquistoc oro.
\v 18 Nopa tetini tlen itoca coral huan jaspe yonque tlahuel
yejyectzitzi ax quiaxilíaj para ica quiixtlahuase tlalnamiquistli
pampa tlalnamiquistli más ipati que nopa piltetzitzi tlen más
patiyo.
\v 19 Nopa tetini tlen itoca topacio tlen tlahuel pajpatiyo huan
quihualicaj tlen tlali Etiopía ax ininpati queja tlalnamiquistli.
Huan niyon ax huelis tijcohuas ica senquistoc oro.
\p
\v 20 “Huajca ¿tlaque hueli tijchihuase titlacame para tijpiyase
tlalnamiquistli? Huan ¿canque tijpantise tlamachilistli?
\v 21 Axaca hueli quipantía pampa eltoc ixtacatzi. Niyon totome
tlen patlantinemij ajacatipa ax huelij quiitaj.
\v 22 Eltoc queja mictla huan miquistli quiijtohuaj: ‘Tojuanti
tijcactoque se quentzi tlen tlalnamiquistli huan campa hueli
mopantis.’
\p
\v 23 “Pero nimitzilhuía Toteco Dios quimati canque mopantía
tlalnamiquistli. Yajaya quimati quejatza tijcuis,
\v 24 pampa yajaya tlachiya hasta campa tlami tlaltepactli huan
quiita nochi tlen onca ipan elhuicactli.
\v 25 Yajaya quichihua ma tlaajaca ica miyac o quentzi
chicahualistli san queja yajaya quinahuatía. Quixolehua nochi atl
ipan hueyi atl.
\v 26 Yajaya quimacac tlanahuatili nopa atl para tlaahuetzis huan
quinextili nopa tlapetlanilotl nopa ojtli para quitoquilis.
\v 27 Huan Toteco teipa quitlachili tlalnamiquistli huan quiyejyeco
ica cuidado. Huan quiquetzqui queja tlen más ipati.
\v 28 Huajca Toteco Dios quej ni quinyolmelahua nochi tlacame:
‘Quema se tlacatl nechimacasi huan nechtlepanita na, niimoTeco Dios,
quinextía nopa tlalnamiquistli tlen nelía melahuac. Huan quema se
quicahua nochi tlamantli tlen ax cuali, quinextía tlamachilistli
tlen nelía xitlahuac.’ ”
\c 29
\s Job quiilnamijqui nopa tonali quema itztoya cuali
\p
\v 1 Job quisenhuiquili camatqui huan quiijto:
\p
\v 2 “Nelcuali elisquía intla sampa hueli nimocuepasquía ipan
nopa tonali quema Toteco Dios nechmocuitlahuiyaya.
\v 3 Achtohuiya yajaya nechtlahuiliyaya ipan noojhui. Huan ica
itlahuil ninejnemiyaya temachtli ipan tzintlayohuilotl.
\v 4 Quema nieliyaya nitelpocatl, Toteco Dios quitiochihuayaya nochi
ipan nochaj huan yajaya elqui queja nonelhuampo.
\v 5 Nelcuali elisquía intla sampa hueli nimocuepasquía ipan nopa
tonali quema Toteco Tlen Quipiya Nochi Chicahualistli noja itztoya
nohuaya huan noconehua nechyahualohuayayaj,
\v 6 huan nochi yahuiyaya cuali. Nohuacaxhua quipixtoyaj miyac lechi
huan nochi cuatini tlen olivo ipan nocuamil quipixtoyaj miyac
aceite.
\p
\v 7 “Niyohuiyaya campa nopa puerta tlen toaltepe campa
mosentilijque para tlasencahuase. Nimosehuiyaya ininhuaya nopa
tlacame tlen más quipixque tlatlepanitacayotl.
\v 8 Quema telpocame nechitayayaj, moiyocaquetzayayaj para ma
nipano. Huehue tlacame nojquiya moquetzayayaj ica tlatlepanitacayotl
quema niajsiyaya.
\v 9 Huan nopa tlayacanca telpocame ax moliniyayaj quema
niajsisquía. San quitlaliyayaj ininma ipan inincamac para
mocamatzacuase hasta na nicamatisquía.
\v 10 Huan nopa tlayacanani tlen itztoyaj ipan nopa altepetl ax
moliniyayaj. San quichiyayayaj notlajtol.
\p
\v 11 “Nochi tlacame tlen quicaquiyayaj notlajtol
nechhueyitlaliyayaj. Nochi tlen nechitayayaj camatiyayaj cuali tlen
na.
\p
\v 12 “Na niquinpalehuiyaya tlen teicneltzitzi ica tlen
quinpolohuayaya. Niquinpalehuiyaya icnotzitzi tlen ax quipiyayayaj
inintlamanahuijca.
\v 13 Na niquinpalehuiyaya tlen nechca eltoya para miquise, huan
inijuanti nechtiochihuayayaj. Cahual sihuame tlen icnotzitzi
niquinpalehuiyaya huan niquinchihuayaya ma yolpaquica.
\v 14 Nochi tlen nijchihuayaya eliyaya xitlahuac huan cuali. Noyolis
elqui xitlahuac. Ax tleno nijnequiyaya ica tlen ax cuali.
\v 15 Na nieliyaya queja niiniixtiyol tlen popoyotzitzi huan queja
niiniicxihua tlen ax huelqui nejnemij.
\v 16 Na nielqui queja niinintata tlen teicneltzitzi huan
niquinmanahui nochi tlen ehuani sequinoc tlaltini.
\v 17 Niquintehuiyaya nochi fiero tlacame tlen tetlaijiyohuiltiyayaj
huan nitemanahuiyaya ininmaco. Elqui queja niquinpostequiliyaya
iniomiyo nopa fiero tlacame queja se quipostequi itlancoch se
tecuani tlen quiitzquitoc itlapiyal.
\p
\v 18 “Huan na nimoilhuiyaya: ‘Temachtli nihuehuejtiyas huan
nimiquis ica paquilistli ipan nochaj. Nijpiyas tlahuel miyac xihuitl
huan se cuali yolistli.
\v 19 Pampa tlen nijchihua quisa cuali. Niitztoc queja se hueyi
cuahuitl tlen quipiya inelhuayo campa onca miyac atl huan sesen
yohuali huetzi ajhuechtli ipan imacuayohua para quiatequis.
\v 20 Mojmostla más nijselía tlatlepanitacayotl huan ajachica
nochicahualis moyancuilis.’
\p
\v 21 “Ipan nopa tonali, tlacame quicaquiyayaj notlajtol huan
quichihuiliyayaj cuenta. Niyon se tlen inijuanti ax moliniyaya hasta
niquinconsejomacac.
\v 22 Huan teipa quema ya san iyojya nicamati, inijuanti ax
nechnajnanquiliyayaj pampa tlahuel quinpactiyaya notlajtol.
\v 23 Queja tlacame ica nochi ininyolo quinequij ma huetzi atl quema
tlahuel tlatotoniya, nochi tlacame tlahuel quichiyayayaj notlajtol.
\v 24 Quema tlacame motzinquixtiyayaj, niquinyolchicahuayaya. Quema
niquinixhuetzquiliyaya, inquinfuerzajmacayayaj ipan inintonal.
\v 25 Niquinilhuiyaya tlen monequi quichihuase. Niquinxitlahuayaya
queja nielisquía niinintlayacanca. Nijchihuayaya queja se
tlanahuatijquetl tlen quinconsejomaca isoldados.
Niquinyolchicahuayaya tlen mocuesohuayayaj.
\c 30
\s Job quiijto para fiero iyolis
\p
\v 1 “Pero ama telpocame tlen ax quipiyaj xihuitl queja na
nechpinajtíaj. Inintatahua ni telpocame ax quinamiquij para
tequitise ininhuaya nochichihua tlen quinmocuitlahuíaj
noborregojhua.
\v 2 Ax tleno ininpati nopa tetatme para na yonque quipiyaj ininma
tlen chicahuac. Ayoc quipiyaj fuerza para quichihuase niyon se
tequitl huan tlahuel huihuitique.
\v 3 Inijuanti cuahuactoque ica mayantli. Ica yohuali yahuij
ininseltitzi ipan huactoc tlali campa ax tleno onca.
\v 4 Nopona quicuaj ixihuiyo cuatini huan quitlatíaj ininnelhuayo
tzontli para mototonilise.
\v 5 Quinquixtijtoque tlen campa itztoque tlacame. Huan quema
quintojtocayayaj, quintzajtzilijtiyajque ica iniica queja elisquía
tlaxtequini.
\v 6 Huan ama nopa huihui tlacame itztoque campa tlacoyoco, campa
huejhueyi ostotl huan campa tetini.
\v 7 Tzajtzitinemij queja tlapiyalime tlen nemij cuatitla, huan
mosentilijtinemij itzintla se tejtzonquilitl para momanahuise.
\v 8 Huan yeca ininconehua nojquiya itztoque huihuitique huan ax
tlaixmatilme. Huan yeca quinquixtijtoque ipan altepetini.
\p
\v 9 “Pero ama ininconehua nechpinajtíaj ica huicatl huan
nechtlaijilhuíaj ica miyac tlamantli para motlahuetzquiltise.
\v 10 Tlahuel nechcualancaitaj huan ax quinequij nechnechcahuise.
Queja quinequij, nechchajchaj ipan noxayac.
\v 11 Toteco Dios quitlalijtoc noyolis campa mahuilili huan
nechechcapantlalijtoc. Ama inijuanti ax nechtlepanitaj huan
nechchihuilíaj tlen inijuanti quinequij.
\v 12 Mosisinijca tlacame motlalanaj para nechchihuilise miyac
tlamantli tlen ax cuali huan quitlalíaj tlaquetztli campa noicxihua
para ma nihuetzi. Nechtehuíaj chicahuac.
\v 13 Ipan noojhui quitlalíaj miyac tlatzacuiltili huan quichihuaj
nochi tlen huelij para ma nechajsi tlen fiero, yonque ya quimatij
para ax nijpiya niyon se tlen huelisquía nechpalehuisquía.
\v 14 Hualahuij ica campa hueli para nechchihuilise tlen fiero. Huan
nimantzi huitonij ipan na quema nihuetztoc.
\v 15 Huajca ama nechitzquitoc se hueyi majmajtli. Huan nochi
nechcualancaitaj huan nochi noricojyo huan nohueyitilis ixpolijtoque
queja se mixtli tlen ixpolihui quema tlaajaca chicahuac.
\v 16 Tlahuel hueyi cuesoli nijpiya ipan noyolo. Nochi tonali
nimotzinquixtía.
\v 17 Nochi yohuali nicuajcualo chicahuac. Nijmati queja se
tlenijqui quicua noomiyohua.
\v 18 Toteco quiitzquía chicahuac noyoyo ipan noquechtla huan eltoc
queja nechijiyomictía.
\v 19 Toteco nechmajcajtoc ipan soquitl. Huan ama niitztoc queja
nielisquía tlaltejpoctli huan cuanextli.
\p
\v 20 “Na nimitztzajtzilía ta, tinoTeco Dios, para xinechpalehui,
pero ax tinechnanquilía. Nojquiya nihuala moixpa, pero ta ax
tinechchihuilía cuenta, niyon ax tijnequi tinechtlachilis.
\v 21 Ta timosisinijtoc ica na huan tinechtojtocatinemi ica nochi
mochicahualis. Tinechtehuía ica nochi moyajatil.
\v 22 Ta tinechmajcajtoc ipan nopa ajcomalacatl huan
tinechtlaijiyohuiltijtoc ica se hueyi ajacatl.
\v 23 Na nijmati para tijnequi ma nimiqui huan tinechhuicas ipan
nopa lugar campa mosentilíaj nochi mijcatzitzi.
\p
\v 24 “Nimoilhuiyaya para se acajya nechpalehuisquía para ma amo
nihuetzi, queja se tlen quitlalana ima o tzajtzi chicahuac para
tlajtlanis tlapalehuili quema se huetzi ipan se tlaijiyohuilistli.
\p
\v 25 “Queja nopa na nijchijqui. Nichocac ininpampa inijuanti tlen
tlaijiyohuiyayaj. Nimocueso ininpampa inijuanti tlen teicneltzitzi
huan ax tleno quipiyayayaj.
\v 26 Yeca na nijchiyayaya tlen cuali, pero hualajqui tlen ax cuali.
Nojquiya nijchiyayaya paquilistli huan tlahuili, pero hualajqui
cuesoli huan tzintlayohuilotl.
\v 27 Noyolo mocuesohua chicahuac huan ax hueli mosiyajcahua.
Tlaijiyohuilistli nechitzquitoc para miyac tonali.
\v 28 Notlacayo ya tlami yayahuixqui, pero ax ica tonati. Huan
nimoquetza para nitetlajtlanis tlapalehuili, pero san tlapic. San
nijpolohua tonali huan nijpolohua noijiyo,
\v 29 pampa nochi tlacame nechitaj queja niiniicni nopa tepechichime
huan queja niininhuampo nopa avestruces totome.
\v 30 Nochi nocuetlaxo ya yayahuixqui huan huetzisnequi. Huan
noomiyohua tliquisaj ica tlatotonilotl.
\v 31 Nochi nopa paquilistli huan huetzquistli tlen nijpiyayaya, ama
mocueptoc cuesoli.
\c 31
\s Job quiijto para yajaya xitlahuac iixpa Toteco
\p
\v 1 “Na nijchijqui se tlajtoli ica noixtiyol para ax nijtlachilis
se ichpocatl para niquixtocas huan nijchihuas miyac tlamantli
ihuaya.
\v 2 Pampa na nijmati tlen temaca Toteco Tlen Quipiya Nochi
Chicahualistli. Yajaya tlen itztoc nepa huejcapa quintiochihua
tlacame tlen nejnemij xitlahuac.
\v 3 Huan quintlatzacuiltía tlen quichihuaj tlen fiero.
\v 4 Huan Toteco quiita nochi tlen nijchihua huan quejatza
nimonejnemiltía.
\p
\v 5 “Na ax niistlacatitoc, niyon ax nitlacajcayajtoc.
\v 6 Ma Toteco nechtlajtolsencahuas intla ax melahuac. Yajaya
quimati cuali para melahuac ax nijchijtoc tlen ax cuali.
\v 7 Ax nimocuapolojtoc huan ax nijcajtejtoc iojhui Toteco. Ax
nitlajtlacolchijqui ipan noyolo ipampa tlen niquitac. Huan intla
nijhuica tlajtlacoli ipan ni tlamantli o ipan sequinoc tlamantli,
\v 8 ma quipixcaca sequinoc tlen nijtoctoc huan tlen ya quipiya
itlajca. Huan sequinoc ma quihuihuitlaca nochi tlen yancuic
nijtoctoc.
\p
\v 9 “Intla se sihuatl nechyoltilantoc ma nitlajtlacolchihua, o
intla nijnequiyaya niitztos ihuaya isihua nocalnechca,
\v 10 huajca ma nimiqui huan nosihua ma yahui sejcoyoc huan ma
mocuili seyoc tlacatl.
\v 11 Pampa se hueyi tlajtlacoli para tiquixtocas seyoc sihuatl.
Intla se tlacatl quichihuas nopa tlaixpanoli, quinamiqui
quitlatzacuiltise tetlajtolsencahuani.
\v 12 Tlaixtoquilistli eltoc queja se tlitl tlen
nechtlamitlatisquía huan nechmajcahuasquía hasta mictla. Nojquiya
quitlamiltisquía nochi tlen nijpiya.
\p
\v 13 “Intla ax niquinchihuilijtosquía tlen xitlahuac ica nochi
notlatequipanojcahua huan ax niquintlacaquilijtosquía,
\v 14 ¿quejatza nimoixnextisquía iixpa Toteco? ¿Quejatza
nijnanquilisquía quema nechtlajtlanisquía cuenta?
\v 15 Pampa yajaya Toteco Dios tlen nechchijchijqui na huan yajaya
nojquiya quichijchijqui notlatequipanojca. Nochi tiome yajaya
techchijchijqui.
\p
\v 16 “Ax quema niquinchihuili tlen fiero nopa teicneltzitzi, niyon
ax quema niquincuesolmacac cahual sihuame.
\v 17 Na nochipa niquintlamacac tlen icnotzitzi. Ax quema niitztoya
niitzcuinti.
\v 18 Hasta quema nieliyaya nitelpocatl, na niquinmocuitlahui
icnotzitzi ipan nochaj huan niquinitayaya queja elisquía noconehua.
Huan niquinconsejomacac cahual sihuame.
\v 19 Nijyoyonti tlen secmiquiyayaj huan niquinmacayaya yoyomitl,
\v 20 o tlaquemitl tlen iniijhuiyo noborregojhua para ica ma
mopiquica. Huan inijuanti nechtlascamatiyayaj.
\v 21 Ax quema nijcocojtoc se tlen icnotzi san pampa nimoilhui axaca
nechtlajtlanis cuenta.
\v 22 Intla nijchijtoc se tlen nochi ni tlamantli, ma postequi
noajcol campa tlatzquitoc huan ma huetzi tlalchi noma.
\v 23 Pero na tlahuel niquimacasiyaya itlatzacuiltil Toteco. Intla
yajaya cualanisquía ica na ica nochi ichicahualis, ¿tlaque
nijchihuasquía?
\p
\v 24 “Ax nimotemachijtoc ipan notomi, niyon ax niquixtocatoc oro.
\v 25 Ax quema nimopaquilismacayaya ipan notomi o nimoilhuiyaya para
noja más nimoricojchihuasquía.
\v 26 Ax nijtlachilijtoc ne tonati tlen tlahuía ipan elhuicac o
nopa metztli tlen yahui ipan iojhui yejyectzi,
\v 27 huan ixtacatzi niquinhueyichijqui ipan noyolo. Ax quema
niquintitlanili tlatzoponijcayotl ica noma ica huejca.
\v 28 Yajaya nopa elisquía se hueyi tlajtlacoli huan quinamiqui
quiselis tlatzacuiltili. Ax tleno tlen ni tlamantli nijchijtoc. Ax
niquixpanotoc Toteco tlen itztoc elhuicac.
\p
\v 29 “Na ax nipajqui quema nohuampo mopantiyaya ipan
tlaijiyohuilistli huan tlaohuijcayotl.
\v 30 Ax quema nijtelchijqui se tlacatl niyon ax nimomacuepqui ica
nocualancaitacahua.
\v 31 Niyon se notlatequipanojca ax nijcajqui ma quipano mayantli.
\v 32 Nochipa niquincahuili sejcoyoc ehuani ma cochica nocalijtic.
Nochipa nijtlapohuayaya nopuerta para tlen hueli nejnenquetl.
\v 33 Ax nijchijtoc campeca para nijtlatis notlajtlacolhua ixtacatzi
queja quichijqui Adán.
\v 34 Ax quema niquinimacasqui tlacame huan nimotlatiyaya calijtic.
Ax quema niquinimacasqui nochaj ehuani tlen nechcualancaitaj.
Nochipa nimocuatotoni para nijpalehuis se nohuampo.
\p
\v 35 “Cuali elisquía para se acajya nechtlacaquilisquía huan
quimachilisquía tlaque nijmati ipan noyolo. Na nijnequi
nimomanahuis ipan ni tlamantli huan nijtlalis nofirma ipan
notlajtol. Nijnequisquía para Toteco Tlen Quipiya Nochi
Chicahualistli ma nechnextili intla melahuac nimocuapolojtoc. Yajaya
ma quiijto intla melahuac tlen quiijtohuaj nocualancaitacahua. Ma
quiijcuiloca tlen ica nechteilhuía yaja tlen nechteilhuía.
\v 36 Nechpactisquía para san nijmatis tlen ica nechtelhuía.
Nijpatiitasquía queja se yejyectzi corona pampa tlahuel nijnequi
nijmatis.
\v 37 Na niquilhuisquía notlatelchijca nochi tlen nijchijtoc huan
para tlen nijchijqui. Huan iixpa ya nijchihuasquía campeca para
nimomanahuis queja nimonextiyaya iixpa se tequihuejquetl.
\p
\v 38 “Quinamiqui ma nechtlatzacuilti intla nomilhua
nechteilhuisquíaj huan elisquía ipan cuesoli,
\v 39 huan quiijtosquía para niquichtequilijtoc itlajca o
niquinmictijtosquía nopa tlacame tlen iniaxca nopa tlali huan tlen
nechtlanejtiyaya.
\v 40 Intla queja nopa nijchijtoc ma temaca huitztli notlal huan ax
trigo. Ma temaca xihuitl tlen ax cuali huan ax cebada.”
\p Hasta nica tlanqui camati Job.
\c 32
\s Eliú quiilhui Job para Toteco quinextía tlajtlacoli
\p
\v 1 Nopa eyi tlacame ayoc quinanquilijque Job pampa Job noja
quinilhuiyaya para ax quihuica tlajtlacoli.
\p
\v 2 Huajca Eliú cualanqui ica Job. Eliú elqui icone Baraquel huan
iixhui Buz; huan hualayaya ipan ihueyi familia Ram. Cualanqui pampa
Job ax quinequiyaya quiijtos para melahuac tlajtlacolchijtoya. Niyon
ax quiijtohuayaya para quinamiqui nopa tlatzacuiltili tlen Toteco
quititlanilijtoya.
\v 3 Huan nojquiya Eliú cualanqui ica nopa eyi ihuampoyohua Job
pampa ax quimatiyayaj quejatza quinanquilise huan san achi más
quiteilhuiyayaj.
\v 4 Eliú quinchixtoya nopa eyi para tlamise camatij pampa itztoyaj
más huehuentzitzi que ya.
\v 5 Pero quema quinitac para inijuanti ayoc huelque quinanquilíaj,
camatqui ica cualantli,
\v 6 huan quinilhui:
\p “Na noja nitelpocatl huan imojuanti ya inhuehuentzitzi. Yeca
nimochixtoc pampa ax nimotemacayaya niquijtos tlen nimoilhuiyaya.
\v 7 Nochi quiijtohuaj para tlen huehuentzitzi itztoque más
tlalnamiquij, yeca ma camatica achtohui.
\v 8 Pero tlacame itztoque tlalnamiquini pampa quipiyaj itonaltzi
Toteco ipan ininyolo. Quipiyaj iijiyo Toteco Tlen Quipiya Nochi
Chicahualistli.
\v 9 Ax itztoque tlalnamiquini san pampa quipiyaj miyac xihuitl.
Huan tlen huehuentzitzi ax nochipa quimachilíaj tlen xitlahuac.
\v 10 Huajca nimechilhuía, xinechtlacaquilica se tlalochtli huan
xinechcahuilica ma niquijtos tlen nimoilhuijtoc.
\p
\v 11 “Nimochixtoc huan ica miyac cuidado nijtlacaquilijtoc nochi
imotlajtol hasta quema pejqui incamatij.
\v 12 Huan ipan nochi tlen nijtlacaquilijtoc, niyon se tlen
imojuanti ax inquiixcoilhuijque Job para melahuac yajaya se
tlajtlacolchijquetl. Niyon axaca quinanquilijtoc itlatzintoquil
queja quinamiqui.
\v 13 Huan amo xinechilhuica para Job itztoc más tlalnamictoc que
imojuanti o para san Toteco huelis quinextilis se tlajtlacolchijca
tlacatl para tlajtlacolchijtoc.
\v 14 Intla Job monajnanquilijtosquía nohuaya, ax na
nijnanquilisquía queja inquinanquilijtoque.
\p
\v 15 “Job, ni eyi mohuampoyohua momajmatijtoque huan ayoc quimatij
tlaque quiijtose.
\v 16 Na niquinchixtoc ma camatica, pero inijuanti ayoc moliníaj
huan ayoc mitznanquilíaj.
\v 17 Huajca na nojquiya niquijtos tlen nimoilhuijtoc,
\v 18 pampa nijpiya miyac tlajtoli tlen monequi niquijtos, huan
notonaltzi nechchihualtía ma nicamati.
\v 19 Niitztoc queja se yancuic cuetlaxtli tlen temitoc ica xocomeca
atl huan ya quinequi tzayanis. Huan queja nopa nojquiya na nitemitoc
ica tlajtoli hasta tzayanisnequi noyolo.
\v 20 Monequi nicamatis para nicaxanis se quentzi. Huajca
xinechcahuilica ma nicamati.
\v 21 Axaca nijchicoicnelis, niyon ta, niyon ne eyi. Niyon axaca
nijyejyectlalis ica notlajtol.
\v 22 Pampa intla nijhueyimati se huan seyoc axtle, Toteco tlen
nechchijqui nechchihuasquía nihuetzis nimictoc.
\c 33
\s Eliú quitlateilhui Job
\p
\v 1 “Job, na nimitztlajtlanía xijtlacaquili tlen nimitzilhuis.
\v 2 Na nipejtoc nicamati, huajca xinechcahuili ma nijsenhuiquilis.
\v 3 Huan niquijtos nochi tlen senquistoc xitlahuac huan tlen
melahuac.
\v 4 Itonaltzi Toteco nechchijchijqui. Quena, Toteco Tlen Quipiya
Nochi Chicahualistli quiquixti iijiyo huan ica iijiyo nechmaca
yolistli.
\v 5 Ximocualtlali huan xinechnanquili nimantzi intla tihueli.
\p
\v 6 “Na nojquiya niitztoc san se queja ta iixpa Toteco. Na
nojquiya nitlachijchihuali ica soquitl queja ta.
\v 7 Huajca amo xinechimacasi na pampa na ax nieli se tlacatl tlen
quipiya hueyi tequihuejcayotl para ica nimitzmajmatis o
nimitzchihuas xihuihuipica.
\p
\v 8 “Na nimitztlacaquilijtoya quema tiquijto,
\v 9 para titlapajpactic huan ax tleno ax cuali tijchijtoc.
Tiquijtojtoc tixitlahuac huan ax tijpiya tlajtlacoli.
\v 10 Tiquijtohua para Toteco san quitemohua quejatza huelis
quipantis se tlajtlacoli para mitzitas queja tiicualancaitaca.
\v 11 Nojquiya tiquijtojtoc para Toteco quicalaquijtoc moicxihua
ipan cuahuitl para quintetzopas, huan mitztlachilía sesen huelta
quema timolinía.
\p
\v 12 “Xiquita, ya ni tlen na nimitzilhuía. Melahuac
titlajtlacolchijtoc pampa amo xitlahuac ticamatitoc tlen Toteco.
Toteco Dios itztoc más hueyi que se tlacatl.
\v 13 Huajca ¿para tlen tijteilhuía ica tlen ax cuali pampa yajaya
ax mitzyolmelahua para tlen mitztlatzacuiltía?
\p
\v 14 “Toteco Dios technojnotza ajachica, pero tojuanti ax
tijmachilíaj.
\v 15 Quemantzi technojnotza ipan se temictli, o ipan se tlanextili
ica tlayohua quema tlacame tlahuel cochtoque ipan inintlapech.
\v 16 Toteco tecamahuía para quinconsejomacas huan para
quinmajmatis ica tlen panos teipa.
\v 17 Quinnotza tlacame para quinyolcuepas tlen inintlajtlacolhua
huan para ma ax mohueyimatica.
\v 18 Nojquiya quinmanahuía ininyolis para ax huetzise imaco tlen
ax cuali huan para ax yase mictla.
\p
\v 19 “Pero nojquiya quemantzi Toteco quixitlahua se tlacatl ica
cocolistli huan tlacuajcualocayotl ipan nochi itlacayo, yonque ax
quipostequi niyon se iomiyo.
\v 20 Huan nopa cocoxquetl ayoc tleno quiixtocas para quicuas yonque
tlahuel ajhuiyac nopa tlacualistli pampa ayoc mayanas.
\v 21 Queja nopa, nopa tlacatl mocahuas tlahuel cuahuactoc huan san
omitl,
\v 22 huan monechcahuis nopa tonal para miquis huan quitlalpachose.
\p
\v 23 “Pero intla itztosquía se tlayolmelajquetl tlen elhuicac
tlen momaijtosquía ica Toteco huan quinextisquía para nopa tlacatl
itztoc xitlahuac,
\v 24 huajca Toteco quitlasojtlasquía huan quiilhuisquía
itlatequipanojca: ‘Xijmajcahuaca ma yahui nopa tlacatl. Amo
xijchihuaca ma miqui pampa nijpantijtoc seyoc tlen tlaxtlahuas ica
ipatlaca iyolis.’
\v 25 Huan huajca itlacayo nopa tlacatl mochicahuas queja se conetl
itlacayo. Quipiyas chicahualistli queja se telpocatl.
\v 26 Huan quema momaijtos, Toteco quitlacaquilis huan quiicnelis.
Huan yajaya moixtlachilis ica Toteco huan huicas ica miyac
paquilistli. Huan Toteco sampa quiijtos para xitlahuac huan
quitiochihuas miyac.
\v 27 Huan nopa tlacatl quinilhuis ihuampoyohua:
‘Nitlajtlacolchijqui huan nitlaixpanotoc, pero Toteco ax nechmacac
tlen quinamiqui.
\v 28 Toteco nechmanahui tlen miquistli, huajca noja niitztos ipan
ni tlaltepactli ipan tlahuili.’
\p
\v 29 “Quena, Toteco quichihua ya ni miyac huelta para quinojnotzas
se tlacatl.
\v 30 Yajaya quimanahuía ialma tlen miquistli para huelis itztos
ininhuaya tlen yoltoque nica campa tlahuili.
\v 31 Ximomaca cuenta tlen niquijtohua, Job. Xinechtlacaquili huan
noja xinechcahuili ma niquijto se ome tlajtoli.
\v 32 Pero intla ta tijnequi tiquijtos se tlajtoli, huajca xiquijto.
Huan na nijtlacaquilis huan nimitzilhuis intla xitlahuac o axtle.
\v 33 Huan intla ax tleno tijnequi tiquijtos, huajca
xinechtlacaquili. Amo ximolini huan na nimitzmachtis para
titlalnamiquis.”
\c 34
\s Eliú quiijto Job mohueyimati
\p
\v 1 Teipa Eliú sampa camatqui huan quiijto:
\p
\v 2 “Xinechtlacaquilica intlacame tlen intlalnamiquij huan tlen
intlaixmatilme.
\v 3 Hueli tijtlapejpenise tlaque cuali para tijtlacaquilise ica
tonacas, queja ica tocamac hueli tijtlapejpenise tlaque tlacualistli
eltoc ajhuiyac.
\v 4 Huan queja nopa nojquiya monequi tijtlapejpenise tlen ojtli
eltoc xitlahuac para ipan tinejnemise. Ma timomachtica san sejco
tlen eltoc cuali.
\v 5 Pampa Job quiijtojtoc para itztoc xitlahuac, pero Toteco Dios
ax quitlajtolsencahua queja xitlahuac.
\v 6 Quiijtohua para yonque ax tleno quichijtoc, Toteco quitocajtía
se istlacatiquetl. Quiijtohua para yonque ax tlajtlacolchijtoc,
Toteco quitlatzacuiltía nelchicahuac.
\p
\v 7 “¿Canque itztoc seyoc tlacatl tlen mohueyimati queja Job? San
quinequi quiijtos tlen ax tleno ipati.
\v 8 Yajaya nemi ica tlacame tlen quichihuaj tlen fiero. Quitemohuaj
ax cuajcualme para ihuampoyohua.
\v 9 Job quiijtojtoc para san tlapic para se tlacatl quichihuas
campeca para quipaquilismacas Toteco.
\p
\v 10 “Huajca imojuanti tlen intlalnamiquij, xinechtlacaquilica.
Nochi inquimatij para Toteco Tlen Quipiya Nochi Chicahualistli ax
tlajtlacolchihua, niyon ax tlaixpano.
\v 11 Yajaya quintlaxtlahuía nochi tlacame queja quinamiqui ica
tlen ax cuali quichijtoque huan queja nopa ojtli tlen ipan nemi.
\v 12 Huan tijmatij melahuac para Toteco ax quema quichihua tlen ax
cuali. Nochipa Toteco Tlen Quipiya Nochi Chicahualistli
tetlajtolsencahuas queja quinamiqui.
\v 13 Axaca quimacac Toteco tequihuejcayotl ica ni tlaltepactli
pampa elqui ya tlen quisencajqui ni tlaltepactli.
\v 14 Huan intla Toteco Dios quiquixtilisquía Itonaltzi ipan
tlaltepactli huan ayoc techmacasquía iijiyo para ma
titlaiyotilanaca,
\v 15 nochi tlacame miquisquíaj huan mocuepasquíaj tlaltejpoctli.
\p
\v 16 “Huajca xinechtlacaquili huan xijchihua campeca para
tijmachilis tlen nimitzilhuis.
\v 17 ¿Huelis tlanahuatis Toteco intla yajaya ax quinequi
quichihuas tlen xitlahuac? ¿Huelis ta tijtelchihuas nopa
Tetlajtolsencajquetl Tlen Quipiya Nochi Chicahualistli?
\v 18 Yajaya Toteco Dios tlen quinilhuía nopa tlanahuatiani huan
tlayacanani: ‘Fiero imonemilis huan ax inquichihuaj tlen xitlahuac.’
\v 19 Yajaya ax quinchicoicnelía tlacame. San se quinchihuilía
tlen huejhueyi, tlen tlapijpiyani huan tlen teicneltzitzi pampa
yajaya quinchijqui nochi tlacame.
\v 20 Nochi tlacame san itztoque para se tlalochtli huan nimantzi
miquij. Tlajco yohual huihuipicaj huan tlaloch miquij. Nojquiya
tlaloch miquij tlacame tlen quipiyaj chicahualistli yonque axaca
quitlalijtoc ima.
\p
\v 21 “Toteco Dios ica miyac cuidado quitlachilía nochi tlen
tlacame quichihuaj ipan ni tlaltepactli. Yajaya quinita nochi.
\v 22 Ax onca se tzintlayohuilotl yonque tlen más yayahuic campa
tlacame tlen quichihuaj tlen ax cuali hueli motlatise iixpa Toteco
Dios.
\v 23 Ax itequi se tlacatl para quiijtos quema yajaya yas iixpa
Toteco para yajaya ma quitlajtolsencahuas.
\v 24 Huan Toteco Dios axaca monequi quitlajtlanis caquihuili para
quitzontlamiltis se tequihuejquetl huan quitlalis seyoc ipan ilugar.
\v 25 Yajaya quitlachilía nochi tlen quichihuaj huan ipan san se
yohual quintepexihuía huan quintzontlamiltía.
\v 26 Quemantzi quintzontlamiltía fiero tlacame tonaya iniixpa
nochi tlacame,
\v 27 pampa quitlahuelcajtoque Toteco Dios huan ayoc nejnemij ipan
iojhui.
\v 28 Huelis inijuanti quintlaijiyohuiltijtoque tlen teicneltzitzi,
pero tlen teicneltzitzi quitzajtzilijque Toteco Dios, huan yajaya
quincajqui. Toteco quipactía quintlacaquilis tlen tlaijiyohuíaj.
\v 29 Pero intla Toteco ax quinequi camatis, ¿ajqueya huelisquía
quiteilhuis ya? ¿Intla yajaya moixtlatis, ajqueya huelis quipantis?
Yajaya itztoc tlen quitzacuilía se fiero tlacatl,
\v 30 para ma ax tlanahuatis ipan se tlali huan ma ax hueli quitlali
se tlaquetztli para itlacajhua.
\p
\v 31 “¿Para tlen se tlacatl queja ta ax quiilhuía Toteco Dios:
‘Nitlajtlacolchijtoc, pero ayoc nijchihuas’?
\v 32 O quiilhuis: ‘Xinechnextili nopa tlaixpanoli tlen nijchijtoc
pampa ax nijmati. Intla nitlajtlacolchijtoc, xinechilhui quejatza
huan ayoc nijchihuas.’
\p
\v 33 “¿Timoilhuía para monequi Toteco Dios ma mitztlaxtlahuis
queja ta mitzpactía quema noja ax tijnequi timoyolcuepas tlen
motlajtlacolhua? Ta huan ax na tlen monequi tijtlapejpenis tlen
tijchihuas huan monequi timoyolcuepas. Huajca xinechilhui tlaque
timoilhuía.
\v 34 Tlacame tlen tlalnamiquij huan tlacame tlen miyac
quimachilíaj nechilhuise,
\v 35 para ta tiJob, ax tijmati tlen tiquijtohua pampa ax
titlamachilía.
\v 36 Quinamiquiyaya tijselis se tlatzacuiltili tlen hueyi pampa
ticamatqui tlen Toteco Dios queja quichihuasquía se fiero tlacatl.
\v 37 Huajca ama ax san tijhuica tlajtlacoli ica tlen tijchijqui
achtohuiya, pero nojquiya timohueyimajtoc huan tijtlaijilhuijtoc
Toteco Dios ica miyac tlamantli.”
\c 35
\s Eliú quiijto para ax hueli tijtlaijilhuise Toteco
\p
\v 1 Eliú quisenhuiquili camati huan quiilhui Job:
\p
\v 2 “¿Huelis timoilhuía xitlahuac quema tiquijtohua para
tiitztoc cuali iixpa Toteco Dios?
\v 3 Huan teipa tiquijtohua: ‘¿Para tlen ipati intla
nitlajtlacolchihua?’
\p
\v 4 “Na nimitznanquilis ta huan nochi mohuampoyohua huan
nimechilhuis para tlen ipati.
\v 5 Xijtlachili elhuicactli huan mixtli huan timomacas cuenta para
tlahuel más huejcapa que ta.
\v 6 Intla titlajtlacolchihuas, ¿tlaque tijchihuilis Toteco? Yonque
titlajtlacolchihuasquía ajachica, motlajtlacol ax quitlanahuisquía
Toteco Dios.
\v 7 Huan intla timonejnemiltis xitlahuac, yajaya ax tleno quitlani
mopampa ta. ¿Tlaque regalo hueli tijmacas ta?
\v 8 Motlajtlacolhua quintlanahui sequinoc tlacame queja ta, huan
quema tijchihua tlen cuali, elis senquistoc tlacame tlen
tiquinpalehuía.
\p
\v 9 “Teicneltzitzi tzajtzij quema tlaijiyohuíaj ininmaco tlacame
tlen quipiyaj más chicahualistli. Quitemohuaj se acajya ma
quinmanahui.
\v 10 Pero ax quitzajtzilíaj Toteco Dios huan quiijtohuaj:
‘¿Canque itztoc Toteco Dios tlen techchijchijqui huan tlen temaca
paquilistli ipan tlaohuijcayotl?
\v 11 ¿Canque itztoc yajaya tlen techchihuilía achi más ma
tijpiyaca tlalnamiquistli que tlapiyalime huan totome?’
\p
\v 12 “Huan quemantzi tlacame quitzajtzilíaj Toteco Dios huan
yajaya ax quinnanquilía, pampa inijuanti tlahuel mohueyimatij o
quichihuaj tlen fiero.
\v 13 Pero ax quinamiqui intla tiquijtose para Toteco Tlen Quipiya
Nochi Chicahualistli ax quintlacaquilía huan ax quinchihuilía
cuenta tlen ajachica quitzajtzilíaj.
\v 14 Huan ax neli nojquiya intla tiquijtose para Toteco Dios ax
quiita nochi tlen pano. Toteco quimati tlaque tijchijtoc huan
mitzchihuilis tlen xitlahuac intla timochiyas ipan ya.
\v 15 ¿Ticualani ica ya san pampa ax mitznanquilía nimantzi huan
ax quincualancaita nochi fiero tlacame?
\v 16 Job, ticamatitoc queja se tlen huihuitic. Ticamatitoc miyac
pero ax tijmati tlen tiquijtohua.”
\c 36
\p
\v 1 Eliú quisenhuiquili camatqui huan quiijto:
\p
\v 2 “Xijpiya moyolo huan xinechcahuili ma nimitzcamahui seyoc
tlalochtli para nimitznextilis tlen melahuac. Noja nijpiya se ome
tlajtoli para nijtenpalehuis Toteco Dios.
\v 3 Nijtequihuis nochi notlalnamiquilis huan nimitzmacas se
tlamachtili tlen mitznextilis para Toteco Dios tlen nechchijqui
nelía quichihua tlen xitlahuac.
\v 4 Na nimitzilhuía nochi tlen melahuac pampa nijpiya miyac
tlalnamiquistli tlen tlahuel cuali.
\p
\v 5 “Nelía hueyi Toteco Dios, pero axaca quinhuejcamajcahua.
Yajaya quipiya nochi chicahualistli huan nochi tlamachilistli.
\v 6 Yajaya ax quincahuilía ma itztoca tlacame tlen fiero, pero
quinmaca teicneltzitzi tlen xitlahuac.
\v 7 Toteco Dios nochipa quinmocuitlahuía tlen xitlahuaque iixpa.
Yajaya quinhueyitlalía huan quinsehuía ininhuaya tlanahuatiani
para tlanahuatise para nochipa.
\v 8 Huan intla hualas ininpani tlaohuijcayotl huan
tlaijiyohuilistli,
\v 9 Toteco Dios quinnextilía nopa tlajtlacoli tlen quichijque huan
quejatza mohueyimajtoque.
\v 10 Quinpalehuía para ma quitlacaquilica itlajtol para ma
moxitlahuaca. Quinahuatía ma moyolcuepaca huan ma quicahuaca
inintlajtlacolhua.
\p
\v 11 “Intla inijuanti quitlacaquilise huan quitlepanitase tlen
quiijtohua, Toteco Dios quintiochihuas huan inijuanti quipiyase
paquilistli ipan nochi ininyolis huan nochi tlen quichihuase quisas
cuali.
\v 12 Pero intla inijuanti ax quichihuilise cuenta, miquise ica
machete pampa ax quipixque tlalnamiquistli.
\v 13 Pampa fiero tlacame quicualancaitaj Toteco Dios. Ax mocuepaj
ica ya, niyon ax quinotzaj ma quinpalehui quema yajaya
quintlatzacuiltía.
\v 14 Fiero tlacame miquij quema noja telpocame pampa quichihuaj
tlen hueli ica sequinoc tlacame nopona campa quihueyichihuaj
teteyome.
\v 15 Ipampa inintlaijiyohuilis Toteco quinmaquixtis tlacame.
Quinchihua ma quitlacaquilica huan ma moyolcuepaca tlen
inintlajtlacolhua.
\p
\v 16 “Toteco nojquiya quinequi mitzmanahuis huan mitziyocatlalis
tlen nochi tlamantli tlen mahuilili. Quinequi mitzhuicas ipan se
hueyi tlamayamitl campa mitzhueyitlalisquía ipan mochaj ica nochi
tlacualistli tlen más cuali.
\v 17 Pero ta tlahuel ticualantoc ica tlen tlajtlacolchihuaj, huan
tiquijtohua monequi Toteco quintlatzacuiltis. Huajca xijmati para
quinamiqui Toteco Dios mitztlatzacuiltis nojquiya.
\v 18 Pero xijpiya cuidado para axaca mitzyoltilanas ica tomi para
tijchihuas tlen fiero. Amo xijcahuili se tlaxtlahuili ma
mitzchihuili titlajtlacolchihuas.
\v 19 ¿Timoilhuía para motomi huan mochicahualis mitzmanahuis para
ax tijselis tlaijiyohuilistli tlen Toteco?
\p
\v 20 “Amo xijnequi ma eli yohuali quema tlacame quinhuahuatatza
tlacame tlen ininchaj para quinchihuaj miyac tlamantli tlen fiero.
\v 21 Ximoiyocatlali tlen nochi tlamantli tlen ax cuali. Toteco
quititlanqui ni tlaijiyohuilistli ipan ta para mitzcuepase tlen se
yolis tlen fiero.
\s Eliú quiijto Toteco quipiya nochi chicahualistli
\p
\v 22 “Toteco Dios quipiya nochi chicahualistli. Axaca seyoc
tlamachtijquetl tlen tlamachtía queja ya.
\v 23 Axaca huelis quiilhuis Toteco Dios tlaque ojtli ma quitoquili.
Axaca huelis quiilhuis para ax cuali tlen quichihua.
\v 24 Más cuali xijhueyichihua ipampa nochi huejhueyi tlamantli
tlen yajaya quichijtoc ica ichicahualis. Xijhueyichihua ica huicatl.
\v 25 Nochi tlacame huelij quiitaj nopa huejhueyi tlamantli tlen
yajaya quichijtoc, yonque san quiitaj itequi Toteco tlen huejca.
\p
\v 26 “Toteco Dios nelía hueyi huan yeca tojuanti ax tiyajatij
tijtlamiixmatij. Niyon axaca hueli quipohua quesqui xihuitl quipiya.
\v 27 Toteco quichihua ma tlejco nopa apoctli huan teipa quichihua
ma huetzi atl ipan tlaltepactli.
\v 28 Tlen nopa mixtli, Toteco quichihua ma huetzi atl tlen cuali
para ma atlica nochi tlacame.
\v 29 ¿Hueli se tlacatl quimachilis quejatza momoyahua mixtli huan
quejatza hualtemos nopa tlatomonilotl?
\v 30 Xiquita quejatza Toteco quisemana tlapetlanilotl para
quiyahualos campa itztoc. Xiquita quejatza quintlahuilía hasta
tlatzintla ipan hueyi atl.
\v 31 Ica ihueyi chicahualis, quinahuatía ni tlaltepactli huan
temaca inintlacualis hasta mocahua.
\v 32 Ipan ima quipixtoc miyac tlapetlanilotl huan quinmajcahua
campa yajaya quinequi.
\v 33 Quema tlatomoni, techyolmelahua para huala miyac atl tlen
huetzis chicahuac. Huan nopa chicahualistli technextilía
icualancayo Toteco huan quinyolmelahua tlajtlacolchihuani para ma
moyolcuepaca.
\c 37
\p
\v 1 “Huan quema nimoilhuía tlen ya ni, nechmajmatía huan
quichihua ma huihuipica noyolo.
\v 2 Xijtlacaquilica itos Toteco Dios tlen eltoc queja
tlatomonilotl.
\v 3 Itos ajsi campa hueli ipan elhuicactli, huan itlapetlanilo ajsi
ica chicahualistli campa hueli ipan tlaltepactli.
\v 4 Teipa huala nopa tlatomonilotl tlen technextilía Toteco Dios
ihuextilis. Quema yajaya camati, quichihua ica nochi ichicahualis.
\v 5 Nelía yejyectzi tijcaquij itos quema tlatomoni. Yajaya
quichihua huejhueyi tlamantli tlen tojuanti ax tijmachilíaj.
\p
\v 6 “Yajaya quinahuatía nopa sitlal setl ma huetzi ipan
tlaltepactli. Quiilhuía atl tlen huetzi chicahuac para ma
tlaahuetzis cuali.
\v 7 Nochi tlacame quicahuaj inintequi huan san mocahuaj ipan
ininchaj para quiixmatise ihueyi chicahualis.
\v 8 Tlapiyalime tlen nemij ipan cuatitlamitl motlatíaj campa
tetini huan campa inintepasol.
\v 9 Huala atl chicahuac tlen elhuicac huan nopa ajacatl quihualica
se tlasesecayotl tlen chicahuac.
\v 10 Iijiyo Toteco Dios quititlani setl. Quichihua miyac atl ipan
hueyi atl ma mochihua setl.
\v 11 Yajaya quitemitía nochi mixtli ica atl huan tlen nopa mixtli
quititlani nopa tlatlatzini tlapetlanilotl campa hueli.
\v 12 Toteco Dios quimajcahua nopa fiero tlapetlanilotl ica ima.
Huan quinhualtitlani ipan nochi ni tlaltepactli para ma quichihuaca
tlen yajaya quinequi.
\v 13 Quemantzi Toteco Dios quititlani nopa miyac atl para ica
quintlatzacuiltis tlacame, o huelis para ica quintiochihuas, o
huelis san para quiatequilis itlaltepac.
\p
\v 14 “Job, xijtlacaquili ni. Xijchiya se tlalochtli huan
ximoyolilhui tlen nopa huejhueyi chicahualis nescayotl tlen Toteco
Dios quichihua.
\v 15 ¿Tijmati quejatza Toteco Dios quinahuatía nochi atl ma
huetzi chicahuac huan quejatza quichihua ma tlapetlani tlen mixtli?
\v 16 ¿Tijmati quejatza ne mixtli eltoc san ajacatipa huan ax
huetzi hasta tlalchi? Tojuanti tijsentlachilíaj ica nochi
itlalnamiquilis.
\v 17 ¿Tijmati ta para tlen tipatzmiqui ica tlajcotona quema
tlailpitza nopa ajacatl tlen huala ica tlani?
\v 18 ¿Ta tijpalehui Toteco para quipatlahuas elhuicactli queja se
hueyi tescatl tlen tlahuía?
\p
\v 19 “Ta tlen tiquijtohua tijmati nochi, xitechnextili quejatza
timonechcahuise ica Toteco Dios, pampa tojuanti ax tijmatij. Eltoc
queja tiitztoque ipan tzintlayohuilotl.
\v 20 ¿Huelis niquilhuis para na nijnequi nijcamahuis? Pero
¿ajqueya quinequisquía quicamahuis se queja ya tlen huelis
quitolos noja yoltoc?
\v 21 Quema nopa ajacatl quiquixtía nopa mixtli, tojuanti niyon ax
tihuelij tijtlachilitij tonati pampa tlahuel tlahuijtoc.
\v 22 Toteco Dios huala tlen norte huan yahualtic quipixtoc
itlatlanex tlen tlahuel tlahuía. Toteco huala ica nochi ihuextilis
tlen tlahuel temajmatía.
\v 23 Ax hueli tijmachilíaj iyajatil Toteco Tlen Quipiya Nochi
Chicahualistli, pero yajaya nelía xitlahuac huan tlahuel quipiya
tetili. Techtlasojtla, huan yeca ax techtzontlamiltía.
\v 24 Yeca nochi tlacame campa hueli, quiimacasij. Yajaya ax
quipatiita niyon se tlen moilhuía para quipiya miyac
tlalnamiquistli.”
\c 38
\s TOTECO quinextili Job para nelquentzi quimati
\p
\v 1 Huajca TOTECO quinojnotzqui Job tlen se ajcomalacatl huan
quiilhui:
\p
\v 2 “¿Para tlen ta tlen ax tleno tijmati tiquijtohua ax cuali
tlen na ica nochi notlalnamiquilis nijchihua?
\v 3 Ximoquetza cuali huan ximocualtlali para tinechnanquilis pampa
na nijpiya sequin tlatzintoquili para ta.
\p
\v 4 “¿Canque tiitztoya ta quema nijtlaliyaya itzinpehualtil ni
tlaltepactli? Intla nelía titlalnamiqui, xinechilhui.
\v 5 ¿Tijmati quejatza nijcualtlali ihuexca huan nijyejyeco quesqui
metros quipiyasquía?
\v 6 ¿Tijmati ipan tlaque motlatzquilijtoc nopa tlaquetzali ipan
itzinpehualtil? ¿Ajqueya quitlali nopa achtohui tetl tlen más
monequi huan tlen yahui calesquina?
\v 7 ¿Canque tiitztoya quema nochi nopa sitlalime huicayayaj ica
paquilistli ica ijnaloc huan noelhuicac ejcahua\f 38:7 Ipan hebreo
quiijtohua ‘itelpocahua Toteco’ tlen sejcoyoc quinequi quiijtos
elhuicac ehuani. Xijtlachili nojquiya Gn. 6:2; Job 1:6, 2:1 huan Dn.
3:25. Camati tlen ángeles o ielhuicac ejcahua Toteco tlen
tlatzejtzeloltique.\f*  tzajtziyayaj ica paquilistli para
nechhueyichihuaj?
\p
\v 8 “Naja tlen nijtlalili nopa nepamitl tlen nopa hueyi atl ax
hueli panos quema topontiquisqui ica nochi ichicahualis tlen campa
nijchijqui,
\v 9 huan nijtlali mixtli huan tzintlayohuilotl iixco queja
elisquía iyoyo.
\v 10 ¿Tijmati quejatza nijtzajqui nopa hueyi atl queja se
quitzacua se puerta para ayoc quisa tlen itejteno?
\v 11 Huan niquilhui hueyi atl: ‘Hasta nica huelis tiajsis pero ax
huelis tipanos más. Nica tlamis campa hueli ajsis moa tlen
mohuijhuisojtihuala ajachica.’
\p
\v 12 “¿Huelis quemantzi ta tijnahuatijtoc tonali ma tlanesis ica
ijnaloc huan ma tlahui nopa tonati?
\v 13 ¿Huelis tijnahuatijtoc nopa tonali ma tlatlanexti hasta campa
hueli campa itlamiya tlaltepactli para tlacame ayoc ma quichihuaca
más tlajtlacoli ica tlayohua?
\v 14 ¿Tijchijtoc ma tlahui cuali nopa chichiltic tlahuili tlen
monextía ica ijnaloc? ¿Ta tijchijtoc para iixco tlaltepactli ma
nesis queja quipiya iyoyo tlen chichiltic?
\v 15 ¿Tijpannextijtoc campa motlatíaj nopa tlajtlacolchihuani?
¿Tijtzacuilijtoc tlen quitlanantoya iajcol para tecocos?
\p
\v 16 “¿Tiquitztoc canque meya nopa atl ipan hueyi atl?
¿Ticalactoc ipan nopa hueyi ostotl tlen hueyi atl huan tinejnentoc
hasta tlatzintla?
\v 17 ¿Mitznextilijtoque campa eltoc nopa puerta tlen miquistli
huan mictla?
\v 18 ¿Tijmati quesqui ipatlajca ni tlaltepactli? Xinechilhui intla
tijmati nochi ya ni.
\p
\v 19 “¿Tijmati nopa ojtli tlen ipan huala tlahuili? ¿Huelis
tinechilhuis canque yahui nopa tzintlayohuilotl?
\v 20 ¿Huelis tijhuicas tlahuili hasta ichaj? ¿Tijmati nopa ojtli
hasta campa pejqui?
\v 21 Ta, quena, timoilhuía tijmati nochi ya ni pampa timoilhuía
titlacatqui quema aya nijchijchihuayaya nochi ni tlamantli.
Temachtli timoilhuía tijmati miyac pampa tijpiya tlahuel miyac
xihuitl. Pero ax neli tlen timoilhuía.
\p
\v 22 “¿Tiyajtoc campa nicajcoctoc nopa sitlal setl? ¿Tiyajtoc
campa nijchijchihua nopa tesihuitl huan nicajcocui?
\v 23 Nochi ya nopa nicajcoctoc para nijtequihuis ipan tonali tlen
tlaohuijcayotl huan ipan tlatehuijcayotl.
\v 24 ¿Tijmati nopa ojtli tlen yahui campa pehua itlahuil tonati?
¿Tijmati canque pejtoc nopa ajacatl tlen huala ica campa quisa
tonati huan yahui ipan nochi tlaltepactli? Na nijmati.
\p
\v 25 “¿Ta tijmati ajqueya quichijchijqui aojtli ipan tlamayamitl
para ipan ma motlalo nopa atl tlen huetzi huan ajqueya quinextili
iojhui nopa tlapetlanilotl?
\v 26 ¿Tijmati ajqueya quichihua ma huetzi atl ipan huactoc tlali
campa ax tleno eli?
\v 27 ¿Tijmati ajqueya quixolonía nopa tlali tlen tlahuel amiqui
huan quichihua ma ixhua xihuitl tlen selic? Na, quena, nijchijqui.
\p
\v 28 “¿Quipiya itata nopa atl tlen huetzi? ¿Canque huala nopa
ajhuechtli?
\v 29 ¿Ajqueya inana nopa setl? ¿Canque huala nopa setl tlen
huetzi ica ijnaloc? Na nijtitlani.
\v 30 Campa mantoc atl huan iixco atemitl, nopa atl mocuepa setl
tlen tetic queja se tetl pampa na nijchihua ma pano.
\p
\v 31 “¿Huelis ta tiquintzacuilis nopa sitlalime Pléyades para ma
ayoc nejnemica? ¿O huelis tijmalacanis nopa sitlalime tlen inintoca
Orión para ayoc ma mocahuaca tlatzquitoque?
\v 32 ¿Huelis ta tiquinilhuía nopa sitlalime tlen sentic nemij
quema ininhora para monextise ipan elhuicac? ¿Ta tlen tiquinyacana
ipan iniojhui nopa sitlalime tlen sentic yahuij tlen inintoca Osa
Mayor huan Osa Menor?
\v 33 ¿Tiquinixmati nopa tlanahuatili tlen quintoquilíaj nochi
tlamantli ipan elhuicactli huan ipan ni tlaltepactli?
\p
\v 34 “¿Huelis ta tijtzajtzilis chicahuac ne mixtli huan
tijchihuas ma tlaahuetzis?
\v 35 ¿Hueli tijnahuatis ma quisaca miyac tlapetlanilotl huan ma
huetzitij campa ta tijnequi? Na nihueli.
\v 36 Na nitemaca tlalnamiquistli huan tlaixmatilistli.
\v 37 ¿Ajqueya quipiya miyac tlalnamiquistli para quiijtos quesqui
mixtli onca? ¿Ajqueya hueli quichihuas ma huetzi miyac atl quema
tlahuactoc,
\v 38 huan nochi tlali mocueptoc tlaltejpoctli huan tlaltojtolomitl?
\p
\v 39 “¿Tihueli tijtemos tlacualistli para se sihua león para
quintlamacas iconehua,
\v 40 tlen mochixtoque ipan iniosto o ipan cuatitlamitl? Na nihueli.
\v 41 Na nihueli niquintemolía inintlacualis nopa cacalome quema
ininconehua nechtzajtzilíaj, niininTeco, huan nentinemij ipan
inintepasol pampa mayanaj.
\c 39
\p
\v 1 “Job, ¿ta tijmati quema tlaconehuíaj nopa chivojme tlen
itztoque ipan cuatitlamitl? ¿Ta tiquitztoc quejatza se sihua masatl
quitlacatiltis icone?
\v 2 ¿Tijmati quesqui metztli monequi tlanemiltise nopa tenan
chivojme,
\v 3 hasta mohuijcolose para quintlacatiltise ininconehua para
tlamis inintlacuajcualol?
\v 4 Nopa pilchivojtzitzi moscaltíaj nopona ipan cuatitlamitl huan
teipa yahuij huejca para motlamacase ininseltitzi huan ayoc mocuepaj
campa inintatahua.
\p
\v 5 “¿Ta tijmati ajqueya quinchijtoc nopa cuatitla burrojme para
teimacasise huan nejnemise huejca ipan cuatitla? ¿Tijmati ajqueya
quintojtomilijtoc para hueli yahuij campa quinequij?
\v 6 Na nijmati. Na tlen niquintlali cuatitla huan niquinmacac nopa
tlamayamitl campa onca istatl para nopona ma itztoca.
\v 7 Nopa burrojme ax quinequij quicaquise nopa tlahuelchihualistli
ipan altepetini, niyon ax quinequij ma quintzajtzilica nopa burrojme
huicani.
\v 8 Inijuanti paquij motlalojtinemij ipan cuatitlamitl para
quipantise inintlacualis. Nopona quicuajtinemij nochi tlamantli
xihuitl tlen selic.
\p
\v 9 “¿Huelis tijmaxojtilis nopa hueyi búfalo tlen nemi cuatitla?
¿Huelis quinequis mocahuas calijtic campa tlacuaj motlapiyalhua?
\v 10 ¿Huelis ta tijtlalis se cuahuitl iquechtla huan tijtequihuis
nopa hueyi búfalo para tijpoxahuas motlal? ¿Huelis quinequis
tlapoxahuas ica se tepostli ipan motlal?
\v 11 ¿Huelis timotemachis ipan nopa tlapiyali pampa hueyi huan
quipiya miyac chicahualistli? ¿Huelis tijcajtehuas huan tijmati
para quichihuas nopa tequitl tlen tijnequi ma quichihua?
\v 12 ¿Huelis tijtitlanis para ma quimama motrigo huan quihualicas
hasta mochaj?
\p
\v 13 “Nopa sihua tototl tlen itoca avestruz, quihuihuipitza o
quipatlahua ieltlapal, pero ax hueli patlani queja nopa cigüeña.
\v 14 Nopa avestruz quincajtehua itecsis xalpani para ma mototonili.
\v 15 Ax moilhuía para se acajya hueli moquetzas ipani o se
tlapiyali hueli quinpitzinis.
\v 16 Yajaya tlahuel mosisinía ica iconehua queja elisquía ax
iaxcahua huan niyon ax quinchihuilía cuenta intla miquij,
\v 17 pampa na, niimoTeco, ax nijmacac tlalnamiquistli huan
tlamachilistli.
\v 18 Pero quema nopa avestruz motlalana huan motlalohua, chicahuac
yahui huan quintlani nochi cahuayojme huan nochi tlen ininpan
tlejcotoque.
\p
\v 19 “¿Elqui na tlen niquinmacac ininchicahualis cahuayojme huan
nijyejyecchijqui ininquechtla ica inintzoncal tlen huehueyac?
\v 20 ¿Na tiquinmacac cahuayojme yajatili para huitonise queja
chapolime? Se cahuayo quipactía tzajtzi chicahuac huan mohueyimati
huan temajmatía.
\v 21 Quitepachohua tlali ica iisti huan paqui pampa quipiya miyac
chicahualistli. Huan ipan tlatehuijcayotl se cahuayo,
\v 22 ax majmahui huan ax cholojtehua.
\v 23 Yonque cuatlamintli quiajsi ipan ielchiqui se cahuayo o
quiajsij ica cuachoso o machetes tlen tlatequi, nopa cahuayo noja
quichihua itequi.
\v 24 Ica nochi iyolo quitepacho tlali chicahuac ica iisti huan
paqui quema quicaqui tlapitzali. Nimantzi quinequi yas ipan nopa
tlatehuijcayotl.
\v 25 Quema se tlapitza, se cahuayo tlaijnecui hasta huejca para
quimatis canque eltoc nopa tlatehuijcayotl huan tlahuel paqui quema
quicaqui tzajtzij tlen motehuíaj o quicaquis se tlayacanquetl tlen
soldados tlen temaca tlanahuatili.
\p
\v 26 “¿O huelis ta tijmacatoc tlalnamiquistli nopa cuajtli para
motlalanas huan quipatlahuas ieltlapal ica tlani huan patlantehuas?
\v 27 ¿Huelis ica ta motlanahuatil motlalana nopa cuajtli tlen más
hueyi huan yahui campa tepexitl para quichihuas itepasol huejcapa?
\v 28 Nopona nopa cuajtli mocahua para itztos ipan nopa tepexitl
huan nopona quichihua itepasol. Cochi campa tetini tlen más
huejcapa.
\v 29 Huan tlen nopona quitlajtlachilía huejca hasta quiita se
tlapiyali para quiitzquis.
\v 30 O yahui campa huetztoc itlacayo se tlapiyali tlen mictoc para
quihualicas huan quintlamacas ipilconehua ica estli.”
\c 40
\p
\v 1 TOTECO nojquiya quiilhui Job:
\p
\v 2 “¿Noja tijnequi timonajnanquilis nohuaya na, nimoTeco Tlen
Nijpiya Nochi Chicahualistli? Ta tlen tinechtlaijilhuiyaya ¿tijpiya
tlajtoli para tinechnanquilis?”
\s Job quinanquili Toteco
\p
\v 3 Huajca Job quiilhui TOTECO:
\p
\v 4 “Na ax tleno nopati. Ax hueli nimitznanquilis. Más cuali
nijtlalis noma ipan nocamac huan ayoc nimolinis.
\v 5 Nicamatqui miyac huan ayoc nijpiya tlajtoli para niquijtos.”
\s Toteco sampa quiixcoilhui Job
\p
\v 6 Huan TOTECO sampa quinojnotzqui Job tlen tlatlajco ipan nopa
ajcomalacatl huan quiilhui:
\p
\v 7 “Ximoquetza queja se tlacatl huan ximocualtlali para
tinechnanquilis tlen nimitztlajtlanis.
\v 8 ¿Huelis tiquijtohua para na ax nixitlahuac huan ta
tixitlahuac?
\v 9 ¿Tijpiya chicahualistli queja na, nimoTeco Dios, nijpiya? ¿Ta
tihueli tijchihua ma tlatomoni motos nelchicahuac queja na nihueli
nijchihua?
\v 10 Huajca intla nelía tihueyi queja na, ximoquenti nopa
tlatlanextli huan xinechnextili mohueyitilis. Xinechnextili
motequihuejcayo huan nopa tlatlepanitacayotl tlen quinamiqui tijselis.
\v 11 Xijnexti mohueyi cualancayo. Xiquintlachili tlen mohueyimatij
huan xiquinechcapantlali.
\v 12 Xiquinpinahualti nochi tlen motlepanitaj san ica
motlachiyalis. Ximoquejquetza ininpani nopa tlacame tlen fiero
ininyolis.
\v 13 Xiquintlalpacho nochi inijuanti ipan tlali huan xiquinmajcahua
ipan nopa tzintlayohuilotl tlen miquistli.
\v 14 Intla huelis tijchihuas nochi ya nopa, huajca na nojquiya
nimitzitas para tihueyi pampa melahuac tihuelqui timomaquixti ica
mochicahualis.
\p
\v 15 “Xiquita, nopa hueyi tlapiyali Behemot. Nojquiya
nijchijchijqui ya san se queja nimitzchijqui ta. Quicua sacatl queja
se huacax.
\v 16 Xijtlachili quejatza quipiya miyac chicahualistli ipan
imetztomahuiya huan ipan nopa huejhueyi tlalo músculo ipan iijti.
\v 17 Quipiya icuitlapil tlen mohuijhuisohua queja se tiocuahuitl.
Huan ipan iquescuayo quipiya itlalo cuali moijilpitoc itlalijcho san
sejco.
\v 18 Iomiyohua xitlahuaque huan tetique queja nopa tepostli bronce.
Huan imetzhua tetique queja se barra tlen tepostli.
\v 19 Más tlen nochi sequinoc tlapiyalime, nopa Behemot tenextilía
tlen na, niimoTeco hueli niquinchijchijtoc. San na tlen nijchijqui
huelis nijnechcahuis ica nocuitlapa huan yajaya ax tleno
nechchihuilis.
\v 20 Nopa cuatitlamitl campa miyac cuatitlan tlapiyalime
mahuiltijtinemij quimaca nopa xihuitl tlen más cuali para nopa
Behemot ma quicua.
\v 21 Yajaya moteca tlatzintla itzonacahuil nopa xihuitl tlen onca
ipan atl huan motlatía ipan inincuayo tlen más xolontoc.
\v 22 Nopa lotos cuatini tlen onca atentli quimaca iniecahuil campa
nopa álamo cuame tlen moscaltíaj atentli.
\v 23 Nopa Behemot ax momajmatía yonque mosisinisquía nopa atl. Ax
mocuesos intla temis nopa atemitl Jordán huan quiajsis ipan icamac.
\v 24 Axaca huelis quiitzquis, o quimasiltis o quitlalilis anillos
ipan iyacatzol para quihuicas ilpitoc.
\c 41
\p
\v 1 “¿O huelis ta nel tihueyi hasta tihuelis tiquitzquis nopa
leviatán tlapiyali ica se tepos chijcoli? ¿Huelis tiquilpis ica se
lazo ipan icamac queja na nihueli?
\v 2 ¿Huelis tiquilpis ta ica se mecatl ipan iyacatzol o tijcoyonis
ipan icamachal para tijpanoltis se tepos chijcoli?
\v 3 ¿Huelis timoilhuía para yajaya mitztlajtlanis miyac hueltas
para xijcahua, o mitztlacahualtis ica tlajtoli tlen yejyectzitzi?
\v 4 ¿Timoilhuía para quichihuas se tlajtol sencahuali mohuaya
para elis motlatequipanojca para nochipa?
\v 5 ¿Ta tihuelis tijmaxojtilis huan tijpixtos ipan mochaj queja
elisquía se tototl huan tiquinmacas mosihuapilhua ma quiahuiltica?
\v 6 ¿Huelis nopa michtlajtlamani huelise quihuicase ipan tianquis
para quinamacase inacayo?
\v 7 ¿Tihuelis tijcoyonis icuetlaxo ica miyac cuatlamintli o
tijcoyonis itzonteco ica huejhueyi tepos chijcoli?
\v 8 Intla tiquitzquisquía, yajaya mitztehuisquía. Huan ax quema
tiquilcahuasquía nopa tlatehuijcayotl ihuaya. Ayoc quema
tijnequisquía tiquitzquisquía sampa.
\p
\v 9 “San tlapic para tijnequis tiquitzquis para tiquilpis pampa ax
tihuelis. Itlachiyalis tlahuel mitzmajmatis.
\v 10 Huajca axaca mosemaca quiixitis nopa leviatán tlapiyali,
niyon quiitzquis. Huan intla axaca motemaca itztos iixpa ya tlen na
nijchijtoc, ¿ajqueya huelis itztos noixpa na tlen niimoTeco?
\v 11 Na axaca nijtlahuiquilía. Nochi tlen onca tlatzintla
elhuicactli na noaxca.
\p
\v 12 “Nojquiya nicamatis tlen nopa chicahualistli tlen nopa
leviatán quipiya ipan sesen imetz huan ipan nochi itlacayo huan
quejatza yejyectzi hueli ajquis.
\v 13 Axaca hueli quicoyonilis icuetlaxo. Axaca motemaca moquetzas
nechca icamac para quitlalilis se tepos camachali.
\v 14 Axaca hueli quitlapohuilis icamac pampa quinpiya itlancoch
tlen tlahuel temajmati.
\v 15 Nopa cacahuayotl tlen moquetztoque ipan icuitlapa cuali
tlatzquitoque huan mocahuaj tetic queja tetl.
\v 16 Ax quicahuilía panos ajacatl huan niyon se tlamantli ax hueli
quicoyonis.
\v 17 Tlatzquitoque icacahuayo san sejco huan axaca huelis
quiniyocatlalis.
\p
\v 18 “Quema nopa leviatán mijtzomía, quisa tlen eltoc queja
tlapetlanilotl. Huan iixtiyolhua nesij chichiltic queja
tlanestihuala.
\v 19 Ipan icamac quisa miyac tlitl huan tlimoyotl.
\v 20 Ipan iyacatzol quisa poctli queja quema quimolonía se
tlacuali ipan se tlitl tlen acatl.
\v 21 Ica iijiyo quilemenaltis tlicoli huan ipan icamac quisa
tlilelemectli.
\p
\v 22 “Quipiya miyac chicahualistli ipan iquechtla. Huan campa
hueli campa yahui, quinmajmatía nochi tlen quipantía.
\v 23 Campa mocuelpachojtoc icuetlaxo tlahuel motzquitoc. Neltetic
huan ax mojmolinía icuetlaxo campa hueli ipan itlacayo.
\v 24 Quipiya iyolixpa neltetic queja se tetl. Quena, tlahuel tetic
queja se metlatl.
\v 25 Quema nopa leviatán moquetza, quinmajmatía nochi tlen
itztoque iixpa hasta tlen más yoltetique. Nochi cholohuaj pampa
yajaya tlahuel mosisinía.
\v 26 Niyon se machete, cuatlamintli o tepos cuachoso hueli
quicocos.
\v 27 Nopa leviatán quiita tepostli queja elisquía sacatl.
Quichihuilía nopa tepostli bronce queja elisquía se cuahuitl tlen
palantoc.
\v 28 Yajaya ax cholohua quema quimajcahuilíaj cuatlamintli. Huan
quema quimajcahuilíaj tetl ica tehuitlatztli, yajaya quiita queja
quimajcahuilisquíaj tlasoli.
\v 29 Yonque quimaquilíaj ica cuahuitl yajaya ax quichihuilía
cuenta huan san quinhuetzquilía quema quimajcahuilíaj se huehueyac
cuachoso tlen tepostli.
\v 30 Tlatzintla iijti quipiya icacahuayo tlen tetic huan tlen
tlatequi. Huan quema mohuahuatatza, tlahuel quipoxahua tlali.
\p
\v 31 “Nopa leviatán quimolonaltía nopa atl quema quiolinía.
Eltoc queja quichihua ma mojmolini nopa atl hasta campa más
tlatzintla.
\v 32 Huan quema yahui aixco, quiposonaltijti nopa atl. Quema
tijtlachilis nopa hueyi atl tlen posoni, nesi chipahuac queja
elisquía itzoncal se huehuentzi.
\v 33 Ipan nochi tlaltepactli ax onca niyon se tlapiyali queja nopa
leviatán tlen ax tleno quiimacasi.
\v 34 Tlen huejcapa, yajaya quintlachilía nochi tlen mohueyimatij.
Yajaya inintlanahuatijca nochi tlen mohueyimatij.”
\c 42
\s Job moyolcuepqui iixpa TOTECO
\p
\v 1 Huan Job quiilhui TOTECO:
\p
\v 2 “Na nijmati para ta nochi tihueli tijchihua. Axaca huelis
mitztzacuilis para ax tijchihuas niyon se tlamantli tlen
tijsencajtoc para tijchihuas.
\v 3 Ta titlatzintocayaya ¿ajqueya nopa tlacatl tlen quiijtohuayaya
ax cuali tlen tijchihuayaya? Naja nieli nopa tlacatl. Nicamatiyaya
tlen miyac huejhueyi tlamantli tlen ax nijmatiyaya huan ax
nijmachiliyaya.
\p
\v 4 “Ta tinechilhui ma nijtlacaquili, pampa tijnequiyaya ticamatis
nohuaya. Tiquijtohuayaya ta tinechtlajtlanis huan nimitznanquilis
intla melahuac nijpixqui tlalnamiquilistli.
\p
\v 5 “Pero TOTECO nimitzilhuía. Na nijcactoya tlen ta, pero ama
nimitzitztoc.
\v 6 Huan yeca nimoijiya huan nimoyolcuepa moixpa. Nimotemilía
tlaltejpoctli ipan notzonteco huan nimosehuía ipan cuanextli para
nochi ma quimatica nimoyolcueptoc.”
\s TOTECO cualanqui ininhuaya nopa eyi ihuampoyohua Job
\p
\v 7 Teipa quema Toteco tlanqui camati ihuaya Job, quicamahui Elifaz
tlen ehua Temán, huan quiilhui:
\p “Na tlahuel nicualani ica ta huan ica nopa ome mohuampoyohua
pampa ax incamatque xitlahuac tlen na queja notlatequipanojca Job.
\v 8 Huajca ama xiquincuica chicome becerros huan chicome oquich
chivojme, huan xiyaca campa notlatequipanojca Job. Huan nopona
xiquintencahuaca queja se tlacajcahualistli tlatlatili para
inquiixtzacuase imotlajtlacolhua. Huan notlatequipanojca Job
momaijtos imopampa imojuanti huan na nijtlacaquilis. Queja nopa ax
nimechtzontlamiltis queja quinamiqui nimechchihuilis ipampa
imotlajtlacolhua. Pampa imojuanti ax incamatque xitlahuac tlen na
queja notlatequipanojca Job.”
\p
\v 9 Huajca Elifaz tlen ehua Temán, Bildad tlen ehuayaya Súa huan
Zofar tlen ehuayaya Naamán, yajque huan quichihuatoj senquistoc
queja Toteco quinnahuatijtoya. Huan TOTECO quitlacaquili Job quema
momaijto ininpampa inijuanti.
\s TOTECO tlahuel miyac quitiochijqui Job
\p
\v 10 Teipa quema Job momaijto ipampa ihuampoyohua, Toteco Dios
quiquixtili itlaijiyohuilis huan quicuepili nochi iricojyo. Huan
quimacac ome huelta imiyaca tlen quipixtoya achtohuiya.
\p
\v 11 Huan hualajque campa ya nochi isihua icnihua, itlaca icnihua
huan ihuampoyohua tlen quiixmatque achtohuiya huan ilhuichijque
ihuaya ipan ichaj. Huan quiyoltlalijque huan quiyolchicajque ipampa
nochi nopa tlaijiyohuilistli tlen TOTECO quititlanilijtoya. Huan
sesen tlen inijuanti quihualiquili Job se regalo tlen tomi huan se
anillo tlen oro.
\p
\v 12 Huan TOTECO quitiochijqui Job noja más que achtohuiya. Pampa
ama quinpixqui 14 mil borregojme, chicuase mil camellos, mil pares
huacaxme tlen tlapoxahuaj huan mil sihua burrojme.
\p
\v 13 Nojquiya TOTECO quimacac seyoc chicome itelpocahua huan seyoc
eyi iichpocahua.
\v 14 Nopa achtohui ichpocatl itoca eliyaya Jemima, nopa ompa
ichpocatl itoca eliyaya Cesia huan nopa expa ichpocatl itoca eliyaya
Keren Hapuc.
\v 15 Huan ipan nochi tlaltepactli ax oncayaya ichpocame tlen
tlahuel yejyectzitzi queja iichpocahua Job. Huan Job quinmacac
iichpocahua inintlal huan ininparte ipan nochi tlen quipixqui san se
queja quinmacac itelpocahua.
\p
\v 16 Huan teipa Job noja itztoya 140 xihuitl. Huan quinitac
iconehua, iixhuihua, iixhuihua ininconehua huan iixhuihua
ininconehua ininconehua.
\v 17 Teipa mijqui Job quema eliyaya nelhuehuentzi.