\id MIC
\h MIQUEAS
\mt Miqueas
\c 1
\s TOTECO quinteilhui israelitame
\p
\v 1 Ya ni nopa tlajtoli tlen TOTECO nechmacac niMiqueas ipan nopa tonali quema Jotam, Acaz huan Ezequías itztoyaj tlanahuatiani ipan tlali Judá. NiMiqueas tlen niehua altepetl Moreset niquitac nochi ni tlamantli ipan tlanextili tlen TOTECO nechmacac para nochi ma quimatica tlachque ininpantis altepetini Samaria huan Jerusalén. Huajca nica eltoc tlen nechilhui ma niteyolmelahuas.
\p
\v 2 Ma quitlacaquilica nochi tlen itztoque ipan ni tlaltepactli. TOTECO Tlen Más Quipiya Tlanahuatili camati tlen ichaj tlen tlatzejtzeloltic huan quintlatelhuía israelitame ica miyac tlamantli.
\p
\v 3 ¡Xiquitaca! NiimoTECO nihualtemos tlen nochaj huan ninejnentihualas ipan tepetini campa quinhueyitlalíaj totiotzitzi.
\v 4 Huan campa niimoTECO nimoquetzas, nopa tlali atiyas, huan moxitlanis queja cera tlen atiya pampa quitlalijtoque tlixijco. Huan temos hasta campa tlamayamitl huan nochi nopa tlamayamitl motlajcoitase. Huan nopa tepetini hualtemose queja atl tlen mosansejcotilía para motepexihuis hasta tlatzintla tepexitl.
\p
\v 5 Huan ya ni panos ipampa ininfiero tlajtlacol israelitame\f 1:5 Iixhuihua Jacob.\f* ipan tlaltini Judá huan Israel, pampa miyac tlajtlacoli quichijtoque. Huan israelitame tlatzintocase: “¿Tlachque totlajtlacol tlen fiero?”
\p Huan TOTECO quinnanquilis: “Inquinhueyichijtinentoque nopa tlaixcopincayome ipan altepetl Samaria. Ya nopa imotlajtlacol tlen fiero. Huan nopa israelitame ipan tlali Judá ¿canque quinhueyitlepanitaj tlaixcopincayome más? Eltoc ipan altepetl Jerusalén.
\p
\v 6 “Yeca nijchihuas altepetl Samaria ma eli queja tlasoli. Nesis queja se mili campa quimontonojtoque itlasolo para teipa huelis quichihuase se xocomeca mili. Yeca nijxolehuas nopa tepamitl tlen quiyahualohua altepetl Samaria para quimanahuis tlen icualancaitacahua huan nijmajcahuas nopa tetl tlatzintla ipan nopa tlamayamitl. Nijpannextis nochi itlatzinpejya.
\v 7 Niquintlapanas nochi itotiotzitzi. Huan nijtlatis nochi iricojyo tlen quitlantoc ica nopa ahuilnenca sihuame tlen motemacatoque queja tlacajcahualistli ica nopa totiotzitzi. Quena, nopa altepetl quitlantoc iricojyo ica ahuilnenca sihuame. Huan inincualancaitacahua tlen quinichtequilise nopa ricojyotl, teipa quinhuicase ipan inintlalhua huan quinmacase ahuilnenca sihuame tlen quintequipanohuaj tlen yajuanti inintotiotzitzi.”
\s Miqueas camati huan chocac
\p
\v 8 Pampa niquita ni tlatzacuiltilistli tlen quinajsis israelitame, nimochoquilía huan niayijti. Nitzajtzi queja se tepechichi. Huan queja nopa hueyi tototl tlen quimati choca ica tlayohua, nitlahuejchihua. Ninejnemi nitlajcoxolotl huan san noicxipa ica miyac cuesoli huan pinahualistli.
\v 9 Pampa nopa tlatzacuiltilistli tlen tlali Israel ehuani quiselise elis queja se cocotl tlen huejcatla huan ax huelis pachihuis. Huan nopa tlatzacuiltilistli tlen quipantise Israel ehuani nojquiya ajsis hasta ipan tlali Judá. Quena, ajsis hasta noaltepe Jerusalén.
\v 10 Amo xiquinilhuica tocualancaitacahua ipan altepetl Gat tlen fiero topantis tiisraelitame pampa techhuetzquilise. Amo xichocaca iniixpa. Pero inisraelitame ipan altepetl Bet Le Afra ximomimiloca ipan tlaltejpoctli ica hueyi cuesoli.
\v 11 Imojuanti tlen inehuani ipan nopa yejyectzi altepetl Safir inmechhuicase inxolome para intlatequipanotij ica miyac pinahualistli. Itlacajhua altepetl Zaanán motlatijtoque altepeijtic pampa majmahuij huan moilhuíaj queja nopa momanahuise, pero ax neli. Ax hueli momanahuise tlen nopa tlaijiyohuilistli tlen hualas. Nopa altepetl Bet Esel ehuani tlen inmechmanahuiyayaj, ama mochoquilise ininselti ipampa nopa tlatzacuiltilistli tlen quinajsis.
\v 12 Tlen itztoque ipan altepetl Marot huihuipicase ica nopa hueyi tlacuajcualocayotl tlen quinajsis. Quichixtoque ajqueya quinpalehuiqui, pero axaca hualas pampa itlatzacuiltil TOTECO quixolejtoc nochi huan ajsitoc hasta ipuerta altepetl Jerusalén.
\p
\v 13 InLaquis ehuani, inquinpiyaj cahuayojme tlen chicahuac motlalohuaj para quihuicase imocuacarros. Huajca xiisihuica huan xiquincualtlalica nopa cahuayojme tlen más chicahuac motlalohuaj para incholose tlen itlatzacuiltil TOTECO intla inhuelise. Pero san tlapic, pampa inelque nopa achtohui altepetl ipan tlali Judá tlen inquitoquilijque itlajtlacol tlali Israel. Quena, inquinnextilijque Jerusalén ehuani ma quinhueyichihuaca tlamantli tlen ax neli Dios.
\p
\v 14 Huajca xijchihuaca queja se tlacatl tlen quinmacas se regalo quema quinnahuatijtehuas iichpoca ihuaya nopa telpocatl tlen mocuilijtoc. Xiquinmacaca imocualancaitacahua altepetl Moreset Gat queja se regalo pampa ipanima yajuanti quinhuicase nopa altepetl ehuani para iniaxcahua. Tlacame ipan altepetl Aczib quincajcayajtoque nopa tlanahuatiani ipan tlali Israel. Quintencahuilijtoque tlapalehuili pero ax hueli quinpalehuise.
\p
\v 15 ˻TOTECO quiijtohua:˼ “Nijhualicas se tlatlanquetl para quinitzquiti Maresa ehuani para elise itlatequipanojcahua. Quena, nopa tlacame tlen más yejyectzitzi ipan tlali Israel motlatitij ipan nopa tlacacahuaya nechca Adulam, pero nopano quinitzquise huan quinhuicase ilpitoque.
\p
\v 16 “Xichocaca huan ximotzonhuatanica para inquinextise inmocuesohuaj. Quena, ica imotequipachol, ximotzonhuatanica hasta innesise queja nopa tzopilome tlen tzonpepestique. Xiquinchoquilica imopilconehua tlen inmechmacayayaj hueyi paquilistli. Pampa ama inmechcuiliquij huan quinhuicase para tlatequipanotij san tlapic ipan seyoc tlali. Huan ayoc quema inquinitase.”
\c 2
\s Tlatzacuiltili ipan tlacame tlen tetique
\p
\v 1 Teicneltique tlen motecaj ipan inintlapech huan ipan
inintlalnamiquilis mosenilhuíaj tlachque fiero tlamantli hueli
quichihuase. Huan quema tlanesi, ya nopa quichihuaj pampa quipiyaj
chicahualistli para quichihuase tlen quinequij. Teicneltique pampa
ya ajsitihuala inintlatzacuiltilis.
\v 2 Yajuanti quiixtocaj seyoc imil huan quiichtequij yonque ya
quipiyaj miyac. Quiitaj se cali tlen seyoc iaxca huan san
moaxcatíaj. Ica istlacaticayotl quintlacuijcuilíaj
inincalnechcahua huan iniicnihua ininchajchaj yonque piliyojtzi
quipixque. Hasta nojquiya quincuilíaj nopa tlali tlen quiselijtoque
tlen inintatahua.
\p
\v 3 Huajca TOTECO quiijtohua: “Na nojquiya nimoilhuijtoc tlen
niquinchihuilis. Niquintitlanilis se tlaijiyohuilistli huan ax
huelis momanahuise. Huan ipan nopa tonal ayoc mohueyimatise huan
mooquichmajtinemise. Itztose ipan se hueyi tlaohuijcayotl.”
\p
\v 4 Ipan nopa tonal para tlacame inmechhuetzquilise,
imocualancaitacahua huicase ni huicatl queja elisquíaj imojuanti
tlen inhuicaj huan quiijtose:
\q “TOTECO techtlamixolejtoc.
\q Techcuilijtoc nochi tlen toaxca huan quinmajmacatoc tlaxtequini.
\q Quena, nochi totlalhua quinmacatoc tlacame tlen fierojtique.”
\m
\v 5 Huan ayoc itztos niyon se israelita ica tequihuejcayotl iixpa
TOTECO para quixejxelos tlali huan mahuiltis ica piltetzitzi iixpa
TOTECO para quimatis ajqueya quiselis. Nochi tlen quipixque
tequihuejcayotl ya itztose ipan seyoc tlali pampa ya quinhuicatose.
\s Istlacatica tiocamanalohuani
\p
\v 6 Nopa israelita tiocamanalohuani tlen istlacatij nechilhuíaj:
“Amo xiteyolmelahua para hualas tlatzacuiltili. Amo xiquijto para
tiisraelitame timopinahuase pampa ax quema techajsis tojuanti.”
\p
\v 7 ¡Ay imojuanti, iniixhuihua Jacob! ¿Ax inquimatij TOTECO
Itonal huelis inmechnojnotzas chicahuac? ¿Inmoilhuíaj ax quema
quichihuasquía ya nopa?
\p ˻TOTECO quiijtohua:˼ “Nochi notlajtol quinchihuilía cuali tlen
nemij xitlahuac, huajca intla inquichihuayayaj tlen cuali, ax
inquicuesijcaquisquíaj tlen niquijtohua.
\p
\v 8 “Pero nochi imojuanti tlen notlacajhua, ama inmocueptoque
queja innocualancaitacahua. Inquinichtequilíaj tlen ica mopantzacua
se tlacatl, yonque se israelita huan imoicni. Inquiquixtilíaj iyoyo
yonque huala tlen tlatehuijcayotl huan paqui para ajsis ichaj huan
ax quitemohua cualantli, huan san inmechonpano.
\p
\v 9 “Inquinquixtilijtoque ininchajchaj huan inquintojtocatoque
cahual sihuame tlen paquiyayaj yonque nelía pilquentzi quipixque.
Inquinquixtilijque ininconehua nochi tlen na niininTeco
niquinmacatoya.
\v 10 Huajca ximotlaloca huan xitlatequipanotij ipan seyoc tlali
pampa ya nopa quinamiqui. Ya ni ayoc imochaj, niyon ni tlali ayoc
imotlal, pampa onpano intlajtlacolchijtoque huan onpano
inquinenpolojtoque ni tlali huan inquichijtoque ax tlapajpactic
noixpa.
\p
\v 11 “Inquiselíaj aqui hueli tlacatl queja imotiocamanalojcahua
yonque san icamac. Yonque se inmechilhuisquía: ‘Na niquita tlen
cuali imopantis, huan inquipantise paquili huan miyac tlaili.’
Yonque queja nopa inmechistlacahuisquía, inquiselisquíaj para
melahuac, pero ax queja nopa elis.
\s Hualas se tlamanahuilistli
\p
\v 12 “Pero se tonali teipa niquinsentilis nochi iixhuihua Jacob.
Quena, nochi israelitame tlen noja mocahuase yoltoque niquinsentilis
queja se tlamocuitlahuijquetl quinsansejcotilía iborregojhua campa
tlatzactli. Huan queja paquij miyac borregojme campa sacapetlayo, ni
tlali temis ica tlahuel miyac notlacajhua tlen ya niquinhualicatos
tlen campa hueli tlaltini. Huan nochi tlahuejchijtose ica
paquilistli.
\v 13 Huan ipan nopa tonal hualas se tlayacanquetl tlen quitlapos
imoojhui huan inmechyacanas. Quena, inmechpostequilis nopa puertas
campa intzactose huan inmechquixtis. Huan niimotlanahuatijca
nitlayacanas huan innechtoquilise. Huan na niimoTECO nijpiyas
tlanahuatili ipan imotlal.
\c 3
\s Inintlajtlacol nopa tlayacanca israelitame
\p
\v 1 “Xijtlacaquilica imojuanti tlen intlayacanani ipan tlali Judá
huan tlali Israel. Monequisquía más inquimatisquíaj tlen
xitlahuac que nochi sequinoc. ¿Ax neli? Huan quinamiqui
intlayacanani intlamocuitlahuisquíaj para oncas tlen xitlahuac ipan
imotlal.
\v 2 Pero inquihuejcamajcahuaj tlen xitlahuac huan inquinequij tlen
ax cuali. Inquinquixtilíaj notlacajhua tlen iniaxca, queja se
tecuani quiquixtilía icuetlaxo tlen quimictijtoc. Eltoc queja
inquicuaj ininnacayo huan hasta iniomiyo notlacajhua tlen
inquintlahuijsojtoque tlalchi.
\v 3 Quena, imojuanti queja intecuanime, inquicuaj notlacajhua
ininnacayo huan inquinquixtilíaj inincuetlaxo.
Inquinpojpostequilíaj iniomiyo huan inquinhuejhuelohuaj queja
nacatl tlen inquinequij cuechtic para se tlacualistli.
Intlayacanani, inquincuilíaj notlacajhua nochi tlen quipiyaj.
\v 4 Huan yeca ipan nopa tonali quema inquitemose TOTECO para ma
inmechpalehui, ax inmechnanquilis. Yajaya san moixtlatis pampa
inquichijtoque tlahuel miyac tlamantli tlen ax cuali.”
\p
\v 5 Quej ni TOTECO quinilhuía tiocamanalohuani:
“Intiocamanalohuani, inquincuapolojque notlacajhua. Inistlacatij
huan inquiijtohuaj se quipiyas paquilistli intla inmechtlamacas.
Pero intla se tlacatl ax quipiya tleno para inmechmacas,
inquiyolmelahuaj para hualas tlatehuijcayotl para inquimajmatise.
\p
\v 6 “Huajca hualas tlatzacuiltili imopani huan ayoc huelis
inquiitase ipan tlanextili para inquimatise tlachque hualas. Tlamis
imotequi, intiocamanalohuani, pampa ax inteyolmelajtoque para hualas
tlatzacuiltilistli. Elis queja sejtos tonati huan oncas
tzintlayohuilotl campa imojuanti.
\v 7 Huan intiocamanalohuani tlahuel inmopinahuase pampa ax
inquimatiyayaj tlen hualayaya. Huan imojuanti tlen intetonalitayayaj
ayoc inquimatise tlachque inquichihuase. San inmocamatzacuase huan
inmopinahuase pampa ax nimechnanquilis.”
\p
\v 8 Pero na niMiqueas, ax queja nopa niitztoc. Nijpiya miyac
ichicahualis Itonal TOTECO. Ax nimajmahui niquinyolmelahuas tlacame
ipan tlaltini Judá huan ipan Israel para TOTECO quintlatzacuiltis
israelitame ipampa inintlajtlacolhua pampa ya nopa xitlahuac.
\p
\v 9 Huajca xijtlacaquilica ya ni intlayacanani ipan Israel huan
Judá. Inquicuesijcaitaj tlen melahuac huan inquichihuaj huijcoltic
nochi tlen xitlahuac.
\v 10 Inquitlamitemitijtoque Jerusalén ica temictiani huan nochi
tlamantli tlajtlacoli.
\v 11 Intlayacanani, inquinequij tlacame ma inmechtlaxtlahuica para
intetlajtolsencahuase. Intotajtzitzi, san intlamachtíaj intla
inquitlanij tomi. Intiocamanalohuani, san intemachiltíaj TOTECO
itlajtol intla inmechtlaxtlahuíaj. Teipa inquichihuaj queja
inmotlatzquilíaj ipan TOTECO. Huan inmohueyimatij huan
inquiijtohuaj: “TOTECO itztoc tohuaya huan yeca ax tleno tlen fiero
techajsis.”
\v 12 Huan imopampa imojuanti imotlajtlacolhua, imocualancaitacahua
quixolehuase altepetl Jerusalén. Canactzi mocahuas queja se mili
tlapoxahuali huan canactzi elis queja se monton campa calxolehuaj.
Huan nopa tlachiquili campa ijcatoc tiopamitl, teipa elis se
cuatitlamitl.
\c 4
\s Nopa tepetl tlen TOTECO ipan itlamiya tonali
\r (Is. 2:2-4)
\p
\v 1 Pero teipa, ipan itlamiya tonali, Jerusalén elis más
tlaixmatili que nochi sequinoc altepetini ipan nochi tlaltepactli
pampa nopano mosehuis tlen quinnahuatis nochi tlaltini. Huan tlacame
tlen ehuaj campa hueli ipan tlaltepactli ajachica quipaxalose.
\p
\v 2 Quena, tlacame tlen ehuani ipan campa hueli tlaltini moilhuise
se ica seyoc: “Ma tiyaca ma tijpaxalotij itepe Toteco Dios. Ma
tiquitatij itiopa ininTECO nopa israelitame. Yajaya technextilis
iojhui huan tlachque cuali para tijchihuase huan tijneltoquilise.”
Pampa ipan nopa tonali TOTECO quinahuatis nochi tlaltepactli tlen
altepetl Jerusalén huan tlen nopano quisas itlajtol.
\p
\v 3 Yajaya tetlajtolsencahuas quema onca cualantli tlatlajco miyac
tlamantli tlacame campa hueli. Quena, quema mocualanise se tlali
tlen tetic ica seyoc tlen nojquiya tetic, yajaya motlajcoquetzas
para quinyoltlalis. Huan oncas tlasehuilistli. Tlacame
quitejtejtzonase inintepos tlen ica tlatehuiyayaj para ica
quichihuase azadones. Huan inincuatlaminhua quitejtejtzonase para
quichihuase huíngaros. Niyon se tlali ayoc motlalanas para
quitehuis seyoc tlali, niyon ayoc aca momachtis quejatza tlatehuis.
\p
\v 4 Huan sesen tlacatl mosiyajcahuas ica paquili itzala se
icuatlatoc huan sesen ixocomecamil temacas hasta mocahuas. Ayoc aca
quintemajmatis pampa TOTECO Tlen Quinyacana Ielhuicac Ejcahua Ma
Tlatlanitij queja nopa quiijtojtoc.
\v 5 Huajca yonque nochi sequinoc tlaltini ama ipan ni tonali
quinhueyichihuaj totiotzitzi, tiisraelitame tijtoquilise TOTECO,
yajaya tlen eliyaya toDios tlen ipejya huan elis para nochipa.
\s TOTECO sampa quinsentilis israelitame tlen campa hueli tlaltini
\p
\v 6 TOTECO quiijtohua: “Ipan nopa tonali niquinhualicas
notlacajhua tlen metzcototique huan tlen tlahuel tlaijiyohuijtoque
campa quinhuicatoque. Quena, niquinsentilis nochi tlen ax tleno
quipiyaj pampa niquintlatzacuiltijtoc.
\v 7 Huan ica yajuanti sampa nijchihuas se tlali ica tlacame tlen
tejtetique. Huan na, niimoTECO, nielis inintlanahuatijca huan
nitlanahuatis ipan tepetl tlen nopa tonal huan para nochipa.
\v 8 Huajca Jerusalén elis temachtli queja se tlamocuitlahuijquetl
quintlachilía iborregojhua tlen huejcapa. Huan Jerusalén sampa
quipiyas se tlanahuatijquetl ica hueyi tlanahuatili campa hueli
queja achtohuiya oncayaya.”
\s Achtohui israelitame chocase ipampa tlatzacuiltilistli tlen
hualas
\p
\v 9 Pero ama ipan ni tonal intlahuejchihuase queja sihuame quema
quinajsi inintlacuajcualol para conepiyase. Ax inquipiyase se
imotlanahuatijca o se imotlalnamictijca pampa ya mictose. Axaca
inmechmanahuis para ax inmechajsis imotlacuajcualocayo.
\v 10 Huajca inJerusalén ehuani, xihuihuipicaca queja se sihuatl
tlen tlaijiyohuía para tlatlacatiltis. Xitlahuejchihuaca pampa
inquiijiyohuise nopa hueyi tlacuajcualocayotl tlen inmechajsis.
Amantzi monequi inquisase ipan ni imoaltepe huan initztotij
miltitla. Teipa inmechhuicase tlali Babilonia. Pero nopano TOTECO
yas para inmechcohuati huan inmechmajcahuas. Quena, hasta nepa se
tonal TOTECO inmechmaquixtiti ininmaco imocualancaitacahua.
\p
\v 11 Pero ama monechicojtoque inintlacajhua miyac tlaltini tlen
imoca cualanij inJerusalén ehuani. Quiijtohuaj: “Tijnequij
tiquitase quema quixolehuase imoaltepe huan tlahuel fiero mocahuas.
Tijnequij tiquitase quema inmopinahuase.”
\v 12 Pero yajuanti ax quimatij TOTECO itlalnamiquilis, niyon ax
quimachilíaj nopa tlatzacuiltili tlen yajaya quisencajtoc para
quinchihuilis teipa. Se tonal yajaya ininpan moquejquetzas
imocualancaitacahua queja se quisentilía trigo huan ininpan
nejnemis, huan quihuitequis chicahuac para quiquixtilis iyol.
\p
\v 13 Huajca ipan nopa tonal TOTECO inmechilhuis inisraelitame:
“Ximotlalanaca huan ximoquejquetzaca ininpani imocualancaitacahua.
Na niimoTECO nimechmacas chicahualistli. Inquipiyase chicahualistli
queja se tlapiyali ica icuacua tlen tepostli huan iisti tlen bronce.
Huan inquinhuejhuelose miyac tlacame huan nochi ininricojyo
imocualancaitacahua tlen quitlantoque ica istlacatili, se tonal
inquiselise para innechmacase. Quena, innechmacase queja se
tlacajcahualistli, niimoTeco, tlen noaxca nochi tlaltepactli.”
\c 5
\s Inincualancaitacahua ajsitoque
\p
\v 1 InJerusalén ehuani, xiquinsentilica imosoldados para
inmomanahuise ama, intla inhuelij. Imocualancaitacahua ya
quiyahualojtoque ni altepetl Jerusalén. Quipinahualtise
inintlayacanca tlali Israel ehuani. Quimaquilise ica se cuahuitl
ipan icampa.
\s Tlacatis se tlanahuatijquetl ipan pilaltepetzi Belén
\p
\v 2 Yonque ax más hueyi pilaltepetzi Belén Efrata queja sequinoc
altepetini ipan tlali Judá, pero nopano se tonal tlacatis para na
se hueyi Tlanahuatijquetl tlen quinnahuatis israelitame. Yajaya
nejnentihualajtoc hasta huejcajquiya pampa nochipa itztoc.
\s TOTECO quintlahuelcahuas itlacajhua hasta seyoc tonal
\p
\v 3 Huajca TOTECO quintlahuelcahuas itlacajhua ininmaco
inincualancaitacahua hasta nopa tonal quema nopa sihuatl tlen
monequi tlatlacatiltis, quitlacatiltis icone. Teipa quena,
iisraelita icnihua tlen noja mocahuase ipan sequinoc tlaltini campa
quinhuicaque, sampa hualase ipan inintlal.
\s Quema tlanahuatis TOTECO
\p
\v 4 Huan ipan nopa tonali yajaya motlalanas ica ichicahualis TOTECO
huan quinmocuitlahuis itlacajhua ica ichicahualis TOTECO. Huan
quihuicas itoca TOTECO iDios. Huan itlacajhua itztose ica temachili
huan pajcaitztose. Huan campa hueli ipan tlaltepactli tlahuel
quihueyitlepanitase.
\v 5 Huan tlen ya hualas tlasehuilistli.
\p Quema nopa tlali Asiria ehuani quinequise calaquise ipan totlal
para quixolehuase tocalhua tlen más cuali tlasencahuali, ica ya
tiquintlalise tlahuel miyac israelita tlayacanani huan
tlamocuitlahuiani tlen tejtetique para quintlanise.
\v 6 Huan ica machete quinahuatise tlali Asiria tlen elqui itlal
Nimrod. Yajaya techmanahuis ininmaco Asiria ehuani quema hualase
para quitehuise totlal huan quipanose tonepa.
\p
\v 7 Huan ipan nochi tlaltepactli ipan nopa tonali, nopa israelitame
mocahuase campa hueli queja quema TOTECO techtitlanilía ajhuechtli
tlen tlasejseltía o atl tlen quixolonía xihuitl. Nopa atl tlen
techmaca ax quichiya hasta tlacame quinequij ma huetzi, niyon ax
mocahua quema tlacame quinequi ma mocahua.
\v 8 Quena, nopa israelitame itztose ipan campa hueli tlaltini
ininhuaya tlen hueli tlamantli tlacame. Huan nopa tlacame
quinimacasise queja sequinoc tlapiyalime ipan cuatitlamitl
quiimacasij nopa hueyi tecuani león. Huan nopa israelitame tlen
mocahuase ipan nopa tonali tlanahuatise campa hueli huan axaca
huelis momanahuis iniixpa pampa itztose queja se tecuani tlen nemi
tlatlajco borregojme tlen quinmictijtinemis huan
quinhuejhuelojtinemis tlen quinequis.
\v 9 Quena, TOTECO quinmatlalanas israelitame huan
quintzontlamiltise nochi inincualancaitacahua.
\p
\v 10 Huan TOTECO quiijtohua: “Ipan nopa tonali niquinxolehuas
nochi imotlatehuijca carros huan imocahuayojhua tlen ipan
inmotemachijtose para inmomanahuise.
\v 11 Nojquiya nitlanahuatis ma quixolehuaca imoaltepehua tlen
inmoilhuíaj temachtli tlen ipan inmotlatíaj quema onca
tlatehuijcayotl. Quena, nijxolehuas sesen tepamitl tlen
quiyahualohua imoaltepehua pampa ayoc monequis.
\v 12 Huan nijxolehuas tlen ica intetlajchihuíaj huan ayoc itztos
niyon se tetlajchihuijquetl campa imojuanti.
\v 13 Huan niquinxolehuas nochi totiotzitzi huan tlaixcopincayome
tlen inquinhueyichihuaj. Huan ayoc quema inmotlancuaquetzase para
inquihueyichihuase tlen se quichijchijtoc ica ima.
\v 14 Niquinquixtis nochi nopa tlaixcopincayome tlen nopa teteyotl
Asera tlen mopantía imohuaya huan niquinxolehuas. Nojquiya
nijxolehuas nochi altepetini campa quinhueyichihuaj totiotzitzi.
\v 15 Huan nopa tlaltini tlen ax nechneltoquilise quimachilise
nocualancayo, pampa niquintlatzacuiltis chicahuac huan ica miyac
cualantli.”
\c 6
\s TOTECO quinteilhui israelitame
\p
\v 1 TOTECO quiijtohua: “Xijtlacaquilica, inisraelitame,
ximotlalanaca huan xinechcamaijixnamiquica intla ax cuali
nijchijtoc. Tlacactoque nochi huejhueyi tepetini huan nochi
tlachiquili tlen innechilhuise.
\p
\v 2 “Quena, nochi huejhueyi tepetini huan hasta campa
onmotlatzquilijtoc tlali ma quitlacaquilica tlen na niimoTECO
nijpiya para ica nimechteilhuis inisraelitame. Pampa innotlacajhua,
huan imohuaya nijpiya se cualantli.
\v 3 Notlacajhua, ¿tlachque fiero nimechchihuilijtoc para
innechtlahuelcahuase? ¿Ica tlachque nimechcuesojtoc?
¡Xinechnanquilica!
\v 4 Pampa na nimechquixti tlen tlali Egipto campa san tlapic
intlatequipanohuayayaj. Nopano quema initztoyaj iniaxcahua sequinoc
tlacame, na nimechcojqui para nimechtojtomas tlen nopa
tlatequipanojcayotl. Huan nimechtitlanili Moisés huan Aarón huan
María para inmechyacanase.
\p
\v 5 “Notlacajhua, ax inquiilnamiquij Balac nopa tlanahuatijquetl
ipan tlali Moab tlen quinequiyaya inmechtzontlamiltis huan
quitlajtlani nopa tiocamanalojquetl Balaam icone Beor ma
inmechteilhuis. Pero na nijfuerzajhui Balaam ma inmechtiochihua.
¿Ax inquiilnamiquij nochi tlen yejyectzi nimechchihuili quema
initztoyaj ipan ojtli tlen Sitim hasta Gilgal? Nijchijqui para
inquimatque para na, niimoTECO, huan nijchihua tlen xitlahuac.”
\s Tlen TOTECO quinequi tlacame ma quichihuaca
\p
\v 6 ¿Quejatza hueli tiajsitij iixpa TOTECO Tlen Más Hueyi para
tijhueyichihuase ica nochi tlen ax cuali tijchijtoque? ¿Cuali
tihualase iixpa ica becerros tlen quiaxitijtoque se xihuitl para
tijmacase queja tlacajcahualistli?
\p
\v 7 ¿Paquis TOTECO ica miyac mil tlacajcahualistli intla ax
tijchihuaj tlen cuali? Yonque nijmacasquía miles tlen borregojme o
tlahuel miyac aceite tlen quitemitisquía majtlactli mil atlajtli,
ax ya nopa quinequi. Yonque nijmacasquía noachtohui cone ipampa
notlaixpanolhua, yajaya tlen quisqui ipan notlacayo ipampa
tlajtlacoli tlen eltoc ipan noyolo, ax ica ya nopa paquis.
\p
\v 8 TOTECO techilhuijtoc nopa tlen cuali huan tlen quinequi ma
tijchihuaca. San quinequi ma tijchihuaca tlen xitlahuac, ma
titetlasojtlaca huan ma tinejnemica ihuaya huan ma timoechcapanoca
iixpa.
\s Ma ax tlacajcayahuaca
\p
\v 9 TOTECO camati chicahuac para nochi altepetl Jerusalén ehuani.
Tlacame tlen tlalnamiquij quiimacasij huan quitlepanitaj. Huan
TOTECO quiijtohua: “Xijtlacaquilica tlachque tlatzacuiltili hualas
huan xijmatica na nijtitlantoc.
\v 10 Pero imojuanti, ax ya nopa inquichihuaj. Inmoricojchihuaj ica
tlamantli tlen pajpatiyo tlen tlaxtectli. Huan quema intlanamacaj,
ax intemacaj ajsitoc queja monequi.
\v 11 Temachtli monequi nimechtlatzacuiltis pampa inquitequihuíaj
se tlayejyecoli tlen ax ajsi huan inquipiyaj tetini tlen quinpolohua
para inquitlalise ipan imobalanzas.
\v 12 Nopa tominpiyani quitemitijtoque ininchajchaj ica miyac
tlamantli tlachtectli huan nochi ininchaj ehuani istlacatij huan
tlacajcayahuaj.
\v 13 Yeca na nojquiya nijchihuas ximocococa huan nimechmajcahuas.
Nimechchihuas inmocahuase san imoma ipampa imotlajtlacolhua.
\v 14 Intlacuase, pero ax quema inixhuise. Tlen fiero ax quema
inmechcahuas. Yonque miyac inpixcase, ax huelis inquiajcocuise para
teipa. Huan tlen inquiajcocuise, niimoTeco niquinmactilis
imocualancaitacahua tlen inmechtlanise para ma quihuejhueloca.
\v 15 Intocase, pero ax inpixcase. Yonque ipan inmoquejquetzase
olivos para inquiquixtilise aceite, ax inquipiyase niyon se quentzi
aceite para inmopolose pampa tlen inmechtlanise quitequihuise. Huan
inmoquejquetzase ipan xocomecatl, pero ax oncas xocomeca atl para
inquiise, pampa nochi tlen imoaxca niquinmacas sequinoc.
\v 16 Inquitoquilijtoque itlanahuatilhua nopa fiero tlanahuatijquetl
Omri huan ifiero ojhui tlanahuatijquetl Acab. Yeca na nijchihuas
para ma quixolehuaca imoaltepe. Huan nochi sequinoc tlacame
inmechhuetzquilise ipampa tlen imopanti, inJerusalén ehuani.
Innotlacajhua, tlahuel inmopinahuase.”
\c 7
\s Israelitame momacaj cuenta para fierojtique
\p
\v 1 Nelía fiero nijmati. Nijmati queja se tlen quinequisquía
quicuas se quesqui higos tlen achtohui tlaicsi huan yohui campa
cuatini para quitequis huan niyon se ax quipantía. Nijmati queja se
tlen yohui para quitequis xocomecatl huan niyon se quechtli ax onca,
niyon setzi ax mocahua para quicuasquía.
\v 2 Ica na, yonque nijtemohua se tlen tetlasojtla ipan totlal,
niyon setzi ayoc aca. Axaca niyon se tlacatl tlen xitlahuac. Nochi
tlacame san tlachixtoque para temictise huan quitoyahuase estli.
Sesen quichihua tlaquetztli para quimasiltis huan quimictis iicni.
\p
\v 3 Nochi quipiyaj miyac yajatili para tlajtlacolchihuase hasta ica
nochi ininchicahualis. Totlayacancahua huan tojueces
quintlajtlaníaj nochi ma quintlaxtlahuica para tetlajtolsencahuase
queja yajuanti quinequij. Tlen tominpiyaj quinilhuíaj tlachque
quinequij ma quinchihuilica huan ya nopa quichihuaj nopa tequitini
yonque ax nesi intla tlasencajtoque.
\v 4 Axaca niyon se tequitiquetl tlen cuali. Tlen más cuali
itztoque queja huitztli tlen tecocohua. Huan tlen más xitlahuac
itztoque queja sahua mecatl tlen temasiltía. Pero nechcatitoc huala
inintlatzacuiltil. Ajsis nopa tonal tlen imotiocamanalojcahua tlen
temachtli tlachixtoyaj inmechyolmelajtoque para hualas. Huan ayoc
inquimatise tlachque inquichihuase.
\p
\v 5 Huajca amo xijneltoquili mohuampo, niyon amo ximotemachi ipan
tlen ihuaya ticochi pampa nojquiya mitzcajcayahuas. Más cuali amo
ximolini iixpa.
\v 6 Pampa ininconehua tlacame quinixpanose inintatahua. Huan
ichpocame ax quitlepanitase ininnanahua, niyon teyexhua ax
quitlepanitase iniyexnahua. Huan icualancaitacahua se tlacatl, elise
yajuanti tlen itztoque ipan ichaj.
\s Miqueas motemachi ipan TOTECO Dios
\p
\v 7 Pero na nijtlachilis TOTECO Dios para nechpalehuis.
Nimotemachis ipan yajaya tlen nechmaquixtía. Quena, noTeco
nechtlacaquilis.
\s Se tonal Israel tlatlanis
\p
\v 8 Imojuanti innocualancaitacahua, amo xipaquica noca na. Pampa
yonque nihuetztoc, sampa nimotlalanas. Yonque niitztoc ipan
tzintlayohuilotl ama, teipa TOTECO nechtlahuilis.
\v 9 Huajca ama niquijiyohuis icualancayo TOTECO pampa
nitlajtlacolchijtoc ica ya. Nijchiyas hasta yajaya camatis para
nechmanahuis. Nijpiyas noyolo hasta yajaya quichihuas tlen
quinamiqui ica na. Se tonali nechquixtis tlen ni tzintlayohuilotl
huan nechtlalis campa tlahuili. Huajca quena, niquitas para yajaya
san quichihua tlen xitlahuac.
\v 10 Huan nojquiya nocualancaitacahua quiitase huan TOTECO
quinpinahualtis tlen nechilhuiyayaj: “¿Canque itztoc moTECO
Dios?” Huan na niquitas quema TOTECO ininpan moquejquetzas
nocualancaitacahua queja soquitl tlen eltoc callejtipa.
\p
\v 11 Hualas tonali quema sampa tijsencahuase toaltepe huan
mohueyilis nopa tlali tlen toaxca.
\v 12 Ipan nopa tonali tlen ehuani ipan miyac tlaltini quiitaquij
altepetl Jerusalén. Hualase tlali Asiria ehuani huan hasta tlen
ehuani nopa altepetini tlen moyahualojque ica tepamitl; tlen tlali
Egipto hasta tlen itztose nechca atemitl Éufrates. Hualase nochi
tlen ehuani nopa tlaltini tlen ixalteno se hueyi atl hasta ixalteno
seyoc hueyi atl. Quiitaquij nochi tlen ehuaj tlaltini tlen ipejya
tepetini tlen nechca hasta tlen ehuaj san itlamiya tepetini tlen
huejca. Nochi quipaxaloquij toaltepe.
\v 13 Pero tlatzitzicatoc elis nopa tlaltini ipampa nochi tlamantli
fiero tlen quichijtoque tlen nopano ehuani.
\s Miqueas momaijto ica TOTECO
\p
\v 14 TOTECO, xitechyacana pampa timotlacajhua. Xitechmocuitlahui
queja se tlamocuitlahuijquetl quinmocuitlahuía iborregojhua huan
quintilana ica icuachijcol huehueyac quema calaquisnequij campa
mahuilili. Xitechcahuili tojuanti tlen tiitztoque toseltitzi campa
cuatitlamitl, ma sampa tiitztoca campa temachtli. Xitechtlamaca
cuali queja tiquintlamaca borregojme ica sacatl tlen sejselic queja
eltoc ipan tlali Basán huan Galaad. Quena, sampa ma tiitztoca ica
yejyectzi queja achtohuiya.
\s TOTECO tlananquili
\p
\v 15 ˻TOTECO camati:˼ “Na sampa nimechnextilis huejhueyi tlamantli
queja nopa chicahualnescayotl tlen nijchijqui quema inquisque
tlali Egipto.”
\s Miqueas sampa camati
\p
\v 16 Sequinoc tlaltini quiitase tlen tijchihuas huan mopinahuase
pampa quiitase ax tleno ipati ininchicahualis. Mopinahuase hasta
mocamatzacuase huan monacastzacuase.
\v 17 Quipipitzose nopa tlalcuanextli queja cohuame. Queja cohuame
tlen mohuahuatatzaj, huihuipicatihualase tlen campa motlatiyayaj
huan monextise ica hueyi majmajtli moixpa ta, TOTECO Dios.
\p
\v 18 Axaca seyoc Dios queja ta. Ta titetlapojpolhuía tlaixpanoli
huan yonque fiero quichijtoque motlacajhua tlen mocahuaj yoltoque,
tiquilcahua inintlajtlacolhua. Ax tijyoltipantlalía cualantli pampa
ta tipaqui miyac quema titetlasojtlaj.
\p
\v 19 Sampa tijpiyas hueyi moyolo tohuaya huan tijtlaltocas
totlaixpanolhua. Quena, TOTECO, ticatzonpolihuiltis nochi
totlajtlacolhua campa más huejcatla ipan hueyi atl.
\v 20 Techtiochihuas queja tiquilhui tohuejcapan tata Jacob para
tijchihuasquía huan techtlasojtlas queja tiquilhui Abraham. Nochi
tlen tiquintencahuili tohuejcapan tatahua huejcajquiya para
tijchihuasquía, ya nopa tijtlamichihuas.