\id ZEC
\h ZACARÍAS
\mt Zacarías
\c 1
\s TOTECO quinnotzqui itlacajhua
\p
\v 1 Ipan metztli chicnahui ipan tocalendario\f 1:1 Ipan octubre o noviembre ipan tocalendario tlen ama.\f* quema Tlanahuatijquetl Darío yahuiyaya para ome xihuitl tlanahuatis, TOTECO nechmacac niitiocamanalojca se tlajtoli. Na niZacarías tlen niicone Berequías tlen eliyaya icone Iddo. Huan yajaya quiijto:
\v 2 “NiimoTECO nicualanqui chicahuac ica mohuejcapan tatahua.
\v 3 Yeca ama nijnequi xiquinmaca israelitame ni tlajtoli. Na, niininTECO Tlen Niquinyacana Noelhuicac Ejcahua Ma Tlatlanitij niquijtohua: ‘Ximonechcahuica campa na, huan na nimonechcahuis campa imojuanti.’
\v 4 Amo ximochihuaca queja imohuejcapan tatahua quichijque quema nopa achtohui tiocamanalohuani quinilhuijque para ma mocuepaca tlen nopa fiero ojtli tlen quitoquiliyayaj. Quena, quinilhuijque ma quicahuaca nochi nopa fiero tlamantli tlen quichihuayayaj, pero yajuanti ax nechtlacaquilijque, niyon ax quichihuilijque cuenta nopa tlajtoli.” Queja nopa quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 5 “Ama nochi imohuejcapan tatahua ya huejcajquiya mijque. Huan imojuanti nojquiya queja imohuejcapan tatahua huan nopa tiocamanalohuani tlen huejcajquiya san initztose se tlalochtli.
\v 6 Pero notlajtol tlen niquinilhui ipan nopa tonali ipampa notiocamanalojcahua tlen nechtequipanohuayayaj ax mijque. Senquistoc nochi nopa tlajtoli huan tlanahuatili tlen niquinilhui nopa israelitame mochijque ipan imohuejcapan tatahua queja niquijto para panos. Huajca teipa moyolcuepque imohuejcapan tatahua huan quiijtojque: ‘TOTECO, Ta Tlen Tiquinyacana Moelhuicac Ejcahua Ma Tlatlanitij, titechtlatzacuiltijtoc senquistoc queja titechilhuijtoya titechchihuilisquía. Huan quinamiqui tlen tijchijqui ipampa nopa tlamantli fiero tlen tijchihuayayaj huan ipampa nopa fiero ojtli ipan tlen tinemiyayaj.’ ”
\s Tlanextili tlen tlacame ipan cahuayojme
\p
\v 7 Huan sampa TOTECO nechmacac se tlajtoli ipan nopa xihuitl quema Tlanahuatijquetl Darío yahuiyaya para ome xihuitl tlanahuatis. Elqui ipan 24 itequi nopa metztli majtlactli huan se ipan tocalendario\f 1:7 Ipan 15 itequi febrero ipan tocalendario tlen ama.\f*. Nopa metztli quitocaxtíaj Sebat. Huan TOTECO sampa nechcamahui na, niZacarías, niitiocamanalojca huan niicone Berequías tlen eliyaya icone Iddo.
\v 8 Quena, ipan nopa yohuali niquitac se tlanextili huan ipan nopa tlanextili niquitac se tlacatl tlejcotoya ipan se cahuayo chichiltic tlen moquetzayaya tepequespa campa tlafiero ica miyac cuatini tlen inintoca mirtos. Huan iica itztoyaj sequinoc cahuayojme. Sequin tlen nopa cahuayojme eliyayaj chichiltique, sequin costique huan sequinoc chipahuaque. Huan ipan sesen cahuayo tlejcotoya se tlacatl.
\v 9 Huan nijtlatzintoquili: “¿Tate, ajqueya yajuanti huan para tlen tlejcotoque ipan cahuayojme? ¿Tlachque quinequi quiijtos?” Huan nopa elhuicac ejquetl tlen nechcamahuiyaya nechilhui: “Na nimitzilhuis ajqueya yajuanti.”
\p
\v 10 Huajca nopa tlacatl tlen tlejcotoya ipan nopa cahuayo chichiltic ipan nopa mirtos nechilhui: “Ni cahuayojme huan tlen ininpan tlejcotoque itztoque tlen TOTECO quinhualtitlantoc para nemise campa hueli ipan tlaltepactli para quitlachilise tlen onca.”
\p
\v 11 Huan huajca nopa sequinoc tlen tlejcotoyaj ipan cahuayojme quiyolmelajque ielhuicac ejca TOTECO tlen itztoya campa nopa mirtos tlen quiitaque, huan quej ni quiilhuijque: “Ya tijyahualojtoque nochi tlaltepactli huan campa hueli onca tlasehuilistli huan temachili.”
\p
\v 12 Huan ielhuicac ejca TOTECO momaijto ica TOTECO huan quiijto: “Oh, TOTECO, Ta Tlen Tiquinyacana Moelhuicac Ejcahua Ma Tlatlanitij, ya quipiya 70 xihuitl para ticualantoc ica altepetl Jerusalén ehuani huan ica tlacame tlen hualahuij tlen altepetini ipan tlali Judá. ¿Quesqui tonali noja polihui para sampa tiquinnextilis motlaicnelijcayo?”
\p
\v 13 Huan TOTECO camatqui para quinanquili nopa elhuicac ejquetl tlen moquetzayaya nonechca huan nechcamahuiyaya huan TOTECO quiilhui tlajtoli tlen cuali huan tlen teyolchicahua.
\p
\v 14 Huajca nopa elhuicac ejquetl tlen nechcamahuiyaya nechilhui ma nitlayolmelahua ni tlajtoli: “Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij: ‘Tlahuel niquinicnelía huan niquintlasomati nopa tlacame ipan altepetl Jerusalén huan ipan tlali Judá huan nijnequi san na ma nechicnelica.
\v 15 Nojquiya tlahuel nicualantoc ica nopa tlaltini tlen ama mosiyajcahuaj pampa quema na nicualantoya san se quentzi ica notlacajhua, nopa tlaltini noja achi más fiero quinchihuilijque.’ ”
\v 16 Huajca TOTECO quiijto: “Temachtli nimocuepas huan sampa nijtlasojtlas altepetl Jerusalén. Huan nopano sampa quicualtlalise notiopa huan tepanchihuani quitlamachihuase nopa altepetl huan sampa quisencahuase.”
\v 17 Nojquiya nechilhui noja ma niquijto: “Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij: ‘Nijchihuas para noaltepehua huan notlacajhua sampa ma quipiyaca nochi tlen cuali hasta mocahuas. Huan nijmocuitlahuis Sion\f 1:17 Sion huan Jerusalén quinequi quiijtos san se altepetl.\f* ica nohueyi tlaicnelijcayo. Quena, niquijtos para Jerusalén eltoc nopa altepetl tlen nijtlapejpenijtoc.’ ”
\s Tlanextili tlen nahui cuacuajtli
\p
\v 18 Teipa niajcoitac huan niquitac nahui cuacuajtli.
\p
\v 19 Huajca nijtlatzintoquili nopa elhuicac ejquetl tlen nechcamahuiyaya, huan niquilhui: “¿Tlachque quiixnextíaj ne nahui cuacuajtli?”
\p Huan nechilhui: “Nopa nahui cuacuajtli quiixnextíaj ininchicahualis nopa tlaltini tlen quipiyaj chicahualistli tlen quinsemanque tlen ehuayayaj tlali Judá, tlali Israel huan altepetl Jerusalén.”
\p
\v 20 Teipa TOTECO nechnextili nahui teposchihuani.
\v 21 Huan na niquijto: “¿Tlachque hualajtoque quichihuaquij ne teposchihuani?”
\p Huan ielhuicac ejca TOTECO nechilhui: “Nopa teposchihuani hualajtoque para quintejtequilise inincuacua nopa tlaltini tlen quinsemanque tlali Judá ehuani. Quinquixtilise ininchicahualis hasta ayoc huelise moquetzase xitlahuac. Quena, quinchihuase ma huihuipicaca ica majmajtli nopa tlacame tlen tlaltini tlen nopa cuacuajtli quinextíaj.”
\c 2
\s Tlanextili tlen se cinta para tlayejyecose
\p
\v 1 Teipa niajcoitac huan niquitac se tlacatl huan ipan ima
quipiyayaya se mecatl tlen ica tlayejyecohua.
\v 2 Huan nijtlatzintoquili: “¿Canque tiya?”
\p Huan ya nechilhui: “Nijyejyecoti altepetl Jerusalén para
niquitas quesqui ihuehueyaca huan quesqui ipatlajca.”
\p
\v 3 Huan niquitac nopa elhuicac ejquetl tlen nechcamahuijtoya
quistejqui para monamiquiti ihuaya seyoc elhuicac ejquetl tlen
hualayaya quinamiquiqui.
\v 4 Huan nopa elhuicac ejquetl tlen hualayaya quiilhui: “Ximotlalo
campa ne telpoca tlacatl huan xiquilhui para teipa altepetl
Jerusalén quinpiyas miyac tlacame huan miyac tlapiyalime hasta ayoc
quincuis altepeijtic huan miyac tlacame huan tlapiyalime mocahuase
icalixpa nopa tepamitl. Pero yajuanti itztose ica temachili,
\v 5 pampa na, quiijtohua TOTECO, nielis queja se tepamitl tlen
tlitl tlen quiyahualos altepetl Jerusalén para nijmocuitlahuis.
Huan nijtemitis nopa altepetl ica notlatlanex.”
\s Ielhuicac Ejca TOTECO camatqui ipampa TOTECO
\p
\v 6-7 Huan TOTECO quiijto: “¡Xijtlacaquilica inisraelitame!
Nimechxolejqui campa hueli queja se chicahuac ajacatl
tlasemanasquía, pero ama nimechilhuía: ‘Xicholojtehuaca tlen nopa
tlali ica ajco campa ama initztoque queja inseyoc tlali ehuani.
Quena, inJerusalén ehuani, xijtlalcahuica tlali Babilonia huan
ximomanahuica.’ ”
\p
\v 8 Pampa ya ni tlen quiijtohua TOTECO Tlen Quinyacana Ielhuicac
Ejcahua Ma Tlatlanitij: “Quema monextis nohueyitilis, yajaya TOTECO
nechtitlanis na ica ni tlajtoli para ma niquintehuis nopa tlaltini
intla tlen hueli inmechchihuilijque. Pampa TOTECO quiijtohua para
aqui hueli tlen inmechcuatotonía, initlacajhua, eltoc queja
quicocohua iixtiyol sitlal, nopa tlen iaxca tlen achi más
quimocuitlahuía.
\v 9 Yeca na noseli niquintepachos nopa tlaltini huan nijchihuas
para inintlatequipanojcahua ma quintlamitlachtequilica hasta ax
tleno quipiyase. Huan huajca quimachilise para TOTECO Tlen
Quinyacana Ielhuicac Ejcahua Ma Tlatlanitij nechtitlanqui na.
\p
\v 10 “Huajca xihuicaca huan xipaquica, imojuanti tlen altepetl
Jerusalén, pampa na nihualas para niitztos tlatlajco imojuanti.”
Queja nopa quiijto TOTECO.
\v 11 “Huan ipan nopa tonali nojquiya tlacame tlen ehuaj ipan miyac
tlaltini mosansejcotilise ica TOTECO. Huan yonque ax israelitame,
mochihuase notlacajhua huan na nimocahuas para niitztos tlatlajco
imojuanti. Huan huajca inquimachilise para TOTECO Tlen Quinyacana
Ielhuicac Ejcahua Ma Tlatlanitij nechtitlanqui campa imojuanti.
\v 12 Huan TOTECO yancuic moaxcatis tlali Judá tlen mopantía ipan
nopa tlali tlen tlatzejtzeloltic huan sampa teyolmelahuas para
quitlapejpenijtoc altepetl Jerusalén.”
\p
\v 13 Ipan nochi tlaltepactli ma axaca molini iixtla TOTECO pampa
quistejqui ipan ichaj tlatzejtzeloltic ipan elhuicac huan ya ajsitoc
ipan tlaltepactli.
\c 3
\s Tlanextili tlen iyoyo tlapajpactic Josué
\p
\v 1 Teipa ipan nopa tlanextili, nopa elhuicac ejquetl nechnextili
nopa hueyi totajtzi tlen itoca Josué. Yajaya moquetzayaya iixtla
ielhuicac ejca TOTECO. Huan campa inejmatl Josué, moquetzayaya
Axcualtlacatl huan quitlateilhuiyaya Josué ica miyac tlamantli.
\p
\v 2 Huan ielhuicac ejca TOTECO quiilhui Axcualtlacatl: “Ma TOTECO
mitztlateilhui, Axcualtlacatl. Yajaya ax mitzselilía tlen ica
tijteilhuía ni tlacatl. Pampa TOTECO ya quitlapejpenijtoc para
quitlasojtlas Jerusalén. Huan yajaya quitlahuelcahuas tlen ica
tijteilhuijtoc ni totajtzi. Ni tlacatl itztoc queja se cuapipitztli
tlen nijmanahuía tlen se hueyi tlitl huan ya tlatlajco tlatlatoc.”
\p
\v 3 Huan quema Josué moquetztoya iixtla ielhuicac ejca TOTECO,
moquentijtoya yoyomitl tlen tlahuel soquiyo.
\p
\v 4 Huajca ielhuicac ejca Toteco quinilhui nopa sequinoc tlen
moquetzayayaj nopano: “Xijquixtilica Josué nopa yoyomitl tlen
tlahuel soquiyo.”
\p Huan teipa ielhuicac ejca TOTECO quiilhui Josué: “Xiquita, ya
ni quiijtosnequi ya nimitzquixtilijtoc nochi motlajtlacolhua. Huan
yeca ama nijchihuas para ma mitzquentica yoyomitl tlen nelía
yejyectzi.”
\p
\v 5-6 Teipa nopa elhuicac ejquetl quincamahui nopa sequinoc tlen
nopano itztoyaj huan quinnahuati ma quitlalilica ipan itzonteco se
cuatzajcayotl tlen yancuic. Huan quitlalilijque. Huan quiquentijque
iyoyo tlen yancuic huan ielhuicac ejca TOTECO moquetztoya inechca.
Huan ielhuicac ejca TOTECO quicamahui Josué huan quiilhui:
\v 7 “Quej ni quiijtohua TOTECO Tlen Quinyacana Ielhuicac Ejcahua
Ma Tlatlanitij: ‘Intla tijtoquilis noojhui huan tijchihuas nochi
tlen nimitznahuatía, huajca nimitztequimacas titlayacanquetl tlen
quipiya más tequihuejcayotl ipan notiopa huan icalixpahua. Huan na
nimitzcahuilis para ticalaquis huan tiquisas tlen na noixpa queja ni
elhuicac ehuani quichihuaj tlen nechtequipanohuaj.
\p
\v 8 “ ‘Ta tiJosué tlen tihueyi totajtzi ininhuaya ni totajtzitzi
tlen mosehuíaj moixtla, xijtlacaquilica cuali ya ni, pampa nochi
imojuanti inquiixnextíaj nopa cuajcuali tlamantli tlen hualase
teipa. Temachtli na nijhualtitlanis notlatequipanojca tlen itoca
Chamanquetl.
\v 9 Quena, xijtlachilica nopa tetl tlen más ipati tlen
nimitztencahuilis, Josué. Nopa tetl quipiyas chicome iixtiyol tlen
quinextis para nochi quimatis. Huan ipan nopa tetl na nitlajcuilos.
Huan san ipan se tonali nijtlamiquixtis nochi tlajtlacoli tlen ni
tlali.’ ” Queja nopa quiijto TOTECO Tlen Quinyacana Ielhuicac
Ejcahua Ma Tlatlanitij.
\p
\v 10 “ ‘Huan inquinnotzase imohuampoyohua para ma mosehuica
imohuaya imocalixpa inintzala xocomeca tzontli huan ininmatzala
higuera cuatini. Huan inpaquise san sejco ica tlasehuilistli huan
temachili.’ ” Queja nopa quiijto TOTECO Tlen Quinyacana Ielhuicac
Ejcahua Ma Tlatlanitij.
\c 4
\s Tlanextili tlen tlahuil quetzali huan ome olivo cuahuitl
\p
\v 1 Huajca nopa elhuicac ejquetl tlen nechcamahuijtoya, nechixiti
queja quiixitíaj se tlacatl tlen cochtoc.
\v 2 Huan nechilhui: “¿Tlachque tiquita?”
\p Huan na niquilhui: “Niquita se tlahuil quetzali tlen
tlachijchihuali ica oro, huan quipiya chicome tlahuili. Huan ica
huejcapa tlen nopa tlahuili onca se caxitl campa quitecaj aceite.
Huan yahualtic nopa caxitl, onca chicome tlahuili huan tubos
quisayayaj tlen nopa caxitl para quipanoltise aceite ipan sesen
tlahuili.
\v 3 Huan ipan sese lado nopa caxitl onca se olivo cuahuitl. Se ipan
inejmatl nopa caxitl huan seyoc ica iarraves.”
\v 4 Na nijsenhuiquili nicamati. Huan nijtlatzintoquili nopa
elhuicac ejquetl tlen nechcamahuiyaya, niquilhui: “Tate, ¿tlachque
nochi ya nopa? Huan ¿Tlachque quiixnextíaj?”
\p
\v 5 Huan nopa elhuicac ejquetl tlen nechcamahuiyaya nechilhui:
“¿Melahuac ax tijmati tlachque quiixnextíaj?”
\p Huan na niquilhui: “Melahuac ax nijmati, tate.”
\p
\v 6 Huajca yajaya nechilhui: “Ya ni quiixnextía nopa tlajtoli
tlen TOTECO quinequi quimacas nopa tequihuejquetl Zorobabel ica
quejatza quitlamiltis nopa tiopamitl: ‘Ax ininpampa mosoldados,
niyon ipampa mochicahualis. San nopampa na notonaltzi mochihuas.’
Queja nopa quiijtohua TOTECO Tlen Quinyacana Ielhuicac Ejcahua Ma
Tlatlanitij.
\p
\v 7 “Huan tlen hueli tlaohuijcayotl tlen nesis queja se hueyi
tepetl para quitzacuilis itequi Zorobabel, mocuepas ica se
tlamayamitl tlen ax más ohui. Huan quema quitlalis itlamiya tetl
tlen nelía yejyectzi ipan itzonpac nopa tiopamitl, nochi
israelitame tzajtzise ica paquilistli huan quiijtose: ‘¡Ma TOTECO
quitiochihua! ¡Ma TOTECO quitiochihua!’ ”
\s Zorobabel quisencahuas nopa tiopamitl
\p
\v 8 Huan TOTECO nechmacac ni tlajtoli:
\v 9 “Zorobabel quitlali itzinpehualtil nopa tiopamitl huan yajaya
quisencahuas. Huan huajca inquimachilise para TOTECO Tlen Quinyacana
Ielhuicac Ejcahua Ma Tlatlanitij nechtitlanqui campa ta.
\v 10 Ma axaca moilhui para ax tleno ipati nopa tlamantli
pilsiltzitzi tlen quichihuas para ica quipehualtis nopa tiopamitl,
pampa paquise quema quiitase nopa plomada imaco Zorobabel quema nopa
tequitl cuali yohui. Huan nopa chicome iixtiyolhua TOTECO tlen
tlachiyaj campa hueli ipan nochi tlaltepactli quipalehuise ma
quitlamisencahua nopa tiopamitl.”
\p
\v 11 Na sampa nicamatqui huan nijtlatzintoquili: “¿Tlachque
quiixnextíaj ne ome olivo cuahuitl tlen eltoque ipan sesen lado
tlen ne tlahuil quetzali?”
\v 12 Huan nojquiya niquilhui: “¿Tlachque quiixnextíaj ne ome
ininmacuayohua ne cuatini olivo tlen quitoyahuaj nopa aceite tlen
eltoc queja oro ipan nopa ome tubos tlen oro?”
\p
\v 13 Huan yajaya nechilhui: “¿Ax tijmati tlachque
quiixnextíaj?”
\p Huan na niquilhui: “¡Axtle, tate, ax nijmati!”
\v 14 Huajca yajaya nechilhui queja ni: “Quiixnextíaj nopa ome
tlacame tlen quinajaltijtoque huan quintequimacaque para
quitequipanose TOTECO tlen quinahuatía nochi tlaltepactli.”
\c 5
\s Tlanextili tlen nopa amatlajcuiloli tlen patlani
\p
\v 1 Huan sampa niajcoitac huan niquitac patlanti se amatl tlen
quipiya tlajcuiloli.
\v 2 Huan nopa elhuicac ejquetl nechilhui: “¿Tlachque tiquita?”
\p Huan na niquilhui: “Niquita patlanti se hueyi amatl tlen quipiya
tlajcuiloli. Huelis quipiya chicnahui metros ihuehueyaca huan nahui
metro huan tlajco ipatlajca.”
\p
\v 3 Huajca nechilhui: “Ipan nopa amatl ijcuilijtoc nopa
tlatelchihualistli tlen TOTECO quititlani ipan ni tlali. Ipan se
lado ijcuilijtoc para nochi tlen tlaxtequij, quintojtocase. Huan
ipan nopa seyoc lado ijcuilijtoc para nochi tlen quitestigojquetzaj
tlen ax neli ayoc hueli itztose nopano.
\v 4 Ya ni tlen quiijtohua TOTECO Tlen Quinyacana Ielhuicac Ejcahua
Ma Tlatlanitij: ‘Na nijtitlanis ni tlatelchihualistli ipan
ininchajchaj nochi tlen momatque tlaxtequij huan ipan ininchajchaj
nochi tlacame tlen tlatestigojquetzaj ipan notoca ica tlamantli tlen
ax melahuac. Huan nopa tlatelchihualistli tlen nijtitlantoc mocahuas
ipan sesen nopa caltini hasta quintlamixolehuase ica nochi
inincuatetonyo huan nochi tetl tlatecpicholi.’ ”
\s Tlanextili tlen se sihuatl ipan se tlayejyecoli
\p
\v 5 Huajca nopa elhuicac ejquetl tlen nechcamahuiyaya nechcajtejqui
se tlalochtli. Teipa sampa hualajqui huan nechilhui: “Ama
xiajcotlachiya huan xijtlachili tlen monextijtoc.”
\p
\v 6 Huan nijtlatzintoquili: “¿Tlachque ya nopa?”
\p Huan yajaya nechilhui: “Ya ne eli se chiquihuitl tlen eli se
tlayejyecoli para trigo huan temitoc ica nochi inintlajtlacolhua
nochi tlacame tlen itztoque ipan ni tlali.”
\p
\v 7 Nopa chiquihuitl quipixqui itepos tzajca tlen plomo tlen
tlahuel etic. Huan teipa quitlalanque iixtzajca huan ipan nopa
chiquihuitl niquitac mosehuijtoc se sihuatl.
\v 8 Huan nopa elhuicac ejquetl nechilhui: “Nopa sihuatl
quiixnextía tlajtlacolotl huan nochi tlen ax cuali.” Huan teipa
quicuatopejqui nopa sihuatl para sampa quicalaquis ipan nopa
chiquihuitl huan quiixtzajqui ica iixtzajca tlen tlahuel etic.
\p
\v 9 Teipa sampa nijtlachili huan niquinitac ome sihuame tlen
patlantihualayayaj campa tojuanti ipan nopa ajacatl ica
inieltlapalhua. Huan ni sihuame quipiyayayaj inieltlapal queja
ieltlapal nopa tototl tlen quitocaxtíaj cigüeña. Huan yajuanti
quicuicoj nopa chiquihuitl huan patlantiyajque huan quihuicaque ipan
ajacatl.
\p
\v 10 Huan nijtlatzintoquili nopa elhuicac ejquetl tlen
nechcamahuiyaya: “¿Canque quihuicaj ne chiquihuitl?”
\p
\v 11 Huan yajaya nechilhui: “Quihuicaj ipan tlali Babilonia para
quichijchihuilitij itiopa. Huan quema ya quisencajtose nopa
tiopamitl, quitlalise nopa chiquihuitl nopano ipan se mesa para
quinextise.”
\c 6
\s Tlanextili tlen nopa nahui carrojme
\p
\v 1 Sampa niajcoitac huan niquinitac nahui tlatehuijca carrojme
tlen quisayayaj tlajco tlen nopa ome huejhueyi tepetini tlen eltoc
queja nopa tepostli bronce.
\v 2 Nopa achtohui tlatehuijca carro quinpixtoya cahuayojme tlen
chichiltique tlen quitilanayayaj. Nopa ompa tlatehuijca carro
quinpixtoya cahuayojme tlen yayahuique.
\v 3 Nopa expa tlatehuijca carro quinpixtoya cahuayojme tlen
chipahuaque. Huan nopa najpa tlatehuijca carro quinpixtoya
cahuayojme tlen ixtenextique.
\p
\v 4 Huajca niquilhui nopa elhuicac ejquetl tlen nechcamahuiyaya:
“Tate, ¿tlachque quiixnextíaj ne tlatehuijca carrojme?”
\p
\v 5 Huan yajaya nechilhui: “Yajuanti quinixnextíaj nopa nahui
elhuicac ehuani tlen itztoque iixpa TOTECO tlen quinahuatía nochi
tlaltepactli. Huan hualahuij para quichihuaquij nopa tequitl tlen
TOTECO quinilhuijtoc ma quichihuaca.
\v 6 Nopa carro ica cahuayojme tlen yayahuique, yohuij ipan nopa
tlali tlen mocahua ica norte. Huan nopa carro ica cahuayojme
chipahuaque, yohuij ipan nopa tlali campa calaqui tonati. Huan nopa
carro ica cahuayojme tlen ixtenextique yohuij ipan nopa tlali tlen
mocahua ica tlani.”
\p
\v 7 Pero nopa cahuayojme tlahuel motetiliyayaj pampa quinequiyayaj
yase para nemise ipan nochi tlaltepactli. Huan nopa elhuicac ejquetl
quinilhui: “¡Cualtitoc! Xiyaca huan xinemica campa hueli ipan
nochi tlaltepactli.” Huan yajuanti nimantzi quisque huan yajque
ipan inintequi.
\p
\v 8 Huajca ielhuicac ejca TOTECO nechmacac na, niZacarías, ni
tlajtoli, nechilhui: “Xiquita, yajuanti tlen yajque ipan nopa tlali
ica norte, quitlalitoj tlatzacuiltili nopano. Huan yeca
mosiyajcajtoc Notonal nepa huan nechyoltlali tlen nohueyi
cualancayo.”
\s Se corona ipan itzonteco Josué
\p
\v 9 Huan TOTECO nechmacac ni tlajtoli, quiijto:
\v 10 “Xiya ama ipan ichaj Josías, icone Sofonías huan xijselili
nopa plata huan oro tlen quihualicaj Heldai, Tobías huan Jedaías
tlen mocueptoque tlen tlali Babilonia.
\v 11 Huan ica nopa plata huan oro, xijchijchihua se corona, huan
teipa xijtlalili ipan itzonteco nopa hueyi totajtzitzi Josué tlen
icone Josadac.
\v 12 Huan teipa xiquilhui Josué: ‘Quej ni quiijtohua TOTECO Tlen
Quinyacana Ielhuicac Ejcahua Ma Tlatlanitij: Teipa hualas nopa
tlacatl tlen itoca Chamanquetl. Yajaya chamanis ica iseli huan
quichijchihuas TOTECO itiopa.
\v 13 Quena, elis ya tlen quichihuas itiopa TOTECO huan yajaya
quipiyas ihuextilis huan mosehuis queja tlanahuatijquetl ipan isiya
campa tlanahuatía. Huan yajaya nojquiya elis se totajtzi tlen
mosehuía ipan nopa siya tlen tlanahuatijquetl para tlanahuatis.
Huan oncas tlasehuilistli ica nopa ome itequi.’
\p
\v 14 “Teipa nopa corona xijtlalica ipan tiopamitl para
inmechilnamiquiltis tlen nopa tlen temacaque Heldai, Tobías,
Jedaías huan Josías icone Sofonías.
\v 15 Huan miyac tlacame tlen huejca ehuani hualase para
quipalehuise para quicualtlalise itiopa TOTECO. Huan quema mochihuas
ya nopa, inquimachilise para TOTECO Tlen Quinyacana Ielhuicac
Ejcahua Ma Tlatlanitij nechtitlanqui campa imojuanti. Nochi ya ni
panos quema imojuanti inquicaquise itos imoTECO Dios huan
inquineltocase.”
\c 7
\s Quejatza monequi mosahuase para quisas cuali
\p
\v 1 Quema Tlanahuatijquetl Darío yohuiyaya para nahui xihuitl tlanahuatis sampa hualajqui se tlajtoli tlen TOTECO para na, niZacarías. Nechmacac nopa tlajtoli ipan 4 itequi nopa metztli tlen itoca Quisleu, tlen eltoc metztli chicnahui ipan tocalendario\f 7:1 Ipan 7 itequi diciembre ipan tocalendario tlen ama.\f*.
\v 2 Ipan nopa tonali nojquiya nopa tlacame tlen altepetl Betel quintitlanque Regem Melec, Sarezer huan inintlacajhua ma yaca hasta itiopa TOTECO ipan Jerusalén para ma quitlajtlanitij TOTECO itlatiochihual.
\v 3 Huan nojquiya quinejque ma quitlajtlanitij nopa totajtzi intla noja quisenhuiquilise chocase huan mosahuase iixtla TOTECO sesen xihuitl ipan metztli macuili queja quichijtoyaj para miyac xihuitl.
\p
\v 4 Huan teipa sampa nechmacac se tlajtoli TOTECO Tlen Quinyacana Ielhuicac Ejcahua Ma Tlatlanitij, huan yajaya quiijto:
\v 5 “Xiquincamahui nochi tlacame ipan ni tlali huan nochi totajtzitzi huan xiquinilhui: ‘Ipan nochi nopa 70 xihuitl quema inchocayayaj huan inmosahuayayaj ipan metztli macuili huan inilhuichihuayayaj ipan metztli chicome, ¿inmoilhuiyayaj inquichihuayayaj para innechtlepanitaj huan para nelía inquicahuase imotlajtlacolhua huan inmonechcahuise campa na? ¡Ax neli!
\v 6 Huan ama ipan ni tonali nojquiya, quema inquichihuaj ilhuitl, ax inmoilhuíaj tlen na. Inquichihuaj para intlacuase huan intlaise san sejco, huan para inixhuise.
\v 7 Nelía san se ni tlajtoli tlen nimechilhuía ama ica nopa tlajtoli tlen huejcajquiya nimechmacac ipampa notiocamanalojcahua. Ipan nopa tonali Jerusalén huan nochi ipilaltepetzitzi huan nopa Neguev huan Sefela quinpixque tlahuel miyac tlacame huan quipixque tlasehuilistli pampa aya niquintlatzacuiltiyaya.’ ”
\s Para tlen TOTECO ax quinnanquilía
\p
\v 8 Teipa sampa TOTECO nechmacac na, niZacarías, se tlajtoli huan quiijto:
\v 9 “NiimoTECO Tlen Niquinyacana Noelhuicac Ejcahua Ma Tlatlanitij huan niquijtohua: ‘Xitetlajtolsencahuaca xitlahuac. Monequi sesen imojuanti ximotlasojtlaca huan ximoicnelica se ica seyoc queja initztosquíaj inicnime.
\v 10 Amo xiquintlaijiyohuiltica cahualme, niyon icnotzitzi, niyon teicneltzitzi, niyon tlacame tlen hualahuij tlen seyoc tlali. Amo ximoilhuica ipan imoyolo para inquicocose seyoc tlacatl.’
\p
\v 11 “ ‘Pero quema niquinilhui ya ni, imohuejcapan tatahua ax quichihuilijque cuenta notlajtol. Moicancuepque huan quitzajque ininnacas ica ininmacpil para ax quicaquise tlen niquinilhuiyaya.
\v 12 Yajuanti tlahuel moyoltetilijque pampa ax quinejque quitlacaquilise nopa tlajtoli huan nopa tlanahuatili tlen, niininTECO, niquinilhuiyaya ipampa Notonal tlen nijtitlanqui ipan nopa tiocamanalohuani. Huan pampa ax quichihuilijque cuenta notlajtol, hualajqui ininpani nohueyi cualancayo, niininTECO, Tlen Niquinyacana Noelhuicac Ejcahua Ma Tlatlanitij.
\p
\v 13 “ ‘Huan pampa ax quichihuilijque cuenta quema na niquinnojnotzqui, nojquiya ayoc niquintlacaquili quema yajuanti nechtzajtziliyayaj. Queja nopa niquijtohua niimoTECO Tlen Niquinyacana Noelhuicac Ejcahua Ma Tlatlanitij.
\v 14 Huan niquinsemanqui imohuejcapan tatahua queja se chicahuac ajacatl quisemana tlasoli. Niquinchihualti ma yaca ipan nochi tlaltini campa hueli ipan tlaltepactli. Huan inintlal mocajqui queja se tlamantli tlen quitlahuelcajtoque huan sosoltic. Huan pampa ayoc aca panoc nopano, nopa tlali mocajqui queja se huactoc tlali.’ ”
\c 8
\s TOTECO quintlajtolcahuili para quintiochihuas
\p
\v 1 Huan sampa nechmacac se tlajtoli TOTECO Tlen Quinyacana
Ielhuicac Ejcahua Ma Tlatlanitij, huan quiijto:
\v 2 Quej ni niimoTECO niquijtohua, na Tlen Niquinyacana Noelhuicac
Ejcahua Ma Tlatlanitij: “Tlahuel niquintlasomati notlacajhua ipan
Jerusalén pampa niquinicnelía miyac. Nijnequi san na ma
nechicnelica huan nicualani miyac intla ax nechicnelíaj.”
\v 3 Huajca ya ni tlen TOTECO quiijtohua: “Temachtli na nimocuepas
ipan Sion huan nimocahuas para niitztos ipan altepetl Jerusalén.
Huan nopa altepetl quitocaxtise: Altepetl Tlen Nopa Tlamantli Tlen
Melahuac. Huan quitocaxtise: Itepe TOTECO Tlen Quinyacana Ielhuicac
Ejcahua Ma Tlatlanitij. Huan quitocaxtise: Tepetl Tlen
Tlatzejtzeloltic.”
\p
\v 4 Quej ni quiijtohua TOTECO Tlen Quinyacana Ielhuicac Ejcahua Ma
Tlatlanitij: “Altepetl Jerusalén sampa quipiyas paquilistli huan
tlasehuilistli. Se tonali huehuentzitzi huan nanatzitzi sampa
nejnemise ipan icalles. Huan sesen tlen yajuanti quihuicas icuatopil
pampa miyac xihuitl quipiyase.
\v 5 Huan nopa calles temise ica miyac oquichpilme huan sihuapilme
tlen mahuiltise nopano.”
\p
\v 6 Quej ni quiijtohua TOTECO Tlen Quinyacana Ielhuicac Ejcahua Ma
Tlatlanitij: “Ipan nopa tonali nopa tlacame tlen noja mocahuase,
quisentlachilise quema sampa oncas miyac tlacame queja elisquía se
tiochicahual nescayotl o se tlamantli tlen hueyi, pero ax ohui para
na, pampa ax tleno ohui para nijchihuas.” Queja nopa quiijtohua
TOTECO.
\p
\v 7 Ya ni tlen quiijtohua TOTECO Tlen Quinyacana Ielhuicac Ejcahua
Ma Tlatlanitij: “Na niquinmaquixtis notlacajhua ininmaco
inincualancaitacahua tlen itztoque ipan nopa tlaltini campa quisa
tonati huan campa calaqui tonati.
\v 8 Niquinhualicas tlen campa hueli huan mocahuase para itztose
ipan altepetl Jerusalén. Huan yajuanti elise notlacajhua huan na
nielis niininDios tlen nelía xitlahuac huan temachtli.”
\p
\v 9 Quej ni quiijtohua TOTECO Tlen Quinyacana Ielhuicac Ejcahua Ma
Tlatlanitij: “Xijpiyaca chicahualistli, imojuanti tlen inquicaquij
ni tlajtoli ipampa nopa tiocamanalohuani huan initztoyaj nopano
quema quitlalijque nopa tzinpehualtili. Xitequitica chicahuac huan
xijtlamiltica nopa tiopamitl.
\v 10 Achtohuiya quema aya inquipehualtiyayaj para inquichihuase
nopa tequitl, ax oncayaya tequitl, niyon tomi para se quitlaxtlahuis
seyoc para itequi o para itequi itlapiyal. Huan axaca huelqui quisas
ipan altepetl huan quimati ica temachtli para mocuepas pampa nochi
inquinpixque miyac imocualancaitacahua pampa nijchijtoya nochi
imojuanti ximococolica se ica seyoc.
\v 11 Pero ama ayoc niquinchihuilis notlacajhua tlen noja mocahuase
queja niquinchihuili achtohui.” Queja nopa quiijtohua TOTECO Tlen
Quinyacana Ielhuicac Ejcahua Ma Tlatlanitij.
\v 12 “Ama nijchihuas para pehuas para oncas tlasehuilistli campa
imojuanti huan nijchihuas para xiitztoca ica paquilistli. Nochi
tlamantli tlen inquitocase, temacase cuali itlajca. Huan xocomeca
mili temacas cuali itlajca. Huan nopa tlali achi más tlaeliltis.
Huan nopa mixtli quichihuas ma huetzi miyac atl. Nochi ni
tlatiochihualistli quiselise nopa tlacame tlen noja mocahuase ipan
nopa tlali.
\v 13 Nopa tlaltini tlen ax quiixmatij TOTECO quiijtohuayayaj para
inisraelitame tlen tlali Israel huan tlali Judá inquinextiyayaj se
tlamantli tlen tlatelchihuali. Pero ama nimechmaquixtis huan nochi
inmechitase para initztose se tlatiochihualistli para nochi tlacame.
Huajca amo ximajmahuica. Ximosemacaca huan xijpiyaca fuerza huan
xijtlamiltica nopa tiopamitl.”
\p
\v 14 Quej ni quiijtohua TOTECO Tlen Quinyacana Ielhuicac Ejcahua Ma
Tlatlanitij: “Huejcajquiya quema imohuejcapan tatahua
nechcualancamacaque, nimotemacac para niquintlatzacuiltis huan,
quena, niquintlatzacuilti. Ax nimoyolpatlac.
\v 15 Huan ama nojquiya tlen niquijtohua para nijchihuas, temachtli
nijchihuas. Huan ya nimotemacac para nijtiochihuas nochi altepetl
Jerusalén huan tlali Judá, huan quena nijchihuas. Huajca amo
ximajmahuica.
\v 16 Ya ni tlen monequi inquichihuase imojuanti: ‘Ximocamahuica se
ica seyoc ica tlajtoli tlen melahuac. Xitetlajtolsencahuaca
xitlahuac. Huan xijtemoca tlamantli tlen inmechhualiquilis
tlasehuilistli.
\v 17 Ma axaca moilhui ipan iyolo para quichihuilis seyoc se
tlamantli tlen ax cuali. Ayoc xijtestigojquetzaca para melahuac se
tlamantli tlen inquimatij para ax melahuac queja ama inmechpactía
inquichihuaj. Ya nopa ax nijnequi niquitas.’ ” Quej nopa quiijtohua
TOTECO.
\p
\v 18 Huan ajsic seyoc tlajtoli tlen TOTECO huan quiijto:
\v 19 “Quej ni quiijtohua TOTECO Tlen Quinyacana Ielhuicac Ejcahua
Ma Tlatlanitij: ‘Nopa tonali quema inmosahuayayaj ipan nopa ilhuitl
ipan metztli nahui, macuili, chicome huan majtlactli mocuepase
tonali quema intlamahuisotij. Nopa ilhuime mocuepase tonali tlen
paquilistli huan nochi israelitame ma paquica quema quinilnamiquise
nopa tonali. Huajca xijnequica tlamantli tlen melahuac tlen
quichihuas ma oncas tlasehuilistli.’
\v 20 Huan TOTECO Tlen Quinyacana Ielhuicac Ejcahua Ma Tlatlanitij
quiijto: ‘Tlacame tlen itztoque ipan miyac altepetini huan tlaltini
campa hueli ipan tlaltepactli hualase ipan Jerusalén.
\v 21 Tlacame tlen se altepetl yase quinitatij nopa tlacame tlen
itztoque ipan seyoc altepetl huan quinilhuitij: Ma tiyaca ipan
altepetl Jerusalén para tijtemotij TOTECO Tlen Quinyacana Ielhuicac
Ejcahua Ma Tlatlanitij. Timomaijtose iixtla huan tijtlajtlanise ma
techtiochihuas. Huan huajca quiijtose: Tojuanti nojquiya tiyase.
\v 22 Huan hualase ipan Jerusalén miyac tlacame tlen miyac
altepetini huan tlen tlaltini tlen quipiyaj miyac chicahualistli.
Huan quitemose TOTECO Tlen Quinyacana Ielhuicac Ejcahua Ma
Tlatlanitij huan momaijtose iixtla huan quitlajtlaniquij
itlapalehuil huan itlatiochihualis.’
\p
\v 23 “Huan quej ni quiijtohua TOTECO Tlen Quinyacana Ielhuicac
Ejcahua Ma Tlatlanitij: ‘Ipan nopa tonali tlahuel miyac tlacame tlen
ehuani ipan nochi tlaltini huan tlen camatij nochi tlamantli
tlajtoli, quiitzquise ipan iyoyo se israelita huan quiilhuise:
Tiyase mohuaya pampa tijmatij para TOTECO Dios itztoc mohuaya.’ ”
\c 9
\s Inintlatzacuiltil tlaltini tlen nechca
\p
\v 1 Ya ni nopa tlajtoli tlen TOTECO teyolmelajqui ica nopa
tlatzacuiltili tlen quinajsis altepetl Damasco huan tlali Hadrac
ehuani. Yajaya quiijto: “Ipan nopa tonali nochi tlacame ipan nochi
altepetini huan nochi nopa huejhueyi familias tlen israelitame
nechtlachilise na, niininTECO.
\v 2 Nojquiya altepetl Hamat tlen mopantía nechca Damasco quipantis
tlen ax cuali huan altepetini Tiro huan Sidón nojquiya. Quena,
quiselise tlatzacuiltili yonque neltlalnamiquij.
\v 3 Yonque ipan altepetl Tiro quichijchijtoque huejhueyi caltini
tlen tilahuac para ipan momanahuise huan yonque quipiyaj tomi tlen
plata huan tlen oro queja imiyaca tlaltejpoctli tlen onca ipan
calles,
\v 4 Toteco quiquixtis nochi tlen quipiyaj. Huan nochi nopa
tlamantli tlen quiitayaya para ichicahualis, Toteco quichihuas para
ma huetzi ipan hueyi atl. Huan nopa altepetl tlamitlatlas.
\p
\v 5 “Huan quema nopa tlacame tlen itztoque ipan altepetl Ascalón
quiitase para huetzqui altepetl Tiro, momajmatise miyac. Huan nopa
tlacame tlen itztoque ipan altepetl Gaza tlahuel mocuesose. Huan
nopa tlacame tlen itztoque ipan altepetl Ecrón huihuipicase pampa
quiitase para altepetl Tiro ayoc huelis quinmanahuis tlen
inincualancaitacahua. Huan quinmictilise inintlanahuatijca nopa
tlacame tlen altepetl Gaza. Huan altepetl Ascalón mocahuas queja
tlali tlen quitlahuelcajtoque pampa ayoc mocahuas niyon se tlacatl.
\p
\v 6 “Huan seyoc tlali ehuani hualase para itztose ipan altepetl
Asdod. Huan ininpampa yajuanti nijtlamiltis nochi tlen ica
mohueyimatiyayaj nopa filisteo tlacame.
\v 7 Nijchihuas para ayoc quicuase se tlapiyali ica ieso. Huan ayoc
niquincahuilis ma quicuaca sequinoc tlamantli tlen ax quinamiqui
quicuase niyon quinhueyichihuase inintotiotzitzi. Huan nochi
yajuanti tlen noja mocahuase yoltoque nepa, quihueyichihuase Toteco
Dios, huan mochihuase tequitini ipan tlali Judá. Huan tlacame
nopano quinselise queja se familia tlen yancuic. Quena, nopa
filisteos tlen Ecrón mochihuase san se ica israelitame queja
huejcajquiya nopa jebuseos mochijque san se ininhuaya.
\v 8 Huan na niquinyahualos notlacajhua queja se
tlamocuitlahuijquetl huan ax niquincahuilis nopa miyac soldados tlen
panoque ma mocuepase para quintehuiquij. Niyon se tlen
quintlaijiyohuiltisquía ayoc quema panos nica pampa ama na
nitlachixtoc huan niquinmocuitlahuía.”
\s Hualas inintlanahuatijca israelitame
\p
\v 9 ¡Xipaquica miyac, intlacame ipan Jerusalén! ¡Xitzajtzica ica
paquilistli, nochi inisraelitame campa hueli! Imotlanahuatijca neca
huala. Yajaya senquistoc xitlahuac huan temaquixtía. Moicnonequi
huan huala ipan se pilburrojtzi. Quena, yajaya huala ipan icone se
sihua burra.
\s Tlachque quichihuas inintlanahuatijca
\p
\v 10 Huan nopa Tlanahuatijquetl quiijtohua: “Nijxolehuas nopa
tlatehuijca carrojme tlen quinpiyaj ipan tlali Israel campa itztoyaj
iixhuihua Efraín huan nopa tlatehuijca cahuayojme tlen itztoque
ipan altepetl Jerusalén. Nijpostequis nopa cuahuitoli tlen
quitequihuíaj ipan tlatehuilistli.” Quena, queja nopa quichihuas.
Huan quinmacas tlasehuilistli nochi tlaltini. Huan itlanahuatijcayo
ajsis tlen se hueyi atl hasta seyoc hueyi atl. Huan tlen nopa
atentli Éufrates ajsis campa hueli hasta san itlamiya tlaltepactli.
\v 11 TOTECO quiijtohua: “Huan pampa nijchijqui se
tlajtolsencahuali imohuaya, inisraelitame, tlen quisellojhuijque ica
estli huejcajquiya, yeca nimechmanahuis tlen initztoque ipan
tlatzactli san se queja nijchololti José tlen itztoya ipan nopa
aostotl tlen ax quipixqui atl huejcajquiya.
\v 12 Imojuanti tlen ineliyayaj intlatzactoque campa hueli,
ximocuepaca nopan na tlen niitztoc queja se cali tlen tlahuel
quipiya chicahualistli. Nopan na initztose temachtli. Nopan na
ximotemachica quema noja onca tonali. Huan nimechyolmelahuas para
nimechtiochihuas ome hueltas ipampa sesen tlaohuijcayotl.
\v 13 Pampa se tonal nijtequihuis tlali Judá ehuani queja
nocuahuitol. Huan itlacajhua tlali Efraín o Israel elis queja se
cuatlamintli ipan nocuahuitol tlen ica nitlatehuis. Nopa telpocame
ipan Jerusalén mooquichmatise huan elise queja se machete nomaco
tlen niquinhuicas ipan tlatehuijcayotl ica nopa soldados tlen tlali
Grecia ehuani.”
\s TOTECO monextis para quinmanahuis itlacajhua
\p
\v 14 Huan ipan nopa tlatehuijcayotl, TOTECO monextis iniixco
itlacajhua. Huan nopa cuatlamintli tlen quintequihuis motlalose
queja tlapetlanilotl. Huan TOTECO Dios quipitzas nopa tlapitzali
huan quisas para motehuis ihuaya icualancaitacahua. Huan yajaya
quipiyas chicahualistli queja se hueyi ajacatl tlen temajmatía
nopano ica tlani.
\v 15 Huan TOTECO Tlen Quinyacana Ielhuicac Ejcahua Ma Tlatlanitij
quinmanahuis itlacajhua. Huan itlacajhua quintzontlamiltise
inincualancaitacahua. Huan ininpan nejnemise queja tetini para
tlatehuitlatztli. Elise queja se tecuani tlen quicua tlen quitlantoc
huan quii ieso. Quema ya tlatlantose, itlacajhua tzajtzise ica
paquilistli queja se tlen quiitoc xocomeca atl tlen cococ. Quema
yajuanti quintzontlamiltise nochi inincualancaitacahua elise queja
nopa caxitl ipan tiopa tlen temitoc ica ieso nopa tlapiyali para ica
quiatzejtzelohuaj icuacua nopa tlaixpamitl.
\v 16 Huan ipan nopa tonali, TOTECO Dios quinmaquixtis itlacajhua
queja se tlamocuitlahuijquetl quinmanahuía iborregojhua. Huan ipan
nopa tonali itlacajhua petlanise ipan itlal queja piltetzitzi tlen
yejyectzitzi tlen quintlatzquiltijtoque ipan se corona.
\v 17 Tlahuel cuajcualtzi elis nopa tlali huan nochi elis nelía
yejyectzi. Huan pampa oncas miyac trigo huan miyac xocomecatl, nopa
telpocame huan ichpocame moscaltise yejyectzi huan quipiyase miyac
chicahualistli.
\c 10
\s TOTECO quinmaquixtis itlacajhua
\p
\v 1 Xijtlajtlanica TOTECO ma huetzis atl quema ajsis tonali para
seliyase cuatini. Huan yajaya tlen quichihua ma tlapetlani huan ma
onca huejhueyi mixtli inmechmacas atl hasta mocahuas. Queja nopa
nochi toctli ipan nochi mila temacas cuali itlajca.
\v 2 Pero quema inquintlatzintoquilíaj totiotzitzi se tlenijqui,
san tlapic tlen inmechnextilise. Huan yonque tetonalitani
quiijtohuaj para quipixque tlanextili campa quiitaque tlen panos
teipa, nochi inintlajtol san istlacatili. Tlayoltlalíaj ica
tlajtoli tlen ax neli huan quiijtohuaj para ax huala tlatzacuiltili.
Yeca nochi israelitame yohuij ipan iniojhui queja borregojme tlen ax
quipiyaj se tlen melahuac inintlamocuitlahuijca para
quinmanahuisquía huan yeca nelía tlaijiyohuise.
\p
\v 3 Huajca TOTECO quiijtohua: “Tlahuel nicualantoc ica nopa
tlamocuitlahuiani huan ica nopa tlayacanani tlen ax melahuac huan
yeca niquintlatzacuiltis. Pero niimoTECO Tlen Niquinyacana
Noelhuicac Ejcahua Ma Tlatlanitij nihualas huan niquintiochihuas
notlacajhua tlen iixhuihua Judá tlen huejcajquiya. Quena,
niquinchihuas tetique huan yejyectzitzi queja nocahuayo tlen más
mocualtlalijtoc para tlatehuis huan más quipiya tlatlepanitacayotl.
\v 4 Huan se iteipa ixhui Judá elis queja nopa tetl tlen más
monequi para ipan quiquetzase se cali tlen tetl pampa itztoc tlen
más monequi ipan nopa cali tlen na nijchihua. Yajaya elis queja
nopa tlaquetzali tlen ipan quiquetzaj se yoyon cali. Elis queja nopa
cuahuitoli tlen más cuali para tlatehuijcayotl. Huan iixtla ya
cholojtehuase nochi tlayacanani tlen quinequij tetlaijiyohuiltise.
\v 5 Iteipa ixhuihua Judá elise soldados tlen más motemacaj ipan
tlatehuijcayotl huan nejnemise ipan inincualancaitacahua queja
elisquíaj soquitl ipan calles. Huan tlatehuise chicahuac pampa
niininTECO niitztos ininhuaya. Huan quintlanise nochi ipan
tlatehuijcayotl hasta quinpinahualtise inincualancaitacahua tlen
tlejcoj ipan cahuayojme.
\p
\v 6 “Huan na niquinmacas chicahualistli ininteipa ixhuihua Judá
huan José huan niquinmaquixtis. Huan pampa niquintlasojtlas,
niquinchihuas sampa ma mocuepaca huan itztose ipan inintlal. Huan
elis queja ax quema niquintlahuelcajtoc pampa na niDios niininTECO
huan nijtlacaquilis nochi tlen quiijtose quema momaijtose ica na.
\v 7 Huan iteipa ixhuihua Efraín mochihuase queja tlatehuiani tlen
tlahuel motemacaj huan quipiyaj miyac chicahualistli. Huan paquise
miyac queja paquij tlacame tlen quiitoque miyac xocomeca atl. Huan
ininconehua quiitase quejatza niininTECO niquinicnelía huan
yolpaquise noixtla.
\v 8 Huan niquiquisis para niquinnotzas ma hualaca huan nimantzi
hualase mosentilise pampa ya niquinmaquixtijtoc. Huan nopa quentzi
israelitame tlen noja mocahuase yoltoque, pehuase momiyaquilise huan
sampa mochihuase nelmiyac tlacame queja eliyayaj achtohuiya.
\v 9 Yonque niquinsemantoc nopa israelitame campa hueli ipan
tlaltini tlen nelhuejca, nopano sampa nechilnamiquise huan
nechtemose. Huan yajuanti huan ininconehua mocuepase para sampa
itztose ipan inintlal.
\v 10 Quena, niquinchihuas ma mocuepaca tlen tlali Egipto huan tlen
tlali Asiria. Huan niquinhualicas hasta ipan tlali Galaad huan ipan
tlali Líbano. Huan itztose tlahuel miyac yajuanti tlen mocuepase
hasta ayoc quipiyase campa mochihuase.
\v 11 Huan yonque quipanose tlaohuijcayotl queja huejcajquiya quema
quipanoque nopa Hueyi Atl Chichiltic, na nijtzacuilis ichicahualis
nopa atl para ma ax quincocos. Nopa atemitl Nilo ipan tlali Egipto,
nijchihuas ma huaqui para huelis quisase ipan nopa tlali. Huan
niquinpinahualtis nopa tlayacanani ipan tlali Asiria tlen tlahuel
mohueyimatiyayaj huan nijtlamiltis nopa tequihuejcayotl tlen tlali
Egipto quipixqui.
\p
\v 12 “Huan nijchihuas para notlacajhua ma quipiyaca chicahualistli
noixtla. Huan yajuanti nejnemise nica huan neca campa quinequise
huan quihuicase notoca na.” Queja nopa quiijto TOTECO.
\c 11
\s Quihuejcamajcahuase inintlamocuitlahuijca
\p
\v 1 ¡Xiquitaca! Nopa tlali ipan Israel tlen itoca Líbano quiselis
se hueyi tlatzacuiltilistli. Elis queja quitlapos ipuertas para ma
calaqui se hueyi tlitl huan nopa tlitl quintlamitlatis nochi
tiocuatini tlen más yejyectzi quipixqui.
\v 2 Huan nochi tlacame nopano tlahuel mocuesose huan hasta elis
queja nopa cuatini tlen ocotl chocase pampa quimatise san se
ininpantis. Ama ya huetztoque nopa tiocuatini yonque eliyayaj nelía
yejyectzitzi huan huejcapantique. Eltoc queja nopa ahua cuatini
nopano campa itoca tlali Basán chocaj ica majmajtli pampa nochi
cuatitlamitl tlen quipiyayaya miyac cuatini hasta axaca huelqui pano
nopano, ama ya quinmajcajtoque tlalchi.
\v 3 Xijtlacaquilica quejatza chocaj nopa tlamocuitlahuiani tlen
borregojme ipan tlali Israel pampa nochi nopa sacapetlatl campa
quinnemiltijque inintlapiyalhua ya sosolijtoque. Ama san caquisti
cone tecuanime tlen nanalcaj pampa ya tlanqui nochi nopa yejyectzi
cuatitlamitl nechca atemitl Jordán campa mocajque para itztose.
\s Ome tlamantli tlamocuitlahuiani
\p
\v 4 Quej ni nechilhui NoTECO Dios: “Xiya huan xiquinmocuitlahui
notlacajhua tlen itztoque queja borregojme tlen tlaiyocatlalilme
para miquise.
\v 5 Queja tlacohuani tlen quincohuaj borregojme huan quinmictíaj
huan ax tleno moilhuíaj, nopa israelita tlayacanani quinmictíaj
notlacajhua huan ax momacaj cuenta intla quihuicaj tlajtlacoli. Huan
queja tlanamacani quinnamacaj borregojme huan san quiijtohuaj:
‘Tlascamati TOTECO pampa ya nimochijtoc nirico’, nopa israelita
tlayacanani tlen itztoque queja tlamocuitlahuiani tlen ax melahuac
quintemactilíaj notlacajhua ma miquise huan ax quintlasojtlaj.
\v 6 Para na ayoc niquintlapojpolhuis tlen fiero itztoque ipan ni
tlali. Nijchihuas para sese yajuanti ma huetzica ininmaco
ininhuampoyohua huan imaco inintlanahuatijca huan yajuanti
quinquechtzontequise. Huan nopa ax cuajcualme quichihuase para nopa
tlali ma mocahua queja huactoc tlali, pero na ax niquinmanahuis
notlacajhua tlen nopa ax cuajcualme.”
\p
\v 7 Huajca na nimotlali para niquinmocuitlahuis nopa israelitame
tlen quichiyayayaj tlatzacuiltili huan itztoyaj queja borregojme
tlen ya tlaiyocatlalilme para miquise. Ni borregojme quiixnextiyayaj
tlen más teicneltzitzi tlen nopa tlacame. Huan teipa nijcuic ome
cuatopili. Se nijtocaxtlali “Itlasojtlacayo”. Huan nopa seyoc
nijtocaxtlali “Quinchijtoc San Se”. Huan quej nopa,
niquinmocuitlahui nopa borregojme queja se cuali
tlamocuitlahuijquetl quichihuasquía huan queja TOTECO
nechnahuatijtoya.
\v 8 Huan ipan se metztli, niquintzontlamilti eyi tlamocuitlahuiani.
Pero ax nijpixqui noyolo ica nopa borregojme, niyon ica tlacame tlen
nopa tlali, huan yeca yajuanti nechcocolijque.
\p
\v 9 Huajca quej ni niquinilhui tlacame tlen nopa tlali tlen
itztoyaj queja nopa borregojme: “¡Ayoc nielis
niimotlamocuitlahuijca niyon ayoc nimechtlamacas! Intla inquinequij
inmiquise, huajca ximiquica. Intla se quinequi inmechmictis, huajca
ma inmechmicti. Huan tlen noja mocahuase, ma motzontlamiltica se ica
seyoc.”
\p
\v 10 Teipa nijcuic nopa cuatopili tlen itoca: “Itlasojtlacayo”
huan tlen quinextía noteicnelijcayo huan nijtlajcopostejqui. Ya
nopa nijchijqui para nijxolehuas nopa tlajtolsencahuali tlen
nijchijtoya ica nochi tlaltini.
\v 11 Huajca queja nopa ipan nopa tonali tlanqui nopa tlajtoli tlen
nijchijtoya ininhuaya. Huan nochi nopa tlacame tlen teicneltzitzi
nechtlachilijtoyaj huan quimachilijque para ica nopa tlamantli tlen
nijchijqui quinnextiliyaya tlen TOTECO quinequiyaya quinyolmelahuas.
\p
\v 12 Huan niquinilhui nopa tlayacanani: “Intla inmechpactía
huajca xinechtlaxtlahuica tlen inquiitaj nitequititoc. Huan intla ax
inmechpactía, huajca san xijcahuaca.”
\p Huajca yajuanti nechpatiitaque huan nechmacaque 30 plata tomi.
\p
\v 13 Huan TOTECO nechilhui: “Xijcui nopa piltlaxtlahuiltzi tlen
mitzmacaque queja motlaxtlahuil huan xijmajcahua ipan itiopa TOTECO
para ma quicahuaca campa quiajcocuij tomi.” Huajca nijcuic nopa
piltomintzitzi huan nijcuamajcajqui ipan itiopa TOTECO para
quitlalise campa quiajcocuij tomi.
\v 14 Teipa nijtlajcopostejqui nopa seyoc cuatopili tlen itoca
eliyaya: “Quinchijtoc San Se”. Huan queja nopa, niquixnexti para
tlali Judá huan tlali Israel tlen achtohuiya mocajque sentic, ya
motlajcoitaque.
\p
\v 15 Huan TOTECO nechilhui: “Xijchihuati sampa nopa tequitl tlen
se tlamocuitlahuijquetl pero ama ximochihua queja se
tlamocuitlahuijquetl tlen ax cuali huan xijcui nopa tlamantli tlen
yajaya quihuicasquía.
\v 16 Ya ni quinnextilía para nijtlalis ipan ni tlali se
tlamocuitlahuijquetl tlen ax quintemos nopa pilborregojtzitzi tlen
mocuapolojtoque, niyon ax quinmocuitlahuis tlen ontlacajtoque, niyon
ax quinpajtis tlen mometzpostectoque, huan niyon ax
quiajcolpantlalis nopa borrego tlen más tlaxicojtoc. Pero quena,
quicuas ininnacayo nopa borregojme tlen más tomahuaque. Huan hasta
iniisti nojquiya quitzayanas huan quicuas.
\v 17 Fiero ipantis nopa tlamocuitlahuijquetl tlen ax tleno ipati
huan tlen quintlahuelcahua nopa borregojme. Ica imachete TOTECO
quimaquilis ipan iajcol huan iixtiyol tlen inejmatl. Huan ima tlen
quinpalehuijtosquía iborregojhua mocahuas senquistoc huactoc. Huan
iixtiyol tlen quintlachilijtosquía mocahuas popoyotzi.”
\c 12
\s TOTECO quimanahuis Jerusalén
\p
\v 1 Ya ni nopa tlajtoli tlen TOTECO nechmacac ica tlen ininpantis
israelitame. Quena, TOTECO tlen quipatlajqui elhuicactli, huan
quitlalili itzinpehualtil ni tlaltepactli, huan quichijqui nopa
tonaltzi tlen eltoc ipan iyolo sesen tlacatl quej ni, quiijtohua:
\v 2 “Nijchihuas altepetl Jerusalén para elis queja se caxitl tlen
temitoc ica nocualancayo para nochi sequinoc tlaltini. Elis queja
temitoc ica se pajtli tlen tlahuel cococ huan fiero. Huan
quinchihuas ma moihuintica huan ma huihuipicaca nochi tlacame tlen
ehuaj ipan tlaltini tlen quinequise quintehuise tlali Judá huan
altepetl Jerusalén.
\v 3 Quena, ipan nopa tonali nijchihuas Jerusalén ma eli queja se
hueyi tetl tlen tlahuel etic. Huan yonque nochi tlaltini mosentilise
para quitehuise, nochi tlen quinequise quiolinise,
quintlamitepachos.”
\v 4 Quej ni quiijtohua TOTECO: “Ipan nopa tonali, na
niquintemajmatis nochi cahuayojme tlen quinhualicaj soldados para
quitehuise altepetl Jerusalén. Huan nopa soldados tlen ipan
tlejcotoque niquinchihuas ma tlapoloca. Pero na niquinmocuitlahuis
nochi tlali Judá ehuani. Huan nochi cahuayojme tlen ininpan
tlejcotoque para tlatehuise mocuepase popoyotzitzi.
\p
\v 5 “Huan nopa tlayacanani ipan tlali Judá quiitase ya ni huan
quiijtose: ‘Xiquitaca, Jerusalén ehuani quipantíaj chicahualistli
ipan TOTECO Tlen Quinyacana Ielhuicac Ejcahua Ma Tlatlanitij pampa
yajaya tlen ininTeco.’
\p
\v 6 “Ipan nopa tonali nijchihuas nopa tlayacanani ipan tlali Judá
elise queja se tlicuahuitl tlen quichihuas ma tlatla miyac cuatini
ipan se cuatitlamitl. Itztose queja tlicuahuitl tlen quichihua ma
tlatlas trigo pixquistli tlen huactoc huan nopa tlayacanani
quintlatise nochi tlaltini tlen mocahuaj nechca tlen ininnejmatl
hasta iniarraves. Pero ipan nopa tonali quema Judá ehuani
quintlanise nopa tlaltini, altepetl Jerusalén sampa temis ica
tlacame ica miyac paquilistli para itztose ipan inialtepe.
\p
\v 7 “Pero na, niimoTECO, achtohui niquinmaquixtis nopa tlacame
tlen itztoque ipan tlali Judá huan teipa niquinmaquixtis tlen
ehuani ipan altepetl Jerusalén. Nijchihuas ya nopa para nopa
tlacame tlen ehuani ipan altepetl Jerusalén tlen iteipa ixhuihua
David ax quiselise más tlatlepanitacayotl que ne sequinoc tlen
itztoque ipan sequinoc altepetini ipan tlali Judá.
\v 8 Ipan nopa tonali TOTECO quinmanahuis nopa tlacame tlen itztoque
ipan altepetl Jerusalén. Huan yeca se tlen ax quipiyas más
chicahualistli ipan nopa tonali quipiyas chicahualistli queja
Tlanahuatijquetl David. Huan tlen hualahuij ipan iteipa ixhuihua
David elise queja Toteco Dios, queja ielhuicac ejcahua TOTECO tlen
yohuij iniixtla notlacajhua.
\v 9 Huan ipan nopa tonali nimotlalis para niquintzontlamiltis nochi
tlacame tlen nochi tlaltini tlen hualase para quitehuise altepetl
Jerusalén.
\s Moyolcuepase israelitame
\p
\v 10 “Huan ipan nopa tonali niquinmacas iteipa ixhuihua David huan
nochi tlen itztoque ipan Jerusalén nopa Tonaltzi tlen quinpalehuis
para moicnelise huan momaijtose. Huan yajuanti nechitase na tlen
nechtlapohuilijque noelchiquicanahuiya huan nechchoquilise queja
chocaj tetajme quema miqui se conetl tlen iyojtzi. Huan mocuesose
nopampa na queja mocuesohuaj quema miqui se achtohui ejquetl.
\v 11 Huan ipan nopa tonali, ipan altepetl Jerusalén chocase huan
mocuesose achi más huan ax queja panoc quema mijqui nopa cuali
tlanahuatijquetl tlen itoca Josías huejcajquiya nechca Hadad Rimón
ipan nopa tlamayamitl tlen itoca Meguido.
\p
\v 12 “Nochi israelitame campa hueli ipan ni tlali chocase miyac
ica tlen nechchihuilijtoque. Sesen huejhueyi familia chocase iyoca.
Tlacame tlen itztoque iteipa ixhuihua David yase iyoca. Huan
ininsihuajhua nojquiya moiyocaquixtise para mocuesose.
\v 13 Huan chocase huan mocuesose ininseltitzitzi nochi iteipa
ixhuihua Leví. Huan ininseltitzitzi mocuesose iteipa ixhuihua
Simei. Huan sihuame mocuesose iyoca tlen ininhuehuejhua.
\v 14 Huan chocase nochi ipan nochi sequinoc huejhueyi familias tlen
israelitame. Huan sesen hueyi familia chocas huan mocuesos iyoca
ipampa tlen nechchihuilijtoque. Huan sesen tlacatl chocas iyoca tlen
isihua.
\c 13
\p
\v 1 “Ipan nopa tonali nijtlapos se ameli campa meya miyac atl para
nochi iteipa ixhuihua David huan nochi Jerusalén ehuani. Huan nopa
atl quinpajpacas tlen inintlajtlacolhua huan tlen nochi tlamantli
tlen ica moijtlacojtoque.
\v 2 Ipan nopa tonali niquintlamiixpolihuiltis nochi totiotzitzi
huan tlaixcopincayome tlen quinhueyichihuaj ipan nopa tlali huan
ayoc quema quiilnamiquise inintoca. Nojquiya
niquintlamiixpolihuiltis nopa tlacajcayajca tiocamanalohuani huan
nochi nopa ajacame tlen Axcualtlacatl tlen quinyacana.” Queja nopa
quiijtohua TOTECO Tlen Quinyacana Ielhuicac Ejcahua Ma Tlatlanitij.
\v 3 “Huan intla noja motlalanas se huan camatis queja se
tiocamanalojquetl, itata huan inana quiilhuise: ‘Monequi timiquis
pampa tiistlacatitoc. Tiquijtohua para TOTECO mitzmacatoc motlajtol,
pero yajaya ax quiijtojtoc.’ Huan ipan nopa tlalochtli itatahua
quicuaxahuase ica se huehueyac cuatlamintli huan quimictise.
\p
\v 4 “Ipan nopa tonali nochi tlen quiitase ipan tlanextili queja
tiocamanalohuani mopinahuase pampa quimatise para ax melahuac huala
tlen na. Axaca mohueyimatis huan quiijtos para yajaya se
tiocamanalojquetl pampa quimatis para ax neli. Huan ayoc aqui
quinequis tlacajcayahuas huan moquentis nopa yoyomitl tlen fiero
queja quemantzi moquentíaj tiocamanalohuani tlen melahuac ipan ni
tonali.
\v 5 Huan teipa se tlacatl tlen quiselis tlajtoli tlen ax melahuac,
quiijtos: ‘Ax na nitiocamanalojquetl. Na se nimilchijquetl. Hasta
quema noja eliyaya nioquichpil, san nitequiti mila.’
\p
\v 6 “Huan se quiilhuis: ‘Huajca ¿para tlen lijlipintic moma?’
Huan yajaya quiijtos: ‘Ya ni pampa nechcocojque ipan ininchaj
nohuampoyohua.’ ”
\s Quimaquilise itlamocuitlahuijca TOTECO
\p
\v 7 Quej ni quiijtohua TOTECO Tlen Quinyacana Ielhuicac Ejcahua Ma
Tlatlanitij: “Nijcahuilis ma quimictica nopa Tlamocuitlahuijquetl
tlen na nijtitlantoc, yajaya tlen más nonechca huan tlen san se
queja na. Quena, nitlanahuatis ma quimictica nopa
Tlamocuitlahuijquetl huan nochi nopa borregojme mosemanase. Huan na
nijtlalanas noma ica nopa tlacame tlen itztoque queja
pilborregojtzitzi huan nojquiya tlaijiyohuise.
\v 8 Ipan sesen eyi israelitame, ome miquise huan setzi mocahuas
ipan ni tlali.
\v 9 Huan nopa pilquentzi israelitame tlen noja mocahuase ipan ni
tlali, niquinpanoltis ipan se hueyi tlitl para niquinyejyecos huan
niquintlapajpacchihuas hasta itztose queja plata huan oro tlen
senquistoc cuali. Huan yajuanti nechtzajtzilise, huan na
niquintlacaquilis, huan niquijtos: ‘Ya ni notlacajhua.’ Huan
yajuanti quiijtose: ‘TOTECO yajaya toDios tojuanti.’ ”
\c 14
\s TOTECO mocuepas ipan tlaltepactli
\p
\v 1 ¡Xijtlachilica! Ya monechcahuía nopa tonali tlen itoca itonal
TOTECO quema yajaya tetlatzacuiltis. Huan tlacame inmechquixtilise
tlen imoaxca huan motlajcoxelhuilise imoixtla.
\v 2 Quena, ipan nopa tonali TOTECO quichihuas para nochi tlaltini
ma mosentilica para quiyahualose altepetl Jerusalén. Huan
quitehuise huan moaxcatise nopa altepetl. Calaquise ipan nochi
caltini para quicuise nochi tlen quinequise huan para quinchihuilise
tlen hueli nopa sihuame. Huan quinixtequise tlajco nopa tlacame huan
quinhuicase ilpitoque ipan seyoc tlali. Huan nopa seyoc tlajco
mocahuase ipan altepetl Jerusalén.
\p
\v 3 Pero teipa hualas TOTECO huan iselti quintehuis ininsoldados
nochi tlaltini. Quena, tlatehuis queja tlatehuijqui ipan nopa tonali
quema oncac hueyi tlatehuijcayotl.
\v 4 Ipan nopa tonal TOTECO hualas huan moquetzas ipan nopa tepetl
tlen itoca Olivos tlen mocahua iixmelac altepetl Jerusalén ica
campa quisa tonati. Huan nopa tepetl Olivos motlajcoitas huan
mochihuas se hueyi tlamayamitl tlen ajsis hasta campa quisa tonati
huan hasta campa oncalaqui. Huan queja nopa, tlajco tlen nopa tepetl
mocahuas ica norte, huan tlajco mocahuas ica tlani.
\v 5 Huan ipan nopa tlamayamitl imojuanti inmochololtise pampa nopa
tlamayamitl tlen mochijtoc tlen notepe ajsis hasta Azal. Quena,
incholose queja huejcajquiya cholojque imohuejcapan tatahua quema
mojmolini tlali ipan nopa tonali quema quihuicayaya tequitl
Tlanahuatijquetl Uzías ipan tlali Judá. Huan huajca hualas TOTECO,
yajaya tlen noDios, ininhuaya ielhuicac ejcahua huan ininhuaya nochi
itlatzejtzeloltijca tlacajhua.
\p
\v 6 Huan ipan nopa tonal, tonati, metztli huan sitlalime ayoc
tlahuise huan ax oncas se tlahuili tlen chicahuac niyon ax oncas
tzintlayohuilotl.
\v 7 Elis se tonal tlen senquistoc seyoc tlamantli pampa ax quema
oncac se tonal queja nopa. San TOTECO iselti quiixmati quejatza elis
nopa tonal pampa ax oncas tzintlayohuilotl niyon tlen nelía
tlatlanextli. Ica tiotlac ipan nopa tonal quema quinamiqui pehuas
para tlayohuas, oncas tlahuili queja elisquía tonaya.
\v 8 Huan ipan nopa tonal quisas ipan altepetl Jerusalén atl tlen
temacas yolistli tlen yancuic. Huan tlajco nopa atl ajsis ipan nopa
Hueyi Atl Mictoc huan nopa seyoc tlajco ajsis ipan nopa Hueyi Atl
tlen itoca Mediterráneo. Huan ne seyoc tlajco nopa atl quisas sesen
xihuitl ipan nopa tonali quema tlahuel tlaseseya huan ipan nopa
tonali quema tlatotoniya.
\p
\v 9 Huan TOTECO elis Tlanahuatijquetl ipan nochi tlaltepactli.
Quena, ipan nopa tonali momacase cuenta para onca san setzi Dios,
yajaya tlen TOTECO. Huan san yajaya nochi quiixmatise huan
quihueyichihuase.
\v 10 Nochi ni tlali mopatlas miyac quema chicahuac molinis tlali.
Mochihuas queja se hueyi tlamayamitl tlen pehuas altepetl Geba ica
norte tlen tlali Judá huan ajsis hasta altepetl Rimón tlen mocahua
ica tlani tlen altepetl Jerusalén. Huan altepetl Jerusalén sampa
motlalanas huan tlejcos más huejcapa, pero mocahuas campa ama
eltoc. Huan altepetl Jerusalén sampa mohueyichihuas. Quipiyas miyac
tlacame tlen nopa puerta tlen eliyaya iniaxca ininteipa ixhuihua
Benjamín huan hasta nopa puerta ipan esquina campa eltoya nopa
achtohui puerta. Teipa Jerusalén yas campa nopa Huejcapantic Cali
Hananeel campa tlachiyaj hasta campa quichihuaj ixocomeca ayo nopa
tlanahuatijquetl.
\v 11 Huan altepetl Jerusalén temis ica tlacame huan ayoc quema
moxolehuas. Nochi nopa altepetl huan itlacajhua itztose temachme.
\p
\v 12 Huan ya ni elis nopa tlatzacuiltili tlen TOTECO quintitlanilis
nochi nopa tlacame tlen nopa tlaltini tlen hualajque para quitehuise
altepetl Jerusalén: Inintlacayohua nochi inintlacajhua ijtlacahuis
huan lochonis yonque noja yoltoque huan moquetztoque ica iniicxihua.
Huan lochonise iniixtiyolhua huan ininnenepil ipan inincamac.
\p
\v 13 Ipan nopa tonali TOTECO quititlanis se hueyi majmajtli huan
nochi tlacame majmahuise hasta ax quimatise tlachque quichihuase.
Huan ininseltitzitzi tlacame quitlalanase ininma para momaquilise se
ica seyoc.
\v 14 Huan iixhuihua Judá nojquiya tlatehuitij ipampa altepetl
Jerusalén ica tlen hualajque ipan sequinoc tlaltini. Huan
quintlamiichtequilise nopa tlacame nochi tlamantli tlen
tlachijchihuali ica oro, plata huan yoyomitl.
\v 15 Huan nopa cocolistli tlen TOTECO quititlanis ipan tlacame
nojquiya quinajsis cahuayojme, mulas, camellos, burrojme huan nochi
tlamantli tlapiyalime tlen nopa tlatehuiani tlen sequinoc tlaltini
quinpixtose campa mochihuase.
\p
\v 16 Huan nopa tlacame tlen tlaltini tlen quitehuijque Jerusalén
huan tlen noja mocahuase yoltoque, yase sesen xihuitl ipan
Jerusalén para quihueyichihuatij nopa Tlanahuatijquetl tlen nopano
itztoc. Huan nopa Tlanahuatijquetl elis TOTECO Tlen Quinyacana
Ielhuicac Ejcahua Ma Tlatlanitij. Quena, yase para quichihuatij nopa
ilhuitl tlen nopa pilxajcaltzitzi.
\v 17 Huan intla sequin tlacame tlen nopa sequinoc tlaltini ax
quinequise yase ipan altepetl Jerusalén para quihueyichihuatij nopa
Tlanahuatijquetl tlen itztos TOTECO Tlen Quinyacana Ielhuicac
Ejcahua Ma Tlatlanitij, huajca TOTECO quichihuas para ma ax huetzi
atl ipan inintlal.
\v 18 Huan intla tlali Egipto ehuani ax quinequise yase, huajca
TOTECO quichihuas ma ax huetzi atl ipan nopa tlali. Huan
inintlacajhua quiselise nopa cocolistli tlen TOTECO quintitlanili
nopa sequinoc tlaltini tlen ax quinequij yase para quichihuatij nopa
ilhuitl tlen pilxajcaltzitzi.
\v 19 Nopa cocolistli elis nopa tlatzacuiltili tlen quiselise tlali
Egipto ehuani huan nochi sequinoc tlaltini tlen ax yase para
quichihuase nopa ilhuitl tlen pilxajcaltzitzi.
\p
\v 20 Ipan nopa tonal quitlalise se tlajcuiloli ipan nochi
tlamantzitzi huan quiijtos: “Ya ni tlatzejtzeloltic huan
tlaiyocatlalili para itequi TOTECO” pampa nochi tlamantli elis
tlatzejtzeloltic o tlaiyocatlalili para TOTECO. Huan nochi tlamantli
quipiyase nopa tlajcuiloli hasta ininteposcamachal cahuayojme huan
hasta nopa miyac chachapali ipan itiopa TOTECO tlen ipan
quisencahuaj tlacualistli. Nochi elise tlatzejtzeloltic queja nopa
huejhueyi caxitl tlen eltoque nechca tlaixpamitl.
\v 21 Nochi tlamantzitzi hasta tlen ipan quisencahuaj tlacualistli
ipan altepetl Jerusalén huan altepetl Judá elise tlatzejtzeloltic
huan tlaiyocatlalijtoc para TOTECO. Huan yajuanti tlen yohuij huan
quihuicase se tlapiyali para quimictise, quicuise se nopa chachapali
tlen quitequihuise para ipan quiicxitise inacayo nopa tlapiyali.
Huan ipan nopa tonali ayoc oncas tlacame tlen fiero o tlen
tlanamacaj ipan itiopa TOTECO, Yajaya Tlen Quinyacana Ielhuicac
Ejcahua Ma Tlatlanitij.