\id MAL
\h MALAQUÍAS
\mt Malaquías
\c 1
\s TOTECO quinexti iteicnelijcayo ica nopa israelitame
\p
\v 1 Ya ni nopa tlajtoli tlen TOTECO nechmacac na, niMalaquías, huan nechilhui ma niquinpohuili israelitame.
\p
\v 2-3 TOTECO quiijto: “Na nimechicnelía miyac.”
\p Pero inquiijtohuaj: “¿Quejatza techicnelijtoc?”
\p Huan TOTECO quiijtohua: “Nimechicnelía pampa nimechtlapejpenijtoc quema nijtlapejpeni para niquicnelis imohuejcapan tata Jacob\f 1:2-3 O Israel.\f*, yonque iicni, Esaú, tlen achtohui tlacatqui, ax nijnejqui. Huan pampa nijtlahuelcajqui Esaú, nijchijqui nochi cuatitlamitl tlen eliyaya iaxca ma eli queja huactoc tlali. Huan nochi itlalhua niquinmactili tlapiyalime tlen mosisiníaj para nopano ma tlacuaca.”
\p
\v 4 Huan huelis iixhuihua Esaú quiijtose: “Yonque quitlamixolehuas totlal, sampa tijcualtlalise.”
\p Pero TOTECO Tlen Quinyacana Ielhuicac Ejcahua Ma Tlatlanitij quiijtos: “Intla nopa edomitame sampa quicualtlalise, na sampa nijxolehuas. Huan tlacame quitocaxtise inintlal: ‘Inintlal tlacame tlen quichihuaj tlen fiero.’ Huan tlacame quintocaxtise iixhuihua Esaú: ‘Tlacame tlen ax quipiyase tlapojpolhuili ica TOTECO para nochipa.’
\v 5 Pero ax queja nopa nimechchihuilía, inisraelitame. Inquiitase nopa tlasemanalistli ica imoixtiyol huan inquiijtose: ‘Tlahuel hueyi TOTECO huan ihuextilis quionpano inepa totlal Israel.’ ”
\s TOTECO quinteilhui totajtzitzi
\p
\v 6 Huan TOTECO Tlen Quinyacana Ielhuicac Ejcahua Ma Tlatlanitij quinilhuía nopa totajtzitzi: “Se conetl quitlepanita itata huan se tlatequipanojquetl quiimacasi iteco. Huajca intla na nieli niimoTata, ¿para tlen ax innechtlepanitaj? Huan intla na nieli niimoTECO, ¿para tlen ax innechimacasij? Pero imojuanti intotajtzitzi tlen innechcocolíaj.”
\p Huan nopa totajtzitzi quitlatzintoquilíaj: “¿Quejatza timitzhuejcamajcajtoque?”
\p
\v 7 Huan TOTECO inmechnanquilis: “Nijmati innechhuejcamajcajtoque pampa innechmacaj tlacajcahualistli tlen fiero ipan notlaixpa.”
\p Huan innechtlajtlaníaj: “¿Tlachque tlacajcahualistli tlen fiero timitzmacatoque?”
\p Huan TOTECO inmechilhuis: “Inquinextíaj innechcocolíaj quema inteyolmelahuaj para ma ax nechmacaca inintlapiyalhua tlen más cuali. Ma san nechmacaca tlen hueli tlapiyali tlen metzcototic, popoyotzi, o mococohua. ¿Inmoilhuíaj para ya nopa cuali para innechmacase?
\v 8 Intla inquitencahuaj se tlapiyali para tlacajcahualistli tlen metzcototic, o popoyotzi o tlen mococohua, huajca nelía fiero inquichijtoque. Xijhuiquilica imotlanahuatijca se regalo queja nopa huan inquiitase intla quipactis huan quiselis.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 9 “Huajca ximomaijtoca huan xinechtlajtlanica ma nimechtlasojtla quema innechmacaj tlacajcahualistli tlen fiero huan inquiitase intla nijchihuas. ¿Para tlen nimechtlasojtlas quema queja nopa fiero intechchihuilíaj?” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 10 “¡Cuali elisquía intla itztosquía se totajtzi tlen quitzacuasquía ipuertajyo tiopamitl para ayoc quitlatis nopa tlaixpamitl huan ayoc quiselisquía tlacajcahualistli queja nopa! Tlahuel nicualantoc ica imojuanti huan yeca ayoc nijselis imotlacajcahualis.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 11 “Pero ica sequinoc tlacame tlen ax israelitame, quena, ipan campa hueli tlaltini nechhueyitlepanitase tlacame tlen ax israelitame. Ica ijnaloc huan hasta tiotlac nechhueyichihuase huan nechmacase tlacajcahualistli tlen copali tlen mijmiyotía ajhuiyac huan nechmacase tlacajcahualistli tlen tlapajpactic.” Quej ni quiijtohua TOTECO Dios Tlen Quinyacana Ielhuicac Ejcahua Ma Tlatlanitij.
\p
\v 12 “Pero imojuanti miyac innechixpanoj. Ax inquipatiitaj notlaixpa. San inquiijtohuaj: ‘TOTECO itlaixpa ax neli tlapajpactic huan huelis tijmacase tlen hueli tlamantli tlen ayoc tijnequij.’
\v 13 Huan inquiijtohuaj: ‘Nelía ohui tijtequipanose TOTECO huan ohui para tijchihuase tlen yajaya quinequi.’ Huan inquihuejcamajcahuaj nopa tlanahuatili para tlacajcahualistli. Quej nopa innechcocolíaj.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p “Huan quema innechmacaj tlacajcahualistli huan inquihualicaj se tlapiyali tlen inquiixtectoque, o tlen metzcuachotique o tlen mococohuaj, ¿inquiitaj cuali nimechselilis? ¡Axtle! ¡Ax nimechselilis!
\v 14 Ma eli tlatelchihuali nopa tlacatl tlen quiijtohua tlamiyacapa para nechmacas se oquich borrego tlen cuali huan teipa quipatlas ica seyoc tlen cocoxquetzi. Quena, yajaya tlatelchihuali, pampa na, niTlanahuatijquetl Tlen Tlahuel niHueyi huan quinamiqui para nochi tlacame ipan campa hueli tlaltini ma nechimacasica huan ma nechtlepanitaca.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\c 2
\s Quinteilhui totajtzitzi ica tlen fiero quichihuayayaj
\p
\v 1-2 “Nochi intotajtzitzi xijtlacaquilica cuali ni tlanahuatili
tlen nimechilhuía: Intla ax inquitlacaquilise, huan ax inmotemacase
ica nochi imoyolo para innechhueyitlalise, huajca nijtitlanis ipan
imojuanti se hueyi tlatzacuiltilistli huan nimechtelchihuas. Quena,
yonque nijnequisquía nimechtiochihuas, nimechtelchihuas pampa ax
intechtlepanitztoque. Nelía ya nimechtelchijtoc.” Quej ni
quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 3 “Ipampa nopa tlajtlacoli tlen inquichijtoque, niquinquixtilis
inintequihuejcayo imoixhuihua para elise totajtzitzi. Huan
nimechixpolos inincuitl ni tlapiyalime tlen innechmacaj para
tlacajcahualistli. Huan inmechhuicase nochi imojuanti para
inmechmajcahuase queja tlen quihuicaj cuitlatl.
\v 4 Huan huajca inquimatise para elqui na tlen nimechyolmelajqui
xijtoquilica nopa tlanahuatili tlen nijmacac imohuejcapan tata
Leví.” Quej ni quiijtohua TOTECO Tlen Quinyacana Ielhuicac Ejcahua
Ma Tlatlanitij.
\p
\v 5 “Nopa tlajtoli tlen huejcajquiya nijchijqui ininhuaya
iixhuihua Leví elqui para ma quipiyaca yolistli huan
tlasehuilistli. Huan niquinmacac para ma nechtlepanitaca huan ma
nechimacasica. Huan nechimacasiyayaj huan noixpa
moechcapanohuayayaj.
\v 6 Yajuanti quinnextiliyayaj israelitame nochi nopa tlanahuatili
tlen xitlahuac tlen na niquinmacac. Ax quema quinistlacahuiyayaj,
niyon ax quema quincajcayahuayayaj. Nochipa nejnenque xitlahuac
noixpa huan quipixque tlasehuilistli nohuaya. Huan quichijqui para
miyac tlacame ma quicahuaca inintlajtlacol.
\v 7 Quinamiqui para totajtzitzi ma tenextilica quejatza
nechixmatise na, niimoTECO. Monequi quinmachtise nopa miyac
tlanahuatili tlen nimechmacatoc pampa se totajtzi eli
notlayolmelajca, niimoTECO Tlen Niquinyacana Noelhuicac Ejcahua Ma
Tlatlanitij.
\p
\v 8 “Pero ama, intotajtzitzi, inquicajtejtoque noojhui, niimoTECO.
Huan ica imotlamachtil, miyac inquinchihualtijtoque ma motepotlamica
huan ma huetzica ipan tlajtlacoli. Quena, miyac inquiixpanotoque
nopa tlajtoli tlen nijchijqui ihuaya imohuejcapan tata Leví.” Quej
ni quiijtohua TOTECO Tlen Quinyacana Ielhuicac Ejcahua Ma
Tlatlanitij.
\p
\v 9 “Huajca yeca iniixpa nopa tlacame na nimechechcapantlalijtoc
huan nijchijtoc para yajuanti ma inmechijiyaca queja se tlamantli
tlen fiero. Ya ni nijchihua pampa ax inquitoquilijtoque noojhui. San
inquitlapejpenijtoque catlía notlanahuatilhua inquinequij
inquineltocase. Huan tlen ax inquinequij inquitoquilise, san
inquiixpanoj.” Quej ni quiijtohua TOTECO Dios Tlen Quinyacana
Ielhuicac Ejcahua Ma Tlatlanitij.
\s Malaquías quinnojnotza israelitame
\p
\v 10 Nochi tojuanti tijpiyaj san se totata. Huan setzi Toteco Dios
techchijchijqui nochi tojuanti. Huajca ¿para tlen timochihuilíaj
miyac tlamantli tlen ax cuali huan tiquixpanoj nopa tlajtoli tlen
TOTECO quichijqui ica tohuejcapan tatahua?
\v 11 Ipan tlali Israel, israelitame quichijtoque tlajtlacoli tlen
fiero iixpa TOTECO. Quena, nojquiya ipan tlali Judá huan hasta ipan
altepetl Jerusalén, israelitame tlahuel tlaixpanotoque. Quena,
israelitame ipan tlali Judá quichijtoque ax tlapajpactic itiopa
TOTECO tlen tlatzejtzeloltic huan tlen yajaya tlahuel quiicnelía.
Pampa tlacame nopano mosihuajtijtoque ininhuaya sihuame tlen
quinhueyichihuaj tlaixcopincayome huan totiotzitzi.
\v 12 TOTECO ma quitzontlamilti tlen hueli tlacatl tlen itztoc ipan
totlal tlen quichihua nopa huan ayoc itztos tohuaya tiisraelitame.
Quena, ma quitzontlamilti yonque se totajtzi tlen quitencahua
tlacajcahualistli iixpa TOTECO Tlen Quinyacana Ielhuicac Ejcahua Ma
Tlatlanitij.
\p
\v 13 Nojquiya inquichihuaj para TOTECO itlaixpa ma xoloni ica
imoixayo. Inchocaj huan intlahuejchihuaj pampa TOTECO ayoc
quichihuilía cuenta nopa tlacajcahualistli tlen inquimacaj, niyon
ayoc inmechselía ica paquilistli.
\v 14 Inmotlatzintoquilíaj: “¿Para tlen TOTECO
techtlahuelcajtoc?” Na nimechilhuis para tlen. Eltoc pampa TOTECO
quiitac quema inquincajtejque imosihuajhua tlen inmosencajtoyaj
ininhuaya ica tlajcuiloli quema intelpocatixtoyaj, yeca yaja
inmechtelhuía. Quena, yonque sesen tlen nopa sihuame eliyayaj
temachme imohuaya, san inquintlahuelcajque.
\v 15 TOTECO inmechsansejcotili sesen imojuanti ica imosihua huan
inmechchijqui san se imotonal. Huan inmechchijqui queja setzi pampa
quinequiyaya xiquinpiyaca coneme tlen tlatzejtzeloltique para ya.
Huajca nimechilhuía sesen imojuanti, monequi xijmocuitlahuica
imoyoltzi huan ipan imoyolo amo xijnequica tlen ax cuali. Sesen tlen
imojuanti ma quitlepanita isihua tlen mocuili quema eliyaya telpoca
tlacatl huan ma mochihua temachtli ihuaya.
\p
\v 16 Pampa TOTECO Dios tlen tiisraelitame quiijtohua: “Ax nijnequi
niquitas quema se tlacatl huan isihua moamaxolehuaj, o se quicahua
seyoc. Ax nijnequi niquitas quema se tlacatl mocuilis isihua huan
teipa quiixpanos huan yas ica seyoc. Yeca monequi xijmocuitlahuica
ipan imotlalnamiquilis para ayoc ximosihuacahuaca.” Quej ni
quiijtohua TOTECO Tlen Quinyacana Ielhuicac Ejcahua Ma Tlatlanitij.
\s Nopa tonal quema TOTECO tetlajtolsencahuas
\p
\v 17 Inquichijtoque para TOTECO ma tlaxico ica miyac imotlajtol.
\p Pero intlatzintocaj: “¿Ica tlachque tlamantli
tijchihualtijtoque ma tlaxicohua TOTECO?”
\p Inquisiyahuiltijque pampa inmoilhuíaj ax quichihua tlen
xitlahuac huan ax quema quintlatzacuiltía ax cuajcualme.
Inquiijtohuaj para TOTECO más quipactíaj tlen tlajtlacolchihuaj.
Intlatzintocaj: “¿Canque itztoc Toteco Dios tlen quichihua tlen
xitlahuac?”
\c 3
\s Monechcahuía nopa tonal quema TOTECO tetlatzacuiltis
\p
\v 1 “¡Xijtlachilica! Na nijtitlanis notlayolmelajca ma yohui noixpa para quicualtlalis noojhui. Huan teipa ajsitihuetzis imohueyiTeco tlen inquitemohuaj. Ipan se tlalochtli ajsitihuetzis ipan Itiopa nopa tlayolmelajquetl tlen nopa tlajtolsencahuali tlen nijsencajqui imohuaya. Yajaya itztoc tlen inquichiyaj huan tlahuel inquinequij ma huala.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 2 “Pero ¿ajqueya huelis quiijiyohuis huan mocahuas para itztos ipan nopa tonal quema yajaya hualas? ¿Ajqueya huelis moquetzas para quiixnamiquis quema yajaya monextis? Yajaya elis queja se tlitl tlen nelía temajmati tlen quiatilis tlen hueli tepostli. Elis queja se xapo tlen más chicahuac tlen hueli quichipahualtía tlen hueli yoyomitl tlen soquiyo.
\v 3 Yajaya mosehuis queja se juez para tetlajtolsencahuas. Queja se teposchijquetl quitlapajpacchihuas plata tepostli ipan tlitl, yajaya quintlapajpacchihuas nochi levitame. Quena, nochi totajtzitzi quinyejyectis queja quiyejyectíaj oro o plata ipan tlitl huan yajaya quinextis inintlajtlacolhua. Huan teipa nochi totajtzitzi itztose notlatequipanojcahua niimoTECO huan nemise xitlahuac noixpa huan nechmacase tlacajcahualistli tlen cuali queja quinamiqui.
\v 4 Huan huajca na niimoTECO sampa nijcualitas nopa tlacajcahualistli tlen inquihualicase inisraelitame tlen initztoque ipan tlali Judá huan ipan altepetl Jerusalén. Sampa elis nochi queja eliyaya hasta huejcajquiya.
\p
\v 5 “Ipan nopa tonal na nihualas para niquintlajtolsencahuas nochi israelitame. Huan nimantzi niquinteilhuis huan niquintlatzacuiltis tetlajchihuiani huan tlen momecatíaj huan nochi tlen istlacatij quema tlatestigojquetzaj huan tlen quinichtequilíaj inintlatequipanojcahua inintlaxtlahuil. Niquintlatzacuiltis tlen quintlaijiyohuiltíaj cahual sihuame huan icnotzitzi, huan tlen ax quinchihuilíaj seyoc tlali ehuani tlen cuali huan tlen ax nechimacasij na.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij
\s Diezmos huan ofrendas
\p
\v 6 “NiimoTECO, ax nimoyolpatla, yeca aya nimechtzontlamiltía inisraelitame\f 3:6 O iniixhuihua Jacob.\f*.
\v 7 Inquitlahuelcajtoque notlanahuatilhua hasta ipan nopa tonali quema itztoyaj imohuejcapan tatahua. Pero noja hueli inmocuepase ica na. Quena, xihualaca campa na huan na sampa nimocuepas campa imojuanti huan nimechtlapojpolhuis. Pero inquiijtohuaj: ‘Ax quema timohuejcatlalijtoque tlen ta.’
\p
\v 8 “Pero nimechtlatzintoquilía: ‘¿Se tlacatl quitlaxtequilisquía Dios?’
\p “Huan inquiijtohuaj: ‘Axtle, axaca quichihuasquía.’
\p “Pero imojuanti, quena, innechtlaxtequilijtoque.
\p “Huan inquiijtohuaj: ‘¿Ipan tlachque tlamantli timitztlaxtequilijtoque?’
\p “Innechtlachtequilijtoque ipan nopa diezmos huan ipan nopa ofrendas tlen quinamiqui innechmacasquíaj.
\v 9 Nochi imojuanti ipan ni tlali innechtlachtequilijtoque huan yeca nimechtelchijtoc.
\v 10 Huajca xijhualicaca nochi diezmos campa tlaajcocuij tiopan calijtic para sampa oncas nopa tlacualistli tlen monequi ipan nochaj. Queja nopa xijchihuaca huan xinechyejyecoca huan inquiitase para nijtlapos nopa ventanas ipan elhuicactli huan nimechtitlanilis miyac tlatiochihualistli hasta tlahuel mocahuas.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 11 “Quena, na nijmocuitlahuis imotlatoc para nopa ocuilime ma ayoc quicuaca, huan nijchihuas para imoxocomecamil ayoc quitepehuas itlajca quema aya icsitoc.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\v 12 “Huan tlacame ipan nochi sequinoc tlaltini inmechtocaxtise intlatiochihualme pampa nochi inquipiyase ipan imotlal.” Quej ni quiijtohua TOTECO Tlen Quinyacana Ielhuicac Ejcahua Ma Tlatlanitij.
\s TOTECO quinicnelía itlacajhua
\p
\v 13 “Inquiijtojtoque tlen na miyac tlajtoli tlen fiero huan tlen nechyolcocojtoc”, quiijtohua TOTECO Tlen Quinyacana Ielhuicac Ejcahua Ma Tlatlanitij.
\p Pero inquiijtohuaj: “¿Tlachque tlajtoli tiquijtojtoque?”
\p
\v 14 “Inquiijtojtoque: ‘San tlapic para tijtequipanose Toteco Dios. Ax tleno techpalehuía para tijchijtinemise nochi tlen quiijtohua itlanahuatilhua. ¿Para tlen ma timocuesojtinemica ica totlajtlacolhua iixpa TOTECO Tlen Quinyacana Ielhuicac Ejcahua Ma Tlatlanitij?
\v 15 Tiquitaj para tlacame tlen mohueyimatij, paquij, huan tlen fiero ininnemilis, quisaj cuali. Quiyejyecojtoque TOTECO, huan yaja ax quintitlanilijtoc niyon se tlatzacuiltili.’ Queja nopa inquiijtojque.”
\s TOTECO quintlasojtlas itlacajhua
\p
\v 16 Huan quema nopa tlacame tlen quiimacasque huan quiicnelijque TOTECO quicajque nochi inin, mocamahuijque huan mopohuilijque tlen cuali TOTECO quinchihuilijtoya. Huan TOTECO quintlacaquili huan quiijcuilo tlen quiijtojque ipan se libro nepa iixpa ipan elhuicactli campa quipiya nochi inintoca nopa tlacame tlen quiimacasij huan moyolilhuíaj tlen ya.
\p
\v 17 Huan TOTECO Tlen Quinyacana Ielhuicac Ejcahua Ma Tlatlanitij quiijto: “Yajuanti elise notlacajhua ipan nopa tonal quema niquintlapejpenis ajqueya yajuanti más niquinicnelía. Huan ipan nopa tonal niquintlapojpolhuis tlen nechicnelíaj huan ax niquintlatzacuiltis, queja se tlacatl quitlapojpolhuía icone tlen quitlepanita huan quichihua nochi tlen quinahuatía.
\v 18 Huajca quena, ipan nopa tonal quema nitetlajtolsencahuas, inquiitase tlachque tlamantli tlen cuali niquinchihuilis tlacame tlen quipiyaj ininnemilis xitlahuac noixpa. Huan inquiitase tlachque tlamantli fiero niquinchihuilis tlen fiero ininnemilis. Huan inquimatise para ax san se tlamantli quipantise tlacame tlen nechhueyitlepanitaj ica tlacame tlen ax nechtlepanitaj.
\c 4
\s Monechcahuía nopa tonal quema TOTECO tetlajtolsencahuas
\p
\v 1 “Monechcahuía nopa tonal quema nitetlajtolsencahuas. Nopa
tonal elis queja se tlitl tlen tlahuel totonic. Huan nopa tonal
nochi tlen mohueyimatij huan nochi tlen fiero ininnemilis tlatlase
queja sacatl tlen huactoc. Quena, elis queja tlamitlatlas se hueyi
cuahuitl hasta niyon inelhuayo ax mocahuas.” Quej ni quiijtohua
TOTECO Tlen Quinyacana Ielhuicac Ejcahua Ma Tlatlanitij.
\p
\v 2 “Pero para imojuanti tlen innechimacasij huan innechicnelíaj,
monextis se tlen elis queja se tonati. Huan campa ajsis Itlahuil
nochi elis xitlahuac huan quichicahuas nochi tlen monequi. Huan
inmechmalacanis para inquisase inhuitontinemise ica paquilistli
queja pilbecerrojtzitzi tlen quinquixtijtoque tlen campa
quintzactoyaj.
\v 3 Huan incuajcualme inmoquetzase ininpan ax cuajcualme pampa
fiero tlacame elise san queja cuanextli imoicxitla.” Quej ni
quiijtohua TOTECO Tlen Quinyacana Ielhuicac Ejcahua Ma Tlatlanitij.
\p
\v 4 “Huajca xiquilnamiquica para xijtlamichihuaca nochi nopa
tlanahuatili huan leyes tlen nijmacac notlatequipanojca Moisés
huejcajquiya ipan nopa tepetl Horeb para ma inmechmaca nochi
inisraelitame.
\s Elías hualas quema aya tetlajtolsencahua
\p
\v 5 “¡Xiquitaca! Na nijtitlanis nopa tiocamanalojquetl Elías
quema aya ajsi nopa tonal tlen na, niimoTECO. Quema ajsis nopa tonal
elis nelía hueyi huan temajmati pampa nitetlajtolsencahuas huan
tlahuel nitetlatzacuiltis.
\v 6 Pero quema aya ajsi nopa tonal, ajsis Elías huan quichihuas
para tetajme ma moyolcuepaca tlen inintlajtlacolhua huan
moyoltlalise ica ininconehua. Huan quichihuas para telpocame ma
moyolcuepaca huan ma moyoltlalica ica inintatahua. Pampa intla ax
moyolcuepase tlacame, na nihualas huan nijtelchihuas inintlal huan
nijtlamixolehuas.” Quej ni quiijtohua TOTECO.