\id GAL
\h GÁLATAS
\mt Nopa Amatlajcuiloli tlen Pablo Quintlajcuilhui Tlaneltocani ipan Tlali Galacia
\c 1
\s Pablo quintlajcuilhui tlaneltocani ipan tlali Galacia
\p
\v 1 Na niPablo, niitlayolmelajca Jesucristo nimechtlajcuilhuía. Ax nechtequitlalijque tlacame para nielis niitlayolmelajca Jesucristo, niyon ax nechilhuijque sequinoc quema Toteco nechtequitlali. Nechtequimacaque Jesucristo huan Toteco Totata tlen quiyoliti Jesús quema mictoya.
\v 2 Na huan nochi toicnihua ipan Cristo tlen itztoque nicani nohuaya timechtlajpalohuaj imojuanti tlen initztoque ipan itiopahua Toteco ipan tlali Galacia.
\v 3 Toteco Totata huan Toteco Jesucristo ma quipiyaca hueyi ininyolo ica imojuanti huan ma inmechmacaca tlasehuilistli ipan imoyolo.
\v 4 Jesucristo motemacac huan mijqui para techmaquixtis tlen totlajtlacolhua huan para techmalacanis tlen nopa tlen ax cuali tlen onca ipan ni tonali pampa ya ni elqui ipaquilis Toteco Totata para quichihuas.
\v 5 Huajca ma tijhueyimatica Toteco nochi tonali para nochipa. ¡Quej nopa ma eli!
\s Ax onca seyoc tlamachtilistli tlen huelis techtlajtlacolquixtis
\p
\v 6 Nelía ax hueli nijneltoca para nimantzi inquicajtejque Toteco tlen quipiya hueyi iyolo imohuaya ipan Jesucristo huan tlen inmechnotzqui para iniaxcahua. Ama ya inquitoquilíaj seyoc tlamantli tlamachtili tlen ax queja tlen nimechilhui huan inmoilhuíaj ya nopa inmechtlajtlacolquixtis.
\v 7 Pero ax neli onca seyoc tlamachtilistli tlen huelis inmechtlajtlacolquixtis. San itztoque sequin tlacame tlen inmechcuapolhuilíaj imotlalnamiquilis, huan quinequij quipatlase nopa cuali tlajtoli tlen Cristo.
\v 8 Intla aqui hueli tlacatl inmechilhuis seyoc tlamachtilistli tlen quiijtohua para huelis inmechtlajtlacolquixtis, ma quiajsi ihueyi cualancayo Toteco. Quena, yonque na niyasquía campa imojuanti o yonque se elhuicac ejquetl hualajsquía tlen elhuicac huan inmechmachtisquía seyoc tlamachtilistli huan ax ya tlen timechmachtijtoque, ma quiajsi ihueyi cualancayo Toteco.
\v 9 Sampa nimechilhuía tlen ya nimechilhuijtoc. Intla se acajya inmechilhuis seyoc tlamachtili tlen ax queja tlen inquiselijtoque, ma quiajsi ihueyi cualancayo Toteco.
\p
\v 10 Ax nimechilhuía ya ni pampa nijnequi nimechpactis, o nijnequi ma nechcualitaca tlacame. Nimechilhuía ya ni pampa nijnequi nijyolpactis Toteco Dios. Intla nijtemosquía ma nechcualitaca tlacame, huajca ayoc niitztosquía niitequipanojca Cristo.
\s Quejatza Pablo mochijqui itlayolmelajca Toteco
\p
\v 11 Noicnihua, nijnequi xijmatica para nopa cuali tlajtoli tlen nimechilhuijtoc ax san tlacame quisencajtoque ica inintlalnamiquilis.
\v 12 Ax elqui se tlacatl tlen nechilhui nopa cuali tlajtoli. Elqui Jesucristo tlen nechnextili.
\p
\v 13 Ya inquicactoque queja eltoya nonemilis achtohuiya quema nijtoquiliyaya toisraelita tlamachtil. Inquicactoque quejatza tlahuel niquintlatzacuiltiyaya nochi tlen quineltocayayaj Tohueyiteco. Quena, nijnequiyaya niquintzontlamiltis nochi tlen itztoyaj ipan itiopa Toteco.
\v 14 Tlen nochi israelitame ipan notlal tlen nohuaya moscaltiyayaj na nielqui tlen más nimomachti toisraelita tlamachtil. Huan ica nochi noyolo nijchijqui campeca para nijchihuas senquistoc nochi tlen quiijtohua inintlamachtil tohuejcapan tatahua.
\v 15 Pero Toteco ya nechiyocatlalijtoya para nielis niitlayolmelajca quema aya nitlacatiyaya, huan yajaya nechnotzqui pampa quipixqui hueyi iyolo nohuaya.
\v 16 Huan nechnextili Icone Cristo huan nechtequimacac para ma niquinilhui tlacame tlen ax israelitame tlen Cristo. Huan quema monextijtoya noca na, ax niyajqui nijcamahuito se tlacatl para ma nechconsejomaca tlaque nijchihuasquía.
\v 17 Niyon ax niyajqui ipan hueyi altepetl Jerusalén para niquinitati nopa tlayolmelahuani tlen Toteco quinnotzqui quema aya nijneltocayaya. Niyajqui huejca hasta tlali Arabia para niitztos noselti. Huan más teipa quema niquisqui Arabia, sampa nimocuepqui ipan altepetl Damasco.
\p
\v 18 Ax niyajqui Jerusalén hasta ya panotoya eyi xihuitl. Huajca quena, niyajqui niquitato Pedro huan nimocajqui ome samano ihuaya.
\v 19 Pero nopa sequinoc itlayolmelajcahua Toteco, ax niquinitac. San niquitac Jacobo, iicni teipan ejquetl Tohueyiteco Jesús.
\v 20 Toteco quimati xitlahuac nochi tlen nimechtlajcuilhuijtoc nicani huan ax niistlacati.
\p
\v 21 Teipa niyajqui ipan tlali Siria huan tlali Cilicia.
\v 22 Pero nopa tiopantini tlen tlaneltocani tlen mosentilíaj campa hueli ipan tlali Judea noja aya quema nechitztoyaj.
\v 23 Inijuanti san quicajque quiijtohuaj para nopa tlacatl tlen achtohuiya quintlatzacuiltiyaya huan quinequiyaya quitlamiltis nopa cuali tlajtoli tlen Jesucristo tlen inijuanti quineltocaj, ama quinilhuiyaya nochi tlacame para ma quineltocaca Jesucristo.
\v 24 Huajca nochi inijuanti quihueyimatiyayaj Toteco pampa quipatlatoya nonemilis.
\c 2
\s Sequinoc itlayolmelajcahua Toteco quiselijtoyaj Pablo
\p
\v 1 Huan teipa quema ya panotoya seyoc catorce xihuitl, sampa
niyajqui altepetl Jerusalén ihuaya Bernabé. Huan nojquiya
nijhuicac Tito.
\v 2 Niyajqui pampa Toteco nechnextili ma niya. Huan quema niitztoya
nepa, nimosentili ininhuaya nopa tlayacanca israelita tlaneltocani
para huelqui ticamatique san tojuanti. Nijnequiyaya niquinilhuis
nopa cuali tlajtoli tlen niquinpohuiliyaya tlacame tlen ax
israelitame para ax onca se tlamantli tlen techiyocatlalis. Ax
nijnequiyaya ma quisa san tlapic nochi tlen tijchijtoque.
\v 3 Huan inijuanti quicualcajque tlen nitlamachtiyaya, huan ax
quiijtojque para Tito tlen itztoya nohuaya ma motequili nopa
tlanescayotl tlen itoca circuncisión, yonque yajaya eliyaya se
griego tlen ax quiixmati nopa tlamantli.
\v 4 Pejqui nopa tlalnamiquilistli para ma motequilica nopa
tlanescayotl quema hualajque sequin istlacatini tlen quiijtojque
para eliyayaj tlaneltocani, pero ax neli. Inijuanti ixtacatzi pejque
quitlachilíaj tonemilis huan quiitaque quejatza Cristo Jesús
techmalacanijtoya tlen itlanahuatil Moisés. Huajca inijuanti
quinequiyayaj sampa ma tielica queja tiinintequipanojcahua para ma
tijtoquilica itlanahuatil Moisés huan ma tiquinfuerzajhuica nochi
tlacame tlen ax israelitame ma motequilica nopa tlanescayotl tlen
itoca circuncisión ipan inintlacayo.
\v 5 Pero niyon se tlalochtli ax tiquintlacaquilijque. Pampa
tijnejque para imojuanti tlen ax inisraelitame san xijmatica tlen
melahuac: Toteco quimaquixtía tlen quineltoca Cristo, huan axaca
monequi motequilis itlacayo.
\p
\v 6 Huan nopa tlayacanca tlaneltocani ax nechilhuijque niyon se
tlamachtili yancuic para ma niquinilhui tlacame. (Para na ax tleno
ipati intla miyac tlacame quinitaj para huejhueyi tlayacanani, pampa
iixpa Toteco san se topati.)
\v 7 Pero nima nopa tlayacanani quiitaque para Toteco
nechtequimacatoya ma niquinilhui tlacame tlen ax israelitame
quejatza Toteco tetlajtlacolquixtía, san queja quitequimacatoya
Pedro ma quinilhui israelitame.
\v 8 Quena, san queja Toteco quititlanqui Pedro queja itlayolmelajca
ica israelitame, nechtitlantoc na niitlayolmelajca ica tlacame tlen
ax israelitame.
\p
\v 9 Quema Jacobo, Pedro huan Juan tlen más tlaixmatilme momacaque
cuenta tlen nopa tequitl huan tlatiochihualistli tlen Toteco
nechmacatoya, sampa nechmatlajpalojque huan quimatlajpalojque
Bernabé queja se tlanescayotl para techselijque queja tiicnime tlen
san sejco tijchihuaj itequi Toteco. Quiijtojque para Bernabé huan
na ma tiyaca ica tlacame tlen ax israelitame huan inijuanti ica
israelitame.
\v 10 San nojquiya nechilhuijque ma tiquilnamiquica tiquinpalehuise
tlen pilteicneltzitzi queja nochipa tijchihuaj campeca tijchihuase.
\s Pablo quiajhuac Pedro nepa Antioquía
\p
\v 11 Pero teipa, quema Pedro ajsico altepetl Antioquía, monejqui
niquixcoilhui tlamiyacapa pampa quichihuayaya tlen ax cuali.
\v 12 Achtohui tlacuayaya ininhuaya tlaneltocani tlen ax israelitame
tlen ax quipiyaj nopa tlanescayotl san se queja tlacuayaya ininhuaya
tlen israelitame. Pero teipa, ajsicoj se ome israelita tlacame tlen
eliyayaj ihuampoyohua Jacobo tlen quinequiyayaj nochi tlaca
tlaneltocani tlen ax israelitame ma motequilica nopa tlanescayotl
para momaquixtise. Huajca Pedro quinimacasqui nopa tlacame tlen
ajsicoj huan pejqui moiyocacahua tlen tlaneltocani tlen ax
israelitame, huan ayoc tlacuayaya ininhuaya.
\v 13 Teipa nojquiya quipixque ome ininxayac nopa sequinoc israelita
tlaneltocani tlen itztoyaj nepa pampa no moiyocacajque tlen
tlaneltocani tlen ax israelitame. Hasta Bernabé nojquiya
moiyocacajqui tlen ax israelitame queja Pedro quichihuayaya.
\v 14 Huajca quema niquitac Pedro ax nejnemiyaya xitlahuac queja
quiijtohua Itlajtol Toteco, nicajhuac. Iniixpa nochi nopa
tlaneltocani, niquilhui: “Xijcaqui Pedro, ta tiisraelita tlacatl
huan mitztequilijtoque nopa tlanescayotl, pero ama tinejnemi queja
se tlacatl tlen ax israelita pampa ayoc tijtoquilía sequinoc
tlamantli tlen quiijtohuaj itlanahuatil Moisés. Huajca, ¿para tlen
ama tijnequi ni tlacame tlen ax israelitame ma nejnemica queja
israelitame? Ax xitlahuac tlen tijchihua.”
\s Toteco quintlajtlacolquixtía nochi tlen quineltocaj
\p
\v 15 Tojuanti tiisraelitame hasta quema titlacatque. Ax
“titlajtlacolchihuani” queja quinnotzaj tlacame tlen ax
israelitame.
\v 16 Pero tiisraelita tlaneltocani ya timomacatoque cuenta para
axaca hueli mochihuas xitlahuac iixpa Toteco pampa quitoquilíaj
itlanahuatil Moisés. Ya tijmachilíaj para san tlen quineltoca
Jesucristo itztose xitlahuaque iixpa. Yeca tojuanti nojquiya
tijneltocaque Jesucristo para Toteco Dios ma techchihua
tixitlahuaque iixpa pampa tijneltocatoque. Tiquitaque ax tleno ipati
eliyaya para quitoquiliyaya itlanahuatil Moisés, pampa axaca hueli
mochihua xitlahuac iixpa Toteco pampa quitoquilía nopa
tlanahuatili.
\p
\v 17 Huan intla tijneltocatoque Cristo para ma techchihua
tixitlahuaque iixpa Toteco, huan timomacaj cuenta para tiisraelitame
nojquiya titlajtlacolchihuani iixpa Toteco, ¿huelis tiquijtose
Cristo techchijqui titlajtlacolchihuani? ¡Axtle! Ax queja nopa
ximoilhuica.
\v 18 Pero intla nipehuasquía nitlamachtis para tlacame hueli
momaquixtisquíaj tlen inintlajtlacolhua intla quitoquilisquíaj
tlanahuatili tlen ayoc quipiya chicahualistli, huajca quena,
nimochihua nitlaixpanoquetl.
\v 19 Pampa noca na, yonque miyac nimomachti huan nijchijqui campeca
nijtoquilis itlanahuatil Moisés, niquitac para nochi nopa
tlanahuatili ax quema huelqui nechchihua nixitlahuac iixpa Toteco,
pampa ax nihuelqui nijtlamichihua tlen quiijtohuaj. Nopa
tlanahuatili ayoc quinnahuatíaj tlen mictoque, huan huajca
nimochijtoc queja se nimijcatzi para nochi nopa tlanahuatili ma ayoc
nechnahuati. Nijchijqui ya ni para huelis niyoltos para Cristo.
\v 20 Nelía nechcuamapeloltijque ihuaya Cristo huan nepa nimijqui.
Huan yeca ama na ayoc niyoltoc, pero quena, ama Cristo itztoc nopan
na. Huan ni yolistli tlen ama nijpiya huala pampa nijneltoca Icone
Toteco tlen nechicneli huan motemactili huan mijqui nopampa na.
\v 21 Niquita tlahuel hueyi ipati tlen Toteco quichijqui quema
techtlasojtlac huan quititlanqui Cristo ma miqui topampa, huan na ax
nijhuejcamajcahua tlen quichijtoc. Intla itlanahuatil Moisés tlen
tiisraelitame tijtoquiliyayaj techchihuilijtosquíaj tixitlahuaque
iixpa Toteco huan techmaquixtijtosquíaj, huajca san tlapic
mictosquía Cristo.
\c 3
\s Xijtlapejpenica itlanahuatil Moisés o Cristo
\p
\v 1 ¡Nelía inhuihuitique inGálata ehuani! ¿Ajqueya
inmechcajcayajtoc para ayoc inquineltocaj tlen melahuac? Nempa
nimechilhui queja inijuanti quicuamapeloltijque Jesucristo quema
niitztoya imohuaya.
\v 2 San se tlamantli nimechtlajtlanis. ¿Toteco inmechmacac Itonal
pampa inquitoquilijque itlanahuatil Moisés? ¡Axtle! Itonal Toteco
hualajqui ipan imoyolo quema inquicajque nopa tlen Jesucristo
inmechchihuilijtoya, huan inmotemachijque ipan ya para ma
inmechmaquixti.
\v 3 Huajca amo ximohuihuichihuaca. Intla monequiyaya Itonal Toteco
para inmechmacas yolistli tlen yancuic pampa nochi nopa tlanahuatili
ax huelqui temaca yolistli, amo ximoilhuica para huelis
inquisencahuase achi cuali itequi Toteco pampa sampa inquichihuaj
campeca inquitoquilise nochi nopa tlanahuatili.
\v 4 Ya intlaijiyohuijtoque miyac pampa inquineltocaj Cristo. ¿Huan
inmoilhuíaj para intlaijiyohuijtoque san tlapic? ¡Axtle! Na
nijmati para ax san tlapic.
\v 5 Nimechtlajtlanía: ¿Toteco inmechmacac Itonal huan quichijqui
hueyi chicahualnescayotl imoixpa pampa inquintoquilijque
itlanahuatil Moisés? ¡Axtle! Inquimatij para Toteco quichijqui
nopa tlamantli pampa inquicajque Itlajtol Toteco huan
inquineltocaque.
\p
\v 6 Eltoc queja ijcuilijtoc ipan Itlajtol Toteco campa quiijtohua:
“Abraham quineltocac Toteco, huan yeca Toteco quiitac para itztoc
xitlahuac iixpa.”
\v 7 Huajca xijmachilica para nochi nopa tlacame tlen quineltocaj
Toteco, inijuanti itztoque tlen nelía iconehua Abraham.
\v 8 Tlen huejcajquiya mocajtoc ijcuilijtoc ipan Itlajtol Toteco
quejatza miyac xihuitl teipa Toteco quinchihuasquía tlacame tlen ax
israelitame xitlahuaque iixpa intla quineltocasquíaj. Huan Toteco
Dios quiilhui Abraham ni cuali tlajtoli quema quiijto: “Ica ta,
Abraham, niquintiochihuas nochi tlamantli tlacame tlen itztoque ipan
campa hueli tlali ipan tlaltepactli.”
\v 9 Quena, nochi tlen motemachise ipan Cristo, Toteco
quintiochihuas queja Toteco quitiochijqui Abraham pampa
quineltoquili.
\p
\v 10 Pero nochi tlacame tlen quitoquilíaj itlanahuatil Moisés
para momaquixtise, quipantise ihueyi cualancayo Toteco pampa ax
huelij quichihuaj nochi tlen quiijtohuaj nochi nopa tlanahuatili.
Huan ijcuilijtoc ipan Itlajtol Toteco campa quiijtohua:
“Tlatelchihualtique nochi tlacame tlen ax quichihuaj senquistoc
nochi tlen ijcuilijtoc ipan ni tlanahuatili.”
\v 11 Huajca nempa nesi para Toteco Dios ax quinita tlacame
xitlahuaque iixpa pampa quitoquilíaj itlanahuatil Moisés. Itlajtol
Toteco quiijtohua: “Se tlen itztoc xitlahuac iixpa Toteco, itztos
para nochipa pampa quineltoca Toteco.”
\v 12 Ya ni nopa ojtli tlen cuali. Quena, intla se quineltocas
Toteco, yajaya quimaquixtis tlen itlajtlacolhua. Pero se tlen
quinequi quitoquilis itlanahuatil Moisés para momaquixtis quipiya
seyoc tlamantli tlalnamiquilistli. Pampa itlanahuatil Moisés
quiijtohuaj: “Se tlen quinequi quipantis yolistli pampa
quitoquilía nochi ni tlanahuatili, monequi quitoquilis senquistoc
nochi tlen quiijtohuaj.”
\p
\v 13 Pero Cristo tlaxtlajqui tlen monequiyaya para techmaquixtis
tlen nopa tlatelchihuali tlen nopa tlanahuatili quiijtojtoya
techajsisquía. Quema yajaya mijqui ipan cuamapeli topampa, yajaya
quiseli nopa tlatelchihuali tlen techajsisquía, pampa Itlajtol
Toteco quiijtohua: “Tlatelchihualtique nochi tlacame tlen
quincuapilohuaj ipan cuamapeli.”
\v 14 Yeca ama ica tlen Cristo Jesús quichijqui topampa tojuanti,
Toteco Dios hueli quintiochihuas hasta tlacame tlen ax israelitame
san se queja quitiochijqui Abraham. Huan quema tojuanti tijneltocaj
Toteco, tijselíaj Itonal Toteco tlen ya techtencahuilijtoc para
techmacas.
\s Itlanahuatil Moisés huan tlen Toteco quitencahuili Abraham
\p
\v 15 Xiquitaca noicnihua. Nimechilhuis se huicaltili para más
inquimachilise tlen nimechilhuía. Quema tlacame quichihuaj se
tlajtolsencahuali ipan se amatl huan quifirmarohuaj, huajca quipiya
tlanahuatili. Huan axaca huelis moquixtis para ax quitlamichihuas
tlen quitlajtolcajtoc quichihuas ipan nopa amatl. Huan nojquiya
axaca huelis quiixpolos tlen quiijtohua, niyon quipihuis más
tlamantli ipan nopa amatl.
\v 16 Nojquiya Toteco quichijqui se tlajtolsencahuali huejcajquiya
tlen quiijto quichihuas para Abraham huan se iteipan ixhui. Pero
nopa tlajtolsencahuali ax quiijto: “Abraham huan iteipan
ixhuihua”, queja camatisquía tlen miyac iteipan ixhuihua. ¡Axtle!
Nopa tlajtolsencahuali quiijto: “Abraham huan iteipan ixhui.”
Quinequi quiijtos Abraham huan iteipan ixhui tlen elqui Cristo.
\v 17 Huajca ya ni tlen nimechilhuía: Toteco quichijqui nopa
tlajtolsencahuali ica Abraham huan quitencahuili quejatza
quitiochihuasquía. Huajca itlanahuatil Moisés tlen ajsicoj teipa
quema panotoya 430 xihuitl, ax huelqui quixolehua nopa
tlajtolsencahuali tlen Toteco ya quichijtoya ica Abraham.
\v 18 Huan intla Abraham monectosquía quitoquilis itlanahuatil
Moisés para quiselijtosquía nopa tlatiochihualistli tlen Toteco
quitencahuili quimacasquía, ax hueltosquía quiselijtosquía, pampa
aya oncayayaj itlanahuatil Moisés para quitoquilisquía. Pero
Toteco quimacac Abraham nopa tlamantli pampa san quitencahuili
quimacas.
\p
\v 19 Huajca, ¿para tlen hualajqui itlanahuatil Moisés?
¡Xitlacaquica! Toteco temacac nochi nopa tlanahuatili para
quinnextilis tlacame quesqui tlajtlacoli quihuicayayaj huan quesqui
tlajtlacoli quipiyayayaj iixpa Toteco. Pero nochi nopa tlanahuatili
san quipixqui itequi hasta tlacatisquía Cristo, yajaya tlen iteipan
ixhui Abraham tlen Toteco quitencajqui para quitiochihuas. Nojquiya
ax san se ipati nopa tlanahuatili huan Cristo, pampa Toteco
quinmacac israelitame nopa tlanahuatili ica elhuicac ehuani tlen
teipa quimacac Moisés. Huajca ielhuicac ejca Toteco huan Moisés
motlajcoquetztoyaj ica Toteco huan tlacame.
\v 20 Pero axaca monequi motlajcoquetzas quema se quitencahuas
iselti para quimacas seyoc se tlamantli. Huan axaca motlajcoquetzqui
quema Toteco iselti quitencahuili Abraham tlen quimacasquía.
\s Itlanahuatilhua Moisés eltoya queja totlamachtijca
\p
\v 21 Huajca amo ximoilhuica para itlanahuatilhua Moisés
quitlamilti nopa tlen Toteco quitencahuili Abraham para
quimacasquía. ¡Axtle! Toteco temacac nopa miyac tlanahuatili huan
nopa tlatencahuali huan nochi ome quipiyaj inintequi, huan ax elqui
inintequi nopa miyac tlanahuatili para techmacas yolistli para
nochipa. Intla Toteco techmacatosquía miyac tlanahuatili tlen
techmacatosquía yolistli para nochipa, huajca
tiquintoquilijtosquíaj nopa miyac tlanahuatili huan
techchijtosquíaj tixitlahuaque iixpa Toteco.
\v 22 Pero Itlajtol Toteco quiijtohua para nochi titlacame
tiilpitoque ipan tlajtlacoli, huan san hueli timomaquixtise tlen
totlajtlacolhua intla tijneltocase Jesucristo.
\p
\v 23 Huejcajquiya quema aya hualayaya Cristo para ma tijneltocaca,
itlanahuatil Moisés techilpiyayaj huan techyahualtzacuayaya
tiisraelitame. Huan queja nopa elqui hasta ajsic hora para Toteco
technextili ma tijneltocaca Cristo.
\v 24 Huajca itlanahuatil Moisés eltoyaj queja nopa
tlatequipanojquetl ipan techaj tlen quipiya itequi para
quinmocuitlahuis huan quintlalnamictis nopa coneme hasta
huehuejtiyase, ica tojuanti elqui hasta hualajqui Cristo tlen nelía
huelqui techchijqui tixitlahuaque iixpa Toteco.
\v 25 Pero ama, ya ajsico Cristo para ma tijneltocaca, huan ayoc
tiitztoque imaco nopa tlatequipanojquetl tlen elqui itlanahuatil
Moisés, pampa ayoc quipiyaj tequihuejcayotl ica tojuanti.
\p
\v 26 Huajca ama nochi imojuanti iniconehua Toteco pampa
inquineltocatoque Cristo Jesús.
\v 27 Huan nochi tojuanti tlen Itonal Toteco techtlatzquiltijtoc
ipan Cristo, techchijtoc ma tiitztoca queja Cristo.
\v 28 Huan Toteco ayoc techita queja titlacame, tisihuame,
titecojme, titlatequipanohuani, tiisraelitame, o tlen ax
tiisraelitame, pampa nochi san se tiitztoque ipan Cristo.
\v 29 Ama intla iniaxcahua Cristo, huajca nelnelía initeipa
ixhuihua Abraham. Huan yeca nojquiya inquiselise tlen Toteco
quitencahuili Abraham.
\c 4
\p
\v 1 Ximoilhuica tlen ni huicaltili tlen nimechilhuis. Ma tijtlalica
para se tlacatl tlen tlapijpixtoc miquis huan quicajtehuas miyac
tlamantli para ipilcone. Pero yonque nelía nochi iaxca nopa
ipilcone, yajaya mocahua queja se tlatequipanojquetl pampa noja
pilsiltzi.
\v 2 Huan mojmostla monequi quinneltoquilis tlen quimocuitlahuíaj
hasta moscaltis huan quiaxitis nopa xihuitl tlen quiijto itata para
quiselis nochi tlen iaxca.
\v 3 Quej nopa nojquiya eltoya ica tojuanti quema aya hualayaya
Cristo. Tiitztoyaj queja tipilconetzitzi huan titlatequipanohuani
tlen tijtoquiliyayaj inintlalnamiquilis ajacame tlen itztoque ipan
ni tlaltepactli.
\v 4 Pero quema ajsic hora tlen Toteco Dios quiixtlalijtoya,
quititlanqui Icone tlen quitlacatilti se israelita sihuatl tlen
quintlepanitac itlanahuatilhua Moisés.
\v 5 Toteco quititlanqui Icone para techcohuas para tiiaxcahua huan
para techmalacanis tlen itlanahuatil Moisés, para Toteco ma
techseli queja tiiconehua.
\p
\v 6 Huajca ama nochi tojuanti timochijtoque tiiconehua Toteco, huan
yeca Toteco techmacatoc Itonal Icone ipan toyolo. Huan ama
tiquijtohuaj: “Papá”, quema tijnotzaj Toteco Dios pampa tlahuel
tiquicnelíaj.
\v 7 Huajca ayoc tiitztoque queja titlatequipanohuani. Ama
tiiconehua. Huan pampa tiiconehua, nojquiya tijselise nochi tlen
Toteco quicualtlalijtoc para quinmacas iconehua. Huan tijselise
nochi tlen Cristo techchihuilijtoc.
\s Pablo mocueso ipampa nopa tlaneltocani
\p
\v 8 Achtohuiya quema aya inquiixmatiyayaj Toteco, imojuanti tlen ax
inisraelitame inquintequipanohuayayaj totiotzitzi tlen tlacame
quinchijtoque tlen ax neli Dios.
\v 9 Pero ama ya inquiixmatij Toteco o más xitlahuac tiquijtose,
Toteco inmechixmati, huajca ¿para tlen inquinequij inquicajtehuase
Toteco para sampa inquitequipanose itlanahuatilhua Moisés tlen ayoc
quipiyaj chicahualistli? Ax tleno ipati itlanahuatilhua Moisés para
techmaquixtis huan ayoc quipiya tequihuejcayotl.
\v 10 Ama inquichihuaj campeca para inquitoquilise nopa tlanahuatili
pampa inilhuichihuaj quema yancuic metztli, huan quema sesen
tlamantli ipohual, huan quema yancuic xihuitl, huan quema onca
israelita ilhuitl, pampa inmoilhuíaj queja nopa inquipactise
Toteco.
\v 11 Nelía chicahuac nitequititoc para nimechmachtis tlen
melahuac, huan ama nimomajmatía miyac pampa huelis notequi ica
imojuanti elqui san tlapic.
\p
\v 12 Noicnihua, nimechtlajtlanía chicahuac para xijcajtehuaca
itlanahuatilhua Moisés queja na nijchijtoc. Na nimochijtoc queja
imojuanti tlen ax inisraelitame initztoyaj huan ninemi iyoca tlen
nopa miyac tlanahuatili. Nochipa innechchihuilijtoque san tlen
cuali.
\v 13 Inquimatij quema achtohui niyajqui nimechilhuito itlajtol
Toteco, eltoya pampa nimococohuayaya.
\v 14 Pero yonque nitlaijiyohuiyaya ica se cocolistli tlen fiero, ax
innechijixque huan ax innechhuejcamajcajque, pero innechselijque
queja inquiselisquíaj se ielhuicac ejca Toteco. Quena, queja
inquiselisquíaj Cristo Jesús, innechselijque.
\v 15 ¿Canque yajqui nopa paquilistli tlen inquipixque quema
nimechcamahuito achtohuiya? Nelía intla inhueltosquíaj,
inmoquixtilijtosquíaj imoixtiyol huan innechmacatosquíaj para
nimochicajtosquía.
\v 16 Pero ama, huelis nimochijtoc niimocualancaitaca pampa
nimechilhuía tlen melahuac.
\p
\v 17 Nopa tlacame tlen tlamachtíaj nopa tlamachtilistli tlen ax
xitlahuac mochihuaj queja imohuampoyohua, pero ax quichihuaj pampa
quinequij inmechchihuilise tlen cuali huan tlen inmechpalehuis.
Inijuanti san quinequij inmechiyocatlalise tlen na para
xiquintoquilica huan xijtlacaquilica inintlamachtil.
\v 18 Cuali intla sequinoc quinequij elise imohuampoyohua yonque
niitztoc imohuaya o axtle, intla nelnelía quinequij
inmechchihuilise tlen cuali.
\v 19 Innopilconehua tlen nimechicnelía. Sampa nitlaijiyohuía ica
imojuanti queja se sihuatl tlen quitlacatiltía icone. Huan
nitlaijiyohuis hasta nopa tonal quema imonemilis nesis queja iyolis
Cristo.
\v 20 Nelía tlahuel nijnequi niitztosquía imohuaya para
nimechcamahuis ica yamanic, pero ama nelía nimocuesohua huan ax
nijmati tlaque nimechilhuis.
\s Agar huan Sara
\p
\v 21 Xinechilhuica ya ni, imojuanti tlen inquinequij inquitoquilise
nochi tlen quiijtohuaj itlanahuatil Moisés. ¿Nelía
inquimachilíaj tlen quiijtohuaj nopa tlanahuatili? ¡Huelis axtle!
\v 22 Itlajtol Toteco techilhuía para Abraham quinpixqui ome
ioquichpilhua. Se ioquichpil quipixqui ica inelsihua huan ne seyoc
quipixqui ica se itlatequipanojca tlen quicojtoya.
\v 23 Nopa sihua tlatequipanojquetl quipixqui cuali itlacayo huan
yeca nimantzi conepixqui. Pero inelsihua Abraham eltoya tenantzi
huan ax hueliyaya conepiya. Pero teipa, yonque ya nanatzi tlacatqui
icone ica ichicahualis Toteco pampa Toteco quitencahuilijtoya
Abraham para tlacatisquía.
\p
\v 24 Ni ome sihuame quinextía nopa ome tlajtolsencahuali tlen
Toteco quisencajtoc ica tlacame. Nopa sihua tlatequipanojquetl tlen
itoca Agar quinextía nopa tlajtolsencahuali tlen Toteco quichijqui
ica israelitame ipan tepetl Sinaí quema quinmacac itlanahuatil
Moisés huan nochi mochijque tlatequipanohuani para quintoquilise
nopa tlanahuatili.
\v 25 Quena, Agar itequipanojca Abraham quinextía israelitame tlen
huejcajquiya itztoyaj ipan tepetl Sinaí ipan tlali Arabia huan nopa
israelitame tlen ama itztoque ipan nopa hueyi altepetl Jerusalén
nicani ipan ni tlaltepactli. Nochi ni tlacame quintoquilíaj
itlanahuatil Moisés huan itztoque queja tlatequipanohuani tlen
ilpitoque ipan nochi nopa tlanahuatili.
\v 26 Pero tojuanti tlen tijneltocaj Cristo tiehuani ipan nopa
yancuic Jerusalén tlen temos tlen elhuicac. Huan Sara inelsihua
Abraham tlen ax elqui tlatequipanojquetl, itztoc tonana tojuanti
tlen ax tiquintoquilíaj itlanahuatil Moisés.
\v 27 Huan ijcuilijtoc ipan Itlajtol Toteco quejatza ichicahualis
hueli quipatla iyolis se tlen ax hueli conepiya. Quiijtohua:
\q “Ta tisihuatl, xipaqui.
\q Yonque ax tiquinpiya coneme, xijpiya paquilistli.
\q Pampa yonque ama ax tiquinpiya moconehua,
\q teipa tiquinpiyas más moconehua queja sequinoc sihuame.”
\p
\v 28 Huajca ama noicnihua, tiitztoque queja Isaac tlen Toteco
quitencahuili Abraham para tlacatisquía yonque isihua ax huelqui
conepiya. Huan na huan imojuanti tiiconehua Toteco pampa ya
quitencajqui techchihuasquía tiiconehua intla tijneltocasquíaj
Jesucristo.
\v 29 Huan queja huejcajquiya icone Agar, nopa tlatequipanojquetl,
quitlaijiyohuilti nopa oquichpil Isaac tlen Itonal Toteco
quitlacatilti, ama nojquiya inijuanti tlen quinequij ma tijtoquilica
itlanahuatil Moisés techtlaijiyohuiltíaj tojuanti tlen Itonal
Toteco techtlacatilti.
\v 30 Pero Itlajtol Toteco techilhuía queja Toteco quiilhui Abraham
huejcajquiya: “Xijtotoca Agar, nopa sihua tlatequipanojquetl ihuaya
ioquichpil, pampa ioquichpil nopa sihuatl tlen mitztequipanohua ax
huelis quiselis tlen tijcajtehuas. San quiselis mocone Isaac tlen
Sara mosihua quitlacatilti.”
\v 31 Huajca noicnihua, ax tiitztoque queja tiiconehua nopa sihua
tlatequipanojquetl tlen eliyaya iaxca iteco. Tojuanti tiiconehua
Sara yajaya tlen nelía eltoya isihua Abraham huan eltoya majcajtoc.
\c 5
\s Xijtoquilica tlen inmechmalacanis tlen nopa tlanahuatili
\p
\v 1 Cristo techtojtomilijtoc ica nopa tlen tiilpitoyaj para ma
tielica tlacame tlen timajcajtoque para tiyase campa tijnequise. Ax
quinequi ma tiitztoca titlatequipanohuani tlen tiilpitoque. Huajca
ximotetilica huan amo xijcahuilica ma sampa inmechilpica
itlanahuatilhua Moisés.
\p
\v 2 Xijtlacaquilica tlen na niPablo nimechilhuía. Intla intlacame
inmotequilisquíaj nopa tlanescayotl tlen itoca circuncisión pampa
inmoilhuíaj para ica ya nopa Toteco inmechtlapojpolhuis
imotlajtlacolhua, huajca ax tleno ipati Cristo para imojuanti.
\v 3 Sampa nimechyolmelahuas, intla inmotequilise nopa tlanescayotl
ipan imotlacayo pampa inmoilhuíaj Toteco inmechcualitas, huajca
monequi inquichihuase senquistoc nochi tlen quiijtohuaj itlanahuatil
Moisés.
\v 4 Quena, intla inmoilhuíaj monequi inquintoquilise nochi nopa
tlanahuatili para inelise inxitlahuaque iixpa Toteco, ya
inmohuejcatlalijtoque tlen Cristo tlen quipiya hueyi iyolo ica
tojuanti.
\v 5 Pero tojuanti tlen timotemachíaj ipan Cristo, ica miyac
paquilistli huan ica itlapalehuil Itonal Toteco timochiyaj hasta
nopa tonal quema yajaya techchihuas senquistoc tixitlahuaque iixpa.
\v 6 Para tojuanti tlen titlatzquitoque ipan Jesucristo, ax ipati
intla techtequilijtoque totlacayo o axtle. San ipati intla nelía
tijneltocaj Cristo huan tiquinicnelíaj toicnihua.
\p
\v 7 Achtohuiya inmonejnemiltiyayaj cuali. ¿Ajqueya inmechtzacuili
para ayoc inquitoquilíaj tlen melahuac?
\v 8 Nopa tlalnamiquilistli tlen inmechmacatoque ax huala tlen
Toteco tlen inmechnotztoc para inelise inmajcajtoque.
\v 9 Quemantzi se tlacatl tlen fiero iyolis huelis quincajcayahuas
miyac tlacame. Eltoc queja nopa tlajtoli tlen quiijtohua: “San se
quentzi tlasasaltili quisonehuas miyac pantzi.”
\v 10 Na nimotemachía ipan Tohueyiteco para inmechpalehuis para
ayoc ximoilhuica tlen nopa tlamachtilistli tlen ax neli. Huan Toteco
quitlatzacuiltis aqui hueli tlacatl tlen quinequis
inmechcajcayahuas.
\p
\v 11 Intla niquinilhuisquía tlacame tlen ax israelitame para
monequi motequilise inintlacayo para Toteco quinselis, axaca
nechcocolisquía. Pero nechcocolíaj miyac israelitame pampa
nitlamachtía para Toteco quinmaquixtía tlacame san pampa Jesús
mijqui ipan icuamapel ininpampa inijuanti.
\v 12 Cuali elisquía intla inijuanti tlen quinequij ximotequilica
imotlacayo, ma motequilica inintlacayo hasta ma mocaparoca.
\p
\v 13 Noicnihua, Toteco inmechnotzqui para inmechmalacanis. Pero
yonque inmajcajtoque, amo xijtoquilica imotlacayo tlen quinequi
tlajtlacolchihuas. Pero ximotequipanoca se ica seyoc pampa
inmoicnelíaj.
\v 14 Quena, nochi itlanahuatil Moisés eltoc ipan ni tlajtoli:
“Xiquinicneli sequinoc queja timoicnelía.”
\v 15 Pero intla imojuanti inmonajnanquilíaj huan inmoijilnamiquij,
huajca ximomocuitlahuica para ax inmotzontlamiltise.
\s Xinejnemica ica Itonal Toteco
\p
\v 16 Ya ni nimechilhuía: Ximonejnemiltica cuali ica itlapalehuil
huan ichicahualis Itonal Toteco huan quej nopa ax inquitoquilise
imotlacayo tlen quinequi tlajtlacolchihuas.
\v 17 Pampa imotlacayo quinequi xitlajtlacolchihuaca, huan Itonal
Toteco quinequi xijchihuaca tlen cuali. Huajca ni ome
tlalnamiquilistli mococolíaj huan quema inquinequij inquichihuase
se tlamantli, sesen ni ome inmechnojnotza xijchihuaca queja sesen
itlalnamiquilis huan ax inmechcahuilis inquichihuase tlen xitlahuac
inquinequij inquichihuase.
\v 18 Huajca monequi xijcahuilica Itonal Toteco ma inmechyacana,
huan quej nopa ayoc elis itlanahuatilhua Moisés tlen quipiyase
tequihuejcayotl ipan imonemilis.
\p
\v 19 Nempa nesi nopa fiero tlamantli tlen tlacame quichihuaj quema
quitoquilíaj tlen quinequi inintlacayo. Momecatíaj huan quichihuaj
tlen hueli ica tlen ax ininnamic. Moilhuíaj miyac tlamantli tlen ax
cuali. Quichihuaj tlen fiero pampa ya nopa tlahuel quinequij
quichihuase.
\v 20 Quihueyichihuaj tlen tlacame quichijtoque huan quiitaj para se
dios. Tetlajchihuíaj, tecocolíaj, mosisiníaj, huan techicoitaj.
Nojquiya tlacame cualancatlahuejchihuaj, monajnanquilíaj,
motlajcoxelohuaj, huan tlamachtíaj tlen ax xitlahuac.
\v 21 Quiixtocaj tlen sequinoc quipiyaj, temictíaj, moihuintíaj
huan quichihuaj tlen fiero pampa ihuintij. Huan inijuanti tlen
quitoquilíaj tlen inintlacayo quinequi huan miyac más tlamantli
tlen ax cuali. Sampa nimechilhuía tlen ya nimechilhuijtoc. Tlacame
tlen quichijtinemij ni tlamantli tlen ax cuali, ax huelis calaquise
campa tlanahuatía Toteco.
\p
\v 22 Pero quema tijpiyaj Itonal Toteco ipan toyolo huan
tijcahuilíaj ma techyacantiya, ya ni tlen tijchihuaj:
Titeicnelíaj, tipaquij, tijpiyaj tlasehuilistli ipan toyolo,
tijpiyaj toyolo ininhuaya sequinoc, titetlasojtlaj,
tiquinchihuilíaj sequinoc tlen cuali, tiitztoque titemachme,
\v 23 timoicnonequij huan timonahuatíaj cuali para ma ax
titlajtlacolchihuaca. Tlacame tlen quichihuaj ni cuali tlamantli ax
monequi se tlanahuatili.
\v 24 Quena, tojuanti tlen tiiaxcahua Cristo Jesús eltoc queja
tijmictijque itlanequilis totlacayo tlen techyoltilanayaya ma
titlajtlacolchihuaca huan tijtlalijque ipan cuamapeli ihuaya Jesús.
\v 25 Huan ama pampa tijpiyaj yolistli tlen yancuic tlen Itonal
Toteco techmacac, nojquiya ma tijcahuilica Itonal Toteco ma
techyacantiya ipan sesen tlamantli tlen tijchihuaj.
\v 26 Ma ayoc tijtemoca ajqueya techhueyimatis. Ma ayoc
timonajnanquilica. Huan ma ayoc tiquixtocaca tlen sequinoc quipiyaj.
\c 6
\s Ximopalehuica
\p
\v 1 Noicnihua, intla inquipantíaj se imoicni tlen huetztoc ipan se
tlajtlacoli, imojuanti tlen inmonejnemiltíaj ica ichicahualis
Itonal Toteco xijpalehuica para ma motlalana. Quena, ica yamanic
xijnojnotzaca ma ayoc tlajtlacolchihua. Pero ximomocuitlahuica para
ax inmechyoltilanas huan nojquiya imojuanti intlajtlacolchihuase.
\v 2 Ximopalehuica se ica seyoc ica imocuesolhua huan queja nopa
inquichihuase tlen Cristo technahuatijtoc.
\p
\v 3 Intla se tlacatl moilhuía yajaya más hueyi que sequinoc huan
ax hueli quipalehuía se tlen huetztoc, yajaya nelía mocajcayahua.
\v 4 Monequi sesen tojuanti ma timotequitlachilica para tiquitase
intla iixpa Toteco cuali timonejnemiltíaj o axtle. Huan intla cuali
tonemilis, huajca ma tipaquica, pero axaca ma paqui san pampa
quichijtoc tlen achi cuali que se iicni tlen tlajtlacolchijtoc.
\v 5 Pampa sesen tojuanti tijpiyaj totequi para tijmocuitlahuise
tlen tojuanti tonemilis.
\p
\v 6 Xiquinpalehuica tlen inmechmachtíaj itlajtol Toteco, ica tomi
huan ica nochi nopa cuali tlamantli tlen inquipiyaj.
\p
\v 7 Amo ximocajcayahuaca, pampa axaca hueli quicajcayahuas Toteco.
Tlen inquitocase, ya nopa inquipixcase.
\v 8 Intla inquichihuaj tlen ax cuali pampa inquitoquilíaj tlen
eltoc imopani tlen quipactía tlajtlacolchihuas, inquipantise se
nemilistli tlen fiero. Pero intla inquichihuaj tlen cuali queja
Itonal Toteco techilhuía ma tijchihuaca, huajca Itonal Toteco
techmacas se yolistli tlen yancuic huan huejcahuas para nochipa.
\v 9 Ma ax ticuesihuica para tijchihuase tlen cuali, pampa intla ax
tijcahuase tijchihuaj tlen cuali, Toteco techtlaxtlahuis miyac quema
ajsis tonal.
\v 10 Huajca ama, quema noja tihuelij, ma tiquinchihuilica tlen
cuali nochi tlacame. Huan achi más monequi ma tiquinchihuilica tlen
cuali toicnihua ipan Cristo.
\s Pablo quinnahuatijtejqui
\p
\v 11 Xiquitaca para noselti ica huejhueyi nomatlajcuilol
nimechtlajcuilhuilía nimantzi.
\v 12 Nopa tlacame tlen quinequij ximotequilica nopa tlanescayotl
san quinequij iniisraelita huampoyohua ma quincualitaca para ma ax
quintlaijiyohuiltica queja techtlaijiyohuiltíaj. Huan inquimatij
techtlaijiyohuiltíaj pampa titlamachtíaj para san Cristo hueli
techtlajtlacolquixtis, pampa yajaya mijqui ipan icuamapel topampa.
\v 13 Pero nopa israelita tlacame tlen quinequij inmechmachtise tlen
nopa tlanescayotl, niyon inijuanti ax quichihuaj nochi tlen
quiijtohuaj itlanahuatil Moisés. San quinequij ximotequilica
imotlacayo para mohueyimatise huan quiijtose quinpiyaj tlacame tlen
quitoquilíaj inintlamachtil.
\v 14 Pero na san nimotlepanita ipampa tlen Jesucristo quichijqui
ipan icuamapel para nechmaquixtis, huan intla nimotlepanitas ica
seyoc tlamantli, ma Toteco nechtlatzacuilti. Huajca ayoc hueli
nechyoltilana tlamantli tlen onca ipan ni tlaltepactli, pampa ipan
nopa cuamapeli mijqui tlen nonacayo quinequiyaya. Huan niquita nochi
tlamantli tlen ax cuali ipan tlaltepactli queja mictoc para na.
\v 15 Huajca ax ipati intla timotequilijtoque nopa tlanescayotl o
axtle. San ipati intla tijpiyaj yolistli tlen yancuic ipan Cristo.
\v 16 Ma Toteco inmechtlasojtla huan ma inmechmaca tlasehuilistli
ipan imoyolo nochi imojuanti tlen innejnemij queja nimechilhuijtoc
huan nochi inisraelitame tlen nelía inintlacajhua Toteco.
\p
\v 17 Huajca ama huan teipa ayoc nijnequi timonajnanquilise ica
nochi ni tlamantli. Huan ama ma ayoc aca nechtlajtlani intla nelía
niitequipanojca Toteco, pampa lipintic notlacayo campa
nechcocojtoque tlacame tlen quicocolíaj Jesucristo huan ya nopa
mocahua queja se tlanescayotl tlen quinextía nempa para
niitequipanojca.
\p
\v 18 Noicnihua, Tohueyiteco Jesucristo ma quipiya hueyi iyolo ica
imojuanti. Quej nopa ma eli.