\id EPH
\h EFESIOS
\mt Nopa Amatlajcuiloli tlen Pablo Quintlajcuilhui Tlaneltocani ipan Altepetl Éfeso
\c 1
\s Pablo quintlajcuilhui tlaneltocani tlen mosentilijque ipan Éfeso
\p
\v 1 Na niPablo niitlayolmelajca Jesucristo pampa Toteco ica ipaquilis nechtlapejpeni huan nechtequitlali para niteilhuis Itlajtol. Nimechtlajcuilhuilía imojuanti ipan altepetl Éfeso tlen temachtli inquineltocaj Jesucristo huan tlen initlatzejtzeloltijca tlacajhua.
\v 2 Toteco Totata huan Toteco Jesucristo ma quipiyaca hueyi ininyolo ica imojuanti, huan ma inmechmacaca tlasehuilistli ipan imoyolo.
\s Tlen cuali tijpiyaj ica Cristo
\p
\v 3 Ma tijpaquilismacaca Toteco Dios, yajaya tlen iTata Toteco Jesucristo pampa techtiochijtoc ica nochi tlamantli tlatiochihualistli tlen cuali nepa elhuicac pampa techtlatzquiltijtoc ipan Jesucristo.
\v 4 Huejcajquiya quema polihuiyaya para quichihuas tlaltepactli, Toteco Dios techtlapejpeni para teipa techtlatzquiltis ipan Cristo. Quinejqui ma tiitztoca titlatzejtzeloltique huan para ma ax tijpiyaca niyon se totlajtlacol iixtla.
\v 5 Huan pampa Toteco miyac techicneli, huejcajquiya quema quisencahuayaya tlaque quichihuasquía teipa, quiijto para teipa techselis queja tiiconehua ipampa tlen Jesucristo techchihuilis. Huan ya nopa Toteco quichijqui pampa elqui ipaquilis para quichihuas.
\v 6 Huajca ma tijpaquilismacaca Toteco pampa onpano hueyi iyolo ica tojuanti huan yeca techselijtoc ipan Jesucristo tlen yajaya quiicnelía.
\v 7 Quena, pampa tlahuel hueyi iyolo Toteco tohuaya, tlaxtlajqui tlen monejqui para techtojtomas tlen totlajtlacolhua ica ieso Icone. Huan ama tijpiyaj tlapojpolhuili tlen totlajtlacolhua.
\v 8 Huan pampa hueyi iyolo ica tojuanti techmacac cuali tlalnamiquilistli huan quichijtoc para ma tijmachilica miyac.
\v 9 Huan techmatiltijtoc tlaque ipaquilis tlen axaca quimatiyaya. Quena, quipacti Toteco technextilis tlen huejcajquiya quitlalijtoya quichihuas.
\v 10 Huan ya ni tlen Toteco quiixquetztoya se tonal para quichihuas quema ajsisquía hora. Quinsentilis nochi tlacame huan nochi tlamantli, ipan Cristo. Huan Cristo quipiyas tlanahuatili ica nochi ipan elhuicac huan nochi ipan tlaltepactli.
\p
\v 11 Huan nojquiya tlen huejcajquiya Toteco ipa quitlalijtoya para tijpiyasquíaj nopa tlatiochihualistli tlen tijselisquíaj quema techtlatzquiltisquía ipan Cristo. Huan nochi ni tlamantli panotihuala queja Toteco quisencajqui pampa yajaya quichihua ma pano nochi queja ipaquilis.
\v 12 Pampa hasta huejcajquiya Toteco quinequiyaya para tiisraelitame tlen achtohui timotemachijque ipan Cristo, ma tijpaquilismacaca Toteco Dios pampa yajaya itztoc onpano hueyi.
\v 13 Huan ama imojuanti nojquiya tlen ax inisraelitame inquicactoque Itlajtol Toteco tlen melahuac. Huan Itlajtol inmechilhuijtoc quejatza Cristo hueli inmechmaquixtía tlen imotlajtlacolhua. Huajca quema inquineltocaque Cristo, Toteco inmechsellohuijqui huan inmechtlatzquilti ipan Cristo. Quena, inmechtlalili isello para nesis iniaxcahua pampa inmechmacac Itonal para ma itzto imohuaya queja quitencajtoya achtohuiya para quichihuasquía.
\v 14 Huan Itonal Toteco eltoc queja se tlayacanca tomi tlen technextilía para temachtli tijselise nochi tlen techtencahuilijtoc techmacas nepa elhuicac. Quena, yajaya tlaxtlajqui tlen monejqui para techcohuas para tiiaxcahua huan para techtojtomas tlen tlajtlacoli. Huajca ma tijpaquilismacaca Toteco pampa yajaya itztoc onpano hueyi.
\s Pablo quitlajtlani Toteco ipampa nopa tlaneltocani
\p
\v 15 Huajca pampa Toteco inmechmacatoc nochi ni tlatiochihualistli, quema nijcajqui quejatza chicahuac inquineltocaj Tohueyiteco huan queja inquinicnelíaj nochi tlacame tlen iaxcahua,
\v 16 pejqui nijtlascamati Toteco por imojuanti. Huan ax nijcahua nimomaijtohua ajachica imopampa.
\v 17 Nijtlajtlanía Toteco Dios, yajaya nopa Tetata tlen más quipiya ihueyitilis. Quena, nijtlajtlanía yajaya tlen Iteco Tohueyiteco Jesucristo para ma inmechmaca tlalnamiquilistli para inquimachilise nochi tlen inmechmachtía para achi más xiquixmajtiyaca.
\v 18 Nijtlajtlanía Toteco ma quitlahuili imotlalnamiquilis para xijmatica nopa tlen temachtli Toteco techmacatoc tojuanti tlen technotzqui para ma tielica tiiaxcahua. Quena, nijnequi xijmatica para onpano yejyectzi huan cuajcualtzi nochi nopa huejhueyi tlamantli tlen yajaya quicualtlalijtoc para techmacas tojuanti tlen tiitlatzejtzeloltijca tlacajhua. Huan techmacas teipa nepa elhuicac.
\v 19 Huan nijtlajtlanía xijmatica quejatza onpano hueyi ichicahualis Toteco tlen tequiti ipan tojuanti tlen tijneltocaj. Huan ni chicahualistli techpalehuía huan techfuerzajmaca.
\v 20 Elqui ica ni hueyi chicahualistli Toteco quiyoliti Cristo quema mictoya, huan quitlalanqui hasta elhuicac huan quisehui nepa inejmatl campa onca más tlatlepanitacayotl.
\v 21 Huan Toteco quimacac Cristo nopa tlanahuatili tlen más hueyi pampa quitlali para ma quinnahuati nochi tlen itztoque. Quinnahuatía ielhuicac ejcahua huan nochi ajacame yonque quintocajtíaj tlen quipiyaj tlanahuatili, o tequiticayotl, o chicahualistli o hueyitilistli. Huan nojquiya quinnahuatía nochi sequinoc tlen quipiyaj inintoca. Quena, Cristo quinahuatis nochi tlen itztoque ipan tlaltepactli o tlen itztose ipan nopa tlaltepactli tlen hualas.
\v 22 Huan Toteco quitlalijtoc nochi tlen itztoque huan nochi tlamantli tlen onca iicxitla Cristo para san yajaya ma quipiya tlanahuatili. Huan Toteco quitlalijtoc Cristo ma quipiya tlanahuatili ica itiopa, quinequi quiijtos nochi titlaneltocani.
\v 23 Quena, nochi titlaneltocani tiitztoque tiitlacayoj Cristo huan queja Toteco quimacac Cristo nochi tlamantli, Cristo quitemitía tlaneltocani ipan itiopa ica nochi tlatiochihualistli. Quena, quinmaca nochi tlen yajaya quinchijchijtoc, nochi tlen quinmonequilía.
\c 2
\s Toteco techmaquixtijtoc pampa hueyi iyolo
\p
\v 1 Toteco inmechmacac yolistli imojuanti tlen achtohui initztoyaj
queja inmijcatzitzi iixpa Toteco pampa imotlaixpanolhua huan
imotlajtlacolhua.
\v 2 Quena, achtohui innejnemiyayaj ipan tlajtlacoli queja ne sequin
ipan ni tlaltepactli. Inquichijtinenque tlen quinequiyaya
Axcualtlacatl, nopa hueyi ajacatl tlen tequiti ajacatipa. Yajaya
tlen tequiti ipan ininyolo nochi tlacame tlen ax quinequij
quitlepanitase Toteco, niyon ax quichihuaj tlen yajaya quiijtohua.
\v 3 Achtohuiya nochi tojuanti nojquiya tiitztoyaj queja inijuanti.
Tijchijtinenque san tlen fiero queja quinequiyaya totlacayo tlen
quipactía tlajtlacolchihuas. Quena, tijchihuayayaj ya ni pampa
totequihua huan totlalnamiquilis quinequiyaya ma tijchihuaca, pampa
hasta quema titlacatque, queja nopa tiitztoyaj. Huan yeca Toteco san
quichiyayaya para techtlatzacuiltis ininhuaya nopa sequinoc ax
cuajcualme.
\v 4 Pero Toteco tlen tlahuel miyac tetlasojtla, techicneli quema
tijchihuayayaj tlen ax cuali pampa quipiya hueyi iteicnelijcayo ica
tojuanti.
\v 5 Huan quema noja timictoyaj iixpa Toteco ipan totlajtlacolhua,
Toteco techmacac yolistli yancuic san sejco ica Cristo. Quena,
techmaquixti san pampa hueyi iyolo ica tojuanti.
\v 6 Huan Toteco techyoliti ica Cristo huan techsehui ihuaya Cristo
nepa elhuicac. Huan amantzi Toteco techita queja para ya tiitztoque
nepa elhuicac pampa techtlatzquilti ipan Cristo Jesús.
\v 7 Techsehuijtoc ipan elhuicac pampa quinejqui quinextis para
nochipa quejatza onpano hueyi iyolo ica tojuanti ipampa tlen Cristo
Jesús techchihuilijtoc.
\v 8 Huajca pampa nelía hueyi iyolo Toteco Dios, yajaya
inmechmaquixti tlen imotlajtlacolhua quema inquineltocaque
Jesucristo. Huan ax inquineltocaque Jesucristo imoseltitzitzi, pero
elqui Toteco techmacac nopa tlaneltoquili.
\v 9 Huan ax inmechmaquixti pampa inquichijtoyaj se tlamantli tlen
cuali para queja nopa axaca huelis mohueyimatis iixpa.
\v 10 Toteco techchijtoc huan tojuanti tiitztoque tiitequi ya. Huan
techmacatoc yolistli yancuic ipan Cristo Jesús para huelis
tijchihuase tlamantli tlen cuali pampa queja nopa hasta huejcajquiya
quitlalijtoya para ma tijchijtinemica.
\s Nopa tlasehuilistli tlen tijpiyaj
\p
\v 11 Huajca xiquilnamiquica quejatza elqui achtohuiya ica imojuanti
tlen ax inisraelitame. Tojuanti tiisraelitame timechcualancaitayayaj
pampa ax inmotequilijtoyaj nopa machiyotl tlen itoca circuncisión
ipan imotlacayo queja tiisraelitame timomajtoque tijchihuaj.
\v 12 Ipan nopa tonali initztoyaj huejca tlen Cristo. Ax tleno
inquipixque ica tiisraelitame tlen tiitlacajhua Toteco. Ax
inquipixque tlanahuatili para inquiselise tlen Toteco
techtencahuilijtoya tiisraelitame. Ax inquiixmatiyayaj Toteco. Ipan
tlaltepactli ax inquipiyayayaj ajqueya para ipan inmotemachise para
inmechmaquixtis.
\v 13 Pero imojuanti tlen achtohuiya initztoyaj huejca tlen Cristo,
ama intlatzquijtoque ipan ya pampa inmechnechcahuilti quema
quitoyajqui ieso huan mijqui imopampa.
\v 14 Huan elqui Cristo tlen quisencajqui tlasehuilistli ica
imojuanti tlen ax inisraelitame huan ica tojuanti tlen
tiisraelitame, pampa Cristo techsejcotili huan techchijqui san se
tiitlacajhua. Quena, yajaya quixolejqui tlen techtlajcoitayaya.
\v 15 Huan quema Cristo mijqui, quichijqui para ma ayoc
timocualancaitaca, pampa quiquixtili ichicahualis itlanahuatil
Moisés huan nochi nopa tlamantzitzi tlen technahuatiyaya
tiisraelitame. Huajca amantzi tiisraelita tlacame huan imojuanti
tlen ax inisraelitame, nochi tiitztoque queja san se tlacatl tlen
yancuic, huan yeca ama onca tlasehuilistli.
\v 16 Quema Cristo mijqui ipan cuamapeli para quiyoltlalis Toteco
ica tiisraelitame huan imojuanti tlen ax inisraelitame, yajaya
quitlamilti nopa cualantli tlen tijpixtoyaj se ica seyoc huan
quichijqui ma tiitztoca ipan san se totlacayo ipan Toteco.
\p
\v 17 Cristo hualajqui huan teyolmelajqui tlen nopa cuali tlajtoli
tlen tlasehuilistli tlen eltoc para imojuanti tlen ax inisraelitame
tlen initztoyaj huejca tlen ya huan para tojuanti tiisraelitame tlen
tiitztoyaj más nechca tlen Toteco.
\v 18 Yeca ama, aqui hueli tlacatl yonque israelita o ax israelita
huelis quinechcahuis Toteco Totata ica itlapalehuil Itonal Toteco
ipampa tlen Jesucristo techchihuilijtoc.
\v 19 Huajca imojuanti tlen ax inisraelitame ayoc initztoque queja
insejcoyoc ehuanij tlen ax quipiyaj niyon se tequihuejcayotl. Ama ya
san se inehuani ica tojuanti tlen Toteco techchijtoc
tiitlatzejtzeloltijca tlacajhua. Quena, ama initztoque ichampoyohua
Toteco.
\v 20 Tiitztoque queja se tiopamitl tlen Toteco quichijtihualajtoc
ica tlacame tlen quineltocaj. Itlayolmelajcahua Toteco huan nopa
tiocamanalohuani itztoque queja itzinpehualtil nopa itiopa. Cristo
Jesús itztoc queja nopa hueyi tetl tlen yohui calnacastla tlen ipan
quiquetzase nopa tiopa.
\v 21 Huan ipan Cristo nochi titlaneltocani timonechicohuaj queja
tetini ipan se tepancali. Huan mojmostla mochihua más hueyi itepa
huan timochijtiyohuij itlatzejtzeloltijca tiopa Toteco tlen yajaya
quichihua ica tlacame tlen quineltocaj Cristo.
\v 22 Huan ama imojuanti nojquiya tlen ax inisraelitame initztoque
queja nopa tetini ipan itepanyo nopa tiopa, huan Toteco mocahua ipan
imojuanti pampa Itonal itztoc ipan imoyolo.
\c 3
\s Toteco quitequimacatoc Pablo ica tlacame tlen ax iraelitame
\p
\v 1 Yeca pampa quej nopa ipaquilis Cristo Jesús, na niPablo
nijtzactoc ipan ni tlatzactli pampa niquinilhuiyaya tlacame queja
imojuanti tlen ax inisraelitame Itlajtol.
\v 2 Huelis ya inquicactoque quejatza Toteco, pampa hueyi iyolo noca
na, nechtequimacatoc ma nimechilhuis intlacame tlen ax inisraelitame
Itlajtol.
\v 3 Huan ya nimechtlajcuilhui quentzi ipan ni amatlajcuiloli para
elqui Toteco iselti tlen nechnextili tlen yajaya quichihuayaya ipan
Cristo.
\v 4 Huan quema inquipojtiyase tlen nimechtlajcuilhuijtoc,
inquimachilise quejatza nijmati ni tlamantli tlen Cristo.
\v 5 Quena, huejcajquiya Toteco axaca quinextiliyaya ni tlamantli,
pero ama Toteco ica Itonal ya quinnextilijtoc itlayolmelajcahua huan
itiocamanalojcahua tlen quiniyocatlalijtoc para iaxcahua.
\v 6 Huan ¿tlaque onca nopa tlamantli tlen achtohuiya Toteco ax
tenextiliyaya? Elqui para nochi imojuanti tlen ax inisraelitame san
sejco inquiselise imoparte ica tojuanti tiisraelitame ipan nopa
tlatiochihualistli tlen Toteco techmacas tojuanti tiiconehua. Huan
ama tiitztoque san sejco ipan itlacayo. Huan nopa tlen
techtencahuili ipan Cristo Jesús tlen Toteco techmacas
tiisraelitame, nojquiya inquiselise imojuanti pampa inquineltocaj
nopa cuali tlajtoli tlen ya.
\p
\v 7 Huajca ama pampa hueyi iyolo noca na, Toteco queja se regalo
nechmacatoc notequi para ma nieli niitequipanojca. Huan ipampa
ihueyi chicahualis tlen tequiti nopan na, ama niquinilhuía tlacame
nopa cuali tlajtoli.
\v 8 Yonque na más nipilsiltzi iixpa Toteco que nochi sequinoc
itlatzejtzeloltijca tlacajhua, yajaya nechmacatoc ni paquilistli
para ma niquinilhui tlacame tlen ax israelitame tlen Cristo. Huan
yonque axaca hueli quitlamipohuilis nochi tlen Cristo quipiya pampa
yajaya onpano tlapijpixtoc, na niquinyolmelahua nopa cuali tlajtoli
para Cristo quipiya tlahuel miyac tlamantli tlatiochihualistli para
quinmacas.
\v 9 Quena, Toteco tlen quichijchijtoc nochi tlamantli nechmacatoc
ni notequi para ma niquinilhui nochi tlacame tlen yajaya
quisencajqui tlen huejcajquiya. Huan itlalnamiquilis tlen axaca
quimatiyaya elqui ya ni; yajaya quinmaquixtis tlen israelitame huan
tlen ax israelitame ipan Cristo.
\v 10 Toteco quichijqui ya ni para ama ipan ni tonali nochi tlen
quipiyaj tlanahuatili huan chicahualistli tlen tlanahuatíaj nepa
ajacatipa ma quiitaca para nelhueyi itlalnamiquilis. Quinequi ma
quiitaca para itiopa tlen ax nesi, mochijtoc ica tlaneltocani tlen
israelitame huan tlen ax israelitame.
\v 11 Pampa hasta tlen huejcajquiya Toteco ipa moilhuijtoya
quichihuas ya ni ica Cristo Jesús, Tohueyiteco.
\v 12 Yeca ica tlaque techchihuilijtoc Cristo huan pampa tijneltoca,
ya tijpiyaj tequihuejcayotl para tijnechcahuise huan tijcamahuise
Toteco huan tijmatij temachtli techselis ica paquilistli.
\v 13 Huajca amo xicuesihuica xijtoquilica Toteco yonque ama
nitlaijiyohuía ipan tlatzactli pampa nimechilhuijtoc imojuanti huan
sequinoc tlen ax israelitame Itlajtol. Nochi ni quipannextía para
miyac imopati iixpa huan se tlatlepanitacayotl para imojuanti.
\s Jesucristo nelnelía techicnelía
\p
\v 14 Quema nimoilhuía tlen ihueyi tlalnamiquilis para quisencahuas
nochi ni hueyi tlamantli, nimotlancuaquetza huan nimomaijtohua iixpa
Totata, yajaya tlen iTata Tohueyiteco Jesucristo.
\v 15 Yajaya nelía inintata nochi nopa familias tlen tlacame huan
elhuicac ehuani tlen itztoque ipan elhuicac huan ipan tlaltepactli
pampa yajaya quinchijchijqui huan quintocajtlali.
\v 16 Huan pampa Toteco nelía tlapijpixtoc huan quipiya nopa
chicahualistli tlen más hueyi, nijtlajtlanía para Itonal ma
inmechmaca miyac chicahualistli ipan imoyolo.
\v 17 Nimomaijtohua ica Toteco para xijcahuilica Cristo ma mochanti
ipan imoyolo pampa inquineltocaj. Nijtlajtlanía Toteco para yajaya
ma pajcaitztos ipan imoyolo pampa quipiya tlanahuatili ica nochi
tlen eltoc nepa. Huan queja se tzontli quiselía chicahualistli tlen
inelhuayo, nijtlajtlanía para mojmostla xijselica imochicahualis
tlen iteicnelijcayo.
\v 18 Nijnequi imojuanti huan nochi sequinoc itlatzejtzeloltijca
tlacajhua Toteco xijmachilica quejatza ihuexca itlaicnelicayo
Toteco. Pampa onpano hueyi itlaicnelijcayo huan ajsi campa más
huejcapa, huan campa más tlatzintla, huan ajsi tlen campa quisa
tonati hasta campa oncalaqui.
\v 19 Quena, nijnequi xiquixmatica itlaicnelijcayo Cristo tlen axaca
hueli quitlamiixmatis. Nijnequi initztose queja se tlatlamachihuali
tlen temitoc ica se quentzi tlen ihueyitilis Toteco.
\p
\v 20 Ma tijhueyimatica Toteco Dios yajaya tlen quipiya
chicahualistli para quichihuas onpano más miyac huan ax queja nochi
tlen hueli tijtlajtlaníaj o tlen tihuelij timoilhuíaj. Huan
quichihuas ica ichicahualis tlen ya tequiti ipan tojuanti.
\v 21 Quena, tojuanti tlen timochihuaj tiitiopaj tlen tlaneltocani
ma tijhueyichihuaca Totata san sejco ica Jesucristo para nochipa,
huan ma ax quema tlami. Quej nopa ma eli.
\c 4
\s Itonal Toteco techchijtoc san se
\p
\v 1 Na tlen nitzactoc pampa queja nopa ipaquilis Tohueyiteco,
nimechtlajtlanía xijpiyaca se imonemilis tlen nelía cuali queja
quinamiqui quipiyase tlacame tlen Toteco quinnotzqui para elise
iaxcahua.
\v 2 Ximoicnonequica huan ximocamahuica ica cuali queja tlacame tlen
cuali monahuatíaj. Xijpiyaca imoyolo se ica seyoc, huan sesen
imojuanti xiquijiyohuica quema seyoc imoicni quichihua o quiijtohua
se tlamantli pampa yajaya aya cuali tlamachilía. Quej nopa
inquinextilise inquiicnelíaj.
\v 3 Ica itlapalehuil Itonal Toteco, xijchihuaca campeca inquipiyase
san se imotlalnamiquilis. Huan quej nopa inquipiyase tlasehuilistli.
\v 4 Pampa nochi tojuanti tlen tijneltocaj Toteco tiitztoque queja
san se totlacayo iixpa Toteco. Tijpiyaj san se Itonal Toteco. Huan
quema technotzqui, quiijto ma tijchiyaca para senquistoc
techmaquixtis nepa elhuicac san se queja quinmaquixtis nochi
sequinoc tlen quinnotztoc.
\v 5 San itztoc setzi Tohueyiteco Jesucristo. Huan nochi tijneltocaj
san se Itlajtol. Onca san setzi tlacuaaltilistli.
\v 6 Itztoc setzi Toteco Dios, yajaya tlen Totata nochi tojuanti.
Yajaya quipiya tlanahuatili ica nochi tojuanti. Huan yajaya itztoc
ipan para nochi tojuanti huan itztoc ipan nochi tojuanti.
\p
\v 7 Huan Cristo techmacatoc sesen tojuanti nopa yajatili o
chicahualistli tlen monequi para tijchihuase itequi pampa hueyi
iyolo ica tojuanti huan quinequi ma tijtequihuica para ya.
\v 8 Huajca quisa queja ijcuilijtoc ipan Itlajtol para Toteco
quichihuasquía campa quiijtohua:
\q “Quema yajaya tlejcos elhuicac quinyacantiyas inijuanti tlen
quintlantoc.
\q Huan quinmacatejqui sesen tlacatl regalos tlen yajatili.”
\p
\v 9 Pero ¿tlaque quinequi quiijtos “yajaya tlejcoc elhuicac”?
Quinequi quiijtos para yajaya achtohuiya temotoya tlen elhuicac
hasta campa más tlatzintla ipan ni tlaltepactli.
\v 10 Huajca yajaya tlen temoc ipan ni tlaltepactli eltoc nojquiya
yajaya tlen tlejcoc hasta nepa elhuicac campa más huejcapa.
Quichijqui ya nopa para ma nesi ya itztoc campa hueli ipan san se
tlalochtli huan quitemitía nochi tlaltepactli huan elhuicactli.
\v 11 Huan quinmacac sequin nopa yajatili para ma elica
tlayolmelahuani, huan sequin para ma elica tiocamanalohuani, huan
sequin para ma teyolmelahuaca quejatza Cristo tetlajtlacolquixtía.
Huan quinmacac sequin nopa yajatili para ma elica tlayacanani tlen
tlaneltocani huan sequin para ma elica tlamachtiani tlen Itlajtol
Toteco.
\v 12 Pero Tohueyiteco techmacac sesen tojuanti toyajatil para ica
tiquincualtlalise nochi sequinoc itlacajhua para quichihuase itequi.
Huan teipa monequi tojuanti tlen tiitlacajhua ma timotequipanoca se
ica seyoc para tijmacase tetili nochi tojuanti tlen tiitlacayoj
Cristo, quinequi quiijtos nopa tlasentilistli tlen ax moita tlen
nochi itlacajhua.
\v 13 Monequi tijtequihuise toregalo o tochicahualis huan
timotequipanose ica seyoc hasta nochi titlaneltocani timochihuase
san se ipan tlen tijneltocaj huan cuali tiquixmatise Icone Toteco.
Quej nopa ayoc tiitztose queja ticoneme. Ya tiitztose tihuejhueyi
tlacame ipan Cristo. Huan monequi timoscaltijtiyase hasta tijpiyase
se nemilistli queja Cristo quipiya.
\p
\v 14 Huajca ma ayoc tiitztoca queja coneme tlen quipatlaj
inintlalnamiquilis ajachica huan quitoquilíaj tlen hueli
tlamachtili pampa eltoc queja se ajacatl quinhuica campa hueli. Ma
ayoc inmechcajcayahuaca tlacame tlen istlacatij huan quisencahuaj
tlen hueli tlajtoli para inmechmachtise, pampa inijuanti
neltlalnamiquini para quejatza tlacajcayahuase.
\v 15 Pero tojuanti ma tijtoquilijtinemica tlen melahuac ica
teicnelijcayotl. Huan ma timoscaltijtiyaca para tiitztose más queja
Cristo, yajaya tlen totzonteco, huan tlen technahuatía nochi
titlaneltocani queja totzonteco quinahuatía totlacayo.
\v 16 Ipan itlacayo se tlacatl nochi partes monechicohuaj huan
tequitij san sejco. Huan Cristo quichihua para nochi tojuanti tlen
tiitztoque tiitlacayoj ma timonechicoca huan ma titequitica cuali san
sejco pampa sesen tojuanti tijchihuaj tlen totequi para ma
tijchihuaca. Huan quema sesen tlaneltocaquetl ica miyac
teicnelijcayotl quichihua tlen itequi huan timopalehuíaj se ica
sequinoc, huajca quena, nochi itlacayo Cristo moscaltía.
\s Nopa yancuic yolistli ipan Cristo
\p
\v 17 Huajca ya ni nimechilhuía ica itequihuejcayo Tohueyiteco.
Ayoc xijpiyaca imonemilis queja tlacame tlen ax quineltocaj Toteco
pampa nelía maneltic tlen moilhuíaj huan ax tleno ipati.
\v 18 Tzactoc inintlalnamiquilis huan huejca mocahuaj tlen nopa
nemilistli yancuic tlen Toteco temaca. Ax quipiyaj nopa yolistli
pampa moyoltetilijtoque para ax quiixmatica Toteco.
\v 19 Inijuanti quipolojtoquejya ininpinahualis huan
motemactilijtoque para quichihuase tlamantli tlen más fiero. Ayoc
moilhuíaj intla cuali o ax cuali tlen quichihuaj, san
tlajtlacolchijtinemij, huan mojmostla quinequij quichihuase más
tlen ax cuali.
\p
\v 20 Pero quema inquicajque tlen Cristo, ax inmechmachtijque
xijchihuaca tlamantli tlen fiero.
\v 21 Ama inquicactoquejya tlen ya huan inquimatij nopa tlen
xitlahuac tlen inmechmachtijtoque tlen ya,
\v 22 huan inquitlahuelcajque imonemilis tlen achtohui quema
intlacajcayahuayayaj huan inquichijtinemiyayaj tlamantli tlen fiero
tlen quinequiyaya imotlacayo xijchihuaca.
\v 23 Ama inquipiyaj tlen yancuic imopani para quiyancuilis
imotlalnamiquilis huan imoyolo para xijtlapejpenica para
inquichihuase tlen cuali.
\v 24 Huajca monequi inquinextise imonemilis tlen yancuic pampa
Toteco inmechchijtoc se yancuic tlacatl tlen eltoc queja ya.
Xijpiyaca imonemilis yancuic pampa Toteco inmechchijtoc se yancuic
tlacatl tlen eltoc queja ya. Huan ama huelis inquichijtinemise tlen
xitlahuac huan tlen tlatzejtzeloltic.
\p
\v 25 Huajca ayoc ximoistlacahuica. Sesen imojuanti xiquinilhuica
sequinoc tlen melahuac pampa sesen tojuanti tiitztoque queja
tipartes ipan san se totlacayo ipan Cristo.
\p
\v 26 Intla incualanij, amo xitlajtlacolchihuaca. Nimantzi
ximoyoltlalica quema aya calaqui tonati.
\v 27 Amo xijcahuilica Axcualtlacatl ma calaqui huan ma inmechnotza
xitlajtlacolchihuaca.
\p
\v 28 Imojuanti tlen intlaxtequiyayaj, ayoc xitlaxtequica. Monequi
xitequitica. Monequi xijchihuaca tlamantli tlen cuali ica imoma para
inquipiyase tlen ica inpanose huan para nojquiya huelis
inquinpalehuise sequinoc tlen quinpolohua tlen ica panose.
\p
\v 29 Amo tlen hueli xicamatica. San xiquijtoca tlamantli tlen cuali
tlen quinyolchicahuas huan quinhualiquilis tlatiochihuali tlen
quicaquise.
\v 30 Amo xijchihuaca tlen quicuesolmacas Itonal Toteco tlen
tlatzejtzeloltic. Pampa yajaya Itonal Toteco tlen inmechtlalilijtoc
imachiyo Toteco tlen quinextía iniaxcahua huan para temachtli
Toteco inmechhuicas elhuicac quema ajsis tonal.
\p
\v 31 Ayoc ximoyolcuitlamacaca. Ayoc ximochihuaca inyolquentzitzi.
Ayoc xicualanica. Ayoc xicualancatlahuejchihuaca. Ayoc
xitetlaijilhuica. Ayoc xitecocolica.
\v 32 Más cuali ximochihuilica tlen cuali se ica seyoc.
Ximotlasojtlaca huan ximotlapojpolhuica se ica seyoc queja Toteco
inmechtlapojpolhuijtoc ipan Cristo.
\c 5
\s Quejatza monequi tinejnemise
\p
\v 1 Imojuanti iniconehua Toteco, huajca xijchihuaca queja yajaya
quichihua.
\v 2 Mojmostla xiquinicnelica tlacame queja Cristo techicnelía
hasta motemactili para miquis para techtlajtlacolquixtis. Quena,
yajaya mochijqui nopa tlacajcahualistli tlen Toteco quiseli pampa
tlahuel quipacti.
\p
\v 3 Pero imojuanti tlen initlatzejtzeloltijca tlacajhua Toteco, ax
quinamiqui xijchihuaca tlen ax cuali. Amo xijnequica para
inmoaxcatise más tlamantli mojmostla. Amo quema xijchihuaca
tlamantli ica se tlen ax monamic. Ma amo quema xijchihuaca nopa
tlamantli tlajtlacoli.
\v 4 Amo xiquijtoca tlajtoli tlen fiero. Amo xiahuilcamatica, niyon
amo xiquijtoca tlen quinpinahualtía sequinoc pampa ax quinamiqui
para imojuanti. Pero xijtlascamatica Toteco para nochi nopa cuali
tlamantli tlen inmechchihuilijtoc.
\v 5 Ya inquimatij para ax huelis calaquis campa Cristo huan campa
Toteco tlanahuatía se tlacatl tlen quichijtinemi tlen ax cuali, o
tlen quichijtinemi tlen hueli ica tlen ax inamic, o tlen quinequi
más tlamantli mojmostla. Pampa se tlen tlahuel quinequi moaxcatis
más tlamantli, itztoc san se queja se tlen quinhueyichihua
totiotzitzi.
\v 6 Ma axaca inmechcajcayahuas huan inmechilhuis para ax tleno
imopantis intla inquichihuase ni tlajtlacoli, pampa Toteco chicahuac
quintlatzacuiltis inijuanti tlen ax quitlepanitaj.
\v 7 Huajca ximoiyocatlalica tlen ax cuajcualme huan ax quema
xitlajtlacolchihuaca ininhuaya.
\p
\v 8 Achtohuiya initztoyaj ipan tzintlayohuilotl, pero ama pampa
inmotlatzquilijtoque ipan Tohueyiteco, initztoque ipan tlahuili,
huajca xijchijtinemica tlen cuali para ma nesi innejnemij ipan
tlahuili.
\v 9 Quema Toteco quitlahuilía itlalnamiquilis se tlacatl, yajaya
itztoc cuali, nejnemi xitlahuac, huan quiijtohua tlen melahuac.
\v 10 Huajca xijchijtinemica campeca para inquimachilise tlen
quipactía Toteco.
\v 11 Ximoiyocatlalica tlen nochi nopa tlamantli tlen sequinoc
quichihuaj ipan tzintlayohuilotl pampa nopa tlamantli ax quisase
cuali para imojuanti. Pero quena, xiquintlalnamictica tlen queja
nopa quichihuaj huan xiquinyacanaca campa tlahuili.
\v 12 Se pinahualistli para ticamatise tlen nopa fiero tlamantli
tlen sequin quichihuaj campa axaca quinita.
\v 13 Pero quema se tlahuili quintlahuilíaj, tlanemijya quinextía
para fiero tlen quichihua pampa tlahuili quinextía nochi.
\v 14 Yeca nopa tlajtoli quiijtohua:
\q “Xiijita ta tlen ticochtoc.
\q Xiquincajtehua tlen itztoque queja mijcatzitzi pampa san
tlajtlacolchijtinemij.
\q Quena, xiisa huan Cristo mitztlahuilis.”
\p
\v 15 Huajca ximomocuitlahuica queja inmonejnemiltíaj. Amo xinemica
queja inijuanti tlen huihuitique. Xinemica queja tlalnamiquini pampa
inquiixmatij tlen melahuac.
\v 16 Amo ximotonalpoloca, pero mojmostla xitequitica para Toteco
pampa ipan ni tonali tlacame quichihuaj miyac tlamantli tlen fiero.
\v 17 Huajca amo ximohuihuinequica. Ximotlalnamictica huan
xijchihuaca campeca para inquimachilise tlen Toteco quinequi
xijchihuaca.
\v 18 Amo ximoihuintica ica tlaili pampa ya nopa quicuapolos
imonemilis, pero xijcahuilica Itonal Toteco ma inmechyacantinemi ica
ichicahualis.
\v 19 Huajca queja nopa inmocamahuise se ica seyoc nopa cuajcuali
tlajtoli tlen ijcuilijtoc ipan Salmos, huan ica tiohuicatl huan
huicatl tlen quisa ipan imoyolo. Quena, inhuicase huan
inquipaquilismacase Toteco ica nochi imoyolo.
\v 20 Huan nochipa xijtlascamatica Toteco Totata ipan itoca
Tohueyiteco Jesucristo para nochi tlamantli tlen inmechpanotihuala.
\s Quejatza ma monejnemilti se familia
\p
\v 21 Nojquiya para monextis inquitlepanitaj Cristo, monequi nochi
imojuanti xiquincahuilica sequinoc ma quipiyaca tlanahuatili ica
imojuanti huan monequi inijuanti nojquiya ma inmechcahuilica
imojuanti inquipiyase tlanahuatili ica inijuanti.
\p
\v 22 Xijtlacaquilica insihuame tlen inquipiyaj imohuehue.
Xijcahuili mohuehue ma quipiya tlanahuatili ica ta queja nochi
tojuanti monequi ma tijcahuilica Tohueyiteco ma quipiya tlanahuatili
ica tojuanti.
\v 23 Pampa se tlacatl quipiya tlanahuatili ica isihua queja Cristo
quipiya tlanahuatili ica itiopa, quinequi quiijtos nochi tojuanti
tlen tijneltocaj. Huan Cristo motemactili para elis totemaquixtijca.
\v 24 Yeca queja tojuanti tlen tiitiopaj Cristo tijcahuilíaj ma
quipiya tlanahuatili ica tojuanti, nojquiya sihuame monequi
quicahuilise ininhuehue ma quipiya tlanahuatili ica inijuanti ipan
nochi tlamantli.
\p
\v 25 Xitlacaquica intlacame tlen inquipiyaj imosihua. Xiquicneli
mosihua queja Cristo quiicnelijtoc itiopa huan mijqui para
quimaquixtis.
\v 26 Quena, yajaya mijqui para quitlatzejtzelolchihuas itiopa huan
quitlapajpacchihuas ica nopa atl tlen itlajtol Toteco.
\v 27 Huan quinequi itiopa tlen tlaneltocani tlen ax moita huan tlen
yajaya quicualtlalía para ya iselti, ma eli onpano cuajcualtzi ipan
nopa tonal quema moquetzas iixpa. Quinequi sesen tlacatl ipan itiopa
ma eli nelía tlapajpactic huan ax quipiyase niyon se itlajtlacol, o
niyon se tlamantli tlen ax melahuac. Quinequi sesen ipan itiopa ma
eli tlatzejtzeloltic huan para axaca huelis techteilhuis ica niyon
se tlamantli.
\v 28 Huajca queja nopa nojquiya monequi se tlacatl quiicnelis
isihua queja moicnelía. Yajaya tlen quiicnelía isihua, moicnelía.
\v 29 Pampa axaca quitlahuelcahua itlacayo. Nochi tlacame
quitlamacaj inintlacayo huan quimocuitlahuíaj ica teicnelijcayotl.
Huajca queja tijmocuitlahuíaj totlacayo huan queja Cristo
quimocuitlahuía itiopa, queja nopa xijmocuitlahui mosihua.
\v 30 Huan tojuanti tlen tijneltocaj tiitztoque queja tipartes ipan
itlacayo. Quena, tiitztoque queja tiinacayo huan tiiomiyo.
\v 31 Huajca queja quiijtohua Itlajtol Toteco: “Quema se tlacatl
mosihuajtis, quicajtehuas itata huan inana huan motlatzquilis ica
isihua huan nopa ome mochihuase queja eltosquía san setzi
inintlacayo.”
\v 32 Ya ni achi quentzi ohui para inquimachilise, pero ya ni
technextilía quejatza Cristo mohuica ihuaya itiopa tlen mochijtoc
ica nochi tlaneltocani.
\v 33 Huajca sampa nimechilhuía, sesen tlacatl ma quiicneli isihua
queja moicnelía, huan se sihuatl monequi quitlepanitas ihuehue.
\c 6
\p
\v 1 Xitlacaquica inconeme tlen inquineltocaj Tohueyiteco.
Xijchihuaca tlen imotata huan imonana inmechilhuíaj pampa ya nopa
tlen xitlahuac.
\v 2 Xiquintlepanitaca imotata huan imonana pampa ya ni nopa
achtohui tlanahuatili tlen techtencahuilía tlen cuali Toteco
techmacas intla tijchihuase.
\v 3 Quena, intla tiquintlepanitase tonana huan totata,
techtencahuilijtoc para tijpiyase se tonemilis tlen cuali huan
tiitztose miyac xihuitl ipan ni tlaltepactli.
\p
\v 4 Huan intetatme, xitlacaquica. Amo xiquincualancamacaca
imoconehua. Xiquiniscaltica cuali. Xiquintlalnamictica ica
teicnelijcayotl huan xiquinmachtica tlen Tohueyiteco quinequi ma
quimatica.
\p
\v 5 Xitlacaquica intlatequipanohuani tlen imoteco inmechcojtoc.
Xijchihuaca tlen inmechilhuíaj imotecohua nicani ipan ni
tlaltepactli. Xiquintlepanitaca huan xiquinmahuilica para ax
inquichihuase tlen ax quinpactía. Xiquinchihuilica se cuali tequitl
queja inquitequipanosquíaj Cristo.
\p
\v 6 Amo xitequitica cuali san quema imopatron inmechtlachilijtoc
queja sequinoc quichihuaj tlen quinequij ma quincualitaca tlacame.
Monequi nochipa xitequitica cuali pampa initequipanojcahua Cristo.
Huajca ica nochi imoyolo xitequitica queja inquimatij quipactía
Toteco Dios.
\v 7 Xitequitica ica paquilistli queja inquitequipanosquíaj
Tohueyiteco. Amo ximoilhuica intla san inquintequipanohuaj tlacame.
\v 8 Xiquilnamiquica para yajaya Toteco Dios techtlaxtlahuis quema
tijchihuaj tlen cuali ipan ni tlaltepactli yonque titequipanohuani
tlen tiiaxcahua se tecojtli o tiitztoque timajcajtoque huan hueli
tiyohuij campa tijnequij.
\p
\v 9 Huan nojquiya xitlacaquica intecojme tlen inquincojtoque
imotlatequipanojcahua. Xiquinchihuilica imotequipanojcahua tlen
cuali. Ayoc xiquintemajmatica. Xiquilnamiquica imojuanti huan
inijuanti initztoque initlatequipanojcahua Tohueyiteco tlen itztoc
nepa elhuicac huan yajaya ax techchicoicnelía. San se techicnelía
nochi tojuanti.
\s Quejatza Toteco techcualtlalijtoc
\p
\v 10 Amantzi para nijtlamiltis ni amatlajcuiloli, ya ni
nimechilhuía. Nochi imojuanti, innoicnihua, xielica intetique ica
nopa chicahualistli tlen Toteco inmechmacatoc.
\v 11 Ma tijtequihuica tlen Toteco techmacatoc para ica
timomanahuise huan para tijtlanise Axcualtlacatl pampa yajaya san
mosenilhuijtoc quejatza huelis techcajcayahuas.
\v 12 Pampa tojuanti ax timotehuíaj ininhuaya tlacame queja
tojuanti tlen quipiyaj inieso huan ininnacayo. Timotehuíaj
ininhuaya ajacame tlen ax quipiyaj inintlacayo, pero quipiyaj
inintequi ipan ni tlaltepactli campa onca tzintlayohuilotl. Sequin
motocajtíaj tlen quipiyaj tlanahuatili, sequin tlen quipiyaj
chicahualistli, huan sequin tlen quipiyaj tequihuejcayotl. Ni
ajacame itztoque campa hueli ajacatipa huan quinnotzaj tlacame ma
quichihuaca tlen ax cuali. Ica inijuanti, quena, tijpiyaj
tlatehuilistli.
\v 13 Yeca queja se soldado mocualtlalis para tlatehuilistli,
monequi imojuanti xijtequihuica sesen tlamantli tlen Toteco
inmechmacatoc para ica inmomanahuise. Quej nopa ax tleno huelis
inmechchihuilise nopa ajacame quema hualase inmechtehuiquij pampa
inmoquetztose ica chicahualistli iniixpa.
\v 14 Huan quej ni inmoquetzase intemachme. Xiquijtoca san tlen
melahuac mojmostla huan ya nopa inmechcualtlalijtos queja se soldado
tlen cuali quitetzilohua itlajcoilpica. Xijchihuaca san tlen
xitlahuac mojmostla huan inmocualtlalijtose queja se soldado tlen
motlalilía se tepostli para moyolixtzacuas.
\v 15 Queja se soldado cuali quiijilpía izapato para hueli
moquetzas ica temachili, monequi xijpiyaca nopa tlasehuilistli ipan
imoyolo tlen temaca nopa cuali tlajtoli tlen Toteco.
\v 16 Huan ipan nochi tlatehuilistli tlen tijpiya ica Axcualtlacatl,
monequi ximotemachica ipan Toteco. Quena, queja itepostzajca se
soldado quisehuía nopa lemenca cuatlamintli tlen icualancaitaca
quimajcahuilía, imotlaneltoquilis quiquetzas nochi ilemenca
cuatlamintli tlen Axcualtlacatl inmechmajcahuilis.
\v 17 Xijmatica para temachtli Toteco inmechmaquixtijtoc tlen
imotlajtlacolhua huan nopa tlalnamiquilistli quimocuitlahuis
imotzonteco queja se soldado tlen motlalilía itepostzontzajca. Huan
para inquitehuise Axcualtlacatl, xijtequihuica Itlajtol Toteco tlen
eltoc queja se machete tlen Itonal Toteco techmacatoc.
\v 18 Ajachica huan quema pano tlen hueli tlamantli, ximomaijtoca
ica Toteco ica itlapalehuil Toteco. Xitlachixtoca huan amo
xijcahuaca ximomaijtoca. Quena, queja se soldado tlen
tlamocuitlahuía, xitlachixtoca. Huan nochipa xijtlajtlanica Toteco
ma quintiochihua nochi itlatzejtzeloltijca tlacajhua.
\p
\v 19 Nojquiya ximomaijtoca nopampa na. Xijtlajtlanica Toteco ma
nechmaca nopa tlajtoli tlen quinamiqui huan para ma nimoneltlali
niquinilhuis tlacame nochi itlalnamiquilis Toteco tlen axaca
quimatiyaya. Quena, ma nimoneltlali niteilhuis quejatza Cristo
nojquiya quintlajtlacolquixtis tlacame tlen ax israelitame san se
ica tojuanti tlen tiisraelitame yonque achtohui ax tijmachiliyayaj
ya ni.
\v 20 Yeca nitzactoc huan niilpitoc ica tepos cadenas pampa Toteco
nechtequimacatoc niitlatitlanca huan nimoneltlaliyaya para
niquinilhuis tlacame ni tlajtoli queja monequi nijchihuas.
\s Pablo quinnahuatijtejqui nopa tlaneltocani
\p
\v 21 Tíquico, toicni tlen tiquicnelíaj yas inmechilhuiti tlen
nechpanotihuala huan tlen nijchihua. Yajaya temachtli nechpalehuía
ipan itequi Toteco.
\v 22 Yeca nimechtitlanilijtoc san para xijmatica tlen tojuanti huan
para yajaya ma inmechyolchicahua.
\p
\v 23 Toicnihua, ma Toteco Totata huan Toteco Jesucristo inmechmaca
tlasehuilistli ipan imoyolo. Ma inmechpalehui ximoicnelica se ica
seyoc huan más ximotemachica ipan ya.
\v 24 Ma Toteco quipiya hueyi iyolo ica nochi imojuanti tlen
inquiicnelíaj Toteco Jesucristo ica se tlaicnelijcayotl tlen ax
quema mopatla. Quej nopa ma eli.