\id PHP
\h FILIPENSES
\mt Nopa Amatlajcuiloli tlen Pablo Quintlajcuilhui Tlaneltocani ipan Altepetl Filipos
\c 1
\s Pablo ipan tlatzactli quintlajcuilhui tlaneltocani ipan Filipos
\p
\v 1 Na niPablo huan Timoteo tlen itztoc nohuaya, tojuanti tiitequipanojcahua Cristo Jesús tlen techcojtoc para ma tielica tiiaxcahua. Timechtlajcuilhuilíaj nochi imojuanti intlatzejtzeloltijca tlacajhua Toteco nepa ipan altepetl Filipos tlen yajaya inmechtlatzquiltijtoc ipan Jesucristo. Nimechtlajcuilhuía nochi imojuanti ininhuaya imotlayacancahua huan imotlapalehuijcahua ipan tlasentilistli.
\v 2 Toteco Totata huan Toteco Jesucristo ma quipiyaca hueyi ininyolo ica imojuanti, huan ma inmechmacaca tlasehuilistli ipan imoyolo.
\s Pablo momaijto ipampa nopa tlaneltocani
\p
\v 3 Nochipa quema nimechilnamiqui, nijtlascamati Toteco imopampa.
\v 4 Huan nochipa ninelpaqui quema nimomaijtohua ica Toteco imopampa,
\v 5 pampa hasta quema achtohui inquineltocaque Toteco huan hasta ama intepohuilijtoque tlen Cristo huan innechpalehuijtoque para ma momoyahua itlajtol.
\v 6 Huan temachtli nijmati ya ni. Nopa cuali tequitl tlen Toteco quipehualtijtoc ipan imoyolo quema inquineltocaque, quisenhuiquilis quicualtlalijtiyas mojmostla hasta quitlamiltis ipan nopa tonal quema Jesucristo hualas.
\v 7 Cuali para nimoilhuía quej ni tlen imojuanti pampa nelía nimechhuica ipan noyolo. Hueyi iyolo Toteco ica nochi tojuanti huan san sejco techtiochijtoc miyac. Huan yonque niitztoc ipan tlatzactli, o nimonextía iniixpa tequihuejme para nijmanahuis itlajtol Toteco, o san niteilhuía itlajtol, innechpalehuijtihualahuij ipan nochi tlamantli.
\v 8 Toteco quimati nelía miyac nimechicnelía ica nochi nopa teicnelijcayotl tlen Jesucristo nechmacatoc.
\v 9 Quema nimomaijtohua, nijtlajtlanía Toteco para noja más xiquinicnelica sequinoc, huan para noja más xijmatica tlen ya, huan xijpiyaca nelía cuali imotlalnamiquilis.
\v 10 Nijnequi xijmatica quejatza inquitlapejpenise tlen nelía cuali para initztose senquistoc intlapajpactique. Huan queja nopa axaca huelis inmechteilhuis ama, niyon quema Cristo sampa mocuepas.
\v 11 Nochipa xijchihuaca tlen cuali huan tlen xitlahuac iixpa Toteco. Huan quema tlacame quiitase nochi nopa cuali tlamantli tlen Jesucristo inmechpalehuía xijchihuaca, quihueyimatise huan quipaquilismacase Toteco.
\s Pablo noja quinejqui quitequipanos Cristo
\p
\v 12 Noicnihua, nijnequi xijmatica para nochi ni tlaijiyohuilistli tlen nechpanotihualajtoc quipalehuijtoc para más ma momoyahua itlajtol Toteco.
\v 13 Ama nochi tlen itztoque nicani quimatij nitzactoc san pampa nijneltoca Cristo. Huan hasta nojquiya quimatij nochi nopa soldados tlen quimocuitlahuíaj nopa hueyi cali campa itztoc nopa hueyi tlanahuatijquetl.
\v 14 Huan pampa nitzactoc, miyac tlaneltocani ayoc majmahuij huan achi más mosemacatoque ipan Toteco, huan yeca ama más moneltlalíaj para quinilhuise sequinoc itlajtol.
\p
\v 15 Sequin nelía quincamahuíaj tlacame itlajtol Toteco pampa nechcocolíaj huan quinequij mohueyimatise ica tlen quichihuaj, pero sequinoc quincamahuíaj tlacame tlen Cristo ica ininyolo cuali iixpa Toteco.
\v 16 Inijuanti tlen nechcocolíaj tecamahuíaj itlajtol Toteco para tlacame ma quintlepanitaca. Ax quichihuaj nelía para Toteco. Huan moilhuíaj más nechyolcocose pampa nitzactoc quema nijmatis tlen quichihuaj.
\v 17 Pero nopa sequinoc tlacame, quena, tecamahuíaj itlajtol Toteco pampa nechicnelíaj. Huan inijuanti quimatij Toteco nechtequitlalijtoc nicani para nijmanahuis itlajtol iniixpa tequihuejme.
\v 18 Pero ax quenijqui. Yonque sequin teilhuíaj itlajtol ica nochi ininyolo huan sequinoc ax cuali ininyolo, noja nipaqui pampa miyac tlacame quinilhuíaj sequinoc tlen Cristo. Huan noja más nipaquis,
\v 19 pampa nijmati nochi quisas cuali para na huan se tonal nechmanahuise pampa inquitlajtlaníaj Toteco nopampa na huan Itonal Jesucristo nechpalehuía mojmostla.
\v 20 Ax quema nijnequi nijchihuas se tlamantli tlen ica nimopinahuas iixpa. Ya nopa tlen nijchiya. San nijnequi nimoneltlalis para Cristo para tlacame ma quiitaca ihueyitilis ipan nonemilis yonque niitztos para más tonali o yonque nechmictise.
\v 21 Pampa intla niitztos, niitztos para nijtequipanos Cristo. Huan intla nimiquis, nijtlanis nelía miyac, pampa niitztoti ihuaya Cristo para nochipa.
\v 22 Pero intla noja niitztos, huajca noja más nitequitis para Toteco huan más tlacame quineltocase Cristo. Yeca nelía ax nijmati tlaque nijtlapejpenis. Ax nijmati intla nijnequi niitztos o nijnequi nimiquis.
\v 23 Ohui para nijmatis tlen más cuali. Quemantzi nimoilhuía huelis achi más cuali para niitztos. Huan quemantzi nimoilhuía achi cuali para nimiquis huan niyas niitztoti ihuaya Cristo pampa ya nopa tlen más cuali para na.
\v 24 Pero para imojuanti quisas más cuali intla noja niitztos.
\v 25 Huajca nimoilhuía para noja niitztos para nimechpalehuis inmoscaltise ipan Toteco huan más inpactose pampa cuali inquineltocaj.
\v 26 Intla niitztos, huajca quema nimechpaxaloti, sampa inquitlascamatise Cristo Jesús pampa quichijtoc para ma nechchololtica tlen ni tlatzactli huan sampa niitztos imohuaya.
\p
\v 27 Pero yonque tlen hueli tlen ni ome tlamantli nopantis, tlen más ipati elis para ximonejnemiltica nelía cuali queja tlen quiijtohua itlajtol Toteco. Quej nopa yonque noja niyas nepa campa imojuanti o axtle, nijcaquis quejatza initztoque intemachme ipan Toteco, huan inquipiyaj san se imoyolo, huan chicahuac intequitij para tlacame ma quineltocaca itlajtol Toteco.
\v 28 Niyon quentzi amo xiquinimacasica tlen inmechcocolíaj. Huan quema noja más inmoneltlalise para Toteco, ya nopa elis se tlanescayotl tlen quinnextilis para Toteco inmechmaquixtijtoc imojuanti huan para inijuanti nelía polihuise.
\v 29 Pampa Toteco ax san inmechmacatoc nopa paquilistli para xijneltocaca Cristo, nojquiya inmechmacatoc nopa paquilistli xitlaijiyohuica pampa iniaxcahua.
\v 30 Tojuanti tiitztoque san sejco ipan ni hueyi tlatehuijcayotl ica tlen ax cuali. Innechitztoque quema nitlaijiyohuiyaya achtohuiya huan inquimatij hasta ama noja nitlaijiyohuía.
\c 2
\s Jesús tlen hueyi, moicnonejqui
\p
\v 1 Ya inquimatij para Toteco inmechicnelía huan
inmechtlatzquiltijtoc ipan Cristo, huan inquimatij quejatza ya nopa
inmechyolchicahua huan inmechyoltlalía. Inquimatij Itonal Toteco
itztoc imohuaya huan inmechchihuilía ximoicnelica huan
ximotlasojtlaca.
\v 2 Huajca xijchihuaca tlen nechmacas hueyi paquilistli huan
xijpiyaca san se imotlalnamiquilis. Nochi imojuanti ximoicnelica
miyac huan xitequitica san sejco queja inelisquíaj san se tlacatl
ica san se imoyolo.
\v 3 Axaca ma quichihua se tlamantli pampa quinequi mohueyimatis
iniixpa sequinoc. Ma axaca mohueyimati, pero ximoicnonequica. Sesen
imojuanti xiquinitaca nochi sequinoc queja más huejhueyi que ta.
\v 4 Amo san ximoilhuica tlen tlamantli tlen inmechpalehuis.
Nojquiya ximoilhuica tlen quinpalehuis sequinoc.
\p
\v 5 Ximoyolilhuica queja Cristo Jesús moilhuía:
\q
\v 6 Yonque yajaya Dios huan hueltosquía mocajtosquía campa ipa
itztoya ihuaya Toteco Dios,
\q ax moilhui para monequi mocahuas nopona ica nopa hueyi
tlanahuatili tlen quipixtoya.
\q
\v 7 Moilhui achi cuali quicahuas nochi tlen eliyaya iaxca,
\q huan huajca mochijqui queja se tlen ax quipixqui niyon quentzi
tlanahuatili.
\q Moicnonejqui huan mochijqui se tlacatl,
\q quena, mochijqui queja se tlatequipanojquetl.
\q
\v 8 Huan quema ya itztoya se tlacatl,
\q más moicnonejqui para senquistoc quichihuas tlen iTata
quinequiyaya.
\q Quena, motemacac para miquis ipan se cuamapeli,
\q nopa miquistli tlen más quipiya pinahualistli.
\q
\v 9 Huan pampa moicnonejqui teipa Toteco quihueyitlali nepa
elhuicac,
\q huan quichijqui más hueyi que nochi sequinoc pampa quimacatoc
nopa tlanahuatili tlen más hueyi.
\q
\v 10 Huan Toteco quichijqui ni para ma motlancuaquetzaca iixpa
Jesús nochi tlen itztoque ipan elhuicac, nochi ipan tlaltepactli
huan nochi tlen itztoque ipan mictla pampa momacase cuenta para yaja
tlen más hueyi.
\q
\v 11 Huan nochi tlacame tlen camatij nochi tlamantli tlajtoli
quiijtose tlamiyacapa para Jesucristo, yajaya Dios Tohueyiteco, huan
ica ya ni quinextise ihueyitilis Toteco Totata.
\s Tlaneltocani itztoque queja se tlahuili
\p
\v 12 Noicnihua tlen nimechicnelía, nochipa inquichijtihualajtoque
tlen nimechilhuijtoc quema niitztoya imohuaya. Huajca ama, quema ax
niaqui, achi más xinechcaquica. Xijchijtinemica tlen xitlahuac
queja quinamiqui para ma mopannextis ipan imojuanti para Toteco
nelía inmechmaquixtijtoc tlen imotlajtlacolhua. Xiitztoca queja
tlacame tlen huihuipicaj pampa tlahuel quiimacasij quiixpanose
Toteco Dios.
\v 13 Pampa yajaya Toteco tlen tequiti ipan imoyolo huan
inmechchihua xijnequica xijchihuaca ipaquilis, huan yajaya
inmechmacas chicahualistli para inquichihuase.
\p
\v 14 Ica nochi tlen inquichihuaj ximomocuitlahuica para amo
ximotlaijilhuica, niyon amo ximonajnanquilica.
\v 15 Huan quej nopa axaca huelis inmechteilhuis ica niyon se
imotlajtlacol. Xijpiyaca se yolistli tlen tlapajpactic queja
quinamiqui pampa imojuanti iniconehua Toteco. Xiitztoca queja
tlahuili ipan ni tlaltepactli campa senquistoc onca
tzintlayohuilotl. Quena, yonque initztoque ininhuaya miyac tlacame
tlen tlahuel fiero inintlalnamiquilis huan tlen onpano quinpactía
tlajtlacolchihuase ma cahuani imotlahuil.
\v 16 Huan mojmostla ximotlatzquilijtoca cuali ipan itlajtol Toteco
tlen temaca yolistli yancuic, huan queja nopa ipan nopa tonal quema
Cristo mocuepas, tlahuel miyac nipaquis ica nochi tlen
inquichijtoque, huan nijmatis para ax san tlapic elqui notequi quema
niyajqui nimechilhuito itlajtol Toteco.
\v 17 Imotlaneltoquilis eltoc queja se tlacajcahualistli tlen
inquimacaj Toteco huan intla nimiquis, nonemilis elis queja se
tlacajcahualistli para Toteco. Huajca yonque tlen hueli nopantis,
nipaquis huan nijnequi xipaquica nohuaya.
\v 18 Xipaquica nohuaya intla monequi nimiquis pampa nijtoquilía
Cristo.
\s Epafrodito huan teipa Timoteo yase altepetl Filipos
\p
\v 19 Intla ipaquilis Tohueyiteco Jesús, nijnequi para ax
huejcahuas nijtitlanis Timoteo ma inmechitati. Huan quema mocuepas
nicani, nijpiyas paquilistli pampa nechpohuilis quejatza initztoque.
\v 20 Pampa axaca seyoc quipiya se iyolo queja Timoteo. Yajaya,
queja na, motequipachohua imopampa para xinejnemica cuali.
\v 21 Nochi sequinoc tlen itztoque nicani san moilhuíaj tlen cuali
para inijuanti. Ax moilhuíaj quejatza huelis quipalehuise itequi
Cristo Jesús.
\v 22 Imojuanti ya inquiixmatij inemilis Timoteo pampa queja se
oquichpil tlen ica paquilistli quipalehuía itata, yajaya
nechpalehuijtoc para niquinilhuía tlacame itlajtol Toteco.
\v 23 Huajca nijnequi nijtitlanis para ma inmechitati. San achtohui
monequi nijmatis tlaque nopantis nicani.
\v 24 Huan nimotemachía ipan Toteco para ax huejcahuas na nojquiya
niyas nimechitati.
\p
\v 25 Pero para amantzi, nimoilhuía más cuali sampa
nimechtitlanilis toicni Epafrodito tlen innechtitlanilijque para ma
nechhualiquili tlen inquisentilijque para ica nimopanoltis ipan
itequi Toteco. Huan nojquiya tequitico nohuaya ipan itequi Toteco,
pampa nechpalehuía. Pampa nechpalehuía ipan nopa tlatehuijcayotl
tlen tijpiyaj ica tlen ax cuali.
\v 26 Pero ama yajaya tlahuel quinequi mocuepas campa imojuanti
pampa tlahuel mocuesohua pampa inquicajque para mococohuayaya.
\v 27 Huan nelía mococohuayaya hasta mictinemiyaya. Pero Toteco
quitlasojtlac huan nojquiya nechtlasojtlac na huan yajaya
mochicajqui. Pampa intla mictosquía, nijpiyasquía noja más
cuesoli tlen nijpiya amantzi.
\v 28 Yeca achi más nimoisihuiltía nimechtitlanilis para inpaquise
quema sampa inquiitase, huan ica ya nopa na nojquiya nipaquis.
\v 29 Huajca xijselica Epafrodito ica cuali ipan Toteco huan ica
miyac paquilistli. Nochipa xiquintlepanitaca nochi tlaneltocani tlen
monejnemiltíaj xitlahuac queja ya.
\v 30 Quena, mictoyaya pampa quichihuayaya itequi Cristo huan ica
quentzi mictoyaya pampa nechchihuiliyaya nopa tequitl tlen ax
inhuelque innechchihuilijque pampa initztoyaj huejca.
\c 3
\s Se toyolo tlen xitlahuac iixpa Toteco
\p
\v 1 Huan ama, noicnihua, xijpiyaca paquilistli ipan Tohueyiteco.
Para na ax ya se tequitl para sampa nimechilhuis tlen ya
nimechilhuijtoc, huan cuali para imojuanti intla sampa nimechilhuis.
\v 2 Xitlachixtoca ica nopa ax cuajcualme tlen mosisiníaj queja
chichime huan quinpactía motequilise inintlacayo. Ax melahuac
inintlajtol. Tlamachtíaj para nochi tlacame monequi ma motequilica
nopa tlanescayotl tlen itoca circuncisión para huelis momaquixtise
tlen inintlajtlacolhua.
\v 3 Pero nelía eltoc tojuanti tlen tijpiyaj nopa tlanescayotl tlen
itoca circuncisión tlen nelía ipati, pampa tojuanti
tijhueyichihuaj Toteco Dios ica itlapalehuil Itonal Toteco. Tojuanti
ax timotemachíaj ipan tlen se tlacatl quichihuilijtoc totlacayo.
Timotemachíaj ipan Cristo Jesús huan tlen yajaya techchihuilijtoc.
\v 4 Na achi más que sequinoc nihueltosquía nimotemachijtosquía
ipan nopa tlen na niitztoya para nimotlajtlacolquixtilijtosquía
pampa na achi más nijchijtinemiyaya nopa tlamantli tlen israelitame
moilhuíaj temaquixtisquía.
\v 5 Nechtequilijque nopa tlanescayotl tlen itoca circuncisión ipan
notlacayo quema nijpiyayaya chicueyi tonali. Nitlacatqui niisraelita
pampa niiteipa ixhui Benjamín, icone Israel tlen huejcajquiya.
Nicamati hebreo pampa nitlacatqui ipan se familia tlen hebreo
tlacame. Huan teipa quema nimotlacachijqui, nimochijqui se
nifariseo, inijuanti tlen achi más chicahuac quitoquilíaj
itlanahuatil Moisés.
\v 6 Huan pampa tlahuel niquintoquili inintlanahuatilhua nopa
fariseos, nijtlatzacuiltiyaya itiopa Toteco, tlen quiijtosnequi
nochi tlacame tlen quineltocaj Cristo. Huan axaca huelqui
nechteilhuía ica itlanahuatilhua Moisés, pampa nijchijqui nochi
tlen quiijto.
\p
\v 7 Pero nochi nopa tlamantli tlen achtohuiya nimoilhuiyaya para
tlahuel ipati, teipa niquitac para ax tleno ipati quema nijmachili
tlen Cristo nechchihuili.
\v 8 Quena, niquita nochi tlamantli queja ax tleno ipati. Ama san
nijnequi niquixmatis Jesucristo, nohueyiTeco, huan san ya nopa
niquita para hueyi ipati. Huajca ama nijtlahuelcajtoc nochi tlen
nijchihuayaya huan tlen achtohui nieliyaya, huan niquita nochi nopa
tlamantli san queja tlasoli para huelis nijtoquilis Jesucristo,
\v 9 huan nitlatzquitos ipan ya. Ama nijmati para ax niitztoc
xitlahuac iixpa Toteco ipampa tlen nijchihuayaya quema
nijtoquiliyaya nopa tlanahuatili. Pero Toteco nechchijqui
nixitlahuac quema nijneltocac Cristo, pampa Toteco quinchihua
tlacame xitlahuaque iixpa ipampa inintlaneltoquilis ipan Jesucristo.
\v 10 Huajca ama san ya ni nijnequi. Nijnequi niquixmatis Cristo
huan nijmachilis ipan na nopa hueyi chicahualistli ica tlen
moyolcuic. Nijnequi nitlaijiyohuis se quentzi queja yajaya
tlaijiyohui. Nijnequi mojmostla nimotemactilis ica ya yonque monequi
nimiquis ipampa.
\v 11 Quena, huan nochi nijchihua pampa quema nimiquis, nijnequi
nimoyolcuis huan niquisas campa mijcatzitzi.
\s Pablo quinejqui monejnemiltis noja más cuali
\p
\v 12 Ax niquijtohua para nijpiya nonemilis tlen senquistoc cuali,
niyon ax hueli niquijtos para ax onca niyon se notlajtlacol. Pero
mojmostla nijchihua campeca para nijchihuas más tlen cuali para se
tonal nicaxilis nopa tlen Jesús quinequiyaya ma nieli quema ya
nechmaquixti huan nechnotzqui para ma nieli niiaxca.
\v 13 Noicnihua, ax ninemi nelía cuali queja nijnequi ninemis. Pero
ya ni nijchihua: Mojmostla niquilcahua tlen nijchijqui yalhuaya huan
san nimoyolilhuía tlen cuali huelis nijchihuas ama.
\v 14 Mojmostla ica nochi noyolo nijchihua campeca para ninejnemis
nelía cuali. Nijnequi nielis queja se tlatlanquetl tlen motlalohua
hasta itlamiya. Huan yeca quinotzas para yas huejcapa iniixpa nochi
para quiselis tlen quitlantoc. Nijnequi nijselis nopa tlatlancayotl
tlen nechmacas Toteco Dios. Yajaya tlen technotzqui ipan Jesucristo
para ma tiyaca huejcapa hasta elhuicac para tijselise tlen onca para
tojuanti.
\p
\v 15 Nochi intlaneltocani tlen ya intetixtoque ipan Cristo monequi
ximoilhuica queja na huan xijtemoca mojmostla quejatza inhuelise
inmonejnemiltise noja más cuali. Huan intla sequin imojuanti
inmoilhuíaj para ayoc tleno más inmechpolohua para
inmonejnemiltise nelía cuali, huajca Toteco inmechnextilis para aya
inquiaxilíaj pampa aya inquichihuaj nochi tlen senquistoc
xitlahuac.
\v 16 Pero para ama monequi mojmostla ma tinejnemica queja
quiijtohua nochi itlajtol tlen ya tijmajtoque.
\p
\v 17 Noicnihua, nochi imojuanti ximonejnemiltica queja na
nimonejnemiltía. Nojquiya ximomacaca cuenta ajqueya más
monemiltíaj cuali queja tojuanti.
\v 18 Nimechilhuijtoc ya ni miyac huelta huan ama nichoca para sampa
nimechilhuis. Itztoque miyac tlacame tlen quiijtohuaj quitoquilíaj
Cristo, pero ica ininnemilis quinextíaj para quicocolíaj tlen
yajaya quinchihuili quema mijqui ipan cuamapeli.
\v 19 Nopa tlacame polihuise para nochipa. Ax quema moilhuíaj tlen
Toteco. San moilhuíaj tlen quinequij inintlacayo huan sentlacuaj se
tonal. Monequi mopinahuasquíaj ica nochi tlen fiero quichijtoque,
pero inijuanti mohueyimatij. Nopa tlacame san moilhuíaj tlen eltoc
ipan ni tlaltepactli.
\v 20 Pero tojuanti ax tiitztoque queja inijuanti. Tojuanti ayoc
tiehuaj nicani, tojuanti ticomun tlacame nepa elhuicac campa itztoc
Tohueyiteco. Huan ama titlachixtoque para sampa hualas Tohueyiteco
Jesucristo.
\v 21 Huan quema hualas, yajaya techpatilis ni totlacayo tlen
teicneltzi tlen ama titlacame tijpiyaj para elis queja ya itlacayo
tlen yancuic huan tlen eltoc nelía cuali. Huan Jesucristo huelis
techpatilis totlacayo pampa quipiya nopa chicahualistli tlen más
hueyi tlen quimaca tlanahuatili ica nochi tlacame huan nochi tlen
onca.
\c 4
\s Xipactoca nochipa ipan Tohueyiteco
\p
\v 1 Huajca, noicnihua, na nelía nimechicnelía miyac huan ica
nochi noyolo nijnequi nimechitati pampa tlahuel innechmacaj
paquilistli. Para na, imojuanti initztoque queja se corona o se
tlatlancayotl tlen nijtlantoc nepa elhuicac pampa nimechilhui
itlajtol Toteco. Xijsenhuiquilica xiitztoca intemachme ipan Toteco.
Nimechicnelía miyac.
\p
\v 2 Nijnequi niquintlajtlanis nopa sihuame Evodia huan Síntique ma
motlapojpolhuica se ica seyoc huan ma quipiyaca san se
inintlalnamiquilis ipan Jesucristo.
\v 3 Quena, huan nojquiya nimitztlajtlanía ta tlen nelía titequiti
nohuaya para xiquinpalehui nopa sihuame ma moyoltlalica. Inijuanti
tequititoque chicahuac para nechpalehuijque tiquinilhuijque tlacame
itlajtol Toteco. Nojquiya Clemente huan sequinoc toicnihua
quinpalehuijque para teilhuise itlajtol. Nochi inijuanti quipiyaj
inintoca ijcuilijtoc ipan nopa amatl nepa elhuicac campa ijcuilijtoc
nochi tlen quipiyaj yolistli yancuic para nochipa.
\p
\v 4 Nochipa xipactoca ipan Tohueyiteco. Sampa nimechilhuía,
xipactoca.
\v 5 Ma nochi tlacame quiitaca quejatza inquichihuilíaj tlen cuali
aqui hueli tlacatl. Xiquilnamictoca nechcatitoc para sampa hualas
Tohueyiteco.
\p
\v 6 Ayoc ximotequipachoca ica niyon se tlamantli. Más cuali
ximomaijtoca ica Toteco ica nochi tlen inmechpanotihuala.
Xijtlajtlanica ma inmechmaca nochi tlen monequi huan xijtlascamatica
para nochi tlen inmechchihuilijtoc.
\v 7 Intla queja nopa inquichihuaj, Toteco inmechmacas
tlasehuilistli ipan imoyolo tlen tlacame ax huelis quimachilise.
Huan nopa tlasehuilistli quiyahualtzacuas imoyolo huan
imotlalnamiquilis Toteco pampa inmechtlatzquiltijtoc ipan Cristo.
\s Ximoyolilhuica tlen cuali
\p
\v 8 Huan ama noicnihua, xinechtlacaquilica. San ya ni para
nijtlamiltis ni tlajcuiloli. Ipan imotlalnamiquilis, san
ximoyolilhuijtinemica tlen tlamantli tlen melahuac huan tlamantli
tlen nochi quitlepanitaj. Ximoyolilhuica tlen tlamantli tlen
xitlahuac huan tlen tlapajpactic. Ximoyolilhuica nopa tlamantli tlen
yejyectzi huan tlen nochi tlacame quicualitaj. Quena,
ximoyolilhuijtinemica tlen tlamantli tlen tlapalehuía huan tlen
nochi tlacame quicualitaj. Quena, intla inquicaquij tlen hueli
tlamantli tlen nelía cuali huan tlen nochi tlacame
quihueyitlalíaj, san ya ni ximoyolilhuica.
\p
\v 9 Xijsenhuiquilica xijchihuaca nochi nopa tlamantli tlen
nimechmachtijtoc o nimechijcuilhuilijtoc. Quena, nochi tlen
inquicactoque huan inquiitztoque para nijchihua, ya nopa xijchihuaca
huan itztos imohuaya Itonal Toteco Dios tlen temaca paquilistli.
\s Altepetl Filipos ehuani quimacatoyaj tomi Pablo
\p
\v 10 Na nipaqui miyac huan nijtlascamati Toteco pampa sampa
intechilnamijque huan innechtitlanilijque se quentzi tlen ica
nimopanoltis. Nijmati para nochipa inquinectoque innechpalehuise,
pero panoc tonali quema ax inquipixque quejatza innechpalehuíaj.
\v 11 Ax nimechilhuía nimocuesohuayaya pampa nechpolohuayaya tlen
ica nipanos. Pampa nimomatquiya huan nijpiyas paquilistli ica tlen
nipanotihuala.
\v 12 Nipaqui quema nijpiya pilquentzi tlen ica nipanos huan
nojquiya nipaqui quema nijpiya hasta mocahua. Nipaqui quema nimayana
huan quema niixhuitoc. Nipactoc ica miyac o ica quentzi.
\v 13 Nochi nihueli nijchihua ica nopa chicahualistli tlen Cristo
nechmaca.
\v 14 Pero yonque nipaqui ica tlen onca, cuali para
innechpalehuijque ica tlen monequi para nipanos.
\p
\v 15 Imojuanti inquiilnamiquij quema achtohuiya nimechilhui
itlajtol Toteco huan teipa quema niquisqui imotlal para niyajqui
tlali Macedonia huan ipan sequinoc tlaltini, san imojuanti tlen
inehuaj altepetl Filipos, innechpalehuijque, huan yeca inquiselijque
itlatiochihualis Toteco.
\v 16 Hasta quema nimocahuayaya ipan altepetl Tesalónica, ompa o
expa innechtitlanilijque tomi para ica nipanos.
\v 17 Ax nipaqui san pampa innechmacaque tlen ica nipanos, más
nipaqui pampa nijmati Toteco paqui ica nopa cuali tequitl tlen
inquichijtoque. Huan yeca yajaya quitlalis ipan imocuenta huan
inmechtlaxtlahuis huan inmechtiochihuas.
\v 18 Ama ica ni tomi tlen innechtitlanilijque ica Epafrodito,
nijpiya nochi tlen monequi. Nelía nijpiya hasta mocahua. Tlen
innechmacatoque quipactía Toteco queja inquimacatosquíaj se
tlacajcahualistli tlen ajhuiyac mijyotía huan tlejco hasta
elhuicac.
\v 19 Huan ni Toteco tlen nechmocuitlahuía na, inmechmacas
imojuanti nochi tlen inmechpolohua pampa tlahuel miyac iricojyo nepa
ipan elhuicac huan techmacas ipampa tlen Cristo Jesús
techchihuilijtoc.
\v 20 Ma tijhueyichihuaca Toteco Dios yajaya tlen Totata para
nochipa. Quena, ma ax quema tijtlamiltica tijhueyichihuaj. Quej nopa
ma eli.
\s Pablo quinhualtlajpalo
\p
\v 21 Xiquintlajpaloca nochi toicnihua ipan Cristo Jesús, quena,
xiquintlajpaloca nochi iconehua Toteco tlen quiniyocacajtoc para
iaxcahua. Toicnihua tlen itztoque nicani nohuaya
inmechontlajpalohuaj.
\v 22 Huan nochi sequinoc tlen Toteco quiiyocacajtoc ipan ni
altepetl inmechontlajpalohuaj. Huan achi más inmechontlajpalohuaj
tlen iaxcahua Toteco tlen tequitij ipan nopa hueyi cali para nopa
hueyi tlanahuatijquetl, César.
\p
\v 23 Tohueyiteco Jesucristo ma quipiya hueyi iyolo ica imojuanti.
Quej nopa ma eli.