\id COL
\h COLOSENSES
\mt Nopa Amatlajcuiloli tlen Pablo Quintlajcuilhui Tlaneltocani ipan Altepetl Colosas
\c 1
\s Pablo quintlajcuilhui tlaneltocani ipan Colosas
\p
\v 1 Na niPablo. Toteco Dios ica ipaquilis nechtequitlali ma nieli niitlayolmelajca Jesucristo. Na ihuaya toicni Timoteo,
\v 2 timechtlajcuilhuíaj imojuanti tlen initlatzejtzeloltijca tlacajhua Toteco ipan altepetl Colosas, imojuanti tlen temachtli intoicnihua ipan Cristo. Ma Toteco Totata huan Toteco Jesucristo quipiyaca hueyi ininyolo ica imojuanti huan ma inmechmacaca tlasehuilistli ipan imoyolo.
\s Pablo momaijto ininpampa nopa tlaneltocani
\p
\v 3 Nochipa timomaijtohuaj ica Toteco Dios, yajaya tlen iTata Tohueyiteco Jesucristo huan tijtlascamatij imopampa.
\v 4 Tijcactoque quejatza nelía cuali inquineltocatoque Cristo Jesús huan quejatza miyac inquinicnelíaj nochi itlatzejtzeloltijca Toteco.
\v 5 Nijmati inquichihuaj nochi ya ni pampa inquichiyaj inquiselise nopa tlen yejyectzi tlen Toteco quiajcoctoc para inmechmacas nepa elhuicac. Ya nopa inquichixtihualajtoque hasta quema achtohuiya inquicajque itlajtol Toteco tlen melahuac,
\v 6 tlen ajsitoc campa imojuanti. Ama nopa tlajtoli ajsitoc campa hueli ipan tlaltepactli huan moscaltía huan quipixtihuala itlajca pampa más tlacame quineltocatihualajtoque queja panoc ica imojuanti. Quena, moscaltijtiyajtoc itlajtol Toteco campa imojuanti hasta tlen nopa achtohui tonal quema inquicajque huan inquimachilijque para melahuac hueyi iyolo Toteco ica tojuanti.
\v 7 Epafras tlen tiquicnelíaj miyac elqui tlen achtohui yajqui inmechmachtito itlajtol Toteco. Yajaya se itequipanojca Cristo tlen nelía temachtli tlen tijtitlanij campa hueli tiyohuij.
\v 8 Yajaya techilhuijtoc quejatza Itonal Toteco inmechpalehuijtoc para miyac xiquinicnelica sequinoc.
\p
\v 9 Huajca, hasta quema achtohuiya tijcajque tlen imojuanti timomaijtojtoque ica Toteco imopampa huan tijtlajtlanijtoque para xijmatica senquistoc nochi tlen Toteco quinequi quichihuas ipan imonemilis. Tijtlajtlaníaj ma inmechmaca tlalnamiquilistli para cuali xijmachilica nochi tlen Itonal Toteco tenextilía.
\v 10 Quejnopa inquipiyase imonemilis queja quinamiqui quipiyase tlacame tlen iaxcahua Toteco huan inquipactise ipan nochi tlamantli tlen inquichihuase. Huan pampa inquineltocaj, inquinchihuilise sequinoc tlen cuali huan mojmostla más inquiixmajtiyase Toteco.
\v 11 Tijtlajtlaníaj Toteco ica ihueyi chicahualis ma inmechmaca nopa chicahualistli tlen monequi para inquiijiyohuise nochi tlen inmechpanotihuala huan para noja inquipiyase imoyolo ica nochi tlacame.
\v 12 Huan yeca ica paquilistli huelis inquitlascamatise Toteco Totata tlen techcualtlalijtoc nojquiya ma tijselica nopa tlatiochihualistli nepa elhuicac ininhuaya nochi sequinoc tlaneltocani tlen Toteco quiniyocacajtoc para iaxcahua.
\v 13 Pampa Toteco techmalacanijtoc tlen ichicahualis Axcualtlacatl tlen tlanahuatía campa tzintlayohuilotl huan techtlalijtoc campa tlanahuatía Icone, Jesús, tlen yajaya tlahuel quiicnelía.
\v 14 Huan Jesús techcojtoc ica ieso para huelis techmalacanis tlen nopa tlen ax cuali huan techtlapojpolhuijtoc nochi totlajtlacolhua.
\s Toteco temaca tlasehuilistli ipan Jesucristo
\p
\v 15 Cristo tlen tiquitztoque itztoc iixcopinca Toteco Dios tlen axaca hueli quiita. Cristo ipa itztoya hasta quema aya tleno oncayaya tlen tlachijchijhuali. Huan yajaya tlen quipiya tlanahuatili ica nochi tlamantli tlen teipa quichijchijqui.
\v 16 Quena, Toteco quitequimacac Cristo ma quichijchihua nochi tlen onca ipan elhuicac huan nochi ipan tlaltepactli. Quichijchijqui nochi tlamantli tlen hueli tiquitaj huan nojquiya quinchijchijqui nochi tlen ax hueli tiquinitaj queja inijuanti tlen mosehuíaj campa más quipiyaj tequihuejcayotl, huan inijuanti tlen quipiyaj ininhueyitilis. Quinchijqui inijuanti tlen quipiyaj tlanahuatili huan tlen quipiyaj chicahualistli. Nochi tlamantli Tohueyiteco Jesucristo quinchijchijqui huan nochi iaxcahua para ma quichihuaca tlen yajaya quinequi.
\v 17 Cristo ipa itztoya quema aya tleno oncayaya huan nochi tlamantli tlen tlachijchihuali motlatzquilijtoc ica ichicahualis.
\v 18 Queja motzonteco mitzyacana ipan motlacayo, Jesucristo itzonteco itlacayo, quinequi quiijtos itiopa o nochi tojuanti tlen tijneltocaj. Quena, yajaya totlayacanca. Yajaya tlen achtohui moyolcuic tlen nochi mijcatzitzi. Yajaya tlen más hueyi huan tlen quinyacana huan quinnahuatía nochi tlen onca.
\v 19 Toteco Totata ica senquistoc nochi ihueyitilis itztoc ipan Cristo pampa elqui ipaquilis para ma itztoca san se.
\v 20 Toteco quichijtoc para nochi tlen itztoque ipan elhuicac huan ipan tlaltepactli ma moyoltlalise ihuaya ipampa tlen Cristo quichijqui quema mijqui huan quitoyajqui ieso ipan cuamapeli. Huajca ama tlen achtohuiya itztoyaj icualancaitacahua huelis quipiyase tlasehuilistli ica ya.
\p
\v 21 Huajca imojuanti nojquiya tlen achtohuiya inmohuejcatlalijtoyaj tlen Toteco Totata, huan inquicocoliyayaj ipan imotlalnamiquilis huan inquichijtinemiyayaj tlen ax cuali,
\v 22 ama Jesucristo inmechyoltlalijtoc ica ya. Pampa Jesucristo mocuepqui tlacatl huan mijqui ipan cuamapeli para huelis technextis iixpa Toteco titlatzejtzeloltique huan ica niyon se totlajtlacol. Ama axaca huelis techteilhuis iixpa ica niyon se tlamantli.
\v 23 Huajca monequi ma tijneltocatinemise huan ica nochi toyolo ma timocahuaca cuali titlatzquitoque ipan tlen tijneltocaj. Ma ax tijcahuaca nopa tlen netlachiyalistli tlen tijpantijque quema tijneltocaque ni cuali tlajtoli. Ama miyac tlacame tlacamanalohuaj ni tlajtoli campa hueli techaj ipan ni tlaltepactli. Huan Toteco nechchijtoc na, niPablo, niitequipanojca para nojquiya ma nitlacamanalo.
\s Toteco quitequitlalijtoc Pablo para itequipanojca
\p
\v 24 Huan ama nipaqui pampa nitlaijiyohuía se quentzi imopampa. Cristo miyac tlaijiyohui ipampa itlacayo o itiopa, huan na nojquiya ipan notlacayo nijtlamiltía se quentzi nopa tlaijiyohuilistli tlen polihui pampa nijtequipanohua itoca.
\v 25 Huan elqui Toteco tlen techtequitlalijtoc ma nieli niitequipanojca ipan itiopa. Quena, ni tequitl nechmacatoc para nimechpalehuis imojuanti tlen ax israelitame huan nimechyolmelahuas Itlajtol.
\v 26 Quena, monequi niquincamahuis tlacame ni tlajtoli tlen huejcajquiya axaca quimatiyaya pampa Toteco quitlatijtoya, pero ama yajaya technextilijtoc nochi tojuanti tlen techiyocacajtoc para tiiaxcahua.
\v 27 Pampa Toteco quinejqui ma quimatica nochi tlaneltocani nochi nopa cuali tlamantli tlen quinchihuilis tlacame tlen ax inisraelitame. Huan yonque achtohui axaca quimatiyaya, ama Toteco quinequi xijmatica para ama Cristo nojquiya hualitztoc ipan imoyolo imojuanti tlen ax inisraelitame, huan yeca imojuanti nojquiya huelis inquichiyase para inyase elhuicac campa tlayejyejca para inquipiyase se parte ipan ihueyitilis.
\p
\v 28 Yeca campa hueli campa tiyohuij tiquinilhuíaj nochi tlacame tlen Cristo huan tiquintlalnamictíaj huan tiquinmachtíaj ica nochi nopa tlalnamiquilistli tlen Toteco techmacatoc. Tijnequij nochi tlacame ma elica senquistoc cuajcualme ipan Cristo ipan nopa tonal quema tiquinnextise iixpa Toteco.
\v 29 Yeca nitequiti chicahuac ica nochi nopa chicahualistli tlen Cristo nechmaca.
\c 2
\p
\v 1 Nijnequi xijmatica quejatza nimotequipacho huan nimomaijtohua
imopampa huan nijtlajtlanía para nochi tlaneltocani ipan altepetl
Laodicea huan ininpampa nochi sequinoc tlaneltocani tlen ax quema
nechitztoque.
\v 2 Nimomaijtohua ica Toteco para ximosemacaca huan
ximotlatzquilica ica itlaicnelijcayo. Nijtlajtlanía para
ximotemachica para inquimachilise nochi nopa tlalnamiquilistli tlen
Toteco quisencajqui tlen achtohuiya quitlatijtoyaj. Huan nopa tlen
quitlatijtoya elqui nochi tlen quinchihuilisquía tlacame ica
Cristo.
\v 3 Ipan Cristo tijpantise nochi tlalnamiquilistli huan nochi
tlamatilistli.
\v 4 Ya ni nimechilhuía para axaca ma inmechcajcayahuas inijuanti
tlen yejyectzi camatij huan quinequij inmechhuicase ipan seyoc
tlamachtili.
\v 5 Yonque ax niitztoc campa imojuanti, noyolo itztoc imohuaya huan
nipaqui pampa nijcaqui para inmonejnemiltíaj nelía cuali huan para
inquineltocaj Cristo ica nochi imoyolo.
\s Nopa yancuic yolistli ipan Cristo
\p
\v 6 Queja inquiselijque Tohueyiteco Jesucristo pampa
inquineltocayayaj, ama queja nopa xinemica ihuaya. Huan ximocahuaca
inmotlatzquilijtoque ipan ya.
\v 7 Queja inelhuayo se cuahuitl monequi ma motlatzquili huejcatla,
imojuanti nojquiya ximotlatzquilica ipan Cristo huan xijcahuaca para
yajaya ma inmechchihua senquistoc intemachme ipan tlen inquineltocaj
queja timechmachtijtoque. Huan nochipa xijtlascamatica miyac Toteco
ica nochi imoyolo para nopa tlen inmechchihuilijtoc.
\p
\v 8 Ximomocuitlahuica para axaca inmechcajcayahuas ica miyac
tlajtoli yejyectzitzi huan queja nopa inmechilpis ipan tlen ax
melahuac huan tlen ax ipati. Tlen inijuanti inmechmachtíaj huala
tlen inintlalnamiquilis tlacame huan tlen ajacame huan ax ya nopa
tlen xitlahuac. Inijuanti ax inmechmachtíaj tlen Cristo.
\p
\v 9 Cristo itztoc senquistoc Dios huan senquistoc se tlacatl tlen
quipiya itlacayo.
\v 10 Ama inmechtlatzquiltijtoc ipan ya, huan yeca ayoc tleno
inmechpolohua para inelise senquistoc incuajcualme. Yajaya quipiya
tlanahuatili ica nochi tlamantli elhuicac ehuani huan ajacame yonque
quipiyaj tlanahuatili o chicahualistli.
\v 11 Huan quema inquiselijque Cristo, ax elqui se tlacatl tlen
inmechtequili nopa tlanescayotl. Pero yajaya Cristo inmechmacac se
tlanescayotl tlen ax nesi, pampa inmechnescayoti quema
inmechquixtili itequihuejcayo nopa tlen fiero tlen eltoya imopani
tlen san quinequiyaya tlajtlacolchihuas.
\v 12 Quema Itonal Toteco inmechtlali ipan Cristo, elqui queja
inmijque huan inmechtlalpachojque ica Cristo. Huan teipa Toteco
inmechyolcuic pampa inmotemachijque ipan ihueyi chicahualis tlen
quiyolcuic Cristo quema yajaya mictoyaya. Huan ya ni tlen
tijnextíaj quema timocuaaltíaj.
\p
\v 13 Achtohuiya initztoyaj queja inmictoque iixpa Toteco pampa san
intlajtlacolchijtinemiyayaj huan ax inquitemohuayayaj Toteco pampa
ax inisraelitame. Pero ama quena, Toteco inmechyolitijtoc ihuaya
Cristo huan inmechtlapojpolhuijtoc nochi imotlajtlacolhua.
\v 14 Sesen tojuanti tijpixtoyaj queja se amatl tlen techteilhuiyaya
tlen tlajtlacoli tijchijtoyaj huan tlen titlahuicayaya iixpa Toteco.
Pero Cristo quitlali nopa amatl ica totlajtlacolhua ipan icuamapel
huan nepa quixolejqui nochi tlen ica techteilhuiyaya. Quichijqui ni
quema mijqui topampa.
\v 15 Huan Cristo quiquixtili ichicahualis Axcualtlacatl huan
iajacahua tlen quipiyaj tlanahuatili huan tlen quipiyaj
chicahualistli huan quinpinahualti tlamiyacapa quema quintlanqui
ipan icuamapel.
\s Xijtemoca tlamantli tlen ipati iixpa Toteco
\p
\v 16 Huajca amo xiquintlacaquilica tlen inmechteilhuíaj huan
quiijtohuaj para ax cuali tlen inquicuaj huan tlen inquiij.
Quiijtohuaj monequi inilhuichihuase para Toteco ipan yancuic metztli
huan ipan sequinoc tonali queja israelitame quichihuaj huan monequi
inquitlepanitase nopa tonali quema mosiyajcahuaj israelitame.
\v 17 Quema aya hualayaya Cristo, nochi nopa tlanahuatili ipati
eliyaya pampa elqui queja se acahuilotl tlen quinexti tlen
hualasquía teipa. Pero ama hualajtoc Cristo, huan ayoc ipati nochi
nopa tlanahuatili tlen huejcajquiya.
\v 18 Amo xiquintlacaquilica nopa tlacame tlen quinequij xiyaca ipan
seyoc ojtli para amo xijselise nopa tlen inmechchiya ipan elhuicac.
Nopa tlacame quichihuaj queja nelía moicnonequisquíaj, pero ax
neli. Quiijtohuaj monequi xiquinhueyimatica elhuicac ehuani huan
para inijuanti quiselijtoque ni tlamachtili ipan temictli huan yeca
quipiyaj más inintlalnamiquilis. Inijuanti san moilhuíaj queja
tlajtlacolchijca tlacame.
\v 19 Pero inijuanti ax motlatzquilijtoque ipan Cristo, yajaya tlen
totzonteco huan tlen techyacana nochi titlaneltocani tlen tiitztoque
ipan itlacayo. Huan tojuanti, quena, tiitztoque san sejco ipan
itlacayo huan timotlatzquilijtoque ipan ya. Huan timoscaltíaj san
quema tijselíaj nopa chicahualistli tlen huala tlen Toteco.
\p
\v 20 Imojuanti inmijque quema Cristo mijqui, huan yajaya
inmechtojtonqui tlen inintlamachtil ajacame ipan ni tlaltepactli.
Huajca ayoc xiquincahuilica ma inmechnahuatica nopa
piltlanahuatiltzitzi tlen inijuanti quichijtoque,
\v 21 tlen quiijtohuaj: “Amo xiquitzquica o amo xijnechcahuica ni
tlamantli, o amo xijcuaca ni tlacualistli, o niyon amo xijtoxomaca
nopa.” Niyon quentzi amo xiquinchihuilica cuenta ni tlanahuatili.
\v 22 Imojuanti san inmechmacaj miyac tlanahuatili huan
tlamachtilistli tlen tlacame quisencajtoque. Nochi tlacualistli
tlami quema tijtequihuíaj huan ax hueli inmechyolijtlacos.
\v 23 Huelis nochi ni tlanahuatili nesij para cuali pampa se tlacatl
monequi ma moneltlalis para senquistoc quintoquilis. Huan tlen
quintoquilíaj ni tlanahuatili motlaijiyohuiltíaj miyac, huan
moicnonequij miyac huan tlahuel monahuatíaj para ax quinixpanose
nopa miyac tlanahuatili huan para miyac quihueyitlepanitase Toteco.
Pero ax tleno ipati para se quintoquilis nochi nopa tlanahuatili. Ax
quipalehuis se tlacatl ma quitlani nopa tlajtlacoli tlen itlacayo
huan itlajtlacolchijca tlalnamiquilis quinequi quichihuase.
\c 3
\p
\v 1 Pero Toteco inmechyolitijtoc ihuaya Cristo, huajca ximoilhuica
tlen eltoc nepa elhuicac campa Cristo mosehuijtoc inejmatl Toteco
campa más onca tlatlepanitacayotl.
\v 2 Quena, san ximoyolilhuica tlen nepa elhuicac, amo ximoilhuica
tlen eltoc ipan ni tlaltepactli.
\v 3 Inmijque nicani ihuaya Cristo huan ayoc inmoilhuíaj tlen eltoc
ipan ni tlaltepactli. Ama imonejnemilis tlen nelía eltoc nepa
elhuicac ica Cristo huan iixpa Toteco.
\v 4 Huan se tonal quema sampa mohualnextiqui Cristo, yajaya tlen
toyolis, imojuanti nojquiya inmonextise ihuaya huan inquipiyase
imotlatlanex queja yajaya quipiya.
\s Tonemilis tlen achtohui huan tonemilis tlen yancuic
\p
\v 5 Huajca ximomacaca cuenta para inmictoquejya huan ayoc
xijchihuaca tlen imoyolo inmechnotza xijchihuaca. Amo xijchihuaca
tlen hueli ica tlen ax imonamic. Amo ximoilhuica tlen ax cuali. Amo
xijtoquilica tlen fiero tlen quinequi imotlacayo. Amo ximoilhuica
tlamantli tlen eli se pinahualistli. Amo xijnequica inquipiyase más
tlamantzitzi mojmostla, pampa tlacame tlen queja nopa quichihuaj,
quihueyimatij tlen quipiyaj queja elisquía se dios huan ayoc
quihueyimatij Toteco.
\v 6 Yeca ihueyi cualancayo Toteco quinajsis nochi tlacame tlen
quichihuaj ni tlamantli pampa ax quitlepanitaj.
\v 7 Achtohuiya nojquiya inquichijtinemiyayaj nochi ni tlamantli
quema initztoyaj queja ni tlacame ipan ni tlaltepactli.
\v 8 Pero ama, ayoc xijchihuaca. Ayoc ximocualanica, ayoc
ximochihuaca inyolquentzitzi, ayoc xitecocolica, ayoc
xitetlaijilhuica, huan ayoc xicamatica fiero tlajtoli.
\v 9 Ayoc ximoistlacahuica se ica seyoc pampa queja se moquixtilía
itlaque sosoltic, ya inmoquixtilijtoque imotlajtlacolchijca
tlalnamiquilis tlen inmechnahuatiyaya huan inquicajtejtoque nochi
nopa fiero tlamantli tlen inquichihuayayaj.
\v 10 Ama queja se tlacatl tlen moquentía iyoyo tlen yancuic,
Toteco inmechmacatoc se imonemilis tlen yancuic tlen eltoc queja ya.
Yeca mojmostla xijchihuaca campeca para más inquiixmajtinemise
Cristo huan más inmochihuase queja ya.
\v 11 Ipan ni yancuic yolistli inquimatij para ax ipati iixpa Toteco
intla se tlacatl itztoc se israelita o axtle, intla motequilijtoc
nopa tlanescayotl ipan itlacayo o axtle. Ax ipati intla se tlacatl
ax tleno quimati o san cuatitlan nejnemi, o intla tequiti campa
quitlaxtlahuía huan hueli yohui campa quinequi, o intla monequi
quisentequipanos iteco tlen quicojtoc para iaxca. Ax ipati intla se
tlacatl ehua se cuali tlali tlen nochi quipiya, o sejcoyoc campa ax
tleno onca. San ipati intla se tlacatl quineltoca Cristo, pampa
yajaya Cristo tlen ipati. Huan yajaya Toteco hualitztos ipan iyolo
aqui hueli tlacatl. Huan quema yajaya itztoc ipan toyolo, axaca
ipati más iixpa que sequinoc, nochi tiitztoque san se.
\p
\v 12 Huajca pampa Toteco inmechtlapejpenijtoc huan
inmechiyocacajtoc para iaxcahua pampa inmechicnelía miyac, monequi
xiquintlasojtlaca huan xiquinchihuilica sequinoc tlen cuali. Sesen
imojuanti ximoicnonequica huan xitecamahuica ica yamanic. Xijpiyaca
imoyolo ica nochime.
\v 13 Huajca xijpiyaca imoyolo ica tlen inmechchihuilíaj tlen ax
cuali huan xiquintlapojpolhuica. Intla se quiteilhuía seyoc ica se
tlenijqui, ma quitlapojpolhui queja Cristo inmechtlapojpolhuijtoc.
\v 14 Huan tlen más ipati para inquichihuase, monequi ximoicnelica
huan queja nopa initztose cuali, pampa tlaicnelijcayotl techilpía
san sejco para ma tijpiyaca sanse toyolo.
\v 15 Cristo inmechmacac tlasehuilistli ipan imoyolo para
xijchihuaca tlen cuali, huajca ya nopa xijchihuaca, pampa Toteco
inmechnotztoc para xijselica itlasehuilis pampa initztoque ipan san
se itlacayo. Huan nochipa ximotlascamatica.
\p
\v 16 Xijcahuaca para ma mocahua ipan imoyolo nochi nopa yejyectzi
tlajtoli tlen techilhuía tlen Cristo. Ximoyolchicahuaca se ica
seyoc ica Itlajtol Toteco huan ximomachtijtinemica. Xihuicaca
salmos, huan tiohuicatl, huan huicatl tlen quipalehuía imotonaltzi
para inquipaquilismacase Toteco. Quena, xihuicaca huan
xijtlascamatica Toteco ica nochi imoyolo.
\v 17 Huan nochi tlen inquichihuaj huan nochi tlen inquiijtohuaj,
xijchihuaca pampa inquineltocaj Tohueyiteco Jesús huan iniaxcahua.
Huan nochipa xijtlascamatica Toteco Totata ipan Cristo.
\s Quejatza ma itztoca familias tlen quineltocaj Toteco
\p
\v 18 Xitlacaquica insihuame tlen inquipiyaj imohuehue. Sesen
imojuanti xijcahuilica imohuehue ma inmechyacana queja quinamiqui
pampa iniaxcahua Toteco.
\v 19 Xitlacaquica intlacame tlen inquipiyaj imosihuajhua. Nochi
imojuanti xiquinicnelica imosihua huan amo ximocualanica ininhuaya.
\v 20 Huan inconeme, xijchihuaca nochi tlen imonana huan imotata
inmechilhuíaj pampa ya nopa tlen quipactía Toteco.
\v 21 Xitlacaquica imojuanti tlen inquinpiyaj imoconehua. Amo
xiquincualancamacaca imoconehua para ma ax mocuesose.
\p
\v 22 Xitlacaquica intlatequipanohuani xijneltoquilica imotecohua
nicani ipan ni tlaltepactli. Xijchihuaca nochi tlen
inmechnahuatíaj. Amo xitequitica chicahuac san quema
inmechtlachilíaj. Mojmostla xitequitica ica nochi imoyolo huan
xijchihuaca tlen quipactía imoteco yonque axaca inmechtlachilía,
pero xijchihuaca pampa inquiimacasij huan inquitlepanitaj Toteco.
\v 23 Xitequitica chicahuac huan ica paquilistli ipan tlen hueli
tequitl tlen inquichihuaj. Xijmachilica para inquitequipanohuaj
Toteco, amo ximoilhuica intla san inquitequipanohuaj se tlacatl.
\v 24 Xiquilnamiquica para Toteco inmechmacas nopa tlaxtlahuili tlen
quinamiqui inquiselise nepa elhuicac, pampa nelía Cristo yajaya
imoTeco huan yajaya tlen inquitequipanohuaj.
\v 25 Pero intla ax intequitij queja quinamiqui o intla inquichihuaj
tlen ax cuali, Toteco inmechmacas se tlaxtlahuili tlen ax nelía
inmechpactis, pampa Toteco ax techchicoicnelía huan nochi tlacame
quiselise inintlaxtlahuil queja tlen quichijtoque.
\c 4
\p
\v 1 Xitlacaquica intecojme tlen inquinpiyaj tlatequipanohuani tlen
inquincojtoque para imoaxcahua. Xiquinchihuilica imotequipanojcahua
tlen xitlahuac huan tlen cuali pampa inquimatij nojquiya inquipiyaj
imoTeco nepa elhuicac.
\s Nochi toicnihua monequi ma timomaijtoca miyac
\p
\v 2 Nochipa ximomaijtojtinemica ica Toteco. Huan quema
inmomaijtohuaj, xitlachixtoca tlaque inquitlajtlaníaj. Huan
xijtlascamatica Toteco ipampa nochi tlen inmechmacatoc.
\v 3 Nojquiya amo xiquilcahuaca xijtlajtlanica Toteco para tojuanti.
Xijtlajtlanica para ma techtlapohuili se ojtli para más tihuelise
titecamahuise Itlajtol campa hueli. Nijnequi niquinilhuis más
tlacame nopa tlamantli tlen Cristo tlen huejcajquiya axaca
quimatiyaya. Quejnopa nijchihuayaya huan yeca nechtzajque.
\v 4 Xijtlajtlanica Toteco para huelis nitecamahuis Itlajtol nempa
queja quinamiqui nijchihuas.
\p
\v 5 Ximomocuitlahuica huan ximonejnemiltica ica tlalnamiquilistli
iniixpa tlen ax quineltocaj Toteco. Amo san ximotonalpoloca
ininhuaya. Xiquinilhuica Itlajtol Toteco.
\v 6 Xiquincamahuica ica yamanic huan ica yejyectzi, pero melahuac.
Huan ximoilhuica quejatza monequi inquinanquilise sesen tlacatl
quema inmechtlajtlanise.
\s Pablo quinnahuatijtejqui
\p
\v 7 Toicni Tíquico tlen tiquicnelíaj yas inmechilhuiti nochi tlen
nechpano nicani. Yajaya nelía se notlapalehuijca tlen temachtli
huan quitequipanohua Toteco nohuaya.
\v 8 Nimechtitlanilía Tíquico para inquimatise quejatza tiitztoque
nicani huan para yajaya huelis inmechyolchicahuas.
\v 9 Nojquiya ihuaya Tíquico nimechtitlanilía toicni Onésimo tlen
tiquicnelíaj. Yajaya nojquiya se toicni tlen temachtli huan itztoc
se tlen imojuanti. Inijuanti inmechilhuise nochi tlen pano nicani.
\p
\v 10 Inmechtlajpalohuaj Aristarco tlen itztoc ipan tlatzactli
nohuaya huan Marcos imachicni Bernabé. Ya nimechilhuijtoc para
xijselica Marcos ica cuali intla yas inmechitati.
\v 11 Nojquiya inmechtlajpalohua Jesús tlen tojuanti tijtocajtíaj
Justo. San ni eyi israelita tlaneltocani tequitij nohuaya para
quinnotzase tlacame ma calaquica campa tlanahuatía Toteco, huan
inijuanti nelía nechyolchicajtoque miyac.
\v 12 Nojquiya inmechtlajpalohua Epafras tlen ehua nepa campa
imojuanti. Yajaya quitequipanohua Toteco nicani ica nochi iyolo.
Mojmostla ica miyac chicahualistli quitlajtlanía Toteco imopampa.
Quitlajtlanía para xielica intemachme, huan para xielica queja
tlacame tlen chicahuac quineltoca Toteco huan para ma xijmatica
nochi ipaquilis Toteco.
\v 13 Nimechyolmelahua para nopa Epafras nelía mocuesohua miyac
imopampa huan nojquiya ininpampa toicnihua tlen itztoque ipan
altepetl Laodicea huan altepetl Hierápolis.
\v 14 Lucas, nopa tepajtijquetl tlen tiquicnelíaj, huan Demas
nojquiya inmechontlajpalohuaj.
\p
\v 15 Xiquintlajpaloca inijuanti tlen quineltocaj Toteco nepa
Laodicea. Nojquiya xijtlajpaloca Ninfas huan nopa tlaneltocani tlen
mosentilíaj ipan ichaj.
\v 16 Quema ya inquipojtose ni amatlajcuiloli, xiquinpanoltilica
toicnihua tlen mosentilíaj ipan altepetl Laodicea para ma
quipohuaca nepa nojquiya. Huan imojuanti xijpohuaca nopa
amatlajcuiloli tlen niquintlajcuilhuijtoc tlaneltocani ipan
Laodicea.
\v 17 Xiquilhuica Arquipo ni tlajtoli: “Xijpiya cuidado xijchihua
nochi nopa tequitl tlen Toteco mitzmacatoc xijchihua.”
\p
\v 18 Nicani na niPablo nimechtlajcuilhuijtoc ni tlajtoli ica noma
para nimechtlajpalos. Xiquilnamiquica niitztoc ipan tlatzactli. Ma
Toteco quipiya hueyi iyolo ica imojuanti. Quejnopa ma eli.