\id 1TH
\h 1 TESALONICENSES
\mt Nopa Achtohui Amatlajcuiloli tlen Pablo Quintlajcuilhui Tlaneltocani ipan Altepetl Tesalónica
\c 1
\s Pablo quintlajcuilhui tlaneltocani ipan Tesalónica
\p
\v 1 Na niPablo, ininhuaya Silvano huan Timoteo, timechtlajcuilhuíaj imojuanti ipan nopa tiopamitl tlen tlaneltocani ipan altepetl Tesalónica. Intlatzquijtoque ipan Toteco Totata huan ipan Toteco Jesucristo. Toteco ma quipiya hueyi iyolo ica imojuanti huan ma inmechmaca tlasehuilistli.
\s Quejatza panotihualajque nopa tlaneltocani
\p
\v 2 Ajachica tijtlascamatij Toteco imopampa imojuanti huan tijtlajtlaníaj ma inmechtiochihua.
\v 3 Nochipa quema timomaijtohuaj ica Toteco Totata ipampa imojuanti, tiquilnamiquij quejatza intequitij chicahuac pampa inquineltocaj, huan quejatza inquitequipanohuaj pampa inquiicnelíaj, yonque tlahuel insiyahuij. Tiquilnamiquij nojquiya quejatza mojmostla inquichiyaj para sampa hualasoc Tohueyiteco Jesucristo.
\p
\v 4 Toicnihua, tijmatij para temachtli Toteco inmechicnelía huan inmechtlapejpenijtoc para inelise iniaxcahua.
\v 5 Huan quema titlacamanalojque nopa cuali tlajtoli campa imojuanti, ax san timechilhuiyayaj tlajtoli tlen ax ipati. Timechilhuijque itlajtol Toteco huan nopa tlajtoli quipixqui chicahualistli pampa Itonal Toteco inmechnextiliyaya ipan imoyolo para tlen tiquijtojque nelía elqui melahuac. Huan inquimatij tonemilis quema tiitztoyaj nepa imohuaya inmechnextili para melahuac totlajtol, pampa tijnequiyayaj xijneltocaca Toteco.
\p
\v 6 Huan intechtoquilijque tlen tojuanti tijchijtoque huan tlen Tohueyiteco quichijqui, pampa yonque inmechtlaijiyohuiltiyayaj sequinoc tlacame, inquiselijque itlajtol Toteco ica paquilistli tlen Itonal Toteco inmechmacac.
\v 7 Huan yeca inquinnextilijtoque nochi tlaneltocani ipan tlali Macedonia huan ipan tlali Acaya tlen cuali para nojquiya quichihuase.
\v 8 Huan tlen imojuanti, ax san mosemoyajtoc itlajtol Toteco ipan tlaltini Macedonia huan Acaya, ama yajtoc hasta tlacame ipan campa hueli tlali, pampa campa hueli quitlacaquilijtoque quejatza ica nochi imoyolo inquineltocaj Toteco. Yeca ayoc monequi tiquinilhuise tlen imojuanti,
\v 9 pampa nopa tlacame ininseltitzitzi techpohuilíaj tlen quicactoque para panoc quema timechpaxalojque. Techilhuíaj quejatza inmoyolpatlaque huan inquincajque inquinhueyichihuaj nopa totiotzitzi tlen tlacame quinchijtoyaj ica ininma, huan pejqui inquitequipanohuaj Toteco tlen itztoc huan tlen temachtli.
\v 10 Huan techilhuíaj quejatza ama inquichiyaj para Jesús, icone Toteco, sampa ma huala tlen elhuicac. Quena, Toteco Dios quiyoliti Jesús quema mictoya, huan yajaya Jesús tlen techmanahuía para ax techajsis ihueyi cualancayo Toteco tlen teipa monextis.
\c 2
\s Quejatza Pablo quitequipano Toteco nepa Tesalónica
\p
\v 1 Noicnihua, inquimatij ax san tlapic totequi quema
timechhualiquilijque itlajtol Toteco.
\v 2 Yonque achtohuiya ipan altepetl Filipos titlaijiyohuijque miyac
huan tlacame fiero techchihuilijque, Toteco techpalehuis ma tiajsica
campa imojuanti huan ma timoneltlalica timechilhuise itlajtol Toteco
yonque tonechca itztoyaj miyac tlen quinequiyayaj ma ayoc aca
tiquilhuise.
\v 3 Huan quema tiquinilhuíaj tlacame itlajtol Toteco, ax quema
tiistlacatij, ax quema tijchihuaj tlen ax cuali, huan ax quema
tijnequij tiquincajcayahuase.
\v 4 Ax quema tiquincamahuíaj tlacame pampa tijnequij ma
tiquinpactica. Pero tijnequij tijpactise Toteco tlen achtohui
techyoltlachili huan techmacac itlajtol para ma titlacamanaloca
pampa motemachi ipan tojuanti para tijchihuase. Huajca xitlahuac
tiquincamahuíaj tlacame.
\v 5 Huan inquimatij ax quema timechcamahuijque para
timechyectlalise, niyon ax quema timechcajcayajque para xinechmacaca
tomi pampa timechilhuiyayaj itlajtol. Toteco quimati nelía
xitlahuac tlen niquijtohua.
\v 6 Ax quema tijtemojque para imojuanti, niyon para sequinoc, ma
techhueyichihuaca. Yonque tijpiyaj tequihuejcayotl pampa
tiitlayolmelajcahua Jesucristo para tijselise tlen quinamiqui ipampa
totequi.
\v 7 Pero quema tiitztoyaj imohuaya, timechcamahuijque ica yamanic
tlajtoli. Timechchihuilijque queja se tena tlen quiniscaltía
iconehua ica miyac teicnelili.
\v 8 Huan pampa timechicnelíaj miyac, ax tijnequiyayaj san
timechilhuise itlajtol Toteco tlen cuali, pero nojquiya
timictosquíaj imopampa imojuanti, pampa nelía timechicnelíaj.
\v 9 Huan noicnihua, xiquilnamiquica quejatza titequitiyayaj hasta
tisiyahuiyayaj. Titequitiyayaj yohuali huan tonali para tijtlanise
tlen ica tipanose para ma ax timechcuatotonica quema
timechilhuiyayaj itlajtol Toteco.
\p
\v 10 Inquiitaque huan Toteco nojquiya quiitac quejatza tinejnenque
campa imojuanti tlen inquineltocaj Toteco. Tijchijque tlen
senquistoc cuali huan xitlahuac, huan axaca huelis techteilhuis ica
niyon se tlamantli ax cuali.
\v 11 Inquimatij queja timechtlalnamictijque huan timechyolchicajque
sesen imojuanti queja se tetata quinchihuilía iconehua.
\v 12 Timechilhuijque para xinemica xitlahuac queja quinamiqui pampa
Toteco inmechnotzqui para xicalaquica campa yajaya tlanahuatía huan
xijpiyaca imoparte ipan ihueyitilis.
\p
\v 13 Huajca yeca, ax tijcahuaj para tijtlascamatij Toteco pampa
intechtlacaquilijque tlen timechilhuijque huan inquiselijque
itlajtol Toteco ica paquilistli. Ax inquiselijque san queja itlajtol
tlacame. Inquiselijque queja itlajtol Toteco pampa inquimachilijque
para ya nopa tlen melahuac elqui. Huan eltoc nopa itlajtol Toteco
tlen noja quichihua itequi ipan imoyolo imojuanti tlen inquineltocaj
Tohueyiteco.
\v 14 Huan ica imojuanti, toicnihua, inmochijque queja quichijque
nopa tlaneltocani ipan tlali Judea, pampa san se
inmechtlaijiyohuiltijque tlacame tlen san sejco ehuaj imohuaya queja
quintlaijiyohuiltijque nopa israelitame tlen ax quineltocaj
Tohueyiteco ipan inintlal.
\v 15 Sequin nopa israelitame quimictijque Tohueyiteco Jesús,
quinmictijque nopa tiocamanalohuani tlen Toteco quintitlanili, huan
nojquiya techtojtocaque tojuanti. Ax quichihuaj tlen quipactía
Toteco huan quincocolíaj nochi tlacame.
\v 16 Quinequiyayaj techtzacuilise para ma ax tiquincamahuica tlen
ax israelitame para ma ax momaquixtica ipan Toteco. Quej ni, nopa
israelitame nochipa quichihuaj más tlajtlacoli hasta temitoc
ininnemilis ica tlajtlacoli, huan yeca ama ininpani eltoc
icualancayo Toteco.
\s Pablo sampa quinejqui quinpaxalos nopa tlaneltocani nepa Tesalónica
\p
\v 17 Toicnihua, yonque ax tiitztoque nepa imohuaya pampa monejqui
tiquisque para se tlalochtli, timechilnamiquij ipan toyolo huan
tlahuel tijnequij sampa timechitatij.
\v 18 Nelía tijnequiyayaj timechpaxalotij. Huan na niPablo
nijchijqui campeca miyac huelta para niyas, pero Axcualtlacatl
nechtzacuili.
\v 19 Tijnequij timechitatij pampa intechmacaj hueyi paquilistli.
Ipan nopa tonal quema Tohueyiteco Jesús sampa hualas, huan
timoquetzase iixpa, tijpiyase hueyi paquilistli pampa initztose nepa
tohuaya. Quena, para timechitase nopona ipan nopa tonal elis queja
se corona para tojuanti.
\v 20 Quena, imojuanti innechmacaj hueyi paquilistli huan yeca
Toteco techhueyitlalis nopona.
\c 3
\p
\v 1 Huajca yeca, quema ax tihueliyayaj timochiyaj más para
tijmatise quejatza initztoyaj, nimoilhui cuali para nimocahuas
noselti ipan altepetl Atenas,
\v 2 huan para Timoteo ma yahui campa imojuanti. Nijtitlanqui para
ma inmechmacas tetili huan inmechyolchicahuas para más xijneltocaca
Tohueyiteco. Nelía Timoteo se toicni ipan Cristo huan
quitequipanohua Toteco tohuaya para tiquinilhuise tlacame nopa cuali
tlajtoli tlen Cristo techchihuilijtoc.
\v 3 Yajaya inmechpalehuito para axaca moyamanilis para quineltocas
Toteco pampa ya intlaijiyohuíaj ipampa ya, pampa inquimatij Toteco
quitlalijtoc para titlaneltocani ma tijpanoca tlaijiyohuilistli.
\v 4 Huan quema noja tiitztoyaj imohuaya, timechilhuiyayaj se tonal
ajsis tlaijiyohuilistli huan ama queja nopa panotoc queja inquiitaj.
\v 5 Huajca yeca, quema ayoc huelqui nimochixqui más, nijtitlanqui
Timoteo para quimatis intla noja chicahuac inquineltocaj Tohueyiteco
para yajaya huelis mocuepas huan nechmatiltis. Nimocuesohuayaya
intla huelis Axcualtlacatl inmechcajcayajtosquía huan
inmechtlantosquía, huan totequi eltosquía san tlapic.
\p
\v 6 Pero ama ya mocueptoc Timoteo, huan techilhuijtoc nopa cuali
tlajtoli para noja chicahuac inquineltocaj Tohueyiteco huan para
inteicnelíaj miyac. Techilhuijtoc quejatza nochipa intechilnamiquij
tojuanti ica cuali, huan quiijto para nelía inquinequij intechitase
queja nojquiya tojuanti tijnequij timechitase.
\v 7 Yeca toicnihua, yonque techpanotihualajtoc miyac tlaohuijcayotl
huan tlaijiyohuilistli nica, techyolchicajqui miyac quema tijmatque
para noja cuali inquineltocaj Tohueyiteco.
\v 8 Huan ama nelía tiyolpaquij huan techmaca yancuic
chicahualistli pampa tijmatij ica temachili inmoquetzaj ipan ya.
\v 9 Yeca ax quema hueli tijtlamitlascamatise Toteco ipampa
imojuanti. Quema timoilhuíaj tlen imojuanti, techmaca miyac
paquilistli iixpa Toteco.
\v 10 Huan tonali huan yohuali tijtlajtlaníaj Toteco chicahuac para
sampa timoixitase. Tijnequij timechpalehuise xijneltocaca
Tohueyiteco achi más cuali intla oncasquía campa polihui se
quentzi.
\p
\v 11 Huajca Toteco Totata huan Toteco Jesús ma techyacanas para
huelis sampa timechpaxalotij.
\v 12 Huan Tohueyiteco ma inmechpalehuis para ximoicnelica huan
xiquinicnelica nochi sequinoc tlacame hasta mocahuas
inmoteicnelilis, queja nojquiya tojuanti timechicnelíaj.
\v 13 Huan Tohueyiteco ma inmechmacas tetili ipan imoyolo para
initztose intlatzejtzelolme, huan axaca huelis inmechteilhuis quema
inmoquetzase iixpa Toteco Totata quema sampa hualas Tohueyiteco
Jesús ininhuaya nochi sequinoc itlatzejtzeloltijca tlacajhua.
\c 4
\s Se yolistli tlen quipactía Toteco
\p
\v 1 Huajca ama, toicnihua timechtlajtlaníaj chicahuac
ximonejnemiltica queja quipactía Toteco queja tojuanti
timechmachtijtoque. Ya inquichihuaj ya ni, pero tijnequij
timechyolchicahuase ipan Toteco para achi más xijchihuaca.
\p
\v 2 Huan ya inquimatij nopa tlanahuatili tlen timechmacaque ica
itequihuejcayo Tohueyiteco Jesús.
\v 3 Pampa Toteco quinequi mojmostla más initztose
intlatzejtzeloltique huan intlaiyocatlalilme tlen tlajtlacoli.
Yajaya quinequi para axaca tlen imojuanti ma quichihua tlamantli ica
se tlen ax inamic.
\v 4 Quinequi sesen imojuanti ma quinahuati sese itlacayo. Quinequi
ximonemiltica queja tlatzejtzelolme iixpa Toteco para nochi tlacame
inmechtlepanitase.
\v 5 Ax quinequi para inquicahuilise inmotlajtlacolchijca
tlanequilis ma inmechnahuatis queja quichihuaj tlacame tlen ax
quiixmatij Toteco.
\v 6 Huan ma axaca quicajcayahuas, niyon quiixpanos, iicni ipan
Cristo ica ni tlajtlacoli huan mocuilis isihua, pampa Toteco
chicahuac quitlatzacuiltis tlen ya nopa quichihuas. Ya
timechilhuijque ya ni achtohuiya.
\v 7 Pampa Toteco technotztoc para timochihuase
titlatzejtzeloltique, ax technotztoc para ma tijchihuaca tlen fiero
iixpa.
\v 8 Huajca intla se tlacatl quitlahuelcahua ni tlamachtili, ax
quitlahuelcahua se tlacatl; yajaya quitlahuelcahua Toteco tlen
techmacatoc Itonal tlen tlatzejtzeloltic.
\p
\v 9 Pero ax monequi timechtlajcuilhuise para timechilhuise
xiquinicnelica imoicnihua, pampa Toteco ya inmechmachtijtoc quejatza
monequi inmoicnelise se ica seyoc.
\v 10 Huan nelía inquinicnelíaj nochi imoicnihua ipan nochi
imotlal Macedonia. Pero toicnihua, timechtlajtlaníaj para achi más
xiquinicnelica.
\v 11 Xijchihuaca campeca para mojmostla initztose
inmoyoltlalijtoque huan innejnemise ica yoltlasehuilistli. Huan
ximotequihuica ica tlen imojuanti imocuenta. Xitequitica cuali ica
imoma queja ya timechnahuatijque.
\v 12 Queja nopa tlacame tlen ax quineltocaj Toteco
inmechtlepanitase, huan ax monequis inquintlajtlanise sequinoc tlen
inmechmonequilía.
\s Jesucristo sampa hualas
\p
\v 13 Toicnihua, tojuanti tijnequij xijmachilica tlaque panos ica
tlaneltocani tlen ya mictoque para ax inmocuesose queja ne sequinoc
tlacame tlen ax mochiyaj para itztose ihuaya Jesucristo.
\v 14 Tojuanti tijmatij para Jesús mijqui huan sampa moyolcuic,
yeca nojquiya tijneltocaj para Toteco Dios quichihuas para toicnihua
tlen ya mictoque ma hualaca ihuaya Jesús quema yajaya sampa hualas.
\p
\v 15 Huan timechilhuíaj ya ni tlen Tohueyiteco techilhui. Tojuanti
tlen noja tiitztose huan timocajtose ipan tlaltepactli quema sampa
hualas Tohueyiteco, ax titlejcose huan tiquintlayacancuilise nopa
tlaneltocani tlen ya mictoque.
\v 16 Pampa yajaya Tohueyiteco tzajtzis ica hueyi tlanahuatili huan
hualtemos tlen elhuicac. Huan ielhuicac ejca Toteco tlen más
quipiya chicahualistli camatis nelía chicahuac huan se quipitzas
itlapitzal Toteco para tematiltise tlen onca. Huan achtohui
moyolitise inintlacayohua nopa tlaneltocani tlen ya mictoque.
\v 17 Teipa Toteco techquixtis huan techtlejcoltis tojuanti tlen
noja tiitztose ipan tlaltepactli huan san sejco ica inijuanti para
timopantise ihuaya Tohueyiteco nepa campa mixtli ipan elhuicactli.
Huan queja nopa tiitztose para nochipa ihuaya Tohueyiteco.
\v 18 Huajca ximoyolchicahuaca se ica seyoc ica ni tlajtoli. Amo
ximocuesoca.
\c 5
\p
\v 1 Toicnihua, ax monequi timechtlajcuilhuise quejatza huan quema
nochi ya ni panos.
\v 2 Pampa cuali inquimatij tlaloch ajsis nopa tonal tlen iaxca
Tohueyiteco. Ajsis quema tlacame ax moilhuise para ajsisquía, queja
se tlaxtejquetl calaqui tlalochtli ica tlayohua.
\v 3 Tlacame quiijtojtose ya onca tlasehuilistli huan ya itztoque
ica cuali, huan ipan nopa tlalochtli quinajsis se hueyi
tlatzacuiltili. Nimantzi hualas queja se sihuatl quema pehua
itlacuajcualol para tlatlacatiltis huan axaca huelis cholos.
\p
\v 4 Pero imojuanti noicnihua, ax initztoque ipan tzintlayohuilotl
para nopa tonal ma inmechmajmati queja tlamajmatía se tlaxtejquetl
ica tlayohua.
\v 5 Imojuanti ya innejnemij ipan tlahuili o campa tona. Ya
inquiixmatij Toteco Jesucristo huan ayoc initztoque ipan
tzintlayohuilotl.
\v 6 Yeca ama ma ayoc tiitztoca queja tlacame tlen cochtoque huan ax
quimatij tlen oncas. Ma titlachixtoca para quema ajsis nopa tonal.
Ma tijpiyaca cuali totlalnamiquilis.
\v 7 Tlen ax quiixmatij Toteco itztoque queja tlacame tlen cochtoque
o tlen ihuintitoque tlayohua.
\v 8 Pero ma tijpiyaca cuali totlalnamiquilis pampa tiitztoque queja
tlacame tlen nemij tonaya. Ma tijneltocaca Toteco ica nochi toyolo.
Ma titeicnelica. Ma timochiyaca ica paquilistli para Toteco tlen
techmaquixtijtoc ma techhuicas ihuaya. Intla tijchihuaj nochi ni
tlamantli, timocualtlalijtose queja se soldado tlen motlalilía se
iyolix tepostzajcayo huan itepos tzontzajca para quimocuitlahuis
itlacayo ipan tlatehuijcayotl.
\v 9 Pampa Toteco Totata ax techtlalijtoc para ma tijselise
tlatzacuiltilistli. Techtlalijtoc para techmaquixtis ipampa tlen
Jesucristo techchihuilijtoc.
\v 10 Yajaya mijqui topampa tojuanti para ma tiitztoca ihuaya para
nochipa yonque timictoque o noja tiitztoque quema yajaya hualas.
\v 11 Yeca noja más ximoyolchicahuaca ipan Toteco huan
ximofuerzajmacaca se ica sequinoc queja ya nijmati para
inquichijtiyohuij.
\s Pablo quintlamiconsejomacac nopa tlaneltocani
\p
\v 12 Ama toicnihua, timechtlajtlaníaj para xiquintlepanitaca miyac
nopa tlacame tlen tlayacanaj ipan itequi Toteco nepa campa
imojuanti. Inijuanti tequitij chicahuac campa imojuanti huan
inmechmachtíaj pampa Tohueyiteco quintequimacatoc ma
inmechmocuitlahuica para innejnemise cuali.
\v 13 Huan monequi inquintlepanitase huan inquinicnelise miyac
ipampa nopa tequitl tlen quichihuaj. Xiitztoca san sejco ica
paquilistli.
\p
\v 14 Huan nojquiya timechtlajtlaníaj, toicnihua, para chicahuac
xiquincamahuica nopa tlacame tlen tlatzihuij nopona campa imojuanti.
Xiquinyolchicahuaca inijuanti tlen nimantzi mopinahuaj huan ax
quipiyaj tetili. Xiquinpalehuica tlen aya nelcuali quineltocaj
Toteco. Huan xijpiyaca imoyolo ica nochi tlacame.
\p
\v 15 Xijtlachilica para axaca ma quicuepilis seyoc tlen ax cuali
quichihuilijtoc. Nochipa xijchihuaca campeca ximochihuilica tlen
cuali se ica sequinoc huan ica nochi sequinoc tlacame.
\p
\v 16 Xipaquica mojmostla.
\v 17 Ximomaijtojtinemica ica Toteco ajachica.
\v 18 Xijtlascamatica Toteco ipan nochi tlamantli tlen
inmechpanotihuala pampa queja nopa Toteco quinequi xijchihuaca nochi
imojuanti tlen initztoque iniaxcahua Cristo Jesús.
\p
\v 19 Amo xijcotonilica itequi Itonal Toteco ipan imoyolo.
\v 20 Amo xijtlaijilhuica itlajtol se itiocamanalojca Toteco.
\v 21 Pero xijyejyecoca nochi tlen quiijtohuaj. Xijtoquilica tlen
cuali.
\v 22 Xijtlahuelcahuaca nochi tlamantli tlen ax cuali.
\p
\v 23 Toteco, yajaya tlen iselti techmaca tlasehuilistli ipan
toyolo, senquistoc ma inmechchihua intlatzejtzeloltique. Ma
inmechmocuitlahuili Toteco imotonal, imoalma, huan imotlacayo para
axaca huelis inmechteilhuis ica niyon se tlamantli quema sampa
hualas Tohueyiteco Jesucristo.
\v 24 Toteco tlen inmechnotzqui para inelise iaxcahua, yajaya
temachtli. Huan yajaya quitlamisencahuas ni tlen tijtlajtlaníaj.
\s Pablo tlanqui tlajcuilohua
\p
\v 25 Toicnihua, ximomaijtoca ica Toteco topampa tojuanti.
\p
\v 26 Ximotlajpaloca huan ximotzoponica ica se tlatlepanitacayotl
tlen tlatzejtzeloltic pampa inmoicnelíaj ipan Cristo.
\p
\v 27 Nimechnahuatía intlayacanani ica itequihuejcayo Tohueyiteco
para xijpohuaca ni amatlajcuiloli para ma quicaquica nochi
toicnihua.
\p
\v 28 Tohueyiteco Jesucristo ma quipiya hueyi iyolo imohuaya. Queja
nopa ma eli.