\id 2TH
\h 2 TESALONICENSES
\mt Nopa Ompa Amatlajcuiloli tlen Pablo Quintlajcuilhui Tlaneltocani ipan Altepetl Tesalónica
\c 1
\s Pablo quintlajcuilhui tlaneltocani ipan Tesalónica
\p
\v 1 Na niPablo, ininhuaya Silvano huan Timoteo, timechtlajcuilhuilíaj ni amatl imojuanti ipan nopa tiopamitl tlen tlaneltocani tlen inmosentilíaj ipan altepetl Tesalónica. Intlatzquijtoque ipan Toteco Totata huan ipan Toteco Jesucristo.
\v 2 Toteco Totata huan Toteco Jesucristo ma quipiyaca hueyi ininyolo imohuaya huan ma inmechmacaca tlasehuilistli.
\s Jesucristo quintlajtolsencahuas tlajtlacolchihuani quema sampa hualas
\p
\v 3 Toicnihua, mojmostla tijtlascamatij Toteco imopampa imojuanti, pampa queja nopa quinamiqui. Tijtlascamatij pampa mojmostla inquineltocaj Toteco ica más chicahualistli huan mojmostla más inmoicnelíaj.
\v 4 Huajca, ica paquilistli tiquinilhuíaj tlaneltocani ipan sequinoc itiopahua Toteco tlen cuali inquichihuaj. Tiquinilhuíaj quejatza inquipiyaj imoyolo huan quejatza ica sesen nopa tlaijiyohuilistli huan tlaohuijcayotl tlen inquiijiyohuíaj, más chicahuac inquineltocaj Toteco.
\v 5 Toteco quitequihuis ni tlaijiyohuilistli para tenextilis para yajaya tetlajtolsencahua xitlahuac. Intlaijiyohuíaj ama pampa inquicahuilíaj Toteco ma inmechnahuati ipan imoyolo nica huan ya ni tenextilía para inmechchijtoc quinamiqui incalaquise elhuicac campa yajaya tlanahuatis para nochipa.
\p
\v 6 Huan pampa Toteco itztoc xitlahuac, yajaya nojquiya quincuepilis ica tlaijiyohuilistli nopa tlacame tlen ama inmechtlaijiyohuiltíaj.
\v 7 Huan imojuanti tlen ama intlaijiyohuíaj, inmechchihuas ximosiyajcahuaca queja nojquiya techchihuas tojuanti ma timosiyajcahuaca quema Tohueyiteco Jesucristo mohualnextiqui tlen elhuicac ihuaya ielhuicac ejcahua tlen quipiyaj huejhueyi chicahualistli.
\v 8 Quena, hualas ipan tlitl tlen quipiyas miyac tlixochitl para quintlatzacuiltis nopa tlacame tlen ax quiixmatij huan tlen ax quinejque quichihuase tlen itlajtol Toteco Jesucristo quinilhui.
\v 9 Inijuanti monequi tlaxtlahuase tlen quinamiqui ipampa inintlajtlacol, huan yeca mocuapolojtose para nochipa nepa mictla. Nepa itztose huejca tlen campa itztoc Toteco ica nochi ihueyitilis huan ichicahualis.
\v 10 Huan ya ni panos ipan nopa tonal quema Jesucristo sampa hualas ipan ni tlaltepactli huan nochi itlatzejtzeloltijca tlacajhua quihueyichijtose huan mosentlachilijtose ica nochi tlen techchihuilijtoc. Huan imojuanti nojquiya initztose ihuaya tlen quihueyichijtose pampa ya inquineltocaque tlen timechilhuijtoque tlen ya.
\p
\v 11 Huajca yeca mojmostla timomaijtohuaj ica Toteco ipampa imojuanti huan tijtlajtlaníaj ma inmechmaca chicahualistli para inquichihuase nochi itequi queja ya inquinequij inquichihuase pampa inquineltocaj Toteco. Huan nijtlajtlanía ma quitlachili imotequi huan ma paqui pampa inmechnotzqui para iniaxcahua.
\v 12 Huan yeca sequinoc tlacame quihueyichihuase Toteco quema quiitase tlen inquichijtoque, huan nojquiya inmechhueyichihuase ipampa tlen inquichijtoque. Huan nochi ni panos pampa hueyi ininyolo Toteco Totata huan Toteco Jesucristo imohuaya.
\c 2
\s Nopa tlajtlacol tlacatl tlen ax quitlepanita niyon se tlanahuatili
\p
\v 1 Toicnihua, ama nijnequi nimechcamahuis tlen nopa tonal quema
Tohueyiteco Jesucristo sampa hualas huan timosentilise ihuaya.
\v 2 Ma axaca inmechmajmatis, noicnihua. Niyon amo xiquincahuilica
sequinoc ma inmechcuesolmacaca huan inmechilhuise para ya ajsico
nopa tonal tlen Tohueyiteco. Yonque inmechilhuíaj para tojuanti
timechtitlanilijque se amatlajcuiloli tlen quiijto ya ajsico, o
ajqueya quiselijtoc se tlajtoli, o se tlanextili queja se temictli
tlen Toteco para ya ajsico, amo xiquinneltocaca.
\v 3 Axaca ma inmechcajcayahua. Achtohui, quema aya ajsi nopa tonal,
miyac tlacame quicahuase quineltocase Toteco. Nojquiya monextis nopa
tlajtlacol tlacatl tlen ax quitlepanita niyon se tlanahuatili,
yajaya tlen mocuapolos nepa mictla.
\v 4 Nopa tlajtlacol tlacatl quicocolis Toteco huan nochi tlamantli
tlen tlacame quinhueyimatij o quinnotzaj “dios”. Quinequis nochi
quintlamiltis. Mohueyitlalis huan quinequis nochi tlacame ma
quihueyichihuaca san ya. Hasta yas huan mosehuis ipan nopa hueyi
tiopamitl tlen Toteco huan quiijtos para yajaya Dios.
\p
\v 5 ¿Ax inquiilnamiquij nimechilhui ni quema niitztoya imohuaya?
\v 6 Nojquiya ya inquimatij ajqueya yajaya tlen ax quicahuilía ma
monexti nopa tlajtlacol tlacatl hasta ajsis itonal para monextis.
\v 7 Ya pejqui nopa tlajtlacoli tlen quichihuas nopa tlacatl tlen ax
quitlepanita niyon se tlanahuatili, pero yajaya ax huelis monextis,
pampa amantzi itztoc se tlen ax quicahuilía ma monexti. Teipa
Toteco quiquixtis yajaya tlen ax quicahuilía ma monexti,
\v 8 huan huajca quena, mopannextis nopa tlajtlacol tlacatl tlen ax
quitlepanita niyon se tlanahuatili. Huan teipa, quema ajsis
Tohueyiteco tlen onpano quipiya chicahualistli, nimantzi quimictis
nopa tlajtlacol tlacatl san ica iijiyo. Quena, Tohueyiteco
quitzontlamiltis ica itlatlanex tlen monextis quema hualas.
\v 9 Pampa nopa tlajtlacol tlacatl hualas para quichihuas itequi
Axcualtlacatl, huan quipiyas hueyi chicahualistli, huan nesis queja
quichihua tlanescayotl huan huejhueyi chicahualis nescayotl, pero ax
neli nopa tlamantli tlen quichihua, san tlacajcayahua.
\v 10 Quichihuas miyac tlamantli tlen ax cuali ica tlen
quincajcayahuas tlacame tlen mocuapolose para nochipa pampa ax
quinequise quiselise itlajtol Toteco huan quiicnelise tlen melahuac.
Inijuanti ax quinequise motlajtlacolquixtise.
\v 11 Yeca Toteco quinmacas nopa tlacame inintlalnamiquilis para ma
quineltocaca se istlacaticayotl.
\v 12 Huan Toteco quintlalilis tlatzacuiltili pampa ax quineltocaque
tlen melahuac. San mopaquilismacayayaj ica tlen ax cuali
quichihuayayaj.
\s Toteco inmechtlapejpeni para inmechtlajtlacolquixtilis
\p
\v 13 Pero tojuanti, nochipa tijtlascamatij Toteco imopampa
imojuanti, toicnihua, pampa Toteco inmechicnelía miyac. Huan quema
aya pehuayaya tlaltepactli, yajaya ya inmechtlapejpenijtoya para
inmechtlajtlacolquixtis. Huan teipa Itonal Toteco inmechiyocatlali
para inelise iniaxcahua quema inquineltocaque itlajtol Toteco tlen
melahuac.
\v 14 Huan quema timechilhuijque nopa cuali tlajtoli, Toteco
inmechnotzqui para inquipiyase tlen inmechtocaros nepa campa itztoc
Tohueyiteco Jesucristo ica nochi ihueyitilis.
\p
\v 15 Huajca, toicnihua, ximoquetzaca huan ximotlacxilica cuali.
Xijneltocatiyaca san nopa tlamachtilistli tlen nimechmachtijtoc
quema niitztoya imohuaya huan tlen nimechijcuilhuilijtoc ipan
amatlajcuiloli. Amo xijcahuaca, niyon amo xijtoquilica seyoc
tlamachtili.
\v 16 Toteco Jesucristo huan Toteco Totata techicnelía nochi
tojuanti huan techyoltlalijtoc para nochipa pampa hueyi iyolo ica
tojuanti. Yajaya tlen techchihuilía ma tijchiyaca ica paquilistli
nochi nopa cuali tlamantli tlen techmacas teipa.
\v 17 Huan ama Toteco Totata huan Toteco Jesucristo ma
inmechyolchicahuaca huan ma inmechchihuaca intemachme para
inquiijtose huan inquichihuase nochi tlen cuali.
\c 3
\s Xijtlajtlanica Toteco ma techmocuitlahuis
\p
\v 1 Huajca para tijtlamiltise san ya ni, toicnihua. Ximomaijtoca
ica Toteco topampa tojuanti. Xijtlajtlanica para ma momoyahua
nimantzi itlajtol Toteco huan para miyac tlacame ma quiselica huan
ma quitlepanitaca queja panoc quema imojuanti inquicajque.
\v 2 Xijtlajtlanica Toteco ma techmanahui ica ax cuajcualme huan
tlacame tlen fiero quichihuaj, pampa itztoque sequin tlen ax
quineltocaj Toteco.
\v 3 Pero Toteco yajaya temachtli huan yajaya inmechmacas tetili
huan inmechmanahuis tlen Axcualtlacatl.
\v 4 Huan timotemachíaj ipan Toteco para ya inquichihuaj tlen
timechilhuijtoque, huan mojmostla más inquichijtiyase.
\v 5 Ma Toteco inmechpalehui para achi más xijmachilica hasta
canque ontlantoc itlaicnelijcayo para imojuanti. Huan ma
inmechpalehuis inquipiyase imoyolo queja Cristo quipixqui ica tlen
inmechpanotihuala.
\s Nochi tlaneltocani ma tequitica cuali
\p
\v 6 Ama toicnihua, timechnahuatíaj ica itequihuejcayo Tohueyiteco
Jesucristo, ximoiyocatlalica ica nochi tlaneltocani tlen ax tleno
quichihuaj huan ax tequitij chicahuac queja timechmachtijtoque.
\v 7 Pampa inquimatij quinamiqui para inquitoquilise tojuanti huan
tlen cuali tijchijtoque. Huan quema tiitztoyaj imohuaya, ax
titlatzihuiyayaj.
\v 8 Titlaxtlajque para totlacualis tlen tijcuajque para ax
timechcuatotonise. Huan chicahuac titequitiyayaj tonali huan yohuali
yonque nelía ohui elqui totequi.
\v 9 Tijpiyaj tequihuejcayotl para timechtlajtlanijtosquíaj
totlacualis san tlapic, pero ax tijnequiyayaj. Tijnejque
timechcahuilise se cuali nemachtili para huelis inquitoquilise.
\v 10 Huan quema noja tiitztoyaj imohuaya timechmacaque se
tlanahuatili tlen quiijto: Intla se ax quinequi tequitis, ma ax
tlacua.
\v 11 Pampa tijcactoque itztoque sequin campa imojuanti tlen
tlatzihuij huan ax quichihuaj niyon se tequitl. San quinequij
mocalaquise campa ax inincuenta.
\v 12 Huajca ama tiquinnahuatíaj nopa tlaneltocani ica
itequihuejcayo Tohueyiteco Jesucristo huan tiquinyolchicahua ma
tequitica huan ma ax camatica. Huan ica inintequi ma quitlanica tlen
inijuanti quimonequilía.
\p
\v 13 Huan toicnihua, imojuanti tlen ya intequitij cuali, amo
xisiyahuica para inquichihuase tlen cuali.
\v 14 Huan intla se tlaneltocaquetl ax quichihua tlen timechilhuíaj
ipan ni amatlajcuiloli, ximomacaca cuenta ajqueya ya huan amo
ximohuicaca ihuaya para ma mopinahuas.
\v 15 Pero amo xiquitaca queja inmocualancaitaca, pero
xijtlalnamictica pampa yajaya imoicni.
\s Pablo quintlajpalo
\p
\v 16 Toteco, yajaya tlen temaca tlasehuilistli, ma inmechmaca
tlasehuilistli mojmostla yonque tlen hueli inmechpanotihuala. Toteco
ma itzto imohuaya nochi imojuanti.
\p
\v 17 Nica na niPablo nimechtlajcuilhuía ica noma para
nimechtlajpalos. Quej ni nesi na notlajcuilol campa tlamis nochi
noamatlajcuilol, huan quema inquiitase notlajcuilol, inquimatise
nimechtitlanilía nopa amatlajcuiloli.
\v 18 Tohueyiteco Jesucristo ma quipiya hueyi iyolo ica nochi
imojuanti. Queja nopa ma eli.