\id 1TI
\h 1 TIMOTEO
\mt Nopa Achtohui Amatlajcuiloli tlen Pablo Quitlajcuilhui Timoteo
\c 1
\s Pablo quitlajpalo Timoteo
\p
\v 1 Na niPablo tlen niitlayolmelajca Jesucristo nimitztitlanilía ni amatlajcuiloli. Toteco Dios Totemaquixtijca huan Toteco Jesucristo yajaya tlen ipan timotemachiyaj tlanahuatijque ma nieli niitlayolmelajca huan yeca nijchihua ni tequitl.
\v 2 Noicni Timoteo, nimitztlajcuilhuía ni amatlajcuiloli. Nimitzicnelía ipan Toteco queja tinonelcone, pampa tijneltocatoc Toteco queja na nijneltoca. Toteco Totata huan Toteco Jesucristo ma quipiyaca hueyi ininyolo mohuaya huan ma mitztlasojtlaca, huan ma mitzmacaca tlasehuilistli ipan moyolo.
\s Xiquinquetza tlen tlamachtíaj tlen ax neli
\p
\v 3 Timoteo, sampa nimitzilhuía tlen nimitzilhui quema nimitzcajte para niyas tlali Macedonia. Ximocahua nepa ipan altepetl Éfeso huan xiquinnahuati nopa tlacame tlen tlamachtíaj tlen ax neli ma ayoc quichihuaca.
\v 4 Xiquinilhui tlaneltocani nepa ma ayoc moilhuica tlen cuentos tlen huejcajquiya. Ma ax moilhuica monequi quitemose ajqueya elqui ininhuejcapan tatahua huan intla ne sequinoc moilhuíaj para elque cuajcualme o axtle, pampa nopa tlamantli san quichihuaj para tlacame ma monajnanquilica huan ax tleno quisencahuaj. Ax techpalehuíaj para más ma tijneltocatiyaca Toteco queja yajaya quinequi ma tijchihuaca.
\p
\v 5 Pero quema tojuanti tiquinmacaj toicnihua tlanahuatili ma quichihuaca, tijchihuaj para tlahuel ma teicnelica ica ininyolo tlen tlapajpactique iixpa Toteco huan para ma quipiyaca ininyolo tlen ax quinteilhuía para quipiyaj ome ixayac. Tijnequij para nelía ma quineltocaca Toteco ica nochi ininyolo.
\v 6 Sequin tlacame quicajtejque ni tlalnamiquilistli tlen achtohui quineltocayayaj. Ama san monajnanquilíaj ica tlamantli tlen ax ipati.
\v 7 Quinequij elise tlamachtiani tlen itlanahuatilhua Moisés para tlacame ma quinhueyitlepanitase, pero ax quimachilíaj tlaque quiijtohuaj, niyon tlaque inintequi itlanahuatilhua yonque tlamachtíaj ica miyac chicahualistli.
\p
\v 8 Pero tojuanti tijmatij para cuali itlanahuatilhua Moisés intla tlacame quintequihuíaj queja Toteco quinejqui ma tiquintequihuica.
\v 9 Pero Toteco ax quinchijqui nopa tlanahuatili para tlacame tlen itztoque xitlahuaque iixpa. Toteco quinmacac nopa tlanahuatili para tlacame tlen ax tlatlepanitaj, huan ax quintlacaquilíaj tlen quipiyaj tequihuejcayotl, huan san quichihuaj tlen ax cuali. Itztoque tlacame tlen tlajtlacolchijtinemij huan tlen ax tleno quineltocaj, huan tlen hueli camatij tlen Toteco huan quihuejcamajcahua nochi tlen tlatzejtzeloltic. Itztoque tlen quinmictíaj inintatahua huan tlen quinmictíaj sequinoc tlacame.
\v 10 Toteco quimacac nopa tlanahuatili para tlacame tlen quichihuaj tlen hueli ica tlen ax ininnamic, huan para tlacame tlen nemij ininhuaya tlacame, huan sihuame tlen nemij ininhuaya sihuame para tlen hueli quichihuase. Quimacac nopa tlanahuatili para tlacame tlen teixtequij, huan istlacatij, huan teilhuíaj tlen ax melahuac huan tlen quichihuaj miyac tlamantli tlen nopa xitlahuac tlamachtilistli techilhuía ma ax tijchihuaca.
\v 11 Huan nopa xitlahuac tlamachtilistli huala tlen nopa cuali tlajtoli tlen onpano yejyectzi tlen Toteco quicajtejtoc nomaco para ma nijmoyahua. Yajaya tlen quinamiqui ma tijhueyitlalica.
\s Pablo quitlascamatqui Toteco pampa hueyi iyolo
\p
\v 12 Nijtlascamati Tohueyiteco Jesucristo tlen nechyolitac para nitemachtli huan yeca nechmacac ni itequi huan nechfuerzajmacatoc ma nijchihua.
\v 13 Yonque yajaya cuali quimatiyaya para achtohuiya nicahuilmatiyaya itoca Cristo. Achtohui niquintlaijiyohuiltiyaya itlacajhua huan nelía nimosisiniyaya. Pero yonque queja nopa nielqui, Toteco nechtlasojtlac pampa aya nijneltocayaya huan ax nijmachiliyaya tlen nijchihuayaya.
\v 14 Nelía onpano hueyi iyolo Toteco ica na. Yajaya nechmacac nopa tlaneltoquili huan nopa teicnelijcayotl tlen tijpantijque quema techtlatzquilti ipan Cristo Jesús.
\p
\v 15 Nelía temachtli ni tlajtoli tlen nimechilhuis huan monequi nochi quineltocase: Jesucristo hualajqui ipan ni tlaltepactli para quintlajtlacolquixtis tlajtlacolchihuani huan na achi más nitlajtlacolchijtoya tlen nochi sequinoc tlacame.
\v 16 Yeca Toteco nechtlasojtlac pampa Jesucristo quinejqui nechtlalis para tenextis hasta canque ontlami para quipiya iyolo ica tlajtlacolchihuani tlen más onpano tlajtlacolchijtoque. Huan yeca ama sequinoc tlacame quimachilise para nojquiya huelis quineltocase Jesucristo huan quiselise yolistli para nochipa.
\v 17 Huajca ma tijhueyitlepanitaca Toteco, yajaya nopa Tlanahuatijquetl tlen tlanahuatis para nochipa huan ax quema tlamis. Quena, ma tijhueyimatica yajaya tlen ax hueli miquis, huan tlen axaca hueli quiitas, pampa san yajaya Dios huan quipiya nochi tlalnamiquilistli. Queja nopa ma eli.
\p
\v 18 Timoteo, nocone, ni tlanahuatili nimitzmacas. Ximoneltlali huan xitlatehui chicahuac ica tlen ax cuali queja inintiocamanalojcahua Toteco quiijtojque tijchihuasquía.
\v 19 Xijsenhuiquili xijneltoca itlajtol Toteco ica moyolo tlapajpactic iixpa queja ya tijmati tijchihuas. Sequin tlacame quiixpanotoque tlen quiyolmatij para xitlahuac huan quinpantijque para quixolejtoyaj inintlaneltoquilis.
\v 20 Himeneo huan Alejandro itztoque ome tlen queja nopa quichijtoque. Niquinquixti tlen campa tlaneltocani huan niquintemactilijtoc imaco Axcualtlacatl para quimatise ax tlen hueli camatise tlen Toteco.
\c 2
\s Quejatza monequi ma timomaijtoca ica Toteco
\p
\v 1 Timoteo, achtohui nimitztlajtlanía chicahuac para nochi
imojuanti ximomaijtoca ica Toteco ipampa nochi tlacame.
Xijtlajtlanica Toteco ma quintiochihuas huan ma quintlasojtlas.
Xijtlajtlanica ma quinmaca tlen quimonequilía huan xijtlascamatica
Toteco ipampa sesen inijuanti.
\v 2 Quej ni xijtlajtlanica Toteco ipampa tlanahuatiani huan nochi
tlen quihuicaj tequihuejcayotl para inijuanti ma tequitica cuali
huan huelis tiitztose ica cuali huan ica tlasehuilistli. Quej ni
huelis tijtoquilise Toteco huan sequinoc techtlepanitase.
\v 3 Toteco yajaya Totemaquixtijca quipactía ma timomaijtoca para
sequinoc queja nopa,
\v 4 pampa yajaya quinequi nochi tlacame ma momaquixtica huan ma
quimatica tlen nelía melahuac.
\v 5 Pampa itztoc san se Dios. Itztoc san se tlen motlajcoquetza
tlatlajco Dios huan tlacame para quinyoltlalis se ica seyoc, huan
yajaya Jesucristo tlen mocuepqui tlacatl.
\v 6 Jesucristo motemacac huan mijqui ipampa nochi tlacame para
tlaxtlahuas tlen monequiyaya huan para techmalacanis tlen
totlajtlacolhua. Huan quema ajsic hora Toteco technextili nochi tlen
quichijtoya.
\p
\v 7 Huan yeca Toteco nechtequitlalijtoc na para nielis
niitlayolmelajca huan para ma nitlacamanalo itlajtol. Nechtequitlali
para ma niquinmachti tlacame tlen ax israelitame para ma
quineltocaca huan ma quimatica tlen melahuac. Nimitzilhuía tlen
melahuac huan ax niistlacati.
\p
\v 8 Huajca quema mosentilíaj tlaneltocani campa hueli, nijnequi
para tlacame ma momaijtoca. Pero quema quitlalanaj ininma para
momaijtose ma itztoca tlatzejtzeloltique iixpa Toteco. Ma ax
quipiyaca cualantli niyon tlanajnanquilistli ipan ininyolo.
\p
\v 9 Huan nijnequi sihuame ma moyoyontica huan moyectlalise queja
quinamiqui para sequinoc ma quintlepanitaca. Ma ax huejcahuaca para
mocualtlalise ica miyac oro, huan perlas, huan yoyomitl tlen tlahuel
patiyo para tlacame ma quintlachilica.
\v 10 Achi cuali ma quinitaca sihua tlaneltocani para yejyectzitzi
pampa quichihuaj miyac tlamantli tlen cuali queja quinamiqui sihuame
tlen quineltocaj Toteco.
\p
\v 11 Ipan tlasentilistli nopa sihuame ma quitlacaquilica nopa
tlamachtilistli huan ma quiselica ica nochi ininyolo.
\v 12 Ax niquincahuilía sihuame ma quipiyaca nopa tequitl para
quinmachtise tlacame ipan tlasentilistli, niyon para quipiyase
tequihuejcayotl ica tlacame. Ma san tlacaquica.
\v 13 Pampa Toteco quichijqui Adán achtohui huan teipa quichijqui
Eva.
\v 14 Huan Axcualtlacatl quicajcayajqui Eva huan yajaya
tlajtlacolchijqui. Ax quicajcayajqui Adán.
\v 15 Pero Toteco quinmaquixtis sihuame ica nopa conetl tlen
quichijqui ma tlacati intla inijuanti quineltocase huan teicnelise
huan quipiyase ininnemilis tlen tlatzejtzeloltic huan
inintlalnamiquilis tlen cuali.
\c 3
\s Xiquintequitlali cuali tlacame para quinyacanase tlaneltocani
\p
\v 1 Nimitzilhuis se tlajtoli tlen temachtli. Intla se tlacatl
quinequi mochihuas se huehue tlaneltocaquetl para tlayacanas ipan
tlasentilistli, quinequi se cuali tequitl.
\v 2 Pero monequi se tlayacanquetl tlen tlaneltocani ma eli se
tlacatl tlen axaca huelis quiteilhuis. Monequi quipiyas setzi isihua
huan san itztos ica ya. Monequi ma eli se tlacatl tlen cuali
monahuatía huan tlen quitlamichihua itequi. Ma eli se tlacatl tlen
nochi quitlepanitaj, huan tlen quipactía quinselis paxalohuani ipan
ichaj, huan tlen nelía cuali tlamachtía itlajtol Toteco.
\v 3 Monequi se tlacatl tlen ax quema moihuintía, niyon ax
mosisinía. Monequi se tlen nelía quipiya iyolo ica tlacame, huan
ax cualancatemohua. Monequi se tlen ax quinequi tomi tlen ax iaxca.
\v 4 Xijtequitlali se tlacatl tlen cuali quinyacana nochi ipan ichaj
huan tlen quinpiya iconehua tlen quitlacaquilíaj itlajtol ica miyac
tlatlepanitacayotl.
\v 5 Pampa intla se tlacatl ax hueli tlayacana ipan ichaj, quejatza
huelis quimocuitlahuis tlaneltocani ipan itiopa Toteco.
\v 6 Amo xijtequitlalica se tlacatl para tlayacanquetl tlen yancuic
quineltocatoc Toteco, pampa san polihui mohueyimatis queja
quichijqui Axcualtlacatl huan queja nopa quiselis se tlatzacuiltili
queja yajaya quiseli.
\v 7 Nojquiya monequi xijtlalica se huehue tlaneltocaquetl tlen
quitlepanitaj nochi tlacame yonque ax quineltocaj Toteco. Queja nopa
axaca huelis quiteilhuis huan nopa Axcualtlacatl ax quicajcayahuas.
\s Tlapalehuiani ipan tiopamitl tlen tlaneltocani
\p
\v 8 Nojquiya tlacame tlen quinequij mochihuase tlapalehuiani ipan
tiopamitl tlen tlaneltocani monequi elise tlacame tlen nochi
quintlepanitaj. Xiquintequitlalica tlacame tlen ax quipiya ome
ixayac, huan tlen ax quema moihuintíaj, huan tlen ax quinequij tomi
tlen ax iniaxca.
\v 9 Xiquintlalica tlacame tlen yoltlapajpactique huan tlen ica
nochi ininyolo quineltocaj nopa tlamachtilistli tlen Jesucristo tlen
axaca quimatiyaya hasta Toteco technextili.
\v 10 Pero quema aya tiquintlalijtoc queja tlapalehuiani, monequi
xiquinmacaca seyoc tequitl ipan tlasentilistli para tiquinyejyecos
intla quichihuase cuali nopa tequitl iniixpa nochi, o axtle. Intla,
quena, cuali quichihuaj, huajca xiquintequitlalica queja
tlapalehuiani.
\v 11 Huan nojquiya nopa sihuame monequi elise cuali sihuame tlen
nochi quintlepanitaj. Ma ax elica sihuame tlen teilnamiquini, niyon
tlen moihuintíaj, pero ma elica sihuame tlen temachme ica nochi
tlen quichihuaj.
\v 12 Monequi sesen tlaca tlapalehuijquetl quipiyas san setzi isihua
huan san itztos ica ya. Monequi tlaca tlapalehuiani ma elica tlacame
tlen quimocuitlahuíaj ininchaj huan quinyacanaj ininconehua ica
cuali.
\v 13 Pampa tlacame tlen quichihuase nelía cuali ni tequitl tlen
tlapalehuiani ipan tiopamitl quipiyase inintlatlepanitacayo huan
quineltocase Jesucristo ica más temachili.
\s Tlen tojuanti tijneltocaj
\p
\v 14 Nimitztlajcuilhuía ama yonque nijnequi ax huejcahuas para
nimechitati.
\v 15 Pero intla ax hueli niyas nimantzi, nijnequi nimechmatiltis
queja monequi tlaneltocani ma mochihuase ipan ifamilia Toteco. Pampa
nopa tlaneltocani tlen mosentilíaj, inijuanti itiopa Toteco tlen
yoltoc huan eltoque queja tlaquetzali tlen quiijiyohuíaj nopa tlen
melahuac.
\v 16 Nochi quimatij para nelía hueyi nopa tlen Toteco technextili
para ma tijmachilica tlen ya:
\q Cristo mochijqui tlacatl huan monexti campa tojuanti.
\q Itonal Toteco technextili para yajaya elqui xitlahuac iixpa
Toteco.
\q Elhuicac ehuani quiitaque.
\q Huan tlaneltocani quinilhuijque miyac tlacame ipan campa hueli
tlali tlen ya.
\q Miyac tlacame ipan ni tlaltepactli quineltocaque.
\q Huan teipa Toteco sampa quitlejcolti huan quiseli ipan elhuicac.
\c 4
\s Sequin tlacame quicahuase Jesucristo para quitoquilise sequinoc tlamachtili
\p
\v 1 Itonal Toteco techyolmelajtoc xitlahuac para ipan itlamiya
tonali sequin tlacame quicahuase tlen tijneltocaj. Quintlacaquilise
ajacame tlen Axcualtlacatl tlen san tlacajcayahuaj huan quiselise
inintlamachtil.
\v 2 Ni tlamachtiani san quipiyaj ome ininxayac huan istlacatini,
pero pampa quipiyaj ininyolo mictoc, ayoc tleno moilhuíaj quema
quichihuaj tlen ax cuali.
\v 3 Quiijtohuaj para se tlaneltocaquetl ax hueli quipiyas inamic.
Quiijtohuaj ayoc huelis tijcuase sequin tlamantli tlacualistli. Pero
Toteco quichijtoc nopa tlacualistli para tojuanti tlen tijneltocaj
Toteco huan tijmatij tlen melahuac ma tijcuaca ica tlascamatili.
\v 4 Pampa nochi tlacualistli tlen Toteco quichijtoc eltoc cuali
huan ax monequi tijhuejcamajcahuase niyon se. Huelis tijtlascamatise
Toteco huan tijselise nochi,
\v 5 pampa Itlajtol Toteco quiijtohua yajaya quitiochihuas huan
quitlatzejtzelolchihuas totlacualis quema tijtlascamatij.
\s Se cuali tlatequipanojquetl tlen Jesucristo
\p
\v 6 Xiquinmachtis tlaneltocani nepa ni tlamantli tlen
nimitzilhuijtoc, huan queja nopa tielis se icual tlatequipanojca
Jesucristo. Huan se cuali tequihue monequi momachtis nopa tlajtoli
tlen quineltoca. Quena, motlamacas ica nopa cuali tlamachtilistli
tlen quitoquilía queja elisquía itlacualis.
\v 7 Amo xijtlacaquili huihui tlajtoli huan tlajtoli tlen ax ipati
tlen camatij sequin tename, pero xijtequihui moyolis huan
mochicahualis para más timocualchijchihuas ipan Toteco.
\v 8 Intla tijcualchijchihuas motlacayo, cualtitoc. Pero más ipati
intla timocualchijchihuas ipan Toteco, pampa mitzpalehuis para
nochipa. Ipati ama quema tiitztoque ipan ni tlaltepactli huan achi
más ipati elis teipa quema tiitztose elhuicac.
\v 9 Temachtli ni tlajtoli tlen nimitzilhuijtoc huan quinamiqui para
nochi tlacame ma quiselica.
\v 10 Huan yeca tojuanti chicahuac titlatequipanojtinemij huan
titlaijiyohuijtinemij pampa tijnequij timochixtose ipan yajaya
Toteco tlen yoltoc huan ax quema miquis. Yajaya inintemaquixtijca
nochi tlacame huan quinmaquixtis para nochipa nochi tlen
quineltocaj.
\p
\v 11 Xiquinmachti nopa tlaneltocani nochi ni tlen nimitzilhuijtoc
huan xiquinnahuati ma quichihuaca.
\v 12 Ma axaca quiijto ax monequi mitztlacaquilis pampa noja
titelpoca tlacatl. Pero xiquinnextili tlaneltocani tlen cuali para
quichihuase ica tlen titlamachtía huan ica tlen tijchihua.
Xiquinnextili quejatza ma teicnelica huan ma quineltocaca Toteco ica
nochi ininyolo huan quejatza ma quipiyaca ininyolis tlen
tlapajpactic.
\v 13 Hasta quema niajsiti nepa, ya ni monequi xijchijtiya quema
inmosentilíaj. Xijpohua Itlajtol Toteco para nochi quicaquise.
Xiquinmachti tlen quiijtosnequi. Huan xiquinyolchicahua tlaneltocani
ma quichihuaca tlen quiijtohua.
\v 14 Xijtequihui nopa yajatili tlen Toteco mitzmacac quema nopa
huehue tlaneltocani mitztzonmajpachojque huan Toteco quinmacac
tlajtoli para camatise tlen nochi nopa cuali tequitl tlen
tijchihuasquía teipa.
\p
\v 15 Ica nochi moyolo xijchijtinemi nochi ni tlamantli tlen
nimitzilhuijtoc. San ya nopa xijmati para nochi tlaneltocani
quiitase para mojmostla tijchihua más cuali itequi Toteco.
\v 16 Ximotlachili para san tlen xitlahuac tijchihuas huan para san
tlen cuali titlamachtis. Xijsentoquili ya ni. Intla quej ni
tijchihuas, Toteco mitzmaquixtis ta huan inijuanti tlen
mitztlacaquilise.
\c 5
\s Quejatza monequi Timoteo ma nemi iniixpa tlaneltocani
\p
\v 1 Amo xicajhua se huehue tlacatl quema quichihua tlen ax cuali.
Achi cuali xijnojnotza ica yamanic queja elisquía motata. Huan tlen
san cuali chicaj tlacame, xiquinnojnotza queja elisquíaj moicnihua.
\v 2 Xiquincamahui sihuame tlen tename queja elisquíaj monanahua
huan chicaj sihuame queja elisquíaj mosihua icnihua. Huan quema
tiquincamahuía, xijpiya motlalnamiquilis tlapajpactic.
\p
\v 3 Monequi tlaneltocani quimocuitlahuise nochi cahual toahuihua
tlen axaca quipiyaj para quinpalehuis.
\v 4 Pero intla se cahual toahui quinpiya iconehua o iixhuihua tlen
ya huejhueyi para quipalehuise, huajca monequi ma quipalehuica.
Monequi iconehua quiitase para Toteco quintequimacatoc achtohui ma
quichihuaca tlen cuali ica inintatahua o tlen itztoque
ininchampoyohua. Quena, monequi quicuepilise tlen yejyectzi
inintatahua quinchihuilijque quema quiniscaltijque, pampa Toteco
quipactía quema se quinmocuitlahuía itatahua.
\v 5 Pero ica cahual toahuihua tlen nelía mocahuaj
ininpilseltitzitzi huan axaca quipiyaj para quinpalehuis, huajca,
quena, monequi xiquinpalehuica. Inijuanti san mochiyaj ipan Toteco
huan momaijtohuaj huan quitlajtlaníaj tonaya huan yohuali para ma
quinmacas tlen ica panose.
\v 6 Pero sequinoc cahual toahuihua san quitemohuaj tlen quinpactía
inintlacayohua. Yonque yoltoque, Toteco quinita queja tlen ya
mictoque.
\v 7 Xiquinnahuati tlaneltocani ma quichihuaca nochi ni para ax aqui
huelis quinteilhuis pampa ax quinpalehuíaj cuali cahual toahuihua,
niyon pampa quinpalehuíaj tlen ax nemij cuali.
\v 8 Pero intla se ax quinequi quimacas itata, o inana, o sequinoc
ichampoyohua tlen quimonequilía, huajca ica ya nopa quiijtohua ayoc
quineltoca Toteco. Huan quichijtoc más fiero que se tlacatl tlen ax
quema quineltocatoc Toteco.
\p
\v 9 Amantzi nimitzilhuis catlía cahual toahuihua
inquintlapejpenise huan inquinijcuilose ipan tiopa. San
xiquintlapejpenica cahual toahuihua tlen ya quipiyaj sesenta xihuitl
huan tlen nochipa itztoyaj san ica ininhuehue,
\v 10 huan tlen nochi tlaneltocani quimatij para quichijtinentoque
tlen cuali. Quena, xiquinijcuilo toahuihua tlen cuali
quiniscaltijtoque ininconehua huan tlen ica paquilistli quinselíaj
paxalohuani. Monequi sihuame tlen quinpajpaquilijtoque iniicxihua
tlaneltocani o tlen hueli tlamantli tequitl tlen monequi.
Xiquintlapejpeni tlen ax quema mohueyimatij huan tlen quimatij
quinpalehuíaj tlen tlaijiyohuíaj. Quena, xiquintlapejpeni nopa
cahual toahuihua tlen ica nochi ininyolo quichijtoque tlen cuali.
\p
\v 11 Pero cahual toahuihua tlen aya quipiyaj sesenta xihuitl amo
xiquinijcuiloca ipan tiopamitl, pampa tlen inintlacayo quinequi,
quiniyocatlalis tlen itequi Toteco huan sampa quinequise
monamictise.
\v 12 Yeca Toteco quintlatzacuiltis pampa ax quichijque tlen
quitlajtolcajque para quichihuase quema moijcuilojque ipan tiopa.
\v 13 Huan san polihui para cahual toahuihua tlen ax más quipiyaj
xihuitl pehuas motlatzcanequise quema calnemise ipan inintequi. Huan
nojquiya huelis teilnamiquise, huan tlatzintocatinemise tlen ax
inincuenta. Huan quej nopa camatise tlen ax quinamiqui quiijtose.
\v 14 Huajca nijnequi cahual toahuihua tlen ax más quipiyaj xihuitl
sampa ma monamictica huan quipiyase más ininconehua. Nijnequi cuali
ma quimocuitlahuise ininchajchaj. Ax tleno ma quichihuaca tlen ica
tocualancaitaca huelis quinteilhuis.
\v 15 Pampa sequin cahual toahuihua ya quicajtejtoque Toteco huan
quitoquilíaj Axcualtlacatl.
\p
\v 16 Nojquiya intla se sihuatl o se tlacatl tlen quineltoca Toteco
quinpiya cahual toahuihua tlen quinita queja iteixmatcahua, monequi
quinpalehuis huan ax quincahuas para nopa tiopamitl tlen
tlaneltocani ma quinpalehuica. Queja nopa, tlaneltocani huelise
quinpalehuise san nopa cahual toahuihua tlen nelía axaca quipiyaj.
\p
\v 17 Monequi nochi toicnihua ma quintlepanitaca nopa huehue
tlaneltocani tlen tlayacanaj ipan tiopamitl intla tequitij cuali.
Huan monequi ma quintlaxtlahuica cuali. Pero achi más ma
quintlepanitaca huan ma quintlaxtlahuica nopa tlayacanani tlen ica
nochi ininchicahualis tlacamanalohuaj huan tlamachtíaj Itlajtol
Toteco,
\v 18 pampa Itlajtol Toteco quiijtohua: “Amo xijcamailpi nopa toro
tlen ipan moquejquetza trigo para quiyolquixtis.” Huan nojquiya
quiijtohua: “Quema se tlacatl tequiti, monequi para quiselis
itlaxtlahuil.”
\p
\v 19 Amo xijtlacaquili se tlacatl tlen quiteilhuía se huehue
tlacatl tlen quinyacana tlaneltocani. Pero intla ome o eyi
quiteilhuíaj, huajca quena, xiquinchihuili cuenta.
\v 20 Huan intla se huehue tlacatl noja tlajtlacolchihua,
xijteilhuica iniixpa nochi tlaneltocani para sequinoc quiimacasise
tlajtlacolchihuase.
\v 21 Timoteo, nimitznahuatía iixpa Toteco Dios, huan iixpa
Jesucristo, huan iniixpa nopa elhuicac ehuani tlen
tlatzejtzeloltique, xijchihuas ni tlamantli tlen
nimitzilhuijtoc iniixpa nochi tlaneltocani huan amo
xiquinchicoicneli huehue tlaneltocani tlen mohuampoyohua.
\v 22 Amo xijtlali moma ipan se tlacatl nimantzi para tijtequimacas
queja se huehue tlaneltocaquetl tlen tlayacanas. Pampa intla
tijtzonmajpachos para tijtequitlalis se tlacatl huan teipa
tlajtlacolchihuas, huajca motlajtlacol nojquiya pampa ax tijpixqui
tlamocuitlahuili achtohui ajqueya tijtequitlali. Huajca ximotlachili
para tijchihuas tlen nelía cuali huan ax titlajtlacolchihuas.
\p
\v 23 Nojquiya nimitzyolmelahuas tlen moijti huan nopa cocolistli
tlen tijpiya ajachica. Ax san atl xiqui, nojquiya xiqui quentzi
xocomecatl iayo tlen cococ para timochicahuas.
\p
\v 24 Huan ica tlacame tlen tiquintlapejpenía, xiquilnamiqui para
itztoque sequin tlacame tlen nempa nesi inintlajtlacolhua huan nochi
quimatij Toteco quintlajtolsencahuas. Pero itztoque sequinoc tlacame
tlen ax nesis inintlajtlacolhua hasta miyac tonali teipa huan huajca
quena, nochi quimatise.
\v 25 Ihuical ica cuali tequitl tlen tlacame quichihuaj. Ica sequin
nimantzi nempa nesi tlen cuali quichijtoque huan nochi quimatij.
Pero itztoque sequinoc tlacame tlen quichihuaj cuali tequitl huan ax
nesis nimantzi, pero teipa quena, nesis inintequi tlen cuali pampa
ax hueli huejcahuas motlatijtoc. Huajca xijpiya tlamocuitlahuili
xijtlachili ajqueya inijuanti tiquintlalis para tlayacanani.
\c 6
\p
\v 1 Toicnihua tlen itztoque tlatequipanohuani tlen inintecohua
quincojtoque para iniaxca monequi quintlepanitase inintecohua ipan
tlaltepactli para axaca huelis quitlaijilhuis itoca Toteco huan
itlamachtil.
\v 2 Huan intla toicnihua tlen tlatequipanohuani quipiyaj ininteco
tlen nojquiya quineltocaj Toteco, ma ax quicahuaca quintlepanitaj.
Monequi achi más cuali ma quintequipanoca pampa ininteco nojquiya
eli iniicni ipan Jesucristo. Huan inincualtequi tlen nopa
tlatequipanohuani quichihuaj quipalehuis se tlaneltocaquetl tlen
Toteco quiicnelía. Huajca Timoteo, xiquinmachtijtinemi huan
xiquincamahuijtinemi ni tlamachtilistli.
\s Quejatza paquise tlaneltocani
\p
\v 3 Intla itztoc se tlacatl tlen tlamachtía seyoc tlamantli tlen
ax queja ni temachtli tlamachtilistli tlen Tohueyiteco Jesucristo,
huajca ax neli inintlajtol, pampa ni tlamachtilistli techpalehuía
ma tijpiyaca toyolis más queja Toteco.
\v 4 Huan se tlen tlamachtía seyoc tlamantli san mohueyimati huan
ax tleno quimati. San quipactía tlanajnanquilis huan
tecamaijixnamiquis ica tlen quinequi quiijtos sesen piltlajtoltzitzi
tlen tlacame quiijtohuaj. Queja nopa tlacame pehuaj mochicoitaj,
huan moiyocaquixtíaj, huan quintlaijilhuíaj sequinoc, huan
moilhuíaj ne sequinoc tlajtlacolchijtoque quema huelis ax melahuac.
\v 5 Ni tlamachtiani nochipa quichihuaj para ma onca tlatehuijcayotl
ica ininhuihui tlajtol tlen huala ipan inintlalnamiquilis tlen
ijtlacajtoc. Ax quiijtohuaj tlen melahuac. Mochihuaj queja
quitoquilíaj Toteco itlajtol, pero san quinequij quitlanise miyac
tomi. Huajca xiquincajtehua nopa tlamachtiani.
\p
\v 6 Pero intla tojuanti nelía tijtoquilíaj Toteco itlajtol huan
tipaquij ica tlen tijpiyaj, tijtlantoque miyac. Quena, tiitztoque
queja tominpiyani.
\v 7 Pampa ax tleno tijhualicaque ipan ni tlaltepactli quema
titlacatque huan temachtli ax tleno tijhuicase quema timiquise.
\v 8 Huajca intla tijpiyaj tlen tijcuase huan tlen timoquentise, ma
tipaquica,
\v 9 pampa tlacame tlen tlahuel quinequij miyac tomi, nimantzi
huetzise, pampa tlajtlacoli quinyoltilanas. Eltoc queja se
tlaquetztli tlen quinmasiltía. Huan inijuanti pehuase quinequise
más tlamantzitzi tlen quinijtlacos. Huan ya nopa quinhuicas ipan se
ojtli tlen quixolehuas ininyolis hasta teipa mopolose.
\v 10 Miyac tlamantli tlajtlacoli pehua quema se tlacatl quiicnelía
tomi huan mojmostla quinequi quipiyas más. Sequin tlen tlahuel
quinequiyayaj tomi ya quicajtejtoque quineltocaj Toteco huan yeca
quipantijtoque miyac tlacuajcualocayotl.
\s Xieli queja se cuali soldado
\p
\v 11 Pero ta Timoteo, ta tise tlacatl tlen tiiaxca Toteco. Huajca
xijtlalcahui nochi tlen ax cuali queja ya nimitzilhui. Huan
xijtoquili tlen xitlahuac. Mojmostla xiitzto más queja Toteco. Más
xijneltoca ya huan más xiquinicneli mohuampoyohua. Mojmostla
xijsentoquili motequi huan xijpiya moyolo ica nochi tlacame.
\v 12 Ximoneltlali para titlatehuis ica tlen ax cuali queja
quichihua se cuali soldado. Quena, tiitztoque ipan se
tlatehuijcayotl para ma mocahua senquistoc melahuac totlaneltoquilis
huan para más tlacame ma quicaquise huan quineltocase. Ximoaxcati
nopa yolistli para nochipa tlen Toteco mitzmacatoc. Tiquijto iniixpa
miyac tlacame quejatza tijneltoca Jesús; huajca ax quema xijcahua.
\v 13 Timoteo, nimitznahuatía iixpa Totata tlen quinmaca yolistli
nochi tlamantli tlen itztoque huan iixpa Cristo Jesús tlen quiilhui
Poncio Pilato tlen melahuac quema itztoya iixpa,
\v 14 xiquinchihua nochi ni tlanahuatili tlen nimitzilhuijtoc ica
moyolo senquistoc tlapajpactic para axaca huelis mitzteilhuis pampa
tijpatlatoc nopa tlamachtili. Huan queja nopa xijchijtiya hasta
monextis Jesucristo quema sampa hualas.
\v 15 Pampa quema ajsis nopa tonal tlen cuali, Toteco Dios quiilhuis
Tohueyiteco Jesucristo ma sampa hualas tlen elhuicac. Pampa Toteco
Dios quinahuatía nochi tlen onca huan yajaya tlen quinamiqui
tijhueyitlalise. Yajaya nopa Tlanahuatijquetl tlen quinnahuatía
nochi tlanahuatiani ipan tlaltepactli huan yajaya ininTeco nochi
tecojme.
\v 16 San yajaya quipiya yolistli para nochipa ipan ya. Yajaya
mocahua ipan nopa tlahuili tlen chicahuac tlahuía hasta axaca
huelis monechcahuis. Axaca se tlacatl tlen quiitztoc Toteco Totata
huan axaca hueli quiita. Ma tijnextilica nochi tlatlepanitacayotl
pampa yajaya quipiya nochi tlanahuatili huan quipiyas para nochipa.
Queja nopa ma eli.
\p
\v 17 Xiquinilhui tlaneltocani tlen quipiyaj miyac tomi nica ipan ni
tlaltepactli, ma ax mohueyimatica huan ma ax motemachica ipan
inintomi pampa nimantzi huelis quipolose nochi. Xiquinilhui ma
motemachica ipan Toteco tlen itztoc huan techmaca nochi tlen onca
para ma tipactoca huan techmaca hasta mocahua.
\v 18 Xiquinilhui tlen tominpiyaj ax san ma quipiyaca miyac tomi,
pero nojquiya ma quichihuaca miyac tlamantli tlen cuali. Ma ax
mochihuaca itzcuime, pero ica paquilistli ma quintemoca tlacame tlen
ax quipiyaj tomi para quinpalehuise.
\v 19 Quej ni quema noja itztoque nica quitlantiyase miyac
tlatlancayotl tlen Toteco quiajoctiyas nepa elhuicac huan se tonal
quinmacas. Queja nopa quipantise nopa yolistli tlen nelnelía cuali.
\s Tlen monequi quichihuas Timoteo
\p
\v 20 Ta Timoteo, xijmocuitlahui nopa tlamachtili tlen Toteco
mitzmacac pampa motemachi ipan ta. Xiquincajtehua nopa tlacame tlen
monajnanquilíaj huan camatij tlen ax cuali huan tlen ax ipati.
Quena, xiquincahua nopa tlamachtiani tlen quiijtohuaj quimatij
nochi, pero ax neli, pampa huihuitique.
\v 21 Sequin tlacame quitoquilijque inintlamachtil huan quicajtoque
tlen quineltocayayaj. Timoteo, Toteco ma quipiya hueyi iyolo
mohuaya. Queja nopa ma eli.