\id 2TI
\h 2 TIMOTEO
\mt Nopa Ompa Amatlajcuiloli tlen Pablo Quitlajcuilhui Timoteo
\c 1
\s Pablo quitlajpalo Timoteo
\p
\v 1 Na niPablo, niitlayolmelajca Jesucristo nimitztlajcuilhuía ni amatlajcuiloli. Toteco Dios ica ipaquilis nechtequitlali niitlayolmelajca. Nechtequimacac ma niquinilhui tlacame tlen nopa yolistli tlen quintencahuilijtoc quinmacas nochi tlen motlatzquiltijtoque ipan Cristo Jesús.
\v 2 Noicni Timoteo, nimitzicnelía queja tinocone. Toteco Dios huan Toteco Jesucristo ma quipiya hueyi iyolo mohuaya. Ma mitztlasojtla huan ma mitzmaca tlasehuilistli ipan moyolo.
\s Amo ximopinahua xiteyolmelahua tlen Jesucristo
\p
\v 3 Nochipa nimitzilnamiqui huan nijtlascamati Toteco yohuali huan tonali pampa tijneltocatoc. Yajaya tlen nijtequipanohua ica noyolo tlapajpactic iixpa queja nohuejcapan tatahua nojquiya quichijque.
\v 4 Nijnequi sampa nimitzitas pampa niquilnamiqui queja tichocac quema timonahuatijque huan nipaquis miyac quema sampa timoitase.
\v 5 Nijmati ta tijneltoca Toteco ica nochi moyolo queja achtohui quichijqui mohueyi nana, Loida, huan teipa monana, Eunice.
\p
\v 6 Huajca nimitzilnamiquiltía xijtequihui huan xijmaca tetili nopa yajatili tlen Toteco mitzmacac quema nimitztzonmajpacho.
\v 7 Pampa nopa tonaltzi tlen Toteco techmacatoc ax techchihua ma timajmahuica. Yajaya techmaca chicahualistli. Techchihuilía ma tiquinicnelica tlacame huan ma tijpiyase cuali totlalnamiquilis.
\v 8 Huajca ax quema ximopinahua xiquinyolmelahua tlacame tlen Jesucristo huan xiquinilhui na nitzactoc pampa nijneltoca. Huan ica ichicahualis Toteco monequi xiquijiyohuis nochi tlen monequi titlaijiyohuis pampa titeilhuía itlajtol.
\v 9 Pampa yajaya Toteco techmaquixti tlen totlajtlacolhua huan technotzqui para ma tiitztoca titlatzejtzeloltique iixpa. Ax techmaquixti tlen totlajtlacolhua pampa tijchihuayayaj tlen cuali. Toteco techmaquixti san pampa quipixqui hueyi iyolo ica tojuanti huan quinejqui ya nopa quichihuas. Toteco quiijto quema aya quichihuayaya tlaltepactli para teipa quipiyasquía hueyi iyolo tohuaya ipampa tlen Jesucristo techchihuilisquía.
\v 10 Pero ama technextilijtoc nochi tlen quisencajqui quichihuas pampa Totemaquixtijca Jesucristo hualajqui huan quixolejqui ichicahualis miquilistli para ayoc tleno huelis techchihuilis. Huan yajaya technextilijtoc para tiitztose para nochipa ihuaya ya intla tijneltocase itlajtol.
\p
\v 11 Huan Toteco nechtequitlalijtoc niitlacamanalojca huan niitlayolmelajca huan niitlamachtijca para ma niquinilhui tlacame tlen ax israelitame ni cuali tlajtoli.
\v 12 Yeca nitlaijiyohuía nica ipan tlatzactli. Pero ax nimopinahua, pampa niquixmati yajaya tlen nijneltoca huan nijmati temachtli para yajaya quipiya chicahualistli para quimocuitlahuis tlen nijcajtoc imaco hasta ajsis nopa tonal tlen ya quitlalijtoc.
\p
\v 13 Timoteo, quema tiquinilhuía tlacame ni cuali tlajtoli tlen nimitzilhuijtoc, amo xijpatla niyon se quentzi. Huan xitenextili quejatza tijneltoca Toteco huan tiquinicnelía tlacame pampa tiitztoc ipan Jesucristo.
\v 14 Ica itlapalehuil Itonal Toteco tlen mocahua ipan toyolo, xijmocuitlahui nopa cuali tlajtoli tlen Toteco quicajtoc momaco, huan axaca xijcahuili ma quipatla.
\p
\v 15 Huelis ya tijmati nechcajtejque nochi tlaneltocani tlen ajsicoj nica tlen tlali Asia, hasta nojquiya nechcajtejque Figelo huan Hermógenes.
\v 16 San Onesíforo, axtle. Toteco ma quitlasojtla ica nochi ichampoyohua pampa miyac huelta yajaya hualajqui para nechyolchicahuas, huan ax pinajqui pampa niitztoya nica niilpitoc ica tepos cadena.
\v 17 Huan quema Onesíforo itztoya ipan altepetl Roma, ax moquetzqui nechtemojtinenqui hasta nechpanti.
\v 18 Ma Toteco quitlasojtla ipan nopa tonal quema techtequitlachilis. Ta cuali tijmati queja techpalehui nojquiya nepa ipan altepetl Éfeso.
\c 2
\s Se cuali soldado tlen Jesucristo
\p
\v 1 Nocone Timoteo, tijmati para nelía hueyi iyolo Toteco ica ta
ipan Cristo Jesús huan mitzmacatoc miyac yajatili.
\v 2 Nopa tlamachtili tlen tijcajqui nitlamachti iniixpa miyac
tlacame, ama xiquinmachti sequinoc tlen temachme para teipa
inijuanti no huelise quinmachtise sequinoc.
\p
\v 3 Nojquiya xiquijiyohui tlaijiyohuilistli nohuaya queja se cuali
soldado tlen Jesucristo.
\v 4 Xijchihua queja se tlacatl tlen mosoldadojchihua. Yajaya ax
hueli moilpis ica tlamantli ipan ininyolis sequinoc tlacame. San
hueli moyolilhuía quejatza quipactis iteco tlen quisoldadojchijqui.
\v 5 Huan xijchihua queja se motlalojquetl tlen motlalohua ica
sequinoc para quiitase ajqueya tlatlanis. Monequi motlalos
senquistoc xitlahuac queja quiijtohua tlanahuatili o ax huelis
tlatlanis huan quiselis nopa xochi corona.
\v 6 Huan milchihuani monequi achtohui ma tequitica chicahuac para
huelis teipa quicuase tlen quipixcase.
\v 7 Huajca ximoyolilhui miyac ica tlen nimitzilhuijtoc nica huan
Toteco mitzpalehuis tijmachilis nochi.
\p
\v 8 Xiquilnamiqui Jesucristo quema titlaijiyohuía. Yajaya tlen
tlacatqui queja iteipan ixhui Tlanahuatijquetl David tlen
huejcajquiya huan yajaya tlen sampa moyoliti quema mictoya. Ya ni
nopa cuali tlajtoli tlen nitlacamanalohua,
\v 9 huan yeca niquijiyohuía miyac tlaohuijcayotl huan niilpitoc
ica tepos cadena queja se tlaixpanoquetl tlen temajmati. Pero yonque
na niilpitoc ica tepos cadena, Toteco itlajtol ax ilpitoc.
\v 10 Huan niquijiyohuía nochi tlen huala pampa niquinicnelía
inijuanti tlen Toteco quintlapejpenijtoc nojquiya para iaxcahua.
Nijnequi inijuanti ma momaquixtica ipan Cristo Jesús para huelis
itztose para nochipa nepa campa tlatlanextli.
\p
\v 11 Ya ni se tlajtoli tlen melahuac:
\q Intla timijque quema Cristo mijqui,
\q nojquiya tiyoltose ihuaya.
\q
\v 12 Intla tiquijiyohuíaj tlaohuijcayotl pampa tiquixmatij,
\q se tonal titlanahuatise ihuaya.
\q Intla tiquijtohuaj ax tijchihuase tlen Cristo techilhuía,
\q huajca yajaya quiijtos ax techmacas nopa tlatlancayotl.
\q
\v 13 Intla tojuanti ax tiitztoque titemachme,
\q yajaya mocahua temachtli pampa ax hueli quiijtos ax moixmati ica
iselti huan yajaya itztoc ipan toyolo.
\s Xijchihua itequi Cristo ica nochi mochicahualis
\p
\v 14 Xiquinilnamiquilti tlaneltocani tlen ni tlamantli.
Xiquinnahuati iixpa Toteco ma ax tlanajnanquilica tlen quiijtosnequi
sesen tlajtoli, pampa ax ipati huan quitlaminenpolos ininyolis tlen
quitlacaquilise.
\v 15 Xitequiti chicahuac para quema ajsis nopa tonal quema
timonextis iixpa Toteco, yajaya hueli quiijtos para tijchijqui tlen
quipactía. Xiitzto se icual tlatequipanojca tlen ax monequi
mopinahuas pampa cuali quimati quejatza quitequihuis huan quiixtomas
Itlajtol tlen melahuac.
\v 16 Xiquincajtehua tlacame tlen tlamachtíaj tlen ax quinamiqui
huan tlen ax ipati, pampa ica inintlajtol quinyacanaj tlacame ma
quichihuaca más tlamantli tlen ax quipactía Toteco.
\v 17 Inintlamachtil tlen ax melahuac tlamahuas queja se cocolistli
tlen tlamahua. Queja nopa inintlamachtil Himeneo huan Fileto.
\v 18 Inijuanti chicoquistoque tlen nopa tlajtoli tlen melahuac. Ama
tlamachtíaj para moyolcuitoquejya nochi tlacame tlen mictoque tlen
moyolcuise. Yeca sequin tlen tlaneltocayayaj ayoc quimatij tlaque
quineltocase.
\v 19 Pero ipan ichaj Toteco quitlalijtoc se tlatzinpehualtili tlen
temachtli huan nepa ijcuilijtoc ya ni: “Toteco quinixmati inijuanti
tlen nelía iaxcahua”; huan nojquiya quiijtohua: “Nochi tlacame
tlen motemachijtoque ipan Tohueyiteco Jesucristo ma ayoc quichihuaca
tlen ax cuali.”
\p
\v 20 Ipan se hueyi cali tlen iaxca se tlacatl tlen tlapijpixtoc
onca miyac tlamantli tlen inijuanti quitequihuíaj. Onca sequin
tlamantli tlen ax patiyo queja huajcali huan soqui chachapali, huan
nojquiya onca sequin tlen patiyo tlen quichijtoque ica oro huan ica
plata. Nopa caltecojtli quitequihuía huajcali huan tlamantli tlen
soquitl ica se tequitl tlen quejhueltzi. Huan quitequihuía
tlamantli tlen patiyo quema monequi tlen yejyectzi para tlacame
quitlepanitase.
\v 21 Intla se tlaneltocaquetl moiyocacahuas ica inijuanti tlen
tlamachtíaj tlen ax cuali, yajaya elis queja se tlamantli tlen
nelía patiyo ipan ichaj Toteco, huan Toteco quitequihuis ipan se
cuali tequitl huan tlacame tlen quiitase, quitlepanitase Toteco.
\p
\v 22 Huajca xicholojtehua quema se tlamantli mitzyoltilana para
xijchihua queja telpocame tlen ni tlaltepactli quinpactía
quichihuaj. Xijtoquili tlen xitlahuac. Xijneltoca Toteco ica nochi
moyolo, huan xiquinicneli tlacame. Xiitzto ica cuali ica nopa
tlaneltocani tlen motemachíaj ipan Toteco ica ininyolo cuali iixpa.
\v 23 Xiquintlalcahui tlacame tlen camatij huihui tlajtoli pampa
teipa san pehuaj mocamaijixnamiquij.
\v 24 Se tlen itlatequipanojca Tohueyiteco ma ax quitemos para
mocamaijixnamiquis ica sequinoc. Monequi ma quinchihuili nochi
tlacame tlen cuali. Monequi tlamachtis cuali para tlacame ma
quimachilica itlamachtil huan monequi ma quipiya iyolo ica nochi
tlacame.
\v 25 Se itlatequipanojca Tohueyiteco monequi quinmachtis ica
yamanic tlajtoli nopa tlacame tlen quicocolíaj. Huelis Toteco
quinpatilis ininyolo para huelis moyolpatlase huan quimatise tlen
melahuac.
\v 26 Huan queja nopa, cholose tlen campa quintlaquechilijtoc
Axcualtlacatl, pampa yajaya quinmasiltijtoc para ma quichihuaca tlen
yajaya quinequi.
\c 3
\s Ipan itlamiya tonali tlacame quichihuase más tlen ax cuali
\p
\v 1 Nojquiya monequi xijmachili ya ni. Quema hualas itlamiya tonali
elis nelía fiero.
\v 2 Tlacame san moicnelise ininseltitzitzi huan tlahuel quinequise
miyac tomi. Tlahuel motlepanitase huan mohueyimatise.
Quitlaijilhuise Toteco huan ax quintlepanitase ininnanahua huan
inintatahua. Ax motlascamatise ipampa tlen quiselijtoque huan ax
tleno quiitase para tlatzejtzeloltic.
\v 3 Ax teicnelise. Ax tetlasojtlase. San teijilnamiquise. Tlacame
ayoc huelis monahuatise huan yeca quichihuase san tlen quinequise.
Tecocose ica paquilistli, huan quicocolise nochi tlen cuali.
\v 4 Quena, ipan itlamiya tonali tlacame quincajcayahuase hasta
ininhuampoyohua huan mosisinise huan quichihuase tlen hueli
tlamantli. Moilhuise miyac inintlalnamiquilis, pero ax neli.
Quitemose san tlen ica huelis mopaquilismacase, pero ax quitemose
Toteco.
\v 5 Sequin nopa tlacame mochihuase queja quixmatij Toteco, pero
axtle. Ica tlen quichihuase quinextise para ax tleno quinequij tlen
ichicahualis.
\p Xiquintlahuelcahua tlacame tlen quej ni quichihuaj.
\v 6 Itztoque queja nopa tlacame nopona. Quincajcayahuaj sihuame
tlen huihuitique para huelis calaquise ipan ininchajchaj para
tlamachtise tlen ax melahuac. Huan quinmasiltíaj nopa sihuame para
quitoquilise inintlamachtil. Nopa sihuame ya quipiyaj miyac
inintlajtlacolhua huan tlahuel quinequij quichihuase san tlen
quinpactía.
\v 7 Nopa sihuame quinequij momachtise nochi tlamachtilistli tlen
yancuic, pero ax quema hueli quimachilíaj tlen melahuac.
\v 8 Nopa tlamachtiani quinequij quiquetzase tlajtoli tlen melahuac
queja Janes huan Jambres, itetlajchihuijcahua Faraón huejcajquiya
quinequiyayaj quiquetzase nopa chicahualnescayotl tlen Moisés
quichihuayaya. Ya ijtlacajtoc inintlalnamiquilis nopa tlamachtiani
huan san tlacajcayahuaj quema quiijtohuaj quineltocaj Toteco, pampa
ax neli.
\v 9 Pero ayoc huejca yase, pampa teipa nochi quinitase para
huihuitique queja panoc ica Janes huan Jambres huejcajquiya.
\s Pablo quiilhui Timoteo más tlen monejqui quimatis
\p
\v 10 Pero ta Timoteo, tijtoquilijtoc tlen nitlamachtía huan tlen
na nijchihua. Tijmati tlen nijnequi nijchihuas ipan nonejnemilis
huan quejatza nijneltoca Toteco. Tiquitztoc quejatza
niquijiyohuijtoc nochi tlen nechpanotihualajtoc. Tijmati
niteicnelía huan nijpiya noyolo ica sequinoc.
\v 11 Tijmati quejatza nechtlaijiyohuiltijque miyac huan quejatza
nimoyoltetili. Tijmati quejatza nechtlamicocojque ipan altepetini
Antioquía, Iconio huan Listra, pero sesen huelta Toteco
nechmanahui.
\v 12 Huan nochi tlaneltocani tlen quinequij monejnemiltise queja
Cristo Jesús quinequi, quinpantise tlacame tlen
quintlaijiyohuiltise.
\v 13 Pero ax cuajcualme huan tlacame tlen tlacajcayahuaj noja
quichihuase achi más tlen fiero. Quisenhuiquilise tecajcayahuase
más pampa Axcualtlacatl ya quincajcayajtoc.
\p
\v 14 Pero ta, Timoteo, xijtoquilijtinemi tlen timomachtijtoc huan
tlen tijmati para melahuac pampa tiquinixmati ajqueya inijuanti
mitzmachtijtoque.
\v 15 Pampa hasta quema ticonetzi tieliyaya, tijmatiyaya nopa
Tlajcuiloli tlen tlatzejtzeloltic. Huajca amo xijcahua. Huan
Itlajtol Toteco mitztlalnamictijtoc huan mitznextilijtoc quejatza
huelqui timomaquixti tlen motlajtlacolhua pampa tijneltocac Cristo
Jesús.
\v 16 Toteco temacac nochi nopa Tlatzejtzeloltic Tlajcuiloli, huan
quipiya itequi para techmachtía tlen melahuac huan
techtlacahualtía quema tijchihuaj tlen ax monequi. Huan Itlajtol
techtlalnamictía huan technextilía quejatza ma timonejnemiltica
xitlahuac.
\v 17 Quena, Toteco techmacatoc Itlajtol para techcualtlalis nochi
tojuanti tlen tiiaxcahua para huelis tijchihuase nochi tlen cuali.
\c 4
\s Xiquinilhui Tlacame Itlajtol Toteco
\p
\v 1 Timoteo, nimitznahuatía iixpa Toteco Totata huan iixpa Toteco
Jesucristo tlen se tonal quintlajtolsencahuas nochi tlacame tlen
yoltoque huan tlen mictoque quema sampa hualas ipan tlaltepactli
para tlanahuatis,
\v 2 xitlacamanalojtinemi itlajtol Toteco. Xiquinilhui tlacame
itlajtol nochipa yonque ohui tijchihuas o ax ohui. Xiquinxitlahua
tlen ax quimatij tlaque monequi quichihuase huan xiquintlacahualti
tlen ica ininpaquilis tlajtlacolchihuaj. Xiquinyolchicahua ma
quichihuaca tlen cuali huan nochipa xiquinmachti ica tlajtoli tlen
yamanic.
\v 3 Pampa ajsis se tonal quema tlacame ayoc quinequise
quitlacaquilise nopa tlamachtilistli tlen xitlahuac. Quinequise
quitlacaquilise san tlen quinpactis. Huan quintemose tlamachtiani
tlen quinmachtise tlen inijuanti quinequij.
\v 4 Huan ayoc quitlacaquilise tlen melahuac, san quitoquilise
tlajtoli tlen ax neli.
\v 5 Pero ta, Timoteo, nochipa xijpiya cuali motlalnamiquilis.
Ximoyoltetili quema titlaijiyohuía. Xiquinilhui tlacame itlajtol
Toteco huan xiquinnotza ma quitoquilica. Xijtlamichihua mojmostla
nochi nopa tequitl tlen Toteco mitzmacatoc.
\p
\v 6 Pero ica na, ya nijtoyajtoc nonemilis para Toteco queja se
tlacajcahualistli tlen atic, huan ya monechcahuijtihuala nopa hora
quema nimiquis.
\v 7 Na nitlatehuijtoc chicahuac queja se cuali soldado monequi
quichihuas. Na nitlantoc nochi notequi queja se motlalojquetl tlen
motlalojtoc hasta campa ontlami. Huan nimosentemachijtoc ipan nopa
tlamachtili tlen Toteco nechnextili ma nijneltoca.
\v 8 Huajca nechchiya ica se corona tlen nijtlantoc pampa nijchijqui
tlen xitlahuac. Huan Tohueyiteco, nopa tequihue tlen xitlahuac,
nechmacas nopa corona quema techtequitlachilis nochi titlaneltocani.
Huan ax san na nijselis se corona, pero nojquiya quiselise nochi
tlaneltocani tlen tlahuel quichixtose ma sampa hualas.
\s Xihuala techpaxaloqui
\p
\v 9 Xijchihua campeca para nimantzi tihualas techpaxaloqui.
\v 10 Ya nechtlahuelcajqui Demas huan yajqui altepetl Tesalónica
pampa tlahuel quiicnelía tlamantli tlen ni tlaltepactli. Crescente
yajqui tlali Galacia para quichihuas itequi Toteco, huan Tito yajqui
tlali Dalmacia.
\v 11 San toicni Lucas itztoc nohuaya. Xijtemo Marcos huan
xijhualica mohuaya pampa yajaya nechpalehuis miyac.
\v 12 Nojquiya ax aqui Tíquico pampa nijtitlanqui altepetl Éfeso.
\v 13 Quema tihualas, techhualiquili notlaque tlen nijcajtejqui ipan
ichaj Carpo ipan altepetl Troas. Nojquiya xinechhualiquili nopa
amatlapohuali, pero achi más nijnequi xinechhualiquili nopa amatl
tlen ipan nitlajcuilohuayaya.
\p
\v 14 Alejandro nopa teposchijquetl nechchihuilijtoc miyac tlamantli
tlen ax cuali. Toteco ma quicuepilis queja quinamiqui ica tlen
quichijtoc.
\v 15 Xijpiya cuidado ica ya pampa nelía quinequi quiquetzas tlen
titlamachtíaj.
\p
\v 16 Quema achtohui monejqui nimonextis iniixpa nopa tequihuejme,
ax aqui hualajqui para nechtenpalehuis. Nochi nechtlahuelcajque. Ma
ax quintlatzacuilti Toteco ipampa tlen quichijque.
\v 17 Pero Toteco, quena, yajaya itztoya nohuaya huan nechmacac
chicahualistli para cuali nitlacamanalos itlajtol huan quicajque
miyac tlacame tlen ax israelitame. Huan Toteco nechmanahui huan ax
nechmictijque nimantzi.
\v 18 Huan nijmati Toteco nechmaquixtis tlen nochi tlen ax cuali
huan nechhuicas nepa elhuicac campa yajaya tlanahuatía. Ma
tijhueyichihuaca para nochipa. Queja nopa ma eli.
\s Pablo tlanqui tlajcuilohua
\p
\v 19 Xiquintlajpalo Prisca huan Aquila. Huan xiquintlajpalo nochi
tlen itztoque ipan ichaj Onesíforo.
\v 20 Mocajqui Erasto ipan altepetl Corinto. Nojquiya nijcajtejqui
Trófimo ipan altepetl Mileto pampa mococohua.
\v 21 Ximoisihuilti para huelis tiajsiqui nica quema aya tlaseseya.
Mitzontlajpalohuaj Eubulo, Pudente, Lino, Claudia huan nochi
toicnihua ipan Cristo nica.
\p
\v 22 Tohueyiteco Jesucristo ma itzto ica motonal, Timoteo. Huan ma
quipiya hueyi iyolo imohuaya nochi imojuanti nopona. Queja nopa ma
eli.