\id HEB
\h HEBREOS
\mt Nopa Amatlajcuiloli para nopa Hebreo Tlaneltocani
\c 1
\s Toteco technojnotztoc ica Icone, Jesucristo
\p
\v 1 Huejcajquiya Toteco Dios quinnojnotzqui tohuejcapan tatahua miyac huelta ica itiocamanalojcahua. Quemantzi quinnojnotzqui itiocamanalojcahua ipan temictli, quemantzi ica tlanextili huan quemantzi itztoya nechca inijuanti quema quincamahuiyaya.
\v 2 Pero ama ipan ni itlamiya tonali Toteco technojnotztoc ica Icone tlen yajaya techtitlanili. Toteco Dios quitequimacac Icone ma quichijchihua nochi tlamantli tlen onca huan quiijtojtoc para nochi tlen onca eltoc iaxca.
\v 3 Itlatlanex Toteco Dios tlahuía ipan Icone pampa Icone itztoc san se ica ya. Quena, Jesucristo itztoc queja iixcopinca tlen technextilía quejatza itztoc Toteco Dios. Ica itlajtol, Icone Toteco quimajcuitoc nochi tlen onca ipan tlaltepactli huan elhuicactli campa eltoc, pampa itlajtol tlahuel quipiya chicahualistli. Yajaya mijqui para techpajpacas tlen totlajtlacolhua huan teipa yajqui elhuicac huan mosehuito inejmatl Toteco Dios campa más onca tlatlepanitacayotl.
\s Icone Toteco itztoc más hueyi que nochi ielhuicac ejcahua Toteco
\p
\v 4 Ya ni technextilía para Icone Toteco itztoc más hueyi que nochi elhuicac ehuani, pampa Toteco quimacac Icone tequihuejcayotl\f 1:4 O se itoca.\f* tlen onpano más hueyi que nopa tlen ielhuicac ejcahua quipiyaj.
\v 5 Toteco Dios ax quema quiilhuijtoc se elhuicac ejquetl tlen quiilhui Icone.
\q Quiijto: “Ta tiNocone.
\q Ama nitlayolmelahua tlamiyacapa para na nimoTata.”
\m Huan ax quema quiijto tlen se elhuicac ejquetl:
\q “Na nielis iTata huan yajaya elis Nocone.”
\m
\v 6 Huan sejcoyoc ipan iTlajtol Toteco ijcuilijtoc nopa tlen Toteco quiijto quema quiixnextis Icone tlen quipiya hueyi tlatlepanitacayotl ipan ni tlaltepactli. Quiijto:
\q “Ma quihueyichihuaca nochi noelhuicac ejcahua.”
\m
\v 7 Pero tlen inintequi elhuicac ehuani, quiijtohua:
\q “Toteco Dios quinchijqui ielhuicac ejcahua ma itztoca tonaltzitzi.
\q Quena, quintequihuía queja tlayolmelahuani tlen itztoque queja tlilelemectli.”
\m
\v 8 Pero quema Itlajtol Toteco camati tlen Icone, quiijto:
\q “Ta tiDios, titlanahuatis para nochipa huan ax quema tlamis motlanahuatilis.
\q Titlatlajtolsencahuas senquistoc xitlahuac huan temachtli.
\q
\v 9 Mitzpactía nochi tlen cuali huan tijcocolía nochi tlen ax cuali.
\q Yeca Toteco Dios, yajaya tlen moTeco,
\q mitztequitlalijtoc tiitlanahuatijca huan mitzmacatoc más paquilistli que nochi sequinoc.”
\m
\v 10 Nojquiya Toteco Dios quiilhui Icone:
\q “NoTeco, ipan ipejya nochi tlen onca, ta tijchijchijqui itlatzinpehualtil tlaltepactli.
\q Ta tijchijchijqui nochi hasta elhuicactli ica moma.
\q
\v 11 Nochi inijuanti tlamise, pero ta, tiitztos para nochipa.
\q Tlaltepactli huan elhuicactli sosolihuise queja sosolihui se yoyomitl.
\q
\v 12 Tiquinmimilos queja elisquía se tlaquemitl tlen sosoltic huan ya ajsic hora para tlantiyas.
\q Pero ta, noTeco, tielis san se para nochipa.
\q Ax quema tihuehuejtiyas, niyon ax quema tlamis monemilis.”
\m
\v 13 Huan Toteco Dios ax quema quiilhui se elhuicac ejquetl queja quiilhui Icone ipan ni tlajtoli:
\q “Ximosehui nica nonejmatl campa onca más tlatlepanitacayotl,
\q hasta nijchihuas para tiquinnahuatis nochi mocualancaitacahua.”
\m
\v 14 Ielhuicac ejcahua Toteco itztoque san tonaltzitzi tlen tlatequipanohuaj. Quena, Toteco quintitlantinemi para quinpalehuise huan quinmocuitlahuise nochi tlacame tlen Toteco quintlapejpenijtoc para quinmaquixtis tlen inintlajtlacolhua.
\c 2
\s Ma tijtlacaquilica Toteco para timomaquixtise
\p
\v 1 Yeca pampa Icone Toteco itztoc más hueyi que nochi ielhuicac
ejcahua Toteco, monequi achi más tijtlacaquilise nochi nopa
tlamachtili tlen tijcactoque tlen ya para ax quema tichicoquisase
tlen iojhui.
\v 2 Tijmatij nochi nopa tlanahuatili tlen Toteco temacac ica
elhuicac ehuani huejcajquiya quipixqui chicahualistli. Huan tlen ax
quineltocaque huan ax quintlepanitaque nopa tlanahuatili,
quiselijque se tlatzacuiltili queja quinamiquiyaya.
\v 3 Huajca intla quintlatzacuilti tlen ax quintlepanitaque tlen
quiijtojque ielhuicac ejcahua, noja más hueyi Toteco
techtlatzacuiltis tojuanti intla ax tijchihuilíaj cuenta nopa hueyi
tlamantli tlen techchihuilijtoc Icone quema techmaquixti tlen
totlajtlacolhua. Pampa elqui yajaya Tohueyiteco Jesús tlen achtohui
techilhuico para techmaquixtis tlen totlajtlacolhua, huan teipa
nojquiya techilhuicoj nopa tlacame tlen quicajque itlajtol Icone.
Quena, inijuanti no hualajque huan technextilijque para temachtli
techmaquixtis.
\v 4 Huan nojquiya Toteco technextiliyaya para temachtli inintlajtol
nopa tlacame, pampa quema Itonal Toteco quinequiyaya, quinmacayaya
nopa tlacame yajatili ma quichihuaca tlanescayotl, chicahualis
nescayotl huan miyac tlamantli tlen ica tlacame quinsentlachilijque.
\s Jesús Yajaya Totemaquixtijca
\p
\v 5 Huan Toteco ax quintequimacatoc elhuicac ehuani para
tlanahuatise ipan nopa tlaltepactli tlen teipa oncas tlen ica
ticamatij.
\v 6 Pero tlacame tlanahuatise nopona pampa ijcuilijtoc ipan
Itlajtol campa se tlacatl quiilhuía Toteco:
\q “Toteco, ¿para tlen titechchihuilía cuenta tojuanti titlacame?
\q ¿Para tlen timocuatotonía ica tojuanti?
\q
\v 7 Para se tlalochtli tijchijqui para titlacame ma ax tiitztoca
tinelhuejhueyi queja nopa elhuicac ehuani.
\q Pero teipa titechnextilis miyac tlatlepanitacayotl huan
titechhueyitlalis titlacame.
\q Huan titechmacas tequihuejcayotl ica nochi tlen tijchijtoc.
\q
\v 8 Quena, tijtlali tomaco titlacame para ma tijnahuatica nochi.”
\m Huan quema quiijtohua quitlali nochi tlamantli momaco, quinequi
quiijtos ax onca niyon se tlamantli tlen tlacame ax quinahuatise.
Amantzi aya tiquitaj intla tlacame quinahuatíaj nochi pampa noja
polihui para panos.
\v 9 Pero tojuanti tiquitaj Jesús, yajaya tlen para se tlalochtli
Toteco quichijqui ma eli tlatzintla tlen elhuicac ehuani para
huelqui mijqui topampa nochi titlacame pampa hueyi iyolo tohuaya.
Huan ama pampa Jesús mijqui topampa tojuanti, Toteco Dios
quihueyitlalijtoc huan quinextilijtoc miyac tlatlepanitacayotl.
\p
\v 10 Nochi tlen onca, eltoc pampa queja nopa ipaquilis Toteco. Huan
yajaya quichijchijqui nochi tlen onca. Huan ica tlen Jesús
tlaijiyohui, Toteco quichijqui para yajaya ma eli nopa tlayacanquetl
tlen senquistoc quinamiqui para quinmaquixtis nochi tlacame tlen
mochihuase iconehua.
\v 11 Huajca ama Jesús huan nochi tojuanti tlen
techtlatzejtzelolchijtoc tijpiyaj san se totata, yajaya, toTata
Dios. Yeca Jesucristo ax pinahua para techilhuis tiiicnihua.
\v 12 Ipan Itlajtol Toteco ijcuilijtoc campa Jesús quiilhui iTata:
\q “Niquincamahuis noicnihua tlen ta,
\q huan ipan tlasentilistli timitzpaquilismacase san sejco ica
huicatl.”
\m
\v 13 Huan nojquiya quiijtohua:
\q “Na nimotemachis ipan Toteco Dios ihuaya noicnihua.”
\m Huan nojquiya Jesús quiijto:
\q “Nica niitztoc ininhuaya iconehua Toteco tlen yajaya
nechmacatoc.”
\p
\v 14 Huan pampa tojuanti tlen Jesús technotzqui “tiiconehua” san
titlacame tlen tijpiyaj toomiyo huan tonacayo, Jesús nojquiya
tlacatqui queja se tlacatl tlen quipiya inacayo huan iomiyo. Huan
pampa mochijqui se tlacatl, huelqui mijqui huan quixolejqui
ichicahualis nopa Axcualtlacatl tlen quipixqui tlanahuatili para ma
onca miquistli ipan tlaltepactli.
\v 15 Quena, Jesús hualajqui queja se tlacatl para nochi tlacame
tlen mojmostla quiimacasiyayaj miquise, ma ayoc majmahuica. Eltoc
queja quintojtonqui tlacame campa ilpitoque para ma yaca
malacantoque.
\v 16 Tojuanti tijmatij Jesús ax hualajqui para quinpalehuis
elhuicac ehuani. Yajaya hualajqui para techpalehuis nochi titlacame
tlen tijneltocaj Toteco queja Abraham quineltocac.
\v 17 Yeca monequiyaya para Jesús mochihuasquía queja tojuanti
tiiicnihua para huelis mochihuasquía se tohueyi totajtzi tlen
tetlasojtla huan temachtli techtenpalehuía iixpa Toteco. Huajca
quena, Jesús mocuepqui tlacatl para huelis motemactilis ica Toteco
Dios topampa tojuanti queja nopa tlacajcahualistli tlen nelnelía
techquixtilis totlajtlacolhua nochi titlacame.
\v 18 Huan pampa Jesucristo tlaijiyohui huan Axcualtlacatl
quiyoltilanqui ma tlajtlacolchihua, ama Jesús quipiya
chicahualistli para techpalehuis quema titlaijiyohuíaj huan quema
Axcualtlacatl techyoltilana ma titlajtlacolchihuaca.
\c 3
\s Jesús más hueyi que Moisés
\p
\v 1 Noicnihua, imojuanti tlen initlatzejtzeloltijca tlacajhua
Toteco huan tlen inmechtlapejpenijtoc para inyase elhuicac,
ximoyolilhuica tlen Jesús, yajaya itlayolmelajca Toteco huan
tohueyi totajtzi tojuanti ipan totlaneltoquilis.
\v 2 Jesús elqui temachtli iixpa Toteco tlen quitequimacac queja
totajtzi. Quena, san se elqui temachtli queja Moisés elqui
temachtli ipan nochi nopa tlamantli tequitl tlen Toteco quimacac ma
quichihua ipan ichaj Toteco huejcajquiya.
\p
\v 3 Pero Jesús itztoc más hueyi que Moisés, yeca quinamiqui para
más tijtlepanitase ya. Nochipa más tijtlepanitaj se calchijquetl
huan ax queja nopa cali tlen yajaya quisencajqui.
\v 4 Nochi caltini quipiyaj ajqueya quinchijchijtoc, pero Toteco
Dios, yajaya tlen quichijchijtoc nochi tlen onca ipan tlaltepactli.
\v 5 Huan Moisés elqui temachtli para quichihuas nochi tlen Toteco
quiilhui ipan nochi itequi ipan ichaj Toteco tlen quiquetzqui
huejcajquiya, pero yajaya san elqui se tlatequipanojquetl. Huan
nochi tlen quichijqui ipan nopa cali tlen Toteco tenextili tlen
Toteco quichihuasquía teipa.
\v 6 Pero Cristo, ax eli se tlatequipanojquetl, yajaya Icone Toteco
huan yajaya quipiya tlanahuatili ica nochi ichaj Toteco. Huan
tojuanti tlen titlaneltocani tiitztoque ipan ichaj Toteco intla
tijsenhuiquilíaj timoneltlalíaj huan ica paquilistli timochiyaj
ipan Toteco.
\p
\v 7 Huan ijcuilijtoc ipan Itlajtol Toteco campa Itonal techilhuía:
\q “Ama quema inquicaquij itlajtol Toteco, xijtlacaquilica.
\q
\v 8 Amo ximoyoltetilica queja huejcajquiya moyoltetilijque nopa
israelitame tlen eliyayaj imohuejcapan tatahua.
\q Pampa huejcajquiya nepa campa huactoc tlali inijuanti
quiyejyecojque Toteco para quiitase tlaque quichihuasquía.”
\q
\v 9 (Huan Toteco quiijto:)
\q “Yonque nijchihuayaya chicahualnescayotl iniixtla imohuejcapan
tatahua para cuarenta xihuitl,
\q inijuanti quejipa nechyejyecohuayayaj huan mochiyayayaj quiitase
tlaque más nijchihuasquía para nechneltoquilisquíaj.
\q
\v 10 Yeca nelía nicualanqui ininhuaya nopa tlacame,
\q pampa niquitac para ni tlacame nochipa yolchijchicoquisaj.
\q Ax quiixmajtoque nopa cuali ojtli tlen na nijnequi ma
quitoquilica.
\q
\v 11 Huajca nicualanqui ininhuaya huan nimotestigojquetzqui para ax
quema calaquise campa onca nopa tlasiyajcahualistli tlen nitemaca.”
\p
\v 12 Huajca noicnihua, ximomocuitlahuica para ax inquipiyase se
imoyolo tlen ax cuali tlen ayoc quinequis tlaneltocas. Amo xijpiyaca
se imoyolo tlen quinequi inmechchijchicoquixtis tlen Toteco tlen
nelía yoltoc.
\v 13 Más cuali, ama quema noja onca tonali, ximoyolchicahuaca se
ica seyoc para más inquineltocase Toteco. Ma axaca moyoltetili ica
Toteco pampa quicajcayajtoc tlajtlacoli.
\v 14 Pampa intla timochihuase titemachme hasta itlamiya tonali huan
tijsenhuiquilise timotemachise ipan Toteco queja quema achtohuiya
tijneltocaque Cristo, huajca temachtli tijselise ihuaya Cristo nochi
tlen techtocaros.
\v 15 Huan ijcuilijtoc ipan Itlajtol Toteco campa quiijtohua:
\q “Ama xijtlacaquilica tlen Toteco quiijtohua.
\q Amo ximoyoltetilica ica ya queja nopa israelitame quichijque
huejcajquiya quema ax quitlepanitaque.”
\m
\v 16 Huan ¿ajqueya eliyayaj nopa tlacame tlen ax quitlepanitaque
yonque quicajque tlen yajaya quinilhui ma quichihuaca? Elque nopa
israelitame tlen Moisés quinquixti ipan tlali Egipto.
\v 17 Huan san se inijuanti tlen tlajtlacolchijque huan
quicualancamacaque Toteco para cuarenta xihuitl, huan yeca
quincahuili ma miquica nepa ipan huactoc tlali huan para nopona ma
quintlalpachoca.
\v 18 Huan Toteco quinilhui nopa israelitame tlen ax quineltocaque
para melahuac ax calaquisquíaj ipan nopa tlali tlatencahuali para
ipan mosehuise.
\v 19 Huajca tiquitaj para inijuanti ax huelque calajque campa
mosiyajcahuasquíaj pampa ax quineltocaque Toteco.
\c 4
\s Itlacajhua Toteco mosehuise
\p
\v 1 Huan ama ipan ni tonali Toteco noja technotza ma ticalaquica
ipan itlasiyajcahualis. Huajca ma timomocuitlahuise para ax
tiquiyocacahuase niyon se tlajtoli tlen Toteco techtencahuilijtoc
para quejatza hueli timosiyajcahuase ipan ya.
\v 2 Pampa Toteco nojquiya techilhuijtoc tojuanti nopa cuali
tlajtoli para huelis timosehuise san se queja huejcajquiya quinilhui
nopa israelitame. Pero nopa cuali tlajtoli tlen Toteco quinilhui
huejcajquiya ax quinpalehui, pampa ax quineltocaque.
\v 3 Pampa san tojuanti tlen nelía tijneltocaj Toteco huelis
ticalaquise campa onca nopa tlasiyajcahualistli. Toteco Dios camati
tlen inijuanti tlen ax quineltocaque huan quiijto:
\q “Quema nicualanqui ininhuaya,
\q nimotestigojquetzqui para ax calaquise campa onca nopa
tlasiyajcahualistli tlen nitemaca.”
\p Huajca inijuanti ax calajque campa Toteco quinequiyaya ma
calaquica yonque Toteco quitlamilti itequi hasta quema
quichijchijqui tlaltepactli huan quinchiyayaya para inijuanti ma
mosiyajcahuaca ihuaya.
\v 4 Pampa ijcuilijtoc ipan Itlajtol Toteco tlen Toteco quichijqui
ipan nopa chicompa tonali, quiijtohua:
\q “Toteco Dios mosehui ipan nopa chicompa tonali pampa ya
quitlamiltijtoya nochi itequi.”
\m
\v 5 Pero ipan sejcoyoc nojquiya techpohuilía tlen nopa israelitame
tlen ax calajque campa Toteco quinequiyaya, pampa Toteco Dios
quiijto:
\q “Ax calaquise campa nitemaca tlasiyajcahualistli.”
\m
\v 6 Huajca Toteco ax quincahuili nopa tlacame ma calaquica pampa ax
quineltocaque yonque Toteco quinilhuijtoya icual tlajtol. Pero noja
polihui para sequin tlacame ma calaquica huan mosehuise ihuaya.
\v 7 Yeca Toteco Dios quiixtlalijtoc seyoc tonal para ma calaquica
campa onca tlasiyajcahualistli, pampa Toteco quiijto: “Ama ni
tonal.” Huan teipa quema ya panotoya miyac xihuitl, David
tlayolmelajqui tlen Toteco quiijto huejcajquiya, huan quiijto:
\q “Ama ni tonal, intla Toteco inmechnotzas ximosehuica ihuaya,
xijtlacaquilica.
\q Amo ximoyoltetilica, niyon amo xijtlahuelcahuaca itlajtol.”
\m
\v 8 Pero ax camati tlen tlali Canaán, pampa intla Josué
hueltosquía quinmacatosquía tohuejcapan tatahua
tlasiyajcahualistli nopona, Toteco teipa ayoc quiijtosquía para ama
eltoc nopa tonal para tlacame ma calaquica ipan itlasiyajcahualis.
\v 9 Huajca noja mocahua se tlasiyajcahualistli para itlacajhua
Toteco ipan ma calaquise.
\v 10 Huan aqui hueli calaquis campa Toteco temaca tlasehuilistli,
mosiyajcahuas tlen nochi itequi san se queja Toteco mosiyajcajqui
quema quitlamilti itequi para quichijchijqui tlaltepactli.
\p
\v 11 Huajca ma tijchihuaca campeca para ticalaquise campa
timosiyajcahuase ihuaya Toteco. Ma ax timochihuaca queja nopa
israelitame tlen huetzque pampa ax quitlepanitaque Toteco
huejcajquiya.
\p
\v 12 Pampa Itlajtol Toteco yoltoc huan quipiya tlahuel miyac
chicahualistli. Más tlatequi que se machete tlen oncac tlatentili.
Itlajtol Toteco calaqui hasta ipan tealma huan tetonal huan hasta
campa más teyolijtic. Huan quipannextía intla cuali o ax cuali
tlen timoyolilhuíaj huan quipannextía tlen tijnequij tijchihuase.
\v 13 Ax tleno tlen Toteco quichijtoc huelis motlatis iixtla para ma
ax quiita, pampa iixtla ya nempa nesi nochi tlen tijchihuaj huan
tlen timoyolilhuíaj. Huan se tonal monequi timoquetzase iixtla para
tijmacase cuenta tlen nochi tlen tijchijtoque.
\s Jesús, yajaya nopa hueyi totajtzi
\p
\v 14 Yeca tojuanti tijpiyaj se tohueyi totajtzi tlen ya ajsito ipan
elhuicac, yajaya Jesús, Icone Toteco. Huajca nochipa ma
timotemachica ipan ya queja tiquijtojtoque tlamiyacapa para
tijchihuaj.
\v 15 Nopa tohueyi totajtzi techtlasojtla quema ax tijpiyaj fuerza
para tijchihuase tlen xitlahuac, pampa nochi tlamantli tlajtlacoli
nojquiya quiyoltilanqui Jesús queja tojuanti techyoltilana
mojmostla, pero yajaya ax quema tlajtlacolchijqui.
\v 16 Huajca ma timonechcahuica ica tlatemachili campa mosehuijtoc
Toteco tlen nochi quinahuatía. Huan ma ax timajmahuica
tijtlajtlanise itlapalehuil, pampa temachtli techtlasojtlas huan
techpalehuis ipan tlen hueli tlalochtli quema más monequi pampa
hueyi iyolo ica tojuanti.
\c 5
\p
\v 1 Nopa huejhueyi israelita totajtzitzi itztoyaj tlacame tlen
quintlapejpenijtoyaj tlen nochi totajtzitzi. Huan quipixque
tequihuejcayotl para moquetzase iixpa Toteco ininpampa nochi
israelitame. Nojquiya quipixque inintequi para quimacase Toteco
tlacajcahualistli huan inieso tlapiyalime para ma quiixtzacuilica
inintlajtlacolhua nopa tlacame.
\v 2 Huan sesen nopa huejhueyi totajtzitzi quipixqui hueyi iyolo ica
nopa tlacame tlen ax quimatque catlía cuali para quichihuase huan
tlen chicoquistoyaj. Pampa nopa totajtzitzi nojquiya itztoyaj san
tlacame queja tojuanti, huan ax quipixque miyac fuerza para
quichihuase nochi tlen cuali.
\v 3 Yeca sesen hueyi totajtzi monequiyaya achtohui quimacas Toteco
se tlacajcahualistli para ma quiixtzacuas tlen ya itlajtlacolhua
huan teipa quimacayaya Toteco se tlacajcahualistli para ma
quiixtzacua tlen Toteco inintlajtlacolhua nochi tlacame.
\p
\v 4 Huan niyon se hueyi totajtzi ax motlapejpeni iselti para
mochihuas hueyi totajtzi huan quipiyas nopa tlatlepanitacayotl, pero
monejqui Toteco Dios ma quitlapejpeni sesen inijuanti, san se queja
Toteco quitlapejpeni Aarón huejcajquiya.
\v 5 Yeca Cristo nojquiya ax motlapejpeni ica iselti para mochihuas
tohueyi totajtzi. ¡Axtle! Elqui Toteco Dios tlen quitequitlali
Cristo quema quiilhui:
\q “Ta tiNocone. Ama nitlayolmelahua tlamiyacapa para na
nimoTata.”
\m
\v 6 Huan nojquiya ipan Itlajtol, Toteco Dios queja ni quiilhui
Cristo:
\q “Ta tielis se totajtzi para nochipa ica san se nopa hueyi
tequihuejcayotl queja Melquisedec quipixqui.”
\m
\v 7 Quema Cristo itztoya ipan ni tlaltepactli, yajaya momaijto ica
Toteco Dios. Quitlajtlani Toteco tlen quinequiyaya huan quicamahui
ica nochi iyolo hasta chocac. Pampa san Toteco quipiyayaya
chicahualistli para quimaquixtis tlen nepa campa miquistli. Huan
Toteco Dios quitlacaquili pampa Cristo quitlepanitayaya Toteco ica
nochi iyolo.
\v 8 Huan yonque Cristo eliyaya Icone Toteco, ica tlen quiijiyohui,
quipanti para nelía miyac ipati para quitlepanitas tlen Toteco
quiilhui ma quichihua.
\v 9 Huan ica ni mochijqui senquistoc nopa hueyi totajtzi tlen
Toteco Dios quinequiyaya. Huan mochijqui nopa Temaquixtijquetl tlen
quinmaquixtía para nochipa nochi tlacame tlen quichihuaj tlen
yajaya quiijtohua,
\v 10 pampa Toteco Dios quitequimacac Cristo para elis se hueyi
totajtzi ica san se nopa hueyi tequihuejcayotl tlen quipixqui
Melquisedec huejcajquiya.
\s Mahuilili intla ayoc tijneltocase Toteco
\p
\v 11 Onca miyac más tlen ni tlamantli tlen nijnequisquía
nimechilhuis, pero ohui para nimechixtomilis pampa ax inquinequij
inquicaquise.
\v 12 Quipiya miyac xihuitl inquineltocaque Toteco huan quinamiqui
ya inelisquíaj intlamachtiani pero, axtle. Noja monequi para
sequinoc ma inmechmachtica sampa nopa tlamantli tlen ax más ohui
ipan Itlajtol Toteco. Initztoque queja coneme tlen ya monequi
tlacuase, pero noja quinequij lechi.
\v 13 Quena, nochi tlaneltocani tlen san quinequij quicaquise tlen
ax más ohui ipan Itlajtol Toteco itztoque queja pilconetzitzi tlen
ax moscaltijtoque ipan Toteco, huan ax hueli quimatise tlaque cuali
huan tlaque ax cuali para quichihuase.
\v 14 Pero tlacualistli tlen tetic eltoc para tlacame tlen ya
moscaltijtoque huan hueli quimachilíaj Itlajtol Toteco tlen más
ohui. Ni tlacame quitequihuijtoque inintlalnamiquilis para
quiixmatise tlen cuali huan tlen ax cuali para quichihuase.
\c 6
\p
\v 1 Huajca ma tijcahuaca tlaica nopa achtohui tlamachtili tlen
Cristo tlen ya inquicactoque. Ama nimechmachtis nopa tlamachtili
tlen inmechpalehuis inmoscaltise. Ayoc monequi nimechilhuis sampa
para axaca huelis momaquixtis tlen itlajtlacolhua pampa quichihua
tlen cuali, niyon ax monequi nimechilhuis para monequi xijcahuaca
imotlajtlacolhua huan xijneltocaca Toteco.
\v 2 Ayoc monequi nimechilhuis nopa tlamachtili tlen
tlacuaaltilistli, niyon tlaque quiijtosnequi quema tlayacanani ipan
tlaneltocani quitlalíaj ininma ipan se tlaneltocaquetl para
quitequimacase. Ayoc monequi nimechilhuis para moyolcuise nochi
mijcatzitzi huan quejatza Toteco tetlajtolsencahuas huan
tetlatzacuiltis para nochipa. Nochi ni tlamantli ya inquimatij.
\v 3 Huajca intla Toteco quinequi, nimechmachtis sequinoc tlamantli
tlen más monequi.
\p
\v 4 Pampa san tlapic niquinmachtis tlacame tlen quipixtoyaj
tlahuili ipan ininyolo huan quicajtejtoque. ¿Para tlen sampa
niquinmachtis tlen ya quimachilijtoque tlen cuali Toteco techmacas
nepa elhuicac huan tlen ya quiselijtoque Itonal Toteco?
\v 5 Intla ya quimachilijtoque ipan ininyolo para cuali itlajtol
Toteco, huan quimatij para oncas hueyi chicahualistli ipan nopa
tlali tlen hualas teipa,
\v 6 huan teipa chicoquisaj tlen Toteco, ax huelis
niquinyolchicahuas ma moyolcuepaca ica ya quema eltoc queja
quicuamapeloltíaj huan quipinahualtíaj Icone tlamiyacapa.
\v 7 Ni tlacame itztoque queja se mili tlen quiselía miyac atl
quema tlaahuetzi. Huan intla tlen quitoctoque ipan nopa mili temaca
cuali itlajca, huajca Toteco quitiochihuas.
\v 8 Pero intla nopa mili san temaca huitztli huan sahuamecatl,
huajca ax tleno ipati. Nechcatitoc para Toteco quitelchihuas nopa
mili. Huan temachtli quitlatis tlen temacatoc.
\s Tlajtoli tlen techpalehuía huan techyolchicahua
\p
\v 9 Pero imojuanti noicnihua tlen nimechicnelía, yonque
nimechcamahuijtoc tlen ni tlacame tlen quicajtejtoque Toteco, ax
nijneltoca para imojuanti inquicajtejtoque. Nimotemachía ipan
Toteco para tlamantli tlen más cuali inmechchiya imojuanti ipan
nopa tonal, tlamantli tlen Toteco quinmacas tlacame tlen quiselise
tlamaquixtilistli.
\v 10 Toteco Dios nochipa quichihua tlen xitlahuac. Yajaya ax
quiilcahuas nopa tequitl tlen inquichijtoque pampa inquiicnelíaj.
Ax quiilcahuas quejatza inquinpalehuijque itlatzejtzeloltijca
tlacajhua huan hasta ama noja inquichihuaj.
\v 11 Pero nijnequi para sesen imojuanti xiquicnelica Toteco hasta
ajsis tonal para inmiquise. Queja nopa inquimatise ica temachili
inquiselise nochi tlen inmochiyaj para inquiselise.
\v 12 Ax tijnequij ximotlatzcanequica. Tijnequij para xielica queja
nopa tlaneltocani tlen ica nochi ininyolo quineltocaj nochi tlen
Toteco techilhuijtoc huan quipiyaj ininyolo para quichiyase hasta
quiselise nochi tlen Toteco techtencahuilijtoc para techmacas.
Nelía Toteco techmacas nochi tlen tijchiyaj.
\p
\v 13 Nimechmacas se huicaltili. Quema Toteco quitencahuili Abraham
tlen quimacasquía, quinequiyaya Abraham ma quineltoca para
temachtli quiselisquía. Huan pampa axaca más hueyi que ya para
quitestigojquetzas, Toteco Dios motestigojquetzqui iselti,
\v 14 huan quiilhui Abraham: “Temachtli nimitztiochihuas tlahuel
miyac. Nijchihuas para moteipa ixhuihua ma elica onpano miyac
millones hasta axaca huelis quinpohuas.”
\v 15 Huan Abraham quipixqui iyolo huan quichixqui huan ajsic tonal
quema Toteco quimacac Isaac queja quitencahuilijtoya.
\p
\v 16 Quema tlacame quitencahuaj para quichihuase se tlamantli,
quitestigojquetzaj se tlen más hueyi que inijuanti para ma
quinneltocaca para temachtli inintlajtol. Huan nochi quimatij quema
se tlatestigojquetza huajca ica ya nopa tlami tlajtoli huan monequi
tlen tlatestigojquetzqui ma quichihua tlen quiijto.
\v 17 Yeca Toteco Dios motestigojquetzqui pampa quinequiyaya
quinnextilis nopa tlacame para temachtli quiselisquíaj nopa tlen
quitencahuayaya para quinmacas, huan para yajaya ax quema
moyolpatlasquía ica tlen moilhuijtoya quichihuas.
\p
\v 18 Huajca Toteco techmacatoc ome tlamantli tlen ax hueli mopatla,
pampa Toteco ax hueli istlacati. Achtohui techtencahuili tlen
techmacas huan teipa motestigojquetzqui para quichihuas tlen
quiijtojtoc. Yeca ama nochi tojuanti tlen timotlalojtoque campa ya
para techmanahuis, huelis timoyolchicahuase pampa tijmatij temachtli
yajaya quichihuas nochi tlen techtencahuili para quichihuas.
\v 19 Huajca tijmatij temachtli Toteco techmaquixtis queja
techtencahuilijtoc quichihuas. Huan yeca eltoc queja tijpiyaj toalma
cuali ilpitoc hasta nepa ipan elhuicac.
\v 20 Tohueyiteco Jesús ya calajqui elhuicac para quitlapos se
ojtli para tojuanti huelis ticalaquise nojquiya. Huan nopona yajaya
mochijtoc nopa hueyi totajtzi tlen nochipa itztos ica nopa hueyi
tequihuejcayotl tlen quipixqui Melquisedec huejcajquiya.
\c 7
\s Quihuicalotía totajtzi Jesús ica nopa totajtzi Melquisedec
\p
\v 1 Huejcajquiya Melquisedec eliyaya tlanahuatijquetl tlen altepetl
Salem huan eliyaya se totajtzi iixpa Toteco tlen Más Hueyi. Huan se
tonal quema Abraham mocuepayaya ichaj pampa quintlantoya miyac
tlanahuatiani ipan tlatehuilistli, Melquisedec quinamiquico huan
quitiochijqui.
\v 2 Huan Abraham quimacac se diezmo tlen nochi tlamantli tlen
quitlantoya ipan nopa tlatehuilistli.
\p Nopa tocajyotl, Melquisedec, quiijtosnequi “tlanahuatijquetl
tlen xitlahuac.” Huan nojquiya eliyaya tlanahuatijquetl tlen Salem,
huan Salem quiijtosnequi “Tlasehuilistli.” Huajca yajaya se
“Tlanahuatijquetl Tlen Tlasehuilistli.”
\v 3 Ax cana ijcuilijtoc ajqueya itata, o ajqueya inana, o ajqueya
ihuejcapan tatahua Melquisedec. Ax cana techilhuía quema tlacatqui
o quema mijqui. Huajca tiquitaj para yajaya itztoc queja Icone
Toteco tlen mochijtoc se totajtzi para nochipa.
\p
\v 4 Xiquitaca quejatza tijmatij para tlahuel hueyi eliyaya
Melquisedec. Achtohui Abraham, yajaya tlen elqui tohuejcapan tata
nochi tiisraelitame, quiitac para hueyi pampa quimacac Melquisedec
se diezmo tlen nochi tlen quitlantoya ipan tlatehuilistli.
\v 5 Miyac xihuitl teipa itlanahuatilhua Moisés quinmacac
tequihuejcayotl iixhuihua Leví tlen mochijque totajtzitzi para
quiselise diezmos tlen israelitame yonque inijuanti nojquiya
itztoyaj iniicnihua huan iteipa ixhuihua Abraham.
\v 6 Pero ni Melquisedec tlen ax tijmatij ajqueya itatahua ax
eliyaya iixhui Leví, huan Abraham quimacac se diezmo tlen nochi
tlen quipixqui.
\p Ica ompa, Melquisedec quitiochijqui Abraham, yajaya tlen Toteco
ya quitencahuilijtoya tlaque quimacas.
\v 7 Huan nochi tlacame quimatij para se tlen tetiochihua quipiya
más tequihuejcayotl huan ax queja tlen tlatiochihuali.
\p
\v 8 Ica expa, nopa israelita totajtzitzi tlen quiselijque nochi
diezmos itztoyaj san tlacame tlen miquiyayaj huan teipa sequinoc
quiitzquijque inintequi. Pero ica Melquisedec ax tiquitaj intla
mijqui, pampa Itlajtol Toteco camati tlen ya queja noja itztoc.
\p
\v 9 Huan ica najpa, tiquitaj más hueyi Melquisedec que israelita
totajtzitzi tlen teipa itztosquíaj pampa eltoc queja ininhuejcapan
tata tlen itoca eliyaya Leví, nojquiya itztoya nopona nopa tonal
huan nojquiya quitlaxtlahui Melquisedec quema Abraham quimacac
idiezmo.
\v 10 Pampa yonque Leví aya tlacatiyaya nopa tonal quema
Melquisedec quinamijqui huan quiseli nopa diezmos, huelis tiquijtose
para Abraham quihuicayaya ipan itlacayo nopa xinachtli ica tlen
teipa tlacatisquía Leví, pampa Leví elqui se iteipa ixhui
Abraham.
\p
\v 11 Huan ama ica ya ni nijtlamiltis. Nopa israelitame quinselijque
itlanahuatilhua Moisés tlen quiijto para totajtzitzi ma elica
iteipa ixhuihua Leví. Pero intla nochi tlen nopa totajtzitzi
quichijque hueltosquía quinchijtosquíaj tlacame xitlahuaque iixpa
Toteco, ax monectosquía para Toteco techtitlanilijtosquía seyoc
totajtzi, yajaya Cristo, tlen ax ininteipa ixhui Leví huan Aarón,
pero quipiya tequihuejcayotl queja Melquisedec quipixqui
huejcajquiya.
\p
\v 12 Huan ama pampa mopatlac totajtzi, Toteco nojquiya monejqui
quipatlas nopa israelita tlanahuatili,
\v 13 pampa tijmatij para Cristo ax huala ipan ihueyi familia Leví.
Yajaya huala ipan seyoc hueyi familia tlen ax huelqui mochihuase
totajtzitzi.
\v 14 Quena, nempa nesi para Tohueyiteco Jesucristo huala ipan nopa
hueyi familia tlen mochijqui ica iteipa ixhuihua Judá. Huan Moisés
ax cana quiijcuilo intla Judá o se iixhui huelis mochihuas
totajtzi.
\p
\v 15 Huajca ama noja más nempa nesi para ya onca se yancuic
tlamantli totajtzi tlen quipiya tequihuejcayotl queja Melquisedec.
\v 16 Quena, Cristo ax mochijqui totajtzi pampa hualayaya ipan
ifamilia Leví tlen itlanahuatilhua Moisés quiijtojque ma elis
totajtzi. ¡Axtle! Cristo mochijqui totajtzi pampa quipiya
chicahualistli para itztos para nochipa huan axaca huelis
quitlamiltis iyolis,
\v 17 yeca ijcuilijtoc ipan Itlajtol Toteco tlen Toteco Dios
quiilhui Cristo, huan quiijto:
\q “Ta tielis se totajtzi para nochipa ica san se nopa hueyi
tequihuejcayotl queja Melquisedec quipixqui.”
\m
\v 18 Huajca Toteco quitlamiltili inintequi nopa miyac tlanahuatili
tlen temacatoya achtohuiya pampa ax quipixqui chicahualistli, huan
ax ipati eliyaya,
\v 19 para quinmaquixtis tlacame huan quinchihuas xitlahuaque iixpa
Toteco. Pero ama pejtoc seyoc tlajtoli tlen achi cuali huan huelis
tijnechcahuise Toteco pampa techchihuilijtoc tixitlahuaque iixpa.
\p
\v 20 Quema Toteco quichijqui Jesucristo se totajtzi para nochipa,
tlatestigojquetzqui para ma tijmatise para temachtli,
\v 21 pero quema quintequimacac nopa israelita totajtzitzi, axaca
tlatestigojquetzqui. San ica Jesucristo Toteco Dios quiijto:
\q “Na nimoTeco Dios.
\q Nimotestigojquetza huan ax nimoyolcuepas:
\q ‘Ta tielis se totajtzi para nochipa ica san se nopa hueyi
tequihuejcayotl queja Melquisedec quipixqui.’ ”
\m
\v 22 Huajca tijmatij ica temachili para itequi Cristo queja
totajtzi elis onpano más cuali que nopa totajtzitzi tlen
achtohuiya, pampa itequi Cristo pejqui quema Toteco Dios
tlatestigojquetzqui.
\v 23 Huan achtohuiya itztoyaj miyac totajtzitzi, pampa quema mijqui
sesen inijuanti, monequiyaya seyoc ma quiitzquis itequi.
\v 24 Pero pampa Cristo itztos para nochipa, ayoc monequis seyoc.
\v 25 Huan yeca Cristo hueli quinmaquixtis para nochipa nochi
tlacame tlen quinechcahuíaj Toteco ipampa tlen yajaya quichijqui,
pampa yajaya itztos para nochipa huan ajachica momaijtohua ica
Toteco Totata ininpampa inijuanti.
\p
\v 26 Jesucristo yajaya senquistoc nopa tlamantli hueyi totajtzi
tlen monequiyaya para tojuanti. Yajaya tlatzejtzeloltic huan ax
quipiya tlajtlacoli. Axaca huelqui quiteilhuis ica niyon se
tlamantli tlen ax cuali. Huan ama yajaya itztoc iyoca tlen nochi
titlajtlacolchijca tlacame, huan quitlalijtoc campa más onca
tlatlepanitacayotl nepa ipan elhuicac.
\v 27 Nopa israelita totajtzitzi mojmostla quimacayayaj Toteco Dios
tlacajcahualistli. Achtohui quimacayayaj para inintlajtlacolhua
inijuanti, huan teipa quimacayayaj para inintlajtlacolhua nochi
tlacame. Pero Cristo ax queja nopa quichijqui. Yajaya san se huelta
motemactili huan mijqui queja se tlacajcahualistli, yeca ayoc
monequi más tlacajcahualistli.
\v 28 Huejcajquiya itlanahuatilhua Moisés quintequimacac tlacame
para ma elica huejhueyi totajtzitzi yonque tlajtlacolchihuani tlen
ax quipixque chicahualistli para quichihuase tlen nelcuali. Pero
yonque ya eltoyaj itlanahuatilhua Moisés, Toteco Dios
motestigojquetzqui huan quitequimacac Icone, Jesucristo tlen
senquistoc cuali, para ma eli hueyi totajtzi para nochipa.
\c 8
\s Jesús techcahuilijtejtoc se yancuic tlajtolsencahuali ica Toteco
\p
\v 1 Tlen nochi tlen nimechilhuijtihualajtoc, ya ni tlen más ipati:
Tohueyi totajtzi Jesucristo ya mosehuijtoc nepa elhuicac inejmatl
Toteco Dios campa más onca tlatlepanitacayotl.
\v 2 Nopona Jesucristo tequiti queja tohueyi totajtzi tiopan
calijtic nepa ipan elhuicac campa nelnelía eltoc Campa Más
Tlatzejtzeloltic. Nopa tiopamitl Toteco Dios iselti quichijqui. Ax
tlachijchihuali ica ininma tlacame.
\p
\v 3 Nochi huejhueyi totajtzitzi quipiyayayaj inintequi para
quimacase Toteco Dios tlacajcahualistli huan inieso tlapiyalime.
Huan Jesucristo nojquiya monequiyaya quimacas Toteco se
tlacajcahualistli.
\v 4 Intla Jesucristo itztosquía ipan tlaltepactli, ax elisquía se
totajtzi, pampa nica ya itztoque totajtzitzi tlen temacaj
tlacajcahualistli queja quiijtohuaj itlanahuatilhua Moisés.
\v 5 Pero tijmatij nopa israelita totajtzitzi nica ipan ni
tlaltepactli tequitij ipan se tiopamitl tlen san quiixcopinaj nopa
tiopamitl tlen nelnelía eltoc nepa elhuicac, o huelis tiquijtose
para san se ecahuilotl tlen nopa tlen nelnelía. Pampa huejcajquiya
quema Moisés quichihuayaya nopa tiopamitl tlen cuetlaxtli, Toteco
quicamahui huan quiilhui: “Xijpiya cuidado para tijchihuas
senquistoc queja nopa tiopamitl nepa elhuicac tlen nimitznextili
iixcopinca nepa ipan tepetl Sinaí.”
\v 6 Huan ama Cristo tohueyi totajtzi tlen itztoc nepa elhuicac
nojquiya quipiya se tequitl tlen más cuali que inijuanti tlen
tlatequipanohuaj ipan ni tlaltepactli, pampa yajaya quisencajqui se
tlajtolsencahuali ica Toteco Dios huan titlacame tlen achi más
cuali. Huan nopa yancuic tlajtolsencahuali techtencahuilía miyac
tlamantli tlen más cuali que nopa tlajtoli achtohuiya.
\p
\v 7 Intla nopa achtohui tlajtolsencahuali ica Toteco huan tlacame
eltosquía senquistoc cuali, huajca ax monectosquía seyoc.
\v 8 Pero Toteco Dios iselti quiitac para tlacame tlen quipixtoyaj
nopa achtohui tlajtolsencahuali, ax hueliyayaj quichihuaj tlen
quiijtohua, huan yajaya ax quipacti huan quiijto:
\q “Ajsis se tonali quema nijchihuas se yancuic tlajtolsencahuali
ica tlacame ipan tlali Israel huan ipan tlali Judá.
\q
\v 9 Ax elis queja nopa achtohui tlajtolsencahuali tlen nijchijqui
ininhuaya ininhuejcapan tatahua quema niquinmatilanqui huan
niquintlayacancuili para ma quisaca ipan tlali Egipto.
\q Pampa inijuanti ax quichijque tlen quiijto nopa achtohui
tlajtolsencahuali huan yeca niquintlalcahui.
\q
\v 10 Pero ya ni elis nopa yancuic tlajtolsencahuali tlen nijchihuas
ica israelitame.
\q Ajsis tonali quema nijtlalis notlanahuatilhua ipan
inintlalnamiquilis para ma quimatica tlaque nijnequi ma quichihuaca.
\q Quena, niquijcuilos ipan ininyolo para ma quitlepanitaca.
\q Huan na nielis niininTeco huan inijuanti elise notlacajhua.
\q
\v 11 Huan axaca monequisoc quiilhuis ihuampo o iicni para monequi
quiixmatis Tohueyiteco,
\q pampa nochi nechixmatise hasta tlen más huejhueyi huan hasta
tlen más pilsiltzitzi.
\q
\v 12 Na niquintlasojtlas huan niquintlapojpolhuis nopa tlaixpanoli
tlen quichijtoque,
\q huan ayoc quema niquilnamiquis inintlajtlacolhua.”
\m
\v 13 Quema Toteco camatqui tlen se tlajtolsencahuali tlen yancuic,
quiijtosnequi quichijqui para nopa achtohui tlajtolsencahuali ma
ayoc quipiya itequi. Huan tlen ayoc quipiya itequi sosolihuis huan
teipa polihuis.
\c 9
\s Nopa tiopamitl tlen tlaltepactli huan nopa tlen elhuicac
\p
\v 1 Ipan nopa achtohui tlajtolsencahuali oncayaya miyac
tlanahuatili tlen quinilhuiyaya tlacame quejatza ma quihueyichihuaca
Toteco huan nojquiya oncayaya se tlatzejtzeloltijca tiopamitl tlen
cuetlaxtli nica ipan tlaltepactli.
\v 2 Nopa tiopamitl tlen cuetlaxtli quipixtoya ome cuartos. Nopa
achtohui cuarto quitocajtiyayaj “Campa Tlatzejtzeloltic”, huan
nopona eltoya nopa tlahuil quetzali huan nopa mesa ica nopa pantzi
tlen tlatzejtzeloltic.
\v 3 Huan teipa oncayaya se cortina huan ica iica eltoya nopa seyoc
cuarto tlen quitocajtiyayaj “Campa Más Tlatzejtzeloltic”.
\v 4 Huan nopona eltoya nopa tlaixpamitl tlen oro campa quitlatíaj
copali huan nopa caxa tlen cuahuitl tlen quialtijtoyaj senquistoc
ica oro. Huan iijtic nopa caxa quipixtoya se xarro tlen oro ica
quentzi nopa pantzi tlen huetzqui tlen elhuicac tlen itoca maná.
Huan nojquiya quipixqui icuatopil Aarón tlen chamanqui. Huan
nojquiya quipixtoya nopa ome tepatlactli tlen ipan quiijcuilojtoya
nopa majtlactli tlanahuatili.
\v 5 Nojquiya, ipan itzajca nopa caxa quisencajtoque ome
iniixcopinca tlen se tlamantli ielhuicac ejcahua Toteco tlen
inintoca querubines. Huan nopa tlaixcopincayome tlen quichijtoque,
eltoya tlaatili ica oro. Tlen nelnelía querubines elhuicac ehuani
itztoque nepa campa itztoc Toteco huan campa nesi itlatlanex. Huan
nopa tlaixcopincayome tlen elhuicac ehuani quipatlajtoyaj
inieltlapal queja para quiecahuilise itzajca nopa caxa. Huan nepa
ipan itzajca nopa caxa quimacaque Toteco estli tlen
quiixtzacuiliyaya inintlajtlacolhua nopa tlacame. Pero ama ax
nicaxilis para nicamatis más tlen ni tlamantli.
\p
\v 6 Quema ya quicualtlalijtoyaj nochi nopa tlamantzitzi tiopan
calijtic, nopa israelita totajtzitzi ajachica calaquiyayaj ipan nopa
achtohui cuarto para quichihuase inintequi iixpa Toteco.
\v 7 Pero ipan nopa cuarto tlen más calijtic tlen quitocajtiyayaj
“Campa Más Tlatzejtzeloltic”, san hueliyaya calaquis nopa hueyi
israelita totajtzi se huelta ipan se xihuitl. Huan quema
calaquiyaya, monequiyaya quihuicas ieso se tlapiyali para quimacas
Toteco. Achtohui quimacayaya estli ipampa ya itlajtlacolhua huan
teipa quimacayaya ipampa inintlajtlacolhua tlen quichijque nochi
tlacame pampa ax quimatiyayaj intla tlajtlacoli.
\v 8 Ica nochi ni tlanahuatili, Itonal Toteco technextilía para
aqui hueli tlacatl ax hueliyaya calaquis ipan nopa cuarto Campa Más
Tlatzejtzeloltic, quinequi quiijtos campa itztoc Toteco, quema noja
tequitiyaya nopa achtohui tiopan cuarto huan nopa israelita
totajtzitzi ajachica quimacayayaj Toteco tlacajcahualistli.
\p
\v 9 Ni tlamantli technextilía quejatza nochi mopatlatoc ama. Pampa
nopa tlacajcahualistli huan inieso tlapiyalime tlen tlacame
quimacayayaj Toteco huejcajquiya, ax huelqui nelía quinyolpajpaca
tlen inintlajtlacolhua.
\v 10 Nojquiya nopa achtohui tlajtolsencahuali quipixqui miyac
tlanahuatili tlen quinilhuiyayaj tlacame tlaque hueliyaya quicuase o
quiise. Huan nopa tlanahuatili quinilhuiyayaj quejatza monequi
momajtequise, maltise huan mopajpacase para huelise quihueyimatise
Toteco. Nochi ni tlamantli quipixqui chicahualistli hasta oncac nopa
yancuic tlajtolsencahuali.
\p
\v 11 Pero ama Cristo mochijtoc nopa Hueyi Totajtzi tlen
techhualiquilía nochi nopa tlamantli tlen cuali tlen ama tijpiyaj.
Huan yajaya ax calajqui Campa Más Tlatzejtzeloltic ipan se
tiopamitl tlen tlamachijchihuali ipan ni tlaltepactli, pero calajqui
Campa Más Tlatzejtzeloltic nepa elhuicac huan ya nopa más cuali.
\v 12 Huan quema calajqui Campa Más Tlatzejtzeloltic ipan elhuicac
ax quihuicac inieso chivojme o huacaxme queja quichihuayayaj
israelita totajtzitzi ipan tlaltepactli, pero quimacac Toteco tlen
ya ieso. Huan Cristo calajqui san se huelta huan ayoc más monejqui,
pampa ica ieso techmaquixti tlen totlajtlacolhua para nochipa.
\v 13 Achtohuiya nopa estli tlen chivojme huan torojme, huan
inincuanexo pilhuacaxtzitzi quipiyayaya chicahualistli para
quintlapajpacchihuas nopa tlacame tlen mochijtoyaj ax tlapajpacme
iixpa Toteco.
\v 14 Pero miyac más hueli quichihua ieso Cristo, pampa ieso
quipiya chicahualistli para quitlapajpacchihuas tonemilis huan
toyolo tlen tlajtlacoli tlen techhuicasquía campa miquistli. Huan
techchihua ma tijtequipanoca Toteco tlen nelía itztoc. Itonal
Toteco tlen itztoc para nochipa quipalehui Cristo tlen ax quipixqui
niyon se itlajtlacol, para ma motemactili ica Toteco queja se
tlacajcahualistli tlen senquistoc cuali para totlajtlacolhua.
\p
\v 15 Huajca yeca ama eltoc Cristo tlen motlajcoquetza ica tlacame
huan Toteco Dios, huan yajaya quisencajtoc nopa yancuic
tlajtolsencahuali. Yeca ama nochi tojuanti tlen Toteco technotztoc
para ma tijneltocaca Cristo, huelis tijselise para nochipa nochi
nopa cuali tlamantli tlen Toteco techtencahuilijtoc techmacas.
Tijselise nochi pampa Cristo techcojqui ica ieso quema mijqui por
tojuanti. Quena, ieso techtlapojpolhuía totlajtlacolhua tlen
tijchijque quema noja quipiyayaya itequi nopa achtohui
tlajtolsencahuali.
\p
\v 16 Pero inquimatij intla se tlacatl quichihua se amatl tlen
quiijtohua ajqueya quiselis sesen tlamantli tlen iaxca quema yajaya
miquis, axaca huelis moaxcatis tlen quitocaros hasta quema ya mictos
nopa tlacatl.
\v 17 Pampa nopa amatl ax quipiyas chicahualistli hasta ya mictos
yajaya tlen quiijcuilo.
\v 18 Queja nopa elqui huejcajquiya ica nopa achtohui
tlajtolsencahuali, monequiyaya miquis se tlapiyali para pehuas
itequiticayo nopa tlajtolsencahuali.
\v 19 Moisés quinpohuili nopa israelitame nochi nopa tlanahuatili.
Huan teipa quicuic borrego ichcatl tlen chichiltic huan nopa xihuitl
itoca hisopo huan quixoloni ipan inieso torojme huan chivojme tlen
quimanelojtoya ica atl. Huan teipa quiijtzelo nopa estli ipan nochi
nopa israelitame huan ipan nopa tlajcuiloli tlen quipixtoya nopa
miyac tlanahuatili.
\v 20 Huan quema quiijtzelohuayaya nopa estli, Moisés queja ni
quinilhui nopa tlacame: “Ni estli quipehualtía itequi nopa
tlajtolsencahuali tlen Toteco quichijtoc ica imojuanti.”
\v 21 Nojquiya Moisés quiijtzelo estli ipan nopa tiopamitl tlen
cuetlaxtli huan ipan nochi nopa tlamantzitzi tlen quitequihuiyayaj
para quihueyichihuase Toteco tiopan calijtic.
\p
\v 22 Huajca hueli tiquijtose para ipan nopa achtohui
tlajtolsencahuali, quitlapajpacchihuayayaj nochi tlamantli ica
estli. Huan ax onca tlapojpolhuili intla se ax quitoyahuas estli.
\s Itlacajcahualis Cristo techquixtilía totlajtlacolhua
\p
\v 23 Nopa tiopamitl tlen cuetlaxtli tlen huejcajquiya oncac nica
ipan tlaltepactli ihuaya nochi nopa tlamantzitzi tlen
quitequihuijque calijtic eltoya se iixcopinca tlen nopa tlen
nelnelía eltoc nepa elhuicac. Huan nojquiya Moisés monejqui
quitequihui inieso tlapiyalime para quitlapajpacchihuas nochi
tlamantzitzi nopona, pero nochi nopa tlamantzitzi tlen onca nepa
elhuicac, Toteco quintlapajpacchijqui ica se tlacajcahualistli tlen
más ipati.
\v 24 Pampa Cristo ax calajqui ipan nopa cuarto Campa Más
Tlatzejtzeloltic tlen tlacame quichijchijtoque tlen san
technextilía quejatza eltoc nepa elhuicac. ¡Axtle! Cristo calajqui
nepa elhuicac campa eltoc nopa tiopamitl tlen nelnelía huan nopona
yajaya itztoc iixpa Toteco para techpalehuis.
\v 25 Huan Cristo ax motemactili miyac huelta queja nopa huejhueyi
israelita totajtzitzi calaquiyayaj sesen xihuitl Campa Más
Tlatzejtzeloltic para quimacase Toteco inieso tlapiyalime. ¡Axtle!
\v 26 Intla queja nopa monectosquía, Cristo monectosquía miquis
miyac huelta tlen quema pejqui tlaltepactli. ¡Pero axtle! Cristo
monexti ipan ni itlamiya tonali huan motemactili san se huelta para
miquis ipan cuamapeli queja se tlacajcahualistli para quinquixtilis
inintlajtlacolhua nochi tlacame huan yeca ayoc tleno monequi más.
\v 27 Pampa Toteco Dios quitlalijtoc para monequi nochi tlacame ma
miquica san se huelta huan teipa monextise iixpa para ma
quintlajtolsencahuas.
\v 28 Huajca Cristo nojquiya mijqui san se huelta quema motemactili
queja se tlacajcahualistli para quintlajtlacolquixtis miyac tlacame.
Huan yajaya sampa hualas, pero ax hualas para tetlajtlacolquixtiqui.
¡Axtle! Yajaya hualas para quinmaquixtis para nochipa nochi tlen
ajachica quichixtoque para ma huala.
\c 10
\p
\v 1 Itlanahuatilhua Moisés huan nochi tlen huejcajquiya
quinnahuatijque tlacame ma quichihuaca elqui san queja se ecahuilotl
tlen technescayotiliyaya nopa miyac cuali tlamantli tlen teipa
nelía melahuac hualasquía ica Cristo. Pero nopa miyac tlanahuatili
ax temacac tlen melahuac. Huan yonque tlacame quimacayayaj Toteco
tlacajcahualistli sesen xihuitl, nopa tlacajcahualistli ax huelqui
quinchihua xitlahuaque iixpa Toteco.
\v 2 Intla quinchijtosquía nopa tlacame xitlahuaque huan nelía
quinyolpajpactosquía iixpa, ax monectosquía para ajachica
quimacase Toteco más tlacajcahualistli, pampa ayoc
quimachilijtosquíaj para noja quihuicaj tlajtlacoli iixpa.
\v 3 ¡Pero axtle! Pampa quema inijuanti quihualicayayaj
tlacajcahualistli sesen xihuitl, nopa tlacajcahualistli
quinilnamiquiltiyaya tlen inintlajtlacolhua.
\v 4 Pampa inieso torojme huan chivojme ax hueli nelía
tetlajtlacolquixtilía.
\p
\v 5 Yeca Cristo, quema hualajqui ipan tlaltepactli, quiilhui Toteco
Dios:
\q “Nopa tlacajcahualistli huan inieso tlapiyalime ax elqui tlen
nelía tijnequiyaya,
\q huajca tijsencajqui notlacayo para nitlacatis queja se tlacatl
huan nimitzmacas nopa tlacajcahualistli tlen melahuac quinamiqui.
\q
\v 6 Pampa yonque tlacame quinmictiyayaj tlapiyalime huan
quintlatiyayaj nejmaxtique moixtla,
\q huan mitzmacayayaj sequinoc tlamantli tlacajcahualistli por
inintlajtlacolhua, ax tijcualitac.
\q
\v 7 Huajca na niquijtohua:
\q ‘Nica niitztoc noTeco.
\q Nijchihuas nochi mopaquilis pampa queja nopa ijcuilijtoc ipan
nopa Amatlapohuali para ma nijchihua.’ ”
\m
\v 8 Achtohui Cristo quiijto para Toteco ax quipactía
tlacajcahualistli, huan inieso tlapiyalime, huan tlapiyalime tlen
quintlatiyayaj nejmaxtique ipan tlaixpamitl ipampa inintlajtlacolhua
yonque nochi ya nopa eltoya senquistoc tlen quiijtojque
itlanahuatilhua Moisés para tlacame ma quimacaca Toteco.
\v 9 Huajca teipa Cristo quiilhui Toteco Dios: “Nica niitztoc
noTeco. Nihualajtoc para nijchihuas tlen mopaquilis.” Huajca ica ni
quinextía para quitlamiltía nopa achtohui tlajtolsencahuali huan
quipehualtía seyoc tlen más cuali.
\v 10 Huan ipaquilis Toteco elqui para Cristo ma
techtlatzejtzelolchihua para nochipa quema san se huelta motemactili
huan mijqui ipan cuamapeli.
\p
\v 11 Nochi nopa totajtzitzi tlen itlanahuatilhua Moisés mojmostla
quinmictiyayaj tlapiyalime huan quimacayayaj Toteco queja
tlacajcahualistli. Pero nopa tlacajcahualistli ax quema huelqui
tetlajtlacolquixtía.
\v 12 Pero Cristo motemacac para miquis san se huelta por
totlajtlacolhua para nochipa, huan teipa yajaya mosehui inejmatl
Toteco Dios campa más onca tlatlepanitacayotl.
\v 13 Nopona Cristo quichiya hasta Toteco Dios quimacas nochi
icualancaitacahua para ma quinnahuati.
\v 14 Pampa ica setzi tlacajcahualistli tlen temactili, techchijqui
tixitlahuaque iixpa Toteco nochi tojuanti tlen techiyocacajtoya para
tiiaxcahua.
\p
\v 15 Tijmatij para melahuac ya ni, pampa Itonal Toteco techilhui
san se ipan Itlajtol Toteco campa quiijtohua:
\q
\v 16 “Ya ni nopa yancuic tlajtolsencahuali tlen nijchihuas ica
israelitame.
\q Nijtlalis notlanahuatil ipan ininyolo para ma quimatica tlaque
nijnequi ma quichihuaca.
\q Quena, niquijcuilos ipan inintlalnamiquilis para ma
quitlepanitaca.”
\m
\v 17 Huan nojquiya Toteco quiijto:
\q “Ayoc quema niquilnamiquis inintlajtlacolhua huan
inintlaixpanolhua.”
\m Queja nopa quiijtohua Itlajtol Toteco.
\p
\v 18 Huajca pampa Toteco ya techtlapojpolhuijtoc nochi
totlajtlacolhua huan quinilcajtoc para nochipa, ayoc monequi
tijmacase tlacajcahualistli para ma techtlapojpolhui.
\s Ma timonechcahuica campa Toteco
\p
\v 19 Huajca ama noicnihua, nochi tojuanti huelis ticalaquise ica
temachili nopona Campa Más Tlatzejtzeloltic ipan elhuicac campa
itztoc Toteco Dios, pampa Jesús quitoyajqui ieso topampa tojuanti.
\v 20 Quena, quema Jesús temactili itlacayo huan mijqui, quitlapo
nopa cortina tlen quitzacuayaya Campa Más Tlatzejtzeloltic ipan
nopa hueyi tiopamitl huan techtlapohuili se ojtli tlen yancuic huan
tlen temaca yolistli.
\v 21 Huan pampa tijpiyaj tohueyi totajtzi, Jesucristo, tlen quipiya
tlanahuatili ica nochi itlacajhua huan techpalehuía iixpa Toteco,
\v 22 ma timonechcahuica campa Toteco Dios ica toyolo tlen xitlahuac
iixpa. Ma tijmatica para temachtli techselis, pampa eltoc queja
Toteco quiijtzelojtoc toyolo tlen elqui fiero ica ieso Cristo para
ma tielica titlapajpactique iixpa. Nojquiya quipajpactoc
totlacayohua ica atl tlen senquistoc cuali.
\v 23 Huajca ma ax caxanis totlaneltoquilis, pero ma tijneltocaca
para temachtli tijselise nochi nopa tlatiochihualistli tlen
tiquinilhuijtoque sequinoc para tijchiyaj tijselise, pampa Toteco
temachtli techmacas nochi tlen techtencahuilijtoc.
\p
\v 24 Ma tijtemoca quejatza timosemacase se ica seyoc para más
timoicnelise huan tijchihuase tlen cuali.
\v 25 Ximomocuitlahuica para ax inquicahuase inmosentilise ininhuaya
sequinoc tlaneltocani. Amo xijchihuaca queja sequinoc tlen ayoc
mosentilíaj. Quinamiqui ximosentilica huan ximosemacaca achi más
ama pampa ya inquiitaj monechcahuía para sampa hualas Jesucristo.
\p
\v 26 Intla se tlacatl tlajtlacolchihuas ica ipaquilis quema ya
quiixmajtoc tlen melahuac, ayoc oncas seyoc tlacajcahualistli tlen
huelis quimacas Toteco ipampa itlajtlacolhua.
\v 27 Quena, intla quihuejcamajcahuas itlacajcahualis Cristo, san
hueli quichiyas se temajmatili para Toteco quitlajtolsencahuas huan
quitlatzacuiltis ipan nopa hueyi tlitl tlen quintzontlamiltis
icualancaitacahua Toteco.
\v 28 Huejcajquiya quema se tlacatl quiixpano se itlanahuatil
Moisés huan ome o eyi tlacame quiitaque huan quiteilhuijque, huajca
nopa tequihuejme quimacaque tlanahuatili para ma quimictica, niyon
ma ax quitlasojtlaca.
\v 29 Pero ama se tlacatl tlen quihuejcamajcahuas Icone Toteco,
monequi ma quiseli se tlatzacuiltili tlen noja más hueyi. Quena,
Toteco tlahuel quitlatzacuiltis tlen moilhuis ax tleno ipati tlen
Cristo quichijqui quema quitoyajqui ieso para techtlapajpacchihuas
tlen totlajtlacolhua huan para quipehualtis nopa yancuic
tlajtolsencahuali ica Toteco. Nopa tlacame chicahuac
quitlaijilhuíaj Itonal Toteco tlen technextilía quejatza Toteco
quipiya hueyi iyolo ica tojuanti.
\v 30 Tojuanti tijmatij para Toteco Dios quiijto: “Na tlen
nechnamiqui nitecuepilis tlen ax cuali quichijtoque huan quena,
niquintlaxtlahuis.” Huan nojquiya ijcuilijtoc ipan Itlajtol Toteco
campa quiijtohua: “Toteco quintlajtolsencahuas itlacajhua.”
\v 31 ¡Nelía temajmati elis para tlen huetzis imaco Toteco tlen
yoltoc para ma quitlatzacuilti!
\p
\v 32 Pero xiquilnamiquica nopa yejyectzi tonali quema inquicajque
itlajtol Toteco. Yonque sequinoc inmechtlaijiyohuiltiyayaj,
imojuanti inmocajque intemachme ipan Toteco.
\v 33 Quemantzi tlacame inmechpinahualtiyayaj huan
inmechmaquiliyayaj tlamiyacapa. Huan quemantzi inmechhuicaque para
xijtlachilica quema chicahuac quintlaijiyohuiltiyayaj sequinoc
imoicnihua.
\v 34 Quena, nojquiya intlaijiyohuijque ica nopa tlaneltocani tlen
quintzactoyaj. Huan quema tlacame inmechquixtiliyayaj tlamantli tlen
imoaxca, inpaquiyayaj pampa inquimatiyayaj para nepa elhuicac
inmechchiyayaya miyac tlatiochihualistli tlen más cuali huan tlen
más ipati.
\v 35 Huajca xijsenhuiquilica ximotemachica ipan Toteco yonque
intlaijiyohuíaj, pampa yajaya inmechmacas se hueyi tlaxtlahuili
nepa elhuicac.
\v 36 Pero ama, monequi xijpiyaca imoyolo huan xiquijiyohuica nochi
tlen inmechpanotihuala, huan quema ya inquichijtose nochi ipaquilis
Toteco, yajaya temachtli inmechmacas nochi tlen
inmechtencahuilijtoc.
\v 37 Pampa Itlajtol Toteco quiijtohua:
\q “Ica se quentzi tonali hualas yajaya tlen quiijto tlajcuiloli
para hualasquía.
\q Yajaya, ax huejcahuas.
\q
\v 38 Se tlen itztoc xitlahuac iixpa Toteco,
\q itztos para nochipa pampa quineltoca.
\q Pero intla se moicancuepas, ax nipaquis ihuaya.”
\m
\v 39 Pero tojuanti ax tiitztoque ininhuaya tlen moicancuepaj huan
quicahuaj Toteco huan mocuapolose. ¡Axtle! Tojuanti tiitztoque
ininhuaya tlen quineltocaj Toteco para ma quinmaquixtilis inialma.
\c 11
\s Tlaneltoquili
\p
\v 1 ¿Tlaque quiijtosnequi tlaneltoquili? Quinequi quiijtos
tijneltocaj para temachtli panos nopa tlamantli tlen Toteco
techtencahuilijtoc. Yeca senquistoc tijmatij para temachtli ya eltoc
nopa tlamantli tlen ama niyon quentzi aya hueli tiquinitaj.
\p
\v 2 Huejcajquiya Toteco Dios tlahuel camatqui cuali tlen
tohuejcapan tatahua pampa quineltocaque ica tlatemachili.
\p
\v 3 Pampa tijneltocaj Itlajtol Toteco, tijmatij para Toteco san
quiijto para ma onca tlaltepactli, elhuicactli huan nochi tlamantli,
huan nochi nopa tlamantli oncac. Huan tijmatij nochi tlamantli tlen
ama tiquitaj, Toteco quisencajqui tlen tlamantli tlen axaca huelqui
quiitac.
\p
\v 4 Abel quineltocac temachtli tlen Toteco quiijto huan yeca
quimacac Toteco se tlacajcahualistli tlen más cuali huan ax queja
itlacajcahualis Caín. Huan pampa quineltocac, Toteco quiijto para
Abel itztoya xitlahuac iixpa, huan quiijto para quicualitac
itlacajcahualis. Huan yonque quipiya miyac xihuitl para mijqui Abel,
itlaneltoquilis technextilía quejatza tojuanti monequi nojquiya
tijneltocase Toteco.
\p
\v 5 Enoc quineltocac temachtli tlen Toteco quiijto, huan yeca se
tonali Toteco quihuicac elhuicac noja yoltoc. Huan ayoc aqui
quipanti itlacayo pampa ax mijqui; Toteco san quihuicac. Pero Toteco
ya ipa quiijtojtoya para quipactiyaya iyolis Enoc.
\v 6 Pero se tlacatl ax hueli quiyolpactis Toteco intla ax
quineltoca temachtli tlen Toteco quiijtohua. Pampa aqui hueli tlen
quinequi monechcahuis campa Toteco, monequi quineltocas para Toteco
itztoc, huan para yajaya quintlaxtlahuía tlacame tlen nelía
quitemohuaj ica tlen cuali.
\p
\v 7 Noé quineltocac temachtli tlen Toteco quiijto, huan yeca quema
Toteco quiyolmelajqui para hualasquía tlahuel miyac atl yonque ax
huelqui quiita para hualayaya, Noé, ica majmajtli, nimantzi pejqui
quichijchihua nopa hueyi cuacanahua queja quiilhui, para ipan
momanahuisquíaj ya huan ichampoyohua. Huan pampa Noé quineltocac
Toteco, technextilía quejatza nelía hueyi inintlajtlacol nopa
sequinoc tlacame tlen ax quineltocaque tlen Toteco quiijto. Huan
yeca Toteco quichijqui Noé xitlahuac iixpa pampa quineltocac.
\p
\v 8 Abraham quineltocac temachtli tlen quiijto Toteco. Yeca quema
Toteco quiilhui ma quisa ipan itlal huan ma yohui ipan se tlali tlen
yajaya quitencahuili para quimacas para iaxca, Abraham quisqui.
Quicajtejqui ichaj huan yajqui yonque ax quimatiyaya canque ajsiti o
canque eltoya nopa tlali.
\v 9 Huan pampa Abraham quineltocac tlen Toteco quiijto, yajaya
ajsito ipan nopa tlali tlen Toteco quitencahuilijtoya quimacas. Huan
nopona itztoya ipan yoyon caltini queja se sejcoyoc ejquetl. Huan
teipa nojquiya san se quichijque Isaac huan Jacob pampa quiselijque
san se tlatencahuali tlen Toteco huan quineltocaque.
\v 10 Abraham mocajqui ipan yoyon caltini huan quipixqui iyolo pampa
quineltocac temachtli tlen Toteco Dios quiilhuijtoya. Yajaya
quichiyayaya para itztos ipan nopa altepetl nepa elhuicac. Achtohui
Toteco moyolilhui quejatza elis nopa altepetl huan teipa quiyejyeco
huan quisencajqui. Nopa altepetl quipiya cuali itlatzinpehualtil
huan huejcahuas para nochipa.
\p
\v 11 Nojquiya Sara, isihua Abraham, quineltocac temachtli tlen
Toteco quiijto, yeca yonque ax hueliyaya conepiya, quiseli
chicahualistli para conecuis. Huan teipa quitlacatilti se icone
yonque ya nanatzi. Quena, quineltocac para eliyaya temachtli Toteco
tlen quitencahuilijtoya para quipiyas icone.
\v 12 Huan Abraham nojquiya quineltocac Toteco yonque ya
huehuejtixtoya huan ya panotoya tonali para huelis quinpiyas
iconehua. Pero yonque queja nopa elqui, quipixqui icone huan teipa
icone motlacachijqui huan quinpixqui iconehua. Huan ama iteipa
ixhuihua Abraham tlahuel momiyaquilijtoque hasta axaca hueli
quinpohuas. Itztoque queja imiyaca sitlalime huan queja imiyaca xali
iteno hueyi atl.
\p
\v 13 Nochi ni tlacame quineltocaque temachtli tlen Toteco quiijto,
pero quema mijque noja ax quiselijtoyaj tlen Toteco
quintencahuilijtoya para quinmacas. Pero inijuanti ica paquilistli
quichiyayayaj pampa quimatiyayaj para Toteco temachtli
quinmacasquía. Yeca inijuanti quiijtojque para itztoyaj sejcoyoc
ehuani huan san paxalohuani ipan ni tlaltepactli.
\p
\v 14 Huan quema inijuanti camatque queja nopa, nempa nesi para
quitemohuayayaj se tlali tlen nelía elisquía iniaxca.
\v 15 Pero ax moilhuiyayaj tlen nopa tlali campa quisque, pampa
intla queja nopa elisquía, huajca hueltosquíaj mocueptosquíaj
nopona intla quinectosquíaj.
\v 16 Pero inijuanti quinequiyayaj se tlali tlen achi cuali,
quinequi quiijtos quinequiyayaj itztose nepa elhuicac. Yeca Toteco
ax pinahua para motocajtía ininDios, huan yajaya
quinsencahuilijtojca se altepetl nepa elhuicac.
\p
\v 17 Abraham quineltocac temachtli tlen Toteco quiijto, huan yeca
quema Toteco quiyejyeco huan quiilhui ma quimactili Isaac, icone
iyojtzi, queja se tlacajcahualistli, nimantzi mocualtlali para
quimictis yonque Toteco quitencahuilijtoya para quimacasquía iteipa
ixhuihua ipan ya.
\v 18 Pampa Toteco ya quiilhuijtoya: “Ipan Isaac tijpiyas miyac
moteipa ixhuihua.”
\v 19 Quema Abraham itztoya para quimictis icone, quimatiyaya para
Toteco quipixqui chicahualistli para quiyolitisquía Isaac yonque
quimictisquía. Huan huelis tiquijtose para Toteco sampa quimacac
icone yolistli quema ya mictoc pampa quema quiilhui ma ax quimicti
elqui nelnechca imiquilis.
\p
\v 20 Isaac quineltocac temachtli tlen Toteco quiijto, yeca
quintencahuili itelpocahua Jacob huan Esaú nopa tlatiochihualistli
tlen quimatqui Toteco quinmacasquía teipa.
\p
\v 21 Jacob quineltocac temachtli tlen Toteco quiijto, yeca quema ya
itztoya para miquis, quitencahuili sesen itelpocahua José quejatza
Toteco quintiochihuasquía teipa. Huan Jacob quihueyichijqui Toteco
quema quincamahui, momatlaquechijtoya ipan icuatopil.
\p
\v 22 José quineltocac temachtli tlen Toteco quiijto. Yeca quema
nechca eliyaya para miquis, quinilhui nopa israelitame para melahuac
se tonal Toteco quinquixtisquía ipan nopa tlali Egipto huan
quinilhui ma quihuicase iomiyohua ininhuaya.
\p
\v 23 Inana huan itata Moisés quineltocaque temachtli tlen Toteco
quiijto. Huajca quema quiitaque para nelía yejyectzi nopa
pilconetzi tlen Toteco quinmacatoya, quitlatijque para eyi metztli,
huan ax quiimacasiyayaj nopa tlanahuatijquetl tlen tlanahuatijtoya
ma quinmictica nochi israelita oquichpilme.
\p
\v 24 Moisés quineltocac temachtli tlen Toteco quiijto. Yeca quema
motlacachijqui ax quinejqui motocajtis icone iichpoca Faraón.
\v 25 Quitlapejpeni para tlaijiyohuis ininhuaya itlacajhua Toteco.
Ax quinejqui mopaquilismacas ica tlajtlacoli tlen san temaca
paquilistli para se tlalochtli.
\v 26 Moisés quiitac para achi más ipati para tlaijiyohuis ipampa
nopa Cristo tlen hualasquía huan ax queja para quipiyas nochi nopa
tomi tlen elqui iaxca ipan tlali Egipto, pampa ya quiitayaya nopa
tlaxtlahuili tlen Toteco teipa quimacasquía.
\p
\v 27 Huan pampa Moisés quineltocac Toteco, yajaya quisqui tlali
Egipto, niyon ax quiimacasiyaya icualancayo nopa tlanahuatijquetl,
pampa quimatiyaya para Toteco itztoya ihuaya yonque ax hueliyaya
quiita.
\p
\v 28 Huan pampa quineltocac Toteco, Moisés quinilhui nopa
israelitame para ma quisencahuaca nopa Pascua tlacualistli, huan ma
quimictica se pilborregojtzi huan ma quiijtzeloca ieso ipan
inincaltencua para ielhuicac ejca Toteco tlen temictía, ma ax
quimictisquía iniachtohui ejca cone quema panosquía.
\p
\v 29 Moisés huan nochi nopa israelitame quineltocaque para
temachtli tlen Toteco quiijto, yeca panoque ipan nopa Chichiltic
Hueyi Atl queja elisquía tlen hueli tlali tlen huactoc. Pero quema
nopa egiptome quinejque panose, nopa atl quinatzonpolihuilti.
\p
\v 30 Nopa israelitame quineltocaque temachtli tlen Toteco quiijto,
yeca inijuanti quiyahualojtinenque nopa altepetl Jericó para
chicome tonali. Huan nopa hueyi tepamitl tlen quiyahualohuayaya nopa
altepetl, huetzqui.
\p
\v 31 Nopa sihuatl Rahab tlen achtohuiya tlacanemiyaya quineltocac
Toteco huan yeca quinseli nopa achtohui israelitame tlen hualajque
tlajtlachiyacoj quejatza huelisquíaj quitlanisquíaj ialtepe. Huan
yeca Rahab ax mijqui ininhuaya nopa sequinoc Jericó ehuani tlen ax
quitlepanitaque Toteco.
\p
\v 32 ¿Huan tlaque más monequi niquijtos? Ax nicaxilis para
nimechpohuilis quejatza chicahuac quineltocaque Toteco nopa tlacame
queja Gedeón, Barac, Sansón, Jefté, David, Samuel huan nochi nopa
tiocamanalohuani.
\v 33 Quena, nochi inijuanti quineltocaque temachtli tlen Toteco
quiijto huan yeca quintlanque tlanahuatiani huan ininsoldados,
tetlajtolsencajque xitlahuac huan quiselijque tlen Toteco
quintencahuilijtoya. Huan yonque quintzajque sequin inijuanti
ininhuaya tecuanime, Toteco quincamatzajqui huan quinmanahui pampa
quineltocaque.
\v 34 Huan quema quinmictisnequiyayaj ipan tlitl xahuantoc, nopa
tlitl sehuiyaya. Quema nechca itztoyaj para miquise sequin ica
machete, Toteco quinmanahui. Quema ayoc quipiyayayaj fuerza, Toteco
quinfuerzajmacac. Quipixque chicahualistli ipan tlatehuilistli huan
tlatlanque, huan quintojtocaque miyac soldados tlen huejca ehuani.
\p
\v 35 Sequin sihuame quineltocaque Toteco huan yajaya quinyoliti
sampa ininconehua o ininhuehuejhua tlen ya mictoyaj.
\p Sequinoc tlaneltocani mijque pampa chicahuac
quintlaijiyohuiltiyayaj para ma quicahuasquíaj Toteco, pero ax
quiselijque para ma quinmaquixtis tlen nopa tlaijiyohuilistli, pampa
quinequiyayaj quiselise tlen nelcuali teipa quema nochi tlacame
moyolcuise.
\p
\v 36 Sequin tlaneltocani quinpinahualtijque, sequinoc quinhuitejque
ica cuartas ica omitl, sequinoc quinilpijque ica tepos mecatl ipan
tlatzactli tlen fiero.
\v 37 Sequin tlaneltocani quinmictijque ica tetl, sequinoc
quinhuejhuelojque ica sierra, sequinoc quinmictijque ica machetes,
sequinoc quinyejyecojque ica miyac tlamantli para ma
quitlahuelcahuaca Toteco, pero ax quicajque. Sequinoc tlaneltocani
nejnenque campa hueli huan ax cana quipiyayayaj para mosehuise. San
quipiyayayaj inincuetlaxo borregojme o chivojme para ininyoyo.
Eliyayaj tlahuel teicneltzitzi huan tlahuel mayanayayaj, huan
tlacame san quincocoliyayaj huan tlen hueli quinchihuiliyayaj.
\v 38 Nochi ni tlaneltocani nelía itztoyaj cuajcualme huan ax
quinamiquiyaya itztose ipan ni tlaltepactli. Motlatijtinenque campa
hueli ipan huactoc tlali, ipan tepetini, ipan tlacajcahuaya huan
ipan huejhueyi tlacoyoctini ipan tlaltepactli.
\p
\v 39 Toteco quipacti tlen quichijque nochi ni tlacame huan camatqui
cuali tlen inijuanti pampa chicahuac quineltocaque. Pero quema
mijque nopa tlacame, noja ax quiselijtoyaj nochi tlen Toteco
quintencahuilijtoya quinmacas.
\v 40 Pampa Toteco quipixqui itlalnamiquilis tlen achi cuali.
Quinejqui para inijuanti ma quichiyaca tlen quintencahuilijtoya
hasta san sejco techchihuas tojuanti huan inijuanti senquistoc cuali
iixpa huan techmacas nochi tlen quiijtojtoc techmacas.
\c 12
\s Ma timoilhuica tlen Jesús
\p
\v 1 Ama eltoc queja techyahualohuaj huan techtlachilíaj nochi ni
tlacame tlen achtohui quineltocaque Toteco huan quiijiyohuijque tlen
quinpanotihualajqui. Huajca queja se motlalojquetl quichihua, ma
timoquixtilica nochi tlen techtzacuilía huan ma tijtlahuelcahuaca
nopa tlajtlacoli tlen más techtzacuilía. Ma timoyoltetilica huan
ma timotlaloca ipan nopa ojtli tlen Toteco technextilijtoc.
\v 2 Ma tijpixtoca totlachiyalis ipan Jesús tlen technextili
quejatza ma tijneltocaca Toteco huan techpalehuía mojmostla achi
más ma tijneltocaca. Yajaya quiijiyohui nopa hueyi pinahualistli
para miquis ipan cuamapeli pampa quimatiyaya nopa hueyi paquilistli
tlen quichiyayaya teipa. Huan ama ya mosehuijtoc inejmatl Toteco
campa más onca tlatlepanitacayotl.
\p
\v 3 Ximoyolilhuica tlen nochi tlen Jesús quiijiyohui huan tlen
nochi nopa fiero tlamantli tlen ax cuajcualme quichihuilijque para
ax inyamalihuise huan intlapolose.
\v 4 Hasta amantzi ax timictoque ipan nopa tlatehuilistli ica nopa
tlajtlacolchijca tlacame tlen techcocolíaj.
\v 5 ¿Huelis ya inquiilcajtoque tlen Toteco techilhui tojuanti
tiiconehua?
\q Ijcuilijtoc ipan Itlajtol Toteco campa yajaya techilhuía:
\q “Noconehua, amo xicualanica quema na niimoTeco
nimechtlalnamictía,
\q niyon amo ximotzinquixtica quema nimechtlacahualtía.
\q
\v 6 Pampa nochi tlen niquinicnelía,
\q niquintlalnamictía,
\q huan niquincuahuasashuía nochi tlen niquinselía para elise
noconehua.”
\m
\v 7 Huajca xiquijiyohuica quema Toteco inmechtlalnamictía pampa
ica ya nopa inmechnextilía para nelía initztoque iniconehua.
Quena, Toteco quichihua queja nochi tetatme tlen quintlalnamictíaj
huan quinxitlahuaj ininconehua quema quichihuaj tlen ax cuali para
quinnextilise quejatza ma monejnemiltica cuali. Axaca se conetl tlen
itata ax quema quitlalnamictía.
\v 8 Intla Toteco ax inmechtlalnamictía huan ax inmechxitlahua
quema inquichihuaj tlen ax cuali, huajca ax nelía iniconehua. Ax
initztoque ipan ifamilia huan yajaya ax imoTata.
\v 9 Nojquiya quema tiitztoyaj ticoneme, tijpixtoyaj totatahua ipan
ni tlaltepactli tlen techtlalnamictiyayaj huan techtlacahualtiyayaj
huan yeca tiquintlepanitayayaj. Huajca noja más monequi
tijtlepanitase Toteco Totata para huelis se tonal tiitztose ihuaya.
\v 10 Totatahua ipan ni tlaltepactli techtlalnamictijque huan
techtlacahualtijque para se ome xihuitl queja quiitaque para cuali
pampa quinequiyayaj ma timonejnemiltica xitlahuac. Pero quema Toteco
techtlalnamictía huan techxitlahua, yajaya quimati tlen senquistoc
cuali para techpalehuis tielise titlatzejtzeloltique queja yajaya
tlatzejtzeloltic.
\v 11 Quema se techtlalnamictía o techxitlahua, ax techpactía ipan
nopa tlalochtli, pampa techcocohua. Pero intla tijchihuaj cuenta
para tlen techxitlahua, teipa tiquitase para nopa tlatzacuiltili
techpalehui miyac para tijchihuase tlen xitlahuac huan para ma
tijpiyaca tlasehuilistli ipan toyolo.
\s Monequi tijchihuilise cuenta itlajtol Toteco
\p
\v 12 Huajca ximoyolchicahuaca ipan Toteco imojuanti tlen
insiyahuij. Huan ximotetilica imojuanti tlen inyamalijtoque ipan
imotlaneltoquilis.
\v 13 Xijtoquilica se ojtli tlen xitlahuac. Queja nopa, nochi
tlacame tlen yohuij imotepotzco yonque pilquentzi quineltocaj
Toteco, ax motepotlamise, niyon ax huetzise. Inijuanti nejnemise
xitlahuac huan quipiyase chicahualistli.
\p
\v 14 Xijchihuaca campeca xiitztoca ica yejyectzi ica nochi tlacame
huan xijpiyaca se yolistli tlatzejtzeloltic, pampa intla ax
inquipiyase se yolistli tlatzejtzeloltic, huajca ax huelis
inquiitase Tohueyiteco.
\v 15 Hueyi iyolo Toteco ica tojuanti huan ximomocuitlahuica se ica
seyoc para axaca quiilcahuas. Ma axaca yolcualani pampa intla se
cualantinemis, huelis quintlanahuis miyac toicnihua huan huelis
quinmajcahuas ipan tlajtlacoli.
\v 16 Ximotlachilica para axaca ma quichihua tlamantli ica tlen ax
inamic. Ma axaca quihuejcamajcahua tlen Toteco techmacatoc queja
Esaú quichijqui. Yajaya quitlahuelcajqui nochi nopa tlatiochihuali
tlen eliyaya iaxca para quiselis pampa eliyaya nopa achtohui
ejquetl. Quena, nochi quinemaquilti iicni ica se plato tlacuali
quema mayanayaya.
\v 17 Huan tijmatij para teipa Esaú quinequiyaya quiselis
itlatiochihual itata, pero ax huelqui. Yonque chocac miyac, ya
panotoya tonal para moyolcuepas huan para moaxcatis tlen
quinamacatoya.
\p
\v 18 Imojuanti ax inmonechcahuíaj campa se tepetl tlen hueli
inquiitzquise queja nopa israelitame quichijque huejcajquiya quema
Toteco quinmacac itlanahuatilhua. Inijuanti quinechcahuijque se
tepetl tlen tlatlayaya, huan iniixpa monexti se hueyi
tzintlayohuilotl tlen quinmajmati, huan quiitaque se hueyi
ajcomalacatl.
\v 19 Huan quicajque tlapitzali huan quicajque quejatza chicahuac
Toteco quincamahuiyaya. Huan inijuanti tlahuel quiimacasque itlajtol
huan yeca ica nochi ininyolo quitlajtlanijque Toteco para ma ayoc
quincamahui.
\v 20 Toteco quinmacac se tlanahuatili para intla aqui hueli tlacatl
o tlapiyali quinechcahuisquía nopa tepetl, monequi quimictise ica
tetl o ica cuatlamintli. Huajca inijuanti tlahuel momajmatijque.
\v 21 Huan pampa tlahuel temajmati tlen quiitaque ipan nopa tonal,
Moisés nojquiya quiijto: “Nelía nimajmahui huan nihuihuipica.”
\p
\v 22 Pero ica imojuanti ax queja nopa. Inajsitoque campa tepetl
Sion campa eltoc ialtepe Toteco tlen yoltoc. Quena, inajsitoque ipan
altepetl Jerusalén tlen eltoc nepa elhuicac campa mosentilijtoque
onpano miyac miles tlen elhuicac ehuani.
\v 23 Inajsitoque ipan nopa tlasentilistli tlen tlacame tlen
temachtli quiselise itlatiochihualis Toteco pampa quipiyaj inintoca
ijcuilijtoc nepa elhuicac. Quena, inajsitoque campa Toteco itztoc,
yajaya tlen quintlajtolsencahuas nochi tlacame. Nojquiya
inmosentilijtoque ininhuaya inintonaltzitzi cuajcuali tlacame tlen
ama Toteco quinchijtoc senquistoc xitlahuaque iixpa.
\v 24 Inajsitoque campa Jesús tlen quichijqui ni yancuic
tlajtolsencahuali ica Toteco huan tlacame. Inajsitoque campa eltoc
ieso yajaya tlen tetlapojpolhuía. Huan ieso Jesús tlen
tetlapojpolhuía eltoc más cuali que ieso Abel tlen quinotzayaya
Toteco para ma tetlatzacuilti.
\p
\v 25 Huajca xijchihuaca campeca para inquitlamichihuase tlen Toteco
techilhuía. Huejcajquiya nopa israelitame tlen itztoyaj ipan ni
tlaltepactli quiselijque se hueyi tlatzacuiltili pampa ax
quitlepanitaque itlajtol Toteco tlen Moisés quinpohuiliyaya. Huajca
achi más tojuanti tijselise se hueyi tlatzacuiltili intla ax
tijchihuase cuenta tlen techcamahuía tlen elhuicac.
\v 26 Achtohuiya, quema Toteco quincamahui ipan nopa tepetl Sinaí,
itos quichijqui ma mojmolini tlali. Huan ama yajaya
techtencahuilijtoc sampa mojmolinis pampa quiijtohua: “San se
huelta más nitecamahuis, huan sampa mojmolinis tlaltepactli. Pero
ama nojquiya mojmolinis elhuicactli.”
\v 27 Quema yajaya quiijto: “San se huelta más”, quiijtosnequi
para mojmolinis huan Toteco quiquixtis nochi tlamantli tlen yajaya
quichijtoc. Huan san mocahuas nopa tlamantli tlen eltoc para nochipa
tlen ax hueli mojmolinía.
\v 28 Huajca pampa tijselise se altepetl tlen ax hueli mojmolinía,
ma tijtlascamatica Toteco. Nojquiya ma tijtequipanoca ica nochi
toyolo, ma tijpaquilismacaca huan ma tijhueyichihuaca ica miyac
majmajtli huan tlatlepanitacayotl,
\v 29 pampa Toteco yajaya temajmati queja se tlitl tlen
quitlamitlatía nochi tlen onca.
\c 13
\s Quejatza monequi monejnemiltise tlaneltocani
\p
\v 1 Ax quema xijcahuaca ximoicnelica queja inicnime.
\v 2 Amo xiquilcahuaca para inquinselise ica cuali, nopa tlacame
tlen huejca ehuani tlen ajsij campa imochaj, pampa queja nopa sequin
quinselijtoque elhuicac ehuani queja ininpaxalojcahua yonque ax
quimatiyayaj.
\v 3 Amo xiquilcahuaca xiquinpalehuica tlen tzactoque pampa
tepohuiliyayaj itlajtol Toteco. Ximoyolilhuica queja tlaijiyohuíaj
queja imojuanti initztosquíaj ipan tlatzactli ininhuaya. Nojquiya
xiquinilnamiquica nopa sequinoc toicnihua tlen tlacame
quinchihuilíaj tlen fiero, pampa imojuanti nojquiya inquipiyaj
imotlacayo tlen se tonal huelis tlaijiyohuis.
\p
\v 4 Nochi ma quitlepanitaca se tlacatl huan se sihuatl tlen
monamictijtoque pampa tlapajpactic ininnemilis san sejco. Pero
Toteco Dios quintlatzacuiltis tlen momecatíaj huan tlen quichihuaj
tlamantli ica tlen ax ininnamic.
\p
\v 5 Amo xiquixtocaca inquipiyase miyac tomi. Más cuali xipaquica
ica tlen inquipiyaj pampa Toteco Dios quiijtojtoc: “Ax quema
nimechcajtehuas, nochipa niitztos imohuaya.”
\v 6 Huajca ica miyac paquilistli sesen tojuanti hueli quiijtos:
\q “Toteco nechpalehuía.
\q Ax niquimacasis tlen tlacame huelise nechchihuilise.”
\p
\v 7 Xiquinilnamiquica imotlamachtijcahua tlen inmechyacanque huan
inmechmachtijque Itlajtol Toteco achtohui. Ximoyolilhuica tlen nochi
nopa tlatiochihualistli tlen hualajqui tlen ininnemilis huan
xijchihuaca campeca para cuali inquineltocase Toteco queja inijuanti
quineltocaj.
\p
\v 8 Jesucristo itztoc san se yalhuaya huan ama huan san se itztos
para nochipa.
\v 9 Ma axaca inmechcajcayahua ica miyac tlamantli tlamachtilistli
tlen yancuic o tlen ax quema inquicactoque. Inquimatij para hueyi
iyolo Toteco imohuaya huajca más cuali ma tijcahuilica para ni
tlalnamiquilistli ma techyolchicahua ipan Toteco. Amo xijtemoca para
inmomacase tetili iixpa Toteco ipampa ax inquicuaj sequin
tlacualistli. Nopa piltlanahuatiltzitzi tlen tlacame quichijtoque ax
quinpalehuijtoc tlen quintoquilíaj.
\p
\v 10 Nopa totajtzitzi tlen noja quimacaj Toteco tlacajcahualistli
para momaquixtise, ax quipiyaj parte ipan nopa tlacajcahualistli
tlen tojuanti tijpiyaj. Pampa Jesucristo mijqui ipan icuamapel queja
totlacajcahualis ipan tlaixpamitl huan yajaya tlen nelía
tetlajtlacolquixtía.
\p
\v 11 Sesen xihuitl nopa hueyi israelita totajtzi quicui ieso nopa
tlapiyali tlen quimictijque huan quihuica tiopan calijtic Campa Más
Tlatzejtzeloltic huan quitencahua queja se tlacajcahualistli para
quiixtzacuas tlajtlacoli. Huan teipa quicui itlacayo nopa tlapiyali
huan quisa tlen nopa altepetl huan nopona quitlatía.
\v 12 Huajca queja nopa nojquiya elqui ica Jesús. Quena, yajaya
quisqui nopa altepetl huan nepa tlaijiyohui huan mijqui para
tetlapajpacchihuas ica ieso.
\v 13 Huajca ma tiquisaca nojquiya huan tiyase altepeteno campa
yajaya itztoc campa onca pinahualistli, yonque monequis
titlaijiyohuise pampa tiiaxcahua.
\v 14 Pampa nica ipan ni tlaltepactli ax onca se altepetl tlen
huejcahuas para nochipa. ¡Axtle! Tojuanti tijchiyaj nopa yancuic
altepetl nepa elhuicac tlen teipa oncas.
\p
\v 15 Ma nochipa tijtlascamatica Toteco ica itlapalehuil Jesucristo.
Ni tlascamatili eltoc nopa tlacajcahualistli tlen ama quinamiqui
tijmacase Toteco. Huajca ica tocamac ma tijhueyichihuaca Toteco
ajachica.
\v 16 Amo xiquilcahuaca para xijchihuaca tlen cuali. Xiquinpalehuica
sequinoc tlen ax tleno quipiyaj, pampa ya nopa quicualita Toteco
queja elisquía se tlacajcahualistli.
\p
\v 17 Xiquintlepanitaca imotlayacancahua ipan Toteco huan
xiquincahuilica ma quipiyaca tlanahuatili ica imojuanti, pampa
inijuanti quimocuitlahuíaj imoalma. Inijuanti quimatij para se
tonal monequi moquetzase iixpa Toteco huan quimacase cuenta tlen
nochi tlen quichijtoque. Xiquincahuilica para ma quimacase cuenta
tlen imojuanti ica paquilistli iixpa huan ax ica cuesoli, pampa
intla axtle, huajca imojuanti nojquiya intlaijiyohuise.
\p
\v 18 Ximomaijtoca ica Toteco topampa tojuanti. Tijmatij ipan toyolo
para tinemij xitlahuac iixpa huan queja nopa tijnequisquíaj
tijchihuase nochipa.
\v 19 Huan achi más nijnequi ximomaijtoca ica Toteco ama para ax
huejcahuas niyas nimechitati.
\s Quintiochijqui huan quinnahuatijtejqui
\p
\v 20 Ma inmechtiochihua Toteco Dios tlen temaca tlasehuilistli ipan
teyolo huan tlen quiyoliti Tohueyiteco Jesucristo. Yajaya nopa hueyi
tlamocuitlahuijquetl tlen itlacajhua. Huan yajaya tlen quitoyajqui
ieso para quipehualtis nopa yancuic tlajtolsencahuali tlen
huejcahuas para nochipa.
\v 21 Ma inmechmaca nochi yajatili tlen monequi para inquichihuase
nochi tlen cuali tlen ya ipaquilis. Toteco ica ichicahualis
Jesucristo ma quichihua ipan imojuanti nochi tlen quipactía. Ma
tijhueyichihuaca para nochipa huan ax quema ma tijtlamiltise. Queja
nopa ma eli.
\p
\v 22 Noicnihua, ica nochi noyolo nimechtlajtlanía xijtlacaquilica
nochi tlen nimechilhuía nica ipan ni amatlajcuiloli para
nimechyolchicahuas, pampa ax quipiya miyac tlajtoli.
\p
\v 23 Nojquiya nijnequi xijmatica para ya quimalacanijque toicni
Timoteo tlen tzactoya. Huan intla yajaya nimantzi ajsis nica,
nijhuicas nohuaya quema nimechpaxaloti.
\p
\v 24 Xiquintlajpaloca nochi tlen inmechyacanaj ipan Toteco huan
nojquiya nochi sequinoc itlatzejtzeloltijca tlacajhua Toteco nepa.
Toicnihua ipan tlali Italia inmechontlajpalohuaj.
\p
\v 25 Toteco ma quipiya hueyi iyolo ica imojuanti. Queja nopa ma
eli.