\id 1PE
\h 1 PEDRO
\mt Nopa Achtohui Amatlajcuiloli tlen Quiijcuilo Pedro
\c 1
\s Pedro quintlajcuilhui tlaneltocani tlen mosemantoyaj campa hueli
\p
\v 1 Na niPedro niitlayolmelajca Tohueyiteco Jesucristo. Nimechtlajcuilhuilía imojuanti tlen inquicajtejtoque imotlal huan inyajtoque initztotij campa hueli ipan tlaltini Ponto, Galacia, Capadocia, Asia huan Bitinia.
\v 2 Huejcajquiya Toteco Totata inmechtlapejpeni pampa ipa quimatiyaya tlachque panosquía teipa. Huan Itonal Toteco inmechiyocacajtoc para inelise intlatzejtzeloltique iixtla. Yeca inquineltocatoque Jesucristo huan inmechyolpajpactoc ica ieso tlen quitoyajqui topampa nochi tojuanti. Ma Toteco quipiya hueyi iyolo ica imojuanti huan ma inmechmaca miyac tlasehuilistli ipan imoyolo.
\s Tonemilis ipan Jesucristo
\p
\v 3 Ma tijhueyichihuaca Toteco Dios yajaya tlen iTata Tohueyiteco Jesucristo pampa miyac techtlasojtla, huan yeca techtlacatiltijtoc sampa huan techchihuilijtoc ma tijpiyaca tonemilis tlen yancuic. Huan nochi tlen tijpiyaj eltoc pampa yajaya quiyoliti Jesucristo quema ya mictoya. Huan ama timochixtoque tlachque techmacas teipa,
\v 4 pampa nepa elhuicac techchiya tlamantli tlen tlahuel cuali tlen Toteco quiajcojtoc para techmacas teipa. Huan nopa tlamantli huejcahuas para nochipa. Ax palanis, niyon nenpolihuis, niyon sosolihuis.
\v 5 Ama pampa inquineltocaj Jesucristo, Toteco inmechmocuitlahuijtinemis ica ichicahualis hasta ajsis nopa san itlamiya tonali. Huan ipan nopa tonali inmechnextilis nochi tlen inmechchiya nepa pampa Toteco inmechmaquixtijtoc tlen imotlajtlacolhua.
\p
\v 6 Huajca xiyolpaquica, yonque ama para se tlalochtli monequi inquiijiyohuise miyac tlamantli tlayejyecoli.
\v 7 Quena, queja tlacame quiyejyecohuaj oro ipan tlitl para quipiyase oro tlen senquistoc cuali, queja nopa Toteco nojquiya quichihua ica imojuanti. Yajaya quicahuilía para ma huala tlaijiyohuilistli para quiyejyecos imotlaneltoquilis para quiitas intla senquistoc inquineltocaj. Quema Toteco quiyejyecohua imotlaneltoquilis, más quipatiita huan ax queja oro tlen más cuali. Huan intla Toteco quiitas para senquistoc cuali inquineltocaj Jesucristo, huajca ipan nopa tonal quema sampa hualas Tohueyiteco Jesucristo yajaya inmechxochimacas, inmechhueyitlalis huan yajaya quinnextilis nochi quejatza miyac inmechtlepanita.
\p
\v 8 Inquiicnelíaj Jesucristo yonque ax quema inquiitztoque. Huan inquineltocaj yonque ax hueli inquiitaj ama. Nelía hueyi nopa paquilistli tlen inquipiyaj ipan imoyolo hasta ax hueli inquinilhuise sequinoc quejatza tlahuel inpaquij.
\v 9 Huan pampa inmotemachijtoque ipan ya, yajaya quimaquixti imoalma para ax mocuapolos para nochipa.
\p
\v 10 Itiocamanalojcahua Toteco huejcajquiya quiijcuilojque tlen panosquía teipa huan techilhui quejatza Toteco quipiyasquía hueyi iyolo ica tojuanti ipan ni tonali. Pero itiocamanalojcahua ax quimachiliyayaj cuali tlen quiijcuilohuayayaj. Huajca quitemojque huan momachtijque para quimachilise quejatza Toteco techtlajtlacolquixtisquía ama.
\v 11 Huan Itonal Tohueyiteco Cristo itztoya ininpani, huan quinmacayaya inintlalnamiquilis para huelque quiijcuilojque huejcajquiya quejatza Cristo tlaijiyohuisquía ipan ni tonali. Huan huejcajquiya nojquiya quiijcuilojque quejatza Cristo quipiyasquía ihueyitilis teipa, quema tlamisquía itlaijiyohuilis. Huan itiocamanalojcahua Toteco quinequiyayaj quimatise ajqueya yajaya tlen tlaijiyohuisquía teipa huan ipan tlachque xihuitl panosquía.
\v 12 Toteco quinnextili para nopa tlamantli tlen quiijcuilohuayayaj ax panosquía ipan ininyolis, pero elqui inintequi para tlayolmelahuase tlen panos miyac xihuitl teipa ica nochi tojuanti. Huan yeca teipa Toteco quititlanqui Itonal tlen elhuicac, huan nopa tlacame yajque ica ichicahualis Itonal para inmechnextilise tlen quinequi quiijtos Itlajtol Toteco tlen nopa tiocamanalohuani quiijcuilojque huejcajquiya. Inmechnextilijque nochi nopa tlamantli nelcuajcualtzi tlen Toteco techchihuilijtoc ipan Cristo huan hasta ama elhuicac ehuani nojquiya quinequij quitlachilise quejatza panotiya ni tlamantli.
\s Toteco technotztoc ma tiyaca ipan se ojtli xitlahuac
\p
\v 13 Huajca xijmocuitlahuica imotlalnamiquilis para inmoyolilhuise tlen xitlahuac. Cuali ximonahuatica. Huan ica paquilistli ximochiyaca hasta inquiselise nochi nopa tlatiochihualistli tlen Toteco inmechmacas quema sampa hualas Jesucristo.
\v 14 Xijchihuaca tlen Toteco inmechilhuía pampa iniconehua. Amo xijchihuaca nopa tlamantli ax cuali tlen inquichihuayayaj achtohuiya quema ax tleno inquimachiliyayaj tlen itlajtol Toteco.
\v 15 Tlatzejtzeloltic Toteco tlen inmechnotztoc para xiitztoca iniconehua; huajca imojuanti nojquiya xiitztoca intlatzejtzeloltique huan xijchihuaca tlen senquistoc cuali.
\p
\v 16 Pampa ijcuilijtoc ipan Itlajtol Toteco campa yajaya quiijto:
\p “Monequi xiitztoca intlatzejtzeloltique pampa na nitlatzejtzeloltic.”
\p
\v 17 Intla inquitocaxtíaj Toteco “Totata” quema inquinotzaj, cualtitoc, pero monequi nojquiya inquiimacasise inquiixpanose. Queja nopa monequi inquitlepanitase nochi tonali quema noja innemij ipan ni tlaltepactli campa initztoque queja seyoc altepetl ehuani. Yajaya ax inmechchicoicnelis quema tetlajtolsencahuas. Quintlajtolsencahuas nochi tlacame queja tlen cuali huan tlen ax cuali quichijtoque.
\v 18 Achtohuiya inquitoquiliyayaj inintlalnamiquilis tohuejcapan tatahua, pero inquimatij Toteco tlaxtlajqui para inmechmaquixtis tlen nopa yolistli tlen ax ipati tlen inquipixtoyaj. Pero Toteco ax tlaxtlajqui para inmechmaquixtis ica tlen panotehua queja tomi tlen plata o tlen oro. ¡Axtle!
\v 19 Yajaya tlaxtlajqui ica ieso Jesucristo tlen quitoyajqui quema mijqui. Huan imiquilis ya onpano hueyi ipati. Quena, queja tlacame quimictíaj se pilborregojtzi tlen ax tleno quichijtoc para se tlacajcahualistli, nojquiya Cristo mijqui imopampa imojuanti yonque ax quipixqui niyon se itlajtlacol.
\v 20 Huejcajquiya quema noja aya oncayaya tlaltepactli, Toteco Dios quitequimacac Cristo para ma huala ipan tlaltepactli huan ma miqui topampa tojuanti tlen techicnelía miyac. Huan yeca queja nopa panotoc ipan ni tonali.
\p
\v 21 Por tlen Cristo inmechchihuilijtoc, inmotemachijtoque ipan Toteco Dios. Huan pampa Toteco quiyolcuic Cristo quema ya mictoya huan quimacac ihueyitilis, ama imojuanti hueli inquineltocase Toteco huan inmochiyase ipan ya ica temachili.
\p
\v 22 Ama inquichihuaj tlen quiijtohua nopa tlajtoli tlen melahuac tlen Toteco, huan yajaya inmechyolpajpactoc para huelis inquinicnelise imoicnihua. Huajca nelía ximoicnelica se ica seyoc ica imoyolo cuali iixtla Toteco,
\v 23 pampa ya intlacatque sampa. Se tonal tlamis nopa yolistli tlen pejqui quema intlacatque tlen imonana, pero ax quema tlamis nopa yolistli yancuic tlen ama inquipiyaj pampa inquineltocatoque Itlajtol Toteco, pampa Itlajtol Toteco yoltoc huan mocahuas para nochipa.
\v 24 Ijcuilijtoc ipan Itlajtol Toteco queja ni:
\q “Nochi tlacame ipan ni tlaltepactli itztoque queja sacatl tlen ax huejcahua.
\q Huan nochi tlamantzitzi tlen tlacame quipiyaj eltoc queja xochitl tlen pilinij.
\q Nochi sacatl huaqui huan nochi xochitl huetzi,
\q
\v 25 pero Itlajtol Toteco mocahua para nochipa.”
\m Huan ya ni Itlajtol tlen inmechcamahuijtoque.
\c 2
\p
\v 1 Huajca ayoc xitecocolica, niyon xitlacajcayahuaca, niyon amo
xijchihuaca ome imoxayac. Ayoc xiquinchicoitaca sequinoc, niyon
xiquintlaijilhuica.
\v 2 Queja pilconetzitzi quinequij lechi, tlahuel xijnequica
Itlajtol Toteco ica nochi ichicahualis para ica inmoscaltise ipan
Toteco tlen inmechmaquixtijtoc,
\v 3 huan ya inquimatij para hueyi iyolo ica imojuanti.
\s Cristo nopa hueyi tetl
\p
\v 4 Huajca ximonechcahuica campa Cristo, yajaya tlen quipiya
yolistli ipan ya. Yonque tlacame ax quiselijque, Toteco Dios
quitlapejpeni Cristo huan quiijto para yajaya tlen más ipati.
Quena, yajaya itztoc queja nopa tetl tlen más hueyi huan más
monequi quema tlacame quichihuaj se cali tlen tetini. Nopa hueyi
tetl monequi yohui calnacastla huan ipan ya tlatzquise nochi
sequinoc tetini ipan nopa cali.
\v 5 Titlaneltocani ya tijpiyaj yolistli yancuic huan tiitztoque
queja nopa sequinoc tetini tlen ica Toteco quichihua nopa cali tlen
axaca hueli quiita. Monequi timotlatzquilise ipan Cristo tlen
mocahua calnacastla. Tiitztoque titotajtzitzi tlen
titlatzejtzeloltique. Huan totequi eltoc para tijmacase Toteco
tlacajcahualistli. Pero ax tijmacaj tlacajcahualistli tlen tlacame
hueli quiitase. Totlacajcahualis eltoc para tijtequipanose, huan
tijchihuase nochi tlen technahuatía. Huan Toteco quiselis tlen
tijmacase pampa Jesucristo ya techpajpactoc.
\v 6 Ijcuilijtoc ipan Itlajtol Toteco campa Toteco quiijto ni tlen
Cristo, huan quiijtohua:
\q “Queja se calchijquetl achtohui quitlapejpenía nopa hueyi tetl
tlen yas calnacastla huan ipan quiquetzas ichaj,
\q na ya niquiyocatlalijtoc ipan altepetl Jerusalén yajaya tlen
nijtlapejpenijtoc para elis tlen más ipati ipan nochaj.
\q Huan ajqueya quineltocas ax quema mopinahuas pampa
quineltocatoc.”
\m
\v 7 Quena, tojuanti tlen tijneltocaj Cristo, tiquitaj para onpano
hueyi ipati. Pero sequinoc tlen ax quineltocaj, san
quihuejcamajcahuaj Cristo queja ax tleno ipati. Yeca elis queja ni
tlen Toteco quiijtohua ipan Itlajtol:
\q “Nopa hueyi tetl tlen nopa calchihuani quihuejcamajcajque huan
quiijtojque ax tleno ipati,
\q yajaya nopa tlen Toteco quitlapejpeni para elis tlen más monequi
ipan ichaj huan yas calnacastla para quimacas tetili nopa cali.”
\m
\v 8 Huan nojquiya Toteco camati tlen Cristo ipan Itlajtol campa
quiijtohua:
\q “Yajaya elis queja se tetl campa tlacame motepotlamise huan ipan
huetzise.”
\m Quena, tlacame motepotlamise huan mopolose pampa ax quineltocaj
niyon ax quichihuaj tlen quiijtohua Itlajtol, huan quej nopa
quipantise nopa tlatzacuiltilistli tlen Toteco ipa quitlalijtoya
para ininpantis.
\s Yajuanti tlen iaxcahua Toteco
\p
\v 9 Pero imojuanti ax inmotepotlamijtoque ipan Itlajtol. Initztoque
tlacame tlen Toteco inmechtlapejpenijtoc tlen huejcajquiya.
Inmechchijtoc queja se hueyi pamitl tlen totajtzitzi tlen
quitequipanohuaj. Initztoque queja se hueyi altepetl tlen tlacame
tlatzejtzeloltique. Quena, initlacajhua tlen Toteco inmechcojtoc
para inelise iniaxcahua. Huan inmechtequimacatoc xiquinilhuica
sequinoc tlacame quejatza ihueyitilis Toteco tlen inmechnotzqui
quema innejnemiyayaj ipan ojtli tlen ax cuali huan campa
tzintlayohuilotl. Ama inmechchijtoc xinejnemica campa itlahuil tlen
cuajcualtzi.
\v 10 Achtohuiya ax ineliyayaj itlacajhua, pero ama quena,
initlacajhua Toteco. Achtohuiya ax tleno inquimatiyayaj tlen
itlasojtlacayo Toteco, pero ama inquiitaj para Toteco
inmechtlasojtla miyac.
\s Xinemica queja Toteco quinequi
\p
\v 11 Noicnihua tlen nimechicnelía. Initztoque ipan ni tlaltepactli
pero ax nica inehuani, san inpaxalohuani. Huajca amo xijchihuaca
tlen ax cuali tlen inquinequij inquichihuase, pampa nopa tlamantli
quitilana huan quitehuía imoyolo para ma xijcahuaca Toteco.
\v 12 Ximomocuitlahuica miyac para innejnemise xitlahuac ininhuaya
tlen ax quineltocaj Toteco. Yonque ama inmechtlaijilhuíaj huan
quiijtohuaj ax incuajcualme, pero teipa quiitase nochi tlen cuali
inquichijtinemij huan quineltocase Toteco. Queja nopa yajuanti
nojquiya quihueyichihuase Toteco ipan nopa tonal quema yajaya hualas
para tetlajtolsencahuas.
\p
\v 13 Toteco quinequi xijtlepanitaca nochi tequitl tlen gobierno
huan nojquiya xijtlepanitaca nopa hueyi tequihuejquetl tlen quipiya
tequihuejcayotl.
\v 14 Nojquiya xiquintlepanitaca nochi tequihuejme pampa Toteco
quinmacatoc tequihuejcayotl quintlatzacuiltise tlen tlaixpanoj huan
para quincualitase tlen quichihuaj tlen cuali.
\v 15 Ipaquilis Toteco para xijchihuaca tlen cuali para ax huelis
inmechteilhuise nopa tlacame tlen ama inmechteilhuíaj. Yajuanti ax
quipiyaj inintlalnamiquilis huan san huihuitique.
\p
\v 16 Ica Cristo ax initztoque queja nopa tlatequipanohuani tlen
iniaxcahua inintecohua queja se inintlapiyal. Ax inquipiyaj se
imoteco tlen inmechnahuatía sesen tlamantli tlen inquichihuase.
Initztoque inmajcajtoque para inquitlapejpenise, pero amo
xijchihuaca queja sequinoc tlen quitlapejpeníaj tlajtlacolchihuase
pampa majcajtoque. Ama xijtlapejpenica para inquitequipanose Toteco
ica nochi imoyolo.
\v 17 Xiquintlepanitaca nochi tlacame. Xiquinicnelica imoicnihua
ipan Cristo. Xijtlepanitaca Toteco huan xiquimacasica para
inquiixpanose. Xijtlepanitaca nopa hueyi tlanahuatijquetl ipan
imotlal.
\s Cristo tlaijiyohui topampa tojuanti
\p
\v 18 Xijtlacaquilica imojuanti tlen intlatequipanohuaj tlen
iniaxcahua se imoteco nica. Monequi xiquinneltocaca imotecohua huan
xiquintlepanitaca. Xiquintlepanitaca tlen cuajcualme huan quipiyaj
ininyolo, huan nojquiya xiquintlepanitaca tlen fiero
inintlalnamiquilis.
\v 19 Quema intlaijiyohuíaj huan ax tleno inquichijtoque tlen ax
cuali, Toteco quicualitas intla inquiselise nopa tlaijiyohuilistli
pampa inquitlepanitaj Toteco ipan imoyolo.
\v 20 Pero ax ipati iixtla Toteco intla intlajtlacolchijtoque huan
yeca inmechtlatzacuiltíaj huan inquiijiyohuíaj, pampa ya nopa tlen
quinamiqui inquiselisquíaj. Pero intla inquichihuaj tlen cuali huan
inquiijiyohuíaj tlaijiyohuilistli tlen ax quinamiqui huan noja
inquipiyaj imoyolo, huajca quena, Toteco quicualitas.
\p
\v 21 Toteco quitlalijtoc para quemantzi ma titlaijiyohuica. Pampa
Cristo tlaijiyohuico imopampa imojuanti huan inmechnextilijtoc queja
monequi para xijpiyaca imoyolo quema intlaijiyohuíaj pampa queja
nopa quichijqui ya.
\v 22 Cristo ax quema tlajtlacolchijqui, niyon axaca quicajcayajqui.
\v 23 Quema tlacame quitlaijiyohuiltiyayaj Cristo, ax tleno
quinnanquiliyaya. Quema yajaya tlaijiyohuiyaya, ax temajmatiyaya ica
tlen quincuepilisquía teipa. Pero nochipa quincajqui tlen fiero
quichihuiliyayaj imaco Toteco tlen tetlajtolsencahua xitlahuac.
\v 24 Huan Cristo iselti quihuicac totlajtlacolhua ipan itlacayo
quema mijqui ipan nopa cuamapeli. Quichijqui para tojuanti ma
tielica queja mijcatzitzi quema acajya technotza ma
titlajtlacolchihuaca. Huan intla timijcatzitzi huan ayoc hueli
technotza tlajtlacoli, huajca ama huelis tijpiyase tonemilis
xitlahuac. Quena, quicocojque Jesús huan yeca Toteco techchicajqui
iixtla.
\v 25 Tinejnemiyayaj queja borregojme tlen mocuapolojtoyaj, pero ama
timocueptoque ica Toteco, yajaya totlamocuitlahuijca tlen
quimocuitlahuía toalma.
\c 3
\s Quejatza monequi itztose sihuame huan tlacame
\p
\v 1 Nojquiya xijtlacaquilica insihuame. Intla se sihuatl quipiya
ihuehue, ma quicahuili ihuehue para ma quiyacana. Huan intla quej
nopa quichihua, yonque se quipiya ihuehue tlen ax quineltoca
itlajtol Toteco, ihuehue quiitas para cuali iyolis isihua, huan ica
yolic quineltocas Toteco yonque ax tleno isihua quiilhuía.
\v 2 Quiitase senquistoc cuali tlen inquichihuaj huan quejatza
tlahuel intlatlepanitaj.
\p
\v 3 Ax tlahuel ximocuatotonica para se imoyejyejca tlen
inmotlalilise imopani. Amo ximocuesoca quejatza inmoxilhuise, huan
tlachque tlamantli oro inmotlalilise huan tlachque yoyomitl patiyo
inmoquentise.
\v 4 Más cuali xijtemoca se imoyejyejca tlen eltoc ipan imoyolo.
Xijpiyaca teicnelili ica nochi huan nochipa ximoechcapanoca para
queja nopa inquipiyase imoyejyejca tlen ax quema tlamis, pampa ya
nopa tlen ipati iixtla Toteco.
\v 5 Sihuame tlen tlatzejtzeloltique huejcajquiya queja nopa
quitemojque se ininyejyejca tlen ininyolijtic. Yajuanti mochixque
ipan Toteco huan quincahuilijque ininhuehuejhua ma quinyacanaca.
\v 6 Queja nopa nojquiya quichijqui Sara, pampa quineltoquili
Abraham tlen elqui ihuehue huan quinotzqui “noteco”. Huan
initztose queja Sara intla inquichihuase tlen xitlahuac. Huan queja
nopa ax aqui monequis quiimacasis tlen ihuehue quichihuilis.
\p
\v 7 Nojquiya xijtlacaquilica intlacame. Xiitztoca ica cuali
ininhuaya imosihuajhua huan xiquintlepanitaca. Xijmachilica para
yajuanti ax tetic inintlacayo queja titlacame, pero Toteco
quinselía sihuame san se queja techselía titlacame huan nojquiya
quinmaca yolistli yancuic pampa hueyi iyolo ica nochi tojuanti.
Intla se ax quitlepanitas isihua, Toteco ax quicaquis quema
momaijtos.
\s Tlacame tlen tlaijiyohuíaj pampa quichihuaj tlen cuali
\p
\v 8 Huajca para nijtlamiltis, monequi nochi imojuanti inquipiyase
san se imoyolo. Xijpiyaca hueyi imoyolo se ica seyoc. Ximoicnelica
queja inicnime. Ximotlasojtlaca huan ximoicnochihuaca.
\v 9 Amo xiquincuepilica tlacame tlen fiero inmechchihuilíaj. Amo
xiquintlaijilhuica tlen inmechtlaijilhuíaj, pero xiquinchihuilica
tlen cuali huan xijtlajtlanica Toteco ma quintiochihua. Inquimatij
Toteco inmechnotztoc para iniaxcahua para inmechtiochijtinemis quema
inquichijtinemij tlen ipaquilis.
\v 10 Ijcuilijtoc ipan Itlajtol Toteco campa quiijtohua:
\q “Aqui quinequi itztos ica cuali huan quipiyas paquilistli ma ax
tetlaijilhui huan ma ax istlacati.
\q
\v 11 Ma quicajtehua tlen fiero huan ma quichihua san tlen cuali.
\q Ma quichihua campeca para itztos ica cuali ica nochi tlacame,
\q huan nojquiya ma quinpalehui sequinoc ma itztoca ica cuali se ica
seyoc.
\q
\v 12 Pampa Toteco quinmocuitlahuía tlen quichihuaj tlen xitlahuac
iixtla,
\q huan quincaqui quema momaijtohuaj.
\q Pero Toteco moicancuepa ica tlen quichihuaj tlen ax cuali.”
\p
\v 13 Intla inquichijtinemise tlen cuali ica nochi imoyolo, Axaca
inmechchihuilis se tlenijqui.
\v 14 Huan yonque tlacame inmechtlaijiyohuiltisquíaj pampa
inquichihuaj tlen cuali, Toteco inmechtlaxtlahuis. Huajca amo
xiquinimacasica sequinoc, niyon amo ximocuesoca ica tlen pano.
\v 15 San ya ni monequi xijchihuaca. Xijhueyimatica Cristo ipan
imoyolo huan san yajaya xijmatica para imohueyiTeco.
Ximocualchijchijtoca quejatza intlananquilise intla se tlacatl
inmechtlajtlanis para tlen inmotemachíaj ipan Cristo, pero
xijnanquilica ica yamanic huan ica tlatlepanitacayotl.
\v 16 Xijpiyaca imoyolo ica nochi, huan queja nopa yajuanti tlen
inmechtlaijilhuíaj mopinahuase, pampa quiitase para cuali
imonemilis pampa inquitoquilíaj Cristo.
\v 17 Pampa achi más cuali intlaijiyohuise pampa inquichijtoque
tlen cuali, intla queja nopa ipaquilis Toteco, huan ax
intlaijiyohuise pampa inquichijtoque tlen fiero.
\p
\v 18 Pampa Cristo nojquiya tlaijiyohui huan mijqui san sempatzi,
huan ica imiquilis tlaxtlajqui tlen monejqui ipampa totlajtlacolhua
nochi titlacame para nochipa. Quena, yajaya tlen senquistoc cuali
mijqui topampa tojuanti tlen titlaixpanoni, huan ya nopa quichijqui
pampa quinejqui techhuicas campa Toteco. Huan yonque tlacame
quimictijque itlacayo, itonal quichijqui para sampa ma moyolcuis.
\v 19 Huan elqui itonal Cristo tlen yajqui huan quincamahui nopa
tonalme tlen tzactoque.
\v 20 Ya ni inintonalhua yajuanti tlen huejcajquiya ax
quitlepanitaque Toteco ipan nopa tonali quema Toteco quipixqui iyolo
huan quichixqui para miyac tonali para Noé ma quichihua nopa hueyi
cuacanahua. Momaquixtijque san chicueyi tlacame quema nopa atl
quitlejcolti inincuacanahua.
\v 21 Huan nopa atl techilnamiquiltía tlen quejatza ama
timocuaaltíaj ipan atl quema timomaquixtíaj. Ax timocuaaltíaj
para ma quipajpaca tlen soquiyo ipan totlacayo, pero timocuaaltíaj
para tijnextilise para ica nochi toyolo tijtlajtlaníaj Toteco ma
techyolpajpaca. Huan quena, Toteco techmaquixtía ipampa tlen Jesús
quichijqui quema mijqui huan moyolcuic.
\v 22 Huan ama Jesucristo yajtoc elhuicac huan mosehuijtoc inejmatl
Toteco Dios campa más quipiya tlatlepanitacayotl. Huan nopano
quichihuaj ipaquilis nochi elhuicac ehuani huan nojquiya yajuanti
tlen inintoca tlen quipiyaj tequihuejcayotl huan tlen quipiyaj
chicahualistli.
\c 4
\s Ayoc xijchihuaca tlen ax cuali
\p
\v 1 Cristo tlaijiyohui ipan itlacayo quema mijqui, huajca ma
timoyolilhuica queja ya tlaijiyohui huan ma ax tiquimacasica intla
monequi titlaijiyohuise. Tlacame tlen ipan ininyolo
mocualtlalijtoque para tlaijiyohuise pampa iaxcahua Toteco ayoc
quinequij tlajtlacolchihuase.
\v 2 Intla intlaijiyohuíaj, ayoc inquichihuase tlen ax cuali tlen
imotlacayo quinequi quichihuas. Ipan ni tonali tlen mocahua para
noja initztose ipan tlaltepactli, inquichijtinemise tlen ipaquilis
Toteco.
\v 3 Ya inpanotoque miyac tonali quema inquichihuayayaj miyac
tlajtlacoli queja quichijtinemij tlacame tlen ax quiixmatij Toteco.
Inquichihuayayaj miyac tlajtlacoli tlen quinequiyaya imotlacayo.
Inihuintiyayaj, huan intlahuejchihuayayaj, huan inyohuiyayaj ipan
ilhuitl campa tlahuel inontlaiyayaj. Inquintlepanitayayaj tlamantli
tlen tlacame quinchijtoque, huan inquinitayayaj queja dioses, huan
ya nopa Toteco ax quinequi quiitas.
\p
\v 4 Pero ama ayoc inquichihuaj. Ayoc intlajtlacolchijtinemij ica
tlen eliyayaj imohuampoyohua, huan yeca yajuanti san
inmechsentlachilíaj huan inmechtlaijilhuíaj.
\v 5 Pero Toteco quintlajtolsencahuas pampa yajaya mocualtlalijtoc
para quintlajtolsencahuas tlen yoltoque huan tlen mictoque.
\v 6 Yeca quincamahuijque itlajtol Toteco ica tlen ama mictoque para
yonque inintlacayohua quiselijque nopa tlatzacuiltili tlen miquistli
queja nochi titlacame timiquij, ama itztoque ipan inintonal queja
Toteco itztoc.
\p
\v 7 Ya monechcahuía nopa tonali quema tlamis tlaltepactli. Huajca
monequi inquipiyase cuali imotlalnamiquilis huan ximonahuatica cuali
para huelis inmomaijtose ica Toteco queja monequi.
\v 8 Huan tlen achi más ipati, monequi ximoicnelica miyac se ica
seyoc, pampa se tlen quiicnelía ne seyoc quitlapojpolhuía yonque
nopa seyoc quiixpano miyac huelta.
\v 9 Ximoselica se ica seyoc quema inmopaxalohuaj. Xiquintlamacaca
huan xiquinmacaca campa mocahuase tlaneltocani tlen ajsij campa
imojuanti, huan amo ximocuesijcaitaca.
\p
\v 10 Toteco inmechmacatoc sesen imojuanti imoyajatil tlen monequi
para inquichihuase sesen tlamantli imotequi ipan nopa tlasentilistli
tlen tlaneltocani. Huajca ica nopa yajatili tlen inquiselijtoque
pampa hueyi iyolo Toteco, ximopalehuica se ica seyoc para initztose
inincualtequipanojcahua.
\v 11 Intla se tlen imojuanti quipiya itequi para camatis itlajtol
Toteco, ma camati queja elisquía Toteco tlen camati ipan ya. Intla
se tlen imojuanti quipiya itequi para quinpalehuis sequinoc, ma
quinpalehui ica nopa chicahualistli tlen Toteco quimaca. Queja nopa
nochi tlen inquichihuaj elis para ihueyitilis Toteco Dios, huan
huelis tijhueyitlalise pampa tlen Jesucristo techchihuilijtoc.
Yajaya quipiya nochi hueyitilistli huan nochi tequihuejcayotl para
nochipa. Huan itequihuejcayo ax quema quipiyas itlamiya. Quena,
queja nopa eltos.
\s Tlaijiyohuilistli tlen inmechpanotihuala
\p
\v 12 Noicnihua tlen nimechicnelía, amo ximosentlachilica pampa
tlahuel intlaijiyohuíaj. Amo ximoilhuica para san imojuanti tlen
queja nopa inmechpano.
\v 13 Pero xipaquica quema intlaijiyohuíaj pampa Cristo nojquiya
tlaijiyohui huan inmechcahuilijtoc inquimatise se quentzi
tlaijiyohuilistli queja ya quimatqui. Huan yeca quema yajaya hualas
huan nochi imojuanti inquiitase ihueyitilis, nelía miyac inpaquise.
\p
\v 14 Intla sequin inmechtlaijilhuíaj pampa inquineltocaj Cristo,
xijpiyaca paquilistli huan xijmatica nopa cuajcualtzi Itonal Toteco
mocahua ipan imoyolo. Huan xijmatica yonque yajuanti
quitlaijilhuíaj Toteco, imojuanti inquihueyichihuaj.
\v 15 Intla intlaijiyohuíaj, ma ax eli pampa intemictijtoque o
intlaxtectoque. Ma ax eli pampa inquichijtoque tlen ax cuali o pampa
incalactoque campa ax monequi.
\v 16 Pero intla intlaijiyohuíaj pampa iniaxcahua Cristo, amo
ximopinahuaca. Xijpaquilismacaca Toteco pampa tlacame quimatij
iniaxcahua.
\p
\v 17 Ya ajsic tonali para Toteco tetlajtolsencahuas. Achtohui
techtlajtolsencahuas tojuanti tlen tiiconehua. Huan intla monequi
techtlajtolsencahuas tojuanti tlen tiiconehua, san ximoilhuica
quejatza tlahuel quintlatzacuiltis yajuanti tlen ax quema
quineltoquilijtoque tlen technahuatía itlajtol.
\v 18 Quisas queja ijcuilijtoc ipan Itlajtol Toteco campa
quiijtohua:
\q “Intla ica ohui momaquixtise tlacame tlen itztoque xitlahuaque
iixtla Toteco,
\q huajca nelía fiero elis para tlen ax quitlepanitaj Toteco huan
tlajtlacolchihuaj miyac.”
\p
\v 19 Huajca intla ama intlaijiyohuíaj pampa queja nopa ipaquilis
Toteco, ximotemacaca ipan Toteco, yajaya tlen techchijchijqui huan
tlen senquistoc temachtli. Huan teipa xijsenhuiquilica
xijchijtinemica tlen cuali.
\c 5
\s Tlajtoli para tlaneltocani
\p
\v 1 Ama nimechcamahuis inhuehue tlacame tlen intlayacanaj ipan
tiopantini tlen tlaneltocani. Na nojquiya nise huehue tlacatl tlen
nitlayacanquetl queja imojuanti. Huan niquitac Cristo quema
tlaijiyohui huan mijqui. Nojquiya nijselis tlen quinamiqui para na
ipan nopa tonali quema Cristo mocuepas huan nochi quiitase
ihueyitilis.
\v 2 Queja tlacame quinmocuitlahuíaj ininborregojhua, monequi
inhuehue tlacame xiquinmocuitlahuica itlacajhua Toteco tlen itztoque
imomaco. Xiquinmocuitlahuica ica paquilistli huan ica cuali imoyolo,
pampa ya nopa quipactía Toteco. Amo ximoilhuica para Toteco
inmechfuerzajhuisquía, pampa ax neli. Niyon amo xijchihuaca pampa
inquinequij inquitlanise tomi. Xijchihuaca pampa tlahuel inquinequij
inquitequipanose Toteco.
\v 3 Amo xiquinnahuatica tlen itztoque imomaco queja initztosquíaj
inintecohua. Pero xiquinnextilica se cuali ojtli para ma
quitoquilica.
\v 4 Huan quema Toteco, nopa Hueyi Tlamocuitlahuijquetl hualas,
yajaya inmechmacas se corona tlen tlahuel yejyectzi huan tlen ax
nenpolihuis.
\p
\v 5 Intelpocame, nojquiya xiquincahuilica nopa huehue tlacame ma
inmechyacanaca. Huan nochi imojuanti ximoicnochihuaca huan
ximopalehuica se ica seyoc pampa ijcuilijtoc ipan Itlajtol Toteco
campa quiijtohua:
\q “Toteco ax quincualita tlen mohueyimatij,
\q pero hueyi iyolo ica tlen moicnochihuaj iixtla.”
\m
\v 6 Huajca ximoicnochihuaca iixtla Toteco tlen quipiya hueyi
chicahualistli huan yajaya inmechhueyitlalis quema yajaya quiijtos
para ya ajsic tonal.
\v 7 Xiquilhuica Toteco nochi imocuesol huan xijcahuaca imaco, pampa
yajaya inmechmocuitlahuía.
\p
\v 8 Nochipa ximotlalnamictica huan xitlachixtoca, pampa
Axcualtlacatl, yajaya imocualancaitaca, nemi campa hueli queja se
tecuani tlen quitemojtinemi ajqueya huelis quitzontlamiltis.
\v 9 Chicahuac xijtehuica para ax inmechtlanis. Ximotetilica huan
xijneltocaca Toteco ica nochi imoyolo. Xiquinilnamiquica toicnihua
ipan Cristo campa hueli ipan ni tlaltepactli nojquiya tlaijiyohuíaj
san se queja imojuanti.
\v 10 Huan quema ya intlaijiyohuijtose se quentzi, Toteco tlen hueyi
iyolo imohuaya inmechchihuas inchicajtoque huan intemachme. Huan
inmechmacas yancuic chicahualistli huan tetili pampa
inmotlatzquilijtoque ipan ya. Yajaya Toteco tlen inmechnotzqui para
inquipiyase imoparte ipan ihueyitilis tlen huejcahuas para nochipa
nepa campa tlayejyeca. Huan nochi quichijqui pampa initztoque ipan
Jesucristo.
\v 11 Yajaya quipiya nochi hueyitilistli huan nochi tequihuejcayotl
para nochipa. Huan itequiticayo ax quema quipiyas itlamiya. Quena,
quej nopa eltos.
\s Pedro quinnahuatijtejqui
\p
\v 12 Ica itlapalehuil Silvano nimechtlajcuilhuijtoc ni
pilamatlajcuiloltzi. Yajaya se toicni tlen temachtli ipan Cristo.
Nimechtlajcuilhuijtoc para nimechyolchicahuas huan nimechilhuis para
melahuac hueyi iyolo Toteco ica tojuanti yonque tlen hueli
tlaohuijcayotl techpanotihuala.
\p
\v 13 Imoicnihua tlen itztoque ipan nopa tiopa tlen tlaneltocani
ipan altepetl Babilonia inmechontlajpalohuaj. Toteco nojquiya
quintlapejpenijtoc queja inmechtlapejpenijtoc imojuanti. Nojquiya
Marcos tlen niquita queja nocone, inmechontlajpalohua.
\v 14 Ximotlajpaloca huan ximotzoponica ica se tlatlepanitacayotl
tlen tlatzejtzeloltic pampa inmoicnelíaj ipan Cristo.
\p Toteco ma inmechmaca tlasehuilistli ipan imoyolo nochi imojuanti
tlen initztoque ipan Jesucristo. Queja nopa ma eli.