\id 2PE
\h 2 PEDRO
\mt Nopa Ompa Amatlajcuiloli tlen Quiijcuilo Pedro
\c 1
\s Pedro quintlajcuilhui tlaneltocani
\p
\v 1 Na niSimón Pedro. Na niitlatequipanojca huan niitlayolmelajca Jesucristo. Nimechtlajcuilhuilía imojuanti tlen Jesucristo inmechpalehuijtoc xijneltocaca ica nochi imoyolo queja tojuanti tijchihuaj. Huan Jesucristo inmechmacatoc tlaneltoquilistli pampa yajaya xitlahuac, huan yajaya itztoc Dios huan Totemaquixtijca.
\v 2 Toteco noja más ma quipiya hueyi iyolo imohuaya huan mojmostla ma inmechmaca miyac tlasehuilistli ipan imoyolo para más inquinixmajtiyase Toteco Totata huan Toteco Jesús.
\s Tlachque monequi quichihuase tlaneltocani
\p
\v 3 Tohueyiteco Cristo ica ihueyi chicahualis techmacatoc nochi tlen monequi para huelis tinejnemise cuali huan tiitztose más queja ya. Ya tijpiyaj nochi tlen monequi pampa tiquixmatij Cristo, yajaya tlen technotztoc para se tonal tijselise tlen ihueyitilis huan para se tonal ma tiitztoca cuali queja ya.
\v 4 Huan pampa yajaya quipiya ihueyitilis huan yajaya senquistoc cuali, techtencahuilijtoc miyac tlamantli tlen tlahuel hueyi huan tlen tlahuel cuali. Quiijtojtoc para huelis techmaquixtis tlen nopa fiero tlamantli tlen tlacame ipan ni tlaltepactli quichijtinemij pampa tlahuel quinequij tlajtlacolchihuase. Huan quiijtojtoc techmacas se yolistli yancuic queja Toteco quipiya. Quena, queja nopa techtencahuili.
\p
\v 5 Yeca amo san xijneltocaca Toteco, pero mojmostla xijpixtiyaca imonemilis más xitlahuac. Huan amo san xinemica nelía xitlahuac, pero nojquiya mojmostla más xijmajtiyaca tlen Toteco quinequi xijchihuaca.
\v 6 Huan quema inquimatise cuali tlen Toteco quinequi xijchihuaca, huajca más inmonahuatise huan inmotlachilise para ax intlajtlacolchihuase. Huan tlen cuali monahuatíaj para ax tlajtlacolchihuase, teipa más quipiyase ininyolo para quiijiyohuise tlen huala. Huan tlen cuali quipiyaj ininyolo, teipa itztose más queja Toteco.
\v 7 Huan quema se itztoc más queja Toteco, más moilhuijtinemis tlen sequinoc huan quejatza huelis quinpalehuis. Huan intla tiquinpalehuijtiyase sequinoc, teipa nelía tiquinicnelise queja Toteco quinequi.
\p
\v 8 Intla queja ni inmoscaltijtiyase ipan nochi ni tlamantli, huajca cuali inquiixmatise Tohueyiteco Jesucristo. Huan Toteco inmechtequihuis ipan itequi huan nochi tlen inquichihuase para Toteco quisas cuali.
\v 9 Pero se tlen ax moscaltía ipan Toteco huan ax hueli quichihua ni tlamantli itztoc queja se popoyotzi o queja se tlen ax hueli tlachiya huejca. Yajaya ya quiilcajtoc para Toteco quipajpaquili iyolo tlen nopa tlajtlacoli tlen achtohuiya quichihuayaya.
\v 10 Huajca noicnihua, xinemica nelía cuali para inquinextise para Toteco temachtli inmechtlapejpenijtoc huan inmechnotztoc para inelise iniaxcahua. Intla inquichijtinemij ni tlamantli tlen nimechilhuijtoc, ax quema inhuetzise ipan tlajtlacoli.
\v 11 Huan Tohueyiteco Jesucristo, yajaya Totemaquixtijca, tlen tlanahuatis para nochipa, inmechcaltlapos nepa elhuicac huan inmechselis ica paquilistli quema inajsitij.
\p
\v 12 Nochipa nimechilnamiquiltis tlen ni tlamantli yonque nelía ya inquimatij huan ya inmotlatzquilijtoque ipan nopa tlen melahuac tlen inmechmachtijtoque.
\v 13 Pero nimoilhuía cuali para nimechilnamiquiltijtinemis tlen ni tlamantli quema noja niitztos para ax quema inquiilcahuase.
\v 14 Pampa nijmati monechcahuía nopa tonal para nimiquis pampa queja nopa Tohueyiteco Jesucristo ya nechnextili.
\v 15 Huajca nijchihuas campeca para nimechilnamiquiltis ajachica quejatza monequi innejnemise nelía cuali para ax inquiilcahuase quema ya nimictos.
\s Pedro quiitztoya Cristo
\p
\v 16 Tojuanti ax timechpohuiliyayaj cuentos tlen san tijsencajtoyaj quema timechilhuijque tlen ihueyi chicahualis Jesucristo huan para yajaya sampa hualas ipan tlaltepactli. ¡Axtle! Na ihuaya ne sequinoc tiquitztoque ihueyitilis ica toixtiyol.
\v 17 Tojuanti tijcajque quema Toteco Dios quihueyimatqui Jesucristo tlen elhuicac huan quinextili miyac tlatlepanitacayotl. Quena, Toteco Totata tlen onpano hueyi huan cuajcualtzi camatqui tlen nepa campa tlayejyectzi huan quiijto: “Ya ni Nocone tlen niquicnelía huan nipaqui miyac ica tlen quichihua.”
\v 18 Quema tiitztoyaj nepa ipan nopa tepetl tlatzejtzeloltic campa technextili ihueyitilis, toseltitzitzi tijcajque quema Toteco Dios quiijto ni tlajtoli tlen elhuicac.
\p
\v 19 Huan para tojuanti tlen tiquitaque, quichijqui noja más temachtli nopa tlajtoli tlen quiijcuilojque itiocamanalojcahua Toteco huejcajquiya. Yeca monequi san tequitl initztose para inquitlacaquilise tlen quiijcuilojtoque pampa inintlajtol eltoc queja se tlahuili tlen tlatlanextía campa tzintlayohua. Xijtlacaquilica inintlajtol hasta quema Jesucristo sampa hualas. Ipan nopa tonal yajaya elis queja se tlahuili tlen nelía chicahuac, huan elis queja yajaya cahuantos ipan imoyolo.
\v 20 Pero xijmatica para niyon se tlamantli ipan Itlajtol Toteco tlen itiocamanalojcahua quiijcuilojque huejcajquiya, ax hualajqui tlen nopa tiocamanalohuani ininseltitzi,
\v 21 niyon hualajqui pampa nopa tiocamanalohuani quinequiyayaj quiijtose tlen panos teipa. ¡Axtle! Elqui Itonal Toteco tlen quinilhuijtiyajqui nopa tlatzejtzeloltique tlacame tlen Toteco quinequiyaya ma quiijcuiloca.
\c 2
\s Tlacame tlen tlamachtíaj tlen ax melahuac
\r (Judas 4-13)
\p
\v 1 Huejcajquiya nojquiya itztoyaj israelitame tlen istlacatiyayaj
huan motocaxtiyayaj itiocamanalojcahua Toteco, pero ax neli. Huan
queja nopa nojquiya itztose istlacatica tlamachtiani campa
imojuanti. Huan ixtacatzi tlamachtise tlen ax neli huan tlen
quinsemanas nochi tlen quiselise inintlamachtil. Hasta quiijtose ax
quiixmatij Tohueyiteco tlen quincojqui. Huan quipantise se hueyi
tlatzacuiltili tlen nimantzi quintzontlamiltis.
\v 2 Huan miyac tlacame quintoquilise nopa istlacatini ipan
ininnemilis tlen fiero huan quichihuase miyac tlamantli ininhuaya
tlen ax ininnamic. Huan yeca sequinoc tlacame quitlaijilhuise nopa
ojtli tlen melahuac tlen Toteco techilhui ma tijtoquilica.
\v 3 Huan pampa nopa istlacatini quinequise imotomi,
inmechcajcayahuase ica miyac tlajtoli tlen ax neli. Toteco
huejcajquiya quiixtlalijtoc inintlatzacuiltilis huan temachtli
quinajsis. Nechcatitoc nopa tonal para quintlamiltis.
\p
\v 4 Toteco ax quintlapojpolhui nopa elhuicac ehuani tlen
tlajtlacolchijque. Quinmajcajqui hasta mictla, huan quintzajqui ipan
tzintlayohuilotl huan nepa mochiyaj hasta nopa tonal quema Toteco
quintlajtolsencahuas.
\v 5 Nojquiya Toteco ax quintlapojpolhui nopa tlacame tlen itztoyaj
huejcajquiya, pero quititlanqui se tlahuelatl para quinisahuis nochi
nopa ax cuajcualme. San quinmaquixti Noé huan chicome más. Huan
Noé quinyolmelahuayaya sequinoc quejatza huelisquíaj itztosquíaj
xitlahuac iixtla Toteco.
\v 6 Huan Toteco nojquiya quintlatzacuilti nopa fiero tlacame ipan
altepetini Sodoma huan Gomorra. Quintlamitlati yajuanti huan
inialtepehua huan teipa san mocajqui cuanextli. Ica tlen
quinchihuili, Toteco technextilijtoc tlachque elis ininpantis nochi
ax cuajcualme.
\v 7 Pero Toteco nojquiya ipan nopa tonali quimaquixti Lot tlen nopa
fiero altepetini pampa yajaya elqui se tlacatl tlen itztoya
xitlahuac iixtla. Huan nelía tlaijiyohuiyaya miyac mojmostla ipampa
nopa fiero tlacame pampa san quichihuayayaj tlen fiero tlen
inintlacayo quinequiyayaj quichihuase.
\v 8 Huan cuali Lot itztoya ininhuaya nopa fiero tlacame, huan
mojmostla quiyolcocohuayaya tlen fiero quiitayaya huan tlen fiero
quicaquiyaya.
\v 9 Yeca tiquitaj Toteco quimati quejatza quinmaquixtis cuali
tlacame ipan tlen hueli tlayejyecoli. Huan nojquiya Toteco quimati
quejatza quintlatzacuiltijtiyas fiero tlacame hasta ajsis hora para
quintlajtolsencahuas.
\p
\v 10 Huan achi más Toteco quintlatzacuiltis fiero tlacame tlen
quichihuaj san tlen inintlacayo quinequi huan yajuanti tlen
quincocolíaj nochi tlen quipiyaj tequihuejcayotl. Nopa tlacame
mohueyimatij huan mosisiníaj. San quichihuaj tlen yajuanti
ininseltitzi quinequij. Ax majmahuij para quinistlacahuíaj ajacame
tlen quipiyaj más chicahualistli queja yajuanti.
\v 11 Pero niyon nopa elhuicac ehuani tlen quipiyaj más
chicahualistli huan tequihuejcayotl, ax quema quintlaijilhuíaj
ajacame iixtla Toteco.
\p
\v 12 Pero nopa istlacatica tlamachtiani itztoque queja tlapiyalime
tlen ax quipiyaj inintlalnamiquilis. Tlapiyalime san quichihuaj tlen
inintlacayo quinequi, huan ax hueli moyolilhuíaj achtohui tlachque
ininpantis, huajca ax ohui tiquinmasiltise huan tiquinmictise. Huan
san se eli ica nopa tlamachtiani, nimantzi quintlaijilhuíaj ajacame
pampa ax quimachilíaj ininchicahualis. Huan yeca nopa tlamachtiani
mopolose san queja tlapiyalime.
\v 13 Yajuanti quintlaijiyohuiltíaj tlen quincajcayahuaj, huan
huajca para inintlaxtlahuil nojquiya tlaijiyohuise. Ica ininpaquilis
quichijtinemij tlen más fiero tlamiyacapa quema tonaya. Yajuanti
eltoque queja se mancha ipan imoyoyo tlen cuali. Yajuanti se
pinahualistli campa imojuanti, pampa yohuij ipan imoilhui queja
cuajcualme quema intlacuaj san sejco, pero quema itztoque campa
mesa, inmechhuetzquilíaj quejatza inmechcajcayajtoque.
\p
\v 14 Yajuanti ax quema quiitaj se sihuatl huan ax quiixtocaj. Ax
quema tlaxicohuaj para tlajtlacolchihuase. Quinyoltilanaj tlen aya
nelcuali quineltocaj Toteco para ma tlajtlacolchihuaca ininhuaya.
Nochi tlen quiitaj, quinequij moaxcatise. Toteco ya quintelchijtoc
huan inintlatzacuiltilis ya quinchiya.
\v 15 Mocuapolojtoque pampa quicajtejtoque nopa ojtli xitlahuac.
Quichijtoque queja Balaam icone Beor tlen huejcajquiya quipactiyaya
quitlanis tomi ica nopa tlamantli fiero tlen quichijqui.
\v 16 Hasta iburro Balaam camatqui huan quiajhuac pampa yohuiyaya
para más tlajtlacolchihuas, yonque burrojme ax hueli camatij. Pero
Toteco quichijqui para nopa burro ma camati queja titlacame
ticamatij, huan quitzacuili nopa tiocamanalojquetl Balaam para ax
quichihuas más tlamantli tlen ax xitlahuac.
\p
\v 17 Ni tlacajcayahuani itztoque queja se ameli tlen ax quipiya
atl. Itztoque queja mixtli tlen nesi para quihualicasquía atl, pero
nopa ajacatl san quihuica huan ax tlaahuetzi. Huajca Toteco ya
quinsencahuilijtoc inintlatzacuiltilis nopa tlacajcayahuani huan
mocahuase campa tlahuel tzintlayohua para nochipa.
\v 18 Yajuanti camatij para mohueyimatise, pero nochi quimatij para
huihuitic inintlajtol huan ax melahuac. Para quincajcayahuase
tlacame tlen yancuic quicajtejtoque tlajtlacoli, nopa fiero tlacame
quiijtohuaj para huelis tijchihuase tlen hueli ica tlen ax tonamic
para queja nopa quinequij nopa yancuini sampa ma calaquica ipan
tlajtlacoli.
\v 19 Yajuanti quiijtohuaj huelis quinmalacanise sequinoc, pero
yajuanti ininseltitzi itztoque ilpitoque ipan tlen inintlacayo
quinequi, pampa se tlacatl mocahua queja itlatequipanojca nopa
tlajtlacoli tlen quichijtinemi.
\v 20 Miyac tlacame quicaquij tlen Tohueyiteco Jesucristo,
Totemaquixtijca, huan quicajtehuaj tlajtlacoli tlen eltoc ipan ni
tlaltepactli. Pero intla yajuanti teipa mocuepaj huan sampa
moilpíaj ipan nopa tlajtlacoli huan nopa tlajtlacoli quintlani,
itztose más fiero teipa que achtohuiya.
\v 21 Achi cuali intla ax quimajtosquíaj tlen nopa ojtli xitlahuac,
pampa nelía fiero intla quimatij nopa ojtli tlen cuali huan teipa
quinhuejcamajcahuaj nopa miyac tlanahuatili tlatzejtzeloltique tlen
Toteco quinmacatoc.
\v 22 Ica yajuanti eltoc queja nopa tlajtoli tlen quiijtohua: “Se
chichi mocuepas huan quicuas tlen quiisotlatoc. Huan quema
quipajpacaj se pitzo, nopa pitzo sampa mocuepas huan momimilos ipan
soquitl.”
\c 3
\s Toteco sampa hualas
\p
\v 1 Noicnihua tlen nimechicnelía, ya ni nopa ompa amatlajcuiloli
tlen nimechtlajcuilhuijtoc. Ica ni ome nijnequi nimechyolchicahuas
para ximoyolilhuica xitlahuac. Huan nijnequi nimechilnamiquiltis
tlen ya inquimatij.
\v 2 Quena, nijnequi inquiilnamiquise tlen quiijtojque nopa
tlatzejtzeloltique tiocamanalohuani huejcajquiya. Nojquiya nijnequi
inquiilnamiquise tlen Tohueyiteco Jesús, Totemaquixtijca,
technahuati tiitlayolmelajcahua huan teipa tojuanti timechilhuijque.
\p
\v 3 Achtohui xijmatica ya ni. Ipan itlamiya tonali hualase tlacame
tlen san quihuetzquilise nochi tlen tijneltocaj, huan quichihuase
tlen hueli tlamantli tlajtlacoli tlen inintlacayo quinequij ma
quichihuase.
\v 4 Inmechilhuise: “Inquiijtohuaj Cristo quiijto sampayano hualas.
¿Canque itztoc? Ax hualajtoc. Pampa nochi tlamantli panotihuala
queja ipa panoyaya. Xiquitaca hasta tlen quema pejqui tlaltepactli,
huan teipa quema mijque tohuejcapan tatahua, huan teipa hasta ama
nochi panotihuala san se huan ax hualajtoc Cristo.” Queja nopa
inmechilhuise.
\p
\v 5 Pero yajuanti quinequij quiilcahuase para Toteco huejcajquiya
quichijqui elhuicactli ica itlajtol, huan teipa quichijqui tlali
ipan ni tlaltepactli ma tlejco tlen atl, huan quichijqui ica atl.
\v 6 Huan yajuanti quiilcahuaj queja Toteco huejcajquiya
quintzontlamilti tlen itztoyaj ipan tlaltepactli ica atl ipan nopa
tlahuelatl.
\v 7 Huan Toteco nojquiya ica itlajtol ya quiniyocatlalijtoc nopa
elhuicactli huan ni tlaltepactli tlen ama eltoc para teipa
quixolehuas ica se tlitl ipan nopa tonal quema quintlajtolsencahuas
tlacame. Huan yajuanti tlen fierojtique yase campa tlitl campa
tlaijiyohuise para nochipa.
\p
\v 8 Huajca amo xiquilcahuaca ya ni, noicnihua tlen nimechicnelía:
Toteco quiita se tonal queja elisquía se mil xihuitl. Huan nojquiya
Toteco quiita se mil xihuitl queja elisquía san se tonal.
\v 9 Toteco ax quiilcajtoc tlen quiijtojtoc queja sequin moilhuíaj.
Techtencahuilijtoc para sampa hualas, huan temachtli hualas. Pero
ama yajaya quichiya pampa nelía quipiya iyolo ica tojuanti huan
quinequi nochi ma timoyolpatlaca huan tijcahuase totlajtlacolhua. Ax
quinequi niyon se ma polihui para nochipa.
\p
\v 10 Huan nimantzi ajsis nopa tonal quema tiquitase itequihuejcayo
Tohueyiteco. Quena, queja se tlaxtejquetl calaqui ipan imochaj quema
ax intlachixtoque, nojquiya quema ax inmoilhuíaj, elhuicactli
tlamis. Huan inquicaquise quema tlahuelchihuas queja se hueyi tlitl,
huan nochi tlen onca ipan elhuicactli campa sitlalime tlamitlatlas.
Huan tlatlas tlaltepactli huan nochi tlen quipiya.
\p
\v 11 Huajca pampa ya inquimatij queja ni Toteco quixolehuas nochi
tlen onca, monequi xiitztoca intlatzejtzeloltique huan xijchihuaca
tlen senquistoc cuali para más tiitztiyase queja Toteco.
\v 12 Xitlachixtoca para nopa tonal quema nesis itequihuejcayo
Toteco huan nojquiya xijchihuaca tlen monequi para ma moisihuilti
para ajsis nopa tonali. Quena, ipan nopa tonali nochi elhuicactli
campa sitlalime huan nochi tlen eltoc nopano tlatlas huan
semanihuis, huan nochi tlen onca atiyas pampa nopa tlitl elis
tlahuel totonic.
\v 13 Pero tojuanti tijchiyaj nopa yancuic elhuicactli huan
tlaltepactli yancuic tlen Toteco techtencahuilijtoc campa nochi
quichihuase san tlen xitlahuac.
\p
\v 14 Huajca noicnihua tlen nimechicnelía, pampa inmochiyaj para
panos ni tlamantli, xijchihuaca campeca para ax
intlajtlacolchihuase. Xielica senquistoc tlapajpactique iixtla
Toteco para axaca huelis inmechteilhuis. Queja nopa Toteco
inmechpantis ica tlasehuilistli ipan imoyolo quema mocuepas.
\v 15 Huan xiquilnamiquica para Toteco quipiya iyolo huan quichiya
para hualas pampa quinequi ma onca más tonali para quinmaquixtis
tlacame tlen inintlajtlacolhua. Toicni Pablo tlen nochi quiicnelíaj
miyac nojquiya inmechtlajcuilhuijtoc huan inmechilhui san se
tlamantli ica nopa tlalnamiquilistli tlen Toteco quimacac.
\v 16 Yajaya camatitoc tlen iyolo Toteco ipan sesen iamatlajcuilol
yonque quemantzi onca tlen ohui para tijmachilise. Huan sequin tlen
ax momachtíaj Itlajtol Toteco huan aya motlatzquilijtoque ipan ya,
quipatlaj itlajtol Pablo huan nochi sequinoc amatini ipan Itlajtol
Toteco, yeca yajuanti mopolose.
\p
\v 17 Pero ica imojuanti innoicnihua tlen nimechicnelía, ya
inquimatij ni tlamantli achtohuiya quema aya pano. Huajca monequi
intlachixtose para ni tlacame tlen fiero tlen quinequij
inmechcajcayahuase ica istlacaticayotl ax hueli inmechhuicase ipan
se ojtli tlen ax cuali. Ya inmotlatzquilijtoque ipan Toteco, huajca
axaca ma inmechmajcahua.
\v 18 Pero ximomachtijtiyaca más tlen Tohueyiteco Jesucristo yajaya
tlen Totemaquixtijca. Huan más xijmachilijtiyaca quejatza yajaya
quipiya hueyi iyolo tohuaya. Ma tijhueyichihuaca ama huan para
nochipa. Queja nopa ma eli.