\id REV
\h APOCALIPSIS
\mt Ni Amatlapohuali Quipiya tlen Jesucristo Technextilijtoc
\c 1
\s Jesucristo technextili ya ni
\p
\v 1 Ni amatl techilhuía ni tlamantli tlen Toteco quipannextili Jesucristo para ma technextiliqui tojuanti tiitlatequipanojcahua. Huan ni tlamantli panos ipan tlen hueli tlalochtli quema ax tijchiyaj ma pano. Jesucristo nechtitlanili se ielhuicac ejca tlen nechnextili ni tlamantli para ma niquinpohuilis sequinoc itlatequipanojcahua. Na niJuan huan niitlatequipanojca Jesucristo.
\v 2 Huan nicani niquijcuilohua ni tlamantli para nimechpohuilis nochi tlen niquitztoc huan nochi itlajtol Toteco tlen Jesucristo nechilhui.
\p
\v 3 Toteco quitiochihuas yajaya tlen quipohuas ni amatlapohuali tlen techilhuía ama tlen panos teipa. Huan quintiochihuas nochi tlen quicaquise ni tlajtoli huan quichihuase tlen techilhuía pampa nechca hualas ni tlamantli.
\s Juan quintlajpalo tlacame ipan chicome tiopantini tlen tlaneltocani
\p
\v 4 Na niJuan, nimechtlajpalohua imojuanti ipan chicome tiopantini tlen tlaneltocani ipan tlali Asia. Ma quipiyaca hueyi ininyolo ica imojuanti Toteco Dios tlen ama itztoc, huan ipa itztoya, huan itztos para nochipa; huan Itonal Toteco tlen itztoc queja chicome tlahuili tlen mocahua iixmelac ihueyi siyaj Toteco,
\v 5 huan Jesucristo tlen nochipa techilhuía tlen temachtli. Jesucristo itztoc tlen achtohui moyolcuic tlen nochi mijcatzitzi, huan yajaya nopa tlanahuatijquetl tlen quinnahuatía nochi tlanahuatiani ipan tlaltepactli. Jesucristo techicnelía huan ica ieso tlen quitoyajqui ipan cuamapeli, techyolpajpajqui tlen totlajtlacolhua. Ni Toteco ma inmechmaca tlasehuilistli ipan imoyolo.
\v 6 Jesús techchihuilijtoc titlanahuatiani huan titotajtzitzi iixpa iTata, Toteco Dios. Yajaya tlen ipa quipixtoc nochi hueyitilistli huan nochi tequihuejcayotl huan quipixtos para nochipa. Queja nopa elis.
\q
\v 7 Xiquitaca, Jesucristo hualas ipan mixtli.
\q Nochi tlacame quiitase hasta nojquiya inijuanti tlen quicuaxajque quema itztoya ipan cuamapeli quiitase.
\q Huan nochi xinachtli tlacame ipan tlaltepactli chocase huan momajmatise quema quiitase ya huala.
\q Quena, queja nopa ma eli.
\p
\v 8 Toteco Dios quiijtohua: “Na niitztoc queja nopa letra A tlen achtohui huan queja nopa letra Z tlen itlamiya. Na niipejya huan niitlamiya nochi tlen onca. Xiquitaca, na niitztoc ama huan ipa niitztoya huan para nochipa niitztos. Na niitztoc Tlen Nijpiya Nochi Chicahualistli.” Queja nopa Toteco quiijto.
\s Juan quiitac Jesucristo ica itlatlanex
\p
\v 9 Na niJuan nimechtlajcuilhuía. Na niimoicni. Toteco quipiya tlanahuatili ipan noyolo queja nojquiya ipan imoyolo. San sejco titlaijiyohuíaj pampa tiiaxcahua Jesucristo huan monequi tijpiyase toyolo queja yajaya quipixqui iyolo. Na niJuan niitztoya ipan se piltlaltzi tlen itoca Patmos tlatlajco ipan hueyi atl campa nechhuicaque huan nechtzajque pampa nitlacamahuiyaya itlajtol Toteco huan niquinilhuiyaya tlacame tlen Jesucristo.
\v 10 Huan ipan se tonal tlen iaxca Tohueyiteco, eliyaya queja ichicahualis Itonal Toteco hualajqui ipan na huan pejqui niitztoc queja nitemiquiyaya. Huan nijcajqui se tlen camatqui chicahuac ica noica. Huan nijcajqui itlajtol queja elisquía se tlapitzali.
\p
\v 11 Huan nechilhui: “Naja niitztoc queja nopa letra A tlen achtohui huan queja nopa Z tlen itlamiya. Na niipejya huan niitlamiya nochi tlen onca. Xiquijcuilo ipan se amatlapohuali nochi tlen tiquitas huan xiquintitlanili nopa chicome tiopantini tlen tlaneltocani ipan tlali Asia. Xiquintitlanili nopa chicome tiopantini ipan altepetini Éfeso, Esmirna, Pérgamo, Tiatira, Sardis, Filadelfia huan Laodicea.”
\p
\v 12 Huan nimoicancuepqui para niquitas ajqueya nechcamahuiyaya. Huan quema nimoicancuepqui, niquitac chicome tlahuil quetzalme tlen oro.
\v 13 Huan tlatlajco nopa tlahuil quetzali niquitac se tlen nesqui queja yajaya tlen Mocuepqui Tlacatl. Huan moquentijtoya iyoyo tlen ajsic hasta iicxico huan ica oro motlajcoilpitoya huan quitzacuayaya hasta iyolixpa.
\v 14 Itzonteco huan itzoncal eltoya nelchipahuac queja ichcatl o queja nextli. Huan iixtiyol eliyaya queja tlixochitl tlen quistinemi ipan se tlitl.
\v 15 Huan iicxi tlahuiyaya queja se tepostli bronce tlen quixahuanajtiltoyaj huan teipa nelía cuali quipojpojtoyaj. Huan nijcajqui itos tlen caquistiyaya chicahuac queja quema nopa hueyi atl ajcahuaca ica nochi ihueyi chicahualis.
\v 16 Ipan inejmatl quipixqui chicome sitlalime. Huan icamaco quisqui se machete huehueyac tlen oncac tlatequi, huan ixayac tlahuiyaya queja tlahuía tonati ica tlajco tona.
\p
\v 17 Huan quema niquitac Jesucristo queja nopa, nihuetzqui iicxiteno queja nimictoc. Huan yajaya nechtlalili ima nejmatl huan nechilhui: “Amo ximomajmati. Na niipejya huan niitlamiya nochi tlen onca.
\v 18 Naja tlen nijpiya yolistli ipan na. Nimijqui, pero ama niitztoc para nochipa. Na nijpiya nopa llaves para miquistli huan campa mocahuaj mijcatzitzi, pampa san na tlen nijpiya tequihuejcayotl para niquijtos ajqueya itztos nepa.
\v 19 Xiquijcuilo tlen ya tiquitztoc, huan tlen ama eltoc, huan tlen panos teipa.
\v 20 Ama nimitzilhuis tlaque quiijtosnequi nopa chicome sitlalime tlen tiquitac nomaco huan tlaque quiijtosnequi nopa chicome tlahuil quetzali tlen oro. Nopa chicome sitlalime quiijtosnequi nopa chicome elhuicac ehuani tlen quinyacanaj nopa chicome tiopantini tlen tlaneltocani. Huan nopa chicome tlahuil quetzali tlen oro quiijtosnequi nopa chicome tiopantini tlen tlaneltocani.”
\c 2
\s Tlajtoli para nopa tiopamitl ipan altepetl Éfeso
\p
\v 1 Huan Jesucristo nechilhui: “Xijtlajcuilhui nopa elhuicac
ejquetl\f 2:1 Nojquiya huelis tijpatlase ni tlajtoli ica náhuatl
ica “itlatitlanil Toteco” o “nopa tlayacanquetl” ipan nopa
tiopamitl.\f*  ipan nopa tiopamitl tlen tlaneltocani tlen eltoc ipan
altepetl Éfeso. Xiquilhui para na niJesucristo tlen nijpiya nomaco
nopa chicome elhuicac ehuani tlen tlayacanaj ipan nopa chicome
tiopantini. Huan ninemi tlatlatlajco nopa chicome tiopantini tlen
tlaneltocani. Xiquilhui queja ni niquilhuía:
\b
\pi1
\v 2 “Nijmati nochi tlen inquichihuaj. Nijmati para chicahuac
intequitij huan inquipiyaj imoyolo ica nochi tlen inmechpanotihuala.
Nijmati ax inquinijiyohuíaj tlen ax cuajcualme. Quema ajsitoj
tlacajcayahuani tlen motocajtíaj itlayolmelajcahua Toteco, nijmati
para inquinyejyecojque huan inquinixmatque para istlacatini.
\v 3 Inquipixtoque imoyolo quema inquiijiyohuijtoque tlaohuijcayotl
pampa innechicnelíaj. Intequititoque chicahuac huan ax
insiyajtoque, niyon ax innechcajtoque.
\pi1
\v 4 “Pero niquita se tlamantli tlen ax ijqui. Ayoc innechicnelíaj
huan ayoc inmoicnelíaj queja achtohuiya.
\v 5 Huajca xiquilnamiquica quejatza innechicneliyayaj achtohuiya
huan ximoyolcuepaca huan sampa queja nopa xinechicnelica. Intla ax
inmoyolcuepaj, huajca nimantzi niyas nepa huan nimechquixtilis
imotlahuil quetzal campa eltoc.
\v 6 Nojquiya nijmati seyoc tlamantli tlen cuali inquichihuaj.
Inquicocolíaj tlen quichihuaj nopa nicolaitame tlen na nojquiya ax
nijnequi niquitas.
\pi1
\v 7 “Nochi inquipiyaj imonacas, huajca xijtlacaquilica huan
xijmachilica tlen Itonal Toteco quinilhuía tlaneltocani ipan
tiopantini, pampa quiijtohua: Nochi tlacame tlen quitlanij tlen ax
cuali quicuase itlajca nopa cuahuitl tlen temaca yolistli para
nochipa. Nopa cuahuitl ijcatoc campa tlahuel tlayejyectzi nepa campa
itztoc Toteco.”
\s Tlajtoli para nopa tiopamitl ipan altepetl Esmirna
\p
\v 8 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl Esmirna
huan xiquilhui para na niipejya huan niitlamiya nochi tlen onca.
Nimijqui huan sampa nimoyolcuic huan queja ni niquilhuía:
\b
\pi1
\v 9 “Nijmati nochi tlen inquichihuaj. Nijmati quejatza
intlaijiyohuíaj nopampa na. Nijmati tlahuel inteicneltzitzi, yonque
nelía intlapijpixtoque iixpa Toteco. Nijmati quejatza
inmechtlaijilhuíaj nopa tlacame tlen quiijtohuaj para israelitame
huan itlacajhua Toteco, pero ax neli. Tlen itztoque ipan nopa
israelita tiopamitl, inijuanti nelía iaxcahua Axcualtlacatl pampa
yajaya tlen inijuanti quitequipanohuaj.
\v 10 Amo xiquimacasica tlen monequi inquiijiyohuise. Ax huejcahuas
inijuanti tlen quitoquilíaj Axcualtlacatl inmechtzacuase sequin
imojuanti ipan tlatzactli para inmechyejyecose, huan intlaijiyohuise
majtlactli tonali. Pero xiitztoca intemachme huan amo xinechcahuaca
yonque monequi inmiquise. Huan na nimechmacas se corona tlen eli
yolistli para nochipa.
\pi1
\v 11 “Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
nochi tiopantini. Tlen quitlanise tlen ax cuali ax yase mictla campa
tlacame quiijiyohuise nopa ompa miquistli.”
\s Tlajtoli para nopa tiopamitl ipan altepetl Pérgamo
\p
\v 12 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl Pérgamo
huan xiquilhui para najaya tlen nijpiya se machete tlen oncac
tlatequi huan queja ni niquilhuía:
\b
\pi1
\v 13 “Nijmati nochi tlen inquichihuaj huan nojquiya nijmati
initztoque nepa ipan nopa altepetl campa nochi quihueyichihuaj
Axcualtlacatl. Pero noja innechtoquilíaj ica nochi imoyolo. Ax
inquicajtoque innechneltocaj yonque itoquilijcahua Axcualtlacatl
quimictijque Ántipas tlen quinpohuiliyaya tlacame tlen na
mojmostla.
\pi1
\v 14 “Pero niquita se ome tlamantli tlen ax ijqui.
Inquincahuilíaj tlacame ma itztoca imohuaya tlen quichihuaj tlen
Balaam quichijqui huejcajquiya. Balaam quiilhui Balac ma quinmachti
israelitame ma quicuaca tlacualistli tlen quitlalijtoyaj iniixtla
totiotzitzi para tlacajcahualistli. Huan ica nopa quinchijqui ma
huetzica ipan tlajtlacoli. Nojquiya quiilhui ma quinmachti
israelitame ma quichihuaca tlamantli ica tlen ax ininnamic, huan ya
nopa tlen quichihuaj nopa tlacame nepa imohuaya.
\v 15 Huan imojuanti nojquiya inquinijiyohuíaj tlacame imohuaya
tlen quitoquilíaj ininfiero tlamachtilis nopa nicolaitame huan ya
nopa ax nijnequi niquitas.
\v 16 Huajca ximoyolcuepaca, pampa intla ax inmoyolpatlase, niyas
nimantzi huan niquintehuis ica notlajtol tlen eltoc queja se machete
tlen quisa ipan nocamac.
\pi1
\v 17 “Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
tiopantini. Tlen quitlanise tlen ax cuali niquinmacas nopa
tlacualistli tlen huala tlen elhuicac tlen axaca hueli quiita. Huan
nijmacas se piltetzi tlen chipahuac huan quipiyas se tocaitl tlen
yancuic tlen tlajcuiloli ipani huan axaca quimatis nopa yancuic
tocaitl tlen Toteco quimacas, san yajaya tlen quiselía.”
\s Tlajtoli para nopa tiopamitl ipan altepetl Tiatira
\p
\v 18 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl Tiatira
huan xiquilhui para na niIcone Toteco. Na nijpiya noixtiyol tlen
tlahuía queja tlixochitl huan nijpiya noicxi tlen nesi queja nopa
tepostli bronce tlen nelía cuali quipojpojtoque huan queja ni
nijnequi niquilhuis:
\b
\pi1
\v 19 “Nijmati nochi tlen inquichihuaj huan quejatza miyac
inteicnelíaj. Nijmati chicahuac innechneltocaj huan
innechtequipanohuaj. Inquiijiyohuijtoque nochi tlen
inmechpanotihuala, huan mojmostla más inquichijtiyohuij tlen cuali
ama huan ax queja inquichihuayayaj achtohuiya.
\pi1
\v 20 “Pero niquita se ome tlamantli tlen ax ijqui. Inquicahuilíaj
nopa sihuatl Jezabel ma quinmachti huan quintlajtlacolmaca
notlatequipanojcahua. Yajaya motocajtía se itiocamanalojca Toteco
huan quiijtohua tlamachtía tlajtoli tlen Toteco quimacatoc, pero ax
neli. Yajaya quinmachtía tlaneltocani ma quichihuaca tlamantli
ininhuaya tlen ax ininnamic. Quinmachtía ma quicuaca tlacualistli
tlen sequinoc quitlalijtoque queja se tlacajcahualistli iniixtla
totiotzitzi.
\v 21 Nijchixqui miyac tonali para Jezabel moyolcuepasquía, pero ax
quinequi quicahuas momecatía.
\v 22 Huajca nijmacas se cocolistli tlen ica huilantos ipan itlapech
huan tlaijiyohuis miyac. Nojquiya tlaijiyohuise nochi tlen
momecatiyayaj ihuaya intla ax quicahuase inintlajtlacol.
\v 23 Huan niquinmictis nochi tlen quitoquilíaj itlamachtilis
Jezabel, intla ax moyolpatlaj, pampa itztoque queja iconehua. Yeca
tlaneltocani quimatise ipan campa hueli tiopantini para na,
niJesucristo, nijmati tlen sesen imojuanti inmoilhuíaj ipan
imotlalnamiquilis huan nijmati tlen eltoc ipan sesen imojuanti
imoyolo. Huan nimechcuepilis sesen imojuanti queja tlen quinamiqui.
\v 24 Nojquiya nijpiya se tlajtoli para ne sequin imojuanti ipan
altepetl Tiatira tlen ax inquitoquilijtoque itlamachtilis nopa
sihuatl. Ax inquimatij tlen inijuanti quitocajtíaj nopa
‘tlamachtilistli tlen más huejcapa’ tlen Axcualtlacatl. Ax tleno
más monequi nimechnahuatis.
\v 25 San nijnequi inquichijtinemise nopa cuali tlamantli tlen ama
inquichihuaj hasta quema nihualas. Amo xisiyahuica.
\pi1
\v 26 “Nochi tlacame tlen quitlanise tlen ax cuali huan
quichijtinemise tlen nimechilhuijtoc hasta itlamiya, nimechmacas
tequihuejcayotl inquinnahuatise tlacame ipan nochi tlaltini.
\v 27 Chicahuac inquinnahuatise. Huan intla tlacame ax
inmechtlepanitase, inquinchihuilise queja elisquíaj se comitl tlen
tlapani. Inquipiyase san se nopa tequihuejcayotl queja noTata
nechmacatoc na.
\v 28 Huan nojquiya nimechmacas nopa sitlali tlen tlahuía chicahuac
ica ijnaloc quema nechca para tlanesis.
\v 29 Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
nochi tiopantini.”
\c 3
\s Tlajtoli para nopa tiopamitl ipan altepetl Sardis
\p
\v 1 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl Sardis
huan xiquilhui para najaya tlen nijpiya nopa chicome itonalhua
Toteco huan nopa chicome sitlalime, huan queja ni niquilhuía:
\b
\pi1
“Nijmati nochi tlen inquichihuaj. Nijmati sequinoc quiijtohuaj
cuali initztoque huan cuali inquitequipanohuaj Toteco, pero ax neli.
Eltoc queja inmictoque iixpa Toteco.
\v 2 Xiisaca huan xijmacaca tetili nopa tlamantli tlen noja
inquichihuaj tlen quentzi cuali, pampa ax nijpantía para
inquichihuaj tlen cuali iixpa Toteco.
\v 3 Xiquilnamiquica itlajtol Toteco tlen inquicajtoque huan
inquiselijtoque. Xijchihuaca nochi tlen nopa tlajtoli quiijtohua.
Ximoyolcuepaca ica tlen ax cuali inquichihuayayaj. Intla axtle,
niyas campa imojuanti quema ax innechchiyaj queja ajsi se
tlaxtejquetl. Huan ax inquimatise ipan tlaque hora niajsiti.
\pi1
\v 4 “Pero itztoque se quesqui tlaneltocani imohuaya ipan altepetl
Sardis tlen ax quisoquihuijtoque ica tlajtlacoli ininyoyo. Yajuanti
moyoyontise ica tlen chipahuac huan nejnemise nohuaya, pampa queja
nopa quinamiqui tlen itztoque tlapajpactique iixpa Toteco.
\v 5 Quena, nochi tlacame tlen quitlanise tlen ax cuali Toteco
quinyoyontis ica ininyoyo tlen chipahuac. Huan ax quema niquixpolos
inintoca ipan nopa amatlapohuali tlen quipiya ajqueya inijuanti
itztose para nochipa. Huan na niquijtos iixtla noTata huan ielhuicac
ejcahua para nopa tlacame noaxcahua.
\v 6 Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
nochi tiopantini.”
\s Tlajtoli para nopa tiopamitl ipan altepetl Filadelfia
\p
\v 7 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl
Filadelfia huan xiquilhui para na tlen senquistoc nitlatzejtzeloltic
huan nitemachtli. Xiquinilhui para na nijpiya illaves huan
itequihuejcayo Tlanahuatijquetl David. Quema nijtlapos se puerta,
axaca huelis quitzacuas huan quema nijtzacuas se puerta, axaca
huelis quitlapos. Xiquilhui para queja ni nijnequi niquilhuis:
\b
\pi1
\v 8 “Nijmati nochi tlen inquichihuaj. Yonque quentzi
imochicahualis, inquitoquilíaj notlajtol huan inquinilhuíaj
tlacame para innoaxcahua. Huajca nimechtlapohuili se puerta imoixtla
tlen axaca hueli quitzacuas.
\v 9 Xiquitaca, nijchihuas para nopa tlacame tlen iaxcahua
Axcualtlacatl ma hualaca huan ma motlancuaixtlapachoca imoicxiteno,
huan quiijtose para imojuanti nopa tlacame tlen nimechicnelía. Nopa
tlacame quiijtohuaj para israelitame huan itlacajhua Toteco, pero ax
neli. San istlacatij.
\pi1
\v 10 “Nimechilhuijtoc xijpiyaca imoyolo ica tlen inmechpanotihuala
huan nelía inquitlacaquilijtoque notlajtol, huajca na
nimechmocuitlahuis para ax inmechpantis nopa hora quema oncas
tlaijiyohuilistli ipan ni tlaltepactli para quinyejyecos tlen
itztoque nica.
\v 11 Xiquitaca, ipan tlen hueli tlalochtli nihualas. Huajca
xijtoquilijtinemica itlajtol Toteco tlen inquipiyaj para axaca
inmechquixtilis nopa corona tlen inquiselise nepa elhuicac.
\v 12 Huan tlacame tlen quitlanise tlen ax cuali niquinchihuas ma
elica queja tlaquetzali ipan ihueyi tiopa noTeco, huan ax quema
quisase nepa. Huan niquijcuilos ipan nopa tlacame itoca noTeco huan
itoca nopa yancuic altepetl Jerusalén, ialtepe noTeco tlen temos
tlen elhuicac campa yajaya itztoc. Huan niquijcuilos ipan inijuanti
notoca tlen yancuic.
\v 13 Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
nochi tiopantini.”
\s Tlajtoli para nopa tiopamitl ipan altepetl Laodicea
\p
\v 14 Huan Jesucristo nechilhui: “Xijtlajcuilhui nopa elhuicac
ejquetl ipan nopa tiopamitl tlen tlaneltocani ipan altepetl Laodicea
huan xiquilhui para najaya tlen nijpiya nochi tequihuejcayotl. Na
nitemachtli huan na tlen niquinilhuía tlacame tlen nelía
xitlahuac. Xiquilhui ica na Toteco quichijqui nochi tlen onca huan
na nijnahuatía, huan queja ni niquilhuía:
\b
\pi1
\v 15 “Nijmati tlen inquichihuaj. Ax innechcocolíaj huan ax
innechicnelíaj. Initztoque queja se tlamantli tlen ax sesec, niyon
ax totonic. Más cuali intla innechcocolisquíaj o
innechicnelisquíaj,
\v 16 pero pampa initztoque queja se atl tlen yamanca totonic,
huajca monequi nimechisotlas.
\v 17 Inquiijtohuaj intlapijpixtoque huan ax tleno inmechpolohua,
pero ax inquimachilíaj intla iixpa Toteco fiero initztoque. Yajaya
inmechijiya. Inteicneltzitzi, inpopoyotzitzi huan inxolome iixpa ya.
\v 18 Huajca nimechtlajtolmaca xihualaca campa na para nimechmacas
tlen inmechchihuas nelía cuali iixtla. Amo xijtemoca tlen hueli
oro, pero xinechcohuilica oro tlen más cuali tlen quipajpactoque
ipan tlitl para nelía inmoricojtilise. Huan xinechcohuilica
yoyomitl tlen nelía chipahuac queja Toteco quinmaca tlen itztoque
xitlahuaque iixpa, huan ya nopa inmoquentise para ayoc inpinahuase
pampa inxolome iixpa. Huan xinechcohuilica ixtiyol pajtli para
inmotequilise ipan imoixtiyol para inquiitase tlen melahuac.
\pi1
\v 19 “Na tlen niquintlacahualtía huan niquintlalnamictía nochi
tlacame tlen niquinicnelía, huajca ica nochi imoyolo
ximoicnonequica huan ximoyolpatlaca.
\pi1
\v 20 “Xiquita, nimoquetza campa puerta huan nimitznotza. Intla
tinechtoscaquis huan tinechcaltlapos, nicalaquis huan nitlacuas
mohuaya huan tielis tinohuampo.
\v 21 Huan nochi tlacame tlen quitlanise tlen ax cuali
niquincahuilis ma mosehuica nohuaya nepa campa nimosehuía para
nitlanahuatis, san se queja na nijtlanqui tlen ax cuali huan
nimosehuía ihuaya noTata nepa campa yajaya tlanahuatía.
\v 22 Nochi inquipiyaj imonacas, huajca xijtlacaquilica huan
xijmachilica tlen Itonal Toteco nica quinilhuía tlaneltocani ipan
tiopantini.”
\c 4
\s Juan quiita Toteco nepa ipan elhuicac
\p
\v 1 Teipa nijtlachili huan niquitac se puerta tlen tlapojtoya nepa
elhuicac. Huan yajaya tlen nechcamahui achtohuiya huan tlen
quipixtoya itos queja se tlapitzali chicahuac, sampa nechnotzqui
huan nechilhui: “Xitlejco nica huan nimechnextilis tlen monequi
panos teipa.”
\p
\v 2 Huan nimantzi elqui queja Itonal Toteco quihuicac notonal
ihuaya queja ipan se temictli. Huan nepa ipan elhuicac niquitac nopa
hueyi siyaj queja tlen iaxca se tlanahuatijquetl, huan Toteco Dios
mosehuiyaya nepa.
\v 3 Huan yajaya tlahuiyaya queja se tlamantli tlen onpano cuali.
Cahuaniyaya más huan ax queja nopa tetl tlen tlahuel patiyo tlen
itoca jaspe o tlen itoca cornalina. Huan yahualtic ihueyi siyaj
petlaniyaya se acosamalotl tlen nesqui queja nopa tetl tlen tlahuel
patiyo tlen itoca esmeralda.
\v 4 Huan nopa sempoali huan nahui siyas queja para tlanahuatiani
quiyahualohuayayaj ihueyi siyaj Toteco. Huan ipan nopa siyas
niquinitac mosehuiyayaj sempoali huan nahui huehue tlacame tlen
moquentiyayaj ininyoyo tlen nelchipahuac. Huan nochi nopa huehue
tlacame quipiyayayaj coronas tlen oro ipan inintzontecohua.
\v 5 Huan tlen nopa hueyi siyaj quisayaya tlapetlanilotl huan
tlatomonilotl huan tlahuejchijcayotl. Huan imelac ihueyi siyaj
Toteco eltoya chicome tlahuil quetzali tlen lemeniyayaj tlen
quinescayotijtoya nopa chicome itonalhua Toteco.
\v 6 Huan iixmelac nopa hueyi siyaj nesqui queja se hueyi atl tlen
tzalantic queja tescatl huan tlahuiyaya queja nopa tetl tlen itoca
cristal.
\p Huan iixmelac nopa hueyi siyaj huan yahualtic itztoyaj nahui
tlamantli tlen yoltoque huan campa hueli ininpani quipixtoyaj
iniixtiyolhua. Quipixtoyaj iniixtiyolhua iniixtla huan iniica.
\v 7 Huan nopa achtohui tlamantli tlen yoltoc nesqui queja se león
tecuani huan nopa ompa nesqui queja se hueyi toro tlen quimati
tlapoxahua. Huan nopa expa tlamantli tlen yoltoc quipixtoya ixayac
queja se tlacatl, huan nopa najpa tlamantli tlen yoltoc itztoya
queja se hueyi cuajtli tlen quipatlajtoya ieltlapalhua queja
patlantinemiyaya.
\v 8 Huan sesen nopa nahui tlamantli tlen yoltoque quipixtoyaj
chicuase inieltlapalhua huan campa hueli ininpani quipiyayayaj
iniixtiyolhua inieltlapalijtic huan ininpani. Huan ax quema
moquetzque yohuali huan tonali, san quiijtohuayayaj:
\q “Tlatzejtzeloltic, quena, senquistoc tlatzejtzeloltic Toteco
Dios Tlen Quipiya Nochi Chicahualistli.
\q Yajaya ipa itztoya,
\q huan ama itztoc,
\q huan itztos para nochipa.”
\p
\v 9 Huajca nochipa nopa tlamantli tlen yoltoque queja nopa
quihueyichihuayayaj, quihueyitlascamatiyayaj huan quinextiliyayaj
inintlatlepanitacayo Toteco Dios tlen mosehuía ipan nopa hueyi
siyaj, yajaya tlen itztoc para nochipa huan ax quema tlamis itztos.
Huan sesen huelta quema nopa tlamantli tlen yoltoque quihueyimatij
Toteco,
\v 10 nopa sempoali huan nahui huehue tlacame nojquiya
motlancuaixtlapachojque iixpa yajaya tlen itztoc para nochipa, huan
inijuanti nojquiya quihueyimatij. Huan nopa huehue tlacame nojquiya
quitlalíaj inincoronas imelac ihueyi siyaj huan quiijtohuaj:
\q
\v 11 “Ta tiToteco Dios tlen onpano tihueyi.
\q Nochi chicahualistli tijpiya.
\q Quinamiqui ma timitznextilica nochi tlatlepanitacayotl.
\q Quinamiqui para san ta ma timitzhueyichihuaca.
\q Ta tijchijchijqui nochi tlen onca.
\q Quena, nochi tlen onca eltoc pampa eltoya mopaquilis para ma
onca,
\q huan yeca tijchijchijqui.”
\c 5
\s Juan quiitac nopa Pilborregojtzi huan nopa amatlapohuali mimilijtoc
\p
\v 1 Huan niquitac se amatlapohuali mimilijtoc ipan ima nejmatl
Toteco Dios tlen mosehuiyaya ipan ihueyi siyaj. Huan nopa
amatlapohuali tlen mimilijtoc quipixtoya tlajcuiloli iijtic huan
ipani huan quitzactoyaj ica chicome sellos.
\v 2 Huan niquitac se elhuicac ejquetl tlen nelía tetic tlen
tzajtziyaya: “¿Ajqueya senquistoc cuali huan quinamiqui para
quitlapanas isellos ni amatlapohuali huan quitlapos?”
\p
\v 3 Pero axaca tlen itztoya ipan elhuicac, niyon axaca tlen itztoya
ipan tlaltepactli, niyon axaca tlen itztoya itzintla tlaltepactli
huelqui quitlapos nopa amatlapohuali para quiitas tlen ijcuilijtoc
nopona.
\v 4 Huajca pejqui nichoca miyac pampa axaca quipantijque tlen
senquistoc cuali huan quinamiqui para quitlapos nopa amatlapohuali
tlen mimilijtoc huan quiitas tlen ijcuilijtoc ipani.
\v 5 Huan se tlen nopa sempoali huan nahui huehue tlacame nechilhui:
“Ayoc xichoca. Xiquita, itztoc se tlen huelis quitlapos. Yajaya
quipiya hueyi tlanahuatili queja se león tecuani. Yajaya se iteipa
ixhui Judá tlen huejcajquiya itztoya huan nojquiya yajaya se iteipa
ixhui nopa hueyi tlanahuatijquetl David huan tlanahuatis campa David
tlanahuatiyaya. Ya quitlantoc tlen ax cuali huan quinamiqui para
quitlapanas nopa chicome sellos tlen quitzacua nopa amatlapohuali
tlen mimilijtoc huan quitlapos.”
\p
\v 6 Huajca nijtlachili huan niquitac se Pilborregojtzi. Huan nopa
Pilborregojtzi nempa quihualicayaya campa quicocojque quema tlacame
quimictijque. Huan yajaya moquetzayaya tlatlajco nopa hueyi siyaj
campa itztoyaj nopa nahui tlamantli tlen yoltoque huan nopa sempoali
huan nahui huehue tlacame. Huan nopa Pilborregojtzi quipixtoya
chicome icuacua huan chicome iixtiyol tlen quinescayotiyaya nopa
chicome Itonalhua Toteco tlen quintitlantoc campa hueli ipan
tlaltepactli.
\v 7 Huan nopa Pilborregojtzi yajqui huan quicuito nopa
amatlapohuali tlen mimilijtoc tlen eltoya ipan inejmatl Toteco Dios
tlen mosehuiyaya ipan nopa hueyi siyaj tlen yejyectzi.
\v 8 Huan quema quicuic nopa mimilijtoc amatlapohuali, nopa nahui
tlamantli tlen yoltoque huan nopa sempoali huan nahui huehue tlacame
motlancuaixtlapachojque iixpa nopa Pilborregojtzi. Sesen inijuanti
quipixtoyaj se arpa ica icuerda para tlatzotzonase. Huan quipixtoyaj
popochconme tlen oro temitoc ica copali tlen quiijtosnequi nochi
tlajtoli tlen tlacame tlen iaxcahua Toteco quiijtojtoyaj quema
momaijtoyayaj.
\v 9 Huan inijuanti tlen itztoyaj nepa iixpa nopa Pilborregojtzi
huicaque se tiohuicatl tlen yancuic, quiijtojque:
\q “Ta tisenquistoc ticuali.
\q Huan quinamiqui tijcuis nopa mimilijtoc amatlapohuali huan
tijtlapanas isellos.
\q Pampa mitzmictijque huan ica moeso tijcohui Toteco tojuanti tlen
tihualajque tlen nochi xinachtli tlacame,
\q huan tlen ticamatij nochi tlamantli tlajtoli.
\q Tijcohui Toteco tojuanti tlen tihualahuij ipan tlacame tlen
quipiyaj sesen tlamantli inintlalnamiquilis huan inincostumbres,
\q huan tlen tiehuaj ipan nochi tlaltini.
\q
\v 10 Huan techchihuilijtoc ma tiitztoca titlanahuatiani huan
titotajtzitzi iixpa Toteco Dios,
\q huan para ma titlanahuatica ipan tlaltepactli.”
\p
\v 11 Nijtlachili huan nijcajqui inintlajtol tlahuel miyac millones
huan millones elhuicac ehuani tlen huicayayaj huan quiyahualojtoyaj
nopa hueyi siyaj campa itztoya Toteco. Huan quinyahualojtoyaj nopa
nahui tlamantli tlen yoltoque huan nopa sempoali huan nahui huehue
tlacame.
\v 12 Huan nochi nopa elhuicac ehuani huicayayaj chicahuac huan
quiijtohuayayaj:
\q “Senquistoc cuali ni Pilborregojtzi tlen tlacame quimictijque.
\q Huan quinamiqui para nochi tlacame ma quinextilica nochi
tlatlepanitacayotl,
\q huan ma quihueyichihuaca huan ma quipaquilismacaca.
\q Yajaya quipiya nochi chicahualistli huan nochi tlalnamiquistli.
\q Huan quinamiqui para nochi tlen ipati elis san iaxca ya.”
\p
\v 13 Huan nijcajqui tlen quiijtojque nochi tlacame, tlapiyalime,
michime, totome, huan nochi sequinoc tlamantzitzi tlen Toteco
quinchijchijtoc ipan elhuicac, huan ipan tlaltepactli, huan itzintla
tlaltepactli, huan ipan hueyi atl. Huan nochi inijuanti
quiijtohuayayaj:
\q “Ma tiquinpaquilismacaca nopa Pilborregojtzi huan Toteco Dios
tlen mosehuía ipan nopa hueyi siyaj tlen yejyectzi.
\q Ma tiquinnextilica nochi tlatlepanitacayotl, huan ma
tiquinhueyichihuaca para nochipa.
\q Yajuanti quipiyaj nochi chicahualistli huan quipiyase nochi
chicahualistli para nochipa huan ax quema tlamis.”
\p
\v 14 Huan nopa nahui tlamantli tlen yoltoque quiijtohuayayaj:
“¡Queja nopa ma eli!”
\p Huan nopa huehue tlacame motlancuaixtlapachojque huan
quinhueyimatque Toteco Dios huan nopa Pilborregojtzi.
\c 6
\s Nopa chicome sellos
\p
\v 1 Huan quema nijtlachiliyaya, nopa Pilborregojtzi quitlapanqui
nopa achtohui sello tlen nopa chicome sellos ipan nopa mimilijtoc
amatlapohuali. Huan nijcajqui se tlen nopa nahui tlamantli tlen
yoltoque camatqui huan itlajtol caquistic queja quema tlatomoni,
huan yajaya quiijto: “¡Xihuala, xiquitaqui!”
\p
\v 2 Huan nijtlachili huan niquitac se cahuayo chipahuac, huan
yajaya tlen tlejcotoya ipani quipixtoya se cuahuitoli imaco para
quimajcahuas cuatlamintli. Huan quimacaque se corona pampa elqui se
tlatlanquetl tlen yajqui para más tlatlaniti.
\p
\v 3 Huan nopa Pilborregojtzi quitlapanqui nopa ompa sello, huan
nijcajqui nopa ompa tlamantli tlen yoltoc quiijto: “¡Xihuala,
xiquitaqui!”
\p
\v 4 Huan quisqui seyoc cahuayo tlen chichiltic. Huan yajaya tlen
tlejcotoya ipani quipixqui tlanahuatili para quiquixtilis
tlasehuilistli tlen tlaltepactli. Yajaya quipixqui tlanahuatili para
quichihuas ma onca miyac tlatehuijcayotl campa hueli ipan
tlaltepactli huan para tlacame ma momijmictica campa hueli. Huan se
quimacac se hueyi machete.
\p
\v 5 Huan nopa Pilborregojtzi quitlapanqui nopa expa sello, huan
nijcajqui nopa expa tlamantli tlen yoltoc quiijto: “¡Xihuala,
xiquitaqui!”
\p Huan nijtlachili huan niquitac se cahuayo yayahuic, huan yajaya
tlen tlejcotoya ipani quipixtoya imaco se balanza tlatlamachihuali.
\v 6 Huan nijcajqui se tlen camatqui tlatlajco nopa nahui tlamantli
tlen yoltoque, huan quiijto: “Tlahuel ohui para tlacame mopanoltise
pampa nochi tlapatiyo. Se kilo trigo o eyi kilos cebada ipati tlen
se tlacatl hueli quitlani ipan se tonal tequitl, pero amo xijnenpolo
nopa aceite huan xocomecatl iayo.”
\p
\v 7 Huan nopa Pilborregojtzi quitlapanqui nopa najpa sello, huan
huajca nijcajqui nopa najpa tlamantli tlen yoltoc quiijto:
“¡Xihuala, xiquitaqui!”
\p
\v 8 Huan nijtlachili huan niquitac se cahuayo istaltic queja nesi
ixayac se mijcatzi. Huan tlen tlejcotoya ipani itoca Miquilistli.
Huan tlen quitoquiliyaya quinescayotiyaya nopa lugar campa yohuij
mijcatzitzi. Huan quipixtoyaj tlanahuatili para quinmictise se ipan
sesen nahui tlacame ipan tlaltepactli. Quinchihuase ma miquica ipan
tlatehuijcayotl, o ica mayantli, o ica cocolistli, o para ma
quinmictica tecuanime tlen itztoque ipan tlaltepactli.
\p
\v 9 Huan nopa Pilborregojtzi quitlapanqui nopa macuilpa sello, huan
niquitac itzintla tlaixpamitl inialmas nopa tlacame tlen
quinmictijtoyaj pampa quineltocayayaj itlajtol Toteco huan pampa
quinilhuiyayaj sequinoc tlen ya.
\v 10 Huan chicahuac quiijtojque: “Tohueyiteco, ta tlen
titlatzejtzeloltic. Ta tlen titemachtli. ¿Quesqui tonali más
monequi tijchiyase para tiquintlajtolsencahuas tlacame tlen itztoque
ipan tlaltepactli ipampa tlen fiero techchihuilijtoque? ¿Hasta
quema tiquincuepilis tlen techmictijque?”
\p
\v 11 Huan Toteco quinmacac sesen inijuanti ininyoyo tlen chipahuac
huan huehueyac. Quinilhui ma mosiyajcahuaca quentzi más pampa aya
tecuepilis hasta miquise senquistoc nochi imiyaca iniicnihua tlen
ininpantis para tlacame quinmictise pampa quitequipanohuayayaj
Toteco ininhuaya.
\p
\v 12 Huan nijtlachili quema nopa Pilborregojtzi quitlapanqui nopa
chicuasempa sello. Huan chicahuac mojmolini tlali, huan tonati
mochijqui yayahuic queja se tlen moyoyontía yayahuic quema acajya
miqui. Huan metztli mochijqui chichiltic queja estli.
\v 13 Huan nopa sitlalime tlen elhuicac huetzque ipan tlaltepactli
queja se lalax cuahuitl tepehui itlajca tlen selic quema chicahuac
tlaajaca.
\v 14 Huan elhuicactli motlajcoitac huan sesen lado momimilo huan
patlantejqui huan ayoc nesqui. Huan nochi tepeme huan nochi
piltlaltzitzi ipan hueyi atl moijicuenijque.
\v 15 Huan motlatijque nochi tlanahuatiani ipan tlaltepactli, huan
huejhueyi tequihuejme, huan capitanes, huan tlacame tlen
tlapijpixtoque, huan tlen quipixque miyac chicahualistli.
Motlatijque tlatequipanohuani tlen iniaxcahua inintecohua, ininhuaya
tlacame tlen ax quipixque inintecohua. Nochi san motlatijque ipan
ostome campa huejhueyi tetl huan inintzala tetini tlen mocahuaj
nechca tepeme.
\v 16 Huan quiilhuiyayaj nopa tepeme huan nopa huejhueyi tetini:
“Xihuetzica topani. Techtlatica para ax nechitas yajaya tlen
mosehuía ipan nopa hueyi siyaj. Techtlatica para ax nechajsis
icualancayo nopa Pilborregojtzi.
\v 17 Pampa ya ajsico nopa hueyi tonal quema techtlatzacuiltis huan
axaca huelis quiijiyohuis.”
\c 7
\s Toteco quinmocuitlahuis miyac israelitame
\p
\v 1 Teipa niquinitac nahui elhuicac ehuani tlen moquetzayayaj ipan
nahui inacastla tlaltepactli. Huan inijuanti quitzacuiliyayaj nopa
nahui tlamantli ajacatl tlen tlailpitza ipan tlaltepactli para ma ax
tlaajaca ipan tlali, niyon ipan hueyi atl, niyon ma ax tlaajaca ipan
niyon se cuahuitl.
\v 2 Huan niquitac seyoc elhuicac ejquetl tlen tlejcoyaya campa
quisa tonati huan quipixtoya isello Toteco Dios tlen yoltoc. Huan
nopa elhuicac ejquetl tzajtzic chicahuac para quincamahuis nopa
nahui elhuicac ehuani tlen quipixtoyaj tlanahuatili para
quinenpolose tlali huan hueyi atl. Huan nopa elhuicac ejquetl
quinilhui nopa sequinoc:
\v 3 “Amo xiquijtlacoca tlali, niyon hueyi atl, niyon cuatini,
hasta tiquintlalilise se sello ipan inincuaixpa tlen
quitequipanohuaj Toteco.”
\p
\v 4 Huan nijcajqui ipan quesqui tlacame quintlalilijque se sello
para quinextis para iaxcahua Toteco huan eltoyaj ciento cuarenta y
cuatro mil tlacame tlen itztoyaj ininteipa ixhuihua nochi majtlactli
huan ome itelpocahua Israel tlen huejcajquiya.
\v 5 Huan quintlalili sello ipan:
\q 12,000 iteipa ixhuihua Judá,
\q 12,000 iteipa ixhuihua Rubén,
\q 12,000 iteipa ixhuihua Gad,
\q
\v 6 12,000 iteipa ixhuihua Aser,
\q 12,000 iteipa ixhuihua Neftalí
\q 12,000 iteipa ixhuihua Manasés,
\q
\v 7 12,000 iteipa ixhuihua Simeón,
\q 12,000 iteipa ixhuihua Leví,
\q 12,000 iteipa ixhuihua Isacar,
\q
\v 8 12,000 iteipa ixhuihua Zabulón,
\q 12,000 iteipa ixhuihua José huan
\q 12,000 iteipa ixhuihua Benjamín.
\s Tlahuel miyac tlacame quihueyichihuaj Toteco
\p
\v 9 Teipa nijtlachili huan niquitac onpano miyac tlacame tlen axaca
hueli quinpohua. Hualajtoyaj tlen campa hueli tlaltini, huan tlen
nochi xinachtli tlacame, huan tlen tlacame ica sesen tlamantli
inintlalnamiquilis huan inincostumbres, huan tlacame tlen camatij
nochi tlamantli tlajtoli tlen onca ipan tlaltepactli. Huan nochi
inijuanti moquetzayayaj imelac nopa hueyi siyaj huan iixpa nopa
Pilborregojtzi. Moquentiyayaj ininyoyo tlen chipahuac huan tlen
huehueyac huan ininmaco quipixtoyaj imacuayo apach cuahuitl,
\v 10 huan tzajtziyayaj chicahuac huan quiijtohuayayaj:
\q “¡Hueyi paquilistli!
\q Ya techmaquixtijque ni Pilborregojtzi huan Toteco Dios tlen
mosehuía ipan ihueyi siyaj tlen yejyectzi.”
\m
\v 11 Huan nochi nopa elhuicac ehuani tlen moquetzayayaj yahualtic
tlen nopa nahui tlamantli tlen yoltoque huan nopa huehue tlacame
motlancuaixtlapachojque imelac nopa hueyi siyaj tlen yejyectzi huan
quihueyimatque Toteco.
\v 12 Quiijtojque:
\q “¡Paquilistli!
\q Ma tijpaquilismacaca huan ma tijhueyichihuaca Toteco Dios para
nochipa huan ax quema tlami.
\q Ma tijnextilica nochi tlatlepanitacayotl,
\q huan ma tijhueyitlascamatisquía para nochipa.
\q San yajaya quipiya nochi tlalnamiquistli, huan nochi
tequihuejcayotl,
\q huan nochi chicahualistli, huan yajaya quipiyas para nochipa.
\q Queja nopa ma eli.”
\p
\v 13 Huan teipa se tlen nopa sempoali huan nahui huehue tlacame
nechtlajtlani: “¿Ta tijmati ajqueya inijuanti tlen moquentíaj
ininyoyo tlen chipahuac huan tlen huehueyac, huan canque
hualajtoque?”
\p
\v 14 Huan na niquilhui: “Tate, ta tlen tijmati nopa.”
\p Huan yajaya nechilhui: “Yajuanti tlen hualajque ipan nopa tonali
tlen hueyi tlaijiyohuilistli huan quichicuenijtoque ininyoyo ica
ieso nopa Pilborregojtzi, huan yeca quichijtoque chipahuac ininyoyo.
\q
\v 15 “Yeca moquetzaj imelac ihueyi siyaj Toteco huan
quitequipanohuaj yohuali huan tonali nepa ipan ichaj.
\q Huan Toteco Dios tlen mosehuía ipan ihueyi siyaj tlen yejyectzi
quinmocuitlahuía.
\q
\v 16 Ayoc quema mayanase, niyon amiquise.
\q Huan ayoc quintlatis tonati, niyon quimatise tlacontonalotl.
\q
\v 17 Pampa nopa Pilborregojtzi tlen itztoc tlatlajco nopa hueyi
siyaj tlen yejyectzi elis inintlamocuitlahuijca.
\q Huan queja se tlamocuitlahuijquetl quichihua ica iborregojhua,
\q yajaya quinhuicas amelco campa meya atl tlen yoltoc huan tlen
temaca yolistli para nochipa.
\q Huan Toteco quinhuachilis iniixayo para ayoc quema ma chocaca.”
\c 8
\s Nopa chicompa sello
\p
\v 1 Huan nopa Pilborregojtzi quitlapanqui nopa chicompa sello, huan
axaca molini nepa elhuicac para nechca se tlajco hora.
\v 2 Huan niquinitac chicome elhuicac ehuani tlen moquetzayayaj
iixpa Toteco Dios huan quinmacaque chicome tlapitzali, se para sesen
inijuanti.
\v 3 Huan seyoc elhuicac ejquetl hualajqui huan moquetzqui nechca
tlaixpamitl huan quipixtoya se popoch comitl tlen oro. Huan
quimacaque miyac copali para quitlatis iixpa Toteco para ma tlejcos
ipocyo ihuaya nochi tlajtoli tlen tlacame tlen iaxcahua Toteco
quiijtojque quema momaijtoyayaj. Huan nopa elhuicac ejquetl
quitejqui nochi tlen eltoya ipan ipopochco ipan nopa tlaixpamitl
tlen oro imelac nopa hueyi siyaj para quimacas Toteco.
\v 4 Huan nopa poctli quisqui ipan nopa popoch comitl tlen nopa
elhuicac ejquetl quipixqui imaco, huan tlejcoc iixpa Toteco ihuaya
nochi tlajtoli tlen momaijtojtoyaj tlacame tlen iaxcahua Toteco.
\v 5 Huan nopa elhuicac ejquetl quicuic nopa popoch comitl huan
quitemiti ica tlicoli tlen eltoya ipan tlaixpamitl, huan teipa
quimajcajqui ipan tlaltepactli. Huan nimantzi pejqui tlatomoni, huan
tlahuelchihua, huan tlapetlani, huan chicahuac mojmolini tlali.
\s Nopa tlapitzali
\p
\v 6 Huan nopa chicome elhuicac ehuani tlen quipixtoyaj nopa chicome
tlapitzali mocualtlalijque para tlapitzase.
\p
\v 7 Huan quema nopa achtohui elhuicac ejquetl tlapitzqui,
quimajcajque ipan tlaltepactli tesihuitl huan tlitl maneltic ica
estli. Huan tlatlac se ipan eyi tlaltini, huan se ipan eyi cuatini,
huan tlatlac nochi xihuitl huan sacatl.
\p
\v 8 Huan nopa ompa elhuicac ejquetl tlapitzqui huan quimajcajque
ipan hueyi atl se tlamantli queja se hueyi tepetl tlen tlatlayaya,
huan se ipan eyi huejhueyi atl mocuepque estli.
\v 9 Huan se ipan eyi michime huan tlamantzitzi tlen itztoque ipan
hueyi atl mijque, huan quinxolejqui se ipan eyi nochi huejhueyi
cuacanahua tlen nemiyayaj ipan hueyi atl.
\p
\v 10 Huan nopa expa elhuicac ejquetl tlapitzqui huan se hueyi
sitlali tlen tlatlayaya queja se tlicualementli huetzqui tlen
elhuicactli ipan se ipan eyi atemitl huan ameli tlen onca ipan
tlaltepactli.
\v 11 Huan nopa sitlali itoca eliyayaj Tlen Tlahuel Chichic huan se
parte ipan sesen eyi partes tlen nochi atl mocuepqui chichic, huan
miyac tlacame mijque pampa quiique nopa chichic atl.
\p
\v 12 Huan nopa najpa elhuicac ejquetl tlapitzqui huan
quimaquilijque se parte ipan eyi partes tlen tonati, huan se parte
ipan eyi partes tlen metztli, huan se ipan eyi sitlalime. Huajca se
parte ipan eyi partes tlen tonati, huan metztli, huan sitlalime
mocuepque yayahuique. Huan ayoc tonayaya para se parte ipan eyi
partes tlen sesen tonal, huan ayoc metztonayaya, niyon ayoc nesque
sitlalime para se parte ipan eyi partes tlen sesen yohuali.
\p
\v 13 Huan nijtlachili huan niquitac se elhuicac ejquetl tlen
patlantinemiyaya nepa tlatlajco elhuicactli. Huan nijcajqui
quiijtohuayaya chicahuac: “¡Temajmati, temajmati, temajmati para
tlen itztose ipan tlaltepactli quema quipitzase nopa eyi elhuicac
ehuani nopa eyi tlapitzali tlen polihuiyoc!”
\c 9
\p
\v 1 Huan nopa macuilpa ejquetl tlapitzqui huan niquitac se sitlali
huetzqui tlen elhuicactli hasta tlaltepactli. Nopa sitlali
quiijtosnequi se acajya. Huan quimacaque nopa llaves para nopa
ostotl tlen tlahuel huejcatla hasta ax quipiya itzintla campa
mocahuaj iajacahua Axcualtlacatl.
\v 2 Huan quema quitlapo nopa ostotl, tlejcoc poctli tlen quisqui
nepa queja ipocyo se hueyi tlilelemectli. Huan ica nopa poctli tlen
quisqui ipan nopa ostotl tzintlayohuili tonati huan nochi ajacatl
tlen quiijiyotilanaj tlacame.
\v 3 Huan poc ijtic quisque chapolime tlen ajsicoj ipan tlaltepactli
huan quipixque chicahualistli para tetzopinise queja tetzopiníaj
colome tlen nelía cococ ipan tlaltepactli.
\v 4 Huan quinilhuijque nopa chapolime ma ax quicococa sacatl ipan
tlaltepactli, niyon cuatini, niyon ax huelque quicocose niyon se
tlamantli tlen xoxohuic. San ma quincococa tlacame tlen ax quipixque
isello Toteco ipan inincuaixpa.
\v 5 Huan quinilhuijque nopa chapolime tlen tetzopiniyayaj para ma
ax temictica. San ma tlahuel tetlaijiyohuiltica. Huan nopa tlacame
tlen ax quipiyaj isello Toteco tlahuel tlaijiyohuise para macuili
metztli queja tlaijiyohuíaj quema se colotl tetzopinía.
\v 6 Huan ipan nopa tonali quema tlacame tlahuel tlaijiyohuise,
tlahuel quinequise miquise, pero ax huelise. Quichiyase huan
moilhuise ama, quena, miquise, pero axtle, pampa queja nopa Toteco
quinequi ma tlaijiyohuica.
\p
\v 7 Huan nopa chapolime nesqui queja cahuayojme tlen
tlacualchijchihualme para tlatehuise. Huan ipan inincuaixpa
quipixtoyaj coronas tlen nesqui queja oro huan ininxayac nesqui
queja ininxayac tlacame.
\v 8 Huan quipixtoyaj inintzoncal queja inintzoncal sihuame, huan
inintlancoch queja inintlancoch tecuanime.
\v 9 Huan tlen ica quinyolixtzactoya elqui queja tepostli. Huan
inieltlapal caquisti queja miyac cuacarros tlen miyac cahuayojme
quintilantiyohuij quema motlalojtiyohuij para tlatehuitij.
\v 10 Huan nopa chapolime quipixque inincuitlapil queja colome ica
inintzinhuitzo. Huan quipixque tlanahuatili para quincocose tlacame
para macuili metztli ica inincuitlapilhua.
\v 11 Inintlanahuatijca elqui nopa elhuicac ejquetl tlen mocuepqui
se fiero ajacatl. Yajaya tlen tlanahuatía ipan nopa ostotl tlen
tlahuel huejcatla hasta ax quipiya itzintla. Yajaya ipan tlajtoli
hebreo itoca Abadón. Huan ipan tlajtoli griego itoca Apolión, huan
itoca quiijtosnequi Tlaxolejquetl.
\p
\v 12 Nopa achtohui tlaijiyohuilistli tlen fiero huan temajmati ya
panoc, pero noja polihui seyoc ome tlamantli tlaijiyohuilistli.
\p
\v 13 Huan nopa chicuasempa elhuicac ejquetl tlapitzqui huan
nijcajqui camatqui se tlen itztoya tlatlajco nopa nahui icuacua nopa
tlaixpamitl tlen oro tlen eltoc iixpa Toteco.
\v 14 Huan yajaya tlen camatiyaya quinotzqui nopa chicuasempa
elhuicac ejquetl huan quiilhui: “Xiquincahuili ma yaca majcajtoque
nopa nahui ajacame tlen ilpitoque nechca nopa hueyi atemitl
Éufrates.”
\p
\v 15 Huan quintojtonqui nopa nahui ajacame tlen Toteco
quinsencajtoya para nopa hora, ipan nopa tonal, ipan nopa metztli,
ipan nopa xihuitl tlen yajaya quitlapejpenijtoya para ma quinmictica
se ipan eyi tlacame tlen noja itztoyaj.
\v 16 Huan nijcajqui quesqui soldados nopa ajacame quinyacanayayaj
para tlatehuise. Huan elque ome ciento millones tlen soldados tlen
tlejcotoyaj ipan cahuayojme huan nopa ajacame quinyacanayayaj.
\p
\v 17 Huan ipan nopa tlanextili tlen eliyaya queja se temictli
niquinitac nopa cahuayojme huan nopa tlacame tlen cahuaj
tlejcotoyaj. Huan nopa tlacame quihuicayayaj ininyolixco se tepostli
para quinmanahuis tlen eliyaya chichiltic, azultic huan costic. Huan
inintzonteco nopa cahuayojme eltoya queja inintzonteco nopa
tecuanime tlen inintoca leones. Huan ipan inincamac quisayaya tlitl,
poctli huan azufre.
\v 18 Huan nopa tlitl, poctli huan azufre tlen quisayaya inincamaco
nopa cahuayojme quinmicti se ipan sesen eyi tlacame tlen itztoyaj
ipan tlaltepactli.
\v 19 Nopa cahuayojme quipixque chicahualistli ipan inincamac huan
ipan inincuitlapil para temictise. Inincuitlapil nesque queja
cohuame tlen quipixtoyaj inintzonteco para ica tecocose.
\p
\v 20 Pero nopa tlacame tlen ax mijque ica ni tlamantli tlen fiero
noja ax moyolpatlaque ica tlen ax cuali quichihuayayaj.
Quisenhuiquilijque quinhueyimatij iajacahua Axcualtlacatl huan nopa
totiotzitzi huan tlaixcopincayome tlen quichijtoque tlen oro, plata,
tepostli, tetl huan cuahuitl. Huan noja quinhueyichijque totiotzitzi
tlen quinsencajtoyaj ica ininma yonque nopa tlaixcopincayome ax
hueli tlachiyaj, niyon ax hueli tlacaquij, niyon ax hueli nejnemij.
\v 21 Huan nopa tlacame ax quinejque quicahuase temictíaj,
tetlajchihuíaj, momecatíaj huan tetlaxtequilíaj.
\c 10
\s Nopa elhuicac ejquetl huan nopa amatlapohuali pilsiltzi
\p
\v 1 Huan niquitac seyoc elhuicac ejquetl tlen nelía tetic temoyaya
tlen elhuicac, huan moquimilojtoya ica se mixtli huan quipixqui nopa
acosamalotl ipan itzonteco. Huan ixayac tlahuiyaya queja tonati huan
iicxihua eltoya queja ome tlaquetzali tlen tlitl.
\v 2 Huan nopa elhuicac ejquetl quipixtoya imaco se amatlapohuali
pilsiltzi tlen momimilijtoc huan tlapojtoya nopa amatlapohuali. Huan
quitlali iicxi tlen inejmatl ipan hueyi atl huan iicxi tlen iarraves
ipan tlali.
\v 3 Huan nopa elhuicac ejquetl tzajtzic chicahuac queja tzajtzi se
tecuani tlen itoca león. Huan quema tzajtzitoya, tlatomonijque nopa
chicome tlatomoniani.
\v 4 Huan quema tlahuejchijtoyaj nopa chicome tlatomoniani,
nimocualtlali para niquijcuilosquía tlen quiijtojque. Huan se
acajya camatqui tlen elhuicac huan nechilhui: “Amo xiquijcuilo tlen
quiijtojque nopa tlatomoniani para axaca quimatis.”
\p
\v 5 Teipa nopa elhuicac ejquetl tlen niquitac moquetzayaya ipan
hueyi atl huan ipan tlali, quitlejcolti ima nejmatl para elhuicac.
\v 6 Huan quitestigojquetzqui Toteco tlen itztoc para nochipa huan
tlen quichijchijqui elhuicactli, huan tlaltepactli, huan hueyi atl
huan nochi tlen itztoque ininpani. Huan nopa elhuicac ejquetl
quiijto: “Toteco ayoc quichiyas más.
\v 7 Quema nopa chicompa elhuicac ejquetl pehuas para tlapitzas,
huajca panos nochi nopa tlamantli tlen Toteco huejcajquiya quinilhui
itlatequipanojcahua, nopa tiocamanalohuani, para teipa panosquía.”
\p
\v 8 Huan sampa nijcajqui tlen achtohui nechcamahui tlen elhuicac,
huan yajaya nechilhui: “Xiya huan xijcuiti nopa amatlapohuali tlen
tlapojtoc imaco nopa elhuicac ejquetl tlen moquetza ipan hueyi atl
huan ipan tlali.”
\p
\v 9 Huajca niyajqui campa elhuicac ejquetl huan nijtlajtlani ma
nechmaca nopa amatlapohuali pilsiltzi. Huan yajaya nechilhui:
“Xijcui huan xijcua. Huan ipan mocamac tijmatis tzopelic queja
nectli, pero quema tijtolos, tijmatis para chichic ipan moijti.”
\p
\v 10 Huajca niquitzqui nopa amatlapohuali pilsiltzi tlen imaco
elhuicac ejquetl huan nijcuajqui. Huan eltoya tzopelic ipan nocamac
queja nectli, pero ipan noijti mochijqui chichic.
\v 11 Huan sampa nechilhui: “Monequi tiyas tiquinilhuis tlacame
tlen Toteco mitzilhuis para teipa panos huan tlen ininpantis tlacame
tlen quipiyaj sesen tlamantli inintlalnamiquilis huan
inincostumbres, huan tlen itztoque ipan miyac tlaltini huan tlen
camatij miyac tlamantli tlajtoli huan inintlanahuatijcahua.”
\c 11
\s Nopa ome testigos tlen Toteco
\p
\v 1 Huan nechmacaque se ohuatl tlen nesqui queja se cuatopili para
ica ma nitlayejyecohua, huan nopa elhuicac ejquetl nechilhui: “Xiya
huan xijyejyecoti ihuehueyaca ihueyi tiopa Toteco huan itlaixpa.
Huan xiquinpohua quesqui tlacame tlen quihueyimatij Toteco nepa.
\v 2 Pero amo xijyejyeco nopa calixpamitl tlen mocahua nopa se
lado ihueyi tiopa. San xijcahua, pampa ya nopa quinmacatoc sejcoyoc
ehuani. Huan ipan moquejquetzase nopa altepetl tlatzejtzeloltic para
eyi xihuitl huan tlajco.
\v 3 Huan niquinmacas tequihuejcayotl nopa ome notestigos huan
camatise queja tiocamanalohuani para eyi xihuitl huan tlajco. Huan
moquentise ininyoyo tlen cuesoli.”
\p
\v 4 Ni ome testigos, inijuanti nopa cuatini tlen olivos huan nopa
ome tlahuil quetzali tlen moquetzaj iixpa Toteco tlen quinahuatía
tlaltepactli.
\v 5 Huan intla se acajya quinequi quincocos nopa testigos,
inincamaco quisas tlitl tlen quintlamitlatis inincualancaitacahua.
Queja nopa miquise tlen quinequise quinmictise.
\v 6 Yajuanti quipiyase chicahualistli para quitzacuase elhuicac
para ma ax huetzi atl nochi nopa tonali quema quinilhuise tlacame
nochi nopa tlajtoli tlen Toteco quinmacas pampa itztoque
itiocamanalojcahua. Nojquiya quipiyase chicahualistli para
quichihuase nochi atl ma mocuepa estli. Huan quipiyase
chicahualistli para quititlanise nochi tlamantli tlaijiyohuilistli
tlen más fiero ipan tlaltepactli. Huan ya nopa huelise quichihuase
nochi hueltas quema quinequise quichihuase.
\p
\v 7 Huan quema nopa ome testigos tlamise camatij para Toteco,
quintehuis nopa fiero tlapiyali tlen quisas ipan nopa ostotl tlen
tlahuel huejcatla hasta ax quipiya itzintla. Huan nopa fiero
tlapiyali quintlanis huan quinmictis.
\v 8 Huan inintlacayo tepejtose callejtipa ipan nopa hueyi altepetl
Jerusalén campa tlacame quicuamapeloltijque Tohueyiteco. Huan ipan
nopa tonali nopa altepetl eltos fiero queja altepetl Sodoma huan
queja tlali Egipto.
\v 9 Huan nochi xinachtli tlacame, huan nochi tlacame tlen quipiyaj
sesen tlamantli inintlalnamiquilis huan inincostumbres, huan tlen
camatij nochi tlamantli tlajtoli, huan tlen ehuaj ipan nochi
tlaltini quiitase inintlacayo nopa mijcatzitzi para eyi tonali huan
tlajco. Huan axaca quicahuilise para ma quintlalpachoca.
\v 10 Huan nochi tlacame tlen iaxcahua ni tlaltepactli paquise, huan
ilhuichihuase huan momajmacase regalos, pampa ya mictose nopa ome
testigos tlen camatiyayaj para Toteco huan quintlaijiyohuiltiyayaj.
\v 11 Pero ica eyi tonati huan tlajco Toteco quinchihuas nopa ome
tlayolmelahuani ma moyolcuica sampa huan moquetzase. Huan tlahuel
momajmatise nochi tlen quinitase.
\v 12 Huan nopa ome testigos quicaquise se tlen quinnotzas tlen
elhuicac, huan quinilhuis: “Xihualaca nica huejcapa.” Huan
tlejcose elhuicac ipan se mixtli, huan inincualancaitacahua noja
quintlachilijtose.
\v 13 Huan ipan nopa hora chicahuac mojmolinis tlali ipan nopa
altepetl huan huetzise se parte ipan sesen majtlactli partes ipan
nopa altepetl huan chicnahui mocahuase. Huan chicome mil tlacame
miquise quema mojmolinis tlali. Huan tlen ax miquise tlahuel
momajmatise huan quihueyichihuase Toteco tlen itztoc elhuicac.
\p
\v 14 Ya panoc nopa ompa tlamantli tlen fiero huan tlen temajmati.
Xiquita nopa expa tlamantli tlen fiero nimantzi ajsis.
\s Nopa chicompa tlapitzali quihualica nopa expa tlamantli tlen fiero
\p
\v 15 Huan nopa chicompa elhuicac ejquetl tlapitzqui huan nijcajqui
miyaqui tlen itztoyaj ipan elhuicac tlen tzajtzique chicahuac, huan
quiijtojque:
\q “Ama nochi tlaltepactli mochijtoc iaxca Toteco Dios huan iaxca
Cristo para ma quinahuatis.
\q Huan yajaya tlanahuatis para nochipa huan ax quema tlamis.”
\m
\v 16 Huan nopa sempoali huan nahui huehue tlacame tlen mosehuíaj
ipan ininsiyas yejyectzitzi iixpa Toteco motlancuaixtlapachojque
huan quihueyimatque Toteco Dios.
\v 17 Huan quiijtojque:
\q “Timitzhueyitlascamatij Toteco Dios tlen tijpiya nochi
chicahualistli.
\q Ta tiitztoya hasta quema ipejya nochi tlen onca huan ama tiitztoc
huan noja tiitztos para nochipa.
\q Timitztlascamatij pampa ama ta tijcuitoc mochicahualis tlen
nelhueyi huan ya pejqui titlanahuatía.
\q
\v 18 Tlahuel mitzcocolíaj tlacame ipan nochi tlaltini tlen ax
mitzneltocaj,
\q huan ama ajsic tonal para ta tiquincocolis huan
tiquintlatzacuiltis.
\q Ya ajsic hora para ta, Toteco,
\q tiquintlajtolsencahuas tlen mictoque.
\q Ya ajsic hora tiquintlaxtlahuis motiocamanalojcahua tlen
mitztequipanohuayayaj,
\q huan motlacajhua tlen tiquinchijtoc tlatzejtzelolme.
\q Huan tiquintlaxtlahuis nochi tlacame tlen mitztlepanitaj tlen
huejhueyi tlacame hasta tlen pilsiltzitzi.
\q Huan ajsic hora para tiquintzontlamiltis inijuanti tlen
tlaxolehuayayaj ipan tlaltepactli.”
\p
\v 19 Huan niquitac tlapojtoya ihueyi tiopa Toteco tlen eltoc nepa
elhuicac. Huan nepa calijtic nesqui nopa caxa tlen quipixqui nopa
tlajtolsencahuali tlen Toteco quichijqui ica itlacajhua
huejcajquiya. Huan tlapetlaniyaya, huan tlahuelchihuayaya, huan
tlatomoniyaya, huan mojmoliniyaya tlali, huan huetziyaya huejhueyi
tesihuitl.
\c 12
\s Nopa sihuatl huan nopa dragón
\p
\v 1 Huan nepa elhuicac nesqui se hueyi tlanescayotl, se sihuatl
tlen moquimilijtoya ica tonati huan quipixtoya metztli tlatzintla
iicxi. Ipan itzonteco quipixtoya se corona ica majtlactli huan ome
sitlalime.
\v 2 Huan nopa sihuatl conehue eltoya huan tzajtziyaya chicahuac
pampa pejqui quicocohua chicahuac para quitlacatiltis icone.
\v 3 Huan nimantzi niquitac seyoc tlanescayotl tlen nesqui nepa
elhuicac, se fiero tlapiyali tlen nesiyaya queja se hueyi dragón
tlen chichiltic. Quipixtoya chicome itzonteco, huan majtlactli
icuacua, huan se corona quitlalijtoya ipan sesen itzontecohua.
\v 4 Huan icuitlapil quintepexihui se ipan eyi sitlalime tlen
elhuicac huan quinmajcajqui ipan tlaltepactli. Huan nopa dragón
moquetzqui iixtla nopa sihuatl tlen quitlacatiltisquía icone para
huelis quicualilisquía icone quema tlacatisquía.
\v 5 Huan nopa sihuatl quitlacatilti se oquichpil tlen quipiyas
itequi para chicahuac quinnahuatis nochi tlacame tlen nochi tlaltini
queja se tlen tlanahuatía ica se tepos barra imaco para ica
quincocos tlen ax quitlepanitaj. Huan Toteco quitlalanqui nopa icone
hasta elhuicac campa ihueyi siyaj tlen yejyectzi para ma itztos nepa
ihuaya.
\v 6 Huan nopa sihuatl cholo hasta nopa tlali tlen tlahuel huactoc
campa ax tleno eli campa Toteco quisencajtoya se lugar para ma
mocahua huan ma quimocuitlahuis para eyi xihuitl huan tlajco.
\p
\v 7 Huan teipa oncac se tlatehuijcayotl nepa ipan elhuicac. Huan
nopa tlayacanca elhuicac ejquetl, Miguel, huan nopa elhuicac ehuani
tlen yajaya quinyacanayaya motehuijque ihuaya nopa dragón huan
ielhuicac ejcahua tlen mocueptoyaj ajacame.
\v 8 Pero nopa dragón huan iajacahua ax quipixtoyaj chicahualistli
queja ielhuicac ejcahua Toteco huan ayoc huelque itztose ipan
elhuicac.
\v 9 Huan ielhuicac ejcahua Toteco quicuamajcajque nopa dragón
ininhuaya nochi iajacahua hasta ipan tlaltepactli. Nopa hueyi
dragón, yajaya tlen itoca Axcualtlacatl o nopa Yohualnenquetl, huan
yajaya tlen mocuepqui nopa cohuatl huejcajquiya ipan nopa xochi
mili. Yajaya tlen quincajcayahua nochi tlacame tlen itztoque campa
hueli ipan tlaltepactli.
\p
\v 10 Huan nijcajqui se tlen tzajtziyaya chicahuac tlen elhuicac
huan quiijtohuayaya:
\q “Ya mochijtoc.
\q Toteco ya quinmaquixtijtoc itlacajhua.
\q Ya nestoc ichicahualis Toteco Dios huan nelía cuajcualtzi nochi
campa yajaya tlanahuatía.
\q Ya nesqui itequihuejcayo Cristo yajaya tlen quitlapejpenijtoya
Toteco,
\q pampa quicuamajcajtoque tlatzintla Axcualtlacatl tlen
quinteilhuiyaya toicnihua.
\q Yajaya elqui tlen quinteilhuiyaya toicnihua iixpa Toteco yohuali
huan tonali.
\q
\v 11 Huan itlacajhua Toteco quitlantoque Axcualtlacatl ica ieso
nopa Pilborregojtzi tlen quitoyajqui quema mijqui,
\q huan pampa ax quiimacasiyayaj quinilhuise tlacame itlajtol.
\q Quena, quitlanque Axcualtlacatl pampa ax majmajque para miquise
pampa itztoyaj iaxcahua nopa Pilborregojtzi.
\q
\v 12 Huajca ama ma paquica nochi tlen itztoque elhuicac.
\q Pero ipan tlaltepactli tlahuel temajmati para nochi tlacame tlen
itztoque ipan tlali huan ipan hueyi atl,
\q pampa ya ajsico nopa Axcualtlacatl imohuaya.
\q Yajaya nelía mocualancamaca pampa quimati ax polihui miyac
tonali para Toteco quitlajtolsencahuas.”
\p
\v 13 Huan quema nopa dragón quiitac para quimajcajtoyaj ipan
tlaltepactli, quitoquili nopa sihuatl tlen quitlacatilti nopa
oquichpil.
\v 14 Pero Toteco quimacac nopa sihuatl ome ieltlapal queja nopa
hueyi cuajtli quipiya para ma mochololti hasta nopa huactoc tlali
campa ax tleno eli. Nepa Toteco quisencajtoya ajqueya
quimocuitlahuis para eyi xihuitl huan tlajco para nopa dragón ax
hueli quiajsis.
\v 15 Huan nopa dragón quichijqui para ma quisa atl icamaco tlen
mochijqui se atemitl tlen chicahuac tlatilana. Huan nopa atl
quitoquili nopa sihuatl para ma quihuicasquía huan
quiisahuiltisquía.
\v 16 Pero tlaltepactli quipalehui nopa sihuatl huan motlapo huan
quitolo nopa atl tlen quisqui icamaco nopa hueyi dragón.
\v 17 Huajca nopa hueyi dragón nelía cualanqui ihuaya nopa sihuatl
huan yajqui quintehuito nopa sequinoc iconehua, quinequi quiijtos
nochi sequinoc tlacame tlen quintoquilíaj itlanahuatilhua Toteco
huan quinilhuíaj tlacame para inijuanti iaxcahua Jesucristo.
\c 13
\s Ome fiero tlapiyalime
\p
\v 1 Huan ipan nopa tlanextili queja se temictli tlen niquitayaya,
nimoquetzayaya ipan xali iteno ipan hueyi atl huan niquitac se fiero
tlapiyali tlen tlejcoyaya tlen nopa hueyi atl. Huan quipixtoya
chicome itzonteco huan majtlactli icuacua huan ipan sesen nopa
majtlactli icuacua quipixtoya se corona. Huan ipan sesen
itzontecohua ijcuilijtoya itoca tlen fiero ica tlen quitelchihuayaya
Toteco.
\v 2 Ni fiero tlapiyali tlen niquitac nesqui queja nopa tecuani tlen
itoca leopardo. Huan iicxihua nesqui queja iicxihua se oso, huan
icamac nesqui queja icamac se león. Huan nopa hueyi dragón
quimacac tlen ya iselti ichicahualis nopa fiero tlapiyali, huan
quicahuili ma tlanahuati ipan ihueyi siyaj huan quimacac miyac
tequihuejcayotl.
\v 3 Huan niquitac para tlahuel quicocojtoyaj se itzonteco nopa
fiero tlapiyali hasta tlanempa nesiyaya para ica ya nopa
mictosquía. Pero nesqui queja teipa pachijqui nopa cocotl. Huan
quema tlacame quiitaque pachijqui campa quicocojtoyaj huan ica tlen
mictoya, nochi quisentlachilijque huan pejque quitoquilíaj nopa
fiero tlapiyali.
\v 4 Huan tlacame quihueyimatque nopa hueyi dragón tlen quimacac
itequihuejcayo nopa fiero tlapiyali. Huan nojquiya quihueyimatque
nopa fiero tlapiyali huan quiijtojque: “Axaca seyoc quipiya
chicahualistli queja ni fiero tlapiyali. Axaca hueli moquetza iixtla
para quitehuis.”
\p
\v 5 Huan quimacaque nopa fiero tlapiyali tequihuejcayotl ma camati
queja se tlacatl. Huan camatqui para mohueyimatis huan para
quitelchihuas Toteco. Huan quipixqui caquihuili para quichihuas tlen
quinejqui para eyi xihuitl huan tlajco.
\v 6 Huajca quiijto tlen hueli tlen Toteco Dios, huan ihueyi tiopa
huan nochi tlen itztoque ipan elhuicac. Huan quintelchijqui ica
tlajtoli tlen más fiero.
\v 7 Huan nopa fiero tlapiyali quipixqui tequihuejcayotl para
quintehuis huan quintlanis itlatzejtzeloltijca tlacajhua Toteco.
Huan quimacac tequihuejcayotl ica nochi xinachtli tlacame, huan ica
tlacame tlen quipiyaj sesen tlamantli inintlalnamiquilis huan
inincostumbres, huan ica tlacame tlen camatij nochi tlamantli
tlajtoli huan ica tlen ehuani nochi tlaltini.
\v 8 Huan nochi tlen itztoque ipan tlaltepactli quihueyimatque nopa
fiero tlapiyali queja yajaya elisquía Dios. Quena, quihueyimatise
nochi tlacame tlen inintoca ax ijcuilijtoc hasta quema pejqui
tlaltepactli ipan nopa amatlapohuali tlen iaxca nopa Pilborregojtzi,
pampa nopa Amatlapohuali Tlen Nopa Pilborregojtzi Tlen Quimictijque
quipiya inintoca nochi tlacame tlen quipiyase yolistli para nochipa.
\p
\v 9 Nochi inquipiyaj imonacas, huajca xijtlacaquilica ni tlajtoli
huan xijmachilica:
\q
\v 10 “Tlacame tlen quintocaros para yase ipan tlatzactli,
\q quinhuicase ipan tlatzactli.
\q Tlacame tlen quintocaros para miquise, quinmictise.
\q Pero amo ximocuesoca,
\q imojuanti tlen initlatzejtzeloltijca tlacajhua Toteco.
\q Ipan ni tonali monequi inquipiyase imoyolo huan xiitztoca
intemachme.”
\p
\v 11 Huan ipan nopa tlanextili niquitac seyoc fiero tlapiyali tlen
quisayaya tlalijtic. Yajaya quipixqui ome icuacua queja se
pilborregojtzi, pero camatqui queja nopa hueyi dragón.
\v 12 Huan nopa ompa fiero tlapiyali quipixtoya nochi itequihuejcayo
nopa achtohui fiero tlapiyali huan tequitic iixtla. Huan nopa ompa
fiero tlapiyali tlanahuati para nochi tlacame campa hueli ipan
tlaltepactli ma quihueyimatica nopa achtohui fiero tlapiyali queja
elisquía Dios, quinequi quiijtos nopa achtohui fiero tlapiyali tlen
quicocojtoyaj huan monejqui mictosquía, pero teipa pachijqui icoco.
\v 13 Huan nopa ompa fiero tlapiyali huelis quichihuas huejhueyi
tlanescayotl huan chicahualis nescayotl. Huan quichihuas ma huetzis
tlitl tlen elhuicac hasta tlaltepactli quema tlacame quitlachilíaj.
\v 14 Huan nopa ompa fiero tlapiyali quincajcayahuas nochi tlacame
tlen itztoque ipan tlaltepactli ica nopa tlanescayotl tlen quipiya
tequihuejcayotl para quichihuas quema itztoc iixtla nopa achtohui
fiero tlapiyali. Huan nopa ompa fiero tlapiyali quinnahuatis nochi
tlacame tlen itztoque ipan tlaltepactli ma quichihuaca se
tlaixcopincayotl tlen nesis queja nopa achtohui fiero tlapiyali tlen
quicocojtoyaj ica machete huan mictosquía, pero teipa queja
moyolcuic.
\v 15 Huan huajca nopa ompa fiero tlapiyali quipixqui chicahualistli
para quimacas yolistli nopa tlaixcopincayotl huan para huelqui
camati. Huan nopa tlaixcopincayotl tlanahuati ma quinmictica nochi
tlacame tlen ax quinejque quihueyimatise ya queja elisquía Dios.
\v 16 Huan nopa tlaixcopincayotl nojquiya quinmacac nochi tlacame se
machiyotl ipan inincuaixpa o ipan ininnejmatl. Quinmacac nochi
tlacame tlen huejhueyi huan tlen pilsiltzitzi. Quinmacac tlen
tlapijpixtoque huan tlen teicneltzitzi. Quinmacac tlen
tlatequipanohuani tlen iniaxca inintecohua huan tlen ax quipixtoyaj
ininteco. Nechca nochi tlacame quiselise nopa machiyotl,
\v 17 pampa axaca huelis tlacohuas o tlanamacas intla ax quipiyas
nopa machiyotl, o itoca nopa fiero tlapiyali o nopa número tlen
quiijtosnequi itoca.
\v 18 Ya ni monequi tlalnamiquistli para inquimachilise huan
inquimatise quesqui quisa nopa número tlen quiijtosnequi nopa fiero
tlapiyali. Pampa inúmero eltoc inúmero se tlacatl huan inúmero
eltoc 666.
\c 14
\s Inintiohuica nopa 144,000 tlacame
\p
\v 1 Nijtlachili huan niquitac nopa Pilborregojtzi moquetzayaya ipan
Tepetl Sion huan ihuaya moquetzayayaj ciento cuarenta y cuatro mil
tlacame tlen quipixtoyaj itoca nopa Pilborregojtzi huan itoca iTata
ijcuilijtoc ipan inincuaixpa.
\v 2 Huan nijcajqui se tlamantli ipan elhuicac tlen eltoya queja
caquisti miyac atl tlen motlalohua chicahuac. Elqui queja miyac
tlatomonilotl, o queja quema miyac tlacame tlatzotzonaj ipan arpas
san sempa.
\v 3 Nochi inijuanti huicayayaj se tiohuicatl tlen yancuic iixtla
nopa hueyi siyaj tlen Toteco huan iniixtla nopa nahui tlamantli tlen
yoltoque huan nopa sempoali huan nahui huehue tlacame. Huan axaca
más huelqui huicas nopa tiohuicatl. San nopa ciento cuarenta y
cuatro mil tlacame tlen Toteco quinmaquixtijtoya ininmaco inijuanti
tlen fierojtique ipan tlaltepactli.
\v 4 Yajuanti itztoyaj yoltlapajpactique queja cuali ichpocame tlen
aya quiixmatij se tlacatl. Huan nopa tlacame quitoquilíaj nopa
Pilborregojtzi campa hueli campa yohui. Toteco quincojqui huan
quinmaquixti ni tlacame tlen nopa sequinoc ipan tlaltepactli para ma
elica queja nopa tlen achtohui elise iniaxcahua Toteco huan nopa
Pilborregojtzi.
\v 5 Axaca huelis quinteilhuis para istlacatitoque o
tlacajcayajtoque pampa ax quichijque. Itztoque queja se tlapiyali
para tlacajcahualistli para Toteco tlen ax tleno ax cuali quipiya.
\s Eyi elhuicac ehuani
\p
\v 6 Huan niquitac seyoc elhuicac ejquetl tlen patlantinemiyaya
tlatlajco elhuicactli huan quihuicayaya itlajtol Toteco tlen nochipa
quipiya chicahualistli. Huan yajqui campa hueli para quinilhuis
tlacame tlen itztoque ipan tlaltepactli itlajtol. Yajqui ipan nochi
tlaltini, huan ipan nochi xinachtli tlacame, huan hasta tlacame tlen
camatij nochi tlajtoli, huan tlacame tlen quipiyaj sesen tlamantli
inintlalnamiquilis huan inincostumbres.
\v 7 Huan nopa elhuicac ejquetl tzajtzic chicahuac huan quiijto:
“Xiquimacasica Toteco. Xijhueyichihuaca pampa ya ajsic hora para
yajaya quintlajtolsencahuas nochi tlacame. Xijhueyimatica yajaya
tlen quichijqui elhuicactli huan tlaltepactli, nopa hueyi atl huan
nochi ameli.”
\p
\v 8 Huan seyoc elhuicac ejquetl quitoquili huan yajaya tzajtziyaya:
“Ya huetztoc. Huetzqui nopa hueyi altepetl Babilonia. Nopa
Babilonia ehuani itztoque tlen quinnextilijque nochi sequinoc
tlaltini ehuani ma quintoquilica inintlamachtil, huan ma quichihuaca
tlen fiero huan quinhueyichihuase totiotzitzi huan tlen ax neli
Dios.”
\p
\v 9 Huan seyoc elhuicac ejquetl, nopa expa, quintoquili huan
chicahuac tzajtziyaya: “Intla se tlacatl quinhueyimatis nopa fiero
tlapiyali huan itlaixcopincayo, o intla quiselis imachiyo ipan
icuaixpa o ipan ima,
\v 10 temachtli Toteco quitlatzacuiltis ica nochi ichicahualis.
Quena, quitlatzacuiltis ica nochi icualancayo, huan niyon se ax
huelis cholos tlen itlatzacuiltil. Tlen quihueyimati nopa fiero
tlapiyali tlaijiyohuise ipan nopa tlitl tlen onpano hueyi huan
tlahuel chicahuac pampa lemeni ica azufre iniixtla nopa
tlatzejtzeloltijca elhuicac ehuani huan iixtla nopa Pilborregojtzi.
\v 11 Huan para nochipa tlejcos nopa poctli tlen quisas campa
tlaijiyohuíaj huan ax quema tlamis. Huan nopa tlacame tlen
quihueyimatque nopa fiero tlapiyali huan itlaixcopincayo, huan
quiselijque imachiyo o itoca, ax quema mosiyajcahuase yohuali huan
tonali para nochipa.”
\v 12 Huajca pampa inquimatij tlen quinchiya tlen ax iaxcahua
Toteco, imojuanti tlen initlatzejtzeloltijca tlacajhua monequi
inquiijiyohuise nochi tlen inmechpanotihuala huan inquipiyase
imoyolo. Amo xijcaxanica xijchihuaca tlen itlanahuatilhua Toteco
techilhuíaj huan ximotemachica ipan Jesús.
\p
\v 13 Huan nijcajqui se ipan elhuicac tlen nechilhui ma niquijcuilo
ni tlajtoli: “Paquilistli para tlacame tlen miquise ama huan teipa
tlen motlatzquilijtoque ipan Toteco.” Huan Itonal Toteco
quiijtohua: “Quena, paquilistli pampa tlanquiya nochi nopa
tlaijiyohuilistli tlen quinpanoyayaj. Huan nochi nopa cuali
tlamantli tlen quichijtinenque momatise ipan elhuicac, huan Toteco
quintlaxtlahuis.”
\s Nopa pixquistli tlen tlaltepactli
\p
\v 14 Nijtlachili sampa huan niquitac se mixtli tlen chipahuac huan
ipani mosehuiyaya yajaya tlen Mocuepqui Tlacatl. Huan quipixqui se
corona tlen oro ipan itzonteco huan quihuicayaya se hueyi tepostli
tlen tlatequi queja quitequihuíaj para quipixcaj trigo.
\v 15 Huan seyoc elhuicac ejquetl quisqui ipan ihueyi tiopa Toteco
huan chicahuac quinotzqui yajaya tlen mosehuiyaya ipan mixtli, huan
quiilhui: “Xijcalaqui motepos queja quichihua se trigo pixcaquetl
huan xijtzontequi nopa pixquistli ipan tlaltepactli, pampa ya
chicajtoc huan ya ajsic hora.”
\v 16 Huan yajaya tlen mosehuiyaya ipan mixtli quipanoltili itepos
huan quitzontejqui nopa pixquistli ipan tlaltepactli.
\p
\v 17 Huan seyoc elhuicac ejquetl quisqui tlen ihueyi tiopa Toteco
nepa elhuicac huan nojquiya quipixtoya se tepostli tlen tlatequi
para ica pixcas.
\v 18 Huan teipa seyoc elhuicac ejquetl quisqui campa tlaixpamitl,
yajaya tlen quipixqui tlanahuatili ica tlitl. Huan chicahuac
quinotzqui nopa elhuicac ejquetl tlen quipixqui nopa tepostli para
pixcas. Quiilhui: “Xijtequihui motepos tlen tlatequi huan xijtequi
nopa xocomecatl itlajca tlen eltoc ipan tlaltepactli, pampa ya
icsitoc. Quena, ajsic hora para titetlatzacuiltis.”
\p
\v 19 Huan nopa elhuicac ejquetl quipanolti itepos tlen tlatequi
ipan tlaltepactli huan quisejcotili tlen elqui queja xocomecatl
itlajca ipan tlaltepactli huan quimajcajqui ipan nopa hueyi ostotl
campa quipatzcase para quiquixtise iayo, pampa ajsic hora para
Toteco tlahuel quintlatzacuiltis tlacame.
\v 20 Huan nejnentinenque ipan nopa xocomecatl itlajca para
quipatzcase campa nopa hueyi ostotl iteno nopa altepetl. Huan quema
Toteco tetlatzacuiltiyaya, estli quisqui campa quipatzcayaya. Huan
nopa estli ajsic hasta ipan ininteposcamachal cahuayojme huan
moxoyajqui queja se atemitl tlen yajqui para tres cientos
kilómetros.
\c 15
\s Nopa chicome tlaijiyohuilistli tlen fiero
\p
\v 1 Huan niquitac seyoc hueyi tlanescayotl nepa elhuicac huan
nelía temajmati. Niquinitac chicome elhuicac ehuani tlen
quipixtoyaj chicome tlamantli tlaijiyohuilistli tlen fiero. Huan ica
ni chicome tlamantli tlaijiyohuilistli quitlamiltis icualancayo
Toteco ica tlacame.
\p
\v 2 Huan niquitac tlen elqui queja se hueyi atl neltzalantic. Elqui
queja tescatl maneltic ica tlitl. Huan moquetzayayaj ipan nopa hueyi
atl tlen tescatl nochi nopa tlacame tlen quintlanque nopa fiero
tlapiyali huan itlaixcopincayo, huan ax quiselijtoyaj nopa número
tlen quinescayoti itoca. Nopa tlacame quipixtoyaj arpas tlen Toteco
quinmacac.
\v 3 Huan huicayayaj se tiohuicatl queja tlen Moisés,
itlatequipanojca Toteco, huicatoya. Huan huicayayaj para nopa
Pilborregojtzi, huan quiijtojque:
\q “Tlahuel hueyi huan cuajcualtzi nochi tlen ta tijchihua, Toteco
Dios.
\q Ta Tlen Tijpiya Nochi Chicahualistli.
\q Xitlahuac huan temachtli nochi moojhui.
\q Ta tiTlanahuatijquetl tlen nochi tlaltini.
\q
\v 4 Axaca tlen ax quiimacasis para mitzixpanos, Tohueyiteco.
\q Nochi mitzhueyichihuase pampa san ta titlatzejtzeloltic.
\q Quena, nochi tlacame tlen nochi tlaltini hualase moixtla huan
mitzhueyimatise,
\q pampa quiitztoque para san tlen xitlahuac tijchijtoc.”
\p
\v 5 Huan teipa nijtlachili huan niquitac tlapojtoc ihueyi tiopa
Toteco nepa elhuicac. Huan tlapojtoya calijtic nopa cuarto Campa
Más Tlatzejtzeloltic campa quipixqui nopa tlajtoli tlasencahuali
tlen Toteco quichijqui ica tlacame.
\v 6 Huan nopa chicome elhuicac ehuani tlen quipixtoyaj nopa chicome
tlaijiyohuilistli tlen fiero quisque ihueyi tiopa Toteco
moyoyontijtoque ica ininyoyo chipahuac huan tlen tlahuiyaya. Huan
moilpilijtoque ininyolixpa ica inintzinquechilpijcayo tlen oro.
\v 7 Huan se tlen nopa nahui tlamantli tlen yoltoque quinmajmacac
nopa chicome elhuicac ehuani chicome caxitl tlen oro temitoc ica
ihueyi cualancayo Toteco Dios tlen itztoc para nochipa huan ax quema
tlamis para itztos.
\v 8 Huan nochi ihueyi tiopa Toteco temic ica poctli tlen itlatlanex
huan ichicahualis Toteco. Huan axaca huelqui calaqui calijtic ipan
ihueyi tiopa Toteco hasta nopa chicome elhuicac ehuani
quitlamitoyajtosquíaj nopa chicome tlaijiyohuilistli tlen fiero
ipan tlaltepactli.
\c 16
\s Nopa chicome caxitl ica tlatzacuiltilistli
\p
\v 1 Huan nijcajqui se tlen tzajtziyaya tlen itiopa Toteco huan
quinilhuiyaya nopa chicome elhuicac ehuani: “Xiyaca ama huan
xiquixcuepatij ipan tlaltepactli nopa chicome caxitl tlen quipiyaj
ihueyi cualancayo Toteco.”
\p
\v 2 Huajca nopa achtohui elhuicac ejquetl yajqui huan quiixcuepato
icaxi ipan tlaltepactli, huan ipan nochi tlacame tlen quiselijtoyaj
imachiyo nopa fiero tlapiyali huan tlen quihueyimatque
itlaixcopincayo. Huan quisqui ininpani miyac fiero cocome tlen
tlahuel tecoco.
\p
\v 3 Huan teipa nopa ompa elhuicac ejquetl quiixcuepqui icaxi ipan
hueyi atl. Huan nopa hueyi atl mocuepqui estli, queja ieso se
mijcatzi tlen onmijqui. Huan nochi tlen itztoyaj ipan hueyi atl
mijque.
\p
\v 4 Huan nopa expa elhuicac ejquetl quiixcuepqui icaxi ipan nochi
atemitl, atentli huan ameli, huan nochi mocuepqui estli.
\v 5 Huan nijcajqui nopa elhuicac ejquetl tlen quipixtoya
tequihuejcayotl ipan atl, huan yajaya quiijto:
\q “Toteco, ta tiitztoc ama huan nochipa ipa tiitztoya.
\q Ta tlen senquistoc titlatzejtzeloltic.
\q Nelía tixitlahuac quema titetlajtolsencahua.
\q Huan xitlahuac ni tlatzacuiltilistli tlen titemacac.
\q
\v 6 Pampa nopa fiero tlacame quitoyajtoque inieso
motlatzejtzeloltijca tlacajhua,
\q huan ama tiquinmacatoc estli para ma quiica nojquiya.
\q Ya ni tlen quinamiqui.”
\p
\v 7 Huan nijcajqui se tlen camatqui tlen tlaixpamitl huan quiijto:
\q “Quena, Toteco Dios Tlen Tijpiya Nochi Chicahualistli,
\q xitlahuac titetlajtolsencahua huan quinamiqui nopa
tlatzacuiltilistli tlen titemaca.”
\p
\v 8 Huan nopa najpa elhuicac ejquetl quiixcuepqui icaxi ipan tonati
huan quichijqui tonati ma quintlatis tlacame queja elqui se tlitl.
\v 9 Huan tonati tlahuel quintlatiyaya nochi tlacame ipan
tlaltepactli. Huan quitelchijque Toteco ica tlajtoli más fiero
pampa quintlatzacuiltijtoya ica ni tlaijiyohuilistli tlen fiero.
Pero ax quinejque moyolcuepase tlen inintlajtlacolhua huan ax
quihueyichijque Toteco.
\p
\v 10 Huan nopa macuilpa elhuicac ejquetl quiixcuepqui icaxi ipan
isiyaj campa nopa fiero tlapiyali mosehuiyaya para tlanahuatis. Huan
nochi nopa tlaltini tlen yajaya quinahuatiyaya tzintlayohuac. Huan
nochi nopa tlaltini ehuani tlen yajaya quinnahuatiyaya monenepil
tlanquechijque pampa tlahuel tlaijiyohuiyayaj.
\v 11 Huan quitelchijque huan quitlaijilhuijque Toteco tlen itztoc
ipan elhuicac ica tlajtoli tlen más fiero pampa quinchihuilijtoya
ma tlaijiyohuica huan ma quipiyaca nopa fiero cocome, pero ax
quinejque moyolpatlase, niyon ax quicajtejque tlen fiero
quichihuayayaj.
\p
\v 12 Teipa nopa chicuasempa elhuicac ejquetl quiixcuepqui icaxi
ipan nopa hueyi atemitl tlen itoca Éufrates, huan nopa atemitl
huajqui. Huan nepa campa eltoya nopa atemitl mochijqui se ojtli para
ipan ajsise tlanahuatiani tlen hualase ica ininsoldados tlen nopa
tlaltini campa quisa tonati.
\p
\v 13 Huan niquinitac eyi fiero ajacame tlen nesque queja
xocuelechime. Se quisaco icamaco nopa hueyi dragón, huan se icamaco
nopa fiero tlapiyali, huan se icamaco nopa istlacatijca
tiocamanalojquetl.
\v 14 Huan nopa eyi huelque quichihuaj tlanescayotl huan
chicahualnescayotl. Nopa eyi ajacame yohuij campa hueli ipan nochi
tlaltepactli para quinsentilise tlanahuatiani ininhuaya ininsoldados
ipan nopa hueyi tonal quema pehuas nopa hueyi tlatehuijcayotl ica
Toteco Tlen Quipiya Nochi Chicahualistli.
\p
\v 15 Xiquilnamiquica tlen quiijtohua Jesús: “Xiquitaca na
nihualas quema ax innechchiyaj queja quema ajsi se tlaxtejquetl.
Paquilistli para nopa tlacame tlen tlachixtose huan tlen nemij
cuali, huan quimocuitlahuíaj ininyoyo chipahuac para ax monequi
nemise xolome, huan mopinahuase quema tlacame quinitase.”
\p
\v 16 Huan nochi nopa tlanahuatiani huan ininsoldados mosentilise
ipan se lugar tlen itoca Armagedón ica tlajtoli hebreo.
\p
\v 17 Teipa nopa chicompa elhuicac ejquetl quiixcuepqui icaxi ipan
ajacatl tlen tlacame quiijiyotilanaj. Huan se tzajtzic chicahuac
tlen isiyaj Toteco ipan ihueyi tiopa ipan elhuicac huan quiijto:
“Ya quitlamichijtoc.”
\p
\v 18 Huan pejqui tlapetlani, huan tlahuelchihua, huan tlatomoni.
Huan teipa chicahuac mojmolini nochi tlaltini campa hueli ipan
tlaltepactli queja ax quema panotoc tlen quema tlacame achtohui
pejque itztose ipan tlaltepactli.
\v 19 Huan nopa hueyi altepetl tlen Babilonia tlapanqui huan excac
moitac. Huan sequinoc altepetini campa hueli ipan miyac tlaltini
nojquiya huetzque. Huan Toteco quiilnamijqui nochi itlajtlacolhua
nopa hueyi altepetl Babilonia huan nopa tlacame nepa, huan tlahuel
quintlatzacuilti. Quena, quinajsic ihueyi cualancayo.
\v 20 Huan nochi piltlaltzitzi tlatlajco ipan hueyi atl temoque
atzintla. Huan nochi tepeme campa hueli temoque huan ayoc nesque.
\v 21 Huan teipa pejqui huetzi tlen elhuicac huejhueyi tesihuitl
ipan tlacame huan sesen tesihuitl quipixtoya cuarenta kilos ietica.
Huan nochi tlacame quitelchijque huan quitlaijilhuijque Toteco ica
tlajtoli tlen más fiero pampa quintitlanilijtoya nopa tesihuitl
tlen tlahuel quincocojtoya.
\c 17
\s Quitlatzacuilti nopa momecatijca sihuatl
\p
\v 1 Huan se tlen nopa chicome elhuicac ehuani tlen quiixcueptoyaj
nopa chicome caxitl ipan tlaltepactli, nechcamahuico huan nechilhui:
“Xihuala nica huan nimitznextilis nopa tlatzacuiltilistli tlen
quiajsis altepetl Babilonia tlen mosehuía ipan miyac hueyi atl huan
tlen itztoc queja se fiero momecatijca sihuatl.
\v 2 Eltoc queja nochi tlanahuatiani ipan tlaltepactli momecatijque
ihuaya huan quicajtejtoque Toteco. Eltoc queja nopa altepetl
quinmacatoc nochi tlacame ipan tlaltepactli se tlaili para
moihuintise ihuaya huan ihuaya quinhueyichihuase miyac tlamantli
totiotzitzi tlen ax neli Dios queja yajaya quichihua.”
\p
\v 3 Huan elqui queja nopa elhuicac ejquetl quihuicac notonal ihuaya
hasta nopa huactoc tlali campa ax tleno eli. Huan queja ipan se
temictli niquitac se sihuatl tlen mosehuiyaya ipan se fiero
tlapiyali chichiltic tlen quipixtoya chicome itzonteco huan
majtlactli icuacua. Huan ipan itlacayo nopa fiero tlapiyali tlami
ijcuilijtoc nochi tlamantli tlajtoli tlen más fiero para ica
quitelchihuas huan ica quitlaijilhuis Toteco.
\v 4 Huan nopa sihuatl moquentijtoya iyoyo moradojtic huan
chichiltic tlen tlahuel patiyo. Huan motlalilijtoya costli, anillos,
maquechcostli huan pijpiloli tlen oro, perlas huan piltetzitzi tlen
tlahuel patiyo. Huan imaco nopa sihuatl quipixqui se caxitl tlen oro
tlen temitoc ica nochi tlamantli tlajtlacoli tlen quichijtoya huan
nochi tlamantli tlajtoli tlen más fiero tlen ica quitelchijtoya
huan quitlaijilhuijtoya Toteco pampa tlahuel quimatqui
tlajtlacolchihua.
\v 5 Huan ipan icuaixpa quipixtoya se tocaitl ijcuilijtoc tlen
quiijtosnequi se tlamantli ixtacatzi pampa quinescayotía se
tlamantli. Nopa itoca elqui: “Nopa hueyi Babilonia, ininnana nochi
tlen momecatijtoque ica totiotzitzi, huan nochi tlen fiero tlen
Toteco Dios ax quinequi quiitas ipan tlaltepactli.”
\v 6 Huan niquitac para ihuintitoc nopa sihuatl pampa quiitoya
inieso itlatzejtzeloltijca tlacajhua Toteco huan quinmictijtoya nopa
tlacame pampa quinilhuiyayaj sequinoc tlen Jesús.
\p Huan quema niquitac nopa sihuatl, nijsentlachili miyac.
\v 7 Huan elhuicac ejquetl nechilhui: “¿Para tlen tijsentlachili?
Nimitzilhuis tlen ax tijmachilía tlen nopa sihuatl huan nopa
tlapiyali tlen quipiya chicome itzonteco huan majtlactli icuacua
tlen quimamajtihuala nopa sihuatl pampa quipiya tlen quinescayotía.
\v 8 Nopa fiero tlapiyali tlen tiquitac achtohui yoltoya huan ama
ayoc yoltoc. Pero teipa sampa tlejcos tlen nopa ostotl tlen tlahuel
huejcatla hasta ax quipiya itzintla. Huan teipa yas campa Toteco
quitlatzacuiltis para nochipa. Onca se amatlapohuali tlen hasta
quema aya pehuayaya tlaltepactli ya quipixtoya ijcuilijtoc inintoca
nochi tlacame tlen quipiyaj yolistli yancuic para nochipa. Pero
tlacame tlen ax quipiyaj inintoca ipan nopa amatlapohuali huan tlen
quitoquilíaj tlen eltoc ipan ni tlaltepactli mosentlachilise quema
sampa monextis nopa tlapiyali tlen itztoya, huan ama ayoc itztoc,
huan teipa sampa itztos.
\p
\v 9 “Xijmachilica ya ni tlen intlalnamiquij. Nopa chicome
itzonteconhua nopa fiero tlapiyali quiijtosnequi nopa chicome tepeme
tlen ipan mosehuía ni sihuatl para tlanahuatis.
\v 10 Nojquiya nopa tepeme quinescayotíaj chicome tlanahuatiani.
Macuilti nopa tlanahuatiani ya mictoque, se ama tlanahuatía huan
seyoc noja polihui tlanahuatis. Huan quema hualas yajaya tlen noja
polihui, san tlanahuatis para se quesqui tonali.
\v 11 Nopa fiero tlapiyali tlen itztoya huan mijqui, yajaya nojquiya
itztos nopa chicuexpa tlanahuatijquetl, yonque nojquiya itztoya se
tlen nopa achtohui chicome. Yajaya teipa yas campa Toteco
quitlatzacuiltis.
\p
\v 12 “Huan nopa majtlactli icuacua tlen tiquitac quiijtosnequi
majtlactli tlanahuatiani tlen noja polihui tlanahuatise. Yajuanti
quiselise campa tlanahuatise huan tlanahuatise ihuaya nopa fiero
tlapiyali para se tlalochtli.
\v 13 Ica san se inintlalnamiquilis moilhuise para quimacase
ininchicahualis huan inintequihuejcayo nopa fiero tlapiyali.
\v 14 Huan teipa inijuanti ica nopa fiero tlapiyali quitehuise nopa
Pilborregojtzi. Pero nopa Pilborregojtzi quintlanis pampa yajaya
nopa Dios tlen más hueyi que nochi tlen tlacame quintocajtíaj
dioses. Yajaya nopa Tlanahuatijquetl tlen más hueyi que nochi
tlanahuatiani. Huan itlacajhua tlen itztoque ihuaya nopa
Pilborregojtzi itztoque tlen Toteco quintlapejpenijtoc huan
quinnotztoc, huan inijuanti temachme.”
\p
\v 15 Huan elhuicac ejquetl nechilhui: “Nopa miyac huejhueyi atl
tlen ipan tiquitac mosehuiyaya nopa momecatijca sihuatl
quiijtosnequi para yajaya quinnahuatis miyac tlacame tlen hualahuij
ipan nochi xinachtli tlacame, huan tlacame tlen quipiyaj sesen
tlamantli inintlalnamiquilis huan inincostumbres, huan tlen itztoque
ipan nochi tlaltini, huan tlen camatij miyac tlamantli tlajtoli.
\v 16 Huan nopa fiero tlapiyali huan nopa majtlactli icuacua tlen
tiquitac quinescayotía tlanahuatiani tlen tlanahuatise ihuaya. Huan
nochi quicocolise nopa momecatijca sihuatl. Yajuanti quitlamicocose
huan quicahuase sosoltic huan xolotic. Elis queja quicuase inacayo
huan quitlamitlatise tlen mocahuas.
\v 17 Pampa Toteco quintlalilis ipan ininyolo nopa majtlactli
tlanahuatiani para ma quimacaca inintequihuejcayo nopa fiero
tlapiyali, huan yeca panos tlen Toteco quinequi ma pano.
\v 18 Huan nopa sihuatl tlen tiquitac yajaya nopa hueyi altepetl
tlen quinnahuatía nochi tlanahuatiani ipan tlaltepactli.”
\c 18
\s Huetzis altepetl Babilonia
\p
\v 1 Quema tlanqui nochi ya ni, niquitac seyoc elhuicac ejquetl tlen
temoyaya tlen elhuicac, huan yajaya quipixqui hueyi tequihuejcayotl.
Huan yajaya tlahuiyaya hasta quimacac tlahuili ipan tlaltepactli.
\v 2 Huan tzajtzic chicahuac huan quiijto:
\q “Ya huetzqui nopa hueyi altepetl Babilonia.
\q Nepa san elis ininchaj ajacame tlen fierojtique.
\q Quena, fiero tonalme itztose ipan tlatzactli nepa.
\q Huan nochi totome tlen ax cuali huan tlen tlacame quincocolíaj
quichihuase inintepasol campa eltoya nopa altepetl.
\q
\v 3 Pampa tlacame ipan nochi tlaltini quiselijtoque itlamachtil
para fiero quichihuase iixpa Toteco.
\q Nochi tlanahuatiani ipan tlaltepactli momecatijtoque ihuaya huan
quicajtejtoque Dios para quinhueyimatise totiotzitzi queja yajaya
quinnextili.
\q Miyac tlanamacani tlen campa hueli ipan tlaltepactli
moricojchijtoque pampa nopa altepetl Babilonia ehuani quinequiyayaj
senquistoc nochi tlamantli tlen onca.”
\q
\v 4 Huan teipa nijcajqui seyoc tlen camatqui tlen elhuicac huan
quiijto:
\q “Huajca innotlacajhua, pampa inquimatij para huetzis nopa
altepetl, ama xiquisaca ipan ya.
\q Xiquisaca para ax inquichihuase nopa tlajtlacoli tlen quichihuaj
tlen nepa ehuaj,
\q huan para ax inquiselise nopa fiero tlaijiyohuilistli tlen nepa
ehuani quiselise.
\q
\v 5 Tlahuel tlajtlacolchijtoque Babilonia ehuani huan
inintlajtlacolhua ajsitoc hasta elhuicac.
\q Huan Toteco quiilnamiqui nochi inintlaixpanolhua.
\q
\v 6 Toteco, xijmaca Babilonia tlen fiero,
\q san se queja yajaya quinchihuilijtoc tlen fiero motlacajhua.
\q Xijcuepili ompa tlen yajaya quinchihuilijtoc sequinoc.
\q Xijsencahuili se fiero tlatzacuiltilistli ica ompa nopa
tlaijiyohuilistli tlen yajaya quinmacac sequinoc.
\q
\v 7 Yajaya tlahuel mohueyimatiyaya huan tlahuel quinequiyaya nochi
tlen onca,
\q huajca ama xijchihua ma tlahuel tlaijiyohui huan ma tlahuel
choca.
\q Babilonia quiijto ipan iyolo:
\q ‘Nica nimosehuijtoc queja se sihua tlanahuatijquetl.
\q Ax niitztoc queja se cahuali tlen teicneltzi.
\q Huan ax quema hualas se tonal quema nitlaijiyohuis.’
\q
\v 8 Yeca, pampa quiijto nopa, ica san se tonal ajsis ipan nopa
altepetl ehuani se tlaijiyohuilistli tlen fiero.
\q Oncas choquistli, mayantli huan miquistli.
\q Ipan nopa tonal nopa altepetl tlatlas pampa Toteco Dios Tlen
Quipiya Nochi Chicahualistli quitlajtolsencahuas.”
\p
\v 9 Huan nopa tlanahuatiani ipan tlaltepactli tlen momecatijque
ihuaya, huan ihuaya quihuejcamajcajque Toteco, huan ihuaya
quinequiyayaj nochi tlen onca, quiitase nopa poctli quema tlatlas
nopa altepetl, huan chocase, huan tlahuelchihuase.
\v 10 Mohuejcaquetzase pampa quiimacasise nopa tlatzacuiltilistli
tlen quiajsic, huan quiijtose:
\q “¡Teicnelti, teicnelti ne hueyi altepetl Babilonia tlen
quipixtoya chicahualistli!
\q ¡Pampa ipan san se hora ajsic itlatzacuiltilis!”
\p
\v 11 Huan tlanamacani tlen ehuaj campa hueli ipan tlaltepactli
chocase huan tlahuejchihuase pampa ya tlamixoletos nopa altepetl
huan ayoc aqui nepa quincohuilis inintlamamal.
\v 12 Babilonia ehuani quicohuayayaj miyac tlamamali tlen oro, huan
tlen plata, huan perlas huan piltetzitzi tlen patiyo. Quicohuayayaj
yoyomitl tlen senquistoc lino, huan tlen moradojtic, huan tlen
chichiltic huan tlen seda. Quicohuayayaj marfil, mármol,
tiocuahuitl huan miyac tlamantli cuahuitl tlen patiyo. Huan
quicohuayayaj tepostli tlen cobre huan tlen hierro.
\v 13 Nojquiya quicohuayayaj tlamamali tlen canela, tlacualpajyotl
huan miyac tlamantli copali. Quicohuayayaj tlaajhuiyacayotl tlen
itoca mirra, olíbano, vino tlaili, aceite, harina tlen más cuali,
huan trigo. Nojquiya quincohuayayaj huacaxme, borregojme,
cahuayojme, tlatehuijca carros huan tlacame. Quena,
quinfuerzajhuiyayaj tlacame ma quintequipanoca san tlapic.
\v 14 Huan nopa tlanamacani mocuesose pampa ayoc aca niyon se
Babilonia ejquetl. Huan quiijtose:
\q “Nochi nopa tlamantli tlen tlahuel patiyo tlen más
inquitlasomatque, ya tlanqui.
\q Nochi imotomi huan tlen tlahuel cuajcualtzi inquipixtoyaj,
\q inquipolojtoque huan ayoc quema inquipiyase sampa pampa ayoc
initztoque.”
\p
\v 15 Nopa tlanamacani tlen quintlanamaquiltiyayaj Babilonia ehuani
nopa tlamantli huan tlen moricojchijtoque ica inintomi,
quihuejcatlachilise pampa quiimacasise inintlaijiyohuilis. Huan nopa
tlanamacani chocase huan tlahuelchihuase,
\v 16 huan quiijtose:
\q “¡Teicnelti, teicnelti ne hueyi altepetl Babilonia huan
itlacajhua!
\q Elqui nelía yejyectzi queja se sihuatl tlen moquentiyaya se nopa
cuali yoyomitl tlen moradojtic o tlen chichiltic.
\q O elqui queja se sihuatl tlen moyecchijchihua ica tlamantli tlen
oro,
\q huan perlas huan ica nopa piltetzitzi tlen patiyo tlen tlahuía.
\q
\v 17 Pero ica san se hora ya tlanqui nochi iricojyo tlen
quipixtoya.
\q ¡Nochi ya xolejtoc!”
\p Huan mohuejcaquetzase nochi axcame tlen huejhueyi cuaacaltini,
huan nochi tlayacanani tlen quinnemiltiyayaj, huan nochi tlen
tlapalehuiyayaj, huan nochi tlacame tlen monequi nemise ipan hueyi
atl para yase quitlanitij tomi.
\v 18 Nochi mohuejcaquetzase huan chocase quema quiitase ipocyo nopa
altepetl Babilonia tlen tlatla huan quiijtose: “Ax oncayaya se
altepetl queja ni altepetl.”
\v 19 Huan chocase huan mocuatlaltemise para quiixnextise
inincuesol. Tzajtzise huan quiijtose:
\q “¡Teicneltique, teicneltique tlen ehuayaya nopa hueyi altepetl
Babilonia!
\q Techricojchijtoque ica inintomi nochi tojuanti tlen tijpixtoque
huejhueyi cuaacaltini,
\q huan ica san se hora nochi tlen quipixque tlanqui.”
\q
\v 20 Pero ma paquica nochi tlen itztoque ipan elhuicac pampa ya
xolejqui.
\q Nojquiya xipaquica nochi imojuanti tlen initlatzejtzeloltijca
tlacajhua Toteco,
\q huan initlayolmelajcahua huan initiocamanalojcahua.
\q Xipaquica pampa Toteco quintlajtolsencajqui nopa altepetl ehuani
ipampa nochi tlen inmechchihuilijtoyaj.
\p
\v 21 Huan teipa se elhuicac ejquetl tlen quipixqui miyac
chicahualistli quicuic se hueyi tetl queja se hueyi metlatl huan
quimajcajqui ipan hueyi atl. Huan yajaya tzajtzic huan quiijto:
\q “Queja ayoc nesi ni tetl tlen nijcuamajcajtoc ipan hueyi atl,
\q ayoc nesis nopa hueyi altepetl Babilonia pampa Toteco quixolehuas
huan ayoc quema aca quiitas.
\q
\v 22 Nepa axaca quicaquisoc tlen tlatzotzonas ipan arpa.
\q Niyon axaca huicas,
\q niyon axaca quipitzas flauta,
\q niyon tlapitzali ipan nopa altepetl.
\q Axaca tequitis nepa,
\q niyon axaca tisis.
\q
\v 23 Ayoc oncas niyon se tlahuili ipan nopa altepetl,
\q niyon ayoc oncas nopa paquilistli nepa tlen oncac quema oncayaya
se nenamictili.
\q Nochi ya ni panos pampa nopa tlanamacani ipan nopa altepetl tlen
eliyayaj más huejhueyi ipan tlaltepactli quimatque tetlajchihuíaj.
\q Huan ica inintetlajchihuil quincajcayajque tlen ehuaj ipan nochi
tlaltini.”
\p
\v 24 Babilonia ehuani nojquiya quihuicaj tlajtlacoli iixpa Toteco
pampa quinmicti itiocamanalojcahua huan itlatzejtzeloltijca
tlacajhua. Babilonia ehuani quinmictijtoque itlacajhua Toteco campa
hueli ipan nochi tlaltepactli.
\c 19
\p
\v 1 Teipa niquincajqui tlahuel miyac tlacame nepa elhuicac tlen
quiijtohuayayaj:
\q “¡Hueyi paquilistli!
\q Toteco techmaquixtijtoc.
\q San yajaya tlen quipiya nochi hueyitilistli huan nochi
chicahualistli.
\q Ma tijnextilica nochi tlatlepanitacayotl para nochipa.
\q
\v 2 Yajaya tetlajtolsencahua temachtli huan xitlahuac.
\q Quintlatzacuiltijtoc tlen ehuayayaj nopa altepetl Babilonia tlen
itztoyaj queja se momecatijquetl tlen tlahuel quintlajtlacolmacac
nochi tlacame ipan tlaltepactli.
\q Quinnextiliyayaj ma quihuejcamajcahuaca Toteco.
\q Toteco quicuepilijtoc nopa fiero sihuatl pampa quinmicti
itlatequipanojcahua.”
\p
\v 3 Huan sampa nopa miyac tlacame quiijtojque:
\q “¡Hueyi paquilistli!
\q Toteco ya quixolejqui nopa altepetl huan ipocyo tlejcos para
nochipa.”
\p
\v 4 Huan teipa nopa sempoali huan nahui tlayacanani huan nopa nahui
tlamantli tlen yoltoque motlancuaixtlapachojque huan quihueyimatque
Toteco tlen mosehuía ipan nopa hueyi siyaj huan quiijtojque:
“¡Queja nopa ma eli! ¡Ma tijpaquilismacaca Toteco!”
\p
\v 5 Huan nijcajqui seyoc tlen hualcamatqui tlen nechca nopa hueyi
siyaj huan quiijto:
\q “Ma tijpaquilismacaca Toteco Dios nochi tojuanti tlen
tijtlepanitaj huan tlen tiitlatequipanojcahua.
\q Yonque tihuejhueyi tlacame o tipilsiltzitzi,
\q nochi ma tijpaquilismacaca Toteco.”
\s Nopa tlacualistli tlen nenamictili tlen nopa Pilborregojtzi
\p
\v 6 Huan nijcajqui tlen caquistic queja itztoyaj miyac tlacame tlen
camatiyayaj,
\q huan tlen caquistic queja miyac atl tlen ajcahuaca,
\q o caquistic queja tlatomoni chicahuac.
\q Huan nochi san sejco quiijtohuayayaj:
\q “¡Hueyi paquilistli!
\q Tohueyiteco Dios tlanahuatía,
\q Quena, tlanahuatía Toteco Tlen Quipiya Nochi Chicahualistli.
\q
\v 7 Ma tipaquica huan ma tijpaquilismacaca huan ma tijhueyimatica.
\q Ya ajsic hora para nopa nenamictili tlen nopa Pilborregojtzi. Ya
mocualchijchijtoc isihua.
\q
\v 8 Huan quimacatoc ma moquenti tlen más cuali yoyomitl tlen
chipahuac huan neltlapajpactic hasta tlahui.
\q Nopa cuali yoyomitl tlen chipahuac quinescayotía nochi nopa
tlamantli tlen cuali tlen quichijtoque itlatzejtzeloltijca tlacajhua
Toteco.”
\p
\v 9 Huan nopa elhuicac ejquetl nechilhui ma niquijcuilo: “Nelía
paquij nopa tlacame tlen Toteco quinnotztoc ma yaca campa nopa
tlacualistli tlen nenamictili tlen nopa Pilborregojtzi.”
\p Huan nechilhui: “Ni tlajtoli nelía melahuac pampa ni tlajtoli
hualajqui tlen Toteco.”
\p
\v 10 Huan nimotlancuaixtlapacho iixtla para nijhueyimatisquía nopa
elhuicac ejquetl. Huan yajaya nechilhui: “Amo xinechhueyimati. Na
nojquiya nijtequipanohua Toteco queja ta huan moicnihua tlen
inquitoquilíaj Jesús. San Toteco xijhueyimati. Quema Toteco
quinmaca itiocamanalojcahua tlajtoli tlen tlamantli tlen teipa panos
para ma quinpohuilica sequinoc, quichihua para tlacame ma
quihueyichihuaca Jesús quema nopa tlamantli panose.”
\s Yajaya tlen ipan mosehuis nopa cahuayo chipahuac
\p
\v 11 Huan niquitac tlapojtoc elhuicac huan moquetzayaya nepa se
cahuayo chipahuac. Huan yajaya tlen ipan tlejcotoya quinescayotía
Tohueyiteco huan quipixqui itoca: Tlen Temachtli huan Melahuac. Quej
nopa quitocajtíaj pampa tetlajtolsencahua huan tetlalilía nopa
tlatzacuiltili tlen xitlahuac, huan quintehuía tlen ax cuajcualme.
\v 12 Huan iixtiyol tlen tlejcotoya eltoya queja tlilelemectli huan
ipan itzonteco quipixtoya miyac coronas tlen quinextía
itequihuejcayo. Huan ipani ijcuilijtoc se tocaitl tlen axaca
quimachilía tlaque quiijtosnequi, san ya quimati.
\v 13 Huan moquentiyaya se iyoyo huehueyac tlen quixolonijtoya ica
estli huan yajaya itoca: Itlajtol Toteco.
\v 14 Huan quitoquiliyayaj nochi soldados tlen elhuicac huan
tlejcotoyaj ipan cahuayojme tlen chipahuaque. Huan nopa soldados
moquentiyayaj ininyoyo tlen más cuali, huan tlen chipahuac huan
tlapajpactic.
\v 15 Huan yajaya tlen tlayacanayaya quipixtoya se huehueyac
tlamintli tlen tlatequi tlen quisayaya icamaco para ica quinmaquilis
tlacame ipan nochi tlaltini. Huan chicahuac yajaya quinnahuatis
tlacame. Huan queja se tlacatl chicahuac ipan moquejquetza
xocomecatl itlajca para quiquixtilis iayo, queja nopa yajaya ininpan
moquejquetzas tlacame. Quena, Toteco Tlen Quipiya Nochi
Chicahualistli tlahuel cualantoc ica tlacame huan quintlatzacuiltis
ica tlen más fiero.
\v 16 Ipan iyoyo nopa tlayacanquetl huan ipan imetztomahuiya
ijcuilijtoya itoca: “Tlanahuatijquetl tlen nochi tlanahuatiani huan
ninopa Dios tlen más nihueyi que nochi tlen tlacame quintocajtíaj
‘dioses’.”
\p
\v 17 Huan niquitac se elhuicac ejquetl tlen moquetzayaya ipan
tonati tlen quintzajtziliyaya totome huan quinilhuiyaya: “Nochi
intotome tlen inpatlantinemij ipan elhuicactli, xihualaca pampa
Toteco inmechsencahuilis se hueyi tlacualistli.
\v 18 Xihualaca, xijcuaquij ininnacayo tlanahuatiani. Xijcuaquij
ininnacayo ininsoldados huan inintlayacancahua tlen más quimatque
tlatehuíaj. Xijcuaquij ininnacayo cahuayojme huan tlen ininpan
tlejcotoyaj. Quena, xijcuaquij ininnacayo nochi tlamantli tlacame;
sequin itztoyaj tlatequipanohuani huan sequinoc axtle. Sequin
itztoyaj huejhueyi tlacame huan sequin axtle.”
\p
\v 19 Huan teipa niquitac nopa fiero tlapiyali quinsentiliyaya nochi
tlanahuatiani ipan tlaltepactli ica ininsoldados para quitehuise
Tohueyiteco tlen tlejcotoc ipan icahuayo chipahuac huan para
quintehuise isoldados tlen quitoquiliyayaj.
\v 20 Huan tlen tlejcotoya ipan nopa cahuayo chipahuac quiitzqui
nopa fiero tlapiyali huan nopa istlacatica tiocamanalojquetl, huan
quincuamajcajqui ipan nopa tlitl tlen onpano hueyi. Nopa istlacatica
tiocamanalojquetl elqui tlen quichijqui chicahualnescayotl iixtla
nopa fiero tlapiyali huan quincajcayajtoya nochi tlacame tlen
quiselijque nopa machiyotl tlen nopa fiero tlapiyali huan tlen
quihueyimatque itlaixcopincayo. Huan nochi ome quincuamajcajqui noja
yoltoque ipan nopa tlitl tlen onpano hueyi huan lemeni ica azufre.
\v 21 Huan tlen tlejcotoc ipan nopa cahuayo chipahuac quinmicti
nochi sequinoc tlen quitehuiyayaj ica nopa huehueyac tlamintli tlen
quisqui icamaco. Huan nochi totome tlamiixhuique ica ininnacayo nopa
mijcatzitzi.
\c 20
\s Se mil xihuitl quema Cristo tlanahuatis
\p
\v 1 Huan niquitac se elhuicac ejquetl tlen temoyaya tlen elhuicac
ica illaves nopa ostotl tlen tlahuel huejcatla hasta ax quipiya
itzintla. Huan nojquiya quipixtoya imaco se hueyi tepos cadena.
\v 2 Huan quiitzqui nopa hueyi dragón, yajaya nopa cohuatl tlen
huejcajquiya, yajaya tlen itztoc nopa Yohualnenquetl huan nopa
Axcualtlacatl. Huan quiilpi ica tepos cadenas huan quitzajqui para
se mil xihuitl.
\v 3 Huan nopa elhuicac ejquetl quicuamajcajqui nopa Axcualtlacatl
ipan nopa ostotl tlen tlahuel huejcatla hasta ax quipiya itzintla.
Huan quitzajqui nopa ostotl huan quitlalili se sello para ax huelis
quisas huan ayoc huelis quincajcayahuas tlacame ipan campa hueli
tlaltini hasta tlamis nopa mil xihuitl. Quema tlamis nopa mil
xihuitl, huajca quimalacanis nopa Axcualtlacatl para se tlalochtli.
\p
\v 4 Huan niquitac miyac siyas tlen yejyectzitzi queja para
tlanahuatiani huan tlen ininpan mosehuiyayaj quipixtoyaj
tequihuejcayotl para tetlajtolsencahuase. Nojquiya niquinitac
inialma nopa tlacame tlen quinquechtzontectoyaj pampa quinilhuiyayaj
sequinoc tlen Jesús huan itlajtol Toteco. Yajuanti itztoyaj tlen ax
quihueyichijque nopa fiero tlapiyali, niyon itlaixcopincayo. Ax
quiselijtoyaj imachiyo ipan inincuaixpa, niyon ipan ininma. Huan
nochi nopa tlacame moyolcuique huan tlanahuatijque ihuaya Cristo
para se mil xihuitl.
\v 5 Ni nopa tlacame tlen achtohui moyolcuise. Pero nopa sequinoc
tlen mictoque ax moyolcuise hasta tlamis nopa mil xihuitl.
\v 6 Tlatiochihualme huan tlatzejtzeloltique nopa tlacame tlen
achtohui moyolcuise. Nopa ompa miquistli campa nopa hueyi tlitl ax
tleno hueli quinchihuilis. Yajuanti elise totajtzitzi para Toteco
huan Cristo. Huan nochi nopa tlacame tlanahuatise ihuaya Cristo para
mil xihuitl.
\p
\v 7 Quema ya tlantos nopa mil xihuitl, quitlapose campa tzactoc
Axcualtlacatl huan quicahuilis ma quisa.
\v 8 Huan nopa Axcualtlacatl yas quincajcayahuati tlacame ipan nochi
tlaltini ipan tlaltepactli. Quincajcayahuas itlacajhua Gog huan
Magog para ma mosentilica huan quitehuise Toteco. Quena,
quinsentilis tlahuel miyac tlacame hasta itztose queja imiyaca xali
iteno hueyi atl.
\v 9 Huan nopa miyac tlacame hualase tlen campa hueli tlali huan
quiyahualoquij campa mocahuaj itlatzejtzeloltijca tlacajhua Toteco
huan nopa altepetl Jerusalén tlen Toteco quiicnelía. Huan nimantzi
huetzis tlitl tlen elhuicac huan quintzontlamiltis nochi nopa
soldados tlen ajsicoj para quitehuise Toteco.
\v 10 Huan Toteco quimajcahuas nopa Axcualtlacatl tlen tecajcayajqui
ipan nopa tlitl tlen onpano hueyi huan lemeni ica azufre. Nepa
mocahuas Axcualtlacatl ihuaya nopa fiero tlapiyali huan nopa
istlacatica tiocamanalojquetl. Huan inijuanti tlaijiyohuise nepa
yohuali huan tonali para nochipa huan ax quema tlamis
inintlaijiyohuilis.
\s Toteco tetlajtolsencahuas tlen ihueyi siyaj tlen chipahuac
\p
\v 11 Huan niquitac se hueyi siyaj tlen chipahuac huan Toteco
mosehuiyaya nepa. Huan iixtla ya polijqui tlaltepactli huan nochi
tlen eltoya ipan elhuicactli huan ayoc mopanti ipan niyon se lugar.
\v 12 Huan niquinitac nochi mijcatzitzi tlen huejhueyi huan
pilsiltzitzi moquetztoyaj iixtla nopa hueyi siyaj. Huan quintlapo
nochi amatlapohuali. Huan quitlapo seyoc amatlapohuali tlen quitlapo
quipixqui inintoca tlacame tlen itztose para nochipa. Huan Toteco
quintlajtolsencajqui nochi nopa mijcatzitzi ica tlen ijcuilijtoc
ipan nopa sequinoc amatlapohuali pampa quipixque nochi tlen
quichijtoyaj.
\v 13 Huan itztoyaj nepa nochi mijcatzitzi tlen mictoyaj ipan tlali
huan quintlalpachojque huan nochi tlen mijque ipan hueyi atl. Huan
itztoyaj nochi inialma tlen itztoyaj campa tlitl. Huan Toteco
quintlajtolsencajqui nochi queja nopa tlamantli tlen quichijtoyaj
ipan tlaltepactli.
\v 14 Huan nochi nopa mijcatzitzi ininhuaya inialmas tlen achtohui
mocahuayayaj campa tlitl, quincuamajcajque ipan nopa tlitl tlen
onpano hueyi. Huan nopa tlitl tlen onpano hueyi eltoc nopa ompa
miquistli.
\v 15 Quena, nochi tlacame tlen ax quipixque inintoca ijcuilijtoc
ipan nopa amatlapohuali tlen quiijtohua ajqueinijuanti quipiyaj
yolistli yancuic para nochipa quincuamajcajque ipan nopa tlitl tlen
onpano hueyi.
\c 21
\s Yancuic elhuicactli huan yancuic tlaltepactli
\p
\v 1 Huan niquitac se yancuic elhuicactli huan se yancuic
tlaltepactli pampa nopa achtohui elhuicactli huan nopa achtohui
tlaltepactli panotejqui huan nojquiya polijqui nochi hueyi atl.
\v 2 Huan na niJuan niquitac nopa altepetl tlatzejtzeloltic, nopa
yancuic Jerusalén temoyaya tlen elhuicac campa Toteco. Elqui nelía
yejyectzi queja se ichpocatl tlen mocualtlalijtoc para ihuehue.
\v 3 Huan nijcajqui se tlen tzajtzic chicahuac tlen nopa hueyi siyaj
huan quiijto: “Xiquitaca ama Toteco Dios mochanti ininhuaya
itlacajhua huan yajaya mocahuas ininhuaya. Yajuanti itztose
itlacajhua huan Toteco iselti itztos ininhuaya queja ininTeco.
\v 4 Huan Toteco quinhuachilis nochi iniixayo. Huan ayoc quema aqui
miquis, niyon mocuesos, niyon chocas, niyon mococos pampa ya panotos
nochi ni tlamantli tlen achtohuiya eltoya ipan nopa achtohui
tlaltepactli.”
\p
\v 5 Huan Toteco tlen mosehuía ipan nopa hueyi siyaj tlen yejyectzi
quiijto: “Xiquita, na nijchijchihuas yancuic nochi tlen onca.”
\p Huan yajaya nechilhui: “Xiquijcuilo ni pampa ni tlajtoli
temachtli huan melahuac.”
\p
\v 6 Huan teipa nechilhui: “Eltojca. Na niitztoc queja nopa letra A
huan nopa letra Z. Na niipejya huan niitlamiya nochi tlen onca.
Nochi tlacame tlen amiquij ipan ininyolo, niquincahuilis ma atlica
ipan nopa ameli tlen temaca yolistli yancuic para nochipa huan ax
monequi quiixtlahuase para nopa atl.
\v 7 Nochi tlacame tlen quitlanise tlen ax cuali quiselise nochi ni
tlatiochihualistli tlen nimechilhuijtoc nicani. Huan na nielis
niininTeco, huan inijuanti elise noconehua.
\v 8 Pero para tlacame tlen quiimacasij tlaijiyohuise huan
nechhuejcamajcahuaj, huan tlen ax quinequij quineltocase notlajtol,
huan tlen fiero inintlalnamiquilis, huan tlen temictíaj, huan tlen
momecatíaj, huan tlen tetlajchihuíaj, huan tlen quinhueyimatij
totiotzitzi, huan tlen tlacajcayahuaj; nochi inijuanti yase ipan
nopa tlitl tlen onpano hueyi huan lemeni ica azufre. Ya ni nopa ompa
miquistli.”
\s Nopa yancuic Jerusalén
\p
\v 9 Huan hualajqui se tlen nopa chicome elhuicac ehuani tlen
achtohuiya quipixtoyaj nopa chicome caxitl ica nopa chicome
tlaijiyohuilistli tlen fiero, huan nopa elhuicac ejquetl nechilhui:
“Xihuala nohuaya huan nimitznextilis nopa ichpocatl, yajaya tlen
isihua nopa Pilborregojtzi.”
\p
\v 10 Huan nopa elhuicac ejquetl quihuicac notonal queja ipan se
temictli hasta se tepetl tlen nelía huejcapantic huan nechnextili
nopa tlatzejtzeloltic altepetl, Jerusalén, tlen temoyaya tlen
elhuicac campa Toteco.
\v 11 Huan temitoya ica itlatlanex Toteco huan tlahuiyaya queja se
piltetzi tlen nelía patiyo; elqui senquistoc tzalantic huan
tlahuiyaya queja nopa piltetzi tlen itoca jaspe.
\v 12 Huan nopa yancuic altepetl Jerusalén quipixtoya se tepamitl
tlen patlahuac huan huejcapantic tlen quiyahualo. Huan nopa altepetl
quipixtoya majtlactli huan ome puertas. Huan sesen puerta quipixqui
se elhuicac ejquetl tlen quimocuitlahuiyaya sesen puerta. Huan ipan
nopa puertas ijcuilijtoc inintoca nopa majtlactli huan ome
itelpocahua Israel tlen huejcajquiya itztoyaj huan tlen ica
quipehualti nopa familias tlen israelitame.
\v 13 Huan eltoya eyi puertas ica campa quisa tonati, huan eyi ica
norte, huan eyi ica sur, huan eyi ica campa calaqui tonati.
\v 14 Huan ipan itzinpehualtil nopa tepamitl tlen quiyahualo nopa
altepetl eltoya majtlactli huan ome huejhueyi tetini huan ininpani
ijcuilijtoc inintoca nopa majtlactli huan ome itlayolmelajcahua nopa
Pilborregojtzi.
\p
\v 15 Huan nopa elhuicac ejquetl tlen nechcamahui quipixtoya imaco
se huehueyac ohuatl tlen oro para ica quitlamachihuas nopa altepetl,
huan ipuertas, huan nopa tepamitl tlen quiyahualo.
\v 16 Huan quema quitlamachijqui, quipanti nopa altepetl eltoya
cuadradojtic. Ihuehueyaca eltoya san se queja ipatlajca. Huan yajaya
quitlamachijqui quesqui ihuexca huan quipixtoya dos mil doscientos
kilómetros. Huan ihuehueyaca huan ipatlajca huan ihuejcapanca
eltoya san se.
\v 17 Huan quitlamachijqui itepa tlen quiyahualtzajqui nopa altepetl
huan quipixtoya sesenta y cinco metros ininpatlajca queja
totlatlamachihual titlacame tlen nopa elhuicac ejquetl
quitequihuiyaya.
\p
\v 18 Huan nopa tepamitl eltoya nochi tetl yejyectzitzi tlen itoca
jaspe. Huan nopa altepetl quichijchijtoya ica senquistoc oro tlen
nesqui queja se tescatl tlapajpactic.
\v 19 Huan nopa tetini tlen ica quitzinpehualtijtoyaj itepa nopa
altepetl quipixtoya sequinoc tetini tlen tlahuel patiyo calactoc
iniijtico para ica quicualchijchijtoque. Huan nopa achtohui tetl
ipan itzintlapehualtil eltoya jaspe, huan nopa ompa zafiro, huan
nopa expa ágata, huan nopa najpa esmeralda,
\v 20 huan nopa macuilpa ónice, huan nopa chicuasempa cornalina,
huan nopa chicompa crisólito, huan nopa chicuexpa berilo, huan nopa
chicnajpa topacio, huan nopa majtlacpa crisopraso, huan nopa
majtlactli huan sempa jacinto, huan nopa majtlactli huan ompa
amatista.
\v 21 Huan nopa majtlactli huan ome puertas eltoya majtlactli huan
ome perlas tlen huejhueyi. Huan sesen puerta eltoya san se perla
hueyi. Huan icalle nopa altepetl eltoya senquistoc oro tlen nesqui
queja tescatl tlen tzalantic.
\p
\v 22 Huan ax niquitac se tiopamitl ipan nopa altepetl pampa Toteco
Dios Tlen Quipiya Nochi Chicahualistli huan nopa Pilborregojtzi,
inijuanti itiopa nopa altepetl.
\v 23 Huan ipan nopa altepetl ax monejqui tonati, niyon metztli para
quitlahuilis pampa inintlatlanex Toteco huan nopa Pilborregojtzi
quitlahuilía.
\v 24 Huan tlacame tlen momaquixtijtoyaj huan hualajtoyaj tlen nochi
tlaltini ipan tlaltepactli nejnemise ipan itlahuil nopa altepetl.
Huan nochi tlanahuatiani ipan tlaltepactli calaquise ipan nopa
altepetl huan quimactilise ininhueyitilis huan nochi
inintlatlepanitacayo.
\v 25 Huan ax quema motzacuas ipuerta quema tlayohua pampa ax quema
oncas yohuali nepa.
\v 26 Huan nochi xinachtli tlacame tlen itztoyaj ipan nochi tlaltini
quihuicase nepa nochi tlen cuajcualtzi tlen quipiyaj, huan
quihuicase nochi inintlatlepanitacayo para quimactilise Toteco.
\v 27 Huan ax tleno tlen ax cuali calaquis nepa. Niyon ax calaquis
tlen tlacajcayahua o quichihuaj tlen Toteco ax quinequi quiitas. San
itztose ipan nopa altepetl nopa tlacame tlen quipixque inintoca
ijcuilijtoc ipan nopa amatlapohuali tlen nopa Pilborregojtzi tlen
quipiya inintoca nochi tlen quipiyaj yolistli yancuic para nochipa.
\c 22
\p
\v 1 Huan elhuicac ejquetl nechnextili se atemitl tlen tlahuel
tzalantic queja tescatl tlen quisayaya tlen ihueyi siyaj Toteco huan
nopa Pilborregojtzi. Huan nopa atemitl temacayaya yolistli,
\v 2 huan motlalohuayaya tlajco nopa hueyi calle tlen eltoya tlajco
nopa altepetl. Huan ipan ome nali nopa atemitl moscaltiyaya se
cuahuitl tlen temaca yolistli para nochipa. Huan nopa cuahuitl
temacas majtlactli huan ome tlamantli itlajca, se tlamantli itlajca
para sesen metztli ipan se xihuitl. Huan ixihuiyo nopa cuahuitl
quitequihuise para quinfuerzajmacase tlen hualajtoyaj ipan nochi
tlaltini.
\v 3 Huan ax oncas niyon se tlamantli tlatelchihuali queja tlen
oncayaya ipan nopa achtohuiya tlaltepactli tlen Toteco
quitelchijqui. Huan ihueyi siyaj Toteco huan nopa Pilborregojtzi
eltos ipan nopa altepetl huan itlatequipanojcahua quitequipanose.
\v 4 Huan itlatequipanojcahua quiitase ixayac ininTeco huan itoca
ijcuilijtos inincuaixpa.
\v 5 Huan ax quema oncas tzintlayohuilotl nepa. Huan ax monequis se
tlahuili, niyon tonati para tlahuis pampa Toteco Dios quintlahuilis.
Huan inijuanti tlen itztoque nepa tlanahuatise para nochipa huan ax
quema tlamis.
\s Ax huejcahuas para hualas Jesucristo
\p
\v 6 Huan teipa nopa elhuicac ejquetl nechilhui: “Ni tlajtoli
temachtli huan melahuac. Toteco Dios tlen quinilhuía
itiocamanalojcahua tlen panos teipa, quititlantoc ielhuicac ejca
para mitznextilis ta huan nochi itlatequipanojcahua tlen nechca para
hualas.”
\p
\v 7 Huan Jesús quiijto:
\pi1
“Ax huejcahuas para nihualas. Hueyi paquilistli quipantis
yajaya tlen quitlacaquilía tlen ijcuilijtoc ipan ni amatlapohuali
pampa quiijtohua tlen panos teipa.”
\p
\v 8 Huan na niJuan nijcajqui huan niquitac nochi ni tlamantli. Huan
quema nijcajqui huan niquitac tlen nechnextiliyaya,
nimotlancuaixtlapacho iixtla nopa elhuicac ejquetl para
nijhueyimatisquía.
\v 9 Pero yajaya sampa nechilhui: “Amo xinechhueyimati.
Xijhueyimati san Toteco. Na san niitlatequipanojca Toteco queja ta,
huan queja moicnihua, nopa itiocamanalojcahua Toteco, huan queja
nochi sequinoc tlen quitlacaquilise tlen eltoc ipan ni
amatlapohuali. Nochi tojuanti san sejco tijtequipanohuaj Toteco.”
\p
\v 10 Huan nechilhui: “Amo xijtzacua huan xijsellojhui tlen
ijcuilijtoc ipan ni amatlapohuali para ma ax mocahua ixtacatzi pampa
quipiya tlen panos teipa huan ax huejcahuas para panos.
\v 11 Huajca yajaya tlen ax cuali o tlen fiero quichihua, huan ax
quinequi quicaquis ni amatlapohuali, ma quisenhuiquilis quichihuas
tlen ax cuali huan tlen fiero. Huan yajaya tlen itztoc cuali huan
tlatzejtzeloltic iixpa Toteco huan quicaquis ni amatlapohuali, ma
quisenhuiquilis quichihuas tlen cuali huan ma itztos
tlatzejtzeloltic iixpa Toteco.”
\p
\v 12 Huan Jesucristo quiijto:
\pi1
“Xiquita ax huejcahuas para nihualas huan nohuaya nijhualicas
notlaxtlahuil para nijtlaxtlahuis sesen tlacatl queja tlen
quichijtoc.
\v 13 Na niitztoc queja nopa letra A huan nopa letra Z. Na niipejya
huan niitlamiya nochi tlen onca. Na ipa niitztoya quema nochi pejqui
huan noja niitztos quema nochi tlen onca tlamis.”
\p
\v 14 Paquilistli para nochi tlacame tlen quichicueníaj ininyoyo,
quiijtosnequi, tlen quicahuilía Toteco ma quinyolpajpaca. Yajuanti
quipiyase tequihuejcayotl huan calaquise ipan ipuerta nopa altepetl
huan quicuase itlajca nopa cuahuitl tlen temaca yolistli para
nochipa.
\v 15 Pero mocahuase calteno nopa altepetl nochi tlacame tlen fiero
inintlalnamiquilis huan tetlajchihuíaj, momecatíaj, temictíaj,
tlacajcayahuaj huan tlen quintlepanitaj totiotzitzi.
\p
\v 16 Huan sampa Jesús quiijto:
\pi1
“Na niJesús, nijtitlanqui noelhuicac ejca para mitzilhuis ni
tlamantli para tiquinpanoltilis nochi tlaneltocani ipan nochi
tiopantini. Na tlen nijmacac chicahualistli Tlanahuatijquetl David
huan na niiteipa ixhui tlen nimosehuis ipan ihueyi siyaj para
nitlanahuatis. Na niitztoc queja nopa sitlali tlen tlahuía
chicahuac ica ijnaloc quema nechca para tlanesis.”
\p
\v 17 Huan Itonal Toteco huan isihua nopa Pilborregojtzi
quiijtohuaj: “Xihualaca.” Huan nochi tlen quicaquij ni
amatlapohuali ma quinilhuica sequinoc: “Xihualaca.” Quena, ma
hualaca nochi tlen amiquij ipan ininyolo huan tlen quinequij
hualase. Ma quiiquij nopa atl tlen temaca yolistli tlen yancuic para
nochipa. Huan tlen quiis nopa atl ax monequi quiixtlahuas.
\p
\v 18 Huan ya ni tlen niquinilhuía nochi intlacame tlen inquicaquij
ni tlajtoli tlen eltoc ipan ni amatlapohuali tlen techilhuía tlen
panos teipa. Intla se quimiyaquilis ica más tlamachtilistli tlen ax
mopantía nica, huajca Toteco quitlatzacuiltis ica nopa fiero
tlaijiyohuilistli tlen ijcuilijtoc ipan ni amatlapohuali.
\v 19 Huan intla se quiquixtilis se tlamantli tlen ijcuilijtoc nica
tlen quinilhuía tlacame tlen hualas teipa, Toteco ayoc quicahuilis
para quicuas itlajca nopa cuahuitl tlen temaca yolistli yancuic.
Huan Toteco ax quicahuilis calaquis ipan nopa altepetl
tlatzejtzeloltic tlen techpohuilía ni amatlapohuali.
\p
\v 20 Huan Jesús tlen techilhuía ni tlamantli quiijtohua: “Quena,
ax huejcahuas para nihualas.”
\p ¡Queja nopa ma eli! ¡Xihuala Tohueyiteco Jesús!
\p
\v 21 Tohueyiteco Jesús ma quipiya hueyi iyolo ica nochi imojuanti.
Queja nopa ma eli.