\id GAL - Naro NT [nhr] -Botswana 2012 (web 2014)
\h GALATIA NE
\toc1 Galatia ne
\toc3 Gal
\mt1 GALATIA NE
\mt2 Paulom dis tcgãya sa
\mt2 Galatia ne koe
\imt Téé-cookgꞌai sa
\ip Eẽ i ko Jesom di qãè tchõàn tshoa-tshoa a ko xgaa-xgaaè, a ko ẽe Juta tama ne ka cám̀ tshàua mááè, kas kò tẽè sa xgoaba: khóè ba méém Juta iise kgꞌõè naka baà Moshem di xꞌáèan ko méé sa komsana naka baà qꞌãe nqãa-qgai khòoè, nxãaskam gha tseegu dim dtcòm̀-kgꞌao ba ii di sa. Me kò Paulo ba ncẽes gúùs cgoa ntcoeku, a ko máá qaase tama ia témé. Qaasekos gúù sa, Krestem koe dtcòm̀ si i, gaas ka ta gha wèéa ta ga Nqarim ka tchànokaguè. Igaba Galatia koe hàna zi kereke zi xgꞌaeku koe ne cꞌẽe ne khóè ne hãa, Paulo ba ko ntcoe ne, a bìrísea hãa khóè ba méém gataga Moshem di xꞌáèan komsana naka baa nxãasega Nqarim ka tchànokaguè sa.
\ip Paulom dis tcgãya sa kò góáèa, tseegu di dtcòm̀an koes gha Galatia ne ka̱bi ka, ncẽe ko tshúù-ntcõa di xgaa-xgaan ka ho̱àkaguè ne.
\ip Paulo ba kò tshoa-tshoa (1-2) koe a Jeso Krestem dim xꞌáè úú-kgꞌao ba tam gha ma tciiè di qaria nem úúa hãas ka kgꞌui. A ba a kò nxàe, gam di tsééan xꞌáè úú-kgꞌaom ii dia Nqarim koe guua hãa, khama i khóèan koe guu tama sa, i gam di tsééan ẽe Juta tama ne khóè ne koe hãa sa.
\ip Me kò nxãaska kgꞌui sa ghùi, ncẽe ko máá, dtcòm̀an ka cúím ko khóè ba Nqarim koe tchànokaguè, témé di sa. Qãè tsééa nea khóè ba kgoara tama, igabam ko kgoaraèam khóè ba qãè tsééan kúrú ka (3-4).
\ip Chõò di xu tcee xu (5-6) koem ko Paulo ba xꞌáí, Krestem koe dtcòm̀ sa ko ncàm̀kus ncẽe ko kgꞌõèa ta ka̱ba-ka̱ba sa óága sa.
\ib
\ip Qaa-qaasa kgꞌuia ne:
\ili1 - qꞌãe nqãa-qgai khòoku sa
\ili1 - xꞌáèa ne
\ili1 - kgoarasea ne
\ib
\ip Tcgãyas qꞌoo koe hàna zi:
\io1 - Paulom di tsééa ne xꞌáè úú-kgꞌaom ii di i \ior (1–2) \ior*
\io1 - Nqarim di cgóm̀kuan di qãè tchõà ne \ior (3–4) \ior*
\io1 - Dtcòm̀-kgꞌao ne di kgoarasea ne naka tsééa ne hẽéthẽé e \ior (5–6) \ior*
\c 1
\ms Paulom di tsééa ne xꞌáè úú-kgꞌaom ii di i (1–2)
\s Tsgám̀kaguku zi
\p
\v 1 Paulo ra a, xꞌáè úú-kgꞌao\f + \fr 1:1 \fk xꞌáè úú-kgꞌao - \ft Gerika sa ko “apostolo” témé.\f* ba kúrúèa hãa ra: khóè ne koe guu tamase, kana khóèm ka tamase, igaba Jeso Kreste ba hẽé naka xꞌooan koe ghùi Mea hãam Nqarim Abom ka hẽéthẽé e.
\v 2 Tíí hẽé naka wèé xu qõe xu ncẽe tíí cgoa hãa xu hẽéthẽéa ko \add ncẽes tcgãya sa\add* Galatia di zi kereke zi góá máá a ko máá:
\p
\v 3 Nqarim gatá ka Xõò ba hẽé naka Xꞌaigam Jeso Kreste ba hẽéthẽé tsara koe guua hãa cgóm̀kuan hẽé naka tòókuan hẽéthẽé méé i gatu cgoa hãa.
\v 4 Ncẽe ko gatá di chìbian domka máàse ba, nxãasegam gha ncẽe xꞌaè dim nqõóm cgꞌãè tcꞌẽean dim koe kgoara tcgꞌòó ta a ka, ncẽem ko ma gatá dim Nqarim Xõò ba ma tcꞌẽe khama.
\v 5 Chõò tamase méém dqo̱m̀mè, Amen.
\s Cúísega tseegu ii qãè tchõà ne
\p
\v 6 Gatu kar area hãa! Eẽ Krestem di cgóm̀kuan koe tciia óá tu ua hãa ba tu ncẽeta ma qháésega aagua hãa, a tãá tchõàn koe nxana,
\v 7 ncẽe qãè tchõà tama a. Igaba i cꞌẽe khóèan hàna ncẽe ko nqùu sa tcãà tu u, a Krestem di qãè tchõàn kàmakagu kgꞌoana.
\v 8 Igabar \add ko bìrí tu u a ko máá\add*: ncẽè sixae igaba kana nqarikgꞌai koe guuam moengelem kòo cꞌẽe tchõàn xgaa-xgaa tu u, ncẽe sixae kòo xgaa-xgaa tu u qãè tchõàn cgoa qõòa mááku tama a, ne méém chõò tamase xgàraè!
\v 9 Ncẽe xae nxãakamaga mééa hãa khamagar ko ncẽeska gaicara méé a ko máá: ncẽè cꞌẽem khóèm kòo ẽe tu xgaa-xgaaèa qãè tchõàn cgoa qõòa mááku tama qãè tchõàn xgaa-xgaa tu u ne méém chõò tamase xgàraè!
\p
\v 10 Khóè ne kar gha koaè sa ra koáé qaa kana Nqarim kaa? Kana ra ko khóèan qãè-tcaokagu sa qaa? Ncẽè qanega ra kòo khóèan qãè-tcaokagu ner Krestem dir tséé-kgꞌaor tama ra a!
\s Ntam ko ma Paulo ba xꞌáè úú-kgꞌao ba kúrú sa
\p
\v 11 Qꞌãa méé tu sar ko tcꞌẽe khama, tíí qõe ga tuè, ncẽer kòo xgaa-xgaa qãè tchõà nea khóèan koe guu tama sa.
\v 12 Khóèan kar máàè e tama khama, a \add khóèan ka\add* xgaa-xgaaè e tama, igaba ra Jeso Krestem ko tíí koe xꞌáíse koe guu a máàè ea.
\p
\v 13 Kóḿa tu hãa ẽer kò Juta dis dtcòm̀s koe hãa kar kòo ma kgꞌõè sa khama: kaisase nqáéaser kò Nqarim dis kereke sa xgàra, a kòo cgꞌõoa dqùrì si.
\v 14 A ra a kò Juta dis dtcòm̀s koe káí xu tiris tcáràs di xu ka còoka hãar Juta ra a, a kò ẽe ne kò sita ka tsgõose ga ne máà ta a cauan kaisase qgóóa qari.
\v 15 Qanegar ábàè tama cookgꞌai koem kò Nqari ba nxárá tcgꞌòó tea. A ba a kò Gam di cgóm̀kuan ka tciia óá te. I kò qãè-tcaokagu Me
\v 16 Gam dim Cóá bam xꞌáí tea sa, nxãasegar gha tãá zi qhàò zi di ne koe Gam di qãè tchõàn xgaa-xgaa ka. Gaa xꞌaè kagar kò khóèan cgoa táá xgꞌae,
\v 17 a ra a kò gataga Jerusalema koe ga táá qõò, a ẽe xgꞌao tíí ka tcꞌãà a xꞌáè úú-kgꞌao ii xu koe síí, igaba ra kò Arabia koe qõò, a ra a gaa koe guus ka Damaseko koe ka̱bise.
\p
\v 18 Ra kò nxãaska nqoana kuri qãá qꞌoo koe Jerusalema koe qõò, a Petere\f + \fr 1:18 \fk Petere - \ft Gerika sa ko “Kefase” témé.\f* ba dàra, a síí 15 cáḿan gam cgoa xꞌãè.
\v 19 Igaba ra kò cúím xꞌáè úú-kgꞌaom ga ba táá bóò, Jakobom oose, ncẽe Xꞌaigam \add Jesom\add* ka qõese ba.
\p
\v 20 Bóò, Nqarim cookgꞌai koer ko gaìse, ncẽer góá máá tua hãa sa tshúù-ntcõas tama si i sa.
\v 21 Kháókar kò Siria hẽé naka Kilikia hẽéthẽé di zi xgꞌaeku zi koe qõò.
\v 22 Ra kò Jutea di zi kereke zi koe qꞌãaè tama, ncẽe Krestem koe hãa zi;
\v 23 kgꞌamaga ne kò tíí ka kóḿaa hãa i ko máá: “Gaam ẽe kòo kgꞌaia xgàra ta a ba ko ncẽeska dtcòm̀s ka xgaa-xgaa, ncẽem kòo cgꞌõoa dqùrì sa,” téméè.
\v 24 Ne kò tíí domka Nqari ba dqo̱m̀.
\c 2
\s Paulom di tchõà ne ko xꞌáè úú-kgꞌao xu cꞌẽe xu ka dtcòm̀mè
\p
\v 1 Ra kò nxãaska 14 kurian qãá qꞌoo koe gaia Jerusalema koe qõò, Barenabasem cgoa hãase, a ra a kò thẽé Titom ga ba séè,
\v 2 a \add Nqarim ko\add* xꞌáí \add te\add* sa xùri; a ra a ẽer kò tãá zi qhàò zi di ne xgaa-xgaa hãa qãè tchõàn gaxu cookgꞌai koe síí tòó. Kaia ntcõó-qꞌooan úúa hãa xu cgoar kò ncẽe sa cúía hãase nxàe; tsééan ncẽer ko wèé qaria te cgoa kúrúa hãa a, a ko qanega kúrú u, nea gha kgꞌamaga di ii sar tcꞌẽe tama khama.
\v 3 Igaba Titom ncẽe kò tíí cgoa hãam ka i kò qaase tama, qꞌãe nqãa-qgai khòoèm gha sa, Gerika me e kò ii igaba.
\v 4 Igaba xu kòo cꞌẽe xu khóè xu kúrúè i gha sa tcꞌẽe. Dtcòm̀-kgꞌao xu khama xu ko ma qgóóse, igaba xu tchõà qaase xu iise sixae koe tsꞌana tcana. A xu a ko ẽe ta Jeso Krestem koe úúa hãa kgoarasean hàà bóò, nxãasega xu gha gaxu di qãàn kúrú ta a ka.
\v 5 Igaba xae kò xꞌaè-coam di kòm̀ ga táá máà xu, nxãasega tu gha qãè tchõàn di tseeguan úú ka.
\p
\v 6 Igaba gaxu ẽe tcꞌãà-cookgꞌaian khama ko ma qgóóè xu - ẽe xu kò hãas téé-qꞌoo sa tíí koe cúí gúù ga méé tama, Nqari ba khóè ne tãákase qgóó tama khama - ẽe xu khóè xua kò táá bìrí te, cúí gúù ga ra gha \add ẽer ko xgaa-xgaa qãè tchõàn\add* koe càù sa.
\v 7 Igaba xu kò bóòa qꞌãa, Nqari ba tíía máà tea hãa, qhàò zi di ner gha qãè tchõàn xgaa-xgaa sa, ẽem kò ma Petere ba máàna hãa khamaga ma, Juta nem gha qãè tchõàn xgaa-xgaa sa.
\v 8 Nqarim ncẽe kò Petere ba tsééa hãa, me xꞌáè úú-kgꞌaom Juta ne ko qãè tchõàn xgaa-xgaa ba ii, ba kò tíí tséé te, xꞌáè úú-kgꞌaom tãá zi qhàò zi di ne ko qãè tchõàn xgaa-xgaa bar gha ii ka khama.
\v 9 Xu kò Jakobo ba hẽé, naka Petere\f + \fr 2:9 \fk Petere - \ft Gerika sa ko “Kefase” témé.\f* ba hẽé naka Johane ba hẽéthẽé xu, ncẽe kòo nquu ba ko ghùi-ghui xu hìi xu iise séèè xu bóòa qꞌãa Nqari ba ncẽes tséé sa máà tea hãa sa, a xu a tíía hẽé naka Barenabase ba hẽéthẽé tsam qgóó tshàu, dtcòm̀kua xae hãa dis xꞌáís iise. Dtcòm̀kua xae ko hãa ncẽeta xae gha ma tsééa xgꞌae sa: Sitsam gha tãá zi qhàò zi di ne koe síí, xu gaxu Juta ne koe síí sa.
\v 10 Cúís gúùs dtcàrà xu kòo sa: ẽe dxàua hãa ne méé tsam qãèse kòre si i, si kò gaas gúù sa tcáóa te koe tcãà kúrú sir gha sa.
\s Paulo ba ko Petere ba ntcoe
\p
\v 11 Igaba ẽem ko Petere ba Antioke koe hàà kar kò \add dtcòm̀-kgꞌao ne\add* cookgꞌai koe ga ntcoe me, chìbia nem úúa hãa khama.
\v 12 Cꞌẽe xu khóè xu Jakobom ka tsééa óáèa xu ko hàà cookgꞌai koem kòo tãá zi qhàò zi di ne cgoa tcꞌõó, igaba ẽe xu ko hàà kam kò qꞌãe nqãa-qgai khòokus dis xgꞌae sa bèe, a tééa dìbi, a tãá zi qhàò zi di ne cgoa qꞌaa-qꞌaase.
\v 13 Gabá hẽé naka cꞌẽe xu Juta xu hẽéthẽéa kò tshoa-tshoa a ẽe xu qꞌana hãa si qãè tamas gúù sa kúrú, me kò Barenabasem ga ba gaxu di cgꞌãè tsééan domka ho̱à cgoa xu.
\v 14 Igaba ẽer ko qãè tchõàn di tseeguan xu xùri tama sa bóò kar ko wèéa ne cookgꞌai koe ga Petere\f + \fr 2:14 \fk Petere - \ft Gerika sa ko “Kefase” témé.\f* ba bìrí a máá: “Juta tsi i, igaba tsi ko \add gane cgoa tcꞌõóan ka\add* tãá zi qhàò zi di ne di cauan cgoa kgꞌõè, Juta ne dian ka tamase. Ka nxãaska dùú saa ncẽe tsi ko qhàò zi di ne chùi, Juta ne di cauan ne gha xùri ka sa?” témé.
\p
\v 15 Abà nqa̱is koe ga ta guu a Juta ta a, a qhàò zi di tama, ncẽe chìbi-kgꞌao \add ta ko ma tciiè\add* ne.
\v 16 Igaba ta qꞌana hãa, khóè ba xꞌáèan komsana ka tchànom iise bóòè tama, igaba Jeso Krestem koe dtcòm̀an ka a sa. Gaa domka ta gatá \add Juta ta\add* igaba thẽé Jeso Krestem koe dtcòm̀a hãa, nxãasega ta gha Krestem koe dtcòm̀s ka tchàno ta iise bóòè ka, xꞌáèan komsana ka tamase; xꞌáèan komsana kam cúím khóèm ga ba tchàno iise bóòè hãa tite khama.
\p
\v 17 Igaba ncẽè Krestem koe \add dtcòm̀an ka\add* ta kò tchàno ta iise bóòè kgꞌoana ne ta gha \add qhàò zi di ne khama ii, ncẽe\add* chìbi-kgꞌao ne \add ta ko ma tciiè ne\add*. Kháé ẽe sa ko nxãaska máá, Kreste ba chìbian dim tséé-kgꞌao Me e, \add ẽe ko kúrú ta a ta chìbi-kgꞌao ii ba\add*, témé? Nxãas tama si i!
\v 18 Ncẽè cꞌẽem khóèm kòo ẽem ko̱bea hãa sa gaia tshàoa ghùi, nem ko chìbian kúrú.
\v 19 Xꞌáèa ner \add kgꞌõèa máá tama\add* khama, igabar xꞌáèan koe guu a xꞌóóa, nxãasegar gha Nqari ba kgꞌõèa máá ka. Krestem cgoar xgàuèa,
\v 20 ra tíí ncẽeska kgꞌõèa hãa tama, igabam Kreste ba tíí koe kgꞌõèa hãa; ra ncẽer ko cgàam koe kgꞌõès kgꞌõè sa ko Nqarim dim Cóám koe dtcòm̀an koe kgꞌõè, ncẽe kò ncàm̀ tea, a tíí domka máàsea ba.
\v 21 Ncẽè khóèm kò ko \add cgóm̀kuan ka tamase, igaba\add* xꞌáèan koe guu a Nqarim cgoa tchànokaguè, nem Kreste ba nxãaska kgꞌamaga káà hùise xꞌóóa hãa. Gaa domkar cuiskaga Nqarim di cgóm̀kuan dxùukgꞌai za tòóa hãa tite.
\c 3
\ms Nqarim di cgóm̀kuan di qãè tchõà ne (3–4)
\s Dtcòm̀ sa nooam dàòm kgoaraè ta gham ga me e
\p
\v 1 Gatu káà tcꞌẽe tu Galatia tuè! Dìína gáé tsoò tua hãa? Gatu ncẽe tcgáí qꞌooa tu koe gam kò Jeso Kreste ba qãèse xꞌáíse xgàuèam hãa sa tu!
\v 2 Cúís gúù sar gatu koe qꞌãa kgꞌoana: xꞌáèan komsana ka tua kò \add Tcom-tcomsam\add* Tcꞌẽe ba hòò, kana ẽe tu kóḿa hãa \add qãè tchõàn koe\add* dtcòm̀s kaa?
\v 3 Tsóágase tu gáé káà tcꞌẽe tua! \add Tcom-tcomsam\add* Tcꞌẽem cgoa tu tshoa-tshoaa hãa, ka tua ko ncẽeska cgàam \add di cauan\add* cgoa chõòkagu?
\v 4 A hùi úú tamase tua kaisase xgàrasea hãa? Kháé tseegukaga ia kò hùi úú tama?
\v 5 Gaam ẽe ko \add Tcom-tcomsam\add* Tcꞌẽe ba máà tu u, a ko gatu xgꞌaeku koe are-aresa zi tséé zi kúrú ba koáé xꞌáèan tu ko komsana domka gatà hẽé? Kháé ba gáé ẽe tu kóḿa hãa \add qãè tchõàn koe\add* tu dtcòm̀a hãa domka gatà hẽé tama?
\p
\v 6 Abrahamam ka i kò ii khamaga i ii: Nqarim koem kò dtcòm̀, a ba a kò tchànom iise bóòè!
\v 7 Ke nxãaska kóḿa qꞌãa, ẽe dtcòm̀ sa úúa hãa nea Abrahamam ka cóáse ga ne e sa.
\v 8 \add Nqarim di zi\add* Tcgãya zia kò nxãakamaga còoka bóò, Nqari ba gha tãá zi qhàò zi di ne dtcòm̀s koe guu a tchàno ne iise bóò sa, a ba a kò Abrahama ba kámága qãè tchõàn máà, a máá: “Wèé zi qhàò zia gha tsáá koe guu a tsꞌee-tsꞌeekgꞌaiè,” témé;
\v 9 khama gane ẽe dtcòm̀an úúa hãa nea kò dtcòm̀a hãam Abrahamam cgoa xgꞌae a tsꞌee-tsꞌeekgꞌaiè.
\p
\v 10 Wèé ne ẽe xꞌáèan komsanan ka ko \add tchàno ne iise bóòè kgꞌoana\add* nea cgúísea hãa; \add Nqarim di zi\add* Tcgãya zi koe i góásea hãa a ko máá: “Wèé xꞌaè ka ẽe Xꞌáèan dis Tcgãyas koe góásea hãa zi gúù zi wèé zi kúrú tamam khóè ba cgúísea hãa,” témé khama.
\v 11 Xꞌáíse i ko, cúím khóèm ga ba xꞌáèan ka Nqarim cookgꞌai koe tchàno iise bóòè ta ga hãa sa; \add Nqarim di zi Tcgãya zia ko máá:\add* “Eẽ tchàno ii ba gha dtcòm̀s koe guu a kgꞌõè,” témé khama.
\v 12 Igaba i xꞌáèan dtcòm̀an koe guu tama, a ncẽe koe guua, \add Nqarim di zi\add* Tcgãya zi ko méé khama a ko máá: “Eẽ ko ncẽe zi gúù zi kúrú ba gha gazi koe guu a kgꞌõè,” témé.
\p
\v 13 \add Nqarim di zi\add* Tcgãya zi koe i góásea hãa a ko máá: “Wèém khóèm ẽe ko hìis koe tceeè ba cgúíèa hãa,” téméè khamam kò Kreste ba gatá domka cgúíè. A ba a kò ncẽeta hẽéan ka xꞌáèan dis cgúíkus koe xꞌámá tcgꞌòó ta a.
\v 14 Nxãasega i gha Abrahamam kò nqòòkaguèa hãa tsꞌee-tsꞌeekgꞌaikuan Jeso Krestem koe guu a tãá zi qhàò zi di ne koe tcãà ka, ta gha nxãasega dtcòm̀s koe guu a ẽe ta kò nqòòkaguèa hãam \add Tcom-tcomsam\add* Tcꞌẽe ba hòò.
\s Xꞌáèan hẽé naka nqòòkagukuan hẽéthẽé e
\p
\v 15 Tíí qõe ga tuè, wèé cáḿ dis sere-sere sar gha tséékagu. Khóè ne kò qáé-xgꞌae sa kúrú a tseegukagu sia hãa ne i cúí khóè ga ko̱be si, kana cꞌẽe gúù ga gaas koe càùa hãa tite.
\v 16 Nqòòkaguku zia kò Abrahama ba hẽé naka gam ka cóáse ba hẽéthẽé tsara bìríèa hãa. Si \add Nqarim dis Tcgãya sa\add* ncẽeta méé naka máá: “naka gam ka cóáse ga XU hẽéthẽé e,” témé tama naka sa káí xu nxàe, igabas ko máá: “naka cóáse BA hẽéthẽé e,” témé, a ko cúí ba nxàe, ncẽe Kreste ii ba.
\v 17 Ncẽe sa nxàer kos ga si i a ko máá: Qáé-xgꞌae sa Nqarim ka kámága kúrú a tseegukaguèa hãa, i xꞌáèan 430 kurian qãá qꞌoo koe hààraa. Ncẽe xꞌáèa ne ẽes qáé-xgꞌae sa ko̱be tite, a Nqarim dis nqòòkagu sa kaàkagua hãa tite.
\v 18 Ncẽè Nqarim dis máàkus kò xꞌáèan koe guua hãa ne i nxãaska gaicara nqòòkagukus koe guu tama khama; igabam kò Nqari ba nqòòkagukus koe guu a Gam di cgóm̀kuan ka Abrahama ba máà a.
\p
\v 19 Nxãaska xꞌáèan di tsééa nea dùú saa? Tcãàèa i kò hãa, \add nxãasega i gha xꞌáí,\add* chìbian \add kúrú sa dùú si i sa\add* ka, me gha nxãakgꞌaiga \add Abrahamam ka\add* Cóáse ba síí hàà, ncẽe kò nqòòkagukus koe nxàeèa ba. Moengele xu ka i kòo qõòkaguè, \add Moshem\add* ẽe ko nqáè koe hãam koe guu a.
\v 20 Igaba ẽe nqáè koe hãa ba cúís \add xgꞌaes cgoa cúí tséé\add* tama, igabam Nqari ba cúí Me e.
\s Qãàn hẽé naka cóán hẽéthẽé e
\p
\v 21 Kháé nxãaska ia xꞌáèan Nqarim di zi nqòòkaguku zi cgoa qõòa mááku tama? Nxãas tama si i! Ncẽè kgꞌõè sa ko óá di qarian úúam xꞌáèm kò hàna hãa, nem ga kò khóè ba tseegukaga xꞌáèan komsana koe guu a Nqarim cgoa tchànokaguèa khama.
\v 22 Igabas ko \add Nqarim dis\add* Tcgãya sa nxàea tseegukagu, wèém nqõó ba chìbian koe hãa sa, nxãasegas gha ẽe kò nqòòkaguèas abas ncẽe ko Jeso Krestem koe dtcòm̀an koe guu a máàè sa, ẽe ko dtcòm̀ ne máàè ka.
\p
\v 23 Igaba dtcòm̀s ko hàà cookgꞌai koe ta kò xꞌáèan ka qgóó a qáéèa hãa, nxãakgꞌaigas gha síí ncẽe ko hààs dtcòm̀ sa hòòè ka.
\v 24 I kò gaa domkaga xꞌáèan tcꞌãà-cookgꞌai ta a hãa, Me nxãakgꞌaiga síí Kreste ba hàà\f + \fr 3:24 \fq Me nxãakgꞌaiga síí Kreste ba hàà - \ft kana “a ko Krestem koe úú ta a”.\f*, nxãasega ta gha dtcòm̀s koe guu a \add Nqarim cookgꞌai koe\add* tchàno iise bóòè ka.
\v 25 Si gaas dtcòm̀ sa hààraa, i ncẽeska \add xꞌáèan\add* tcꞌãà-cookgꞌai ta a tama.
\p
\v 26 Wèéa tu ga dtcòm̀s koe guu a Jeso Krestem koe Nqarim di tu cóá tu u khama.
\v 27 Wèéa tu ẽe kò Krestem koe tcguù-tcguuèa hãa tua Kreste ba ha̱na khama.
\v 28 Me Juta ba kana Gerika ba hãa tite, me qãà ba kana qãà tama ba hãa tite, me kgꞌáò ba kana dxàes ga sa hãa tite, wèéa tu ga Jeso Krestem koe cúí tu u khama.
\v 29 A ncẽè Krestem di tu kò ii, ne tu nxãaska Abrahamam di tu cóá tu u, a tu a ẽe kò nqòòkaguèa hãas xꞌais di tu qꞌõò-kgꞌao tu u.
\c 4
\p
\v 1 Méé ra ko sa: ẽe gha ko hàà xꞌaian qꞌõòm kò cóá ba ii nem gha hàà kgꞌamaga qãàm khama ma séèè, ẽetam ga ma wèé zi gúù zi qꞌõòa hãa igaba.
\v 2 Tchàno-tchanoku-kgꞌao xu hẽé naka qõòkagu-kgꞌao xu hẽéthẽé dòm̀ qꞌoo koem hãa, me gha nxãakgꞌaiga xõòm ka tòóèa hãam xꞌaè ba síí hàà.
\v 3 Ncẽem dàòm ka ta gatá igaba thẽé, ẽe ta kò cóá ii, ka kò nqõóm di qarian di ta qãà ta a.
\v 4 Igaba ẽem ko xꞌaè ba cgꞌoè kam kò Nqari ba Gam dim Cóá ba tsééa úú, khóès ka ábàèa hãa, a xꞌáèan dòm̀ qꞌoo koe kgꞌõèa hãa ba,
\v 5 síím gha ẽe xꞌáèan dòm̀ qꞌoo koe hãa ne kgoara ka, nxãasega ta gha \add Nqarim di ta\add* cóá ta ii di qarian hòò ka.
\v 6 Me kò Nqari ba cóá tu u domka Gam ka Cóásem dim Tcꞌẽe ba tsééa tcgꞌòó, Me síí tcáóa ta koe tcãà, a ba a qꞌaua tcii a ko máá: “Aboè, gatá ka Xõò Tseè,” témé.
\v 7 Khama tsi ncẽeska gaicara qãà tama, igaba tsi cóá tsi i, a cóá tsi kò ii ne tsi gataga thẽé Nqarim koe guu a qꞌõò-kgꞌao tsi i.
\s Paulo ba Galatia ne dis téé-qꞌoos ka area hãa
\p
\v 8 Kgꞌaia, ncẽe tu kò Nqari ba cꞌúùa hãa xꞌaè ka tu kò gúù zi ncẽe nqárì tama zi di tu qãà tu u.
\v 9 Igaba tu ncẽeska Nqari ba qꞌana hãa (i ko gataga qaase, nxàer gha a máá: “Nqarim ka tu qꞌãaèa hãa,” témé sa), ka tua gha nxãaska ntama ma nqõóm di qarian ncẽe kgꞌamka, a cgóm̀-cgomsa koe gaicara ka̱bise? A tseegukaga tua gaicara gaan di qãà kgꞌoana?
\v 10 Cꞌẽe cáḿan hẽé, naka nxoean hẽé naka xꞌaèan hẽé naka kurian hẽéthẽé tu xaèa kgꞌónò a ko kõ̱è zi kúrú.
\v 11 Qꞌáòkagu te tu ko! Eẽr gatu koe kúrúa hãa tsééa ne káà hùi khamaga i ii domka.
\p
\v 12 Tíí qõe ga tuè, còrè tu ur ko a ko máá: Tíí khama méé tu ii, témé, tíí igabar gatu khama ii ke. Cúí cgꞌãè ga tu kúrú cgae te tama.
\v 13 Qꞌana tu hãa, cgáé-qꞌoom di kgꞌamkan domkagar kòo kgꞌaia qãè tchõàn xgaa-xgaa tu u sa.
\v 14 Eẽta i kò ma tiri tcììan kúrúa bóòa tu di ii, igaba tu kò táá ntcoe te ga hẽé, a xguì te ga hẽé, a kò Nqarim dim moengelem khama ma qãèse hààkagu te, Jeso Krestem khama ma.
\v 15 Gatu di qãè-tcaoa ne \add ncẽeska\add* ndaa? Tíí ga ra gha nxàea tseegukagu a máá, kgoanase i kò ne tu ga tcgáía tu nxo̱bea tcgꞌòó, a máà te, témé.
\v 16 A \add ncẽeska\add* ra gáé gatu dim cgꞌõo-kgꞌao ba kúrúsea, ncẽer ko tseeguan bìrí tu u ka?
\p
\v 17 Eẽ xu \add tshúù-ntcõa-kgꞌao\add* xua qãèm dàòm ka tcãà-tcaoa máá tu u tama, igaba xu ko qaa sa \add sixae cgoa\add* qꞌaa-qꞌaa tu u si i, nxãasega tu gha tcãà-tcaoa máá xu ka.
\v 18 I wèé xꞌaè ka qãès gúùs koe tcãà-tcaoan qãè e, tíí kò gatu cgoa hãa ne cúí tamase.
\v 19 Tiri tu cóá tu ncàm̀-ncamsa tuè, gatu domkar gaicara ábàn di thõòan koe hãa, Me gha nxãakgꞌaiga síí Kreste ba gatu koe kúrúse!
\v 20 Nta ra ko ma tcꞌẽe, ncẽeskar ga gatu cgoa hãa sa, a ra a ga kgꞌui-qꞌooa te ka̱bi! Gatu kar area hãa khama.
\s Hagare sa hẽé naka Sarah sa hẽéthẽé e
\p
\v 21 Bìrí te tu, gatu ncẽe xꞌáèan dòm̀ qꞌoo koe tu gha hãa sa ko tcꞌẽe tu: a xꞌáèan tu komsana tama?
\v 22 Góásea i hãa a kò máá, Abrahama ba ko cám̀ cóá tsara úúa hãa, me cꞌẽe ba qãàs di me e, me cꞌẽe ba \add gam dis khóès\add* kgoarasea hãas di me e, téméè.
\v 23 Igabam kò qãàs dim cóá ba cgàam koe guu a ábàè; me kò kgoarasea hãas khóès dim cóá ba nqòòkagukus koe guu a ábàè.
\v 24 Ncẽe zi gúù zia gha xꞌáís iise séèè: ncẽe sara khóè sara cám̀ sara qáé-xgꞌae sara a; cꞌẽe sa Sinai dim xàbìm dis xꞌáí si i, a ko hàà gha qãàn kúrú cóán ábà, si nxãa sa Hagare si i.
\v 25 Si Hagares ncẽe sa Sinai dim xàbìm Arabia dim nqõóm koe hànam dis xꞌáí si i, a Jerusalema dis xꞌáí si i; gas di ne cóá ne cgoas xgꞌae a qãà si i khama.
\v 26 Igaba tcꞌamaka hãas Jerusalema sa kgoarasea, a sa a gasá gatá ka xõò si i.
\v 27 Góásea i hãa khama a ko máá:
\q1 “Qãè-tcao, sáá ábà tama si khóè seè,
\q1 \add qãè-tcaoan ka\add* qꞌau,
\q1 sáá ncẽe ábàn di thõòan koe hãa tite si;
\q1 ẽe aaguèas khóès di cóá nea
\q1 ẽe séèa hãas khóès dian ka káí i khama,”
\m téméè.
\p
\v 28 \add Ncẽes Jerusalema sa gatá ka xõò si i khamaga\add* tu gatu, tíí qõe ga tuè, Isakam khamaga ma nqòòkagukus di tu cóá tu u.
\v 29 Igaba ẽem xꞌaèm kam kò ẽe ko cgàam koe guu a ábàèm cóá ba, ẽe Tcꞌẽem koe guu a ábàèa ba xgàra; si ko gatà iis gúù sa ncẽe zi cáḿ zi kaga igaba kúrúse.
\v 30 Igaba sa ko \add Nqarim dis\add* Tcgãya sa nta méé? Ncẽetas ko méé a ko máá: “Xhàiagu qãà sa hẽé naka gaas dim cóá ba hẽéthẽé e! Qãàs dim cóá ba cuiskaga ẽe kgoarasea hãas khóès dim cóám cgoa xgꞌae naka qꞌõòa hãa tite ke,” témé.
\v 31 Gaa domka, tíí qõe ga tuè, qãàs di ta cóá ta tama ta a, igaba ta kgoarasea hãas khóès di ta cóá ta a.
\c 5
\ms Dtcòm̀-kgꞌao ne di kgoarasea ne naka tsééa ne hẽéthẽé e (5–6)
\s Krestem koe kgoarasea hãa ne
\p
\v 1 Kreste ba kò kgoara ta a, nxãasega ta gha kgoarasease hãa ka; gaa domka méé ta nxãaska qarika téé, naka taa qãàn dis joko sa gaicara táá kgoara mááse guu.
\p
\v 2 Komsana! Tíía, Paulo ra ko bìrí tu u a ko máá: qꞌãe nqãa-qgai khòoè tu kòo nem Kreste ba gatu koe cúí hùi ga úú tama, témé.
\v 3 A ra a ko wèém khóèm ẽe qꞌãe nqãa-qgai khòoèm gha sa máàsea hãam koe gaicara nxàea tseegukagu, nxãaska méém ẽe i ko xꞌáèan méés wèé sa kúrú sa.
\v 4 Gatu ncẽe xꞌáèan \add komsana\add* ka gha tchàno tu iise bóòè tua Krestem koe guu a qꞌãea tcgꞌòóèa; cgóm̀kuan tu cgꞌáé guua.
\v 5 Tcꞌẽem koe ta ko guu a dtcòm̀s koe ta gha tchàno ii dis nqòò sa hãa a qãà khama.
\v 6 Qꞌãe nqãa-qgai khòoè sa kana qꞌãe nqãa-qgai khòoè tama sa Jeso Krestem koe cgáé tama, igaba ncàm̀s koe ko tséés dtcòm̀ si i.
\p
\v 7 Qãèse tu kòo qàrò, ka ia dìín xgáè-kgꞌam tua hãa tseeguan komsana ne?
\v 8 Eẽta iis xgaa-xgaaku sa Gaam ẽe ko tcii tu um koe guu tama.
\v 9 Cgꞌáré péré gãé-gãe ne ko káí péréan kúrú i gãe.
\v 10 Xꞌaigam koer tcoman úúa hãa, cuiskaga tu cꞌẽe dàò ga séèa hãa tite di i; me gha gaam ẽe ko nqùu sa tcãà tu u ba gam dis xgàrase sa xám̀, dìím ga igaba.
\p
\v 11 Igaba, tíí qõe ga tuè, ncẽè xgaa-xgaa ra kòo, a ko máá: qꞌãe nqãa-qgai khòoku sa ko qanega qaase, témé ne ra ko kháé nxãaska dùús domka xgàraèa máá? Gatà i kò ii, ne i ga kò xgàus \add ka xgaa-xgaan\add* xgꞌore sa ghùi tama.
\v 12 Eẽ ko tcgꞌome tcúú tu u xu khóè xu méé xu qõò naka síí qꞌãe khòo-kgꞌaiè sar ko tcꞌẽe!
\p
\v 13 Kgoarasea tu gha hãa ka tu tciièa khama, tíí qõe ga tuè; igaba méé tu gatu di kgoarasean táá cgàam di zi tséé zi koe tcãà guu; igaba méé tu ncàm̀kuan koe guu naka gatu ka cꞌẽean tsééa máá.
\v 14 Wèé xꞌáèa ne ko cúím xꞌáè-kgꞌáḿ koe nxàeè a ko máá: “Tsáá ka cꞌẽe ba méé tsi ncàm̀, ẽe tsi ma ncàm̀sea hãa khamaga ma,” témé khama.
\v 15 Igaba ẽe tu kòo ka̱áku a ko ka̱á kgꞌooku, ne méé tu qꞌõése naka tua gha gatu ka cꞌẽe ne ka táá cgꞌõoè guu.
\s Tcom-tcomsam Tcꞌẽem koe kgꞌõè sa hẽé naka cgàam di tsééan hẽéthẽé e
\p
\v 16 Igaba ra ko máá: \add Tcom-tcomsam\add* Tcꞌẽem ka méé tu tcéè tcuìè naka tua cgàam ko tcꞌẽe sa táá kúrú guu, témé.
\v 17 Cgàam ko qaa sa ẽem ko \add Tcom-tcomsam\add* Tcꞌẽe ba qaas cgoa qõòa mááku tama khama, si Tcꞌẽem ko qaa sa cgàam dis cgoa qõòa mááku tama; ncẽea ne ko xꞌãàku khama, nxãasega tu gha ẽe tu ko tcꞌẽe sa táá kúrú ka.
\v 18 Igaba ncẽè \add Tcom-tcomsam\add* Tcꞌẽem ka tu kò tcꞌãà-cookgꞌaièa hãa ne tu xꞌáèan dòm̀ qꞌoo koe hãa tama.
\p
\v 19 Cgàam di tséé ne ko kgꞌama bóòse a i a: cgꞌárà a, naka cgꞌãè zi tséé zi hẽé, naka cgꞌurian hẽé,
\v 20 naka kúrúa mááseèa hãa nqárìan dqo̱m̀an hẽé, naka tsoòan cii hẽé, naka hòrekuan hẽé, naka xgꞌorean hẽé, naka tauan hẽé, naka xgóàn hẽé, naka cẽèan hẽé, naka kóḿku taman hẽé, naka dtcõò zi cgoa qꞌaa-qꞌaasean hẽé,
\v 21 naka chìikuan hẽé, naka nqàrea hãa ne hẽé, naka qarika kgꞌáàn hẽé, naka ncẽe zi gúù zi khama ii zi hẽéthẽé e. Ra ko ncẽeska bìría qꞌãa-qꞌãa tu u, ncẽer kò kgꞌaia ma qꞌãa-qꞌãa tua hãa khamaga ma, a ko máá: ẽeta ii zi gúù zi ko kúrú nea cuiskaga Nqarim di xꞌaian qꞌõòa hãa tite, témé.
\p
\v 22 Igaba \add Tcom-tcomsam\add* Tcꞌẽem di tcꞌáróa ne ncàm̀ si i, naka qãè-tcaoan hẽé, naka tòókuan hẽé, naka qáò tcáóan hẽé, naka qãè tcáóan hẽé, naka qãèan hẽé, naka tcom-tcomsan hẽé,
\v 23 naka tcꞌaua hãan hẽé, naka qãè qgóósean hẽéthẽé e. Eẽta ii zi gúù zi koe i xꞌáèan tséé úú tama.
\v 24 Ne gane ẽe Jeso Krestem di ne cgàa ba xgàua hãa, naka gaam cgàam di zi xám̀se-qꞌoo zi hẽé naka gaam di zi tcꞌẽe zi hẽéthẽé cgoa.
\v 25 Ncẽè Tcꞌẽem ka ta kò kgꞌõèa hãa, ne méé ta Tcꞌẽem cgoa qõòa te si i.
\v 26 Táá méé ta bóòse gúù kana ghã̱aku di ii guu, kana chìiku di ii guu.
\c 6
\s Wèém khóè ba qãèan kúrúa máá ne
\p
\v 1 Tíí qõe ga tuè, ncẽè cꞌẽem khóèm kò cgꞌãèan kúrú ka qgóóèa hãa, ne méé tu gatu ncẽe \add Tcom-tcomsam\add* Tcꞌẽe ba úúa hãa tu tcꞌausase úúa tcgꞌòó me. Tsáá igaba méé tsi kòresea hãa naka tsia táá chìbian koe tcãà guu.
\v 2 Gatu di zi xgàm zi tu xgàma hùiku, naka tua gha ncẽem dàòm ka Krestem di xꞌáèan komsana.
\v 3 A ncẽè cꞌẽem khóèm kò tcꞌẽea máá, gúù cgáé me e, ta tcꞌẽea hãa, gúù cgáé tama baa igaba, nem ko qàe-qaese khama.
\v 4 Wèém khóè ba méém gam di tsééan qãèse bóò. Qãè kò ii nem gha nxãwa koase, cꞌẽem khóèm cgoa tòóa xgꞌaese tamase.
\v 5 Wèém khóè ba méém gam dis xgàm sa dcẽéa mááses gúù si i khama.
\p
\v 6 Eẽ ko \add Nqarim dim\add* kgꞌui ba xgaa-xgaaè ba méém gam dim xgaa-xgaa-kgꞌaom cgoa wèé zi gúù zi qãè zi xgꞌaea máá.
\p
\v 7 Táá méé tu qàe-qaeè guu: Nqari ba cuiskaga nco̱iè tite ke; wèés gúùs ẽem ko khóè ba xhárà sa, nxãa sam gha gataga thẽé tcuù khama. \fig |LB00094.tif| col|||Cgùrian ko xháràm khóè ba|6:7\fig*
\v 8 Me gha gaam ẽe ko gam di cgàan koe xhárà ba, gaam cgàam koe ga guu a ko̱bea cgꞌõo sa tcuù; igaba gaam ẽe ko \add Tcom-tcomsam\add* Tcꞌẽem koe guu a xhárà ba gha \add Tcom-tcomsam\add* Tcꞌẽem koe guu a chõò tamas kgꞌõè sa tcuù khama.
\v 9 Ke hàà naka ta qãèan kúrú ka táá xhõekaguè guu; kgꞌanoa hãam xꞌaèm ka ta gha tcuù ke, ncẽè kaàn tcáó tama ta kò hãa ne.
\v 10 Gaa domka, ncẽe ga ta xꞌaè ba hòòa hãa, ke hàà naka ta wèé khóèan koe qãèan kúrú, káí-kgꞌaise ẽe dtcòm̀s dim xꞌáém di ne koe.
\s Còo di zi dqàèku zi hẽé naka tsgám̀ku zi hẽéthẽé e
\p
\v 11 Bóò, nta noose kaia hãa góá ner ko tséékagu sa, ncẽer ko \add ncẽeska\add* tshàua te cgoa góá máá tu u ka.
\p
\v 12 Gane ẽe ko chùi tu u qꞌãe nqãa-qgai khòoè tu gha ka nea ko cgàam koe qãè-qgóósean cúíga tcꞌẽe, nxãasega ne gha Krestem dis xgàus domka táá xgàraè ka.
\v 13 Gane ẽe qꞌãe nqãa-qgai khòoèa nea gane ka xꞌáèan qgóóa qari tama khama, igaba ne ko tcꞌẽe gatu méé tu qꞌãe nqãa-qgai khòoè sa, nxãasega ne gha gatu dim cgàam koe dqo̱m̀se ka.
\v 14 Igaba tíí ka, cuiskagar cꞌẽes gúùs koe dqo̱m̀sea hãa tite, gatá dim Xꞌaigam Jeso Krestem dis xgàus koe cúí oose. Gaas koer guu a nqõó ba xgàua mááèa, ra tíí nqõó ba xgàua mááèa.
\v 15 Qꞌãe nqãa-qgai khòoè sa kana qꞌãe nqãa-qgai khòoè tama sa gúù méé tama khama, igabam ko Nqari ba ka̱bas kgꞌõè sa kúrúa máá ta a\f + \fr 6:15 \fq ka̱bas kgꞌõè sa kúrúa máá ta a - \ft Gerika sa ko cꞌẽe zi kgꞌui zi tséékagu ncẽe ko máá: “ka̱base kúrúèa hãam nqõóm” khama ma, témé zi.\f*.
\v 16 Tòókuan hẽé naka thõò-xama-máákuan hẽéthẽé méé i gane ẽe ko ncẽem xꞌáè-kgꞌáḿ ba xùri ne cgoa hãa, \add gane hẽé\add* naka Nqarim di ne Iseraele ne hẽéthẽé e.
\p
\v 17 Còo dis ka méé i cꞌẽe khóè ga táá cgꞌãèan kúrúa máá te guu, cgáé-qꞌooa te koer Jesom domka xgàrakuan di zi xꞌáí zi úúa hãa ke.
\p
\v 18 Cgóm̀kuan Xꞌaigam Jeso Krestem di méé i gatu dim tcꞌẽem cgoa hãa, tíí qõe ga tuè. Amen.