\id 1TH - Naro NT [nhr] -Botswana 2012 (web 2014)
\h 1 TESALONIKA NE
\toc1 1 Tesalonika ne
\toc3 1Tes
\mt1 1 TESALONIKA NE
\mt2 Paulom dis tcgãyas tcꞌãà di sa
\mt2 Tesalonika ne koe
\imt Téé-cookgꞌai sa
\ip Tesalonika ba kò xꞌáé-dxoom Roma ne di me e, Maketonia koe hàna ba. Paulo ba kò gaa koe xgaa-xgaa, ẽem ko Filipi koe guu ka, si kò kereke sa gaa koe tshoa-tshoase (Tsee 17:1-9).
\ip Káí ne qhàò zi di ne kò Juta ne di cauan koe tcãàn tcaoa hãa, a kò Paulom di xgaa-xgaan komsana, igaba ne kò Juta ne tshoa-tshoa a tauan tcãà a ne a ntcoeku. Paulo ba kò Tesalonika koe chùia tcgꞌòóè, a ba a Berea koe qõò (Tsee 17:10). Gaa koem kò hànaa, a síí Korinta koe tcãà, kam kò Paulo ba gam ka cꞌẽem Timoteom koe tchõàn kóḿ, Tesalonika koe hànas kerekes di téé-qꞌooan ka.
\ip Tcꞌãà dis tcgãyas Paulom di sa kò Tesalonika ne góá mááèa hãa, gaa koe hãa ne dtcòm̀-kgꞌao nes gha ghùi-ghui tcáó, a sa a ntcàm ne ka. Gane di dtcòm̀an hẽé naka ncàm̀kuan hẽéthẽé di tchõà nem ko qãè-tcaoa máá. Tcꞌẽe-tcꞌẽesekagu nem ko, kgꞌõès ẽem kò gane cgoa hãa xꞌaè kam kò kgꞌõè sa, a ba a kò nxãaska Kreste ba gha n-cáḿa hàà di zi tẽè zi ẽe kò ghùièa hãa zi xo̱a. Cꞌẽes tẽè sa kòo máá: “Dtcòm̀-kgꞌaom ncẽe kò Krestem hàà tama cookgꞌai koe xꞌóóa hãa ba gha kháé chõò tama kgꞌõèan úúa?” témé sa. Si kò cꞌẽes tẽè sa máá: “N-cáḿa ba gha Kreste ba gaicara ka̱bise a hàà?” témé. Paulo ba kò ncẽem xꞌaè ba séè a bìrí ne, nqooa hãase méé ne tséé sa, nqòò sa úúa hãase Kreste ba gha ka̱bise a hàà di sa.
\ib
\ip Qaa-qaa sa kgꞌuia ne:
\io1 - ncàm̀ku
\io1 - Jeso ba ko gaicara ka̱bise a hàà \ior (1:10; 3:13; 4:13–5:11) \ior*
\ib
\ip Tcgãyas qꞌoo koe hàna zi:
\io1 - Qãè-tcaoa máákuan hẽé naka dqo̱m̀kuan hẽéthẽé e \ior (1–3) \ior*
\io1 - Nqari ba ko qãè-tcaokagus kgꞌõè sa \ior (4:1-12) \ior*
\io1 - Xgaa-xgaan Krestem di hààn di i \ior (4:13–5:11) \ior*
\io1 - Còo di ghùi-ghui-tcáókua ne \ior (5:12-28) \ior*
\c 1
\ms Qãè-tcaoa-máákuan hẽé naka dqo̱m̀kuan hẽéthẽé e (1–3)
\s Tsgám̀kaguku zi
\p
\v 1 Paulo ra a, a Silefano\f + \fr 1:1 \fk Silefano - \ft Silefanom di cꞌẽe cgꞌõèa nea Silase e.\f* ba hẽé naka Timoteo ba hẽéthẽé tsara cgoa hãa,
\p xae ko \add ncẽes tcgãya sa\add* Tesalonika dis xgꞌaes ncẽe Nqarim gatá ka Xõò ba hẽé naka Xꞌaigam Jeso Kreste ba hẽéthẽé tsara koe hãa sa góá máá, a ko máá:
\p Cgóm̀kuan hẽé naka tòókuan hẽéthẽé méé i gatu cgoa hãa, témé.
\s Tesalonika ne dis kgꞌõè sa hẽé naka dtcòm̀ sa hẽéthẽé e
\p
\v 2 Wèéa tu domka xae ko wèé xꞌaè ka Nqari ba qãè-tcaoa máá, a ko sixae di còrèan koe gatu ka kgꞌui,
\v 3 a ko Nqarim gatá ka Xõòm cookgꞌai koe wèé xꞌaè ka tcꞌẽe-tcꞌẽese: gatu kúrúa hãa tsééan dtcòm̀an di hẽé, naka gatu di tsééan ncàm̀kuan di hẽé, naka gatá dim Xꞌaigam Jeso Krestem koe nqòòan ka tu qarika tẽes ka hẽéthẽé e.
\p
\v 4 Tíí qõe ga tu Nqarim ka ncàm̀mèa tuè, qꞌana xae hãa nxárám tcgꞌòó tua hãa sa \add Gam di tu gha ii ka\add*.
\v 5 Sixae di qãè tchõà nea kò gatu koe kgꞌui iise cúí hàà tama khama, igaba i kò qarian cgoa hẽé, Tcom-tcomsam Tcꞌẽem cgoa hẽé naka kaisa tcoman cgoa hẽéthẽé hàà. Tu qꞌana hãa nta xae kòo ma gatu xgꞌaeku koe gatu domka kgꞌõè sa.
\v 6 A tu a kò hàà sixae hẽé naka Xꞌaiga ba hẽéthẽé di tu serè-kgꞌao tu kúrúse. Eẽta i kò ma xgàrakuan hãa igaba tu kò Tcom-tcomsam Tcꞌẽem koe guua qãè-tcaoan cgoa kgꞌui ba séèa mááse khama.
\v 7 A tu a kò ncẽem dàòm ka, wèé ne dtcòm̀-kgꞌao ne Maketonia hẽé naka Akaia hẽéthẽé koe hàna ne koe xꞌáí sa kúrúse.
\v 8 Xꞌaigam dim kgꞌuim gatu koe guua ba kò Maketonia hẽé naka Akaia koe hẽéthẽé cúí síí tama, igabaga i kò gatu di Nqarim koe dtcòm̀an wèé za ga qꞌãaè, nxãasega i gha cꞌẽe gúù xae gha nxàe sa táá qaase ka.
\v 9 Gaa nea ko gane ka nxàe, nta tu kò ma hààkagu xae e sa khama. A ne a ko gataga nxàe, nta tu kò ma kúrúa mááseèa hãa nqárìan ma tcgꞌoaragu a Nqarim koe ma ka̱bise sa, a síí kgꞌõèa hãa a tseegu dim Nqari ba tsééa máá sa,
\v 10 naka tu ma Cóásem nqarikgꞌai koe gha guu a hàà ba ma qãà hãa sa, ncẽem kò xꞌooan koe ghùi ba, Jesom ncẽe hààko xgóàn koe ko kgoara ta a ba.
\c 2
\s Paulom di tsééa ne Tesalonika koe
\p
\v 1 Tíí qõe ga tuè, qꞌana tu hãa, sixae dis dàras gatu xae kò dàra tu ua hãa sa kò kgꞌamaga di tama sa.
\v 2 Hàà tama xae hãa cookgꞌai koe xae kò ma Filipi koe xgàraè sa hẽé, naka xae kò ma sau-saugase qgóóè sa hẽéthẽé tu qꞌana hãa. Igaba xae kò sixae dim Nqarim koe qarian hòò, a qãè tchõàn kgoarasease kgꞌui cgoa tu u, ẽeta i kò ma kaisa ntcoekuan hãa igaba.
\v 3 Sixae di xgaa-xgaa ne kàma, kana cgꞌurigam dàòm di, kana kàan di tama khama.
\v 4 Igaba xae ko Nqarim ka tcommèa hãa, a xae a qãè tchõàn xgaa-xgaan dis tséé sa máàèa hãa khama ma kgꞌui, khóèan xae gha qãè-tcaokagu ka tamase, igabaga xae gha Nqari ba qãè-tcaokagu ka, ncẽe ko tcáóa xae kúrúa bóò ba.
\v 5 Tu qꞌana hãa, wèé xꞌaè ka xae kò táá qàe-qaekuan di kgꞌuian cgoa hàà cgae tu u sa, a xae a kò táá sixae di tsééan kúrú, cꞌẽe gúù xae gha gatu koe hòò domka - Nqari ba sixae dim tééa-máá-kgꞌao Me e!
\v 6 Gataga xae kò khóèan ka xae gha dqo̱m̀mè sa qaa tama, gatu kaga igaba kana cꞌẽe khóèan kaga igaba.
\p
\v 7 Krestem di xae xꞌáè úú-kgꞌao\f + \fr 2:7 \fk xꞌáè úú-kgꞌao - \ft Gerika sa ko “apostolo” témé.\f* xae iise xae ga kò káí gúùan qaa cgae tua hãa, igaba xae kò gatu xgꞌaeku koe tcꞌaua xae khóè xae e, khóès gas di cóán ko qãèse qꞌõés khama ma.
\v 8 A xae a kò kaisase xgónè tua hãa, domka xae kò kgꞌónòsea hãa, táá xae gha Nqarim di qãè tchõàn cúí máà tu u ka, igabaga xae gha thẽé sixae di kgꞌõèan tcgꞌòóa máá tu u ka, tseegukaga tu kò sixae koe kaisase ncàm̀-ncamsa tu u khama.
\v 9 Qanega tu qꞌana hãa, tíí qõe ga tuè, sixae di tsééan hẽé naka qóḿ cgoa qgóókuan hẽéthẽé ka. Nqarim di qãè tchõàn xae kò xgaa-xgaa tu u, a xae a kò ntcùú ba hẽé naka koaba ba hẽéthẽé tséé, táá xae gha gatu ka cꞌẽean ga qóḿ ba qgóókagu ka.
\p
\v 10 Gatu hẽé naka Nqari ba hẽéthẽéa gha ncẽes gúù sa nxàea tseegukagu, sixae di qgóóse-kgꞌáḿa ne kò gatu \add dtcòm̀-kgꞌao tu\add* koe qꞌano o, a tchàno o, a cúí cgꞌuri ga úú tama khama.
\v 11 Gataga tu qꞌana hãa, xae ko ma gatu ka cꞌẽem wèé ba ma qgóó sa, ẽem ko ma cóán ka xõò ba ma cóán qgóó khamaga ma,
\v 12 naka xae kò ko ma ntcàm, a korè, a ko Nqarim koe ma qarika bìrí tu u sa hẽéthẽé e, Nqari ba kgꞌanoa hãas kgꞌõè sa tu gha kgꞌõè ka, ncẽe ko Gam di xꞌaian hẽé naka xꞌáàn hẽéthẽé koe tcii tu u ba.
\p
\v 13 Nqari ba xae ko chõò tamase qãè-tcaoa máá, ẽe xae kò kgꞌui ba xgaa-xgaa tu u ka tu kò cám̀ tshàua máá me khama. Khóèan koe guua hãam kgꞌuim iise tamase, igaba Nqarim koe guuam kgꞌuim iise, ncẽem tseeguan kaga ii khamaga ma, \add Nqarim\add* ncẽe ko gatu dtcòm̀-kgꞌao tu koe tséé ba.
\v 14 Tíí qõe ga tuè, Jutea koe hàna zi kereke zi Nqarim di zi, ncẽe Jeso Krestem di zi koe kúrúsea hãa sa gatu koe thẽé kúrúsea. Gatu di ne khóè ne ka tu kò xgàraè, ncẽe gane kò ma Juta ne ka ma xgàraè khamaga ma.
\v 15 \add Juta ne\add* ncẽe kò Xꞌaigam Jeso ba hẽé naka porofiti xu hẽéthẽé cgꞌõo, a xhàiagu xae e ne, ncẽe Nqari ba qãè-tcaokagu tama ne, a ko wèé khóèan cgoa ga ntcoeku ne.
\v 16 Xgáè-kgꞌam xae e ne ko, nxãasega xae gha táá tãá zi qhàò zi di ne cgoa kgꞌui, ne kgoaraè ka. Ncẽem dàòm ka i ko wèé xꞌaè ka gane di chìbian càùse a cgꞌoè. I ncẽeska Nqarim di xgóàn còo dis ka hàà cgae nea.
\s Paulo ba gaicara Tesalonika ne dàra kgꞌoana
\p
\v 17 Tíí qõe ga tuè, xòm̀ xꞌaè-coan xae kò gatu cgoa qꞌaa-qꞌaaèa hãa, i kò tcꞌáróa xae gatu xgꞌaeku koe káà a, tcꞌẽea xae ka tamase. Xae gaa domka kaisase xgónè tua hãa, a ko wèé qaria xae cgoa xꞌãà máá, gaicara xae ga bóò tu u sa,
\v 18 síí cgae tu u kgꞌoana xae kò hãa khama. Tíí Paulor tcꞌáróa kò káí qꞌoro tcꞌẽea hãa, síí cgae tu ur gha sa, igabagam kò satana ba xgáè-kgꞌam xae e.
\v 19 Kháé sa nxãaska sixae dis nqòò sa, kana qãè-tcao sa, kana xꞌaian dis cábá sa, ẽe xae gha Xꞌaigam Jesom kò hàà ne xae gha dqo̱m̀se cgoa sa dùú saa? Gatu tama tua? \fig |BK00158.tif| col|||Xꞌaiga ba xꞌaian dis cábá sa cábá hãa|2:19\fig*
\v 20 Tseeguan kaga xae ga dqo̱m̀se cgoa tu u, tu ko qãè-tcaokagu xae e.
\c 3
\p
\v 1-2 Eẽ xae ko ncẽes gúù sa qóḿa máá xaea hãa sa bóò, ka xae kò nxãaska bóòa tcgꞌòó, sixae ka qõesem Timoteo ba xae gha tsééa úú sa, ncẽe sixae khamaga ma Krestem di qãè tchõàn xgaa-xgaa koe Nqarim dim tséé-kgꞌao ba, xae gha sixae cuiaga Atene koe hãa ka. Ncẽes gúù sa xae kò bóòa tcgꞌòó, síím gha gatu di dtcòm̀an koe qari-qari, a korè tu u ka,
\v 3 nxãasega i gha táá cúí-kgꞌáía tu ga ncẽe zi xgàraku zi domka tééa dìbi ka. Gatu igaba tu qãèse qꞌana hãa, ẽe zi xgàraku zim Nqari ba kgoara máá taà hãa sa khama.
\v 4 Eẽ xae ko qanega gatu cgoa hãa ka xae kò xꞌaèan cookgꞌai koe ga bìrí tua hãa, hààko xꞌaè ka ta gha xgàraè sa, si ncẽe sa kúrúsea, ẽe tu ma qꞌana hãa khamaga ma.
\v 5 Gaa domkar kò, ẽer ko bóò si ncẽes gúù sa qóḿa máá tea hãa ka, \add Timoteo ba\add* gatu koe tsééa úú, nxãasega xae gha gatu di dtcòm̀an ka qꞌãa ka, qàe-qaeku-kgꞌao ba gha cꞌẽedaoka qàe-qae tu u, i ga kò sixae di tsééan kgꞌamaga di i khama.
\p
\v 6 Igabam ncẽeska Timoteo ba ka̱bisea hãa, a qãè-tcaokagu xae e ko kgꞌuian cgoa hààra máá xaea hãa, gatu di dtcòm̀an hẽé naka ncàm̀kuan hẽéthẽé di i. Gatagam kò thẽé bìrí xae e, wèé xꞌaè ka tu ko qãè-tcaoan cgoa tcꞌẽe-tcꞌẽese xae e, a bóòa xae xgónèa hãa sa, ncẽe xae ma sixae igabaga ma bóòa tu xgónèa hãa khamaga ma.
\v 7 Tíí qõe ga tuè, gaa domka xae kò gaxae di qóḿan hẽé naka xgàrakuan hẽéthẽé wèé qꞌoo koe gatu di dtcòm̀an ka qgài-qgai tcáóè.
\v 8 Ncẽè Xꞌaigam koe tu kòo qarika tẽe, ne xae gha nxãaska ncẽeska sónòa dìbi a kgꞌõèan hòò khama.
\v 9 Nqari ba xaea gha ntama ma tcꞌãòase gatu domka cám̀ tshàua máá! Kaisase xae ko Gam cookgꞌai koe gatu ka qãè-tcao.
\v 10 Koaba ba hẽé naka ntcùú ba hẽéthẽé xae ko qarika còrè, gatu cgoa xae ga xgꞌae a bóò tu u sa, nxãasega xae gha ẽe gatu di dtcòm̀an koe tcàoa hãa sa càùa máá tu u ka.
\p
\v 11 Ke méé tsara ncẽeska gatá dim Nqarim, ncẽe gatá ka Xõò ba hẽé, nakam gatá dim Xꞌaigam Jeso ba hẽéthẽé tsara dàò ba kgꞌónòa máá xae e gatu koe xae gha síí di ba.
\v 12 Gataga méém Xꞌaiga ba gatu ka cꞌẽea ne koe hẽé naka wèé khóèan koe ga hẽéthẽé kúrú naka i gatu di ncàm̀kuan càùse naka káí, ncẽe xae sixae ma ncàm̀ tua hãa khamaga ma.
\v 13 Nxãasegam gha Nqarim gatá ka Xõò ba gatu di tcáóan qarian máà, tu gha káàn chìbi, a tu a gha Gam cookgꞌai koe tcom-tcomsa ii, ẽem gha ko gatá dim Xꞌaigam Jeso ba Gam di ne tcom-tcomsa ne wèé ne cgoa hàà ka.
\c 4
\ms Nqari ba ko qãè-tcaokagus kgꞌõè sa (4:1-12)
\p
\v 1 Ncẽeska còo dis ka, tíí qõe ga tuè, sixae koe tu xgaa-xgaasea hãa, nta méé tu ma kgꞌõè naka tua Xꞌaiga ba qãè-tcaokagu sa, si ncẽe sa gaas kúrú tu kos ga si i. Igaba xae ko Xꞌaigam Jesom koe dtcàrà a ko korè tu u, a ko máá: ncẽes gúù sa méé tu qarika kúrú, témé.
\v 2 Xꞌaigam Jesom di qarian ka xae kò xꞌáè-kgꞌáḿan máà tu u sa tu qꞌana hãa khama.
\p
\v 3 Ncẽea Nqarim ko ma tcꞌẽe ga a khama, tcom-tcomsakaguè tu gha sa: nxãasega tu gha cgꞌáràn koe ncèèsea hãa ka,
\v 4 nakam wèém khóè ba tcom-tcomsa a tcommèa hãam dàòm ka gam dis khóès cgoa kgꞌõè,
\v 5 cgꞌãè zi tcꞌẽe-kgꞌáḿ zi tcáóa ba ka ncàm̀mèa hãa zi kúrú ka tamase, cgꞌãè tcꞌẽe ne khóè ne Nqari ba cꞌúùa hãa ne ko hẽé khama.
\v 6 Nakam gha nxãasega táá cúím khóèm ga ba ncẽes gúùs ka gam ka cꞌẽe ba chìbian kúrú cgae guu, kana kàa me guu. Xꞌaiga ba gha ẽeta ii chìbian wèé ko kúrú ne xgàra ke, ncẽe xae nxãakamaga ma bìrí tua hãa a ma nxàea tseegukagua hãa khamaga ma.
\v 7 Hàà ta gha qꞌano tamase kgꞌõè kam Nqari ba tcii ta a tama khama, igaba ta gha hàà tcom-tcomsas kgꞌõè sa kgꞌõè ka a.
\v 8 Gaa domkam gha ẽe ko ncẽe xgaa-xgaan xguì ba, khóèm ko méé sa xguì tama, igabam gha ko Nqarim ko méé sa xguì, \add Nqarim\add* ncẽe ko Gam dim Tcom-tcomsam Tcꞌẽe ba máà tu u ba.
\p
\v 9 Ncẽeska gatu ka ncàm̀kuan ka: qaase tama ia góá xae ga máá tu u sa; Nqarim ka tu nxãakamaga xgaa-xgaaèa hãa, tu ga ma ncàm̀ku sa khama.
\v 10 A tu a ko tseeguan kaga wèé ne dtcòm̀-kgꞌao ne Maketoniam wèém di ne koe ncẽe sa kúrú, igaba xae ko dtcàrà tu u, tíí qõe ga tuè, kaisase tu gha gatà hẽé sa.
\p
\v 11 Gataga xae ko thẽé korè tu u, kgàea hãas kgꞌõè sa tu ga kgꞌõè sa, nakam wèém khóè ba gam di zi tséé zi gam ka kúrú naka baà tshàua ba cgoa tsééa mááse, ncẽe xae ma xꞌáè tua hãa khama.
\v 12 Naka tua gha nxãasega cꞌẽe ne khóè ne ka tcommè, naka tua táá cꞌẽe khóèan dtcãàsea hãa guu.
\ms Xgaa-xgaan Krestem di hààn di i (4:13–5:11)
\p
\v 13 Tíí qõe ga tuè, tcꞌẽe tama xae hãa ẽe xꞌóm̀a hãa ne ka tu gha cꞌúùa hãase hãa sa, nxãasega tu gha táá thõò-tcaoase kgꞌae ka, gane ẽe nqòòan úú tama ne khama ma.
\v 14 Ncẽè Jesom xgꞌao xꞌóó a xꞌooan koe tẽea hãa sa ta kòo dtcòm̀, ne ta ko thẽé dtcòm̀, Nqarim gha gane ẽe Gam koe xꞌóm̀a hãa ne Jesom cgoa óá sa.
\v 15 Ncẽea Xꞌaigam dim kgꞌuim nxàe xae kom ga me e khama, ncẽe ko máá: gatá ncẽe kgꞌõèa a qaùa hãa ta cuiskaga ẽe xꞌóm̀a hãa ne ka tcꞌãà naka síía hãa tite, ẽem gha ko Xꞌaiga ba hààm cáḿ ka.
\v 16 Xꞌaiga ba gha nqarikgꞌai koe guu a kaiam dòm̀ cgoa xõa, kaiam moengelem dim dòm̀ ba hẽé naka Nqarim dim nxãàm di qꞌauan cgoa hẽéthẽé e, ne gha ẽe Krestem koe xꞌóóa hãa ne tcꞌãà a ghùiè khama.
\v 17 Nxãaska ta gha gatá ẽe kgꞌõèa a qaùa hãa ta gane cgoa xgꞌae-xgꞌae a túú-cꞌõòs qꞌoo koe hãase ghùiè, a síí Xꞌaigam cgoa tcꞌãá qꞌoo koe xgꞌae, a ta a gha gaa koe guus ka chõò tamase Xꞌaigam cgoa hãa.
\v 18 Gaa domka méé tu ncẽe kgꞌuian cgoa qgài-qgai tcáóku.
\c 5
\s Xꞌaigam di hààn kgꞌónòsea máá
\p
\v 1 Tíí qõe ga tuè, ncẽe zi gúù zi gha hàà kúrúse xꞌaèan hẽé naka cáḿan hẽéthẽé ka xae ga góáa máá tu u sa qaase tama.
\v 2 Gatu igaba tu qãèse qꞌana hãa, Xꞌaigam dim cáḿ ba gha tsꞌãà-kgꞌaom ko ma ntcùú ka hàà khama ma hàà cgae tu u sa khama.
\v 3 Cꞌẽe ne khóè ne gha máá: “Wèé zi gúù zia qãèse hãa, ta qãè qgáì koe hãa,” témé. I gha kúúga cgꞌãèan hàà cgae ne, ncãàn úúas khóès ábàn di thõòan ka ko kúúga hàà cgaeès khama ma, ne cuiskaga nxanagu ana hãa tite.
\p
\v 4 Igabaga tu gatu ntcùús qꞌoo koe hãa tama, tíí qõe ga tuè, me cuiskaga ẽem cáḿ ba tsꞌãà-kgꞌaom ga ma arekagu tua hãa khama ma arekagu tu u tite.
\v 5 Wèéa tu ga xꞌáàm di tu cóá tu u, a koaba di tu cóá tu u khama. Ta ntcùú kana dcùú-qoms di ta cóá ta tama ta a.
\v 6 Ke méé ta táá xꞌóm̀a hãa guu, cꞌẽe ne khama, igabaga méé ta kókòa hãa, naka qgóósean úúa hãa.
\v 7 Eẽ ko xꞌóm̀ ne ko ntcùú ka xꞌóm̀, ne ko ẽe ko nqàre ne ntcùú ka nqàre khama.
\v 8 Igaba ta gatá koaba di ta a, ke méé ta qgóósean úúa hãa naka ta dtcòm̀an hẽé naka ncàm̀kuan hẽéthẽé dxùua ta ko ncèèa máás gúùs khama ma hã̱a, naka taa kgoarakuan dis nqòò sa tcúúa ta ko ncèèa máás cábás khama ma cábá.
\v 9 Nqari ba Gam di xgóàn ka ta gha xgàraè ka nxárá tcgꞌòó ta a tama khama, igabaga ta gha gatá dim Xꞌaigam Jeso Krestem koe kgoarasean hòò ka a.
\v 10 Ncẽe kò xꞌóóa máá ta a ba, ẽem ko hàà xꞌaè ka ta gha nxãasega Gam cgoa xgꞌae a kgꞌõè ka, kgꞌõèa ta ga hãa kana ta ga xꞌóóa hãa igaba\f + \fr 5:10 \fq kgꞌõèa ta ga hãa kana ta ga xꞌóóa hãa igaba - \ft Gerika sa ko máá: “kókòa ta ga hãa kana ta ga xꞌóm̀a hãa igaba,” témé.\f*.
\v 11 Ke méé tu gaa domkaga ncẽe tu ko hẽé khamaga ma korèku naka hùiku.
\ms Còo di ghùi-ghui-tcáókua ne (5:12-28)
\p
\v 12 Tíí qõe ga tuè, dtcàrà tu u xae ko, ẽe ko gatu xgꞌaeku koe tséé ne khóè ne méé tu tcom sa, gane ẽe Xꞌaigam koe tcꞌãà-cookgꞌai tua hãa a ko tchàno-tchano tu u ne.
\v 13 Eẽ ne ko kúrú tsééan domka méé tu kaisa tcoman hẽé naka ncàm̀kuan hẽéthẽé cgoa qgóó ne. Gatu xgꞌaeku koe méé tu tòókuan cgoa hãa.
\v 14 Tíí qõe ga tuè, dtcàrà tu u xae ko, a ko máá: Eẽ ko xgꞌáḿ-kgꞌaiate ne tchàno-tchano, ẽe ko sau-cgaese ne korè, ẽe kgꞌamka ne hùi, naka wèé ne khóè ne koe qáò tcáó ii.
\v 15 Bóò méé tu naka i táá cúí khóè ga cꞌẽean kúrú cgae ana cgꞌãèan domka cgꞌãèan kúrú cgae e guu, igaba méé tu wèé xꞌaè ka, gatu ka cꞌẽe ne hẽé, naka wèé khóèan ga hẽéthẽé tu ga ma qãèan kúrúa máá sa xꞌãà máá.
\p
\v 16 Wèé xꞌaè ka méé tu qãè-tcaoa hãa,
\v 17 naka tua wèé xꞌaè ka còrè.
\v 18 Wèé zi xgꞌaeku zi koe méé tu Nqari ba qãè-tcaoa máá, ncẽea gatu kam ma Nqari ba Jeso Krestem koe ma ncàm̀a hãa ga a ke.
\p
\v 19 Táá méé tu \add Tcom-tcomsam\add* Tcꞌẽe ba xgáè-kgꞌam guu,
\v 20 naka tua táá porofitan ntcoe guu.
\v 21 Wèés gúù sa méé tu qãèse bóòa tcgꞌòó, naka ẽe qãè ii sa qgóóa qari.
\v 22 Qgóóse méé tu wèés gúùs ẽe cgꞌãè iis koe.
\p
\v 23 Nqarim tòókuan di ba méém Gam tcꞌáró-tcꞌaro ka kúrú tu u naka tu wèé zi dàò zi koe tcom-tcomsa ii: gatu di tcꞌẽean hẽé, naka tcáóan hẽé, naka tcꞌáróan hẽéthẽé wèé méé i qãèse qgóóè, naka ia táá cúís chìbis ga sa úú guu nakam nxãakgꞌaiga síí gatá dim Xꞌaigam Jeso Kreste ba hàà.
\v 24 Nqarim ncẽe tcii tua hãa ba tcom-tcomsa Me e, khamam gha ẽem nqòòkagu tua hãa sa kúrú.
\p
\v 25 Tíí qõe ga tuè, còrèa tu máá xae e.
\v 26 Wèé ne dtcòm̀-kgꞌao ne tu tcom-tcomsas xꞌobèkus cgoa tsgám̀.
\v 27 Ra ko Xꞌaigam di cgꞌõèan koe dtcàrà tu u, ncẽes tcgãya sa méé tu wèé ne dtcòm̀-kgꞌao ne nxárá máá sa.
\p
\v 28 Gatá dim Xꞌaigam Jeso Krestem di cgóm̀kuan méé i gatu wèé tu cgoa hãa.