\id 2TI - Naro NT [nhr] -Botswana 2012 (web 2014)
\h 2 TIMOTEO
\toc1 2 Timoteo
\toc3 2Tim
\mt1 2 TIMOTEO
\mt2 Paulom dis tcgãyas cám̀ di sa
\mt2 Timoteom koe
\imt Téé-cookgꞌai sa
\ip Paulom dis tcgãyas cám̀ di sa kò Timoteom ka qꞌãà-qꞌaa, cgꞌárém tcáràm gam dim iise. Paulo ba kò ncẽes tcgãyas koe kaisase qáò tcáóan ka kgꞌui. Timoteo ba kò bìríèa hãa, a ba a ntcàmmèa hãa:
\ili1 - tseegusem gha Jeso Krestem ka nxàea tseegukagu sa,
\ili1 - a gataga tseeguan qãè tchõà di xgaa-xgaan hẽé naka Ncìís Qáé-xgꞌaes dian hẽéthẽém gha qarika qgóó ka,
\ili1 - naka ba gam di tsééan kúrú xgaa-xgaan di i naka Nqarim di kgꞌuian khóè ne máà di hẽéthẽé e,
\ili1 - xgàrasean hẽé naka ntcoekuan hẽéthẽé koem kò hàna igaba.
\ip Paulo ba kò Timoteo ba qꞌãa-qꞌãa, táá méém tchõà úú cgoa guu káà tcꞌẽe a kgꞌamka zi ntcoeku zi (2:23), ncẽe qãèan cúí ga kúrú tama zi, igaba ko kgꞌama khóèan ẽe ko komsana a ko cgꞌuri-cgꞌuri zi.
\ip Gatagam kò qꞌãa-qꞌãa me, ncẽe zi gúù zi wèé zi koe méém Timoteo ba Paulom dis kgꞌõès ka hẽé, naka gam di dtcòm̀an di tsééan ka hẽé, naka qáò tcáóan ka hẽé, naka ncàm̀kuan ka hẽé, naka xgàrasean ka hẽéthẽé xꞌáís iise tcꞌẽe-tcꞌẽese sa.
\ib
\ip Qaa-qaasa kgꞌuia ne:
\ili1 - dtcòm̀ sa
\ili1 - tseegua ne
\ili1 - xgàrase sa
\ib
\ip Tcgãyas qꞌoo koe hàna zi:
\io1 - Xgàrakuan koe méé tsi còoka qõò \ior (1:1–2:13) \ior*
\io1 - Tshúù-ntcõa di xu xgaa-xgaase-kgꞌao xu \ior (2:14–4:5) \ior*
\io1 - Paulom dis téé-qꞌoo sa (4:6-22)
\c 1
\ms Xgàrakuan koe méé tsi còoka qõò (1:1–2:13)
\p
\v 1 Paulo ra a, Jeso Krestem dir xꞌáè úú-kgꞌao\f + \fr 1:1 \fk xꞌáè úú-kgꞌao - \ft Gerika sa ko “apostolo” témé.\f* ra, Nqarim ma tcꞌẽea khama. Tsééar óáèa, hààr gha Nqarim nqòòkagua hãas kgꞌõè sa nxàe ka, kgꞌõès ncẽe Jeso Krestem koe hàna sa.
\p
\v 2 Timoteo tsi tiri tsi cóá tsi ncàm̀-ncamsa tsir ko \add ncẽes tcgãya sa\add* góá máá a ko máá:
\p Nqarim Abo ba hẽé naka Jeso Krestem gatá dim Xꞌaiga ba hẽéthẽé tsara di cgóm̀kuan hẽé, thõò-xama-máákuan hẽé naka tòókuan hẽéthẽé méé i tsáá cgoa hãa, témé.
\s Tcom-tcomsa tsi gha ii dis ghùi-ghui-tcáóku sa
\p
\v 3 Nqari bar ko qãè-tcaoa máá, ncẽer ko qꞌanos tcáós cgoa tsééa máá ba, tiri ne tsgõo ne hẽéa khama, ẽer kò ntcùú ba hẽé naka koaba ba hẽéthẽé tiri còrèan koe káíse tcꞌẽe-tcꞌẽese tsi ka.
\v 4 Eẽr ko tcgáí-tshàraa tsi tcꞌẽe-tcꞌẽese ner ko bóòa tsi xgónè, nxãasegar gha qãè-tcaoan ka cgꞌoè cgaeè ka.
\v 5 Tsaris dtcòm̀s kàa di tama sar ko tcꞌẽe-tcꞌẽese, ncẽe xgꞌao kgꞌaia tsáá tsgõos Loises koe hàna sa naka saòs Enikes koe hẽéthẽé e, ra ncẽeska tcoma hãa tsáá koes gataga thẽé hàna sa.
\v 6 Gaa domkar ko tcꞌẽe-tcꞌẽe tsi, Nqarim di aban tsi gha cꞌees khama ma ntcàm sa. Tiri tshàua ner còrèan cgoa tòó cgae tsia hãa, kgꞌaiga i gaa aban tsáá koe hàna khama.
\v 7 Nqari ba qꞌáò-qꞌáòsean dim tcꞌẽe ba máà ta a tama khama, igabam qarian hẽé, ncàm̀kuan hẽé naka qgóósean hẽéthẽé dim tcꞌẽe ba máà taa hãa.
\p
\v 8 Ke méé tsi gatá dim Xꞌaigam ka nxàea tseegukaguan ka sau-cgaekaguè guu, kana tíí ka hẽéthẽé e, ncẽe Gam domka qáé-nquus koe hàna ra, igabaga méé tsi Nqarim di qarian koe qãè tchõàn domka tíí cgoa xgàrasean koe hãa,
\v 9 Gaam ẽe kgoara taà ba, a kò tcom-tcomsas tciikus cgoa tcii ta a ba, gatá di tsééan domka tamase, igaba Gam di tcꞌẽean hẽé naka Gam di cgóm̀kuan hẽéthẽé domka, ncẽem kò nqõóm tshoa-tshoase tama cookgꞌai koe Jeso Krestem koe máà taa hãa a,
\v 10 i gaa cgóm̀kuan ncẽeska gatá koe xꞌáíèa hãa gatá dim Kgoara-kgꞌaom Jeso Krestem di xꞌáísean koe, ncẽe kò xꞌoo sa kaàkagu ba, a ba a káà tites kgꞌõè sa óága, ncẽe kò hàà qãè tchõàn koe guu a qꞌuu-qꞌuuase xꞌáà sa.
\v 11 Ncẽe qãè tchõàn dir kgꞌui-kgꞌaor gha ii, a xꞌáè úú-kgꞌao ra ii, a xgaa-xgaa-kgꞌao ii kar nxárá tcgꞌòóèa.
\v 12 Gaa domkagar ko ncẽe zi gúù zi koe xgàrase. Igabar saucgae tama, qꞌana ra hãa Dìím koer ko dtcòm̀ sa khama, a tcoman úúa hãa ẽer máàèa hãa sam gha kòre di qari nem úúa sa, me gha nxãakgꞌaiga síí ẽem cáḿ \add Jesom ko hàà\add* ba tcãà.
\p
\v 13 Qgóóa qari kgꞌõèkaguko kgꞌuian ẽe tsi tíí koe kóḿa hãa a, naka xꞌáís iise séè e, naka xùri dtcòm̀an hẽé naka ncàm̀kuan hẽéthẽé e, ncẽe Jeso Krestem koe hãa a.
\v 14 Gatá koe xꞌãèa hãam Tcom-tcomsam Tcꞌẽem di hùian ka méé tsi qãè gúùan ẽe tsi máàèa hãa kòre.
\p
\v 15 Qꞌana tsia, wèé ne ncẽe Asia dim nqõóm koe hãa ne qꞌaumana tea hãa sa, gane koe tsara Fugelo tsara Heremogene tsara hàna.
\p
\v 16 Xꞌaigam \add Nqari\add* ba méém Onesiforom dim xꞌáé ba thõò-xama máá, wèé xꞌaè kam kòo ghùi-ghui tcáó te khama. A kò gataga qáékuan di táùan tiri ka sau-cgaekaguè tama,
\v 17 igaba ẽem ko Roma koe hàà kam kò kgoara tcáó a qaa te, a síí hòò te.
\v 18 Xꞌaiga ba méém kgoara máá me nakam \add Xꞌaigam Jesom ko hààm\add* cáḿ ka, Gam koe thõò-xama-máákuan hòò - qãèse tsi qꞌana hãa, wèé tsééan ẽem Efeso koe kúrúa hãa a.
\c 2
\s Qãèm ncõo-kgꞌaom Jeso Krestem di ba
\p
\v 1 Timoteo, tiri cóáè, Jeso Krestem di cgóm̀kuan koe méé tsi qari ii.
\v 2 Káí zi gúù zi tsi kò kóḿ ra kò xgaa-xgaa, ncẽe kò káí ne khóè ne ka nxàea tseegukaguè zi. Ncẽe zi gúù zi tcom-tcomsa ne khóè ne xgaa-xgaa, ncẽe gha gataga kgoana a cꞌẽe ne xgaa-xgaa zi ne.
\p
\v 3 Xgàrasean koe \add sita\add* cgoa hãa, qãèm ncõo-kgꞌaom Jeso Krestem dim khama ma.
\v 4 Wèém ncõo-kgꞌaom ẽe tsééan koe hãa ba, ẽe ncõo-kgꞌao tama ne khóè ne di tsééan koe tcãà tama - gam dim tcꞌãà-cookgꞌaim cúí bam qãè-tcaokagu kgꞌoana hãa khama.
\v 5 Ncẽè khóèm kò ko qàròs koe qàrò nem tàà-kgꞌao ba kúrúè tama khamaga ma, igaba qàròs di zi xꞌáè-kgꞌáḿ zim kò xùria hãa ne cúíga a.
\v 6 Eẽ ko xháràm koe qarika tséém xhárà-kgꞌao ba méém gam tcꞌãà a ko xháràm di tcꞌõoan tcꞌõó ba ii.
\v 7 Tcꞌẽe-tcꞌẽese kgꞌuir ko zi gúù zi, Xꞌaigam \add Nqari\add* ba gha wèé zi ncẽe zi koe kóḿa qꞌãan máà tsi ke.
\p
\v 8 Jeso Kreste ba tcꞌẽe-tcꞌẽese, xꞌooan koe ghùièa hãa ba, Dafitem dis qhàòs koe guua hãa ba. Ncẽe sar ko qãè tchõàn koe xgaa-xgaa,
\v 9 ncẽer ko gaan domka xgàrase e, a gaan domka táùan cgoa qáé a síí qáé-nquuan koe tcãàèa, chìbi-kgꞌaom khama ma. Igabam Nqarim dim kgꞌui ba qáéèa hãa tite.
\v 10 Gaa domkar ẽe nxárá tcgꞌòóèa ne khóè ne domka wèé qóḿan xgꞌaeku koe qarika tẽe, nxãasega ne gha gane igaba Jeso Krestem koe hànas kgoaraku sa hẽé, naka chõò tama xꞌáàn hẽéthẽé hòò ka.
\p
\v 11 Ncẽea tcom-tcomsam kgꞌuim ga me e ncẽe ko máá:
\q1 “Ncẽè Gam cgoa ta kòo xꞌóóa hãa ne
\q2 ta gha gataga thẽé Gam cgoa kgꞌõè.
\q1
\v 12 A ncẽè qóḿan xgꞌaeku koe
\q1 ta ko qarika tééa hãa ne
\q2 ta gha gataga Gam cgoa tcꞌãà-cookgꞌaia hãa.
\q1 Ncẽè cꞌúù me ta kòo
\q2 nem gha Gam igaba cꞌúù ta a.
\q1
\v 13 A ncẽè tcom-tcomsa tama ta kò hãa
\q2 nem gha Gabá tcom-tcomsa ii,
\q1 cuiskagam cꞌúùsea hãa tite khama,”
\q1 ta ko méé ba.
\ms Tshúù-ntcõa di xu xgaa-xgaase-kgꞌao xu (2:14–4:5)
\s Tcom-tcomsam tséé-kgꞌao ba
\p
\v 14 Khóè ne méé tsi ncẽe zi gúù zi tcꞌẽe-tcꞌẽesekagu. Nqarim cookgꞌai koe méé tsi mẽékuan di kgꞌuian koe dqàè ne, ncẽe káà hùi i, a ko ẽe ko kóḿ m ne koe cgꞌãè tcꞌẽean cúí ga tcãà a.
\v 15 Wèé tcáóa tsi cgoa kúrú naka Nqarim koe xꞌáíse, kúrúa bóòku sa tsi tààa hãa a tchàno ii sa. Saucgae ga úú tama tsi tséé-kgꞌao tsi méé tsi ii, ncẽe ko tseeguan dim kgꞌui ba tchànose xgaa-xgaa tsi.
\v 16 Káà hùi kgꞌuian dxãwam di koe tcgꞌoa, ẽe ko gatà ma kgꞌui ne gha cgꞌãè tcáóan ka kaisase cgꞌoè cgaeè ke.
\v 17 Gane di xgaa-xgaa ne gha qꞌombe dis tcììs khama ma tsa̱i-tsa̱ise. Gane xgꞌaeku koe tsara Humenaio ba hẽé naka Fileto ba hẽéthẽé tsara hàna,
\v 18 ncẽe tseeguan koe ho̱àra hãa tsara, a ko máá, xꞌooan koe tẽe sa nxãakamaga kúrúsea hãa, témé, a tsara a ko cꞌẽe ne di dtcòm̀an cgꞌõo.
\v 19 Gatà i ii igabas kò Nqarim dis tshoa-tshoase-qꞌoo sa qarika téé, gas di kgꞌuian tcꞌàmà tòó cgaeèase, ncẽe kòo máá: “Xꞌaigam \add Nqari\add* ba ẽe Gam di ii ne qꞌana” témé e, naka “Wèém khóèm ẽe ko Xꞌaigam \add Nqarim\add* cgꞌõè tcii ba méém cgꞌãèan cgoa qꞌaa,” ta ko méé e.
\p
\v 20 Kaiam nquum koe i gautan hẽé naka seleferan hẽéthẽé di gàban cúí hãa tama, igaba i hìian hẽé naka góḿan hẽéthẽé cgoa kúrúèan ga thẽé hãa. Cꞌẽea ne cgáé zi tséé zi di i, i cꞌẽean kgꞌamka zi tséé zi di i.\fig |HK00143.tif| col|||Qanoan cgoa kúrúèa gàban hẽé naka góḿan cgoa kúrúèa suuan hẽéthẽé e|2:20\fig*
\v 21 A ncẽè khóèm kò ko cgꞌãè zi gúù zi kúrúan koe tcgꞌòóse a ko qꞌano-qꞌanose nem gha cgáé tsééan dim gàba ba ii, tsꞌee-tsꞌeekgꞌaièa ba, a ba a qꞌõòsem koe tsééan úúa, a kgꞌónòsea máána hãa wèé tsééan qãèm gha kúrú sa.
\p
\v 22 Tcgꞌoaragu cgꞌãè zi qgóóse-kgꞌáḿ zi qárí-kgꞌao-coan di zi, naka tsia tchànoan hẽé, dtcòm̀an hẽé, ncàm̀kuan hẽé naka tòókuan hẽéthẽé xꞌãà máá, gane ẽe ko Nqari ba qꞌanos tcáós cgoa tcii ne cgoa hãase.
\v 23 Táá tchõà úú cgoa guu káà tcꞌẽe a kgꞌamka zi ntcoeku zi, qꞌana tsi hãa zi ko mẽékuan óága ke.
\v 24 Nqarim dim qãà ba méém táá mẽéku di ii guu, igaba méém wèé khóèan koe qãè ii. Gataga méém kgoana naka ko xgaa-xgaa, naka baa tcꞌaua hãa.
\v 25 Gane ẽe ko ntcoe me ne méém kgàesase xꞌáè-kgꞌáḿan máà. Cꞌẽedaokam gha Nqari ba gane di chìbian koe tcóósekagu ne, ne gha tseeguan qꞌãa,
\v 26 a ne a gha qãèse tcꞌẽea ka̱bi, a dxãwam dis ntcóm̀ sa nxãa. Ntcóm̀s ncẽe dxãwam ka ne kò qgóóèa hãa sa, wèés gúùs gam ko tcꞌẽe sa ne gha kúrú ka.
\c 3
\s Còo di xu cáḿ xu
\p
\v 1 Ncẽes gúù sa méé tsi qꞌana hãa: Còo di xu cáḿ xu ka i gha cgꞌãè xꞌaèan hãa sa.
\v 2 Khóè ne gha gane ka ncàm̀se, a marian ncàm̀, a koase, a bóòse, a cgúíku di, a gane di xõòan táá komsana, a táá qãè-tcaoa mááku, a táá qꞌano,
\v 3 a táá ncàm̀ku, a táá qgóóa mááku, a cꞌam̀ku di, a káà qgóóse, a cgꞌãè tcáó, a táá qãèan ncàm̀,
\v 4 a kàaku di, a tchõà úú tama, a bóòsean ka cgꞌoè cgaeè, a Nqari ba ne gha ncàm̀ xꞌaè ka ka̱rean ncàm̀.
\v 5 Nqari-tcáóa ne hãa dis bóòse-qꞌoo sa ne úúa hãa, igabaga ne gha gaan di qarian xo̱ase. Táá tchõà úú cgoa ne guu.
\v 6 Gane xgꞌaeku koe xu cꞌẽe xu hàna hãa, khóè ne ko tcꞌirì-tcꞌiri a gane di xꞌáéan koe tcãà xu, a kgꞌamka zi khóè zi di tcꞌẽean cgoa qgóé xu, cgꞌãè cauan ka cgꞌoè cgaeèa zi, a wèé tcꞌẽean cgꞌãè ka qgóó qarièa hãa zi;
\v 7 wèé xꞌaèan ncẽe kaga ko xgaa-xgaase, igabaga kgoana naka tseeguan bóòa qꞌãa tama zi.
\v 8 Khóè ne ncẽe ne ko tseeguan ntcoe, Janesea tsara Jamberesea tsara kò ma Moshe ba ma ntcoea khamaga ma. Xꞌóó-xꞌoo tcꞌẽeèa ne khóè ne e, dtcòm̀an koe cgꞌãa-cgꞌana ne.
\v 9 Igabaga ne cuiskaga nqúù ka qõòa hãa tite. Gane di káà tcꞌẽe ne gha wèém khóèm koe qꞌanose bóòse khama, \add Janesea tsara Jamberesea\add* tsara ka i kò ma ii khamaga ma.
\s Còo di xꞌáè-kgꞌáḿa ne
\p
\v 10 Igabaga méé tsi tsáá wèés gúùs ẽer ko xgaa-xgaa sa kúrú: kgꞌõè-kgꞌáḿa te hẽé, bìrísea ra hãa sa hẽé, tiri dtcòm̀an hẽé, tiri qáò tcáóan hẽé, tiri ncàm̀kuan hẽé, qáò xꞌaèan qgóóse a tsééan hẽéthẽé e.
\v 11 \add Qꞌana tsi hãa\add* qóḿ cgoa qgóókuan tiri ka, naka wèé xgàrasean ncẽe Antioke koe hẽé, Ikonio koe hẽé, naka Lusetera koe hẽéthẽé kúrúse cgae tea hãa ka. Qóḿ cgoa qgóókuan ncẽe koer kò qáò tcáóse hãa, igabagam kò Xꞌaiga ba ẽe zi gúù zi wèé zi koe kgoara te.
\v 12 Tseegukaga, wèé ne khóè ne ẽe Jeso Krestem koe Nqari-tcáóa hãase kgꞌõè kgꞌoana ne gha cꞌẽe ne ka xgàraè.
\v 13 Ne gha cgꞌãè tcꞌẽe ne hẽé naka khóèan ko kàa ne hẽéthẽé gane di cgꞌãè cauan ka càùse cgaeè. Khóèan ne ko qàe-qae, a ne a ko thẽé qàe-qaeè khama.
\v 14 Igabaga méé tsi tsáá ẽe tsi xgaa-xgaasea hãa, a kaisase dtcòm̀a hãa zi koe hãa, dìín koe tsi xgaa-xgaase zia hãa sa tsi qꞌana hãa ke.
\v 15 Cgꞌáré-qꞌooa tsi koe tsi kò guu a tshoa-tshoa a ma tcom-tcomsa zi Tcgãya zi \add Nqarim di zi\add* ma qꞌana hãa khama, ncẽe ko kgoana a qãè tcꞌẽean qꞌãa di máà tsi zi, Jeso Krestem koe dtcòm̀ a kgoaraèan di i.
\v 16 Wèés Tcgãya sa Nqarim koe guua hãa, a xgaa-xgaan hẽé, naka dqàèkuan hẽé, naka tchàno-tchanokuan hẽé, naka tchànoan ka xgaa-xgaan hẽéthẽé di tsééan úúa;
\v 17 nxãasegam gha Nqarim dim khóè ba tcꞌãòa hãa xgaa-xgaasean úú, a gha wèés tséés qãè sa kgꞌónòsea máána hãa ka.
\c 4
\nb
\v 1 Jeso Krestem ko kháóa hàà qhúí a Xꞌaigam khama ma tcꞌãà-cookgꞌai nem gha kgꞌõèa ne hẽé naka xꞌooa ne hẽéthẽé bóò qꞌoo a xgàra. Nqari ba hẽé naka Jeso Kreste ba hẽéthẽé tsara cookgꞌai koer ko ncẽem xꞌáè ba máà tsi:
\v 2 Nqarim dim kgꞌui ba méé tsi xgaa-xgaa, naka tsia qgóóa qari me, xꞌaè zia ga qãè zia kana zia ga xꞌaè zi tshúù zi i igaba, naka khóè ne tchàno-tchano, naka \add qaase i ko koe\add* dqàè ne, naka korè ne. Wèé xꞌaè ka méé tsi qáò tcáóan cgoa xgaa-xgaa ne.
\v 3 Xꞌaè ba gha hàà, khóè ne cuiskaga qãè xgaa-xgaan komsana tite ba, igaba ne gha gane ko tcꞌẽe zi xùriate, a ne a gha káí xgaa-xgaa-kgꞌaoan qaara mááse, ncẽe gha ẽe ne gane kóḿ kgꞌoana hãa sa bìrí ne e.
\v 4 Tseeguan ne gha táá komsana, a gha huwan koe tòóse.
\v 5 Igaba méé tsi tsáá wèés téé-qꞌoos koe qgóóse, naka tsia xháé zi koe qarika téé, naka tséé-kgꞌaom qãè tchõàn di ba kúrú, naka tsaris tséés Nqarim di sa qãèse kúrú.
\ms Paulom dis téé-qꞌoo sa (4:6-22)
\p
\v 6 Xꞌaè ba hààraa kgꞌõèa te ko kgꞌáàèkos dàòa-máákus khama ma ntcã̱àè ba, me ncẽes kgꞌõès koer gha guu a xgoaba dim xꞌaè ba tíí koe hààraa.
\v 7 Qãès ncõo sar xꞌãà hãa, a qàrò sa xgꞌara-xgꞌara hãa, a ra a dtcòm̀ sa qgóóa qaria hãa.
\v 8 Ncẽe koe guus kar tààa ra hãa dis cábá sa tòóa mááèa, tchànos kgꞌõè sar kgꞌõèa hãa khama. Xꞌaigam tchànoan dim Xgàra-kgꞌao ba gha \add Jesom ko hààm\add* cáḿ ka máà te si; igabagam tíí cúí ra máà sia hãa tite, a gha wèé ne ẽe qhúím gha ka hãa a ko ncàm̀kuan cgoa qaa Me ne thẽé máà si.\fig |HK 00.tif| col|||Tàà dis cábá sa|4:8\fig*
\p
\v 9-10 Demase ba aagu tea, ncẽem nqõóm \add di ka̱rea nem\add* ncàm̀a hãa khama, a ba a Tesalonika koe qõòa. Me Keresekene ba Galatia koe qõòa, me Tito ba Dalematia koe qõòa, ke méé tsi qarika kúrú naka qháése hàà cgae te.
\v 11 Me Lukam cúí ba tíí cgoa hãa. Mareko ba méé tsi qaa naka hàà cgoa, tiris tséés koem hùian úúa hãa ke.
\v 12 Tigiko bar Efeso koe tsééa úúa.
\v 13 Hàà tsi kòo ne, Teroa koer Karepom koe qaùa hãam qgáím cgoa hàà, Tcgãya zi hẽéthẽé e, káí-kgꞌaise khòo cgoa kúrúèa hãa zi. \fig |HK00153.tif| col|||Tcgãya sa hẽé naka góá hìi ba hẽé naka góá cgoa di nxúìan dis gàba sa hẽéthẽé e|4:13\fig*
\p
\v 14 Alekesanterem qano tséé-kgꞌao ba ẽem kúrú cgae tea hãa cgꞌãèan ka kaisase thõò-xamkagu tea. Kúrúa baa zi tséé zi domkam gha Xꞌaiga ba xgàra me.
\v 15 Tsáá igaba méé tsi thẽé qꞌãa mea hãa, kaisasem ko gaxae ko kgꞌui gúùan ntcoe ke.
\p
\v 16 Tcꞌãà dim cáḿ kgꞌuiar ko máásem ka i kò táá cúí khóè ga tcãà dòm̀ qꞌoo te, igaba ne kò wèéa ne ga aagu te. Nqari ba méém táá chìbi bóò ne guu.
\v 17 Igabagam kò Nqari ba téé dxùukgꞌai te, a qarian máà te, nxãasegam gha Gam dim kgꞌui ba tíí koe guu a qãèse nxàeè ka, tãá zi qhàò zi di ne wèé ne gha qãèse kóḿ me ka. Ra kò gàman kgꞌáḿ-qꞌoo koe kgoaraè.
\v 18 Me gha Xꞌaiga ba wèé zi tséé zi cgꞌãè zi koe kgoara te, a gha kgoarasease nqarikgꞌai di xꞌaian gam di koe úú te. Chõò tamase méém dqo̱m̀mè. Amen.
\p
\v 19 Tsgám̀kagu Perisila khara Akila khara, naka Onesiforom dis xꞌáé-qꞌoos di ne hẽéthẽé e.
\v 20 Eraseto ba kò Korinta koe qaù, ra kò Terofimo ba Mileto koe qaù, tsàam kò ko khama.
\v 21 Kúrú méé tsi qarika naka ncẽe ko hààs saos cookgꞌai koe hàà.
\p Ebolo ba hẽé, naka Putenese ba hẽé, Lino ba hẽé, Kelaudia sa hẽé, naka tsáá qõe ga xu wèé xu hẽéthẽéa ko tsgám̀ tsi.
\p
\v 22 Xꞌaiga ba méém tsarim tcꞌẽem cgoa hãa. Cgóm̀kuan méé i gatu cgoa hãa.