\id JAS - Naro NT [nhr] -Botswana 2012 (web 2014)
\h JAKOBO
\toc1 Jakobo
\toc3 Jak
\mt1 JAKOBO
\mt2 Jakobom dis tcgãya sa
\imt Téé-cookgꞌai sa
\ip Jakobom dis tcgãya sa gúù zi kúrú ta ko kgꞌõèa ta qꞌoo koe zi di xꞌáèan úúa hãa. Tcgãyas Jakobom dis ka tsi kò xòm̀se kgꞌui kgꞌoana ne tsi gha máá: “Ncẽè dtcòm̀ tsi kòo ne méé tsi gataga thẽé ẽe tsi dtcòm̀a hãa sa kúrú. Kgꞌuian hẽé naka tsééan hẽéthẽé méé i qõòa mááku. Tsaris dtcòm̀ sa méés tsari kgꞌõèan qꞌoo koe tséé. Tsaris dtcòm̀ sa méés tsari zi tséé-kgꞌáḿ zi koe xꞌáíse.”
\ip Tãáka zi gúù zi kam ko kgꞌui: qguù sa hẽé naka dxàu sa hẽé, kúrúa bóòku sa hẽé, qãè tchàno-tchanokuan hẽé, tãákase khóè ne qgóó sa hẽé, naka ta̱m di tséé-kgꞌáḿan hẽé, qꞌãa di tcꞌẽean hẽé, mẽékuan hẽé, dqo̱m̀sean hẽé naka cgꞌáré-cgꞌaresean hẽé, cꞌẽe ne bóò a nxàe sa hẽé, qáò tcáóan hẽé, naka còrèan hẽéthẽé e.
\ib
\ip Qaa-qaasa kgꞌuia ne:
\ili1 - qꞌãa di tcꞌẽea ne
\ili1 - dtcòm̀ sa hẽé naka tséé zi hẽéthẽé e
\ib
\ip Tcgãyas qꞌoo koe hàna zi:
\io1 - Dtcòm̀ sa hẽé naka qꞌãa di tcꞌẽean hẽéthẽé e \ior (1:2-8) \ior*
\io1 - Dxàu sa hẽé naka qguù sa hẽéthẽé e \ior (1:9-11) \ior*
\io1 - Kúrúa bóòkuan hẽé naka qàe-qaekuan hẽéthẽé e \ior (1:12-18) \ior*
\io1 - Kóḿ sa hẽé naka kúrú sa hẽéthẽé e \ior (1:19-27) \ior*
\io1 - Táá méé ta tãákase khóèan qgóó guu \ior (2:1-13) \ior*
\io1 - Dtcòm̀ sa hẽé naka tséé zi hẽéthẽé e \ior (2:14-26) \ior*
\io1 - Dtcòm̀-kgꞌao ba hẽé naka ta̱m ba hẽéthẽé e \ior (3:1-18) \ior*
\io1 - Dtcòm̀-kgꞌao ba hẽé naka nqõó ba hẽéthẽé e \ior (4:1–5:6) \ior*
\io1 - Tãáka zi xꞌáè-kgꞌam zi \ior (5:7-20) \ior*
\c 1
\ms Dtcòm̀ sa hẽé naka qꞌãa di tcꞌẽean hẽéthẽé e (1:2-8)
\p
\v 1 Tsgám̀kagu tu ur ko, tíí Jakobo ra, qãàr Nqarim di ra, a Xꞌaigam Jeso Krestem di ra,
\p nxãa ra ko 12 zi qhàò zi, ncẽem nqõóm koe tsa̱i-tsa̱isea hãa zi \add ncẽes tcgãya sa\add* góá máá.
\p
\v 2 Tíí qõe ga tuè, ndaka xꞌaè ga igaba tu ko tãáka zi kúrúa bóòku zi cgoa xgꞌae igaba méé tu kaisase qãè-tcaoa máá zi.
\v 3 Qꞌana tu hãa, gatu di dtcòm̀an di kúrúa bóòkua ne ko qarika-téékagu tu u sa ke.
\v 4 Igaba méé i \add gatu di\add* qarika tééan tchànos tséé sa kúrú, naka tu gha nxãasega wèé za ga tchàno ii, naka káàn chìbi ii, naka tua gha cꞌẽe gúù kaga táá tcàoè guu.
\p
\v 5 A ncẽè gatu ka cꞌẽem kòo tcꞌẽean tcào ne méém Nqarim ncẽe ko qãè-tcáóase hẽé naka cgóm̀aase hẽéthẽé wèém khóè ba máà ba dtcàrà, nxãaskam gha máàè e ke.
\v 6 Igaba méém dtcòm̀an úúa hãase dtcàrà, káí tcꞌẽe tamase, gaam ẽem káí tcꞌẽe ba tshàan di qhonèan khama ii ke, ncẽe ko tcꞌãán ka xàbùè, a ko ka̱bi-ka̱bise e,
\v 7-8 ẽem khóèm káí zi gúù zi ko tcꞌẽe ba kana gam di zi dàò zi koe kgòe tama ba méém táá tcꞌẽea máá, cúí gúù gam gha Xꞌaigam \add Nqarim\add* koe hòò, ta tcꞌẽea guu khama.
\ms Dxàu sa hẽé naka qguù sa hẽéthẽé e (1:9-11)
\p
\v 9 Dtcòm̀-kgꞌaom ẽe nqãaka hàna ba méém dqo̱m̀se, tcꞌamaka hànas téé-qꞌoos \add ẽe Nqarim máà mea hãas\add* domka.
\v 10 Gataga méém qguùam khóè ba Nqarim cookgꞌai koem nqãaka hàna sa qꞌãa, dcãan di xꞌaan khamam gha ma kaà ke.
\v 11 Cáḿ sa ko kùruan cgoa qaò, a sa a dcãan nqa̱ikagu, i gaan di xꞌaan tcheè, i gaan di tꞌõèan kaà khama. Gatagam gha ma qguùam khóè ba ma kaà gam di tsééan koe hãa a.
\ms Kúrúa bóòkuan hẽé naka qàe-qaekuan hẽéthẽé e (1:12-18)
\p
\v 12 Tsꞌee-tsꞌeekgꞌaièa baa, khóèm ẽe ko kúrúa bóòkuan koe qarika téé ba. Ncẽè kúrúa bóòkua nem kò tààa hãa nem gha cábás kgꞌõèan di sa cábákaguè khama, ncẽe Nqarim ẽe ncàm̀ Mea hãa ne nqòòkagua hãa sa.
\v 13 Khóèm ẽe ko kúrúa bóòè a ko chìbian koe tcãàè ba méém táá máá: “Nqari ba ko chìbian koe tcãà te,” témé guu. Nqari ba cuiskaga cgꞌãèan ka chìbian koe tcãàè tite, a ba a gataga Gabá cuiskaga khóèan chìbian koe tcana hãa tite ke.
\v 14 Igaba i ko khóèan ncẽeta iim dàòm ka chìbian koe tcãàè: khóè ba ko gam tcꞌáró-tcꞌaro di tcꞌẽean ka cgꞌãèan koe tcéèa úúè, a síí ntcóm̀s koe qaè.
\v 15 I ko nxãaska gam di cgꞌãè tcꞌẽean ẽe i kòo càùse ne chìbian xàm, ne i ko chìbian ẽe kai, a xꞌooan óá.
\p
\v 16 Táá méé tu qàe-qaeè guu, tíí qõe ga tu ncàm̀-ncamsa tuè.
\v 17 Wèés kamas cgáé sa hẽé, naka wèés abas tchàno sa hẽéthẽé sara tcꞌamaka guua, a ko xõa Xõòm xꞌáàn dim koe guu a, ncẽe Gam koe i cúí gúù ka̱bièa ga káà a ba, kana sóm̀an khama ka̱bi-ka̱bise tama ba.
\v 18 Gam di tcꞌẽean koem kò ábà ta a, kgꞌuim tseeguan dim koe guu a, nxãasega ta gha \add Gam di ta khóè ta tcꞌãà di ta ii\add* ka, Gam ka kúrúèa zi gúù zi koe, tcꞌãà di tcꞌõoan xháràm di khama.
\ms Kóḿ sa hẽé naka kúrú sa hẽéthẽé e (1:19-27)
\p
\v 19 Qꞌãa méé tu ncẽe sa, tíí qõe ga tu ncàm̀-ncamsa tuè. Wèém khóè ba méém qháé ii komsanan koe, naka kgꞌuian koe ão ii, naka ba ão ii xgóàn koe.
\v 20 Khóèm di xgóà ne Nqarim ko tcꞌẽe tchànoan koe síí tama khama.
\v 21 Gaa domka méé tu cgꞌãè gúùan kúrúan hẽé naka cgꞌãèan kaikaguan hẽéthẽé chõòkagu, naka cgꞌáré-cgꞌarese naka \add Nqarim dim\add* kgꞌuim gatu koe xháráèa ba hòòa mááse, ncẽe kgoara tu um gha di qarian úúa ba.
\p
\v 22 \add Nqarim dim\add* kgꞌui ba ko komsana tu méé tu ii. Kgꞌui ba kóḿs cúí sa tu kò kúrú, ne tu gha ko qàe-qaese.
\v 23 Khóèm kò \add Nqarim dim\add* kgꞌuim dim kóḿ-kgꞌao ba ii, a ba a kúrú-kgꞌao ba ii tama nem ncẽeta iim khóèm khama ii khama: ncẽe ko ábà cgoaèa bas kgꞌáí sa bóò-kgꞌáís koe bóò ba.
\v 24 Ntcáàsem ko xgꞌara a qõò, a ba a kúúga cꞌurù ntam kò ii sa khama.
\v 25 Igaba gaam ẽe ko tchàno xꞌáèan koe bóò ba, xꞌáèan ncẽe kgoara tu u ko o, a ba a ko qgóóa qari i ba, nxãa ba gha gam di kúrúan koe tsꞌee-tsꞌeekgꞌaiè, ncẽe \add xꞌáèan\add* cꞌurù tamam kóḿ-kgꞌao ba, igaba kúrú-kgꞌao ii ba.
\p
\v 26 A ncẽè khóèm kò bóò, dtcòm̀a nem úúa sa ne, igabam ko gam dim ta̱m ba qgóó tama, a ko tcáóa ba qàe-qae, ne i gam di dtcòm̀an cgꞌãa-cgꞌana di i.
\v 27 Dtcòm̀s ncẽe Nqarim gatá ka Xõòm cookgꞌai koe qꞌano a chìbi úú tama sa ncẽe si i: khãadoma cóán hẽé naka dxàe-ntcõan hẽéthẽé gaan di xháéan koe kòre si i, naka nqõóm koe káà cgꞌurise qgóóse sa hẽéthẽé e.
\c 2
\ms Táá méé ta khóè ne tãákase qgóó guu (2:1-13)
\p
\v 1 Tíí qõe ga tuè, gatá dim xꞌáàkom Xꞌaigam Jeso Krestem koe tu kò dtcòm̀an úúa hãa, ne méé tu táá tãákase khóèan qgóó guu,
\v 2 Cꞌẽedaokam kòo gautan di tcãà tshàuan hẽé naka tꞌõè qgáían hẽéthẽé ha̱nam khóè ba gatu dim còrè-nquum koe tcãà, me gataga dxàuam khóèm cgꞌãa-cgꞌana qgáían ha̱na ba thẽé hàà cgae tu u,
\v 3 tu kò ẽe tꞌõè qgáían ha̱na ba qãèse qgóó, a bìrí me a máá: “Ncẽe qgáìan qãè koe ntcõó,” témé, a tu a ẽe cgꞌãa-cgꞌanasea ba bìrí a máá: “Tsáá méé tsi ẽe koe téé,” témé, kana máá “Nqàrè-kgꞌama te koe góḿankgꞌai koe ntcõó,” témé.
\v 4 Eẽta tu kò hẽé ne tu qꞌaa-qꞌaasean xgꞌaekua tu koe úúa, a tu a ncẽeska cgꞌãè tcꞌẽem xgàra-kgꞌao ba kúrúa hãa!
\p
\v 5 Komsana tu, tíí qõe ga tu ncàm̀-ncamsa tuè. A Nqari ba gáé nqõómkgꞌai koe dxàua ne khóè ne nxárá tcgꞌòóa hãa tama, dtcòm̀an koe ne gha qguù ka, a ne a gha xꞌaian di ne qꞌõò-kgꞌao ne ii, ncẽem kò ẽe ncàm̀ Mea ne nqòòkagua hãa a?
\v 6 Igaba tu ko dxàua ne khóè ne sau-cgaekagu. A qguùa ne tama ne gáé ẽe ko nqãaka úú tu u ne, gane tama nea ncẽe ko qáé-nquuan koe úú tu u ne?
\v 7 A gane tama nea ncẽe ko tꞌõès cgꞌõès \add Krestem di\add* sa cgꞌãèkagu ne, ncẽe gatu koe kò \add ẽe tu ko tcguù-tcguuè xꞌaè ka\add* tciiè sa?
\p
\v 8 A ncẽè tseegukaga tu kò \add Nqarim di\add* xꞌaian di xꞌáèan qgóóa qaria hãa ne, ncẽes ko \add Nqarim dis\add* Tcgãya sa méé khama, a ko máá: “Tsáá ka cꞌẽe ba méé tsi ncàm̀, ẽe tsi ma ncàm̀sea khamaga ma,” témé, ne tu ko qãèse hẽé.
\v 9 Igaba tu kòo khóè ne tãákase qgóó ne tu ko chìbian kúrú, a tu a gha xꞌáèan ka bóòè, chìbi kúrú-kgꞌao tu iise.
\v 10 Dìím wèém ẽe ko wèé xꞌáèan qgóóa qari, igaba ko cúís qgáìs koe tsa̱a a ba wèéan koe ga chìbiga me e khama.
\v 11 Gaam ẽe ko máá: “Táá cgꞌáràn kúrú guu,” témé ba ko gaicara máá: “Táá cgꞌõo guu,” témé khama. A ncẽè cgꞌáràn tsi kò kúrú tama ne, igaba tsi kò cgꞌõo, ne tsi xꞌáèan koe chìbi kúrú-kgꞌao tsi i.
\p
\v 12 Dùús wèés ẽe tu ko kgꞌui a ko kúrús ka méé tu \add tcꞌẽe-tcꞌẽese\add*, ncẽe gha kgoara tu um xꞌáè-kgꞌáḿ ka tu gha xgàraè sa.
\v 13 Nqarim kò hàà ko khóè ne di zi tséé zi bóò qꞌoo, qãè zi i sa kana tshúù zi i sa, nem gaam ẽe kò thõò-xama-máákuan úú tamam koe thõò-xama-máákuan xꞌáía hãa tite khama. Igaba ẽe thõò-xama-máákuan úúa hãam khóè ba chìbi bóòè tite.
\ms Dtcòm̀s tséé tama sa xꞌóóa hãa (2:14-26)
\p
\v 14 Dùú sa i ko hùi, tíí qõe ga tuè, ncẽè khóèm kò ko máá, dtcòm̀a nem úúa, témé, igabam tséékagu u tama ne? A gam di dtcòm̀a nea gha kgoara me?
\v 15 Cꞌẽedaokam kò tsáá qõe ba kana tsáá qões igaba qgꞌaè-cgaea, a tcꞌõo úú tama tcꞌõó ne gha a,
\v 16 me gatu ka cꞌẽe ba gaa khóèan ka máá: “Tòókuan cgoa qõò, hã̱a tu gha, a tu a gha tsáú ke,” témé, ẽe ko cgáé-qꞌooa ne koe qaase gúùan máà ne tamase, ne i ko nxãan dùú sa hùi?
\v 17 Gatà iim dàòm ka i dtcòm̀an xꞌóóa hãa, ncẽè cúíse i kò hàna ne, a tsari tsééan cgoa qõòa mááku tama ne.
\p
\v 18 Igabagam gha cꞌẽem khóè ba xo̱a a máá: “Cꞌẽe khóè nea dtcòm̀an úúa, i cꞌẽean tsééan úúa,” témé.
\m Ra gha nxãaska tẽè a máá: “Xꞌáí te, ntamam gha ma cꞌẽem khóè ba dtcòm̀an úú, igabam tsééa ba koe xꞌáí i tama sa. Nxãaskar gha tíía tiri tsééan koe guu a tiri dtcòm̀an xꞌáí tsi,” témé.
\m
\v 19 A dtcòm̀ tsi ko Nqari ba cúí Me e sa?
\m Qãèse tsi ko hẽé, igabaga \add tsi tcàoa,\add* dxãwa tcꞌẽean ga ko dtcòm̀, a ia a qꞌáòan ka cgùru khama.
\m
\v 20 A xꞌáíè kgꞌoana tsia, tsáá káà tcꞌẽe tsi khóè tsi, tséé tama dtcòm̀a ne káà hùi i sa?
\v 21 Ntama ba kò ma Abrahamam gatá ka xõò ba Nqarim koe tchàno iise bóòè? Gam di tsééan ka a kò ii, ẽem kò ko gam ka cóásem Isaka ba altaram koe úú ka.
\v 22 Bóò tsi ko, dtcòm̀a ne kòo gam di zi tséé zi cgoa tsééa xgꞌae sa, i kò gam di dtcòm̀an tséé zi ka cgꞌoè-cgꞌoeè.
\v 23 Si kò \add Nqarim dis\add* Tcgãya sa tseegukaguè, ncẽeta kòo méé sa: “Abrahama ba kò Nqari ba dtcòm̀, Me Nqari ba gam di dtcòm̀an ka tchànom iise séè me,” témé. Me kò Nqarim dim tcárà ba ta ma tciiè.
\v 24 Bóò tu ko, khóè ba ko gam di zi tséé zi koe guu a tchànom iise bóòè, dtcòm̀s ka cúí tamase.
\p
\v 25 Rahabes cgꞌárà-kgꞌao sa kò tãá za guu a ko nqõó ba ntcáà tsara khóè tsara séè, a sa a tãám dàòm cgoa tsꞌãàkagu tsara a. A ncẽeta hẽéan ka sa gáé kò gataga gas di tsééan koe táá tchànos iise bóòè?
\p
\v 26 Tcꞌẽe ba úú tamam tcꞌáró ba xꞌóóa hãa, i gatà iim dàòm ka dtcòm̀an ncẽe tsééan úú tama a xꞌóóa hãa thẽé.
\c 3
\ms Dtcòm̀-kgꞌao ba hẽé naka ta̱m ba hẽéthẽé e (3:1-18)
\s Ta̱m ba xgaa-xgaa ne
\p
\v 1 Táá méé tu wèéa tu ga xgaa-xgaa-kgꞌaoan kúrú guu, tíí qõe ga tuè. Qꞌana tu hãa, sita ncẽe ko xgaa-xgaa ta ko hàà kaisase thõòse Nqarim ka xgàraè sa ke.
\v 2 Wèéa ta ga ko káí chìbian kúrú khama. Ncẽè cꞌẽem kò cúí chìbi ga kúrú tama ẽem ko kgꞌuis gúùs koe nem tchànom khóè me e, kgoana ko a gam dim tcꞌáróm wèé ba kòre ba.
\p
\v 3 Bìian kgꞌáḿ-qꞌoo koe ta ko tóḿ sa tcãà, nxãasega i gha komsana ta a ka. Ncẽeta hẽéan ka ta ko wèé tcꞌáróan gaan di ga tchàno-tchano. \fig |LB00035.tif| col|||Qábì-kgꞌao ba ko toms ko ma tséékaguè sa xꞌáí|3:3\fig*
\m
\v 4 Bóò skepe zi gataga, gatà zi ma kaia igaba, a ko kaia tcꞌãán ka qõòkaguè, igaba zi ko kaisase cgꞌárém hìim tchàno-tchano dim cgoa nqàriè, a nqàri-kgꞌaom ko tcꞌẽem xòèm za qõò. \fig |LB00217.tif| col|||Skepe sa tshàam qꞌoo koe, a ko qõòkagu si kom gúù ba xꞌáí|3:4\fig*
\m
\v 5 Gatà iim dàòm kam ta̱m ba cgꞌárém gúù me e, igabam ko kaia zi gúù zi ka koase.
\p Tcꞌẽe naka bóò, kaias hìi-kgꞌai sa ko cgꞌárém cꞌeem ka dàòè sa.
\m
\v 6 Ta̱m igabam cꞌee me e, a cgꞌãès dim nqõó me e. Ncẽea me ko ma tséé ga a, gatá cgáé-qꞌoo koe, a ba a ko wèém tcꞌáróm khóèan di ba cgꞌãè-cgꞌãe. Cꞌees koem ko wèés kgꞌõès khóèm di sa tcãà, a ba a ko chõò tamas cꞌees dxãwam dis ka tcãà-dòm̀mè.
\m
\v 7 Khóè ta gha kgoana a xgaa-xgaa wèém kgꞌoo-coa-qhàò ba hẽé, naka tsa̱rán hẽé, naka ncãà cgoa ko qõòan hẽé, naka tshàan qꞌoo di gúùan hẽéthẽé e khama, a ta a gataga xgaa-xgaa ana.
\v 8 Igaba i cúí khóè ga kgoana naka ta̱m ba xgaa-xgaa hãa tite, sãa tamam cgꞌãè ba, cgꞌõoko gúùan ka cgꞌoèa hãa ba.
\v 9 Gaam cgoa ta ko Xꞌaigam \add Nqarim\add* Xõò ba dqo̱m̀, a ta a ko gaam cgoa Nqarim dis iis koe kúrúèa ne khóè ne cgúí.
\v 10 Dqo̱m̀kuan hẽé naka cgúíkuan hẽéthẽéa ko cúís kgꞌáḿs koe tcgꞌoa. Tíí qõe ga tuè, ncẽe sa méés táá gatà ii guu.
\v 11 A tsàùm koe i ga ka̱re tshàan hẽé naka tsa̱u tshàan hẽéthẽé cúí xꞌaè ka tcgꞌoa?
\v 12 Tíí qõe ga tuè, a faia dis hìi sa ga olife di tcꞌáróan kúrú, kana sa ga chõó-kgꞌom dis hìi sa faia di tcꞌáróan kúrú? Tsa̱u tshàa ne cuiskaga ka̱re tshàan kúrúa hãa tite.
\s Cám̀ tsara dàò tsara tcꞌẽean di tsara
\p
\v 13 Dìí ba tcꞌẽega baa, a ba a ko kóḿa qꞌãa gatu xgꞌaeku koe? Gam di kgꞌõèan qãè ka méém xꞌáí, gam di tsééa ne ko cgꞌáré-cgꞌaresean cgoa kúrúè sa, tcꞌẽean cgoa hẽéthẽé e.
\v 14 Igaba tu kò gatu di tcáóan koe xgóàm tau ba hẽé naka cẽèan hẽéthẽé úúa ne táá koase guu, naka táá tseeguan tshúù-ntcõakagu guu.
\v 15 Gatà ii tcꞌẽea nea nqarikgꞌai koe guu tama, igaba i nqõómkgꞌai di i, a khóèm di i, a dxãwam di i.
\v 16 Eẽ tauan hẽé naka cẽèan hẽéthẽé hàna qgáì koe, i gha kóḿku taman hãa khama, naka wèé cgꞌãè-qhàòan kúrúan hẽéthẽé e.
\v 17 Igaba i nqarikgꞌai koe guua tcꞌẽean tcꞌãà dis ka qꞌano o, a cám̀ dis ka gataga tòókuan úúa, cꞌẽe ne khóè ne ka i ko tcꞌẽe, a i a komsanan koe hẽé naka tcꞌẽea ka̱bian koe hẽéthẽé kgoarasea hãa, a cgóm̀kuan ka cgꞌoèa hãa, a i a ko qãè zi tséé zi di tcꞌõoan máà ta a, a i a khóè ne tãákase qgóó tama, a i a kgoarasease ko qgóóse.
\v 18 Tòókuan di ne khóè ne ncẽe ko tòókuan di cgùrian xhárà ne gha tchànoan tcuù.
\c 4
\ms Dtcòm̀-kgꞌao ba hẽé naka nqõó ba hẽéthẽé e (4:1–5:6)
\s Nqõó ba ncàm̀ guu
\p
\v 1 Dùú sa ko ncõoan ghùi, si ko dùú sa xꞌãàkuan ghùi gatu xgꞌaeku koe? A gatu ko tcꞌẽe zi gúù zi tama zia, ncẽe ko gatu di tcꞌáróan koe ncõoan ghùi zi?
\v 2 Ncóó tu ko, igaba tu úú tama. Cgꞌõo tu ko, a tu a ko kaisase xaù, igaba tu kgoana naka hòò tite. Xꞌãà tu ko, a tu a ko ncõoan ghùi. Gúù tu úú tama, Nqari ba tu dtcàrà tama domka.
\v 3 Dtcàrà tu ko, igaba tu hòò tama, tchàno tamase tu ko dtcàrà khama, ẽe tu ko hòò gúùan tu gha nxãasega ẽe tu ko ma gatu tcꞌẽe khama ma tséékagu ka.
\v 4 Cgꞌárà-kgꞌao tuè! A cꞌúùa tua, nqõóm cgoa ncàm̀kua ne Nqarim cgoa hòreku si i sa? Nxãaska, ncẽè nqõóm di tsi ncàm̀-khoe tsi kò ii ne tsi Nqarim di tsi cgꞌõo-kgꞌao tsi i.
\v 5 \add Nqarim dis\add* Tcgãya sa ko máá: “Tcꞌẽem ncẽem Nqarim gatá koe tòóa hãa ba kaisa zi tcꞌẽe zi ka cgꞌoèa hãa,” témé. Ncẽe kgꞌui ne tseegu u, ná?
\v 6 Igabam ko \add Nqari ba\add* kaisa cgóm̀kuan máà \add ta a\add*. Gaa domkas ko \add Nqarim dis Tcgãya sa\add* ncẽeta méé:
\q1 “Nqari ba ko ẽe tcomsea ne ntcoe,
\q1 igabam ko ẽe ko cgꞌáré-cgꞌarese ne cgóm̀kuan máà,”
\m témé.
\p
\v 7 Ke tu ncẽeska Nqarim koe máàse. Dxãwa ba xguì, nakam gha gatu koe guu ná qgóé.
\v 8 Nqarim koe cúù-cuuse, nakam gha Gam igaba gatu koe cúù-cuuse. Xgꞌaà tshàua tu, gatu chìbi-kgꞌao tuè, naka tu gatu khóè tu cám̀ tcꞌẽe tu, tcáóa tu qꞌano-qꞌano.
\v 9 Tshúù-tcao méé tu, naka kgꞌae, naka ntcã̱à tcgáí-tshàra. Gatu di kgꞌãèan méé i ka̱bise naka kgꞌae ii, naka i gatu di qãè-tcaoan ka̱bise naka tshúù-tcao sa ii.
\v 10 Xꞌaigam \add Nqarim\add* cookgꞌai koe méé tu cgꞌáré-cgꞌarese nakam gha nxãasega kaikagu tu u.
\s Tsáá ka cꞌẽe ba xgàra guu
\p
\v 11 Táá méé tu gatu ka cꞌẽe ne cgoa cgꞌãèse kgꞌui guu, tíí qõe ga tuè. Gaam ẽe ko qõesem cgoa cgꞌãèse kgꞌui ba kana ko qõese ba xgàra, ba ko xꞌáèan cgoa cgꞌãèse kgꞌui, a ko xꞌáèan xgàra. Xꞌáèan tsi ko xgàra ne tsi gaa xꞌáèan di tsi tséékagu-kgꞌao tsi tama tsi i, igaba tsi xꞌáèan di tsi xgàra-kgꞌao tsi i.
\v 12 Xꞌáèan hẽé naka xgàrakuan hẽéthẽé dim tcgꞌòó-kgꞌao ba cúí Me e, Gaam ẽe ko kgoara, a ko ko̱be di qarian úúa ba. Igaba tsi tsáá dìí tsia, ncẽe tsáá ka cꞌẽe ba ko xgàra tsi?
\s Táá koase guu
\p
\v 13 Hàà tu ncẽeska, gatu ẽe ko máá: “Ncẽe cáḿ ka kana qꞌuu ka ta gha ncẽeta iim xꞌáé-dxoom koe qõò, a síí gaa koe kuri ba xꞌãè, a gaa koe síí xꞌámágu, a gha nxãasega marian hòò,” témé tu. \fig |HK00240.tif| col|||Xꞌámágu dis qgáì sa|4:13\fig*
\v 14 Igaba tu qꞌuu ka dim cáḿ ka i gha gatu di kgꞌõèan nta ii sa cꞌúùa hãa. Nqo̱ara-nqa̱uan khama tu ii khama, ncẽe ko xòm̀ xꞌaè-coa séè a hãa a, a i a gaia kaà.
\v 15 Khama tu ga ko ncẽeta mééa: “Xꞌaigam \add Nqarim\add* kò tcꞌẽe ne ta gha kgꞌõè, a ta a ncẽe sa kana ẽe sa kúrú,” témé.
\v 16 Ncẽe i ii khama, tu ko koase a ko dqo̱m̀se. Eẽta ii dqo̱m̀sean wèé ga cgꞌãè e.
\v 17 Gaa domkam wèém khóèm ẽe qãè gúùan kúrú qꞌana, igaba kúrú u tama ba, nxãa ba chìbiga me e.
\c 5
\s Qguùa khóèan dqàèa ne
\p
\v 1 Hàà tu ncẽeska, gatu khóè tu ẽe qguùa tu, kgꞌae méé tu naka xo̱ò, cgꞌãè zi ncẽe ko hàà cgae tu u zi domka.
\v 2 Gatu di qguùa ne tsꞌóóa hãa, i gatu di qgáían tcgꞌãàn ka tcꞌõóèa hãa.
\v 3 Gatu di gautan hẽé naka seleferan hẽéthẽéa ncàbà hãa, i gha gaan di ncàbàn gatu koe xꞌáí sa ii, a i a gha cꞌees khama ma gatu di cgàan tcꞌõóa xgãá. Gatu di xꞌaian tu tòóa máásea hãa, còo di xu cáḿ xu u igaba.
\v 4 Bóò, surutan gatu di tséé-kgꞌaoan di i, ncẽe gatu di xháràn koe kò tséé e, ncẽe tu kò táá suruta a, nxãa nea kgꞌaea tcgꞌòóa hãa, i kgꞌae-qꞌooan ẽe kòo gaa xháràn khõá ne di Xꞌaigam \add Nqarim\add* qarim wèém tcee-dòm̀ koe tcana hãa.
\v 5 Nqõómkgꞌai koe tu ka̱rean koe hẽé, naka qãè-tcaoan koe hẽéthẽé xꞌãèa. Tsáúkagua tu hãa tcáóa tu, \add a tu a gha ghòèan ko ma cgꞌõoè khama ma xgàraè\add*, cgꞌõokus dim cáḿ ka.
\v 6 Tchàno khóèan tu ko chìbi-chibi a xgàra, a cgꞌõo, gatu cgoa ne kò ntcoeku tama igaba.
\ms Tãáka zi xꞌáè-kgꞌam zi (5:7-20)
\s Qáò tcáóa ne
\p
\v 7 Gaa domka méé tu qáò tcáó ii, tíí qõe ga tuè, naka i nxãakgꞌaiga Xꞌaigam di hàà-qꞌooan síí tcãà. Bóò, xhárà-kgꞌao ba ko góḿ ba qãà me xhárà di tcꞌõoan tcgꞌòó. Qáò tcáó cgoa am ko, i nxãakgꞌaiga síí tcꞌãà di túúan hẽé naka kháóka di túúan hẽéthẽé tuu.
\v 8 Gatu igaba méé tu qáò tcáó ii. Qari méé tu ii tcáóa tu koe, Xꞌaigam \add Nqarim\add* di hàà-qꞌooa ne cúù u ke.
\v 9 Tíí qõe ga tuè, gatu ka cꞌẽea ne cgoa méé tu táá káíse kgꞌui-kgꞌuise guu, naka tua gha nxãasega táá xgàraè. Bóò, Xgàra-kgꞌao ba nquu-kgꞌáḿ koe hãa!
\p
\v 10 Tíí qõe ga tuè, tcꞌẽe-tcꞌẽese porofiti xu ncẽe kò Xꞌaigam \add Nqarim\add* cgꞌõè ka kgꞌui xu. Sere-seres iise séè xu, qáò tcáó xu khóè xu u kò ii di sa, ẽe xu kòo xgàrase ka.
\v 11 Bóò, tsꞌee-tsꞌeekgꞌaièa xu, ta ta ko ma tcii xu, ẽe kò \add xgàrakuan di xꞌaè ka\add* qarika tééa hãa xu. Jobem di qarika tééa máásean ka tu kóḿa, a tu a kò Xꞌaigam \add Nqari\add* ba còo dis ka dùú sa kúrúa sa bóò. Xꞌaigam \add Nqari\add* ba thõò-xama-máákuan hẽé naka cgóm̀kuan hẽéthẽé ka cgꞌoèa hãa khama.
\p
\v 12 Igaba wèé zi gúù zi tcꞌamkgꞌai koe, tíí qõe ga tuè, nqarikgꞌaian cgoa igaba kana nqõómkgꞌai cgoa igaba, kana cꞌẽe gaìsean cgoa ga igaba táá gaìse guu. Igaba méés gatu dis ‘eè’ sa, ‘eè’ sa ii, nakas gatu dis ‘ẽe-ẽe’ sa, ‘ẽe-ẽe’ sa ii, naka tua gha nxãasega táá xgàrasean koe tcãà guu.
\s Dtcòm̀an di còrèa ne
\p
\v 13 Gatu xgꞌaeku koem kò cꞌẽe ba qóḿan qꞌoo koe hàna ne méém còrè. A ncẽè cꞌẽem kò qãè-tcaoa hãa ne méém dqo̱m̀an di ciian nxáè.
\v 14 A ncẽè cꞌẽem kòo gatu xgꞌaeku koe tsàa ne méém kaia xu kerekes di xu tcii, naka xu còrèa máá me, naka nxúìan cgoa tcgáù me, Xꞌaigam \add Nqarim\add* dim cgꞌõèm koe,
\v 15 naka i gha dtcòm̀an di còrèan tsàakom khóè ba kgꞌõèkagu, nakam gha Xꞌaiga ba ghùi me, a ncẽè chìbia nem kò kúrúa hãa nem gha qgóóa mááè e.
\v 16 Ke tu nxãaska bìríku gatu di chìbia ne, naka còrèa mááku, naka tua gha nxãasega kgꞌõèkaguè. Tchànom khóèm di còrèa ne kaisa qarian úúa, \add Nqari ba ko\add* gaan koe tséé khama.
\v 17 Elija ba kò kgꞌama khóè me e, gatá khamaga ma, a ba a kò qarika còrè, túúan gha táá tuu ka, i kò nqõómkgꞌai koe túúan táá tuu, nqoana kurian hẽé naka 6 nxoean hẽéthẽé e.
\v 18 Me gaicara còrè, i nqarikgꞌaian túúan tuukagu, me kò nqõó ba kaisase tcꞌõoan kúrú.
\p
\v 19 Tíí qõe ga tuè, ncẽè gatu ka cꞌẽem kò tseeguan ho̱àra guua hãa, me kò cꞌẽe ba ka̱bi me ne
\v 20 méém qꞌãa, dìím wèém ẽe ko chìbi-kgꞌao ba gam di dàòan ho̱àm ko koe ka̱bi ba gha ko kgoara me, táám gha tcꞌẽea ba cgoa ga igaba xꞌóóa xgãáse ka, a ba a gha káí chìbian gam di qgóóa máàè.