\id JOB
\h JOB
\mt Job
\c 1
\s Job se tlacatl catli xitlahuac
\p
\v 1 Tlahuel huejcajya ipan tlali Uz, itztoya se tlacatl catli itoca
Job. Yaya eltoya se tlacatl catli xitlahuac huan catli amo aqui
huelqui quitelhuis. Quiimacasiyaya huan quitlepanitayaya Toteco Dios
huan mohuejcatlaliyaya tlen nochi catli amo cuali.
\v 2 Job quinpixqui chicome itelpocahua huan eyi iichpocahua.
\v 3 Nojquiya quinpiyayaya chicome mil borregojme, eyi mil camellos,
500 pares huacaxme catli quimatque tlapoxoníaj, 500 sihua burrojme
huan miyac tequipanohuani. Job más tlapijpixtoya que nochi sequinoc
masehualme catli itztoyaj ipan nopa tlali campa hualquisa tonati.
\p
\v 4 Huan sesen xihuitl quema sese iconehua Job quiaxitiyaya ixihui,
ilhuichihuayaya ipan ichaj. Huan nochipa quinnotzayaya itlaca
icnihua huan nopa eyi isihua icnihua para sentic tlacuase.
\v 5 Quemantic nopa ilhuime huejcahuayaya miyac tonali. Huan quema
tlamiyaya sesen ilhuitl, Job nochipa quintlapajpacchihuayaya
iconehua iixpa Toteco Dios. Ica ijnaloc mehuayaya nelcualca huan
quitencahuayaya se tlacajcahualistli tlatlatili iixpa Toteco Dios
por sese icone. Job quichihuayaya ya ni pampa moilhuiyaya: “Huelis
noconehua tlajtlacolchijtoque huan quitelchijtoque Toteco Dios ipan
ininyolo.” Huan Job quej nopa nochipa quichihuayaya.
\p
\v 6 Se tonali itequihuajcahua Toteco [1:6 Ni camanali ipan hebreo
quiijtohua “itelpocahua Toteco”. Quinequi quiijtos ángeles o
itequihuajcahua Toteco catli tlatzejtzeloltique. Ipan sequin
versículos huan nojquiya huelis nica, camanalti nojquiya tlen
itequihuajcahua catli huejcajya tlajtlacolchijque huan mochijque
ajacame pampa nica quiijtohua para Amocualtlacatl hualajqui
ininhuaya. Xiquita nojquiya Gn. 6:2; Job 2:1, 38:7 huan Dn. 3:25.] 
hualajque para moixnextise iixpa TOTECO, huan ininhuaya nojquiya
hualajqui Amocualtlacatl.
\p
\v 7 Huan TOTECO quitlatzintoquili Amocualtlacatl:
\p ―¿Canque tihuala?
\p Huan Amocualtlacatl quiilhui:
\p ―Na ninejnentihuala tlen iixco tlaltipactli campa
nitlachixtiyohuiyaya nochi catli panoyaya.
\p
\v 8 Huajca TOTECO quitlatzintoquili Amocualtlacatl:
\p ―¿Tiquitztoc notequipanojca Job? Ipan nochi tlaltipactli amo
aqui seyoc quen ya. Amo aqui hueli quitelhuis ica niyon se tlamantli
catli amo cuali. Quichihua nochi catli xitlahuac. Yaya nechimacasi
huan nechtlepanita huan mohuejcatlalía tlen nochi tlamantli catli
amo cuali.
\p
\v 9 Pero nopa Amocualtlacatl quiilhui:
\p ―¿Ta tiquita Job mitztlepanita san pampa quinequi?
\v 10 ¡Amo neli! Yaya san mitztlepanita pampa nochipa
tijmocuitlahuijtoc inemilis, ifamilia huan nochi catli quipiya. Amo
tijcahuilijtoc ma quiajsi niyon se tequipacholi. Tijchijtoc ma quisa
cuali nochi tlamantli catli quichihua huan tlahuel tijricojchijtoc.
Yeca mitzhueyimati.
\v 11 Pero xijquixtili nochi catli yaya quipiya huan tiquitas sintla
amo mitztelchihuas moixpa.
\p
\v 12 Huajca TOTECO quiilhui Amocualtlacatl:
\p ―Nimitzmaca caquihuili xijchihua catli ta tijnequis ica nochi
catli Job quipiya, pero amo tleno xijchihuili itlacayo.
\p Huajca nopa Amocualtlacatl quisqui iixpa TOTECO huan yajqui.
\p
\v 13 Huan se tonali quema nochi itelpocahua huan iichpocahua Job
tlacuayayaj ipan ichaj iachtihui ejquetl, panoc se hueyi
tequipacholi.
\v 14 Huan ajsitihuetzico se tlayolmelajquetl ipan ichaj Job huan
quiilhui:
\p ―Nochi mohuacaxhua tlapoxoniyayaj huan nopa burrojme
tlacuajtinemiyayaj nopona ininnechca.
\v 15 Huan hualajque nopa sabeo tlacame huan quinichtejque.
Quinhuicaque nochi nopa tlapiyalme huan quinmictijque nochi
motequipanojcahua. Huan san na nimochololti para
nimitzyolmelahuaqui.
\p
\v 16 Huan quema noja camanaltiyaya nopa tlacatl, ajsico seyoc
tlayolmelajquetl huan quiilhui Job:
\p ―Ipan nopa lugar campa tiquinmocuitlahuiyayaj moborregojhua,
huetzqui tlitl tlen Toteco Dios huan quintlati nochi nopa
tlamocuitlahuiani huan nochi moborregojhua. San na nimochololti para
nimitzyolmelajqui.
\p
\v 17 Huan quema noja camanaltiyaya ni tlacatl, ajsico seyoc
tlayolmelajquetl huan quiilhui Job:
\p ―Hualajque eyi pamitl tlen caldeo soldados huan quinichtejque
nochi mocamellos. Quinmictijque motequipanojcahua ica machete huan
san na nimochololti para nimitzyolmelahuaqui.
\p
\v 18 Huan quema noja camanaltiyaya ni tlacatl, ajsico seyoc catli
quiilhui Job:
\p ―Motelpocahua huan moichpocahua ilhuichihuayayaj ipan ichaj
mocone catli achtihui ejquetl,
\v 19 huan hualajqui se ajacatl catli tlahuel chicahuac tlen nopa
huactoc tlali huan quitzohuitejqui nopa cali. Huan itzontzajca nopa
cali huetzqui ipan moconehua huan nochi mijque. San na nimochololti
para nimitzyolmelahuaqui.
\p
\v 20 Huajca Job moquetzqui huan quitzayanqui iyoyo huan quixinqui
itzonteco para quinextis tlahuel motequipachohua. Huan
motlancuaquetzqui huan quihueyichijqui Toteco.
\v 21 Huan teipa quiijto:
\p ―Nixolotic nitlacatqui ipan ni tlaltipactli huan nixolotl niyas
quema nimiquis. TOTECO techmacatoya nochi catli nijpixtoya. Huan ama
yaya techquixtilijtoc. Nijhueyichihua itoca TOTECO.
\p
\v 22 Ipan nochi ni tlamantli, Job amo quichijqui niyon se
tlajtlacoli niyon amo quitelhui TOTECO quen quichijtosquía se
tlamantli amo cuali.
\c 2
\s Amocualtlacatl sempa quiyejyeco Job
\p
\v 1 Seyoc tonali quema itequihuajcahua TOTECO [2:1 Xiquita Job
1:6.]  sempa hualajque para moixnextise iixpa, Amocualtlacatl
nojquiya hualajqui para moixnextis iixpa.
\v 2 Huan TOTECO quiilhui Amocualtlacatl:
\p ―¿Canque tihuala?
\p Huan Amocualtlacatl quiilhui:
\p ―Na ninejnentihuala tlen iixco tlaltipactli campa
nitlachixtiyohuiyaya nochi catli panoyaya.
\p
\v 3 Huajca TOTECO quiilhui:
\p ―¿Tiquitztoc notequipanojca Job? Ipan nochi tlaltipactli amo
aqui seyoc quen ya. Amo aqui hueli quitelhuis ica niyon se tlamantli
catli amo cuali. Quichihua nochi catli xitlahuac. Yaya nechimacasi
huan nechtlepanita, huan mohuejcatlalía tlen nochi tlamantli catli
amo cuali. Yaya quisenhuiquilía quichihua catli cuali masque ta
techchihualti ma tijtlatzacuiltis quema amo tleno quichijtoya.
\p
\v 4 Huan Amocualtlacatl quiilhui:
\p ―Se masehuali quichihuas miyac tlamantli para quimanahuis
inemilis. Mitzhueyitlalía san pampa tijmocuitlahuijtoc itlacayo.
\v 5 Pero sintla nijmacas se cocolistli catli chicahuac, yaya
mitztelchihuas moixpa.
\p
\v 6 Huan TOTECO quiilhui Amocualtlacatl:
\p ―Cualtitoc, xijchihua ta catli tijnequi ica itlacayo, pero amo
xijmicti.
\p
\v 7 Huajca Amocualtlacatl quisqui iixpa TOTECO huan quicoco Job
tlen itzonteco hasta iicxitla ica se sahua cocolistli catli tlahuel
fiero.
\v 8 Huajca Job mosehui ipan cuanextli huan quicuic se tepalcatl
para ica mohuahuanas.
\v 9 Huan hualajqui isihua huan quiilhui:
\p ―¿Noja timotemachía ipan Toteco Dios masque tiquitztoc nochi
ya ni catli mitzchihuilijtoc? ¡Xijtelchihua Toteco Dios para yaya
ma mitzmicti!
\p
\v 10 Pero Job quiilhui:
\p ―Ticamanaltitoc quen se sihuatl catli huihuitic. ¿Atlac
tijselise catli cuali tlen Toteco Dios huan amo tijselise catli amo
cuali?
\p Huan ipan nochi ni tlamantli Job amo tlajtlacolchijqui, niyon amo
quitelchijqui Toteco Dios.
\s Ihuampoyohua Job quipaxalocoj
\p
\v 11 Huan Job quinpixtoya eyi ihuampoyohua, huan quema inijuanti
quicajque para Job quipantijtoya se hueyi tlaijiyohuilistli,
mocamanalhuijque para san sejco yase quiyoltlalitij huan
quiyolchicahuatij. Inijuanti inintoca eliyayaj: Elifaz catli
ehuayaya Temán, Bildad catli ehuayaya Súa, huan Zofar catli
ehuayaya Naamat.
\v 12 Huan ica huejca quitlachilijque Job, pero amo quiiximatque
sintla eliyaya Job pampa tlahuel mopatlatoya itlachiyalis ica nopa
cocolistli. Huajca ihuampoyohua pejque chocaj huan quitzayanque
ininyoyo. Quimajcajque tlaltejpoctli ipan ajacatl huan motemilijque
tlali ipan inintzonteco para quinextise tlahuel motequipachohuaj.
\v 13 Teipa mosehuijque tlalchi ihuaya Job para chicome tonali huan
chicome yohuali. Huan niyon se tlen inijuanti amo quiilhui niyon se
camanali pampa momacaque cuenta para tlahuel hueyi itlaijiyohuilis.
\c 3
\s Job quitelchijqui nopa tonali quema tlacatqui
\p
\v 1 Teipa Job quitelchijqui nopa tonali quema yaya tlacatqui.
\v 2 Quiijto:
\p
\v 3 “Tlatelchihuali ma eli nopa tonali quema nitlacatqui huan nopa
yohuali quema tlayolmelajque para tlacajtoya se oquichpil.
\v 4 Más cuali amo panotosquía nopa tonali. Nochime ma
quielcahuaca nopa tonali para nochipa. Huan Toteco Dios ma
quiixpolihuilti. Ma quiixtzacua nopa tonali ipan tzintlayohuilotl
para nochipa.
\v 5 Quena, ma Toteco Dios quitlali tzintlayohuilotl quen
miquilistli ipan nopa tonali huan ma quiixtzacua se hueyi mixtli
catli tlahuel yayahuic para amo quema panotosquía nopa tonali.
\v 6 Nipaquisquía sintla hueli quiixpolojtosquía nopa tonali ipan
calendario, huan ma amo monextis ipan niyon se xihuitl o ipan niyon
se metztli.
\v 7 Más cuali eltosquía nopa yohuali sintla niyon se conetl amo
tlacajtosquía. Más cuali sintla amo oncatosquía paquilistli ipan
nopa tlayohua pampa tlacatqui se oquichpil.
\v 8 Masehualme catli más quimatij tlatelchihuaj ma quitelchihuaca
nopa tonali. Ma quitelchihuaca nopa chicahuaque tlacame catli
motemacaj para quiixitise nopa hueyi tlapiyali catli temajmati catli
itoca leviatán.
\v 9 Achi cuali sintla tzintlayohuilijtosquía sitlalime ipan nopa
yohuali quema nitlacatqui. Más cuali sintla nochi quichixtosquía
tlahuili nopa tonali, pero nopa tonali amo quema hualajtosquía.
Sintla amo oncatosquía nopa tonali huan nopa tlahuili amo
tlahuijtosquía ica ijnaloc, amo nitlacajtosquía.
\v 10 ¿Para tlen Toteco Dios amo quitzajqui iijti nonana para amo
nitlacajtosquía? ¿Para tlen techcahuili ma nitlacati para ma
niquijiyohuis nochi ni catli ama nechpano?
\p
\v 11 “¿Para tlen amo nimijqui iijtico nonana o quema san
niontlacajtoya?
\v 12 ¿Para tlen nopa partera techcahuili ma niitzto? ¿Para tlen
nechchichiti nonana?
\v 13 Sintla nimictosquía quema nitlacatqui, huajca amantzi
niitztosquía cuali. Niitztosquía nicochtoc huan nimosiyajquetztoc.
\v 14 Ama niitztosquía mictoc ininhuaya tlanahuatiani huan
tetlalnamictiani catli mochijchihuilijque inincaltlanahuatilhua
catli ama ya tlasosololi.
\v 15 Niitztosquía ininhuaya tlayacanani catli quipixque miyac oro
huan quipixtoyaj ininchaj temitoc ica plata.
\v 16 ¿Para tlen amo nechtlalpachojtosquíaj quen se conetl catli
tlacatqui mictoc? Quej nopa amo niquitztosquía tlatlanextli.
\v 17 Masehualme catli fiero ininnemilis ayacmo tecualancamacase
nopona campa mijcatzitzi huan nochi masehualme catli siyajtoque
mosiyajquetzase.
\v 18 Nopona catli itztoyaj ipan tlatzactli ipan tlaltipactli
itztoque ica cuali pampa amo aqui se tetzajquetl para
quintlaijiyohuiltis.
\v 19 Itztoque san sejco catli teicneltzitzi huan catli
tlapijpiyani. Nopona tequipanohuani itztoque majcajtoque tlen
inintecohua.
\p
\v 20 “¿Para tlen Toteco Dios quinmaca tlahuili huan nemilistli
masehualme quen na catli titlaijiyohuíaj huan timotequipachohuaj?
\v 21 ¿Para tlen techcahuilía ma tiitztose tojuanti catli tlahuel
tijnequij timiquise huan miquilistli amo ajsic? Huan tijtemohuaj
miquilistli quen sequinoc quitemosquíaj tlacualistli o tomi, pero
amo hueli tijpantise.
\v 22 ¿Para tlen quinmaca nemilistli masehualme catli nelía
yolpaquise quema ajsis tonali para miquise huan quintlalpachose?
\v 23 ¿Para tlen Toteco Dios quicahuilía ma tlacati se tlacatl
huan teipa quitzacuas ipan se nemilistli campa onca
tlaijiyohuilistli huan tequipacholi?
\v 24 Ni tlacuajcualocayotl amo nechcahuilía ma nitlacua.
Nochoquilis motlalohua quen se hueyatl.
\v 25 Nechajsitoc nopa tlamantli catli nochipa niquimacasiyaya huan
catli más nijmahuiliyaya.
\v 26 Amo nijpiya tlasehuilistli ipan noyolo. Noijti mojmolinía.
Amo hueli nimosiyajquetzas. San nijmati tequipacholi.”
\c 4
\s Elifaz quiilhui Job san tlaijiyohuíaj amo cuajcualme
\p
\v 1 Huajca Elifaz catli ehuayaya Temán quiilhui Job:
\p
\v 2 “Techcahuili ma nicamanaltis se quentzi. Amo hueli san
nimitztlacaquilijtos huan amo nimitzilhuis niyon se camanali.
\p
\v 3 “Xiquita, achtihuiya ta tiquintlalnamictiyaya miyac masehualme
catli quipixque tequipacholi para ma motemachica ipan Toteco Dios.
Nojquiya tiquinyolchicajqui catli amo quipixque fuerza.
\v 4 Tiquinyolchicajqui catli huetztoyaj ipan tlajtlacoli huan catli
quinyoltilanayaya catli amo cuali.
\v 5 Pero ama, ta moseltzi timotequipachohua huan timotzinquixtía
por ni tlaijiyohuilistli catli mitzajsitoc.
\v 6 ¿Para tlen amo timotemachis más ipan Toteco Dios ipan ni
tlaijiyohuilistli? Tijmati Toteco Dios quinmocuitlahuía masehualme
catli xitlahuaque.
\p
\v 7 “Ximonejnehuili tlen ya ni: Toteco Dios amo quitlatzacuiltía
huan amo quitzontlamiltía niyon se tlacatl catli xitlahuac huan
catli amo tleno quichijtoc.
\v 8 Quen na niquitztoc, masehualme catli quichihuaj catli fiero,
inijuanti quiselíaj catli fiero.
\v 9 Pampa quema Toteco Dios cualanis, yaya quintzontlamiltía ica
iijiyo.
\v 10 Nimantzi ajsi icualancayo huan ayacmo itztoc nopa masehualme.
Masque nopa fiero masehualme cualanisquíaj o mosisinisquíaj quen
huejhueyi tecuanime, Toteco Dios quintzacuas inincamac huan
quintzontlamiltis.
\v 11 Masque inijuanti quipiyaj chicahualistli, miquise ica mayantli
huan ininconehua motlamisemanase.
\p
\v 12 “Se nechmacac ni tlamachtili ichtacatzi. Elqui quen se
nechichtacailhui ipan nonacas.
\v 13 Niquitac se tlanextili se tlayohua quema nochi masehualme
cochtoyaj.
\v 14 Ipan se tlatoctzi nechitzqui majmajtli huan pejqui
nihuihuipica hasta mojmoliniyaya noomiyohua.
\v 15 Se ajacatl panoc noixtla, huan moquejquetzqui notzoyo ipan
nochi notlacayo.
\v 16 Teipa nijmachili para nopa ajacatl moquetzqui nonechca huan
huejcajqui, pero amo huelqui niquitac. Teipa nijcajqui itoscac catli
nechichtacailhui:
\v 17 ‘¿Huelis se masehuali itztoc xitlahuac iixpa Toteco Dios?
¿Huelis elis tlapajpactic iixpa yaya catli quichijchijqui?’
\p
\v 18 “Xiquita, sintla Toteco Dios amo hueli motemachía ipan
itequihuajcahua huan quintelhui itequihuajcahua catli
tlajtlacolchijtoque, quenicatza huelis motemachis ipan masehualme
catli tlachijchihualme san ica soquitl.
\v 19 Amo hueli niyon quentzi motemachis ipan tojuanti catli
tijpiyaj totlatzinpehualtil ipan tlaltejpoctli huan amo ohui para
yaya moquejquetzas topani huan techmictis quen tipapalome.
\v 20 Masehualme itztoque ipan ni tlaltipactli san se tlatoctzi.
Eltoc quen ica ijnaloc yoltoque huan ica tiotlac miquij. Huan
sequinoc nimantzi quinelcahuaj. Polijtoque para nochipa.
\v 21 Masque yejyectzi se masehuali, tlami inemilis huan amo aqui
motequipachos por ya. San miquij huan ayamo quipantijtoque
tlalnamiquilistli.
\c 5
\p
\v 1 “Job, xijtzajtzili se ma mitzpalehuis sintla tijnequi, pero
amo aqui mitznanquilis. Huelis tiquinnotzas itequihuajcahua Toteco
Dios catli tlatzejtzeloltique, pero amo mitzpalehuise.
\v 2 Se catli huihuitic quen ta miqui pampa cualani huan pampa
quiixtoca catli sequinoc quipiyaj.
\v 3 Niquinitztoc catli huihuitique quema tlatlanij para se
tlatoctzi, pero teipa quicahuaj Toteco Dios huan nimantzi huala
tlatzacuiltili huan quipolohuaj nochi.
\v 4 Mahuilili para ininconehua. Quincualancaitaj ipan tequicali
quema moquetzaj iixpa se juez, huan amo aqui quinmanahuía.
\v 5 Catli quipiya se tlacatl catli huihuitic ipan imila
quiichtequilíaj masehualme catli mayancamictinemij masque
quipantíaj huitzala. Huan nochi itomi sequinoc quiixtocaj huan
quicuilíaj.
\v 6 Tlaohuijcayotl huan tequipacholi amo moscaltíaj ininseltzitzi
quen huitztli moscaltía ipan tlali, masehualme mohualiquilíaj
tequipacholi ininpani.
\v 7 Masehualme quipantíaj tlaijiyohuilistli tlen quema tlacatij.
Temachtli teajsis tequipacholi quen se tlimoyotl catli quisa campa
tlitl temachtli patlanis ajacatipa.
\p
\v 8 “Huajca Job, nimitzilhuía: Xijtemo Toteco Dios huan xiquilhui
motlajtlacolhua.
\v 9 Pampa Toteco quichihua huejhueyi tlamantli catli amo aqui
huelis quimachilis. Quinchihua tlahuel miyac tlanextili hasta amo
aqui huelis quinpohuas.
\v 10 Quichihua ma huetzi atl ipan tlaltipactli para quiatequis
nochi mili huan nochi cuatitlamitl.
\v 11 Yaya quinhueyitlalía masehualme catli moechcapanohuaj iixpa
huan quinmatilana catli motequipachohuaj.
\v 12 Quisemana inintlalnamiquilis tlacajcayahuani para amo hueli
quichihuase catli fiero monejnehuilijtoque quichihuase.
\v 13 Toteco Dios quinchihua ma huetzica tlacame catli mohueyimatij
ipan nopa tlaquetztli catli san inijuanti quichijtoque. Ica catli
moitaj para tlahuel tlalnamiquini, quinmasiltía ipan nopa tlamantli
fiero catli quisencajtoque para quichihuase.
\v 14 Tonaya motepotlamíaj tlacajcayahuani quen elisquíaj
popoyotzitzi. Huan masque tlajcotona, amo hueli tlachiyaj. Para
tlacajcayahuani tlajcotona eltoc quen elisquía tzintlayohua.
\p
\v 15 “Toteco Dios quinmanahuía catli teicneltzitzi tlen tlacame
catli quipiyaj chicahualistli. Quinquixtía ininmaco fiero
masehualme catli tetlaijiyohuiltíaj.
\v 16 Huajca catli teicneltzitzi hueli mochiyase ipan ya pampa
Toteco quincamatzacuas fiero tlacame catli quinequij quintlamiltise.
\p
\v 17 “Pero se tlacatl catli Toteco Dios quixitlahua quipiya hueyi
paquilistli. Huajca quema titlajtlacolchijtoc, amo ximotequipacho
sintla mitztlatzacuiltis Toteco Catli Quipiya Nochi Chicahualistli.
\v 18 Masque yaya mitzcocos, teipa mitzpajtis huan mitzchicahuas.
\v 19 Huan yaya mitzmanahuis miyacapa para niyon se tlamantli catli
amo cuali amo hueli mitzajsis.
\v 20 Ipan nopa tonali quema oncas mayantli, yaya mitzmanahuis para
amo timayancamiquis. Ipan tlahuilancayotl mitzmanahuis para amo
mitzcocos machete.
\v 21 Toteco mitzmanahuis tlen catli mitzistlacahuíaj. Huan amo
monequi xiquimacasis catli panos teipa quema hualase catli
tlaxolehuase.
\v 22 Quema oncas mayantli huan tlasemanalistli, ta san
tiquinhuetzquilis. Huan niyon se tecuani amo tiquimacasis.
\v 23 Nopa teme ayacmo mitztzacuilise quema titequitis ipan momila.
Huan nopa tecuanime catli nemij cuatitla ayacmo mitzcuatotonise.
\v 24 Mofamilia itztos temachtli huan amo timotequipachos por
inijuanti quema huejca tinemis. Quema tiquinpaxalos motlapiyalhua,
niyon se amo mitztlachtequilijtos.
\v 25 Tiquinpiyas miyac moconehua, huan moixhuihua
momiyaquilijtiyase quen xihuitl.
\v 26 Tiitztos miyac xihuitl huan noja tijpiyas chicahualistli quema
timiquis. Amo quipixcaj trigo quema ayamo ipohual, huan ta amo
timiquis quema ayamo tihuehuentzi.
\p
\v 27 “Nochi ya ni nimonejnehuilijtoc ica cuidado huan nijmati para
melahuac. Huajca xijtlacaquili, huan xijchihua catli quinamiqui huan
mitzpalehuis miyac.”
\c 6
\s Job quinanquili Elifaz quen yaya eliyaya nelxitlahuac
\p
\v 1 Huajca Job quiilhui:
\p
\v 2 “Cuali elisquía sintla se quitamachihuasquíaj nochi
notlaijiyohuilis ipan balanza para quiitase quesqui
niquijiyohuijtoc.
\v 3 Notlaijiyohuilis eltoc más etic que nopa xali catli onca campa
atentli. Yeca nimantzi nicamanaltitoc chicahuac.
\v 4 Toteco Catli Quipiya Nochi Chicahualistli nechtlahuisojtoc ica
cuatlamintli. Eltoc quen itencococa nopa cuatlamintli ajsitoc ipan
noyolo huan ipan nochi notlacayo. Eltoc quen Toteco Dios nechhuilana
ica nochi ni hueyi tlaijiyohuilistli catli nechajsitoc.
\v 5 Quinamiqui para na nijnextis notequipachol. Tzajtzi se burro
sintla amo quipiya tlacualistli. Tzajtzi se huacax quema amo
quipanti sacatl para quicuas.
\v 6 Tlaejelnamiqui se tlacatl sintla se tlacualistli amo cuali
poyec. Nochi cualanisquíaj sintla monequisquía quicuase iistaca se
tecsistli pampa amo quipiya iajhuiyaca, san asejsec.
\v 7 Quema nijtlachilía iistaca se tecsistli, nimantzi nijmati
ayacmo nimayana huan pehua nimisotlasnequi. Huan ama notequipachol
eltoc noja más fiero.
\p
\v 8 “Cuali elisquía sintla Toteco Dios nechmacasquía catli
nijnequi huan catli nijchiya.
\v 9 Quena, cuali elisquía sintla nechmictisquía para ayacmo
nitlaijiyohuijtos imaco.
\v 10 Quej nopa noja nijpiyasquía ni paquilistli: Amo
nijtlaijilhuijtoc icamanal Toteco Dios catli Tlatzejtzeloltic masque
nijpanotoc nochi ni tlacuajcualocayotl catli amo nechcahua.
\v 11 Ayacmo nihueli niquijiyohuis ni cocolistli pampa amo tleno
catli cuali nijchiya. ¿Quenicatza huelis niquijiyohuis hasta
nimiquis?
\v 12 ¿Atlac nijpiya tetili quen se tetl? ¿O atlac nonacayo
mochijtoc ica nopa tepostli bronce?
\v 13 ¡Amo! Ayacmo nijpiya chicahualistli para nimopalehuis. Ayacmo
tleno hueli nijchihuas para quisas cuali.
\p
\v 14 “Quinamiqui para se masehuali quiicnelis ihuampox catli
itztoc ipan tlaijiyohuilistli, pero ta tlahuel techtlatelhuijtoc.
Niyon amo tiquimacastoc Toteco Catli Quipiya Nochi Chicahualistli.
\v 15 Pero tinoicni, timonextijtoc para amo titemachtli. Tiitztoc
quen se atlajtli catli temi ica atl quema tlasejseltía cuame,
\v 16 pampa temitoc ica setl huan sitlal setl catli ya atiya.
\v 17 Pero ipan nopa tonalme quema tlahuel tlatotoniya, nopa
atlajtli ayacmo quipiyas atl huan nimantzi huaquis.
\v 18 Miyac masehualme catli nemij san sejco ica inintlapiyalhua
panoj nopona nechca nopa atlajtli. Quicahuaj iniojhui huan yohuij
para moseseltisquíaj, pero amo quipantíaj atl para atlise. San
miquij ica amiquistli ipan nopa huactoc tlali.
\v 19 Quema hualahuij nopa miyac paxalohuani catli sentic nemij tlen
tlali Temán huan Sabá huan moquetzaj nopona para atlise,
\v 20 quinechcahuíaj nopa atlajtli huan mopinahuaj pampa amo
quipantijque catli tlahuel quichiyayayaj. San quipantíaj catli
huactoc.
\v 21 Huan quej nopa nojquiya ta tiitztoc ica na. Amo
techpalehuijtoc quen nijchiyayaya. San tiquitztoc nococolis huan
timohuejcatlalijtoc tlen na.
\v 22 ¿Para tlen? ¿Atlac nimitztlajtlani ma techchihuili se favor?
¿Atlac nimitztlajtlani se nemactli tlen tomi? ¡Amo! ¡Amo quema
nijchijtoc!
\v 23 Amo quema nimitztlajtlani se tlapalehuili para techmanahuis
tlen nocualancaitacahua o para techmanahuis ininmaco tlachtequini.
\p
\v 24 “San nijnequi technanquili xitlahuac huan teipa na ayacmo
nimolinis. Techilhui tlaque amo cuali nijchijtoc.
\v 25 Masque camanali catli melahuac achtihui tecocohua, teipa
tepalehuía. Pero ta mocamanal amo quiijtohua catli melahuac.
\v 26 ¿Atlac techejelnamiquis san pampa nitzajtzic chicahuac por
notlaijiyohuilis?
\v 27 Eltoc quen tijtlaijiyohuiltisquía se conetl catli icnotzi, o
quen tijcajcayahuasquía huan tijnemacasquía se mohuampox.
\v 28 ¡Techtlachili! ¿Atlac timoilhuía quinamiqui
nimitzistlacahuis moixpa?
\v 29 Amo xijchihua catli amo cuali. Amo xiquijto para nijhuica
tlajtlacoli. Ximomaca cuenta para nise tlacatl catli nixitlahuac.
\v 30 ¿Anmoilhuíaj niistlacati? ¿Atlac anmoilhuíaj amo
niquiximati catli cuali huan catli amo cuali? Sintla
nitlajtlacolchijtosquía, ¿atlac amo nimomacasquía cuenta?
\c 7
\s Job quinejqui miquis para ayacmo tlaijiyohuis
\p
\v 1 “Tlahuel ohui inemilis se masehuali ipan ni tlaltipactli.
Quipano miyac tlaohuijcayotl. Quipiya inemilis catli ohui quen
inemilis se catli tetequipanohua chicahuac mojmostla.
\v 2 Niitztoc quen se tetequipanojquetl catli tlahuel quinequi ma
ajsi hora para mosiyajquetzas o tlahuel quinequi nimantzi ma tlami
nopa semana huan quiselis itlaxtlahuil.
\v 3 Quej nopa nojquiya na nitlaijiyohuijtoc miyac metztli quema amo
tleno oncayaya temachtli. Huan sesen yohuali nijpanotoc miyac
tlacuajcualocayotl.
\v 4 Quema nimoteca, nimoilhuía: Cuali elisquía para nimantzi
tlanesisquía. Sesen yohuali nijmachilía nelhueyi. Huan san
nimocuejcuepa tlatoctzitzi ipan notlapech pampa tlahuel nicuati.
Huan quej nopa nijchihua hasta tlanesi.
\v 5 Nochi nocuetlaxo ocuilojtoc huan yayahuic. Nococohua
tlatoctzitzi tzayanij huan temalquisaj.
\p
\v 6 “Nonemilis nimantzi tlantiya. Mojmostla moisihuiltía para
monechcahuis nopa tonal quema nimiquis. Ayacmo nijpiya nechiyalistli
para nimochicahuas.
\p
\v 7 “Toteco Dios, xiquelnamiqui para nonemilis eltoc quen se
ijiyotl catli panotehua. Amo quema sempa niquitas catli cuali.
Ayacmo quema nijpiyas paquilistli.
\v 8 Huan masque amantzi techtlachilijtoc, ica se quentzi tonali,
techitas nimictoc.
\v 9 Pampa quen se mixtli catli ica se tlatoctzi ixpolihui huan
ayacmo nesi, quej nopa nojquiya ixpolihui para nochipa se catli
miqui huan yohui campa mijcatzitzi. Ayacmo quema mocuepa nica.
\v 10 Ayacmo quema mocuepas ichaj, niyon ichaj ehuani ayacmo quema
quiitase pampa ayacmo quema monextis.
\p
\v 11 “Huajca monequi ama nijsenhuiquilis nicamanaltis tlen
notlaijiyohuilis pampa tlahuel hueyi ni tlacuajcualocayotl.
\v 12 ¡NoTeco Dios! ¿Atlac techita para na nieli se hueyi atl
catli quichihua san catli quinequi? ¿O huelis techita para nieli
nopa hueyi tlapiyali catli temajmati ipan hueyi atl huan yeca
techtzacua?
\v 13 Ica tlayohua quema nimoteca ipan notlapech para nicochis,
nijchihua campica para niquelcahuas notlaijiyohuilis,
\v 14 pero ta techmajmatía ica temictli catli temajmati.
\v 15 Más cuali techilpisquía noquechtla para ayacmo
nitlaijiyohuijtos huan quej nopa nimiquis.
\v 16 Nelía niquijiya nonemilis pampa amo tleno ipati. Huajca
NoTeco Dios, techcahuili ma nijpiya tlasehuilistli ni se ome tonali
catli noja polihui para niitztos.
\p
\v 17 “¿Tlaque ipati se tlacatl para timocuatotonis huan
timotequipachos miyac por ya?
\v 18 ¿Para tlen tijpaxalohua mojmostla ica ijnaloc? ¿Para tlen
tijyejyecohua tlatoctzitzi?
\v 19 ¿Para tlen tlahuel techcuatotonía huan amo techcahuilía se
tlatoctzi masque san para nijtolos nochijchi?
\v 20 Sintla nitlajtlacolchijtoc, ¿tlaque nimitzchihuilijtoc, ta
catli tiquinsentlachilía tiquintlachilía nochi masehualme? ¿Para
tlen techmelac itztoc na ica mocuatlamin? ¿Nonemilis eltoc se
tlamamali catli tlahuel etic para ta?
\v 21 ¿Para tlen amo techtlapojpolhuía notlajtlacolhua huan
xiquixpolo nochi catli nijchijtoc? Pampa nechcatitoc para nimotecas
ipan tlaltejpoctli huan nimiquis, huan quema techtemos, ayacmo
techpantis.”
\c 8
\s Bildad quiilhui Job para yaya amo neli motemachía ipan Toteco
Dios
\p
\v 1 Bildad, catli ehua ipan Súa, quiilhui Job:
\p
\v 2 “¿Job, hasta quema tijcahuas ticamanaltis? Mocamanal eltoc
quen se ajacatl catli chicahuac huala.
\v 3 Tijmati para Toteco Catli Quipiya Nochi Chicahualistli amo
quichijcolohua catli xitlahuac huan melahuac.
\v 4 Temachtli moconehua tlajtlacolchijque ica ya huan yeca
quintlatzacuilti quen quinamiqui.
\v 5 Pero sintla ta tijtemos Toteco Catli Quipiya Nochi
Chicahualistli huan timotlatlajtis ica ya, mitztlacaquilis.
\v 6 Sintla tiitztos senquistoc cuali huan tijchihua san catli
xitlahuac, yaya temachtli mitznanquilis quema timotlatlajtis. Yaya
mitztiochihuas miyac huan mitzmacas paquilistli ipan mochaj.
\v 7 Huan nochi catli tijpiyayaya achtihuiya timomacas cuenta para
eliyaya pilquentzi, pampa teipa tijpiyas más miyac.
\p
\v 8 “Ximonejnehuili tlen nochi catli panotoc hasta huejcajya huan
xijtlachili tlaque tlamantli quinpanti nopa masehualme.
\v 9 Xijtlachili pampa tojuanti sanoc yalohua titlacatque huan
pilquentzi tijmatij. Huan tonemilis ipan ni tlaltipactli san
huejcahuas quen se ecahuilotl.
\v 10 Inijuanti catli achtihuiya itztoyaj mitzmachtise miyac
tlamantli huan mitztlalnamictise ica camanali catli temachtli.
\p
\v 11 “Nochi catli quielcahuaj Toteco Dios, ayacmo tleno hueli
quichiyase. Itztoque quen acatl catli amo quipiya tlali campa
inelhuayo, o quen se xihuitl catli amo quipiya atl para xoxohuixtos.
\v 12 Nimantzi pehua pilini huan huaqui quema noja ayamo
quintzontequij.
\v 13 Quej nopa pano ica catli quielcahua Toteco Dios. Se masehuali
catli amo quineltoca Toteco eltoc quen motemachía ipan se
tocatzahuali.
\v 14 Pero nochi nopa tlamantli catli yaya ipan motemachía, huetzis
hasta tlalchi.
\v 15 Huan quej nopa nojquiya itztoc se tlacatl catli motemachía
ipan ichaj. Mocajcayahua pampa nopa cali amo moquetztos para
nochipa. Nimantzi tlamis.
\v 16 Nojquiya nopa masehuali itztoc quen se cuahuitl catli xoxohuic
catli ica ijnaloc monextía para tlahuel quipiya chicahualistli huan
tetic. Huan imacuayohua yohuij campa hueli ipan nopa xochi mili.
\v 17 Inelhuayohua motlatzquilía campa onca miyac atl inintzala
teme.
\v 18 Pero quema se acajya quihuihuitla, tlami ixpolihui. Ayacmo
aqui quipantis campa eltoya pampa ya tlanqui.
\v 19 Ayacmo hueli tijchiyas itlajca nopa cuahuitl, huan seyoc
cuahuitl ixhuas campa eltoya.
\p
\v 20 “Pero xiquita. Toteco Dios amo quihuejcamajcahua se masehuali
catli xitlahuac, niyon amo quipalehuía catli tlajtlacolchihua.
\v 21 Toteco Dios noja mitzchihuilis xihuetzca huan xitzajtzi ica
paquilistli.
\v 22 Huan nochi mocualancaitacahua mopinahualtise. Huan Toteco
quintzontlamiltis nochi tlajtlacolchihuani.”
\c 9
\s Job quiijto amo aqui huelis momanahuis iixpa Toteco
\p
\v 1 Job quiilhui Bildad:
\p
\v 2 “Na nijmati para melahuac Toteco amo quihuejcamajcahua catli
xitlahuac. Pero ¿quenicatza huelis se masehuali mochihuas xitlahuac
iixpa Toteco Dios?
\v 3 Sintla se masehuali quinequisquía monajnanquilis ihuaya
Toteco, amo hueli quinanquilis se huelta ipan se mil
itlatzintoquilijcahua.
\v 4 Pampa Toteco Dios tlahuel tlalnamiqui huan tlahuel quipiya
chicahualistli. ¿Ajqueya mohuilanqui ihuaya huan tlatlanqui?
\p
\v 5 “Ica ihueyi cualancayo Toteco quinijcuinía tepeme.
Quinixcuepa ipan se tlatoctzi quema amo aqui momaca cuenta.
\v 6 Quicocoxonía ni tlaltipactli hasta campa itzinpehualtil.
Quichihua ma tlahuel mojmoliníaj itlaquetzalhua.
\v 7 Sintla Toteco quimaca tlanahuatili, tonati amo cahuanis, huan
sitlalime amo tlahuise.
\v 8 Toteco iseltzi quipatlajqui ilhuicactli. Yaya nejnemi ipan
hueyi atl para quitamachihuas ihuexca.
\v 9 Toteco quinchijchijqui nochi sitlalime hasta inijuanti catli
nejnemij motzquitoque huan inintoca Osa Mayor, Orión huan nopa
Pléyades. Nojquiya quinchijchijqui nopa miyaqui sitlalime catli
motzquitoque san sejco ica tlani ipan ilhuicactli.
\v 10 Toteco quichihua huejhueyi tlamantli catli amo aqui huelis
quimachilis. Quichihua tlahuel miyac tiochicahual nextili hasta amo
aqui huelis quipohuas.
\p
\v 11 “Pero quema yaya pano noixpa, amo niquita. Quema yaya
nentinemi nonechca, amo nijmachilía.
\v 12 Quema Toteco quititlani miquilistli para quiitzquis se
masehuali, ¿ajqueya hueli quitzacuilis para ma amo quichihua? O
¿ajqueya mosemacas para quitlatzintoquilis: ‘¿Tlaque tijchihua?’
\v 13 Toteco Dios amo quitzacuilía icualancayo. Iixpa ya
moechcapanose nochi catli mohueyimatij.
\p
\v 14 “Huajca ¿ajqueya na para nimonajnanquilis ihuaya Toteco
Catli Quipiya Nochi Chicahualistli? ¿Ica tlaque camanali huelis
nimomanahuis iixpa?
\v 15 Masque amo tleno nijchijtoc, amo hueli nimomanahuis ica miyac
camanali. San nijtlajtlanisquía ma nechtlasojtla huan ma quipiya
hueyi iyolo ica na, pampa yaya Juez.
\v 16 Masque nijnojnotzasquía huan yaya nechnanquilisquía, amo
nijneltoca para nelía nechtlacaquilisquía.
\v 17 Yaya quimiyaquilisquía notlaijiyohuilis huan
nechtzontlamiltisquía, masque amo tleno nijchijtoc.
\v 18 Yaya amo nechcahuilía ma nitlaijiyotilana. San onpano
nechtlaijiyohuiltía.
\v 19 Sintla ticamanalti tlen tetili, Toteco Dios catli más quipiya
fuerza. Sintla ticamanaltisquía tlen ajqueya más xitlahuac, yaya
tlatlanis. Amo aqui hueli quitelhuis ica niyon se tlamantli.
\v 20 Masque na niquijtosquía amo nijhuica tlajtlacoli, ica nocamac
nimotelhuisquía. Huan masque niquijtosquía para amo aqui huelis
nechtelhuis, Toteco Dios nechilhuisquía para senquistoc
nitlajtlacolchijquetl.
\p
\v 21 “Masque amo tleno nijchijtoc, niquita para amo tleno ipati.
¡Niquijiya nonemilis!
\v 22 Toteco quinita catli xitlahuaque huan catli tlajtlacolchihuaj
quen san se. Yeca niquijtohua para san se quintzontlamiltía catli
cuali huan catli amo cuali.
\v 23 Quema huala se fiero cocolistli ipan masehualme catli amo
tleno quichijtoque, yaya san huetzca.
\v 24 Quema se tlali huetzi ininmaco tlacame catli mosisiníaj,
Toteco Dios quinixtzacua nopa tetlajtolsencahuani huan quincahua ma
quichihuaca catli amo xitlahuac. Sintla amo Toteco Dios catli
quincahua ma quichihuaca catli amo xitlahuac, huajca, ¿ajqueya
quichihua?
\p
\v 25 “Nonemilis panoti chicahuac quen se motlalojquetl. Quena,
nimantzi pano huan amo niquita se tlatoctzi tlen paquilistli.
\v 26 Quen se pilcuaacaltzi yohui chicahuac ipan atl huan se cuajtli
chicahuac patlani para quiitzquis se piyo, quej nopa nojquiya
nimantzi panoti nonemilis.
\v 27 Masque nijchihuilía fuerza para niquelcahuas notlaijiyohuilis
huan nijcahuasquía notequipachol huan nijchihuasquía para
niyolpactos, amo nechpalehuisquía.
\p
\v 28 “Ta Toteco noja más tlaijiyohuilistli techtitlanisquía.
Pampa nijmati ta, tiToteco Dios, techita para amo nixitlahuac
moixpa.
\v 29 Masque nijchihua catli cuali o catli amo cuali, ta temachtli
techtlatzacuiltis. Huajca ¿para tlen nijchihuas campica?
\v 30 Masque nimaltisquía ica atl huan nimomajtequisquía ica nopa
xapo catli más tlapajpaca,
\v 31 ta techcalaquisquía ipan se soqui ostotl huan
techchihuasquía nelía nisoquiyo hasta noyoyo nojquiya
nechijiyasquía.
\p
\v 32 “Toteco amo ya se tlacatl quen na para huelis
nimonajnanquilis ihuaya. Amo hueli nijhuicas iixpa se juez para
nijtelhuis.
\v 33 Nipaquisquía sintla itztoya se catli hueli motlajcoquetzas
tlatlajco na huan Toteco Dios para techyoltlalisquía, pero amo
aqui.
\v 34 Sintla itztosquía se catli motlajcoquetza, quichihuasquía
para Toteco Dios ma ayacmo nechtlaijiyolhuiltisquía, huan ayacmo
niquimacasisquía itlatzacuiltilis.
\v 35 Huajca nihuelisquía nijcamanalhuisquía Toteco huan amo
niquimacasisquía. Pero amo hueli nijchihuas san ica na
nochicahualis.
\c 10
\p
\v 1 “Ya nicuesijqui niitztoc. Yeca nijnequi techcahuilica para
nicamanaltis. Niitztoc ipan tlacuajcualocayotl huan ipan hueyi
tequipacholi.
\v 2 Huan niquilhuisquía Toteco Dios: ‘Amo techtlatzacuilti san
pampa tijnequi. Más cuali techilhui para tlen techtlatzacuiltía.
\v 3 ¿Atlac tiquita cuali para techtlaijiyohuiltis huan
techcualancaitas na catli techchijchijqui ica momax? ¿Para tlen
tiquinpaquilismaca fiero masehualme huan tiquinpalehuía ma quisaca
cuali?
\v 4 ¿Atlac tiquita tlamantli san quen tojuanti timasehualme
tiquitaj?
\v 5 ¿Atlac monemilis nojquiya amo huejcahua quen tonemilis?
\v 6 ¿Huelis yeca tijtemohua tlaixpanoli huan tlajtlacoli masque
tijmati amo tleno nijchijtoc?
\v 7 ¿Atlac techtlatzacuiltía quema amo tleno nijchijtoc pampa
tijmati para amo aqui hueli techmanahuis momaco?
\p
\v 8 “ ‘Ta techchijchijqui ica momax, pero ama timoyolpatlatoc huan
techtzontlamiltía.
\v 9 Xiquelnamiqui para ta techchijchijqui ica soquitl, huan ¿ama
sempa techchihuas ma nimocuepas tlaltejpoctli?
\v 10 Tlen ipejya nonemilis ta tiitztoya nopona
techcualchijchihuayaya iijtico nonana.
\v 11 Ta techpijqui ica nocuetlaxo huan ica nonacayo.
Tiquinmotzquilti noomiyohua huan notlalohua.
\v 12 Ta techmacac nemilistli huan tlahuel techicnelijtoc. Pampa ta
techmocuitlahuijtoc, yeca niyoltoc.
\p
\v 13 “ ‘Pero nijmati para nochipa ta techtlachilijtoc ichtacatzi
para tiquitas sintla nitlajtlacolchihuas,
\v 14 para huelis techtlatzacuiltis huan amo techtlapojpolhuis
notlajtlacolhua.
\v 15 Huan teicnelti na sintla nitlajtlacolchijtoc. Huan sintla amo
tleno nijchijtoc, amo tleno ipati. ¡Amo techpalehuía! San tlahuel
nimopinahualtijtoc huan nitlaijiyohuijtoc.
\v 16 Huan sintla nijchihuasquía campica para nimotlananas, ta
tihuitonisquía ipan na quen se hueyi tecuani huan technextilis
mohueyi chicahualis para techcocos.
\v 17 Eltoc quen tlatoctzitzi tiquinhualica más testigos para
techtelhuise huan para más technextilis mohueyi cualancayo. Eltoc
quen techtitlanilía más soldados tlatoctzitzi para
techtlaijiyohuiltise.
\p
\v 18 “ ‘¿Huajca para tlen techquixti iijtico nonana? Más cuali
nimictosquía quema san niontlacatqui huan amo aqui nechitztosquía.
\v 19 Quej nopa amo quema niitztosquía, niyon amo nijpanosquía ni
tlaijiyohuilistli. Más cuali san nionpanotosquía tlen iijti nonana
hasta campa nechtlalpachojtosquíaj.
\v 20 Ama san pilquentzi tonali mocahua para noja niitztos, huajca
techtlalcahui para nimoyoltlalis se quentzi.
\v 21 Nimantzi niyas ipan nopa tlali tlen miquilistli campa onca
tzintlayohuilotl huan ayacmo quema nimocuepas.
\v 22 Nopona tlahuel tzintlayohua quen elisquía tlajco yohual. Ipan
nopa tlali tlen miquilistli tlanahuatíaj amo cuajcualme huan catli
quiitaj tlatlanextli para nojquiya eltoc san tlayohuilotl.’ ”
\c 11
\s Zofar quiilhui Job para Toteco quiita nochi tlaixpanoli
\p
\v 1 Zofar, catli ehua Naamat, quiilhui Job:
\p
\v 2 “Monequi na nimitznanquilis ica nochi catli tiquijtojtoc huan
nimitzquetzas. ¿Atlac icamanal se tlacatl catli camanalti miyac
quinextía para más quimati?
\v 3 Amo tleno huelis niquijtos quema ta ticamanalti tlahuel miyac.
Monequi para se acajya mitzpinahualtis pampa tijpinajtía Toteco
Dios.
\v 4 Ta tiquijtojtoc para motlamachtil nelxitlahuac huan para
timoilhuía tiitztoc xitlahuac iixpa Toteco.
\v 5 Cuali elisquía sintla Toteco Dios camanaltisquía huan
mitzilhuisquía nochi catli yaya moilhuía ica ta.
\v 6 Cuali elisquía sintla mitzchihuasquía titlalnamictoc pampa
san yaya quimachilía sesen tlamantli ichtacatzi tlen
tlalnamiquilistli. Tlahuel ohui para se masehuali quipiyas
tlalnamiquilistli. Xijtlacaquili ni: Toteco Dios
mitztlatzacuiltijtoc nelpilquentzi huan amo quen quinamiqui por
motlajtlacolhua.
\p
\v 7 “¿Tiquiximati nochi catli ichtacatzi tlen Toteco?
¿Tijmachilía nochi iyajatil Toteco Catli Quipiya Nochi
Chicahualistli huan hasta canque ontlami catli yaya hueli quichihua?
¡Amo ta tijmati!
\v 8 Eltoc onpano hueyi nochi catli ichtacatzi tlen Toteco huan
itlamachiltilis. Eltoc nelhuejcapa quen ilhuicactli. Pero ¿ajqueya
ta para tijmachilis nochi tlen itlalnamiquilis? Itlalnamiquilis
Toteco eltoc tlahuel iyoca tlen nochi sequinoc tlalnamiquilistli.
Nojquiya itlalnamiquilis Toteco yohui tlahuel huejcatla hasta campa
más tlatzintla. Amo tleno huelis tijmachilis quen yaya
tlamachilía.
\v 9 Huan itlalnamiquilis eltoc más hueyi que ni tlaltipactli huan
más patlahuac que hueyi atl.
\v 10 Sintla Toteco Dios huala para quitzacuas se acajya ipan
tlatzactli o sintla quinotzas se masehuali iixpa se juez para
quitelhuis, ta amo tihuelis tijtzacuilis para ma amo quichihua.
\v 11 Yaya quinyoliximati catli tlacajcayahuaj. Quiita nochi
tlajtlacoli huan sesen quichihuilía cuenta.
\v 12 Se huihui tlacatl amo hueli mochihuas se tlalnamijquetl, niyon
hueli se burro quitlacatiltis se masehuali.
\p
\v 13 “Xijnextili Toteco Dios catli eltoc ipan moyolo. Xijxitlahua
momax iixpa huan ximotlatlajti ica ya.
\v 14 Xijcahua nochi motlajtlacolhua huan ximoquixtili nochi
tlamantli catli amo cuali ipan moyolo.
\v 15 Huajca quena, tiixhuetzcas pampa tiitztos cuali iixpa Toteco
huan ayacmo tijmahuilis. Tijpiyas fuerza iixpa huan ayacmo
timopinahuas. Ayacmo tijpiyas niyon se motlajtlacol catli
mitzsoquihuisquía iixpa.
\v 16 Quej nopa tiquelcahuas nochi motlaijiyohuilis. Huan sintla
tiquelnamiquis, timoilhuis san tlatoc panoc quen elisquía atl catli
san panotiquisa moixpa.
\v 17 Nochi monemilis elis cuali. Cahuanis monemilis quen tonati
ipan tlajcotona. Catli teipa timoilhuis para tzintlayohuilotl, elis
quen ama quema tlanestihuala pampa nochi monemilis elis quen
tlatlanextli.
\v 18 Huan ta tiitztos temachtli pampa timotemachía ipan Toteco
Dios, huan yaya mitzmocuitlahuijtos. Tijtlachilis catli yahualtic,
huan tiquitas para eltoc cuali. Ticochis ica paquilistli.
\v 19 Quema timotecas, amo tleno mitzmajmatis. Huan miyac masehualme
quitemojtihualase motlapalehuil.
\v 20 Pero fiero tlacame amo huelise momanahuise niyon amo huelise
mochololtise. Inijuanti san hueli mochiyase para miquise.”
\c 12
\s Job quiilhui Zofar para inemilis se tlacatl eltoc imaco Toteco
\p
\v 1 Huan Job quiilhui Zofar:
\p
\v 2 “Temachtli amojuanti anquimatij nochi. Huan quema anmiquise,
ayacmo itztos niyon se masehuali catli tlalnamiqui.
\v 3 Pero na nijpiya tlalnamiquilistli nojquiya. Amojuanti amo más
ancuajcualme que na. ¿Ajqueya amo quimati nochi catli
antechilhuijtihualajtoque?
\v 4 Achtihuiya nimotlatlajtiyaya ica Toteco Dios huan yaya
techmacayaya catli nijtlajtlaniyaya. Pero ama nochi nocalnechcahua
san nechhuetzquilíaj. Masque na se nitlacatl catli nixitlahuac, ama
nochi techpinajtíaj.
\v 5 Tlacame catli nochi quipiyaj quinpinajtíaj masehualme catli
tlaijiyohuíaj. Amo quinequij quinitase catli motepotlamíaj.
\v 6 Toteco quincahua tlachtequini ica tlasehuilistli, huan catli
quicualancamacaj itztoque ica temachili. Nochi catli inijuanti
quipiyaj Toteco quitlalijtoc ininmaco.
\p
\v 7 “Nochi quimatij para TOTECO quichijchijqui nochi tlamantli.
Xiquintlatzintoquili nopa tlapiyalme catli más huihuitique huan
inijuanti mitzilhuise. Inijuanti quimatij para melahuac TOTECO
quinchijchijqui. Xiquintlatzintoquili nopa totome catli
patlantinemij. Inijuanti quimatij.
\v 8 Nojquiya mitznextilis ni tlaltipactli o nopa michime catli
itztoque ipan hueyi atl.
\v 9 Nochi quimatij para TOTECO quinchijchijtoc.
\v 10 Ininnemilis nochi masehualme huan nochi tlamantli yoltoque
eltoc imaco TOTECO. Yaya huelis quinquixtilis iniijiyo quema ya
quinequi.
\v 11 Quen tocamac quimachilía iajhuiyaca sesen tlamantli
tlacualistli, totlacaquilis hueli quicaqui huan quiyecohua catlique
camanali eltoc cuali.
\v 12 Huan huehuentzitzi quipiyaj tlalnamiquilistli huan
quimachilíaj miyac tlamantli.
\p
\v 13 “Pero san yaya Toteco Dios quipiya nopa tlalnamiquilistli
huan chicahualistli catli nelía melahuac. San yaya hueli
techconsejomaca catli quinamiqui. San yaya quimachilía nochi
tlamantli.
\p
\v 14 “Catli Toteco Dios quisosolohua, amo aqui hueli quicualtlalis
sempa. Huan sintla yaya quitzacuas se tlacatl, amo aqui huelis
quimajcahuas.
\v 15 Quema Toteco quichihua ma amo huetzi atl, huajca nochi huaqui
huan mocahua quen se huactoc tlali. Huan quema yaya quichihua ma
huetzi atl chicahuac, nochi tlatemi huan tlahueloni.
\p
\v 16 “Yaya quipiya nochi chicahualistli huan tlalnamiquilistli.
Quipiya tlanahuatili ica nochi catli tlacajcayahuaj huan nochi catli
sequinoc quincajcayajtoque.
\v 17 Toteco quinhuihuitilía jueces. Quichihua catli
teconsejomacayayaj ma quichihuaca tlamantli catli amo quinamiqui
quen para quintojtomase tetequipanohuani para ma yohuij majcajtoque.
\v 18 Yaya quinquixtía inintlanahuatil tlanahuatiani huan quichihua
ma quinhuicaca ilpitoque ica lazos ipan inintzinquechtla para ma
tetequipanotij.
\v 19 Toteco quinquixti inintequi totajtzitzi huan quichijqui ma
quihuicaca para tetequipanotij san tlapic. Quintlahuiso nopa
masehualme catli tlahuel chicahuaque.
\v 20 Yaya quinchihua ma ayacmo camanaltica catli tlalnamiquij.
Quincuilía inintlalnamiquilis nopa huejhueyi tlacame para ayacmo
teconsejomacase.
\v 21 Yaya quinpinahualtía tlanahuatiani. Quinquixtilía inintepos
inijuanti catli quipixque chicahualistli.
\p
\v 22 “Yaya quitlamiltía tzintlayohuilotl huan miquilistli ica
itlahuil.
\v 23 Toteco Dios quinchihua sequin tlalme ma mochihuaca tlahuel
chicahuaque, huan Toteco Dios quintzontlamiltía nopa tlalme catli
quinequi. Quinhueyilía sequin tlalme, huan sequin quinsemana huan
quintlahuelcahua.
\v 24 Yaya quinquixtilía inintlalnamiquilis tlanahuatiani ipan
tlaltipactli huan quinchihua ma mocuapolojtinemica ipan se huactoc
tlali campa amo onca ojtli.
\v 25 Quinchihua ma nejnemica ipan tzintlayohuilotl campa amo onca
niyon se tlahuili. Quinchihua ma mocuapoloca quen ihuintini.
\c 13
\s Job quitlajtlani Toteco para ayacmo ma quitlaijiyohuilti
\p
\v 1 “Xiquita, nochi catli amojuanti anquiijtohuaj ya niquitztoc
ica noixteyol, huan ya nijcactoc ica nonacas. Nochi ya nopa
nijmachilía.
\v 2 Nochi catli anquimatij, na nojquiya nijmati. Amo ximoilhuica se
nihuihui tlacatl. Amo más anquimatij que na.
\v 3 Pero na tlahuel nijnequisquía nicamanaltis ihuaya Toteco Catli
Quipiya Nochi Chicahualistli. Nijnequi niquixnextis nochi ni
tlamantli para nimomanahuis.
\v 4 Pero amojuanti san antechtlaijilhuíaj ica istlacatili.
Anitztoque quen antepajtiani catli amo hueli anquichicahuaj niyon se
masehuali.
\v 5 Cuali elisquía sintla amo tleno anquiijtosquíaj huan quej
nopa nelía annesisquíaj antlalnamiquij.
\v 6 Ama techtlacaquilica se quentzi. Xijchihuilica cuenta catli
niquijtos para nimomanahuis.
\p
\v 7 “¿Anquisenhuiquilise ancamanaltise quen anquipiyaj
itequiticayo Toteco Dios? Yaya amo anmechilhuijtoc niyon se
camanali. Nochi catli anquiijtohuaj san istlacatili huan
tlacajcayahuali.
\v 8 ¿Atlac Toteco Dios quinequi anistlacatise huan para quej nopa
anmonajnanquilise ipan ya itoca? Monequi amo aqui
anquichicoicnelise, niyon ya, niyon na.
\v 9 Xijpiyaca miyac cuidado para Toteco ma amo quipantis nochi
catli anquichihuaj. ¿Atlac anmoilhuíaj anhuelise anquicajcayahuase
Toteco quen antecajcayahuaj?
\v 10 ¡Amo! Yaya anmechtlatzacuiltis chicahuac sintla
anquichicoicnelíaj ya huan amo anquichihuaj san catli xitlahuac.
\v 11 ¿Amo anmechmajmatía ihueyitilis Toteco Dios? ¿Para tlen amo
anquiimacasij?
\v 12 Nochi nopa camanali catli antechilhuijtoque amo tleno ipati.
Eltoc quen tlaltejpoctli. Huan nochi catli anmoilhuíaj para ica
anquimanahuise eltoc quen se soqui comitl.
\p
\v 13 “Huajca ayacmo ximolinica. Techcahuilica ma nicamanalti na.
Ya nimocualtlalijtoc para niquijiyohuis tlen hueli tlaijiyohuilistli
catli hualas teipa.
\v 14 Nicamanaltis masque na nijmati por nocamanal Toteco huelis
nechmictis.
\v 15 Pero masque Toteco Dios nechmictisquía, noja
nimotemachisquía ipan ya huan nimomanahuisquía iixpa.
\v 16 Huan ya ni huelis nechpalehuis para nijnextis amo tleno
nijchijtoc, pampa se tlacatl catli amo cuali amo monechcahuis iixpa
Toteco Dios.
\p
\v 17 “Xijtlacaquilica cuali nochi catli niquijtos. Quena,
techtlacaquilica.
\v 18 Xiquitaca, na nimocualtlalijtoc ica tlaque nimomanahuis pampa
nijmati para huelis nijnextilis para amo tleno nijchijtoc.
\v 19 ¿Ajqueya hueli nechtelhuis ica se tlamantli catli amo cuali
catli nijchijtoc? Sintla amojuanti antechnextilisquíaj para
melahuac nijchijtoc catli amo cuali, ayacmo sempa nimomanahuisquía
hasta nimiquis.
\p
\v 20 “Toteco Dios, chicahuac nimitztlajtlanía para ayacmo
techchihuilis ni ome tlamantli para huelis nicamanaltis mohuaya:
\v 21 Ayacmo más techtlaijiyohuilti. Huan nojquiya amo techmajmati
quema niitztoc moixpa huan nijmachilía mohueyi chicahualis.
\v 22 Huajca technotza huan techtlatzintoquili huan na
nimitznanquilis. O sintla tijnequi, na nimitzcamanalhuis achtihui
huan ta technanquilis.
\v 23 ¿Se favor, san techilhui tlaque tlamantli catli amo cuali
nijchijtoc? Technextili notlaixpanolhua huan notlajtlacolhua.
\v 24 ¿Para tlen timohuejcatlalía tlen na? ¿Para tlen techita
quen nielisquía nimocualancaitaca?
\v 25 ¿Tijtlaijiyohuiltisquía se xihuitl catli huetzqui tlen se
cuahuitl huan quipatlanaltía ajacatl? ¿Tijtojtocasquía itlasolo
trigo catli quihuica ajacatl huan amo tleno ipati? Huajca ¿para
tlen techtojtoca na catli amo tleno nopati na?
\p
\v 26 “Eltoc quen tiquijcuilojtoc miyac fiero tlamantli para ica
techtelhuisquía. Eltoc quen techelnamiquiltía tlen nochi
notlajtlacolhua catli nijchijqui quema nieliyaya nitelpocatl.
\v 27 Eltoc quen tijtepitztlatoc noicxihua ipan cuahuitl para amo
nicholosquía. Techtlachilijtinemi campa ninejnemi. Tijtlalijtoc
sellos tlatzintla noicxihua para campa hueli ninemis nijsellojhuis
nopa tlali huan tijmatis para naya.
\v 28 Na nieltoc quen se cuahuitl catli huetztoc huan más palani
mojmostla. Niitztoc quen se yoyomitl catli mejtolime ya
quitlamicuajtoque.
\c 14
\s Job quiijto para nimantzi tlami inemilis se masehuali
\p
\v 1 “Amo huejcahua inemilis niyon se masehuali. Temitoc sesen
tonali tlen inemilis ica tlaijiyohuilistli.
\v 2 Timasehualme tiitztoque quen se xochitl catli cahuani se
tlatoctzi huan teipa pilini. O tiitztoque quen iecahuil se mixtli
catli san pano huan nimantzi ixpolihui.
\p
\v 3 “Toteco Dios, ¿para tlen tijtlatzquiltijtoc moixteyol ipan na
para techtlajtlanis cuenta?
\v 4 Amo aqui huelis quipantis catli tlapajpactic ipan se tlacatl
quen na catli nitlacatqui ica tlajtlacoli.
\v 5 Toteco, ta tiquixquetztoc quesqui tonali sesen timasehualme
tiitztose huan nelcototzi tonemilis. Quena, ta tiquixquetztoc
quesqui metztli sesen tojuanti tiitztose huan amo aqui hueli
quitlalilis niyon se tonali más.
\v 6 Huajca techcahuili nochi timasehualme se quentzi tonali para ma
timosiyajquetzaca. Xiquijcuini mohueyi cualancayo se tlatoctzi para
ma caxani. Tiitztoque quen titetequipanohuani. Techcahuili ma
tijtlamiltica nopa tequitl catli techmacac ma tijchihuaca.
\p
\v 7 “Quema tlacame quitzontequij se cuahuitl, noja onca pajtli
para chamanis huan sempa quipiyas imacuayohua catli selic.
\v 8 Huan masque inelhuayohua nopa cuahuitl huehuejtiyasquíaj
tlatzintla tlali huan icuatzonyo palanisquía,
\v 9 quema quiajsisquía atl, sempa chamanisquía. Quena, quema
inelhuayohua moxoxohuilisquíaj, yancuic ixhuatos.
\p
\v 10 “Pero quema se tlacatl miqui, ayacmo onca chicahualistli
ipani. San tlami tlaijiyotilana huan ayacmo itztoc.
\v 11 Quen apoctli tlejco tlen hueyi atl huan amo mocuepa, huan quen
se hueyatl tlahuaqui huan san polihui,
\v 12 quej nopa nojquiya tlami se masehuali catli miqui. Ayacmo
motlananas hasta quema ayacmo oncas ilhuicactli, niyon ayacmo isas.
\p
\v 13 “Toteco, cuali elisquía sintla techtlatisquía ipan nopa
hueyi ostotl campa itztoque mijcatzitzi huan techelcahuasquía hasta
tlamisquía mohueyi cualancayo. Pero xiquixquetza se tonal quema
sempa techelnamiquis.
\v 14 Sintla se masehuali miquis, ¿sempa moyolcuis? Sintla quena,
nelía nechpactisquía miyac. Huan mojmostla ipan nonemilis
nimochiyas hasta ta techmajcahuas tlen ni tlaijiyohuilistli para ma
nimiquis.
\v 15 Sintla ta technotzasquía, na niyasquía. Huan ta
techselisquía ica miyac tlaicnelijcayotl pampa techchijchijqui ica
momax.
\v 16 Huan ta tijpohuasquía sesen huelta canque nijtlali noicxi,
huan amo tijpohuasquía notlajtlacolhua.
\v 17 Tijtlatisquía nochi notlaixpanolhua ipan se coxtali. Huan
tiquixpolosquía nochi notlajtlacolhua.
\p
\v 18 “Ta tijtlamiltía catli quichiya se masehuali quen tepeme
huelonij huan mochihuaj cuechtic huan nopa teme tepehuij tlen se
tepexitl.
\p
\v 19 “Tijtlamiltía nochi catli quichiyaj masehualme quen miyac
atl quichihua nopa teme ma mocuepaca xali, huan miyac atl catli
huetzi quichihua ma mohuahuatatza miyac tlali.
\v 20 Nochipa tiquintlani masehualme huan teipa san ixpolijtehuaj.
Tiquinchihua masehualme ma huehuejtiyaca huan ma ixcuilichtiyaca
huan teipa miquij.
\v 21 Huan quema mictoc se masehuali, ayacmo quema quimatis sintla
iconehua moscaltise huan quiselise tlatlepanitacayotl o
pinahualistli.
\v 22 Yaya san quimachilía tlacuajcualocayotl ipan itlacayo huan
motequipachohua ica nopa tlaijiyohuilistli.”
\c 15
\s Elifaz quiajhuac Job
\p
\v 1 Huajca, Elifaz catli ehua Temán, quiilhui Job:
\p
\v 2 “Amo quinamiqui para se tlalnamijca tlacatl quen ta,
camanaltisquía quen tijchihua. Nochi camanali catli tiquijtojtoc
san eltoc quen ajacatl.
\v 3 Amo cuali para se masehuali camanaltis catli se huihuiyotl.
Mocamanal amo cuali huan amo mitzpalehuía.
\v 4 ¿Amo tiquimacasi Toteco Dios? ¿Amo tijtlepanita?
\v 5 Motlajtlacol mitzchihua xicamanalti quej nopa. Quena,
ticamanaltic quen se tlacajcayajca tlacatl.
\v 6 Huajca amo monequi na nimitztelhuis. ¡Amo! Mocamac ta, ya nopa
mitztelhuijtoc.
\p
\v 7 “¿Timoilhuía para ta tiachtihui tlacatl ipan ni
tlaltipactli? Huelis san ta catli más titlalnamiqui tlen nochi
sequinoc. ¿Titlacatqui hasta quema ayamo oncayaya tepeme?
\v 8 Huelis ta tijcajqui nochi tlamantli catli ichtacatzi catli
Toteco moilhui quichihuas. Huelis san ta tijpiya nochi
tlalnamiquilistli.
\v 9 ¿Tlaque tijmati catli tojuanti amo tijmatij? ¿Tlaque más
tijmachilía catli tojuanti amo tijmachilíaj?
\v 10 Tlatlajco tojuanti itztoque huehue tlacame catli
tzonchipahuaque huan quipiyaj más xihuitl que motata.
\p
\v 11 “¿Atlac tiquita para amo tleno ipati para Toteco Dios
mitzyoltlalis ica nochi ni yejyectzi camanali catli tojuanti
timitzmacaj?
\v 12 ¿Para tlen timoyolpatlatoc huan ticualancatlachiya?
\v 13 ¿Para tlen tijcualancaita Toteco Dios huan tijtlaijilhuía
ica camanali catli fiero?
\v 14 ¿Quenicatza huelis se masehuali mochihuas tlapajpactic iixpa
Toteco? ¿Huelis se catli tlacatqui tlen se sihuatl mochihuas
xitlahuac quen ta tiquijtohua?
\v 15 ¡Xiquita! Toteco Dios amo motemachía ipan itequihuajcahua.
Niyon ilhuicactli amo eltoc senquistoc tlapajpactic iixpa.
\v 16 Sintla quej nopa eltoc, ¿quenicatza huelis yaya motemachis
ipan se tlacatl quen ta catli mosisinía huan senquistoc
tlajtlacolchihua huan quinequi quichihuas miyac tlamantli catli amo
cuali?
\p
\v 17 “Sintla techtlacaquilis, nimitzpohuilis catli nijmati huan
catli niquitztoc.
\v 18 Nimitzpohuilis nopa tlamachtili catli tlalnamijca tlacame
quiselijque tlen ininhuejcapan tatahua.
\v 19 Inintatahua elque catli quiselijque nopa tlali huejcajya quema
ayamo ajsiyayaj tlacame tlen sequinoc tlalme para mosansejcotilise
ininhuaya.
\p
\v 20 “Se tlacatl catli amo cuali huan catli tlahuel mosisinía
quipantía tlaijiyohuilistli ipan nochi inemilis.
\v 21 Quema quicaqui tlahuejchihualistli, momajmatía. Quema nochi
eltoc cuali, hualahuij tlachtequini huan quitlachtequilíaj.
\v 22 Majmahui para quisas ica tlayohua. Moilhuía tlacame
quimictise.
\v 23 San motlajtlanijtinemij tlacualistli. Quiijtohua ¿canque onca
pantzi? Fiero tlacame quimatij nechcatitoc para tlamis ininnemilis.
\v 24 Itztoque ipan majmajtli huan tlahuel motequipachohuaj quen se
tlanahuatijquetl catli mocualtlalía para quinhuilanas
icualancaitacahua.
\v 25 Fiero tlacame quitlananaj ininmax iixpa Toteco Dios para
quimacase. Quej nopa quiixpanoj Toteco Catli Quipiya Nochi
Chicahualistli.
\v 26 Motzacuaj ica ininyoltepostzajca catli tilahuac para
quinmanahuisquía huan motlalohuaj campa ya.
\p
\v 27 “Nopa fiero tlacame motomajtoque huan moricojchijtoque,
\v 28 pero monequi itztose ipan altepeme catli tlami sosolijtoque
huan ipan calme tlaxolejtoque campa amo aqui mocahuaj pampa nochi
quintlamimictijque.
\v 29 Nopa tlacame amo elise ricos para nochipa, niyon amo
quisenhuiquilise moaxcatise tlamantzitzi para mochihuase huejhueyi
ipan inintlal.
\p
\v 30 “Fiero tlacame mocahuase ipan tzintlayohuilotl para nochipa
huan amo hueli cholose. Se tlitl quintzontlamiltis huan Toteco ica
iijiyo quintlamiltis.
\v 31 Huajca se tlacatl catli amo cuali ma ayacmo motemachi ipan
iricojyo pampa amo huejcahuas. Niyon ayacmo más ma mocajcayahuas,
pampa nopa tomi amo hueli mocohuis catli yaya quiyoltemohua. Huan
teipa iyolo elis cactoc.
\v 32 Fiero tlacame miquij quema ayamo ajsi hora huan tlamis nochi
tlamantli catli ipan motemachiyayaj.
\v 33 Inijuanti elise quen se xocomecatl catli quitequilijtoque
itlajca quema ayamo icsiyaya. O elise quen se olivo cuahuitl quema
huetzij ixochiyo huan ayacmo huelis temacas itlajca.
\v 34 Ininconehua amo cuajcualme amo momiyaquilíaj. Nopa tlacame
san quipactíaj quiselise tomi ichtacatzi huan quitemitíaj
ininchajchaj ica miyac tlamantli. Huajca Toteco quintzontlamiltis
ica tlitl.
\v 35 Inijuanti san huelij quiyolitíaj tlajtlacoli huan
tequipacholi. Ipan ininyolo san moilhuíaj quenicatza huelij
tlacajcayahuase.”
\c 16
\s Job quiilhui Elifaz para ya quipiya Itlatempalehuijca
\p
\v 1 Huajca Job quiilhui Elifaz:
\p
\v 2 “Na nijcactoc miyac hueltas nochi ya nopa. Amojuanti amo
nelía antechyoltlalíaj. San achi más antechtlaijiyohuiltíaj.
\v 3 ¿Amo quema anmoquetzase ancamanaltij? ¿Para tlen tlahuel
anhuejcahuaj ica camanali catli amo tleno ipati?
\v 4 Na nojquiya nihuelisquía nicamanaltisquía quen amojuanti
sintla amojuanti anmopantisquíaj ipan tlaijiyohuilistli.
Nimechtlaijilhuisquía huan nicojolinisquía notzonteco huan
nimechpinajtisquía.
\v 5 Pero amo ya nopa nijchihuasquía. Nimechcamanalhuisquía para
nimechpalehuisquía huan nimechyoltlalisquía. Nijchihuasquía
campica para xiquelcahuaca amotlaijiyohuilis.
\v 6 Pero ica na nijsenhuiquilía nitlaijiyohuía masque
nicamanaltisquía para nimomanahuis o amo nicamanaltisquía.
\p
\v 7 “Toteco Dios, ta techtlaijiyohuiltijtoc huan techquixtilijtoc
nofamilia.
\v 8 Techchijtoc nicocoxquetzi huan niteicneltzi, huan ni tlacame
quiijtohuaj san nechajsi ni tlatzacuiltili por notlajtlacolhua.
\p
\v 9 “Toteco tlahuel nechcualancaita. Yaya quitzayanqui nonacayo.
Motlanhuehuechotza ica cualantli huan chicahuac nechsentlachilía.
\v 10 Nochi masehualme catli hualahuij para nechyoltlalise
nechhuetzquilíaj huan san nechmaquilíaj ipan noixayac.
Nocualancaitacahua mosentilíaj para nechpinajtise.
\v 11 Huan Toteco Dios nechtemactilijtoc ininmaco tlajtlacolchihuani
huan ininmaco tlacame catli fiero ininnemilis.
\p
\v 12 “Na niitztoya cuali huan ica paquilistli huan Toteco Dios
pejqui nechtlaijiyohuiltía. Nechitzqui noquechtla huan
nechmajcajqui tlalchi huan quichijqui cuechtic nochi notlacayo.
Teipa nechcuahuiyoni huejcapa para nechmelac itas ica cuatlamintli.
\v 13 Isoldados nechyahualojque huan nechmajcahuilijque
cuatlamintli. Quitlamicocojtoque notlacayo huan ni tlali xolonqui
ica noeso. Niyon quentzi amo nechtlasojtlaque.
\v 14 Tlatoctzitzi Toteco quisenhuiquilía nechmaquilijtoc.
Nechtojtocatihualajtoc quen se tlahuilanquetl.
\v 15 Huan nica nimosehuía huan nimoquentijtoc ipan nopa fiero
yoyomitl catli quinextía notequipachol. Ipan notzonteco nijtemilía
cuanextli. Ya nimotemacatoc iixpa.
\v 16 Noixteyolhua nochi chichiltic pampa tlahuel nichocatoc.
Samajtoc huan yayahuic noixtencuetlaxo hasta nesi para
nimiquisnequi.
\v 17 Quej nopa nechpantijtoc, masque amo quema nimosisinijtoc. Huan
nochi catli niquilhuijtoc Toteco Dios quema nimotlatlajtijtoc ica ya
eltoya cuali.
\p
\v 18 “Ma amo quiijis noeso ni tlali. Xijcahuili noeso ma
huejchihua por quinextis notlaijiyohuilis.
\v 19 Pero yaya catli noTestigo huan noTlatempalehuijca itztoc
huejcapa ipan ilhuicac. Yaya Toteco nechita huan quimati amo
nijhuica tlajtlacoli.
\v 20 Nohuampoyohua nechpinajtíaj, pero na nimochoquilía iixpa
Toteco.
\v 21 Cuali elisquía sintla itztoya se catli hueli motlajcoquetzas
ica Toteco Dios huan ica na quen quichihuas se tlacatl catli
motlajcoquetza ica ome ihuampoyohua.
\v 22 Pampa amo huejcahuas para nimiquis huan niyas ipan nopa ojtli
campa ayacmo quema nimocuepas.
\c 17
\p
\v 1 “Noyoltzi nechcocohua huan tlahuel nimotequipachohua hasta
nijmati para nimiquis. Nopa tecacahuatl eltoc tlasencahuali para
ipan nechtlalpachose.
\v 2 Nechyahualojtoque miyac masehualme catli nechpinajtíaj. Campa
hueli itztoque catli nechhuetzquilíaj.
\p
\v 3 “¡Ay Toteco Dios! Monequi ta techpalehuis huan tijnextis para
amo nijchijtoc catli amo cuali pampa amo aqui más hueli
nechpalehuis.
\v 4 Ta tijtzactoc inintlalnamiquilis ni tlacame para ma amo
quimachilica, pero amo xiquincahuili ma techtlanica.
\v 5 Fiero tlacame catli quiselíaj tomi para quintelhuise
ininhuampoyohua quipantise para ininconehua tlaijiyohuise huan
mocahuase popoyotzitzi.
\p
\v 6 “Yaya Toteco Dios nechpinahualtijtoc tlamiyacapa. Quichijtoc
para ma nechhuetzquilica huan nechixchijchaj nochi masehualme.
\v 7 Nitlachiya quen tlamixtentoc pampa tlahuel nichocatoc.
Nonemilis tlantiya quen se ecahuilotl.
\v 8 Cuajcualme momajmatíaj quema nechitaj.
\p “Huan se tonali inijuanti motlananase huan quintlanise nopa
masehualme catli amo tleno tlatlepanitaj.
\v 9 Quena, masehualme catli xitlahuaque quisenhuiquilise nejnemij
ipan iniojhui catli yohui huejcapa. Catli yoltlapajpactique elise
noja más tetique huan quipiyase más chicahualistli.
\p
\v 10 “Pero xihualaca nochi amojuanti huan anquiitase para amo
mopantis niyon se tlalnamijquetl campa amojuanti.
\v 11 Pero ya panotoc nochi tonali catli cuali para na. Ixpolijtoc
nochi catli nijchiyayaya. Nochi catli nimoilhuijtoya nijchihuas,
tlanqui.
\v 12 Huan amojuanti tlahuel anquielihuishuíaj catli melahuac.
Anquiijtohuaj para yohuali eltoc tonaya huan tonaya eltoc yohuali.
\v 13 San nimochiya para nimiquis huan nimotecati campa
tzintlayohuilotl.
\v 14 Huan nipaquis ipan nopa tecacahuatl huan nijtocaxtis notata.
Huan niquinselis nopa ocuilime ica paquilistli. Elis quen
niquintocaxtis nonana huan nosihua icnihua.
\v 15 Huajca ¿tlaque paquilistli nechchiya? Amo aqui huelis
quipantis se tlamantli catli nijchiya.
\v 16 Nochi catli nijchiyayaya yas nohuaya ipan notecacahua. San
sejco timosiyajquetzatij ipan tlaltejpoctli.”
\c 18
\s Bildad sempa quiilhui Job
\p
\v 1 Huajca Bildad catli ehua Súa quiilhui Job:
\p
\v 2 “¿Hasta quema timoquetzas ticamanaltis? Xicamanalti ica
camanali catli mitznextis para titlalnamiqui sintla tijnequi ma
timitznanquilica.
\v 3 ¿Para tlen techita quen titlapiyalme catli huihuitique?
\v 4 Ta tlahuel timocualancamaca huan tijtzayana moyoyo.
¿Timoilhuía para ica ya nopa pehuas mojmolinis ni tlali huan
mijcuinise nochi teme?
\p
\v 5 “Quema fiero inemilis se masehuali quen ta, yaya miquis huan
itlahuil sehuis. Ayacmo tlatlas itli ipan icalijtic.
\v 6 Teipa oncas tzintlayohuilotl ipan nochi calme campa onca
tlajtlacolotl, huan sehuise nopa tlahuilme catli eltoc ininnechca.
\v 7 Amo cuajcualme mohueyimatij huan moilhuíaj para huelis
tecajcayahuase, pero huetzise ipan tlaquetztli catli san inijuanti
quisencajtoque.
\p
\v 8 “Campa amo cuajcualme nejnemij, quinpantía se matlatl. Huan
ilpitoque ipan nopa matlatl huetzij ipan se ostotl catli
tlasencahuili.
\v 9 Eltoc quen se tlaquetztli quiitzquía iniicxihua huan se lazo
quintlamiilpía.
\v 10 Campa nejnentiyohuij amo cuajcualme quinchiya se tlaquetztli
para quinmasiltis. Pero inijuanti amo quiitaj sintla eltoc
tlalijtic.
\p
\v 11 “Tlahuel majmahuij amo cuajcualme campa hueli yohuij pampa
quimatij catli fiero yohui inintepotzco.
\v 12 Ininchicahualis amo cuajcualme tlantiya por mayantli. Nochi
masehualme quichiyaj para ma huetzica ipan tlajtlacoli.
\v 13 Cocolistli quipalanaltía inincuetlaxo amo cuajcualme. Huan
miquilistli quitlamiltía inintlacayo.
\v 14 Masque itztoyaj ica temachtli achtihui ipan inintlacayo,
miquilistli quinquixtis ipan inintlacayo para ma temoca ipan nopa
hueyi ostotl campa itztoc nopa tlanahuatijquetl catli más
temajmatíaj.
\v 15 Masehualme quitlatise ichaj se fiero tlacatl ica azufre huan
tlamis nochi catli quipiya.
\v 16 Se fiero tlacatl elis quen se cuahuitl catli huaquij
inelhuayohua tlalijtic, huan teipa huaquij imacuayohua huejcapa.
\v 17 Tlamis nochi catli tlajtlacolchihuani quichijque ipan ni
tlaltipactli huan ayacmo aqui quinelnamiquis.
\v 18 Toteco Dios quinquixtis tlen campa onca tlahuili huan
quimajcahuas campa tzintlayohuilotl. Quintojtocas tlen ni
tlaltipactli.
\v 19 Huan ayacmo mocahuas niyon se inincone, niyon se iniixhui huan
niyon se ininteiximatca ipan nopa tlali campa itztoyaj.
\v 20 Masehualme catli itztoque campa hualquisa tonati hasta campa
oncalaqui, momajmatíaj por catli ininpantis nopa fiero masehualme.
\v 21 Quiijtose: ‘Ya ni elqui ichaj se catli quihuejcamajcajqui
Toteco Dios huan amo quinejqui quiiximatis.’ ”
\c 19
\s Job quiijtohua para quipiya iTlamanahuijca
\p
\v 1 Job quiilhui Bildad:
\p
\v 2 “¿Hasta quema anquicahuase antechtlaijiyohuiltise? ¿Hasta
quema anquicahuase antechcocose ica amocamanal?
\v 3 Majtlactli hueltas antechtlatelhuijtoque para nitlaijiyohuía
por na notlajtlacol. ¿Atlac amo anpinahuaj antechilhuise quej nopa?
\v 4 Sintla melahuac nitlajtlacolchijtosquía, huajca monequiyaya
antechnextilise canque nimocuapolojtoc.
\v 5 Anmoilhuíaj tlahuel anhuejhueyi huan antechpinahualtíaj
pampa nechicnotlalijtoque.
\v 6 Pero cuali xijmatica ya ni. Eltoc Toteco Dios catli
nechchihuilijtoc catli amo cuali. Yaya catli nechmasiltijtoc ipan
imatla.
\p
\v 7 “Na nitzajtzi chicahuac para yaya nechchihuilijtoc catli amo
cuali, pero amo aqui nechnanquilía para nechpalehuis. Masque
nichoca, amo aqui nechchihuilía catli xitlahuac.
\v 8 Toteco Dios quitzactoc noojhui para amo hueli nipanos. Huan
campa ninejnemi quicueptoc notlahuil ica tzintlayohuilotl.
\v 9 Yaya nechcuili nochi catli nijpixqui huan quichijtoc para
ayacmo aqui ma nechtlepanita.
\v 10 Nechtlaijiyohuiltijtoc campa hueli huan yeca ya nitlantinemi.
Quitlamilti nochi catli cuali catli nijchiyayaya.
\v 11 Yaya tlahuel cualani nohuaya huan nechita quen se
niicualancaitaca.
\v 12 Quintitlanqui isoldados para ma nechhuilanaca. Inijuanti
mocualtlalíaj para nechitzquise huan para quiyahualose nochaj.
\p
\v 13 “Noteiximatcahua nechhuejcatlalijtoque huan nochi noicnihua
quichihuaj quen amo nechiximatij.
\v 14 Nochi nocalnechcahua huan nohuampoyohua catli más nechca
nechtlahuelcajtoque.
\v 15 Nochi catli itztoque ipan nochaj huan notequipanojcahua,
nechitaj quen niehua seyoc tlali.
\v 16 Quema nijnotza notequipanojca, yaya amo nechnanquilía huan
amo huala masque nijsenhuiquilía nijnotza.
\v 17 Nosihua quiijiya noijiyo. Noicnihua amo quinequij nechitase.
\v 18 Hasta catli coneme nojquiya nechcualancaitaj. Quema nimoquetza
inijuanti nechhuihuiitaj.
\v 19 Catli eliyayaj nocualhuampoyohua ama nechijiyaj. Huan nochi
catli tlahuel niquinicnelía moicancueptoque ica na.
\v 20 San niomitl nimocajtoc. Nechcatitoc niitztoc para nimiquis.
\p
\v 21 “Annohuampoyohua, techtlasojtlaca pampa yaya Toteco Dios
catli nechmacatoc.
\v 22 ¿Para tlen antechtoquilijtinemij quen Toteco Dios quichihua?
¿Amo anquiitaj para tlahuel nitlaijiyohuía?
\p
\v 23 “Cuali elisquía para se acajya quiijcuilosquía nochi
nocamanal para amo aqui quielcahuasquía.
\v 24 Quitejtequisquía sesen camanali ipan se hueyi tetl ica se
cincel huan quiixtemitisquía ica plomo para amo ixpolihuis para
nochipa.
\p
\v 25 “Na nijmati para itztoc noTlamanahuijca, huan ipan itlamiya
tonali yaya moquetzas ipan ni tlaltipactli.
\v 26 Huan masque palanis ni notlacayo, teipa ica notlacayo niquitas
Toteco.
\v 27 Huan por na noseltzi niquitas. Quena, niquitas ica na
noixteyol. Ica nochi noyolo nijnequisquía nimantzi ma ajsi nopa
tonali.
\p
\v 28 “¿Quenicatza anmotemacaj para antechtlaijiyohuiltijtinemise?
Anquichihuaj quen elisquía anquimatij para elqui notlajtlacol, pero
amo neli.
\v 29 Huajca nimechilhuía, xijpiyaca cuidado pampa amoseltzitzi
anmotemolíaj tlatzacuiltili por catli anquichihuaj. Huan se tonali
anquimatise para temachtli Toteco Dios tetlajtolsencahua.”
\c 20
\s Zofar quinanquili Job huan quiajhuac
\p
\v 1 Huajca Zofar, catli ehua Naamat, quiilhui Job:
\p
\v 2 “Na nimoisihuiltía para nimitznanquilis pampa nelía
nicualani. Amo hueli niquijiyohuis mocamanal, huan ama nimoilhuijtoc
quenicatza nimitznanquilis.
\v 3 Ica nochi catli tiquijtojtoc techpinahualtijtoc pampa
timitzilhuijtoque para tijchijtoc catli amo cuali, pero ama
notlalnamiquilis nechchihualtía ma nimitznanquili.
\p
\v 4 “¿Amo tijmati para hasta quema Toteco Dios quintlali
masehualme ipan ni tlaltipactli huejcajya,
\v 5 amo huejcahua ipaquilis se tlacatl catli amo cuali? Se fiero
tlacatl san hueli tlatlani para se tlatoctzi.
\v 6 Masque se tlacatl catli amo quitlepanita Toteco Dios tlahuel
mohueyimati huan quimati itzonteco quiajsisquía ne mixtli,
\v 7 yaya tlamis para nochipa. Huan masehualme quimajcahuase
itlacayo quen elisquía cuitlatl. Huan nochi catli quiiximatque
motlatzintoquilise ¿canque itztoc?
\v 8 Ixpolihuis quen se temictli, o quen se tlanextili catli
monextía ica tlayohua huan ayacmo aqui huelis quipantis.
\v 9 Niyon ifamilia, niyon ihuampoyohua nopa tlacatl catli amo
quitlepanitac Toteco, ayacmo quema quiitase.
\v 10 Huan iconehua quitlajtlanise tlapalehuili tlen catli hueli
masehuali masque teicneltzitzi. Sequinoc quinchihualtise ma
tequitica nelchicahuac para quicuepase catli inintata quinichtejqui.
\v 11 Huan nopa fiero tlacatl catli san eltoya se telpocatl huan
eltoya tetic, ama mictoc huan iomiyohua mocueptoque tlaltejpoctli.
\p
\v 12 “Tlahuel quipacti nopa fiero tlacatl para quichihuas catli
amo cuali hasta quimachili quen eltoya ajhuiyac ipan icamac.
\v 13 Quiajocui icamaijtic huan ica yolic quitolohuayaya para amo
tlamis nimantzi.
\v 14 Pero ica se tlatoctzi, eltos quen nochi nopa tlamantli catli
quicuajtoc, xocoyas ipan iijti. Mochihuas quen inintencococa cohuame
iijtico.
\v 15 Huan quiisotlas nochi nopa ricojyotl catli quiichtectoc pampa
Toteco Dios amo quicahuilis ma quipixto.
\v 16 Eltoc quen se fiero tlacatl quichichina inintencococa cohuame
huan se cohuatl quitzacanis huan quimictis.
\v 17 Yaya quiichtejqui tlahuel miyac aceite, sayol nectli huan
queso, pero ama ayacmo quema quicuas.
\v 18 Nopa tequitl catli quichihuayaya para tlachtequis elis san
tlapic. Catli mocuilijtoc monequi quicuepas. Amo tleno mocahuas para
ica mopaquilismacas.
\v 19 Yaya quintlaijiyohuilti catli teicneltzitzi huan moaxcati
calme catli yaya amo quichijqui. Amo tleno mocajqui ininmaco nopa
teicneltzitzi.
\v 20 Nochipa nopa fiero tlacatl quinequiyaya más tlamantli. Pero
masque tlahuel quipacti moaxcatis tlamantli catli amo iaxca, ama amo
tleno quipiya. Huan ica nochi catli quinejqui quipiyas, amo huelis
momaquixtis ama.
\v 21 Masque quitlamicuajqui nochi tlamantli, catli quipiya amo
huejcahuas.
\p
\v 22 “Quema tlahuel moricojchijtoc nopa fiero tlacatl, quipantis
miyac tlaohuijcayotl, catli quitzontlamiltis.
\v 23 Quema nechcatitoc para temis iijti ica nochi catli cuali,
Toteco Dios quititlanis ihueyi cualancayo ipan ya.
\v 24 Sintla quinequi mochololtis tlen Toteco, Toteco quitepotztocas
huan quiajsis ica icuatlamin.
\v 25 Quiquixtía nopa cuatlamintli catli quisentlapalo itlacayo
huan iyecapa quipiya ichichica. Se hueyi majmajtli quiitzquía huan
yaya miqui.
\p
\v 26 “Nochi iricojyo tlami quema yaya miqui huan yohui ipan nopa
hueyi ostotl campa tlahuel tzintlayohua. Se hueyi tlitl
quitlamitlatis ya huan nochi catli quicajtejtoque ipan ichaj.
\v 27 Toteco Dios quipannextis itlajtlacolhua nopa masehuali. Huan
masehualme catli itztoque ipan ni tlaltipactli motlananase para
quitelhuise.
\v 28 Elis quen hualas miyac atl huan quihuicas ichaj huan nochi
iricojyo pampa Toteco Dios tlahuel cualantoc ihuaya.
\v 29 Ya ni catli ininpantis amo cuajcualme pampa ya ni catli Toteco
Dios quinajocuilijtoc.”
\c 21
\s Job quinanquili Zofar quen yaya cualani ica Toteco Dios
\p
\v 1 Huajca Job quiilhui:
\p
\v 2 “Xijtlacaquilica cuali catli nimechilhuis huan san ya nopa
nechyoltlalis.
\v 3 Nimechtlajtlanía techcahuilica nicamanaltis huan quema
nitlamis, xijsenhuiquilica techpinajtica sintla anquinequij.
\p
\v 4 “Na amo nicualani ica niyon se masehuali. Yaya Toteco Dios
catli nijnequi nijtlatzintoquilis huan yeca notonaltzi tlahuel
tlaijiyohuía.
\v 5 Techtlachilica huan ximomajmatica quen nieltoc, masque monequi
xijtzacuaca amocamac ica amomax por quenicatza ninesi.
\v 6 Quema nimoilhuía catli nijnequi niquijtos, nechitzquía se
hueyi majmajtli huan nihuihuipica.
\p
\v 7 “Na niquita para amo cuajcualme itztoque hasta huehuejtiyaj
huan moricojchihuaj.
\v 8 Quinitaj ininconehua moscaltíaj huan iniixhuihua nojquiya.
\v 9 Ininchajchaj amo cuajcualme eltoque temachtli, huan amo
quinajsi niyon se majmajtli. Niyon Toteco Dios amo
quintlatzacuiltía.
\v 10 Nochi ininhuacaxhua momiyaquilíaj huan cuali
quintlacatiltíaj ininconehua. Amo quintlahuisohuaj.
\v 11 Ininconehua senquistoc pactoque. Motlalojtinemij huan
tzicuintinemij quen pilborregojtzitzi.
\v 12 Amo cuajcualme mojmostla huicatinemij huan mijtotijtinemij ica
arpas, tambores huan flautas. Amo tleno quinpolohua pampa tlahuel
ricos.
\v 13 Ica se tlatoctzi miquij niyon amo tlaijiyohuíaj. Ica
paquilistli yohuij ipan nopa hueyi ostotl campa mijcatzitzi.
\v 14 Inijuanti quitlahuelcahuaj Toteco Dios huan quiilhuíaj:
‘Techtlalcahui. Amo tleno tijnequij tijmatise tlen ta, niyon amo
tijnequij tijchihuase catli tijnequi.’
\v 15 Huan amo cuajcualme quiijtohuaj: ‘¿Ajqueya yaya catli quipiya
nochi chicahualistli? ¿Para tlen monequi tijtlepanitase huan
tijtequipanose? ¿Tlaque tijtlanise sintla timotlatlajtise ica ya?’
\v 16 Pero masque quej ni quiijtohuaj huan nochi quisa cuali para
amo cuajcualme, amo inijuanti catli nelía quipiyaj tlanahuatili
para quiijtose tlaque panos. Itztoque huejca tlen Toteco Dios huan
yeca na niquinhuejcamajcahua huan amo nijcaqui ininconsejo.
\p
\v 17 “Pero niquita para nelquentzi panoj tlaijiyohuilistli amo
cuajcualme. Huan Toteco Dios ica ihueyi cualancayo san quemantica
quintitlanilía tlacuajcualocayotl huan miquilistli.
\v 18 Amo cuajcualme quemantic itztoque quen trigo itlasolo catli
ajacatl quihuica. Itztoque quen sacatl huactoc catli patlani.
\p
\v 19 “Miyac quiijtohuaj: ‘Toteco Dios quintlatzacuiltis iconehua
se tlacatl catli tlajtlacolchijtoc.’ Pero na niquijtohua más cuali
para Toteco Dios ma quitlatzacuilti nopa tetaj catli
tlajtlacolchijtoc huan amo iconehua. Huan quitlatzacuiltisquía ipan
itlacayo para yaya quimatisquía tlaque quinamiqui para
itlajtlacolhua.
\v 20 Quena, ma quitzontlamilti nopa masehuali por ya
itlajtlacolhua. Nopa masehuali ma quitlamimachili nochi ihueyi
cualancayo Toteco Catli Quipiya Nochi Chicahualistli.
\v 21 Pampa quema se masehuali mictos, amo momacas cuenta tlaque
ipantis isihua huan iconehua huan sintla quiselise
tlatzacuiltilistli.
\p
\v 22 “Pero ¿ajqueya huelis quimachtis o quitlacahualtis Toteco,
yaya catli itztoc nopa Tetlajtolsencajquetl catli más hueyi?
\v 23 Toteco quicahuilía se tlacatl ma miqui quema quipiya fuerza
huan tominpiya huan nochi yohui cuali para ya.
\v 24 Miqui quema quipiya nochi catli cuali para quicuas, huan
tomahuac huan senquistoc yolpactoc.
\v 25 Huan Toteco quicahuilía seyoc tlacatl ma miqui catli
tlaijiyohuía huan amo quema quipixqui niyon se tlamantli catli
cuali.
\v 26 Catli tlapijpiya huan catli teicneltzi miquij huan
quintlalpachohuaj ipan san se tlaltejpoctli huan san se tlamantli
ocuilime quicuaj inintlacayo.
\p
\v 27 “Cuali na nijmati tlaque anmonejnehuilíaj huan quenicatza
anquinequij antechixpanose.
\v 28 Tlatoctzitzi antechilhuíaj tlen nopa tominpiyani huan amo
cuajcualme catli quiselijque tlatzacuiltili por inintlajtlacolhua
huan ama senquistoc sosolijtoque ininchajchaj.
\v 29 Pero na nimechilhuía: Xiquintlatzintoquilica aquime hueli
catli miyac quimatij, huan catli miyac tlapaxalojtoque huan
inijuanti anmechilhuise catli melahuac.
\v 30 Amo cuajcualme nochipa momanahuíaj quema huala tlaohuijcayotl
huan cholohuaj quema Toteco Dios quinextía icualancayo.
\v 31 Amo aqui quinajhua tlamiyacapa, niyon amo aqui
quintlatzacuiltía por catli quichijtoque.
\v 32 Ica tlatlepanitacayotl quinhuicaj inintlacayo campa
tecacahuatl huan nopona mocahua se tlacatl para tlamocuitlahuis.
\v 33 Quema quinhuicaj para quintlalpachotij, yohuij tlahuel miyac
masehualme. Sequin tlayacanaj huan sequin yohuij inintepotzco para
quintlalpachotij ipan tlali catli yamanic.
\p
\v 34 “Huajca ¿quenicatza huelis amojuanti antechyoltlalise ica
camanali catli amo tleno ipati? Quema antechnanquilíaj, amo
melahuac catli anquiijtohuaj.”
\c 22
\s Elifaz quinanquili Job ica expa
\p
\v 1 Huajca Elifaz, catli ehua Temán, quiilhui Job:
\p
\v 2 “¿Timoilhuía para se masehuali huelis quichihuas se
tlenijqui para quipalehuis Toteco Dios? Masque se tlacatl itztoc
tlalnamiqui ¿quenicatza hueli quipalehuis?
\v 3 Sintla tiitztosquía tixitlahuac, ¿para tlen quipactisquía
Toteco Catli Quipiya Nochi Chicahualistli? ¿Tlaque quitlanis Toteco
por ta sintla timochihuas se masehuali catli cuali?
\v 4 ¿O timoilhuía para yaya mitzajhua huan mitztelhuía ama pampa
tixitlahuac?
\v 5 ¡Amo! Yaya mitztlatzacuiltijtoc por nochi tlamantli catli amo
cuali catli tijchijtoc. Tijpiya tlahuel miyac motlajtlacolhua hasta
amo aqui hueli quinpohuas.
\p
\v 6 “Masque tieliyaya tirico, huelis timocajqui ica inintlaque
nopa teicneltzitzi catli tiquintlanejtiyaya tomi. Quena, huelis
quema hualayayaj para mitztlanehuiliquij tomi, tiquinilhuiyaya ma
mitzprendajcahuilica se ininyoyo huan tiquinchijqui ma mocahuaca
xolome.
\v 7 O huelis amo tiquinamacac catli amiquiyayaj, o amo
tiquintlamacac catli mayanayayaj.
\v 8 Masque ta tijpixqui chicahualistli huan miyac tlali, huelis
timoilhui para nochi elqui san para ta.
\v 9 Huelis amo tiquinpalehui cahual sihuame huan tiquincuepalti san
quiaja. O huelis icnotzitzi tiquinpostequili iniajcol ica tlamamali.
\v 10 Yeca ama miyac tlaquetztli mitzyahualojtoque para mitzmasiltis
huan onca miyac tlamantli catli tlahuel mitzmajmatía.
\v 11 Tzintlayohuilotl mitzyahualojtoc para ayacmo titlachiyas huan
eltoc quen hualajtoc miyac atl huan mitzatzonpolihuiltijtoc.
\p
\v 12 “Toteco Dios itztoc hueyi. Itztoc más huejcapa que
ilhuicactli huan más huejcapa que nopa sitlalime catli más huejca.
\v 13 Huan ta tiquijtohua para yeca Toteco Dios amo hueli quiita
catli tijchihua. Tiquijtohua para amo huelis mitztlajtolsencahuas
Toteco Dios pampa quitzacuilía se mixtli catli nelyayahuic.
\v 14 Pampa miyac mixtli catli tlahuel yayahuic quiyahualohua Toteco
Dios, huan yeca amo hueli techita. Yaya itztoc huejca huan san
nentinemi nepa ilhuicac. Quej nopa timoilhuía.
\p
\v 15 “¿Ta tijtoquilis nopa ojtli tlen tlajtlacoli catli nochi amo
cuajcualme quitoquilíaj?
\v 16 Catli quitoquilíaj nopa ojtli miquij quema noja telpocame
huan ininnemilis ixpolihui para nochipa quen huala miyac atl huan
quinhuica.
\v 17 Inijuanti quiilhuijque Toteco Dios: ‘Techtlalcahui huan xiya.’
Quiijtojque: ‘¿Tlaque hueli techchihuas por tojuanti Toteco Catli
Quipiya Nochi Chicahualistli?’
\v 18 Pero quielcajtoque para elqui Toteco Dios catli quintiochijqui
huan quinricojchijqui. Toteco ma nechpalehui para nijhuejcamajcahua
catli quej nopa moilhuíaj.
\p
\v 19 “Masehualme catli xitlahuaque quiitase nopa tlatzacuiltili
catli quinajsis nopa tlajtlacolchihuani huan paquise. Nochi
cuajcualme huetzcase huan quinpinahualtise.
\v 20 Huan quiijtose: ‘Toteco Dios quintzontlamiltijtoc nochi
tocualancaitacahua huan quitlamitlatijtoc nochi ininricojyo.’
\p
\v 21 “Huajca Job, ximotemaca ica Toteco Dios. Ximoyoltlali ica ya
huan tijpiyas tlasehuilistli huan nochi catli cuali.
\v 22 Xijtlacaquili nochi icamanal huan xicajocui ipan moyolo.
\v 23 Sintla timocuepas ica Toteco Catli Quipiya Nochi
Chicahualistli huan tijcahuas nochi catli amo cuali, yaya sempa
mitztlananas.
\v 24 Ayacmo xiquixtocas tomi huan xijtepehuas nochi mooro campa
teme ipan atlajtli,
\v 25 huajca Toteco Catli Quipiya Nochi Chicahualistli elis catli
más ipati ipan monemilis. Tiquitas para más ipati que oro o plata
tomi catli más yejyectzi.
\p
\v 26 “Huan tijpantis paquilistli ipan Toteco Catli Quipiya Nochi
Chicahualistli huan san ipan ya timotemachis.
\v 27 Timotlatlajtis ica ya huan yaya mitztlacaquilis. Huan
tijtlamichihuas nochi catli tijtlajtolcahuilis para tijchihuas.
\v 28 Huan nochi catli tijnequis tijchihuas, tijtlamichihuas huan
quisas cuali. Huan nopa tlahuili tlen ilhuicac mitztlahuilis ipan
moojhui campa tinejnentiyas.
\v 29 Pampa Toteco Dios quiechcapantlalía catli mohueyimati huan
quimanahuía catli moechcapanohua.
\v 30 Huan yaya mitzmaquixtis sintla amo tijhuica tlajtlacoli huan
sintla tiitztoc titlapajpactli iixpa.”
\c 23
\s Job quiilhui Elifaz para iTetlajtolsencajca quimanahuis
\p
\v 1 Pero Job quiilhui:
\p
\v 2 “Ama sempa nicamanaltis ica tequipacholi pampa Toteco
nelchicahuac nechtlatzacuiltía ica imax huan amo quen quinamiqui,
masque tlahuel niayijti.
\v 3 Nijnequisquía nijmatis canque hueli nijpantis Toteco Dios.
Nijnequisquía niyasquía campa mosehuía huan nijcamanalhuisquía.
\v 4 Nijpohuilisquía nochi notequipachol huan teipa nijcaquisquía
tlaque nechilhuis.
\v 5 Huan nijmachilisquía tlaque quinequi ma nijchihuas.
\v 6 Toteco Dios amo nechnanquilisquía ica cualantli masque quipiya
hueyi chicahualistli. Yaya nechtlacaquilisquía huan amo
techtelhuisquía.
\v 7 Tlacame catli xitlahuaque huelisquíaj monajnanquilise ihuaya
para nechmanahuise, huan yaya catli noTetlajtolsencajca
quiijtosquía amo nijhuica tlajtlacoli.
\p
\v 8 “Sintla nijtemohua Toteco Dios ica campa hualquisa tonati o
campa oncalaqui, amo nijpantía.
\v 9 Sintla yaya quichihua huejhueyi tequitl ica norte, amo
niquitas. Huan sintla nimocuepa ica tlani campa yaya motlatía, amo
hueli nijpantis.
\v 10 Pero yaya cuali quiiximati noojhui huan sesen tlamantli catli
nechpano. Huan quema tlami nechyejyecos, yaya quiijtos para
nixitlahuac huan nitlapajpactic quen oro.
\p
\v 11 “Nochipa nijtoquilijtoc iojhui Toteco Dios huan ninejnentoc
iicxipa. Amo quema nimoiyocatlalijtoc.
\v 12 Amo nijcajtejtoc itlanahuatilhua catli quisque ipan icamac.
Achi más nimopaquilismaca ipan icamanal huan amo quen ipan
notlacualis catli nijcua mojmostla.
\v 13 Pero sintla yaya moilhuijtoc para quichihuas se tlenijqui, amo
aqui huelis quiyolpatlas. Nochi catli yaya quinequi, ya nopa
quichihua.
\v 14 Huajca nochi catli yaya quisencajtoc para quichihuas ica na,
ya nopa quichihuas. Huan noja quichihuas ica na más tlamantli catli
quisencajtoc.
\v 15 Huan yeca nimajmahui iixpa. Quema niquelnamiqui catli yaya
hueli quichihua, nihuihuipica.
\v 16 Toteco quiquixtilijtoc ichicahualis noyolo. Quena, Toteco
Catli Quipiya Nochi Chicahualistli quichijtoc tlahuel ma nimajmahui.
\v 17 Pero masque san tzintlayohuilotl niquita, nopa
tzintlayohuilotl catli nechixtzactoc ayamo nechtzontlamiltijtoc.
\c 24
\s Job quiijtohua Toteco amo nochi quintlajtolsencahua
\p
\v 1 “¿Para tlen Toteco Catli Quipiya Nochi Chicahualistli amo
quiixquetza se tonal para quintlajtolsencahuas masehualme? ¿Para
tlen monequi masehualme catli xitlahuaque ma quichiyaca mojmostla
huan nopa tonal amo quema ajsi?
\v 2 Pampa onca miyac tlamantli catli amo cuali. Sequin tlacame
quiijcuiníaj nepamitl huan quincuilíaj inintlal sequinoc.
Quinmocuitlahuíaj borregojme catli teichtequilijtoque campa cuali
sacatl.
\v 3 Quinichtequilíaj ininburros masehualme catli teicneltzitzi
huan catli icnotzitzi. Huan quema cahual sihuame quinequij
motlanehuise tomi, quintlajtlaníaj ma quiprendajcahuaca iniiyojtzi
tlapiyal.
\v 4 Quinquixtilíaj masehualme catli teicneltzitzi tlen iojhui.
Teicneltzitzi monequij motlatise quema inijuanti monechcahuíaj.
\v 5 Teicneltzitzi itztoque quen burrojme ipan se huactoc tlali
catli mojmostla quitemojtinemij quentzi tlacualistli para inijuanti
huan ininconehua para ica mopanoltise.
\v 6 Quicuaj tlen hueli tlamantli catli quipantíaj ipan cuatitla
huan quitejtemohuaj catli mocajtoc ipan ininxocomecamil masehualme
catli mosisiníaj.
\v 7 Tlayohua nopa teicneltzitzi itztoque xolome ipan nopa
tlasesecayotl pampa amo quipiyaj ininyoyo, niyon inintlaque, para
ica mopiquise.
\v 8 Nopa atl catli huetzi ipan tepeme quinxolonía. Inijuanti
quinnajnahuaj nopa huejhueyi teme catli quentzi totonic pampa
tlaseseya huan amo quipiyaj ininchaj.
\p
\v 9 “Mosisinijca tlacame quiichtequij se cahual sihuatl icone
catli noja chichi. Quichihuaj nopa tetajme catli teicneltzitzi ma
quinprendajcahuaj ininconehua para quintlanejtise tomi.
\v 10 Teicneltzitzi nemij xolome pampa amo quipiyaj ininyoyo. Amo
cuajcualme quinchihualtíaj ma quimamaca trigo masque inijuanti
mayancamictinemij.
\v 11 Quinfuerzajhuíaj catli teicneltzitzi ma quipatzcaca olivos
ipan molino para quiquixtise aceite pero amo quincahuilíaj
quiyecose se quentzi. Ipan moquejquetzaj xocomecatl itlajca para
quiquixtise iayo, pero masque tlahuel amictoque, amo quincahuilíaj
quiijise niyon quentzi iayo.
\v 12 Tzajtzij chicahuac nopa masehualme catli miquisnequij ipan
nopa altepetl. Catli mococojtoque tlajtlanij tlapalehuili, pero
Toteco Dios mochihua quen amo quincaqui, niyon amo quinpalehuía.
\p
\v 13 “Mosisinijca masehualme quicualancaitaj tlahuili. Amo
quiiximatij catli xitlahuac. San nemij ipan iniojhui catli fiero.
\v 14 Temictiani mehuaj cualca para quimictise se catli teicneltzi
catli amo tleno quipiya. Ica tlayohua tlachtequij.
\v 15 Catli sihuanemij quichiyaj para más ma tzintlayohuiya pampa
quiijtohuaj: ‘Amo aqui techitas.’ Quitzacuaj iniixayac ica se
yoyomitl para amo aqui huelis quiniximatis.
\v 16 Tlachtequini ica tlayohua calaquij ipan techaj. Tonaya cochij
pampa amo quinpactía tlatlanextli.
\v 17 Inijuanti quiitaj yohuali quen elisquía ijnaloc. Ica tlayohua
mosentilíaj para temajmatise.
\p
\v 18 “Pero amo cuajcualme tlatoc ixpolihuij ipan ni tlaltipactli
quen tlasoli catli quihuica se hueyatl. Nochi catli quipiyaj amo
cuajcualme eltoc tlatelchihuali. Amo aqui tequitis ipan ininxocomeca
milhua.
\v 19 Miquilistli quintzontlamiltía tlajtlacolchihuani quen
tlatotonilotl quiatilía setl.
\v 20 Hasta inana se tlajtlacolchijquetl quielcahuas. Ocuilime
quicuase inacayo huan tlahuel ajhuiyac quimatise. Toteco Dios
quintzontlamiltis tlajtlacolchihuani quen huetzi se cuahuitl quema
tlaajaca chicahuac, huan ayacmo aqui quinelnamiquis.
\v 21 Nopa fiero tlacame tlen hueli quinchijtoque sihuame catli amo
quipiyaj niyon se conetl para quinmanahuis. Amo quintlasojtlaque
cahual sihuame catli tlaijiyohuíaj.
\p
\v 22 “Pero Toteco Dios ica ihueyi chicahualis quinhuahuatatza
tlapijpiyani huan quinquixtía tlen ni tlaltipactli. Masque
inijuanti mochihuaj huejhueyi, huelis tlatoc miquise.
\v 23 Masque Toteco quincahua ma itztoca ica temachili ama huan
quinmaca chicahualistli, quintlachilía tlatoctzitzi.
\v 24 Masque ama amo cuajcualme tlahuel mohueyichijtoque, ajsis se
tonal quema Toteco Dios quinechcapanos. Ica se tlatoctzi
quintlamiixpolos san se quen panos ica sequinoc. Quintzontequis quen
quitzontequij itlajca nopa trigo.
\p
\v 25 “¿Hueli se acajya quiijtos para ya ni amo melahuac?
¿Ajqueya hueli quiijtos para san niistlacati huan
nimocuapolojtoc?”
\c 25
\s Bildad quiijto amo aqui huelis mochihuas xitlahuac iixpa Toteco
\p
\v 1 Huajca Bildad, catli ehua altepetl Súa, quiilhui Job:
\p
\v 2 “Hueyi ichicahualis Toteco Dios huan tlahuel temajmati. Yaya
quichihua ma onca tlasehuilistli ipan ilhuicactli.
\v 3 Quinpiyaj tlahuel miyac itequihuajcahua hasta amo aqui hueli
quinpohuas. Itlahuil ajsi ipan senquistoc nochi ni tlaltipactli.
\v 4 ¿Quenicatza huelis se masehuali moquetzas huan quiijtos para
itztoc xitlahuac iixpa Toteco Dios? Amo aqui ipan nochi tlaltipactli
itztoc senquistoc tlapajpactic.
\v 5 Toteco Dios itztoc onpano cuajcualtzi hasta eltoc quen nopa
metztli huan sitlalime amo quipiyaj ininyejyejca huan amo tleno
ininpati iixpa ya.
\v 6 Huajca se masehuali amo hueli quipiya niyon quentzi ipati
iixpa. Pampa iixpa Toteco Dios, se masehuali nesi san quen se
pilocuiltzi.”
\c 26
\s Job quiilhui Bildad para Toteco nelía hueyi huan temajmati
\p
\v 1 Huajca Job quiilhui Bildad:
\p
\v 2 “Niyon quentzi amo quema tijpalehuijtoc catli tlaijiyohuíaj.
Amo tijmaquixtijtoc se masehuali catli amo quipiya fuerza.
\v 3 ¿Tiquita para nelía techtlalnamictijtoc na catli nihuihuitic?
¿Tlaque catli tlalnamiqui tiquijtojtoc?
\v 4 ¿Canque tijpantijtoc ni camanali huan ni tlalnamiquilistli
catli ica ticamanalti? ¿Ajqueya iaxca nopa tonaltzi catli
mitzpalehuía para ticamanalti quej ni?
\p
\v 5 “Mijcatzitzi huihuipicaj ica majmajtli. Catli itztoque
tlatzintla huan ipan hueyi atl majmahuij.
\v 6 Toteco Dios quintlachilía nochi inijuanti huan quiniximati.
Amo hueli motlatíaj iixpa ya.
\v 7 Toteco quipatlajqui ilhuicactli campa amo tleno oncayaya huan
ni tlaltipactli quicuapilo san ajacatipa.
\v 8 Yaya quitzacua atl ica mixtli huan nopa mixtli amo tzayani
masque tlahuel etic nopa atl.
\v 9 Quitzacua isiya ica mixtli.
\v 10 Yaya quitlalilijtoc nopa nepamitl nopa hueyi atl para canque
nesis para panquisas tonati ica ijnaloc huan campa calaquis ica
tlayohua.
\v 11 Itzinpehualtil ilhuicactli huihuipica quema Toteco Dios
cualani.
\v 12-13 Ica ihueyi chicahualis quinahuatía nopa hueyi atl tlaque
ma quichihua. Ica iyajatil quitzonpechi nopa hueyi cohuatl catli
nopona mocahuayaya. Quena, ica imax quitzontlamilti nopa cohuatl
catli chicahuac motlalohuayaya. Ica iijiyo quiyejyecchijqui
ilhuicactli.
\p
\v 14 “Nopa elqui itequi catli más tziquitetzitzi catli yaya
quichijtoc. Nelquentzi quinextijtoc ichicahualis. Huajca ¿ajqueya
huelis quiijiyohuis quema Toteco Dios quichihua ma monextis nochi
ihueyi chicahualis huan ichicahualis chicahuac tlatomonis?”
\c 27
\s Job: Nopa tlatzacuiltilistli catli quiselise amo cuajcualme
\p
\v 1 Job quisenhuiquili camanaltic huan quiijto:
\p
\v 2 “Nitlatestigojquetza iixpa Toteco Dios catli nechquixtilijtoc
nopa tlanahuatili catli quinamiqui para sesen tlacatl ma quipiya.
Quena, nijtestigojquetza Toteco Catli Quipiya Nochi Chicahualistli
catli tlahuel nechyolcocojtoc.
\v 3 Niquijtohua para nochi tonali quema noja niitztos huan Toteco
Dios nechmacas nemilistli,
\v 4 amo niquijtos catli amo cuali, niyon amo niistlacatis.
\v 5 Amo quema niquijtos para xitlahuac catli anquiijtohuaj hasta
nimiquis. Nijsenhuiquilis niquijtos amo tleno nijchijtoc.
\v 6 Quena, tlatoctzitzi niquijtos para amo tleno nijchijtoc catli
amo cuali. Huan noyolo elis tlapajpactic huan amo nechtelhuis nochi
tonali quema noja niitztos.
\p
\v 7 “Nochi nocualancaitacahua ma quiselica nopa tlatzacuiltilistli
catli quinamiqui para amo cuajcualme.
\v 8 ¿Tlaque noja hueli quichiyas se fiero tlacatl quema Toteco
Dios quiquixtilis inemilis huan quitzontlamiltis?
\v 9 O masque noja itztoque huan itztose ipan tlaijiyohuilistli,
Toteco Dios amo quinchihuilis cuenta quema quitlajtlanise ma
quinpalehui.
\v 10 Pampa nopa fiero tlacatl amo mopaquilismacac ipan Toteco Catli
Quipiya Nochi Chicahualistli huan san quielnamictoc Toteco Dios
quema itztoc ipan tlaohuijcayotl.
\p
\v 11 “Na nimechmachtis tlen ichicahualis Toteco Dios. Amo
nimechtlatilis niyon se tlamantli tlen Toteco Catli Quipiya Nochi
Chicahualistli huan catli yaya quisencajtoc para quichihuas.
\v 12 Masque amo monequi nimechmachtis ni tlamantli pampa ya cuali
anquimatij tlen ya san quen na. Pero masque ya anquimatij, tlen
Toteco, antechpohuilíaj nochi ni camanali catli amo tleno ipati.
\p
\v 13 “Ya ni catli Toteco Dios quisencajtoc para quinchiyas nochi
amo cuajcualme. Nochi ya ni quiselise fiero tlacame tlen Toteco
Catli Quipiya Nochi Chicahualistli.
\v 14 Sintla amo cuajcualme quinpiyaj miyaqui ininconehua, nochi
inijuanti miquise ipan tlahuilancayotl o ica mayantli.
\v 15 Ininconehua catli noja mocahuase miquise ica se hueyi
cocolistli huan amo aqui quinchoquilis. Niyon ininsihuajhua catli
mocahuaj amo quinchoquilise.
\p
\v 16 “Se tlacatl catli amo cuali hueli quisentilis tomi quen
imiyaca tlaltejpoctli huan quipiyas tlahuel miyac iyoyo.
\v 17 Pero nochi catli quipiya quitequihuise masehualme catli
xitlahuaque iixpa Toteco Dios. Catli amo quichijtoque catli fiero
moxelhuilise itomi.
\v 18 Huan nopa cali catli quichijchijqui se fiero tlacatl eltos
quen se tocatzahuali catli amo quipiya tetili. Tlatlapacatoc ichaj
quen se pilxajcaltzi catli quichihuaj ipan mila.
\p
\v 19 “Masque se fiero tlacatl moteca para cochis se
tlapijpixquetl, quema isas, quiitas para ayacmo tleno quipiya.
\v 20 Yeca huala ipani se hueyi majmajtli. Huan se ajacatl catli
tlahuel chicahuac quicuitiquisaqui ica tlayohua.
\v 21 Nopa ajacatl catli huala ica campa hualquisa tonati quihuicas
nopa fiero tlacatl huan quiixpolihuiltis. Quihuicas ipan se lugar
campa itztoti para nochipa.
\v 22 Toteco Dios quiitzquis chicahuac huan amo quitlasojtlas masque
nopa tlacatl quinequisquía mochololtis imaco.
\v 23 Masehualme tzajtzise ica paquilistli huan momatlatzinise quema
miquis nopa fiero tlacatl. Quipinajtise quema Toteco quimajcahuase
para yas ipan se lugar campa itztoti para nochipa.
\c 28
\s Nopa tlalnamiquilistli catli melahuac
\p
\v 1 “Masehualme quimatij quenicatza quiquixtise nopa plata
tepostli tlen iojhui tlalijtic. Huelij quimoloníaj oro para
quichihuase se oro catli senquistoc tlapajpactic.
\v 2 Quiquixtíaj nopa hierro tepostli tlen tlalijtic huan
quinmoloníaj teme para ma quisas catli senquistoc cobre.
\v 3 Tlacame quimatij quitlahuilise nopa tzintlayohuilotl huan
tlacoyonise ipan tlacacahuaya catli yohui hasta tlahuel huejcatla.
Nopona quiquixtíaj tepostli huan quitlachixcahuíaj huan quiijitaj
nochi tlamantli catli onca nepa tlalijtic. Quena, yohuij huejca
campa amo aqui nemi.
\v 4 Quicoyoníaj se ostotl catli tlahuel huejcatla huejca tlen
techaj. Moilpíaj ica lazo huan mohuiyonijtiyohuij nepa tlatzintla
ipan nopa ostotl masque tlahuel mahuilili huan huelis miquise.
\v 5 Ni tlaltipactli iixco techmaca trigo para pantzi, pero nopona
tlatzintla huan tlalijtic eltoc quen panotoc se tlitl catli nochi
quialtijtoc.
\p
\v 6 “Nopona mopantíaj yejyectzitzi piltetzitzi catli itoca
zafiro, huan quipantíaj oro catli maneltic ica tlaltejpoctli.
\v 7 Nelhuejcatla quipantíaj tlamantli catli pajpatiyo catli niyon
se tzopilotl o cuajtli amo quema quiitztoc masque nelía hueli
tlachiya huejca.
\v 8 Niyon se tlapiyali catli nemi cuatitla amo quema nejnentoc ipan
nopa tlamantli catli pajpatiyo nepa. Niyon se león amo quema
moquetztoc ininpani.
\v 9 Tlacame ica ininmax quitlapanase pedernal teme catli ica huelis
tijyolitis tlitl. Quimatij quihuelonise inintzinpehualtil nopa
tepeme.
\v 10 Quicoyoníaj miyac ojtli ipan nopa tetl nopona tlatzintla.
Nopona quipannextíaj nopa piltetzitzi catli tlahuel pajpatiyo.
\v 11 Quitzacuaj campa pehua hueyame nopona tlatzintla huan nochi
catli motlatijtoc nopona quiquixtíaj hasta tlalixco campa
tlatlanextli.
\p
\v 12 “Pero masque tlacame huelij quichihuaj nochi ni tlamantli,
amo quimatij canque quipantise tlalnamiquilistli huan
tlamachilistli.
\v 13 Masehualme amo quimatij para tlahuel ipati tlalnamiquilistli
huan amo mopantía ipan ni tlaltipactli.
\v 14 Nojquiya nopa ostotl catli tlahuel huejcatla quiijtohua: ‘Nica
amo onca tlalnamiquilistli.’ Huan nopa hueyi atl quiijtohua: ‘Niyon
nica amo onca.’
\p
\v 15 “Amo aqui huelis quicohuas tlalnamiquilistli ica miyac tomi
tlen oro o tlen plata.
\v 16 Niyon amo huelis mocohuis tlalnamiquilistli ica miyac oro tlen
Ofir, niyon ica miyac teme catli pajpatiyo quen ónice huan zafiro.
\v 17 Tlalnamiquilistli tlahuel ipati huan amo quen oro o quen se
diamante catli más patiyo. Niyon amo huelis tijcohuas ica teme
patiyo catli quiquetztoque ipan catli senquistoc oro.
\v 18 Nopa teme catli itoca coral huan jaspe masque tlahuel
yejyectzitzi amo quiaxilíaj para ica quiixtlahuase
tlalnamiquilistli pampa tlalnamiquilistli más ipati que nopa
piltetzitzi catli más patiyo.
\v 19 Nopa teme catli itoca topacio catli tlahuel pajpatiyo huan
quihualicaj tlen tlali Etiopía amo ininpati quen tlalnamiquilistli.
Huan niyon amo huelis tijcohuas ica senquistoc oro.
\p
\v 20 “Huajca ¿tlaque hueli tijchihuase timasehualme para
tijpiyase tlalnamiquilistli? Huan ¿canque tijpantise
tlamachilistli?
\v 21 Amo aqui hueli quipantía pampa eltoc ichtacatzi. Niyon totome
catli patlantinemij ajacatipa amo huelij quiitaj.
\v 22 Eltoc quen mictla huan miquilistli quiijtohuaj: ‘Tojuanti
tijcactoque se quentzi tlen tlalnamiquilistli huan campa hueli
mopantis.’
\p
\v 23 “Pero nimitzilhuía Toteco Dios quimati canque mopantía
tlalnamiquilistli. Yaya quimati quenicatza tijcuis,
\v 24 pampa yaya tlachiya hasta campa tlami tlaltipactli huan quiita
nochi catli onca ipan ilhuicactli.
\v 25 Yaya quichihua ma tlaajaca ica miyac o quentzi chicahualistli
san quen yaya quinahuatía. Quitamachihua nochi atl ipan hueyi atl.
\v 26 Yaya quimacac tlanahuatili nopa atl para tlaquiyahuis huan
quinextili nopa tlapetlanilotl nopa ojtli para quitoquilis.
\v 27 Huan Toteco teipa quitlachili tlalnamiquilistli huan
quiyejyeco ica cuidado. Huan quiquetzqui quen catli más ipati.
\v 28 Huajca Toteco Dios quej ni quinyolmelahua nochi masehualme:
‘Quema se masehuali techimacasi huan techtlepanita na, niamoTeco
Dios, quinextía nopa tlalnamiquilistli catli nelía melahuac. Huan
quema se quicahua nochi tlamantli catli amo cuali, quinextía
tlamachilistli catli nelía xitlahuac.’ ”
\c 29
\s Job quielnamijqui nopa tonali quema itztoya cuali
\p
\v 1 Job quisenhuiquili camanaltic huan quiijto:
\p
\v 2 “Nelcuali elisquía sintla sempa hueli nimocuepasquía ipan
nopa tonali quema Toteco Dios nechmocuitlahuiyaya.
\v 3 Achtihuiya yaya nechtlahuiliyaya ipan noojhui. Huan ica
itlahuil ninejnemiyaya temachtli ipan tzintlayohuilotl.
\v 4 Quema nieliyaya nitelpocatl, Toteco Dios quitiochihuayaya nochi
ipan nochaj huan yaya elqui quen nonelhuampox.
\v 5 Nelcuali elisquía sintla sempa hueli nimocuepasquía ipan nopa
tonali quema Toteco Catli Quipiya Nochi Chicahualistli noja itztoya
nohuaya huan noconehua nechyahualohuayayaj,
\v 6 huan nochi yohuiyaya cuali. Nohuacaxhua quipixtoyaj miyac lechi
huan nochi cuame tlen olivo ipan nocuamil quipixtoyaj miyac aceite.
\p
\v 7 “Niyohuiyaya campa nopa puerta tlen toaltepe campa
mosentilijque para tlasencahuase. Nimosehuiyaya ininhuaya nopa
tlacame catli más quipixque tlatlepanitacayotl.
\v 8 Quema telpocame nechitayayaj, moiyocaquetzayayaj para ma
nipano. Huehue tlacame nojquiya moquetzayayaj ica tlatlepanitacayotl
quema niajsiyaya.
\v 9 Huan nopa tlayacanca telpocame amo moliniyayaj quema
niajsisquía. San quitlaliyayaj ininmax ipan inincamac para
mocamatzacuase hasta na nicamanaltisquía.
\v 10 Huan nopa tlayacanani catli itztoyaj ipan nopa altepetl amo
moliniyayaj. San quichiyayayaj nocamanal.
\p
\v 11 “Nochi masehualme catli quicaquiyayaj nocamanal
nechhueyitlaliyayaj. Nochi catli nechitayayaj camanaltiyayaj cuali
tlen na.
\p
\v 12 “Na niquinpalehuiyaya catli teicneltzitzi ica catli
quinpolohuayaya. Niquinpalehuiyaya icnotzitzi catli amo quipiyayayaj
inintlamanahuijca.
\v 13 Na niquinpalehuiyaya catli nechcatitoya para miquise, huan
inijuanti nechtiochihuayayaj. Cahual sihuame catli icnotzitzi
niquinpalehuiyaya huan niquinchihuayaya ma yolpaquica.
\v 14 Nochi catli nijchihuayaya eliyaya xitlahuac huan cuali.
Nonemilis elqui xitlahuac. Amo tleno nijnequiyaya ica catli amo
cuali.
\v 15 Na nieliyaya quen niiniixteyol catli popoyotzitzi huan quen
niiniicxihua catli amo huelqui nejnemij.
\v 16 Na nielqui quen niinintata catli teicneltzitzi huan
niquinmanahui nochi catli ehuani sequinoc tlalme.
\v 17 Niquinhuilanayaya nochi fiero tlacame catli
tetlaijiyohuiltiyayaj huan nitemanahuiyaya ininmaco. Elqui quen
niquinpostequiliyaya iniomiyo nopa fiero tlacame quen se quipostequi
itlancoch se tecuani catli quiitzquijtoc itlapiyal.
\p
\v 18 “Huan na nimoilhuiyaya: ‘Temachtli nihuehuejtiyas huan
nimiquis ica paquilistli ipan nochaj. Nijpiyas tlahuel miyac xihuitl
huan se cuali nemilistli.
\v 19 Pampa catli nijchihua quisa cuali. Niitztoc quen se hueyi
cuahuitl catli quipiya inelhuayo campa onca miyac atl huan sesen
yohuali huetzi ajhuachtli ipan imacuayohua para quiatequis.
\v 20 Mojmostla más nijselía tlatlepanitacayotl huan tlatoctzitzi
nochicahualis moyancuilis.’
\p
\v 21 “Ipan nopa tonali, tlacame quicaquiyayaj nocamanal huan
quichihuiliyayaj cuenta. Niyon se tlen inijuanti amo moliniyaya
hasta niquinconsejomacac.
\v 22 Huan teipa quema ya nitlamiyaya nicamanalti, inijuanti amo
nechnajnanquiliyayaj pampa tlahuel quinpactiyaya nocamanal.
\v 23 Quen masehualme ica nochi ininyolo quinequij ma huetzi atl
quema tlahuel tlatotoniya, nochi tlacame tlahuel quichiyayayaj
nocamanal.
\v 24 Quema tlacame motzinquixtiyayaj, niquinyolchicahuayaya. Quema
niquinixhuetzquiliyaya, quinfuerzajmacayaya ipan inintonal.
\v 25 Niquinilhuiyaya catli monequi quichihuase. Niquinxitlahuayaya
quen nielisquía niinintlayacanca. Nijchihuayaya quen se
tlanahuatijquetl catli quinconsejomaca isoldados.
Niquinyolchicahuayaya catli motequipachohuayayaj.
\c 30
\s Job quiijto para fiero inemilis
\p
\v 1 “Pero ama telpocame catli amo quipiyaj xihuitl quen na
nechpinajtíaj. Inintatahua ni telpocame amo quinamiquij para
tequitise ininhuaya nochichihua catli quinmocuitlahuíaj
noborregojhua.
\v 2 Amo tleno ininpati nopa tetajme para na masque quipiyaj ininmax
catli chicahuac. Ayacmo quipiyaj fuerza para quichihuase niyon se
tequitl huan tlahuel huihuitique.
\v 3 Inijuanti cuahuactoque ica mayantli. Ica yohuali yohuij
ininseltzitzi ipan huactoc tlali campa amo tleno onca.
\v 4 Nopona quicuaj ixihuiyo cuame huan quitlatíaj ininnelhuayo
tzontli para mototonilise.
\v 5 Quinquixtijtoque tlen campa itztoque masehualme. Huan quema
quintojtocayayaj, quintzajtzilijtiyajque ica iniica quen elisquía
tlachtequini.
\v 6 Huan ama nopa huihui tlacame itztoque campa tlacomolco, campa
huejhueyi ostotl huan campa teme.
\v 7 Tzajtzitinemij quen tlapiyalme catli nemij cuatitla, huan
mosentilijtinemij itzintla se tejtzonquilitl para momanahuise.
\v 8 Huan yeca ininconehua nojquiya itztoque huihuitique huan amo
tlaiximatilme. Huan yeca quinquixtijtoque ipan altepeme.
\p
\v 9 “Pero ama ininconehua nechpinajtíaj ica huicatl huan
nechtlaijilhuíaj ica miyac tlamantli para motlahuetzquiltise.
\v 10 Tlahuel nechcualancaitaj huan amo quinequij nechnechcahuise. Quen
quinequij, nechchijchaj ipan noixayac.
\v 11 Toteco Dios quitlalijtoc nonemilis campa mahuilili huan
nechechcapantlalijtoc. Ama inijuanti amo nechtlepanitaj huan
nechchihuilíaj catli inijuanti quinequij.
\v 12 Mosisinijca tlacame motlananaj para nechchihuilise miyac
tlamantli catli amo cuali huan quitlalíaj tlaquetztli campa
noicxihua para ma nihuetzi. Nechhuilanaj chicahuac.
\v 13 Ipan noojhui quitlalíaj miyac tlatzacuiltili huan quichihuaj
nochi catli huelij para ma nechajsi catli fiero, masque ya quimatij
para amo nijpiya niyon se catli huelisquía nechpalehuisquía.
\v 14 Hualahuij ica campa hueli para nechchihuilise catli fiero.
Huan nimantzi huitonij ipan na quema nihuetztoc.
\v 15 Huajca ama nechitzquitoc se hueyi majmajtli. Huan nochi
nechcualancaitaj huan nochi noricojyo huan nohueyitilis ixpolijtoque
quen se mixtli catli ixpolihui quema tlaajaca chicahuac.
\v 16 Tlahuel hueyi tequipacholi nijpiya ipan noyolo. Nochi tonali
nimotzinquixtía.
\v 17 Nochi yohuali nicuajcualo chicahuac. Nijmati quen se tlenijqui
quicua noomiyohua.
\v 18 Toteco quiitzquía chicahuac noyoyo ipan noquechtla huan eltoc
quen nechijiyomictía.
\v 19 Toteco nechtlahuisojtoc ipan soquitl. Huan ama niitztoc quen
nielisquía tlaltejpoctli huan cuanextli.
\p
\v 20 “Na nimitztzajtzilía ta, tinoTeco Dios, para techpalehui,
pero amo technanquilía. Nojquiya nihuala moixpa, pero ta amo
techchihuilía cuenta, niyon amo tijnequi techtlachilis.
\v 21 Ta timosisinijtoc ica na huan techtojtocatinemi ica nochi
mochicahualis. Techhuilana ica nochi moyajatil.
\v 22 Ta techtlahuisojtoc ipan nopa ajcomalacatl huan
techtlaijiyohuiltijtoc ica se hueyi ajacatl.
\v 23 Na nijmati para tijnequi ma nimiqui huan techhuicas ipan nopa
lugar campa mosentilíaj nochi mijcatzitzi.
\p
\v 24 “Nimoilhuiyaya para se acajya nechpalehuisquía para amo ma
nihuetzi, quen se catli quitlanana imax o tzajtzi chicahuac para
tlajtlanis tlapalehuili quema se huetzi ipan se tlaijiyohuilistli.
\p
\v 25 “Quej nopa na nijchijqui. Nichocac por inijuanti catli
tlaijiyohuiyayaj. Nimotequipacho por inijuanti catli teicneltzitzi
huan amo tleno quipiyayayaj.
\v 26 Yeca na nijchiyayaya catli cuali, pero hualajqui catli amo
cuali. Nojquiya nijchiyayaya paquilistli huan tlahuili, pero
hualajqui tequipacholi huan tzintlayohuilotl.
\v 27 Noyolo motequipachohua chicahuac huan amo hueli mosiyajquetza.
Tlaijiyohuilistli nechitzquitoc para miyac tonali.
\v 28 Notlacayo ya tlami yayahuixqui, pero amo ica tonati. Huan
nimoquetza para nitetlajtlanis tlapalehuili, pero san tlapic. San
nijpolohua tonali huan nijpolohua noijiyo,
\v 29 pampa nochi masehualme nechitaj quen niiniicni nopa tepe
chichime huan quen niininhuampox nopa avestruces totome.
\v 30 Nochi nocuetlaxo ya yayahuixqui huan huetzisnequi. Huan
noomiyohua tliquisaj ica tlatotonilotl.
\v 31 Nochi nopa paquilistli huan huetzquistli catli nijpiyayaya,
ama mocueptoc tequipacholi.
\c 31
\s Job quiijto para yaya xitlahuac iixpa Toteco
\p
\v 1 “Na nijchijqui se camanali ica noixteyol para amo nijtlachilis
se ichpocatl para niquixtocas huan nijchihuas miyac tlamantli
ihuaya.
\v 2 Pampa na nijmati catli temaca Toteco Catli Quipiya Nochi
Chicahualistli. Yaya catli itztoc nepa huejcapa quintiochihua
masehualme catli nejnemij xitlahuac.
\v 3 Huan quintlatzacuiltía catli quichihuaj catli fiero.
\v 4 Huan Toteco quiita nochi catli nijchihua huan quenicatza
nimonejnemiltía.
\p
\v 5 “Na amo niistlacatitoc, niyon amo nitlacajcayajtoc.
\v 6 Ma Toteco nechtlajtolsencahuas sintla amo melahuac. Yaya
quimati cuali para melahuac amo nijchijtoc catli amo cuali.
\v 7 Amo nimocuapolojtoc huan amo nijcajtejtoc iojhui Toteco. Amo
nitlajtlacolchijqui ipan noyolo por catli niquitac. Huan sintla
nijhuica tlajtlacoli ipan ni tlamantli o ipan sequinoc tlamantli,
\v 8 ma quipixcaca sequinoc catli nijtoctoc huan catli ya quipiya
itlajca. Huan sequinoc ma quihuihuitlaca nochi catli yancuic
nijtoctoc.
\p
\v 9 “Sintla se sihuatl nechyoltilantoc ma nitlajtlacolchihua, o
sintla nijnequiyaya niitztos ihuaya isihua nocalnechca,
\v 10 huajca ma nimiqui huan nosihua ma yohui seyoc lado huan ma
mocuili seyoc tlacatl.
\v 11 Pampa se hueyi tlajtlacoli para tiquixtocas seyoc sihuatl.
Sintla se tlacatl quichihuas nopa tlaixpanoli, quinamiqui
quitlatzacuiltise tetlajtolsencahuani.
\v 12 Tlaixtoquilistli eltoc quen se tlitl catli
techtlamitlatisquía huan techmajcahuasquía hasta mictla. Nojquiya
quitlamiltisquía nochi catli nijpiya.
\p
\v 13 “Sintla amo niquinchihuilijtosquía catli xitlahuac ica nochi
notequipanojcahua huan amo niquintlacaquilijtosquía,
\v 14 ¿quenicatza nimoixnextisquía iixpa Toteco? ¿Quenicatza
nijnanquilisquía quema nechtlajtlanisquía cuenta?
\v 15 Pampa yaya Toteco Dios catli nechchijchijqui na huan yaya
nojquiya quichijchijqui notequipanojca. Nochi tiome yaya
techchijchijqui.
\p
\v 16 “Amo quema niquinchihuili catli fiero nopa teicneltzitzi,
niyon amo quema niquintequipacholmacac cahual sihuame.
\v 17 Na nochipa niquintlamacac catli icnotzitzi. Amo quema
niitztoya niitzcuimitl.
\v 18 Hasta quema nieliyaya nitelpocatl, na niquinmocuitlahui
icnotzitzi ipan nochaj huan niquinitayaya quen elisquía noconehua.
Huan niquinconsejomacac cahual sihuame.
\v 19 Nijyoyonti catli secmiquiyayaj huan niquinmacayaya yoyomitl,
\v 20 o tlaquemitl tlen iniijhuiyo noborregojhua para ica ma
mopiquica. Huan inijuanti nechtlascamatiyayaj.
\v 21 Amo quema nijcocojtoc se catli icnotzi san pampa nimoilhui amo
aqui nechtlajtlanis cuenta.
\v 22 Sintla nijchijtoc se tlen nochi ni tlamantli, ma postequi
noajcol campa tlatzquitoc huan ma huetzi tlalchi nomax.
\v 23 Pero na tlahuel niquimacasiyaya itlatzacuiltil Toteco. Sintla
yaya cualanisquía ica na ica nochi ichicahualis, ¿tlaque
nijchihuasquía?
\p
\v 24 “Amo nimotemachijtoc ipan notomi, niyon amo niquixtocatoc
oro.
\v 25 Amo quema nimopaquilismacayaya ipan notomi o nimoilhuiyaya
para noja más nimoricojchihuasquía.
\v 26 Amo nijtlachilijtoc ne tonati catli tlahuía ipan ilhuicac o
nopa metztli catli yohui ipan iojhui yejyectzi,
\v 27 huan ichtacatzi niquinhueyichijqui ipan noyolo. Amo quema
niquintitlanili tlatzoponijcayotl ica nomax ica huejca.
\v 28 Ya nopa elisquía se hueyi tlajtlacoli huan quinamiqui
quiselis tlatzacuiltili. Amo tleno tlen ni tlamantli nijchijtoc. Amo
niquixpanotoc Toteco catli itztoc ilhuicac.
\p
\v 29 “Na amo nipajqui quema nohuampox mopantiyaya ipan
tlaijiyohuilistli huan tlaohuijcayotl.
\v 30 Amo quema nijtelchijqui se masehuali niyon amo nimomacuepqui
ica nocualancaitacahua.
\v 31 Niyon se notequipanojca amo nijcajqui ma quipano mayantli.
\v 32 Nochipa niquincahuili seyoc tlali ehuani ma cochica
nocalijtic. Nochipa nijtlapohuayaya nopuerta para aqui hueli
nejnenquetl.
\v 33 Amo nijchijtoc campica para nijtlatis notlajtlacolhua
ichtacatzi quen quichijqui Adán.
\v 34 Amo quema niquinimacasqui masehualme huan nimotlatiyaya
calijtic. Amo quema niquinimacasqui nochaj ehuani catli
nechcualancaitaj. Nochipa nimocuatotoni para nijpalehuis se
nohuampox.
\p
\v 35 “Cuali elisquía para se acajya nechtlacaquilisquía huan
quimachilisquía tlaque nijmati ipan noyolo. Na nijnequi
nimomanahuis ipan ni tlamantli huan nijtlalis nofirma ipan
nocamanal. Nijnequisquía para Toteco Catli Quipiya Nochi
Chicahualistli ma nechnextili sintla melahuac nimocuapolojtoc. Yaya
ma quiijto sintla melahuac catli quiijtohuaj nocualancaitacahua. Ma
quiijcuiloca catli ica nechtelhuía notlatelchijca.
\v 36 Nechpactisquía para san nijmatis catli ica nechtelhuía.
Nijpatiitasquía quen se yejyectzi corona pampa tlahuel nijnequi
nijmatis.
\v 37 Na niquilhuisquía notlatelchijca nochi catli nijchijtoc huan
para tlen nijchijqui. Huan iixpa ya nijchihuasquía campica para
nimomanahuis quen nimonextiyaya iixpa se tequichijquetl.
\p
\v 38 “Quinamiqui ma nechtlatzacuilti sintla nomilhua
nechtelhuisquíaj huan elisquía ipan tequipacholi,
\v 39 huan quiijtosquía para niquichtequilijtoc itlajca o
niquinmictijtosquía nopa masehualme catli iniaxca nopa tlali huan
catli nechtlanejtiyaya.
\v 40 Sintla quej nopa nijchijtoc ma temaca huitztli notlal huan amo
trigo. Ma temaca xihuitl catli amo cuali huan amo cebada.”
\p Hasta nica tlanqui camanalti Job.
\c 32
\s Eliú quiilhui Job para Toteco quinextía tlajtlacoli
\p
\v 1 Nopa eyi tlacame ayacmo quinanquilijque Job pampa Job noja
quinilhuiyaya para amo quihuica tlajtlacoli.
\p
\v 2 Huajca Eliú cualanqui ica Job. Eliú elqui icone Baraquel huan
iixhui Buz; huan hualayaya ipan ihueyi familia Ram. Cualanqui pampa
Job amo quinequiyaya quiijtos para melahuac tlajtlacolchijtoya.
Niyon amo quiijtohuayaya para quinamiqui nopa tlatzacuiltili catli
Toteco quititlanilijtoya.
\v 3 Huan nojquiya Eliú cualanqui ica nopa eyi ihuampoyohua Job
pampa amo quimatiyayaj quenicatza quinanquilise huan san achi más
quitelhuiyayaj.
\v 4 Eliú quinchixtoya nopa eyi para tlamise camanaltij pampa
itztoyaj más huehuentzitzi que ya.
\v 5 Pero quema quinitac para inijuanti ayacmo huelque
quinanquilíaj, camanaltic ica cualantli,
\v 6 huan quinilhui:
\p “Na noja nitelpocatl huan amojuanti ya anhuehuentzitzi. Yeca
nimochixtoc pampa amo nimotemacayaya niquijtos catli nimoilhuiyaya.
\v 7 Nochi quiijtohuaj para catli huehuentzitzi itztoque más
tlalnamiquij, yeca ma camanaltica achtihui.
\v 8 Pero masehualme itztoque tlalnamiquini pampa quipiyaj itonaltzi
Toteco ipan ininyolo. Quipiyaj iijiyo Toteco Catli Quipiya Nochi
Chicahualistli
\v 9 Amo itztoque tlalnamiquini san pampa quipiyaj miyac xihuitl.
Huan catli huehuentzitzi amo nochipa quimachilíaj catli xitlahuac.
\v 10 Huajca nimechilhuía, techtlacaquilica se tlatoctzi huan
techcahuilica ma niquijtos catli nimoilhuijtoc.
\p
\v 11 “Nimochixtoc huan ica miyac cuidado nijtlacaquilijtoc nochi
amocamanal hasta quema pejqui ancamanaltij.
\v 12 Huan ipan nochi catli nijtlacaquilijtoc, niyon se tlen
amojuanti amo anquiixcoilhuijque Job para melahuac yaya se
tlajtlacolchijquetl. Niyon amo aqui quinanquilijtoc itlatzintoquil
quen quinamiqui.
\v 13 Huan amo techilhuica para Job itztoc más tlalnamictoc que
amojuanti o para san Toteco huelis quinextilis se tlajtlacolchijca
tlacatl para tlajtlacolchijtoc.
\v 14 Sintla Job monajnanquilijtosquía nohuaya, amo na
nijnanquilisquía quen anquinanquilijtoque.
\p
\v 15 “Job, ni eyi mohuampoyohua momajmatijtoque huan ayacmo
quimatij tlaque quiijtose.
\v 16 Na niquinchixtoc ma camanaltica, pero inijuanti ayacmo
moliníaj huan ayacmo mitznanquilíaj.
\v 17 Huajca na nojquiya niquijtos catli nimoilhuijtoc,
\v 18 pampa nijpiya miyac camanali catli monequi niquijtos, huan
notonaltzi nechchihualtía ma nicamanalti.
\v 19 Niitztoc quen se yancuic cuetlaxtli catli temitoc ica xocomeca
atl huan ya quinequi tzayanis. Huan quej nopa nojquiya na nitemitoc
ica camanali hasta tzayanisnequi noyolo.
\v 20 Monequi nicamanaltis para nicaxanis se quentzi. Huajca
techcahuilica ma nicamanalti.
\v 21 Amo aqui nijchicoicnelis, niyon ta, niyon ne eyi. Niyon amo
aqui nijyejyectlalis ica nocamanal.
\v 22 Pampa sintla nijhueyimati se huan seyoc amo, Toteco catli
nechchijqui nechchihuasquía nihuetzis nimictoc.
\c 33
\s Eliú quitlatelhui Job
\p
\v 1 “Job, na nimitztlajtlanía xijtlacaquili catli nimitzilhuis.
\v 2 Na nipejtoc nicamanalti, huajca techcahuili ma nijsenhuiquilis.
\v 3 Huan niquijtos nochi catli senquistoc xitlahuac huan catli
melahuac.
\v 4 Itonaltzi Toteco nechchijchijqui. Quena, tlaijiyoquixti Toteco
Catli Quipiya Nochi Chicahualistli huan nechmaca nemilistli ica
iijiyo.
\v 5 Ximocualtlali huan technanquili nimantzi sintla tihueli.
\p
\v 6 “Na nojquiya niitztoc san se quen ta iixpa Toteco. Na nojquiya
nitlachijchihuali ica soquitl quen ta.
\v 7 Huajca amo techimacasi na pampa na amo nieli se masehuali catli
quipiya hueyi tequiticayotl para ica nimitzmajmatis o nimitzchihuas
xihuihuipica.
\p
\v 8 “Na nimitztlacaquilijtoya quema tiquijto,
\v 9 para titlapajpactic huan amo tleno amo cuali tijchijtoc.
Tiquijtojtoc tixitlahuac huan amo tijpiya tlajtlacoli.
\v 10 Tiquijtohua para Toteco san quitemohua quenicatza huelis
quipantis se tlajtlacoli para mitzitas quen tiicualancaitaca.
\v 11 Nojquiya tiquijtojtoc para Toteco quicalaquijtoc moicxihua
ipan cuahuitl para quintetzopas, huan mitztlachilía sesen huelta
quema timolinía.
\p
\v 12 “Xiquita, ya ni catli na nimitzilhuía. Melahuac
titlajtlacolchijtoc pampa amo xitlahuac ticamanaltitoc tlen Toteco.
Toteco Dios itztoc más hueyi que se masehuali.
\v 13 Huajca ¿para tlen tijtelhuía ica catli amo cuali pampa yaya
amo mitzyolmelahua para tlen mitztlatzacuiltía?
\p
\v 14 “Toteco Dios technojnotza tlatoctzitzi, pero tojuanti amo
tijmachilíaj.
\v 15 Quemantic technojnotza ipan se temictli, o ipan se tlanextili
ica tlayohua quema masehualme tlahuel cochtoque ipan inintlapech.
\v 16 Toteco tecamanalhuía para quinconsejomacas huan para
quinmajmatis ica catli panos teipa.
\v 17 Quinnotza masehualme para quinyolcuepas tlen inintlajtlacolhua
huan para ma amo mohueyimatica.
\v 18 Nojquiya quinmanahuía ininnemilis para amo huetzise imaco
catli amo cuali huan para amo yase mictla.
\p
\v 19 “Pero nojquiya quemantic Toteco quixitlahua se masehuali ica
cocolistli huan tlacuajcualocayotl ipan nochi itlacayo, masque amo
quipostequi niyon se iomiyo.
\v 20 Huan nopa cocoxquetl ayacmo tleno quiixtocas para quicuas
masque tlahuel ajhuiyac nopa tlacualistli pampa ayacmo mayanas.
\v 21 Quej nopa nopa masehuali mocahuas tlahuel cuahuactoc huan san
omitl,
\v 22 huan monechcahuis nopa tonal para miquis huan quitlalpachose.
\p
\v 23 “Pero sintla itztosquía se tlayolmelajquetl tlen ilhuicac
catli motlatlajtisquía ica Toteco huan quinextisquía para nopa
tlacatl itztoc xitlahuac,
\v 24 huajca Toteco quitlasojtlasquía huan quiilhuisquía
itequipanojca: ‘Xijmajcahuaca ma yohui nopa masehuali. Amo
xijchihuaca ma miqui pampa nijpantijtoc seyoc catli tlaxtlahuas por
inemilis.’
\v 25 Huan huajca itlacayo nopa masehuali mochicahuas quen se conetl
itlacayo. Quipiyas chicahualistli quen se telpocatl.
\v 26 Huan quema motlatlajtis, Toteco quitlacaquilis huan
quiicnelis. Huan yaya moixtlachilis ica Toteco huan huicas ica miyac
paquilistli. Huan Toteco sempa quiijtos para xitlahuac huan
quitiochihuas miyac.
\v 27 Huan nopa masehuali quinilhuis ihuampoyohua:
‘Nitlajtlacolchijqui huan nitlaixpanotoc, pero Toteco amo nechmacac
catli quinamiqui.
\v 28 Toteco nechmanahui tlen miquilistli huajca noja niitztos ipan
ni tlaltipactli ipan tlahuili.’
\p
\v 29 “Quena, Toteco quichihua ya ni miyacpa para quinojnotzas se
masehuali.
\v 30 Yaya quimanahuía ialma tlen miquilistli para huelis itztos
ininhuaya catli yoltoque nica campa tlahuili.
\v 31 Ximomaca cuenta catli niquijtohua, Job. Techtlacaquili huan
noja techcahuili ma niquijto se ome camanali.
\v 32 Pero sintla ta tijnequi tiquijtos se camanali, huajca
xiquijto. Huan na nijtlacaquilis huan nimitzilhuis sintla xitlahuac
o amo.
\v 33 Huan sintla amo tleno tijnequi tiquijtos, huajca
techtlacaquili. Amo ximolini huan na nimitzmachtis para
titlalnamiquis.”
\c 34
\s Eliú quiijto Job mohueyimati
\p
\v 1 Teipa Eliú sempa camanaltic huan quiijto:
\p
\v 2 “Techtlacaquilica antlacame catli antlalnamiquij huan catli
antlaiximatilme.
\v 3 Hueli tijtlapejpenise tlaque cuali para tijtlacaquilise ica
tonacas, quen ica tocamac hueli tijtlapejpenise tlaque tlacualistli
eltoc ajhuiyac.
\v 4 Huan quej nopa nojquiya monequi tijtlapejpenise catli ojtli
eltoc xitlahuac para ipan tinejnemise. Ma timomachtica san sejco
catli eltoc cuali.
\v 5 Pampa Job quiijtojtoc para itztoc xitlahuac, pero Toteco Dios
amo quitlajtolsencahua quen xitlahuac.
\v 6 Quiijtohua para masque amo tleno quichijtoc, Toteco
quitocaxtía se istlacatiquetl. Quiijtohua para masque amo
tlajtlacolchijtoc, Toteco quitlatzacuiltía nelchicahuac.
\p
\v 7 “¿Canque itztoc seyoc tlacatl catli mohueyimati quen Job? San
quinequi quiijtos catli amo tleno ipati.
\v 8 Yaya nemi ica tlacame catli quichihuaj catli fiero. Quitemohuaj
amo cuajcualme para ihuampoyohua.
\v 9 Job quiijtojtoc para san tlapic para se masehuali quichihuas
campica para quipaquilismacas Toteco.
\p
\v 10 “Huajca amojuanti catli antlalnamiquij, techtlacaquilica.
Nochi anquimatij para Toteco Catli Quipiya Nochi Chicahualistli amo
tlajtlacolchihua, niyon amo tlaixpano.
\v 11 Yaya quintlaxtlahuía nochi masehualme quen quinamiqui ica
catli amo cuali quichijtoque huan quen nopa ojtli catli ipan nemi.
\v 12 Huan tijmatij melahuac para Toteco amo quema quichihua catli
amo cuali. Nochipa Toteco Catli Quipiya Nochi Chicahualistli
tetlajtolsencahuas quen quinamiqui.
\v 13 Amo aqui quimacac Toteco tequiticayotl ica ni tlaltipactli
pampa elqui ya catli quisencajqui ni tlaltipactli.
\v 14 Huan sintla Toteco Dios quiquixtilisquía Itonaltzi ipan
tlaltipactli, huan ayacmo techmacasquía iijiyo para ma
titlaijiyotilanaca,
\v 15 nochi masehualme miquisquíaj huan mocuepasquíaj
tlaltejpoctli.
\p
\v 16 “Huajca techtlacaquili huan xijchihua campica para
tijmachilis catli nimitzilhuis.
\v 17 ¿Huelis tlanahuatis Toteco sintla yaya amo quinequi quichihua
catli xitlahuac? ¿Huelis ta tijtelchihuas nopa Tetlajtolsencajquetl
Catli Quipiya Nochi Chicahualistli?
\v 18 Yaya Toteco Dios catli quinilhuía nopa tlanahuatiani huan
tlayacanani: ‘Fiero amonemilis huan amo anquichihuaj catli
xitlahuac.’
\v 19 Yaya amo quinchicoicnelía masehualme. San se quinchihuilía
catli huejhueyi, catli tlapijpiyani huan catli teicneltzitzi pampa
yaya quinchijqui nochi masehualme.
\v 20 Nochi masehualme san itztoque para se tlatoctzi huan nimantzi
miquij. Tlajco yohual huihuipicaj huan tlatoc miquij. Nojquiya
tlatoc miquij tlacame catli quipiyaj chicahualistli masque amo aqui
quitlalijtoc imax.
\p
\v 21 “Toteco Dios ica miyac cuidado quitlachilía nochi catli
masehualme quichihuaj ipan ni tlaltipactli. Yaya quinita nochi.
\v 22 Amo onca se tzintlayohuilotl masque catli más yayahuic campa
masehualme catli quichihuaj catli amo cuali hueli motlatise iixpa
Toteco Dios.
\v 23 Amo itequi se tlacatl para quiijtos quema yaya yas iixpa
Toteco para yaya ma quitlajtolsencahuas.
\v 24 Huan Toteco Dios amo aqui monequi quitlajtlanis caquihuili
para quitzontlamiltis se tequichijquetl huan quitlalis seyoc ipan
ilugar.
\v 25 Yaya quitlachilía nochi catli quichihuaj huan ipan san se
yohual quintepexihuía huan quintzontlamiltía.
\v 26 Quemantic quintzontlamiltía fiero tlacame tonaya iniixpa
nochi masehualme,
\v 27 pampa quitlahuelcajtoque Toteco Dios huan ayacmo nejnemij ipan
iojhui.
\v 28 Huelis inijuanti quintlaijiyohuiltijtoque catli teicneltzitzi,
pero catli teicneltzitzi quitzajtzilijque Toteco Dios, huan yaya
quincajqui. Toteco quipactía quintlacaquilía catli tlaijiyohuíaj.
\v 29 Pero sintla Toteco amo quinequi camanaltis, ¿ajqueya
huelisquía quitelhuis ya? ¿Sintla yaya moixtlatis, ajqueya huelis
quipantis? Yaya itztoc catli quitzacuilía se fiero tlacatl,
\v 30 para ma amo tlanahuatis ipan se tlali huan ma amo hueli
quitlali se tlaquetztli para imasehualhua.
\p
\v 31 “¿Para tlen se masehuali quen ta amo quiilhuía Toteco Dios:
‘Nitlajtlacolchijtoc, pero ayacmo nijchihuas?’
\v 32 O quiilhuis: ‘Technextili nopa tlaixpanoli catli nijchijtoc
pampa amo nijmati. Sintla nitlajtlacolchijtoc, techilhui quenicatza
huan ayacmo nijchihuas.’
\p
\v 33 “¿Timoilhuía para monequi Toteco Dios ma mitztlaxtlahuis
quen ta mitzpactía quema noja amo tijnequi timoyolcuepas tlen
motlajtlacolhua? Ta huan amo na catli monequi tijtlapejpenis catli
tijchihuas huan monequi timoyolcuepas. Huajca techilhui tlaque
timoilhuía.
\v 34 Tlacame catli tlalnamiquij huan masehualme catli miyac
quimachilíaj nechilhuise,
\v 35 para ta tiJob, amo tijmati catli tiquijtohua pampa amo
titlamachilíaj.
\v 36 Quinamiquiyaya tijselis se tlatzacuiltili catli hueyi pampa
ticamanaltic tlen Toteco Dios quen quichihuasquía se fiero tlacatl.
\v 37 Huajca ama amo san tijhuica tlajtlacoli ica catli tijchijqui
achtihuiya, pero nojquiya timohueyimajtoc huan tijtlaijilhuijtoc
Toteco Dios ica miyac tlamantli.”
\c 35
\s Eliú quiijto para amo hueli tijtlaijilhuise Toteco
\p
\v 1 Eliú quisenhuiquili camanalti huan quiilhui Job:
\p
\v 2 “¿Atlac timoilhuía xitlahuac quema tiquijtohua para tiitztoc
cuali iixpa Toteco Dios?
\v 3 Huan teipa tiquijtohua: ‘¿Para tlen ipati sintla
nitlajtlacolchihua?’
\p
\v 4 “Na nimitznanquilis ta huan nochi mohuampoyohua huan
nimechilhuis para tlen ipati.
\v 5 Xijtlachili ilhuicactli huan mixtli huan timomacas cuenta para
tlahuel más huejcapa que ta.
\v 6 Sintla titlajtlacolchihuas, ¿tlaque tijchihuilis Toteco?
Masque titlajtlacolchihuasquía tlatoctzitzi, motlajtlacol amo
quitlanahuisquía Toteco Dios.
\v 7 Huan sintla timonejnemiltis xitlahuac, yaya amo tleno quitlani
por ta. ¿Tlaque nemactli hueli tijmacas ta?
\v 8 Motlajtlacolhua quintlanahui sequinoc masehualme quen ta, huan
quema tijchihua catli cuali, elis senquistoc masehualme catli
tiquinpalehuía.
\p
\v 9 “Teicneltzitzi tzajtzij quema tlaijiyohuíaj ininmaco
masehualme catli quipiyaj más chicahualistli. Quitemohuaj se acajya
ma quinmanahui.
\v 10 Pero amo quitzajtzilíaj Toteco Dios huan quiijtohuaj:
‘¿Canque itztoc Toteco Dios catli techchijchijqui huan catli temaca
paquilistli ipan tlaohuijcayotl?
\v 11 ¿Canque itztoc yaya catli techchihua achi más ma tijpiyaca
tlalnamiquilistli que tlapiyalme huan totome?’
\p
\v 12 “Huan quemantic masehualme quitzajtzilíaj Toteco Dios huan
yaya amo quinnanquilía, pampa inijuanti tlahuel mohueyimatij o
quichihuaj catli fiero.
\v 13 Pero amo quinamiqui sintla tiquijtose para Toteco Catli
Quipiya Nochi Chicahualistli amo quintlacaquilía huan amo
quinchihuilía cuenta catli tlatoctzitzi quitzajtzilíaj.
\v 14 Huan amo neli nojquiya sintla tiquijtose para Toteco Dios amo
quiita nochi catli pano. Toteco quimati tlaque tijchijtoc huan
mitzchihuilis catli xitlahuac sintla timochiyas ipan ya.
\v 15 ¿Ticualani ica ya san pampa amo mitznanquilía nimantzi huan
amo quincualancaita nochi fiero tlacame?
\v 16 Job, ticamanaltitoc quen se catli huihuitic. Ticamanaltitoc
miyac pero amo tijmati catli tiquijtohua.”
\c 36
\p
\v 1 Eliú quisenhuiquili camanaltic huan quiijto:
\p
\v 2 “Xijpiya moyolo huan techcahuili ma nimitzcamanalhui seyoc
tlatoctzi para nimitznextilis catli melahuac. Noja nijpiya se ome
camanali para nijtenpalehuis Toteco Dios.
\v 3 Nijtequihuis nochi notlalnamiquilis huan nimitzmacas se
tlamachtili catli mitznextilis para Toteco Dios catli nechchijqui
nelía quichihua catli xitlahuac.
\v 4 Na nimitzilhuía nochi catli melahuac pampa nijpiya miyac
tlalnamiquilistli catli tlahuel cuali.
\p
\v 5 “Nelía hueyi Toteco Dios, pero amo aqui quinhuejcamajcahua.
Yaya quipiya nochi chicahualistli huan nochi tlamachilistli.
\v 6 Yaya amo quincahuilía ma itztoca masehualme catli fiero, pero
quinmaca teicneltzitzi catli xitlahuac.
\v 7 Toteco Dios nochipa quinmocuitlahuía catli xitlahuaque iixpa.
Yaya quinhueyitlalía huan quinsehuía ininhuaya tlanahuatiani para
tlanahuatise para nochipa.
\v 8 Huan sintla hualas ininpani tlaohuijcayotl huan
tlaijiyohuilistli,
\v 9 Toteco Dios quinnextilía nopa tlajtlacoli catli quichijque
huan quenicatza mohueyimajtoque.
\v 10 Quinpalehuía para ma quitlacaquilica icamanal para ma
moxitlahuaca. Quinahuatía ma moyolcuepaca huan ma quicahuaca
inintlajtlacolhua.
\p
\v 11 “Sintla inijuanti quitlacaquilise huan quitlepanitase catli
quiijtohua, Toteco Dios quintiochihuas huan inijuanti quipiyase
paquilistli ipan nochi ininnemilis huan nochi catli quichihuase
quisas cuali.
\v 12 Pero sintla inijuanti amo quichihuilise cuenta, miquise ica
machete pampa amo quipixque tlalnamiquilistli.
\v 13 Pampa fiero tlacame quicualancaitaj Toteco Dios. Amo mocuepaj
ica ya, niyon amo quinotzaj ma quinpalehui quema yaya
quintlatzacuiltía.
\v 14 Fiero tlacame miquij quema noja telpocame pampa quichihuaj
catli hueli ica sequinoc tlacame nopona campa quihueyichihuaj
teteyome.
\v 15 Por inintlaijiyohuilis Toteco quinmaquixtis masehualme.
Quinchihua ma quitlacaquilica huan ma moyolcuepaca tlen
inintlajtlacolhua.
\p
\v 16 “Toteco nojquiya quinequi mitzmanahuis huan mitziyocatlalis
tlen nochi tlamantli catli mahuilili. Quinequi mitzhuicas ipan se
hueyi tlamayamitl campa mitzhueyitlalisquía ipan mochaj ica nochi
tlacualistli catli más cuali.
\v 17 Pero ta tlahuel ticualantoc ica catli tlajtlacolchihuaj, huan
tiquijtohua monequi Toteco quintlatzacuiltis. Huajca xijmati para
quinamiqui Toteco Dios mitztlatzacuiltis nojquiya.
\v 18 Pero xijpiya cuidado para amo aqui mitzyoltilanas ica tomi
para tijchihuas catli fiero. Amo xijcahuili se tlaxtlahuili ma
mitzchihuili titlajtlacolchihuas.
\v 19 ¿Timoilhuía para motomi huan mochicahualis mitzmanahuis para
amo tijselis tlaijiyohuilistli tlen Toteco?
\p
\v 20 “Amo xijnequi ma eli yohuali quema tlacame quinhuahuatatza
masehualme tlen ininchaj para quinchihuaj miyac tlamantli catli
fiero.
\v 21 Ximoiyocatlali tlen nochi tlamantli catli amo cuali. Toteco
quititlanqui ni tlaijiyohuilistli ipan ta para mitzcuepase tlen se
nemilis catli fiero.
\s Eliú quiijto Toteco quipiya nochi chicahualistli
\p
\v 22 “Toteco Dios quipiya nochi chicahualistli. Amo aqui seyoc
tlamachtijquetl catli tlamachtía quen ya.
\v 23 Amo aqui huelis quiilhuis Toteco Dios tlaque ojtli ma
quitoquili. Amo aqui huelis quiilhuis para amo cuali catli
quichihua.
\v 24 Más cuali xijhueyichihua por nochi huejhueyi tlamantli catli
yaya quichijtoc ica ichicahualis. Xijhueyichihua ica huicatl.
\v 25 Nochi masehualme huelij quiitaj nopa huejhueyi tlamantli catli
yaya quichijtoc, masque san quiitaj itequi Toteco tlen huejca.
\p
\v 26 “Toteco Dios nelía hueyi huan yeca tojuanti amo tiyajatij
tijtlamiiximatij. Niyon amo aqui hueli quipohua quesqui xihuitl
quipiya.
\v 27 Toteco quichihua ma tlejco nopa apoctli huan teipa quichihua
ma huetzi atl ipan tlaltipactli.
\v 28 Tlen nopa mixtli, Toteco quichihua ma huetzi atl catli cuali
para ma atlica nochi masehualme.
\v 29 ¿Hueli se masehuali quimachilis quenicatza momoyahua mixtli
huan quenicatza hualtemos nopa tlatomonilotl?
\v 30 Xiquita quenicatza Toteco quisemana tlapetlanilotl para
quiyahualos campa itztoc. Xiquita quenicatza quintlahuilía hasta
tlatzintla ipan hueyi atl.
\v 31 Ica ihueyi chicahualis, quinahuatía ni tlaltipactli huan
temaca inintlacualis hasta mocahua.
\v 32 Ipan imax quipixtoc miyac tlapetlanilotl huan quinmajcahua
campa yaya quinequi.
\v 33 Quema tlatomoni, techyolmelahua para huala miyac atl catli
huetzis chicahuac. Huan nopa chicahualistli technextilía
icualancayo Toteco huan quinyolmelahua tlajtlacolchihuani para ma
moyolcuepaca.
\c 37
\p
\v 1 “Huan quema nimoilhuía tlen ya ni, nechmajmatía huan
quichihua ma huihuipica noyolo.
\v 2 Xijtlacaquilica itoscac Toteco Dios catli eltoc quen
tlatomonilotl.
\v 3 Itoscac ajsi campa hueli ipan ilhuicactli, huan itlapetlanilo
ajsi ica chicahualistli campa hueli ipan tlaltipactli.
\v 4 Teipa huala nopa tlatomonilotl catli technextilía Toteco Dios
ihueyitilis. Quema yaya camanalti, quichihua ica nochi ichicahualis.
\v 5 Nelía yejyectzi tijcaquij itoscac quema tlatomoni. Yaya
quichihua huejhueyi tlamantli catli tojuanti amo tijmachilíaj.
\p
\v 6 “Yaya quinahuatía nopa sitlal setl ma huetzi ipan
tlaltipactli. Quiilhuía atl catli huetzi chicahuac para ma
tlaquiyahuis cuali.
\v 7 Nochi masehualme quicahuaj inintequi huan san mocahuaj ipan
ininchaj para quiiximatise ihueyi chicahualis.
\v 8 Tlapiyalme catli nemij ipan cuatitlamitl motlatíaj campa teme
huan campa inintepasol.
\v 9 Huala atl chicahuac tlen ilhuicac huan nopa ajacatl quihualica
se tlasesecayotl catli chicahuac.
\v 10 Iijiyo Toteco Dios quititlani setl. Quichihua miyac atl ipan
hueyi atl ma mochihua setl.
\v 11 Yaya quitemitía nochi mixtli ica atl huan tlen nopa mixtli
quititlani nopa tlatlatzini tlapetlanilotl campa hueli.
\v 12 Toteco Dios quimajcahua nopa fiero tlapetlanilotl ica imax.
Huan quinhualtitlani ipan nochi ni tlaltipactli para ma quichihuaca
catli yaya quinequi.
\v 13 Quemantica Toteco Dios quititlani nopa miyac atl para ica
quintlatzacuiltis masehualme, o huelis para ica quintiochihuas, o
huelis san para quiatequilis itlaltipac.
\p
\v 14 “Job, xijtlacaquili ni. Xijchiya se tlatoctzi huan
ximonejnehuili tlen nopa huejhueyi tiochicahual nextili catli Toteco
Dios quichihua.
\v 15 ¿Tijmati quenicatza Toteco Dios quinahuatía nochi atl ma
huetzi chicahuac huan quenicatza quichihua ma tlapetlani tlen
mixtli?
\v 16 ¿Tijmati quenicatza ne mixtli eltoc san ajacatipa huan amo
huetzi hasta tlalchi? Tojuanti tijsentlachilíaj ica nochi
itlalnamiquilis.
\v 17 ¿Tijmati ta para tlen tipatzmiqui ica tlajcotona quema
tlailpitza nopa ajacatl catli huala ica tlani?
\v 18 ¿Ta tijpalehui Toteco para quipatlahuas ilhuicactli quen se
hueyi tescatl catli cahuani?
\p
\v 19 “Ta catli tiquijtohua tijmati nochi, technextili quenicatza
timonechcahuise ica Toteco Dios, pampa tojuanti amo tijmatij. Eltoc
quen tiitztoque ipan tzintlayohuilotl.
\v 20 ¿Atlac niquilhuis para na nijnequi nijcamanalhuis? Pero
¿ajqueya quinequisquía quicamanalhuis se quen ya catli huelis
quitolos noja yoltoc?
\v 21 Quema nopa ajacatl quiquixtía nopa mixtli, tojuanti niyon amo
tihuelij tijtlachilitij tonati pampa tlahuel cahuantoc.
\v 22 Toteco Dios huala tlen norte huan yahualtic quipixtoc
itlatlanex catli tlahuel cahuani. Toteco huala ica nochi ihueyitilis
catli tlahuel temajmatía.
\v 23 Amo hueli tijmachilíaj iyajatil Toteco Catli Quipiya Nochi
Chicahualistli, pero yaya nelía xitlahuac huan techtlasojtla, huan
yeca amo techtzontlamiltía.
\v 24 Yeca nochi masehualme campa hueli, quiimacasij. Yaya amo
quipatiita niyon se catli moilhuía para quipiya miyac
tlalnamiquilistli.”
\c 38
\s TOTECO quinextili Job para nelquentzi quimati
\p
\v 1 Huajca TOTECO quinojnotzqui Job tlen se ajcomalacatl huan
quiilhui:
\p
\v 2 “¿Para tlen ta catli amo tleno tijmati tiquijtohua amo cuali
catli na ica nochi notlalnamiquilis nijchihua?
\v 3 Ximoquetza cuali huan ximocualtlali para technanquilis pampa na
nijpiya sequin tlatzintoquili para ta.
\p
\v 4 “¿Canque tiitztoya ta quema nijtlaliyaya itzinpehualtil ni
tlaltipactli? Sintla nelía titlalnamiqui, techilhui.
\v 5 ¿Tijmati quenicatza nijcualtlali ihuexca huan nijtamachijqui
quesqui metros quipiyasquía?
\v 6 ¿Tijmati ipan tlaque motlatzquilijtoc nopa tlaquetzalme ipan
itzinpehualtil? ¿Ajqueya quitlali nopa achtihui tetl catli más
monequi huan catli yohui calesquina?
\v 7 ¿Canque tiitztoya quema nochi nopa sitlalime huicayayaj ica
paquilistli ica ijnaloc huan notequihuajcahua [38:7 Ipan hebreo
quiijtohua ‘itelpocahua Toteco’. Xijtlachili nojquiya Gn. 6:2; Job
1:6, 2:1 huan Dn. 3:25. Camanalti tlen ángeles o itequihuajcahua
Toteco.]  tzajtziyayaj ica paquilistli para nechhueyichihuaj?
\p
\v 8 “Naya catli nijtlalili inepa nopa hueyi atl quema
topontiquisqui ica nochi ichicahualis tlen campa nijchijqui,
\v 9 huan nijtlali mixtli huan tzintlayohuilotl iixco quen elisquía
iyoyo.
\v 10 ¿Tijmati quenicatza nijtzajqui nopa hueyi atl quen se
quitzacua se puerta para ayacmo quisa tlen itejteno?
\v 11 Huan niquilhui hueyi atl: ‘Hasta nica huelis tiajsis pero amo
huelis tipanos más. Nica tlamis campa hueli ajsis moa catli
mohuijhuisojtihuala tlatoctzitzi.’
\p
\v 12 “¿Atlac quemantic ta tijnahuatijtoc tonali ma tlanesis ica
ijnaloc huan ma tlahui nopa tonati?
\v 13 ¿Atlac tijnahuatijtoc nopa tonali ma tlatlanexti hasta campa
hueli campa itlamiya tlaltipactli para masehualme ayacmo ma
quichihuaca más tlajtlacoli ica tlayohua?
\v 14 ¿Tijchijtoc ma tlahui cuali nopa chichiltic tlahuili catli
monextía ica ijnaloc? ¿Ta tijchijtoc para iixco tlaltipactli ma
nesis quen quipiya iyoyo catli chichiltic?
\v 15 ¿Tijpannextijtoc campa motlatíaj nopa tlajtlacolchihuani?
¿Tijtzacuilijtoc catli quitlanantoya iajcol para tecocos?
\p
\v 16 “¿Tiquitztoc canque meya nopa atl ipan hueyi atl?
¿Ticalactoc ipan nopa hueyi ostotl tlen hueyi atl huan tinejnentoc
hasta tlatzintla?
\v 17 ¿Mitznextilijtoque campa eltoc nopa puerta tlen miquilistli
huan mictla?
\v 18 ¿Tijmati quesqui ipatlajca ni tlaltipactli? Techilhui sintla
tijmati nochi ya ni.
\p
\v 19 “¿Tijmati nopa ojtli catli ipan huala tlahuili? ¿Huelis
techilhuis canque yohui nopa tzintlayohuilotl?
\v 20 ¿Huelis tijhuicas tlahuili hasta ichaj? ¿Tijmati nopa ojtli
hasta campa pejqui?
\v 21 Ta, quena, timoilhuía tijmati nochi ya ni pampa timoilhuía
titlacatqui quema ayamo nijchijchihuayaya nochi ni tlamantli.
Temachtli timoilhuía tijmati miyac pampa tijpiya tlahuel miyac
xihuitl. Pero amo neli catli timoilhuía.
\p
\v 22 “¿Tiyajtoc campa nicajoctoc nopa sitlal setl? ¿Tiyajtoc
campa nijchijchihua nopa tesihuitl huan nicajocui?
\v 23 Nochi ya nopa nicajoctoc para nijtequihuis ipan tonali tlen
tlaohuijcayotl huan ipan tlahuilancayotl.
\v 24 ¿Tijmati nopa ojtli catli yohui campa pehua itlahuil tonati?
¿Tijmati canque pejtoc nopa ajacatl catli huala ica campa hualquisa
tonati huan yohui ipan nochi tlaltipactli? Na nijmati.
\p
\v 25 “¿Ta tijmati ajqueya quichijchijqui aojtli ipan tlamayamitl
para ipan ma motlalo nopa atl catli huetzi huan ajqueya quinextili
iojhui nopa tlapetlanilotl?
\v 26 ¿Tijmati ajqueya quichihua ma huetzi atl ipan huactoc tlali
campa amo tleno eli?
\v 27 ¿Tijmati ajqueya quixolonía nopa tlali catli tlahuel amiqui
huan quichihua ma ixhua xihuitl catli selic? Na, quena, nijchijqui.
\p
\v 28 “¿Quipiya itata nopa atl catli huetzi? ¿Canque huala nopa
ajhuachtli?
\v 29 ¿Ajqueya inana nopa setl? ¿Canque huala nopa setl catli
huetzi ica ijnaloc? Na nijtitlani.
\v 30 Atl mocuepa setl campa mantoc atl huan ipan hueyame huan
mochihua tetic quen tetl pampa na nijchihua ma pano.
\p
\v 31 “¿Huelis ta tiquintzacuilis nopa sitlalime Pléyades para ma
ayacmo nejnemica? ¿O huelis tijtojtomas nopa sitlalime catli
inintoca Orión para ayacmo ma mocahuaca tlatzquitoque?
\v 32 ¿Atlac ta tiquinilhuía nopa sitlalime catli sentic nemij
quema ininhora para monextise ipan ilhuicac? ¿Ta catli tiquinyacana
ipan iniojhui nopa sitlalime catli sentic yohuij catli inintoca Osa
Mayor huan Osa Menor?
\v 33 ¿Tiquiniximati nopa tlanahuatilme catli quintoquilíaj nochi
tlamantli ipan ilhuicactli huan ipan ni tlaltipactli?
\p
\v 34 “¿Huelis ta tijtzajtzilis chicahuac ne mixtli huan
tijchihuas ma tlaquiyahuis?
\v 35 ¿Hueli tijnahuatis ma quisaca miyac tlapetlanilotl huan ma
huetzitij campa ta tijnequi? Na nihueli.
\v 36 Na nitemaca tlalnamiquilistli huan tlaiximatilistli.
\v 37 ¿Ajqueya quipiya miyac tlalnamiquilistli para quiijtos
quesqui mixtli onca? ¿Ajqueya hueli quichihuas ma huetzi miyac atl
quema tlahuactoc,
\v 38 huan nochi tlali mocueptoc tlaltejpoctli huan tlaltojtolomitl?
\p
\v 39 “¿Tihueli tijtemos tlacualistli para se sihua león para
quintlamacas iconehua,
\v 40 catli mochixtoque ipan iniosto o ipan cuatitlamitl? Na
nihueli.
\v 41 Na nihueli niquintemolía inintlacualis nopa cacalome quema
ininconehua nechtzajtzilíaj, niininTeco, huan nentinemij ipan
inintepasol pampa mayanaj.
\c 39
\p
\v 1 “Job, ¿ta tijmati quema tlaconehuíaj nopa chivojme catli
itztoque ipan cuatitlamitl? ¿Ta tiquitztoc quenicatza se sihua
masatl quitlacatiltis icone?
\v 2 ¿Tijmati quesqui metztli monequi tlanemiltise nopa tenan
chivojme,
\v 3 hasta mohuitolose para quintlacatiltise ininconehua para tlamis
inintlacuajcualol?
\v 4 Nopa pilchivojtzitzi moscaltíaj nopona ipan cuatitlamitl huan
teipa yohuij huejca para motlamacase ininseltzitzi huan ayacmo
mocuepaj campa inintatahua.
\p
\v 5 “¿Ta tijmati ajqueya quinchijtoc nopa cuatitla burrojme para
teimacasise huan nejnemise huejca ipan cuatitla? ¿Tijmati ajqueya
quintojtomilijtoc para hueli yohuij campa quinequij?
\v 6 Na nijmati. Na catli niquintlali cuatitla huan niquinmacac nopa
tlamayamitl campa onca istatl para nopona ma itztoca.
\v 7 Nopa burrojme amo quinequij quicaquise nopa tlahuejchihualistli
ipan altepeme, niyon amo quinequij ma quintzajtzilica nopa burrojme
huicani.
\v 8 Inijuanti paquij motlalojtinemij ipan cuatitlamitl para
quipantise inintlacualis. Nopona quicuajtinemij nochi tlamantli
xihuitl catli selic.
\p
\v 9 “¿Atlac huelis tijmaxojtilis nopa hueyi búfalo catli nemi
cuatitla? ¿Atlac quinequis mocahuas calijtic campa tlacuaj
motlapiyalhua?
\v 10 ¿Huelis ta tijtlalis se cuahuitl iquechtla huan tijtequihuis
nopa hueyi búfalo para tijpoxonis motlal? ¿Atlac quinequis
tlapoxonis ica se tepostli ipan motlal ta?
\v 11 ¿Huelis timotemachis ipan nopa tlapiyali pampa hueyi huan
quipiya miyac chicahualistli? ¿Huelis tijcajtehuas huan tijmati
para quichihuas nopa tequitl catli tijnequi ma quichihua?
\v 12 ¿Huelis tijtitlanis para ma quimama motrigo huan quihualicas
hasta mochaj?
\p
\v 13 “Nopa sihua tototl catli itoca avestruz, quihuihuipitza o
quipatlahua ieltlapal, pero amo hueli patlani quen nopa cigüeña.
\v 14 Nopa avestruz quincajtehua itecsis xalpani para ma mototonili.
\v 15 Amo moilhuía para se acajya hueli moquetzas ininpani o se
tlapiyali hueli quinpitzinis.
\v 16 Yaya tlahuel mosisinía ica iconehua quen elisquía amo
iaxcahua huan niyon amo quinchihuilía cuenta sintla miquij,
\v 17 pampa na, niamoTeco, amo nijmacac tlalnamiquilistli huan
tlamachilistli.
\v 18 Pero quema nopa avestruz motlanana huan motlalohua, chicahuac
yohui huan quintlani nochi cahuayojme huan nochi catli ininpan
tlejcotoque.
\p
\v 19 “¿Elqui na catli niquinmacac ininchicahualis cahuayojme huan
nijyecchijqui ininquechtla ica inintzoncal catli huehueyac?
\v 20 ¿Na tiquinmacac cahuayojme yajatili para huitonise quen
chapolime? Se cahuayo quipactía tzajtzi chicahuac huan mohueyimati
huan temajmatía.
\v 21 Quitejtzona tlali ica iisti huan paqui pampa quipiya miyac
chicahualistli. Huan ipan tlahuilancayotl se cahuayo,
\v 22 amo majmahui huan amo cholojtehua.
\v 23 Masque cuatlamintli quiajsi ipan ielchiqui o quiajsij ica
cuachoso o machetes catli tlatequi, se cahuayo noja quichihua
itequi.
\v 24 Ica nochi iyolo quitejtzona tlali chicahuac ica iisti huan
paqui quema quicaqui tlapitzali. Nimantzi quinequi yas ipan nopa
tlahuilancayotl.
\v 25 Quema se tlapitza, se cahuayo tlaijnecui hasta huejca para
quimatis canque eltoc nopa tlahuilancayotl huan tlahuel paqui quema
quicaqui tzajtzij catli mohuilanaj o quicaquis se tlayacanquetl tlen
soldados catli temaca tlanahuatili.
\p
\v 26 “¿O huelis ta tijmacatoc tlalnamiquilistli nopa cuajtli para
motlananas huan quipatlahuas ieltlapal ica tlani huan patlantehuas?
\v 27 ¿Huelis ica ta motlanahuatil motlanana nopa cuajtli catli
más hueyi huan yohui campa tepexitl para quichihuas itepasol
huejcapa?
\v 28 Nopona nopa cuajtli mocahua para itztos ipan nopa tepexitl
huan nopona quichihua itepasol. Cochi campa teme catli más
huejcapa.
\v 29 Huan tlen nopona quitlajtlachilía huejca hasta quiita se
tlapiyali para quiitzquis.
\v 30 O yohui campa huetztoc itlacayo se tlapiyali catli mictoc para
quihualicas huan quintlamacas ipilconehua ica estli.”
\c 40
\p
\v 1 TOTECO nojquiya quiilhui Job:
\p
\v 2 “¿Noja tijnequi timonajnanquilis nohuaya na, nimoTeco Catli
Nijpiya Nochi Chicahualistli? Ta catli techtlaijilhuiyaya ¿tijpiya
camanali para technanquilis?”
\s Job quinanquili Toteco
\p
\v 3 Huajca Job quiilhui TOTECO:
\v 4 “Na amo tleno nopati. Amo hueli nimitznanquilis. Más cuali
nijtlalis nomax ipan nocamac huan ayacmo nimolinis.
\v 5 Ya nicamanaltic miyac huan ayacmo nijpiya camanali para
niquijtos.”
\s Toteco sempa quiixcoilhui Job
\p
\v 6 Huan TOTECO sempa quinojnotzqui Job tlen tlatlajco ipan nopa
ajcomalacatl huan quiilhui:
\p
\v 7 “Ximoquetza quen se tlacatl huan ximocualtlali para
technanquilis catli nimitztlatzintoquilis.
\v 8 ¿Atlac tiquijtohua para na amo nixitlahuac huan ta
tixitlahuac?
\v 9 ¿Tijpiya chicahualistli quen na, nimoTeco Dios, nijpiya? ¿Ta
tihueli tijchihua ma tlatomoni motoscac nelchicahuac quen na nihueli
nijchihua?
\v 10 Huajca sintla nelía tihueyi quen na, ximoquenti nopa
tlatlanextli huan technextili mohueyitilis. Technextili
motequiticayo huan nopa tlatlepanitacayotl catli quinamiqui
tijselis.
\v 11 Xijnexti mohueyi cualancayo. Xiquintlachili catli mohueyimatij
huan xiquinechcapantlali.
\v 12 Xiquinpinahualti nochi catli motlepanitaj san ica
motlachiyalis. Ximoquejquetza ininpani nopa masehualme catli fiero
ininnemilis.
\v 13 Xiquintlalpacho nochi inijuanti ipan tlali huan xiquinmajcahua
ipan nopa tzintlayohuilotl tlen miquilistli.
\v 14 Sintla huelis tijchihuas nochi ya nopa, huajca na nojquiya
nimitzitas para tihueyi pampa melahuac tihuelqui timomaquixti ica
mochicahualis.
\p
\v 15 “Xiquita, nopa hueyi tlapiyali Behemot. Nojquiya
nijchijchijqui ya san se quen nimitzchijqui ta. Quicua sacatl quen
se huacax.
\v 16 Xijtlachili quenicatza quipiya miyac chicahualistli ipan
imetztomahuiya huan ipan nopa huejhueyi tlalo músculo ipan iijti.
\v 17 Quipiya icuitlapil catli mohuijhuisohua quen se tiocuahuitl.
Huan ipan iquescuayo quipiya itlalo cuali moijilpitoc itlalijcho san
sejco.
\v 18 Iomiyohua xitlahuaque huan tetique quen nopa tepostli bronce.
Huan imetzhua tetique quen se barra tlen tepostli.
\v 19 Nopa Behemot itztoc nopa tlayacanca temachtli tlen nochi
tlapiyalme catli na, niamoTeco niquinchijchijtoc. San na catli
nijchijqui huelis nijnechcahuis ica nocuitlapa huan yaya amo tleno
nechchihuilis.
\v 20 Nopa cuatitlamitl campa miyac cuatitlan tlapiyalme
mahuiltijtinemij quimaca nopa xihuitl catli más cuali para nopa
Behemot ma quicua.
\v 21 Yaya moteca itla itzonacahuil nopa xihuime catli onca ipan atl
huan motlatía ipan inincuayo catli más xolontoc.
\v 22 Nopa lotos cuame catli onca atentli quimaca iniecahuil campa
nopa álamo cuame catli moscaltíaj atentli.
\v 23 Nopa Behemot amo momajmatía masque mosisinisquía nopa atl.
Amo motequipachos sintla temis nopa hueyatl Jordán huan quiajsis
ipan icamac.
\v 24 Amo aqui huelis quiitzquis, o quimasiltis o quitlalilis anillos
ipan iyacatzol para quihuicas ilpitoc.
\c 41
\p
\v 1 “¿O huelis ta nel tihueyi hasta tihuelis tiquitzquis nopa
leviatán tlapiyali ica se teposchijcoli? ¿Huelis tiquilpis ica se
lazo ipan icamac quen na nihueli?
\v 2 ¿Huelis tiquilpis ta ica se mecatl ipan iyacatzol o tijcoyonis
ipan icamachal para tijpanoltis se teposchijcoli?
\v 3 ¿Atlac timoilhuía para yaya mitztlajtlanis miyac hueltas
para xijcahua, o mitztlacahualtis ica camanali catli yejyectzitzi?
\v 4 ¿Timoilhuía para quichihuas se camanal sencahuali mohuaya
para elis motequipanojca para nochipa?
\v 5 ¿Ta tihuelis tijmaxojtilis huan tijpixtos ipan mochaj quen
elisquía se tototl huan tiquinmacas mosihuapilhua ma quiahuiltica?
\v 6 ¿Atlac nopa michtlajtlamani huelise quihuicase ipan tianquis
para quinemacase inacayo?
\v 7 ¿Tihuelis tijcoyonis icuetlaxo ica miyac cuatlamintli o
tijcoyonis itzonteco ica huejhueyi teposchijcolme?
\v 8 Sintla tiquitzquisquía, yaya mitzhuilanasquía. Huan amo quema
tiquelcahuasquía nopa tlahuilancayotl ihuaya. Ayacmo quema
tijnequisquía tiquitzquisquía sempa.
\p
\v 9 “San tlapic para tijnequis tiquitzquis para tiquilpis pampa
amo tihuelis. Itlachiyalis tlahuel mitzmajmatis.
\v 10 Huajca amo aqui mosemaca quiixitis nopa leviatán tlapiyali,
niyon quiitzquis. Huan sintla amo aqui motemaca itztos iixpa ya
catli na nijchijtoc, ¿ajqueya huelis itztos noixpa na catli
niamoTeco?
\v 11 Na amo aqui nijtlahuiquilía. Nochi catli onca tlatzintla
ilhuicactli na noaxca.
\p
\v 12 “Nojquiya nicamanaltis tlen nopa chicahualistli catli nopa
leviatán quipiya ipan sesen imetz huan ipan nochi itlacayo huan
quenicatza yejyectzi hueli ajquis.
\v 13 Amo aqui hueli quicoyonilis icuetlaxo. Amo aqui motemaca
moquetzas nechca icamac para quitlalilis se tepos camachali.
\v 14 Amo aqui hueli quitlapolis icamac pampa quinpiya itlancoch
catli tlahuel temajmati.
\v 15 Nopa cacahuayotl catli moquetztoque ipan icuitlapa cuali
tlatzquitoque huan mocahuaj tetic quen tetl.
\v 16 Amo quicahuilía panos ajacatl huan niyon se tlamantli amo
hueli quicoyonis.
\v 17 Tlatzquitoque icacahuayo san sejco huan amo aqui huelis
quiniyocatlalis.
\p
\v 18 “Quema nopa leviatán mijtzomía, quisa catli eltoc quen
tlapetlanilotl. Huan iixteyolhua nesij chichiltic quen
tlanestihuala.
\v 19 Ipan icamac quisa miyac tlitl huan tlimoyotl.
\v 20 Ipan iyacatzol quisa poctli quen quema quimolonía se tlacuali
ipan se tlitl tlen acatl.
\v 21 Ica iijiyo quilemenaltis tlicoli huan ipan icamac quisa
tlilelemectli.
\p
\v 22 “Quipiya miyac chicahualistli ipan iquechtla. Huan campa
hueli campa yohui, quinmajmatía nochi catli quipantía.
\v 23 Campa mocuelpachojtoc icuetlaxo tlahuel motzquitoc. Neltetic
huan amo mojmolinía icuetlaxo campa hueli ipan itlacayo.
\v 24 Quipiya iyolixpa neltetic quen se tetl. Quena, tlahuel tetic
quen se metlatl.
\v 25 Quema nopa leviatán moquetza, quinmajmatía nochi catli
itztoque iixpa hasta catli más yoltetique. Nochi cholohuaj pampa
yaya tlahuel mosisinía.
\v 26 Niyon se machete, cuatlamintli o teposcuachoso hueli quicocos.
\v 27 Nopa leviatán quiita tepostli quen elisquía sacatl.
Quichihuilía nopa tepostli bronce quen elisquía se cuahuitl catli
palantoc.
\v 28 Yaya amo cholohua quema quimajcahuilíaj cuatlamintli. Huan
quema quimajcahuilíaj tetl ica tehuitlatztli, yaya quiita quen
quimajcahuilisquíaj tlasoli.
\v 29 Masque quimaquilíaj ica cuahuitl yaya amo quichihuilía
cuenta huan san quinhuetzquilía quema quimajcahuilíaj se cuachoso
tlen tepostli.
\v 30 Tlatzintla iijti quipiya icacahuayo catli tetic huan catli
tlatequi. Huan quema mohuahuatatza, tlahuel quipoxonía tlali.
\p
\v 31 “Nopa leviatán quimolonaltía nopa atl quema quiolinía.
Eltoc quen quichihua ma mojmolini nopa atl hasta campa más
tlatzintla.
\v 32 Huan quema yohui aixco, quiposonaltijti nopa atl. Quema
tijtlachilis nopa hueyi atl catli posoni, nesi chipahuac quen
elisquía itzoncal se huehuentzi.
\v 33 Ipan nochi tlaltipactli amo onca niyon se tlapiyali quen nopa
leviatán catli amo tleno quiimacasi.
\v 34 Tlen huejcapa, yaya quintlachilía nochi catli mohueyimatij.
Yaya inintlanahuatijca nochi catli mohueyimatij.”
\c 42
\s Job moyolcuepqui iixpa TOTECO
\p
\v 1 Huan Job quiilhui TOTECO:
\p
\v 2 “Na nijmati para ta nochi tihueli tijchihua. Amo aqui huelis
mitztzacuilis para amo tijchihuas niyon se tlamantli catli
tijsencajtoc para tijchihuas.
\v 3 Ta titlatzintocayaya ¿ajqueya nopa masehuali catli
quiijtohuayaya amo cuali catli tijchihuayaya? Naya nieli nopa
tlacatl. Nicamanaltiyaya tlen miyac huejhueyi tlamantli catli amo
nijmatiyaya huan amo nijmachiliyaya.
\p
\v 4 “Ta techilhui ma nijtlacaquili, pampa tijnequiyaya
ticamanaltis nohuaya. Tiquijtohuayaya ta techtlatzintoquilis huan
nimitznanquilis sintla melahuac nijpixqui tlalnamiquilistli.
\p
\v 5 “Pero TOTECO nimitzilhuía. Na nijcactoya tlen ta, pero ama
nimitzitztoc.
\v 6 Huan yeca nimoijiya huan nimoyolcuepa moixpa. Nimotemilía
tlaltejpoctli ipan notzonteco huan nimosehuía ipan cuanextli para
nochi ma quimatica nimoyolcueptoc.”
\s TOTECO cualanqui ininhuaya nopa eyi ihuampoyohua Job
\p
\v 7 Teipa quema Toteco tlanqui camanalti ihuaya Job, quicamanalhui
Elifaz catli ehua Temán, huan quiilhui:
\p “Na tlahuel nicualani ica ta huan ica nopa ome mohuampoyohua
pampa amo ancamanaltique xitlahuac tlen na quen notequipanojca Job.
\v 8 Huajca ama xiquincuica chicome becerros huan chicome oquich
chivojme, huan xiyaca campa notequipanojca Job. Huan nopona
xiquintencahuaca quen se tlacajcahualistli tlatlatili para
anquiixtzacuase amotlajtlacolhua. Huan notequipanojca Job
motlatlajtis por amojuanti huan na nijtlacaquilis. Quej nopa amo
nimechtzontlamiltis quen quinamiqui nimechchihuilis por
amotlajtlacolhua. Pampa amojuanti amo ancamanaltique xitlahuac tlen
na quen notequipanojca Job.”
\p
\v 9 Huajca Elifaz catli ehua Temán, Bildad catli ehuayaya Súa
huan Zofar catli ehuayaya Naamán, yajque huan quichihuatoj
senquistoc quen Toteco quinnahuatijtoya. Huan TOTECO quitlacaquili
Job quema motlatlajti por inijuanti.
\s TOTECO tlahuel miyac quitiochijqui Job
\p
\v 10 Teipa quema Job motlatlajti por ihuampoyohua, Toteco Dios
quiquixtili itlaijiyohuilis huan quicuepili nochi iricojyo. Huan
quimacac ome huelta imiyaca catli quipixtoya achtihuiya.
\p
\v 11 Huan hualajque campa ya nochi isihua icnihua, itlaca icnihua
huan ihuampoyohua catli quiiximatque achtihuiya huan ilhuichijque
ihuaya ipan ichaj. Huan quiyoltlalijque huan quiyolchicajque por
nochi nopa tlaijiyohuilistli catli TOTECO quititlanilijtoya. Huan
sesen tlen inijuanti quihualiquili Job se nemactli tlen tomi huan se
anillo tlen oro.
\p
\v 12 Huan TOTECO quitiochijqui Job noja más que achtihuiya. Pampa
ama quinpixqui 14 mil borregojme, chicuase mil camellos, mil pares
huacaxme catli tlapoxoníaj huan mil sihua burrojme.
\p
\v 13 Nojquiya TOTECO quimacac seyoc chicome itelpocahua huan seyoc
eyi iichpocahua.
\v 14 Nopa achtihui ichpocatl itoca eliyaya Jemima, nopa ompa
ichpocatl itoca eliyaya Cesia huan nopa expa ichpocatl itoca eliyaya
Keren Hapuc.
\v 15 Huan ipan nochi tlaltipactli amo oncayaya ichpocame catli
tlahuel yejyectzitzi quen iichpocahua Job. Huan Job quinmacac
iichpocahua inintlal huan ininparte ipan nochi catli quipixqui san
se quen quinmacac itelpocahua.
\p
\v 16 Huan teipa Job noja itztoya 140 xihuitl. Huan quinitac
iconehua, iixhuihua, iixhuihua ininconehua huan iixhuihua
ininconehua ininconehua.
\v 17 Teipa mijqui Job quema eliyaya nelhuehuentzi.