\id PRO
\h PROVERBIOS
\mt Proverbios
\c 1
\s Itlalnamijca camanal Salomón
\p
\v 1 Na niSalomón. Nitlanahuatijquetl ipan tlali Israel huan
niicone David. Huan ya ni nopa tlalnamijca camanali catli nijnequi
nitemacas.
\v 2 Nicajoctoc ni camanali para quinmachtis masehualme quenicatza
ma motlalnamictica. Quinilhuis tlaque ma quichihuaca para itztose
ica cuali.
\v 3 Nijnequi masehualme quiselise se tlalnamijca camanali catli
quinamiqui para motlalnamictise. Quej nopa huelis quipiyase se
nemilistli catli cuali huan quichihuase catli melahuac, huan catli
xitlahuac, huan catli nelcuali.
\v 4 Ni tlalnamijca camanali quinpalehuis catli huihuitzitzi para
motlalnamictise. Quinpalehuis telpocame huan ichpocame ma quipiyaca
se tlalnamijcayotl catli cuali para ma amo quichihuase se
huihuiyotl.
\p
\v 5 Masehualme catli ya tlalnamiquij ma quitlacaquilica catli nica
eltoc huan achi más ma motlalnamictica.
\v 6 Nochi masehualme ma quitemoca tlaque quinequi quiijtos sesen ni
tlalnamijca camanali, huan ni huicalotl huan cuali camanali catli
tlalnamiquini quiijcuilojque nica para huelis quimachilise nochi.
\p
\v 7 Quema se masehuali pehua quiimacasi huan quitlepanita TOTECO,
ya pejtoc para mochihuas tlalnamiqui. Pero catli huihuitique amo
quinequij quicaquise camanali catli quipiyaj tlalnamiquilistli huan
tlamachtili.
\s Tlamachtili para telpocame
\p
\v 8 Tinotelpoca, xijtlacaquili catli motata huan monana
mitzmachtíaj, huan amo xijhuejcamajcahua inincamanal.
\v 9 Pampa nochi catli mitzmachtíaj, mitzhualiquilis
tlatlepanitacayotl. Elis nelcuali para ta quen se yejyectzi costli
ipan moquechcuayo huan quen se corona ipan motzonteco.
\p
\v 10 Notelpoca, sintla hualahuij tlaixpanoca tlacame huan quinequij
mitzcajcayahuase, amo xiquincahuili.
\v 11 Huelis inijuanti mitzilhuise: “Xihuala tohuaya, ma
timotlatica huan tijmictise se acajya masque amo tleno
techchihuilijtoc.
\v 12 Tiquinmictise catli tejtetique inintlacayo. Nimantzi miquise
huan mopantise ipan teostotl.
\v 13 Tijpantise miyac tlamantli catli ipati. Tijtemitise tochajchaj
ica nochi catli tiquichtequise.
\v 14 Xihuala huan techpalehui. Tijpiyase san setzi bolsa huan teipa
san se timomajmacase nochi catli tomaco ajsis.”
\p
\v 15 Pero notelpoca, na nimitzilhuía amo xiya ininhuaya, niyon amo
xijtoquili iniojhui. San xiquintlalcahui.
\v 16 Pampa inijuanti san tlahuel quinequij quichihuase catli fiero,
huan quinequij temictise.
\v 17 Quema se tototl quiita para masehualme quitlalíaj se
tlaquetztli ica campa yohui, nopa tototl amo monechcahuía nopona.
\v 18 Pero nopa masehualme catli huihuitique, amo. Inijuanti ica
ininseltzitzi motlaquechilíaj para miquise. Eltoc quen motlalilíaj
se lazo ininseltzitzi para mocuapilose ica catli amo cuali
quichihuaj.
\v 19 Quena, quej nopa tlamimiquise nochi masehualme catli quinequij
moaxcatise miyac tlamantli catli sequinoc quipiyaj. Quipantise se
miquilistli catli fiero pampa tlahuel itzcuime.
\s Se catli quipiya tlalnamiquilistli teconsejomaca
\p
\v 20 Pero itztoc se catli quipiya tlalnamiquilistli catli
technotza. Eltoc quen moquetza ipan hueyi ojtli huan ipan tianquis,
huan quinnojnotza nochi masehualme ma quitlacaquilica huan ma
motlalnamictica.
\v 21 Quena, quinnotza nochi masehualme campa momatij mosentilíaj.
Quinnotza tequitini catli quipiyaj inintequi para
tetlajtolsencahuase campa tequicali ipan altepetl.
\v 22 Huan yaya catli quipiya tlalnamiquilistli quinilhuía:
“Amojuanti catli amo tleno anquimatij, ¿hasta quema quej nopa
anmocahuase? Huan amojuanti catli san anquinhuihuiitaj nochi
masehualme catli tlalnamiqui, ¿hasta quema tlamis
anquinhuihuiitase? Huan ¿hasta quema anquicualancaitase
tlamachiltilistli?
\v 23 Xihualaca, techtlacaquiliquij, huan na nimechmacas miyac
tlalnamiquilistli. Quena, catli nimechmatiltis
anmechtlalnamiquiltis.
\p
\v 24 “Ya nimechnotztoc miyac hueltas, pero amo anquinectoque
antechtlacaquilise. Tlatoctzitzi nimechmacac nomax huan amo
antechchihuilijtoque cuenta.
\v 25 Quena, amojuanti anquihuejcamajcajtoque nopa consejos catli
quipiyaj tlalnamiquilistli. Amo antechtlacaquilijtoque catli
tiquijtojtoque quema tijnequiyayaj timechtlacahualtise.
\v 26 Pero ajsis se tonal quema anitztose ipan miyac tlaohuijcayotl,
huan catli quipiyaj tlalnamiquilistli san anmechhuetzquilise. Quena,
catli quipiyaj tlalnamiquilistli anmechpinajtise quema anmechajsis
nopa catli achi más anquiimacasij.
\v 27 Quena, anmechhuetzquilise quema hualas amopani miyac
tlaohuijcayotl masque anmechnenpolos quen se chicahuac ajacatl catli
nochi quisosolohua. Ipan nopa hora masehualme catli quipiyaj
tlalnamiquilistli ayacmo huelis anmechpalehuise, masque ipan se
tlatoctzi quema amo anquichiyaj hualas amopani tequipacholi,
choquistli, huan tlaijiyohuilistli.
\p
\v 28 “Catli quipiyaj tlalnamiquilistli ayacmo anmechnanquilise
quema anquinnojnotzase. Antechtemose para ma timechpalehuise, pero
amo antechpantise.
\v 29 Pampa amojuanti amo anquinejque anquipiyase tlalnamiquilistli.
Amo anquinejque anquitlepanitase TOTECO huan anmotemachise ipan ya.
\v 30 San anquihuejcamajcajque inincamanal catli quipiyaj
tlalnamiquilistli quema anmechconsejomacayayaj. Amo
antechchihuilijque cuenta quema timechtlacahualtiyayaj.
\v 31 Huajca yeca antlaijiyohuise pampa anquiselise amotlaxtlahuil
por catli fiero anquichijtoque. Anquitlapejpenijtoque nopa fiero
ojtli para anquitoquilise, huan ama anquimatise nochi majmajtli
catli nopona mopantíaj.
\v 32 Pampa masehualme catli amo tleno quimatij huan catli
quihuejcamajcahuaj camanali catli quipiyaj tlalnamiquilistli,
quipantise miquilistli. Catli huihuitique mocuapolose pampa amo
quipiyaj cuidado ica tlamantli catli monequi.
\v 33 Pero nochi masehualme catli techtlacaquilise catli tijpiyaj
tlalnamiquilistli, itztose ica temachili huan tlasehuilistli.
Itztose ica paquilistli huan amo tleno quiimacasise.”
\c 2
\s Hueyi ipati tlalnamiquilistli
\p
\v 1 Tinotelpoca, xijseli catli nimitzilhuía, huan xicajocui
notlanahuatil ipan moyolo.
\v 2 Cuali xijtlacaquili nocamanal catli quipiyaj tlalnamiquilistli.
Quena, ica nochi moyolo ximotlali para nelcuali tijmachilis nochi.
\v 3 Xijtemo tlalnamiquilistli. Quena, ica nochi moyolo ximomachti
para más tijmachilis tlamantli.
\v 4 Xiquintemo ni tlalnamiquilistli huan tlaiximatili ica nochi
moyolo quen tijtemosquía miyac tomi catli motlatijtoc, o quen
tijtemosquía se tlamantli catli nelpatiyo catli tijpolojtoya.
\v 5 Huan huajca quena, tijmachilis para tlahuel monequi
tijtlepanitas huan tiquimacasis TOTECO, huan teipa tiquiximatis ya.
\v 6 Pampa san yaya TOTECO temaca tlalnamiquilistli, huan tlen ya
huala nochi tlamatilistli huan tlamachilistli.
\v 7 Quena, TOTECO quinmaca se cuali tlalnamiquilistli nochi
masehualme catli itztoque xitlahuaque. Quinmanahuía catli nemij
cuali iixpa.
\v 8 Yaya TOTECO catli quinmocuitlahuía nochi catli monemiltíaj
cuali. Quena, quinmocuitlahuía itlatzejtzeloltijca masehualhua ipan
iniojhui.
\p
\v 9 Quema TOTECO quimacas se masehuali tlalnamiquilistli, quimatis
tetlajtolsencahuas xitlahuac, huan quimatis catli melahuac, huan
catli nelía cuali para quichihuas. Quena, tijmatis quenicatza
huelis tijtlapejpenis nopa ojtli catli más cuali.
\v 10 Quema tijpiyas miyac tlalnamiquilistli huan tijmatis miyac
tlamantli catli melahuac, tijmachilis miyac paquilistli ipan moyolo.
\v 11 Huan pampa tielis titlalnamiqui huan tijmatis miyac,
motlalnamiquilis mitzmocuitlahuis. Quena, catli tijmatis mitzchihuas
para tiitztos ica temachili.
\p
\v 12 Motlalnamiquilis huan nopa catli tijmatis mitzmanahuise para
amo tiyas ipan ojtli catli amo cuali. Quena, mitzmaquixtis ininmaco
masehualme catli tlahuel fiero camanaltij.
\v 13 Motlalnamiquilis mitzmaquixtis tlen masehualme catli
quitlahuelcahuaj iojhui TOTECO, huan quitoquilíaj se ojtli catli
quipiya tzintlayohuilotl.
\v 14 Quena, nopa amo cuajcualme tlahuel mopaquilismacaj quema
quinchihuilíaj masehualme catli amo cuali. Ilhuichihuaj quema
tlahuel tecocojtoque huan fiero quinchihuilijtoque.
\v 15 Nopa masehualme nemij ipan se ojtli catli huijcoltic, huan
niyon se tlamantli catli quichihuaj amo eltoc cuali pampa
mocuapolojtoque.
\p
\v 16 Nojquiya quema tijpiyas tlalnamiquilistli, mitzmanahuis para
amo timocajcayahuas ininhuaya sihuame catli amo cuali ininnemilis.
Nopa sihuame quinpactía momecatíaj huan quimatij quenicatza
tecajcayahuaj ica yejyectzi camanali.
\v 17 Sihuame quej nopa ya quincajtejtoque ininhuehuejhua catli
ininhuaya monamictijque quema ichpocame, huan quitlahuelcajtoque
itlanahuatilhua TOTECO.
\v 18 Sintla tiyas ipan nopa ojtli catli ajsis hasta ininchaj nopa
sihuame catli quej nopa quichihuaj, tijpantis miquilistli. Elis quen
tiquitzquis se ojtli catli yohui mictla.
\v 19 Pampa catli mocajcayahuaj ininhuaya sihuame quej nopa, ayacmo
mocualtilise. Ayacmo monejnemiltise sempa ipan ojtli xitlahuac campa
mopantía se cuali nemilistli.
\p
\v 20 Pero ta, tinotelpoca, ximonejnemilti ipan nopa ojtli campa
nemij cuajcuali masehualme. Quena, xijtoquili nopa ojtli catli ipan
nemij catli itztoque xitlahuaque.
\v 21 Pampa masehualme catli itztoque xitlahuaque itztose ica
temachili ipan nopa cuali tlali. Quena, nopona campa cuali tlali
mocahuase catli amo aqui hueli quintelhuis.
\v 22 Pero TOTECO quinquixtis masehualme catli amo quitlepanitaj
ipan nopa tlali. Quena, masehualme catli temajmatíaj TOTECO
quintzontlamiltis.
\c 3
\s Catli monequi quichihuase masehualme para quipiyase tlalnamiquilistli
\p
\v 1 Notelpoca, amo xiquelcahua catli nimitzmachtía nica. Xicajocui
notlanahuatil ipan moyolo.
\v 2 Pampa sintla tijchihuas catli nimitzilhuía, tiitztos para
miyac xihuitl huan tijpiyas tlasehuilistli huan paquilistli ipan
moyolo.
\v 3 Amo quema xijcahua xitetlasojtla huan xiquijto catli melahuac.
Ma quiitaca nochi masehualme ni cuali tlamantli catli tijchihua quen
quiitasquíaj se costli ipan moquechtla. Ma nesi tlanemijya para
ipan moyolo tijtoquilía tlanahuatili catli xitlahuac.
\v 4 Huan TOTECO huan masehualme quicualitase catli tijchihua.
Quena, mitztlepanitase huan camanaltise cuali tlen ta.
\p
\v 5 Ximotemachi ipan TOTECO ica nochi moyolo. Amo xijtoquili san
catli motlalnamiquilis mitzilhuía.
\v 6 Ximoilhui tlaque ipaquilis TOTECO ipan nochi tlamantli catli
tijchihuasquía, huan yaya mitzyacanas ipan se ojtli catli
xitlahuac.
\p
\v 7 Amo ximohueyimati pampa timoilhuía nelía titlalnamiqui. Más
cuali xiquimacasi huan xijtlepanita TOTECO huan ximoiyocatlali ica
nochi catli amo cuali.
\v 8 Quena, ni tlamantli elis quen cuali pajtli catli quichicahuas
campa timococohua, huan quimacas chicahualistli motlacayo huan
moomiyohua.
\p
\v 9 Xijnexti para tijtlepanita TOTECO pampa tijmaca TOTECO catli
iaxca tlen nochi tlamantli catli tijpiya. Xijmaca TOTECO nopa
achtihui pixquistli catli tijcuis ipan momila.
\v 10 Huan TOTECO mitztiochihuas huan quitemitis mocuacalhua ica
tlacualistli hasta tzontis huan ayacmo huelis quicuise más. Yaya
anmechmacas xocomeca atl catli yancuic hasta onmocahuas para
tiquijis.
\p
\v 11 Notelpoca, amo xicholo tlen TOTECO quema mitztlalnamictía,
niyon amo xicualani quema yaya mitztlacahualtía.
\v 12 Pampa aqui TOTECO quiicnelía, quitlalnamictía quen se tetata
quixitlahua icone catli tlahuel quiicnelía.
\p
\v 13 Hueyi paquilistli quipiya se tlacatl catli quipantía
tlalnamiquilistli huan mochihua tlalnamiqui.
\v 14 Pampa tlalnamiquilistli tepalehuía miyac. Más ipati que
plata huan oro catli nelía cuali.
\v 15 Tlalnamiquilistli más ipati que nopa piltetzitzi catli
tlahuel pajpatiyo. Niyon se tlamantli catli tijnequisquía amo hueli
quiaxilis para quen ipati tlalnamiquilistli.
\v 16 Masehualme catli quipiyaj tlalnamiquilistli huejcahuase para
itztose. Nojquiya quipantise tlatiochihualistli huan
tlatlepanitacayotl.
\v 17 Masehualme catli tlalnamiquij quitoquilíaj se ojtli catli
quipiya paquilistli. Quena, nopa ojtli mitzmacas tlasehuilistli ipan
moyolo.
\v 18 Tlalnamiquilistli eltoc quen se cuali cuahuitl catli temaca se
nemilistli catli nelía yejyectzi. Sintla timochihuas titlalnamiqui
huan amo tiquiyocacahuas motlalnamiquilis, tijpiyas miyac
paquilistli ipan monemilis.
\p
\v 19 Ica tlalnamiquilistli huan tlamachilistli, TOTECO
quichijchijqui ilhuicactli huan tlaltipactli.
\v 20 Pampa yaya nochi quimati, quichijqui para ma moxejxelo nopa
hueyi atl, huan quichijqui para tlen ilhuicac hualtemosquía atl
para tlaquiyahuiltis ipan tlaltipactli.
\p
\v 21 Huajca notelpoca, xijpiya cuali tlalnamiquilistli huan
xijtlacaquili ni tlalnamijca camanali, amo quema xiquinelcahua,
\v 22 pampa nochi ni tlalnamiquilistli huan tlamachiltili mitzmacas
se cuali nemilistli. Quena, quiyejyecchihuas monemilis quen se
costli quiyejyecchihuas se masehuali ipan iquechcuayo.
\v 23 Sintla tijpiyas tlalnamiquilistli huan ya nopa tijtoquilis,
mitzpalehuis para tinejnemis ica temachili, huan amo timotepotlamis
ipan moojhui.
\v 24 Quema timotecas para ticochis, amo timajmahuis. Timotecas huan
ticochis nelía cuali. Quena, ticochis ica temachili.
\v 25 Amo monequi tiquimacasis para ipan tlen hueli tlatoctzi hualas
catli fiero mopani quen quinajsi amo cuajcualme,
\v 26 pampa TOTECO mitzmacas temachili. Yaya amo aqui quicahuilis
para mitzmasiltis ipan se tlajtlacolotl.
\p
\v 27 Quema quinamiqui tijpalehuis se masehuali huan tihueli
tijchihuas, amo xiquilhui para amo.
\v 28 Amo xiquilhui seyoc: “Xihuala mostla huan nimitzmacas”,
sintla tijpixtoc momaco para tijmacasquía ama.
\p
\v 29 Amo ximonejnehuili catli amo cuali catli huelis tijchihuilis
seyoc catli motemachía ipan ta.
\v 30 Amo xijtelhui seyoc san molhui sintla yaya amo tleno
mitzchihuilijtoc.
\p
\v 31 Amo xiquixtoca inemilis se masehuali catli amo quitlepanita
TOTECO. Amo xijtoquilis niyon se iojhui.
\v 32 Pampa TOTECO quicualancaita nopa masehuali catli huijcoltic
iojhui, pero quinicnelía catli itztoque xitlahuaque iixpa.
\p
\v 33 Quena, TOTECO quintelchihua catli itztoque ipan ininchaj
masehualme catli amo quitlepanitaj, pero catli itztoque ipan
ininchaj masehualme catli itztoque xitlahuaque iixpa quintiochihua.
\p
\v 34 TOTECO quinpinahualtía catli tehuihuiitaj, pero hueyi iyolo
TOTECO ica masehualme catli moicnonequij.
\p
\v 35 Catli tlalnamiquij quiselise miyac tlatlepanitacayotl, pero
catli huihuitique TOTECO quinpinahualtis.
\c 4
\s Salomón teyolchicahua ma monejnemiltica xitlahuac
\p
\v 1 Amojuanti antelpocame, techtlacaquilica catli nimechmachtía
quen anquitlacaquilisquíaj amotata. Xijmachilica catli
nimechilhuía para nelía anmochihuase antlalnamiquini.
\v 2 Pampa nica nimechmaca se tlamachtili catli cuali. Huajca amo
quema xijcahuaca catli nimechilhuía.
\v 3 Na nojquiya nielqui se conetl huan nijpixqui notata. Tlahuel
nechicneliyaya nonana pampa nieliyaya niiyojtzi cone.
\p
\v 4 Huan notata nechmachti huan nechilhui: “Amo quema xiquelcahuas
ni tlamachtili, xijchihua catli nimitznahuatía ica nochi moyolo
huan tiitztos ica cuali.
\v 5 Xijtemo tlalnamiquilistli huan tlamachilistli catli TOTECO
temaca. Amo xiquelcahua nocamanal, niyon amo quema ximoiyocaquixti
tlen catli niquijtohua.
\v 6 Amo xijcahua itlalnamiquilis. Xiquicneli nopa tlalnamiquilistli
catli yaya temaca, huan mitzmocuitlahuis huan mitzmanahuis ica nochi
catli amo cuali.
\v 7 Catli más ipati ipan monemilis elis para tijtemos
tlalnamiquilistli huan tlamachiltilistli ica nochi tlamantli catli
tijchihuas.
\v 8 Xiquita quenicatza tlahuel hueyi ipati tlalnamiquilistli.
Quena, xijhueyitlali tlalnamiquilistli huan quema tijpiyas,
masehualme mitzhueyitlalise huan mitztlepanitase.
\v 9 Huan tijselis miyac xochi coronas ipan motzonteco. Quena,
tijselis coronas catli yejyectzi quema masehualme mitznextilise
tlatlepanitacayotl pampa tijpiya tlalnamiquilistli.”
\p
\v 10 Notelpoca, techtlacaquili huan xijchihua catli nimitzilhuía.
Sintla quej nopa tijchihuas, tiitztos miyac xihuitl ipan monemilis.
\v 11 Naya nimitznejnemiltijtoc ipan ojtli catli xitlahuac huan
campa onca tlalnamiquilistli.
\v 12 Huan sintla timonejnemiltis ica tlalnamiquilistli, amo tleno
quitzacuilis moojhui. Huan sintla timotlalos, amo timotepotlamis.
\v 13 Xijchijtinemi catli nimitzmachtía huan amo xijcahua.
Mojmostla xijhuica ipan moyolo catli nimitzilhuijtoc huan tijpiyas
se nemilistli nelyejyectzi.
\p
\v 14 Amo xicalaqui ipan iniojhui masehualme catli amo quitlepanitaj
TOTECO, niyon amo xijchihua catli quichihuaj.
\v 15 Xijtlalcahui campa inijuanti itztoque. Amo xipano nopona.
Xicholo tlen campa inijuanti yohuij huan xiya ipan seyoc ojtli.
\v 16 Pampa inijuanti amo cochij sintla amo quichijtoque catli amo
cuali. Amo quinequij mosiyajquetzase sintla amo quichijtoque seyoc
para ma huetzi ipan tlajtlacoli.
\v 17 Quena, fiero tlacame quitemohuaj se para quimictise o para
quitlachtequilise, quen sequinoc quitemohuaj tlacualistli huan catli
quiijise.
\p
\v 18 Pero iniojhui masehualme catli itztoque xitlahuaque eltoc
yejyectzi quen quema tlanestihuala ica ijnaloc. Huan ininnemilis
mochihuas más yejyectzi mojmostla hasta nesis quen tonati catli
tlahuía ica nochi itlatlanex quema tlajcotona.
\v 19 Pero iniojhui masehualme catli amo quitlepanitaj TOTECO eltoc
quen tzintlayohuilotl, niyon amo quimatij ipan tlaque
motepotlamíaj.
\p
\v 20 Pero ta tinotelpoca, xijchihuili cuenta nocamanal.
Xijtlacaquili nochi catli nimitzilhuía.
\v 21 Amo xiquelcahua catli niquijtojtoc. Xicajocui catli
nimitzilhuía ipan moyolo para nimantzi tijtoquilis.
\v 22 Pampa catli nimitzilhuía para tijchihuas mitzmacas se
nemilistli yejyectzi. Elis quen se cuali pajtli catli quimacas
chicahualistli nochi motlacayo.
\p
\v 23 Catli más ipati para tijchihuas elis para tijmocuitlahuis
moyoltzi huan catli tiquicnelía, pampa catli tiquicnelía quiijtos
catli tijchihuas ipan monemilis.
\p
\v 24 Amo quema xicamanalti ica camanali catli fiero, niyon amo
xiquijto camanali catli tlacajcayahua.
\p
\v 25 Nochipa xijtlachili para tijchihuas san catli xitlahuac.
Quena, ximotlachili tlaque eltoc para campa tiya.
\v 26 Xijtlapejpeni se cuali ojtli para ipan tinemis. Quena,
xijtoquili se ojtli xitlahuac huan nochi eltos cuali para ta.
\v 27 Amo ximoiyocatlali tlen nopa ojtli catli xitlahuac, niyon para
monejmatco, niyon ica moopochco.
\c 5
\s Se tlacatl monenpolos ica se sihuatl catli amo inamic
\p
\v 1 Notelpoca, xijchihuili cuenta nopa tlalnamiquilistli catli
nijpiya. Quena, ximonacasquetza para tijmachilis nocamanal pampa
nijmati catli niquijtohua.
\v 2 Huan quej nopa timochihuas titlalnamiqui. Huan ticajoctiyas
más tlamantli catli tijmatis.
\p
\v 3 Icamanal se ahuilnenca sihuatl eltoc tzopelic quen nectli. Huan
catli quiijtohua nelía yejyectzi, pampa tlahuel quimati quenicatza
tlacajcayahuas.
\v 4 Pero teipa aqui yohui ihuaya quipantis catli chichic quen se
tlamantli pajyo catli temictía. Quimachilis tlacuajcualoli quen
quiajsisquía ipan iyolo se machete catli oncac tlatequi.
\v 5 Nopa ahuilnenca sihuatl quihuicas se tlacatl campa onca
miquilistli. Quena, quiyacanas hasta quiaxititi mictla.
\v 6 Huijcoltic iojhui nopa sihuatl, pero niyon amo quimati sintla
fiero campa yohui. Yaya amo quichihuilía cuenta nopa ojtli
xitlahuac catli yohui campa onca se cuali nemilistli.
\p
\v 7 Huajca amojuanti antelpocame, techtlacaquilica catli
nimechilhuía, huan amo quema xiquelcahuaca nocamanal.
\v 8 Xijtlalcahuica se ahuilnenca sihuatl, niyon amo ximonechcahuica
campa ichaj.
\v 9 Pampa notelpoca, sintla tijpaxalos, ayacmo aqui mitztlepanitas.
Huan catli tijtlantoc ica miyac xihuitl tequitl, tiquinmacas
ininmaco masehualme catli amo quitlepanitaj TOTECO huan catli amo
tiquiniximati.
\v 10 Amo xiquincahuili seyoc altepetl ehuani ma moricojchihuaca ica
catli timotlanilijtoc. Ma amo moaxcatise catli tijpanti ica miyac
tlaijiyohuili huan tlaohuijcayotl.
\v 11 Teipa san timochoquilis por nochi catli fiero tijchijtoc
ihuaya nopa sihuatl. Huan titlaijiyohuis quema nopa cocolistli catli
tijpanti ihuaya ica yolic mitztzontlamiltijtiyas.
\v 12 Huan huajca tiquijtos: “Más cuali nijchihuilijtosquía
cuenta nopa consejo catli nijcajqui. ¿Para tlen amo nijtlacaquili
quema nechtlacahualtiyaya? ¿Para tlen nijchijqui san catli
nechpacti?
\v 13 ¡Ay! ¿Para tlen amo nijnejqui niquintlacaquilis catli
nechconsejomacayayaj? ¿Para tlen amo niquinchihuili cuenta quema
nechmachtiyayaj catli cuali?
\v 14 Ama por notlajtlacol niitztoc nechca se tlaixtemolis catli
nechtzontlamiltis. Nihuetztoc ipan se hueyi pinahualistli iniixpa
nochi masehualme.”
\p
\v 15 Huajca notelpoca, quema tiamiqui, ximoaixhuiti ica atl catli
meya ipan tlen ta moamel. Amo xijnechcahui se sihuatl catli amo
mosihua, pampa ica mosihua tijpantis paquilistli quen se atl catli
más ajhuiyac.
\v 16 ¿Para tlen tiquinconemacas sihuame catli san nentinemij ipan
calles? ¿Para tlen catli eltoc moxinach mopantis ipan tianquis?
\v 17 Catli eli mocone ma elica san para ta. Amo xiquinmaca catli
tijpiya sihuame catli amo tiquiniximati.
\p
\v 18 Ma TOTECO quitiochihua nopa chicahualistli catli mitzmacatoc
pampa titlacatl. Huan ximopaquilismaca miyac ica nopa sihuatl catli
timocuili quema tieliyaya titelpocatl.
\v 19 Ximoilhui tlen mosihua quen se sihuatzi masatl catli nelía
yejyectzi nejnemi. San xiyolpaqui ica ya catli mitzicnelía miyac.
Tlahuel xipaqui quema yaya mitznajnahua ipan tlen hueli tlatoctzi.
Nochipa ximoixhuiti ica ya itlaicnelilis.
\v 20 Huajca notelpoca, ¿para tlen tinejnemisquía quen se
popoyotzi ica se ahuilnenca sihuatl?
\p Amo quinamiqui tijnajnahuas o tiquitzquis ichichihual se sihuatl
catli amo monamic.
\p
\v 21 Pampa TOTECO mitztlachilía huan quiita sesen tlamantli catli
tijchihua. Quitlachilía campa tiya huan sesen pilojtzitzi catli
ipan tinemi.
\v 22 Masehualme catli amo quitlepanitaj TOTECO momasiltise ipan
inintlajtlacolhua. Quena, inintlaixpanolhua quinitzquis huan
quinilpis quen elisquía se mecatl.
\v 23 Nopa masehualme miquise pampa amo quinejque quiselise icamanal
catli quintlacahualtiyaya. Pampa tlahuel quinequij
tlajtlacolchihuase, ininhuihuiyo quichihuas para ma mocuapoloca para
nochipa.
\c 6
\s Amo xijpalehui seyoc para motlanehuis tomi
\p
\v 1 Ta tinotelpoca, sintla tijtlalijtoc mofirma para tijpalehuis
mohuampox para quitlanejtise se tlenijqui, o sintla titemacatoc
mocamanal para tijtlaxtlahuis catli quitlanejtía sintla amo hueli
ya tlacuepas, ya timocalaquijtoc ipan se hueyi tequipacholi.
\v 2 Ica moseltzi timoilpitoc ica mocamanal. Quena, ica catli
tiquijto timomasiltijtoc ipan se tlatzactli.
\v 3 Huajca notelpoca, nimantzi xijchihua catli nimitzilhuía para
timomanahuis. Ya tiitztoc imaco mohuampox. Huajca xiquitati huan
ximoechcapantlali iixpa huan xijtlajtlani mohuampox chicahuac para
ma quiixpolo motoca campa nesi titlatzquitoc ihuaya.
\v 4 Amo xicochi, niyon amo ximosiyajquetza. Amo xijcahua para seyoc
tonali. Xijsencahuas ni tlamantli nimantzi.
\v 5 Xijchihua nochi catli tihueli para timomanahuis quen quichihua
se masatl catli motlalohua para mochololtía quema quiita se
tlapejquetl, o se tototl catli quimasiltijtoya ipan tlaquetztli huan
teipa momanahuía.
\p
\v 6 Ta catli titlatzihui, xiquintlachili nopa tzitzime quen
tequitij. Ximomachti catli quichihuaj para timotlalnamictis.
\v 7 Masque inijuanti amo quipiyaj se tlanahuatijquetl, niyon se
tlayacanquetl catli quinnahuatía tlaque monequi quichihuase,
\v 8 inijuanti tequitij chicahuac quema tlatotoniya, huan
quisentilíaj inintlacualis para quipiyase catli quicuase quema
tlaseseyas.
\v 9 Pero ta catli titlatzihui, san tijnequi ticochis. ¿Hasta quema
timehuas? Xijmachilis ya ni.
\v 10 Sintla tiquijtos: “Noja se quentzi más niixcochhuetzis, huan
san se tlatoctzi más nimomanajnahuas para nimosiyajquetzas”,
\v 11 ica se tlatoctzi ajsis mopani se hueyi mayantli quen nimantzi
huala se tlachtejquetl quema amo tijchiya. Huan nimantzi timochihuas
se catli teicneltzi pampa amo titequitqui.
\s Inintequijya amo cuajcualme
\p
\v 12 Amo cuajcualme huan catli amo quitlepanitaj TOTECO
istlacatitinemij.
\v 13 Quinijcopilíaj ininhuampoyohua para mocamanalhuise.
Monextilíaj ica iniicxihua campa yohuij. Momanextilíaj se ica
seyoc catli quinequij quichihuase.
\v 14 Temitoc ininyolo amo cuajcualme ica tlajtlacoli huan mojmostla
moilhuijtinemij catli fiero hueli quichihuase. Quinxejxelohuaj
masehualme huan quinchihuaj para ma mocualanica.
\v 15 Yeca ipan se tlatoctzi quema nopa amo cuajcualme amo
quichiyaj, quipantise catli fiero. Quinomiyopojpostequis hasta
ayacmo oncas pajtli. Quena, quintzontlamiltis.
\s Tlamantli catli TOTECO amo quinequi quiitas
\p
\v 16 Onca chicuase tlamantli huan hasta chicome catli TOTECO amo
quinequi quiitas. Catli más quicualancamaca eltoc ya ni:
\q
\v 17 se catli mohueyimati;
\q se catli teistlacahuía;
\q se catli quimictía seyoc catli amo tleno quichihuilijtoc;
\q
\v 18 se catli moilhuijtinemi catli fiero hueli quichihuas;
\q se catli nimantzi yohui para quichihuas catli amo cuali pampa
tlahuel quipactía;
\q
\v 19 se catli moquetza quen se testigo huan quiistlacahuía catli
amo tleno quichijtoc;
\q se catli quipehualtía cualantli ica icnime. Nochi ya ni TOTECO
amo quinequi quiitas.
\s Catli quipantis se tlacatl catli momecatía
\p
\v 20 Notelpoca, xijtlepanita catli motata huan monana
mitzilhuijtoque. Amo xijcahua catli mitzmachtijtoque.
\v 21 Ipan moyolo nochipa xijpixto inincamanal. Ximoilhuijtinemi
catli quiijtojtoque quen timoilpilisquía inintlamachtil ipan
moquechtla.
\v 22 Pampa inintlamachtil mitzyacanas campa hueli tiyas huan sintla
tijtoquilis catli mitzilhuijtoque, ticochis cuali huan ica
temachili. Ica ijnaloc quema tiisas tijcaquis inincamanal catli
mitzconsejomacas.
\v 23 Pampa inincamanal motatahua eltos quen se tlahuili catli
quitlahuilis moojhui. Quema se acajya mitztlacahualtía o
mitztlalnamictía, yaya mitznextilía se ojtli campa onca se cuali
nemilistli.
\p
\v 24 Quena, sintla tijneltoquilía inintlamachtil motatahua,
mitzmanahuis tlen ahuilnenca sihuame. Catli mitzilhuijtoque
mitzpalehuis para amo tiquinchihuilis cuenta fiero sihuame catli
tlahuel quimatij camanaltise yejyectzi.
\v 25 Amo xiquixtoca iyejyejca se sihuatl quej nopa, niyon amo
xijcahuili ma mitztlani quema mitzijcopilía ica iixteyol catli
yejyectzitzi.
\v 26 Pampa se ahuilnenca sihuatl quichihuas para se tlacatl ma
quinenpolo itomi hasta ayacmo quipiyas niyon para se pantzi. Quena,
se momecatijca sihuatl huelis quicuilis inemilis se tlacatl.
\v 27 ¿Huelis se tlacatl moquechilis se tlicuahuitl iyolixpa huan
amo motlatis? ¡Amo! Temachtli motlatis.
\v 28 Sintla se tlacatl nejnemis ipan tlicoli, temachtli icxi
apopolocas.
\v 29 Quej nopa ipantis se tlacatl catli momecatía ihuaya se
sihuatl catli quipiya ihuehue. Quiselise san se tlatzacuiltilistli
quen nochi tlacame catli quiitzquíaj isihua seyoc tlacatl.
\p
\v 30 Se tlachtejquetl hueli motechtía sintla tlachtejqui para amo
miquisquía ica mayantli,
\v 31 pero quema tequitini quiitzquise, monequi tlaxtlahuas chicome
huelta imiyaca catli quiichtectoc, masque monequisquía quinemacas
nochi catli eltoc ipan icalijtic para tlaxtlahuas.
\p
\v 32 Pero onpano huihuitic se masehuali catli momecatía. Amo
quipiya tlalnamiquilistli, pampa ica iseltzi quinenpolos inemilis.
\v 33 Nopa tlacatl tlahuel tlaijiyohuis huan masehualme ayacmo
quitlepanitase. Huan amo quema huelis quiixpolos nopa pinahualistli.
\v 34 Pampa temachtli ihuehue quitlasomatis nopa sihuatl huan
tlahuel cualanis. Amo quitlapojpolhuis nopa tlacatl quema ajsis
tonali para quicuepilis catli yaya quichihuilijtoc.
\v 35 Ihuehue amo quiselis se tlaxtlahuili para moseseltis. Amo
quitlapojpolhuisquía masque quimacasquía miyac tlamantli catli
ipati.
\c 7
\s Xiquintlahuelcahua momecatijca sihuame
\p
\v 1 Notelpoca, xijneltoca noconsejos huan xicajocui nocamanal ipan
moyolo.
\v 2 Sintla tijchihuas catli nimitznahuatía, cuali tiitztos.
Xijtlacaquili nopa tlanahuatili catli nimitzmachtía pampa onpano
ipati.
\v 3 Amo quema xiquelcahua catli nimitzilhuía. Xijtlatzquilti ipan
moyolo para mocahuas mohuaya.
\p
\v 4 Xiquinicneli tlalnamiquilistli huan tlamachiltilistli quen
tiquicnelía mosihua icni. Xiquinchihua quen elisquíaj
mocualhuampoyohua.
\v 5 Inijuanti mitzmanahuise para amo tijpaxaloti se momecatijca
sihuatl. Sintla tijpiya tlalnamiquilistli huan titlamachilía,
mitzpalehuis para amo tijtlacaquilis quema se sihuatl
mitzcamanalhuis ica yejyectzi camanali para mitzcajcayahuas.
\p
\v 6 Se tonal na niontlachixtoya ipan noventana,
\v 7 huan ipan miyac telpocame niquitac se telpocatl catli
huihuitzi.
\v 8 Yaya nejnemiyaya ipan nopa calle nechca se esquina campa itztoc
se ahuilnenca sihuatl, huan quiitzqui nopa ojtli catli yohui ichaj.
\v 9 Huetztoya tonati huan ya pejtoya tlaixtlatlayohuiya.
\v 10 Nimantzi quisqui nopa sihuatl para quinamiquiqui. Cuali
mochijchijtoya para quincajcayahuas tlacame pampa tlahuel quimati
quenicatza quichihuas.
\v 11 Eliyaya se sihuatl catli camanalti chicahuac huan niyon
quentzi amo pinajqui. Amo quema quinequi itztos ichaj.
\v 12 Quemantic mopantía callejtipa huan quemantic ipan tianquis.
Tlachixtinemi para quinpantis tlacame catli huelis quincajcayahuas.
\p
\v 13 Quinechcahui nopa telpocatl huan quinajnahuajqui huan
quitzoponi. Tlahuel moneltlali chicahuac. Niyon se quentzi amo
pinajqui para quiilhuis:
\v 14 “Ya nitemacac notlacajcahualis para tlasehuilistli huan
nijtlamichijtoc nochi catli nitlajtolcajqui nijchihuasquía, huan
nijhualica nopa nacatl para se cuali tlacualistli.
\v 15 Yeca nimitztemohuayaya pampa san ta nijnequiyaya nimitzitas,
huan ama nimitzpantijtoc.
\v 16 Notlapech nijyejyecchijtoc ica ipantzajca catli yejyectzi.
Nijcualtlalijtoc notlapech ica yoyomitl catli más cuali catli huala
ipan tlali Egipto.
\v 17 Huan nicajhuiyalijtoc campa timotecase ica tlaajhuiyacayotl
tlen mirra, áloe huan canela.
\v 18 Xihuala, ma timopaquilismacaca hasta tlanesis. Ma tijchihuaca
tlen hueli para timonextilise para nelía timonequij.
\v 19 Pampa nohuehue amo mopantía nica, yajtoc paxaloti huejca.
\v 20 Quihuicatoc miyac tomi, huan quiijtojtejqui huejcahuas nepa.
Amo mocuepas hasta chicahuiyas metztli.”
\p
\v 21 Quej nopa, nopa sihuatl quiyolyamanili nopa telpocatl ica
icamanal catli yejyectzi. Quiyoltilanqui san ica iistlacaticayo.
\v 22 Huan nima nopa telpocatl quitoquilijtiyajqui quen se huacax
quema quihuicaj para quimictitij, huan quen se catli huihuitic catli
amo quimati yohui ipan tlatzactli campa quiselis itlatzacuiltilis.
\v 23 Nopa telpocatl eltoc quen nopa tototl catli patlanti xitlahuac
para campa eltoc tlaquetztli. Niyon amo quimati sintla miquis hasta
quimajcahuilise se cuatlamintli catli ajsis iyolixco.
\p
\v 24 Huajca amojuanti catli antelpocame techtlacaquilica.
Xijchihuaca catli nimechilhuía.
\v 25 Amo quema xijcahuili motlanequilis ma mitzcuapolo para
tijtoquilis se ahuilnenca sihuatl. Amo ximonechcahui nopa ojtli
catli yohui ichaj para amo tihuetzis ipan tlajtlacoli.
\v 26 Pampa sihuame catli quej nopa quichihuaj quincajcayajtoque
miyac telpocame. Quena, miyac tlacame quintzontlamiltijtoque.
\v 27 Sintla timonejnemiltía ipan nopa ojtli para tiyas ichaj,
huajca tiquitzquitoc ipan nopa ojtli catli yohui campa miquilistli.
\c 8
\s Catli quipiya tlalnamiquilistli quipantis catli cuali
\p
\v 1 ¡Xijtlacaquilica! Eltoc quen se catli quipiya
tlalnamiquilistli huan tlamachiltilistli mitznojnotza chicahuac para
tijchihuilisquía cuenta icamanal huan timochihuas titlalnamiqui.
\v 2 Quema tiitztoc ipan se tepetl campa tlahuejcapantic, o tiitztoc
campa momaxalohua ojtli, ipan moyolo ¿amo tijcaqui catli quinequi
mitztlalnamictis?
\v 3 Xijtlacaquili ipan moyolo quema timoquetza ipuertajteno nopa
altepetl pampa se catli tlalnamiqui mitznojnotza huan quiijtohua:
\v 4 “Nochi amojuanti anmasehualme, techtlacaquilica catli
nimechilhuía.
\v 5 Amojuanti catli amo anquimatij quenicatza anmonejnemiltise huan
anhuihuitique, ximomachtica quenicatza anquipiyase se cuali
tlalnamiquilistli.
\v 6 Xijtlacaquilica cuali catli nimechilhuis pampa nocamanal nelía
miyac ipati. Nochi notlamachtil elis xitlahuac.
\v 7 Na niquijtohua catli melahuac. Amo quema niistlacatisquía huan
amo quema nitlacajcayahuasquía.
\v 8 Quena, nelía cuali nocamanal huan tepalehuía miyac. Niyon se
tlamantli catli niquijtos elis amo cuali o necuiltic.
\v 9 Nochi catli niquijtohua nesi nelía xitlahuac para masehualme
catli quimachilíaj tlamantli. Quena, catli tlalnamiquij quimatij
nocamanal, huan quinpalehuía para quimatise más.
\p
\v 10 “Huajca xijselica catli nimechmachtía huan catli na nijmati,
pampa achi más ipati que plata huan oro catli senquistoc cuali.
\v 11 Más cuali tijpiyas tlalnamiquili huan amo nopa piltetzitzi
catli más patiyo. Niyon se tlamantli catli tijnequisquía, amo eli
san se.
\p
\v 12 “Catli quipiya tlalnamiquilistli nojquiya quimati cuali para
quinnextilis sequinoc para quichihuase catli xitlahuac ipan
ininnemilis. Tlalnamiquilistli mitzpalehuis para tijpiyas cuajcuali
tlaiximatilistli huan tlamachiltilistli.
\v 13 Se catli quiimacasi huan quitlepanita TOTECO, quiijiyas nochi
catli amo cuali. Amo quinequis quinitas masehualme catli
mohueyimatij huan catli mohueyitlepanitaj. Amo quinnechcahuis catli
fiero ininnemilis huan catli istlacatij.
\v 14 Se catli quipiya tlalnamiquilistli hueli temaca cuali
consejos. Yaya quimati para tetlajtolsencahuas xitlahuac.
Quimachilía miyac tlamantli huan quipiya miyac chicahualistli.
\v 15 Tlanahuatiani mochihuaj tlalnamiquini para tlanahuatise pampa
quipiyaj tlalnamiquilistli huan quitlacaquilíaj consejos. Catli
quipiyaj tequiticayotl hueli quichihuaj tlanahuatilme catli
xitlahuac pampa quipiyaj tlalnamiquilistli.
\v 16 Nochi tequitini hueli tlayacanaj huan tetlajtolsencahuaj
xitlahuac pampa quipiyaj tlalnamiquilistli.
\p
\v 17 “Masehualme catli quiicnelíaj tlalnamiquilistli huan
quitemohuaj, quipantise huan mochihuase tlalnamiquini. Huan catli
nelnelía quitemohuaj tlalnamiquilistli, quipantise.
\v 18 Masehualme catli mochihuaj tlalnamiquij nojquiya quipantise
ricojyotl huan tlatlepanitacayotl. Quena, quipantise se ricojyotl
catli huejcahuas huan mochihuase masehualme catli nelxitlahuaque.
\v 19 Masehualme catli mochihuaj tlalnamiquij temacase tlamantli
catli más cuali que oro huan plata catli onpano cuali.
\v 20 Pampa tlalnamiquilistli quichihua para se masehuali ma
monejnemilti ipan se ojtli catli xitlahuac huan nelcuali.
\v 21 Masehualme catli quiicnelíaj tlalnamiquilistli, quipiyase
catli quicahuase para ininconehua. Quena, pampa tlalnamiquij,
quitemitise ininchajchaj ica tlamantli catli nelía ipajpati.
\p
\v 22 “TOTECO quipixtoya tlalnamiquilistli ipan ipejya nochi catli
onca. Quema ayamo tleno quichihuayaya.
\v 23 Quena, TOTECO ya ipa quipixtoya tlalnamiquilistli huejcajya
quema ayamo oncayaya tlaltipactli.
\v 24 Ya quipixqui tlalnamiquilistli quema ayamo eltoya hueyi atl
ipan tlaltipactli, niyon ayamo oncayaya amelme ica nochi inia.
\v 25 TOTECO ya ipa quipixqui tlalnamiquilistli quema ayamo
quinchihuayaya tepeme huan nochi tlachiquilme.
\v 26 Quena, quipixqui tlalnamiquilistli quema ayamo quichihuayaya
tlaltipactli, mili o niyon se quentzi nopa tlaltejpoctli catli ama
onca.
\p
\v 27 “TOTECO ya ipa quipixtoya tlalnamiquilistli quema
quichijchijqui nochi catli onca ipan ilhuicactli, huan quema
quichijchijqui nopa huejhueyi ostotl para campa ma mocahua huejhueyi
atl.
\v 28 Yaya ipa quipixtoya tlalnamiquilistli quema quitlali mixtli ma
mocahua ipan ilhuicactli, huan quiilhui nochi huejhueyi hueyame
hasta canque hueli ajsisquíaj.
\v 29 TOTECO ya ipa quipixtoya tlalnamiquilistli quema quimacac nopa
huejhueyi atl ininnepa huan quimacac tlanahuatili para amo hueli
quipanose. Yaya ya quipixtoya tlalnamiquilistli quema quitlalili
itzinpepechol ni tlaltipactli.
\v 30 Huan TOTECO quitequihui itlalnamiquilis ipan nochi itequi,
huan nochi catli quichijqui quinextía para tlahuel miyac
tlalnamiquilistli quipiya. TOTECO amo quema moiyocacahua tlen nopa
hueyi tlalnamiquilistli catli quipiya.
\v 31 TOTECO nelía paqui para quitequihuía itlalnamiquilis, huan
teipa paqui ica nochi catli quichijchijqui. Quena, pampa quichijqui
nochi ica ihueyi tlalnamiquilis, ama paqui ica ni tlaltipactli huan
nochi masehualme catli quinsencajqui.
\p
\v 32 “Huajca antelpocame, xijtlacaquilica quema se catli quipiya
tlalnamiquilistli anmechcamanalhuía. Quej nopa anquipantise miyac
paquilistli huan tlatiochihualistli.
\v 33 Xijtlacaquilica cuali quema se catli tlalnamiqui anmechmacas
consejos ica quenicatza anmotlalnamictise. Amo xijhuejcamajcahuaca.
\p
\v 34 “Hueyi paquilistli quipantis nopa tlacatl catli
quitlacaquilis se catli quipiya tlalnamiquilistli huan mojmostla
quinequis más, masque nopa tlacatl monequi quichiyas campa ichaj
yaya catli tlalnamiqui para ma quitlalnamictis achi más.
\v 35 Pampa aqui quipantía tlalnamiquilistli, quipiyas se
nemilistli catli nelía cuali, huan TOTECO quitlachilis ica miyac
paquili.
\v 36 Pero catli quimati catli tlalnamiqui para quichihuas huan
quitlahuelcahuas, mococos ica ya iseltzi. Catli amo quinequij
mochihuase tlalnamiquini quitemohuaj miquilistli.”
\c 9
\s Amo san se tlalnamiquilistli huan huihuiyotl
\p
\v 1 Yaya catli nelía quipiya tlalnamiquilistli quichijqui se
yejyectzi cali ica chicome tlaquetzalme iixpa.
\v 2 Quicualtlalijtoc se hueyi tlacualistli, huan quichijchijtoc se
tlaili catli más cuali. Ya quisencajtoc nopa cuamesa ica miyac
tlamantli tlacuali.
\v 3 Quintitlanqui itequipanojcahua para ma yaca huan ma quinnotzaca
nochi masehualme para ma hualaca huan ma mochihuase tlalnamiquini.
Eltoc quen yaya catli quipiya tlalnamiquilistli moquetza campa más
tlahuejcapanco nechca nopa altepetl pampa tlahuel quinequi
tetlalnamictis. Huan catli quipiya tlalnamiquilistli quiijtohua:
\v 4 “Xihualaca nochaj amojuanti catli anhuihuitzitzi huan catli
amo anquimachilíaj catli cuali para anquichihuase.
\v 5 Xihualaca, xijcuaqui notlacualis huan xiquijica tlailistli
catli cuali catli nijsencajtoc.
\v 6 Xijcajtehuaca nochi huihuiyotl, huan nimechnextilis quenicatza
huelis anquipiyase se nemilistli catli yejyectzi. Xinejnemi ipan
nopa ojtli catli nimechnextilis huan ximotlalnamictica.”
\p
\v 7 Sintla tijchihua campica para tijtlalnamictis se tlacatl catli
quinhuihuiita sequinoc o se catli fiero inemilis, yaya san
mitzpinahualtis huan chicahuac mitznajnanquilis.
\v 8 Huajca amo xijtlacahualti se catli tehuihuiita pampa san
mitzcualancaitas. Pero sintla tijxitlahuas se masehuali catli
tlalnamiqui, yaya más mitzicnelis.
\v 9 Xijmachti se masehuali catli tlalnamiqui, huan achi más
mochihuas tlalnamiqui. Huan sintla tijmachtis se catli xitlahuac
monejnemiltía, achi más quimatis catli cuali para quichihuas.
\p
\v 10 Pampa tlalnamiquilistli pehua quema se acajya quiimacasi huan
quitlepanita TOTECO. Huan sintla se acajya quiiximatis TOTECO catli
tlatzejtzeloltic, quichihuas para quimachilis miyac tlamantli.
\p
\v 11 Huan tlalnamiquilistli mitzchihuilis para tiitztos miyac
tonali. Quena, mitzmiyaquilis nopa xihuitl ipan monemilis.
\v 12 Sintla timochihuas titlalnamiqui, tipanos nelcuali. Pero
sintla tijhuihuiitas tlalnamiquilistli, huajca ica moseltzi
timochihuilis catli fiero.
\p
\v 13 Se sihuatl catli huihuitic teyolpasolohua pampa amo tleno
catli cuali quimati. Chicahuac camanalti huan seseme huihuitzi.
\v 14 Yaya mosehuía ipan cuasiya ipuertajteno campa achi más
tlahuejcapanco ipan nopa altepetl.
\v 15 Huan quinnotza tlacame catli panoj, masque amo quitemohuaj.
Inijuanti san quitoquilijtiyohuij se ojtli catli xitlahuac.
\v 16 Pero nopa sihuatl amo quincahua ma panoca, quinnotza huan
quinilhuía: “Xihualaca nochaj.” Huan nopa telpocame catli amo
tleno quimachilíaj quitlacaquilíaj icamanal quema quinilhuía:
\v 17 “Xihuala nohuaya huan nimitzmacas catli nelía cuali.”
Quena, catli itztoc ihuaya se sihuatl quej nopa quipiya paquilistli
se tlatoctzi quen se atl catli tlaichtectli eltoc catli más
tzopelic, o se tlacualistli catli se quiichtequis huan quicuas
ichtacatzi ihuaya seyoc eltoc catli más ajhuiyac,
\v 18 pero catli yohuij campa ichaj nopa sihuatl amo quimatij sintla
nopa tlacame catli achtihuiya quipaxalojque, ama itztoque mictla.
\c 10
\s Nopa achtihui amatlajcuiloli tlen tlalnamijca camanali tlen
Salomón
\p
\v 1 Ya ni nopa tlalnamijca camanali catli Salomón quiijcuilo. Se
telpocatl catli tlalnamiqui quipaquilismaca itata huan inana, pero
se catli quej hueli nemi, quinmaca miyac tequipacholi.
\p
\v 2 Tlamantli catli tlaichtectli amo temaca paquilistli, niyon amo
huejcahua. Pero nochi masehualme catli nemij xitlahuac iixpa Toteco
momanahuise tlen se miquilistli catli fiero.
\p
\v 3 TOTECO amo quicahuas para se masehuali catli nemi xitlahuac ma
mayancamiqui, niyon amo quicahuilis se masehuali catli amo
quitlepanita TOTECO ma ixhuis. Nochipa quinequis más.
\p
\v 4 Se catli tlatzihui nimantzi mochihuas se catli teicneltzi, pero
se catli tequiti chicahuac, moricojchihuas.
\p
\v 5 Tlalnamiqui nopa tlacatl catli quisentilía itlacualis ipan
nopa tonalme quema noja tlatotoniya. Pero catli cochi ipan nopa hora
para pixcas, mopinahuas quema amo quiaxilis itlacualis.
\p
\v 6 TOTECO quimacas miyac tlatiochihualistli se tlacatl catli nemi
xitlahuac iixpa, pero amo cuajcualme quipantíaj miyac tlamantli
tlahuilancayotl por catli fiero quichihuaj.
\p
\v 7 Quema miquis se tlacatl catli xitlahuac, nochi quielnamiquij
ica cuali. Pero quema miquise amo cuajcualme, catli quinelnamiquij
quinitaj quen se tlamantli catli pojyajtoc.
\p
\v 8 Se catli tlalnamiqui quiselía tlanahuatili ica paquilistli,
pero se catli huihuitic camanalti miyac huan nima onhuetzi ica
ixayac ipan tequipacholi.
\p
\v 9 Se catli monejnemiltía xitlahuac quipiya temachili ipan
inemilis. Pero se catli nemi ipan ojtli catli huijcoltic
motepotlamis huan tlahuel mococos.
\p
\v 10 Masehualme catli amo tleno quichihuaj quema se tlacatl
quiixpano ne seyoc, tlahuel temacaj tequipacholi. Pero catli
quinajhuaj chicahuac catli fiero quichihuaj quiseseltíaj cualantli.
\p
\v 11 Quema camanalti se tlacatl catli itztoc xitlahuac eltoc quen
se ameli catli temaca se nemilistli catli cuali. Pero ipan inincamac
amo cuajcualme quisa catli quipehualtía cualantli.
\p
\v 12 Se catli quincualancaita sequinoc quipehualtía cualantli.
Pero catli teicnelía quintlapojpolhuía catli quiixpanoj.
\p
\v 13 Quema se masehuali catli tlalnamiqui camanalti, nochi catli
quicaquij momacaj cuenta para quimachilía miyac tlamantli. Pero
quema se catli huihuitic camanalti, nochi momacaj cuenta para
monequi aqui quihuitequis ica se cuahuitl.
\p
\v 14 Masehualme catli tlalnamiquini nochipa quinequij quimatise
más tlamantli. Pero se catli huihuitic camanalti quej hueli huan
san motlanilía tequipacholi.
\p
\v 15 Se catli tominpiya huelis momanahuis ica itomi para itztos ica
temachili. Pero se catli teicneltzi motequipachohua pampa amo tleno
quipiya para ica mopalehuisquía.
\p
\v 16 Nochi catli quitlani se masehuali catli itztoc xitlahuac
quipalehuía para quipiyas catli cuali ipan inemilis. Pero amo
cuajcualme san quinenpolohuaj inintomi ipan tlajtlacoli.
\p
\v 17 Se masehuali catli quitlacaquilía quema seyoc quixitlahua
nemi ipan nopa ojtli catli yohui campa onca nemilistli. Pero se
catli amo quitlacaquilía catli quinequi quitlalnamictis,
mocuapolos.
\p
\v 18 Se catli tecualancaita huan mochihua quen teicnelía, yaya se
istlacatiquetl. Huan se catli tetlaijilhuía nelía huihuitic.
\p
\v 19 Se catli tlahuel camanalti amo polihui para quiijtos se
camanali catli ica tlaixpanos. Pero se catli tlalnamiqui quipiya
miyac cuidado ica catli quiijtohua.
\p
\v 20 Quema se tlacatl catli itztoc xitlahuac iixpa TOTECO
camanalti, monequi tijtlacaquilis pampa icamanal ipati quen plata
catli más cuali. Pero inincamanal amo cuajcualme amo tleno ipati.
\p
\v 21 Masehualme catli nemij xitlahuac iixpa TOTECO hueli temacaj
cuali consejos. Pero catli huihuitique miquise pampa amo quipiyaj
tlalnamiquilistli para monejnemiltise cuali.
\p
\v 22 Quema TOTECO quitiochihuas se masehuali, yaya moricojchihuas
ica catli nelía ipati. Huan TOTECO quimaca miyac paquilistli.
\p
\v 23 Se tlacatl catli huihuitic quipaquilismaca para quichihua
catli fiero. Pero se catli tlalnamiqui quipaquilismaca para quipiyas
más tlalnamiquilistli.
\p
\v 24 Nopa catli tlahuel quiimacasi se masehuali catli amo cuali, ya
nopa catli quipantis. Pero masehualme catli itztoque xitlahuaque
iixpa TOTECO, yaya quinmacas nopa tlamantli catli quinequij.
\p
\v 25 Quena, quen se hueyi ajcomalacatl san hualpanotiquisa, quej
nopa nojquiya itztoque masehualme catli amo quitlepanitaj TOTECO
pampa amo huejcahuaj para itztose. Pero masehualme catli itztoque
xitlahuac iixpa TOTECO huejcahuase pampa moquetztoque ipan se
tlatzinpehualtili catli temachtli.
\p
\v 26 Se tetequipanojquetl catli tlatzihui tlahuel quitequipachohua
iteco quen poctli catli calaqui ipan iixteyol, o quen vinagre catli
quiajsi itlancoch hasta cuajcualo.
\p
\v 27 Quema se masehuali quiimacasi huan quitlepanita TOTECO, TOTECO
quinchihuas para ma itzto miyac xihuitl. Pero TOTECO quincotonilis
ininxihui catli amo cuajcualme.
\p
\v 28 Catli itztoque xitlahuaque iixpa TOTECO quichiyaj tlamantli
catli temaca paquilistli. Pero masehualme catli amo quitlepanitaj
TOTECO quichiyaj tlamantli catli san tlapic.
\p
\v 29 TOTECO quinmocuitlahuía catli nemij xitlahuaque iixpa, pero
quintzontlamiltía masehualme catli quichihuaj catli amo cuali.
\p
\v 30 TOTECO quintiochihuas catli itztoque xitlahuaque iixpa huan
amo quema tlatzintlatemose. Pero quinquixtis masehualme catli amo
quitlepanitaj ipan ni tlali, pampa amo quincahuilis ma huejcahuaca
para itztose.
\p
\v 31 Quema camanalti se masehuali catli itztoc xitlahuac iixpa
TOTECO, tetlalnamictía. Pero se tecajcayajquetl, TOTECO
quitzontlamiltis para ayacmo huelis camanaltis.
\p
\v 32 Quema camanalti se cuali tlacatl, icamanal tepalehuía. Pero
amo cuajcualme quiijtohuaj camanali catli tlacajcayahuaj.
\c 11
\p
\v 1 TOTECO tlahuel quicualancaita catli tecajcayahua huan amo
ajsitoc tlatamachihua. Quinequi xitlatamachihua xitlahuac pampa ya
nopa quimaca paquilistli.
\p
\v 2 Quema se masehuali pehua mohueyimatis, sequinoc ayacmo
quitlepanitase. Pero catli moechcapantlalíaj quipantise
tlalnamiquilistli.
\p
\v 3 Masehualme catli monejnemiltíaj xitlahuac quipiyaj se ininyolo
catli cuali catli quinyacana huan quinilhuía catli ma quichihuaca.
Pero masehualme catli quinpactía tlajtlacolchihuase
motzontlamiltise pampa tlacajcayajtinemij.
\p
\v 4 Ipan nopa tonal quema TOTECO tetlajtolsencahuas, itomi se
tominpixquetl amo quipalehuis. Pero masehualme catli itztoque
xitlahuac iixpa TOTECO momanahuise tlen miquilistli.
\p
\v 5 Nochi catli cuali quichihua se masehuali catli itztoc xitlahuac
quipalehuía para ma quipiya se ojtli catli alaxtic. Pero masehualme
catli amo cuajcualme huetzise por inintlajtlacolhua.
\p
\v 6 Nopa tlamantli catli cuali catli cuajcualme quichihuaj
quinmanahuis tlen miyac tlaquetztli, pero catli fiero quichihuaj
tlajtlacolchijca masehualme quinmasiltis.
\p
\v 7 Quema miqui se tlacatl catli amo cuali, tlami nochi catli yaya
quichiyayaya quichihuas. Masque yaya se tlacatl tetic, nenpolihuis
nochi catli mochiyayaya para quichihuas.
\p
\v 8 TOTECO quinmanahuis catli itztoque xitlahuaque iixpa tlen
tlaijiyohuilistli. Pero masehualme catli amo quitlepanitaj, TOTECO
quincahuilis ma quinajsi.
\p
\v 9 Se tlacatl catli moijixpatla quinyolcocohua ihuampoyohua ica
icamanal catli fiero. Pero catli itztoc xitlahuac iixpa TOTECO
mochololtía tlen tlaohuijcayotl por nopa cuali tlalnamiquilistli
catli quipiya.
\p
\v 10 Ipan se altepetl nochi masehualme paquij quema nochi quisa
cuali para se cuali tlacatl. Pero se altepetl ilhuichihua quema
miquij amo cuajcualme.
\p
\v 11 Nopa miyac tlatiochihualistli catli quiselíaj masehualme
catli itztoque xitlahuaque quihueyitlalía inialtepe. Pero amo
cuajcualme quinenpolohuaj inialtepe ica catli fiero quiijtohuaj.
\p
\v 12 Se catli amo cuali itlalnamiquilis camanalti fiero tlen seyoc
catli itztoc icalnechca. Pero se tlacatl catli tlalnamiqui amo
molinía.
\p
\v 13 Se catli tetlaijilhuijtinemi amo quema hueli quimati se
camanali catli ichtacatzi huan amo teyolmelahuas. Pero se tlacatl
catli temachtli quimati miyac tlamantli catli amo tematiltía.
\p
\v 14 Campa amo onca tequitini catli tlalnamiquij para tlayacanase,
tlatzintlanhuetzise nopa masehualme. Pero quema masehualme ipan se
altepetl quintequitlalíaj miyac tlacame catli quinmacaj cuali
consejos, huelis itztose ica temachili.
\p
\v 15 Quipantis tequipacholi catli quitlalis ifirma para tlaxtlahuas
para seyoc sintla yaya amo hueli. Pero se catli amo quitlalis ifirma
para seyoc, itztos ica temachili.
\p
\v 16 Se sihuatl catli quipiya iyolo ica sequinoc, quipantis
tlatlepanitacayotl. Pero tlacame catli amo quitlepanitaj TOTECO san
quinequij quipantise tomi.
\p
\v 17 Se tlacatl catli tetlasojtla mochihuilía catli cuali pampa
moyolpactía, pero se tlacatl catli tecocohua motlanahuía pampa
moyolcocohua.
\p
\v 18 Se tlacatl catli amo cuali itlalnamiquilis tlacajcayahua huan
nopa tomi catli quej nopa quitlantoc san eltoc para se tlatoctzi.
Pero se tlacatl catli quichihua catli xitlahuac iixpa TOTECO
quiselis se itlaxtlahuil catli nelía ipati.
\p
\v 19 Se catli quichihuas catli xitlahuac, yas campa onca
nemilistli. Pero se catli quitoquilis catli fiero, quipantis
miquilistli.
\p
\v 20 TOTECO quincualancaita catli moilhuíaj quenicatza hueli
tlacajcayahuase. Pero quincualita catli nemij nelcuali huan amo aqui
huelis quintelhuis.
\p
\v 21 Temachtli se tonal TOTECO quintlatzacuiltis masehualme catli
amo quitlepanitaj. Pero ininconehua masehualme catli itztoque
xitlahuaque iixpa, TOTECO quinmanahuis tlen tlaohuijcayotl.
\p
\v 22 Se sihuatl catli yejyectzi pero amo quipiya tlalnamiquilistli,
eltoc huihuitic san se ica se pitzo catli quihuica ipan iyacatzol se
anillo tlen oro.
\p
\v 23 Catli cuali quinchiya masehualme catli quichihuaj catli cuali.
Pero icualancayo TOTECO quinchiya amo cuajcualme.
\p
\v 24 Catli quinpactía temajmacase catli quipiyaj, achi más
moricojchihuase. Pero catli itzcuime huan amo quinequij temajmacase
catli iniaxca, teipa mochihuase teicneltzitzi.
\p
\v 25 Quena, se masehuali catli hueyi iyolo huan miyac quinmaca
sequinoc tlen catli quipiya, moricojchihuas más. Huan aqui quinpalehuía
sequinoc, TOTECO quitiochihuas huan quipiyas nochi catli monequi.
\p
\v 26 Se catli amo quinemacas itrigo quema sequinoc quitemohuaj
pampa moilhuía patiyohuas, ialtepe ejcahua quitelchihuase. Pero
aqui quinemaquiltis sequinoc quema quinmonequilijtoc, TOTECO
quitiochihuas.
\p
\v 27 Sintla tijtemohua catli cuali para tijchihuas, TOTECO
mitzcualitas, pero sintla tijtemohua catli amo cuali para
tijchihuas, ya nopa tijpantis.
\p
\v 28 Aqui motemachía ipan itomi huetzis quen se xihuitl catli
huactoc. Pero masehualme catli quichihuaj catli cuali quipiyase
fuerza quen imacuayohua se cuahuitl catli nochipa xoxohuixtoc.
\p
\v 29 Se huihui telpocatl catli quihualica tlaohuijcayotl ipan
ifamilia amo tleno quiselis teipa catli itatahua quicahuilijtehuase.
Huan yaya catli huihuitic teipa monequis quitequipanos seyoc catli
tlalnamiqui.
\p
\v 30 Pero se masehuali catli itztoc xitlahuac iixpa TOTECO
tepalehuía quen se cuahuitl catli temaca cuali nemilistli. Huan
aqui quinnotza sequinoc ma quitoquilica TOTECO, yaya nelía
tlalnamiqui.
\p
\v 31 Sintla catli itztoque xitlahuaque quiselíaj inintlaxtlahuil
nica ipan ni tlaltipactli para catli quichijtoque, huajca más
temachtli catli amo cuajcualme huan catli tlajtlacolchihuaj
quiselise catli quinamiqui.
\c 12
\s Masehualme catli xitlahuaque huan ne sequinoc catli amo
quitlepanitaj TOTECO
\p
\v 1 Se catli quipactía quiselía tlamachtili catli quixitlahua
quipiya tlalnamiquilistli catli cuali. Pero se catli amo quinequi
quitlacaquilis catli quixitlahua nelía huihuitic.
\p
\v 2 TOTECO quicualita se masehuali catli cuali. Pero TOTECO
quitlalis tlatzacuiltilistli ipan nopa tlacatl catli moilhuía catli
fiero huelis quichihuas.
\p
\v 3 Se masehuali amo quipantis temachili ipan inemilis ica catli
fiero quichihua. Pero masehualme catli quichihuaj catli cuali,
quena, quipiyaj ininnelhuayo catli calaqui huejcatla huan amo tleno
quinolinis.
\p
\v 4 Se sihuatl catli nelcuali quihualiquilía ihuehue
tlatlepanitacayotl pampa masehualme quitlachilíaj quen se
tlanahuatijquetl ica se corona ipan itzonteco. Pero se sihuatl catli
quihualiquilía ihuehue pinahualistli quicocohua ihuehue quen se
cocolistli catli quicua iomiyohua.
\p
\v 5 Se cuali masehuali moilhuía quichihuas catli xitlahuac, pero
amo cuajcualme moilhuíaj quenicatza hueli tlacajcayahuase.
\p
\v 6 Inincamanal masehualme catli amo quitlepanitaj TOTECO
tecocohuaj hasta hueli temictía. Pero inincamanal masehualme catli
itztoque xitlahuaque temanahuíaj tlen miquilistli.
\p
\v 7 Toteco Dios quintzontlamiltis amo cuajcualme, pero ininteipan
ixhuihua masehualme catli quichihuaj catli cuali itztose ica
temachtli para nochipa.
\p
\v 8 Masehualme quitlepanitaj se tlacatl catli quipiya cuali
itlalnamiquilis, pero se catli huihuitic quiitaj para amo tleno
ipati.
\p
\v 9 Más cuali se catli tequiti chicahuac huan mosoquihuía ipan
itequi para quitlanis catli yaya huan itequipanojcahua quicuase,
huan amo se masehuali catli mohueyimati huan amo quinequi
motequihuis para quipiyas catli quicuas.
\p
\v 10 Se cuali masehuali motequipachohua por itlapiyalhua pampa amo
quinequi ma tlaijiyohuica. Pero quema se masehuali catli amo
quitlepanita TOTECO moyolilhuía para quitlasojtlas itlapiyal, noja
pano fiero quichihuilía pampa san ya nopa quimati.
\p
\v 11 Se masehuali catli tequiti chicahuac ipan imila nochipa
quipiyas miyac tlacualistli. Pero se catli huihuitic quinenpolohua
itonal pampa tlatzihui.
\p
\v 12 Catli tlachtequij cualanij quema quiitaj para itequixpo
quiichtectoc se tlamantli catli hueyi ipati. Pero cuajcualme
quitlanij ica inintequi para huelis quinpalehuise sequinoc.
\p
\v 13 Amo cuajcualme istlacatij huan inincamanal quinmasiltía pampa
nima nesi para amo melahuac. Pero cuajcualme amo istlacatij huan
momanahuíaj tlen miyac tlamantli tlaohuijcayotl.
\p
\v 14 Se tlacatl catli quiijtohua catli melahuac quipantis miyac
tlamantli catli cuali huan catli quitemitis inemilis ica
paquilistli. Huan yaya catli tequiti cuali ica imax quiselis se
tlaxtlahuili catli cuali.
\p
\v 15 Se catli huihuitic moilhuía para nemi ipan se ojtli xitlahuac
huan amo quinequi consejos. Pero se masehuali catli tlalnamiqui
quintlacaquilía catli quiconsejomacaj para ma monejnemiltis más
cuali.
\p
\v 16 Se catli huihuitic nimantzi cualani quema sequinoc
quitlaijilhuíaj. Pero se catli tlalnamiqui quipiya iyolo sintla
quitlaijilhuíaj, yaya amo quinextía cualantli.
\p
\v 17 Se testigo catli quiijtohua nochi catli senquistoc melahuac,
quichihua catli xitlahuac. Pero se testigo catli istlacati quichihua
pampa quinequi tlacajcayahuas.
\p
\v 18 Itztoque sequin tlacame catli tecocohuaj ica inincamanal quen
elisquía se machete catli tlatequi. Pero inincamanal tlalnamiquini
eltoc quen se pajtli catli teyolchicahua huan teseseltía.
\p
\v 19 Icamanal se testigo catli quiijtohua nochi catli senquistoc
melahuac huejcahuas pampa nochi quiitase para xitlahuac. Pero
icamanal se testigo catli istlacati amo huejcahuas pampa nima
monextis para amo melahuac.
\p
\v 20 Nochi catli moilhuíaj quichihuase catli amo cuali,
quisencahuaj ipan ininyolo quenicatza huelis tlacajcayahuase. Pero
catli itztoque xitlahuaque quipiyaj paquilistli ipan ininyolo pampa
moyolilhuíaj catli cuali huelis quichihuase.
\p
\v 21 Amo quipantise tlatzacuiltili catli monejnemiltíaj xitlahuac,
pero miyac tlaohuijcayotl quipantise ipan ininnemilis amo
cuajcualme.
\p
\v 22 TOTECO quincualancaita masehualme catli istlacatij. Pero nochi
catli quiijtohuaj catli melahuac, TOTECO quincualita.
\p
\v 23 Se catli tlalnamiqui amo mohueyimati, niyon amo quinnextilis
sequinoc nochi catli quimati. Pero catli huihuitique tlahuel
mohueyimatij huan quiijtohuaj miyac tlamantli catli eli san se
huihuiyotl.
\p
\v 24 Xitequiti chicahuac huan tielis se tlayacanquetl, pero sintla
timochihuas titlatzihui tielis itequipanojca seyoc masehuali.
\p
\v 25 Se masehuali catli moyoltequipachohua nelía tlaijiyohuía,
pero se cuali camanali quimacas paquilistli ipan iyolo.
\p
\v 26 Se masehuali catli monejnemiltía xitlahuac quinyacana
ihuampoyohua ipan se cuali ojtli, pero amo cuajcualme quinhuicaj
sequinoc ipan se ojtli campa mocuapolose.
\p
\v 27 Se masehuali catli tlatzihui amo quinequi quitemos niyon
cuahuitl para quiicxitis catli quipejtoc, san xoxohuic quicuas, pero
se catli quipactía tequitis quitlanis catli nelcuali.
\p
\v 28 Masehualme catli quichihuaj catli cuali quitoquilíaj nopa
ojtli catli tehuica campa onca nemilistli. Iniojhui amo yohui campa
onca miquilistli.
\c 13
\p
\v 1 Se telpocatl catli tlalnamiqui quiselía catli itata quiijtohua
quema quitlalnamictía, pero se catli tlahuihuiita amo
quitlacaquilía catli quitlacahualtía.
\p
\v 2 Se masehuali catli camanalti cuajcuali tlamantli quipantis
catli cuali ipan inemilis, pero masehualme catli amo quitlepanitaj
TOTECO san quipantise tlahuilancayotl.
\p
\v 3 Se catli quipiya miyac cuidado ica catli quiijtohua huan amo
quej hueli camanalti, quimocuitlahuía inemilis. Pero se catli quej
hueli ontlananquilijtiquisa quipantía tlaohuijcayotl.
\p
\v 4 Se tlacatl catli tlatzihui quinequi miyac tlamantli, pero amo
quinpantía por itlatzcayo. Pero se catli tequiti chicahuac,
moricojchihuas.
\p
\v 5 Se masehuali catli itztoc xitlahuac iixpa TOTECO amo quinequi
quiitas istlacaticayotl, pero nopa masehualme catli amo
quitlepanitaj TOTECO teijistlacahuijtinemij, huan amo aqui
quintlepanitas.
\p
\v 6 Nopa cuali tlamantli catli quichihuaj cuajcualme quinmanahuía
mojmostla ipan ininnemilis. Pero catli fiero quichihuaj
tlajtlacolchijca masehualme quintzontlamiltía.
\p
\v 7 Itztoque sequin masehualme catli pilteicneltzitzi, pero
mohueyimatij huan monextíaj para tlapijpiyani. Huan itztoque
sequinoc catli nelía tominpiyani, pero moechcapantlalíaj huan
mochihuaj quen teicneltzitzi.
\p
\v 8 Quema quiichtequij se masehuali catli tominpiya huan quihuicaj
huejca, quitlajtlaníaj ma tlaxtlahua miyac tomi para quimanahuis
inemilis. Pero se catli teicneltzi amo monequi quiimacasis ajqueya
quiitzquis huan tlajtlanis tomi.
\p
\v 9 Inemilis se cuali masehuali eltoc quen se tlahuili catli
tlatlanextía campa hueli. Pero ininnemilis tlajtlacolchihuani eltoc
quen se tlahuili catli tlatoctzitzi sehui.
\p
\v 10 Se masehuali catli motlepanita quipantis tlanajnanquilistli.
Pero catli moicnonequi huan quitlacaquilía consejos, quipiyas
tlalnamiquilistli.
\p
\v 11 Catli moilhuía quitlanis miyac tomi ipan se tlatoctzi
mocajcayajtoc. Pero catli quisentilía tomi sesentzitzi huan ica
miyac tequitl, quipiyas tomi catli momiyaquilis.
\p
\v 12 Quema se masehuali mojmostla quipiya nechiyalistli para
quiselis se tlenijqui huan amo ajsi imaco, nelía quiyolcocohua.
Pero quema se quinequi se tlamantli huan teipa quiselía, nelía
yolpaqui.
\p
\v 13 Se masehuali catli amo quinequi quiitas itlanahuatilhua
TOTECO, mocuapolos pampa amo quintoquilía. Pero aqui quintlepanitas
tlanahuatilme, TOTECO quitiochihuas.
\p
\v 14 Itlamachtil se catli tlalnamiqui eltoc quen se ameli campa
temaca se cuali nemilistli. Huan catli quitlacaquilíaj icamanal se
catli tlalnamiqui momanahuíaj tlen nopa tlaquetztli catli
quimictisquía.
\p
\v 15 Se masehuali catli tlalnamiqui quimachilía miyac tlamantli
huan sequinoc quicualitaj. Pero iniojhui tlacajcayahuani tlahuel
ohui pampa quiselise tlatzacuiltili por inintlajtlacolhua.
\p
\v 16 Nochi tlacame catli tlalnamiquij monejnehuilíaj achtihui
sintla cuali para quichihuase se tlamantli o amo. Pero catli
huihuitique amo monejnehuilíaj achtihui. Nimantzi quichihuaj tlen
hueli tlamantli huan quinextíaj ihuihuiyo.
\p
\v 17 Se tlayolmelajquetl catli amo quitlepanita TOTECO quichihuas
ma onca cualantli. Pero se tlayolmelajquetl catli temachtli
teyolchicahua.
\p
\v 18 Quema se masehuali amo quinequi quicaquis catli
quiconsejomaca, mochihuas teicneltzi huan teipa tlahuel mopinahuas.
Pero se catli quitlacaquilía catli quinequi quixitlahuas teipa
quiselis tlatlepanitacayotl.
\p
\v 19 Se paquilistli quema pano cuali tlamantli quen se quinequiyaya
ma pano. Pero catli huihuitique amo quinequij quicahuase tlen fiero
quichihuaj para quipantise catli cuali.
\p
\v 20 Se masehuali catli nemi ininhuaya catli tlalnamiquij mochihuas
tlalnamiqui. Pero aqui nemi ininhuaya huihuime, quipantis ajqueya
quinpojpostequis iomiyohua.
\p
\v 21 Tlamantli catli amo cuali quintoquilíaj catli
tlajtlacolchijtinemij. Pero catli quichihuaj catli cuali quipantise
miyac tlatiochihualistli.
\p
\v 22 Quema miqui se cuali masehuali, quincahuilijtehua miyac
tlamantli catli cuali para iconehua huan hasta para iixhuihua. Pero
quema miqui se catli tlajtlacolchijtinemi, iricojyo panos ica se
catli quichihua catli cuali.
\p
\v 23 Se masehuali catli teicneltzi huelis quipiyas imil catli
tlahuel tlaeli huan quimaca miyac tlacualistli. Pero sintla amo onca
tlanahuatilme catli xitlahuac ipan ialtepe, fiero masehualme huelis
quiichtequilise nochi.
\p
\v 24 Se masehuali catli amo quitlacahualtía icone quema quichihua
tlamantli catli amo cuali, quinextía para amo quiicnelía. Pero
aqui nelía quiicnelía icone, pehua quixitlahua quema noja
tziquitetzi.
\p
\v 25 Se masehuali catli quichihua catli cuali quipiya miyac
tlacualistli para huelis tlacuas hasta ixhuis. Pero amo cuajcualme
mayancamictinemij pampa amo tequitij.
\c 14
\p
\v 1 Se sihuatl catli tlalnamiqui mojmostla quisencahua ichaj para
ma eli más cuali, pero se catli huihuitic quisosolohua ichaj ica
catli quichihua.
\p
\v 2 Catli monejnemiltía ipan nopa ojtli catli xitlahuac quiimacasi
huan quitlepanita TOTECO. Pero se catli necuiltic nemi amo quinequi
quiitas.
\p
\v 3 Icamanal se huihui masehuali quihualiquilía tlatzacuiltili.
Pero inincamanal tlalnamiquini quinmocuitlahuía tlen catli amo
cuali.
\p
\v 4 Quema amo onca torojme para tlaxahuase, amo oncas trigo ipan
cuacali para pantzi. Pero quema onca torojme catli tequitij ica
nochi ininchicahualis, momiyaquilis pixquistli.
\p
\v 5 Se testigo catli temachtli amo quema istlacatis, pero se
testigo catli quipactía tlacajcayahua, mojmostla istlacati.
\p
\v 6 Se catli tlahuihuiita amo quema quipantis tlalnamiquilistli
masque quiijtohua quitemohua. Pero se catli quimachilía miyac
tlamantli, yaya amo ohui quipantía tlalnamiquilistli.
\p
\v 7 Ximohuejcatlali ica tlen quichihua se masehuali catli
huihuitic, pampa yaya amo mitznextilis niyon se tlamantli catli
cuali.
\p
\v 8 Se catli tlalnamiqui yaya moilhuía catli imelac huala ipan
iojhui. Pero se catli huihuitic mocajcayahua ica iseltzi ica
ihuihuiyo.
\p
\v 9 Catli huihuitique san huetzcaj quema tlajtlacolchihuaj. Pero
masehualme catli xitlahuac nemij quipiyaj ipan ininyolo para
monejnemiltise noja más xitlahuac.
\p
\v 10 Sesen masehuali quimati nopa tequipacholi o nopa paquilistli
catli quipiya ipan iyolo. Huan amo aqui huelis quimachilis
senquistoc catli seyoc quimati.
\p
\v 11 Nopa yejyectzi cali catli amo cuajcualme quipiyaj mososolos.
Pero masque masehualme catli xitlahuaque san quipiya ininchaj catli
teicneltzi nochi elis cuali para catli nopona itztoque.
\p
\v 12 Onca ojtli catli tlacame moilhuíaj para xitlahuac, pero catli
yohuij ipan nopa ojtli quipantise miquilistli.
\p
\v 13 Huan masque huetzca se acajya, hueli onca catli quiyolcocohua
miyac. Huan quema tlami huetzca, noja quimachilía nopa
tequipacholi.
\p
\v 14 Amo cuajcualme mocahuaj cuesijtoque ica nochi catli fiero
quichihuaj. Pero nochi catli quichihua se cuali masehuali
quitemitía iyolo ica paquilistli.
\p
\v 15 Se catli huihuitzi nimantzi quineltoca nochi catli
ihuampoyohua quiilhuíaj ma quichihua, pero se masehuali catli
tlalnamiqui moilhuía sintla cuali para quichihuas se tlamantli o
amo.
\p
\v 16 Se catli tlalnamiqui quiimacasi catli amo cuali huan
mohuejcatlalía. Pero se catli huihuitic mochihua quen amo tleno
quiimacasi huan momajcahua san quej hueli campa tlamantli mahuilili.
\p
\v 17 Se tlacatl catli yolquentzi nimantzi cualani huan quichihua
tlamantli catli amo quinamiqui. Huan nochi masehualme
quicualancaitaj se catli monejnehuilía quenicatza huelis tecocos o
tecajcayahuas.
\p
\v 18 Catli huihuitzitzi san quipiyaj huihuiyotl ipan inintzonteco,
pero catli tlalnamiquij inijuanti quipiyaj tlalnamiquilistli quen se
corona yejyectzi catli quihuicaj ipan inintzonteco.
\p
\v 19 Fiero masehualme moixhuijtzomase iniixpa cuajcualme. Quena,
motlancuaquetzase iniixpa catli quichihuaj catli xitlahuac huan
quintlajtlanise tlapalehuili.
\p
\v 20 Ica masehualme catli teicneltzitzi hasta ininteiximatcahua amo
quinequij quinitase. Pero tlapijpiyani quipiyaj miyac
ininhuampoyohua.
\p
\v 21 Tlajtlacolchihua catli amo quinequi quiitas se catli
icalnechca. Pero hueyi ipaquilis se tlacatl catli quintlasojtla
catli teicneltzitzi huan quinpalehuía.
\p
\v 22 Catli moyolilhuíaj san catli amo cuali huelise quinchihuase
mocuapolose, pero catli monejnehuilíaj catli cuali huelise
quichihuase quipantise tlaicnelili huan catli temachtli.
\p
\v 23 Catli tequitij cuali quiselise inintlaxtlahuil. Pero catli san
camanaltij huan amo quichihuaj inintequi mocahuase teicneltzitzi.
\p
\v 24 Nopa ricojyotl catli masehualme catli tlalnamiquij quitlanij
quinhualiquilía miyac tlatlepanitacayotl. Pero catli huihuitique
san quitlanij más huihuiyotl.
\p
\v 25 Se testigo catli quiijtohua catli melahuac quinmanahuía
ininnemilis masehualme catli amo tleno quichijtoque. Pero se testigo
catli tlacajcayahua san istlacati.
\p
\v 26 Masehualme catli quiimacasij huan quitlepanitaj TOTECO
itztoque ica temachili, huan ipan TOTECO nojquiya ininconehua
momanahuise.
\p
\v 27 Quema se masehuali quiimacasi huan quitlepanita TOTECO eltoc
quen se ameli catli temaca se cuali nemilistli, huan quimanahuis
catli eltoc nechca miquilistli.
\p
\v 28 Quema nelía momiyaquilíaj masehualme ipan se tlali,
inintlanahuatijca mohueyichihuas. Pero quema mocahuaj san se quesqui
masehualme ipan itlanahuatilis se tlayacanquetl, tlantiyas
itequiticayo.
\p
\v 29 Se masehuali catli ohui para cualanis quimachilis miyac
tlamantli. Pero se catli nimantzi cualani quinextía ihuihuiyo.
\p
\v 30 Quema se masehuali quipiya tlasejseltili ipan iyolo, quimacas
se nemilistli catli huejcahuas ipan ni tlaltipactli. Pero sintla
tiquixtocas catli sequinoc quipiyaj, quicuas moomiyo quen se
cocolistli huan amo tihuejcahuas.
\p
\v 31 Aqui quitlaijiyohuiltía se catli teicneltzi quiixpano TOTECO
catli quichijchijqui. Pero aqui quintlasojtla catli teicneltzitzi
quinextilía TOTECO tlatlepanitacayotl.
\p
\v 32 Masehualme catli amo quitlepanitaj TOTECO motzontlamiltise ica
inintlajtlacolhua. Pero catli itztoque xitlahuaque iixpa TOTECO
motemachíaj ipan ya catli hueli quinmanahuis ipan miquilistli.
\p
\v 33 Tlalnamiquilistli mopantía ipan ininyolo masehualme catli
tlalnamiquij. Pero amo mopantía tlalnamiquilistli campa catli
huihuitique.
\p
\v 34 Quema nochi masehualme ipan se tlali monejnemiltíaj
xitlahuac, sequinoc quihueyitlalíaj inintlal. Pero quema masehualme
tlajtlacolchijtinemij, quihualiquilíaj pinahualistli.
\p
\v 35 Se tlanahuatijquetl yolpaqui ica itequipanojcahua catli
tlalnamiquij huan quimatij tlaque quichihuase. Pero sintla se
itequipanojca quihualica pinahualistli, quiajsis icualancayo nopa
tlayacanquetl.
\c 15
\p
\v 1 Quema se acajya quinanquilía ica yejyectzi seyoc catli
cualantoc, nimantzi quiseseltía. Pero sintla quinanquilis
chicahuac, achi más quicualancamacas.
\p
\v 2 Se catli tlalnamiqui quicualtlalía catli tlamachtía para ma
quiyoliti paquilistli. Pero se catli huihuitic san camanalti
huihuiyotl catli amo tleno ipati.
\p
\v 3 TOTECO itztoc campa hueli huan quitlachilía tlaque quichihuaj
nochi masehualme. Quintlachilía catli quichihuaj masehualme catli
amo quitlepanitaj TOTECO huan catli quichihuaj cuajcualme.
\p
\v 4 Se masehuali catli camanalti ica camanali catli yamanic temaca
se nemilistli catli cuali. Pero catli quiijtohua camanali catli
tecajcayahua nelía teyolcocohua.
\p
\v 5 Se telpocatl catli huihuitic amo quinequi quitlacaquilis itata
quema quitlacahualtía. Pero se catli tlalnamiqui, yaya quena.
Quicaqui huan quichihua catli itata quiilhuía.
\p
\v 6 Ipan ichaj se masehuali catli itztoc xitlahuac onca miyac catli
ica panos. Pero se masehuali catli amo quitlepanita TOTECO san
quitlani tlaohuijcayotl.
\p
\v 7 Inincamanal tlalnamiquini temaca tlalnamiquilistli. Pero
masehualme catli amo quitlepanitaj TOTECO amo quipiyaj
tlalnamiquilistli para temaca.
\p
\v 8 TOTECO amo quinequi quiitas nopa tlacajcahualistli catli fiero
masehualme quimacaj. Pero quimaca miyac paquilistli quema
motlatlajtíaj masehualme catli itztoque xitlahuaque iixpa.
\p
\v 9 TOTECO amo quinequi quiitas nopa ojtli catli ipan nemij amo
cuajcualme. Pero yaya quinicnelía catli quinequij quitoquilise
catli nelxitlahuac ipan nochi catli quichihuase.
\p
\v 10 TOTECO quintlalnamictis catli quicajtehuase iojhui TOTECO para
sempa quichihuase catli fiero. Pero sintla se amo quinequis
quicualtlalis inemilis quema TOTECO quixitlahua, TOTECO
quintzontlamiltis.
\p
\v 11 TOTECO quiita nochi catli pano ica catli mopantíaj campa
teostotl huan campa mictla, pero noja más quimati sesen
piltlamantzitzi catli eltoc ipan ininyolo masehualme.
\p
\v 12 Se catli tlahuihuiita amo quiicnelía catli quitlacahualtía
huan quinequi quixitlahuas. Amo quinequi quinnechcahuis catli
tlalnamiquij pampa amo quinequi ma quiixcoilhuica para amo cuali
catli quichihua.
\p
\v 13 Se catli yolpactoc, tenextilía ipaquilis pampa huetzca, huan
se catli moyoltequipachojtoc, nimantzi quinextía ipan ixayac.
\p
\v 14 Iyolo se masehuali catli tlalnamiqui tlahuel quinequi
quimachilis más tlamantli. Pero se catli huihuitic san moixhuitía
ica más huihuiyotl.
\p
\v 15 Se masehuali catli yolcuesihui quiita nochi tonali para
nelfiero, pero se catli yolpactoc, mojmostla quiita quen elisquía
ilhuitl.
\p
\v 16 Más cuali para se masehuali elis teicneltzi huan quiimacasi
huan quitlepanita TOTECO, huan amo para quipiyasquía miyac tomi ica
yoltequipacholi.
\p
\v 17 Achi más cuali se quicuas san quilitl ipan se cali campa onca
tlaicnelijcayotl, huan amo quicuas toro nacatl campa onca cualantli.
\p
\v 18 Se masehuali catli nimantzi cualani quintlahuilanaltía
sequinoc, pero se catli quipiya iyolo, yaya quinseseltía.
\p
\v 19 Se catli tlatzihui quiohuijmati nochi tlamantli ipan ni
nemilistli huan quinita nochi tlamantli quen huitztli catli ohui
para quinpanos, pero masehualme catli quichihuaj catli xitlahuac
quiitaj para amo ohui nopa tlamantli catli quinixnamictihuala.
Ininnemilis eltoc quen se ojtli catli patlahuac.
\p
\v 20 Se telpocatl catli tlalnamiqui quinmaca miyac paquilistli
itatahua, pero se catli huihuitic quincualancaita.
\p
\v 21 Se catli amo tlalnamiqui mopaquilismaca ica nochi huihuiyotl
catli quichihua, pero se catli quimachilía miyac tlamantli
quichihua campica para moxitlahuas huan quitoquilis nopa ojtli catli
cuali.
\p
\v 22 Quema se acajya quinequi quichihuas se tlamantli pero amo
motlatzintoquilía quenicatza quichihuas o sintla cuali para
quichihuas, amo quisa cuali itequi. Pero quema se motlajtlanía
miyac consejos tlen tlalnamiquini, nochi catli quichihua quisa
cuali.
\p
\v 23 Nochi masehualme quinpactía quema se tlananquilía cuali huan
tepalehuía tlamachilise más. Nelía yejyectzi quema se acajya
quimati quenicatza quicamanalhuis se catli quipiya tequipacholi huan
quiilhuis catli quinamiqui ipan nopa tlatoctzi quema monequi.
\p
\v 24 Masehualme catli tlalnamiquij quitoquilíaj nopa ojtli ica
huejcapa catli tehuica ilhuicac campa onca nemilistli. Inijuanti
quihuejcacajtoque nopa ojtli catli tehuica mictla.
\p
\v 25 TOTECO quisosolos ininchaj masehualme catli mohueyimatij huan
nochi tlamantli catli quipiyaj, pero yaya quimocuitlahuía nochi
catli iniaxca cahual toahuihua.
\p
\v 26 TOTECO amo quinequi quiitas catli fiero monejnehuilíaj amo
cuajcualme, pero quipiya paquilistli ica catli quiijtohuaj
masehualme catli yoltlapajpactique pampa cuali inincamanal.
\p
\v 27 Se masehuali catli quinequi tlacajcayahuas huan moaxcatis
catli seyoc iaxca quihualicas catli fiero ipan ichampoyohua, pero
aqui amo quiselis tomi catli amo quitlantoc itztos ica cuali.
\p
\v 28 Se masehuali catli itztoc xitlahuac iixpa TOTECO
monejnehuilía quenicatza tlananquilis quen quinamiqui, pero se
masehuali catli amo quitlepanita TOTECO ontlananquilijtiquisa
nimantzi ica camanali catli amo cuali.
\p
\v 29 TOTECO mohuejcatlalijtoc tlen masehualme catli fiero
ininnemilis, pero quintlacaquilía quema motlatlajtíaj masehualme
catli itztoque xitlahuaque iixpa.
\p
\v 30 Quema se acajya ixpaqui, quinchihua sequinoc ma quipiyase
paquilistli ipan ininyolo, huan quema se quihualica se camanali
catli cuali, quinmaca masehualme chicahualistli hasta ipan iniomiyo.
\p
\v 31 Nopa masehuali catli quichihuilía cuenta quema seyoc quimacas
consejo para quimanahuis inemilis, teipa mopantis ininhuaya catli
nelía tlalnamiquij.
\p
\v 32 Catli amo quichihuilía cuenta catli quinequi quitlalnamictis,
ica iseltzi mochihuilía catli fiero. Pero se catli quitlacaquilía
quema seyoc quixitlahuasnequi, quimachilis miyac tlamantli.
\p
\v 33 Sintla tiquimacasi huan tijtlepanita TOTECO mitzchihuas tielis
titlalnamiqui. Huan catli moechcapantlalía iixpa ya, teipa
quipantis tlatlepanitacayotl.
\c 16
\p
\v 1 Tojuanti hueli tijcualtlalise ipan toyolo tlaque tijchihuase,
pero TOTECO quiijtos sintla cuali o amo para tijchihuase catli
timoilhuijtoque.
\p
\v 2 Se masehuali quiita nochi tlamantli catli quichihua para cuali,
pero TOTECO quitlachilía iyolo huan quiita para tlen quichijqui
catli quichijtoc.
\p
\v 3 Nochi catli ta timoilhuía para tijchihuas xijcahuili imaco
TOTECO para mitzyacanas, huan yaya mitzpalehuis para quisas cuali
catli timoilhuijtoc.
\p
\v 4 TOTECO quichijchijqui nochi tlamantli para ma quitlamilti
ipaquilis. Quinchijchijtoc fiero masehualme para ma quiselica
inintlaijiyohuilis ipan nopa tonal catli amo cuali.
\p
\v 5 TOTECO quincualancaita nochi masehualme catli mohueyimatij,
huan temachtli quiselise inintlatzacuiltilis.
\p
\v 6 Para se quixitlahuas catli tlajtlacolchihua monequi miyac
teicnelijcayotl huan camanali catli melahuac. Huan quema yaya pehuas
quiimacasis huan quitlepanitas TOTECO, moiyocatlalis ica tlamantli
catli amo cuali.
\p
\v 7 Quema iojhui se masehuali quipactía TOTECO, hasta
icualancaitacahua nojquiya moyoltlalise ica nopa masehuali.
\p
\v 8 Más paqui se masehuali catli quipiya pilquentzi tomi, pero
monejnemiltía xitlahuac, que se catli quitlantoc miyac tomi pampa
tlacajcayahua.
\p
\v 9 Tojuanti hueli timonejnehuilíaj canque cuali tiyase, pero yaya
TOTECO catli quiijtohua sintla nopona tiyase o amo.
\p
\v 10 TOTECO quipalehuía se tlanahuatijquetl para quiijtos catli
xitlahuac quema tetlajtolsencahua, huajca amo quinamiqui para
istlacatis huan mocuapolos.
\p
\v 11 TOTECO quinequi para nochi tlayejyecoli huan tlatamachihuali
catli motequihuijtoc ma eli xitlahuac. Yaya TOTECO catli quichihua
nochi tlanahuatili huan nochi masehualme monequi quichihuase catli
yaya quiijtojtoc.
\p
\v 12 TOTECO amo quinequi quiitas se tlanahuatijquetl catli
quichihuas catli amo cuali, pampa se catli quipiya tequiticayotl
monequi itztos xitlahuac para itlanahuatilhua ma quipiya
chicahualistli.
\p
\v 13 Tlanahuatiani yolpaquij quema ininmasehualhua quiijtohuaj
catli xitlahuac. Quinicnelíaj catli quinyolmelahuaj senquistoc
catli panoc.
\p
\v 14 Icualancayo se tlanahuatijquetl huelis quichihuas para ma
miqui se masehuali, pero se catli tlalnamiqui quiyoltlalis.
\p
\v 15 Masehualme catli quipaquilismacaj se tlanahuatijquetl
quiselíaj miyac tlamantli catli cuali. Para nopa masehuali catli
quiselía nopa tlatiochihuali eltoc quen quema huetzi miyac atl
quema ayamo tlaquiyajtoc.
\p
\v 16 Nelía más cuali sintla tijtemos tlalnamiquilistli huan para
tijmachilis miyac tlamantli, huan amo oro niyon plata.
\p
\v 17 Iniojhui catli itztoque xitlahuaque quitlahuelcahua campa onca
catli amo cuali. Aqui momocuitlahuía para amo quichihuas catli amo
cuali quimocuitlahuía inemilis.
\p
\v 18 Aqui achtihui mohueyimati, teipa motepotlamis, huan aqui
achtihui motlepanita teipa huetzis huan tlahuel mococos.
\p
\v 19 Más cuali timoechcapantlalis huan tiitztos ininhuaya
teicneltzitzi, huan amo para timochihuas catli titlapijpiya ica
tlamantli tlachtectli ininhuaya catli mohueyimatij.
\p
\v 20 Se masehuali catli quitlacaquilía tlamachtili quipantis catli
cuali. Huan TOTECO quintiochihuas catli ipan ya motemachíaj.
\p
\v 21 Tlalnamiquini moiximajtoque pampa quimachilíaj miyac
tlamantli. Huan catli quitequihuíaj cuajcuali camanali quema
camanaltij achi más mochihuaj tlalnamiquini.
\p
\v 22 Sintla tijpiya tlamachilistli para timonejnemiltis nelía
cuali, eltoc quen se ameli moyoltipa catli temaca se nemilistli
catli yejyectzi. Pero nojquiya huihuitique catli quichihuaj campica
quinxitlahuase catli huihuitique.
\p
\v 23 Pampa cuali itzonteco se masehuali catli tlalnamiqui,
momocuitlahuía ica catli quiijtohua. Cuali quimati para teseseltis
huan teyolpitzahua ica icamanal quen quinamiqui.
\p
\v 24 Camanali catli yamanic eltoc quen nectli. Quichihuas más
tzopelic monemilis huan eltoc quen se pajtli catli temaca
chicahualistli.
\p
\v 25 Onca se ojtli catli masehualme quiitaj para cuali huan
xitlahuac, pero nopa ojtli quinhuicas xitlahuac campa mictla.
\p
\v 26 Quema mayana se tequipanojquetl, quipalehuía. Quichihua nopa
tequipanojquetl ma tequiti cuali para quipiyas itlacualis.
\p
\v 27 Se masehuali catli amo quitlepanita TOTECO quitemohua catli
amo cuali catli sequinoc quichijtoque para quiixnextis. Icamac eltoc
quen se tlilelemectli catli quitlatía nochi.
\p
\v 28 Se tlacatl catli amo quitlepanita TOTECO quiyolitía
cualantli. Huan se catli tetlaijilhuía quinxelohua catli
monelhuampoxchijtoque.
\p
\v 29 Se masehuali catli fiero inemilis quicajcayahua hasta
inelhuampox. Quihuica ipan ojtli catli amo cuali.
\p
\v 30 Ijcopi iixteyol quema monejnehuilía para quichihuas catli amo
cuali. Motennatzcua para quinequisquía ma mochihua catli fiero
moilhuía.
\p
\v 31 Nopa cuaichtli eli quen se xochi corona para se masehuali
catli ya huehuejtixtoc, huan mopantía campa masehualme catli
monejnemiltíaj xitlahuac.
\p
\v 32 Más cuali catli quipiyas iyolo huan amo cualani que catli
itztoc tetic. Más cuali catli monahuatis ica iseltzi para amo
quichihuas catli fiero, que se catli quitlanis se altepetl.
\p
\v 33 Se masehuali huelis quimajcahuas nopa piltetzitzi para
quitemos isuerte, pero eltoc TOTECO catli quiijtohua catli panos
ipan inemilis.
\c 17
\p
\v 1 Más cuali para quipiyase san tochoj para quicuase ipan se cali
campa onca tlasehuilistli, huan amo para quipiyase miyac
tlacualistli ipan se cali campa nochi mocualaníaj.
\p
\v 2 Se tequipanojquetl catli tlalnamiqui quipiyas tequiticayotl
para quinahuatis itelpoca iteco catli amo tlatlepanita. Nopa cuali
tequipanojquetl quixejxelos ininhuaya nopa icnime catli iteco
quicajtehuas.
\p
\v 3 Ica tlitl quipajpacaj plata huan oro para ma mocahua senquistoc
cuali, pero yaya TOTECO quiyejyecohua huan quipajpaca toyolo.
\p
\v 4 Amo cuajcualme huan istlacatini quitlacaquilíaj camanali catli
fiero. Quichihuilíaj cuenta inincamanal masehualme catli quinequij
quintzontlamiltise sequinoc.
\p
\v 5 Aqui quipinajtía catli teicneltzi quiixpano TOTECO. Huan nochi
catli quihuetzquilíaj se catli tlaijiyohuía, TOTECO temachtli
quintlatzacuiltis.
\p
\v 6 Se huehue tlacatl yolpaqui por iixhuihua. Coneme yolpaquij por
inintatahua.
\p
\v 7 Amo quinamiqui para se huihui tlacatl camanaltis ica miyac
tlalnamiquilistli. Huan niyon quentzi quinamiqui para se
tlanahuatijquetl para istlacatis.
\p
\v 8 Se catli quitlaxtlahuis se tequitiquetl ichtacatzi para
quipalehuis moilhuía para quipiya suerte. Moilhuía para nochi
quisa cuali para ya campa hueli yohui.
\p
\v 9 Aqui amo tenextilía itlajtlacol ihuampox catli quiixpano
quipiya teicnelijcayotl, pero aqui tlatoctzitzi tematiltía
quihuejcatlalía ihuampox.
\p
\v 10 Se catli tlalnamiqui más nimantzi moxitlahua quema seyoc san
se quentzi quitlacahualtía, huan amo quen moxitlahua se catli
huihuitic masque quimaquilise cien hueltas ipan icuitlapa.
\p
\v 11 Masehualme catli amo tlatlepanitaj quitemohuaj catli amo cuali
para quichihuase, pero TOTECO quintitlanilis itlayolmelajca catli
temajmati para quintlatzacuiltis chicahuac.
\p
\v 12 Más cuali elisquía sintla timonamiquisquía ica se tenan osa
catli quiichtequilijtoque ipilconehua, huan amo ica se catli
huihuitic catli quinextijtoc ihuihuiyo iniixpa miyac masehualme.
\p
\v 13 Catli quicuepilis ica catli amo cuali se catli quichihuilijtoc
catli cuali, nochipa quipiyas tlatelchihualistli ipan ichaj.
\p
\v 14 Se catli quipehualtis se cualantli eltoc quen se catli
quitzintlapos se hueyatl para ma pano ipan ichaj, elis ohui teipa
para quiquetzas. Huajca achi cuali xijcahua se tlamantli huan amo
xijpehualti para ximonajnanquili ica seyoc.
\p
\v 15 TOTECO quincualancaita catli quitlapojpolhuíaj se catli
melahuac quihuica tlajtlacoli, huan nojquiya quincualancaita catli
quitlatzacuiltíaj se catli amo tleno quichijtoc.
\p
\v 16 San tlapic para titlaxtlahuas para ma momachtis más se catli
huihuitic, catli ipan iyolo niyon se quentzi tlalnamiquilistli amo
quipiya o quinequi.
\p
\v 17 Se tocualhuampox temachtli techicnelía nochipa. Quema onca
tlaohuijcayotl techpalehuía quen elisquía se toicni.
\p
\v 18 Amo quipiya tlalnamiquilistli catli quiijtos quiixtlahuas
catli ihuampox tlahuica. Huihuitic catli mocuiltía quiixtlahuas
catli seyoc tlahuica, o temacas ifirma para seyoc.
\p
\v 19 Aqui quipactía tlanajnanquilis quipactía tlajtlacolchihua.
Aqui mohueyimati ica iseltzi motemolía tlaohuijcayotl.
\p
\v 20 Se catli fiero iyolo amo quema quipantis catli cuali, huan se
catli tlacajcayajtinemi ica catli quiijtohua quipantis catli amo
cuali.
\p
\v 21 Nelía se hueyi tequipacholi quipantis itata se telpocatl
catli tlahuel huihuitic. Amo quema yolpaquis itata se catli amo
tlatlepanita.
\p
\v 22 Yolpaquilistli tepalehuía quen elisquía se cuali pajtli.
Pero quema se masehuali moyoltequipachohua quitlamiltía
ichicahualis quen se cocolistli catli quihuatza iomiyo.
\p
\v 23 Tequitini catli amo cuajcualme quiselíaj tlaxtlahuili
ichtacatzi, huan yeca tlatlajtolsencahuaj amo xitlahuac.
\p
\v 24 Masehualme catli tlalnamiquij quimelac itaj tlalnamiquilistli
pampa quinequij quipiyase más, pero catli huihuitique campa hueli
tlachixtiyohuij pampa amo quimatij catli quinequij.
\p
\v 25 Se telpocatl catli amo quitlepanita TOTECO quincuesolmaca
itatahua. Quichihua ininnemilis ma eli ohui.
\p
\v 26 Amo quinamiqui para se quitlalilis tlatzacuiltili se catli amo
tlaixpanotoc. Niyon amo quinamiqui quihuijhuitequise se catli nemi
xitlahuac.
\p
\v 27 Se catli quimocuitlahuía icamac para amo camanaltis tlahuel,
yaya quipiya tlalnamiquilistli. Se masehuali catli quimachilía
miyac tlamantli amo nimantzi cualani.
\p
\v 28 Masque huihuitic, se masehuali nesi para tlalnamiqui sintla
amo molinía. Quema se quitzacua icamac nesi quen tlamachilía.
\c 18
\p
\v 1 Se catli itzcuimitl moiyocacahua tlen sequinoc masehualme pampa
san moilhuía catli yaya iseltzi quinequi. Monajnanquilía ica nochi
catli cuali inintlalnamiquilis.
\p
\v 2 Masehualme catli huihuitique amo quinequij tlamachilise, san
quinequij tematiltise catli moilhuíaj.
\p
\v 3 Se tlacatl catli fiero inemilis quimati tlahuihuiita. Nimantzi
pehua tepinahualtía huan tlanajnanquilía pampa ayacmo tleno
quitlepanita.
\p
\v 4 Icamanal se tlacatl catli tlalnamiqui eltoc quen atentli catli
tlahuel huejcatla ica se atl catli temaca se cuali nemilistli. Quen
meya miyac atl ipan se ameli, icamanal tepalehuía huan temaca
tlalnamiquilistli.
\p
\v 5 Tlajtlacoli sintla se juez quipalehuis catli amo cuali
quichihua. Nojquiya amo cuali sintla se juez quitlatzacuiltía se
catli amo tleno quichijtoc.
\p
\v 6 Catli huihuime quiijtohuaj tlatoctzitzi quipehualtía
tlanajnanquilistli. Inincamanal quihualica miyac tlahuilancayotl.
\p
\v 7 Ica icamac se catli huihuitic monenpolos. Ica catli quiijtohua
moijilpía ipan tlaohuijcayotl.
\p
\v 8 Icamanal se catli ichtacatzi mitzilhuis se camanali para
quitlaijilhuis seyoc, eltoc quen se tlamantli ajhuiyac ipan mocamac,
pero para catli quitlaijilhuía, calaqui hasta más ipan iyolijtic
para quicocos.
\p
\v 9 Se masehuali catli tlatzihui ipan itequi san se eltoc ica se
catli san quisosolohua catli iaxca iteco.
\p
\v 10 TOTECO eltoc quen se huejcapantic tepancali campa masehualme
hueli momanahuise. Cuajcualme yohuij campa TOTECO huan ayacmo aqui
hueli quincocos.
\p
\v 11 Catli tominpiyaj moilhuíaj para inintomi temachtli huelis
quinmanahuis tlen miquilistli. Ipan inintlalnamiquilis inintomi
quinmaca temachili quen se hueyi altepetl catli cuali tzactoc ica se
tepamitl catli tilahuac, pero mocajcayajtoque.
\p
\v 12 Quema se masehuali mohueyimati, huetzis ipan pinahualistli,
pero quema se moechcapantlalía, quihualiquilía tlatlepanitacayotl.
\p
\v 13 Nelía se huihuiyotl huan se pinahualistli sintla
titlananquilis quema noja ayamo tijcactoc nochi catli quichihuaj
campica para mitzilhuise.
\p
\v 14 Se masehuali hueli quiijiyohuis se cocolistli ipan itlacayo,
pero sintla se tlahuel quiyolcocos, nelía ohui quiijiyohuis.
\p
\v 15 Se masehuali catli tlalnamiqui nochipa quinequi quimachilis
tlamantli yancuic. Nochipa tlacactoc para quicaquis más
tlalnamiquilistli.
\p
\v 16 Se masehuali catli temaca nemactli quitlapohua puertas para
ipan calaquis. Huan huelis ajsis hasta iniixpa huejhueyi masehualme.
\p
\v 17 Nesi xitlahuac catli quiijtohua nopa achtihui masehuali catli
monextía iixpa se juez para momanahuis, pero teipa huala ne se huan
tenextilía para nelía tlaixpanotoc.
\p
\v 18 Nopa tequitini hueli quiquixtise suertes para quimatise
temachtli quenicatza quisencahuase se cualantli catli ohui. Ica
suertes tlamis camanali.
\p
\v 19 Nelía ohui para sempa timohuampoxchihuas ihuaya se moicni
catli tiquixpanotoc, huelis más amo ohui para tijtlanis se altepetl
catli yahualtic tzactoc ica tepamitl. Cualantli quinxejxelohua catli
achtihui mohuampoxchihuayayaj quen se puerta ica candado
quixejxelohua catli calijtic huan calteno.
\p
\v 20 Se catli quinpalehuía sequinoc huan temaca cuali tlamachtili,
quitemitía tlen ya iyolo quen se tlacualistli catli quiixhuitía
iijtic. Quema se masehuali quiijtohua catli quinamiqui, momaca miyac
paquilistli.
\p
\v 21 Se huelis quipantis miquilistli o se nemilistli cuali por
catli quiijtohua. Huan se catli tlahuel quinequi camanaltis quiselis
catli quitlantoc ica icamanal sintla cuali o amo.
\p
\v 22 Se tlacatl catli mocuili se sihuatl quipantijtoc se tlamantli
catli cuali, huan TOTECO nelía paquis ica catli quichijtoc.
\p
\v 23 Se teicneltzi motlajtlanía tlapalehuili, pero nopa masehuali
catli tominpiya quinanquilía chicahuac.
\p
\v 24 Se masehuali catli quinequi quinpiyas ihuampoyohua, monequi
quinpalehuis sequinoc quen mochihuaj masehualme catli
mohuampoxchijtoque. Pero itztoque tohuampoyohua catli más
techicnelíaj que toicnihua.
\c 19
\p
\v 1 Más cuali se masehuali teicneltzi catli monejnemiltía
xitlahuac huan amo se huihui masehuali catli amo quitlepanita
TOTECO.
\p
\v 2 Mahuilili sintla se acajya nimantzi quinequi quichihuas se
tlamantli catli amo quimati. Huelis nima huetzis ipan tlajtlacoli.
\p
\v 3 Se masehuali ica ihuihuiyo quicuapolohua iojhui catli cuali,
huan teipa quitlajtlacoltía TOTECO ica catli quipanotoc.
\p
\v 4 Se masehuali catli tominpiya quinpiya miyac ihuampoyohua, pero
se catli teicneltzi hasta ihuampoyohua quitlahuelcahuaj.
\p
\v 5 Se testigo catli san tlacajcayahua quiselis itlatzacuiltilis,
huan catli istlacatij iixpa se juez amo huelise momanahuise.
\p
\v 6 Miyac masehualme quitemohuaj se catli hueyi iyolo ica catli
teicneltzitzi para ma quinchihuili se favor. Nochi quinequij
mohuampoxchihuase ihuaya.
\p
\v 7 Sintla hasta iicnihua se teicneltzi quitlahuelcahuaj, huajca
achi más ihuampoyohua amo quinequise quiitase. Catli teicneltzi
quintemohua huan quinnojnotza ihuampoyohua, pero inijuanti amo
quichihuilíaj cuenta.
\p
\v 8 Se catli mochijtoc tlalnamiqui moicnelía. Huan se masehuali
catli quichihua campica para mojmostla quimachilis más quisas cuali
ipan nochi catli quichihua.
\p
\v 9 Se testigo catli quiijtohua catli amo melahuac iixpa se juez
quiselis se tlatzacuiltili. Huan aqui istlacati mocuapolos para
nochipa.
\p
\v 10 Amo cuali nesi para se catli huihuitic mohueyichihuas huan
quipiyas miyac ricojyotl. Niyon amo nesi cuali para se
tequipanojquetl quinnahuatis tlanahuatiani tlaque ma quichihuaca.
\p
\v 11 Se masehuali catli tlamachilía amo yolquentzi. Masehualme
quitlepanitaj pampa amo quichihuilía cuenta quema sequinoc
quiixpanoj.
\p
\v 12 Icualancayo se tlanahuatijquetl nelmahuilili quen tijcaqui
nanalca se león tecuani monechca. Pero quema se tlanahuatijquetl
quipiya hueyi iyolo huan quinequi tepalehuis, temaca paquilistli quen
ajhuachtli catli huetzi ipan sacapetlatl.
\p
\v 13 Se telpocatl catli huihuitic quimaca itata miyac
tlacuajcualoli. Huan se sihuatl catli mojmostla monajnanquilía ica
ihuehue itztoc quen se tlacuajcualoli catli amo caxanis.
\p
\v 14 Se tetata hueli quiaxcatis icone se cali huan nochi tlamantli
catli ica moricojchihuas, pero san TOTECO hueli quimaca se masehuali
isihua catli cuali itlalnamiquilis.
\p
\v 15 Nopa masehuali catli tlatzihui tlahuel cochi, pero teipa
tlahuel mayana pampa amo tequitqui.
\p
\v 16 Aqui quintlepanita itlanahuatilhua TOTECO quimocuitlahuía
inemilis, pero aqui quintlahuelcahua itlanahuatilhua miquis.
\p
\v 17 Quema se quipalehuía catli teicneltzi eltoc quen
quitlanejtisquía TOTECO. Huan yaya mitztlaxtlahuis para nochi catli
cuali tijchijtoc.
\p
\v 18 Xiquinxitlahua moconehua quema noja onca pajtli quema ayamo
quipiyaj miyac xihuitl. Sintla amo tiquintlalnamictis eltoc quen
tijnequi ma miquica.
\p
\v 19 Se masehuali catli nochipa cualantoc quiselis nopa
tlatzacuiltili catli quinamiqui, huan sintla tijmanahuis para amo
quipantis, noja más fiero elis catli quichihuas.
\p
\v 20 Xijtlacaquili nochi consejos huan xijseli inincamanal catli
mitztlacahualtíaj, huan tijpiyas miyac tlalnamiquilistli catli
huejcahuas nochi monemilis.
\p
\v 21 Se masehuali hueli monejnehuilía tlen miyac tlamantli para
quichihuas, pero catli TOTECO quiijtojtoc para oncas, ya nopa catli
panos.
\p
\v 22 Masehualme catli tetlasojtlaj quipiyaj yolpaquilistli. Más
cuali tielis se teicneltzi huan amo se istlacatiquetl.
\p
\v 23 Catli quiimacasi huan quitlepanita TOTECO quipantis
nemilistli. Nojquiya quipiyas temachili huan momanahuis ica catli
amo cuali.
\p
\v 24 Itztoque sequin catli tlahuel tlatzihuij hasta amo quinequij
momatlananase para motlamacase.
\p
\v 25 Quema se juez quihuitequi catli quinhuihuiita nochime,
sequinoc huihuime quichihuilise cuenta huan moxitlahuase. Huan
sintla quitlacahualtis se catli tlamachilía, yaya noja más
tlalnamiqui mochihuas.
\p
\v 26 Telpocame catli quinmaquilíaj inintatahua o quintojtocaj
ininnanahua, nelía mopinahualtijtoque iniixpa nochi sequinoc huan
quinpinahualtijtoque inintatahua.
\p
\v 27 Notelpoca, sintla ayacmo tijtlacaquilía quema seyoc
mitztlalnamictía, timohuejcatlalía tlen tlalnamiquilistli.
\p
\v 28 Nopa testigo catli istlacati iixpa se juez quinhuetzquilía
catli quinequij tlajtolsencahuase xitlahuac. Nochi catli quiijtohuaj
amo cuajcualme eltoc fiero.
\p
\v 29 Tlatzacuiltilistli quinchiya catli quinhuihuiitaj sequinoc.
Huan quinhuitequise catli huihuime ipan inincuitlapa miyac hueltas.
\c 20
\s Tlamachtili para amo tlaise
\p
\v 1 Catli quiiji huino huan tlaili catli cococ mochihua se catli
tlahuihuiita huan tlahuilana. Catli moihuintía ica tlaili nelía
huihuitic.
\p
\v 2 Se tlanahuatijquetl catli tlahuel cualani hasta mosisinía eli
quen nanalca se león tecuani. Huan catli quicualancamaca,
quipolohua inemilis.
\p
\v 3 Masehualme quitlepanitaj se catli moiyocacahua tlen
tlanajnanquilistli, pero se catli huihuitic tlatoctzitzi quinequi
quipehualtis cualantli.
\p
\v 4 Se masehuali catli tlatzihui amo momiltía quema ipohual, huan
amo tleno quipiya quema ajsi tonali para pixquistli.
\p
\v 5 Huejcatla ipan iyolo sesen masehuali eltoc nopa tlamantli catli
yaya achi más quiita para ipati huan catli yaya quinequi
quichihuas, huan catli tlalnamiqui quimati quenicatza quipalehuis
para tematiltis.
\p
\v 6 Miyac masehualme mitzilhuise para huelis timotemachis ipan
inijuanti para elise monelhuampoyohua ipan tlen hueli tlatoctzi,
pero nelía ohui para tijpantis se catli hueli ipan timotemachis.
\p
\v 7 Masehualme catli cuajcualme monejnemiltíaj xitlahuac, huan
TOTECO quintiochihuas ininconehua catli mochihuase quen inintatahua.
\p
\v 8 Quema se tlanahuatijquetl mosehuía ipan caltlanahuatili para
tetlajtolsencahuas, quitlachilía ica miyac cuidado sesen tlamantli
catli masehualme quiilhuíaj para huelis quitlamiltis catli amo
cuali.
\p
\v 9 Amo aqui ica iseltzi huelis quiijtos: “Nimoyolpajpactoc huan
ama amo nijpiya niyon se notlajtlacol”.
\p
\v 10 TOTECO amo quinequi quiitas niyon se tlatamachihuali catli amo
ajsitoc. Quicualancaita catli quitequihuía ome hilos para
quitamachihuas tlali o ome tlamantli teme para amo temacas se kilo
ajsitoc.
\p
\v 11 Sintla cuali quichijtinemi se masehuali, masque yaya se
conetl, nochi quiiximatij para itztoc xitlahuac. Nochi quiitaj
sintla monejnemiltía quen monequi huan sintla tlapajpactic iyolo
iixpa TOTECO.
\p
\v 12 TOTECO techmacatoc tonacas para hueli titlacaquise huan
toixteyol para huelis titlachiyase. Nochi ome quisencajtoc TOTECO.
\p
\v 13 Amo xijnequi san tisencochtos para amo timochihuas se
titeicneltzi. Más cuali xiisa cualca huan xitequiti chicahuac para
tijpiyas nochi catli tijnequi para tijcuas.
\p
\v 14 Se tlacojquetl quema tlacohua quiijtohua: “Inin amo cuali”
para ma quitemohuilise ipati, pero quema ya quicojtoc se tlamantli,
camanalti cuali pampa quipantijtoc catli nelcuali.
\p
\v 15 Onca oro huan piltetzitzi catli yejyectzitzi catli nelía
patiyo ipan ni tlaltipactli, pero achi más ipati se masehuali catli
tlalnamiqui huan catli camanalti ica camanali catli senquistoc
cuali.
\p
\v 16 Sintla se masehuali mocuiltía para tlaxtlahuas por seyoc
masque amo quiiximati o yaya se huejca ejquetl, xijpiya miyac
cuidado ica ya. Achi cuali xijcuilica itlaque o catli ipati catli
iaxca hasta mitztlamitlaxtlahuis.
\p
\v 17 Catli istlacati para mocuilis se pantzi o quiichtequi nelía
quiajhuiyacmati, pero teipa ipan icamac mocuepa quen cuanextli.
\p
\v 18 Amo xijtlamisencahua catli tijchihuas hasta
timotlatzintoquilijtoc ica sequinoc sintla cuali catli timoilhuía.
Amo xicalaqui ipan se tlahuilancayotl hasta tiquintlatzintoquilijtoc
sequinoc para ma mitzconsejomaca.
\p
\v 19 Se catli quipactía tetlaijilhuía amo hueli quiajocui se
camanali catli tijpohuilis ichtacatzi, huajca más cuali amo
ximohuampoxchihua ihuaya.
\p
\v 20 Se masehuali catli quitelchihua itata o inana miquis ipan
tzintlayohuilotl campa más temajmati.
\p
\v 21 Se catli quitlani miyac tlamantli ipan se tlatoctzi quema san
se telpoca tlacatl, amo neli se tlatiochihualistli pampa ayamo
quimati quenicatza quimocuitlahuis.
\p
\v 22 Amo ximoilhui para timomacuepas ica catli mitzchihuilíaj tlen
fiero. Más cuali xijcahuili imaco TOTECO huan yaya quisencahuas
cuali huan mitzmanahuis.
\p
\v 23 TOTECO amo quinequi quiitas tlatamachihuali catli amo ajsi.
Amo cuali catli quitamachihua se tlamantli huan tlacajcayahua.
\p
\v 24 San TOTECO quiijtohua tlaque tijpantise ipan toojhui, huajca
¿quenicatza hueli timasehualme tijmachilíaj catli techpano ipan
tonemilis?
\p
\v 25 Mahuilili para se acajya quitencahua iixpa TOTECO para
quimacas se tlamantli, huan teipa motlatzintoquilía sintla nelía
quinequi quichihuas quema ya moijilpijtoc para quichihuas.
\p
\v 26 Se tlanahuatijquetl catli tlalnamiqui quinitzquis amo
cuajcualme huan quintlatzacuiltis chicahuac.
\p
\v 27 TOTECO techmacatoc totonal catli quiiximati nochi catli
timoilhuíaj ipan toyolo. Eltoc quen se tlahuili catli
quitemojtinemi nochi catli eltoc topani.
\p
\v 28 Se tlanahuatijquetl catli quinicnelía imasehualhua huan
quinchihuilía catli xitlahuac, quipiya tequiticayotl ipan se
itlanahuatilis catli nelía temachtli.
\p
\v 29 Telpocame mohueyimatij pampa quipiyaj fuerza, huan catli
huehuentzitzi paquij pampa ya quiaxitijque miyac xihuitl huan
cuaichyoltoque.
\p
\v 30 Se tlatzacuiltili catli nelía chicahuac ipan itlacayo se
catli amo cuali eltoc quen se pajtli huan quichihua para ma
moyolpatlas. Eltoc quen nopa tlatzacuiltili quipajpaca hasta ipan
iyolo.
\c 21
\p
\v 1 Quen se milchijquetl catli quiatequía imil quihuica nopa
pilaojtzi campa quinequi ma yohui, quen nopa TOTECO quiyolpatla se
tlanahuatijquetl para quiyacana campa ipaquilis.
\p
\v 2 Sesen masehuali quiita para xitlahuac catli quichihua, pero
TOTECO quitlachilía sesen toyolo para quiitas para tlen tijchihuaj
catli tijchihuaj.
\p
\v 3 Más quipactía TOTECO quema tijchihuaj catli xitlahuac huan
catli cuali, huan amo nopa tlacajcahualistli catli tijmacaj.
\p
\v 4 Aqui mohueyimati huan motlepanita, huan nopa amo cuajcualme
catli san moilhuíaj catli fiero hueli quichihuase, nochi
tlajtlacolchihuaj.
\p
\v 5 Aqui achtihui moilhuía ica miyac cuidado quenicatza quichihuas
se tlamantli quipantis para quisas cuali itequi huan yaya
moricojchihuas. Pero nopa masehuali catli momajcahua nimantzi huan
quej hueli quichihuas se tequitl amo quicualtilis huan yaya
mochihuas se teicneltzi.
\p
\v 6 Nopa tomi catli se istlacatiquetl quitlani ica iistlacaticayo
amo huejcahuas. Nochi catli quej nopa quitlanij inintomi quitemohuaj
miquilistli.
\p
\v 7 Nopa fiero tlamantli catli quichihuaj amo cuajcualme
quintzontlamiltis, pampa inijuanti amo quinequij quichihuase catli
xitlahuac.
\p
\v 8 Masehualme catli amo quitlepanitaj TOTECO nemij ipan se ojtli
catli huijcoltic, pero masehualme catli cuajcualme mojmostla
quichijtinemij catli xitlahuac.
\p
\v 9 Más cuali para timocahuas ipan se tepanco moseltzi, huan amo
ipan se cali yejyectzi ica se sihuatl catli sencualantoc.
\p
\v 10 Ipan iyolo se masehuali catli amo quitlepanita TOTECO quinequi
quichihuilis catli icalnechca tlen fiero. Amo quema moilhuía para
quitlasojtlas.
\p
\v 11 Se catli huihuitzi san motlalnamictía quema quinita
quintlatzacuiltíaj catli tlahuihuiitaj. Pero quema se
quitlacahualtía se catli tlalnamiqui, nimantzi achi más mochihuas
tlalnamiqui.
\p
\v 12 TOTECO catli itztoc xitlahuac quimati catli fiero quichihuaj
amo cuajcualme ipan ininchajchaj huan quichihuas para nenpolihuise.
\p
\v 13 Se catli amo quichihuilía cuenta se catli teicneltzi quema
quitlajtlanía se tlapalehuili, amo quipantis tlapalehuili quema
yaya iseltzi tlahuel quitemos.
\p
\v 14 Se masehuali huelis quiyoltlalis catli tlahuel cualantoc ica
se nemactli ichtacatzi. Huan masque se quinextijtoc miyac
icualancayo, se tlaxtlahuili ichtacatzi quitlamiltis.
\p
\v 15 Quinpactía cuajcuali masehualme quema tequitini
tetlajtolsencahuaj xitlahuac. Pero quinchihuilía ma momajmatica
miyac masehualme catli amo quitlepanitaj TOTECO.
\p
\v 16 Se catli quitlahuelcahua itlalnamiquilis huan yohui ipan se
ojtli catli amo cuali, quipantis miquilistli.
\p
\v 17 Aqui san quinenpolohua itomi ica tlen hueli tlamantli catli
quipactía teipa mochihuas se teicneltzi. Huan aqui san mocohuía
huino huan tlaajhuiyacayotl para ica quiajhuiyaltis itlacayo amo
quema elis se tominpixquetl.
\p
\v 18 Se masehuali catli amo cuali o catli amo quitlepanita TOTECO
tlaijiyohuis ipatlaca se catli cuali o catli itztoc xitlahuac.
\p
\v 19 Más cuali para tiitztos moseltzi ipan se huactoc tlali, huan
amo ihuaya se sihuatl catli sencualantoc huan tlatelchihua.
\p
\v 20 Se masehuali catli tlalnamiqui quiajocui itomi huan catli
patiyo quipiya, pero se catli huihuitic nimantzi quinenpolohua nochi
catli quipiya.
\p
\v 21 Aqui quichihua campica para quichihuas catli nelxitlahuac huan
para tetlasojtlas, quipiyas nemilistli, ricojyotl huan
tlatlepanitacayotl.
\p
\v 22 Soldados catli tlalnamiquini hueli quitlanise se altepetl
masque quipiya imasehualhua catli tlahuel tejtetique. Quena, masque
inijuanti motemachíaj ipan itepa nopa altepetl para quinmanahuis,
tlalnamiquini hueli quitlamisosolose.
\p
\v 23 Se catli quipiya miyac cuidado ica catli quiijtohua,
momanahuis para amo mocalaquis ipan tequipacholi.
\p
\v 24 Masehualme catli onpano motlepanitaj, nojquiya tepinajtíaj
huan tehuihuiitaj pampa mohueyimatij. Inintoca teechcapantlaliani.
\p
\v 25 Se masehuali catli tlatzihui tlahuel quiixtoca miyac tlamantli
huan yeca tlatzintlanhuetzi. Pero amo quinequi tequitis ica imax
huan quipiyas se nemilistli catli cuali.
\p
\v 26 Catli tlatzihui nochipa itztoc itzcuimitl huan quinequi
sequinoc ma quimacaca tlamantli. Pero masehualme catli itztoque
xitlahuaque quipiyaj hueyi ininyolo huan temajmacaj miyac tlamantli.
\p
\v 27 TOTECO amo quinequi quiitas nopa tlacajcahualistli catli amo
cuajcualme quihualicaj. Huan achi más quincualancaita quema mochihuaj
quen cuali ininyolo pero san moijixpatlaj.
\p
\v 28 Se testigo catli istlacati iixpa se juez quinamiqui miquis.
Pero se testigo catli quitlacaquilía cuali catli
quitlatzintoquilíaj huejcahuas para itztos pampa quiijtohua catli
xitlahuac.
\p
\v 29 Se masehuali catli amo quitlepanita TOTECO san quiijtohua para
nochi eltoc temachtli masque amo neli, pero se masehuali catli
itztoc xitlahuac quichihua se tlamantli ma eli temachtli pampa
monejnemiltía cuali.
\p
\v 30 Niyon se masehuali hueli motlalis ihuaya TOTECO. Amo ipati
sintla tlahuel tlalnamiqui, o quimachilía miyac tlamantli o tlahuel
quicaqui consejos.
\p
\v 31 Ica miyac cuidado se masehuali hueli quicualtlalis nochi catli
monequi para quihuicas ipan se tlahuilancayotl, pero yaya TOTECO
catli quichihuas para tlatlanis.
\c 22
\p
\v 1 Más cuali para masehualme mitztlepanitase pampa tijchihua
catli cuali huan amo para tijpiyasquía miyac tomi. Más cuali
mitzcualitase para tiitztoc xitlahuac huan amo para tijpiyasquía
oro huan plata hasta onmocahua.
\p
\v 2 Catli tominpixtoque huan catli teicneltzitzi san se
inintlachijchijca quipiyaj. Yaya TOTECO nochi ome quinchijchijqui.
\p
\v 3 Se masehuali catli tlalnamiqui nimantzi momaca cuenta sintla
mahuilili campa yohui huan amo pano, pero se catli huihuitic amo
quichihua cuenta huan quipantía catli amo cuali.
\p
\v 4 TOTECO quitlaxtlahuis catli moechcapantlalía, huan quiimacasi
huan quitlepanita. Quichihuas para ma moricojchihua, huan ma itzto
para miyac xihuitl huan para nochi masehualme ma quitlepanitaca.
\p
\v 5 Onca miyac tlaijiyohuilistli huan tlamantli catli mahuilili
ipan iojhui se masehuali catli amo quitlepanita TOTECO, pero se
catli tlalnamiqui quinequi itztos para miyac xihuitl huan
mohuejcatlalis ica nochi catli amo cuali.
\p
\v 6 Xijnextili mocone quema noja tziquitetzi para ma yohui ipan
nopa ojtli catli TOTECO quisencajtoc para ya. Huan quema yaya
huehuejtiyas noja nopona monejnemiltis.
\p
\v 7 Se tlapijpixquetl quipiya tlanahuatili ica catli teicneltzitzi.
Huan masehualme catli quitlahuicaj tomi elise itequipanojcahua.
\p
\v 8 Se tlanahuatijquetl catli fiero inemilis quipantis
tlatzacuiltili ica catli quichihua, huan tlamis itequiticayo catli
ica temajmatiyaya.
\p
\v 9 TOTECO quitiochihuas catli quintlasojtla catli teicneltzitzi,
pampa quinmaca tlacualistli para quicuase.
\p
\v 10 Quema se quinquixtía catli tlahuihuiitaj, ayacmo oncas
tlahuilancayotl, niyon cualantli, huan ayacmo itztose catli
tetlaijilhuíaj.
\p
\v 11 Se tlanahuatijquetl mohuampoxchihua ininhuaya catli cuali
ininyolo. Quicualita catli camanalti ica yamanic camanali pampa
camanalti quen quinamiqui.
\p
\v 12 TOTECO quinmocuitlahuía masehualme catli quipiyaj
tlalnamiquilistli, pero yaya quintlasosolhuilía catli
quisencajtoque masehualme catli amo quitlepanitaj TOTECO huan
mocualtlalíaj para quichihuase catli fiero.
\p
\v 13 Se masehuali catli tlatzihui motejtechtía ica miyac tlamantli
para amo yas tequititi. Quiijtohua: “Amo niyas nitequititi pampa
huelis nijnamiquis se león tecuani catli nechmictis ipan ojtli.”
\p
\v 14 Nelía mahuilili icamanal se momecatijca sihuatl. Eltoc quen
se ostotl catli tlahuel huejcatla. Nopona huetzise tlacame catli
TOTECO quintelchijtoc.
\p
\v 15 Se oquichpil quichihua miyac tlamantli catli huihuitic por
nopa huihuiyotl catli eltoc ipan iyolo, pero catli quitlalnamictía
ica se cuapipitztli quiquixtilis ihuihuiyo.
\p
\v 16 Aqui moricojchihua pampa quintlaijiyohuiltía catli
teicneltzitzi o pampa quinmaca nemactli catli ya tlapijpiyaj,
mochihuas teicneltzi.
\s Nopa treinta tlalnamijca camanali catli nopa tlalnamiquini quiijtojque
\p
\v 17 Xijtlacaquili ni tlalnamijca camanali catli nimitzilhuía.
Huan xijtlali ipan moyolo nochi catli nimitzmachtía.
\v 18 Pampa elis nelía yejyectzi para ta sintla ticajocuis ipan
moyolo. Quena, xijtzontecomati para nimantzi tiquelnamiquis huan
huelis tijtenquixtis.
\v 19 Pampa na nijnequi ximotemachi ipan TOTECO, yeca ama
nimitzilhuijtoc nochi ni tlamantli para ta tijmatis.
\v 20 Ya nimitztlajcuilhuijtoc miyac tlamachtili para
nimitzconsejomacas huan nimitzpalehuis xijmati miyac tlamantli catli
cuali.
\v 21 Nijnequi xiquiximati catli melahuac para huelis tiquinnanquilis
xitlahuac catli mitztitlanque para tijpantis catli melahuac.
\p
\v 22 Amo xiquintlachtequili catli teicneltzitzi pampa amo quipiyaj
tomi para se inintlatempalehuijca. Niyon amo xiquinchihuili catli
amo xitlahuac iixpa se juez.
\v 23 Pampa TOTECO quinmanahuis catli teicneltzitzi huan quichihuas
para nochi quisas xitlahuac para inijuanti. Huan TOTECO tlahuel
quitlatzacuiltis catli quincocohuaj.
\p
\v 24 Ximohuejcatlali tlen masehualme catli mosisiníaj. Amo xinemi
ica se catli yolcuajcualaxtic.
\v 25 Amo nijnequi para nojquiya tijchihuas quen inijuanti
quichihuaj. Hueli timocuapolos ipan tlajtlacoli huan timiquis.
\p
\v 26 Amo quema ximocuilti para titlaxtlahuas catli seyoc masehuali
tlahuica. Niyon amo xijmaca catli moaxca para seyoc quipixtos hasta
catli tlahuica tlaxtlahuas.
\v 27 Pampa quema tlamis nochi catli tijpiya para titlaxtlahuas
seyoc icuenta, nojquiya hualase huan mitzcuilise motlapech.
\p
\v 28 Amo xiquijcuini nopa nepamitl catli huejcajya quitlalijque
mohuejcapan tatahua.
\p
\v 29 Se masehuali catli cuali quimati itequi huan quichihua ica
nochi iyolo, yaya quintequipanos tlanahuatiani. Amo san
quintequipanos tlen hueli masehualme.
\c 23
\p
\v 1 Quema titlacua ihuaya se tlanahuatijquetl, xijtlachili cuali
tlaque eltoc moixtla.
\v 2 Huan masque tlahuel timayana, amo xiixhui tlahuel, huan amo
xineltlacua masque nochi elis cuali huan ajhuiyac.
\v 3 Amo tlahuel xijnequi sesen tlamantli ajhuiyac catli onca, pampa
huelis ica mitzcajcayahuas.
\p
\v 4 Amo tlahuel xijchihua campica para titlapijpiyas. Amo
ximotonalpolo ipan ya nopa.
\v 5 Pampa quema san tomi tijtlachilía, catli tijpiya polihuis.
Quena, eltoc nopa tomi quen eltlapalyolis huan patlanis quen se
cuajtli.
\p
\v 6 Amo xitlacua ihuaya se catli itzcuimitl, pampa motequipachos
pampa mitztlamaca. Amo xiquixtoca itlacualis o itlapalehuil se
masehuali quej nopa.
\v 7 Pampa yaya huelis mitzilhuis: “Xitlacua huan xitlai”, pero
ipan iyolo amo paqui mohuaya. San motequipachos ica quesqui ipati
motlacualis.
\v 8 Teipa tiquisotlas nochi catli tijcuajqui. San tlapic elis para
tijtlascamatilijtoc ica yejyectzi.
\p
\v 9 Amo ximotonalpolo para tiquilhuis se catli huihuitic se
consejo, pampa san tlapic. Yaya amo quiselis mocamanal masque nelía
eli se cuali tlamachtili para ya.
\p
\v 10 Amo xiquijcuini nopa nepamitl campa ya eltoya tlen huejcajya,
niyon amo xiquinichtequilis inintlal catli icnotzitzi.
\v 11 Pampa yaya TOTECO inintlamanahuijca huan quipiya nochi
chicahualistli. Yaya mitztelhuis huan mitztlajtlanis cuenta
ininpatlaca inijuanti.
\p
\v 12 Ica nochi moyolo xijchihuili cuenta cuali tlamachtili.
Xijtlacaquili camanali catli mitzmacas miyac tlalnamiquilistli.
\p
\v 13 Amo xijcahua para tijtlacahualtis huan tijxitlahuas mocone.
Masque tijmaquilis ica se cuapipitztli, amo miquis.
\v 14 Sintla tijxitlahuas cuali, masque monequi tijmaquilis ica
cuapipitztli, huelis tijmanahuis para amo yas mictla.
\p
\v 15 Nocone, sintla ipan moyolo timochihuas titlalnamiqui, na
nojquiya nelía niyolpaquis.
\v 16 Quena, ica nochi noyolo nipaquis quema nimitzcaquis
ticamanaltis catli melahuac huan catli xitlahuac.
\p
\v 17 Amo quema xiquixtoca tijchihuas catli quichihuaj
tlajtlacolchihuani. Nochipa xiquimacasi huan xijtlepanita TOTECO.
\v 18 Huan tijpantis nochi quisa cuali para ta. Temachtli tijselis
nochi catli tijchiya.
\p
\v 19 Techtlacaquili, tinotelpoca, huan xieli titlalnamiqui.
Ximoxitlahua ipan moyolo para xijtoquili iojhui TOTECO.
\v 20 Amo ximosansejcotili ininhuaya catli quiijij miyac xocomeca
atl, niyon ica catli san quinpactía tlacuajtose masque ayacmo
mayanaj.
\v 21 Pampa ihuintini huan catli amo quicahuaj tlacuaj quema
ixhuitoque mopobrejtilíaj. Huan catli tlatzihuij san quipiyase
ininyoyo catli tzayantoc para ica moyoyontise.
\p
\v 22 Xijtlacaquili catli mitzilhuíaj motatahua catli
mitziscaltijque. Amo xiquinhuejcamajcahua masque ya huehuentzitzi.
\v 23 Xijtequihui motomi para xijtemo catli melahuac, huan para
tijpiyas tlalnamiquilistli, huan para tijcaquis tlamachtili. Quej
nopa tijpiyas se motlalnamiquilis catli nelcuali. Amo quema
xijcahua. Xijpixto ni tlalnamiquilistli huan amo aqui xijcahua ma
mitzquixtili.
\v 24 Itata se telpocatl catli monejnemiltía xitlahuac nelía
yolpaqui. Nelía se paquilistli para tijmati quihuica ta moeso.
\v 25 Huajca xijpaquilismaca motatahua catli mitziscaltijque. Ma
tlahuel paqui monana catli mitztlacatilti.
\p
\v 26 Notelpoca, ica nochi moyolo xijtoquili notlamachtil catli
tlalnamiqui. Huan xijtlachili ica miyac cuidado para timonejnemiltis
ipan se ojtli xitlahuac.
\v 27 Ximohuejcatlali tlen se ahuilnenca sihuatl pampa itztoc quen
se ostotl catli mahuilili. Quena, se momecatijca sihuatl eltoc quen
se ostotl catli tlahuel huejcatla huan tzocopiltic campa huetzij
tlacame huan ayamo huelise momanahuise.
\v 28 Se sihuatl quej nopa itztoc quen se tlachtejquetl catli
motlatía huan quichixtoc ajqueya huelis quicajcayahuas. Quitemohua
seyoc tlacatl para ma quiixpanos isihua.
\p
\v 29 ¿Ajqueya tlaijiyohuía? ¿Ajqueya quipiya tlacuajcualoli?
¿Ajqueya tlatoctzitzi tlahuilana huan quihuicaj iniixpa tequitini?
¿Ajqueya nochipa tetlaijilhuía? ¿Ajqueya quipiya campa mococojtoc
san tlapic? ¿Ajqueya quipiya iixteyol hasta yayahuic?
\v 30 Inijuanti catli quiijij miyac huino huan san quitemojtinemij
para quipantise se yancuic tlaili catli achi más cococ.
\v 31 Amo xiquiji se tlaili catli cococ. Amo xijnechcahui huino
catli tiquita nesi para ajhuiyac o catli ya posoni pampa chicahuac.
\v 32 Pampa teipa huino mitzcocos quen se cohuatl mahuilili catli
tetlanquechía. Elis quen nopa colotl catli más temaca
tlacuajcualoli quema tetzopinía.
\v 33 Quema tiihuintitoc, mitzchihualtis para tiquitas miyac
tlamantli catli amo neli. Mitzchihualtis para xicamanalti catli
fiero huan quen se tlacatl catli quipolojtoc itlalnamiquilis.
\v 34 Huan mitzchihualtis para xinejnemi campa hueli quen
tiitztosquía tlatlajco nopa hueyi atl, o quen timotlatzquilijtos
ipan imacuayo se hueyi cuahuitl campa san timohuijhuisohua pampa amo
tijmati canque tiitztoc.
\v 35 Huan teipa tiquijtos: “Nechhuitejque huan nechcocojque, pero
amo nimomacac cuenta, niyon amo nijmachili sintla tecoco. Huajca
quema niisas se quentzi, sempa niyas huan nijtemoti más huino para
niquijis.”
\c 24
\p
\v 1 Amo xiquixtoca catli quichihuaj amo cuajcualme, niyon amo
xijnequi tiitztos ininhuaya.
\v 2 Pampa inijuanti mojmostla san moilhuíaj tlaque hueli
quiichtequise. Quema camanaltij, san catli fiero quiijtohuaj.
\p
\v 3 Pero tlalnamiquini ica inintlalnamiquilis quichijchihuaj se
cali, huan ica inintlaiximatilis quimatij quitlalilise itzinpepechol
para elis nelía cuali.
\v 4 Pampa inijuanti quimatij quichihuaj miyac tlamantli,
quicualchijchihuaj sesen cuarto ipan ininchajchaj, huan quintemitía
ica miyac tlamantli yejyectzitzi huan catli patiyo.
\p
\v 5 Se tlacatl catli tlalnamiqui quitlanis se catli quipiya fuerza.
Achi más ipati tlalnamiquilistli huan amo tetili.
\v 6 Se catli tlalnamiqui huelis tlatlanis ipan tlahuilancayotl
pampa quintlajtlanía tlalnamiquini miyac consejo.
\p
\v 7 Pero se tlacatl catli huihuitic amo hueli quiaxilis
tlalnamiquilistli, niyon amo quimatis tlaque quiijtos quema
quihuicase ipan tequicali para quitlajtolsencahuase.
\p
\v 8 Se catli san moyolilhuía quenicatza quichihuas catli amo
cuali, sequinoc quiiximatij para se masehuali catli fiero
itlalnamiquilis.
\v 9 Nochi catli moilhuíaj para quichihuase catli huihuitique eltoc
se tlajtlacoli. Huan sequinoc masehualme amo quinequij quiitase
catli tlahuihuiitaj pampa mohueyimatij.
\p
\v 10 Sintla timotlatzcanequis tonaya ipan motequi, noja más
caxantiyas mofuerza para tijtlamiltis.
\p
\v 11 Xiquinmanahui nopa masehualme catli quinhuicaj para
quinmictise masque amo tleno quichijtoque. Xiquinmaquixti catli
quinhuahuatatztiyohuij para quinmictise.
\v 12 Amo huelis timotechtis huan tiquijtos para amo tijmatiyaya
tleno. ¿Amo tijmati para TOTECO catli quiiximati ininyolo nochi
masehualme quiiximati moyolo ta, huan yaya quimati para tijmatiyaya?
\p Huan yaya techtlaxtlahuis sesen tojuanti quen quinamiqui ica
catli tijchijtoque.
\p
\v 13 Notelpoca, xijcua sayolnectli pampa nelía cuali huan tijmatis
para tzopelic.
\v 14 Quej nopa nojquiya moalma quimatis tlalnamiquilistli para
nelcuali. Sintla tijpantis tlalnamiquilistli, nochi quisas cuali
para ta. Huan nochi catli cuali timochiyayaya para panos, tijpantis.
\p
\v 15 ¡Anmasehualme catli amo anquitlepanitaj TOTECO! Ayacmo
ximochiyaca icalteno se masehuali catli xitlahuac para
anquichihuilise catli fiero. Amo xijtlachtequilica catli
quipiya ipan ichaj.
\v 16 ¿Amo anquimatij para se cuali masehuali masque
anquitlaijiyohuiltise chicome hueltas, nochipa sempa motlananas?
Pero quema san setzi tlaijiyohuilistli anmechajsis anamo cuajcualme,
elis cuali para anmechtzontlamiltis.
\p
\v 17 Amo xiyolpaqui quema mocualancaitaca huetzi ipan
tlaohuijcayotl. Amo xijhuetzquili quema yaya quipiya tequipacholi,
\v 18 pampa TOTECO amo quipactis catli tijchihua. Huelis cualanis
ica ta huan ayacmo quitlatzacuiltis ya.
\p
\v 19 Amo ximotequipacho pampa amo tiitztoc quen amo cuajcualme,
niyon amo xiquixtoca inintomi.
\v 20 Pampa amo tleno catli cuali quipantise teipa. Ininnemilis amo
cuajcualme sehuis san quen se tlahuili.
\p
\v 21 Notelpoca, xiquimacasi huan xijtlepanita TOTECO huan nopa
tlanahuatijquetl. Amo ximomanelo ininhuaya masehualme catli amo
tlatlepanitaj.
\v 22 Sintla tiquintoquilía, timopantis para timotzontlamiltijtoc
ininhuaya, pampa ¿ajqueya quimati hasta canque TOTECO huan nopa
tlanahuatijquetl quintlaijiyohuiltis?
\s Sequinoc tlalnamijca camanali tlen tlalnamiquini
\p
\v 23 Nica eltoc tlalnamijca camanali catli quiijtojque masehualme
catli tlalnamiquij. Amo cuali para se tetlajtolsencajquetl
tlachicoicnelis quema tetlajtolsencahuas.
\v 24 Sintla quiilhuis catli tlaixpanotoc: “Amo tijpiya
tlajtlacoli”, nochi masehualme quicualancaitase huan
quitelchihuase.
\v 25 Pero se juez catli tetlajtolsencahuas xitlahuac huan
quintlatzacuiltis catli nelía tlaixpanotoque, quiselis
tlatiochihualistli.
\p
\v 26 Se tlanahuatijquetl quinextilía miyac tlatlepanitacayotl se
acajya catli quinanquilis xitlahuac quema quitlatzintoquilía tlaque
pano.
\p
\v 27 Achtihui xijtlani nopa tomi catli monequi para ica
timopanoltis, teipa ximocualtlalili momil huan hasta teipa
xijpehualti xijchijchihua mochaj.
\p
\v 28 Amo ximochihua se testigo catli quiijtos catli amo neli tlen
mocalnechca catli xitlahuac nemi. Amo xitlacajcayahua huan
xiistlacati tlen seyoc.
\v 29 Amo quema xiquijto: “Quen yaya nechchijqui, na nojquiya
nijchihuilis. Nijcuepilis ica nochi catli fiero nechchihuilijtoc.”
\p
\v 30 Na nipanoc imila se masehuali catli tlatzihui. Quena, nipanoc
ipan ixocomecamil se catli huihuitic.
\v 31 Huan niquitac para tlahuel cuatitla eltoya ica huitztli huan
xihuitl. Huan ya huetztoya nopa tepamitl catli ica quitzactoya
yahualtic.
\v 32 Huajca quema niquitac nochi ya nopa, nijtzontecontlali huan
nimonejnehuili quej ni.
\v 33 Sintla se moilhuía: “Noja se quentzi más nicochis huan
nimosiyajquetzas. San se tlatoctzi más nimomanajnahuas huan amo
nitequitis.”
\v 34 Catli ya nopa quiijtohua ica se tlatoctzi mochihuas se
teicneltzi. Nimantzi itlaijiyohuilis huetzis ipani quen se
tlachtejquetl huala ipan se tlatoctzi quema amo quichiya.
\c 25
\s Nopa ompa amatlajcuiloli tlen itlalnamijca camanal Salomón
\p
\v 1 Ya ni nojquiya eltoc itlalnamijca camanal Tlanahuatijquetl
Salomón. Tlacame catli quitequipanohuayayaj Ezequías,
tlanahuatijquetl ipan tlali Judá, quiijcuilojque ni camanali quema
ya mictoya Salomón.
\p
\v 2 TOTECO quinextía ihueyitilis ica nochi tlamantli catli
ichtacatzi huan amo tihuelij tijmachilíaj. Pero nopa tlanahuatiani
quinextíaj ininhueyitilis para momachtíaj huan quitemohuaj
quimachilise nochi catli huelij.
\p
\v 3 Amo aqui hueli quimachilía quesqui ihuejcapanca ilhuicactli,
niyon quesqui ihuejcatlanca huelis se tlaxahuas ipan tlaltipactli.
Nojquiya amo aqui hueli quimatis nochi catli moilhuía se
tlanahuatijquetl ipan itlalnamiquilis.
\p
\v 4 Quema se quipanoltía plata tepostli ipan tlitl, quisa nochi
isoquiyo huan mocahua senquistoc tlapajpactic. Huajca quena, nopa
teposchijquetl hueli ica quichijchihuas se tlamantli catli tlahuel
patiyo.
\v 5 Huan quej nopa nojquiya xiquinquixtica nochi nopa amo
cuajcualme ipan icaltlanahuatil se tlanahuatijquetl, huan
itlanahuatilis elis temachtli huan nochi itequiticahua
tetlajtolsencahuase xitlahuac.
\p
\v 6 Amo xiquilhui se tlanahuatijquetl para monequi mitznextilis
tlatlepanitacayotl, niyon amo ximocalaqui campa huejhueyi tlacame
quen tiitztosquía san se ininhuaya.
\v 7 Más cuali para timochiyas huan huelis teipa yaya mitznotzas
para ximosehuiti campa achi cuali. Pampa sintla timocalaquis nechca
nopa tlanahuatijquetl huan yaya mitzilhuis para xiya tlatzintla,
mitzpinahualtis tlamiyacapa.
\p Masque ipa tiquitztoc catli quichihua moseltzi,
\v 8 amo nimantzi xiya ipan tequicali para tijtlatelhuis
mocualancaitaca ipan se cualantli, pampa amo tijmati canque
mitzhuicas huan huelis teipa mitzpinahualtis pampa amo tijmati
tlaque tiquijtos.
\v 9 Achtihui xijchihua campica timoxitlahuas ica catli quichijtoc
para san ta huan ya anquimatise. Amo aqui seyoc xijpohuili catli
onca.
\v 10 Pampa hueli seyoc catli quicaquis mitztlatelhuis para san
titetlaijilhuía, huan quej nopa nochi moilhuise tlen ta para
nochipa.
\p
\v 11 Quema se mitzilhuis se camanali catli quinamiqui huan catli
mitzpalehuía ipan nopa tlatoctzi, tlahuel miyac ipati. Eltoc quen se
manzana tlen oro catli eltoc ipan se chiquihuitl catli
quichijchijtoque ica plata.
\p
\v 12 Se catli tlacaqui quiselía icamanal se tlalnamijquetl catli
quitlacahualtía quema monequi. Quena, quiita iconsejo quen
elisquía se anillo o se costli tlen senquistoc oro.
\p
\v 13 Se tlayolmelajquetl catli temachtli huan quiijtohua nochi
catli melahuac eli quen ya ajsitosquía tonali para tlaseseyas quema
huejcajtoc para tlahuel tlatotoniya. Quena, quimacas iteco catli
quititlantoc tlasejseltili ipan iyolo pampa quimati para temachtli
itlatitlanil tepohuilis senquistoc nopa camanali catli quinequi.
\p
\v 14 Aqui quitencahua temacas se tlamantli huan amo temaca, eli
quen nopa mixtli huan ajacatl catli amo quihualica atl.
\p
\v 15 Xijpiya moyolo huan xicamanalti ica yamanic huan se
tlanahuatijquetl quichihuas mocamanal, huan tijseseltis se catli
tlahuel cualantoc.
\p
\v 16 Sintla tijpantis sayolnectli, amo xijcua miyac masque tlahuel
ajhuiyac, pampa sintla onpano miyac tijcuas, teipa tiquisotlas.
\p
\v 17 Se catli mocalnechca, amo xijpaxalo neltlatoctzitzi, pampa
huelis tiquixpajtilis huan teipa yaya amo quinequis mitzitas.
\p
\v 18 Se catli quiistlacahuía seyoc masehuali nelía
quitlaijiyohuiltía. Quicocohua quen se martillo, o se cuchillo o se
machete catli tlahuel tlatequi.
\p
\v 19 Quema se acajya ipan tlaohuijcayotl motemachía ipan se
masehuali catli tlacajcayahua, eli quen tlacuasquía ica itlancoch
catli cualotoc o quen nejnemisquía ica se iicxi cocojtoc.
\p
\v 20 Sintla timonextis tiyolpactoc iixpa se catli tlahuel
moyoltequipachohua, elis quen tiquichtequilisquía iyoyo quema
tlaseseya, o quen tijtlalilisquía vinagre o istatl campa icocohua.
\p
\v 21 Sintla se mocualancaitaca mayana, xijtlamaca. Sintla amiqui,
xijmaca atl.
\v 22 Huan ya nopa quichihualtis ma moixpinahua, huan TOTECO
mitztlaxtlahuis ica cuali.
\p
\v 23 Temachtli se ajacatl catli huala ica norte quihualica atl,
huan nojquiya temachtli se catli camanalti fiero quiyolitía
cualantli.
\p
\v 24 Más cuali para tiitztos san moseltzi ipan se pilcaltzi catli
sosoltic, huan amo ipan se hueyi cali catli yejyectzi ihuaya se
sihuatl catli san cuajcualantoc.
\p
\v 25 Se cuali camanali catli ajsi tlen moteiximatca catli huejca
itztoc ipan seyoc tlali eli cuajcualtzi quen nopa atl sesec catli
quiiji se masehuali catli tlahuel amiqui.
\p
\v 26 Sintla se cuali masehuali motemaca para quichihuas catli fiero
ininhuaya amo cuajcualme, eli quen catli quisoquihuisquía o quen
quimoyahuasquía se ameli.
\p
\v 27 Amo cuali para se quicuas miyac sayolnectli. Nojquiya amo
cuali para se masehuali moilhuis tlen nopa tlatlepanitacayotl catli
huelis quinamiqui para quiselis.
\p
\v 28 Se masehuali catli amo hueli motzacuilía para amo cualanis
huan quichihuas catli amo quinamiqui, nelía mahuilili quen se
altepetl catli amo quipiya tepamitl yahualtic para quimanahuis.
\c 26
\p
\v 1 Amo quinamiqui para asetl huetzis ipan nopa tonali quema
tlahuel tlatotoniya, niyon para tlaquiyahuis quema onca pixquistli.
Nojquiya amo quinamiqui para se catli huihuitic quiselis
tlatlepanitacayotl.
\p
\v 2 Quej nopa tototl soquipali catli mocuapolojtoc huan quen nopa
toctocme catli san patlantinemij, nojquiya se tlatelchihualotl amo
quiajsis se acajya sintla amo quipiya itlajtlacol.
\p
\v 3 Se masehuali huelis quinejnemiltis se cahuayo ica se cuetlaxtli
imaco. Huelis quinejnemiltis se burro sintla quiquechilpis, huan
huelis quinejnemiltis se catli huihuitic sintla quipiya se
cuapipitztli imaco para icuitlapa.
\p
\v 4 Quema timonajnanquilía ihuaya se catli huihuitic, amo
xijnanquili nopa tlamantli huihuitic catli quiijtohua quen elisquía
camanali catli quinamiqui pampa ta tinesis tihuihuitic nojquiya.
\p
\v 5 Pero quema timonajnanquilía ihuaya se catli huihuitic,
xijcuepili para tijpannextis para nelía huihuitic nopa masehuali,
para yaya amo mohueyimatis huan moilhuis para yaya más tlalnamiqui.
\p
\v 6 Catli motemachía ipan se masehuali huihuitic para quihuicas se
camanali para quiyolmelahuas seyoc catli quiijtojtoc, amo quipiya
tlalnamiquilistli. Yaya eli quen se catli moicxitzontequisquía o
quiijisquía se tlamantli pajyo catli temictía.
\p
\v 7 Se catli icxi huactoc, iicxihua san huiyontoque huan niyon
quentzi amo quipalehuíaj para nejnemis. Nojquiya ni tlalnamijca
tlamachtili niyon quentzi amo quipalehuíaj se catli huihuitic.
\p
\v 8 Sintla tijtlepanitas se catli huihuitic, tijchijtoc catli
huihuitic quen se huihui tlacatl catli quiilpisquía se tetl ipan
tehuitlatztli para amo cana yasquía.
\p
\v 9 Se ihuintiquetl amo quimachilía sintla cococ quema mochajcohua
ica se huitztli, huan se catli huihuitic amo hueli quimachilía ni
tlalnamijca consejos.
\p
\v 10 Sintla se tecojtli quiselis se tequipanojquetl catli huihuitic
o se catli moquetza ipan tianquis, nopa tecojtli amo quimati catli
ipantis. Eltoc quen se soldado catli campa hueli tlamotla huan amo
quimati ajqueya quicocos.
\p
\v 11 Quen se chichi mocuepa huan quicua sempa catli quiisotlatoc,
nojquiya se catli huihuitic sempa quichihua nopa huihuiyotl catli
quionchijtoc.
\p
\v 12 Pero más amo ohui para tijmachtis se catli huihuitic ma eli
tlalnamiqui, huan amo se catli mohueyimati.
\p
\v 13 Para amo yas tequititi se tlacatl catli tlatzihui quiijtohua:
“Huelis itztos se tecuani ipan ojtli o ipan tianquis, huajca
mahuilili para niquisas.”
\p
\v 14 Huan quen nopa puerta catli momalacachohua ipan nopa tepostli
campa motlatzquilijtoc, quej nopa se tlacatl catli tlatzihui
tlatoctzitzi mocuepa huan moteca ipan itlapech.
\p
\v 15 Sequin masehualme itztoque nel tlatzihuij hasta quiohuijmatij
para motlamacaj.
\p
\v 16 Catli tlatzihuij motlepanitaj huan moitaj para nelía
tlalnamiquij. Moilhuíaj para inintlalnamiquilis quionpano catli
quipiyaj chicome tlalnamijca masehualme catli tlahuel quimatij
teconsejomacaj.
\p
\v 17 Se catli mocalaquía ipan se cualantli campa amo icuenta
quichihua catli mahuilili huan huihuitic. San se quipolohua
itlalnamiquilis quen se catli quitlananas se chichi ipan inacas.
\p
\v 18 Quen se catli locojti quimajcahua tlicuahuitl lementoc huan
cuatlamintli campa hueli huan amo quichihuilía cuenta sintla
temictis,
\v 19 quej nopa nojquiya itztoc se catli quicajcayahua ihuampox huan
teipa quiijtohua para san ahuilcamanaltiyaya.
\p
\v 20 Se tlitl sehuis quema amo quipiya cuahuitl, huan nojquiya
tlamis cualantli campa amo aqui se catli tetlaijilhuía.
\p
\v 21 Catli quipiya tlicoli catli totonic o catli quipiya tlitl
nimantzi hueli quilemenaltis cuahuitl, huan se masehuali catli
quipactía tlanajnanquilía nimantzi quipehualtía cualantli.
\p
\v 22 Icamanal se catli ichtacatzi mitzilhuis se camanali para
quitlaijilhuis seyoc, eltoc quen se tlamantli ajhuiyac ipan mocamac,
pero para catli quitlaijilhuía, calaqui hasta más iyolijtic para
quicocos.
\p
\v 23 Se soqui chachapali catli quialtijtoque ica plata tecajcayahua
quen se masehuali catli pano fiero iyolo pero quitlatía ica
camanali catli yamanic.
\p
\v 24 Se masehuali catli ipan iyolo tecualancaita quemantic
quitlatía icualancayo ica miyac camanali catli yejyectzi, pero amo
xijneltoquili pampa san quichihua para mitzcajcayahuas.
\v 25 Masque mitzcamanalhuis quen se cuali masehuali, amo
xijneltoquili, pampa itlalnamiquilis tlahuel temitoc ica nochi catli
fiero.
\v 26 Huan masque ipan nopa tlatoctzi amo mitznextilis cualantli
para mitzcajcayahuas, teipa mopannextis icualancayo tlamiyacapa huan
nochi quiitase.
\p
\v 27 Sintla tijchihua se ostotl quen se tlaquetztli para nopona ma
huetzi mohuampox, nopona timotlaquechilía. Huan sintla
tijcuamimilos se hueyi tetl para ma quitzonpechiti seyoc, mocuepati
nopa tetl huan mitztzonpechiqui ta.
\p
\v 28 Se catli quinistlacahuía sequinoc, quincualancaita nopa masehualme
huan quincocohua. Huan se catli camanalti ica alaxtic camanali para
quiyejyectlalis seyoc huan quicajcayahuas, tlahuel tlasosolohua.
\c 27
\p
\v 1 Amo ximohueyimati ica catli timoilhuía para tijchihuas mostla,
pampa amo tijmati tlaque panos ipan seyoc tonali.
\p
\v 2 Amo xicamanalti para timohueyimatis ica moseltzi, achi cuali
xiquincahuili para sequinoc ma mitzhueyichihuaca.
\p
\v 3 Se tetl nelía etic huan nojquiya etic xali, pero achi más
etic quema se catli huihuitic tlahuel mitzcualancaita.
\p
\v 4 Achi más mahuilili se catli quiixtoca catli sequinoc quipiyaj
huan amo catli mosisinía huan tecualancaita.
\p
\v 5 Más cuali se catli mitztlacahualtis chicahuac quema monequi,
huan amo se catli mitzilhuis ichtacatzi para mitzicnelis pero amo
quema mitznextilía.
\p
\v 6 Achi más temachtli tohuampox catli techcocohua quema monequi
techajhuas, huan amo se tocualancaitaca catli techtzoponía san para
techcajcayahuas.
\p
\v 7 Se catli ixhuitoc hasta sayolnectli amo quinequi quiitas, pero
se catli mayancamictinemi quicua nochi catli quiajsi masque chichic.
\p
\v 8 Se tototl catli patlantehua huejca tlen itepasol, eltoc quen se
masehuali catli quicajtehua campa tlacatqui para huejca nemis.
\p
\v 9 Se aceite o se tlaajhuiyacayotl catli ticajhuiyacmatij
techyolpactía. Huan se cuali consejo catli se tohuampox techilhuía
techmaca paquilistli hasta campa hueli topani.
\p
\v 10 Amo quema xiquintlahuelcahua mohuampoyohua, niyon motata
ihuampoyohua, huan quema tijpiyas se tequipacholi amo monequis
tijtemoti moicni catli itztoc huejca. Pampa más cuali se mohuampox
catli itztoc nechca huan amo se moicni catli itztoc huejca.
\p
\v 11 Xieli titlalnamiqui, tinotelpoca, huan techmacas miyac
paquilistli. Sintla tielis se tlalnamijquetl, huelis niquinnanquilis
catli nechtlaijilhuíaj.
\p
\v 12 Se catli tlalnamiqui nimantzi momaca cuenta sintla imelac
huala catli mahuilili huan momanahuía. Pero catli huihuitique amo
momacaj cuenta huan quinajsi catli quincocohua.
\p
\v 13 Xijcuili se tlamantli catli iaxca nopa masehuali catli
mocuiltía para mitztlaxtlahuis catli seyoc mitztlahuiquilía catli
yaya amo cuali quiiximati. Huan nojquiya xicajocuili miyac tlamantli
catli iaxca catli mocuiltía para mitztlaxtlahuis catli
mitztlahuiquilía se momecatijca sihuatl.
\p
\v 14 Sintla nelijnaloc tijcuatzajtzilis mohuampox para
tijtlajpalos, yaya quiitas para tijtelchihua.
\p
\v 15 Se sihuatl catli tlatoctzitzi mosisinía huan cuajcualantoc,
eli san se ica nopa atl catli tlatoctzitzi chichipica huan
mitzcuatotonía miyac quema tlami tlaquiyahui.
\v 16 Aqui mochihua quen quiquetza icualancayo, eltoc quen
quichihuasquía campica para quitzacuilisquía nopa ajacatl o
quicuis aceite ipan imax para quihuicas.
\p
\v 17 Monequi se tlamantli tepostli para quitentis seyoc tepostli.
Huan se masehuali tlalnamiqui quipalehuía ihuampox más
motlalnamictis.
\p
\v 18 Aqui quimocuitlahuía itlatochua, quicuas itlajca. Nojquiya se
tequipanojquetl catli quimocuitlahuía catli iaxca iteco quiselis
tlatlepanitacayotl.
\p
\v 19 Se masehuali hueli moita ipan atl huan quiita quen nesi
ixayac. Nojquiya catli se masehuali quichihua ica nochi iyolo
quinnextilía sequinoc sintla yaya itztoc cuali o amo cuali.
\p
\v 20 Nochipa miquilistli quinequi quinpantis más masehualme para
quincuilis ininnemilis, huan mictla amo quema temi ica mijcatzitzi.
Huan se masehuali catli quiita tlamantli catli yancuic amo quema
yolpaqui ica catli ya quipixtoc, noja quinequi más.
\p
\v 21 Monequi tlitl para quiyejyecose oro huan plata para quiitase
sintla nelía cuali. Pero se masehuali quiyejyecohuaj quema
quihueyimatij sequinoc. Quen yaya quiselía inincamanal catli
quiijtojtoque quinextía sintla cuali iyolo o amo.
\p
\v 22 Se catli huihuitic amo quicahuas ihuihuiyo, masque
tijtlalisquía ipan se hueyi chilcaxitl ica sintli huan tlahuel
tijtetzonas para tiquiniyocacahuas.
\p
\v 23 Mojmostla cuali xijmati quenicatza itztoque sesen
moborregojhua huan mohuacaxhua catli ica timoaxilijtoc.
\v 24 Pampa masque tiitztoc se tlapijpixquetl, catli tijpiya amo
huejcahuas para nochipa sintla amo tijmocuitlahuis. Masque se itztoc
tlanahuatijquetl amo mocahuas nopa tequiticayotl para iconehua huan
iixhuihua sintla amo quimocuitlahuía catli pano ipan nopa
caltlanahuatili ica miyac cuidado.
\v 25 Quema tijtzontequis nopa sacatl catli chicajtoc, chamanis nopa
xihuitl catli xoxohuic. Huan teipa huelis tijpixcas sequinoc xihuime
tlen cuatitla.
\v 26 Huelis tijtequihuis iniijhuiyo moborregojhua para
timochijchihuilis moyoyo para quema tlaseseya. Huelis tiquinnemacas
mochivojhua huan ica timocohuis se mili.
\v 27 Ica ininlechi mosihua chivojhua huelis timopanoltis ininhuaya
moteiximatcahua huan motequipanojcahua.
\c 28
\p
\v 1 Se masehuali catli amo quitlepanita TOTECO cholohua masque amo
aqui quitojtoca, pero se catli monejnemiltía xitlahuac moneltlalía
quen se león tecuani.
\p
\v 2 Quema tlahuel tlajtlacolchihuaj imasehualhua se tlali,
momiyaquilise inintlanahuatijcahua huan inintlal huelis
tlatzintlanhuetzis. Pero quema tlanahuatía se masehuali catli
itztoc xitlahuac huan tlalnamiqui, onca temachili ipan se tlali.
\p
\v 3 Quema se tlacatl catli teicneltzi quintlachtequilía catli más
teicneltzitzi que ya, eltoc quen onpano chicahuac huetzi atl huan
quitlaminenpolohua nochi mili huan amo quicahua sintli para oncas
tlaxcali.
\p
\v 4 Masehualme catli amo quitlepanitaj tlanahuatili
quinyolchicahuaj catli amo cuajcualme, pero catli quichihuaj catli
quiijtohua tlanahuatili quinfuerzajtlamiltía.
\p
\v 5 Amo cuajcualme amo quimachilíaj quenicatza huelis mochihuas
catli xitlahuac ipan se tlali, pero catli quitemohuaj TOTECO huan
quichihuaj catli ipaquilis quimachilíaj nochi tlamantli.
\p
\v 6 Más cuali tielis se teicneltzi catli monejnemiltía xitlahuac,
huan amo se tlapijpixquetl catli fiero iojhui.
\p
\v 7 Se tlalnamijca telpocatl quintlepanita itlanahuatilhua TOTECO,
pero se telpocatl catli nemi ininhuaya catli amo tequitij huan nochi
se tonal tlacuaj quipinahualtía itata.
\p
\v 8 Se catli quintlanejtía itomi pilteicneltzitzi huan quininama
itlanca para más huelis moricojchihuas, quipolos iricojyo. Itomi
ajsis imaco seyoc catli hueyi iyolo ica catli teicneltzitzi.
\p
\v 9 Sintla se masehuali amo quitlepanita itlanahuatilhua TOTECO,
TOTECO amo quitlacaquilis quema motlatlajtía.
\p
\v 10 Se masehuali catli quihuica seyoc catli itztoc xitlahuac ipan
se ojtli catli amo cuali, huetzis ipan nopa ostotl catli
quisencahuayaya para seyoc. Pero catli quinyolchicahua cuajcualme
para más ma quichihuaca catli xitlahuac, quiselis itlaxtlahuil.
\p
\v 11 Se tlapijpixquetl motlepanita huan moilhuía para tlalnamiqui,
pero se teicneltzi catli tlalnamiqui nimantzi quimati para amo neli.
\p
\v 12 Quema cuajcualme tlatlanij, nochi masehualme yolpaquij. Pero
quema motlejcoltíaj masehualme catli fiero inintlalnamiquilis,
nochi momajmatíaj huan motlatíaj.
\p
\v 13 Aqui quitlatía itlajtlacolhua amo cualquisas, pero aqui
quipohuilía TOTECO nochi itlajtlacolhua huan quicahua, TOTECO
quitlapojpolhuis.
\p
\v 14 TOTECO quitiochihuas nopa masehuali catli yamanic iyolo huan
quitlepanita TOTECO, pero se masehuali catli yoltetic huan amo
quichihuilía cuenta TOTECO huetzis ipan catli amo cuali.
\p
\v 15 Sintla se tlanahuatijquetl catli amo quitlepanita TOTECO
quipiya tequiticayotl ica masehualme catli teicneltzitzi, nelía
mahuilili. Yaya quintzajtziltis quen se león tecuani catli mayana o
se oso catli mosisinía huan nanalca pampa ayamo tlacuajtoc.
\p
\v 16 Se tlanahuatijquetl catli huihuitic quintlaijiyohuiltía
imasehualhua, pero se catli quintlepanita imasehualhua huan amo
quiixtoca quitlanis tomi catli amo quinamiqui, huejcahuas inemilis
para tlanahuatis.
\p
\v 17 Se temictijquetl catli quimachilía para fiero quichijtoc
quema temicti nochipa cholojtinemis tlen nopa tlajtlacoli catli
quihuica hasta nopa tonali quema miquis. Ma amo aqui quichihua
campica para quitzacuilis itlacuajcualol.
\p
\v 18 Catli monejnemiltía xitlahuac amo quipantis catli fiero, pero
catli quichihua catli amo xitlahuac nimantzi huetzis.
\p
\v 19 Aqui tequiti chicahuac ipan imila quipiyas hasta mocahuas
itlacualis, pero catli san motonalpolohuaj ica tlamantli catli amo
tleno ipati mopantise teicneltzitzi.
\p
\v 20 Se masehuali catli itztoc temachtli quiselis miyac
tlatiochihualistli, pero aqui quinequi moricojchihuas ica se
tlatoctzi mohualiquilis tlaohuijcayotl.
\p
\v 21 Amo cuali para se acajya quichicoicnelis se masehuali huan
seyoc, amo. Monequi ma quinchihuili nochi masehualme quen catli
quiijtohua tlanahuatili. Pero sequin tlajtlacolchihuase huan
tlachicoicnelise por se tlaxtlahuili catli san ipati quen se pantzi.
\p
\v 22 Se masehuali catli nochi tlamantli quiixtoca quinequisquía
moricojchihuas san ica se tlatoctzi. Pero amo quimati quej nopa más
mochihuas teicneltzi.
\p
\v 23 Se catli quitlacahualtía ihuampox quema monequi elis más
inelhuampox teipa, que seyoc catli san quiyejyectlalía ica icamanal
pampa amo quinequi quiilhuis catli xitlahuac.
\p
\v 24 Aqui quitlachtequilía itata o inana huan quiijtohua para ya
nopa amo tlajtlacoli, eli san se ica se temictijquetl.
\p
\v 25 Aqui quiixtoca moaxcatis catli seyoc iaxca nimantzi
quiyolitía cualantli, pero aqui motemachía ipan TOTECO quipiyas
nochi catli cuali.
\p
\v 26 Aqui motemachía ipan yaya iseltzi nelía huihuitic, pero aqui
motemachía ipan nopa tlalnamiquilistli catli TOTECO temaca,
momanahuis tlen tlaohuijcayotl.
\p
\v 27 Aqui quinpalehuía catli teicneltzitzi amo quema quipolos
catli ica panos, pero aqui moixtzacua huan moyoltetilía para amo
quinpalehuis catli teicneltzi quipantis miyac tlatelchihualistli.
\p
\v 28 Quema amo cuajcualme quiitzquíaj tequiticayotl para
tlanahuatise, masehualme motlatíaj ica majmajtli. Pero quema nopa
amo cuali tequitini mopantíaj ica miquilistli, momiyaquilíaj
masehualme catli itztoque xitlahuaque.
\c 29
\p
\v 1 Aqui moyoltetilía huan amo quichihuilía cuenta quema sequinoc
quitlacahualtíaj, tlatocmiquis huan ayacmo oncas pajtli para
momanahuis.
\p
\v 2 Quema tlanahuatíaj nopa masehualme catli xitlahuaque, nochi
masehualme yolpaquij, pero quema tlanahuatíaj nopa masehualme catli
fiero inintlalnamiquilis, nopa altepetl ehuani tlaijiyohuíaj.
\p
\v 3 Se telpocatl catli mojmostla quinequi elis más tlalnamiqui
quipaquilismacas itata, pero aqui nemi campa momecatijca sihuame
quipinahualtía itata huan quipolos nochi catli quicahuilijtosquía.
\p
\v 4 Se tlanahuatijquetl catli tetlajtolsencahua xitlahuac quichihua
para nochi ipan itlal ma eli temachtli. Pero se tequitiquetl catli
quiselis tomi ichtacatzi para quichihuas catli amo xitlahuac
quitlatzintlahuetziltía itlal.
\p
\v 5 Se catli quihueyimati seyoc ica miyac camanali catli yejyectzi
para quicajcayahuas, eltoc quen quitlalilía se tlaquetztli iojtipa
para ma ipan huetzis.
\p
\v 6 Se tlacatl catli amo cuali moijilpía ipan itlajtlacolhua, pero
catli nemi xitlahuac, amo. Yaya huicatinemi huan nelía paqui.
\p
\v 7 Cuajcualme tlamocuitlahuíaj para catli teicneltzitzi ma
quipiyaca nochi caquihuili catli nopa tlanahuatili quiijtohua para
quipiyaj, pero se masehuali catli amo quitlepanita TOTECO amo quema
mocuesohua por catli teicneltzitzi.
\p
\v 8 Catli tehuihuiitaj hueli quinyolajcomanaj nochime ipan se
altepetl, pero masehualme catli tlalnamiquij quichihuaj campica para
quiseseltíaj cualantli.
\p
\v 9 Quema se catli tlalnamiqui quihuica se catli huihuitic iixpa se
juez, nopa huihui tlacatl san quihuihuiitas huan quihuetzquilis. Amo
tleno quisencahuas para moyoltlalise san sejco.
\p
\v 10 Tlacame catli temictíaj quincualancaitaj catli
monejnemiltíaj xitlahuac, pero cuajcualme quitemohuaj catli elis
cuali para nochi, masque amo cuajcualme.
\p
\v 11 Se catli huihuitic cuatzajtzi huan quinextía nochi
icualancayo, pero se catli tlalnamiqui moijiyohuía huan
moyoltlalía.
\p
\v 12 Sintla se tlanahuatijquetl quinchihuilía cuenta masehualme
catli istlacatij, nochi itequipanojcahua mocuepase amo cuajcualme.
\p
\v 13 Se teicneltzi catli quitlaijiyohuiltíaj huan se catli
tetlaijiyohuiltía nochi ome quipiyaj se tlamantli catli san se.
Itztoc yaya TOTECO catli quinmacatoc nochi ome nemilistli huan
tlachiyalistli.
\p
\v 14 Nopa tlanahuatijquetl catli quintlajtolsencahua xitlahuac
catli teicneltzitzi quichihuas para itequiticayo ma huejcahuas para
miyac xihuitl.
\p
\v 15 Se conetl catli quitlacahualtíaj huan quihuitequij ica
cuapipitztli quema quinamiqui, teipa elis tlalnamiqui. Pero se
conetl catli san quicahuilíaj para ma quichihua catli fiero
quinequi, quinpinahualtis itatahua.
\p
\v 16 Quema quipiyaj tequiticayotl miyac tlaixpanoca masehualme,
momiyaquilía tlajtlacoli, pero masehualme catli monejnemiltía
xitlahuac mocahuase para quinitase quema tlamis inintequiticayo.
\p
\v 17 Xijxitlahua mocone huan huelis timosiyajquetzas huan amo
timoyoltequipachos por ya. Quena, yaya quichihuas para nelía
tiyolpaquis.
\p
\v 18 Ipan se tlali campa amo aqui quiiximati TOTECO, niyon amo aqui
tematiltía icamanal, nopa masehualme quichihuaj miyac tlamantli
catli fiero. Pero ipan se tlali campa masehualme quiiximatij huan
quitlepanitaj itlanahuatilhua TOTECO, onca hueyi paquilistli.
\p
\v 19 Se tequipanojquetl catli amo quitlacaquilía san camanali,
monequi tijtlalnamictis huan tijtlatzacuiltis se quentzi. Masque
quimachilía icamanal iteco, quemantic amo quichihuilía cuenta
catli quinahuatía.
\p
\v 20 ¿Tiquitztoc se masehuali catli camanalti miyac huan amo
quichihuilía cuenta catli quiijtohua? Más cuali quisas se tlacatl
huihuitic huan amo ya.
\p
\v 21 Sintla tlahuel tiquicnelis se motequipanojca hasta quema noja
tziquitetzi, teipa elis quen motelpoca catli quiselis catli
tijcahuilijtehuas.
\p
\v 22 Se catli yolquentzi quipehualtía cualantli huan quichihua
miyac tlamantli tlajtlacoli.
\p
\v 23 Se masehuali catli mohueyimati quipantis catli
quiechcapantlalis, pero catli moechcapanohuaj quipantise
tlatlepanitacayotl.
\p
\v 24 Se masehuali catli quipalehuía se tlachtejquetl para
tlachtequis amo quitlepanita inemilis. Quicaqui quema nopa juez
quiilhuía para ma tlatestigojquetza para quiijtos catli xitlahuac
huan amo quimati sintla quisas más cuali para quiijtos catli
xitlahuac o noja quitlatis catli quichijqui.
\p
\v 25 Catli más quinimacasij masehualme huan amo TOTECO
mocalaquíaj ipan se tlaquetztli, pero catli motemachíaj ipan
TOTECO itztose ica temachili.
\p
\v 26 Miyac masehualme quitlajtlaníaj nopa tlanahuatijquetl ma
quinchihuili se favor para ma quinpalehuis quema monequi
quintlajtolsencahuas, pero más cuali quitemose TOTECO pampa yaya
nochipa tetlajtolsencahua xitlahuac.
\p
\v 27 Masehualme catli monejnemiltíaj xitlahuac amo quinequij
quinitase amo cuajcualme. Huan amo cuajcualme nojquiya
quincualancaitaj masehualme catli nemij ipan se ojtli catli
xitlahuac.
\c 30
\s Ya ni nopa tlalnamijca camanali tlen Agur
\p
\v 1 Ya ni nopa tlalnamijca camanali catli quiijto Agur icone Jaqué
catli ejqui Masá. Agur quiijcuilo ya ni para Itiel huan Ucal:
\v 2 Tlahuel más nihuihuitic que sequinoc masehualme. Amo
nijmachilía tlamantli catli onca quen sequinoc tlamachilíaj.
\v 3 Na amo nijpantijtoc tlalnamiquilistli catli eltoc ipan ni
tlaltipactli, ¿quenicatza huelis niquiximatis TOTECO catli
tlatzejtzeloltic?
\p
\v 4 San yaya TOTECO tlejcotoc hasta ilhuicac huan sempa hualtemoc.
San ya quitzacuilía ajacatl ica imax huan quiilpía hueyi atl ipan
ipayo. San yaya quichijchijqui tlaltipactli huan nochi catli onca.
¿Tijmati tlaque itoca huan tlaque itoca icone?
\p
\v 5 Temachtli nochi icamanal TOTECO huan catli quiijtohua,
mochihuas. Yaya quinmanahuía nochi catli motemachíaj ipan ya.
\v 6 Amo xijmiyaquili catli yaya quiijtojtoc. Yaya huelis
mitztlacahualtis chicahuac huan quinextilis para tiistlacatiquetl.
\v 7 NoTeco, nimitztlajtlanía ome tlamantli quema noja niitztoc. Se
favor technanquili huan techchihuili catli niquijtohua.
\v 8 Techpalehui para amo nimohueyimatis, niyon amo niistlacatis.
Nojquiya amo techricojtili, niyon amo techpobrejchihua. San techmaca
catli ica nipanotos mojmostla.
\v 9 Pampa sintla nimoricojchihuas, huelis teipa nimohueyimatis huan
nimoilhuis para amo monequi nimotemachis ipan ta TOTECO. Huan sintla
nimochihuas tlahuel niteicneltzi, huelis nitlachtequis huan
nimitzixpanos.
\p
\v 10 Amo quema xijtlaijilhui se tequipanojquetl iixpa iteco, pampa
huelis mitztelchihuas huan mitztlaijiyohuiltis.
\p
\v 11 Itztoque sequin masehualme catli quintelchihuaj inintatahua.
Amo quema quintlascamatilíaj.
\v 12 Inijuanti moitaj para tlahuel cuajcualme huan para quichihuaj
nochi catli tlapajpactic, pero nelía itztoque soquiyojque iixpa
TOTECO huan miyac inintlajtlacolhua.
\v 13 Nopa masehualme tlahuel mohueyimatij huan motlepanitaj hasta
quinitaj sequinoc quen amo tleno ininpati.
\v 14 Masehualme quen nopa quihuicaj machetes quen imiyaca
totlancochhua para ica quintzontlamiltise teicneltzitzi. Quena,
nochi catli teicneltzitzi huan catli amo tleno quipiyaj quinequij
quinmictise.
\p
\v 15 Onca miyac tlamantli quen nopa tlalcuitlaxcoli catli quinequi
tlapijpiyas más mojmostla. Quena, nimitznextilis nahui tlamantli
catli amo quema tlami ixhuij, huan amo quema quiijtohuaj: “Ya
cuali”.
\v 16 Mictla nochipa quinselía más mijcatzitzi. Se sihuatl catli
amo hueli conepiya, nochipa quinequi se conetl. Huactoc tlali
nochipa quinequi más atl, huan tlitl nochipa quitemohua más
tlamantli para quitlatis.
\p
\v 17 Aqui quincualancaita o quinhuetzquilía itatahua, quipantise
tzopilome huan cuajme catli quiquixtilise iixteyolhua huan quicuase.
\p
\v 18 Huan onca nahui tlamantli catli na amo hueli nijmachilía,
huan catli ica san nijsentlachilía:
\q
\v 19 se cuajtli catli patlani ipan ajacatl,
\q se cohuatl catli mohuahuatatzti ipan huejhueyi tetl,
\q nopa cuaacali catli yohui aixco ipan hueyi atl catli huejcatla,
\q huan quenicatza se tlacatl mojmostla más quiicnelis nopa
ichpocatl catli quiixtoca.
\m
\v 20 Nojquiya amo hueli nijmachilía quenicatza se sihuatl hueli
quinemaca itlacayo, huan teipa tlacua huan motenpojpohua, huan
quiijtohua: “Amo tleno catli amo cuali nijchijtoc.”
\p
\v 21 Huan itztoque nahui tlamantli catli quichihuaj ma momajmatica
masehualme, huan catli inijuanti quichihuaj amo hueli
quiijiyohuíaj:
\q
\v 22 se tequipanojquetl catli mochihua se tlanahuatijquetl,
\q se masehuali huihuitic catli quipiya nochi catli quinequi hasta
onmocahua catli iaxca huan nelmohueyimati,
\q
\v 23 se sihuatl catli nochi quicualancaitaj huan teipa monamictía,
\q huan se sihua tequipanojquetl catli quicuilía ihuehue nopa
sihuatl catli quitequipanohuayaya.
\p
\v 24 Itztoque nahui piltlapiyaltzitzi ipan tlaltipactli catli
piltziquitetzitzi pero tlahuel tlalnamiquij hasta quinonpano
tlalnamiquini ica inintlalnamijcayo.
\q
\v 25 Tlalnamiquij tzitzime pampa masque amo quipiyaj miyac
chicahualistli,
\q quisentilíaj inintlacualis quema tlatotoniya.
\q
\v 26 Tlalnamiquij cuatochime catli itztoque campa tetl, pampa
masque amo quipiyaj fuerza, quichihuaj inintepasol tecacahuaya campa
tetzala.
\q
\v 27 Tlalnamiquij pilchapoltzitzi pampa masque amo quipiyaj
inintlayacanca, nejnemij nochi ica pamitl campa yohuij.
\q
\v 28 Tlalnamiquij nopa tocame pampa masque amo ohui para
tiquitzquis ica momax, mopantíaj campa hueli hasta ipan
icaltlanahuatil se tlanahuatijquetl.
\p
\v 29 Itztoque nahui tlamantli catli nelía moneltlalíaj huan
monemiltíaj quen se hueyi tlanahuatijquetl:
\q
\v 30 se león tecuani catli más tetic que sequinoc tlapiyalme,
yaya amo cholohua pampa amo tleno quimajmatía;
\q
\v 31 se poyox catli tomahuac imetz,
\q se oquich chivo,
\q huan se hueyi tlanahuatijquetl quema quinyacana isoldados.
\p
\v 32 Sintla ica mohuihuiyo timohueyimajtoc huan timoyolilhuijtoc
para tijchihuas catli amo cuali, ximopinahua ica catli timoilhuijtoc
huan xijtlali momax ipan mocamac, niyon se tlamantli amo cuali
xijchihua.
\p
\v 33 Sintla tijmanelos chicahuac nopa lechi, temachtli tijchihuas
mantequilla. Huan sintla tijtejtzonas chicahuac se masehuali
iyacatzol, temachtli quisas estli. Huan sintla tijcualancamacas
seyoc, temachtli anmohuilanase.
\c 31
\s Tlalnamijca camanali catli para Lemuel
\p
\v 1 Ya ni nopa tlalnamijca camanali catli inana Tlanahuatijquetl
Lemuel ipan Masá quimachti huan catli yaya quiijcuilo.
\p
\v 2 Ta, tinotelpoca, catli tiquisqui ipan notlacayo. Ta catli
nijmactili TOTECO, xijtlacaquili noconsejo.
\v 3 Amo xiquinmaca sihuame mochicahualis. Amo xinemi ipan nopa
ojtli campa miyac tlanahuatiani mocuapolojtoque.
\p
\v 4 Lemuel, amo cuali para tlanahuatiani huan tlayacanani quiijise
xocomeca atl, o sequinoc tlamantli tlaili catli cococ.
\v 5 Pampa sintla tlaijise san hueli quielcahuase catli quiijtohua
tlanahuatili, huan quema tetlajtolsencahuase para catli
teicneltzitzi huan tlaijiyohuíaj miyac, huelis quichihuase catli
amo xitlahuac huan quinixpanose.
\v 6 Xijcahua nopa tlaili para ma quiijica catli tlaijiyohuíaj huan
ya miquisnequij, huan para sequinoc catli tlaijiyohuíaj ipan
ininyolo ica miyac tequipacholi.
\v 7 Inijuanti hueli quiijise huan quielcahuase para nelía
teicneltzitzi, huan ayacmo quielnamiquise inintlaijiyohuilis.
\p
\v 8 Pero ta xiquintenpalehui catli amo hueli camanaltij cuali para
momanahuise. Xijmocuitlahui para tequitini quintlajtolsencahuase
xitlahuac nopa masehualme catli teicneltzitzi.
\v 9 Quena, xiquintenpalehui catli teicneltzitzi huan catli
tlaijiyohuíaj. Xiquintlajtolsencahua xitlahuac quen quinamiqui.
\s Se sihuatl catli nelía cuali
\p
\v 10 Tlahuel ohui para tijpantis se sihuatl catli cuali iyolo huan
neltlalnamiqui. Se sihuatl quej nopa achi más ipati huan amo quen
nopa piltetzitzi catli más pajpatiyo.
\v 11 Ihuehue hueli motemachía ipan ya ica nochi iyolo. Huan nopa
sihuatl quichihuas para ihuehue ma quipiya se nemilistli catli
nelcuali.
\v 12 Mojmostla quichihuilis ihuehue catli cuali huan quipalehuis.
\p
\v 13 Quitemos yoyomitl tlen lino huan tlen borregojme iniijhuiyo,
huan tequitis chicahuac para quiijtzomas catli moquentis ifamilia.
\v 14 Yaya itztoc quen se cuaacali ipan hueyi atl. Amo majmahui para
yas huejca para quitemos nopa tlacualistli catli más cuali para
catli itztoque ipan ichaj.
\v 15 Se sihuatl catli cuali mehua quema ayamo tlanesi para
quisencahuas tlacualistli para ifamilia, huan para quinilhuis
itequipanojcahua tlaque tequitl ma quichihuaca.
\v 16 Nopa sihuatl quitlachiliti se tlali huan quicohuas. Nopona
quitocas se xocomeca mili ica catli quitlantoc.
\p
\v 17 Nopa sihuatl quipiya imetz huan imax catli tetic, huan
quinelpactía tequitis.
\v 18 Quimocuitlahuía nopa tomi catli imaco eltoc para quitequihuis
cuali huan ica tlalnamiquili. Yaya tequiti hasta tlahuel tlayohua.
\v 19 Quimalina borrego ichcatl huan quichihua hilera, huan
quiilacatzohua ichtli.
\p
\v 20 Nochipa quinpalehuía catli teicneltzitzi ica catli quichijtoc
ica imax huan quintemohua catli tlaijiyohuíaj para quinpalehuis.
\p
\v 21 Amo motequipachohua masque tlasehuetzi pampa quinchihuilijtoc
nochi ifamilia ininyoyo catli tilahuac huan totonic.
\v 22 Yaya quichijchihua tlaquemitl catli yejyectzi para itlapech.
Moyoyontía ica iyoyo tlen moradojtic huan lino catli más patiyo
catli yaya mochijchihuilijtoc.
\p
\v 23 Nochi masehualme quiiximatij ihuehue pampa quitlalijtoque se
tequitiquetl ipan caltlanahuatili ica sequinoc tlayacanani. Campa
hueli nochi quitlepanitaj.
\p
\v 24 Nopa cuali sihuatl quichijchihua yoyomitl huan
tzinquechilpicayotl catli más cuali, huan quinnemaquiltía
tlanemacani.
\p
\v 25 Nochi quimatij para nopa sihuatl quipiya miyac chicahualistli
huan nochi quitlepanitaj. Yaya amo momajmatía para elis nanatzi.
\v 26 Se cuali sihuatl camanalti ica miyac tlalnamiquilistli, huan
tlamachtía ica miyac tlaicnelijcayotl.
\v 27 Ica miyac cuidado quitlachilía sesen piltlamantzitzi catli
quimonequilía ifamilia. Amo quema tlatzihui.
\p
\v 28 Iconehua huan ihuehue quitlascamatilíaj. Inijuanti camanaltij
cuali tlen ya huan quiilhuíaj:
\v 29 “Miyac sihuame ipan ni tlaltipactli quichihuaj catli cuali
huan quipiyaj miyac yajatili, pero ta tiquinonpano nochi sequinoc.”
\p
\v 30 Quena, iyejyejca se sihuatl amo huejcahuas huan se catli nesi
nelcuali huelis tecajcayahuas, pero se sihuatl catli quitlepanita
TOTECO, nochi masehualme quihueyichihuase para nochi inemilis.
\v 31 Ma quiselis tlatlepanitacayotl nopa cuali sihuatl por nochi
catli cuali catli quichihua. Huan ma quitlascamatilica nochi catli
quihuicaj tequiticayotl ipan ialtepe por itequi catli nelcuali.