\id JON
\h JONÁS
\mt Jonás
\c 1
\s Jonás cholo iixpa TOTECO
\p
\v 1 TOTECO quinojnotzqui Jonás catli elqui itelpoca Amitai, huan
quiilhui:
\v 2 “Xiya ipan altepetl Nínive huan nopona xiteyolmelahua para
nijpolihuiltis nopa altepetl huan nochi catli itztoque nopona pampa
niquita tlahuel tlajtlacolchihuaj.”
\p
\v 3 Pero Jonás cholojtejqui iixpa TOTECO huan yajqui altepetl Jope
iteno hueyi atl. Huan nepa campa quisaj barcos, quipanti se barco
catli quisayaya para se altepetl catli itoca Tarsis catli huejca
mocahuayaya tlen Nínive. Huajca Jonás tlaxtlajqui huan calajqui
para nojquiya yas pampa quinequiyaya cholos iixpa TOTECO.
\p
\v 4 Pero TOTECO quichijqui ma huala se hueyi ajacatl ipan nopa
hueyi atl huan tlaajacayaya hasta nopa barco mososolosnequiyaya.
\v 5 Huan nopa tlacame catli quinejnemiltiyayaj nopa barco
majmahuiyayaj, huan sesen inijuanti quinnotzayayaj inindioses. Huan
teipa, para ma amo moetili nopa barco, quimajcajque nochi tlamamali
ipan hueyi atl. Pero Jonás temotoya tlatzintla ipan nopa barco
campa quicahuayayaj tlamantli huan quema nopa hueyi ajacatl
panoyaya, tlahuel cochtoya.
\v 6 Huajca nopa tlacatl catli tlayacanayaya ipan nopa barco yajqui
campa itztoya Jonás huan quiilhui:
\p ―¿Tlaque tijchihua nica, ticochquetl? ¡Ximehua huan
xijnojnotza moDios! Nohueli quipiyas tlaicnelili por tojuanti huan
techmanahuis.
\p
\v 7 Huan nopa tlacame catli tequitiyayaj ipan nopa barco
moilhuijque se ica seyoc:
\p ―Ma timahuiltica ica piltetzitzi para tiquitase ajqueya quipiya
tlajtlacoli para pano ni tlamantli.
\p Huajca mahuiltijque, huan nopa piltetzitzi quitocaro Jonás para
quipiya tlajtlacoli.
\v 8 Huajca quiilhuijque:
\p ―Techilhui para tlen tijpantijtoque ni tlamantli. ¿Para tlen
tiitztoc nica? ¿Canque tihuala? ¿Canque motlal? ¿Huan tlaque
moaltepe?
\p
\v 9 Huan Jonás quinnanquili:
\p ―Na nihebreo tlacatl huan nijhueyichihua TOTECO, yaya nopa Dios
catli itztoc ipan ilhuicac. Yaya catli quichijtoc hueyi atl huan
tlaltipactli.
\p
\v 10 Huan Jonás quinpohuili nopa tlacame para cholohuayaya iixpa
TOTECO. Huan quema quicajque catli quiijto huan quiitaque nopa hueyi
atl noja más mocojcoxoniyaya, nelía majmajque,
\v 11 huan quitlatzintoquilijque:
\p ―¿Para tlen ya nopa tijchijqui? ¿Tlaque huelis
timitzchihuilise para ayacmo mocojcoxonis ni hueyi atl?
\p
\v 12 Huan Jonás quinnanquili:
\p ―Techmajcahuaca atitla, huan nopa hueyi atl ayacmo mojmolinis.
Nijmati notlajtlacol na para hualajqui ni ajacatl catli tlahuel
tlatemajmatía.
\p
\v 13 Pero nopa tlacame catli tlapalehuiyayaj ipan nopa barco amo
quinequiyayaj quimajcahuase huan achi más quichijque fuerza
quinejnemiltise nopa barco para ma ajsitij ipan tlali. Pero amo
huelque pampa nopa atl tlahuel más mocojcoxoniyaya.
\v 14 Huajca camanaltique ica TOTECO huan quiilhuijque: “TOTECO,
amo techcahuili ma timiquica ica itlajtlacol ni tlacatl. Huan sintla
ni ajacatl amo hualajtoc por itlajtlacol, amo techtlajtlacolti
sintla miquis ipan atl pampa ta, TOTECO, tijchijtoc nochi ni ajacatl
pampa quej nopa mopaquilis.”
\p
\v 15 Huan quema quiijtojque inin, quimajcajque Jonás atitla, huan
nopa hueyi atl moquetzqui.
\v 16 Huan quema nopa tlacame catli tlapalehuiyayaj ipan barco
quiitaque catli panoc, quiimacasque TOTECO huan
quihueyitlepanitaque. Quimacaque se tlacajcahualistli huan
quitencahuilijque para quitequipanose.
\p
\v 17 Pero TOTECO quicualtlalijtoya se hueyi michi para ma quitolo
Jonás. Huan Jonás itztoya iijtico nopa michi eyi tonali huan eyi
yohuali.
\c 2
\s Jonás motlatlajti
\p
\v 1 Huajca quema Jonás itztoya iijtico nopa michi, motlatlajti ica
TOTECO Dios,
\v 2 huan quiijto:
\q “Quema nitlaijiyohuiyaya, nimitztzajtzili, noTECO,
\q huan ta technanquili huan techpalehui.
\q Quema nechca eltoya para nimiquis,
\q nimitznojnotzqui huan techtlacaquili.
\q
\v 3 Techmajcajqui hasta tlatzintla campa más huejcatla ipan hueyi
atl.
\q Techtitlanqui campa tlahuel tlatilana atl.
\q Huan nopa atl catli ta tijtitlantoya panoyaya nopani ica nochi
ichicahualis.
\q
\v 4 Hasta nimoilhuiyaya para techtlahuelcajtoya.
\q Nimoilhui amo quema sempa niquitasquía motiopa catli
tlatzejtzeloltic.
\q
\v 5 Nechatzonpolihuilti hueyi atl hasta campa más huejcatla,
\q huan nopa cuameca xihuitl catli moscaltía huejcatla
nechtzonyahualo.
\q
\v 6 Nitemotoya hasta itzintla nopa tepeme catli eltoc itzintla
hueyi atl,
\q Huan techtzacuilijtoya para ma amo nitlejco campa onca ajacatl
huan nemilistli.
\q Niitztoya quen se catli ilpitoc ipan nopa atl catli
nechmictisnequiyaya.
\q Pero ta, noTECO DIOS, catli nimitzhueyichihua. Ta techmanahui
imaco miquilistli pampa techtlejcolti.
\q
\v 7 Quema nimoilhui tlamisquía nonemilis, nimitzelnamijqui,
noTECO. Huan quema nimotlatlajti, techcajqui hasta ipan mochaj
nopona campa tlatzejtzeloltic.
\q
\v 8 Huihui masehualme catli quinhueyichihuaj tlaixcopincayome catli
amo neli Dios mitztlahuelcajtoque, TOTECO, ta catli tiquinchiya ica
tlaicnelijcayotl.
\q
\v 9 Pero na nimitztlascamati por catli techchihuilijtoc.
\q Amo quema nijhueyichihuas seyoc, san ta, TOTECO. Huan
nijtlamichihuas catli nijtencajtoc nijchihuasquía.
\q San ta, TOTECO, hueli titemanahuía.”
\p
\v 10 Huajca quema Jonás tlantoya motlatlajtía, TOTECO quinahuati
nopa hueyi michi ma quiijsotla Jonás xalpani. Huan quej nopa
quichijqui.
\c 3
\s Masehualme ipan altepetl Nínive moyolcuepque
\p
\v 1 Huajca TOTECO sempa quicamanalhui Jonás huan quiilhui:
\v 2 “Xiya ipan nopa hueyi altepetl Nínive huan xitlayolmelahuati
catli nimitzilhuis.”
\p
\v 3 Huajca Jonás quineltoquili catli TOTECO quiilhui huan nimantzi
moquetztiquisqui huan yajqui Nínive. Nínive eliyaya se hueyi
altepetl huan para se tlacatl tlaminemis, monequiyaya eyi tonali.
\v 4 Huan Jonás calajqui ipan nopa altepetl huan quema nejnentoya
para se tonali, pejqui chicahuac tlayolmelahua: “¡Ica 40 tonali
TOTECO quitlamisosolos ni altepetl, huan nochi amojuanti catli
anitztoque nica anmiquise!”
\p
\v 5 Huan nochi catli itztoyaj ipan nopa altepetl, masque
tziquitetzitzi o huejhueyi, quineltocaque Toteco Dios. Huan sentic
motlananque para nochi ma mosahuaca huan ma moquentica yoyomitl
catli fiero para se tlanextilijcayotl para tlahuel
motequipachohuayayaj ica catli quichijtoyaj. Huan nochi quej nopa
quichijque.
\p
\v 6 Quema nopa hueyi tlanahuatijquetl tlen Nínive quicajqui ni
tlamantli, nojquiya moquetztiquisqui campa tlanahuatiyaya. Huan
moquixtili nopa yoyomitl catli tlanahuatiani quitequihuíaj, huan
moquenti yoyomitl catli fiero huan mosehui tlalchi.
\v 7 Huan nopa tlanahuatijquetl quichijqui se tlanahuatili para
nochi masehualme ipan altepetl Nínive ma quimatica. Quiijto:
\q
Ica notequiticayo na, niamotlanahuatijca, huan ica
inintequiticayo ni tlacame catli tlanahuatíaj nohuaya,
nimechnahuatía amo aqui ma quicua niyon se tlamantli. Niyon amo
xiquincahuilica huacaxme, borregojme, o sequinoc amotlapiyalhua ma
tlacuaca o ma atlica.
\v 8 Pero monequi nochi masehualme huan tlapiyalme ma moyoyontica
ica yoyomitl catli fiero para quinextise para motequipachohuaj. Huan
monequi nochime amojuanti ximotlatlajtica ica Toteco Dios ica nochi
amoyolo. Sesen ma tijtlahuelcahuaca catli fiero tijchihuaj. Ayacmo
xijchihuaca catli fiero huan ayacmo ximosisinica.
\v 9 Pampa nohueli Toteco Dios quicahuas icualancayo. Pampa hueyi
itlaicnelilis, huelis moyolpatlas huan amo techmictis.
\p
\v 10 Huan Toteco Dios quiitac catli quichihuayayaj nochi masehualme
ipan altepetl Nínive huan quenicatza quitlahuelcajtoyaj catli fiero
quichihuayayaj. Huajca moyolcuepqui para ayacmo quinajsis nopa
tlatzacuiltili catli quinilhuijtoya.
\c 4
\s Jonás cualanqui
\p
\v 1 Pero quema TOTECO moyolcuepqui, Jonás amo quicualitac. Nelía
cualanqui.
\v 2 Huajca motlatlajti ica TOTECO, huan quiilhui:
\p ―Xiquita TOTECO, na cuali nijmatiyaya para panosquía ya ni
quema noja niitztoya ipan notlal. Yeca nimantzi nijnequiyaya
nicholos huejca hasta altepetl Tarsis. Nijmatiyaya para ta se tiDios
catli titetlasojtla huan titeicnelía. Amo nimantzi ticualani, huan
nelhueyi motlaicnelilis hasta titlayolmelahua se tlatzacuiltilistli
huan teipa timoyolcuepa.
\v 3 Yeca ama TOTECO nimitztlajtlanía techmicti na. Más cuali para
nimiquis huan amo niitztos.
\p
\v 4 Pero TOTECO quinanquili:
\p ―¿Cuali tiquita para quej nopa ticualanis?
\p
\v 5 Huan quisqui Jonás ipan Nínive huan yajqui imelac nopa
altepetl campa hualquisa tonati. Huan nopona quichijqui se
pilxajcaltzi ica xihuitl. Teipa mosehui itla para moecahuilis huan
quiitas tlaque panosquía ica nopa altepetl.
\p
\v 6 Huan teipa ixihuiyo nopa xajcali huajqui pampa tlahuel
tonayaya. Pero TOTECO Dios quichijqui para nimantzi ma moscalti se
pilacuacualachtzi itzontla Jonás para ma quiecahuilis ica ixihuiyo
patlahuac huan para quipalehuis ma amo tlahuel tlaijiyohuis. Huan
Jonás nelía paquiyaya ica nopa pilacuacualachtzi.
\v 7 Pero hualmostla, Toteco Dios quichijqui se ocuili ma
quicualolti nopa imacuayo huan yeca huajqui.
\v 8 Huan quema quisqui tonati, Toteco Dios quichijqui ma huala tlen
campa hualquisa tonati se huac ajacatl catli tlahuel totonic. Huan
tonati quitlatiyaya Jonás ipan itzonteco huan quimatqui
tlapolosquía. Huan quinequiyaya cualancamiquis pampa huajqui nopa
pilacuacualachtzi. Huan quiijto:
\p ―Más cuali nimiquis huan ayacmo nitlaijiyohuis ipan ni
nemilistli.
\p
\v 9 Pero Toteco Dios quinanquili:
\p ―¿Cuali tiquita para noca ticualanis quej ni pampa nijchijqui
ma huaqui nopa pilacuacualachtzi catli mitzecahuiliyaya?
\p Huan Jonás tlananquili:
\p ―¡Quena, cuali niquita! ¡Nicualani mohuaya hasta nijnequi
nimiquis!
\p
\v 10 Huajca TOTECO quiilhui:
\p ―Ticualantoc pampa tijtlasojtlac nopa pilacuacualachtzi catli na
nijmicti. Pero na nijtojqui huan nijchijqui ma moscalti, amo ta.
Huan masque amo nijmictijtosquía, amo huejcajtosquía.
\v 11 Huan sintla ya nopa ipati moixpa, ¿amo tiquita noja más
ipati nochi nopa miyaqui masehualme ipan ni hueyi altepetl Nínive
huan monequi niquintlasojtlas? Nopona itztoque pano 120 mil catli
ayamo tleno quimachilíaj. Huan iyoca itztoque miyac tlapiyalme.
Quena, monequi niquintlasojtlas.