\id NAM
\h NAHÚM
\mt Nahúm
\c 1
\s TOTECO cualani ica altepetl Nínive
\p
\v 1 Ya ni nopa camanali catli TOTECO nechmacac na, niNahúm, catli
niehua pilaltepetzi Elcos, quema nechnextili catli ipantis altepetl
Nínive.
\v 2 TOTECO itztoc se Dios catli quintlasomati masehualme pampa
quinamiqui san ya ma quitequipanoca. Yeca quintlatzacuiltía huan
quincualancaita quema amo quitlepanitaj. TOTECO momacuepa huan
nelía cualani ica catli moyoltetilíaj ica ya. Ica miyac cualantli
quintzontlamiltía nochi icualancaitacahua.
\v 3 TOTECO tlahuel quichiya para pehuas cualanis. Pero nelía hueyi
ichicahualis huan yaya quiita para nochi catli tlajtlacolchijtoque
temachtli quiselise inintlatzacuiltilis. TOTECO quinextía
ichicahualis quema onca ajcomalacatl huan quema chicahuac tlaajaca.
Nopa mixtli catli motlalohua eltoc quen tlaltejpoctli iicxitla.
\v 4 Quema yaya quimaca tlanahuatili para ma huaqui, huaqui nochi
nopa hueyi atl, atlajme huan sacamilme ipan tlali Basán. Ica
icamanal nopa cuatitlamitl Carmelo huan nochi nopa cuame ipan
Líbano mososolohuaj.
\v 5 Quema TOTECO itztoc nechca, nopa tepeme huihuipicaj huan nopa
tepexime atiyaj. Mojmolinía tlali huan nochi catli itztoque ipani
tlahuel momajmatíaj.
\p
\v 6 Amo aqui huelis quiijiyohuis quema TOTECO mototonilijtoc ica
cualancayotl. Icualancayo eltoc quen nopa tlilelemectli catli nochi
quitlamitlatía. Quema yaya cualani, nochi nopa tepexime
huehuelocaj.
\p
\v 7 TOTECO hueyi iyolo. Quema se motequipachohua, ma yohui campa ya
huan yaya quimanahuis. Yaya quiniximati catli quineltoquilíaj huan
catli eli iaxcahua.
\v 8 Pero ininca tlachpana icualancaitacahua quen quema huala se
hueyi atl huan nochi quihuica. Icualancaitacahua quintojtocatinemi
hasta tlayohua.
\p
\v 9 ¿Tlaque anmoilhuíaj anquichihuilise TOTECO para anquitlanise
ya? Yaya anmechtzontlamiltis san ica se huelta.
\v 10 Catli mochihuaj icualancaitacahua itztoque quen huitztli catli
moxinepalojtoque. Itztoque quen ihuintini catli huetztihualahuij
pampa tlahuel tlaitoque. TOTECO quintlatis quen xihuime catli cuali
huactoc.
\v 11 Amojuanti ipan altepetl Nínive anmoilhuíaj se tlenijqui
huelis anquichihuilise TOTECO, pero catli quej nopa moilhuía san
fiero itlalnamiquilis.
\v 12 Ya ni catli TOTECO quinilhui imasehualhua: “Masque nopa
asirio ehuani quipiyaj tetili huan itztoque nelía miyaqui, na
niquintzontlamiltis huan ayacmo quema nesise.
\p “Masque miyac nimechtlaijiyohuiltijtoc, ayacmo
nimechtlaijiyohuiltis más.
\v 13 Huan na nimechtojtomas campa anitztoque anilpitoque ica tepos
cadenas huan ayacmo nimechcahuas para xiitztoca quen anilpitoque por
nopa asirios.”
\p
\v 14 Huan ya ni catli TOTECO tlanahuati tlen nopa tlanahuatijquetl
tlen tlali Asiria catli mosehui ipan Nínive. TOTECO quiijto: “Ta
ayacmo tiquinpiyas moixhuihua para mocahuas motoca. Tlen amotiopahua
niquintlapanas nochi nopa tiotzitzi huan tlaixcopincayome. Huan
nopona timiquis huan nimitztocas pampa miyac tlajtlacoli tijchijtoc
huan amo quinamiqui para tiitztos.”
\s Altepetl Nínive motlamisosolos
\p
\v 15 ¡Xiquitaca! Nepa campa tepetl huala ne tlayolmelajquetl catli
quihualica se cuali camanali. Techhualiquilis camanali tlen
tlasehuilistli. Xiilhuichihuaca antlali Judá ehuani.
Xijtlamichihuaca nochi catli anquiijtojque para anquichihuase.
Mocualancaitacahua catli hualahuij tlen Nínive ayacmo quema
mocuepase pampa nochi ya niquintzontlamilti.
\c 2
\p
\v 1 ¡Pero amojuanti ipan altepetl Nínive, xijtlacaquilica!
Amocualancaitacahua ya anmechyahualojtinemij. Campa tepamitl
xitlamocuitlahuica. Ipan ojtli xitlapijpiyaca pampa nimantzi hualase
para anmechhuilanase. Xiquincualtlalica nochi tlacame catli quimatij
tlahuilanaj.
\v 2 Anquitlamitlachtequilijtoque tlali Israel huan anquicajtoque
quen se xocomeca tzontli catli amo quipiya imaxihuiyo. Huajca ama
TOTECO anmechtlatzacuiltis. Nojquiya ama TOTECO sempa quitlananas
tlali Israel. Quihuejcapantlalis nopa tlali hasta quipiyas miyac
tlatlepanitacayotl huan chicahualistli quen quema Jacob
mohueyimatiyaya ica iyejca nopa tlali.
\p
\v 3 Nopa tlahuilanani chichilihuis inintepos catli ica mohuilanaj.
Huan xiquitaca nochi nopa tlaca tlahuilanani moyoyontijtoque
chichiltic. ¿Amo anquinitaj? Inincuacarros eltoc quen tlicuahuitl
huan quema ya monemilijtoque para tlahuilanase, huihuipicase hasta
nopa huejhueyi cuame.
\v 4 Nopa cuacarros ejelihuis nentinemise ipan amocalles huan campa
amotianquis. Caquistis quen tlatomoni huan nesise quen
tlilelemectli. Motlalose chicahuac quen quema tlapetlani.
\v 5 Amotlanahuatijca quintzajtzilis itlahuilancahua para ma hualaca
quimanahuise amoaltepe. Pero quema inijuanti moisihuiltise para
hualase, motepotlamise. Quinequise ajsitij campa nopa tepamitl para
tlacualtlalise huan tlamocuitlahuise.
\v 6 Pero ayacmo oncas caquihuili pampa nopa cuapuerta catli ica
motzactoya amoaltepe ya tlapojtos. Huan quen huala se chicahuac
hueyatl, ya calactose amocualancaitacahua. Nopa hueyi cali tlen
amotlanahuatijca ya sosolijtos.
\p
\v 7 Huan quiitzquise nopa sihua tlanahuatijquetl huan quinahuatise
ma tlejco ipan tepeme para yas. Huan isihua tequipanojcahua ihuaya
yase huan tlaayijhuijtiyase quen pilpalomajtzitzi.
Moyoltejtzontiyase ica tequipacholi huan chocatiyase pampa ama nochi
inijuanti quintequipanose seyoc tlali ehuani ica catli ohui.
\v 8 Nínive ama eltoc quen se pila catli nimantzi quisa nopa atl
catli nopona quiteca. Quen nopa atl, amosoldados nojquiya
cholojtehuaj. Se quintzajtzilía: “¡Ximoquetzaca!
¡Ximoquetzaca!” Pero amo aqui mocuepqui ihuaya.
\p
\v 9 Se quiijtohua: “¡Xiquichtequica nopa plata huan nopa oro!
Iricojyo Nínive nesiyaya quen amo quema tlamisquía. Tlahuel miyac
tlamantli catli patiyo quipixqui nopona.”
\v 10 Pero nimantzi altepetl Nínive mocahuas cactoc. Tlatzitzicatoc
mocahuas huan tlahuel iseltzi. Yolmajmajcamictoque huan
tlancuahuihuipicatoque catli nopona itztoque. Campa hueli
quincocohua quimachilíaj huan mocajtoque ixchipalantique.
\p
\v 11 ¿Canque eltoc altepetl Nínive ama? Nopa altepetl nochi
quinahuatiyaya quen se hueyi león tecuani. Nimantzi quinequiyaya
tlahuilanas pampa yolchicajtoya huan motemacayaya. Nopona itztoyaj
huehuentzitzi catli ayacmo tetique huan coneme. Nojquiya itztoyaj
telpocame huan catli motemacayayaj huan nochi itztoyaj ica
temachili. Amo tleno ica motequipachohuayayaj.
\p
\v 12 Quena, amojuanti ipan altepetl Nínive achtihuiya aneltoyaj
quen huejhueyi leones catli mosisiníaj. Anquinmictiyayaj
amocualancaitacahua huan ica catli anquinichtequiliyayaj
anquintlamacayayaj amoconehua huan amosihuajhua. Huan
anquitemitiyayaj amochajchaj ica tequipanohuani catli tlacohualme
huan miyac tlamantli catli pajpatiyo.
\s Mososolos nochi altepetl Nínive
\p
\v 13 Pero Toteco Catli Quinyacana Itequihuajcahua Ma Tlatlanitij
quiijto: “Amantzi nimochijtoc nimocualancaitaca. Nochi amocuacarros
nimitztlatilis, huan nochi amoconehua miquise ipan tlahuilancayotl.
Nochi catli anquiichtectoque na nijtlamiltis huan ayacmo quema
quipiyas tlanahuatili ni altepetl para quintitlanis tlayolmelahuani
campa hueli.”
\c 3
\p
\v 1 Anteicneltzitzi amojuanti catli anitztoque ipan ni altepetl
Nínive. Se tialtepetl catli titemictía huan tiistlacati. Temitoc
amoaltepe ica ricojyotl catli quichiya ajqueya anmechichtequilis.
Amo quema anquinequiyayaj anquicahuase para amo anmosisinise.
\v 2 Xijcaquica nopa lazo. Amocualancaitacahua quinmaquilíaj
inincahuayos para más nimantzi ma ajsise campa amojuanti.
Xijcaquica nopa cuacarros catli huehuechocatihualahuij huan
iniicxihua nopa cahuayojme. Nopa cuacarros catli chicahuac
motlalojtihualahuij san pepetlacatoque.
\v 3 Xiquitaca nopa machetes tlamintoque, huan nopa tepos cuachoso
cahuani ica tonati pampa nopa miyac soldados quintlanantoque. Miyac
mococojtoque huan campa hueli catli mictoque mocahuaj ica
tlamontome. Campa hueli tepejtoque mijcatzitzi hasta ipan
motepotlamijtinemij.
\p
\v 4 Nochi ya ni panotoc pampa Nínive ehuani ininhuaya momatque
inincualancaitacahua TOTECO. Ni altepetl yejyectzi eltoya, pero
yajqui huan ininhuaya momatque catli amo quitlepanitaj TOTECO.
Pejqui tlahuel tlacajcayahua huan pejqui quinmachtía sequinoc ipan
sequinoc tlalme ma tetlajchihuica. Huan quinmachtijque quenicatza ma
quichihuaca para momecatise huan quicahuase TOTECO. Huan
quinhueyichihuase tiotzitzi catli amo melahuac.
\p
\v 5 Huajca TOTECO Catli Quinyacana Nochi Itequihuajcahua Ma
Tlatlanitij quiijtohua: “Ama nimitztlajtolsencahuas huan tlahuel
nimitzpinahualtis. Quen se quitlananas mocuex hasta mitzixtzacuas
para mitzpinahualtis, na nijchihuas para nochi ma quiitaca tixolotl
huan amo tleno tlen chicahualistli tijpiya. Tlanahuatiani mitzitase
ica nochi mopinahualis.
\v 6 Huan nimitzpolos catli más soquiyo huan nijchihuas ximopinahua
huan miyac mitzmahuisose.
\v 7 Huan nochi catli mitzitase mitztlalcahuise huan quiijtose:
‘Nínive tlamisosolijtoc. Pero amo aqui anmechtlasojtlas.’ Huan
niyon se amo monechcahuis para anmechyoltlalis ipan Nínive.”
\v 8 Huelis ta timoilhuía para achi ticuali que Tebas, nopa
altepetl catli eltoya nechca atentli Nilo. Tebas quipixqui atl catli
quiyahualo. Nopa atl quimanahui quen se tepamitl catli
quiyahualohuayaya.
\v 9 Tlalme Etiopía huan Egipto quimacayayaj chicahualistli huan
nopa tlalme Fut huan Libia quipalehuiyayaj.
\v 10 Pero Tebas huetzqui ininmaco sequinoc huan inijuanti
quinhuicaque nopa Tebas ehuani huejca para tetequipanotij.
Ininpilconehua quintzontlatlapatzque ipan tetl ipan ojtli. Huan
soldados quirifarojque para quiitase catlique tlayacanquetl tlen
Tebas quihuicasquía para quitequipanos. Huan nochi
quintatacatzojque ica tepos cadena huan quinhuicaque para
tlaijiyohuise hasta miquisquíaj.
\p
\v 11 Amojuanti nojquiya catli anehuani Nínive san anhuihuipicatose
quen se ihuintiquetl. Anquinequise anmotlatitij pampa
anquinimacasise amocualancaitacahua catli anmechhuilanaquij.
\v 12 Nochi nopa tepamitl catli ica anmomanahuíaj sosolihuis.
Anhuetzise quen se higo catli tlahuel icsitoc huan huetzi icamaco
catli quitlamicuas. Tlacame anmechtlamiltise nochi amojuanti.
\v 13 Nochi amosoldados elise quen sihuame catli amo quipiyase
tetili huan ayacmo huelis momanahuise. Se tlitl quitlamitlatis
amopuertas huan nopa varas catli quintzacuayaya. Huan amoaltepe
tlapohuis huan amocualancaitacahua calaquise.
\v 14 Huajca ximocualtlalica para nopa tonali quema hualase
soldados. Xicajocuica miyac atl para huelis anquiijiyohuise quema amo
oncas más huan nochi huactos. Huan xijcualchijchihuaca sempa nopa
tepamitl catli ica anmotzajtzactoque para anmomanahuise.
Xijxacualoca miyac soquitl para soqui tabiques huan xijchihuaca
tlapepecholi. Xijchihuaca adobe huan xijcacatzoca.
\v 15 Pero quema annemise antlacualtlalíaj huajca nopa tlitl
ajsiqui campa amojuanti huan tlatlas amoaltepe huan nopa machetes
anmechmictise. Quen hualahuij ica ininmiyaca tlen pilchapoltzitzi
huan quitlamicuaj catli eltoc ipan amomil, hualase catli
anmechtlamihuejhuelose. Masque anmomiyaquilise quen pilchapoltzitzi,
amo hueli anmomanahuise.
\v 16 Anquinpiyaj tlahuel miyac tlacohuani ipan amoaltepe catli
momiyaquilijtoque quen sitlalime ipan ilhuicac, pero
amocualancaitacahua noja más miyaqui. Inijuanti miyaqui quen
ininmiyaca pilchapoltzitzi. Anmechtlamihuicase nochi amojuanti huan
nochi catli anquipiyaj.
\v 17 Nopa tlayacanani catli ama anmechmocuitlahuíaj huan
anmechyacanaj mosansejcotilise quen mosansejcotilíaj
pilchapoltzitzi ipan tepamitl quema tlaseseya. Huan quema quisa
tonati nopa pilchapoltzitzi quisaj huan yohuij huan amo aqui quimati
canque yajtoque. Quen nopa nojquiya yase amotlayacancahua huan
ayacmo anquinitase.
\p
\v 18 Ta titlanahuatijquetl ipan tlali Asiria, motelpocahua nochi
mictoque huan nesi quen cochtoque pampa tepejtoque campa hueli.
Nochi mosoldados catli más motemacayayaj san mosiyajquetztoque.
Momasehualhua mosemantoque campa hueli campa tepeme huan ipan
cuatitla huan amo aqui para quinsentilis sempa.
\v 19 Eltoc quen timotlamipojpostectoque huan ayacmo onca pajtli.
Eltoc quen mitzajsitoc se hueyi cocolistli huan ayacmo quema huelis
timochicahuas. Nochi catli quicaquise catli mopantitoc
momatlajtlatzinise huan san moca paquise, pampa amo aqui hueli
quipantis se tlacatl catli ta amo tijtlaijiyohuilti ica miyac
tlamantli.