\id HAB
\h HABACUC
\mt Habacuc
\c 1
\s Campa hueli nochi tlajtlacolchihuaj
\p
\v 1 Ya ni nopa camanali catli TOTECO nechnextili na niHabacuc,
nitlajtol pannextijquetl.
\p
\v 2 ˻Na niquijto:˼ “TOTECO, ¿hasta quema tlamis
nimitztzajtzilis techpalehuiqui huan amo techtlacaquilis? ¿Hasta
quema tlamis nimitztzajtzilis para ayacmo ma mosisinijca tlacame,
huan amo aqui hualas para techmaquixtis?
\v 3 ¿Para tlen tijchihua ma niquita tlajtlacoli huan catli amo
xitlahuac mojmostla? Campa hueli nechyahualohuaj masehualme catli
tlasosolohuaj huan catli temajmatíaj. Mojmostla mosencualanijtoque
huan mohuilanaj.
\v 4 Huan yeca nopa tlanahuatilme ayacmo quichihuaj inintequi huan
nopa tequitini ayacmo tetlajtolsencahuaj xitlahuac quen
tlanahuatíaj. Masehualme catli fiero ininnemilis momiyaquilijtoque
hasta quionpano ininmiyaca catli cuajcualme huan yeca tlayacanani
ayacmo quichihuaj catli xitlahuac. San tlacajcayahuaj por se
tlaxtlahuili.”
\s TOTECO tlananquili
\p
\v 5 ˻Huan TOTECO quiijto:˼ “Xiquintlachilica nopa sequinoc
tlalme catli anmechyahualohuaj huan ximomajmatica pampa nijchihuas
se tlamantli ipan ni tonali pero amo anquineltocase masque se
anmechpohuilis para panotoc.
\v 6 Quena, na niquintlananas nopa caldeos catli itztoque ipan se
tlali tlen masehualme catli fiero ininnemilis huan catli
mosisiníaj. Inijuanti quinpactía nentinemise campa hueli ipan
nochi tlaltipactli para moaxcatise calme huan tlalme catli sequinoc
iniaxca.
\v 7 Inijuanti tlahuel mahuililme huan temajmatíaj. Quichihuaj san
catli quinequij huan amo aqui hueli quintlacahualtía.
\v 8 Inincahuayos motlalohuaj más chicahuac huan amo quen nopa
tecuanime catli inintoca leopardos. Tlacame catli nopona ehuani achi
más mosisiníaj que nopa lobos catli nemij ica tlayohua. Nopa
tlacame catli tlejcotoque cahuayojtipa hualahuij nelchicahuac tlen
se tlali catli huejca. Temotihuetzij nelchicahuac quen se cuajtli
para quiitzquis se piyo huan nimantzi quistehuas para quicuati.
\p
\v 9 “Nochi inijuanti hualahuij para tlahuilanase. Campa hueli
yohuij nochi temajmatíaj. Quinitzquitihualahuij masehualme quen
imiyaca xali para quinhuicase quintequipanoltitij.
\p
\v 10 “Quinpinajtíaj tlanahuatiani huan quinpinahualtíaj
tlayacanani. Quinhuetzquilíaj nochi altepeme catli moyahualojtoque
ica tepamitl catli tilahuac para quinmanahuisquía. Huan san
quimontonohuaj tlali iica nopa tepamitl huan ipan tlejcoj para
calaquise ipan nopa altepetl huan quinitzquise imasehualhua.
\v 11 Teipa panoj huan yohuij quen elisquía se ajcomalacatl, pampa
senquistoc tlasosolohuaj. Quihuicaj miyac tlajtlacoli pampa san
quiitaj ininchicahualis quen elisquía ininteco.”
\s Habacuc sempa quipohuilía TOTECO itequipachol
\p
\v 12 ˻Na niquijto:˼ “¡TOTECO, hasta huejcajya ta tiitztoya huan
nochipa tiitztoc! ¡Ta tinoTeco Dios catli tiTlatzejtzeloltic! Amo
timiquise. Melahuac ta tiquinpalehuijtoc nopa caldeos para
techtlatzacuiltise huan techxitlahuase por nopa huejhueyi
tlajtlacoli catli tijchijtoque. Pero ta, tiTOTECO, catli titemachtli
huan techmanahuis.
\v 13 Ta senquistoc titlapajpactic huan amo tijnequi tiquitas catli
amo cuali. Ta amo tijnequi tiquitas tlajtlacoli. Huajca ¿para tlen
san tiquintlachilijtoc quema fiero tlacame techtlaijiyohuiltíaj?
¿Para tlen amo tleno tijchihua quema nopa amo cuajcualme
quintzontlamiltíaj catli más cuajcualme que inijuanti?
\p
\v 14 “¿Para tlen techitaj quen tielisquíaj timichime catli
itztoque ipan hueyi atl para masehualme ma quinitzquica huan ma
quinmictica? Tijcahuilía aqui hueli techmictis. Techchijtoc quen
cohuame catli amo quipiyaj inintlanahuatijca para quinmanahuis.
\v 15 Tlali Babilonia ehuani quinquixtíaj nochi masehualme ica
ininteposchijcol huan quinsentilíaj nochi ipan ininmatla. Huan ica
ya nopa tlahuel mopaquilismacaj.
\v 16 Teipa quihueyichihuaj ininmatla huan quitlatilíaj copali.
Moilhuíaj para ica ininmatla moricojchijtoque huan cuali
tlacuajtoque.
\p
\v 17 “¿Tijcahuilis para quej nopa ma quichihuaca para nochipa?
¿Tiquincahuilis ma quisenhuiquilica quintzontlamiltise tlalme
ehuani campa hueli ica nochi inincualancayo?
\c 2
\p
\v 1 “Nimoquetzas huejcapa ipan ni tepamitl campa
nitlamocuitlahuía. Huan nitlachixtos tlaque TOTECO nechilhuis.
Nijchiyas quenicatza nechnanquilis por notequipachol.”
\s TOTECO quinanquili Habacuc
\p
\v 2 Huan TOTECO nechnanquili huan nechilhui: “Nochi nopa
tlanextili catli nimitznextilis para nimitznanquilis, xiquijcuilo
ipan se huapali ica tlajcuiloli catli huejhueyi huan catli cuali
nesi. Quej nopa aqui hueli catli quipohuas huelis nimantzi motlalos
para quinpohuiliti sequinoc.
\v 3 Pero ni tlamantli catli nimitzyolmelahuas amo panos nimantzi.
Pero ica yolic monechcahuijtiyas nopa tonali quema temachtli panos
catli nimitzilhuis ipan ni tlanextili. Sintla tiquitas para amo pano
nimantzi, amo ximotequipacho pampa temachtli panos. Xijpiya hueyi
moyolo pampa ni tlamantli panos senquistoc quen nimitzilhuía ipan
nopa tonali catli niquixquetztoc.
\p
\v 4 “Xiquijcuilo: ‘Se tlacatl catli amo cuali mohueyimati miyac
huan san motemachía ipan ya iseltzi, pero se catli itztoc xitlahuac
iixpa TOTECO, itztos para nochipa pampa quineltoca TOTECO.’
\s Catli ininpantis inincualancaitacahua
\p
\v 5 “Nojquiya nopa tlaili catli quinpactía quiijij quincajcayahua
huan quinchihua ma mohueyimatica. Pero amo huejcahuase. Ininyolo
nopa amo cuajcualme tlahuel quiixtocaj miyac tlamantli catli
sequinoc quipiyaj. Pero masque quinsentilise miyac masehualme tlen
miyac tlalme para iniaxcahua, amo paquij. Noja quinequij quipiyase
más. Itztoque quen miquilistli huan mictla catli amo quema temi.
Nochipa quinequij más.
\v 6 Pero ajsis tonali quema nochi catli quinitzquitoque san
quinhuetzquilise huan quiijtose: ‘Anteicneltzitzi amojuanti catli
anmoricojchijtoque ica tlamantli catli amo amoaxca huan
anquimiyaquilijtoque tlamantli catli anmechprendajcahuilijtoque. Ya
ajsico amotlatzacuiltil. Ama anquiselise amotlaxtlahuil pampa
antetlaijiyohuiltijtoque huan antetlachtequilijtoque.’
\p
\v 7 “Quema amo anquichiyaj, motlananase catli anquintlahuiquilíaj
huan tlahuel anmechmajmatiquij pampa hualase campa amojuanti ica
nochi inincualancayo huan quihuicase nochi catli anquipiyaj.
\v 8 Anquintlachtequilijtoque tlahuel miyac tlalme huan yeca
ama inijuanti catli noja mocahuaj nojquiya anmechtlachtequilise.
Tlahuel miyac masehualme anquinmictijque. Tlahuel chicahuac
anquihuilanque ni tlali, huan ni altepetl huan imasehualhua.
\p
\v 9 “Tlahuel anteicneltique amojuanti catli anquitemitijtoque
amochajchaj ica tlamantli catli san anquiichtectoque. Anmoilhuíaj
para catli anquipiyaj anmechsehuis huejcapa huan anmechmanahuis tlen
nochi tlamantli tlaohuijcayotl.
\v 10 Anquichijtoque tlamantli catli quihualicatoc pinahualistli
ipan amochajchaj. Anquinmictijtoque miyac masehualme ipan tlahuel
miyac altepeme, yeca anquihuicaj miyac tlajtlacoli hasta ayacmo
quinamiqui anitztose.
\v 11 Pampa hasta nopa teme huan nopa apechme catli eltoc ipan
inintepa huan inincalpani nopa calme catli anmoaxcatijtoque
nechtzajtzilíaj para ma nimechtlatzacuilti.
\p
\v 12 “Anteicneltzitzi catli anquicualtlalíaj se altepetl ica tomi
catli anquitlantoque pampa antemictijque huan ica tomi tlen
tlamantli catli anteichtequilijtoque.
\v 13 TOTECO Catli Quinyacana Itequihuajcahua Ma Tlatlanitij
quitlalijtoc para elis san tlapic antequititoque huan san tlapic
anmosiyahuiltijtoque pampa nochi catli anquiichtectoque tlatlas huan
elis san cuanextli quema yaya tetlajtolsencahuas.
\v 14 Pampa monechcahuía tonali quema ihueyitilis TOTECO quitemitis
ni tlaltipactli huan senquistoc nochi masehualme quiitase huan
quimatise. Temis tlaltipactli quen nopa miyac atl quitemitía hueyi
atl.
\p
\v 15 “Tlahuel anteicneltique catli anquimacaj tlaili se catli
amocalnechca huan teipa anquiihuintíaj ica catli chicahuac hasta
huetzis tlalchi huan momimilos para anquitlachilise itlacayo xolotl.
\v 16 Pero ica se tlatoctzi amohueyitilis elis pinahualistli pampa
TOTECO anmechtlatzacuiltis ica inejmac. Huan amojuanti nojquiya
anhuetzise huan anmomimilose huan tlanemijya elis amotlacayo huan
anmopinahuase.
\v 17 Quen anquinsosolojtoque catli eltoya ipan tlali Líbano, ama
nojquiya mocuepas ipan amojuanti. Anquintzontlamiltijtoque miyac
tlapiyalme huan ama nojquiya anmomajmatise pampa
anmechtzontlamiltise. Quej nopa elis pampa anquinmictijtoque miyac
masehualme huan anquisosolojtoque miyac altepeme ipan ni
tlaltipactli, ininhuaya nochi ininmasehualhua.
\s Amo tleno ininpati tiotzitzi huan tlaixcopincayome
\p
\v 18 “Amo tleno quipalehuía se tlacatl catli quihueyichihuas se
tlaixcopincayotl catli san tlamachijchihuali. Amo tleno ipati se
tiotzi catli quisencajtoque ica tepostli catli quimolonijque ipan
tlitl. San quichihua para se quineltocas se istlacatili huan
moilhuis para ya nopa se dios, pero amo neli. Nelía huihuitic se
catli quinchihua tiotzitzi catli amo huelise camanaltise huan teipa
motemachis ipan catli yaya quinsencajtoc.
\v 19 Fiero elis para nopa masehuali catli quicamanalhuía se
tlamantli tlen cuahuitl huan quiilhuía: ‘¡Xiitzto!’ O quiilhuía
se tlamantli tlen tetl catli amo hueli camanalti: ‘¡Xiisa!’ ¿Atlac
huelis camanaltise nopa tiotzitzi huan quimachtise catli cuali para
sequinoc quichihuase? ¡Amo! Masque quinxajtoque nopa tiotzitzi ica
oro huan plata, amo tleno hueli quichihuase pampa amo quipiyaj
nemilistli.
\p
\v 20 “Pero TOTECO itztoc ipan itiopa catli tlatzejtzeloltic.
Ma amo molinica iixpa nochi catli itztoque ipan ni
tlaltipactli pampa tlahuel monequi tijtlepanitase.”
\c 3
\s Inetlatlajtil Habacuc
\p
\v 1 Ya ni inetlatlajtil Habacuc catli yaya huicac iixpa TOTECO:
\p
\v 2 TOTECO, na nijcactoc mocamanal huan nelía nimomajmatía huan
nimitzhueyitlepanita por nochi nopa huejhueyi tlamantli catli
tijchijtoc. Ipan ni tonali quema tlahuel titlaijiyohuíaj sempa
xijchihua nopa huejhueyi tlamantli huan techpalehui quen tijchijqui
ipan nopa tonali tlen huejcajya. Masque tlahuel ticualantoc tohuaya,
xiquelnamiqui para ta hueyi moyolo huan techtlasojtla.
\p
\v 3 Niquita para Toteco Dios catli Tlatzejtzeloltic huala tlen
altepetl Temán huan tlen tepetl Parán. Itlatlanex huan ihueyitilis
quitemitijtoc ilhuicactli, huan quihueyitlalíaj masehualme catli
itztoque ipan nochi tlaltipactli.
\v 4 Yaya petlantihuala huan tlahuili quisa ipan imax quen
tlapetlanilotl. Huan quinextía nopa hueyi chicahualistli catli
motlatijtoc imaco.
\v 5 Iixpa tlayacanaj cocolisme catli temictíaj. Huan campa
iicxihua panotiyohui mocahua tlicoli xaxahuacatoc.
\v 6 Quema yaya moquetza se tlatoctzi, nopa tlali mohuijhuisohua.
Huihuipicaj tlalme quema yaya quintlachilía. Iixpa ya huelonij nopa
tepeme catli nochipa moquetztoyaj huan ixpolihui tlachiquilme catli
eltoque tlen huejcajya. Pero yaya nochipa itztoc. Nejnentihualajtoc
tlen ipejya tonali.
\v 7 Niquita para nopa masehualme tlen tlalme Cusán huan Madián
tlahuel majmahuij pampa quimatij nopa tlaijiyohuilistli catli
quinajsis.
\p
\v 8 TOTECO, ¿atlac ticualaniyaya ica nopa atlajme huan hueyame
quema huejcajya tiquintlapo? ¡Amo neli! Ta tiquinmaquixtiyaya
momasehualhua quema tihualajqui ipan nopa tlahuilanca carros ica
inincahuayos para techpalehuis.
\v 9 Ta tijnexti mohueyi chicahualis quema ticamanaltic. Tijpixtoya
mocuahuitol huan mocuatlaminhua momaco pampa quej nopa
tiquintencahuilijtoya momasehualhua para tiquinpalehuis.
Tijtejtejqui nopa tlali ica miyac atemitl.
\v 10 Nopa tepeme huihuipicaj quema mitzitaj, huan huetzi tlen
ilhuicac tlahuel miyac atl. Tlejco nopa atl catli eltoc tlatzintla
tlali ipan nopa huejhueyi atl. Tlahuel caquisti quen se catli
tzajtzi chicahuac huan eltoc quen nopa atl momatlanana moixpa.
\v 11 Ne tonati huan metztli moquetzque nepa ilhuicac.
Mocuatlaminhua catli tlahuel cahuaniyaya huan petlaniyaya
quinixmictijque.
\p
\v 12 Ica hueyi cualantli tinejnenqui ipan ni tlaltipactli, huan
ininpan timoquejquetzqui nochi tlalme.
\v 13 Tihuala para tiquinmaquixtis momasehualhua catli
tiquintlapejpenijtoc huan nopa Tlanahuatijquetl catli ta
ticaltijtoc. Tiquintzonxamanis nopa tlajtlacolchihuani huan
tiquintlamixolohuis tlen iniicxi hasta ipan inintzonteco.
\p
\v 14 Ica inijuanti inintepos, tiquinmictía nopa tlahuilanani catli
hualayayaj quen se hueyi ajcomalacatl para techsemanase
tiisraelitame. Moilhuiyayaj amo ohui techtzontlamiltisquíaj.
\v 15 Tinejnenqui ipan hueyi atl ica mocahuayojhua. Huan nopa atl
tijmontono ipan sesen lado.
\p
\v 16 Quema nijcajqui nochi ni tlamantli, nelía nimajmajqui.
Notenxipal pejqui huihuipica ica majmajtli. Noomiyohua huan
noicxihua ayacmo quipiyaj tetili para nimoquetzas. Na nijpiyas
noyolo huan nijchiyas nopa tonali quema TOTECO hualas huan
quintlatzacuiltis nopa masehualme catli amantzi
techtlaijiyohuiltíaj.
\p
\v 17 Huajca nipaquis masque amo xochiyohuas nopa higo, huan amo
tlaquis xocomecatl, huan amo temacase inintlajca olivo cuame.
Nijpiyas paquilistli masque amo oncas pixquistli ipan mila, huan
miquise nochi borregojme huan amo itztose huacaxme ipan corral.
\v 18 Masque amo tleno oncas, na nimopaquilismacas ipan TOTECO.
Quena, niyolpaquis ipan Toteco catli techmaquixtis.
\v 19 TOTECO Dios nechmacas chicahualistli. Huan por ichicahualis
nechchihuas na ma ninejnemi chicahuac quen se masatl ipan nopa
tepeme catli más huejcapa.