\id ZEP
\h SOFONÍAS
\mt Sofonías
\c 1
\s Nopa tonali quema ajsis ihueyi cualancayo Toteco
\p
\v 1 Ya ni nopa camanali catli TOTECO nechmacac niSofonías, na
niicone Cusi, huan niiixhui Gedalías, huan niiompaca ixhui Amarías
catli elqui icone Ezequías catli huejcajya itztoya. TOTECO
nechmacac ni camanali quema Josías, icone Amón, eliyaya
tlanahuatijquetl ipan tlali Judá.
\p
\v 2 Quej ni quiijtohua TOTECO: “Niquixpolihuiltis nochi tlamantli
catli onca ipan ni tlaltipactli.
\v 3 Niquinixpolihuiltis masehualme huan nochi tlapiyalme.
Niquinixpolihuiltis totome catli patlantinemij ipan ilhuicac huan
nopa michime catli itztoque ipan atl. Nochi amo cuajcualme
niquintlahuisos huan niquintlamiixpolihuiltis masehualme tlen ni
tlaltipactli.” Quej nopa quiijtohua TOTECO.
\v 4 “Niquintlatzacuiltis nochi masehualme ipan tlali Judá huan
nochi ipan altepetl Jerusalén. Niquinsosolos nochi tlaixcopincayome
tlen Baal huan nochi catli quinhueyichihuaj. Nochi totajtzitzi catli
quintequipanohuayayaj tiotzitzi niquinixpolihuiltis huan ayacmo aqui
quinelnamiquis.
\v 5 Nojquiya niquinixpolihuiltis inijuanti catli tlejcoj
inincalpani huan motlancuaquetzaj para quihueyichihuase tonati,
metztli huan sitlalime. Niquinmictis nochi catli quiijtohuaj
nechhueyichihuaj na, pero nojquiya quihueyichihuaj nopa tiotzi
Milcom.
\v 6 Nojquiya niquinixpolihuiltis inijuanti catli achtihuiya
nechhueyichihuayayaj na catli niininTECO, pero ama
mohuejcatlalijtoque tlen na. Ayacmo quitemohuaj catli nopaquilis,
niyon nechtlajtlaníaj ma niquintiochihua.”
\p
\v 7 Xijtlepanitaca huan xiquimacasica TOTECO. Amo ximolini iixpa.
Ya monechcahuía itonal TOTECO, nopa tonal quema yaya
tetlatzacuiltis. Yaya ya quicualtlalijtoc para quichihuas se
tlacajcahualistli huan elis imasehualhua catli miquise. Ya
quinnotztoc catli hualase quinmictiquij.
\v 8 TOTECO quiijtohua: “Ipan nopa tonali quema
nitetlajtolsencahuas, niquintlatzacuiltis nochi itlapalehuijcahua
nopa tlanahuatijquetl huan nochi iconehua huan nochi catli
moyoyontíaj quen nopa masehualme tlen sequinoc tlalme.
\v 9 Nojquiya niquintlatzacuiltis inijuanti catli amo quinequij ipan
moquetzase caltencuahuitl pampa quintlepanitaj tiotzitzi. Huan
niquintlatzacuiltis catli tecajcayahuaj huan tetlachtequilíaj para
quitemitise ininchaj inintiotzitzi ica tlamantli tlachtectli. Teipa
quitemitíaj ichajchaj inintecohua ica catli tlachtectli.”
\v 10 Nojquiya TOTECO quiijtohua: “Ipan nopa tonali chicahuac
tzajtzise nopa masehualme catli itztoque campa hueli ipan altepetl
Jerusalén. Tzajtzise tlen nopa puerta catli itoca Michi hasta campa
nopa colonia catli yancuic. Huan caquistis chicahuac quema huelonis
nopa tlaixtlejcolis.
\v 11 Huajca xiayijtica nochi anmasehualme ipan nopa colonia campa
tianquis pampa nochi tlanemacani huan nochi catli
anmechtlanejtiyayaj tomi ya mijque.
\p
\v 12 “Ipan nopa tonali nijtequihuis se tlahuili ipan altepetl
Jerusalén huan niquintemos hasta niquinpantis nochi masehualme
catli pajca mosiyajquetztoque ipan tlajtlacoli. Nochi
niquintlatzacuiltis pampa quiijtohuayayaj: ‘TOTECO amo tleno
techchihuilis. Amo techchihuilis catli cuali, niyon catli amo
cuali.’
\v 13 Yeca inincualancaitacahua quinichtequilise nochi catli
quipixtoque, huan ininchajchaj quinsosolhuilise. Masque mochantise,
amo huelis itztose nopona huan masque quitocase xocomecatl, amo
huelis quiijise iayo.
\p
\v 14 “Nechcatitoc nopa tonal quema niininTECO
nitetlajtolsencahuas. Quena, tlahuel nimantzi monechcahuijtihuala
quema nitetlatzacuiltis. Nelfiero elis nopa tonal hasta tlacame
catli más motemacaj chocase huan tlahuejchihuase.
\v 15 Ipan tonal nesis quenicatza niininTECO ninelcualantoc huan
nochi majmahuise huan ayacmo quimatise tlaque quichihuase, san
motlamipasolose. Huan quema tlamis nopa tlasosololistli, ayacmo
tleno mocahuas. Elis se tonali tlen tequipacholi huan
tlaohuijcayotl. Elis se tonal quema tlamixtentos huan
tzintlayohuiyas.
\v 16 Ipan nopa tonali molinis tlapitzali huan miyac tzajtzise pampa
sosolihuis inintepa nopa altepeme catli moyahualojtoque. Huan
huetzise nopa huejcapantique torres campa tlachiyayayaj huejca para
tlamocuitlahuise.
\p
\v 17 “Niquintlaijiyohuiltis nopa masehualme huan nemise quen
popoyotzitzi pampa tlajtlacolchijque ica na niininTECO. Inieso
mosemanas campa hueli quen quema mosemana tlaltejpoctli, huan
ininnacayo palanis quen cuitlatl.”
\p
\v 18 Ipan nopa tonal niyon ininplata tomi, niyon inioro tomi amo
huelis quinmanahuis tlen ihueyi cualancayo TOTECO pampa nochi tlali
tlamitlatlas ica nocualancayo. Huan nochi masehualme ipan
tlaltipactli polihuise ica se tlatoctzi.
\c 2
\s Nopa tonal quema TOTECO quintlatzacuiltis nochi tlalme
\p
\v 1 Ximosentilica huan ximoilhuica quenicatza anitztoque catli amo
anpinahuaj iixpa TOTECO.
\v 2 Xijchihuaca amantzi. Amo xijcahuilica ma pano tonali quen
tlajsoli catli quihuica ajacatl. Amo xijchiyaca hasta ajsis nopa
tonal catli niquijtojtoc hualas quema TOTECO tlahuel cualanis
amohuaya huan amopan ajsis ihueyi cualancayo.
\v 3 Xijtemoca TOTECO nochi amojuanti catli anteicneltzitzi ipan ni
tlaltipactli huan amojuanti catli anquichihuaj catli quiijtohua
itlanahuatilhua. Xijchihuaca catli xitlahuac huan ximoicnonequica
pampa quej nopa huelis anmomanahuise quema TOTECO tetlatzacuiltis
ica nochi icualancayo.
\s TOTECO quintelhuía filisteos
\p
\v 4 Ipan inintlal nopa filisteos nopa altepeme Gaza, Ascalón huan
Asdod mocahuase nochi sosoltic. Quitlamitlachtequilise huan catli
nopona ehuani quintlamiixpolihuiltise.
\v 5 Nelfiero elis para amojuanti ancereteo masehualme catli
anitztoque iteno hueyi atl ipan tlali Canaán pampa TOTECO
anmechtlajtolsencahuas. TOTECO anmechtzontlamiltis nochi catli
anitztoque ipan nopa tlali tlen nopa filisteos huan amo aqui
mocahuas.
\v 6 Nopa tlali catli eltoc nechca hueyatl elis se sacamili. Nopona
mosentilise tlamocuitlahuiani tlen borregojme huan quichihuase
tlatzactli para ininborregojhua.
\p
\v 7 Huan nopa tlali Judá ehuani catli noja mocahuase yoltoque
moaxcatise nopa tlali huan nopona tlacuase ininborregojhua. Ica
tlayohua cochise ipan nopa calme catli eltoc ipan Ascalón pampa
TOTECO ininDios hualas quinpaxaloqui imasehualhua huan quinquixtis
tlen campa tequipanotoj ipan tlalme catli huejca.
\s TOTECO quintlatzacuiltis moabitame huan amonitame
\p
\v 8 Yaya quiijtohua: “Na nijcactoc quenicatza nopa moabitame huan
amonitame quintlaijilhuijtoque nomasehualhua. Quinpinajtijtoque huan
quincuilijtoque inintlal.”
\v 9 Quej ni quiijtohua TOTECO Catli Quinyacana Itequihuajcahua Ma
Tlatlanitij yaya catli ininDios israelitame: “Nimotestigojquetza
ica na noseltzi huan niquijtohua para niquinixpolihuiltis nochi ipan
tlali Moab huan Amón quen nijchijqui ica altepeme Sodoma huan
Gomorra huejcajya. Ipan Moab huan Amón san oncas tejtzonquilitl
huan miyac istatl. Sosolijtos para nochipa. Huan noisraelita
masehualhua catli noja mocahuase yoltoque ipan nopa tonali calaquise
para moaxcatise nopa tlalme.”
\v 10 Quej nopa ininpantis Moab huan Amón pampa mohueyimatque, huan
quintlaijilhuijque huan quinhuetzquilijque imasehualhua TOTECO Catli
Quinyacana Itequihuajcahua Ma Tlatlanitij.
\v 11 TOTECO quinchihuilis catli fiero huan nelía tlahuel
quinmajmatis. Quinixpolihuiltis nochi tiotzitzi catli
quinhueyichihuaj ipan nopa tlalme. Quej nopa nochi tlalme ipan
tlaltipactli quihueyichihuase TOTECO. Sesen quihueyichihuas ipan ya
itlal.
\s TOTECO quitlatzacuiltis Etiopía huan Asiria
\p
\v 12 Huan TOTECO quiijtohua: “Huan amojuanti tlen tlali Etiopía
nojquiya nimechtzontlamiltis ica nomachete.”
\v 13 Ica ihueyi chicahualis TOTECO nojquiya quintlatzacuiltis nopa
tlalme catli mopantíaj ica norte. Quitlatzacuiltis tlali Asiria
huan ihueyi altepe, Nínive, quicahuas sosolijtoc quen se huactoc
tlali campa amo tleno onca.
\v 14 Nopona mosiyajquetzase borregojme huan miyac tlamantli
tlapiyalme catli campa hueli hualase quipiyase ininchaj nepa. Miyac
tlamantli cuamojmojme cochise ipan nopa tlaquetzalme tlen nopa
caltlanahuatilme catli achtihui eltoyaj yejyectzitzi. Tzopilome
itztose ipan ininventanas huan ipan ininpuertas san oncas miyac
tlajsoli. Huan nochi cuatetomitl tlen tiocuahuitl mocahuas
tlanemijya.
\p
\v 15 Quej ni ipantic nopa altepetl catli san pactoya huan catli
eltoya temachtli. Nopona nochi mohueyimatiyayaj ipan ininyolo huan
quiijtohuayayaj: “Ipan nochi tlaltipactli amo onca seyoc altepetl
catli tlahuel cuali quen ni.” Pero ama xiquitaca quenicatza
mocajqui tlasosololi huan mochijqui ininchaj tlapiyalme. Nochi catli
panose nopona san quihuetzquilise huan quiojolinise inintzonteco
para quipinajtise.
\c 3
\s Itlajtlacol Jerusalén huan quenicatza Toteco quimanahuis
\p
\v 1 Nelfiero elis para altepetl Jerusalén. Nelmosisinijtoque catli
ehuaj nopona. Ayacmo tlapajpactique iixpa TOTECO por
inintlajtlacolhua. Tlahuel tetlaijiyohuiltíaj quen quinequij.
\v 2 Catli nopona itztoque amo quitlacaquilíaj TOTECO icamanal
quema quinilhuía catli monequi quichihuase. Amo quema quinequij
quichihuase catli xitlahuac. Amo motemachíaj ipan TOTECO yaya catli
ininDios, niyon amo quitemohuaj.
\p
\v 3 Itlayacancahua nopa altepetl itztoque quen leones catli san
nanalcatoque huan quichiyaj ajqueya huelis quiitzquise. Ijueces
itztoque quen lobos catli nemij tlayohua para quimasiltise huan
quitlamicuase nochi catli quiitzquise hasta niyon se iomiyo amo
mocahuas para ijnaloc.
\v 4 Catli motocaxtíaj tlajtol pannextiani nopona senquistoc
tlacajcayahuaj huan moijixpatlaj. Totajtzitzi nopona quiijtlacohuaj
nochi tlamantli catli tlatzejtzeloltic huan quiixpanoj itlanahuatil
TOTECO.
\v 5 Pero TOTECO itztoc ipan Jerusalén huan yaya quichihua catli
xitlahuac. Amo tleno catli amo cuali quichihua. Mojmostla quinextía
para xitlahuac nochi catli quiijtohua huan quichihua. Huan nochipa
nochime hueli quimatij catli xitlahuac. Pero amo aqui quichihuilía
cuenta. Amo cuajcualme, nopona niyon amo mopinahuaj ica catli
quichihuaj.
\p
\v 6 TOTECO quiijtohua: “Niquinixpolihuiltijtoc miyac tlalme huan
ininmasehualhua. Nochi calme nopona mocajque sosolijtoque huan
inincalles mocajque tlatzitzicatoc. Inialtepehua tlamisosolijtoc
hasta ayacmo mocajqui niyon se masehuali.
\v 7 Huan niquijto para ama quena, nechimacasise huan
nechtlacaquilise quema niquintlacahualtis. Huan quej nopa ayacmo
monequis niquintlatzacuiltis sempa quen achtihuiya. Pero amo
moyolcuepque. Inijuanti noja más pejqui quichihuaj catli fiero.”
\v 8 Huajca ama TOTECO quiijtohua: “Xijpiyaca amoyolo huan
techchiyaca hasta nopa tonal quema na nimoquetzas para
niquintlajtolsencahuas. Pampa na ya nijtlalijtoc quema
niquinsentilis nochi tlalme ehuani huan nochi inintlanahuatijcahua
huan ininpan nijtoyahuas nohueyi cualancayo. Huan nocualancayo elis
quen se tlitl catli quintlamitlatis nochi ipan tlaltipactli.
\p
\v 9 “Ipan nopa tonali na niquinpajpaquilis inincamac nochi
masehualme huan nochi inijuanti sentic huelise nechhueyichihuase,
niininTECO, ica san se ininyolo.
\v 10 Nochi nomasehualhua catli mosemantoque campa hueli hasta ipan
seyoc nali tlen nopa hueyame tlen tlali Etiopía nechtlajtlanise
para sempa ma nieli ininTECO huan hualase para nechmacase
inintlacajcahualis.
\v 11 Huan ipan nopa tonal ayacmo anquipanose pinahualistli por
nochi nopa fiero tlamantli catli ica antechixpanoque pampa ipan nopa
tonali ayacmo anmosisinise ica na. Huan niquinijcuinis tlen campa
amojuanti nochi masehualme catli mohueyimatij huan motlepanitaj,
huan quej nopa ayacmo aqui mohueyimatis ipan notepe catli
tlatzejtzeloltic.
\v 12 Huan tlen amojuanti niquincahuas ma mocahuaca yoltoque se
quesqui masehualme catli teicneltzitzi huan catli moicnonequij pampa
inijuanti catli más nimantzi motemachíaj ipan na, niamoTECO.
\v 13 Huan nopa masehualme catli mocahuase yoltoque amo quichihuase
tlamantli catli amo cuali, amo istlacatise, niyon amo
tlacajcayahuase. Nopona tlacuase huan cochise ica tlasehuilistli,
huan amo aqui quintemajmatis.”
\p
\v 14 Xihuicaca amojuanti catli anitztoque ipan altepetl Sion.
Xitzajtzica ica paquilistli nochi anisraelitame. Ximopaquilismacaca
ica nochi amoyolo nochi ipan altepetl Jerusalén.
\v 15 Pampa TOTECO ayacmo más anmechtlatzacuiltis huan yaya
quinquixtis nochi amocualancaitacahua. Huan TOTECO iseltzi itztos
amohuaya, yaya catli Tlanahuatijquetl ipan tlali Israel. Huan huajca
ayacmo quema anquiitase catli amo cuali.
\p
\v 16 Ipan nopa tonali masehualme quinilhuise Jerusalén ehuani:
“Amo ximajmahuica amojuanti ipan altepetl Sion, niyon amo
ximahuihuipicaca.
\v 17 Pampa TOTECO catli quipiya nochi chicahualistli hualajtoc para
itztos amohuaya. Yaya anmechmaquixtis. Yaya nelía yolpaquis ica
amojuanti. Anmechyoltlalis ica iteicnelijcayo huan por amojuanti,
huicas ica miyac paquilistli.”
\v 18 Huan TOTECO quiijtohua: “Nimechsentilis amojuanti catli
anmotequipachohuaj pampa amo hueliyaya anmosentilise ipan nopa
tlasentililistli catli tlatzejtzeloltique huan ayacmo aqui
anmechpinahualtis sempa.
\v 19 Ipan nopa tonal na niquintlatzacuiltis catli
mitztlaijiyohuiltiyayaj. Niquinmaquixtis nomasehualhua catli amo
quipiyaj chicahualistli huan catli amo hueli momanahuise
ininseltzitzi. Niquinquixtis nomasehualhua catli tetequipanoyayaj
ipan nochi tlalme huan niquinhualicas. Huan niquinhueyitlalis huan
quipiyase tlatlepanitacayotl ipan nochi tlaltipactli.
\p
\v 20 “Ipan nopa tonal na nimechsentilis huan nimechhualicas ipan
amotlal. Huan nimechmacas seyoc amotoca. Nimechhueyitlalis huan
nochi tlalme ipan tlaltipactli anmechtlepanitase. Ica amoixteyol
anquiitase para sempa nimechcualtlalis huan sempa nimechmacas nochi
catli anquipiyayayaj.” Quej nopa quiijto TOTECO.