\id 1CO
\h 1 CORINTIOS
\mt Nopa Achtihui Amatlajcuiloli catli Pablo Quintlajcuilhui Tlaneltocani ipan Altepetl Corinto
\c 1
\s Pablo quintlajcuilhui tlaneltocani ipan Corinto
\p
\v 1 Na niPablo catli Toteco Dios nechnotzqui ica ipaquilis huan
nechtequimacac ma nieli niitlayolmelajca Jesucristo. Na ihuaya
toicni Sóstenes
\v 2 timechtlajcuilhuíaj amojuanti catli anitztoque itiopa Toteco
ipan altepetl Corinto. Toteco anmechnotztoc para anelise
itlatzejtzeloltijca masehualhua. Anmechchijqui antlatzejtzeloltique
ipan Cristo Jesús san se quen quinchijqui tlatzejtzeloltique nochi
sequinoc tlaneltocani campa hueli techaj. Quena, san se
quiniyocatlalijtoc nochi masehualme catli quihueyimatij Tohueyiteco
Jesucristo, pampa yaya ininTeco ne sequinoc quen yaya nojquiya
toTeco tojuanti.
\v 3 Toteco Totata huan Toteco Jesucristo ma quipiyaca hueyi
ininyolo ica amojuanti huan ma anmechmacaca tlasehuilistli ipan
amoyolo.
\s Pablo quitlascamatqui Toteco por nopa tlaneltocani
\p
\v 4 Nochipa nijtlascamati Toteco pampa hueyi iyolo amohuaya ipan
Cristo Jesús.
\v 5 Ipan Cristo, Toteco anmechricojchijqui ica miyac tlamantli
hasta ama cuali anhuelij ancamanaltij icamanal huan
anmechmachiltijtoc nochi catli melahuac.
\v 6 Huajca ya ni quinextía para melahuac nopa camanali catli
timechilhuijque tlen Cristo pampa motlatzquili ipan amoyolo.
\v 7 Huajca ama anquipiyaj nochi yajatili catli monequi para
anmoscaltise ipan Toteco ipan ni tonali quema anquitlatocchiyaj para
monextis Tohueyiteco Jesucristo quema yaya sempa hualas.
\v 8 Huan yaya Toteco catli anmechchihuas antemachme hasta itlamiya
tonali para amo aqui huelis anmechtelhuis ica niyon se tlamantli
ipan nopa hueyi tonal quema Tohueyiteco Jesucristo mocuepas.
\v 9 Toteco yaya temachtli huan yaya catli anmechnotztoc para
annejnemise huan anmohuampoxchihuase ihuaya Icone, Tohueyiteco
Jesucristo.
\s Motlajcoxelojtoyaj nopa tlaneltocani
\p
\v 10 Huan ama, toicnihua, nimechtlajtlanía ica itequiticayo
Tohueyiteco Jesucristo para nochi amojuanti ximoyolilhuica san se
tlamantli. Amo ximotlajcoxeloca, pero xijchihuaca quen san se
masehuali. Xijpiyaca san se amotlalnamiquilis huan san se amoyolo.
\v 11 Noicnihua, nimechilhuía ni tlamantli pampa ichampoyohua Cloé
nechyolmelajque para anmocamaijixnamiquij.
\v 12 Sequin amojuanti anquiijtohuaj antechtoquilíaj na niPablo.
Sequinoc amojuanti anquiijtohuaj anquitoquilíaj Apolos. Sequinoc
quiijtohuaj quitoquilíaj Pedro. Huan sequinoc quiijtohuaj
quitoquilíaj Cristo.
\p
\v 13 Amo cuali catli anquichihuaj. ¿Anmoilhuíaj para huelis
anquitlajcoxelose Cristo? ¡Amo neli! Amo nechcuamapeloltijque na
niPablo por amojuanti. Huan quema anmechcuaaltijque, amo aqui
quiijto anmechcuaaltiyaya ica notoca [1:13 Ica notequiticayo.]  na
niPablo.
\v 14 Nijtlascamati Toteco pampa amo aqui nijcuaalti campa
amojuanti, san Crispo huan Gayo.
\v 15 Huajca amo aqui huelis quiijtos anmocuaaltijque ica
notequiticayo para antechtoquilisquíaj.
\v 16 Nojquiya niquincuaalti ichampoyohua Estéfanas, pero amo
niquelnamiqui sintla nijcuaalti seyoc.
\v 17 Pampa Cristo amo nechtitlanqui para ma nitecuaalti.
Nechtitlanqui para ma nitlacamanalhui nopa cuali camanali tlen
Jesucristo. Amo nitlacamanalhuía ica yejyectzi camanali catli huala
ipan notlalnamiquilis. Sintla ya nopa nijchijtosquía, hueltosquía
masehualme quinpactijtosquía nocamanal huan quielcajtosquíaj para
Cristo mijqui por tojuanti huan ya nopa catli quipiya chicahualistli
para techmaquixtis.
\s Cristo quipiya nochi chicahualistli huan tlalnamiquilistli
\p
\v 18 Nijmati para masehualme catli mocuapolose nochipa quiitaj para
se huihuiyotl ni camanali tlen imiquilis Cristo para
techtlajtlacolquixtis. Pero para tojuanti catli Toteco
techmaquixtijtoc, tiquiximatij ni camanali quipannextía
ichicahualis Toteco.
\v 19 Pampa ijcuilijtoc ipan Icamanal Toteco campa yaya quiijto:
\q “Nijsemanas inintlalnamiquilis tlalnamiquini ipan ni
tlaltipactli.
\q Huan niquinquixtilis masehualme catli monejnehuilijtoque
quichihuase,
\q huan nijcuamajcahuas.”
\p
\v 20 Huajca ¿tlaque quiijtohua Toteco tlen nochi tlalnamijca
tlacame? ¿Tlaque quiijtohua tlen nopa tlamachtiani tlen
itlanahuatilhua Moisés? ¿Tlaque quiijtohua tlen nopa huejhueyi
tlacame catli ipan ni tonali monajnanquilíaj tlamiyacapa para
tenextilise para quipiyaj miyac inintlalnamiquilis? Toteco
quipannextijtoc para nochi tlamantli tlalnamiquilistli catli eltoc
ipan ni tlaltipactli eltoc quen se huihuiyotl catli amo tleno ipati.
\v 21 Huan Toteco catli quipiya nochi tlalnamiquilistli ya
quisencajtoc para amo aqui huelis quiiximatis ajqueya ya pampa
tlalnamiqui quen ipan ni tlaltipactli moilhuíaj tlalnamiquij.
Quipactía Toteco para quinmaquixtis masehualme catli quicaquij
catli tlacamanalhuíaj icamanal huan quineltocaj, masque sequinoc
quiijtohuaj ya ni se huihuiyotl.
\p
\v 22 Pero israelitame amo quinequij quineltocase catli san
tlacamanalhuíaj icamanal. Inijuanti quinequij quiitase tiochicahual
nextili para quineltocase para melahuac se tlamantli. Huan
masehualme catli amo israelitame huan camanaltij griego san
quitemohuaj catli melahuac ica inintlalnamiquilis.
\v 23 Pero tojuanti san tiquinilhuíaj nochi masehualme para Cristo
quicuamapeloltijque huan mijqui por tojuanti. Nelía ohui para
israelitame ma quineltocaca ni camanali. Huan masehualme catli amo
israelitame quiijtohuaj ni camanali san se huihuiyotl.
\v 24 Pero para tojuanti, masque tiisraelitame o amo tiisraelitame,
sintla Toteco technotztoc para ma tiitztoca tiiaxcahua, tiquiximatij
Cristo para yaya catli nelía quipannextía ichicahualis huan
itlalnamiquilis Toteco.
\v 25 Huan ni tlanejnehuilistli catli Toteco quisencajqui para
quichihuas ica Cristo huan catli sequinoc quitocaxtíaj se
huihuiyotl, pano hueyi inintlalnamiquilis nochi masehualme. Huan
masque sequinoc quiijtohuaj Cristo amo quipixqui chicahualistli
pampa quicuamapeloltijque, ichicahualis quema miquiyaya ipan nopa
cuamapeli hueyi quipano nochi ininchicahualis masehualme.
\p
\v 26 Huajca noicnihua, xiquelnamiquica para quema Toteco
anmechnotzqui, amo miyac amojuanti tlahuel antlalnamiquiyayaj quen
quinpactía tlaltipac masehualme. Amo miyac amojuanti anquipiyayayaj
chicahualistli, niyon tequiticayotl. Amo miyac anquipiyayayaj miyac
tomi, niyon amo anquipiyayayaj hueyi tlatlepanitacayotl.
\v 27 Pero Toteco ica ipaquilis quintlapejpeni tlamantli huan
masehualme catli ni tlaltipac ehuani quinitaj para se huihuiyotl
para quinpinahualtis masehualme catli moilhuíaj tlalnamiquij. Huan
Toteco anmechtlapejpenijtoc amojuanti catli amo anquipiyaj
chicahualistli quen sequinoc ipan ni tlaltipactli, para
anquinpinahualtise masehualme catli moilhuíaj quipiyaj tetili.
\v 28 Quena, Toteco quintlapejpenijtoc catli teicneltzitzi ipan ni
tlaltipactli huan catli masehualme quincualancaitaj huan moilhuíaj
para amo tleno ininpati para ica inijuanti quisemanas catli
masehualme moilhuíaj para más hueyi ipati.
\v 29 Toteco quichijqui ya ni para amo aqui huelis mohueyimatis
iixpa.
\v 30 Pampa Toteco iseltzi anmechtlatzquiltijtoc ipan Cristo Jesús.
Huan pampa tiitztoque san se ica Cristo Jesús, yaya mochijtoc
totlalnamiquilis. Huan yaya techchijqui tixitlahuaque huan
titlatzejtzeloltique iixpa Toteco. Huan yaya techcojtoc para
techtojtomas tlen tlajtlacoli para huelis tiyase timajcajtoque.
\v 31 Huajca eltoc quen ijcuilijtoc ipan Icamanal Toteco: “Sintla
se masehuali quinequi mohueyimatis, ma quihueyimati tlen catli
Tohueyiteco techchihuilijtoc.”
\c 2
\s Nopa camanali tlen Jesucristo catli mijqui por tojuanti
\p
\v 1 Huajca, noicnihua, quema achtihui niyajqui campa amojuanti para
nimechilhuis icamanal Toteco, amo nimechcamanalhui ica huejhueyi
camanali, niyon amo nimochijqui quen nineltlalnamiqui.
\v 2 Nimoilhui para más cuali para san nimechcamanalhuis tlen
Jesucristo huan quen yaya mijqui ipan cuamapeli por tojuanti huan
amo tleno más nimechilhuisquía.
\v 3 Huan quema niitztoya amohuaya, amo nijpixqui chicahualistli.
Nimomajmatiyaya huan nihuihuipicayaya amoixpa.
\v 4 Huan amo nimechcamanalhuiyaya ica yejyectzi camanali catli
quinexti itlalnamiquilis se masehuali, pero quema
nimechcamanalhuiyaya, ichicahualis Itonal Toteco monexti ipan
nocamanal.
\v 5 Amo nijnequiyaya para ximotemachica ipan inintlalnamiquilis
masehualme, pero ipan ichicahualis Toteco.
\s Itonal Toteco technextilía itlalnamiquilis Toteco
\p
\v 6 Pero quena, quema tiquincamanalhuíaj tlaneltocani catli
chicajtoque, tiquincamanalhuíaj ica camanali catli quinextía miyac
tlalnamiquilistli. Pero tocamanal amo quinextía nopa
tlalnamiquilistli catli eltoc ipan ni tonali, niyon amo quinextía
nopa tlalnamiquilistli catli quinpactía tlayacanani catli itztoque
ama pampa inijuanti san tlantiyohuij.
\v 7 Pero tiquincamanalhuíaj masehualme ica camanali catli
quinextía itlalnamiquilis Toteco catli achtihuiya amo aqui
quimachiliyaya. Quena, huejcajya quema ayamo pehuayaya tlaltipactli,
Toteco monejnehuili huan quisencajqui nochi nopa cuajcualtzi
tlamantli catli techchihuilisquía teipa ipan Cristo, pero amo
quincahuili masehualme ma quimatica hasta amanoc.
\v 8 Huan niyon se tlayacanquetl ipan ni tlaltipactli amo quimachili
catli quichihuayaya Toteco, pampa sintla quimachilijtosquíaj, amo
quicuamapeloltijtosquíaj Tohueyiteco catli onpano quipiya
ihueyitilis.
\v 9 Eltoc quen ijcuilijtoc ipan Icamanal Toteco campa quiijtohua:
\q “Amo aqui quiitztoc, niyon quicactoc, niyon moilhuijtoc,
\q quen onpano yejyectzi nopa tlamantli catli Toteco quisencajtoc
para quinmacas nopa masehualme catli quiicnelíaj.”
\m
\v 10 Pero tojuanti tijmatij tlen nopa yejyectzi tlamantli pampa
Toteco technextilijtoc ica Itonaltzi. Pampa Itonaltzi quimati huan
quitlachilía nochi catli moilhuía Toteco huan technextilía hasta
nopa tlamantli catli más hueyi catli Toteco moilhuía.
\p
\v 11 Amo aqui hueli quimati catli seyoc masehuali moilhuía, pero
itonal nopa masehuali, quena, quimati nochi catli eltoc ipan iyolo.
Nojquiya amo aqui quimati catli moilhuía Toteco, san Itonal Toteco,
quena, quimati.
\v 12 Huan Toteco amo techmacac se tonaltzi catli hualajqui ipan ni
tlaltipactli. Yaya techmacatoc tlen ya Itonaltzi para huelis
tijmatise nochi nopa tlamantli catli yaya techmacac san quiaja quema
techmaquixti.
\v 13 Huan tiquinilhuíaj masehualme tlen nopa tlamantli quema
titlacamanalhuíaj icamanal. Pero quema tiquincamanalhuíaj
masehualme, amo tijtequihuíaj camanali catli huala ipan
totlalnamiquilis timasehualme, san tijtequihuíaj camanali catli
Itonal Toteco techmachtía. Quena, quej nopa tijtequihuíaj camanali
catli Itonal Toteco techmaca para tiquinmachtise masehualme nochi
catli melahuac para inintonaltzitzi.
\p
\v 14 Pero masehualme ipan ni tlaltipactli catli ayamo quineltocaj
Toteco huan ayamo quipiyaj Itonaltzi ipan ininyolo amo
quimachilíaj, niyon amo quiselíaj, catli Itonal Toteco tlamachtía
pampa quicaquij para san se huihuiyotl. Nelía inijuanti amo hueli
quimachilise catli Itonal Toteco tlamachtía pampa monequi quipiyase
Itonal Toteco ipan ininyolo para quiyecose huan quimachilise.
\v 15 Pero se masehuali catli quipiya Itonal Toteco ipan iyolo,
quena, yaya hueli quiyecos huan quimachilis nochi ni tlamantli catli
Itonal Toteco tlamachtía, pero sequinoc masehualme ipan ni
tlaltipactli amo hueli quimachilíaj nopa masehuali.
\v 16 ¿Quenicatza huelis quimachilise? Ipan Icamanal Toteco
ijcuilijtoc campa quiijtohua:
\q “¿Ajqueya hueli quimachilía itlalnamiquilis Toteco?
\q Amo aqui hueli quimachtis Toteco tlaque monequi quichihuas.”
\m Pero tojuanti, quena, tijmachilíaj ni tlamantli pampa tijpiyaj
itlalnamiquilis Cristo.
\c 3
\s Nopa sequinoc catli tequitique ihuaya Pablo
\p
\v 1 Noicnihua, quema niitztoya nepa amohuaya, amo nihuelqui
nimechcamanalhui quen niquincamanalhuisquía tlaneltocani catli
chicajtoque ipan Toteco huan catli quicahuilíaj Itonal Toteco ma
quinyacana. Monejqui nimechcamanalhui quen niquincamanalhuía
masehualme catli san quitoquilíaj inintlalnamiquilis. Anitztoyaj
quen anpilconetzitzi catli san anpejtoyaj anquineltocaj Cristo.
\v 2 Nimechmachti catli amo ohui tlen Toteco, quen se acajya quimaca
se pilconetzi lechi pampa ayamo hueli quicua nacatl. Ayamo
anhueliyayaj anquimachilíaj catli ohui, huan ama noja ayamo hueli
anquimachilíaj,
\v 3 pampa noja anmechyacana catli amo cuali amotlalnamiquilis
quinequi xijchihuaca. Anmochicoitaj, huan anmonajnanquilíaj huan
anmotlajcoxelohuaj. Quej nopa quichihuaj masehualme catli san
quinyacana catli inijuanti quinequij. Anmochihuaj quen masehualme
tlen ni tlaltipactli catli ayamo quiiximatij Toteco.
\v 4 Pampa quema se tlen amojuanti quiijtohua para yaya
nechtoquilía na niPablo, huan seyoc quiijtohua quitoquilía Apolos,
anquichihuaj quen quichihua tlen hueli masehuali catli amo
quiiximati Toteco.
\p
\v 5 ¿Tlaque chicahualistli quipiya Apolos para anmechpalehuisquía
huan tlaque nijpiya na, niPablo? ¡Amo tleno! Tojuanti san
tiitequipanojcahua Toteco huan ica tojuanti Toteco anmechnotztoc
xijneltocaca, pero san tijchihuayayaj nopa tequitl catli Toteco
techmacatoc ma tijchihuaca.
\v 6 Quema na nimechilhui icamanal Toteco, nijchijqui quen se catli
quitojqui se xinachtli, huan itequi Apolos elqui quen se catli
quiatequi, pero elqui Toteco catli quichijqui nopa xinachtli ma
moscalti.
\v 7 Huajca amo ipati ajqueya quitojqui nopa xinachtli, niyon
ajqueya quiatequi, pero hueyi ipati Toteco catli quichijqui ma
moscalti.
\v 8 San se iixpa Toteco na catli nijtojqui huan Apolos catli
quiatequi, huan Toteco techtlaxtlahuis sesen tojuanti quen nopa
tequitl catli tijchijtoque.
\v 9 Pampa Apolos huan na san sejco titequitij ihuaya Toteco. Huan
amojuanti anitztoque quen imil Toteco campa titocaj, pero amo
antomil tojuanti.
\p O huelis tiquijtose anitztoque quen se cali catli Toteco
techilhui ma tijchihuaca, pero amo toaxca tojuanti.
\v 10 Eltoc quej ni. Toteco, pampa hueyi iyolo ica na,
nechtequimacac ma nijtlali nopa tlatzinpehualtili ipan ichaj quen
quichihua se tlalnamijca calchijquetl. Huan eltoc quen sequinoc
catli anmechmachtíaj Icamanal pejtoque quiiscaltíaj nopa tepancali
ipan nopa tlatzinpehualtili. Pero monequi nochi catli tequitij ipan
nopa cali catli Toteco quichihua, ma motlachilica sintla cuali
inintequi o amo.
\v 11 Quema nicalajqui campa amojuanti, san nimechilhui tlen
Jesucristo. Huan ichaj Toteco amo hueli quipiya seyoc
tlatzinpehualtili.
\v 12 Pero se calchijquetl huelis quichihuas nopa tepancali ica
tlamantli catli huejcahuas quen oro, plata, o yejyectzi tetl catli
patiyo, o nojquiya huelis quichihuas ica catli amo huejcahuas quen
cuahuitl, xihuitl o sacatl.
\v 13 Pero teipa ajsis se tonal quema Toteco quiyejyecos totequi ica
tlitl para quiitas tlaque tlamantli tequitl tijchijque. Huan ica
nopa tlitl monextis quenicatza elqui totequi huan sintla cuali huan
huejcahuas catli tijchijtoque o amo tleno ipati.
\v 14 Sintla se masehuali quichijtoc se tequitl ipan nopa cali tlen
Toteco huan itequi mocahuas huan amo tlamitlatlas, yaya quiselis
itlaxtlahuil.
\v 15 Pero sintla tlamitlatlas itequi se masehuali, huajca quipolos
itlaxtlahuil, pero Toteco quimaquixtis nopa masehuali masque elis
quen se catli quiixcotonqui se tlitl para huelis momanahuis.
\p
\v 16 ¿Amo anquimatij para amojuanti anitztoque ichaj Toteco huan
Itonal Toteco mocahua ipan amojuanti?
\v 17 Sintla se masehuali quisemanas ichaj Toteco, huajca Toteco
tlahuel quitlatzacuiltis, pampa ichaj eltoc tlatzejtzeloltic huan
amojuanti anitztoque nopa tlatzejtzeloltic cali.
\p
\v 18 Amo ximocajcayahuaca. Sintla se campa amojuanti moita para
miyac quimati quen nopa tlalnamiquilistli catli eltoc ipan ni
tlaltipactli, huajca ma mocuepa quen se catli ni tlaltipactli quiita
para amo tleno quimati. Quej nopa huelis quimachilis Icamanal Toteco
huan ya nopa quichihuas ma eli catli nelía tlalnamiqui iixpa
Toteco.
\v 19 Pampa nopa tlalnamiquilistli catli masehualme ipan ni
tlaltipactli quipiyaj eltoc quen se huihuiyotl iixpa Toteco.
Icamanal Toteco quiijtohua:
\q “Ica masehualme catli moilhuíaj tlalnamiquij,
\q Toteco quitequihuía inintlalnamiquilis para quinmasiltis.”
\m
\v 20 Nojquiya Icamanal Toteco quiijtohua ipan seyoc lugar:
\q “Toteco quimati catli moilhuíaj masehualme catli tlalnamiquij
ica nopa tlalnamiquilistli catli eltoc ipan ni tlaltipactli,
\q huan amo tleno ipati catli moilhuíaj.”
\p
\v 21 Huajca amo aqui ma mohueyimati ica tlaque tlacatl
quimachtijtoc, masque elqui Apolos, o na, o seyoc, pampa nochi
tojuanti tiamoaxcahua.
\v 22 Na niPablo, Apolos, Pedro, ni tlaltipactli, nemilistli,
miquilistli, huan tlamantli catli ama onca, huan tlamantli catli
elis teipa; nochi ya ni eltoc amoaxcahua.
\v 23 Huan amojuanti aniaxcahua Cristo huan Cristo iaxca Toteco
Dios.
\c 4
\s Inintequi itlayolmelajcahua Toteco
\p
\v 1 Huajca quema anmoilhuíaj tlen Apolos huan na, xijmachilica
para tojuanti san tiitequipanojcahua Tohueyiteco Cristo catli yaya
techtequimacatoc para ma titlayacanaca para titlamachtise nopa
tlamantli catli achtihuiya amo aqui quimatiyaya tlen Toteco.
\v 2 Anquimatij quema se tecojtli quitequimaca se itequipanojca ma
eli se tlayacanquetl ipan se tequitl, monequi nopa tequipanojquetl
ma eli temachtli huan quitlamichihuas nochi catli iteco quiilhuijtoc
ma quichihua.
\v 3 Huelis antechitaj para na niitztoya temachtli ipan notequi,
huan huelis amo. Para na, amo hueyi ipati tlaque amojuanti o
tequitini moilhuíaj quema nechtequitlachilíaj. Na, niyon amo
nimotemachía ipan catli na nimoilhuía tlen notequi,
\v 4 pampa masque noyolo amo nechtelhuía para nijchijtoc catli amo
cuali, amo ya nopa catli ipati. San ipati catli Toteco quiijtos
quema yaya nechtequitlachilis. San yaya quiijtos sintla cuali o amo
cuali catli nijchihua.
\v 5 Huajca ayacmo xijtlajtolsencahuaca huan xiquijtoca ajqueya
quichihua catli cuali huan catli amo cuali ipan itequi Toteco quema
noja ayamo ajsi hora. Xijchiyaca hasta hualas Tohueyiteco para
tetlajtolsencahuas. Quema Toteco hualas, yaya quipannextis tlamantli
catli ama motlatijtoc ipan iyolo sesen masehuali, pampa ipan nopa
tonal Toteco quipannextis nochi catli sesen masehuali moilhuiyaya
ipan iyolo huan quenque quichijqui catli quichihuayaya. Huajca ipan
nopa tonal, quena, Toteco quinhueyitlalis nopa masehualme sintla
quinamiqui.
\p
\v 6 Huajca noicnihua, nica nicamanaltiyaya tlen Apolos huan na quen
se nemachiltili para xijmachilica amo cuali para miyac
anquihueyitlalise se masehuali hasta onpano catli ijcuilijtoc ipan
Icamanal Toteco. Amo cuali para anquichicoicnelise se itlamachtijca
Toteco huan anmohueyimatise pampa anmechmachtijtoc huan
anquiechcapantlalise seyoc.
\v 7 ¿Ajqueya anmechilhui para achi más anquimatij que sequinoc?
Nochi catli anquimatij, Toteco anmechchijtoc xijmatica. Nochi catli
anquipiyaj anquiselijtoque tlen ya. Huajca, ¿quenque anmohueyimatij
quen anquipantijtosquíaj se tlalnamiquilistli san amoseltzitzi?
\p
\v 8 Nesi quen anmoilhuíaj anquipiyaj nochi catli anquinequij tlen
Toteco. Anmoilhuíaj antlapijpixtoque. Masque tojuanti ayamo
titlanahuatíaj, anmoilhuíaj ya antlanahuatiani. Nipaquisquía
sintla nelía ajsitosquía nopa tonali quema Toteco anmechchihuas
antlanahuatiani, pampa ipan nopa tonali tojuanti nojquiya tiitztose
titlanahuatiani huan tijpiyase tequiticayotl quen amojuanti.
\v 9 Pero quemantic nimoilhuía Toteco techtlalijtoc
tiitlayolmelajcahua iniicantzi nochi sequinoc tlaneltocani.
Tiitztoque quen masehualme catli se tlatlanquetl quinpannextía
tlamiyacapa para quintlantoc ipan tlahuilancayotl huan san quichiyaj
ajqueya quinmictis. Eltoc quen techtlachilíaj nochime catli
itztoque ipan tlaltipactli, masque masehualme o tequihuajme.
\v 10 Masehualme techitaj tiitlayolmelajcahua quen tihuihuitique
pampa tiquicnelíaj Cristo, pero amojuanti anmochihuaj quen catli
más antlalnamiquij. Tojuanti amo tijpiyaj chicahualistli, pero
amojuanti quena, anmochihuaj quen miyac anquipiyaj. Masehualme ipan
ni tlaltipactli anmechtlepanitaj, pero techhuihuiitaj tojuanti.
\v 11 Hasta ama tiitlayolmelajcahua Toteco techpolohua catli
techmonequilía. Timayanaj, tiamiquij huan amo tijpiyaj catli ica
timopiquise. Amo tijpiyaj tochaj catli nelía toaxca huan miyac
hueltas tlacame techhuijhuitequij.
\v 12 Tojuanti ica miyac tlaijiyohuili titequititoque ica tomax para
tijtlanise catli ica tipanose. Quema masehualme techtelchihuaj,
tijtlajtlaníaj Toteco ma quintiochihua. Quema
techtlaijiyohuiltíaj, tiquijiyohuíaj.
\v 13 Tijpiyaj toyolo huan tiquincamanalhuíaj ica cuali nopa
masehualme catli toca camanaltij catli amo cuali. Masehualme
techitaj quen titlasolme ipan ni tlaltipactli. San quinequij
techtepehuase pampa moilhuíaj amo tleno topati. Quena, quej nopa
eltoc hasta ama.
\p
\v 14 Amo nimechtlajcuilhuía ni tlamantli para nimechpinahualtis,
pero nijnequi nimechmatiltis catli melahuac pampa anitztoque quen
annoconehua catli nimechicnelía.
\v 15 Huan masque anquipiyaj majtlactli mil tlamachtiani catli
anmechmachtíaj tlen Cristo, amo anquipiyaj miyac amotatahua, pampa
san na niamotata ipan Cristo Jesús pampa achtihui nimechilhui
icamanal Toteco huan anquineltocaque.
\v 16 Huajca ica nochi noyolo nimechtlajtlanía, xijtoquilica
nonemachtil catli nimechcahuilijtoc huan xijchihuaca quen na
nijchihua.
\p
\v 17 Huan yeca nijtitlantoc Timoteo ma yas anmechitati para
anmechpalehuis anquichihuase quen na nijchihua. Yaya quen nocone
catli niquicnelía miyac huan yaya temachtli quitoquilía Toteco.
Huan yaya anmechelnamiquiltis catli nijchijtinentoc para nijtoquilis
Cristo Jesús. Huan catli yaya anmechilhuis elis catli
niquinmachtía tlaneltocani ipan nochi tiopame catli mosentilíaj
campa hueli.
\v 18 Sequin amojuanti anmohueyimatij huan anmoilhuíaj amo quema
niyas sempa nepa campa anitztoque para nijmatis tlaque anquichihuaj.
\v 19 Pero, quena, amo huejcahuas para niyas nopona, sintla quej
nopa quinequi Toteco. Huan niquitas sintla inijuanti catli
mohueyimatij nelía quipiyaj ichicahualis Toteco o sintla san
quinpactía mohueyimatca camanaltij.
\v 20 Masehualme catli itztoque ipan itlanahuatilis Toteco amo
monextíaj pampa camanaltij yejyectzi, pero monextíaj pampa
quipiyaj chicahualistli.
\v 21 Huan ¿tlaque anquinequij ma nijchihua? ¿Anquinequij ma niya
nimechtlacahualtiti ica catli amo cuali anquichihuaj? O
¿anquinequij anquichihuase catli cuali huan nimechcamanalhuiti ica
cuali huan ica tlaicnelijcayotl?
\c 5
\s Momecatiyaya se catli mosentiliyaya ininhuaya nopa tlaneltocani
\p
\v 1 Nijcactoc para melahuac itztoc se catli mosentilía amohuaya
catli quichihua se tlamantli tlajtlacoli catli nelía fiero, huan
hasta quionpano tlajtlacoli catli quichihuaj masehualme catli amo
quiiximatij Toteco huan amojuanti amo anquichihuilíaj cuenta.
Nechilhuijtoque para itztoc se tlacatl catli mosansejcotilijtoc ica
itepotznana.
\v 2 ¿Quenicatza hueli anmohueyimatij? ¿Quenque amo anchocaj ica
cuesoli? ¿Quenque amo anquiquixtijtoque yaya catli quichijtoc ni
tlajtlacoli para ma ayacmo mosentili amohuaya?
\v 3 Masque amo niitztoc amohuaya ica notlacayo, niitztoc amohuaya
ica notonal, huan ya nijtlajtolsencajtoc yaya catli quichijtoc ni
tlamantli quen niitztosquía nopona.
\v 4 Huajca ximosentilica ipan itoca [5:4 Ica itequiticayo.] 
Tohueyiteco Jesucristo huan na niitztos amohuaya ica notonal, huan
nojquiya itztos amohuaya ichicahualis Tohueyiteco ipan nopa
tlasentililistli.
\v 5 Huan xijtlalica nopa tlacatl imaco Amocualtlacatl para ma
quitzontlamiltis inacayo catli quinequi tlajtlacolchihuas para
itonaltzi nopa tlacatl momaquixtis ipan nopa tonal quema Tohueyiteco
Jesús sempa hualas.
\p
\v 6 Amo cuali para anmohueyimatij quen ancuajcualme iixpa Toteco
huan noja anquicahuilíaj ma itzto amohuaya se catli quej nopa fiero
quichihua. ¿Amo anquimachilíaj masque san anquicahuaj setzi
masehuali ma tlajtlacolchijtinemis, yaya quinmahuas nochi sequinoc
san quen quentzi tlasonejcayotl quisonehua miyac pantzi?
\v 7 Huajca ama xijquixtica nochi tlajtlacoli para anitztose
senquistoc antlapajpacme quen huejcajya ipan nopa Pascua Ilhuitl
anquiquixtiyayaj nochi tlasonejcayotl ipan amochajchaj pampa
anquichihuayayaj se yancuic tixtli tlaxacualoli para pantzi catli
amo quipixqui tlasonejcayotl. Huan quen huejcajya mijqui nopa
pilborregojtzi ipan Pascua Ilhuitl, ama Cristo ya mijqui topatlaca
tojuanti para techmaquixtis tlen totlajtlacolhua.
\v 8 Huajca ma tiitztoca titlapajpacme huan ma tijchihuaca se
yancuic ilhuitl quen quinamiqui pampa tojuanti tijmatij catli
melahuac. Israelitame quimatij moiyocacahuaj tlen tlasonejcayotl
pampa ya nopa eltoc se nemachiltili tlen tlajtlacoli, huan tojuanti
nojquiya ma amo aqui tijcualancaitaca, niyon ma amo tijchihuaca
catli amo cuali. Eltoc quen tijcuaj se yancuic pantzi catli amo
quipiya tlasonejcayotl pampa amo tleno tijpiyaj ica tlajtlacoli.
\p
\v 9 Ipan nopa achtihui amatlajcuiloli catli nimechtlajcuilhui,
nimechilhui para amo ininhuaya ximomatica masehualme catli
quichihuaj tlamantli ica catli amo ininnamic.
\v 10 Pero amo nijnequi nimechilhuis para amo ximomatica ininhuaya
masehualme catli amo quineltocaj Toteco sintla inijuanti quichihuaj
tlamantli ica catli amo ininnamic, o sintla quiixtocaj catli
sequinoc quipiyaj, o tlachtequij, o quinhueyichihuaj
tlaixcopincayome, pampa inijuanti ayamo quiiximatij Toteco. Sintla
ayacmo anmomatisquíaj ininhuaya masehualme quej nopa, monequisquía
anquisasquíaj ipan ni tlaltipactli.
\v 11 Pero nimechtlajcuilhui quej nopa pampa nijnequiyaya
nimechilhuis para amo ihuaya ximomatica se catli quiijtohua para
yaya se toicni ipan Cristo pero noja tlen hueli quichihua ica seyoc,
o tlaixtoca, o quinhueyichihua tlaixcopincayome, o quipactía
tlahuilana, o moihuintía o tlachtequi. Sintla se masehuali
quiijtohua para yaya se toicni huan quej nopa tlachihua, niyon amo
xitlacuaca ihuaya.
\v 12 Pampa amo notequi para niquintlajtolsencahuas catli itztoque
huejca huan amo quineltocaj Tohueyiteco. Pero quena, amotequi para
anquintlajtolsencahuase catli itztoque ipan itiopa Toteco.
\v 13 Pampa catli itztoque huejca huan amo tlaneltocaj, Toteco Dios
quintlajtolsencahuas. Pero ica se catli quiijtohua para se
tlaneltocaquetl, monequi amojuanti xijquixtica nopa fiero tlacatl
para ayacmo ma mosentili amohuaya.
\c 6
\s Tlaneltocani ma amo mohuicaca iniixpa tequitini
\p
\v 1 Quema se tlen amojuanti quipiya se cuesoli pampa seyoc
tlaneltocaquetl quichihuilijtoc se tlamantli catli amo xitlahuac,
amo quinamiqui para yaya yas iixpa se tequitiquetl catli amo itztoc
xitlahuac iixpa Toteco para quitelhuis iicni pampa quinequi nopa
tequitiquetl ma quisencahua. Monequi ma yas iniixpa sequinoc
tlaneltocani para inijuanti ma quixitlahuaca.
\v 2 ¿Amo anquimatij tojuanti catli Toteco techiyocacajtoc para
tiiaxcahua tiquintlajtolsencahuase catli itztoque ipan ni
tlaltipactli? Huajca, sintla tiquintlajtolsencahuase catli itztoque
ipan tlaltipactli, ¿quenque amo hueli anquisencahuaj ni tlamantli
catli tziquitetzitzi?
\v 3 ¿Amo anquimatij para titlaneltocani tiquintlajtolsencahuase
hasta itequihuajcahua Toteco? Huajca amo nelohui para
anquisencahuase ni piltlamantzitzi catli mopantía ipan tonemilis
ipan ni tlaltipactli.
\v 4 Huajca sintla anquipiyaj tlamantli catli anmechtlajcoxelohua
huan monequi se tequitiquetl para anmechtlajtolsencahuas, amo
xijtequimacaca se tequitiquetl catli amo tleno quipiya ipan itiopa
Toteco para yaya quisencahuas.
\v 5 Nimechilhuía ni para nimechpinahualtis. Itztoque tlaneltocani
amohuaya catli tlalnamiquij huan huelis quisencahuase ni tlamantli
catli anmechtlajcoxelohua.
\v 6 Huan amo cuali para anquihuicase se amoicni ipan Toteco iixpa
se tequitiquetl catli amo se tlaneltocaquetl.
\p
\v 7 Tepinajti para anmoilhuise tlen ni piltlamantzitzi catli
techpantía hasta anquinequij anquitelhuise se amoicni tlamiyacapa
iixpa se juez. Achi cuali san xiquijiyohuica nopa catli moicni
anmechchihuilijtoc.
\v 8 Pero amo quej nopa anquichihuaj. Nojquiya amojuanti
anquichihuilíaj catli amo cuali huan sempa anquicajcayahuaj masque
yaya amoicni ipan Cristo.
\p
\v 9 Amo anquimatij para amo cuajcualme amo huelis calaquise ipan
itlanahuatilis Toteco. ¡Amo ximocajcayahuaca! Niyon amo calaquise
nepa catli quichihuaj tlamantli ica catli amo ininnamic, o catli
quinhueyimatij tlaixcopincayome, o catli momecatíaj, o tlacame
catli mosihuanequij. Amo calaquise nepa tlacame catli quichihuaj
tlen hueli ica sequinoc tlacame,
\v 10 o catli tlachtequij, o catli quiixtocaj catli sequinoc
quipiyaj, o moihuintíaj, o catli tlahuilanaj huan catli
tlacajcayahuaj huan quihuicaj catli sequinoc iniaxca.
\v 11 Achtihuiya sequin amojuanti anitztoyaj quej nopa, pero ama
Toteco anmechpajpajqui tlen amotlajtlacolhua huan anmechiyocacajtoc
para anelise iaxcahua. Huan Itonal Toteco anmechchijtoc
anxitlahuaque iixpa ipan itoca [6:11 Ica itequiticayo.] 
Tohueyiteco Jesucristo.
\s Amo xitlajtlacolchihuaca ica amotlacayo
\p
\v 12 Onca sequin tlamantli catli niyon se tlanahuatili amo
technahuatía para ma amo tijchihuaca, pero noja tijmatij para amo
quinamiqui ma tijchihuaca, pampa sequin tlamantli amo tleno
techpalehuía. Huan masque nimajcajtoc, amo cuali nijcahuilis se
tlajtlacoli ma nechnahuati.
\v 13 Huelis anquiijtose: “Toteco quichijqui toijti para quiselis
tlacualistli huan quichijqui tlacualistli para toijti, huajca ma
tijcuaca quema totlacayo technotza.” Ica ya nopa anmoilhuíaj
nojquiya huelis anquichihuaj catli hueli más quema amotlacayo
anmechnotza xijchihuaca, pero xiquelnamiquica para ajsis se tonal
quema Toteco quitlamiltis nochi tlacualistli huan toijti nojquiya.
Toteco amo quichijqui totlacayo para ma tijchihuaca tlen hueli ica
catli amo tonamic. Toteco quichijqui totlacayo para tijtequipanose,
huan Toteco mijqui para totlacayo ma quipiyas nemilistli para
nochipa.
\v 14 Quena, Toteco Dios catli quiyolcuic Tohueyiteco Cristo ipan
itlacayo, nojquiya ica ihueyi chicahualis quiyolcuis totlacayo
tojuanti tlen campa mijcatzitzi.
\p
\v 15 ¿Amo anquimatij amotlacayo eltoc se parte tlen itlacayo
Cristo? Huajca pano fiero para se quicuilis se parte tlen itlacayo
Cristo huan quisansejcotilis ica se tlacanenca sihuatl. Amo aqui ma
quichihua ya nopa, amo quema.
\v 16 ¿Amo anquimatij aqui itztoc ihuaya se tlacanenca sihuatl
quipiya san se itlacayo ihuaya? Pampa Icamanal Toteco quiijtohua se
tlacatl huan se sihuatl mochihuaj san se inintlacayo.
\v 17 Pero quema timochihuaj san se ica Tohueyiteco, timochihuaj san
se totonaltzi ica ya.
\p
\v 18 Huajca ximotlaloca quema anquinequij anquichihuase tlen hueli
ica catli amo amonamic. Masehualme catli quichihuaj sequinoc
tlamantli tlajtlacoli amo quicocohuaj inintlacayo quen se catli
quichihua ni tlajtlacoli. Pampa catli quichihua tlen hueli ica catli
amo inamic quicocohua tlen ya itlacayo ica nopa tlajtlacoli.
\v 19 ¿Amo anquimatij amotlacayo eltoc ichaj Itonal Toteco? ¿Amo
anquimatij Itonal Toteco mocahua ipan amotlacayo pampa Toteco Dios
quititlanqui ma itzto nopona? Huajca amojuanti ayacmo anamoaxcahua
para anmonahuatise. Ama aniaxcahua Toteco,
\v 20 pampa Jesucristo tlaxtlajqui catli patiyo para anmechcohuas
huan anmechchihuas aniaxcahua. Huajca ica nochi catli anquichihuaj
ipan amotlacayo huan ipan amotonal, monequi xijchihuaca para
ihueyitilis Toteco.
\c 7
\s Nopa nenamictili
\p
\v 1 Ama nimechnanquilis catli antechtlajtlanijque na quema
antechtlajcuilhuijque. Cualtitoc sintla se tlacatl amo quema
quipiyas isihua.
\v 2 Pero, pampa itztoque miyac masehualme catli tlen hueli
quichihuaj ica catli amo ininnamic, achi cuali sintla sesen tlacatl
quipiyas isihua, huan sesen sihuatl quipiyas ihuehue.
\v 3 Huan monequi sesen tlacatl ma quichihua nochi catli quinamiqui
ihuaya isihua huan ma amo quiilhuis para amo. Huan monequi sesen
sihuatl ma quichihua nochi catli quinamiqui ihuaya ihuehue huan ma
amo quiilhuis para amo.
\v 4 Sihuame ayacmo quinahuatíaj inintlacayo pampa inintlacayo
iniaxca ininhuehue. Huan san se ica tlacame, inijuanti ayacmo
quinahuatíaj inintlacayo pampa inintlacayo iniaxca ininsihua.
\v 5 Sesen amojuanti amo xijtzacuilica amonamic quema quinequi
itztos mohuaya. San quena, cualtitoc sintla anome anmoilhuíaj para
amo anitztose san sejco para se ome tonati para san anmotlatlajtise
tlen se tonal. Pero teipa sempa xipehuaca xiitztoca san sejco para
Amocualtlacatl amo huelis anmechyoltilanas xitlajtlacolchihuaca ica
seyoc catli amo amonamic pampa ayacmo anhuelij anmoijiyohuíaj.
\p
\v 6 Huajca nimechilhuía para huelis ximonamictica, pero amo
nimechilhuía eltoc se tlanahuatili para nochi monequi
ximonamictica.
\v 7 Na nimoilhuía quisasquía más cuali sintla nochi itztosquíaj
ininseltzitzi quen na. Pero Toteco quimacatoc sesen nopa yajatili
quen catli quinequi ma quipiya. Quinequi sequin ma mocahuaca quen
na, huan quinequi sequinoc ma quipiyaca ininnamic.
\p
\v 8 Niquinilhuía catli amo quipiyaj ininnamic huan catli ya mijque
ininnamic para cualtitoc sintla mocahuase ininseltzitzi quen na.
\v 9 Pero sintla Toteco amo quinmacatoc nopa yajatili huan ohui para
monemiltise xitlahuac pampa ininseltzitzi, huajca ma monamictica.
Quena, achi más cuali ma monamictica para amo mojmostla quinequise
tlajtlacolchihuase.
\p
\v 10 Para amojuanti catli ya anmonamictijque, nimechilhuía inin.
Se sihuatl ma amo quicahua ihuehue huan se tlacatl ma amo quicahua
isihua. Nelía amo san na nimechilhuía, pero Toteco anmechnahuatía
ni tlamantli.
\v 11 Pero sintla se sihuatl ya quicajtejtoc ihuehue, ma amo
monamicti sempa. Ma mocahua iseltzi o ma mosansejcotili ica catli
ipa ihuehue. Huan se tlacatl san se ma amo moiyocacahuas tlen
isihua.
\p
\v 12 Huan ama nimechcamanalhuía ne sequinoc amojuanti catli ya
anquipiyaj amonamic. Na nimechilhuía ya ni masque Tohueyiteco amo
camanaltic tlen ni tlamantli quema itztoya ipan tlaltipactli. Sintla
ama se tlacatl catli quineltoca Toteco quipiya isihua catli amo
quineltoca huan isihua quinequi mocahuas ihuaya, ma mocahua. Nopa
tlacatl ma amo quicajtehua.
\v 13 Huan sintla se sihuatl catli ama quineltoca Toteco quipiya
ihuehue catli amo quineltoca huan ihuehue quinequi mocahuas ihuaya,
ma mocahua. Nopa sihuatl ma amo quicajtehua.
\v 14 Pampa Toteco quiiyocacahuas nopa tlacatl catli amo tlaneltoca
para elis iaxca por isihua catli quineltoca Toteco. Huan Toteco
quiiyocacahuas nopa sihuatl catli amo tlaneltoca para elis iaxca por
ihuehue catli quineltoca Toteco. Sintla amo, amoconehua elisquíaj
quen catli amo tlapajpacme iixpa Toteco, pero ama Toteco quinchijtoc
amoconehua tlapajpactique.
\p
\v 15 Pero sintla se tehuehue o tesihua catli amo quineltoca Toteco
quinequi quisas huan ayacmo itztos ihuaya inamic catli quineltoca
Toteco, ma quisa. Nopa totlaca icni o tosihua icni catli elqui
inamic amo mocahua ilpitoc ica catli quisqui, pampa Toteco quinequi
ma tiitztoca san sejco ica tlasehuilistli.
\v 16 Pampa se sihuatl catli quineltoca Toteco, amo quimati sintla
huelis quipalehuis ihuehue para momaquixtis tlen itlajtlacolhua.
Huan se tlacatl catli quineltoca Toteco, amo quimati sintla huelis
quipalehuis isihua para momaquixtis tlen itlajtlacolhua.
\p
\v 17 Ma sesen itzto quen Toteco quimacac ma itzto. Ximocahuaca quen
anitztoyaj quema Toteco anmechnotzqui para xijneltocaca. Quej nopa
niquinilhuía nochi tlaneltocani catli mosentilíaj ipan tiopame
campa hueli.
\v 18 Sintla ya anmechtequilijtoyaj nopa machiyotl catli itoca
circuncisión quema Toteco anmechnotzqui xijneltocaca, amo
ximocuesoca pampa anquipiyaj. Pero sintla amo anquipixque nopa
machiyotl ipan amotlacayo quema Toteco anmechnotzqui, amo
ximotequilica.
\v 19 Amo ipati sintla anquipiyaj nopa machiyotl o amo anquipiyaj,
san ipati sintla anquinchijtinemij itlanahuatilhua Toteco.
\v 20 Huajca sesen masehuali ma mocahua quen itztoya quema Toteco
quinotzqui ma quineltoca.
\v 21 Sintla se eltoya iaxca iteco catli quicojtoya para ma
quitequipano, ma amo motequipacho pampa iaxca se tlacatl huan amo
majcajtoc para yas campa quinequi. Pero sintla huelis mochihuas
majcajtoc para ayacmo elis iaxca iteco, ma quichihua.
\v 22 Pampa se tetequipanojquetl catli iaxca se iteco quimachilis
ayacmo ilpitoc quema quiselis Cristo. Huan se catli amo eliyaya
ilpitoc huan amo iaxca se iteco quema quiseli Cristo, quimachilis
para yaya ama se tetequipanojquetl catli iaxca Cristo.
\v 23 Toteco tlaxtlajqui catli patiyo para anmechcohuas, huajca ama
xijmatica para anitequipanojcahua Toteco huan ayacmo ximoilhuica
para san anitequipanojcahua se masehuali.
\v 24 Huajca noicnihua, ximocahuaca quen anitztoyaj quema Toteco
anmechnotzqui huan nopona campa anmopantíaj, xijtoquilica Toteco.
\p
\v 25 Ica catli ayamo monamictíaj, Toteco amo nechmacatoc se
tlanahuatili, pero nimechnanquilis quen nimoilhuía cuali
xijchihuaca. Huelis anmotemachise ipan na quen se catli temachtli
pampa Toteco quipixtoc hueyi iyolo ica na.
\v 26 Nimoilhuía achi cuali sintla sesen tlacatl mocahuas quen
itztoc ama por ni tlaohuijcayotl catli ama tijpanoj.
\v 27 Sintla tijpiya mosihua, amo xijcahua. Sintla amo tijpiya
mosihua, amo xijtemo.
\v 28 Pero sintla se tlacatl mosihuajtis ama, amo tlajtlacolchihuas.
Huan sintla se ichpocatl monamictis, amo tlajtlacolchihuas. Pero
catli monamictíaj quipiyase más tequipacholi ipan ni tlaltipactli
huan nijnequi catli amo más ohui para amojuanti.
\p
\v 29 Nijnequi nimechilhuis ya ni, noicnihua. Amo mocahua miyac
tonali. San quentzi más tonali huan tlacame catli quipiyaj
ininsihua amo quipiyase niyon se tlatoctzi para itztose ininhuaya
ininsihua por nopa tonali catli hualase.
\v 30 Huan masehualme catli chocaj monequis quicahuase
inintequipachol. Catli paquij, ayacmo quipiyase se tlatoctzi para
huetzcase. Huan catli quicojtoque miyac tlamantli ipan ni
tlaltipactli, ayacmo quipiyase tonali para quintequihuise.
\v 31 Nochi catli tijtequihuíaj tlamantli ipan ni tlaltipactli,
monequi ma timotlachilica para nopa tlamantli ma amo techitzquili
toyolo, pampa panotehuas ni tlaltipactli catli ama monextía huan
nochi catli quipiya.
\p
\v 32 San nijnequi xiitztoca anyolpactoque huan amo monequi
ximotequipachoca por se amonamic. Se catli amo quipiya inamic huelis
moilhuis tlen itequi Toteco huan quenicatza huelis quichihuas catli
quipactía Toteco,
\v 33 pero se tlacatl catli quipiya isihua, monequi moilhuis tlen
tlamantli ipan ni tlaltipactli huan tlaque monequi quichihuas para
ma paqui isihua. Yeca ome tlamantli quiyoltilana.
\v 34 Nojquiya amo san se, se sihuatl catli quipiya ihuehue huan se
catli amo. Se sihuatl catli ayacmo quipiya ihuehue o se ichpocatl
catli ayamo monamictijtoc huelis moilhuis tlen itequi Toteco huan
huelis moiyocacahuas senquistoc para quichihuas ipaquilis Toteco
ipan itlacayo huan ipan itonal. Pero se sihuatl catli ya quipiya
ihuehue monequi moilhuis tlen tlamantli ipan ni tlaltipactli huan
quenicatza monequi quichihuas para quipactis ihuehue.
\p
\v 35 Nimechilhuía ni tlamantli para nimechpalehuis. Amo nijnequi
nimechnahuatis amo xijchihuaca se tlamantli. Nijnequi xijchihuaca
catli anquiitaj más anmechpalehuis para ica nochi amoyolo huelis
anquitequipanose Toteco.
\p
\v 36 Sintla se tlacatl quipiya se iichpoca huan moilhuía para amo
quichihua catli cuali ica ya pampa ayamo quicahuilía ma monamicti,
huajca ma quichihua catli quinequi. Sintla iichpoca motlanquiya huan
itztoc se telpocatl catli quinequi mosihuajtis ihuaya, huajca ma
monamictica. Amo se tlajtlacoli sintla itata quincahuilis ma
monamictica.
\v 37 Pero sintla seyoc tlacatl moilhuía más cuali amo quicahuilis
iichpoca ma monamicti, huan sintla amo quiyoltilana nopa ichpocatl
para monamictis, huan nopa tlacatl quipiya tlasehuilistli ipan
iyolo, huajca cuali para iichpoca mocahuas ichaj pampa itata quej
nopa moilhuía ipan iyolo.
\v 38 Huajca yaya catli quicahuilía iichpoca ma monamicti quichihua
catli cuali, huan yaya catli amo quicahuilía ma monamicti quichihua
catli achi cuali.
\p
\v 39 Se sihuatl mocahuas monamictijtoc ica ihuehue hasta yaya
miquis huan ipan nochi inemilis amo quipiya caquihuili para
monamictis ica seyoc. Pero sintla ya mijqui ihuehue, huajca ayacmo
ilpitoc nopa sihuatl huan huelis sempa monamictis ica catli
quinequi, pero san ma monamicti ica se tlacatl catli nojquiya
quineltoca Tohueyiteco.
\v 40 Pero na niquita huelis se cahual toahui más paquis sintla amo
monamictis sempa, huan nimoilhuía Itonal Toteco nechmacatoc ni
camanali catli nimechilhuía.
\c 8
\s Tlacualistli catli quitlalijtoque iniixpa tlaixcopincayome
\p
\v 1 Ama nimechcamanalhuis tlen tlacualistli catli sequinoc
quitlalijtoque iniixpa totiotzitzi. Anmoilhuíaj ya anquimatij catli
monequi anquichihuase ipan ni tlamantli, pero tlamatilistli
techchihua ma timohueyimatica. Pero quema titenextilíaj
tlaicnelijcayotl, tiquinpalehuíaj sequinoc ma moscaltica ipan
Tohueyiteco.
\v 2 Sintla se moilhuía ya quimati nochi, quinextía para amo tleno
quimati quen monequi quimatis.
\v 3 Pero sintla se nelía quiicnelía Toteco, Toteco quiiximati.
\p
\v 4 Pero ¿tlaque tijchihuase? ¿Cuali para tijcuase nopa
tlacualistli catli sequinoc quitlalijtoque iniixpa totiotzitzi, o
amo? Tojuanti tijmatij nopa catli inijuanti quinitaj para
totiotzitzi, amo tleno, pampa amo aquime. Itztoc san se Dios huan
amo aqui seyoc.
\v 5 Huan masque sequin masehualme quiijtohuaj itztoque miyac catli
quintocaxtía “dioses” ipan ilhuicactli huan ipan ni tlaltipactli
huan quintocaxtíaj “tecojme”,
\v 6 tojuanti tijmatij san itztoc setzi Dios, yaya Totata, ica catli
pejqui nochi catli onca. Huan tijmatij tiitztoque para ma
tijchihuaca ipaquilis. Huan itztoc san se catli nelía tecojtli huan
yaya Jesucristo ica catli Toteco Totata quichijqui nochi catli onca
huan tojuanti tijpiyaj nemilistli por ya.
\p
\v 7 Pero sequin tlaneltocani ayamo cuali quimachilíaj para itztoc
san se Dios. Inijuanti momajtoyaj quinhueyimatij totiotzitzi huan
moilhuíaj itztoque. Ama quema inijuanti quicuaj se tlacualistli
catli sequinoc quitlalijtoque iniixpa totiotzitzi, quiixpanoj catli
ininyolo quinilhuíaj para amo cuali pampa amo quipiyaj tetili.
\v 8 Toteco amo techcualita más por catli tijcuaj. Amo tiitztose
más cuali iixpa sintla tijcuase se tlamantli. O amo tiitztose más
fiero iixpa sintla amo tijcuase.
\p
\v 9 Pero ximotlachilica para amo tleno catli anquipiyaj caquihuili
anquichihuase, quiyoltilanas ma tlajtlacolchihua se amoicni catli
ayamo cuali quineltoca Toteco.
\v 10 Pampa se catli moilhuía amo cuali quicuas catli sequinoc
quitlalijtoque iixpa se totiotzi huelis mitzitas quema titlacuati
ipan nopa lugar catli quichijtoque para nopa totiotzi. Huan mitzitas
para ta tijmati catli cuali para tijchihuas, huajca pampa amo
quipiya tetili, yaya nojquiya quicuas catli quitlalijtoque iixpa
nopa totiotzi, huan tlajtlacolchihuas ipan iyolo.
\v 11 Huajca pampa ta achi más tijmati, mococos moicni catli amo
quipiya tetili huan Cristo nojquiya tlaxtlajqui por itlajtlacolhua
ya quema mijqui.
\v 12 Huan quema tijyoltilana ma tlajtlacolchihua se moicni catli
ayamo quipiya tetili ipan Cristo huan tijcocohua ipan iyolo, huajca
titlajtlacolchihua iixpa Cristo.
\v 13 Huajca sintla se tlacualistli quichihuas para se noicni ma
tlajtlacolchihua, amo quema nijcuas sempa para amo nijchihuas ma
huetzi noicni.
\c 9
\s Itequiticayo se itlayolmelajca Toteco
\p
\v 1 Na niitlayolmelajca Toteco huan nimajcajtoc. Na niquitztoc
Tohueyiteco Jesús. Amojuanti antlatzquitoque ipan Tohueyiteco pampa
nopa tequitl catli nijchijqui campa amojuanti.
\v 2 Sintla sequinoc quiijtohuaj amo neli niitlayolmelajca Toteco,
anquimatij para quena, nelía niitlayolmelajca. Nimechilhui icamanal
Toteco huan anquineltocaque, huan yeca amojuanti antenextilíaj para
niitlayolmelajca Tohueyiteco.
\p
\v 3 Ica inijuanti catli quichihuaj tlatzintoquili ica tlaque
tequiticayotl nijpiya, quej ni niquinnanquilis.
\v 4 ¿Amo anquimatij na huan catli nohuaya yohuij tijpiyaj
tequiticayotl para tijselise san quiaja catli monequi tiquijise huan
tijcuase campa titlacamanalhuíaj icamanal Toteco?
\v 5 ¿Amo anquimatij tijpiyaj tequiticayotl para tijpiyasquíaj
tosihua catli quineltoca Toteco huan tijhuicasquíaj tohuaya ipan
totequi quen sequinoc itlayolmelajcahua Toteco quichihuaj, huan quen
quichihua Pedro huan iicnihua Tohueyiteco Jesús?
\v 6 ¿O huelis anmoilhuíaj para san Bernabé huan na amo tijpiyaj
tequiticayotl para tijcahuase totequi catli ica tipanotiyohuij para
timopanoltise ica ofrendas tlen itequi Toteco?
\p
\v 7 ¿Tlaque soldado monequi quichihuas seyoc tequitl para
tlaxtlahuas itlacualis? ¿Ajqueya quitoca xocomecatl ipan imil huan
teipa amo quipiya tequiticayotl quicuas? ¿Ajqueya quinmocuitlahuía
chivojme huan amo quipiyaj tequiticayotl quiijise ininlechi?
\v 8 Amo san niquijtohua ni pampa quej nopa nimoilhuía, pero
itlanahuatilhua Moisés nojquiya quej nopa quiijtohuaj.
\v 9 Ijcuilijtoc ipan itlanahuatilhua Moisés campa quiijtohua:
“Amo xijcamailpi nopa huacax catli ipan moquejquetza trigo para
quiyolquixtis.” ¿Anmoilhuíaj Toteco techmacac ni camanali pampa
moilhuiyaya san tlen huacaxme huan catli tlacuasquíaj? ¡Amo neli!
\v 10 Yaya moilhuiyaya nojquiya tlen tojuanti catli
tiitequipanojcahua. Quena, Toteco quiita para quinamiqui se catli
tlalpoxonía ipan mila o se catli pixca, ma tequitis cuali pampa
quimati quiselis se parte tlen nopa pixquistli. Huan quinamiqui para
tojuanti tiitequipanojcahua ma tijselica catli techmonequilía tlen
nopa masehualme catli tiquinpalehuíaj.
\v 11 Tojuanti tijtoctoque icamanal Toteco campa amojuanti huan ya
nopa catli tlahuel monequi para amotonaltzitzi, huajca amo se hueyi
tlamantli sintla antechmacasquíaj catli techmonequilía.
\v 12 Sintla quinamiqui anquinmacaj catli quinmonequilía sequinoc
catli anmechmachtíaj, achi más quinamiqui antechmacase tojuanti.
\p Pero masque tijpiyaj tequiticayotl para tijselise catli
techmonequilía, amo tijtequihuijtoque nopa tequiticayotl. San
tiquijiyohuíaj huan amo timechilhuíaj quema techpolohua catli
monequi. Tijchihuaj ya ni pampa amo tijnequij tijchihuase niyon se
tlamantli catli huelis quitzacuilis nopa cuali camanali tlen Cristo.
\v 13 ¿Amo anquimatij nopa israelitame catli tlatequipanohuaj ipan
ichaj Toteco ica nopa tlamantli catli tlatzejtzeloltique, quicuaj
nopa tlacualistli catli masehualme quihuicaj ipan itiopa Toteco?
Nojquiya catli tlatequipanohuaj nepa iixpa nopa tlaixpamitl, quicuaj
tlen nopa tlacajcahualistli catli masehualme temacaj ipan
tlaixpamitl.
\v 14 Quej nopa nojquiya Toteco quisencajtoc para tojuanti catli
titlacamanalhuíaj icamanal Toteco ma tijselica catli ica tipanose
tlen nopa masehualme catli icamanal quinpalehuijtoc.
\p
\v 15 Pero amo nijtequihuijtoc niyon se tlen ni tequiticayotl catli
itequipanojcahua Toteco quipiyaj. Huan amo nimechtlajcuilhuía ya ni
para nimechtlajtlanis techpanoltica. Nechmaca miyac paquilistli para
nitlacamanalhuis icamanal huan amo tleno nijselía tlen catli
quicaquij. Iyoca nitequiti para nijpiyas catli nechmonequilía. Huan
nijnequisquía nimiquis sintla se masehuali nechtzacuilisquía para
ayacmo nimopanoltis noseltzi.
\p
\v 16 Amo hueli nimohueyimatis pampa nitlacamanalhuía icamanal
Toteco pampa yaya Toteco nechtequimacac huan nechilhui ma nijchihua.
Nel niteicnelti na sintla amo nitlacamanalhuisquía icamanal.
\v 17 Sintla nitlacamanalhuis icamanal san ica nopaquilis, nijselis
notlaxtlahuil. Pero masque amo nijnequisquía, noja monequi
nitlacamanalhuis icamanal, pampa Toteco quitlali nomaco ni tequitl
huan monequi nijchihuas.
\v 18 Huan ¿tlaque tlaxtlahuili nijselía? Notlaxtlahuil eltoc nopa
paquilistli catli nijpiya pampa amo aqui monequi tlaxtlahuas
nogastos quema nitlacamanalhuía icamanal, masque nelía nijpiya
tequiticayotl para sequinoc nechpanoltisquíaj pampa niitequipanojca
Toteco.
\p
\v 19 Masque nimajcajtoc huan amo niiaxca niyon se masehuali catli
nechcojtoc para ma nieli niitequipanojca, na nimochijtoc
niinintequipanojca nochi masehualme para huelis niquintlanis más
masehualme para Cristo.
\v 20 Quema niitztoc ininhuaya sequinoc israelitame, nimochihua quen
se tlen inijuanti para huelis niquintlanis para Cristo. Quema
niitztoc ininhuaya catli quintoquilíaj itlanahuatilhua Moisés, san
se nijchihua. Quena, masque nopa tlanahuatilme ayacmo quipiyaj
tequiticayotl ica na, ica nopaquilis niquintoquilía para huelis
niquintlanis masehualme catli quintoquilíaj nopa tlanahuatilme.
\v 21 Quema niitztoc ininhuaya masehualme catli amo quinmatij
itlanahuatilhua Moisés, amo nicamanalti quen se catli quinmati.
Pero amo nijchihua tlamantli catli amo cuali catli itlanahuatilhua
Toteco techilhuíaj ma amo tijchihuaca. San nijtoquilía nopa
tlanahuatili catli Cristo techmacatoc para huelis niquintlanis para
Cristo nopa masehualme catli amo quinmatij itlanahuatilhua Moisés.
\v 22 Quema niitztoc ininhuaya masehualme catli sequinoc
quintlaijiyohuiltíaj pampa amo quipiyaj chicahualistli, nimochihua
quen se catli amo quipiya chicahualistli para huelis niquintlanis
para Cristo. Huan san se nijchihua ica nochi masehualme. Miyac
nimonejnehuilía quen nimochihuas ica sesen masehuali hasta campa
nihueli para ica ni ojtli, o ne ojtli huelis niquinpalehuis sequin
para ma momaquixtica.
\v 23 Huan nochi ya ni nijchihua para ma momahua nopa cuali camanali
huan para huelis nijselis nojquiya nopa tlatiochihualistli catli
icamanal temaca.
\p
\v 24 Campa masehualme motlalohuaj para quiitase ajqueya tlatlanis,
masque miyaqui tlacame motlalohuaj, san setzi quitlanis nopa
tlatlancayotl catli quitencajtoque quimacase nopa tlatlanquetl.
Huajca amojuanti nojquiya xitequitica chicahuac ipan Toteco para
antlatlanise.
\v 25 Nochi masehualme catli motlalohuaj tlamiyacapa para quiitase
ajqueya tlatlanis, monahuatíaj chicahuac huan quicahuaj miyac
tlamantli catli hueli quinquixtilis ininchicahualis. Quej nopa
quichihuaj pampa quinequij quitlanise nopa xochi corona masque teipa
nopa xochi corona pilinis. Pero ica tojuanti, titequitij chicahuac
ipan itequi Toteco pampa yaya techmacas se corona catli amo quema
pilinis.
\v 26 Huajca na nimochihua quen se catli motlalohua xitlahuac hasta
campa ontlami ojtli. Quen se catli itequi para tlahuilana
tlamiyacapa huan quichihua ica nochi ichicahualis, na nitequiti ica
nochi noyolo quema nijchihua itequi Toteco.
\v 27 Quen catli tlahuilana quichihua para itlacayo ma eli tetic, na
nijnahuatía notlacayo huan nijchihua ma eli notequipanojca.
Niquinilhuijtoc miyaqui masehualme quenicatza ma quitoquilica
ipaquilis Toteco, huan amo nijnequi nijchihuas se tlamantli catli
amo senquistoc cuali huan quichihuas para amo hueli nijselis catli
Toteco quitencajtoc para quimacas nopa tlatlanquetl.
\c 10
\s Pablo quinconsejomacac
\p
\v 1 Noicnihua, amo xiquelcahuaca catli panoc ica tohuejcapan
tatahua catli itztoyaj ihuaya Moisés huejcajya. Toteco quinyacanqui
ica se mixtli catli tlayacantiyajqui iniixmelac. Huan nojquiya
quintlapoli nopa hueyi atl para nochi huelque panoque ipan se ojtli
huactoc.
\v 2 Huan ipan nopa mixtli huan nopa hueyi atl, nochi nopa
masehualme mochijque san se ica Moisés catli ipan motemachijque
para quitoquilise quen quema timocuaaltíaj tijnextíaj para
tijtoquilíaj Toteco.
\v 3 Nochi inijuanti quicuajque san se nopa tlacualistli catli
Toteco quichijqui ma huetzi tlen ilhuicactli ica se tiochicahual
nextili.
\v 4 Nochi quiijique tlen san se nopa atl catli Toteco quichijqui ma
quisa iijtico nopa hueyi tetl ica se tiochicahual nextili. Huan nopa
tetl eliyaya Cristo catli nejnenqui ininhuaya tohuejcapan tatahua
campa hueli yajque.
\v 5 Pero masque Toteco quintiochijqui miyac, nechca nochi inijuanti
quichijque tlamantli catli amo quipacti. Huan yeca Toteco
quinchihualti ma miquica ipan nopa huactoc tlali campa amo tleno
elqui.
\p
\v 6 Huan nochi ni tlamantli panoque para elis se nemachiltili para
tojuanti para technextilis ma amo tijnequica tlamantli catli amo
cuali quen inijuanti quinequiyayaj.
\v 7 Niyon ma amo tiquinhueyimatica totiotzitzi huan
tlaixcopincayome quen sequin inijuanti quichijque. Pampa ijcuilijtoc
ipan Icamanal Toteco campa quiijtohua: “Inijuanti ilhuichijque ica
hueyi tlacualistli huan miyac tlaili, huan teipa mijtotijque huan
tlen hueli quichijque catli amo cuali huan mopaquilismacaque iniixpa
totiotzitzi.”
\v 8 Nojquiya ma amo tijchihuaca tlen hueli ica catli amo tonamic
quen sequin inijuanti quichijque huan Toteco quichijqui ma miquica
veintitrés mil tlen inijuanti ipan se tonal.
\v 9 Niyon ma amo tijyejyecoca Toteco para tiquitase tlaque
quichihuas quen sequin inijuanti quichijque huan cohuame
quintzacanijque huan miyac mijque.
\v 10 Nojquiya ma amo tijtlaijilhuica Toteco quen sequin inijuanti
quichijque huan Toteco quititlanqui itequihua catli temictía huan
yaya quinmicti.
\p
\v 11 Nochi ni tlamantli quinpanoc para elis se nemachiltili para
tojuanti huan ijcuilijtoc para techmachtis catli tiitztoque ama ipan
ni tlayacapan tonali.
\v 12 Huajca amojuanti catli anmoilhuíaj anmoquetzaj huan antetique
ipan Toteco, ximotlachilica para amo xihuetzica ipan tlajtlacoli.
\v 13 Amo quema anmechyoltilantoc niyon se tlajtlacoli para
xijchihuaca catli amo quinyoltilantoc sequinoc masehualme. Pero
Toteco, yaya temachtli, huan amo quicahuilis ma anmechyoltilanas se
tlajtlacoli hasta campa ayacmo huelis anquiijiyohuise. Nochipa ipan
nopa tlatoctzi anmechnextilis quenicatza huelis ancholose para amo
antlajtlacolchihuase.
\p
\v 14 Huajca noicnihua catli nimechicnelía, xicholoca tlen campa
masehualme quinhueyimatij totiotzitzi huan tlaixcopincayome.
\v 15 Amojuanti catli nimechcamanalhuía, antlalnamiquij, huajca
ximoilhuica sintla cuali nocamanal catli ama nimechilhuis o amo.
\v 16 Quema tojuanti tijtlajtlaníaj Toteco ma quitiochihua nopa
taza ipan itlacualis Toteco, ¿amo titenextilíaj tijpiyaj toparte
ipan Cristo catli quitoyajqui ieso por tojuanti? Huan quema
tijtlapanaj nopa pantzi, ¿amo titenextilíaj para tijpiyaj toparte
ipan Cristo catli temacac itlacayo para miquis por tojuanti?
\v 17 Huan nochi tijcuaj tlen san se pantzi ipan nopa tlacualistli
huan ya nopa quinequi quiijtos masque timiyaqui, tiitztoque partes
tlen san se tlacayotl, ya nopa catli itlacayo Cristo.
\p
\v 18 Ximoilhuica tlen nopa israelitame. Inijuanti catli quipixque
caquihuili para quicuase tlen nopa tlacajcahualistli catli
quitencajque ipan itlaixpa Toteco, quinextiyayaj para inijuanti san
sejco nojquiya itztoyaj iaxcahua Toteco catli iaxca nopa
tlaixpamitl.
\v 19 ¿Huajca tlaque nimechilhuía ica ya ni? Amo ximoilhuica para
nimechilhuía para nelía itztoque nopa totiotzitzi, niyon amo
nimechilhuía quipiya chicahualistli nopa tlacajcahualistli catli
masehualme quitlalíaj iixpa se totiotzi, pampa amo neli.
\v 20 Pero nijnequi nimechilhuis para quema masehualme catli amo
quineltocaj Toteco temacaj tlacajcahualistli, melahuac quinmacaj
tlacajcahualistli iajacahua Amocualtlacatl. Amo quimacaj Toteco Dios
nopa tlacajcahualistli. Huan amo nijnequi anquipiyase niyon se parte
ica ajacame.
\v 21 Amo hueli anquiijise ipan nopa taza catli iaxca Toteco huan
nojquiya anquiijise ipan nopa tazas catli eltoque iniixpa ajacame.
Amo hueli anquipiyase se parte ica catli eltoc ipan imesa Toteco
ipan itlacualis huan nojquiya anquicuase catli eltoc ipan ininmesa
ajacame huan anquipiyase se parte ininhuaya.
\v 22 Amo ximoilhuica para cuali anquichihuase catli ica cualanis
Toteco amohuaya. ¿Anmoilhuíaj para anitztoque más antetique que
Toteco huan huelis anquichihuase para amo anmechtlatzacuiltis?
\s Ma tiquinicnelica sequinoc
\p
\v 23 Quena, ayacmo techtzacuilía tlanahuatilme catli technahuatía
ma amo tijchihuaca se tlenijqui, pero sequin tlamantli amo
techpalehuía. Huan masque ayacmo techtzacuilíaj tlanahuatilme,
onca miyac tlamantli catli amo techmaca más tetili ipan Toteco.
\v 24 Amo aqui ma quitemo san catli cuali para ya iseltzi, pero ma
tijchihuaca catli quinpalehuis sequinoc.
\p
\v 25 Huajca xijcuaca nochi catli quinemacaj ipan tianquis huan amo
aqui xijtlatzintoquilica sintla quitlalijtoyaj nopa nacatl iixpa se
totiotzi o amo, para amo anquimatise,
\v 26 pampa ni tlaltipactli iaxca Toteco ihuaya nochi catli ipani
eltoc huan nochi tlamantli yaya techmacatoc para tijtequihuise.
\p
\v 27 Nojquiya sintla se catli amo quineltoca Toteco anmechnotzas
para xitlacuatij ihuaya huan anquinequij anyase, huajca xiyaca. Huan
xijcuaca nochi catli anmechmacas huan amo tleno xijtlatzintoquilica
tlen nopa tlacualistli para amo anquimatise huan amo anmechyolcocos.
\v 28 Pero sintla se anmechilhuis para nopa nacatl achtihui eltoya
se tlacajcahualistli para nopa totiotzitzi, huajca amo xijcuaca para
amo anquicocose yaya catli anmechilhuijtoc, niyon amo anquicocose
iyolo. Xiquelnamiqui para ni tlaltipactli huan nochi catli eltoc
ipani nelía iaxca Toteco.
\v 29 Huelis amo anquicocosquíaj amoyolo sintla anquicuasquíaj,
pero niquijtohua anquiyolcocosquíaj ne tlacatl pampa moilhuis ipan
iyolo para amo cuali catli anquichihuaj quema anquicuaj.
\p Huelis sequin amojuanti anmoilhuíaj: “¿Para tlen seyoc
masehuali quiijtos amo nijchihua catli cuali huan moyolcocos quema
nijchihua se tlenijqui catli nijpiya caquihuili nijchihuas?
\v 30 Huan sintla nijtlascamati Toteco para nopa catli nechmacatoc
ma nijcuas, ¿para tlen nechtelhuis seyoc ica nopa catli nijcua
pampa tijtlascamatqui Toteco para nopa tlacualistli?”
\v 31 Pero nimechilhuía, ica nochi catli anquicuaj, o anquiijij o
nochi sequinoc tlamantli catli anquichihuaj, monequi xijchihuaca
nochi para ihueyitilis Toteco.
\v 32 Amo tleno xijchihuaca catli quiyoltilanas ma tlajtlacolchihua
se israelita, o se catli amo israelita o catli hueli masehuali catli
quineltoca Toteco huan itztoc ipan itiopa.
\v 33 Huajca xijchihuaca quen na nijchihua. Nijnequi nijchihuas
catli quinpactis nochi masehualme. Amo nijchihua catli quisas cuali
san para na. Nijnequi ma quisas cuali para miyac masehualme para
inijuanti ma quineltocaca Cristo catli quinmaquixtis tlen
inintlajtlacolhua.
\c 11
\p
\v 1 Huajca xijchihuaca quen na nijchihua pampa na nijchihua nochi
catli nihueli para nijchihuas catli Cristo quichijqui.
\s Sihuame ipan tlasentililistli
\p
\v 2 Noicnihua, nipaqui pampa nijcaqui antechelnamiquij ica cuali
huan anquitoquilíaj nopa tlamachtili catli nimechmachtijtoc.
\v 3 Pero onca se tlamantli catli nijnequi nimechilhuis para
xijmachilica. Se tlacatl quipiya tequiticayotl ica isihua o itztoc
itzonteco quen Cristo quipiya tequiticayotl ica nochi tlacame, huan
quen Toteco Dios quipiya tequiticayotl ica Cristo o huelis
tiquijtose Toteco itzonteco Cristo.
\v 4 Sintla se tlacatl motlatlajtía ica Toteco ipan
tlasentililistli o camanalti icamanal Toteco huan quiicpahuijtoc
isombrero, huajca amo quinextía sintla quitlepanita Cristo.
\v 5 Pero sintla se sihuatl motlatlajtía ica Toteco ipan
tlasentililistli o tlamachtía camanali catli Toteco quimacatoc huan
amo motzontzactoc, huajca amo quinextía sintla quitlepanita
ihuehue. Eltoc quen moxintoc nopa sihuatl.
\v 6 Huajca sintla se sihuatl amo quinequi ma motzontzacuas, ma
moxima. Pero sintla mopinahuasquía para moximasquía, ma
motzontzacua.
\v 7 Amo cuali para se tlacatl motzontzacuas quema anmosentilíaj,
pampa Toteco quinchijtoc tlacame quen ya iixcopinca huan tlacame
quinextíaj Toteco ihueyitilis, pero se sihuatl tenextilía ihuehue
ihueyitilis.
\v 8 Pampa quema Toteco quichijqui nopa achtihui tlacatl, Adán,
yaya amo hualajqui ipan se sihuatl, pero nopa achtihui sihuatl, Eva,
hualajqui ipan nopa tlacatl.
\v 9 Huan Toteco amo quinchijchijqui tlacame para quinpalehuise
sihuame, pero quinchijchijtoc sihuame para quinpalehuise tlacame.
\v 10 Huajca monequi se sihuatl ma motzontzacua para ma quinextis
iniixpa itequihuajcahua Toteco para ihuehue quipiya tequiticayotl
ica ya.
\p
\v 11 Pero masque eltoc quej nopa, nochi tojuanti tiitztoque san se
ipan Jesucristo, huan niyon tlacame, niyon sihuame amo hueli
mohueyimatise quen achi huejhueyi.
\v 12 Huan masque melahuac nopa achtihui sihuatl quisqui ipan
itlacayo nopa tlacatl, teipa sihuame quintlacatiltíaj nochi
tlacame, huan yaya Toteco catli techchijchijqui nochi tojuanti.
\p
\v 13 Huajca ximoilhuica, amojuanti. ¿Cuali para se sihuatl
motlatlajtis ica Toteco, sintla amo motzontzactoc? ¡Amo neli!
\v 14 Ipan amoyolo anquimatij para quipinahualtisquía se tlacatl
sintla quipiyasquía huehueyac itzoncal,
\v 15 pero quema se sihuatl quipiya itzoncal huehueyac, huajca se
paquilistli huan yejyectzi para ya pampa Toteco quimacatoc itzoncal
para ica ya nopa ma motzontzacua.
\v 16 Pero sintla sequin quinequij monajnanquilise ica ni camanali,
ma quimatica para san ya ni tojuanti titlamachtíaj. Nojquiya san
quej ni quichihuaj nochi sequinoc toicnihua ipan itiopahua Toteco
catli mosentilíaj campa hueli.
\s Quichihuayayaj catli amo cuali ipan itlacualis Toteco
\p
\v 17 Pero monequi nimechilhuis seyoc tlamantli catli amo nechchihua
ma nipaqui amohuaya ica catli anquichihuaj. Nijcaqui amo
anmechpalehuía quema anmosentilíaj, san más anmechtlanahuía.
\v 18 Pampa nijcaqui quema anmosentilíaj, anmotlajcoitztiyohuij,
huan ica quentzi nijneltoca para melahuac.
\v 19 Huan huelis anmoilhuíaj para monequi anmoiyocanequise para ma
monextis ajqueya quichihua catli quipactía Toteco.
\v 20 Huajca sintla anmotlajcoitaj quema anmosentilíaj, amo neli
anquicuaj catli Toteco itlacualis,
\v 21 pampa nijcaqui miyac tlen amojuanti anmotlayacanaltíaj huan
anquitlatoccuaj catli anquihualicatoque ipan nopa tlacualistli catli
achtihui onca. Niyon amo anquichiyaj para ma ajsica sequinoc
tlaneltocani para anquixelose catli anquihualicaque ica nochi.
Huajca sequin catli teipa ajsij amo tleno quiselíaj huan mayanaj.
Huan sequinoc catli cualca ajsique moixhuitíaj huan hasta
moihuintíaj.
\v 22 ¿Amo anquipiyaj amochajchaj campa huelis antlacuase huan
antlaise? ¿Quenque anquimacaj pinahualistli itiopa Toteco huan
anquinpinahualtíaj amoicnihua catli teicneltzitzi huan catli amo
tleno quipiyaj para quihualicase? ¿Anmoilhuíaj para na nipaqui ica
catli anquichihuaj? ¡Amo neli! ¡Ica ya ni, amo nipaqui!
\s Itlacualis Tohueyiteco
\p
\v 23 Pampa elqui yaya Tohueyiteco catli nechnextili nopa catli
nimechmachtijtoc tlen itlacualis, huan ya ni catli nimechilhuijtoc.
Tohueyiteco Jesús quiitzqui se pantzi ipan nopa tlayohua quema
Judas quitemactili,
\v 24 huan quema quitlascamatqui iTata, quitlajcoitac, huan
quinilhui imomachtijcahua: “Xijcuica tlen ni pantzi huan xijcuaca.
Ni notlacayo catli nitemacas quema nimiquis por amojuanti.
Xijchijtiyaca ni para antechelnamiquise na.”
\v 25 San se Tohueyiteco Jesús quichijqui ica nopa taza. Quema
inijuanti ya tlantoya tlacuaj ica tiotlac, quiitzqui se taza ica
xocomecatl iayo huan quiijto: “Ni taza tenextilía noeso catli
nijtoyahuas para quipehualtis nopa yancuic camanal sencahuali catli
Toteco quichihua ica masehualme. Quema anquiijitiyase ipan se taza
quej ni, xijchihuaca pampa anquielnamiquise nimijqui por
amojuanti.”
\v 26 Huan nochipa quema anquicuase ni pantzi huan anquiijise ni
xocomecatl iayo, anteyolmelahuase para Tohueyiteco mijqui por
tojuanti huan quej nopa monequi xijchijtiyaca hasta yaya mocuepas.
\s Quenicatza monequi quicuase Itlacualis Tohueyiteco
\p
\v 27 Huajca sintla se quicuas nopa pantzi o quiijis tlen nopa taza
ipan nopa tlacualistli catli Toteco technextilijtoc, huan amo
quichihua quen quinamiqui, yaya quihuicas tlajtlacoli pampa
tlajtlacolchihuas ica ieso huan itlacayo Tohueyiteco.
\v 28 Huajca achtihui monequi sesen masehuali ma moyoltlachili para
momacas cuenta sintla eltoc catli amo cuali ipan iyolo. Huan quema
quimatis para amo tleno catli amo cuali eltoc ipan iyolo, ma quicua
nopa pantzi huan ma quiiji tlen nopa taza quen quinamiqui.
\v 29 Pampa Toteco quitlatzacuiltis aqui hueli masehuali sintla
quiijis huan quicuas itlacualis Toteco huan amo monejnehuilía para
nelía hueyi ipati itlacayo Tohueyiteco huan catli yaya
techchihuilijtoc.
\v 30 Yeca miyac tlen amojuanti ama amo anquipiyaj tetili huan
anmococohuaj; huan hasta sequin ya mictoque pampa Toteco
anmechtlatzacuiltía.
\v 31 Pero sintla cuali timoyoltlachilise huan timoxitlahuase catli
amo cuali catli eltoc ipan toyolo, huajca Toteco amo
techtlatzacuiltis.
\v 32 Quema Toteco techtlatzacuiltía, techxitlahua para ma
timoyolpatlaca huan ma amo tijselica tlatzacuiltilistli ica sequinoc
masehualme tlen ni tlaltipactli.
\p
\v 33 Huajca noicnihua, quema anmosentilise para anquicuase nopa
tlacualistli catli Toteco technextilijtoc, ximochiyaca se ica seyoc.
\v 34 Huan sintla se nelía mayana, ma tlacuajtehua ichaj para amo
antlajtlacolchihuase quema anmosentilíaj. Huan ica nopa sequinoc
tlamantli catli antechtlajtlanijtoque, nijsencahuas nochi quema
niajsiti nepa amohuaya.
\c 12
\s Yajatili catli Itonal Toteco quimaca sesen tlaneltocaquetl
\p
\v 1 Huan ama noicnihua, nijnequi nimechilhuis se quentzi tlen nopa
miyac tlamantli yajatili catli Itonal Toteco quinmaca tlaneltocani
pampa nijnequi achi más cuali xijmachilica.
\p
\v 2 Ya anquimatij quema ayamo anquineltocayayaj Tohueyiteco,
anquinhueyimatiyayaj totiotzitzi catli amo huelij camanaltij huan
anquintoquiliyayaj nopa totiotzitzi campa hueli huan san
anmocuapolojtinemiyayaj.
\v 3 Yeca ama nijnequi nimechilhuis quen anquinyolmatise masehualme
catli nelía camanaltij ica ichicahualis Itonal Toteco huan
inijuanti catli san quinequij anmechcuapolose. Xijmatica para niyon
se catli camanalti ica ichicahualis Itonal Toteco huelis quiijtos
para tlatelchihuali Jesús. Huan niyon se amo huelis quiijtos para
Jesús itztoc Tohueyiteco sintla amo camanalti ica ichicahualis
Itonal Toteco.
\p
\v 4 Onca miyac tlamantli yajatili o tlalnamiquilistli catli
masehualme quiselíaj para huelis quichihuase itequi Toteco. Pero
itztoc san se Itonal Toteco catli temaca nochi nopa yajatili catli
tlaneltocani quiselíaj.
\v 5 Onca miyac tlamantli tequitl ica catli huelis tijtequipanose
Tohueyiteco, pero itztoc san se Tohueyiteco catli tijtequipanohuaj.
\v 6 Toteco tequiti ipan inemilis sesen tlaneltocaquetl quen quiita
cuali para ya, pero san se Toteco catli quichihua itequi ica nochi
tojuanti.
\p
\v 7 Huan Itonal Toteco quinextía para itztoc ipan sesen
tlaneltocaquetl pampa quimaca nochi nopa yajatili catli monequi para
ica quinpalehuis nochi sequinoc tlaneltocani.
\v 8 San se Itonal Toteco quinmaca sequin tlaneltocani camanali
catli quipiyaj miyac tlalnamiquilistli, huan sequinoc quinmacatoc
camanali catli quipiya miyac tlamatilistli.
\v 9 San se Itonal Toteco quinmacatoc sequinoc masehualme ma
quipiyaca miyac tlaneltoquili huan quinmacatoc sequinoc yajatili
para ma quinchicahuaca cocoyani.
\v 10 Huan Itonal Toteco quinmacatoc sequinoc chicahualistli para
quichihuase tiochicahual nextili. Sequinoc quinmacatoc yajatili quen
tlajtol pannextiani para camanaltise icamanal Toteco. Sequin
masehualme quiselíaj yajatili para quimatise sintla Itonal Toteco
quimacatoc se tlacatl icamanal o sintla se iajacayo Amocualtlacatl
quimacatoc. Sequin tlaneltocani quiselíaj yajatili para camanaltise
camanali catli amo momachtijtoque. Huan sequinoc quiselíaj yajatili
para teyolmelahuase catli quiijtohuaj inijuanti catli camanaltij ica
camanali catli amo momachtijtoque.
\v 11 Pero itztoc san se Itonal Toteco catli quinmajmaca nochi ni
tlamantli yajatili huan san yaya quitlapejpenía catlique
tlaneltocaquetl ma quiselis sesen yajatili.
\s Nochi tlaneltocani itztoque ipan itlacayo Cristo
\p
\v 12 Masque se masehuali quipiya san se itlacayo, itlacayo quipiya
miyac partes huan nochi nopa miyac partes quipiya itequi huan san
sejco mochihua itlacayo. Huan quej nopa nojquiya eltoc ica itlacayo
Cristo.
\v 13 Itztoc san se Itonal Toteco catli techtlatzquiltijtoc tojuanti
catli tijneltocaj Cristo ipan itlacayo. Sequin tojuanti tiitztoque
tiisraelitame, sequinoc amo. Sequin tlaneltocani quipiyaj ininteco
ipan ni tlaltipactli catli quincojtoc para iaxca, sequinoc amo, san
majcajtoque, pero nochi tojuanti tijselijtoque san se Itonal Toteco
ipan toyolo.
\p
\v 14 Itlacayo se masehuali amo san se parte quipiya, pero quipiya
miyac.
\v 15 Huan ¿tlaque panos sintla se iicxi se masehuali huelisquía
camanaltisquía huan quiijtosquía: “Na amo niimax ni masehuali,
huajca amo nise parte tlen itlacayo”? Catli quiijtosquía ya ni amo
tleno quipatlasquía pampa iicxi nopa tlacatl noja mocahuasquía se
parte ipan itlacayo.
\v 16 Huan nojquiya amo tleno mopatlas sintla se inacas
quiijtosquía: “Na amo niiixteyol ni masehuali, yeca amo nise parte
tlen itlacayo.” Pampa masque quej nopa moilhuisquía inacas, noja
mocahuasquía se parte ipan itlacayo.
\v 17 Huan sintla campa hueli ipan itlacayo se masehuali
quipixtosquía senquistoc iixteyolhua, huajca ¿quenicatza
tlacaquisquía? O sintla campa hueli quipixtosquía senquistoc
inacashua, huajca ¿quenicatza tlaijnecuisquía?
\v 18 Pero amo quej nopa. Toteco quichijqui totlacayo ica miyac
partes huan sesen parte quitlali campa yaya quinejqui ma eli.
\v 19 Sintla se masehuali quipiyasquía senquistoc iicxihua,
¿quenicatza tiquijtose quipiya itlacayo?
\v 20 Pero Toteco quisencajtoc para tijpiyase miyac tlamantli partes
ipan totlacayo, pero san se totlacayo tijpiyaj.
\p
\v 21 Huan iixteyol se masehuali amo huelis quiilhuis imax: “Ta amo
timonequi”, niyon itzonteco amo huelis quiilhuis iicxi: “Ta amo
timonequi”.
\v 22 Ya nopa amo neli pampa monequi nochi partes ipan totlacayo.
Huan achi más monequi nopa partes catli nesi para amo tetic huan
amo más ipati quen ne sequinoc.
\v 23 Nopa partes ipan totlacayo catli timoilhuíaj amo senquistoc
cuali, achi más tiquinmocuitlahuíaj. Huan nopa partes catli amo
cuali para ma tiquinnextica, tiquinyoyontíaj ica más cuidado.
\v 24 Huan nopa partes catli cuali monextíaj, amo más
tiquintzacuaj. Huajca Toteco quisencajtoc totlacayo para achi más
tiquinmocuitlahuise nopa partes catli timoilhuíaj quipolohuaj.
\v 25 Quichijqui ni pampa amo quinejqui ma moxelo totlacayo.
Quinequi sesen parte ma quimocuitlahuis nopa sequinoc partes.
\v 26 Sintla se parte mococohua, huajca nochi partes tlaijiyohuíaj
ihuaya. Huan sintla se parte ipan totlacayo quiselía se
tlatlepanitali, nochi partes ipan totlacayo paquij.
\p
\v 27 Ama anitztoque itlacayo Cristo huan sesen amojuanti anitztoque
quen se parte tlen itlacayo catli tlahuel monequi.
\v 28 Huan ipan itlacayo Cristo, o itiopa, Toteco techmacatoc sesen
tojuanti totequi. Achtihui quintequimacac tlayolmelahuani huan,
teipa tlajtol pannextiani. Teipa quintequimacac tlamachtiani huan
teipa catli quipiyaj yajatili para quichihuase tiochicahual nextili.
Teipa quintequimacac catli quipiyaj yajatili para quinchicahuase
cocoyani, huan teipa catli quipiyaj yajatili para tepalehuise. Teipa
quintequimacac catli quipiyaj yajatili para tlayacanase ipan nochi
tlamantli catli quichihua itiopa. Huan teipa quinmacac sequin nopa
yajatili para camanaltise sequinoc camanali catli amo
momachtijtoque.
\p
\v 29 Pero xijmachilica ya ni. Amo nochi quipiyaj nopa tequitl quen
tlayolmelahuani. Amo nochi tlajtol pannextiani. Amo nochi
tlamachtiani tlen Icamanal Toteco. Amo nochi huelij quichihuaj
tiochicahual nextili.
\v 30 Amo nochi huelij quinchicahuaj cocoyani. Amo nochi huelij
camanaltij sequinoc camanali catli amo momachtijtoque. Amo nochi
huelij teyolmelahuase catli quiijtosnequi nopa camanali catli
sequinoc quiijtohuaj.
\v 31 Pero sintla anquitemohuaj se yajatili tlen Itonal Toteco,
huajca ica nochi amoyolo xijnequica nopa tlamantli yajatili catli
achi más quinpalehuía sequinoc. Pero ama nimechilhuis tlen seyoc
ojtli catli noja más cuali para anquitoquilise.
\c 13
\s Tlaicnelijcayotl
\p
\v 1 Masque nihuelisquía nicamanaltisquía camanali catli
masehualme huan itequihuajcahua Toteco camanaltij, amo tleno nopati
sintla amo niteicnelía. Quema nicamanaltisquía nopa camanali
eltosquía quen san nitamborhuijhuitequi o niteposhuijhuitequi.
\v 2 Masque nijpiyasquía yajatili para nicamanaltisquía camanali
tlen Toteco quen se tlajtol pannextijquetl, huan masque
nijmatisquía nochi catli ohui huan masque nijpiyasquía miyac
tlaneltoquili hasta nihuelisquía niquilhuisquía se tepetl ma
mijcuini huan nelía mijcuinisquía, sintla amo niteicnelía, amo
tleno nopati.
\v 3 Masque nitemajmacasquía nochi catli nijpixtoc para oncas
inintlacualis teicneltzitzi, o masque nitemacasquía notlacayo para
ma quitlatica, sintla amo niteicnelía, amo tleno nechpalehuisquía
iixpa Toteco.
\p
\v 4 Se catli teicnelía quipiya iyolo ininhuaya sequinoc huan
quinchihuilía catli cuali. Yaya amo quinequi catli sequinoc
quipiyaj. Amo mohueyimati, niyon amo momachilía achi cuali que
sequinoc.
\v 5 Se catli teicnelía monejnehuilía achtihui quema
tlananquilía. Amo camanalti san que hueli. Amo itzcuimitl huan amo
yolquentzi. Niyon quichihuilía cuenta quema seyoc quichihuilía
catli amo cuali.
\v 6 Catli teicnelía amo quema paqui ica catli amo cuali. San paqui
ica catli melahuac.
\v 7 Se catli teicnelía quiijiyohuía nochi tlamantli catli huala,
huan motemachía para ajsis catli cuali. Nochipa quichiya para
sequinoc ma quichihuaca catli cuali. Se catli teicnelía mocahua
temachtli masque tlen hueli quipanotihuala.
\p
\v 8 Tlaicnelijcayotl nochipa eltos huan amo quema tlamis. Pero
ajsis hora quema masehualme ayacmo camanaltise camanali catli Toteco
quinmacas quen quichihuaj tlajtol pannextiani. Ajsis hora masehualme
ayacmo camanaltise camanali catli amo momachtijtoque. Ajsis hora
quema Itonal Toteco ayacmo quinmachiltis masehualme catli ohui.
\v 9 Ama san se quentzi tijmatij, huan quema se camanalti icamanal
Toteco quen se tlajtol pannextijquetl, san huelis camanaltis se
quentzi.
\v 10 Pero quema catli senquistoc cuali hualas, nochi catli
pilquentzi tlamis.
\p
\v 11 Quema niitztoya niconetzi nicamanaltiyaya quen se conetl,
nimoilhuiyaya quen se conetl, huan nijmachiliyaya tlamantli quen se
conetl. Pero quema nimotlacachijqui, niquiyocacajqui nopa tlamantli
catli coneme quichihuaj.
\v 12 San se ica tojuanti. Ama eltoc quen tijtlachilíaj Toteco ipan
se tescatl campa tzintlayohua huan amo hueli tiquitaj cuali. Pero
teipa quema yaya mocuepas, timoixtlachilise. Amantzi niquiximati se
quentzi, pero teipa niquiximatis senquistoc quen Toteco senquistoc
nechiximati.
\v 13 Huajca onca eyi tlamantli catli huejcahuase. Monequi tijpiyase
tlaneltoquili. Monequi timotemachise para panos nochi catli Toteco
quiijto panosquía, huan monequi titlaicnelise, pero nopa catli más
hueyi ipati ica ni eyi tlamantli eltoc inin, monequi titlaicnelise.
\c 14
\s Masehualme catli camanaltique ica sequinoc camanali
\p
\v 1 Huajca achi más xijchihuaca fuerza xiquinicnelica sequinoc,
pero nojquiya xijnequica miyac para xijselica se yajatili catli
Itonal Toteco temaca. Huan achi más xijnequica para Itonal ma
anmechmaca yajatili quen se tlajtol pannextijquetl para
ancamanaltise icamanal Toteco.
\v 2 Pampa se catli quipiya yajatili para camanaltis ica seyoc
camanali catli amo momachtijtoc, quicamanalhuía Toteco, pero amo
quincamanalhuía masehualme pampa masehualme amo hueli
quimachilíaj. Yaya san camanalti tlamantli catli ichtacatzi catli
Itonal Toteco quimacatoc para ma quiijto.
\v 3 Pero se tlajtol pannextijquetl camanalti icamanal Toteco huan
quinpalehuía masehualme para ma moscaltica ipan Toteco, huan
quinfuerzajmaca huan quinyolchicahua tlaneltocani.
\v 4 Huajca se catli camanalti ipan seyoc camanali, mopalehuía
iseltzi para achi más quineltocas, pero se catli camanalti para
Toteco, quinpalehuía nochi nopa tiopamitl tlen tlaneltocani para
achi más quineltocase Tohueyiteco.
\p
\v 5 Na nipaquisquía sintla nochi amojuanti anhuelisquíaj
ancamanaltisquíaj ica sequinoc camanali, pero achi más
nipaquisquía sintla anquipiyasquíaj yajatili quen se tlajtol
pannextijquetl para ancamanaltisquíaj para Toteco, pampa achi más
ipati se catli camanalti para Toteco que se masehuali catli
camanalti seyoc camanali sintla amo aqui hueli quiixtomas catli
quiijtohua para huelis quinpalehuis ma moscaltica nochi nopa
tiopamitl tlen tlaneltocani.
\v 6 Noicnihua, sintla niyasquía campa amojuanti huan
nicamanaltisquía ica seyoc camanali catli amo anquimachilíaj,
¿quenicatza nimechpalehuisquía? Pero quena, nimechpalehuis sintla
nimechilhuis nopa catli Toteco nechnextilijtoc, o nimechmachiltis
achi más catli melahuac, o nicamanaltis icamanal Toteco catli yaya
nechmacatoc, huan nochi nimechilhuisquía ipan amocamanal catli
anquimachilíaj.
\p
\v 7 Nimechmacas se nemachiltili. Sintla se tlapitza o tlatzotzona,
huan amo aqui hueli quimachilía tlaque huicatl quitzotzona, huajca
san tlapic.
\v 8 Huan ipan se tlahuilancayotl sintla yaya catli tlapitza amo
quimati quipitzas nopa huicatl para quinnotzas tlacame ma
mosentilica, huajca amo aqui quimatis sintla monequi mosentilise
para tlahuilanase o amo.
\v 9 San se ica amojuanti. Sintla amo anquiijtohuaj camanali catli
nochi huelis quimachilise, amo aqui quimatis catli anquiijtohuaj
huan san tlapic amocamanal.
\v 10 Melahuac onca miyac tlamantli camanali catli masehualme
camanaltij ipan ni tlaltipactli. Huan sesen camanali quipiya catli
quinequi quiijtos para catli quimachilíaj.
\v 11 Pero sintla amo nihueli nijmachilía catli sequinoc
quiijtohuaj, catli camanaltij nechitase quen nise huejca ejquetl
huan na niquinitas nojquiya para inijuanti huejca ehuani.
\v 12 Huajca amojuanti catli tlahuel anquinequij yajatili catli
Itonal Toteco temaca, xijnequica nopa tlamantli yajatili catli achi
más quinpalehuía sequinoc ipan itiopa Toteco para ma moscaltica.
\p
\v 13 Sintla se hueli camanalti camanali catli amo momachtijtoc, ma
quitlajtlani Toteco para nojquiya huelis quiixtomas catli
quiijtojtoc.
\v 14 Pampa sintla nimotlatlajtía ica Toteco ica camanali catli amo
nijmachilía, huajca eltoc quen notonal motlatlajtía pero
notlalnamiquilis amo tleno quichihua.
\v 15 ¿Tlaque nijchihuas huajca catli más cuali? Más cuali
nimotlatlajtis ica notonal huan nijtequihuis camanali catli
nijmachilía. Huan nihuicas ica notonal huan nihuicas ica camanali
catli nijmachilía.
\v 16 Pampa sintla anquipaquilismacaj Toteco ica amotonal pampa
ancamanaltij camanali catli amo anmomachtijtoque, nopa masehualme
catli itztoque ipan tlanechicoli amonechca amo huelis quiijtose:
“Quej nopa ma eli”, huan quihueyichihuase Toteco amohuaya, pampa
amo quimachilíaj catli amojuanti anquiijtohuaj.
\v 17 Huajca, masque anquitlascamatij Toteco ica yejyectzi ica nopa
camanali catli anhuelij ancamanaltij, amo tleno quinpalehuía
sequinoc para ma moscaltica ipan Toteco.
\v 18 Na nijtlascamati Toteco para achi más nicamanalti ica
camanali catli amo nimomachtijtoc que nochi amojuanti.
\v 19 Pero quema niitztoc ipan tlasentililistli ipan tiopa, más
cuali niquijtosquía san macuili camanali ica notlalnamiquilis huan
ica camanali catli nochi quimachilíaj huan niquinpalehuis sequinoc,
huan amo para niquijtosquía majtlactli mil camanali catli amo aqui
huelis quimachilis.
\p
\v 20 Noicnihua, amo ximoilhuica quen coneme, pampa coneme san se
quentzi quimachilíaj. Cualtitoc xiitztoca quen coneme ica catli amo
cuali, pampa coneme san pilquentzi quimatij tlen catli amo cuali,
pero ipan sequinoc tlamantli ximoilhuica quen huejhueyi masehualme
catli quipiyaj cuali inintlalnamiquilis.
\v 21 Ipan Icamanal Toteco ijcuilijtoc campa Toteco quiijto:
\q “Niquincamanalhuis nomasehualhua catli amo nechneltocaj ica
camanali catli amo quimachilise.
\q Pampa elis masehualme tlen sequinoc tlalme catli quincamanalhuise
nocamanal.
\q Pero masque quej nopa elis, ni masehualme amo nechchihuilise
cuenta.”
\m Quej nopa quiijto Tohueyiteco.
\v 22 Huajca quema Itonal Toteco temaca yajatili para camanaltise
sequinoc camanali, amo se tlanextilijcayotl para tlaneltocani, pero
eltoc se tlanextilijcayotl para catli amo quineltocaj. Pero quema
Itonal Toteco temacas yajatili quen se tlajtol pannextijquetl para
se masehuali camanaltis icamanal Toteco catli yaya quimacatoc, amo
elis se tlanextilijcayotl para catli amo quineltocaj, pero ya nopa
elis para tlaneltocani.
\v 23 Huan quema nochi nopa tiopamitl tlen tlaneltocani
mosentilíaj, sintla nochi camanaltisquíaj camanali catli amo aqui
quimachilía, huan sintla ajsisquíaj masehualme catli amo
quineltocaj Tohueyiteco, o catli amo quema hualajtoque ipan nopa
tlasentililistli, inijuanti moilhuisquíaj para antzontlapolohuaj.
\v 24 Pero sintla nochi catli camanaltij ipan tlasentililistli,
camanaltise icamanal Toteco ica camanali catli nochi quimachilíaj,
huan calaquisquíaj masehualme catli amo quineltocaj Toteco, o catli
amo quema hualajtoque ipan tlasentililistli, huajca quena,
quicaquisquíaj huan quimachilisquíaj para quipiyaj
inintlajtlacolhua pampa icamanal Toteco quintelhuisquía.
\v 25 Tlanemijya inijuanti quiitase catli quitlatiyayaj ipan
ininyolo huan quen fiero moilhuiyayaj. Yeca nopa masehualme catli
san paxalohuaj motlancuaquetzase para quihueyichihuase Toteco huan
quiijtose para nelía itztoc Toteco nepa amohuaya.
\s Ma amo camanaltica san sejco
\p
\v 26 Huajca noicnihua, ¿tlaque nimechilhuía monequi anquichihuase
ipan amotlasentililis? Quema anmosentilíaj, itztoque sequin catli
quinequij huicase se tiohuicatl tlen Salmos, itztoque sequin catli
quinequij tlamachtise Icamanal Toteco, huan itztoque sequin catli
quinequij teilhuise nochi catli Toteco quinnextilijtoc. Itztoque
sequin catli quinequij camanaltise ica camanali catli amo
momachtijtoque, huan itztoque sequin catli quinequij tlaixtomase
catli quinequi quiijtos nopa camanali. Cualtitoc nochi ya ni, pero
monequi nochi catli anquichihuaj quinpalehuis nochi tlaneltocani
para ma moscaltica ipan Toteco.
\v 27 Huajca sintla sequin quinequij camanaltise camanali catli amo
momachtijtoque, ma camanaltica san ome o eyi, pero amo más. Huan ma
camanaltica sesentzitzi, huan nojquiya monequi itztos se catli
quipiya yajatili para quiixtomas nopa camanali para quinilhuis nochi
nopa masehualme catli quiijtojtoque.
\v 28 Huan sintla amo aqui hueli quinixtomilis sequinoc catli
quinequi quiijtos nopa camanali, huajca amo aqui ma camanalti
camanali ipan se tlasentililistli catli sequinoc amo quimachilíaj.
Inijuanti catli quinequiyayaj camanaltise ica seyoc camanali ma amo
tleno quiijtose ipan nopa tlasentililistli tlen nopa tiopamitl, o
inijuanti huelis motlatlajtise ica Toteco ipan ininyolo.
\v 29 Nojquiya san ome o eyi tlajtol pannextiani ma camanaltica
camanali tlen Toteco. Huan nochi sequinoc ma monejnehuilica tlen
catli quiijtohuaj huan ma moilhuica sintla Itonal Toteco nelía
quinmacatoc inincamanal o amo.
\v 30 Pero teipa sintla itztoc seyoc catli mosehuía nopona huan
Toteco quinextilía se tlamantli para quiijtos, huajca ma ayacmo
molinis yaya catli camanaltiyaya achtihui. Ma quicahuili camanaltis
ne seyoc.
\v 31 Quej nopa, san sesentzitzi, nochi tlajtol pannextiani huelis
camanaltise. Huan nochi sequinoc masehualme huelise quicaquise huan
quimachilise más huan nopa camanali quinyolchicahuas.
\v 32 Pampa se tlajtol pannextijquetl catli quipiya yajatili para
camanaltis para Toteco, hueli quinahuatía itonaltzi huan mochiyas
hasta quema quitocaros para camanaltis.
\v 33 Pampa ipan se tlasentililistli, Toteco amo quinequi para nochi
san ma quichihuaca catli quinequise huan tlahuejchihuase san sejco.
Yaya quinequi ma onca tlasehuilistli huan quinequi sesentzitzi
panotiyase quen tlasencahuili para panos.
\p Huan quen quichihuaj itlatzejtzeloltijca masehualhua Toteco catli
mosentilíaj ipan nochi sequinoc tiopame,
\v 34 amo xiquincahuilica sihuame ma camanaltica ipan
tlasentililistli pampa amo quinamiqui. Monequi sihuame quincahuilise
ininhuehuejhua ma quinyacanaca quen quiijtohuaj itlanahuatilhua
Toteco.
\v 35 Huan sintla sihuame quinequij quimatise se tlamantli, ma
quintlatzintoquilica ininhuehuejhua ipan ininchajchaj, pampa amo
quinamiqui sintla se sihuatl camanaltis ipan tlasentililistli.
\p
\v 36 Amo ximoilhuica para Icamanal Toteco pejqui ica amojuanti huan
san amojuanti catli anquineltocaj, pampa itztoque miyac catli
quiselijtoque icamanal campa hueli.
\v 37 Huajca sintla sequin amojuanti anmoilhuíaj para antlajtol
pannextiani, o anmoilhuíaj Itonal Toteco achi más anmechyacana que
sequinoc, xijmachilica para ni catli nimechtlajcuilhuía nica eltoc
catli Toteco tlanahuatía.
\v 38 Huan sintla se amo quimachilía para ya ni catli Toteco
tlanahuatía, ma amo aqui quichihuili cuenta ya.
\p
\v 39 Huajca noicnihua, xijnequica para Itonal Toteco ma anmechmaca
yajatili para anelise antlajtol pannextiani para ancamanaltise para
Toteco, pero nojquiya amo xiquintzacuilica catli quinequij
camanaltise camanali catli amo momachtijtoque.
\v 40 Pero ipan tlasentililistli xijchihuaca nochi quen quinamiqui
huan nochi ma camanaltica sesentzitzi quen anquisencajtoque para ma
pano.
\c 15
\s Jesucristo moyolcuic
\p
\v 1 Ama noicnihua, nijnequi nimechelnamiquiltis tlen nopa cuali
camanali tlen Cristo catli nimechilhui achtihuiya. Anquiselijque
nopa cuali camanali huan hasta ama noja anquineltocaj.
\v 2 Huan ya nopa catli anmechmaquixtijtoc tlen amotlajtlacolhua
sintla ipan nopa camanali anmotlatzquilijtoque. Sintla amo, huajca
san tlapic anquineltocaque.
\p
\v 3 Nimechilhui nopa camanali catli achi más ipati catli Toteco
nechmachilti. Nimechilhui quen Tohueyiteco Cristo mijqui para
totlajtlacolhua quen quiijto Icamanal Toteco para quichihuasquía.
\v 4 Huan tlacame quitzajque itlacayo ipan se tecacahuatl para
mijcatzitzi, huan nimechilhui ica eyi tonali yaya moyolcuic quen
quiijto Icamanal Toteco para quichihuasquía.
\v 5 Huan teipa yaya monexti ica Pedro huan teipa ica nochi nopa
majtlactli huan se itlayolmelajcahua.
\v 6 Teipa Tohueyiteco Jesucristo monexti ica pano macuili ciento
toicnihua sentic. Nechca nochi ni macuili ciento tlaneltocani noja
itztoque hasta ama, pero sequin ya mijque.
\v 7 Teipa Tohueyiteco monexti iixpa Jacobo, huan teipa nochi
sequinoc itlayolmelajcahua quiitaque.
\p
\v 8 Huan hasta nelteipa, quema panotoya miyac más tonali, monexti
ica na. Elqui quen amo nitlacatqui ipan nopa tonali catli cuali huan
amo niquitac quema nemiyaya nica.
\v 9 Na niitztoc más nitziquitetzi tlen nochi itlayolmelajcahua
huan amo quinamiqui para nechtocaxtise niitlayolmelajca Toteco quen
quinnotzaj nopa sequinoc, pampa niquintlaijiyohuilti catli itztoque
ipan itiopa Tohueyiteco.
\v 10 Pero pampa hueyi iyolo ica na, Toteco nechmacac ni itequi para
nielis niitlayolmelajca. Pero amo san tlapic Toteco quipixqui hueyi
iyolo ica na, pampa nitequititoc achi más que nochi sequinoc. Pero
amo nitequiti noseltzi, pampa yaya Toteco catli tequiti ipan na
pampa hueyi iyolo nohuaya.
\v 11 Huajca amo ipati sintla na catli nicamanalti icamanal o nopa
sequinoc. San ipati timechcamanalhuijque icamanal Toteco huan
anquineltocaque.
\s Mijcatzitzi moyolcuise
\p
\v 12 Huan tojuanti timechyolmelajque quenicatza Cristo moyolcuic
quema ya mictoya huan anquineltocaque. Huajca ama ¿quenque sequin
amojuanti anquiijtohuaj para masehualme catli mictoque amo quema
moyolcuise?
\v 13 Pampa sintla masehualme catli ya mictoque amo huelis
moyolcuise, huajca amo hueltosquía moyolcuitosquía Cristo.
\v 14 Huan sintla Cristo amo moyolcuitosquía, huajca san tlapic
catli timechilhuijtosquíaj tlen yaya huan san tlapic
anquineltocatosquíaj.
\v 15 Nojquiya elisquía quen tiistlacatini quema timechilhuijque
tlen Toteco. Pampa timechilhuijtoque para Toteco Dios quiyolcuic
Toteco Cristo, pero Toteco Dios amo quiyolcuitosquía sintla nelía
catli mictoque amo huelis moyolcuise quen anquiijtohuaj.
\v 16 Pampa sintla inijuanti catli ya mictoque amo huelisquíaj
moyolcuisquíaj, huajca niyon Cristo amo moyolcuitosquía.
\v 17 Huan sintla nelía Tohueyiteco Cristo amo moyolcuic quen
anquiijtohuaj, huajca san tlapic anquineltocatoque huan noja
anquihuicaj amotlajtlacolhua.
\v 18 Nojquiya catli anquiijtohuaj quinequi quiijtos para
tlaneltocani catli ya mictoque, mopolojtoque.
\v 19 Huajca sintla san techpalehuía tojuanti catli timotemachíaj
ipan Cristo quema noja tiitztoque huan amo tleno techpalehuisquía
quema timiquise, huajca achi más titeicneltique que nochi sequinoc
masehualme. Pero amo, amo quej nopa.
\p
\v 20 Ya ni catli melahuac. Cristo nelía moyolcuic quema ya mictoya
quen nopa achtihui pixquistli catli tenextilía para teipa oncas se
hueyi pixquistli. Quena, pampa moyolcuic ya, technextilía nochi
sequinoc catli mictoque nojquiya moyolcuise teipa.
\v 21 Eltoc quej ni. Ica san se tlacatl, Adán, miquilistli pejqui
ipan tlaltipactli, huan nojquiya ica catli quichijqui san se
tlacatl, Jesucristo, ama masehualme hueli moyolcuise.
\v 22 Pampa Adán tlajtlacolchijqui huejcajya, nochi masehualme
monequi ma timiquica. Pero nojquiya pampa san se tlacatl, Jesucristo
moyolcuic, quichijqui para nochi masehualme huelis moyolcuise.
\v 23 Pero sesen moyolcuis quema quitocaros. Quena, achtihui Cristo
moyolcuic quen nopa tlayacapan nemachiltili, huan teipa quema Cristo
mocuepas, nochi catli iaxcahua moyolcuise.
\v 24 Huan ica teipa Toteco Cristo quintlanis nochi
icualancaitacahua catli motocaxtíaj catli tlanahuatilyojque, huan
catli tequiticayojque huan catli chicahualisyojque. Huan nochi
imasehualhua catli itztoque ipan itlanahuatilis Toteco Cristo
quimacas imaco Toteco Dios, iTata, para yaya ma quinnahuatis.
\v 25 Pero monequi para Cristo tlanahuatis hasta quintlanis nochi
icualancaitacahua.
\v 26 Huan icualancaitaca catli hasta más teipa Cristo quitlamiltis
elis miquilistli. Huan quema yaya quisosolos miquilistli, amo aqui
más miquis.
\v 27 Toteco Dios quimacatoc Cristo tlanahuatili ica nochi
masehualme huan nochi tlamantli. Pero amo quinequi quiijtos para
Cristo quipiya tlanahuatili para quinahuatis Toteco Dios, pampa yaya
Toteco Dios catli quimacac Cristo tlanahuatili.
\v 28 Huan quema nochi tlamantli huan nochi icualancaitacahua
mocahuase imaco Cristo para quinnahuatis, huajca ica ipaquilis
Cristo catli itztoc Icone motemactilis ica iTata catli quitlalijtoc
nochi imaco Cristo. Huan yeca ipan nopa tonali Toteco Dios quipiyas
nochi tlanahuatili ica nochi catli onca.
\p
\v 29 Nojquiya, sintla inijuanti catli mictoque amo moyolcuisquíaj,
¿para tlen sequin mocuaaltíaj para masehualme catli ya mictoque?
San tlapic para quichihuaj sintla amo anquineltocaj para moyolcuise.
\p
\v 30 Huan sintla amo timoyolcuise teipa, ¿para tlen niyasquía
nechca miquilistli mojmostla ipan itequi Toteco?
\v 31 Melahuac catli nimechilhuía, mojmostla eltoc quen ajsi nopa
hora para nimiquis. Ya ni melahuac quen nojquiya melahuac na nijpiya
miyac paquilistli por nochi catli Cristo Jesús quichijtoc ipan
amojuanti.
\v 32 San tlapic para nimohuilantoc ica nopa fiero tlacame ipan
altepetl Éfeso catli itztoyaj quen tecuanime sintla amo
nimoyolcuis. Sintla mijcatzitzi amo quema moyolcuise, achi cuali ma
tijchihuaca quen sequinoc quiijtohuaj: “Ma titlamahuisoca, ma
titlacuaca huan ma titlaijica nochi catli tijnequij pampa mostla san
timiquise.”
\p
\v 33 Amo xiquincahuilica sequinoc ma anmechcajcayahuaca. Onca se
camanali catli quiijtohua: “Sintla se tlacatl nemi ica fiero
masehualme, quiijtlacose catli cuali catli yaya quinequiyaya
quichihuas.”
\v 34 Ximotlalnamictica huan ayacmo xitlajtlacolchihuaca. Itztoque
sequin amojuanti catli ayamo anquiiximatij Tohueyiteco.
Nimechilhuía ni para ximopinahuaca.
\s Quenicatza moyolcuise mijcatzitzi
\p
\v 35 Huelis sequin amojuanti anquinequij antechtlatzintoquilise:
“¿Quenicatza huelis moyolcuise mijcatzitzi? ¿Tlaque tlamantli
inintlacayo quipiyase quema moyolcuise?”
\v 36 Huihuitic para se quichihuas nopa tlatzintoquili. ¿Amo
anquimatij quema anquitocaj se xinachtli, achtihui monequi palanis
quen se tlamantli mictoc huan teipa xihuiyo panquisas?
\v 37 Huan nopa xinachtli catli anquitojque amo quipixqui
itlachiyalis quen ixihuiyo catli chamanqui. Anquitojque se
xinachtli. Huelis se xinachtli tlen trigo o seyoc tlamantli
xinachtli, pero nopa xinachtli catli anquitojque amo nesqui quen
ixihuiyo catli ixhuac.
\v 38 Ica nochi tlamantli xinachtli Toteco quichihua ma ixhuaca huan
ma quipiyaca nopa tlamantli ininxihuiyo o huelis tiquijtose nopa
tlamantli inintlacayo catli yaya quinequi ma quipiyaca. Huan sesen
tlamantli xinachtli quipiya catli ya iseltzi ixihuiyo huan amo onca
seyoc quen ya.
\v 39 San se eltoc ica masehualme huan tlapiyalme. Masehualme
quipiyaj se tlamantli ininnacayo, huan tlapiyalme seyoc, huan totome
seyoc huan michime seyoc.
\v 40 Itequihuajcahua Toteco huan catli itztoque ipan ilhuicac
nojquiya quipiyaj seyoc tlamantli ininnacayo huan amo quen catli
tojuanti ipan ni tlaltipactli tijpiyaj. Ininyejyejca amo nesi san se
quen catli eltoc ipan tlaltipactli.
\v 41 Itlahuil tonati amo nesi san se quen nopa tlahuili catli
tlamina metztli, niyon amo nesi san se quen inintlahuil sitlalime.
Huan nochi sitlalime amo cahuanij ica san se ininchicahualis.
\p
\v 42 Quej nopa elis quema mijcatzitzi moyolcuise. Masehualme
quitlalpachohuaj se mijcatzi ica itlacayo catli palani, pero Toteco
quiyolcuis ica se itlacayo catli amo palanis.
\v 43 Quema masehualme quitlalpachohuaj se mijcatzi, fiero itlacayo,
pero quema Toteco quiyolcuis, elis yejyectzi. Nopa catli masehualme
quitlalpachohuaj amo quipiya fuerza, pero nopa catli Toteco
quiyolcuis miyac fuerza quipiyas.
\v 44 Quema tiquintlalpachohuaj mijcatzitzi, quipiyaj se inintlacayo
quen masehualme ipan ni tlaltipactli, pero quema moyolcuise,
quipiyase seyoc tlamantli inintlacayo quen se tonaltzi, o quen
masehualme ipan ilhuicac quipiyaj. Quena, onca inintlacayo
masehualme tlen ni tlaltipactli huan nojquiya onca inintlacayo
masehualme catli itztoque ipan ilhuicac.
\p
\v 45 Quiijtohua ipan Icamanal Toteco: “Ica Adán, nopa achtihui
tlacatl ipan tlaltipactli, Toteco quisencajqui itlacayo huan
quitlali ialma huan quichijqui ma itzto.” Pero Cristo, catli eltoc
seyoc tlayacanquetl quen Adán, ajsico teipa huan yaya mochijqui se
tonaltzi catli temaca nemilistli.
\v 46 Ama, amo tijpiyaj se totlacayo tlen ilhuicac, pampa achtihui
monequi tijpiyase totlacayohua tlen ni tlaltipactli huan teipa
tijpiyase totlacayohua tlen ilhuicac.
\v 47 Adán catli itztoya achtihui, quipixqui itlacayo catli Toteco
quisencajtoya ica tlali tlen ni tlaltipactli. Pero Cristo catli
teipa hualajqui, hualajqui tlen ilhuicac.
\v 48 Nochi masehualme catli itztoque ipan ni tlaltipactli quipiyaj
inintlacayohua quen catli Adán quipixtoya, pero quema tijpiyase
totlacayo tlen ilhuicac, elis san quen catli Cristo quipiya.
\v 49 Quen ama totlacayo nesi quen itlacayo Adán catli elqui tlen
ni tlaltipactli, teipa tijpiyase totlacayo catli nesis quen itlacayo
Cristo catli ehua ilhuicac.
\p
\v 50 Catli nijnequi nimechilhuis noicnihua eltoc ya ni. Totlacayo
catli ama tijpiyaj ica toeso huan tonacayo, amo huelis itztos nepa
ipan itlanahuatilis Toteco. Ni totlacayo miqui huan amo huelis yas
campa nochi itztose para nochipa.
\v 51 Pero xitlacaquica se quentzi huan nimechilhuis se tlamantli
yejyectzi catli hasta ama masehualme amo quimatiyayaj. Amo nochi
tojuanti timiquise, pero nochi tojuanti Toteco techpatilis totlacayo
ica catli yancuic.
\v 52 Quema itequipanojca tlapitzas nopa tlayacapan tlapitzali,
Toteco techpatilis totlacayo. Ya nopa panos ica se tlatoctzi quen
quema tiixijcopij huan titlachixtehuaj. Pampa quema quipitzas nopa
tlapitzali, tlaneltocani catli mictoque, moyolcuise ica inintlacayo
catli amo quema huelis miquis, huan tojuanti catli noja tiitztoque,
Toteco san techpatilis totlacayo ica catli yancuic.
\v 53 Pampa totlacayo catli ama amo huejcahua, mopatlas ica catli
huejcahuas para nochipa. Huan masque ni totlacayo miqui, totlacayo
catli tijpiyase teipa, amo quema huelis miquis.
\v 54 Huajca, quema totlacayo catli ama amo huejcahua mopatlas ica
catli huejcahuas para nochipa, huan mopatlas ni totlacayo catli ama
miqui ica catli amo quema miquis, ipan nopa tlatoctzi panos quen
ijcuilijtoc ipan Icamanal Toteco campa quiijtohua: “Cristo
quitlantoc miquilistli huan yeca miquilistli ayacmo quipiya
chicahualistli.
\v 55 Huajca ¿quenicatza huelis techtlanis miquilistli?
¿Quenicatza huelis techcocos? Ayacmo tleno huelis techchihuilis.”
\p
\v 56 Miquilistli hasta ama hueli techtlani pampa tijpixtoyaj
totlajtlacolhua. Huan tijpixtoyaj totlajtlacolhua pampa amo huelqui
tijchihuaj catli quiijtojque itlanahuatilhua Toteco.
\v 57 Pero ama ma tijtlascamatica Toteco pampa yaya techmacac
chicahualistli ma tijtlanica miquilistli ica catli Tohueyiteco
Jesucristo techchihuilijtoc.
\p
\v 58 Huajca noicnihua catli nimechicnelía, xiitztoca antemachme
ipan Toteco. Amo xijcahuaca niyon se tlamantli ma anmechijcuinis
tlen ya. Nochipa xijchihuaca nochi nopa tequitl catli Tohueyiteco
anmechmaca xijchihuaca para ya. Huan xijmatica amo san tlapic nopa
tequitl catli anquichihuaj quema anmotlatzquilijtoque ipan Jesús.
\c 16
\s Xijsentilica tomi para sequinoc
\p
\v 1 Ama nimechilhuis tlen nopa tomi catli anquinequij
anquisentilise para toicnihua catli tlaijiyohuíaj. Xijchihuaca quen
niquinilhuijtoc ma quichihuaca nopa tlaneltocani catli mosentilíaj
ipan tiopame ipan tlali Galacia.
\v 2 Ipan nochi domingo, nopa achtihui tonal ipan semana, monequi
sesen tlen amojuanti ma quiiyocatlali se parte tlen nopa tomi catli
quitlantoc. Huan nopa tomi xicajocuica para nopa ofrenda quema
niajsiti para amo monequis anquisentilise san ipan se tlatoctzi.
\v 3 Huan nojquiya ama xiquintlapejpenica nopa tlacame catli
anquinequij ma quihuicaca nopa tomi. Quej nopa quema niajsiti
nopona, niquintitlanis nopa tlacame ica amatlajcuiloli para
quihuicase nopa tomi hasta toicnihua catli tlaijiyohuíaj ipan
altepetl Jerusalén.
\v 4 Huan sintla quinamiqui para niyas nojquiya, huajca inijuanti
hueli yase nohuaya.
\s Pablo yas tlali Macedonia
\p
\v 5 Niyas nimechpaxaloti quema nimocuepas tlen tlali Macedonia pero
achtihui monequi niyas nopona.
\v 6 Huan huelis nimocahuas se quentzi tonali amohuaya. Nojquiya
huelis nimocahuas amohuaya hasta panos nopa metztli tlen
tlasesecayotl. Huan teipa huelis antechpalehuise ica catli monequi
ipan noojhui para campa monequi niyas.
\v 7 Pero amo nijnequi san nimechitztiquisati ama, pampa sintla
Tohueyiteco nechcahuilis, nijnequi nimocahuas amohuaya para se
quesqui tonati.
\v 8 Pero nijnequi nimocahuas nica ipan altepetl Éfeso ama hasta
tlamis nopa Ilhuitl Pentecostés.
\v 9 Pampa niquita Toteco nechmacatoc se hueyi tequitl nica huan
miyac masehualme quiselíaj nocamanal, masque nojquiya itztoque
miyac catli nechcualancaitaj.
\p
\v 10 Sintla Timoteo ajsis nopona campa amojuanti, xijselica ica
cuali pampa yaya quichihua itequi Toteco quen na nijchihua.
\v 11 Xiquitaca para nochi nopona ma quitlepanitaca. Nojquiya quema
Timoteo quisas nopona, xijpalehuica ica catli monequi huan
xijtitlanica ipan iojhui ica cuali, pampa nijchiya para ma ajsi nica
ininhuaya sequinoc catli hualase ihuaya.
\p
\v 12 Miyacpa niquilhui toicni Apolos para ma yohui ininhuaya nopa
sequinoc catli yohuij campa amojuanti, pero amo quinequi yas
amantzi. Yaya yas anmechitati quema huelis.
\s Pablo quinnahuatijtejqui
\p
\v 13 Xitlachixtoca. Xiitztoca antemachme ipan catli anquineltocaj
tlen Toteco. Ximoneltlalica quen tlacame catli quipiyaj fuerza huan
ximotetilica.
\v 14 Huan nochi catli anquichihuaj, xijchihuaca ica
tlaicnelijcayotl.
\p
\v 15 Anquimatij Estéfanas huan ichampoyohua elque catli achtihui
quineltocaque Tohueyiteco ipan amotlal Acaya. Huan ama inijuanti
motemacatoque para quinpalehuise imasehualhua Toteco.
\v 16 Huajca nijnequi xiquincahuilica ma anmechyacanaca inijuanti
huan sequinoc catli cuali quichihuaj itequi Toteco quen inijuanti
quichihuaj.
\v 17 Ninelpaqui pampa ya ajsicoj nica Estéfanas, Fortunato, huan
Acaico. Inijuanti nechpalehuijtoque ica nopa catli amojuanti amo
anhuelij anquichihuaj pampa amo anaquiyayaj.
\v 18 Inijuanti nechyolchicajtoque quen anmechyolchicajtoque
amojuanti. Xiquintlepanitaca tlacame catli quichihuaj quen
inijuanti.
\p
\v 19 Tlaneltocani ipan tiopame catli mosentilíaj campa hueli ipan
tlali Asia anmechontlajpalohuaj. Huan Aquila huan Priscila huan nopa
tiopamitl tlen tlaneltocani catli mosentilíaj ipan ininchaj
nojquiya anmechontlajpalohuaj miyac ipan Tohueyiteco.
\v 20 Nochi toicnihua nica nojquiya anmechontlajpalohuaj.
Ximotlajpaloca se ica seyoc huan ximotzoponica ica se
tlatlepanitacayotl catli tlatzejtzeloltic pampa anmoicnelíaj ipan
Toteco.
\p
\v 21 Na niPablo nimechtlajcuilhuía ni camanali nica ica nomax para
nimechtlajpalos.
\p
\v 22 Sintla se amo quiicnelía Tohueyiteco, ma itzto tlatelchihuali
para nochipa. Ma huala Tohueyiteco.
\p
\v 23 Tohueyiteco Jesucristo ma quipiya hueyi iyolo ica amojuanti.
\v 24 Nimechicnelía nochi amojuanti catli anmotlatzquilijtoque ipan
Tohueyiteco Cristo Jesús. Quej nopa ma eli.