\id GAL
\h GÁLATAS
\mt Nopa Amatlajcuiloli catli Pablo Quintlajcuilhui Tlaneltocani
ipan Tlali Galacia
\c 1
\s Pablo quintlajcuilhui tlaneltocani ipan tlali Galacia
\p
\v 1 Na niPablo, niitlayolmelajca Jesucristo nimechtlajcuilhuía.
Amo nechtequitlalijque masehualme para nielis niitlayolmelajca
Jesucristo, niyon amo nechilhuijque sequinoc quema Toteco
nechtequitlali. Nechtequimacaque Jesucristo huan Toteco Totata catli
quiyolcuic Jesús quema mictoya.
\v 2 Na huan nochi toicnihua ipan Cristo catli itztoque nica nohuaya
timechtlajpalohuaj amojuanti catli anitztoque ipan itiopahua Toteco
ipan tlali Galacia.
\v 3 Toteco Totata huan Toteco Jesucristo ma quipiyaca hueyi
ininyolo ica amojuanti huan ma anmechmacaca tlasehuilistli ipan
amoyolo.
\v 4 Jesucristo motemacac huan mijqui para techmaquixtis tlen
totlajtlacolhua huan para techmajcahualtis tlen catli amo cuali
catli onca ipan ni tonali pampa ya ni elqui ipaquilis Toteco Totata
para ma quichihua.
\v 5 Huajca ma tijhueyimatica Toteco nochi tonali para nochipa.
¡Quej nopa ma eli!
\s Amo onca seyoc tlamachtilistli catli huelis techtlajtlacolquixtis
\p
\v 6 Nelía amo hueli nijneltoca para nimantzi anquicajtejque Toteco
catli quipiya hueyi iyolo ica amojuanti ipan Jesucristo huan catli
anmechnotzqui para aniaxcahua. Ama ya anquitoquilíaj seyoc
tlamantli tlamachtilistli catli amo quen catli nimechilhui huan
anmoilhuíaj ya nopa anmechtlajtlacolquixtis.
\v 7 Pero amo neli onca seyoc tlamachtilistli catli huelis
anmechtlajtlacolquixtis. Pero itztoque sequin tlacame catli san
anmechcuapolhuilíaj amotlalnamiquilis, huan quinequij quipatlase
nopa cuali camanali tlen Cristo.
\v 8 Sintla aqui hueli masehuali anmechilhuis seyoc tlamachtilistli
huan quiijtos para huelis anmechtlajtlacolquixtis, ma quiajsi ihueyi
cualancayo Toteco. Quena, masque na niyasquía campa amojuanti o
masque se itequihua Toteco hualasquía tlen ilhuicac huan
anmechmachtisquía seyoc tlamachtilistli huan amo ya catli
timechmachtijtoque, ma quiajsi ihueyi cualancayo Toteco.
\v 9 Sempa nimechilhuía catli ya nimechilhuijtoc. Sintla se acajya
anmechilhuis seyoc tlamachtilistli catli amo ya nopa catli
anquiselijtoque, ma quiajsi ihueyi cualancayo Toteco.
\p
\v 10 Amo nimechilhuía ya ni pampa nijnequi nimechpactis, o
nijnequi ma nechcualitaca masehualme. Nimechilhuía ni pampa
nijnequi nijpactis Toteco Dios. Sintla nijtemosquía ma
nechcualitaca masehualme, huajca ayacmo niitztosquía
niitequipanojca Cristo.
\s Quenicatza Pablo mochijqui itlayolmelajca Toteco
\p
\v 11 Noicnihua, nijnequi xijmatica para nopa cuali camanali catli
nimechilhuijtoc amo san masehualme quisencajtoque ica
inintlalnamiquilis.
\v 12 Amo elqui se masehuali catli nechilhui nopa cuali camanali,
elqui Jesucristo catli nechnextili.
\p
\v 13 Ya anquicactoque quen eltoya nonemilis achtihuiya quema
nijtoquiliyaya toisraelita tlamachtil. Anquicactoque quenicatza
tlahuel niquintlatzacuiltiyaya nochi catli quineltocayayaj
Tohueyiteco. Quena, nijnequiyaya niquinsemanas nochi catli itztoyaj
ipan itiopa Toteco.
\v 14 Tlen nochi israelitame ipan notlal catli nohuaya moscaltiyayaj
na nielqui catli más nimomachti toisraelita tlamachtil. Huan ica
nochi noyolo nijchijqui campica para nijchihuas senquistoc nochi
catli quiijtohua inintlamachtil tohuejcapan tatahua.
\v 15 Pero Toteco ya nechiyocatlalijtoya para nielis
niitlayolmelajca quema ayamo nitlacatiyaya, huan yaya nechnotzqui
pampa quipixqui hueyi iyolo nohuaya.
\v 16 Huan nechnextili Icone Cristo huan nechtequimacac para ma
niquinilhui masehualme catli amo israelitame tlen Cristo. Huan quema
monextijtoya ica na, amo niyajqui nijcamanalhuiti se masehuali para
ma nechconsejomaca tlaque nijchihuasquía.
\v 17 Niyon amo niyajqui ipan hueyi altepetl Jerusalén para
niquinitati nopa tlayolmelahuani catli Toteco quinnotzqui quema
ayamo nijneltocayaya. Niyajqui huejca hasta tlali Arabia para
niitztos noseltzi. Huan más teipa quema niquisqui Arabia, sempa
nimocuepqui ipan altepetl Damasco.
\p
\v 18 Amo niyajqui Jerusalén hasta ya panotoya eyi xihuitl. Huajca
quena, niyajqui niquitato Pedro huan nimocajqui ome semana ihuaya.
\v 19 Pero nopa sequinoc itlayolmelajcahua Toteco, amo niquinitac.
San niquitac Jacobo, iicni teipan ejquetl Tohueyiteco Jesús.
\v 20 Toteco quimati xitlahuac nochi catli nimechtlajcuilhuijtoc
nica huan amo niistlacati.
\p
\v 21 Teipa niyajqui ipan tlali Siria huan tlali Cilicia.
\v 22 Pero nopa tiopame tlen tlaneltocani catli mosentilíaj campa
hueli ipan tlali Judea noja ayamo quema nechitztoyaj.
\v 23 Inijuanti san quicajque quiijtohuaj para nopa tlacatl catli
achtihuiya quintlatzacuiltiyaya huan quinequiyaya quitlamiltis nopa
tlamachtili tlen Jesucristo catli inijuanti quineltocaj, ama
quinilhuiyaya nochi masehualme para ma quineltocaca Jesucristo.
\v 24 Huajca nochi inijuanti quihueyimatiyayaj Toteco pampa
quipatlatoya nonemilis.
\c 2
\s Sequinoc itlayolmelajcahua Toteco quiselijtoyaj Pablo
\p
\v 1 Huan teipa quema ya panotoya seyoc catorce xihuitl, sempa
niyajqui altepetl Jerusalén ihuaya Bernabé. Huan nojquiya
nijhuicac Tito.
\v 2 Niyajqui pampa Toteco nechnextili ma niya. Huan quema niitztoya
nepa, nimosentili ininhuaya nopa tlayacanani tlen tlaneltocani para
huelqui ticamanaltique san tojuanti. Nijnequiyaya niquinilhuis nopa
cuali camanali catli niquinpohuiliyaya masehualme catli amo
israelitame para ma amo oncas se tlamantli catli techiyocatlalis.
Amo nijnejqui ma quisa san tlapic nochi catli tijchijtoque.
\v 3 Huan inijuanti quicualcajque catli nitlamachtiyaya. Huan amo
quiijtojque para Tito catli itztoya nohuaya ma motequilis nopa
machiyotl circuncisión, masque yaya se griego catli amo quiiximati
nopa tlamantli.
\v 4 Pejqui nopa tlalnamiquilistli para motequilisquíaj quema
hualajque sequin istlacatini catli quiijtojque para itztoyaj
tlaneltocani, pero amo neli. Inijuanti ichtacatzi pejque
quitlachilíaj tonemilis huan quiitaque quenicatza Cristo Jesús
techmajcahualtijtoya tlen itlanahuatilhua Moisés. Huajca
quinequiyayaj techchihuase quen tiinintequipanojcahua para ma
tiquintoquilica itlanahuatilhua Moisés huan ma tiquinfuerzajhuica
nochi tlacame catli amo israelitame ma motequilica nopa machiyotl
catli itoca circuncisión ipan inintlacayo.
\v 5 Pero niyon se tlatoctzi amo tiquintlacaquilijque. Pampa
tijnejque para amojuanti catli amo anisraelitame san xijmatica ya ni
catli melahuac. Toteco quimaquixtía aqui hueli catli quineltoca
Cristo, huan amo monequi motequilis itlacayo.
\p
\v 6 Huan nopa tlayacanani tlen tlaneltocani amo nechilhuijque niyon
se tlamachtilistli catli yancuic para ma niquinilhui masehualme.
(Para na amo tleno ipati sintla miyac masehualme quiniximatij para
huejhueyi tlayacanani, pampa iixpa Toteco san se topati.)
\v 7 Pero nima nopa tlayacanani quiitaque para Toteco
nechtequimacatoya ma niquinilhui masehualme catli amo israelitame
quenicatza Toteco tetlajtlacolquixtía, quen quitequimacatoya Pedro
ma quinilhui israelitame.
\v 8 Quena, san se Toteco catli quititlanqui Pedro quen
itlayolmelajca ica israelitame, nechtitlantoc na nielis
niitlayolmelajca ica masehualme catli amo israelitame.
\p
\v 9 Quema Jacobo, Pedro huan Juan catli más tlaiximatilme
momacaque cuenta nopa tequitl huan tlatiochihualistli catli Toteco
nechmacatoya, sempa nechmatlajpalojque huan quimatlajpalojque
Bernabé quen se tlanextilijcayotl para techselijque quen tiicnime
catli san sejco ica inijuanti tijchihuaj itequi Toteco. Quiijtojque
para Bernabé huan naya ma tiyaca ica masehualme catli amo
israelitame huan inijuanti ica israelitame.
\v 10 Nojquiya nechilhuijque ma tiquelnamiquica tiquinpalehuise
catli pilteicneltzitzi quen nochipa tijchihuaj campica tijchihuase.
\s Pablo quiajhuac Pedro nepa Antioquía
\p
\v 11 Pero teipa, quema Pedro ajsico altepetl Antioquía, monejqui
niquixcoilhuis tlamiyacapa pampa quichihuayaya catli amo cuali.
\v 12 Achtihui tlacuayaya ininhuaya tlaneltocani catli amo
israelitame catli amo quipiyaj nopa machiyotl san se quen tlacuayaya
ininhuaya catli israelitame. Pero teipa, ajsicoj se ome israelita
tlacame catli ihuampoyohua Jacobo catli quinequiyayaj nochi tlaca
tlaneltocani catli amo israelitame ma motequilica nopa machiyotl
para momaquixtise. Huajca Pedro quinimacasqui nopa tlacame catli
ajsicoj huan pejqui moiyocacahua tlen tlaneltocani catli amo
israelitame, huan ayacmo tlacuayaya ininhuaya.
\v 13 Teipa nojquiya moijixpatlaque nopa sequinoc israelita
tlaneltocani catli itztoyaj nepa pampa no moiyocacajque tlen
tlaneltocani catli amo israelitame. Hasta Bernabé nojquiya
moiyocacajqui tlen catli amo israelitame quen Pedro quichihuayaya.
\v 14 Huajca quema niquitac Pedro amo nejnemiyaya xitlahuac quen
quiijtohua icamanal Toteco, nicajhuac. Iniixpa nochi nopa
tlaneltocani, niquilhui: “Xijcaqui Pedro, ta tiisraelita tlacatl
huan mitztequilijtoque motlacayo, pero ama tinejnemi quen se
masehuali catli amo israelita pampa ayacmo tijtoquilía sequinoc
tlamantli catli quiijtohuaj itlanahuatilhua Moisés. Huajca, ¿para
tlen ama tijnequi ni tlacame catli amo israelitame ma nejnemica quen
israelitame? Amo xitlahuac catli tijchihua.”
\s Toteco quintlajtlacolquixtilía nochi catli quineltocaj
\p
\v 15 Tojuanti tiisraelitame hasta quema titlacatque. Amo
“titlajtlacolchihuani” quen quinnotzaj masehualme catli amo
israelitame.
\v 16 Pero tiisraelita tlaneltocani ya timomacatoque cuenta para amo
aqui hueli mochihuas xitlahuac iixpa Toteco pampa quintoquilía
itlanahuatilhua Moisés. Ya tijmachilíaj para san catli quineltoca
Jesucristo itztose xitlahuaque iixpa. Yeca tojuanti nojquiya
tijneltocaque Jesucristo para Toteco Dios ma techchihua
tixitlahuaque iixpa pampa tijneltocatoque ya. Tiquitaque amo tleno
eliyaya ipati ajqueya quintoquiliyaya itlanahuatilhua Moisés huan
ajqueya amo, pampa amo aqui huelis mochihuas xitlahuac iixpa Toteco
pampa quintoquilía nopa tlanahuatilme.
\p
\v 17 Huan sintla tijneltocatoque Cristo para techchihuas
tixitlahuaque iixpa Toteco, huan timopantíaj para tiisraelitame
nojquiya titlajtlacolchihuani iixpa Toteco, ¿huelis tiquijtose
Cristo techchijqui titlajtlacolchihuani? ¡Amo! Amo quej nopa
ximoilhuica.
\v 18 Pero sintla nipehuasquía nitlamachtis para masehualme hueli
momaquixtisquíaj tlen inintlajtlacolhua sintla quitoquilisquíaj se
tlanahuatili catli ayacmo quipiya chicahualistli, huajca quena,
nimochihua nitlaixpanoquetl.
\v 19 Pampa ica na, masque miyac nimomachti huan nijchijqui campica
niquintoquilis itlanahuatilhua Moisés, niquitac para nopa
tlanahuatilme amo quema huelqui nechchihua nixitlahuac iixpa Toteco,
pampa amo nihuelqui nijtlamichihua catli quiijtohuaj. Nopa
tlanahuatilme ayacmo quinnahuatíaj catli mictoque, huan huajca
nimochijtoc quen se nimijcatzi para nopa tlanahuatilme ma ayacmo
nechnahuatise. Nijchijqui ni para huelis niyoltos para Cristo.
\v 20 Nelía nechcuamapeloltijque ihuaya Cristo huan nepa nimijqui.
Huan yeca ama na ayacmo niitztoc, pero quena, ama Cristo itztoc ipan
na. Huan ni nemilistli catli ama nijpiya huala pampa nijneltoca
Icone Toteco catli nechicneli huan motemactili huan mijqui por na.
\v 21 Niquita tlahuel hueyi ipati catli Toteco quichijqui quema
techtlasojtlac huan quititlanqui Cristo ma miqui por tojuanti, huan
na amo nijhuejcamajcahua catli quichijtoc. Sintla itlanahuatilhua
Moisés catli tiisraelitame tiquintoquiliyayaj techchijtosquíaj
tixitlahuaque iixpa Toteco huan techmaquixtijtosquíaj, huajca san
tlapic mictosquía Cristo.
\c 3
\s Xijtlapejpenica itlanahuatilhua Moisés o Cristo
\p
\v 1 ¡Nelía anhuihuitique amojuanti catli anGálata ehuani!
¿Ajqueya anmechcajcayajtoc para ayacmo xijneltocaca catli melahuac?
Tlanemijya nimechilhui quen inijuanti quicuamapeloltijque Jesucristo
quema niitztoya amoixpa.
\v 2 San se tlamantli nimechtlatzintoquilis. ¿Toteco anmechmacac
Itonal pampa anquintoquilijque itlanahuatilhua Moisés? ¡Amo!
Itonal Toteco hualajqui ipan amoyolo quema anquicajque catli
Jesucristo anmechchihuilijtoya huan anmotemachijque ipan ya para ma
anmechmaquixti.
\v 3 Huajca amo ximohuihuichihuaca. Sintla monequiyaya Itonal Toteco
para anmechmacas nemilistli catli yancuic pampa nopa tlanahuatilme
amo huelqui, amo ximoilhuica para huelis anquisencahuase achi cuali
itequi Toteco san ica amofuerza pampa sempa anquichihuaj campica
anquintoquilise nopa tlanahuatilme.
\v 4 Ya antlaijiyohuijtoque miyac pampa anquineltocaj Cristo. ¿Huan
anmoilhuíaj para antlaijiyohuijtoque san tlapic? ¡Amo! Na nijmati
para amo san tlapic.
\v 5 Nimechtlatzintoquilía: ¿Toteco anmechmacac Itonal huan
quichijqui hueyi tiochicahual nextili nepa amoixpa pampa
anquintoquilijque itlanahuatilhua Moisés? ¡Amo! Anquimatij Toteco
quichijqui nopa tlamantli pampa anquicajque icamanal Toteco huan
anquineltocaque.
\p
\v 6 Eltoc quen ijcuilijtoc ipan Icamanal Toteco campa quiijtohua:
“Abraham quineltocac Toteco, huan yeca Toteco quiitac para itztoc
xitlahuac iixpa.”
\v 7 Huajca monequi xijmachilica para nochi nopa masehualme catli
quineltocaj Toteco, inijuanti itztoque catli nelía iconehua
Abraham.
\v 8 Tlen huejcajya mocajtoc ijcuilijtoc ipan Icamanal Toteco
quenicatza miyac xihuitl teipa Toteco quinchihuasquía masehualme
catli amo israelitame xitlahuaque iixpa sintla quineltocasquíaj.
Huan Toteco Dios quiilhui Abraham ya ni quema quiijto: “Ica ta,
Abraham, niquintiochihuas nochi tlamantli masehualme catli itztoque
ipan campa hueli tlali ipan tlaltipactli.”
\v 9 Quena, nochi catli motemachise ipan Cristo, Toteco
quintiochihuas quen Toteco quitiochijqui Abraham por
itlaneltoquilis.
\p
\v 10 Pero nochi masehualme catli quintoquilíaj itlanahuatilhua
Moisés para momaquixtise, quipantise ihueyi cualancayo Toteco pampa
amo huelij quichihuaj nochi catli quiijtohuaj nopa tlanahuatilme.
Huan ijcuilijtoc ipan Icamanal Toteco campa quiijtohua:
“Tlatelchihualtique nochi masehualme catli amo quichihuaj
senquistoc nochi catli ijcuilijtoc ipan ni tlanahuatilme.”
\v 11 Huajca tlanemijya nesi para Toteco Dios amo quinita masehualme
xitlahuaque iixpa pampa quitoquilíaj itlanahuatilhua Moisés.
Icamanal Toteco quiijtohua: “Se catli itztoc xitlahuac iixpa
Toteco, itztos para nochipa pampa quineltoca ya.”
\v 12 Ya ni nopa ojtli catli cuali. Quena, sintla se quineltocas
Toteco, yaya quimaquixtis tlen itlajtlacolhua. Pero se catli
quinequi quintoquilis itlanahuatilhua Moisés para momaquixtis
quipiya seyoc tlamantli tlalnamiquilistli. Pampa itlanahuatilhua
Moisés quiijtohuaj: “Catli quinequi quipantis nemilistli pampa
quintoquilía ni tlanahuatilme, monequi quitoquilis senquistoc nochi
catli quiijtohuaj.”
\p
\v 13 Pero Cristo tlaxtlajqui catli monequiyaya para techmaquixtis
tlen nopa tlatelchihuali catli nopa tlanahuatilme quiijtojque
techajsisquía. Quema yaya mijqui ipan cuamapeli por tojuanti, yaya
quiseli nopa tlatelchihuali catli techajsisquía, pampa Icamanal
Toteco quiijtohua: “Tlatelchihualtique nochi masehualme catli
quincuapilohuaj ipan cuamapeli.”
\v 14 Yeca ama ica catli Cristo Jesús quichijqui por tojuanti,
Toteco Dios hueli quintiochihuas nochi masehualme, hasta nojquiya
catli amo israelitame san se quen quitiochijqui Abraham. Huan quema
tojuanti tijneltocaj Toteco, tijselíaj Itonal Toteco catli yaya
techtencahuilijtoc para techmacas.
\s Itlanahuatilhua Moisés huan catli Toteco quitencahuili Abraham
\p
\v 15 Xiquitaca noicnihua. Nimechilhuis se nemachiltili para más
anquimachilise catli nimechilhuía. Quema masehualme quichihuaj se
camanal sencahuali ipan se amatl huan quifirmarohuaj, huajca quipiya
tlanahuatili. Huan amo aqui huelis moquixtis para amo
quitlamichihuas catli quitlajtolcajtoc quichihuas ipan nopa amatl.
Huan nojquiya amo aqui huelis quiixpolos catli quiijtohua, niyon
quitlalis más tlamantli ipan nopa amatl.
\v 16 Nojquiya Toteco quichijqui se camanal sencahuali huejcajya
catli quiijto catli quichihuas para Abraham huan se iteipa ixhui.
Pero nopa camanal sencahuali amo quiijto: “Abraham huan iteipa
ixhuihua”, quen camanaltisquía tlen miyac iteipa ixhuihua. ¡Amo!
Nopa camanal sencahuali quiijto: “Abraham huan iteipa ixhui.”
Quinequi quiijtos Abraham huan iteipa ixhui catli elqui Cristo.
\v 17 Huajca ya ni catli nimechilhuía: Toteco quichijqui nopa
camanal sencahuali ica Abraham huan quitencahuili quenicatza
quitiochihuasquía. Huajca itlanahuatilhua Moisés catli ajsicoj
teipa quema panotoya nahui ciento huan treinta xihuitl, amo huelqui
quisemanas nopa camanal sencahuali catli Toteco ya quichijtoya ica
Abraham.
\v 18 Huan sintla Abraham monectosquía quintoquilis itlanahuatilhua
Moisés para quiselijtosquía nopa tlatiochihualistli catli Toteco
quitencahuili quimacasquía, amo hueltosquía quiselijtosquía,
pampa ayamo oncayayaj itlanahuatilhua Moisés para quintoquilis.
Pero Toteco quimacac Abraham nopa tlamantli san pampa quitencahuili
quimacas.
\p
\v 19 Huajca, ¿para tlen hualajque itlanahuatilhua Moisés?
¡Xitlacaquica! Toteco temacac nopa tlanahuatilme para quinnextilis
masehualme quesqui tlajtlacoli quichihuayayaj huan quesqui
tlajtlacoli quipiyayayaj iixpa Toteco. Pero nopa tlanahuatilme san
quipixque inintequi hasta tlacatisquía Cristo, yaya catli iteipa
ixhui Abraham catli Toteco quitencajqui para quitiochihuas. Nojquiya
amo san se ipati nopa tlanahuatilme huan Cristo. Pampa Toteco
quinmacac israelitame nopa tlanahuatilme ica itequihua catli teipa
quimacac Moisés. Huajca itequihua huan Moisés motlajcoquetztoyaj
ica Toteco huan masehualme.
\v 20 Pero amo aqui monequi motlajcoquetzas quema se quitencahuas
iseltzi para quimacas seyoc se tlamantli. Huan amo aqui
motlajcoquetzqui quema Toteco iseltzi quitencahuili Abraham catli
quimacasquía.
\s Itlanahuatilhua Moisés eltoya quen totlamachtijca
\p
\v 21 Huajca amo ximoilhuica para itlanahuatilhua Moisés
quitlamiltijque nopa catli Toteco quitencahuili Abraham para
quimacasquía. ¡Amo! Toteco temacac nopa tlanahuatilme huan nopa
tlatencahuali huan nochi ome quipiyaj inintequi, huan amo elqui
inintequi nopa tlanahuatilme para techmacas nemilistli. Sintla
Toteco techmacatosquía tlanahuatilme catli temacatosquíaj
nemilistli para nochipa, huajca tiquintoquilijtosquíaj nopa
tlanahuatilme, huan techchijtosquía tixitlahuaque iixpa Toteco.
\v 22 Pero Icamanal Toteco quiijtohua para nochi timasehualme
tiilpitoque ipan tlajtlacolotl, huan san hueli timomaquixtise tlen
totlajtlacolhua sintla tijneltocase Jesucristo.
\p
\v 23 Huejcajya quema ayamo hualayaya Cristo para ma tijneltocaca,
itlanahuatilhua Moisés techilpiyayaj huan techyahualtzacuayaya
tiisraelitame. Huan quej nopa elqui hasta ajsic hora para Toteco
technextili ma tijneltocaca Cristo.
\v 24 Huajca itlanahuatilhua Moisés eltoyaj quen nopa
tetequipanojquetl ipan techaj catli quipiya itequi para
quinmocuitlahuis huan quintlalnamictis nopa coneme hasta mochihuase
huejhueyi. O ica tojuanti elqui hasta hualajqui Cristo catli nelía
huelqui techchihuas tixitlahuaque iixpa Toteco.
\v 25 Pero ama, pampa ya ajsico Cristo para ma tijneltocaca, ayacmo
tiitztoque imaco nopa tetequipanojquetl catli elque itlanahuatilhua
Moisés, pampa ayacmo quipiyaj inintequi ica tojuanti.
\p
\v 26 Huajca ama nochi amojuanti aniconehua Toteco pampa
anquineltocatoque Cristo Jesús.
\v 27 Huan Itonal Toteco techtlatzquiltijtoc nochi tojuanti ipan
Cristo, huan techchijtoc ma tiitztoca quen Cristo.
\v 28 Huan Toteco ayacmo techita quen titlacame, tisihuame,
titecojme, titetequipanohuani, tiisraelitame, o catli amo
tiisraelitame, pampa nochi san se tiitztoque ipan Cristo.
\v 29 Ama sintla aniaxcahua Cristo, huajca nelnelía aniteipa
ixhuihua Abraham. Huan yeca nojquiya anquiselise catli Toteco
quitencahuili Abraham.
\c 4
\p
\v 1 Ximoilhuica tlen ni nemachiltili catli nimechilhuis. Ma
tijtlalica para se tlacatl catli tlapijpixtoc miquis huan
quicajtehuas miyac tlamantli para ipilcone. Pero masque nelía nochi
iaxca nopa ipilcone, yaya mocahua quen se tetequipanojquetl pampa
noja tziquitetzi.
\v 2 Huan mojmostla monequi quinneltoquilis nopa tetequipanohuani
catli quimocuitlahuíaj hasta moscaltis huan quiaxitis nopa xihuitl
catli quiijto itata para quiselis nochi catli iaxca.
\v 3 Quej nopa nojquiya eltoya ica tojuanti quema ayamo hualayaya
Cristo. Tiitztoyaj quen tipilconetzitzi huan titetequipanohuani
catli tijtoquiliyayaj inintlalnamiquilis ajacame catli itztoque ipan
ni tlaltipactli.
\v 4 Pero quema ajsic nopa hora catli Toteco Dios quiixquetztoya,
yaya quititlanqui Icone catli quitlacatilti se israelita sihuatl
catli quintlepanitac itlanahuatilhua Moisés pampa nopa
tlanahuatilme quipixqui tlanahuatili ica ya.
\v 5 Toteco quititlanqui Icone para techcohuas para tiiaxcahua huan
para techmajcahualtis tlen itlanahuatilhua Moisés para quej nopa
Toteco ma techseli quen tiiconehua.
\p
\v 6 Huajca ama nochi tojuanti timochijtoque tiiconehua Toteco, huan
yeca Toteco techmacatoc Itonal Icone ipan toyolo. Huan ama
tiquijtohuaj: “Papá”, quema tijnotzaj Toteco Dios pampa tlahuel
tiquicnelíaj.
\v 7 Huajca ayacmo tiitztoque quen titetequipanohuani. Ama
tiiconehua Toteco catli timoscaltijtoque. Huan pampa tiiconehua
catli timoscaltijque, nojquiya tijselise nochi catli Toteco
quicualtlalijtoc para quinmacas iconehua. Huan tijselise nochi por
catli Cristo techchihuilijtoc.
\s Pablo motequipacho por nopa tlaneltocani
\p
\v 8 Achtihuiya quema ayamo anquiiximatiyayaj Toteco, amojuanti
catli amo anisraelitame anquintequipanohuayayaj totiotzitzi catli
masehualme quinchijtoque catli amo neli Dios.
\v 9 Pero ama ya anquiiximatij Toteco o más xitlahuac tiquijtose,
Toteco ya anmechiximati, ¿quenque anquinequij anquicajtehuase
Toteco para sempa anmochihuase inintequipanojcahua catli
chicahualisyojque ipan ni tlaltipactli catli ayacmo quipiyaj tetili?
\v 10 Ama anquichihuaj campica para anquintoquilise nopa
tlanahuatilme pampa anilhuichihuaj quema yancuic metztli, huan quema
sesen tlamantli ipohual, huan quema yancuic xihuitl, huan quema onca
israelita ilhuitl, pampa anmoilhuíaj quej nopa anquipactise Toteco.
\v 11 Nelía chicahuac nitequititoc para nimechmachtis catli
melahuac, huan ama nimomajmatía miyac pampa huelis san tlapic
notequi ica amojuanti.
\p
\v 12 Noicnihua, nimechtlajtlanía chicahuac para xiquincajtehuaca
itlanahuatilhua Moisés quen na nijchijtoc. Ama ayacmo nechilpíaj
nopa tlanahuatilme. Ninemi iyoca tlen nopa tlanahuatilme quen
nojquiya achtihuiya amojuanti aneliyayaj iyoca pampa amo
anisraelitame. Nochipa antechchihuilijtoque catli cuali huan nijmati
antechtlacaquilise.
\v 13 Anquimatij quema achtihui niyajqui nimechilhuito icamanal
Toteco, eltoya pampa nimococohuayaya.
\v 14 Pero masque nitlaijiyohuiyaya ica se cocolistli catli fiero,
amo antechijixque huan amo antechhuejcamajcajque, pero
antechselijque quen anquiselisquíaj se itequihua Toteco. Quena,
quen anquiselisquíaj Cristo Jesús iseltzi, antechselijque.
\v 15 ¿Canque yajqui nopa paquilistli catli anquipixque quema
nimechcamanalhuito achtihuiya? Nelía sintla anhueltosquíaj,
anmoquixtilijtosquíaj amoixteyolhua huan antechmacatosquíaj para
nimochicajtosquía.
\v 16 Pero ama, huelis nimochijtoc niamocualancaitaca pampa
nimechilhuía catli melahuac.
\p
\v 17 Nopa tlacame catli tlamachtíaj nopa tlamachtilistli catli amo
xitlahuac mochihuaj quen amohuampoyohua, pero amo neli quinequij
mohuampoxchihuase amohuaya para elis cuali para amojuanti. San
quinequij anmechiyocatlalise tlen na para ma xiquintoquilica huan
xijtlacaquilica inintlamachtil.
\v 18 Cuali sintla sequinoc quinequij elise amohuampoyohua masque
niitztoc amohuaya o amo, sintla nelnelía quinequij anmechchihuilise
catli cuali.
\v 19 Annopilconehua catli nimechicnelía. Sempa nitlaijiyohuía ica
amojuanti quen se sihuatl catli quitlacatiltía icone. Huan
nitlaijiyohuis hasta nopa tonal quema amonemilis nesis quen inemilis
Cristo.
\v 20 Nelía tlahuel nijnequi niitztosquía nepa amohuaya para
nimechcamanalhuis ica notoscac catli cuali, pero ama nelía
nimotequipachohua huan amo nijmati tlaque nimechilhuis.
\s Agar huan Sara
\p
\v 21 Techilhuica ya ni, amojuanti catli anquinequij anquitoquilise
nochi catli quiijtohuaj itlanahuatilhua Moisés. ¿Nelía
anquimachilíaj catli quiijtohuaj nopa tlanahuatilme? ¡Huelis amo!
\v 22 Icamanal Toteco techilhuía para Abraham quinpixqui ome
ioquichpilhua. Se ioquichpil quipixqui ica inelsihua huan seyoc
quipixqui ica se isihua tequipanojca catli quicojtoya.
\v 23 Nopa sihua tetequipanojquetl quipixqui cuali itlacayo huan
yeca nimantzi conepixqui. Pero inelsihua Abraham eltoya tetzacatl
huan amo hueliyaya conepiya. Pero teipa, masque ya nanatzi tlacatqui
icone ica ichicahualis Toteco pampa Toteco quitencahuilijtoya
Abraham para tlacatisquía.
\p
\v 24 Huelis tiquijtose para nopa ome sihuame quinextía nopa ome
camanal sencahuali catli Toteco quisencajtoc ica masehualme. Nopa
sihua tetequipanojquetl catli itoca Agar quinextía nopa camanal
sencahuali catli Toteco quichijqui ica israelitame ipan tepetl
Sinaí quema quinmacac itlanahuatilhua Moisés huan nochi mochijque
tetequipanohuani para quintoquilise nopa tlanahuatilme.
\v 25 Quena, Agar itequipanojca Abraham quinextía israelitame catli
huejcajya itztoyaj ipan tepetl Sinaí ipan tlali Arabia huan nopa
israelitame catli ama itztoque ipan nopa hueyi altepetl Jerusalén
nica ipan ni tlaltipactli. Nochi ni masehualme quintoquilíaj
itlanahuatilhua Moisés huan itztoque quen tetequipanohuani catli
ilpitoque ipan nopa tlanahuatilme.
\v 26 Pero tojuanti catli tijneltocaj Cristo tiehuani ipan nopa
yancuic Jerusalén catli temos tlen ilhuicac. Huan Sara inelsihua
Abraham catli amo elqui tetequipanojquetl, itztoc tonana tojuanti
catli amo tiquintoquilíaj itlanahuatilhua Moisés.
\v 27 Huan ijcuilijtoc ipan Icamanal Toteco quenicatza ichicahualis
hueli quipatla inemilis se tetzacatl. Quiijtohua:
\q “Ta tisihua tetzacatl, xipaqui.
\q Masque amo quema tlacatqui mocone, xijpiya paquilistli.
\q Pampa masque ama amo tiquinpiya moconehua,
\q teipa tiquinpiyas más moconehua que sequinoc sihuame.”
\p
\v 28 Huajca ama noicnihua, tiitztoque quen Isaac catli Toteco
quitencahuili Abraham para tlacatisquía masque isihua amo huelqui
conepiya. Huan na huan amojuanti tiiconehua Toteco pampa yaya
quitencajqui techchihuas tiiconehua sintla tijneltocasquíaj
Jesucristo.
\v 29 Huan quen huejcajya icone Agar, nopa tetequipanojquetl,
quitlaijiyohuilti nopa oquichpil Isaac catli Itonal Toteco
quitlacatilti, ama nojquiya inijuanti catli quinequij ma
tiquintoquilica itlanahuatilhua Moisés techtlaijiyohuiltíaj
tojuanti catli Itonal Toteco techtlacatilti.
\v 30 Pero Icamanal Toteco techilhuía san se quen Toteco quiilhui
Abraham huejcajya: “Xijtojtoca Agar, nopa sihua tetequipanojquetl
ihuaya ioquichpil, pampa ioquichpil nopa sihuatl catli
motequipanojca amo huelis quiselis catli ta tijcajtehuas. San
quiselis mocone Isaac catli Sara mosihua quitlacatilti.”
\v 31 Huajca noicnihua, amo tiitztoque quen tiiconehua nopa sihua
tetequipanojquetl catli iaxca iteco. Tojuanti tiiconehua Sara catli
eltoya majcajtoc.
\c 5
\s Xijtoquilica catli anmechmajcahualtis tlen nopa tlanahuatilme
\p
\v 1 Cristo techmajcahualti para ma tielica masehualme catli
timajcajtoque. Amo quinequi ma tiitztoca titetequipanohuani catli
tiilpitoque. Huajca ximotetilica huan amo xijcahuilica ma sempa
anmechilpica itlanahuatilhua Moisés.
\p
\v 2 Xijtlacaquilica catli na niPablo nimechilhuía. Sintla
antlacame anmotzontequilíaj iyecapa cuetlaxo amotlacayo pampa
anmoilhuíaj para ica ya nopa Toteco anmechtlajtlacolquixtis tlen
amotlajtlacolhua, huajca amo tleno ipati Cristo para amojuanti.
\v 3 Sempa nimechyolmelahua, sintla anmotequilise nopa machiyotl
ipan amotlacayo pampa anmoilhuíaj por nopa Toteco anmechcualitas,
huajca monequi anquichihuase senquistoc nochi catli quiijtohuaj
itlanahuatilhua Moisés.
\v 4 Quena, sintla anmoilhuíaj monequi anquintoquilise nopa
tlanahuatilme para anelise anxitlahuaque iixpa Toteco, ya
anmohuejcatlalijtoque tlen Cristo catli quipiya hueyi iyolo ica
tojuanti.
\v 5 Pero tojuanti catli timotemachíaj ipan Cristo, ica miyac
paquilistli huan ica itlapalehuil Itonal Toteco timochiyaj hasta
nopa tonal quema yaya techchihuas senquistoc tixitlahuaque iixpa.
\v 6 Para tojuanti catli titlatzquitoque ipan Jesucristo, amo
quenijqui sintla techtequilijtoque totlacayo o amo. San ipati sintla
nelía tijneltocaj Cristo huan tiquinicnelíaj toicnihua.
\p
\v 7 Achtihuiya anmonejnemiltiyayaj cuali. ¿Ajqueya
anmechtzacuilijtoc para ayacmo anquitoquilijtiyohuij catli melahuac?
\v 8 Nopa tlalnamiquilistli catli anmechmacatoque, amo huala tlen
Toteco catli anmechnotztoc para anelise anmajcajtoque.
\v 9 Quemantic se masehuali catli fiero inemilis huelis
quincajcayahuas miyac masehualme. Eltoc quen nopa camanali catli
quiijtohua: “San se quentzi tlasonejcayotl quisonehuas miyac
pantzi.”
\v 10 Na nimotemachía ipan Tohueyiteco para anmechpalehuis para
ayacmo ximoilhuica tlen nopa tlamachtilistli catli amo neli. Huan
Toteco quitlatzacuiltis aqui hueli masehuali catli quinequis
anmechcajcayahuas.
\p
\v 11 Sintla niquinilhuisquía masehualme catli amo israelitame para
monequi motequilise inintlacayo para Toteco quinselisquía, amo aqui
nechcualancaitasquía. Pero nechcualancaitaj miyac israelitame pampa
nitlamachtía para Toteco quinmaquixtía masehualme san pampa Jesús
mijqui ipan icuamapel por inijuanti.
\v 12 Cuali elisquía sintla inijuanti catli quinequij
ximotzontequilica amotlacayo, ma motzontequilisquíaj inijuanti
inintlacayo hasta mocaparosquíaj.
\p
\v 13 Noicnihua, Toteco anmechnotzqui para anmechchihuas
anmajcajtoque. Pero masque anmajcajtoque, amo xijtoquilica
amotlacayo catli quinequi tlajtlacolchihuas. Pero ximotequipanoca se
ica seyoc pampa anmoicnelíaj.
\v 14 Quena, nochi itlanahuatilhua Moisés eltoc ipan ni camanali:
“Xiquinicneli sequinoc quen timoicnelía.”
\v 15 Pero sintla amojuanti anmonajnanquilíaj huan
anmoejelnamiquij, huajca ximomocuitlahuica para amo
anmotzontlamiltise.
\s Xinejnemica ica Itonal Toteco
\p
\v 16 Ya ni nimechilhuía: Ximonejnemiltica cuali ica itlapalehuil
huan ichicahualis Itonal Toteco huan amo anquitoquilise itlanequilis
amotlacayo catli quinequi tlajtlacolchihuas.
\v 17 Pampa itlanequilis amotlacayo quinequi xitlajtlacolchihuaca,
huan Itonal Toteco quinequi xijchihuaca catli cuali. Huajca quema
anquinequij anquichihuase se tlamantli, sesen ni ome anmechnojnotza
xijchihuaca quen sesen itlalnamiquilis. Huan sesen inijuanti
anmechhuilanaj quema anquinequij anquichihuase catli itlalnamiquilis
ne seyoc pampa ni ome mocualancaitaj.
\v 18 Huajca monequi xijcahuilica Itonal Toteco ma anmechyacana,
huan quej nopa ayacmo elis itlanahuatilhua Moisés catli quipiyase
tequiticayotl ipan amonemilis.
\p
\v 19 Tlanemijya nesi nopa fiero tlamantli catli masehualme
quichihuaj quema quitoquilíaj itlanequilis inintlacayo. Quichihuaj
tlen hueli ica catli amo ininnamic. Moilhuíaj miyac tlamantli catli
amo cuali. Quichihuaj catli fiero pampa ya nopa tlahuel quinequij
quichihuase.
\v 20 Quinhueyichihuaj catli masehualme quinchijtoque huan quinitaj
para dioses. Tetlajchihuíaj, tecualancaitaj, mosisiníaj, huan
techicoitaj. Nojquiya masehualme cualancahuejchihuaj,
monajnanquilíaj, motlajcoxelohuaj huan tlamachtíaj catli amo
xitlahuac.
\v 21 Masehualme quiixtocaj catli sequinoc quipiyaj, temictíaj,
moihuintíaj huan quichihuaj catli fiero pampa ihuintij. Huan
inijuanti catli quitoquilíaj itlanequilis inintlacayo quichihuaj
miyac más tlamantli catli eltoc quej ni tlamantli catli amo cuali.
Sempa nimechilhuía catli ya nimechilhuijtoc. Masehualme catli
quichijtinemij ni tlamantli catli amo cuali, amo huelis calaquise
campa tlanahuatía Toteco.
\p
\v 22 Pero quema tijpiyaj Itonal Toteco ipan toyolo huan
tijcahuilíaj ma techyacanti, ya ni catli tijchihuaj: Titeicnelíaj,
tipaquij, tijpiyaj tlasehuilistli ipan toyolo, tijpiyaj toyolo
ininhuaya sequinoc, titetlasojtlaj, tiquinchihuilíaj sequinoc catli
cuali, tiitztoque titemachme,
\v 23 timoechcapantlalíaj huan timonahuatíaj cuali para ma amo
titlajtlacolchihuaca. Masehualme catli quichihuaj ni cuali tlamantli
amo monequi se tlanahuatili.
\v 24 Quena, tojuanti catli tiiaxcahua Cristo Jesús tijmictijque
itlanequilis totlacayo catli quipactía tlajtlacolchihuas pampa
tijtlalijque ipan icuamapel quema timijque ihuaya Jesús.
\v 25 Huan ama pampa tijpiyaj nemilistli catli yancuic catli Itonal
Toteco techmacac, nojquiya ma tijcahuilica Itonal Toteco ma
techyacantiya ipan sesen tlamantli catli tijchihuaj.
\v 26 Ma ayacmo tijtemoca ajqueya techhueyimatis. Ma ayacmo
timonajnanquilica. Huan ma ayacmo tiquixtocaca catli sequinoc
quipiyaj.
\c 6
\s Ximopalehuica
\p
\v 1 Noicnihua, sintla anquiitaj se amoicni catli huetztoc ipan se
tlajtlacoli, amojuanti catli anmonemiltíaj ica ichicahualis Itonal
Toteco xijchihuaca para ma motlalnamictis. Quena, ica yamactzi
xijnotzaca ma ayacmo tlajtlacolchihua. Pero ximomocuitlahuica para
amo anmechyoltilanas huan nojquiya amojuanti antlajtlacolchihuase.
\v 2 Ximopalehuica se ica seyoc ica amotequipacholhua huan nochi
tlamantli catli amopantis. Quej nopa anquichihuase catli Cristo
technahuatijtoc.
\p
\v 3 Sintla se masehuali moilhuía yaya más hueyi quej sequinoc
huan amo hueli quipalehuía se catli huetztoc, yaya nelía
mocajcayahua.
\v 4 Monequi sesen tojuanti ma timotequitlachilica para tiquitase
sintla iixpa Toteco nelía cuali catli tijchihuaj o amo. Huan sintla
cuali tonemilis, huajca ma tipaquica, pero amo aqui ma paqui san
pampa quichijtoc catli achi más cuali que se iicni catli
tlajtlacolchijtoc.
\v 5 Pampa sesen tojuanti tijpiyaj totequi para ma tijmocuitlahuica
catli tojuanti tonemilis.
\p
\v 6 Nochi amojuanti catli anquipiyaj catli anmechmachtíaj icamanal
Toteco, monequi xiquinpalehuica amotlamachtijcahua ica tomi huan ica
nochi nopa cuali tlamantli catli anquipiyaj.
\p
\v 7 Amo ximocajcayahuaca pampa amo aqui hueli quicajcayahuas
Toteco. Catli anquitocase, ya nopa anquipixcase.
\v 8 Sintla anquichihuaj catli amo cuali pampa anquitoquilíaj
amotlanequilis catli quipactía tlajtlacolchihuas, anquipantise se
nemilistli catli sosolijtoc. Pero sintla anquichihuaj catli cuali
quen Itonal Toteco techilhuía ma tijchihuaca, huajca Itonal Toteco
anmechmacas se nemilistli catli yancuic huan huejcahuas para
nochipa.
\v 9 Ma amo tisiyahuica para tijchihuase catli cuali, pampa sintla
amo tijcahuase tijchihuase catli cuali, Toteco techtlaxtlahuis miyac
quema ajsis tonal.
\v 10 Huajca ama, quema noja tihuelij, ma tiquinchihuilica catli
cuali nochi masehualme. Huan achi más monequi ma tiquinchihuilica
catli cuali catli toicnihua ipan Cristo.
\s Pablo quinnahuatijtejqui
\p
\v 11 Xiquitaca para naya noseltzi catli niquijcuilohua nimantzi ica
nomax huan nelía huejhueyi notlajcuilol.
\v 12 Nopa tlacame catli quinequij ximotequilica nopa machiyotl san
quinequij quinpactise iniisraelita huampoyohua para ma amo
quintlaijiyohuiltica quen techtlaijiyohuiltíaj. Huan anquimatij
techtlaijiyohuiltíaj pampa titlamachtíaj para san Cristo hueli
techtlajtlacolquixtis, pampa yaya catli mijqui ipan icuamapel por
tojuanti.
\v 13 Pero nopa israelita tlacame catli quinequij anmechmachtise
tlen nopa machiyotl, niyon inijuanti amo quichihuaj nochi catli
quiijtohuaj itlanahuatilhua Moisés. San quinequij ximotequilica
amotlacayo para mohueyimatise huan quiijtose quinpiyaj masehualme
catli quitoquilíaj inintlamachtil.
\v 14 Pero na san nimotlepanita por catli Jesucristo quichijqui ipan
icuamapel para nechmaquixtis huan sintla nimotlepanitas ica seyoc
tlamantli, Toteco ma nechtlatzacuilti. Huan ipan nopa cuamapeli
mijqui notlanequilis catli quinequiyaya tlamantli catli onca ipan ni
tlaltipactli. Huan niquita nochi tlamantli catli amo cuali ipan
tlaltipactli quen mictoc para na.
\v 15 Huajca amo ipati sintla timotequilijtoque nopa machiyotl o
amo. San ipati sintla tijpiyaj nemilistli catli yancuic ipan Cristo.
\v 16 Ma Toteco anmechtlasojtla huan ma anmechmaca tlasehuilistli
ipan amoyolo nochi amojuanti catli annejnemij quen nimechilhuijtoc
huan nochi anisraelitame catli nelía animasehualhua Toteco.
\p
\v 17 Huajca ama huan teipa ayacmo nijnequi timonajnanquilise ica
nochi ni tlamantli. Huan ayacmo aqui ma nechtlatzintoquili sintla
nelía niitequipanojca Toteco, pampa lipintic notlacayo campa
nechcocojtoque tlacame catli quicualancaitaj Jesucristo. Huan ya
nopa mocahua quen se machiyotl catli quinextía tlanemijya para
niitequipanojca.
\p
\v 18 Noicnihua, Tohueyiteco Jesucristo ma quipiya hueyi iyolo ica
amojuanti. Quej nopa ma eli.