\id EPH
\h EFESIOS
\mt Nopa Amatlajcuiloli catli Pablo Quintlajcuilhui Tlaneltocani
ipan Altepetl Éfeso
\c 1
\s Pablo quintlajcuilhui tlaneltocani catli mosentilijque ipan
Éfeso
\p
\v 1 Na niPablo niitlayolmelajca Jesucristo pampa Toteco ica
ipaquilis nechtlapejpeni huan nechtequitlali para niteilhuis
icamanal. Nimechtlajcuilhuía amojuanti ipan altepetl Éfeso catli
temachtli anquineltocaj Jesucristo huan catli anitztoque
anitlatzejtzeloltijca masehualhua.
\v 2 Toteco Totata huan Toteco Jesucristo ma quipiyaca hueyi
ininyolo ica amojuanti, huan ma anmechmacaca tlasehuilistli ipan
amoyolo.
\s Catli cuali tijpiyaj ica Cristo
\p
\v 3 Ma tijpaquilismacaca Toteco Dios, yaya catli iTata Toteco
Jesucristo, pampa techtiochijtoc ica nochi tlamantli tlatiochihuali
catli cuali nepa ilhuicac pampa titlatzquitoque ipan Jesucristo.
\v 4 Huejcajya quema polihuiyaya para quichihuas tlaltipactli Toteco
Dios techtlapejpeni para teipa techtlatzquiltis ipan Cristo.
Quinejqui ma tiitztoca titlatzejtzeloltique huan para ma amo
tijpiyaca niyon se totlajtlacol iixpa.
\v 5 Huan pampa Toteco miyac techicneli, huejcajya quema
quisencahuayaya tlaque quichihuas teipa, quiijto para teipa
techselis quen tiiconehua por catli Jesucristo techchihuilis. Huan
ya nopa Toteco quichijqui pampa elqui ipaquilis para quichihuas.
\v 6 Huajca ma tijpaquilismacaca Toteco pampa onpano hueyi iyolo ica
tojuanti huan yeca techselijtoc ipan Jesucristo catli yaya
quiicnelía.
\v 7 Quena, pampa tlahuel hueyi iyolo Toteco tohuaya, tlaxtlajqui
catli monejqui para techmajcahualtis tlen totlajtlacolhua ica ieso
Icone. Huan ama tijpiyaj tlapojpolhuili por totlajtlacolhua.
\v 8 Huan pampa hueyi iyolo ica tojuanti techmacac cuali
tlalnamiquilistli huan tlamachilistli.
\v 9 Huan techmachiltijtoc tlaque ipaquilis catli amo aqui
quimatiyaya. Quena, quipacti Toteco technextilis catli huejcajya
quitlalijtoya quichihuas.
\v 10 Huan ya ni catli Toteco quiixquetztoc se tonal para quichihuas
quema ajsis hora. Quinsentilis nochi masehualme huan nochi
tlamantli, huan Cristo quipiyas tlanahuatili ica nochi. Huan Cristo
quinnahuatis nochi ipan ilhuicac huan nochi ipan tlaltipactli.
\p
\v 11 Huan nojquiya tlen huejcajya Toteco quitlalijtoc para
tijpiyase nopa tlatiochihualistli catli tijselisquíaj quema
techtlatzquiltisquía ipan Cristo. Huan nochi ni tlamantli
panotihuala senquistoc quen Toteco quisencajtoc pampa yaya quichihua
ma pano nochi quen ipaquilis.
\v 12 Pampa hasta huejcajya Toteco quinejqui para tiisraelitame
catli achtihui timotemachijque ipan Cristo, ma tijpaquilismacaca
Toteco Dios pampa yaya itztoc onpano hueyi.
\v 13 Huan ama amojuanti nojquiya catli amo anisraelitame
anquicactoque icamanal Toteco catli melahuac huan anmechilhuijtoc
quenicatza Cristo hueli anmechmaquixtía tlen amotlajtlacolhua.
Huajca quema anquineltocaque Cristo, Toteco anmechmachiyoti huan
anmechtlatzquilti ipan Cristo. Quena, anmechtlalili isello pampa
anmechmacac Itonal Toteco quen quitencajtoya achtihuiya para
quichihuas para ma nesi aniaxcahua.
\v 14 Huan Itonal Toteco eltoc quen se tlayacanca tomi para
technextilis para temachtli tijselise nochi catli techtencahuilijtoc
techmacas nepa ilhuicac. Quena, yaya tlaxtlajqui catli monejqui para
techcohuas para tiiaxcahua huan para techmajcahualtis tlen
tlajtlacoli. Huajca ma tijpaquilismacaca Toteco pampa yaya itztoc
onpano hueyi.
\s Pablo quitlajtlani Toteco por nopa tlaneltocani
\p
\v 15 Huajca pampa Toteco anmechmacatoc nochi ni tlatiochihualistli,
quema nijcajqui quenicatza chicahuac anquineltocaj Tohueyiteco huan
anquinicnelíaj nochi masehualme catli iaxcahua,
\v 16 pejqui nijtlascamati Toteco por amojuanti. Huan amo nijcahua
nimotlatlajtía tlatoctzitzi por amojuanti.
\v 17 Nijtlajtlanía Toteco Dios, yaya nopa Tetata catli más
quipiya ihueyitilis. Quena, nijtlajtlanía yaya catli Iteco
Tohueyiteco Jesucristo para ma anmechmaca tlalnamiquilistli huan
tlamachilistli para achi más xiquiximajtiyaca.
\v 18 Nijtlajtlanía Toteco ma quitlahuili amotlalnamiquilis para
xijmatica nopa catli temachtli Toteco techmacas tojuanti catli
technotzqui para ma tielica tiiaxcahua. Quena, nijnequi xijmatica
para onpano yejyectzi huan cuajcualtzi nochi nopa huejhueyi
tlamantli catli yaya quicualtlalijtoc para tojuanti catli
tiitlatzejtzeloltijca masehualhua huan techmacas teipa nepa ipan
ilhuicac.
\v 19 Huan nijtlajtlanía xijmatica quenicatza nelía onpano hueyi
ichicahualis Toteco catli tequiti ipan tojuanti catli tijneltocaj.
Huan ni chicahualistli techpalehuía huan techfuerzajmaca.
\v 20 Elqui ica ni hueyi chicahualistli Toteco quiyolcuic Cristo
quema mictoya, huan quitlananqui hasta ilhuicac huan quisehui nepa
inejmac campa onca más tlatlepanitacayotl.
\v 21 Huan Toteco quimacatoc Cristo nopa tlanahuatili catli más
hueyi pampa quitlalijtoc ma quinnahuati nochi catli itztoque.
Quinnahuatía itequihuajcahua Toteco huan nochi ajacame masque
quintocaxtíaj catli tlanahuatilyojque, catli tequiticayojque, catli
chicahualisyojque o catli hueyitilisyojque. Huan nojquiya
quinnahuatía nochi sequinoc catli quipiyaj inintoca. Quena,
quinnahuatis nochime catli itztoque ipan ni tlaltipactli o catli
itztose ipan nopa tlaltipactli catli hualas.
\v 22 Huan Toteco quintlalijtoc nochi catli itztoque huan nochi
tlamantli catli onca iicxitla Cristo para san ya ma quipiya
tlanahuatili. Huan Toteco quitlalijtoc Cristo ma quipiya
tlanahuatili ica itiopa, quinequi quiijtos ica nochi titlaneltocani.
\v 23 Quena, nochi titlaneltocani tiitztoque tiitlacayo Cristo huan
quen Toteco quimacac Cristo nochi tlamantli, Cristo quitemitía
tlaneltocani ipan itiopa ica nochi tlatiochihualistli. Quena,
quinmaca nochi catli yaya quinchijchijtoc nochi catli
quinmonequilía.
\c 2
\s Toteco techmaquixtijtoc pampa hueyi iyolo
\p
\v 1 Toteco anmechmacac nemilistli amojuanti catli achtihui
anitztoyaj quen anmijcatzitzi iixpa Toteco ipan amotlaixpanolhua
huan amotlajtlacolhua.
\v 2 Quena, achtihui annejnemiyayaj ipan tlajtlacoli san se quen
sequinoc ipan ni tlaltipactli. Anquichijtinenque catli quinequiyaya
Amocualtlacatl, nopa hueyi ajacatl catli tequiti ajacatipa. Yaya
catli tequiti ipan ininyolo nochi masehualme catli amo quinequij
quitlepanitase Toteco, niyon amo quichihuaj catli yaya quiijtohua.
\v 3 Achtihuiya nochi tojuanti nojquiya tiitztoyaj quen inijuanti.
Tijchijtinenque san catli fiero quen itlanequilis totlacayo catli
quipactía tlajtlacolchihua. Quena, tijchihuayayaj catli totequijya
huan totlalnamiquilis quinequiyaya ma tijchihuaca, pampa hasta quema
titlacatque, quej nopa tiitztoyaj. Huan yeca Toteco san quichiyayaya
para techtlatzacuiltis tojuanti ininhuaya nopa sequinoc amo
cuajcualme.
\v 4 Pero Toteco catli tlahuel miyac tetlasojtla, techicneli quema
tijchihuayayaj catli amo cuali pampa quipiya hueyi itlaicnelijcayo
ica tojuanti.
\v 5 Huan quema noja timictoyaj iixpa Toteco ipan totlajtlacolhua,
Toteco techmacac nemilistli yancuic san sejco ica Cristo. Quena,
techmaquixti san pampa hueyi iyolo ica tojuanti.
\v 6 Huan Toteco techyolcuic ica Cristo huan techsehui ihuaya Cristo
nepa ilhuicac. Huan ama Toteco techita para ya tiitztoque nepa
ilhuicac pampa techtlatzacuilti ipan Cristo Jesús.
\v 7 Techsehuijtoc ipan ilhuicac pampa quinejqui ma monextis para
nochipa quenicatza onpano hueyi iyolo ica tojuanti por catli Cristo
Jesús techchihuilijtoc.
\v 8 Huajca pampa nelía hueyi iyolo Toteco Dios, yaya
anmechmaquixti tlen amotlajtlacolhua quema anquineltocaque
Jesucristo. Huan amo anquineltocaque Jesucristo amoseltzitzi pero
elqui Toteco catli anmechmacac nopa tlaneltoquili.
\v 9 Huan amo anmechmaquixti pampa anquichijtoyaj se tlamantli catli
cuali para quej nopa amo aqui huelis mohueyimatis iixpa.
\v 10 Toteco yaya catli techchijchijtoc huan tojuanti tiitztoque
tiitequij ya. Huan techmacatoc nemilistli yancuic ipan Cristo Jesús
para huelis tijchihuase tlamantli catli cuali pampa quej nopa hasta
tlen huejcajya quitlalijtoc para ma tijchijtinemica.
\s Nopa tlasehuilistli catli tijpiyaj
\p
\v 11 Huajca xiquelnamiquica quenicatza elqui achtihuiya ica
amojuanti catli amo anisraelitame. Tojuanti tiisraelitame
timechcualancaitayayaj pampa amo anmotequilijtoyaj nopa machiyotl
catli itoca circuncisión ipan amotlacayo quen tiisraelitame
timomajtoque tijchihuaj.
\v 12 Ipan nopa tonali anitztoyaj huejca tlen Cristo. Amo tleno
anquipixque ica tiisraelitame catli tiimasehualhua Toteco. Amo
anquipixque tlanahuatili para anquiselise catli Toteco
techtencahuilijtoya tiisraelitame. Amo anquiiximatiyayaj Toteco.
Ipan tlaltipactli amo anquipiyayayaj ajqueya para ipan anmotemachise
para anmechmaquixtis.
\v 13 Pero amojuanti catli achtihuiya anitztoyaj huejca tlen Cristo,
ama antlatzquitoque ipan ya pampa anmechnechcahuilti quema
quitoyajqui ieso huan mijqui por amojuanti.
\v 14 Huan elqui Cristo catli quisencajqui tlasehuilistli ica
amojuanti catli amo anisraelitame huan ica tojuanti catli
tiisraelitame, pampa Cristo techsansejcotili huan techchijqui san se
tiimasehualhua. Quena, yaya quisemanqui catli techtlajcoxelohuayaya.
\v 15 Huan quema Cristo mijqui, quichijqui para ma ayacmo
timocualancaitaca, pampa quinquixtili ininchicahualis
itlanahuatilhua Moisés huan nochi nopa tlamantzitzi catli
technahuatiyaya tiisraelitame. Huajca amantzi tiisraelita masehualme
huan amojuanti catli amo anisraelitame, nochi tiitztoque quen san se
tlacatl catli yancuic. Huan yeca ama onca tlasehuilistli.
\v 16 Quema Cristo mijqui ipan cuamapeli para quiyoltlalis Toteco
ica tiisraelitame huan amojuanti catli amo anisraelitame, yaya
quitlamilti nopa cualantli catli tijpixtoyaj se ica seyoc huan
quichijqui ma tiitztoca ipan san se totlacayo ipan Toteco.
\p
\v 17 Cristo hualajqui huan teyolmelajqui tlen nopa cuali camanali
tlen tlasehuilistli catli eltoc para amojuanti catli amo
anisraelitame catli anitztoyaj huejca tlen ya huan para tojuanti
tiisraelitame catli tiitztoyaj más nechca tlen Toteco.
\v 18 Yeca ama, aqui hueli masehuali masque israelita o amo
israelita huelis quinechcahuis Toteco Totata ica itlapalehuil setzi
Itonal Toteco por catli Jesucristo techchihuilijtoc.
\v 19 Huajca amojuanti catli amo anisraelitame ayacmo anitztoque
quen anseyoc tlali ehuani catli amo quipiyaj niyon se tequiticayotl.
Ama ya san se anehuani ica nochi sequinoc tojuanti catli Toteco
techchijtoc tiitlatzejtzeloltijca masehualhua. Quena, ama anitztoque
ichampoyohua Toteco.
\v 20 Tiitztoque quen se tiopamitl catli Toteco quichijtihualajtoc
ica masehualme catli quineltocaj. Itlayolmelajcahua Toteco huan nopa
tlajtol pannextiani itztoque quen itzinpehualtil nopa itiopa. Cristo
Jesús itztoc quen nopa hueyi tetl catli yohui calnacastla catli
ipan quiquetzase nopa tiopa.
\v 21 Huan ipan Cristo nochi titlaneltocani timonechicohuaj quen
teme ipan se tepancali. Huan mojmostla mochihua más hueyi itepa
huan timochijtiyohuij itlatzejtzeloltijca tiopa Toteco catli yaya
quichihua ica masehualme catli quineltocaj Cristo.
\v 22 Huan ama amojuanti nojquiya catli amo anisraelitame anitztoque
quen teme ipan itepanyo nopa tiopa, huan Toteco mocahua ipan
amojuanti pampa Itonal itztoc ipan amoyolo.
\c 3
\s Toteco quitequimacatoc Pablo ica masehualme catli amo israelitame
\p
\v 1 Yeca pampa quej ni ipaquilis Cristo Jesús, na niPablo
nitzactoc huan pampa nimechilhuiyaya amojuanti huan sequinoc catli
amo anisraelitame icamanal.
\v 2 Huelis ya anquicactoque quenicatza Toteco, pampa hueyi iyolo
ica na, nechtequimacatoc ma nimechilhuis masehualme catli amo
israelitame icamanal.
\v 3 Huan ya nimechtlajcuilhui quentzi ipan ni amatlajcuiloli para
elqui Toteco iseltzi catli nechnextili catli yaya quichihuayaya ipan
Cristo.
\v 4 Huan quema anquipojtiyase catli nimechtlajcuilhuijtoc,
anquimachilise quenicatza nijmati ni tlamantli tlen Cristo.
\v 5 Quena, huejcajya Toteco amo aqui quinextiliyaya ni tlamantli,
pero ama Toteco ica Itonal ya quinnextilijtoc itlayolmelajcahua huan
itlajtol pannextijcahua catli quiniyocatlalijtoc para iaxcahua.
\v 6 Huan ¿catli onca nopa tlamantli catli achtihuiya Toteco amo
tenextiliyaya? Elqui para nochi amojuanti catli amo anisraelitame
san sejco anquiselise amoparte ica tojuanti tiisraelitame ipan nopa
tlatiochihualistli catli Toteco techmacas tojuanti catli tiiconehua.
Huan ama tiitztoque sentic ipan itlacayo. Huan nopa catli
tlatencahuali ipan Cristo Jesús catli Toteco techmacac
tiisraelitame, nojquiya anquiselise amojuanti pampa anquineltocaj
nopa cuali camanali tlen ya.
\p
\v 7 Huajca ama pampa hueyi iyolo ica na, Toteco quen se nemactli
nechmacatoc notequi para ma nieli niitequipanojca. Huan por ihueyi
chicahualis catli tequiti ipan na, ama niquinilhuía masehualme nopa
cuali camanali.
\v 8 Masque na más nitziquitetzi iixpa Toteco que nochi sequinoc
itlatzejtzeloltijca masehualhua, yaya nechmacatoc ni paquilistli
para ma niquinilhui masehualme catli amo israelitame tlen Cristo.
Huan masque amo aqui hueli quitlamipohuilis nochi catli Cristo
quipiya pampa yaya onpano tlapijpixtoc, na niquinyolmelahua nopa
cuali camanali para Cristo quipiya tlahuel miyac tlamantli
tlatiochihualistli para quinmacas.
\v 9 Quena, Toteco catli quichijchijtoc nochi tlamantli nechmacatoc
ni notequi para niquinilhuis nochime catli yaya quisencajqui tlen
huejcajya. Huan itlalnamiquilis catli amo aqui quimatiyaya elqui
para yaya quinmaquixtis israelitame huan catli amo israelitame ipan
Cristo.
\v 10 Toteco quichijqui ya ni para ama ipan ni tonali nochi
inijuanti catli tlanahuatilyojque, huan chicahualisyojque catli
tlanahuatíaj nepa ajacatipa ma quiitaca para nelhueyi
itlalnamiquilis. Quinequi ma quiitaca para itiopa catli amo nesi
mochijtoc ica tlaneltocani catli israelitame huan catli amo
israelitame.
\v 11 Pampa hasta tlen huejcajya Toteco ipa moilhuijtoya para
quichihuas ya ni ica Cristo Jesús, Tohueyiteco.
\v 12 Yeca por catli techchihuilijtoc Cristo huan pampa tijneltocaj
ya tijpiyaj tequiticayotl para tijnechcahuise huan tijcamanalhuise
Toteco. Huan tijmatij temachtli techselis ica paquili.
\v 13 Huajca amo ximotzinquixtica sintla ama nitlaijiyohuía ipan
tlatzactli pampa nimechilhuijtoc amojuanti huan sequinoc catli amo
israelitame icamanal. Nochi ni quipannextía para miyac amopati
iixpa huan se tlatlepanitacayotl para amojuanti.
\s Jesucristo nelnelía techicnelía
\p
\v 14 Quema nimoilhuía tlen ihueyi tlalnamiquilis para quisencahuas
nochi ni tlamantli, nimotlancuaquetza huan nimotlatlajtía iixpa
Totata, yaya catli iTata Tohueyiteco Jesucristo.
\v 15 Yaya ininneltata senquistoc nochi nopa familia tlen masehualme
huan tequihuajme catli itztoque ipan ilhuicac huan ipan tlaltipactli
pampa yaya catli quinchijchijqui huan quintocaxtlali.
\v 16 Huan pampa Toteco nelía tlapijpixtoc huan quipiya nopa
chicahualistli catli más hueyi, nijtlajtlanía para Itonal ma
anmechmaca miyac chicahualistli ipan amoyolo.
\v 17 Nimotlatlajtía ica Toteco para xijcahuilica Cristo ma
mochanti ipan amoyolo pampa anquineltocaj. Nijtlajtlanía Toteco
para yaya ma pajcaitztos ipan amoyolo pampa quipiya tlanahuatili ica
nochi catli eltoc nepa. Huan quen se tzontli quiselía
chicahualistli tlen inelhuayo, nijtlajtlanía para mojmostla
xijselica amochicahualis tlen iteicnelijcayo.
\v 18 Nijnequi amojuanti huan nochi sequinoc itlatzejtzeloltijca
masehualhua Toteco xijmachilica quenicatza ihuexca itlaicnelijcayo
Toteco. Pampa onpano hueyi itlaicnelijcayo huan ajsi campa más
huejcapa, huan campa más tlatzintla, huan ajsi tlen campa hualquisa
tonati hasta campa oncalaqui.
\v 19 Quena, nijnequi xiquiximatica itlaicnelijcayo Cristo catli amo
aqui hueli quitlamiiximatis. Nijnequi anitztose quen se
tlatamachihuali catli temitoc ica se quentzi tlen ihueyitilis
Toteco.
\p
\v 20 Ma tijhueyimatica Toteco Dios catli quipiya chicahualistli
para quichihuas onpano más miyac huan amo quen nochi catli hueli
tijtlajtlaníaj o hueli timoilhuíaj. Huan quichihuas ica
ichicahualis catli ya tequiti ipan tojuanti.
\v 21 Quena, tojuanti catli timochihuaj tiitiopa tlen tlaneltocani
ma tijhueyichihuaca Totata san sejco ica Jesucristo para nochipa,
huan ma amo quema tlami. Quej nopa ma eli.
\c 4
\s Itonal Toteco techchijtoc san se
\p
\v 1 Na catli nitzactoc pampa quej nopa ipaquilis Tohueyiteco,
nimechtlajtlanía xijpiyaca se amonemilis catli nelía cuali quen
quinamiqui quipiyase masehualme catli Toteco quinnotzqui para elise
iaxcahua.
\v 2 Ximoechcapanoca huan ximocamanalhuica ica cuali quen masehualme
catli cuali monahuatíaj. Xijpiyaca amoyolo se ica seyoc, huan sesen
amojuanti xiquijiyohuica quema seyoc amoicni quichihua o quiijtohua
se tlamantli pampa yaya ayamo cuali tlamachilía. Quej nopa
anquinextilise anquiicnelíaj.
\v 3 Ica itlapalehuil Itonal Toteco xijchihuaca campica anquipiyase
san se amotlalnamiquilis. Huan quej nopa anquipiyase tlasehuilistli.
\v 4 Pampa nochi tojuanti catli tijneltocaj Toteco tiitztoque quen
san setzi totlacayo iixpa Toteco. Tijpiyaj san setzi Itonal Toteco.
Huan quema technotzqui, quiijto ma tijchiyaca para senquistoc
techmaquixtis nepa ilhuicac san se quen quinmaquixtis nochi sequinoc
catli quinnotztoc.
\v 5 San itztoc setzi Tohueyiteco Jesucristo. Huan nochi tijneltocaj
san setzi camanali. Onca san setzi tlacuaaltilistli.
\v 6 Itztoc setzi Toteco Dios, yaya catli Totata nochi tojuanti.
Yaya quipiya tlanahuatili ica nochi tojuanti. Huan yaya itztoc por
nochi tojuanti huan itztoc ipan nochi tojuanti.
\p
\v 7 Huan Cristo techmacatoc sesen tojuanti nopa nemactli o yajatili
catli quinequi ma tijtequihuica para ya.
\v 8 Huajca quisa quen ijcuilijtoc ipan Icamanal para Toteco
quichihuasquía, quiijtohua:
\q “Quema yaya tlejcos ilhuicac quinyacantiyas inijuanti catli
quintlantoc.
\q Huan quinmacas nemactli masehualme.”
\p
\v 9 Pero ¿tlaque quinequi quiijtos “yaya tlejcoc ilhuicac”?
Quinequi quiijtos para yaya achtihuiya temotoya tlen ilhuicac hasta
ni tlaltipactli.
\v 10 Huajca yaya catli hualtemoc ipan ni tlaltipactli eltoc
nojquiya yaya catli tlejcoc hasta nepa ilhuicac campa más huejcapa.
Quichijqui ya nopa para ma nesi ya itztoc campa hueli huan
quitemitía nochi tlaltipactli huan ilhuicactli.
\v 11 Huan quinmacac sequin nopa nemactli o yajatili para ma elica
tlayolmelahuani, huan sequin para ma elica tlajtol pannextiani, huan
sequin para ma teyolmelahuaca quenicatza Cristo
tetlajtlacolquixtía. Huan quinmaca sequin nopa yajatili para ma
elica tlayacanani tlen tlaneltocani huan sequin para ma elica
tlamachtiani tlen Icamanal Toteco.
\v 12 Pero Tohueyiteco techmacac sesen tojuanti toyajatil para ica
tiquincualtlalise nochi sequinoc itlatzejtzeloltijca masehualhua
para quichihuase itequi. Huan teipa monequi tojuanti catli
tiimasehualhua ma timotequipanoca se ica seyoc para tijmacase tetili
nochi itlacayo Cristo, quinequi quiijtos nopa tlasentililistli catli
amo moita tlen nochi imasehualhua.
\v 13 Monequi tijtequihuise toyajatil huan timotequipanose se ica
seyoc hasta nochi titlaneltocani timochihuase san se ipan catli
tijneltocaj huan nelcuali tiquiximatise Icone Toteco. Quej nopa
ayacmo tiitztose quen ticoneme. Ya tiitztose tihuejhueyi masehualme
ipan Cristo. Huan monequi timoscaltijtiyase hasta tijpiyase se
nemilistli quen Cristo quipiya.
\p
\v 14 Huajca ma ayacmo tiitztoca quen coneme catli quipatlaj
inintlalnamiquilis tlatoctzitzi huan quitoquilíaj tlen hueli
tlamachtili pampa eltoc quen se ajacatl quinhuica campa hueli. Ma
ayacmo anmechcajcayahuaca tlacame catli istlacatij huan quisencahuaj
tlen hueli camanali para anmechmacase, pampa inijuanti
neltlalnamiquini para tlacajcayahuase.
\v 15 Pero tojuanti ma tijtoquilijtinemica catli melahuac ica
tlaicnelijcayotl. Huan ma timoscaltijtiyaca para tiitztose más quen
Cristo, yaya catli totzonteco, huan catli technahuatía nochi
titlaneltocani quen totzonteco quinahuatía totlacayo.
\v 16 Ipan itlacayo se tlacatl nochi partes monechicohuaj huan
tequitij san sejco. Huan Cristo quichihua para nochi tojuanti catli
tiitztoque tiitlacayo ma timonechicoca huan ma titequitica cuali
san sejco pampa sesen tojuanti tijchihuaj catli techtocarohua ma
tijchihuaca. Huan quema sesen tlaneltocaquetl ica miyac
teicnelijcayotl quichihua catli itequi huan timopalehuíaj se ica
sequinoc, huajca quena, nochi itlacayo Cristo moscaltía.
\s Nopa yancuic nemilistli ipan Cristo
\p
\v 17 Huajca ya ni nimechilhuía ica itequiticayo Tohueyiteco.
Ayacmo xijpiyaca amonemilis quen masehualme catli amo quineltocaj
Toteco pampa nelía maneltic catli moilhuíaj huan amo tleno ipati.
\v 18 Tzactoc inintlalnamiquilis huan huejca mocahuaj tlen nopa
nemilistli yancuic catli Toteco temacas. Amo quipiyaj nopa
nemilistli pampa moyoltetilijtoque para ma amo quiiximatica Toteco.
\v 19 Inijuanti ya quipolojque ininpinahualis huan motemactilijtoque
para quichihuase tlamantli catli más fiero. Ayacmo moilhuíaj
sintla cuali o amo cuali catli quichihuaj, san
tlajtlacolchijtinemij, huan mojmostla quinequij quichihuase más
catli amo cuali.
\p
\v 20 Pero quema anquicajque tlen Cristo, amo anmechmachtijque
xijchihuaca tlamantli catli fiero.
\v 21 Ama ya anquicactoque tlen ya huan ya anquimatij nopa catli
xitlahuac catli anmechmachtijtoc tlen ya.
\v 22 Huan ya anquicuamajcajtoque amonemilis catli achtihui quema
antlacajcayahuayayaj huan anquichijtinemiyayaj tlamantli catli fiero
catli itlanequilis amotlacayo quinequiyaya xijchihuaca.
\v 23 Ama anquipiyaj catli yancuic amopani para quiyancuilis
amotlalnamiquilis huan amoyolo.
\v 24 Huajca monequi anquinextise amotlalnamiquilis catli yancuic
pampa Toteco anmechchijtoc se yancuic masehuali catli eltoc quen ya.
Huan ama huelis anquichijtinemise catli xitlahuac huan catli
tlatzejtzeloltic.
\p
\v 25 Huajca ayacmo ximoistlacahuica. Sesen amojuanti xiquinilhuica
sequinoc catli melahuac pampa sesen tojuanti tiitztoque quen
tipartes ipan san se totlacayo ipan Cristo.
\p
\v 26 Sintla ancualanij, amo xitlajtlacolchihuaca. Nimantzi
ximoyoltlalica quema ayamo calaqui tonati.
\v 27 Amo xijcahuilica Amocualtlacatl ma calaqui huan ma anmechnotza
xitlajtlacolchihuaca.
\p
\v 28 Amojuanti catli anitztoyaj antlachtequini, ayacmo
xitlachtequica. Monequi xitequitica. Monequi xijchihuaca tlamantli
catli cuali ica amomax para anquipiyase catli ica anpanose huan para
nojquiya huelis anquinpalehuise sequinoc catli quinpolohua
inintechmonequi.
\p
\v 29 Amo xicamanaltica tlen hueli camanali. San xiquijtoca
tlamantli catli cuali catli quinyolchicahuas huan quinhualiquilis
tlatiochihuali catli quicaquise.
\v 30 Amo xijchihuaca catli quitequipacholmacas itlatzejtzeloltijca
Tonal Toteco. Pampa yaya Itonal Toteco catli anmechtlalilijtoc
imachiyo Toteco catli quinextía aniaxcahua huan para temachtli
Toteco anmechhuicas ilhuicac quema ajsis tonal.
\p
\v 31 Ayacmo ximoyolchichicachihuaca. Ayacmo ximochihuaca
anyolquentzitzi. Ayacmo xicualanica. Ayacmo xiquijtoca fiero
camanali catli tecocohua. Ayacmo xitetlaijilhuica. Ayacmo
xitecualancaitaca.
\v 32 Más cuali ximochihuilica catli cuali se ica seyoc.
Ximotlasojtlaca huan ximotlapojpolhuica se ica seyoc quen Toteco
anmechtlapojpolhuijtoc ipan Cristo.
\c 5
\s Quen monequi tinemise
\p
\v 1 Amojuanti aniconehua Toteco, huajca xijchihuaca quen yaya
quichihua.
\v 2 Mojmostla xiquinicnelica masehualme quen Cristo techicnelía
hasta motemactili para miquis para techtlajtlacolquixtisquía.
Quena, yaya mochijqui nopa tlacajcahualistli catli Toteco quiseli
pampa tlahuel quipacti.
\p
\v 3 Pero amojuanti catli anitlatzejtzeloltijca masehualhua Toteco,
amo quinamiqui xijchihuaca catli amo cuali. Amo xijnequica para
anmoaxcatise más tlamantli mojmostla. Amo quema xijchihuaca
tlamantli ica se catli amo amonamic. Ma amo quema xijchihuaca nopa
tlamantli tlajtlacoli.
\v 4 Amo xiquijtoca camanali catli fiero. Amo xiahuilcamanaltica,
niyon xiquijtoca catli quinpinahualtía sequinoc pampa amo
quinamiqui para amojuanti. Pero xijtlascamatica Toteco para nochi
nopa cuali tlamantli catli anmechchihuilijtoc.
\v 5 Ya anquimatij para amo huelis calaquis campa Cristo huan Toteco
tlanahuatíaj se masehuali catli quichijtinemi catli amo cuali, o
catli quichijtinemi tlen hueli ica catli amo inamic, o catli
quinectinemis más tlamantli mojmostla. Pampa se catli tlahuel
quinequi moaxcatis más tlamantli, itztoc san se quen se catli
quinhueyimati totiotzitzi.
\v 6 Ma amo aqui anmechcajcayahua huan anmechilhui amo tleno
amopantis sintla anquichihuase ni tlajtlacoli, pampa Toteco
chicahuac quintlatzacuiltis catli amo quitlepanitaj.
\v 7 Huajca ximoiyocatlalica tlen amo cuajcualme huan amo quema
xitlajtlacolchihuaca ininhuaya.
\p
\v 8 Achtihuiya anitztoyaj ipan tzintlayohuilotl, pero ama pampa
anmotlatzquilijtoque ipan Tohueyiteco, anitztoque ipan tlahuili,
huajca xijchijtinemica catli cuali para ma nesi annejnemij ipan
tlahuili.
\v 9 Quema Toteco quitlahuilía itlalnamiquilis se tlacatl, yaya
itztoc cuali, nejnemi xitlahuac, huan quiijtohua catli melahuac.
\v 10 Huajca xijchijtinemica campica para anquimachilise catli
quipactía Toteco.
\v 11 Ximoiyocatlalica tlen nochi nopa tlamantli catli sequinoc
quichihuaj ipan tzintlayohuilotl pampa nopa tlamantli amo quipiyase
inintlajca catli cuali. Pero quena, xiquintlalnamictica catli quej
nopa quichihuaj huan xiquinhuicaca campa tlahuili.
\v 12 Se pinahualistli para ticamanaltise tlen nopa fiero tlamantli
catli sequin quichihuaj campa amo aqui quinita.
\v 13 Pero quema se tlahuili quintlahuilía, tlanemijya quinextía
para fiero catli quichihuaj pampa se tlahuili quinextía nochi.
\v 14 Yeca nopa camanali quiijtohua:
\q “Xiisa ta catli ticochtoc.
\q Xiquincajtehua catli itztoque quen mijcatzitzi pampa san
tlajtlacolchihuaj.
\q Quena, xiisa huan Cristo mitztlahuilis.”
\p
\v 15 Huajca ximotlachilica para ximonemiltica ica miyac
tlamocuitlahuili. Amo xinemica quen inijuanti catli huihuitique.
Xinemica quen tlalnamiquini pampa anquiiximatij catli melahuac.
\v 16 Amo ximotonalpoloca, pero mojmostla xitequitica para Toteco
pampa ipan ni tonali masehualme quichihuaj miyac tlamantli catli
fiero.
\v 17 Huajca amo ximohuihuinequica. Monequi ximotlalnamictica huan
xijchihuaca campica para anquimachilise catli Toteco quinequi
xijchihuaca.
\v 18 Amo ximoihuintica ica tlaili pampa ya nopa quicuapolos
amonemilis, pero xijcahuilica Itonal Toteco ma anmechtemitis huan
anmechyacantinemis ica ichicahualis.
\v 19 Huajca quej nopa ancamanaltise ica nopa cuajcuali camanali
tlen Salmos, huan ica tiohuicatl huan huicatl catli quisa ipan
amoyolo. Quena, anhuicase huan anquipaquilismacase Toteco ica nochi
amoyolo.
\v 20 Huan nochipa xijtlascamatica Toteco Totata ipan itoca
Tohueyiteco Jesucristo para nochi tlamantli catli anmechpanotihuala.
\s Quenicatza ma monejnemilti se familia
\p
\v 21 Nojquiya para monextis anquitlepanitaj Cristo, monequi nochi
amojuanti xiquincahuilica sequinoc ma quipiyaca tlanahuatili ica
amojuanti huan monequi inijuanti nojquiya ma anmechcahuilica
amojuanti anquipiyase tlanahuatili ica inijuanti.
\p
\v 22 Xijtlacaquilica ansihuame catli anquipiyaj amohuehue.
Xijcahuili mohuehue ma quipiya tlanahuatili ica ta quen nochi
tojuanti monequi ma tijcahuilica Tohueyiteco ma quipiya tlanahuatili
ica tojuanti.
\v 23 Pampa se tlacatl quipiya tlanahuatili ica isihua quen Cristo
quipiya tlanahuatili ica itiopa, quinequi quiijtos nochi tojuanti
catli tijneltocaj. Huan Cristo motemactili para elis
totemaquixtijca.
\v 24 Yeca quen tojuanti catli tiitiopa Cristo tijcahuilíaj ma
quipiya tlanahuatili ica tojuanti, nojquiya sihuame monequi
quicahuilise ininhuehue ma quipiya tlanahuatili ica inijuanti ipan
nochi tlamantli.
\p
\v 25 Xitlacaquica antlacame catli anquipiyaj amosihua. Xiquicneli
mosihua quen Cristo quiicnelijtoc itiopa huan mijqui para
quimaquixtis.
\v 26 Quena, yaya mijqui para quitlatzejtzelolchihuas itiopa huan
quitlapajpacchihuas ica nopa atl tlen icamanal Toteco.
\v 27 Huan quinequi itiopa tlen tlaneltocani catli amo moita huan
catli yaya quicualtlalía para ya iseltzi, ma eli onpano cuajcualtzi
ipan nopa tonal quema moquetzas iixpa. Quinequi sesen masehuali ipan
itiopa ma eli nelía tlapajpactic huan amo quipiyase niyon se
itlajtlacol o niyon se tlamantli catli amo melahuac. Quinequi sesen
ipan itiopa ma eli tlatzejtzeloltic huan para amo aqui huelis
quitelhuis ica niyon se tlamantli.
\v 28 Huajca quej nopa nojquiya monequi se tlacatl quiicnelis isihua
quen moicnelía. Yaya catli quiicnelía isihua, moicnelía.
\v 29 Pampa amo aqui quitlahuelcahua itlacayo. Nochi masehualme
quitlamacaj inintlacayo huan quimocuitlahuíaj ica teicnelijcayotl.
Huajca quen tijmocuitlahuíaj totlacayo huan quen Cristo
quimocuitlahuía itiopa, quen nopa xijmocuitlahui mosihua.
\v 30 Huan tojuanti catli tijneltocaj tiitztoque quen tipartes ipan
itlacayo. Quena, tiitztoque quen tiinacayo huan tiiomiyo.
\v 31 Huajca quema se tlacatl mosihuajtis, quicajtehuas itata huan
inana huan motlatzquilis ica isihua huan nopa ome mochihuase quen
eltosquía san setzi inintlacayo.
\v 32 Ya ni achi quentzi ohui para anquimachilise pero ya ni
technextilía quenicatza Cristo mohuica ihuaya itiopa catli
mochijtoc ica nochi tlaneltocani.
\v 33 Huajca sempa nimechilhuis sesen tlacatl monequi ma quiicneli
isihua quen moicnelía, huan se sihuatl monequi ma quitlepanitas
ihuehue.
\c 6
\p
\v 1 Xitlacaquica anconeme catli anquineltocaj Tohueyiteco.
Xijchihuaca catli amotata huan amonana anmechilhuíaj pampa ya nopa
catli xitlahuac.
\v 2 Xiquintlepanitaca amotata huan amonana pampa ya ni nopa
achtihui tlanahuatili catli techtencahuilía catli cuali Toteco
techmacas sintla tijchihuase.
\v 3 Quena, sintla tiquintlepanitase tonana huan totata,
techtencahuilijtoc para tijpiyase se tonemilis catli cuali huan
tiitztose miyac xihuitl ipan ni tlaltipactli.
\p
\v 4 Huan antetajme, xitlacaquica. Amo xiquincualancamacaca
amoconehua. Xiquiniscaltica cuali. Xiquintlalnamictica ica
tlaicnelijcayotl huan xiquinmachtica catli Tohueyiteco quinequi ma
quimatica.
\p
\v 5 Xitlacaquica antetequipanohuani catli amoteco anmechcojtoc.
Xijchihuaca catli anmechilhuíaj amotecohua nica ipan ni
tlaltipactli. Xiquintlepanitaca huan xiquinimacasica para amo
anquichihuase catli amo quinpactía. Xiquinchihuilica se cuali
tequitl quen anquitequipanosquíaj Cristo.
\p
\v 6 Amo xitequitica cuali san quema amopatron anmechtlachilijtoc
quen sequinoc quichihuaj catli quinequij ma quincualitaca
masehualme. Monequi nochipa xitequitica cuali pampa anelij
itequipanojcahua Cristo. Huajca ica nochi amoyolo xitequitica quen
anquimatij quipactía ya.
\v 7 Xitequitica ica paquilistli quen anquitequipanosquíaj
Tohueyiteco. Amo ximoilhuica sintla san anquintequipanohuaj
masehualme.
\v 8 Xiquelnamiquica para yaya Toteco Dios catli techtlaxtlahuis
quema tijchihuaj catli cuali ipan ni tlaltipactli masque
titequipanohuani catli tiiaxcahua se toteco nica o tiitztoque
timajcajtoque huan hueli tiyohuij campa tijnequij.
\p
\v 9 Huan nojquiya xitlacaquica anpatrones catli anquincojtoque
amotequipanojcahua. Xiquinchihuilica amotequipanojcahua catli cuali.
Ayacmo xiquintemajmatica. Xiquelnamiquica amojuanti huan inijuanti
anitztoque anitequipanojcahua Tohueyiteco catli itztoc nepa ilhuicac
huan yaya amo techchicoicnelía. San se techicnelía nochi tojuanti.
\s Quenicatza Toteco techcualtlalijtoc
\p
\v 10 Amantzi para nijtlamiltis ni amatlajcuiloli, ya ni
nimechilhuía. Nochi amojuanti, annoicnihua, xielica antetique ica
nopa chicahualistli catli Toteco anmechmacatoc.
\v 11 Ma tijtequihuica catli Toteco techmacatoc para ica
timomanahuise huan para tijtlanise Amocualtlacatl pampa yaya san
mosenyolilhuía quenicatza hueli techcajcayahuas.
\v 12 Pampa tojuanti amo timohuilanaj ininhuaya masehualme quen
tojuanti catli quipiyaj inieso huan ininnacayo. Timohuilanaj
ininhuaya ajacame catli amo quipiyaj inintlacayo, pero quipiyaj
inintequi ipan ni tlaltipactli campa tzintlayohuilotl. Sequin
motocaxtíaj catli tlanahuatilyojque, sequin catli
chicahualisyojque, huan sequin catli tequiticayojque. Ni ajacame
itztoque campa hueli ajacatipa huan quinnotzaj masehualme ma
quichihuaca catli amo cuali. Ica inijuanti, quena, tijpiyaj
tlahuilancayotl.
\v 13 Yeca quen se soldado mocualtlalía para tlahuilancayotl,
monequi amojuanti xijtequihuica sesen tlamantli catli Toteco
anmechmacatoc para ica anmomanahuise. Quej nopa amo tleno huelis
anmechchihuilise nopa ajacame quema hualase anmechhuilanaquij pampa
anmoquetztose ica chicahualistli iniixpa.
\v 14 Huan quej ni anmoquetzase antemachme. Xiquijtoca san catli
melahuac mojmostla huan ya nopa anmechcualtlalijtos quen se soldado
catli cuali quitetzilohua itlajcoilpica. Xijchihuaca san catli
xitlahuac mojmostla huan anmocualtlalijtose quen se soldado catli
motlalilía se tepostli para moyolixtzacuas.
\v 15 Para hueli anmoquetzase ica temachili quen se soldado catli
cuali quiijilpía izapato, monequi xijpiyaca nopa tlasehuilistli
ipan amoyolo catli temaca nopa cuali camanali tlen Toteco.
\v 16 Huan ipan nochi tlahuilancayotl monequi ximotemachica ipan
Toteco. Quena, quen itepostzajca se soldado quisehuía nopa lemenca
cuatlamintli catli icualancaitaca quitepehuilía, amotlaneltoquilis
quiquetzas nochi ilemenca cuatlamin catli Amocualtlacatl
anmechtepehuilis.
\v 17 Xijmatica para temachtli Toteco anmechmaquixtijtoc tlen
amotlajtlacolhua huan nopa tlalnamiquilistli quimocuitlahuis
amotzonteco quen se soldado catli motlalilía itepostzontzajca. Huan
para anquihuilanase Amocualtlacatl, xijtequihuica Icamanal Toteco
catli eltoc quen se machete catli Itonal Toteco techmacatoc.
\v 18 Tlatoctzitzi huan quema pano tlen hueli tlamantli,
ximotlatlajtica ica Toteco ica itlapalehuil Itonal Toteco.
Xitlachixtoca huan ximotlatlajtica huan amo xijcahuaca. Quena, quen
se soldado catli tlamocuitlahuía, xitlachixtoca. Huan nochipa
xijtlajtlanica Toteco ma quintiochihuas nochi itlatzejtzeloltijca
masehualhua.
\p
\v 19 Nojquiya ximotlatlajtica por na. Xijtlajtlanica Toteco ma
nechmaca nopa camanali catli quinamiqui huan para ma nimoneltlali
niquinilhuis masehualme nochi itlalnamiquilis catli amo aqui
quimatiyaya. Quena, ma nimoneltlali niteilhuis quenicatza Cristo
nojquiya quintlajtlacolquixtis masehualme catli amo israelitame san
se ica tojuanti catli tiisraelitame.
\v 20 Yeca nitzactoc huan niilpitoc ica tepos cadenas pampa Toteco
nechtequimacatoc niitlatitlanca huan nimoneltlaliyaya para
niquinilhuis masehualme ni camanali quen monequi nijchihuas.
\s Pablo quinnahuatijtejqui nopa tlaneltocani
\p
\v 21 Tíquico, toicni catli tiquicnelíaj yas anmechilhuiti catli
nechpanotihuala huan catli nijchihua. Yaya temachtli nechpalehuía
ipan itequi Toteco.
\v 22 Yeca nimechtitlanilijtoc para anquimatise tlen tojuanti huan
para yaya nojquiya ma anmechyolchicahua.
\p
\v 23 Toicnihua, ma Toteco Totata huan Toteco Jesucristo anmechmaca
tlasehuilistli ipan amoyolo. Ma anmechpalehui ximoicnelica se ica
seyoc huan más ximotemachica ipan ya.
\v 24 Ma Toteco quipiya hueyi iyolo ica nochi amojuanti catli
anquiicnelíaj Toteco Jesucristo ica se tlaicnelijcayotl catli amo
quema mopatla. Quej nopa ma eli.