\id PHP
\h FILIPENSES
\mt Nopa Amatlajcuiloli catli Pablo Quintlajcuilhui Tlaneltocani
ipan Altepetl Filipos
\c 1
\s Pablo ipan tlatzactli quintlajcuilhui tlaneltocani ipan Filipos
\p
\v 1 Na niPablo huan Timoteo catli itztoc nohuaya, tojuanti
tiitequipanojcahua Cristo Jesús catli techcojtoc para ma tielica
tiiaxcahua. Timechtlajcuilhuíaj nochi anitlatzejtzeloltijca
masehualhua Toteco nepa ipan altepetl Filipos catli yaya
anmechtlatzquiltijtoc ipan Jesucristo. Nimechtlajcuilhuía nochi
amojuanti ininhuaya amotlayacancahua huan amotlapalehuijcahua ipan
tlasentililistli.
\v 2 Toteco Totata huan Toteco Jesucristo ma quipiyaca hueyi
ininyolo ica amojuanti, huan ma anmechmacaca tlasehuilistli ipan
amoyolo.
\s Pablo motlatlajtía por nopa tlaneltocani
\p
\v 3 Nochipa quema nimechelnamiqui, nijtlascamati Toteco.
\v 4 Huan nochipa ninelpaqui quema nimotlatlajtía ica Toteco por
amojuanti,
\v 5 pampa hasta quema achtihui anquineltocaque Toteco huan hasta
ama antepohuilijtoque tlen Cristo huan antechpalehuijtoque para ma
momoyahua icamanal.
\v 6 Huan temachtli nijmati ya ni. Nopa cuali tequitl catli Toteco
quipehualti quichihua ipan amoyolo quema anquineltocaque,
quisenhuiquilis quicualtlalijtiyas mojmostla hasta quitlamiltis ipan
nopa tonal quema Jesucristo hualas.
\v 7 Cuali para nimoilhuía quej ni tlen amojuanti pampa nelía
nimechhuica ipan noyolo. Hueyi iyolo Toteco ica nochi tojuanti huan
techtiochijtoc miyac. Huan masque niitztoc ipan tlatzactli, o
nimonextía iniixpa tequitini para nijmanahuis icamanal Toteco, o
san niteilhuía icamanal, antechpalehuijtihualahuij ipan nochi
tlamantli.
\v 8 Toteco quimati nelía miyac nimechicnelía ica nochi nopa
tlaicnelijcayotl catli Jesucristo nechmacatoc.
\v 9 Quema nimotlatlajtía, nijtlajtlanía Toteco para noja más
xijpiyaca tlaicnelijcayotl ica sequinoc, huan para noja más
xijmatica tlen ya, huan xijpiyaca nelía cuali amotlalnamiquilis.
\v 10 Nijnequi xijmatica quenicatza anquitlapejpenise catli nelía
cuali para anitztose senquistoc antlapajpactique. Huan quej nopa amo
aqui huelis anmechtelhuis ama, niyon quema Cristo sempa mocuepas.
\v 11 Nochipa xijchihuaca catli cuali huan catli xitlahuac iixpa
Toteco. Huan quema masehualme quiitase nochi nopa cuali tlamantli
catli Jesucristo anmechpalehuía xijchihuaca, quihueyimatise huan
quipaquilismacase Toteco.
\s Pablo noja quinejqui quitequipanos Cristo
\p
\v 12 Noicnihua, nijnequi xijmatica para nochi ni tlaijiyohuilistli
catli nechpanotihualajtoc quipalehuijtoc para más ma momoyahua
icamanal Toteco.
\v 13 Ama nochi catli itztoque nica quimatij nitzactoc san pampa
nijneltoca Cristo. Huan hasta nojquiya quimatij nochi nopa soldados
catli quimocuitlahuíaj nopa hueyi cali campa itztoc nopa hueyi
tlanahuatijquetl.
\v 14 Huan pampa nitzactoc, miyac tlaneltocani achi más mochijtoque
tetique ipan Toteco, huan yeca ama más moneltlalíaj para
quinilhuise sequinoc icamanal.
\p
\v 15 Sequin nelía tlacamanalhuíaj icamanal Toteco pampa
nechchicoitaj huan quinequij mohueyimatise ica catli quichihuaj,
pero sequinoc tlacamanalhuíaj tlen Cristo ica ininyolo cuali iixpa
Toteco.
\v 16 Inijuanti catli nechchicoitaj tlacamanalhuíaj icamanal Toteco
para masehualme ma quintlepanitaca. Amo quichihuaj nelía para
Toteco. Huan moilhuíaj más nechyolcocos nica ipan ni tlatzactli
quema nijmatis catli quichihuaj.
\v 17 Pero nopa sequinoc masehualme, quena, tlacamanalhuíaj
icamanal Toteco pampa nechicnelíaj. Huan inijuanti quimatij Toteco
nechtequitlalijtoc nica para nijmanahuis icamanal iniixpa tequitini.
\v 18 Pero amo quenijqui. Masque sequin teilhuíaj icamanal ica
nochi ininyolo huan sequinoc amo cuali ininyolo, noja nipaqui pampa
miyaqui masehualme quinilhuíaj sequinoc tlen Cristo. Huan noja más
nipaquis,
\v 19 pampa nijmati nochi quisas cuali para na huan se tonal
nechmanahuise pampa anquitlajtlaníaj Toteco por na huan Itonal
Jesucristo nechpalehuía mojmostla.
\v 20 Amo quema nijnequi nijchihuas se tlamantli catli ica
nimopinahuas iixpa. Ya nopa catli nijchiya. San nijnequi ma
nimoneltlalis para Cristo nica campa niitztoc quen ipa nijchihuayaya
achtihuiya. Nijnequi masehualme ma quiitaca ihueyitilis Cristo ipan
nonemilis, masque niitztos para más tonali o masque nechmictise.
\v 21 Pampa sintla niitztos, niitztos para nijtequipanos Cristo.
Huan sintla nimiquis, nijtlanis nelía miyac, pampa niitztoti ihuaya
Cristo para nochipa.
\v 22 Pero sintla noja niitztos, huajca noja más nitequitis para
Toteco huan más masehualme quineltocase Cristo. Yeca amo nelía
nijmati tlaque nijtlapejpenis. Amo nijmati sintla nijnequi niitztos
o nijnequi nimiquis.
\v 23 Ohui para nijmatis catli más cuali. Quemantic nimoilhuía
huelis achi más cuali para niitztos. Huan quemantic nimoilhuía
achi cuali para nimiquis huan niyas niitztoti ihuaya Cristo pampa ya
nopa catli más cuali para na.
\v 24 Pero para amojuanti quisas más cuali sintla noja niitztos.
\v 25 Huajca nimoilhuía para noja niitztos para nimechpalehuis
anmoscaltise ipan Toteco huan más anpactose pampa cuali
anquineltocaj.
\v 26 Sintla niitztos, huajca quema nimechpaxaloti sempa
anquitlascamatise Cristo Jesús pampa quichijtoc para ma
nechchololtica tlen ni tlatzactli huan sempa niitztos amohuaya.
\p
\v 27 Pero masque tlen hueli tlen ni ome tlamantli nopantis, catli
más ipati elis para ximonejnemiltica nelía cuali quen catli
quiijtohua icamanal Toteco. Quej nopa, sintla noja niyas nepa campa
amojuanti o amo, nijcaquis quenicatza anitztoque antemachme ipan
Toteco, huan anquipiyaj san se amoyolo, huan chicahuac antequitij
para masehualme ma quineltocaca icamanal Toteco.
\v 28 Niyon quentzi amo xiquinimacasica catli anmechcualancaitaj.
Huan quema noja más anmoneltlalise para Toteco, ya nopa elis se
tlanextilijcayotl catli quinnextilis para Toteco anmechmaquixtijtoc
amojuanti huan para inijuanti nelía polihuise.
\v 29 Pampa Toteco amo san anmechmacatoc nopa paquili para
xijneltocaca Cristo, nojquiya anmechmacatoc nopa paquili
xitlaijiyohuica pampa aniaxcahua.
\v 30 Tojuanti tiitztoque san sejco ipan ni hueyi tlahuilancayotl
ica catli amo cuali. Antechitztoque quema nitlaijiyohuiyaya
achtihuiya huan anquimatij hasta ama noja nitlaijiyohuía.
\c 2
\s Jesús catli hueyi, moechcapano
\p
\v 1 Ya anquimatij Toteco anmechicnelía huan anmechchijtoc
antlatzquitoque ipan Cristo, huan anquimatij quenicatza ya nopa
anmechyolchicahua huan anmechyoltlalía. Anquimatij Itonal Toteco
itztoc amohuaya huan anmechchihuilía ximoicnelica huan
ximotlasojtlaca.
\v 2 Huajca xijchihuaca catli nechmacas hueyi paquilistli huan
xijpiyaca san se amotlalnamiquilis. Nochi amojuanti ximoicnelica
miyac huan xitequitica san sejco quen anelisquíaj san se tlacatl
ica san se amoyolo.
\v 3 Amo aqui ma quichihua se tlamantli pampa quinequi
mohueyichihuas iniixpa sequinoc. Ma amo aqui mohueyimati, pero
ximoechcapanoca. Sesen amojuanti xiquinitaca nochi sequinoc quen
más huejhueyi que ya.
\v 4 Amo san ximoilhuica tlen tlamantli catli anmechpalehuis.
Achtihui ximoilhuica catli quinpalehuis sequinoc.
\p
\v 5 Ximonejnehuilica quen Cristo Jesús monejnehuili.
\v 6 Masque yaya Dios huan hueltosquía mocajtosquía campa ipa
itztoya ihuaya Toteco Dios, amo moilhui para monequi mocahuas nopona
ica nopa hueyi tlanahuatili catli quipixtoya.
\v 7 Moilhui achi cuali quicahuas nochi catli eliyaya iaxca, huan
huajca mochijqui quen se catli amo quipixqui niyon quentzi
tlanahuatili. Moechcapano huan mochijqui se masehuali, quena,
mochijqui quen se tetequipanojquetl.
\v 8 Huan quema ya itztoya se masehuali, más moechcapano para
senquistoc quichihuas catli iTata quinequiyaya. Quena, motemacac
para miquis ipan se cuamapeli, nopa miquilistli catli más quipiya
pinahualistli.
\v 9 Huan pampa moechcapano, teipa Toteco quitlejcolti huan
quihueyitlali nepa ipan ilhuicac huan quichijqui más hueyi que
nochi sequinoc pampa quimacatoc nopa tlanahuatili catli más hueyi.
\v 10 Huan Toteco quichijqui ni para ma motlancuaquetzaca iixpa
Jesús nochi catli itztoque ipan ilhuicac, nochi ipan tlaltipactli
huan nochi catli itztoque ipan mictla pampa momacase cuenta para
yaya catli más hueyi.
\v 11 Huan nochi masehualme catli camanaltij nochi tlamantli
camanali quiijtose tlamiyacapa para Jesucristo, yaya Dios
Tohueyiteco, huan ica ya ni quinextise ihueyitilis Toteco Totata.
\s Tlaneltocani itztoque quen se tlahuili
\p
\v 12 Noicnihua catli nimechicnelía, nochipa anquichijtihualajtoque
catli nimechilhuijtoc quema niitztoya amohuaya huan quema amo.
Huajca ama, quema amo niaqui, achi más techcaquica. Xijchijtinemica
tlamantli catli xitlahuac quen quinamiqui para ma mopannextis ipan
amojuanti para Toteco nelía anmechmaquixtijtoc tlen
amotlajtlacolhua. Xiitztoca quen catli huihuipicaj pampa tlahuel
quiimacasij quiixpanose Toteco Dios.
\v 13 Pampa yaya Toteco catli tequiti ipan amoyolo huan anmechchihua
xijnequica xijchihuaca tlen ya ipaquilis, huan yaya anmechmacas
chicahualistli para anquichihuase.
\p
\v 14 Ipan senquistoc nochi catli anquichihuaj ximomocuitlahuica
para amo ximotlaijilhuica, niyon ximonajnanquilica.
\v 15 Huan yeca amo aqui huelis anmechtelhuis ica niyon se
amotlajtlacol. Xijpiyaca se nemilistli catli tlapajpactic quen
quinamiqui para amojuanti catli aniconehua Toteco. Xiitztoca quen
miyac tlahuilme ipan ni tlaltipactli campa senquistoc onca
tzintlayohuilotl. Quena, masque anitztoque ininhuaya miyac
masehualme catli tlahuel chicotic inintlalnamiquilis huan catli
onpano quinpactía tlajtlacolchihuaj, ma cahuani amotlahuil.
\v 16 Huan mojmostla ximotlatzquilijtoca cuali ipan icamanal Toteco
catli temaca nemilistli yancuic, huan quej nopa ipan nopa tonal
quema Cristo mocuepas, tlahuel miyac nipaquis ica nochi catli
anquichijtoque, huan nijmatis para amo san tlapic notequi quema
niyajqui nimechilhuito icamanal Toteco.
\v 17 Nelía cuali anquineltocaj Toteco huan masque monequi nimiquis
pampa nimechilhui icamanal, nipaquis. Quena, amotlaneltoquilis eltoc
quen se tlacajcahualistli catli anquimacaj Toteco huan sintla
nimiquis, nonemilis elis quen se tlacajcahualistli tlatoyahuali
catli quicualtlalía noja más cuajcualtzi nopa tlacajcahualistli
catli anquimacaj Toteco. Huajca masque tlen hueli nopantis, nipaquis
huan nijnequi xipaquica.
\v 18 Quena, nojquiya xiyolpactoca nohuaya sintla monequi nimiquis
pampa nijtoquilía Cristo.
\s Epafrodito huan teipa Timoteo yase altepetl Filipos
\p
\v 19 Sintla ipaquilis Tohueyiteco Jesús, nijnequi para amo
huejcahuas nijtitlanis Timoteo ma anmechitati. Huan quema mocuepas
nica, nijpiyas paquilistli pampa nechpohuilis quenicatza anitztoque.
\v 20 Amo aqui seyoc catli quipiya se iyolo quen Timoteo. Yaya, quen
na, motequipachohua para amojuanti xinejnemica ica cuali.
\v 21 Nochi sequinoc catli itztoque nica san moilhuíaj catli cuali
para inijuanti. Amo moilhuíaj quenicatza huelis quipalehuise itequi
Cristo Jesús.
\v 22 Pero amojuanti ya anquiiximatij inemilis Timoteo pampa quen se
oquichpil ica paquili quipalehuía itata, yaya nechpalehuijtoc para
niquinilhuis masehualme icamanal Toteco.
\v 23 Huajca nijnequi achi nimantzi nijtitlanis para ma anmechitati.
San achtihui monequi nijmatis tlaque nopantis nica.
\v 24 Huan nimotemachía ipan Toteco para amo huejcahuas na nojquiya
niyas nimechitati.
\p
\v 25 Pero para amantzi, nimoilhuía achi cuali sempa
nimechtitlanilis toicni Epafrodito. Na huan ya nelía timochijtoque
tiicnime huan san sejco titequititoque ipan itequi Toteco. Yaya
nelía temachtli. Moneltlalijtoc quen se icual soldado Toteco huan
nechpalehuijtoc miyac. Antechtitlanilijque ma nechhualiquili nopa
tomi huan ma nechpalehui.
\v 26 Pero ama yaya tlahuel quinequi mocuepas campa amojuanti pampa
tlahuel motequipacho pampa anquicajque para mococohuayaya.
\v 27 Huan nelía mococohuayaya hasta ya mictinemiyaya. Pero Toteco
quitlasojtlac huan nojquiya nechtlasojtlac na huan yaya mochicajqui.
Pampa sintla mictosquía, noja más nijpiyasquía tequipacholi que
catli nijpiya amantzi.
\v 28 Yeca achi más nimoisihuiltía nimechtitlanilis para anpaquise
quema sempa anquiitase, huan ica ya nopa na nojquiya nipaquis.
\v 29 Huajca xijselica Epafrodito ica cuali ipan Toteco huan ica
miyac paquili. Nochipa xiquintlepanitaca nochi sequinoc tlaneltocani
catli monejnemiltíaj xitlahuac quen ya.
\v 30 Quena, quitlali inemilis para quichihuas itequi Cristo huan
ica se quentzi mictosquía. Nechchihuiliyaya nopa tlamantli catli
amo anhuelque antechchihuilijque pampa anitztoyaj huejca.
\c 3
\s Se toyolo catli xitlahuac iixpa Toteco
\p
\v 1 Huan ama, noicnihua, xipactoca ipan Tohueyiteco. Para na amo ya
se tequitl para sempa nimechilhuis catli ya nimechilhuijtoc. Huan
cuali para amojuanti sintla sempa nimechilhuis.
\v 2 Xitlachixtoca ica nopa amo cuajcualme catli mosisiníaj quen
chichime huan quinpactía motequilíaj inintlacayo. Amo melahuac
inincamanal. Tlamachtíaj para nochi tlacame monequi ma motequilica
nopa machiyotl itoca circuncisión para huelis momaquixtise tlen
inintlajtlacolhua.
\v 3 Pero nelía eltoc tojuanti catli tijpiyaj nopa machiyotl o nopa
circuncisión catli nelía ipati, pampa tojuanti tijhueyichihuaj
Toteco Dios ica itlapalehuil Itonal Toteco. Tojuanti amo
timotemachíaj ipan catli se tlacatl quichihuilijtoc totlacayo.
Timotemachíaj ipan Cristo Jesús huan catli yaya techchihuilijtoc.
\v 4 Na achi más que sequinoc nihueltosquía nimotemachijtosquía
ipan catli na niitztoya para nimotlajtlacolquixtilijtosquía. Pampa
na achi más nijchijtinemiyaya nopa tlamantli catli israelitame
moilhuíaj temaquixtisquía.
\v 5 Nechtzontequilijque nopa machiyotl ipan notlacayo quema
nijpiyayaya chicueyi tonali. Nitlacatqui niisraelita pampa niiteipan
ixhui Benjamín, icone Israel ica catli pejqui nochi israelitame
huejcajya. Nicamanalti hebreo pampa nelnelía nihebreo tlacatl. Huan
teipa quema nimotlacachijqui, nimochijqui se nifariseo, inijuanti
catli achi más chicahuac quintoquilíaj itlanahuatilhua Moisés.
\v 6 Huan pampa tlahuel niquintoquili inintlanahuatilhua nopa
fariseos, nijtlatzacuiltiyaya itiopa Toteco, o nochi masehualme
catli quineltocaj Cristo. Huan amo aqui huelqui nechtelhui ica
itlanahuatilhua Moisés, pampa nimomocuitlahui para nijchihuas nochi
catli nopa tlanahuatilme quiijtohuaj para xitlahuac.
\p
\v 7 Pero nochi nopa tlamantli catli achtihuiya nimoilhuiyaya para
tlahuel ipati, teipa niquitac para amo tleno ipati quema nijmachili
catli Cristo nechchihuili.
\v 8 Quena, niquita nochi sequinoc tlamantli quen amo tleno ipati.
Ama san nijnequi niquiximatis Jesucristo, nohueyiTeco, huan san ya
nopa niquita para hueyi ipati. Huajca ama nijtlahuelcajtoc nochi
catli nijchihuayaya huan catli achtihui nieliyaya. Huan niquita
nochi nopa tlamantli san quen tlasoli para huelis nijpiyas
Jesucristo,
\v 9 huan nielis nitlatzquitoc ipan ya. Ama nijmati para amo
niitztoc xitlahuac iixpa Toteco por catli nijchihuayaya quema
niquintoquiliyaya nopa tlanahuatilme. Pero Toteco nechchijqui
nixitlahuac quema nijneltocac Cristo. Pampa Toteco quinchihua
masehualme xitlahuaque iixpa por inintlaneltoquilis.
\v 10 Huajca ama huelis niquiximatis Cristo huan nelía nijmachilis
nopa hueyi chicahualistli ica catli moyolcuic. Ama pampa niiaxca,
huelis nitlaijiyohuis san se quentzi quen yaya tlaijiyohui. Quej ni
huelis niitztos ica noyolo nel cuali quen yaya quipiyayaya quema
miquiyaya.
\v 11 Quena, huan nochi nijchihua pampa quema nimiquis, nijnequi
nimoyolcuis huan niquisas campa mijcatzitzi.
\s Pablo quinejqui monejnemiltis noja más cuali
\p
\v 12 Amo niquijtohua para ya nicaxili nochi ni tlamantli, niyon amo
hueli niquijtos para amo onca niyon se notlajtlacol. Pero mojmostla
nijchihua campica para nijchihuas más catli tlahuel cuali para se
tonal nicaxilis nopa catli Jesús quinequiyaya ma nielis quema yaya
nechmaquixti huan nechnotzqui para ma nieli niiaxca.
\v 13 Noicnihua, amo ninemi nelía cuali quen nijnequi ninemis. Pero
ya ni nijchihua: Mojmostla niquelcahua catli nijchijqui yalohua huan
san nimonejnehuilía catli cuali huelis nijchihuas ama.
\v 14 Mojmostla ica nochi noyolo nijchihua campica para ninejnemis
nelía cuali. Nijnequi nielis quen se tlatlanquetl catli motlalohua
hasta itlamiya huan yeca quinotzase para yas huejcapa para quiselis
catli quitlantoc. Nijnequi nijselis nopa tlatlancayotl catli
nechmacas Toteco Dios. Yaya catli technotztoc ipan Jesucristo para
ma tiyaca huejcapa hasta ilhuicac para tijselise catli onca para
tojuanti.
\p
\v 15 Nochi antlaneltocani catli ya anquipiyaj tetili ipan Cristo
monequi ximoilhuica quen na huan xijtemoca mojmostla quenicatza
anhuelise anmonemiltise noja más cuali. Huan sintla sequin
amojuanti anmoilhuíaj para ayacmo tleno más anmechpolohua para
anmonejnemiltise nelía cuali, huajca Toteco anmechnextilis para
ayamo anquiaxilíaj para anquichihuase nochi catli senquistoc
xitlahuac.
\v 16 Pero mojmostla ma tiitztoca nelía tixitlahuaque pampa
tijmatij icamanal quiijtohua para ya techchijtoc tixitlahuaque
iixpa.
\p
\v 17 Noicnihua, nochi amojuanti xijchihuaca quen na nijchihua.
Nojquiya ximomacaca cuenta ajqueya más monemiltíaj cuali quen
tojuanti.
\v 18 Nimechilhuijtoc ya ni miyacpa huan ama nichoca para sempa
nimechilhuis. Itztoque miyaqui masehualme catli quiijtohuaj
quitoquilíaj Cristo, pero ica ininnemilis quinextíaj para
quicualancaitaj catli yaya quinchihuili quema mijqui ipan cuamapeli.
\v 19 Nopa masehualme polihuise para nochipa. Amo quema moilhuíaj
tlen Toteco. San moilhuíaj catli quinequij inintlacayo huan
sentlacuaj se tonal. Monequi mopinahuasquíaj ica nochi catli fiero
quichijtoque, pero inijuanti mohueyimatij. Nopa masehualme san
moilhuíaj catli eltoc ipan ni tlaltipactli.
\v 20 Pero tojuanti amo tiitztoque quej nopa. Tojuanti ayacmo
tiehuaj nica, tiehuani nepa ilhuicac campa itztoc Tohueyiteco. Huan
titlachixtoque para quema Totemaquixtijca Tohueyiteco Jesucristo
sempa hualas tlen nepa.
\v 21 Huan quema hualas, yaya techpatilis totlacayo catli teicneltzi
catli ama timasehualme tijpiyaj para elis quen ya itlacayo catli
yancuic catli eltoc onpano cuajcualtzi. Huan Jesucristo huelis
techpatilis totlacayo pampa quipiya nopa chicahualistli catli más
hueyi catli quimaca tlanahuatili ica nochi masehualme huan nochi
catli onca.
\c 4
\s Xipactoca nochipa ipan Tohueyiteco
\p
\v 1 Huajca, noicnihua, na nelía nimechicnelía miyac huan ica
nochi noyolo nijnequi nimechitati pampa tlahuel antechmacaj
paquilistli. Anitztoque quen se tlatlancayotl para na catli
nijtlantoc pampa nimechilhui icamanal Toteco. Xijsenhuiquilica
xiitztoca antemachme ipan Toteco. Nimechicnelía miyac.
\p
\v 2 Nijnequi niquintlajtlanis nopa sihuame Evodia huan Síntique ma
motlapojpolhuica se ica seyoc huan ma quipiyaca san se
inintlalnamiquilis ipan Jesucristo.
\v 3 Quena, huan nojquiya nimitztlajtlanía ta catli nelía
titequiti nohuaya para xiquinpalehui nopa sihuame ma moyoltlalica.
Inijuanti tequititoque chicahuac para nechpalehuijque
tiquinilhuijque masehualme icamanal Toteco. Nojquiya Clemente huan
sequinoc toicnihua quinpalehuijque para teilhuise icamanal. Nochi
inijuanti quipiyaj inintoca ijcuilijtoc ipan nopa amatlapohuali nepa
ilhuicac campa ijcuilijtoque nochi catli quipiyaj nemilistli yancuic
para nochipa.
\p
\v 4 Nochipa xipactoca ipan Tohueyiteco. Sempa nimechilhuía,
xipactoca.
\v 5 Ma quiitaca nochi masehualme quenicatza anquichihuilíaj catli
cuali aqui hueli masehuali. Xiquelnamictoca nechcatitoc para sempa
hualas Tohueyiteco.
\p
\v 6 Ayacmo ximotequipachoca ica niyon se tlamantli. Más cuali
ximotlatlajtica ica Toteco ipan nochi catli anmechpanotihuala.
Xijtlajtlanica ma anmechmaca nochi catli monequi huan
xijtlascamatica ica nochi catli anmechchihuilijtoc.
\v 7 Sintla quej nopa anquichihuaj, Toteco anmechmacas se
tlasehuilistli ipan amoyolo catli masehualme amo hueli quimachilise.
Huan nopa tlasehuilistli quiyahualtzacuas amoyolo huan
amotlalnamiquilis huan quinmocuitlahuis pampa Toteco
anmechtlatzquiltijtoc ipan Cristo.
\s Ximonejnehuilica tlen catli cuali
\p
\v 8 Huan ama noicnihua, techtlacaquilica. San ya ni para
nijtlamiltis ni tlajcuiloli. Ipan amotlalnamiquilis san
ximonejnehuilijtinemica tlen tlamantli catli melahuac huan catli
nochi quitlepanitaj. Ximonejnehuilica tlen nopa tlamantli catli
xitlahuac huan catli tlapajpactic. Ximonejnehuilica tlen tlamantli
catli tlapalehuíaj huan catli nochi masehualme quicualitaj. Quena,
sintla anquicaquij tlen catli hueli tlamantli catli nelía cuali
huan catli nochi masehualme quihueyitlalíaj, ipan ya nopa
ximonejnehuilica.
\p
\v 9 Xijsenhuiquilica xijchihuaca nochi nopa tlamantli catli
nimechmachtijtoc o nimechijcuilhuilijtoc. Quena, nochi catli
anquicactoque huan anquiitztoque para nijchihua, ya nopa xijchihuaca
huan itztos amohuaya Toteco Dios catli temaca paquilistli.
\s Altepetl Filipos ehuani quimacatoyaj tomi Pablo
\p
\v 10 Na nipaqui miyac huan nijtlascamati Toteco pampa sempa
antechelnamijque huan antechtitlanilijque se quentzi tlen ica
nimopanoltis. Nijmati para nochipa anquinectoque antechpalehuise,
pero panoc tonali quema amo anquipixque quenicatza antechpalehuise.
\v 11 Amo nimechilhuía para nimotequipachohuayaya pampa
nechpolohuayaya catli nechmonequilía. Ya nimomatqui para nijpiyas
paquilistli ica tlen hueli catli nechpanotihuala.
\v 12 Nipaqui quema tlahuel pilquentzi nijpiya catli nechmonequilía
huan nojquiya nipaqui quema nijpiya hasta mocahua. Nipaqui quema
nimayana huan quema niixhuitoc. Nipactoc ica miyac o ica quentzi.
\v 13 Nochi nihueli nijchihua ica Cristo catli mojmostla nechmaca
chicahualistli.
\v 14 Pero masque nipaqui ica catli onca, anquichijtoque cuali quema
antechpalehuijque ipan ni tlaohuijcayotl.
\p
\v 15 Ya anquimatij para niyon se tiopamitl tlen tlaneltocani
nechpalehuijque ica tomi quema achtihuiya nimechilhui icamanal
Toteco huan teipa quema niquisqui amotlal Macedonia para niyajqui
ipan sequinoc tlalme. San amojuanti catli anehuaj altepetl Filipos,
quena, antechpalehuijque huan yeca anquiselijque itlatiochihualis
Toteco.
\v 16 Hasta quema nojquiya nimocahuayaya ipan altepetl Tesalónica,
ompa o expa antechtitlanilijque tomi para catli nechmonequilisquía.
\v 17 Amo nipaqui san pampa antechmacaque tlen ica nipanos, más
nipaqui pampa nijmati Toteco paqui ica nopa cuali tequitl catli
anquichijtoque. Huan yeca yaya quitlalis ipan amocuenta, huan
anmechtlaxtlahuis huan anmechtiochihuas.
\v 18 Ama ica ni tomi catli antechtitlanilijque ica Epafrodito,
nijpiya nochi catli monequi. Nelía nijpiya hasta mocahua. Catli
antechmacatoque quipactía Toteco quen anquimacatosquíaj se
tlacajcahualistli huan itlaajhuiyacayo nopa tlacajcahualistli
mijyotía ajhuiyac huan tlejco hasta ilhuicac.
\v 19 Huan Noteco anmechmacas amojuanti nochi catli anmechpolohua
pampa tlahuel miyac iricojyo nepa ipan ilhuicac huan techmacas por
catli Cristo Jesús techchihuilijtoc.
\v 20 Ma tijhueyichihuaca Toteco Dios yaya catli Totata para
nochipa. Quena, ma amo quema tijtlamiltica tijhueyichihuaj. Quej
nopa ma eli.
\s Pablo quinhualtlajpalo
\p
\v 21 Xiquintlajpaloca nochi catli tlatzejtzeloltic ipan Cristo
Jesús, quinequi quiijtos nochi toicnihua. Toicnihua catli itztoque
nica nohuaya anmechontlajpalohuaj.
\v 22 Huan nochi sequinoc catli iaxcahua Toteco nica ipan ni
altepetl anmechontlajpalohuaj. Achi más anmechontlajpalohuaj catli
iaxcahua Toteco catli tequitij ipan nopa hueyi cali para nopa hueyi
tlanahuatijquetl, César.
\p
\v 23 Tohueyiteco Jesucristo ma quipiya hueyi iyolo ica amojuanti.
Quej nopa ma eli.