\id COL
\h COLOSENSES
\mt Nopa Amatlajcuiloli catli Pablo Quintlajcuilhui Tlaneltocani
ipan Altepetl Colosas
\c 1
\s Pablo quintlajcuilhui tlaneltocani ipan Colosas
\p
\v 1 Na niPablo. Toteco Dios ica ipaquilis nechtequitlali ma nieli
niitlayolmelajca Jesucristo. Na ihuaya toicni Timoteo,
\v 2 timechtlajcuilhuíaj amojuanti catli anitlatzejtzeloltijca
masehualhua Toteco ipan altepetl Colosas, amojuanti catli temachtli
antoicnihua ipan Cristo. Toteco Totata huan Toteco Jesucristo ma
quipiyaca hueyi ininyolo ica amojuanti huan ma anmechmacaca
tlasehuilistli ipan amoyolo.
\s Pablo motlatlajti por nopa tlaneltocani
\p
\v 3 Nochipa timotlatlajtíaj ica Toteco Dios, yaya catli iTata
Tohueyiteco Jesucristo huan tijtlascamatij por amojuanti.
\v 4 Tijcactoque quenicatza nelía cuali anquineltocatoque Cristo
Jesús huan quenicatza miyac anquinicnelíaj nochi
itlatzejtzeloltijca masehualhua Toteco.
\v 5 Nijmati anquichihuaj nochi ya ni pampa anquichiyaj anquiselise
nopa paquilistli catli Toteco quiajoctoc para anmechmacas nepa
ilhuicac. Ya nopa anquichixtihualajtoque hasta quema achtihuiya
anquicajque icamanal Toteco catli melahuac,
\v 6 catli ajsic campa amojuanti. Ama nopa camanali ajsitoc campa
hueli ipan tlaltipactli huan moscaltía huan quipixtihuala itlajca
pampa más masehualme quineltocatihualajtoque quen panoc ica
amojuanti. Quena, moscaltijtiyajtoc icamanal Toteco campa amojuanti
hasta tlen nopa achtihui tonal quema anquicajque huan
anquimachilijque para melahuac hueyi iyolo Toteco ica tojuanti.
\v 7 Epafras catli tiquicnelíaj miyac elqui catli achtihui yajqui
anmechmachtito icamanal Toteco. Yaya se itequipanojca Cristo catli
nelía temachtli catli tijtitlanij campa amo hueli tiyohuij.
\v 8 Yaya catli techilhuijtoc quenicatza Itonal Toteco
anmechpalehuijtoc para miyac xiquinicnelica sequinoc.
\p
\v 9 Huajca, hasta quema achtihuiya tijcajque tlen amojuanti
timotlatlajtijtoque ica Toteco por amojuanti huan tijtlajtlanijtoque
para xijmatica senquistoc nochi catli Toteco quinequi quichihuas
ipan amonemilis. Tijtlajtlaníaj ma anmechmaca tlalnamiquilistli
para cuali xijmachilica nochi catli Itonal Toteco tenextilía.
\v 10 Quej nopa anquipiyase amonemilis quen quinamiqui quipiyase
masehualme catli iaxcahua Toteco huan anquipactise ipan nochi
tlamantli catli anquichihuase. Huan pampa anquineltocaj,
anquinchihuilise sequinoc catli cuali huan mojmostla más
anquiiximajtiyase Toteco.
\v 11 Tijtlajtlaníaj Toteco ica ihueyi chicahualis ma anmechmaca
nopa tetili catli monequi para anquiijiyohuise nochi catli
anmechpanotihuala huan para noja anquipiyase amohuexyol ica nochi
masehualme.
\v 12 Huan yeca ica paquilistli huelis anquitlascamatise Toteco
Totata catli techcualtlalijtoc nojquiya ma tijselica nopa
tlatiochihualistli nepa campa tlahuili ininhuaya nochi sequinoc
itlatzejtzeloltijca masehualhua Toteco.
\v 13 Pampa Toteco techtojtontoc tlen Amocualtlacatl catli
tlanahuatía campa tzintlayohuilotl huan techtlalijtoc campa
tlanahuatía Icone, Jesús, catli yaya tlahuel quiicnelía.
\v 14 Huan Jesús techcojtoc ica ieso para huelis techtojtomas tlen
catli amo cuali huan techtlapojpolhuijtoc nochi totlajtlacolhua.
\s Toteco temaca tlasehuilistli ipan Jesucristo
\p
\v 15 Cristo catli tiquitztoque itztoc iixcopinca Toteco Dios catli
amo aqui hueli quiita. Cristo ipa itztoya hasta quema ayamo tleno
oncayaya catli tlachijchihuali. Huan yaya catli quipiya tlanahuatili
ica nochi tlamantli catli Toteco teipa quichijqui.
\v 16 Quena, Toteco quitequimacac Cristo ma quichijchihua nochi
catli onca ipan ilhuicac huan nochi ipan tlaltipactli.
Quichijchijqui nochi tlamantli catli hueli tiquitaj huan nojquiya
quinchijchijqui nochi catli amo hueli tiquinitaj quen inijuanti
catli mosehuíaj campa más tequiticayojque, huan inijuanti catli
hueyitilisyojque, huan catli tlanahuatilyojque huan
chicahualisyojque. Nochi tlamantli Tohueyiteco Jesucristo
quinchijchijqui huan nochi iaxcahua para ma quichihuaca catli yaya
quinequi.
\v 17 Cristo ipa itztoya quema ayamo tleno oncayaya huan nochi
tlamantli catli tlachijchihuali motlatzquilijtoc ica ichicahualis.
\v 18 Jesucristo yaya itzonteco itlacayo, quinequi quiijtos itiopa,
o nochi tojuanti catli tijneltocaj. Quena, yaya totlayacanca. Yaya
catli achtihui moyolcuic tlen nochi mijcatzitzi para ipan nochi
tlamantli yaya elis catli más hueyi.
\v 19 Toteco Totata ica senquistoc nochi ihueyitilis itztoc ipan
Cristo pampa ya ipaquilis para ma itztoca san se.
\v 20 Toteco quichijtoc para nochi catli itztoque ipan ilhuicac huan
ipan tlaltipactli hueli moyoltlalise ihuaya ya por catli Cristo
quichijqui quema mijqui huan quitoyajqui ieso ipan cuamapeli. Huajca
ama catli itztoyaj icualancaitacahua hueli quipiyase tlasehuilistli
ica ya.
\p
\v 21 Huajca amojuanti nojquiya catli achtihuiya
anmohuejcatlalijtoyaj tlen Toteco Totata, huan ipan
amotlalnamiquilis anquicualancaitayayaj huan anquichijtinemiyayaj
catli amo cuali,
\v 22 ama Jesucristo anmechyoltlalijtoc ica ya. Pampa Jesucristo
mocuepqui masehuali huan mijqui ipan cuamapeli para huelis
technextis iixpa Toteco titlatzejtzeloltique huan ica niyon se
totlajtlacol. Ama amo aqui huelis techtelhuis iixpa ica niyon se
tlamantli.
\v 23 Huajca monequi xijneltocatinemica huan ximocahuaca cuali
anmotlatzquilijtoque ipan catli anquineltocaj. Amo xijcahuaca nopa
temachili catli anquimatque quema achtihuiya anquicajque icamanal
Toteco. Ama miyac masehualme tlacamanalhuijtoque icamanal campa
hueli techaj ipan ni tlaltipactli huan Toteco nechchijtoc na niPablo
niitequipanojca para nojquiya ma niquincamanalhui masehualme ni
camanali.
\s Toteco quitequitlalijtoc Pablo para itequipanojca
\p
\v 24 Huan ama nipaqui pampa nitlaijiyohuía se quentzi por
amojuanti. Cristo miyac tlaijiyohui por itlacayo, itiopa, huan na
nojquiya ipan notlacayo nijtlamiltía se quentzi nopa
tlaijiyohuilistli catli polihui pampa nijtequipanohua itiopa.
\v 25 Huan elqui Toteco catli nechtequitlalijtoc ma nieli
niitequipanojca itiopa. Quena, ni tequitl nechmacatoc para ma
nimechilhuis catli amo anisraelitame nochi icamanal para ma
nimechpalehui.
\v 26 Quena, monequi nitlacamanalhuis ni camanali catli tlen
huejcajya amo aqui quimatiyaya pampa Toteco quitlatijtoya, pero ama
yaya technextilijtoc nochi tojuanti catli tiitlatzejtzeloltijca
masehualhua.
\v 27 Pampa Toteco quinejqui ma quimatica nochi tlaneltocani para
iricojyo huan ihueyitilis Cristo eltoc nojquiya para amojuanti catli
amo anisraelitame. Huan masque achtihui amo aqui quimatiyaya,
quinequi xijmatica para ama Cristo nojquiya hualitztoc ipan amoyolo
amojuanti catli amo anisraelitame, huan yeca amojuanti nojquiya
huelis anquichiyase para anyase ilhuicac campa anquipiyase se parte
ipan ihueyitilis.
\p
\v 28 Yeca campa hueli campa tiyohuij tiquinilhuíaj nochi
masehualme tlen Cristo huan tiquintlalnamictíaj huan
tiquinmachtíaj ica nochi nopa tlalnamiquilistli catli Toteco
techmacatoc. Tijnequij nochi masehualme ma elica chicajtoque huan
senquistoc cuajcualme ipan Cristo ipan nopa tonal quema
tiquinnextise iixpa Toteco.
\v 29 Yeca nitequiti chicahuac ica nochi nopa chicahualistli catli
Cristo nechmaca.
\c 2
\p
\v 1 Nijnequi xijmatica quenicatza nimotequipachohua huan
nimotlatlajtía por amojuanti huan nopa tiopamitl tlen tlaneltocani
ipan altepetl Laodicea huan por nochi sequinoc tlaneltocani catli
amo quema nechitztoque.
\v 2 Nimotlatlajtía ica Toteco para ximoyolchicahuaca huan
ximotlatzquilica ica itlaicnelijcayo. Nojquiya nijtlajtlanía para
xijpiyaca temachili pampa anquimachilíaj nochi nopa
tlalnamiquilistli catli Toteco quisencajqui catli achtihuiya elqui
motlatijtoc. Huan nopa elqui nochi catli quinchihuilisquía
masehualme ica Cristo.
\v 3 Ipan Cristo tijpantise nochi tlalnamiquilistli huan nochi
tlamachiltili.
\v 4 Ya ni nimechilhuía para amo anmechcajcayahuase inijuanti catli
yejyectzi camanaltij huan quinequij anmechhuicase ipan seyoc
tlamachtili.
\v 5 Masque niitztoc huejca tlen amojuanti, noyolo itztoc amohuaya
huan nipaqui pampa nijcaqui para anmonejnemiltíaj nelía cuali huan
para anquineltocaj Cristo ica nochi amoyolo.
\s Nopa yancuic nemilistli ipan Cristo
\p
\v 6 Anquineltocaque Jesucristo quen amoTeco huan anquiselijque quen
nopa Cristo catli Toteco quititlanqui, huajca ama quej nopa xinemica
anmotlatzquilijtoque ipan ya.
\v 7 Quen monequi inelhuayo se cuahuitl ma motlatzquilijti
huejcatla, amojuanti nojquiya ximotlatzquilica ipan Cristo huan
xijcahuaca para yaya ma anmechchihua senquistoc antemachme ipan
catli anquineltocaj quen timechmachtijtoque. Huan nochipa
xijtlascamatica miyac Toteco ica nochi amoyolo para nopa catli
anmechchihuilijtoc.
\p
\v 8 Ximomocuitlahuica para amo aqui anmechcajcayahuas ica miyac
camanali yejyectzitzi tlen inintlalnamiquilis huan quej nopa
anmechilpise ipan catli amo melahuac huan catli amo ipati. Catli
inijuanti anmechmachtíaj huala tlen inintlalnamiquilis masehualme
huan tlen ajacame huan amo catli xitlahuac. Inijuanti amo
anmechmachtíaj tlen Cristo.
\p
\v 9 Cristo itztoc senquistoc Dios huan senquistoc se tlacatl catli
quipiya itlacayo.
\v 10 Ama anmechtlatzquiltijtoc ipan ya, huan yeca ayacmo tleno
anmechpolohua para anelise senquistoc ancuajcualme. Yaya quipiya
tlanahuatili ica nochi tlamantli catli chicahualisyojque huan catli
tlanahuatilyojque catli campa hueli itztoque.
\v 11 Huan quema anquiselijque Cristo, amo elqui se masehuali catli
anmechmachiyoti ica imax. Pero yaya Cristo anmechmacac se machiyotl
catli amo nesi, pampa anmechmachiyoti quema anmechquixtili
itequiticayo nopa catli fiero catli eltoya amopani tlen san
quinequiyaya tlajtlacolchihuas.
\v 12 Quema Itonal Toteco anmechtlali ipan Cristo, elqui quen
anmijque huan anmechtlalpachojque ica Cristo. Huan teipa Toteco
anmechyolcuic pampa anmotemachijque ipan ihueyi chicahualis catli
quiyolcuic Cristo quema yaya mictoya. Huan ya ni catli tijnextíaj
quema timocuaaltíaj.
\p
\v 13 Achtihuiya anitztoyaj quen anmictoque iixpa Toteco pampa san
antlajtlacolchijtinemiyayaj huan amo anquitemohuayayaj Toteco pampa
amo anisraelitame. Pero ama quena, Toteco anmechyolcuitoc ihuaya
Cristo huan anmechtlapojpolhuijtoc nochi amotlajtlacolhua.
\v 14 Sesen tojuanti tijpixtoyaj quen se amatl catli techtelhuiyaya
tlen tlajtlacoli tijchijtoyaj huan catli titlahuicayaya iixpa
Toteco. Pero Cristo quitlali nopa amatl ica totlajtlacolhua ipan
icuamapel huan nepa quisemanqui nochi catli ica techtelhuiyaya.
Quichijqui ni quema mijqui por tojuanti.
\v 15 Huan Cristo quiquixtili ichicahualis Amocualtlacatl huan
iajacahua catli tlanahuatilyojque huan catli chicahualisyojque huan
quinpinahualti tlamiyacapa quema quintlanqui ipan icuamapel.
\s Xijtemoca tlamantli catli ipati iixpa Toteco
\p
\v 16 Huajca amo xiquintlacaquilica catli anmechtelhuíaj huan
quiijtohuaj para amo cuali catli anquicuaj huan catli anquiijij.
Quiijtohuaj monequi anilhuichihuase para Toteco ipan yancuic metztli
huan ipan sequinoc tonali quen israelitame quichihuaj huan monequi
anquitlepanitase nopa tonali quema mosiyajquetzaj israelitame.
\v 17 Quema ayamo hualayaya Cristo, ni tlanahuatilme elque quen se
tlaecahuilotl catli tlayacanqui tlen catli hualayaya teipa. Pero ama
hualajtoc Cristo yaya catli más ipati, huan ayacmo ipati nopa
tlanahuatilme catli huejcajya.
\v 18 Amo xiquintlacaquilica nopa masehualme catli quinequij xiyaca
ipan seyoc ojtli para amo anquiselise nopa tlatlancayotl catli
anmechchiya ipan ilhuicac. Nopa masehualme quichihuaj quen nelía
moechcapantlalíaj, pero amo neli. Quiijtohuaj monequi
xiquinhueyimatica tequihuajme huan para quiselijtoque ni tlamachtili
ipan temictli huan yeca más quipiyaj inintlalnamiquilis.
Inintlajtlacolchijca tlalnamiquilis quinchijtoc ma mohueyimatica
miyac.
\v 19 Pero inijuanti amo motlatzquilijtoque ipan Cristo, totzonteco
nochi titlaneltocani catli tiitztoque ipan itlacayo. Pero tojuanti,
quena, tiitztoque san sejco ipan itlacayo huan timotlatzquilijtoque
ica itlalijcho. Huan timoscaltíaj san quema tijselíaj nopa
chicahualistli catli huala tlen Toteco.
\p
\v 20 Amojuanti anmijque quema Cristo mijqui, huan yaya
anmechtojtonqui tlen inintlamachtil ajacame ipan ni tlaltipactli.
Huajca ayacmo xiquincahuilica ma anmechnahuatica nopa
piltlanahuatiltzitzi catli inijuanti quichijtoque,
\v 21 catli quiijtohuaj: “Amo xiquitzquica o amo xijnechcahuica ni
tlamantli, o amo xijcuaca ne tlacualistli, o niyon amo xijtoxomaca
nopa.” Niyon quentzi amo xiquinchihuilica cuenta ni tlanahuatilme.
\v 22 Inijuanti san anmechmacaj tlanahuatilme huan tlamachtilistli
catli masehualme quichijtoque. Nochi tlacualistli tlami quema
tijtequihuíaj huan amo hueli anmechyolijtlacos.
\v 23 Huelis ni tlanahuatilme nesij para cuali pampa monequi se
masehuali ma moneltlalis para senquistoc quintoquilis. Huan catli
quitoquilíaj ni tlanahuatilme motlaijiyohuiltíaj miyac, huan
moechcapantlalíaj miyac, huan tlahuel monahuatíaj para amo
quinixpanose ni tlanahuatilme. Pero niyon quentzi, amo tleno ipati
para se quintoquilisquía nopa tlanahuatilme. Amo quema quipalehuis
nopa masehuali ma quitlani nopa tlajtlacoli catli inacayo huan
itlajtlacolchijca tlalnamiquilis quinequi quichihuas.
\c 3
\p
\v 1 Pero Toteco anmechyolcuitoc ihuaya Cristo, huajca ximoilhuica
catli eltoc nepa ilhuicac campa Cristo mosehuijtoc inejmac Toteco
campa más onca tlatlepanitacayotl.
\v 2 Quena, san ximonejnehuilica catli eltoc huejcapa, amo
ximoilhuica tlen catli eltoc ipan ni tlaltipactli.
\v 3 Anmijque nica ihuaya Cristo huan ama amonemilis eltoc temachtli
nepa ica Cristo pampa ama ya anitztoque nepa ica Toteco.
\v 4 Huan se tonal quema sempa mohualnextiqui Cristo, yaya catli
tonemilis, amojuanti nojquiya anmonextise ihuaya huan anquipiyase
amohueyitilis quen yaya quipiya.
\s Tonemilis catli achtihui huan tonemilis catli yancuic
\p
\v 5 Huajca ximomacaca cuenta para ya mictoc amotlajtlacolchijca
tlalnamiquilis huan ayacmo xijchihuaca catli anmechnotza
xijchihuaca. Amo xijchihuaca tlen hueli ica catli amo amonamic. Amo
ximoilhuica catli amo cuali. Amo xijtoquilica tlen fiero catli
quinequi amotlacayo. Amo ximoilhuica tlamantli catli eli se
pinahualistli. Amo xijnequica anquipiyase más tlamantzitzi
mojmostla, pampa masehualme catli quej nopa quichihuaj,
quihueyimatij catli quipiyaj quen elisquía se dios huan ayacmo
quihueyimatij Toteco.
\v 6 Huajca ihueyi cualancayo Toteco quinajsis nochi masehualme
catli quichihuaj ni tlamantli pampa amo quitlepanitaj.
\v 7 Achtihuiya nojquiya anquichijtinemiyayaj nopa tlamantli quema
anitztoyaj quen nochi sequinoc masehualme ipan ni tlaltipactli.
\v 8 Pero ama, ayacmo xijchihuaca. Ayacmo ximocualanica, ayacmo
ximochihuaca anyolquentzitzi, ayacmo xitecualancaitaca, ayacmo
xitetlaijilhuica, huan ayacmo xiquijtoca fiero camanali.
\v 9 Ayacmo ximoistlacahuica se ica seyoc pampa quen se moquixtilía
itlaque sosoltic, ya anmoquixtilijtoque amotlajtlacolchijca
tlalnamiquilis catli anmechnahuatiyaya huan anquicajtejtoque nochi
nopa fiero tlamantli catli quinequiyaya xijchihuaca.
\v 10 Ama quen se tlacatl catli moquentía iyoyo catli yancuic catli
se quimacatoc, Toteco anmechmacatoc se amonemilis catli yancuic
catli eltoc quen ya. Yeca mojmostla xijchihuaca campica para más
anquiiximajtinemise Cristo huan más anmochihuase quen ya.
\v 11 Ipan ni yancuic nemilistli anquimatij para amo ipati iixpa
Toteco sintla se masehuali itztoc se israelita o amo, sintla
motequilijtoc nopa machiyotl ipan itlacayo o amo. Amo ipati sintla
se masehuali amo tleno quimati hasta san cuatitlan nejnemi, o sintla
tequiti campa quitlaxtlahuía huan hueli yohui campa quinequi, o
sintla monequi quisentequipanos iteco catli quicojtoc para iaxca.
Amo ipati sintla se masehuali ehua se cuali tlali catli nochi
quipiya, o seyoc tlali campa amo tleno cuali onca. San ipati sintla
se masehuali quineltoca Cristo, pampa yaya Cristo catli ipati. Huan
yaya hualitztos ipan aqui hueli masehuali. Huan quema yaya itztoc
ipan toyolo, amo aqui ipati más iixpa que sequinoc, nochi
tiitztoque san se.
\p
\v 12 Huajca pampa Toteco anmechtlapejpenijtoc para anelise
itlatzejtzeloltijca masehualhua catli anmechicnelía miyac, monequi
xiquintlasojtlaca huan xiquinchihuilica sequinoc catli cuali. Sesen
tlen amojuanti ximoechcapantlalica huan xitecamanalhuica ica yamanic
camanali. Xijpiyaca amohuexyol ica nochime.
\v 13 Huajca xijpiyaca amoyolo ica catli anmechchihuilíaj catli amo
cuali huan xiquintlapojpolhuica. Sintla se quitelhuía seyoc ica se
tlenijqui, ma quitlapojpolhui quen Cristo anmechtlapojpolhuijtoc.
\v 14 Huan catli más ipati para anquichihuase, monequi ximoicnelica
huan quej nopa anitztose cuali, pampa tlaicnelijcayotl techilpía
san sejco para ma tijpiyaca san se toyolo.
\v 15 Quema Cristo anmechmaca tlasehuilistli ipan amoyolo para cuali
se tlamantli, huajca ya nopa xijchihuaca, pampa Toteco anmechnotztoc
para xijmatica itlasehuilis san sejco pampa anitztoque ipan san se
tlacayotl. Huan nochipa ximotlascamatica.
\p
\v 16 Xijcahuaca para ma mocahua ipan amoyolo nochi nopa camanali
tlen Cristo huan elis quen anquipantijtoque catli tlahuel ipati.
Ximoyolchicahuaca ica icamanal Toteco huan ximomachtijtinemica se
ica seyoc. Xihuicaca salmos, huan tiohuicatl, huan huicatl catli
quipalehuía amotonaltzi para anquipaquilismacase Toteco. Quena,
xihuicaca huan xijtlascamatica Toteco ica nochi amoyolo.
\v 17 Huan nochi catli anquichihuaj huan nochi catli anquiijtohuaj,
xijchihuaca por itoca Tohueyiteco Jesús. Huan nochipa
xijtlascamatica Toteco Totata por Cristo.
\s Quenicatza ma itztoca familias catli quineltocaj Toteco
\p
\v 18 Xitlacaquica ansihuame catli anquipiyaj amohuehue. Nochi
amojuanti xiquincahuilica amohuehuejhua ma anmechyacanaca quen
quinamiqui para catli iaxcahua Toteco.
\v 19 Xitlacaquica antlacame catli anquipiyaj amosihuajhua. Nochi
amojuanti xiquinicnelica amosihuajhua huan amo ximocualanica
ininhuaya.
\v 20 Huan anconeme, xijchihuaca nochi catli amonana huan amotata
anmechilhuíaj pampa ya nopa catli quipactía Toteco.
\v 21 Xitlacaquica amojuanti catli anquinpiyaj amoconehua. Amo
xiquincualancamacaca amoconehua para ma amo motequipachose.
\p
\v 22 Xitlacaquica antetequipanohuani catli anmechcojtoque
amopatrones. Xijchihuaca nochi catli amopatron nica ipan
tlaltipactli anmechnahuatíaj. Amo xitequitica chicahuac san quema
anmechtlachilíaj. Mojmostla xitequitica ica nochi amoyolo huan
xijchihuaca catli quipactía amoteco masque amo aqui
anmechtlachilía, pero xijchihuaca pampa anquiimacasij huan
anquitlepanitaj Toteco.
\v 23 Xitequitica chicahuac huan ica paquilistli ipan tlen hueli
tlamantli tequitl catli anquichihuaj. Xijmachilica para
anquitequipanohuaj Toteco, amo ximoilhuica sintla san
anquitequipanohuaj se masehuali.
\v 24 Xiquelnamiquica para yaya Toteco catli anmechmacas nopa
tlaxtlahuili catli quinamiqui anquiselise nepa ilhuicac, pampa
nelía Cristo yaya amoTeco huan yaya catli anquitequipanohuaj.
\v 25 Pero sintla amo antequitij quen quinamiqui o sintla
anquichihuaj catli amo cuali, Toteco anmechmacas se tlaxtlahuili
catli amo nelía anmechpactis, pampa Toteco amo techiyocaicnelía
huan nochi masehualme quiselise inintlaxtlahuil quen catli
quichijtoque.
\c 4
\p
\v 1 Xitlacaquica anpatrones catli anquinpiyaj tetequipanohuani
catli anquincojtoque para amoaxcahua. Xiquinchihuilica
amotequipanojcahua catli xitlahuac huan catli cuali pampa anquimatij
nojquiya anquipiyaj amoTeco nepa ilhuicac.
\s Nochi toicnihua monequi ma timotlatlajtica miyac
\p
\v 2 Huan nochi amojuanti nochipa ximotlatlajtijtinemica ica Toteco.
Quema anmotlatlajtíaj, xijtlachixtoca ipan amotlalnamiquilis. Huan
ipan amoyolo xijtlascamatica Toteco por nochi catli anmechmacatoc.
\v 3 Nojquiya amo xiquelcahuaca xijtlajtlanica Toteco por tojuanti.
Xijtlajtlanica para ma techtlapoli se ojtli para más tihuelise
titlacamanalhuise icamanal campa hueli. Nijnequi niquinilhuis más
masehualme nopa tlamantli tlen Cristo catli huejcajya amo aqui
quimatiyaya. Quej nopa nijchihuayaya huan yeca nechtzajque.
\v 4 Xijtlajtlanica Toteco para huelis nitlacamanalhuis icamanal
tlanemijya quen quinamiqui nijchihuas.
\p
\v 5 Ximomocuitlahuica huan ximonejnemiltica ica tlalnamiquilistli
iniixpa catli amo quineltocaj Toteco. Amo san ximotonalpoloca
ininhuaya. Xiquinilhuica icamanal Toteco.
\v 6 Xiquincamanalhuica ica yamanic camanali huan ica camanali catli
echcapantzi, pero melahuac. Huan ximoilhuica quenicatza monequi
anquinanquilise sesen masehuali itlatzintoquil.
\s Pablo quinnahuatijtejqui
\p
\v 7 Toicni Tíquico catli tiquicnelíaj yas anmechilhuiti nochi
catli nechpano nica. Yaya nelía se notlapalehuijca catli temachtli
quitequipanohua Toteco nohuaya.
\v 8 Nimechtitlanilía Tíquico para anquimatise quenicatza
tiitztoque nica huan para yaya huelis anmechyolchicahuas.
\v 9 Nojquiya ihuaya Tíquico nimechtitlanilía toicni Onésimo
catli tiquicnelíaj. Yaya nojquiya se toicni catli temachtli huan
itztoc se tlen amojuanti. Inijuanti anmechilhuise nochi catli pano
nica.
\p
\v 10 Anmechtlajpalohuaj Aristarco catli itztoc ipan tlatzactli
nohuaya huan Marcos imachicni Bernabé. Ya nimechilhuijtoc para
xijselica Marcos ica cuali sintla yas anmechitati.
\v 11 Nojquiya anmechtlajpalohua Jesús catli tojuanti tijtocaxtíaj
Justo. San ni eyi israelita tlaneltocani tequitij nohuaya para
quinnotzase masehualme ma calaquica campa tlanahuatía Toteco, huan
inijuanti nelía nechyolchicajtoque miyac.
\v 12 Nojquiya anmechtlajpalohua Epafras catli ehua nepa campa
amojuanti. Yaya quitequipanohua Toteco nica ica nochi iyolo.
Mojmostla ica miyac chicahualistli quitlajtlanía Toteco por
amojuanti. Quitlajtlanía para xielica antemachme, huan para xielica
quen masehualme catli motlantoque ipan Toteco huan para ma xijmatica
nochi ipaquilis Toteco.
\v 13 Nimechyolmelahua para nopa Epafras nelía motequipachohua
miyac por amojuanti huan nojquiya por toicnihua catli itztoque ipan
altepetl Laodicea huan altepetl Hierápolis.
\v 14 Lucas, nopa tepajtijquetl catli tiquicnelíaj, huan Demas
nojquiya anmechontlajpalohuaj.
\p
\v 15 Xiquintlajpaloca inijuanti catli quineltocaj Toteco nepa
Laodicea. Nojquiya xijtlajpaloca Ninfas huan nopa tiopamitl tlen
tlaneltocani catli mosentilíaj ipan ichaj.
\v 16 Quema ya anquipojtose ni amatlajcuiloli, xiquinpanoltilica
toicnihua catli mosentilíaj ipan altepetl Laodicea para ma
quipohuaca nepa nojquiya. Huan amojuanti xijpohuaca nopa
amatlajcuiloli catli niquintlajcuilhuijtoc tlaneltocani ipan
Laodicea catli anmechmacase teipa.
\v 17 Xiquilhuica Arquipo ni camanali: “Ximotlachili para
tijchihuas nochi nopa tequitl catli Toteco mitzmacatoc xijchihua.”
\p
\v 18 Nica na niPablo nimechtlajcuilhuijtoc ni camanali ica nomax
para nimechtlajpalos. Xiquelnamiquica niitztoc ipan tlatzactli. Ma
Toteco quipiya hueyi iyolo ica amojuanti. Quej nopa ma eli.