\id 1TH
\h 1 TESALONICENSES
\mt Nopa Achtihui Amatlajcuiloli catli Pablo Quintlajcuilhui
Tlaneltocani ipan Altepetl Tesalónica
\c 1
\s Pablo quintlajcuilhui tlaneltocani ipan Tesalónica
\p
\v 1 Na niPablo, ininhuaya Silvano huan Timoteo,
timechtlajcuilhuíaj amojuanti ipan nopa tiopamitl tlen tlaneltocani
ipan altepetl Tesalónica. Antlatzquitoque ipan Toteco Totata huan
ipan Toteco Jesucristo. Toteco ma quipiya hueyi iyolo ica amojuanti
huan ma anmechmaca tlasehuilistli.
\s Quenicatza panotihualajque nopa tlaneltocani
\p
\v 2 Tlatoctzitzi tijtlascamatij Toteco por amojuanti huan
tijtlajtlaníaj ma anmechtiochihua.
\v 3 Nochipa quema timotlatlajtíaj ica Toteco Totata por amojuanti,
tiquelnamiquij quenicatza antequitij chicahuac pampa anquineltocaj,
huan quenicatza anquitequipanohuaj pampa anquiicnelíaj, masque
tlahuel ansiyahuij. Tiquelnamiquij nojquiya quenicatza mojmostla
anquichiyaj para sempa hualasoc Tohueyiteco Jesucristo.
\p
\v 4 Toicnihua, tijmatij para temachtli Toteco anmechicnelía huan
anmechtlapejpenijtoc para anelise aniaxcahua.
\v 5 Huan quema titlacamanalhuijque nopa cuali camanali campa
amojuanti, amo san timechilhuiyayaj camanali catli amo ipati.
Timechilhuijque icamanal Toteco huan nopa camanali quipixqui
chicahualistli pampa Itonal Toteco anmechnextiliyaya ipan amoyolo
para catli tiquijtojque nelía elqui melahuac. Huan anquimatij
tonemilis quema tiitztoyaj nepa amohuaya anmechnextili para melahuac
tocamanal pampa tijnequiyayaj xijneltocaca Toteco.
\p
\v 6 Huan anquitoquilijque tonemachtil huan inemachtil Tohueyiteco,
pampa masque anmechtlaijiyohuiltiyayaj sequinoc masehualme,
anquiselijque icamanal Toteco ica paquilistli catli Itonal Toteco
anmechmacac.
\v 7 Huan yeca anquicajtoque se cuali nemachiltili para ma
quitoquilica nochi tlaneltocani ipan tlali Macedonia huan ipan tlali
Acaya.
\v 8 Huan tlen amojuanti, amo san mosemoyajtoc icamanal Toteco ipan
tlalme Macedonia huan Acaya, ama yajtoc hasta masehualme ipan campa
hueli tlali, pampa campa hueli quitlacaquilijtoque quenicatza ica
nochi amoyolo anquineltocaj Toteco. Yeca ayacmo monequi
tiquinilhuise tlen amojuanti,
\v 9 pampa nopa masehualme ininseltzitzi techpohuilíaj catli
quicactoque para panoc quema timechpaxalojque. Techilhuíaj
quenicatza anmoyolpatlaque huan anquincajque anquinhueyichihuaj nopa
totiotzitzi catli masehualme quinchijtoyaj ica ininmax, huan
anpejque anquitequipanohuaj Toteco catli itztoc huan catli
temachtli.
\v 10 Huan techilhuíaj quenicatza ama anquichiyaj para Jesús,
icone Toteco, sempa ma huala tlen ilhuicac. Quena, Toteco Dios
quiyolcuic Jesús quema mictoya, huan yaya Jesús catli
techmanahuía para amo techajsis ihueyi cualancayo Toteco catli
teipa monextis.
\c 2
\s Quenicatza Pablo quitequipano Toteco nepa Tesalónica
\p
\v 1 Noicnihua, anquimatij amo san tlapic totequi quema
timechhualiquilijque icamanal Toteco.
\v 2 Masque achtihuiya ipan altepetl Filipos titlaijiyohuijque miyac
huan tlacame fiero techchihuilijque, Toteco techpalehui ma tiajsica
campa amojuanti huan ma timoneltlalica timechilhuise icamanal Toteco
masque tonechca itztoyaj miyac catli quinequiyayaj ma ayacmo aqui
tiquilhuise.
\v 3 Huan quema tiquinilhuíaj masehualme icamanal Toteco, amo quema
tiistlacatij, amo quema tijchihuaj catli amo cuali, huan amo quema
tijnequij tiquincajcayahuase.
\v 4 Amo quema tiquincamanalhuíaj masehualme pampa tijnequij ma
tiquinpactica. Pero tijnequi tijpactise Toteco catli achtihui
techyoltlachili huan techmacac icamanal para ma titlacamanalhuica
pampa motemachi ipan tojuanti para tijchihuase. Huajca xitlahuac
tiquincamanalhuíaj masehualme.
\v 5 Huan anquimatij amo quema timechcamanalhuijque para
timechyectlalise, niyon amo quema timechcajcayajque para techmacaca
tomi pampa timechilhuiyayaj icamanal. Toteco quimati nelía
xitlahuac catli niquijtohua.
\v 6 Amo quema tijtemojque para amojuanti, niyon para sequinoc, ma
techhueyichihuaca. Masque tijpiyaj tequiticayotl pampa
tiitlayolmelajcahua Jesucristo para tijselise catli quinamiqui por
totequi.
\v 7 Pero quema tiitztoyaj amohuaya, timechcamanalhuijque ica
yamanic camanali. Timechchihuilijque quen se tenan catli
quiniscaltía iconehua ica miyac teicnelili.
\v 8 Huan pampa timechicnelíaj miyac, amo tijnequiyayaj san
timechilhuise icamanal Toteco catli cuali, pero nojquiya
timictosquíaj por amojuanti, pampa nelía timechicnelíaj.
\v 9 Huan noicnihua, xiquelnamiquica quenicatza titequitiyayaj hasta
tisiyahuiyayaj. Titequitiyayaj yohuali huan tonali para tijtlanise
catli techmonequilía para ma amo timechcuatotonica quema
timechilhuiyayaj icamanal Toteco.
\p
\v 10 Anquiitaque huan Toteco nojquiya quiitac quenicatza
tinejnenque campa amojuanti catli anquineltocaj Toteco. Tijchijque
catli senquistoc cuali huan xitlahuac, huan amo aqui huelis
techtelhuis ica niyon se tlamantli amo cuali.
\v 11 Anquimatij quen timechtlalnamictijque huan timechyolchicajque
sesen amojuanti quen se tetata quinchihuilía iconehua.
\v 12 Timechilhuijque para xinemica xitlahuac quen quinamiqui pampa
Toteco anmechnotzqui para xicalaquica campa yaya tlanahuatía huan
para xijpiyaca amoparte ipan ihueyitilis.
\p
\v 13 Huajca yeca, amo tijcahuaj para tijtlascamatij Toteco pampa
antechtlacaquilijque catli timechilhuijque huan anquiselijque
icamanal Toteco ica paquilistli. Amo anquiselijque san quen
inincamanal masehualme. Anquiselijque quen icamanal Toteco pampa
anquimachilijque para ya nopa catli melahuac elqui. Huan eltoc nopa
icamanal Toteco catli noja quichihua itequi ipan amoyolo amojuanti
catli anquineltocaj Tohueyiteco.
\v 14 Huan ica amojuanti, toicnihua, anmochijque quen nopa tiopame
tlen tlaneltocani catli mosentilíaj ipan tlali Judea pampa san se
anmechtlaijiyohuiltijque masehualme catli san sejco ehuaj amohuaya
quen nopa israelitame catli amo quineltocaj Tohueyiteco ipan
inintlal quintlaijiyohuiltijque.
\v 15 Sequin nopa israelitame quimictijque Tohueyiteco Jesús,
quinmictijque nopa tlajtol pannextiani catli Toteco quintitlanili,
huan nojquiya techtojtocaque tojuanti. Amo quichihuaj catli
quipactía Toteco huan quincualancaitaj nochi masehualme.
\v 16 Quinequiyayaj techtzacuilise para ma amo tiquincamanalhuica
catli amo israelitame para amo ma momaquixtica ipan Toteco. Quej ni,
nopa israelitame nochipa quichihuaj más tlajtlacoli hasta temitoc
ininnemilis ica tlajtlacoli, huan yeca ama ininpani eltoc
icualancayo Toteco.
\s Pablo sempa quinejqui quinpaxalos nopa tlaneltocani nepa
Tesalónica
\p
\v 17 Toicnihua, masque amo tiitztoque nepa amohuaya pampa monejqui
tiquisque para se tlatoctzi, timechelnamiquij ipan toyolo huan
tlahuel tijnequij sempa timechitatij.
\v 18 Nelía tijnequiyayaj timechpaxalotij. Huan na niPablo
nijchijqui campica miyacpa para niyas, pero Amocualtlacatl
nechtzacuili.
\v 19 Tijnequij timechitatij pampa antechmacaj hueyi paquilistli.
Ipan nopa tonal quema Tohueyiteco Jesús sempa hualas huan
timoquetzase iixpa, tijpiyase hueyi paquilistli pampa anitztose nepa
tohuaya. Quena, para timechitase nopona ipan nopa tonal elis quen se
corona para tojuanti.
\v 20 Quena, amojuanti antechmacaj hueyi paquilistli huan yeca
Toteco techhueyitlalis nopona.
\c 3
\p
\v 1 Huajca yeca, quema amo tihueliyayaj timochiyaj más para
tijmatise quenicatza anitztoyaj, nimoilhui cuali para nimocahuas
noseltzi ipan altepetl Atenas,
\v 2 huan para Timoteo ma yohui campa amojuanti. Nijtitlanqui para
ma anmechmacas tetili huan anmechyolchicahuas para más xijneltocaca
Tohueyiteco. Nelía Timoteo se toicni ipan Cristo huan
quitequipanohua Toteco tohuaya para tiquinilhuise masehualme nopa
cuali camanali tlen catli Cristo techchihuilijtoc.
\v 3 Yaya anmechpalehuito para amo aqui moyamanilis para quineltocas
Toteco pampa ya antlaijiyohuíaj por ya, pampa anquimatij Toteco
quitlalijtoc para titlaneltocani ma tijpanoca tlaijiyohuilistli.
\v 4 Huan quema noja tiitztoyaj amohuaya, timechilhuiyayaj se tonal
ajsis tlaijiyohuilistli huan ama quej nopa panotoc quen anquiitaj.
\v 5 Huajca yeca, quema ayacmo huelqui nimochixqui más,
nijtitlanqui Timoteo para quimatis sintla noja chicahuac
anquineltocaj Tohueyiteco para yaya huelis mocuepas huan
nechmatiltis. Nimotequipachohuayaya sintla huelis Amocualtlacatl
anmechcajcayajtosquía huan anmechtlantosquía, huan totequi
eltosquía san tlapic.
\p
\v 6 Pero ama ya mocueptoc Timoteo, huan techilhuijtoc nopa cuali
camanali para noja chicahuac anquineltocaj Tohueyiteco huan para
anteicnelíaj miyac. Techilhuijtoc quenicatza nochipa
antechelnamiquij tojuanti ica cuali, huan quiijto para nelía
anquinequij antechitase quen nojquiya tojuanti tijnequij
timechitase.
\v 7 Yeca toicnihua, masque techpanotihualajtoc miyac tlaohuijcayotl
huan tlaijiyohuilistli nica, techyolchicajqui miyac quema tijmatque
para noja cuali anquineltocaj Tohueyiteco.
\v 8 Huan ama nelía tiyolpaquij huan techmaca yancuic
chicahualistli pampa tijmatij ica temachili anmoquetzaj ipan ya.
\v 9 Yeca amo quema hueli tijtlamitlascamatise Toteco por amojuanti.
Quema timoilhuíaj tlen amojuanti, techmaca miyac paquilistli iixpa
Toteco.
\v 10 Huan tonali huan yohuali tijtlajtlaníaj Toteco chicahuac para
sempa timoixitase. Tijnequij timechpalehuise xijneltocaca
Tohueyiteco achi más cuali sintla oncasquía campa polihui se
quentzi.
\p
\v 11 Huajca Toteco Totata huan Toteco Jesús ma techyacanas para
huelis sempa timechpaxalotij.
\v 12 Huan Tohueyiteco ma anmechpalehuis para ximoicnelica huan
xiquinicnelica nochi sequinoc masehualme hasta onmocahuas
amoteicnelilis, quen nojquiya tojuanti timechicnelíaj.
\v 13 Huan Tohueyiteco ma anmechmacas tetili ipan amoyolo para
anitztose antlatzejtzelolme, huan amo aqui huelis anmechtelhuis
quema anmoquetzase iixpa Toteco Totata quema sempa hualas
Tohueyiteco Jesús ininhuaya nochi sequinoc itlatzejtzeloltijca
masehualhua.
\c 4
\s Se nemilistli catli quipactía Toteco
\p
\v 1 Huajca ama, toicnihua timechtlajtlaníaj chicahuac
ximonejnemiltica quen quipactía Toteco quen tojuanti
timechmachtijtoque. Ya anquichihuaj ya ni, pero tijnequij
timechyolchicahuase ipan Toteco para achi más xijchihuaca.
\p
\v 2 Huan ya anquimatij nopa tlanahuatilme catli timechmacaque ica
itequiticayo Tohueyiteco Jesús.
\v 3 Pampa Toteco quinequi mojmostla más anitztose
antlatzejtzeloltique huan antlaiyocatlalilme tlen tlajtlacoli. Yaya
quinequi para amo aqui tlen amojuanti ma quichihua tlamantli ica se
catli amo inamic.
\v 4 Quinequi sesen amojuanti ma quinahuati se se itlacayo. Quinequi
ximonemiltica quen tlatzejtzelolme iixpa Toteco para nochi
masehualme anmechtlepanitase.
\v 5 Amo quinequi para anquicahuilise amotlajtlacolchijca
tlanequilis ma anmechnahuatis quen quichihuaj masehualme catli amo
quiiximatij Toteco.
\v 6 Huan ma amo aqui quicajcayahuas, niyon quiixpanos, iicni ipan
Cristo ica ni tlajtlacoli huan mocuilis isihua, pampa Toteco
chicahuac quitlatzacuiltis catli ya nopa quichihuas. Ya
timechilhuijque ya ni achtihuiya.
\v 7 Pampa Toteco technotztoc para timochihuase
titlatzejtzeloltique, amo technotztoc para ma tijchihuaca catli
fiero iixpa.
\v 8 Huajca sintla se masehuali quitlahuelcahua ni tlamachtili, amo
quitlahuelcahua se masehuali; yaya quitlahuelcahua Toteco catli
techmacatoc Itonal catli tlatzejtzeloltic.
\p
\v 9 Pero amo monequi timechtlajcuilhuise para timechilhuise
xiquinicnelica amoicnihua, pampa Toteco ya anmechmachtijtoc
quenicatza monequi anmoicnelise se ica seyoc.
\v 10 Huan nelía anquinicnelíaj nochi amoicnihua ipan nochi
amotlal Macedonia. Pero toicnihua, timechtlajtlaníaj para achi más
xiquinicnelica.
\v 11 Xijchihuaca campica para mojmostla anitztose
anmoyoltlalijtoque huan annejnemise ica yoltlasehuilistli. Huan
ximotequihuica ica catli amojuanti amocuenta. Xitequitica cuali ica
amomax quen ya timechnahuatijque.
\v 12 Quej nopa masehualme catli amo quineltocaj Toteco
anmechtlepanitase, huan amo monequis anquintlajtlanise sequinoc
catli anmechmonequilía.
\s Jesucristo sempa hualas
\p
\v 13 Toicnihua, tojuanti tijnequij xijmachilica tlaque panos ica
tlaneltocani catli ya mictoque para amo anmotequipachose quen ne
sequinoc masehualme catli amo mochiyaj para itztose ihuaya
Jesucristo.
\v 14 Tojuanti tijmatij para Jesús mijqui huan sempa moyolcuic,
yeca nojquiya tijneltocaj para Toteco Dios quichihuas para toicnihua
catli ya mictoque ma hualaca ihuaya Jesús quema yaya sempa hualas.
\p
\v 15 Huan timechilhuíaj ya ni catli Tohueyiteco techilhui.
Tojuanti catli noja tiitztose huan timocajtose ipan tlaltipactli
quema sempa hualas Tohueyiteco, amo titlejcose huan
tiquintlayacancuilise nopa tlaneltocani catli ya mictoque.
\v 16 Pampa yaya Tohueyiteco tzajtzis ica hueyi tlanahuatili huan
hualtemos tlen ilhuicac. Huan itequihua Toteco catli más quipiya
chicahualistli camanaltis nelía chicahuac huan se quipitzas
itlapitzal Toteco para tematiltise catli onca. Huan achtihui
moyolcuise inintlacayohua nopa tlaneltocani catli ya mictoque.
\v 17 Teipa Toteco techquixtis huan techtlejcoltis tojuanti catli
noja tiitztose ipan tlaltipactli san sejco ica inijuanti para
timopantise ihuaya Tohueyiteco nepa campa mixtli ipan ilhuicactli.
Huan quej nopa tiitztose para nochipa ihuaya Tohueyiteco.
\v 18 Huajca ximoyolchicahuaca se ica seyoc ica ni camanali. Amo
ximotequipachoca.
\c 5
\p
\v 1 Toicnihua, amo monequi timechtlajcuilhuise quenicatza huan
quema nochi ya ni panos.
\v 2 Pampa cuali anquimatij tlatoc ajsis nopa tonal tlen iaxca
Tohueyiteco. Ajsis quema masehualme amo moilhuise para ajsisquía,
quen se tlachtejquetl calaqui tlatoctli ica tlayohua.
\v 3 Masehualme quiijtojtose ya onca tlasehuilistli huan ya itztoque
ica cuali, huan ipan nopa tlatoctzi quinajsis se hueyi
tlatzacuiltili. Nimantzi hualas quen se sihuatl quema pehua
itlacuajcualol para tlatlacatiltis huan amo aqui huelis cholos.
\p
\v 4 Pero amojuanti noicnihua, amo anitztoque ipan tzintlayohuilotl
para nopa tonal anmechmajmati quen tlamajmatía se tlachtejquetl ica
tlayohua.
\v 5 Amojuanti ya annejnemij ipan tlahuili o campa tona. Ya
anquiiximatij Toteco Jesucristo huan ayacmo anitztoque ipan
tzintlayohuilotl.
\v 6 Yeca ama ma ayacmo tiitztoca quen masehualme catli cochtoque
huan amo quimatij catli oncas. Ma titlachixtoca para quema ajsis
nopa tonal. Ma tijpiyaca cuali totlalnamiquilis.
\v 7 Catli amo quiiximatij Toteco itztoque quen masehualme catli
cochtoque o catli ihuintitoque tlayohua.
\v 8 Pero ma tijpiyaca cuali totlalnamiquilis pampa tiitztoque quen
masehualme catli nemij tonaya. Ma tijneltocaca Toteco ica nochi
toyolo. Ma titeicnelica. Ma timochiyaca ica paquilistli para Toteco
catli techmaquixtijtoc ma techhuicas ihuaya. Sintla tijchihuaj nochi
ni tlamantli, timocualtlalijtose quen se soldado catli motlalilía
se iyoltepos tzajcayo huan itepos tzontzajca para quimocuitlahuis
itlacayo ipan tlahuilancayotl.
\v 9 Pampa Toteco Totata amo techtlalijtoc para ma tijselise
tlatzacuiltilistli. Techtlalijtoc para techmaquixtis por catli
Jesucristo techchihuilijtoc.
\v 10 Yaya mijqui por tojuanti para ma tiitztoca ihuaya para nochipa
masque timictoque o noja tiitztoque quema yaya hualas.
\v 11 Yeca noja más ximoyolchicahuaca ipan Toteco huan
ximofuerzajmacaca se ica sequinoc quen ya nijmati para
anquichijtiyohuij.
\s Pablo quintlamiconsejomacac nopa tlaneltocani
\p
\v 12 Ama toicnihua, timechtlajtlaníaj para xiquintlepanitaca miyac
nopa tlacame catli tlayacanaj ipan itequi Toteco nepa campa
amojuanti. Inijuanti tequitij chicahuac campa amojuanti huan
anmechmachtíaj pampa Tohueyiteco quintequimacatoc ma
anmechmocuitlahuica para annejnemise cuali.
\v 13 Huan monequi anquintlepanitase huan anquinicnelise miyac por
nopa tequitl catli quichihuaj. Xiitztoca san sejco ica paquilistli.
\p
\v 14 Huan nojquiya timechtlajtlaníaj, toicnihua, para chicahuac
xiquincamanalhuica nopa masehualme catli tlatzihuij nopona campa
amojuanti. Xiquinyolchicahuaca inijuanti catli nimantzi mopinahuaj
huan amo quipiyaj tetili. Xiquinpalehuica catli ayamo nelcuali
quineltocaj Toteco. Huan xijpiyaca amoyolo ica nochi masehualme.
\p
\v 15 Xijtlachilica para amo aqui ma quicuepilis seyoc catli amo
cuali quichihuilijtoc. Nochipa xijchihuaca campica ximochihuilica
catli cuali se ica sequinoc huan ica nochi sequinoc masehualme.
\p
\v 16 Xipaquica mojmostla.
\v 17 Ximotlatlajtijtinemica ica Toteco tlatoctzitzi.
\v 18 Xijtlascamatica Toteco ipan nochi tlamantli catli
anmechpanotihuala pampa quej nopa Toteco quinequi xijchihuaca nochi
amojuanti catli anitztoque aniaxcahua Cristo Jesús.
\p
\v 19 Amo xijcotonilica itequi Itonal Toteco ipan amoyolo.
\v 20 Amo xijtlaijilhuica icamanal se itlajtol pannextijca Toteco.
\v 21 Pero xijyejyecoca nochi catli quiijtohuaj. Xijtoquilica catli
cuali.
\v 22 Xijtlahuelcahuaca nochi tlamantli catli amo cuali.
\p
\v 23 Toteco, yaya catli iseltzi techmaca tlasehuilistli ipan
toyolo, ma anmechchihua senquistoc antlatzejtzeloltique. Ma
anmechmocuitlahuili Toteco amotonal, amoalma, huan amotlacayo para
amo aqui huelis anmechtelhuis ica niyon se tlamantli quema sempa
hualas Tohueyiteco Jesucristo.
\v 24 Toteco catli anmechnotzqui para anelise iaxcahua, yaya
temachtli. Huan yaya quitlamisencahuas ni catli tijtlajtlaníaj.
\s Pablo tlanqui tlajcuilohua
\p
\v 25 Toicnihua, ximotlatlajtica ica Toteco por tojuanti.
\p
\v 26 Ximotlajpaloca huan ximotzoponica ica se tlatlepanitacayotl
catli tlatzejtzeloltic pampa anmoicnelíaj ipan Cristo.
\p
\v 27 Nimechnahuatía antlayacanani ica itequiticayo Tohueyiteco
para xijpohuaca ni amatlajcuiloli para ma quicaquica nochi
toicnihua.
\p
\v 28 Tohueyiteco Jesucristo ma quipiya hueyi iyolo amohuaya. Quej
nopa ma eli.