\id 2TH
\h 2 TESALONICENSES
\mt Nopa Ompa Amatlajcuiloli catli Pablo Quintlajcuilhui
Tlaneltocani ipan Altepetl Tesalónica
\c 1
\s Pablo quintlajcuilhui tlaneltocani ipan Tesalónica
\p
\v 1 Na niPablo, ininhuaya Silvano huan Timoteo,
timechtlajcuilhuilíaj ni amatl amojuanti ipan nopa tiopamitl tlen
tlaneltocani catli anmosentilíaj ipan altepetl Tesalónica.
Antlatzquitoque ipan Toteco Totata huan ipan Toteco Jesucristo.
\v 2 Toteco Totata huan Toteco Jesucristo ma quipiyaca hueyi
ininyolo amohuaya huan ma anmechmacaca tlasehuilistli.
\s Jesucristo quintlajtolsencahuas tlajtlacolchihuani quema sempa
hualas
\p
\v 3 Toicnihua, mojmostla tijtlascamatij Toteco por amojuanti, pampa
quej nopa quinamiqui. Tijtlascamatij pampa mojmostla anquineltocaj
Toteco ica más chicahualistli huan mojmostla más anmoicnelíaj.
\v 4 Huajca, ica paquilistli tiquinilhuíaj tlaneltocani ipan
sequinoc itiopahua Toteco catli cuali anquichihuaj. Tiquinilhuíaj
quenicatza anquipiyaj amoyolo huan quenicatza ica sesen nopa
tlaijiyohuilistli huan tlaohuijcayotl catli anquiijiyohuíaj, más
chicahuac anquineltocaj Toteco.
\v 5 Toteco quitequihuis ni tlaijiyohuilistli para tenextilis para
yaya tetlajtolsencahua xitlahuac. Antlaijiyohuíaj ama pampa
anquicahuilíaj Toteco ma anmechnahuati ipan amoyolo nica huan ya ni
tenextilía para anmechchijtoc quinamiqui ancalaquise ilhuicac campa
yaya tlanahuatis para nochipa.
\p
\v 6 Huan pampa Toteco itztoc xitlahuac, yaya nojquiya quincuepilis
ica tlaijiyohuilistli nopa masehualme catli ama
anmechtlaijiyohuiltíaj.
\v 7 Huan amojuanti catli ama antlaijiyohuíaj, anmechchihuas
ximosiyajquetzaca huan nojquiya techchihuas ma timosiyajquetzaca
tojuanti quema ajsis nopa tonal quema Tohueyiteco Jesucristo
mohualnextiqui tlen ilhuicac ihuaya itequihuajcahua catli quipiyaj
huejhueyi chicahualistli.
\v 8 Quena, hualas ipan tlitl catli quipiyas miyac tlixochitl para
quintlatzacuiltis nopa masehualme catli amo quiiximatij huan catli
amo quinejque quichihuase catli icamanal Toteco Jesucristo
quinilhui.
\v 9 Inijuanti monequi tlaxtlahuase catli quinamiqui por
inintlajtlacol, huan yeca mocuapolojtose para nochipa nepa mictla.
Nepa itztose huejca tlen campa itztoc Toteco ica nochi ihueyitilis
huan ichicahualis.
\v 10 Huan ya ni panos ipan nopa tonal quema Jesucristo sempa hualas
ipan tlaltipactli huan nochi itlatzejtzeloltijca masehualhua
quihueyichijtose huan mosentlachilijtose ica nochi catli
techchihuilijtoc. Huan amojuanti nojquiya anitztose ihuaya catli
quihueyichijtose pampa ya anquineltocaque catli timechilhuijtoque
tlen ya.
\p
\v 11 Huajca yeca mojmostla timotlatlajtíaj ica Toteco por
amojuanti huan tijtlajtlaníaj ma anmechmaca chicahualistli para
anquichihuase nochi itequi quen ya anquinequij anquichihuase pampa
anquineltocaj Toteco. Huan nijtlajtlanía ma quitlachili amotequi
huan ma paqui pampa anmechnotzqui para aniaxcahua.
\v 12 Huan yeca sequinoc masehualme quihueyichihuase Toteco quema
quiitase catli anquichijtoque, huan nojquiya anmechhueyichihuase por
catli anquichijtoque. Huan nochi ni panos pampa hueyi ininyolo
Toteco Totata huan Toteco Jesucristo amohuaya.
\c 2
\s Nopa tlajtlacol tlacatl catli amo quitlepanita niyon se tlanahuatili
\p
\v 1 Toicnihua, ama nijnequi nimechcamanalhuis tlen nopa tonal quema
Tohueyiteco Jesucristo sempa hualas huan timosentilise ihuaya.
\v 2 Ma amo aqui anmechmajmatis, noicnihua. Niyon amo
xiquincahuilica sequinoc ma anmechtequipacholmacaca huan
anmechilhuise para ya pano nopa tonal tlen Tohueyiteco. Masque
anmechilhuíaj para tojuanti timechtitlanilijque se amatlajcuiloli
catli quiijto ya ajsico, o aqui quiselijtoc se camanali, o se
tlanextili quen se temictli tlen Toteco para ya ajsico, amo
xiquinneltocaca.
\v 3 Amo aqui ma anmechcajcayahua. Achtihui, quema ayamo ajsi nopa
tonal, miyac masehualme quicahuase quineltocase Toteco. Nojquiya
monextis nopa tlajtlacol tlacatl catli amo quitlepanita niyon se
tlanahuatili, yaya catli mocuapolos nepa mictla.
\v 4 Nopa tlajtlacol tlacatl quicualancaitas Toteco huan nochi
tlamantli catli masehualme quinhueyimatij o quinnotzaj “dios”.
Quinequis nochi quinsosolos huan quintlanis. Mohueyitlalis huan
quinequis nochi masehualme ma quihueyichihuaca san ya. Hasta yas
huan mosehuis ipan nopa hueyi tiopamitl tlen Toteco huan quiijtos
para yaya Dios.
\p
\v 5 ¿Amo anquielnamiquij nimechilhui ni quema niitztoya amohuaya?
\v 6 Nojquiya ya anquimatij ajqueya yaya catli amo quicahuilía ma
monexti nopa tlajtlacol tlacatl hasta ajsis itonal para monextis.
\v 7 Ya pejqui nopa tlajtlacoli catli quichihuas nopa tlacatl catli
amo quitlepanita niyon se tlanahuatili, pero yaya amo huelis
monextis, pampa amantzi itztoc se catli amo quicahuilía ma monexti.
Teipa Toteco quiquixtis yaya catli amo quicahuilía ma monexti,
\v 8 huan huajca quena, mopannextis nopa tlajtlacol tlacatl catli
amo quitlepanita niyon se tlanahuatili. Huan teipa, quema ajsis
Tohueyiteco catli onpano quipiya chicahualistli, nimantzi quimictis
nopa tlajtlacol tlacatl san ica iijiyo. Quena, Tohueyiteco
quisemanas ica itlatlanex catli monextis quema hualas.
\v 9 Pampa nopa tlajtlacol tlacatl hualas para quichihuas itequi
Amocualtlacatl, huan quipiyas hueyi chicahualistli, huan nesis quen
quichihua tlanextilijcayotl huan huejhueyi tiochicahual nextili,
pero amo neli nopa tlamantli catli quichihua, san tlacajcayahua.
\v 10 Quichihuas miyac tlamantli catli amo cuali ica catli
quincajcayahuas masehualme catli mocuapolose para nochipa pampa amo
quinequise quiselise icamanal Toteco huan quiicnelise catli
melahuac. Inijuanti amo quinequise motlajtlacolquixtise.
\v 11 Yeca Toteco quinmacas nopa masehualme inintlalnamiquilis para
ma quineltocaca se istlacaticayotl.
\v 12 Huan Toteco quintlalilis tlatzacuiltili pampa amo
quineltocaque catli melahuac. San mopaquilismacayayaj ica catli amo
cuali quichihuayayaj.
\s Toteco anmechtlapejpeni para anmechtlajtlacolquixtilis
\p
\v 13 Pero tojuanti, nochipa tijtlascamatij Toteco por amojuanti,
toicnihua, pampa Toteco anmechicnelía miyac. Huan quema ayamo
pehuayaya tlaltipactli, yaya ya anmechtlapejpenijtoya para
anmechtlajtlacolquixtis. Huan teipa Itonal Toteco anmechiyocatlali
para anelise aniaxcahua quema anquineltocaque icamanal Toteco catli
melahuac.
\v 14 Huan quema timechilhuijque nopa cuali camanali, Toteco
anmechnotzqui para anquipiyase catli anmechtocaros nepa campa itztoc
Tohueyiteco Jesucristo ica nochi ihueyitilis.
\p
\v 15 Huajca, toicnihua, ximoquetzaca huan ximotlacuahuaca ica
temachili. Xijneltocatiyaca san nopa tlamachtilistli catli
nimechmachtijtoc quema niitztoya amohuaya huan catli
nimechijcuilhuilijtoc ipan amatlajcuiloli. Amo xijcahuaca, niyon amo
xijtoquilica seyoc tlamachtili.
\v 16 Toteco Jesucristo huan Toteco Totata techicnelía nochi
tojuanti huan techyoltlalijtoc para nochipa pampa hueyi iyolo ica
tojuanti. Yaya catli techchihua ma tijchiyaca ica paquilistli nochi
nopa cuali tlamantli catli techmacas teipa.
\v 17 Huan ama Toteco Totata huan Toteco Jesucristo ma
anmechyolchicahuaca huan ma anmechchihuaca antemachme para
anquiijtose huan anquichihuase nochi catli cuali.
\c 3
\s Xijtlajtlanica Toteco ma techmocuitlahuis
\p
\v 1 Huajca para tijtlamiltise san ya ni, toicnihua. Ximotlatlajtica
ica Toteco por tojuanti. Xijtlajtlanica para ma momoyahua nimantzi
icamanal Toteco huan para miyac masehualme ma quiselica huan ma
quitlepanitaca quen panoc quema amojuanti anquicajque.
\v 2 Xijtlajtlanica Toteco ma techmanahui ica amo cuajcualme huan
masehualme catli fiero quichihuaj, pampa itztoque sequin catli amo
quineltocaj Toteco.
\v 3 Pero Toteco yaya temachtli huan yaya anmechmacas tetili huan
anmechmanahuis tlen Amocualtlacatl.
\v 4 Huan timotemachíaj ipan Toteco para ya anquichihuaj catli
timechilhuijtoque, huan mojmostla más anquichijtiyase.
\v 5 Ma Toteco anmechpalehui para achi más xijmachilica hasta
canque ontlantoc itlaicnelijcayo para amojuanti. Huan ma
anmechpalehuis anquipiyase amoyolo quen Cristo quipixqui ica catli
anmechpanotihuala.
\s Nochi tlaneltocani ma tequitica cuali
\p
\v 6 Ama toicnihua, timechnahuatíaj ipan itoca Tohueyiteco
Jesucristo, ximoiyocatlalica ica nochi tlaneltocani catli amo tleno
quichihuaj huan amo tequitij chicahuac quen timechmachtijtoque.
\v 7 Pampa anquimatij quinamiqui para anquitoquilise tonemachtil.
Huan quema tiitztoyaj amohuaya, amo titlatzihuiyayaj.
\v 8 Titlaxtlajque para totlacualis catli tijcuajque para amo
timechcuatotonise. Huan chicahuac titequitiyayaj tonali huan yohuali
masque nelía ohui elqui totequi.
\v 9 Tijpiyaj tequiticayotl para timechtlajtlanijtosquíaj
totlacualis san tlapic, pero amo tijnequiyayaj. Tijnejque
timechcahuilise se cuali nemachtili para huelis anquitoquilise.
\v 10 Huan quema noja tiitztoyaj amohuaya timechmacaque se
tlanahuatili catli quiijto: Sintla se amo quinequi tequitis, ma amo
tlacua.
\v 11 Pampa tijcactoque itztoque sequin campa amojuanti catli
tlatzihuij huan amo quichihuaj niyon se tequitl. San quinequij
mocalaquise campa amo inincuenta.
\v 12 Huajca ama tiquinnahuatíaj nopa tlaneltocani ica itequiticayo
Tohueyiteco Jesucristo huan tiquinyolchicahua ma tequitica huan ma
amo camanaltica. Huan ica inintequi ma quitlanica catli inijuanti
quinmonequilía.
\p
\v 13 Huan toicnihua, amojuanti catli ya antequitij cuali, amo
xisiyahuica para anquichihuase catli cuali.
\v 14 Huan sintla se tlaneltocaquetl amo quichihua catli
timechilhuíaj ipan ni amatlajcuiloli, ximomacaca cuenta ajqueya ya
huan amo ximohuicaca ihuaya para ma mopinahuas.
\v 15 Pero amo xiquitaca quen amocualancaitaca, pero
xijtlalnamictica pampa yaya amoicni.
\s Pablo quintlajpalo
\p
\v 16 Toteco, yaya catli temaca tlasehuilistli, ma anmechmaca
tlasehuilistli mojmostla masque tlen hueli anmechpanotihuala. Toteco
ma itzto amohuaya nochi amojuanti.
\p
\v 17 Nica na niPablo nimechtlajcuilhuía ica nomax para
nimechtlajpalos. Quej ni nesi na notlajcuilol campa tlamis nochi
noamatlajcuilol, huan quema anquiitase notlajcuilol, anquimatise
nimechtitlanilía nopa amatlajcuiloli.
\v 18 Tohueyiteco Jesucristo ma quipiya hueyi iyolo ica nochi
amojuanti. Quej nopa ma eli.