\id 1TI
\h 1 TIMOTEO
\mt Nopa Achtihui Amatlajcuiloli catli Pablo Quitlajcuilhui Timoteo
\c 1
\s Pablo quitlajpalo Timoteo
\p
\v 1 Na niPablo catli niitlayolmelajca Jesucristo nimitztitlanilía
ni amatlajcuiloli. Toteco Dios Totemaquixtijca huan Toteco
Jesucristo yaya catli ipan timotemachíaj tlanahuatijque ma nieli
niitlayolmelajca huan yeca nijchihua ni tequitl.
\v 2 Noicni Timoteo, nimitztlajcuilhuía ni amatlajcuiloli.
Nimitzicnelía ipan Toteco quen tinonelcone, pampa tijneltocatoc
Toteco quen na nijneltoca. Toteco Totata huan Toteco Jesucristo ma
quipiyaca hueyi ininyolo mohuaya huan ma mitztlasojtlaca. Ma
mitzmacaca tlasehuilistli ipan moyolo.
\s Xiquinquetza catli tlamachtíaj catli amo neli
\p
\v 3 Timoteo, sempa nimitzilhuía catli nimitzilhui quema
nimitzcajte para niyas tlali Macedonia. Ximocahua nepa ipan altepetl
Éfeso huan xiquinnahuati nopa tlacame catli tlamachtíaj catli amo
neli ma ayacmo quichihuaca.
\v 4 Xiquinilhui tlaneltocani nepa ma ayacmo moilhuica tlen cuentos
tlen huejcajya. Ma amo moilhuica monequi quitemose ajqueya elqui
ininhuejcapan tatahua huan sintla ne sequinoc moilhuíaj para elque
cuajcualme o amo, pampa nopa tlamantli san quichihuaj para
masehualme ma monajnanquilica huan amo tleno quisencahuaj. Amo
techpalehuíaj para más ma tijneltocatiyaca Toteco quen yaya
quinequi ma tijchihuaca.
\p
\v 5 Pero quema tojuanti tiquinmacaj toicnihua tlanahuatilme ma
quichihuaca, tijchihuaj para tlahuel ma teicnelica ica ininyolo
catli tlapajpactique iixpa Toteco huan para ma quipiyaca ininyolo
catli amo quintelhuía para moijixpatlaj. Tijnequij para nelía ma
quineltocaca Toteco ica nochi ininyolo.
\v 6 Sequin tlacame quicajtejque ni tlalnamiquilistli catli achtihui
quineltocayayaj. Ama san monajnanquilíaj ica tlamantli catli amo
ipati.
\v 7 Quinequij elise tlamachtiani tlen itlanahuatilhua Moisés para
masehualme ma quinhueyitlepanitase, pero amo quimachilíaj tlaque
quiijtohuaj, niyon tlaque inintequi itlanahuatilhua masque
tlamachtíaj ica miyac chicahualistli.
\p
\v 8 Pero tojuanti tijmatij para cuali itlanahuatilhua Moisés
sintla masehualme quintequihuíaj quen Toteco quinejqui ma
tiquintequihuica.
\v 9 Pero Toteco amo quinchijqui nopa tlanahuatilme para masehualme
catli itztoque xitlahuaque iixpa. Toteco quinmacac nopa
tlanahuatilme para masehualme catli amo tlatlepanitaj, huan amo
quintlacaquilíaj catli quipiyaj tequiticayotl huan san quichihuaj
catli amo cuali. Itztoque masehualme catli tlajtlacolchijtinemij
huan catli amo tleno quineltocaj. Inijuanti tlen hueli camanaltij
tlen Toteco huan quihuejcamajcahua nochi catli tlatzejtzeloltic.
Itztoque catli quinmictíaj inintatahua huan catli quinmictíaj
sequinoc masehualme.
\v 10 Toteco quinmacac nopa tlanahuatilme para masehualme catli
quichihuaj tlen hueli ica catli amo ininnamic, huan para tlacame
catli nemij ininhuaya tlacame huan sihuame catli nemij ininhuaya
sihuame para tlen hueli quichihuase. Quinmacac nopa tlanahuatilme
para masehualme catli teichtequij, huan istlacatij huan teilhuíaj
catli amo melahuac. Quena, quinmaca para catli quichihuaj miyac
tlamantli catli nopa xitlahuac tlamachtilistli techilhuía ma amo
tijchihuaca.
\v 11 Huan nopa xitlahuac tlamachtilistli huala tlen nopa cuali
camanali catli onpano yejyectzi catli Toteco quicajtejtoc nomaco
para ma nijmoyahua. Yaya catli quinamiqui ma tijhueyitlalica.
\s Pablo quitlascamatqui Toteco pampa hueyi iyolo
\p
\v 12 Nijtlascamati Tohueyiteco Jesucristo catli nechyolitac para
nitemachtli huan yeca nechmacac ni itequi huan nechfuerzajmacatoc ma
nijchihua.
\v 13 Masque yaya cuali quimatiyaya para achtihuiya nicahuilmatiyaya
itoca Cristo. Achtihui niquintlaijiyohuiltiyaya imasehualhua huan
nelía nimosisiniyaya. Pero masque quej nopa nielqui, Toteco
nechtlasojtlac pampa ayamo nijneltocayaya huan amo nijmachiliyaya
catli nijchihuayaya.
\v 14 Nelía onpano hueyi iyolo Toteco ica na. Yaya nechmacac nopa
tlaneltoquili huan nopa teicnelijcayotl catli tijpantíaj quema
techtlatzquiltía ipan Cristo Jesús.
\p
\v 15 Nelía temachtli ni camanali catli nimechilhuis huan monequi
nochi quineltocase: Jesucristo hualajqui ipan ni tlaltipactli para
quintlajtlacolquixtis tlajtlacolchihuani huan na achi más
nitlajtlacolchijtoya tlen nochi sequinoc masehualme.
\v 16 Yeca Toteco nechtlasojtlac pampa Jesucristo quinejqui
nechtlalis quen se nemachiltili catli quinextía hasta canque
ontlami para quipiya iyolo ica tlajtlacolchihuani catli más onpano
tlajtlacolchijtoque. Huan yeca ama sequinoc masehualme quimachilise
para nojquiya huelis quineltocase Jesucristo huan quiselise
nemilistli para nochipa.
\v 17 Huajca ma tijhueyitlepanitaca Toteco, yaya nopa
Tlanahuatijquetl catli tlanahuatis para nochipa huan amo quema
tlamis. Quena, ma tijhueyimatica yaya catli amo hueli miquis, huan
catli amo aqui hueli quiitas, pampa san yaya Dios huan quipiya nochi
tlalnamiquilistli. Quej nopa ma eli.
\p
\v 18 Timoteo, nocone, ni tlanahuatili nimitzmaca. Ximoneltlali huan
xitlahuilana chicahuac ica catli amo cuali quen itlajtol
pannextijcahua Toteco quiijtojque tijchihuasquía.
\v 19 Xijsenhuiquili xijneltoca icamanal Toteco ica moyolo
tlapajpactic iixpa quen ya tijmati tijchihuas. Sequin tlacame
quiixpanotoque catli quiyolmatij para xitlahuac huan quinpantijque
para quisosolojtoyaj inintlaneltoquilis.
\v 20 Himeneo huan Alejandro itztoque ome catli quej nopa
quichijtoque. Niquinquixti tlen campa tlaneltocani huan
niquintemactilijtoc imaco Amocualtlacatl para quimatise amo tlen
hueli camanaltise tlen Toteco.
\c 2
\s Quenicatza monequi ma timotlatlajtica ica Toteco
\p
\v 1 Timoteo, achtihui nimitztlajtlanía chicahuac para nochi
amojuanti ximotlatlajtica ica Toteco por nochi masehualme.
Xijtlajtlanica Toteco ma quintiochihuas huan ma quintlasojtlas.
Xijtlajtlanica ma quinmaca catli quinmonequilía huan
xijtlascamatica Toteco por sesen inijuanti.
\v 2 Quej ni xijtlajtlanica Toteco por tlanahuatiani huan nochi
catli quihuicaj tequiticayotl para inijuanti ma tequitica cuali huan
huelis tiitztose ica cuali huan ica tlasehuilistli. Quej ni huelis
tijtoquilise Toteco huan sequinoc techtlepanitase.
\v 3 Toteco yaya Totemaquixtijca quipactía ma timotlatlajtica para
sequinoc quej nopa,
\v 4 pampa yaya quinequi nochi masehualme ma momaquixtica huan ma
quimatica catli nelía melahuac.
\q
\v 5 Pampa itztoc san se Dios.
\q Itztoc san se catli motlajcoquetza tlatlajco Dios huan masehualme
para quinyoltlalis se ica seyoc,
\q huan yaya Jesucristo catli mocuepqui masehuali.
\q
\v 6 Jesucristo motemacac huan mijqui por nochi masehualme para
tlaxtlahuas catli monequiyaya huan para techtojtomas tlen
totlajtlacolhua.
\q Huan quema ajsic hora Toteco technextili nochi catli quichijtoya.
\p
\v 7 Huan yeca Toteco nechtequitlalijtoc na para nielis
niitlayolmelajca. Nechtequimacac ma nitlacamanalhui icamanal huan
para ma niquinmachti masehualme catli amo israelitame para ma
quineltocaca huan ma quimatica catli melahuac. Nimitzilhuía catli
xitlahuac huan amo niistlacati.
\p
\v 8 Huajca quema mosentilíaj tlaneltocani campa hueli, nijnequi
para tlacame ma motlatlajtica. Pero quema quitlananaj ininmax para
motlatlajtise ma itztoca tlatzejtzeloltique iixpa Toteco. Ma amo
quipiyaca cualantli niyon tlanajnanquilistli ipan ininyolo.
\p
\v 9 Huan nijnequi sihuame ma moyoyontica huan moyectlalise quen
quinamiqui para sequinoc ma quintlepanitaca. Ma amo huejcahuaca para
mocualtlalise ica miyac oro, huan perlas, huan yoyomitl catli
tlahuel patiyo para masehualme ma quintlachilica.
\v 10 Achi cuali ma quinitaca sihua tlaneltocani para yejyectzitzi
pampa quichihuaj miyac tlamantli catli cuali quen quinamiqui sihuame
catli quineltocaj Toteco.
\p
\v 11 Ipan tlasentililistli nopa sihuame ma quitlacaquilica nopa
tlamachtilistli huan ma quiselica ica nochi ininyolo.
\v 12 Amo niquincahuilía sihuame ma quipiyaca nopa tequitl para
quinmachtise tlacame ipan tlasentililistli, niyon para quipiyase
tequiticayotl ica tlacame. Ma san tlacaquica.
\v 13 Pampa Toteco quichijqui Adán achtihui huan teipa quichijqui
Eva.
\v 14 Huan Amocualtlacatl quicajcayajqui Eva huan yaya
tlajtlacolchijqui. Amo quicajcayajqui Adán.
\v 15 Pero Toteco quinmaquixtis sihuame ica nopa conetl catli
quichijqui ma tlacati sintla inijuanti quineltocase huan teicnelise
huan quipiyase ininnemilis catli tlatzejtzeloltic huan
inintlalnamiquilis catli cuali.
\c 3
\s Xiquintequitlali cuali tlacame para quinyacanase tlaneltocani
\p
\v 1 Nimitzilhuis se camanali catli temachtli. Sintla se tlacatl
quinequi mochihuas se huehue tlaneltocaquetl para tlayacanas ipan
tlasentililistli, quinequi se cuali tequitl.
\v 2 Pero monequi se tlayacanquetl tlen tlaneltocani ma eli se
tlacatl catli amo aqui huelis quitelhuis. Monequi quipiyas setzi
isihua huan san itztos ica ya. Monequi ma eli se tlacatl catli cuali
monahuatía huan catli quitlamichihua itequi. Ma eli se tlacatl
catli nochi quitlepanitaj, huan catli quipactía quinselis
paxalohuani ipan ichaj huan catli nelía cuali tlamachtía icamanal
Toteco.
\v 3 Monequi se tlacatl catli amo quema moihuintía, niyon amo
mosisinía. Monequi se catli nelía quipiya iyolo ica masehualme
huan amo cualancatemohua. Monequi se catli amo quinequi tomi catli
amo iaxca.
\v 4 Xijtequitlali se tlacatl catli cuali quinyacana nochi ipan
ichaj huan catli quinpiya iconehua catli quitlacaquilíaj icamanal
ica miyac tlatlepanitacayotl.
\v 5 Pampa sintla se tlacatl amo hueli tlayacana ipan ichaj,
quenicatza huelis quinmocuitlahuis tlaneltocani ipan itiopa Toteco.
\v 6 Amo xijtequitlalica se tlacatl para tlayacanquetl catli yancuic
quineltocatoc Toteco pampa san polihui mohueyimatis quen quichijqui
Amocualtlacatl. Quej nopa quiselis se tlatzacuiltili quen yaya
quiseli.
\v 7 Nojquiya monequi xijtlalica se huehue tlaneltocaquetl catli
quitlepanitaj nochi masehualme masque amo quineltocaj Toteco. Quej
nopa amo aqui huelis quitelhuis huan nopa Amocualtlacatl amo
quicajcayahuas.
\s Tlapalehuiani ipan tiopamitl tlen tlaneltocani
\p
\v 8 Nojquiya tlacame catli quinequij mochihuase tlapalehuiani ipan
tiopamitl tlen tlaneltocani monequi elise tlacame catli nochi
quintlepanitaj. Xiquintequitlalica tlacame catli amo moijixpatlaj,
huan catli amo quema moihuintíaj huan catli amo quinequij tomi
catli amo iniaxca.
\v 9 Xiquintlalica tlacame catli yoltlapajpactique huan catli ica
nochi ininyolo quineltocaj nopa tlamachtilistli tlen Jesucristo
catli amo aqui quimatiyaya hasta Toteco technextili.
\v 10 Pero quema ayamo tiquintlalijtoc quen tlapalehuiani, monequi
xiquinmacaca seyoc tequitl ipan tlasentilistli para tiquinyejyecos
sintla quichihuase cuali nopa tequitl iniixpa nochi, o amo. Sintla,
quena, cuali quichihuaj, huajca xiquintequitlalica quen
tlapalehuiani.
\v 11 Huan nojquiya nopa sihuame monequi elise cuali sihuame catli
nochi quintlepanitaj. Ma amo elica sihuame catli teelnamiquini,
niyon catli moihuintíaj, pero ma elica sihuame catli temachme ica
nochi catli quichihuaj.
\v 12 Monequi sesen tlaca tlapalehuijquetl quipiyas san setzi isihua
huan san itztos ica ya. Monequi tlaca tlapalehuiani ma elica tlacame
catli quimocuitlahuíaj ininchaj huan quinyacanaj ininconehua ica
cuali.
\v 13 Pampa tlacame catli quichihuase nelía cuali ni tequitl tlen
tlapalehuiani ipan tiopamitl quipiyase inintlatlepanitacayo huan
quineltocase Jesucristo ica más temachili.
\s Catli tojuanti tijneltocaj
\p
\v 14 Nimitztlajcuilhuía ama masque nijnequi amo huejcahuas para
nimechitati.
\v 15 Pero sintla amo hueli niyas nimantzi, nijnequi nimechmachiltis
quen monequi tlaneltocani ma mochihuase ipan ifamilia Toteco. Pampa
nopa tlaneltocani catli mosentilíaj, inijuanti itiopa Toteco catli
yoltoc huan eltoc quen inijuanti tlaquetzalme catli quiijiyohuíaj
nopa catli melahuac.
\v 16 Nochi quimatij para nelía hueyi nopa catli Toteco technextili
para ma tijmachilica tlen ya:
\q Cristo mochijqui masehuali huan monexti campa tojuanti.
\q Itonal Toteco technextili para yaya elqui xitlahuac iixpa Toteco.
\q Itequihuajcahua Toteco quiitaque.
\q Huan tlaneltocani quinilhuijque miyac masehualme ipan campa hueli
tlali tlen ya.
\q Miyac masehualme ipan ni tlaltipactli quineltocaque.
\q Huan teipa Toteco sempa quitlejcolti huan quiseli ipan ilhuicac.
\c 4
\s Sequin tlacame quicahuase Jesucristo para quitoquilise sequinoc tlamachtili
\p
\v 1 Itonal Toteco techyolmelajtoc xitlahuac para ipan nopa
tlayacapan tonali sequin tlacame quicahuase catli tijneltocaj.
Quintlacaquilise ajacame tlen Amocualtlacatl catli san
tlacajcayahuaj huan quiselise inintlamachtil.
\v 2 Ni tlamachtiani san moijixpatlani huan istlacatini. Huan pampa
quipiyaj ininyolo mictoc, ayacmo tleno moilhuíaj quema quichihuaj
catli amo cuali.
\v 3 Quiijtohuaj para se tlaneltocaquetl amo hueli quipiyas inamic.
Quiijtohuaj ayacmo huelis tijcuase sequin tlamantli tlacualistli.
Pero Toteco quichijtoc nopa tlacualistli para tojuanti catli
tijneltocaj Toteco huan tijmatij catli melahuac, ma tijcuaca ica
tlascamatili.
\v 4 Pampa nochi tlacualistli catli Toteco quichijtoc eltoc cuali
huan amo monequi tijhuejcamajcahuase niyon se. Huelis
tijtlascamatise Toteco huan tijselise nochi,
\v 5 pampa Icamanal Toteco quiijtohua yaya quitiochihuas huan
quitlatzejtzelolchihuas totlacualis quema tijtlascamatij.
\s Se cuali tlatequipanojquetl tlen Jesucristo
\p
\v 6 Xiquinmachtis tlaneltocani nepa ni tlamantli catli
nimitzilhuijtoc, huan quej nopa tielis se icual tequipanojca
Jesucristo. Huan se cuali tequipanojquetl monequi momachtis nopa
camanali catli quineltoca. Quena, motlamacas ica nopa cuali
tlamachtilistli catli quitoquilía quen elisquía itlacualis.
\v 7 Amo xijtlacaquili huihui camanali huan camanali catli amo ipati
catli camanaltij sequin tename, pero xijtequihui monemilis huan
mochicahualis para más timocualchijchihuas ipan Toteco.
\v 8 Sintla tijcualchijchihuas motlacayo, cualtitoc. Pero más ipati
sintla timocualchijchihuas ipan Toteco, pampa mitzpalehuis para
nochipa. Ipati ama quema tiitztoque ipan ni tlaltipactli huan achi
más ipati elis teipa quema tiitztose ilhuicac.
\v 9 Temachtli ni camanali catli nimitzilhuijtoc huan quinamiqui
para nochi masehualme ma quiselica.
\v 10 Huan yeca tojuanti chicahuac titequipanojtinemij huan
titlaijiyohuijtinemij pampa tijnequij timochixtose ipan yaya Toteco
catli yoltoc huan amo quema miquis. Yaya inintemaquixtijca nochi
masehualme huan quinmaquixtis para nochipa nochi catli quineltocaj.
\p
\v 11 Xiquinmachti nopa tlaneltocani nochi ni catli nimitzilhuijtoc
huan xiquinnahuati ma quichihuaca.
\v 12 Ma amo aqui quiijto amo monequi mitztlacaquilis pampa noja
titelpoca tlacatl. Pero xiquincahuili tlaneltocani se cuali
nemachiltili ica catli titlamachtía huan ica catli tijchihua.
Xiquinnextili quenicatza ma teicnelica huan ma quineltocaca Toteco
ica nochi ininyolo huan quenicatza ma quipiyaca ininnemilis catli
tlapajpactic.
\v 13 Hasta quema niajsiti nepa, ya ni monequi xijchijtiya quema
anmosentilíaj. Xijpohua Icamanal Toteco para nochi quicaquise.
Xiquinmachti catli quiijtosnequi. Huan xiquinyolchicahua
tlaneltocani ma quichihuaca catli quiijtohua.
\v 14 Xijtequihui nopa yajatili catli Toteco mitzmacac quema nopa
huehue tlaneltocani mitztzonmajpachojque huan Toteco quinmacac
camanali para camanaltise tlen nochi nopa cuali tequitl catli
tijchihuasquía teipa.
\p
\v 15 Ica nochi moyolo xijchijtinemi nochi ni tlamantli catli
nimitzilhuijtoc. San ya nopa xijmati para nochi tlaneltocani
quiitase para mojmostla tijchihua más cuali itequi Toteco.
\v 16 Ximotlachili para san catli xitlahuac tijchihuas huan para san
catli cuali titlamachtis. Ximotlacuahua san ipan ya ni. Sintla quej
ni tijchihuas, Toteco mitzmaquixtis ta huan inijuanti catli
mitztlacaquilise.
\c 5
\s Quenicatza monequi Timoteo ma nemi iniixpa tlaneltocani
\p
\v 1 Amo xicajhua se tlacatl catli ya huehue quema quichihua catli
amo cuali. Achi cuali xijnojnotza ica yamanic quen elisquía motata.
Huan catli san cuali chicaj tlacame, xiquinnojnotza quen elisquíaj
moicnihua.
\v 2 Xiquincamanalhui sihuame catli tename quen elisquíaj monanahua
huan chicaj sihuame quen elisquíaj mosihua icnihua. Huan quema
tiquincamanalhuía, xijpiya motlalnamiquilis tlapajpactic.
\p
\v 3 Monequi tlaneltocani quinmocuitlahuise nochi cahual toahuihua
catli amo aqui quipiyaj para quinpalehuis.
\v 4 Pero sintla se cahual toahui quinpiya iconehua o iixhuihua
catli ya huejhueyi para quipalehuise, huajca monequi ma
quipalehuica. Monequi iconehua quiitase para Toteco quintequimacatoc
achtihui ma quichihuaca catli cuali ica inintatahua o catli itztoque
ininchampoyohua. Quena, monequi quicuepilise catli yejyectzi
inintatahua quinchihuilijque quema quiniscaltijque, pampa Toteco
quipactía quema se quinmocuitlahuía itatahua.
\v 5 Pero ica cahual toahuihua catli nelía mocahuaj
ininpilseltzitzi huan amo aqui quipiyaj, huajca monequi
antlaneltocani ma xiquinpalehuica. Inijuanti san mochiyaj ipan
Toteco huan motlatlajtíaj huan quitlajtlaníaj inintechmonequi
tonaya huan yohuali.
\v 6 Pero sequinoc cahual toahuihua san quitemohuaj catli
quinpactía inintlacayohua. Masque yoltoque, Toteco quinita quen
catli ya mictoque.
\v 7 Xiquinnahuati tlaneltocani ma quichihuaca nochi ni para amo
aqui huelis quintelhuis pampa amo quinpalehuíaj cuali cahual
toahuihua, niyon pampa quinpalehuíaj catli amo nemij cuali.
\v 8 Pero sintla se amo quinequi quimacas itata, o inana o sequinoc
ichampoyohua catli quinmonequilía, huajca ica ya nopa quiijtohua
ayacmo quineltoca Toteco. Huan quichijtoc más fiero que se tlacatl
catli amo quema quineltocatoc Toteco.
\p
\v 9 Amantzi nimitzilhuis catlique cahual toahuihua
anquintlapejpenise huan anquinijcuilose ipan tiopa. San
xiquintlapejpenica cahual toahuihua catli ya quipiyaj sesenta
xihuitl huan catli nochipa itztoyaj san ica ininhuehue,
\v 10 huan catli nochi tlaneltocani quimatij para quichijtinentoque
catli cuali. Quena, xiquinijcuilo toahuihua catli cuali
quiniscaltijtoque ininconehua huan catli ica paquilistli quinselíaj
paxalohuani. Monequi sihuame catli quinpajpaquilijtoque iniicxihua
tlaneltocani o tlen hueli tlamantli tequitl catli monequi.
Xiquintlapejpeni catli amo quema mohueyimatij huan catli quimatque
quinpalehuíaj catli tlaijiyohuíaj. Quena, xiquintlapejpeni nopa
cahual toahuihua catli ica nochi ininyolo quichijtoque catli cuali.
\p
\v 11 Pero cahual toahuihua catli ayamo quipiyaj sesenta xihuitl amo
xiquinijcuiloca ipan tiopamitl, pampa catli inintlacayo quinequi,
quiniyocatlalis tlen itequi Toteco huan sempa quinequise
monamictise.
\v 12 Yeca Toteco quintlatzacuiltis pampa amo quichijque catli
quitlajtolitzquijque para quichihuase quema moijcuilojque ipan
tiopa.
\v 13 Huan san polihui para cahual toahuihua catli amo más quipiyaj
xihuitl pehuas motlatzcanequise quema calnemise ipan inintequi. Huan
nojquiya huelis teelnamiquise huan tlatzintocatinemise catli amo
inincuenta. Huan quej nopa camanaltise catli amo quinamiqui
quiijtose.
\v 14 Huajca nijnequi cahual toahuihua catli amo más quipiyaj
xihuitl sempa ma monamictica huan quipiyase más ininconehua.
Nijnequi cuali ma quimocuitlahuise ininchajchaj. Amo tleno ma
quichihuaca catli ica tocualancaitaca huelis quintelhuis.
\v 15 Pampa sequin cahual toahuihua ya quicajtejtoque Toteco huan
quitoquilíaj Amocualtlacatl.
\p
\v 16 Nojquiya sintla se sihuatl o se tlacatl catli quineltoca
Toteco quinpiya cahual toahuihua catli quinita quen iteiximatcahua,
monequi quinpalehuis huan amo quincahuas para nopa tiopamitl tlen
tlaneltocani ma quinpalehuica. Quej nopa, tlaneltocani huelise
quinpalehuise san nopa cahual toahuihua catli nelía amo aqui
quipiyaj.
\p
\v 17 Monequi nochi toicnihua ma quintlepanitaca nopa huehue
tlaneltocani catli tlayacanaj ipan tiopamitl sintla tequitij cuali.
Huan monequi ma quintlaxtlahuica cuali. Pero achi más ma
quintlepanitaca huan ma quintlaxtlahuica nopa tlayacanani catli ica
nochi ininchicahualis tlacamanalhuíaj huan tlamachtíaj Icamanal
Toteco,
\v 18 pampa Icamanal Toteco quiijtohua: “Amo xijcamailpi nopa toro
catli ipan moquejquetza trigo para quiyolquixtis.” Huan nojquiya
quiijtohua: “Quema se tlacatl tequiti, monequi para quiselis
itlaxtlahuil.”
\p
\v 19 Amo xijtlacaquili se masehuali catli quitelhuía se huehue
tlacatl catli quinyacana tlaneltocani. Pero sintla ome o eyi
quitelhuíaj, huajca quena, xiquinchihuili cuenta.
\v 20 Huan sintla se huehue tlacatl noja tlajtlacolchihua,
xijtelhuica iniixpa nochi tlaneltocani para sequinoc quiimacasise
tlajtlacolchihuase.
\v 21 Timoteo, nimitznahuatía iixpa Toteco Dios, huan iixpa
Jesucristo, huan iniixpa inintequihuajcahua catli quintlapejpenijtoc
para iaxcahua, xijchihuas ni tlamantli catli nimitzilhuijtoc iniixpa
nochi tlaneltocani huan amo xiquinchicoicneli huehue tlaneltocani
catli mohuampoyohua.
\v 22 Amo xijtlali momax ipan se tlacatl nimantzi para tijtequimacas
quen se huehue tlaneltocaquetl catli tlayacanas. Pampa sintla
tijtzonmajpachos para tijtequitlalis se tlacatl huan teipa
tlajtlacolchihuas, huajca motlajtlacol nojquiya pampa amo tijpixqui
tlamocuitlahuili achtihui ajqueya tijtequitlali. Huajca ximotlachili
para tijchihuas catli nelía cuali huan amo titlajtlacolchihuas.
\p
\v 23 Nojquiya nimitzyolmelahuas tlen moijti huan nopa cocolistli
catli tijpiya tlatoctzitzi. Amo san atl xiquiji, nojquiya xiquiji
quentzi xocomeca atl catli cococ para timochicahuas.
\p
\v 24 Huan ica tlacame catli tiquintlapejpenía, xiquelnamiqui para
itztoque sequin tlacame catli tlanemijya nesi inintlajtlacolhua huan
nochi quimatij Toteco quintlajtolsencahuas. Pero itztoque sequinoc
tlacame catli amo nesis inintlajtlacolhua hasta miyac tonali teipa
huan huajca quena, nochi quimatise.
\v 25 San se ica cuali tequitl catli tlacame quichihuaj. Ica sequin
nimantzi tlanemijya nesi catli cuali quichijtoque huan nochi
quimatij. Pero itztoque sequinoc tlacame catli quichihuaj cuali
tequitl huan amo nesis nimantzi, pero teipa quena, nesis inintequi
catli cuali pampa amo hueli huejcahuas motlatijtoc. Huajca xijpiya
tlamocuitlahuili xijtlachili ajqueya inijuanti tiquintlalis para
tlayacanani.
\c 6
\p
\v 1 Toicnihua catli itztoque tlatequipanohuani catli inintecohua
quincojtoque para iniaxca monequi quintlepanitase inintecohua ipan
tlaltipactli para amo aqui huelis quitlaijilhuis itoca Toteco huan
itlamachtil.
\v 2 Huan sintla toicnihua catli tlatequipanohuani quipiyaj ininteco
catli nojquiya quineltocaj Toteco, ma amo quicahuaca quintlepanitaj.
Monequi achi más cuali ma quintequipanoca pampa ininteco nojquiya
eli iniicni ipan Jesucristo. Huan inincualtequi catli nopa
tlatequipanohuani quichihuaj quipalehuis se tlaneltocaquetl catli
Toteco quiicnelía. Huajca Timoteo, xiquinmachtijtinemi huan
xiquincamanalhuijtinemi ni tlamachtilistli.
\s Quenicatza paquise tlaneltocani
\p
\v 3 Sintla itztoc se masehuali catli tlamachtía seyoc tlamantli
catli amo quen ni temachtli tlamachtilistli tlen Tohueyiteco
Jesucristo, huajca amo neli icamanal, pampa ni tlamachtilistli
techpalehuía ma tijpiyaca tonemilis más quen Toteco.
\v 4 Huan se catli tlamachtía seyoc tlamantli san mohueyimati huan
amo tleno quimati. San quipactía tlanajnanquilis huan
tecamaijixnamiquis ica catli quinequi quiijtos sesen
pilcamanaltzitzi catli masehualme quiijtohuaj. Quej nopa masehualme
pehuaj mochicoitaj, huan moiyocaquixtíaj, huan quintlaijilhuíaj
sequinoc, huan moilhuíaj ne sequinoc tlajtlacolchijtoque quema
huelis amo melahuac.
\v 5 Ni tlamachtiani nochipa quichihuaj para ma onca tlahuilancayotl
ica ininhuihui camanal catli huala ipan inintlalnamiquilis catli
ijtlacajtoc. Amo quiijtohuaj catli melahuac. Mochihuaj quen
quitoquilíaj Toteco icamanal, pero san quinequij quitlanise miyac
tomi. Huajca xiquincajtehua nopa tlamachtiani.
\p
\v 6 Pero sintla tojuanti nelía tijtoquilíaj Toteco icamanal huan
tipaquij ica catli tijpiyaj, tijtlantoque miyac. Quena, tiitztoque
quen tominpiyani.
\v 7 Pampa amo tleno tijhualicaque ipan ni tlaltipactli quema
titlacatque huan temachtli amo tleno tijhuicase quema timiquise.
\v 8 Huajca sintla tijpiyaj catli tijcuase huan catli timoquentise,
ma tipaquica,
\v 9 pampa masehualme catli tlahuel quinequij miyac tomi, nimantzi
huetzise, pampa tlajtlacoli quinyoltilanas. Eltoc quen se
tlaquetztli catli quinmasiltía. Huan inijuanti pehuase quinequise
más tlamantzitzi catli quinijtlacos. Huan ya nopa quinhuicas ipan
se ojtli catli quisemanas ininnemilis hasta teipa mopolose.
\v 10 Miyac tlamantli tlajtlacoli pehua quema se masehuali
quiicnelía tomi huan mojmostla quinequi quipiyas más. Sequin catli
tlahuel quinequiyayaj tomi ya quicajtejtoque quineltocaj Toteco huan
yeca quipantijtoque miyac tlacuajcualoli.
\s Xieli quen se cuali soldado
\p
\v 11 Pero ta Timoteo, ta tise tlacatl catli tiiaxca Toteco. Huajca
xijtlalcahui nochi catli amo cuali quen ya nimitzilhui. Huan
xijtoquili catli xitlahuac. Mojmostla xiitzto más quen Toteco. Más
xijneltoca ya huan más xiquinicneli mohuampoyohua. Mojmostla
xijsentoquili motequi huan xijpiya moyolo ica nochi masehualme.
\v 12 Ximoneltlali para titlahuilanas ica catli amo cuali quen
quichihua se cuali soldado. Quena, tiitztoque ipan se
tlahuilancayotl para ma mocahua senquistoc melahuac totlaneltoquilis
huan para más masehualme ma quicaquise huan quineltocase.
Ximoaxcati nopa nemilistli para nochipa catli Toteco mitzmacatoc.
Tiquijto iniixpa miyac masehualme quenicatza tijneltoca Jesús;
huajca amo quema xijcahua.
\v 13 Timoteo, nimitznahuatía iixpa Totata catli quinmaca
nemilistli nochi tlamantli catli itztoque huan iixpa Cristo Jesús
catli quiilhui Poncio Pilato catli melahuac quema itztoya iixpa,
\v 14 xiquinchihua nochi ni tlanahuatilme catli nimitzilhuijtoc ica
moyolo senquistoc tlapajpactic para amo aqui huelis mitztelhuis
pampa tijpatlatoc nopa tlamachtili. Huan quej nopa xijchijtiya hasta
monextis Jesucristo quema sempa hualas.
\v 15 Pampa quema ajsis nopa tonal catli cuali, Toteco Dios
quiilhuis Tohueyiteco Jesucristo ma sempa hualas tlen ilhuicac.
Pampa Toteco Dios quinahuatía nochi catli onca huan yaya catli
quinamiqui tijhueyitlalise. Yaya nopa Tlanahuatijquetl catli
quinnahuatía nochi tlanahuatiani ipan tlaltipactli huan yaya
ininTeco nochi tecojme.
\v 16 San yaya quipiya nemilistli para nochipa ipan ya. Yaya mocahua
ipan nopa tlahuili catli chicahuac cahuani hasta amo aqui huelis
monechcahuis. Amo aqui se masehuali catli quiitztoc Toteco Totata
huan amo aqui hueli quiita. Ma tijnextilica nochi tlatlepanitacayotl
pampa yaya quipiya nochi tlanahuatili huan quipiyas para nochipa.
Quej nopa ma eli.
\p
\v 17 Xiquinilhui tlaneltocani catli quipiyaj miyac tomi nica ipan
ni tlaltipactli, ma amo mohueyimatica huan ma amo motemachica ipan
inintomi pampa nimantzi huelis quipolose nochi. Xiquinilhui ma
motemachica ipan Toteco catli itztoc huan techmaca nochi catli onca
para ma tipactoca huan techmaca hasta mocahua.
\v 18 Xiquinilhui catli tominpiyaj amo san ma quipiyaca miyac tomi,
pero nojquiya ma quichihuaca miyac tlamantli catli cuali. Ma amo
mochihuaca itzcuime, pero ica paquilistli ma quintemoca masehualme
catli amo quipiyaj tomi para quinpalehuise.
\v 19 Quej ni quema noja itztoque nica quitlantiyase miyac
tlatlancayotl catli Toteco quiajoctiyas nepa ilhuicac huan se tonal
quinmacas. Quej nopa quipantise nopa nemilistli catli nelnelía
cuali.
\s Catli monequi quichihuas Timoteo
\p
\v 20 Ta Timoteo, xijmocuitlahui nopa tlamachtili catli Toteco
mitzmacac pampa motemachi ipan ta. Xiquincajtehua nopa tlacame catli
monajnanquilíaj huan camanaltij tlen catli amo cuali huan catli amo
ipati. Quena, xiquincahua nopa tlamachtiani catli quiijtohuaj
quimatij nochi, pero amo neli, pampa huihuitique.
\v 21 Sequin masehualme quitoquilijque inintlamachtil huan
quicajtoque catli quineltocayayaj. Timoteo, Toteco ma quipiya hueyi
iyolo mohuaya. Quej nopa ma eli.