\id 2TI
\h 2 TIMOTEO
\mt Nopa Ompa Amatlajcuiloli catli Pablo Quitlajcuilhui Timoteo
\c 1
\s Pablo quitlajpalo Timoteo
\p
\v 1 Na niPablo, niitlayolmelajca Jesucristo nimitztlajcuilhuía ni
amatlajcuiloli. Toteco Dios ica ipaquilis nechtequitlali
niitlayolmelajca. Nechtequimacac ma niquinilhui masehualme tlen nopa
nemilistli catli quitencahuilijtoc quinmacas nochi catli
motlatzquiltijtoque ipan Cristo Jesús.
\v 2 Noicni Timoteo, nimitzicnelía quen tinocone. Toteco Dios huan
Toteco Jesucristo ma quipiya hueyi iyolo mohuaya. Ma mitztlasojtla
huan ma mitzmaca tlasehuilistli ipan moyolo.
\s Amo ximopinahua xiteyolmelahua tlen Jesucristo
\p
\v 3 Nochipa nimitzelnamiqui huan nijtlascamati Toteco yohuali huan
tonali pampa tijneltocatoc. Yaya catli nijtequipanohua ica noyolo
tlapajpactic iixpa quen nohuejcapan tatahua nojquiya quichijque.
\v 4 Nijnequi sempa nimitzitas pampa niquelnamiqui quen tichocac
quema timonahuatijque huan nipaquis miyac quema sempa timoitase.
\v 5 Nijmati ta tijneltoca Toteco ica nochi moyolo quen achtihui
quichijqui mohueyi nana, Loida, huan teipa monana, Eunice.
\p
\v 6 Huajca nimitzelnamiquiltía xijtequihui huan xijmaca tetili
nopa yajatili catli Toteco mitzmacac quema nimitztzonmajpacho.
\v 7 Pampa nopa tonal catli Toteco techmacatoc amo anmechchihua
ximajmahuica. Yaya techmaca chicahualistli. Techchihua ma
tiquinicnelica masehualme huan ma tijpiyase cuali totlalnamiquilis.
\v 8 Huajca amo quema ximopinahua xiquinyolmelahua masehualme tlen
Jesucristo huan xiquinilhui na nitzactoc pampa nijneltoca. Huan ica
ichicahualis Toteco monequi xiquijiyohui nochi catli monequi
titlaijiyohuis pampa titeilhuía icamanal.
\v 9 Pampa yaya Toteco techmaquixti tlen totlajtlacolhua huan
technotzqui para ma tiitztoca titlatzejtzeloltique iixpa. Amo
techmaquixti tlen totlajtlacolhua pampa tijchihuayayaj catli cuali.
Toteco techmaquixti san pampa quipixqui hueyi iyolo ica tojuanti
huan quinejqui ya nopa quichihuas. Toteco quiijto quema ayamo
quichihuayaya tlaltipactli para teipa quipiyasquía hueyi iyolo
tohuaya por catli Jesucristo techchihuilisquía.
\v 10 Pero ama technextilijtoc nochi catli quisencajqui quichihuas
pampa Totemaquixtijca Jesucristo hualajqui huan quisemanqui
ichicahualis miquilistli para ayacmo tleno huelis techchihuilis.
Huan yaya technextilijtoc para tiitztose para nochipa ihuaya ya
sintla tijneltocase icamanal.
\p
\v 11 Huan Toteco nechtequitlalijtoc niitlacamanalhuijca huan
niitlayolmelajca huan niitlamachtijca para ma niquinilhui masehualme
catli amo israelitame ni cuali camanali.
\v 12 Yeca nitlaijiyohuía nica ipan tlatzactli. Pero amo
nimopinahua, pampa niquiximati yaya catli nijneltoca huan nijmati
temachtli para yaya quipiya chicahualistli para quimocuitlahuis
catli nijcajtoc imaco hasta ajsis nopa tonal catli ya quitlalijtoc.
\p
\v 13 Timoteo, quema tiquinilhuía masehualme ni cuali camanali
catli nimitzilhuijtoc, amo xijpatla niyon se quentzi. Huan
xitenextili quenicatza tijneltoca Toteco huan tiquinicnelía
masehualme pampa tiitztoc ipan Jesucristo.
\v 14 Ica itlapalehuil Itonal Toteco catli mocahua ipan toyolo,
xijmocuitlahui nopa cuali camanali catli Toteco quicajtoc momaco,
huan amo aqui xijcahuili ma quipatla.
\p
\v 15 Huelis ya tijmati nechcajtejque nochi tlaneltocani catli
ajsicoj nica tlen tlali Asia, hasta nojquiya nechcajtejque Figelo
huan Hermógenes.
\v 16 San Onesíforo, amo. Toteco ma quitlasojtla ica nochi
ichampoyohua pampa miyacpa yaya hualajqui para nechyolchicahuas,
huan amo pinajqui pampa niitztoya nica niilpitoc ica tepos cadena.
\v 17 Huan quema Onesíforo itztoya ipan altepetl Roma, amo
moquetzqui nechtemojtinenqui hasta nechpanti.
\v 18 Ma Toteco quitlasojtla ipan nopa tonal quema
techtequitlachilis. Ta cuali tijmati quen techpalehui nojquiya nepa
ipan altepetl Éfeso.
\c 2
\s Se icual soldado Jesucristo
\p
\v 1 Nocone Timoteo, tijmati para nelía hueyi iyolo Toteco ica ta
ipan Cristo Jesús huan mitzmacatoc miyac yajatili.
\v 2 Nopa tlamachtili catli tijcajqui nitlamachti iniixpa miyac
masehualme, ama xiquinmachti sequinoc catli temachme para teipa
inijuanti no huelise quinmachtise sequinoc.
\p
\v 3 Nojquiya xiquijiyohui tlaijiyohuilistli nohuaya quen se icual
soldado Jesucristo.
\v 4 Xijchihua quen se tlacatl catli mosoldadojchihua. Yaya amo
hueli moilpis ica tlamantli ipan ininnemilis sequinoc masehualme.
San hueli monejnehuilía quenicatza quipactis iteco catli
quisoldadojchijqui.
\v 5 Huan xijchihua quen se motlalojquetl catli motlalohua ica
sequinoc para quiitase ajqueya tlatlanis. Monequi motlalos
senquistoc xitlahuac quen quiijtohua tlanahuatili o amo huelis
tlatlanis huan quiselis nopa xochi corona.
\v 6 Huan milchihuani monequi achtihui ma tequitica chicahuac para
huelis teipa quicuase catli quipixcase.
\v 7 Huajca ximonejnehuili miyac ica catli nimitzilhuijtoc nica huan
Toteco mitzpalehuis tijmachilis nochi.
\p
\v 8 Xiquelnamiqui Jesucristo quema titlaijiyohuía. Yaya catli
tlacatqui quen iteipan ixhui Tlanahuatijquetl David tlen huejcajya
huan yaya catli sempa moyolcuic quema mictoya. Ya ni nopa cuali
camanali catli nitlacamanalhuía,
\v 9 huan yeca niquijiyohuía miyac tlaohuijcayotl huan niilpitoc
ica tepos cadena quen se tlaixpanoquetl catli temajmati. Pero masque
na niilpitoc ica tepos cadena, Toteco icamanal amo ilpitoc.
\v 10 Huan niquijiyohuía nochi catli huala pampa niquinicnelía
inijuanti catli Toteco quintlapejpenijtoc nojquiya para iaxcahua.
Nijnequi inijuanti ma momaquixtica ipan Cristo Jesús para huelis
itztose para nochipa nepa campa tlatlanextli.
\p
\v 11 Ya ni se camanali catli melahuac:
\q Sintla timijque quema Cristo mijqui,
\q nojquiya tiitztose ihuaya.
\q
\v 12 Sintla tiquijiyohuíaj tlaohuijcayotl pampa tiquiximatij, se
tonal titlanahuatise ihuaya.
\q Sintla tiquijtohuaj amo tijchihuase catli Cristo techilhuía,
\q huajca yaya quiijtos amo techmacas nopa tlatlancayotl.
\q
\v 13 Sintla tojuanti amo tiitztoque titemachme,
\q yaya mocahua temachtli pampa amo hueli quiijitos amo moiximati
ica iseltzi huan yaya itztoc ipan toyolo.
\s Xijchihua itequi Cristo ica nochi mochicahualis
\p
\v 14 Xiquinelnamiquilti tlaneltocani tlen ni tlamantli.
Xiquinnahuati iixpa Toteco ma amo tlanajnanquilica tlen
quiijtosnequi sesen camanali, pampa amo ipati huan quitlamisemanas
ininnemilis catli quitlacaquilise.
\v 15 Xitequiti chicahuac para quema ajsis nopa tonal quema
timonextis iixpa Toteco, yaya hueli quiijtos para tijchijqui catli
quipactía. Xiitzto se icual tequipanojca catli amo quipiyas niyon
se tlamantli catli ica mopinahuas. Xiitzto se tequipanojquetl catli
cuali quimati quenicatza quitequihuis huan quiixtomas Icamanal catli
melahuac.
\v 16 Xiquincajtehua tlacame catli tlamachtíaj catli amo quinamiqui
huan catli amo ipati, pampa ica inincamanal quinyacanaj masehualme
ma quichihuaca más tlamantli catli amo quipactía Toteco.
\v 17 Inintlamachtil catli amo melahuac tlamahuas quen se cocolistli
catli tlamahua. Quej nopa inintlamachtil Himeneo huan Fileto.
\v 18 Inijuanti chicoquistoque tlen nopa camanali catli melahuac.
Ama tlamachtíaj para ya moyolcuitoque nochi masehualme catli
mictoque catli moyolcuise. Yeca sequin catli tlaneltocayayaj ayacmo
quimatij tlaque quineltocase.
\v 19 Pero ipan ichaj Toteco quitlalijtoc se tlatzinpehualtili catli
temachtli huan nepa ijcuilijtoc ya ni: “Toteco quiniximati
inijuanti catli nelía iaxcahua”; huan nojquiya quiijtohua: “Nochi
masehualme catli motemachijtoque ipan Tohueyiteco Jesucristo ma
ayacmo quichihuaca catli amo cuali.”
\p
\v 20 Ipan se hueyi cali catli iaxca se tlacatl catli tlapijpixtoc
onca miyac tlamantli catli inijuanti quitequihuíaj. Onca sequin
tlamantli catli amo patiyo quen huajcali huan soqui chachapali, huan
nojquiya onca sequin catli patiyo catli quichijtoque ica oro huan
ica plata. Nopa caltecojtli quitequihuía huajcali huan tlamantli
tlen soquitl ica se tequitl catli quejhueltzi. Huan quitequihuía
tlamantli catli patiyo quema monequi catli yejyectzi para masehualme
quitlepanitase.
\v 21 Sintla se tlaneltocaquetl moiyocacahuas ica inijuanti catli
tlamachtíaj catli amo cuali, yaya elis quen se tlamantli catli
nelía patiyo ipan ichaj Toteco, huan Toteco quitequihuis ipan se
cuali tequitl huan masehualme catli quiitase, quitlepanitase Toteco.
\p
\v 22 Huajca xicholojtehua quema se tlamantli mitzyoltilana para
xijchihuas quen telpocame tlen ni tlaltipactli quinpactía
quichihuaj. Xijtoquili catli xitlahuac. Xijneltoca Toteco ica nochi
moyolo, huan xiquinicneli masehualme. Xiitzto ica cuali ica nopa
tlaneltocani catli motemachíaj ipan Toteco ica ininyolo cuali
iixpa.
\v 23 Xiquintlalcahui tlacame catli camanaltij huihui camanali pampa
teipa san pehuaj mocamaijixnamiquij.
\v 24 Se catli itequipanojca Tohueyiteco ma amo quitemos para
mocamaijixnamiquis ica sequinoc. Monequi ma quinchihuili nochi
masehualme catli cuali. Monequi tlamachtis cuali para masehualme ma
quimachilica itlamachtil huan monequi ma quipiya iyolo ica nochime.
\v 25 Se itequipanojca Tohueyiteco monequi quinmachtis ica yamanic
camanali nopa masehualme catli quicualancaitaj. Huelis Toteco
quinpatilis ininyolo para huelis moyolpatlase huan quimatise catli
melahuac.
\v 26 Huan quej nopa, cholose tlen campa quintlaquechilijtoc
Amocualtlacatl, pampa yaya quinmasiltijtoc para ma quichihuaca catli
yaya quinequi.
\c 3
\s Ipan tlayacapan tonali masehualme quichihuase más catli amo
cuali
\p
\v 1 Nojquiya monequi xijmachili ya ni. Quema hualas tlayacapan
tonali elis nelía fiero.
\v 2 Masehualme san moicnelise ininseltzitzi huan tlahuel quinequise
miyac tomi. Tlahuel motlepanitase huan mohueyimatise.
Quitlaijilhuise Toteco huan amo quintlepanitase ininnanahua huan
inintatahua. Amo motlascamatise por catli quiselijtoque huan amo
tleno quiitase para tlatzejtzeloltic.
\v 3 Amo teicnelise. Amo tetlasojtlase. San teejelnamiquise.
Masehualme ayacmo huelis monahuatise huan yeca quichihuase san catli
quinequise. Tecocose ica paquilistli, huan quicualancaitase nochi
catli cuali.
\v 4 Quena, ipan tlayacapan tonali masehualme quincajcayahuase hasta
ininhuampoyohua huan mosisinise huan quichihuase tlen hueli
tlamantli. Moilhuise miyac inintlalnamiquilis, pero amo neli.
Quitemose san catli ica huelis mopaquilismacase, pero amo quitemose
Toteco.
\v 5 Sequin nopa masehualme mochihuase quen quiiximatij Toteco, pero
amo. Ica catli quichihuase quinextise para amo tleno quinequij tlen
ichicahualis.
\p Xiquintlahuelcahua masehualme catli quej ni quichihuaj.
\v 6 Itztoque quen nopa tlacame nopona. Quincajcayahuaj sihuame
catli huihuitique para huelis calaquise ipan ininchajchaj para
tlamachtise catli amo melahuac. Huan quinmasiltíaj nopa sihuame
para quitoquilise inintlamachtil. Nopa sihuame ya quipiyaj miyac
inintlajtlacolhua huan tlahuel quinequij quichihuase san catli
quinpactía.
\v 7 Nopa sihuame quinequij momachtise nochi tlamachtilistli catli
yancuic, pero amo quema hueli quimachilíaj catli melahuac.
\v 8 Nopa tlamachtiani quinequij quiquetzase camanali catli melahuac
quen Janes huan Jambres, itetlajchihuijcahua Faraón huejcajya
quinequiyayaj quiquetzase nopa tiochicahual nextili catli Moisés
quichihuayaya. Ya ijtlacajtoc inintlalnamiquilis nopa tlamachtiani
huan san tlacajcayahuaj quema quiijtohuaj quineltocaj Toteco, pampa
amo neli.
\v 9 Pero ayacmo huejca yase, pampa teipa nochi quinitase para
huihuitique quen panoc ica Janes huan Jambres huejcajya.
\s Pablo quiilhui Timoteo más catli monejqui quimatis
\p
\v 10 Pero ta Timoteo, tijtoquilijtoc catli nitlamachtía huan catli
na nijchihua. Tijmati catli nijnequi nijchihuas ipan nonemilis huan
quenicatza nijneltoca Toteco. Tiquitztoc quenicatza niquijiyohuijtoc
nochi catli nechpanotihualajtoc. Tijmati niteicnelía huan nijpiya
noyolo ica sequinoc.
\v 11 Tijmati quenicatza nechtlaijiyohuiltijque miyac huan
quenicatza nimoyoltetili. Tijmati quenicatza nechtlamicocojque ipan
altepeme Antioquía, Iconio huan Listra, pero sesen huelta Toteco
nechmanahui.
\v 12 Huan nochi tlaneltocani catli quinequij monejnemiltise quen
Cristo Jesús quinequi, quinpantise masehualme catli
quintlaijiyohuiltise.
\v 13 Pero amo cuajcualme huan tlacame catli tlacajcayahuaj noja
quichihuase achi más catli fiero. Quisenhuiquilise tecajcayahuase
más pampa Amocualtlacatl ya quincajcayajtoc.
\p
\v 14 Pero ta, Timoteo, xijtoquilijtinemi catli timomachtijtoc huan
catli tijmati para melahuac pampa tiquiniximati ajqueyame
mitzmachtijtoque.
\v 15 Pampa hasta quema ticonetzi tieliyaya, tijmatiyaya nopa
Tlajcuiloli catli tlatzejtzeloltic. Huajca amo xijcahua. Huan
Icamanal Toteco mitztlalnamictijtoc huan mitznextilijtoc quenicatza
huelqui timomaquixti tlen motlajtlacolhua pampa tijneltocac Cristo
Jesús.
\v 16 Toteco temacac nochi nopa Tlatzejtzeloltic Tlajcuiloli, huan
quipiya itequi para techmachtía catli melahuac huan
techtlacahualtía quema tijchihuaj catli amo monequi. Huan Icamanal
techtlalnamictía huan technextilía quenicatza ma timonejnemiltica
xitlahuac.
\v 17 Quena, Toteco techmacatoc Icamanal para techcualtlalis nochi
tojuanti catli tiiaxcahua para huelis tijchihuase nochi catli cuali.
\c 4
\s Xitlacamanalhui Icamanal Toteco
\p
\v 1 Timoteo, nimitznahuatía iixpa Toteco Totata huan iixpa Toteco
Jesucristo catli se tonal quintlajtolsencahuas nochi masehualme
catli yoltoque huan catli mictoque quema sempa hualas ipan
tlaltipactli para tlanahuatis,
\v 2 xitlacamanalhuijtinemi icamanal Toteco. Xiquinilhui masehualme
icamanal nochipa masque ohui tijchihuas o amo ohui. Xiquinxitlahua
catli amo quimatij tlaque monequi quichihuase huan xiquintlacahualti
catli ica ininpaquilis tlajtlacolchihuaj. Xiquinyolchicahua ma
quichihuaca catli cuali huan nochipa xiquinmachti ica camanali catli
yamanic.
\v 3 Pampa ajsis se tonal quema masehualme ayacmo quinequise
quitlacaquilise nopa tlamachtilistli catli xitlahuac. Quinequise
quitlacaquilise san catli quinpactis. Huan quintemose tlamachtiani
catli quinmachtise catli inijuanti quinequij.
\v 4 Huan ayacmo quitlacaquilise catli melahuac, san quitoquilise
camanali catli amo neli.
\v 5 Pero ta, Timoteo, nochipa xijpiya cuali motlalnamiquilis.
Ximoyoltetili quema titlaijiyohuía. Xiquinilhui masehualme icamanal
Toteco huan xiquinnotza ma quitoquilica. Xijtlamichihua mojmostla
nochi nopa tequitl catli Toteco mitzmacatoc.
\p
\v 6 Pero ica naya, ya nijtoyajtoc nonemilis para Toteco quen se
tlacajcahualistli catli atic, huan ya monechcahuijtihuala nopa hora
quema nimiquis.
\v 7 Na nitlahuilantoc chicahuac quen se cuali soldado monequi
quichihuas. Na nitlantoc nochi notequi quen se motlalojquetl catli
motlalojtoc hasta campa ontlami. Huan nimosentemachijtoc ipan nopa
tlamachtili catli Toteco nechnextili ma nijneltoca.
\v 8 Huajca nechchiya ica se corona catli nijtlantoc pampa
nijchijqui catli xitlahuac. Huan Tohueyiteco, nopa tequitiquetl
catli xitlahuac, nechmacas nopa corona quema techtequitlachilis
nochi titlaneltocani. Huan amo san na nijselis se corona, pero
nojquiya quiselise nochi tlaneltocani catli tlahuel quichixtose ma
sempa hualas.
\s Xihuala techpaxaloqui
\p
\v 9 Xijchihua campica para nimantzi tihualas techpaxaloqui.
\v 10 Ya nechtlahuelcajqui Demas huan yajqui altepetl Tesalónica
pampa tlahuel quiicnelía tlamantli tlen ni tlaltipactli. Crescente
yajqui tlali Galacia para quichihuas itequi Toteco, huan Tito yajqui
tlali Dalmacia.
\v 11 San toicni Lucas itztoc nohuaya. Xijtemo Marcos huan
xijhualica mohuaya pampa yaya nechpalehuis miyac.
\v 12 Nojquiya amo aqui Tíquico pampa nijtitlanqui altepetl Éfeso.
\v 13 Quema tihualas, techhualiquili notlaque catli nijcajtejqui
ipan ichaj Carpo ipan altepetl Troas. Nojquiya techhualiquili nopa
amatlapohuali, pero achi más nijnequi techhualiquili nopa amatl
catli ipan nitlajcuilohuayaya.
\p
\v 14 Alejandro nopa teposchijquetl nechchihuilijtoc miyac tlamantli
catli amo cuali. Toteco ma quicuepilis quen quinamiqui ica catli
quichijtoc.
\v 15 Xijpiya cuidado ica ya pampa nelía quinequi quiquetzas catli
titlamachtíaj.
\p
\v 16 Quema achtihui monejqui nimonextis iniixpa nopa tequitini, amo
aqui hualajqui para nechtempalehuis. Nochi nechtlahuelcajque. Ma amo
quintlatzacuilti Toteco por catli quichijque.
\v 17 Pero Toteco, quena, yaya itztoya nohuaya huan nechmacac
chicahualistli para cuali nitlacamanalhui icamanal huan quicajque
miyac masehualme catli amo israelitame. Huan Toteco nechmanahui huan
amo nechmictijque nimantzi.
\v 18 Huan nijmati Toteco nechmaquixtis tlen nochi catli amo cuali
huan nechhuicas nepa ilhuicac campa yaya tlanahuatía. Ma
tijhueyichihuaca para nochipa. Quej nopa ma eli.
\s Pablo tlanqui tlajcuilohua
\p
\v 19 Xiquintlajpalo Prisca huan Aquila. Huan xiquintlajpalo nochi
catli itztoque ipan ichaj Onesíforo.
\v 20 Mocajqui Erasto ipan altepetl Corinto. Nojquiya nijcajtejqui
Trófimo ipan altepetl Mileto pampa mococohua.
\v 21 Ximoisihuilti para huelis tiajsiqui nica quema ayamo
tlaseseya. Mitzontlajpalohuaj Eubulo, Pudente, Lino, Claudia huan
nochi toicnihua ipan Cristo nica.
\p
\v 22 Tohueyiteco Jesucristo ma itzto ica motonal, Timoteo. Huan ma
quipiya hueyi iyolo amohuaya nochi amojuanti nopona. Quej nopa ma
eli.