\id HEB
\h HEBREOS
\mt Nopa Amatlajcuiloli para nopa Hebreo Tlaneltocani
\c 1
\s Toteco technojnotztoc ica Icone, Jesucristo
\p
\v 1 Huejcajya Toteco Dios quinnojnotzqui tohuejcapan tatahua
miyacpa ica itlajtol pannextijcahua. Quemantic quinnojnotzqui
itlajtol pannextijcahua ipan temictli, quemantic ica tlanextili huan
quemantic itztoya nechca inijuanti quema quincamanalhuiyaya.
\v 2 Pero ama ipan ni tlayacapan tonali Toteco technojnotztoc ica
Icone catli yaya techtitlanili. Toteco Dios quitequimacac Icone ma
quichijchihua nochi tlamantli catli onca huan quiijtojtoc para nochi
catli onca eltoc iaxca.
\v 3 Itlatlanex Toteco Dios cahuani ipan Icone pampa Icone itztoc
san se ica ya. Quena, Jesucristo itztoc quen iixcopinca catli
technextilía quenicatza itztoc Toteco Dios. Ica icamanal, Icone
Toteco quimajcuitoc nochi catli onca ipan tlaltipactli huan
ilhuicactli campa eltoc, pampa icamanal tlahuel quipiya
chicahualistli. Yaya mijqui para techpajpacas tlen totlajtlacolhua
huan teipa yajqui ilhuicac huan mosehuito inejmac Toteco Dios campa
más onca tlatlepanitacayotl.
\s Icone Toteco itztoc más hueyi que nochi itequihuajcahua Toteco
\p
\v 4 Ya ni technextilía para Icone Toteco itztoc más hueyi que
nochi itequihuajcahua Toteco, pampa Toteco quimacac Icone se
tequiticayotl [1:4 O se itoca.]  catli onpano más hueyi que nopa
catli itequihuajcahua quipiyaj.
\v 5 Toteco Dios amo quema quiilhuijtoc se itequihua catli quiilhui
Icone quema quiijto:
\q “Ta tiNocone. Ama nitlayolmelahua tlamiyacapa para na
nimoTata.”
\m Huan amo quema quiijto tlen se itequihua:
\q “Na nielis iTata huan yaya elis Nocone.”
\m
\v 6 Huan ijcuilijtoc ipan seyoc lugar catli quiijtos Toteco Dios
quema quiixnextis ipan tlaltipactli Icone catli quipiya hueyi
tlatlepanitacayotl, huan ya ni catli quiijtos Toteco Dios:
\q “Ma quihueyichihuaca nochi notequihuajcahua.”
\m
\v 7 Ijcuilijtoc ipan Icamanal Toteco tlaque inintequi
itequihuajcahua, huan ya ni catli quiijtohua:
\q “Toteco Dios quinchijqui itequihuajcahua ma itztoca tonaltzitzi.
\q Quena, quintequihuía quen tlayolmelahuani catli itztoque quen
tlilelemectli.”
\m
\v 8 Pero quema Toteco Dios quicamanalhui Icone, ijcuilijtoc para ya
ni catli quiijto:
\q “Ta tiDios, titlanahuatis para nochipa huan amo quema tlamis
motlanahuatilis.
\q Titlatlajtolsencahuas senquistoc xitlahuac huan temachtli.
\q
\v 9 Mitzpactía nochi catli cuali huan tijcualancaita nochi catli
amo cuali.
\q Yeca Toteco Dios, yaya catli moTeco,
\q mitztequitlalijtoc tiitlanahuatijca huan mitzmacatoc más
paquilistli que nochi sequinoc.”
\m
\v 10 Nojquiya Toteco Dios quiilhui Icone:
\q “NoTeco, ipan ipejya nochi catli onca, ta tijchijchijqui
itlatzinpehualtil tlaltipactli.
\q Ta tijchijchijqui nochi hasta ilhuicactli ica momax.
\q
\v 11 Nochi inijuanti tlamise, pero ta, tiitztos para nochipa.
\q Tlaltipactli huan ilhuicactli sosolihuise quen sosolihui se
yoyomitl.
\q
\v 12 Tiquinmimilos quen elisquía se tlaquemitl catli sosoltic huan
ya ajsic hora para tlantiyas.
\q Pero ta, noTeco, tielis san se para nochipa.
\q Amo quema tihuehuejtiyas, niyon amo quema tlamis monemilis.”
\m
\v 13 Huan Toteco Dios amo quema quiilhui se itequihua quen quiilhui
Icone ipan ni camanali:
\q “Ximosehui nica nonejmac campa onca más tlatlepanitacayotl,
\q hasta nijchihuas para tiquinnahuatis nochi mocualancaitacahua.”
\m
\v 14 Itequihuajcahua Toteco itztoque san tonaltzitzi catli
tetequipanohuaj. Quena, Toteco quintitlantinemi para quinpalehuise
huan quinmocuitlahuise nochi masehualme catli Toteco
quintlapejpenijtoc para quinmaquixtis tlen inintlajtlacolhua.
\c 2
\s Ma tijtlacaquilica Toteco para timomaquixtise
\p
\v 1 Yeca pampa Icone Toteco itztoc más hueyi que nochi
itequihuajcahua Toteco, monequi achi más tijtlacaquilise nochi nopa
tlamachtili catli tijcactoque tlen ya para amo quema tichicoquisase
tlen iojhui.
\v 2 Tijmatij nochi nopa tlanahuatilme catli Toteco temacac ica
itequihuajcahua huejcajya quipixqui chicahualistli. Huan catli amo
quineltocaque huan amo quintlepanitaque nopa tlanahuatilme,
quiselijque se tlatzacuiltili quen quinamiquiyaya.
\v 3 Huajca sintla quintlatzacuilti catli amo quintlepanitaque catli
quiijtojque itequihuajcahua, noja más hueyi Toteco
techtlatzacuiltis tojuanti sintla amo tijchihuilíaj cuenta nopa
hueyi tlamantli catli techchihuilijtoc Icone quema techmaquixti tlen
totlajtlacolhua. Pampa elqui yaya Tohueyiteco Jesús catli achtihui
techilhuicoj para techmaquixtis tlen totlajtlacolhua, huan teipa
nojquiya techilhuicoj nopa tlacame catli quicajque icamanal Icone.
Quena, inijuanti no hualajque huan technextilijque para temachtli
techmaquixtis.
\v 4 Huan nojquiya Toteco technextiliyaya para temachtli inincamanal
nopa tlacame, pampa quema Itonal Toteco quinequiyaya, quinmacayaya
nopa tlacame yajatili ma quichihuaca tlanextilijcayotl, tiochicahual
nextili huan miyac tlamantli catli ica masehualme
quinsentlachilijque.
\s Jesús Yaya Totemaquixtijca
\p
\v 5 Huan Toteco amo quintequimacatoc itequihuajcahua para
tlanahuatise ipan nopa tlaltipactli catli teipa oncas catli ica
ticamanaltij.
\v 6 Pero masehualme tlanahuatise nopona pampa ijcuilijtoc ipan
Icamanal campa se masehuali quiilhuía Toteco:
\q “Toteco, ¿para tlen techchihuilía cuenta tojuanti
timasehualme?
\q ¿Para tlen timocuatotonía ica tojuanti?
\q
\v 7 Para se tlatoctzi tijchijqui para timasehualme ma amo tiitztoca
nel tihuejhueyi quen motequihuajcahua.
\q Pero teipa technextilis miyac tlatlepanitacayotl huan
techhueyitlalis timasehualme.
\q Huan techmacas tequiticayotl ica nochi catli tijchijtoc.
\q
\v 8 Quena, tijtlali tomaco timasehualme para ma tijnahuatica
nochi.”
\m Huan quema quiijtohua quitlali “nochi tlamantli” tomaco
quinequi quiijtos amo onca niyon se tlamantli catli masehualme amo
quinahuatise. Amantzi ayamo tiquitaj sintla masehualme quinahuatíaj
nochi pampa noja polihui para panos.
\v 9 Pero tojuanti tiquitaj Jesús, yaya catli para se tlatoctzi
Toteco quichijqui ma eli tlatzintla itequihuajcahua para huelqui
mijqui por nochi timasehualme pampa hueyi iyolo tohuaya. Huan ama
pampa Jesús mijqui por tojuanti, Toteco Dios quihueyitlalijtoc huan
quinextilijtoc miyac tlatlepanitacayotl.
\p
\v 10 Nochi catli onca, eltoc pampa quej nopa ipaquilis Toteco. Huan
yaya quichijchijqui nochi catli onca. Huan ica catli Jesús
tlaijiyohui, Toteco quichijqui para yaya ma eli nopa tlayacanquetl
catli senquistoc quinamiqui para quinmaquixtis nochi masehualme
catli mochihuase iconehua.
\v 11 Huajca ama Jesús huan nochi tojuanti catli
techtlatzejtzelolchijtoc tijpiyaj san se totata, yaya, toTata Dios.
Yeca Jesucristo amo pinahua para techilhuis tiiicnihua.
\v 12 Ipan Icamanal Toteco ijcuilijtoc campa Jesús quiilhui iTata:
\q “Niquinyolmelahuas noicnihua tlen ta,
\q huan ipan tlasentilistli timitzpaquilismacase san sejco ica
huicatl.”
\m
\v 13 Huan nojquiya quiijtohua:
\q “Na nimotemachis ipan Toteco Dios ihuaya noicnihua.”
\m Huan nojquiya Jesús quiijto:
\q “Nica niitztoc ininhuaya iconehua Toteco catli yaya
nechmacatoc.”
\p
\v 14 Huan pampa tojuanti catli Jesús technotzqui “tiiconehua”
san timasehualme catli tijpiyaj toomiyo huan tonacayo, Jesús
nojquiya tlacatqui quen se masehuali catli quipiya inacayo huan
iomiyo. Huan pampa mochijqui se masehuali, huelqui mijqui huan
quisosolo ichicahualis nopa Amocualtlacatl catli quipixqui
tlanahuatili para ma onca miquilistli ipan tlaltipactli.
\v 15 Quena, Jesús hualajqui quen se masehuali para nochi
masehualme catli mojmostla quiimacasiyayaj miquise, ma ayacmo
majmahuica. Eltoc quen quintojtonqui masehualme campa ilpitoque para
ma yaca majcajtoque.
\v 16 Tojuanti tijmatij Jesús amo hualajqui para quinpalehuis
itequihuajcahua Toteco. Yaya hualajqui para techpalehuis nochi
timasehualme catli tijneltocaj Toteco quen Abraham quineltocac.
\v 17 Yeca monequiyaya para Jesús mochihuasquía quen tojuanti
tiiicnihua para huelis mochihuasquía se tohueyi totajtzi catli
tetlasojtla huan temachtli techtenpalehuía iixpa Toteco. Huajca
quena, Jesús mocuepqui masehuali para huelis motemactilis ica
Toteco Dios por tojuanti quen nopa tlacajcahualistli catli nelnelía
techquixtilis totlajtlacolhua nochi timasehualme.
\v 18 Huan pampa Jesucristo tlaijiyohui huan Amocualtlacatl
quiyoltilanqui ma tlajtlacolchihua, ama Jesús quipiya
chicahualistli para techpalehuis quema titlaijiyohuíaj huan quema
Amocualtlacatl techyoltilana ma titlajtlacolchihuaca.
\c 3
\s Jesús más hueyi que Moisés
\p
\v 1 Noicnihua, amojuanti catli anitlatzejtzeloltijca masehualhua
Toteco huan catli anmechtlapejpenijtoc para anyase ilhuicac,
ximonejnehuilica tlen Jesús, yaya itlayolmelajca Toteco huan
tohueyi totajtzi tojuanti ipan totlaneltoquilis.
\v 2 Jesús elqui temachtli iixpa Toteco catli quitequimacac quen
totajtzi. Quena, san se elqui temachtli quen Moisés elqui temachtli
ipan nochi nopa tlamantli tequitl catli Toteco quimacac ma quichihua
ipan ichaj Toteco huejcajya.
\p
\v 3 Pero Jesús itztoc más hueyi que Moisés, yeca quinamiqui para
más tijtlepanitase ya. Nochipa más tijtlepanitaj se calchijquetl
huan amo quen nopa cali catli yaya quisencajqui.
\v 4 Nochi calme quipiyaj ajqueya quinchijchijtoc, pero Toteco Dios,
yaya catli quichijchijtoc nochi catli onca ipan tlaltipactli.
\v 5 Huan Moisés elqui temachtli para quichihuas nochi catli Toteco
quiilhui ipan nochi itequi ipan ichaj Toteco catli quiquetzqui
huejcajya, pero yaya san elqui se tequipanojquetl. Huan nochi catli
quichijqui ipan nopa cali tlen Toteco tenextili catli Toteco
quichihuasquía teipa.
\v 6 Pero Cristo, amo se tequipanojquetl, yaya Icone Toteco huan
yaya quipiya tlanahuatili ica nochi ichaj Toteco. Huan tojuanti
catli titlaneltocani tiitztoque ipan ichaj Toteco sintla
tijsenhuiquilíaj timoneltlalíaj huan ica paquilistli timochiyaj
ipan Toteco.
\p
\v 7 Huan ijcuilijtoc ipan Icamanal Toteco campa Itonal techilhuía:
\q “Ama quema anquicaquij icamanal Toteco, xijtlacaquilica.
\q
\v 8 Amo ximoyoltetilica quen huejcajya moyoltetilijque nopa
israelitame catli eliyayaj amohuejcapan tatahua.
\q Pampa huejcajya nepa campa huactoc tlali inijuanti quiyejyecojque
Toteco para quiitase tlaque quichihuasquía.”
\q
\v 9 (Huan Toteco quiijto:)
\q “Masque nijchihuayaya tiochicahual nextili iniixpa amohuejcapan
tatahua para cuarenta xihuitl,
\q inijuanti quejipa nechyejyecohuayayaj huan mochiyayayaj quiitase
tlaque más nijchihuasquía para nechneltoquilisquíaj.
\q
\v 10 Yeca nelía nicualanqui ininhuaya nopa masehualme,
\q pampa niquitac para ni masehualme nochipa yolchijchicoquisaj.
\q Amo quiiximajtoque nopa cuali ojtli catli na nijnequi ma
quitoquilica.
\q
\v 11 Huajca nicualanqui ininhuaya huan nimotestigojquetzqui para
amo quema calaquise campa onca nopa tlasiyajquetzalistli catli
nitemaca.”
\p
\v 12 Huajca noicnihua, ximomocuitlahuica para amo anquipiyase se
amoyolo catli amo cuali catli ayacmo quinequis tlaneltocas. Amo
xijpiyaca se amoyolo catli quinequi anmechchijchicoquixtis tlen
Toteco catli nelía yoltoc.
\v 13 Más cuali, ama quema noja onca tonali, ximoyolchicahuaca se
ica seyoc para más anquineltocase Toteco. Ma amo aqui moyoltetili
ica Toteco pampa quicajcayajtoc tlajtlacoli.
\v 14 Pampa sintla timochihuase titemachme hasta itlamiya huan
tijsenhuiquilise timotemachise ipan Toteco quen quema achtihuiya
tijneltocaque Cristo, huajca temachtli tijselise ihuaya Cristo nochi
catli techtocaros.
\v 15 Huan ijcuilijtoc ipan Icamanal Toteco campa quiijtohua:
\q “Ama xijtlacaquilica catli Toteco quiijtohua.
\q Amo ximoyoltetilica ica ya quen nopa israelitame quichijque
huejcajya quema amo quitlepanitaque.”
\m
\v 16 Huan ¿ajqueyame eliyayaj nopa masehualme catli amo
quitlepanitaque masque quicajque catli yaya quinilhui ma
quichihuaca? Elque nopa israelitame catli Moisés quinquixti ipan
tlali Egipto.
\v 17 Huan san se inijuanti catli tlajtlacolchijque huan
quicualancamacaque Toteco para cuarenta xihuitl, huan yeca
quincahuili ma miquica nepa ipan huactoc tlali huan para nopona ma
quintlalpachoca.
\v 18 Huan Toteco quinilhui nopa israelitame catli amo quineltocaque
para melahuac amo calaquisquíaj ipan nopa tlali tlatencahuali para
ipan mosiyajquetzase.
\v 19 Huajca tiquitaj para inijuanti amo huelque calajque campa
mosiyajquetzasquíaj pampa amo quineltocaque Toteco.
\c 4
\s Imasehualhua Toteco mosiyajquetzase
\p
\v 1 Huan ama ipan ni tonali Toteco noja technotza ma ticalaquica
ipan itlasiyajquetzalis. Huajca ma timomocuitlahuise para amo
tiquiyocacahuase niyon se camanali catli Toteco techtencahuilijtoc
para quenicatza hueli timosiyajquetzase ipan ya.
\v 2 Pampa Toteco nojquiya techilhuijtoc tojuanti nopa cuali
camanali para huelis timosiyajquetzase san se quen huejcajya
quinilhui nopa israelitame. Pero inon cuali camanali catli Toteco
quinilhui huejcajya amo quinpalehui, pampa amo quineltocaque.
\v 3 Pampa san tojuanti catli nelía tijneltocaj Toteco huelis
ticalaquise campa onca nopa tlasiyajquetzalistli. Toteco Dios
camanalti tlen inijuanti catli amo quineltocaque huan quiijto:
\q “Quema nicualanqui ininhuaya,
\q nimotestigojquetzqui para amo calaquise campa onca nopa
tlasiyajquetzalistli catli nitemaca.”
\p Huajca inijuanti amo calajque campa Toteco quinequiyaya ma
calaquica masque Toteco quitlamilti itequi hasta quema
quichijchijqui tlaltipactli huan quinchiyayaya para inijuanti ma
mosiyajquetzaca ihuaya.
\v 4 Pampa ijcuilijtoc ipan Icamanal Toteco catli Toteco quichijqui
ipan nopa chicompa tonali, quiijtohua:
\q “Toteco Dios mosiyajquetzqui ipan nopa chicompa tonali pampa ya
quitlamiltijtoya nochi itequi.”
\m
\v 5 Pero ipan seyoc lugar nojquiya techpohuilía tlen nopa
israelitame catli amo calajque campa Toteco quinequiyaya, pampa
Toteco Dios quiijto:
\q “Amo calaquise campa nitemaca tlasiyajquetzalistli.”
\m
\v 6 Huajca Toteco amo quincahuili nopa masehualme ma calaquica
pampa amo quineltocaque masque Toteco quinilhuijtoya icual camanal.
Pero noja polihui para sequin masehualme ma calaquica huan
mosiyajquetzase ihuaya.
\v 7 Yeca Toteco Dios quiixquetztoc seyoc tonal para ma calaquica
campa onca tlasiyajquetzalistli, pampa Toteco quiijto: “Ama ni
tonal.” Huan teipa quema ya panotoya miyac xihuitl, David
tlayolmelajqui catli Toteco quiijto huejcajya, huan quiijto:
\q “Ama ni tonal, sintla Toteco anmechnotzas ximosiyajquetzaca
ihuaya, xijtlacaquilica.
\q Amo ximoyoltetilica, niyon amo xijtlahuelcahuaca icamanal.”
\m
\v 8 Pero amo camanalti tlen tlali Canaán, pampa sintla Josué
hueltosquía quinmacatosquía tohuejcapan tatahua
tlasiyajquetzalistli nopona, Toteco teipa ayacmo quiijtosquía para
ama eltoc nopa tonal para masehualme ma calaquica ipan
itlasiyajquetzal.
\v 9 Huajca noja mocahua se tlasiyajquetzalistli para imasehualhua
Toteco ipan ma calaquise.
\v 10 Huan aqui hueli catli calaqui campa Toteco temaca
tlasiyajquetzalistli, mosiyajquetzas tlen nochi itequi san se quen
Toteco mosiyajquetzqui quema quitlamilti itequi para quichijchijqui
tlaltipactli.
\p
\v 11 Huajca ma tijchihuaca campica para ticalaquise campa
timosiyajquetzase ihuaya Toteco. Ma amo timochihuaca quen nopa
israelitame catli huetzque pampa amo quitlepanitaque Toteco
huejcajya.
\p
\v 12 Pampa Icamanal Toteco yoltoc huan quipiya tlahuel miyac
chicahualistli. Más tlatequi que se machete catli oncac tlatentili.
Icamanal Toteco calaqui hasta ipan tealma huan tetonal huan hasta
campa más teyolijtic. Huan quipannextía sintla cuali o amo cuali
catli timonejnehuilíaj huan quipannextía catli tijnequij
tijchihuase.
\v 13 Amo tleno catli Toteco quichijtoc huelis motlatis iixpa para
ma amo quiita, pampa iixpa ya tlanemijya nesi nochi catli tijchihuaj
huan catli timonejnehuilíaj. Huan se tonal monequi timoquetzase
iixpa para tijmacase cuenta tlen nochi catli tijchijtoque.
\s Jesús, yaya nopa hueyi totajtzi
\p
\v 14 Yeca tojuanti tijpiyaj se tohueyi totajtzi catli ya ajsito
ipan ilhuicac, yaya Jesús, Icone Toteco. Huajca nochipa ma
timotemachica ipan ya quen tiquijtojtoque tlamiyacapa para
tijchihuaj.
\v 15 Inon tohueyi totajtzi techtlasojtla quema amo tijpiyaj fuerza
para tijchihuase catli xitlahuac, pampa nochi tlamantli tlajtlacoli
nojquiya quiyoltilanqui Jesús quen tojuanti techyoltilana
mojmostla, pero yaya amo quema tlajtlacolchijqui.
\v 16 Huajca ma timonechcahuica ica temachili campa mosehuijtoc
Toteco catli nochi quinahuatía. Huan ma amo timajmahuica
tijtlajtlanise itlapalehuil, pampa temachtli techtlasojtlas huan
techpalehuis ipan tlen hueli tlatoctzi quema más monequi pampa
hueyi iyolo ica tojuanti.
\c 5
\p
\v 1 Nochi sequinoc huejhueyi israelita totajtzitzi itztoyaj tlacame
catli quintlapejpenijque tlen nochi masehualme. Huan quipixque
tequiticayotl para moquetzase iixpa Toteco por nochi israelitame.
Nojquiya quipixque inintequi para quimacase Toteco tlacajcahualistli
huan inieso tlapiyalme para quiixtzacuilise inintlajtlacolhua nopa
masehualme.
\v 2 Huan sesen nopa huejhueyi totajtzitzi quipixqui hueyi iyolo ica
nopa masehualme catli amo quimatque catlique cuali para quichihuase
huan catli ica chicoquisasquíaj. Pampa nopa totajtzitzi nojquiya
itztoyaj san masehualme quen tojuanti, huan amo quipixque miyac
fuerza para quichihuase nochi catli cuali.
\v 3 Yeca sesen hueyi totajtzi monequiyaya achtihui quimacas Toteco
se tlacajcahualistli para quiixtzacuilis tlen ya itlajtlacolhua huan
teipa quimacayaya Toteco se tlacajcahualistli para quiixtzacuilis
inintlajtlacolhua nochi masehualme.
\p
\v 4 Huan niyon se hueyi totajtzi amo motlapejpeni iseltzi para
mochihuas hueyi totajtzi huan quipiyas nopa tlatlepanitacayotl, pero
monejqui Toteco Dios ma quitlapejpeni sesen inijuanti, san se quen
Toteco quitlapejpeni Aarón huejcajya.
\v 5 Yeca Cristo nojquiya amo motlapejpeni ica iseltzi para
mochihuas tohueyi totajtzi. ¡Amo! Elqui Toteco Dios catli
quitequitlali Cristo quema quiilhui:
\q “Ta tiNocone. Ama nitlayolmelahua tlamiyacapa para na
nimoTata.”
\m
\v 6 Huan nojquiya ipan Icamanal, Toteco Dios quej ni quiilhui
Cristo:
\q “Ta tielis se totajtzi para nochipa ica san se nopa hueyi
tequiticayotl quen Melquisedec quipixqui.”
\m
\v 7 Quema Cristo itztoya ipan ni tlaltipactli, yaya motlatlajti ica
Toteco Dios. Quitlajtlani Toteco catli quinequiyaya huan
quicamanalhui ica nochi iyolo hasta chocac. Pampa san Toteco
quipiyayaya chicahualistli para quimaquixtis tlen nepa campa
miquilistli. Huan Toteco Dios quitlacaquili pampa Cristo
quitlepanitayaya Toteco ica nochi iyolo.
\v 8 Huan masque Cristo eliyaya Icone Toteco, ica catli quiijiyohui,
quipanti para nelía miyac ipati para quitlepanitas catli Toteco
quiilhui ma quichihua.
\v 9 Huan ica ni mochijqui senquistoc nopa hueyi totajtzi catli
Toteco Dios quinequiyaya. Huan mochijqui nopa Temaquixtijquetl catli
quinmaquixtía para nochipa nochi masehualme catli quichihuaj catli
yaya quiijtohua,
\v 10 pampa Toteco Dios quitequimacac Cristo para elis se hueyi
totajtzi ica san se nopa hueyi tequiticayotl catli quipixqui
Melquisedec huejcajya.
\s Mahuilili sintla ayacmo tijneltocase Toteco
\p
\v 11 Onca miyac más tlen ni tlamantli catli nijnequisquía
nimechilhuis, pero ohui para nimechixtomilis pampa amo anquinequij
anquicaquise.
\v 12 Quipiya miyac xihuitl anquineltocaque Toteco huan quinamiqui
ya anelisquíaj antlamachtiani, pero amo. Noja monequi para sequinoc
ma anmechmachtica sempa nopa tlamantli catli amo más ohui ipan
Icamanal Toteco. Anitztoque quen coneme catli ya monequi tlacuase,
pero noja quinequij lechi.
\v 13 Quena, nochi tlaneltocani catli san quinequij quicaquise catli
amo más ohui ipan Icamanal Toteco itztoque quen pilconetzitzi catli
amo moscaltijtoque ipan Toteco, huan amo hueli quimatise tlaque
cuali huan tlaque amo cuali para quichihuase.
\v 14 Pero tlacualistli catli tetic eltoc para masehualme catli ya
moscaltijtoque huan hueli quimachilíaj Icamanal Toteco catli más
ohui. Ni masehualme quitequihuijtoque inintlalnamiquilis para
quiiximatise catli cuali huan catli amo cuali para quichihuase.
\c 6
\p
\v 1 Huajca ma tijcahuaca tlaica nopa achtihui tlamachtili tlen
Cristo catli ya anquicactoque. Ama nimechmachtis nopa tlamachtili
catli anmechpalehuis anmoscaltise. Ayacmo monequi nimechilhuis sempa
para amo aqui huelis momaquixtis tlen itlajtlacolhua pampa quichihua
catli cuali, niyon amo monequi nimechilhuis para monequi xijcahuaca
amotlajtlacolhua huan xijneltocaca Toteco.
\v 2 Ayacmo monequi nimechilhuis nopa tlamachtili tlen tlacuaaltili,
niyon tlaque quiijtosnequi quema tlayacanani ipan tlaneltocani
quitlalíaj ininmax ipan se tlaneltocaquetl para quitequimacase.
Ayacmo monequi nimechilhuis para moyolcuise nochi mijcatzitzi huan
quenicatza Toteco tetlajtolsencahuas huan tetlatzacuiltis para
nochipa. Nochi ni tlamantli ya anquimatij.
\v 3 Huajca sintla Toteco quinequi, nimechmachtis sequinoc tlamantli
catli más monequi.
\p
\v 4 Pampa san tlapic niquinmachtis masehualme catli quipixtoyaj
tlahuili ipan ininyolo huan quicajtejtoque. ¿Para tlen sempa
niquinmachtis catli ya quimachilijtoque catli cuali Toteco techmacas
nepa ilhuicac huan catli ya quiselijtoque Itonal Toteco?
\v 5 Sintla ya quimachilijtoque ipan ininyolo para cuali icamanal
Toteco, huan quimatij para oncas hueyi chicahualistli ipan nopa
tlali catli hualas teipa,
\v 6 huan teipa chicoquisaj tlen Toteco, amo huelis
niquinyolchicahuas ma moyolcuepaca ica ya quema eltoc quen
quicuamapeloltíaj huan quipinahualtíaj Icone tlamiyacapa.
\v 7 Ni masehualme itztoque quen se mili catli quiselía miyac atl
quema tlaquiyahui. Huan sintla catli quitoctoque ipan nopa mili
temaca cuali itlajca, huajca Toteco quitiochihuas.
\v 8 Pero sintla nopa mili san temaca huitztli huan sahua mecatl,
huajca amo tleno ipati. Nechcatitoc para Toteco quitelchihuas nopa
mili. Huan temachtli quitlatis catli temacatoc.
\s Camanali catli techpalehuía huan techyolchicahua
\p
\v 9 Pero amojuanti noicnihua catli nimechicnelía, masque
nimechcamanalhuijtoc tlen ni masehualme catli quicajtejtoque Toteco,
amo nijneltoca para amojuanti anquicajtejtoque. Nimotemachía ipan
Toteco para tlamantli catli más cuali anmechchiya amojuanti ipan
nopa tonal, tlamantli catli Toteco quinmacas masehualme catli
quiselise tlamaquixtilistli.
\v 10 Toteco Dios nochipa quichihua catli xitlahuac. Yaya amo
quielcahuas nopa tequitl catli anquichijtoque pampa anquiicnelíaj.
Amo quielcahuas quenicatza anquinpalehuijque itlatzejtzeloltijca
masehualhua huan hasta ama noja anquichihuaj.
\v 11 Pero nijnequi para sesen amojuanti xiquicnelica Toteco hasta
ajsis tonal para anmiquise. Quej nopa anquimatise ica temachili
anquiselise nochi catli anmochiyaj para anquiselise.
\v 12 Amo tijnequij ximotlatzcanequica. Tijnequij para anelise quen
nopa tlaneltocani catli ica nochi ininyolo quineltocaj nochi catli
Toteco techilhuijtoc huan quipiyaj ininyolo para quichiyase hasta
quiselise nochi catli Toteco techtencahuilijtoc para techmacas.
Nelía Toteco techmacas nochi catli tijchiyaj
\p
\v 13 Nimechmacas se nemachiltili. Quema Toteco quitencahuili
Abraham catli quimacasquía, quinequiyaya Abraham ma quineltoca para
temachtli quiselisquía. Huan pampa amo aqui más hueyi que ya para
quitestigojquetzas, Toteco Dios motestigojquetzqui iseltzi,
\v 14 huan quiilhui Abraham: “Temachtli nimitztiochihuas tlahuel
miyac. Nijchihuas para moteipan ixhuihua ma elica onpano miyac
millones hasta amo aqui huelis quinpohuas.”
\v 15 Huan Abraham quipixqui iyolo huan quichixqui huan ajsic tonal
quema Toteco quimacac Isaac quen quitencajtoya.
\p
\v 16 Quema masehualme quitencahuaj para quichihuase se tlamantli,
quitestigojquetzaj se catli más hueyi que inijuanti para ma
quinneltocaca para temachtli inincamanal. Huan nochi quimatij quema
se tlatestigojquetza huajca ica ya nopa tlami camanali huan monequi
catli tlatestigojquetzqui ma quichihua catli quiijto.
\v 17 Yeca Toteco Dios motestigojquetzqui pampa quinequiyaya
quinnextilis nopa masehualme para temachtli quiselisquíaj nopa
catli quitencahuayaya para quinmacas, huan para yaya amo quema
moyolpatlasquía ica catli moilhuijtoya quichihuas.
\p
\v 18 Huajca Toteco techmacatoc ome tlamantli catli amo hueli
mopatla, pampa Toteco amo hueli istlacati. Achtihui techtencahuili
catli techmacas huan teipa motestigojquetzqui para quichihuas catli
quiijtojtoc. Yeca ama nochi tojuanti catli timotlalojtoque campa ya
para techmanahuis, huelis timoyoltlalise pampa tijmatij temachtli
yaya quichihuas nochi catli techtencahuili para quichihuas.
\v 19 Huajca tijmatij temachtli Toteco techmaquixtis quen
techtencahuilijtoc quichihuas. Huan yeca eltoc quen tijpiyaj toalma
cuali ilpitoc hasta nepa ipan ilhuicac.
\v 20 Tohueyiteco Jesús ya calajqui ilhuicac para quitlapos se
ojtli para tojuanti huelis ticalaquise nojquiya. Huan nopona yaya
mochijtoc nopa hueyi totajtzi catli nochipa itztos ica nopa hueyi
tequiticayotl catli quipixqui Melquisedec huejcajya.
\c 7
\s Quihuicalotía totajtzi Jesús ica nopa totajtzi Melquisedec
\p
\v 1 Huejcajya Melquisedec eliyaya tlanahuatijquetl tlen altepetl
Salem huan eliyaya se totajtzi iixpa Toteco Catli Más Hueyi. Huan
se tonal quema Abraham mocuepayaya ichaj pampa quintlantoya miyac
tlanahuatiani ipan tlahuilancayotl, Melquisedec quinamiquico huan
quitiochijqui.
\v 2 Huan Abraham quimacac se diezmo tlen nochi tlamantli catli
quitlantoya ipan nopa tlahuilancayotl.
\p Nopa tocayotl, Melquisedec, quiijtosnequi “Tlanahuatijquetl
Catli Xitlahuac.” Huan nojquiya eliyaya tlanahuatijquetl tlen
Salem, huan Salem quiijtosnequi “Tlasehuilistli.” Huajca yaya se
“Tlanahuatijquetl Tlen Tlasehuilistli.”
\v 3 Amo cana ijcuilijtoc ajqueya itata, o ajqueya inana, o ajqueya
ihuejcapan tatahua Melquisedec. Amo cana techilhuía quema tlacatqui
o quema mijqui. Huajca tiquitaj para yaya itztoc quen Icone Toteco
catli mochijtoc se totajtzi para nochipa.
\p
\v 4 Xiquitaca quenicatza tijmatij para tlahuel hueyi eliyaya
Melquisedec. Achtihui Abraham, yaya catli elqui tohuejcapan tata
nochi tiisraelitame, quiitac para hueyi pampa quimacac Melquisedec
se diezmo tlen nochi catli quitlantoya ipan tlahuilancayotl.
\v 5 Miyac xihuitl teipa itlanahuatilhua Moisés quinmacac nopa
iixhuihua Leví catli mochijque totajtzitzi tequiticayotl para
quiselise diezmos tlen israelitame masque inijuanti nojquiya
itztoyaj iniicnihua huan iteipan ixhuihua Abraham.
\v 6 Pero ni Melquisedec catli amo tijmatij ajqueya itatahua amo
eliyaya iixhui Leví, huan Abraham quimacac se diezmo tlen nochi
catli quipixqui.
\p Ica ompa, Melquisedec quitiochijqui Abraham, yaya catli Toteco ya
quitencahuilijtoya tlaque quimacas.
\v 7 Huan nochi masehualme quimatij para se catli tetiochihua
quipiya más tequiticayotl huan amo quen catli tlatiochihuali.
\p
\v 8 Ica expa, nopa israelita totajtzitzi catli quiselijque nochi
diezmos itztoyaj san tlacame catli miquiyayaj huan teipa sequinoc
quiitzquijque inintequi. Pero ica Melquisedec amo tiquitaj sintla
mijqui, pampa Icamanal Toteco camanalti tlen ya quen noja itztoc.
\p
\v 9 Huan ica najpa, tiquitaj más hueyi Melquisedec que israelita
totajtzitzi catli teipa itztosquíaj pampa eltoc quen ininhuejcapan
tata catli itoca eliyaya Leví, nojquiya itztoya nopona nopa tonal
huan nojquiya quitlaxtlahui Melquisedec quema Abraham quimacac
idiezmo.
\v 10 Pampa masque Leví ayamo tlacatiyaya nopa tonal quema
Melquisedec quinamijqui huan quiseli nopa diezmos, huelis tiquijtose
para Abraham quihuicayaya ipan itlacayo nopa xinachtli ica catli
teipa tlacatisquía Leví, pampa Leví elqui se iteipan ixhui
Abraham.
\p
\v 11 Huan ama ica ya ni nijtlamiltis. Nopa israelitame quinselijque
itlanahuatilhua Moisés catli quiijto para totajtzitzi ma elica
iteipan ixhuihua Leví. Pero sintla nochi catli nopa totajtzitzi
quichijque hueltosquía quinchijtosquíaj masehualme xitlahuaque
iixpa Toteco, amo monectosquía para Toteco techtitlanilijtosquía
seyoc totajtzi, yaya Cristo, catli amo ininteipan ixhui Leví huan
Aarón, pero quipiya tequiticayotl quen Melquisedec quipixqui
huejcajya.
\p
\v 12 Huan ama pampa mopatlac totajtzi, Toteco nojquiya monejqui
quipatlas nopa israelita tlanahuatilme,
\v 13 pampa tijmatij para Cristo amo huala ipan ihueyi familia
Leví. Yaya huala ipan seyoc hueyi familia catli amo huelqui
mochihuase totajtzitzi.
\v 14 Quena, tlanemijya nesi para Tohueyiteco Jesucristo huala ipan
nopa hueyi familia catli mochijqui ica iteipan ixhuihua Judá. Huan
Moisés amo cana quiijcuilo sintla Judá o se iixhui huelis
mochihuas totajtzi.
\p
\v 15 Huajca ama noja más tlanemijya nesi para ya onca se yancuic
tlamantli totajtzi catli quipiya tequiticayotl quen Melquisedec.
\v 16 Quena, Cristo amo mochijqui totajtzi pampa hualayaya ipan
ifamilia Leví catli itlanahuatilhua Moisés quiijtojque ma elis
totajtzi. ¡Amo! Cristo mochijqui totajtzi pampa quipiya
chicahualistli para itztos para nochipa huan amo aqui huelis
quitlamiltis inemilis,
\v 17 yeca ijcuilijtoc ipan Icamanal Toteco catli Toteco Dios
quiilhui Cristo, huan quiijto:
\q “Ta tielis se titotajtzi para nochipa ica san se nopa hueyi
tequiticayotl quen Melquisedec quipixqui.”
\m
\v 18 Huajca Toteco quitlamiltili inintequi nopa tlanahuatilme catli
temacatoya achtihuiya pampa amo quipixqui chicahualistli, huan amo
ipati eliyaya
\v 19 para quinmaquixtis masehualme huan quinchihuas xitlahuaque
iixpa Toteco. Pero ama pejtoc seyoc camanali catli achi cuali huan
huelis tijnechcahuise Toteco pampa techchijtoc tixitlahuaque iixpa.
\p
\v 20 Quema Toteco quichijqui Jesucristo se totajtzi para nochipa,
tlatestigojquetzqui para ma tijmatise para temachtli,
\v 21 pero quema quintequimacac nopa israelita totajtzitzi, amo aqui
tlatestigojquetzqui. San ica Jesucristo Toteco Dios quiijto:
\q “Na nimoTeco Dios.
\q Nimotestigojquetza huan amo nimoyolcuepas:
\q ‘Ta tielis se totajtzi para nochipa ica san se nopa hueyi
tequiticayotl quen Melquisedec quipixqui.’ ”
\m
\v 22 Huajca tijmatij ica temachili para itequi Cristo quen totajtzi
elis onpano más cuali que nopa totajtzitzi catli achtihuiya, pampa
itequi Cristo pejqui quema Toteco Dios tlatestigojquetzqui.
\v 23 Huan achtihuiya itztoyaj miyac totajtzitzi, pampa quema mijqui
sesen inijuanti, monequiyaya seyoc ma quiitzquis itequi.
\v 24 Pero pampa Cristo itztos para nochipa, ayacmo monequis seyoc.
\v 25 Huan yeca Cristo hueli quinmaquixtis para nochipa nochi
masehualme catli quinechcahuíaj Toteco por catli yaya quichijqui,
pampa yaya itztos para nochipa huan tlatoctzitzi motlatlajtía ica
Toteco Totata por inijuanti.
\p
\v 26 Jesucristo yaya senquistoc inon tlamantli hueyi totajtzi catli
monequiyaya para tojuanti. Yaya tlatzejtzeloltic huan amo quipiya
tlajtlacoli. Amo aqui huelqui quitelhuis ica niyon se tlamantli
catli amo cuali. Huan ama yaya itztoc iyoca tlen nochi
titlajtlacolchijca masehualme, huan quitlalijtoc campa más onca
tlatlepanitacayotl nepa ipan ilhuicac.
\v 27 Nopa israelita totajtzitzi mojmostla quimacayayaj Toteco Dios
tlacajcahualistli. Achtihui quimacayayaj para inintlajtlacolhua
inijuanti, huan teipa quimacayayaj para inintlajtlacolhua nochi
masehualme. Pero Cristo amo quej nopa quichijqui. Yaya san sempatzi
motemactili huan mijqui quen se tlacajcahualistli, yeca ayacmo
monequi más tlacajcahualistli.
\v 28 Huejcajya itlanahuatilhua Moisés quintequimacac tlacame para
ma elica huejhueyi totajtzitzi masque tlajtlacolchihuani catli amo
quipixque chicahualistli para quichihuase catli nelcuali. Pero
masque ya eltoyaj itlanahuatilhua Moisés, Toteco Dios
motestigojquetzqui huan quitequimacac Icone, Jesucristo catli
senquistoc cuali, para ma eli hueyi totajtzi para nochipa.
\c 8
\s Jesús techcahuilijtejtoc se yancuic camanal sencahuali ica
Toteco
\p
\v 1 Tlen nochi catli nimechilhuijtihualajtoc, ya ni catli más
ipati: Tohueyi totajtzi Jesucristo ya mosehuijtoc nepa ilhuicac
inejmac Toteco Dios campa más onca tlatlepanitacayotl.
\v 2 Nopona Jesucristo tequiti quen tohueyi totajtzi tiopan calijtic
nepa ipan ilhuicac campa nelnelía eltoc Campa Más
Tlatzejtzeloltic. Nopa tiopamitl Toteco Dios iseltzi quichijqui. Amo
tlachijchihuali ica ininmax masehualme.
\p
\v 3 Nochi huejhueyi totajtzitzi quipiyayayaj inintequi para
quimacase Toteco Dios tlacajcahualistli huan inieso tlapiyalme. Huan
Jesucristo nojquiya monequiyaya quimacas Toteco se
tlacajcahualistli.
\v 4 Sintla Jesucristo itztosquía ipan tlaltipactli, amo elisquía
se totajtzi, pampa nica ya itztoque totajtzitzi catli temacaj
tlacajcahualistli quen quiijtohuaj itlanahuatilhua Moisés.
\v 5 Pero tijmatij nopa israelita totajtzitzi nica ipan ni
tlaltipactli tequitij ipan se tiopamitl catli san quiixcopinaj nopa
tiopamitl catli nelnelía eltoc nepa ilhuicac, o huelis tiquijtose
para san se ecahuilotl tlen nopa catli nelnelía. Pampa huejcajya
quema Moisés quichihuayaya nopa tiopamitl tlen cuetlaxtli, Toteco
quicamanalhui huan quiilhui: “Xijpiya cuidado para tijchihuas
senquistoc quen nopa tiopamitl nepa ilhuicac catli nimitznextili
iixcopinca nepa ipan tepetl Sinaí.”
\v 6 Huan ama Cristo tohueyi totajtzi catli itztoc nepa ilhuicac
nojquiya quipiya se tequitl catli más cuali que inijuanti catli
tequipanohuaj ipan ni tlaltipactli, pampa yaya quisencajqui se
camanal sencahuali ica Toteco Dios huan timasehualme catli achi más
cuali. Huan inon yancuic camanal sencahuali techtencahuilía miyac
tlamantli catli más cuali que nopa camanali achtihuiya.
\p
\v 7 Sintla nopa achtihui camanal sencahuali ica Toteco huan
masehualme eltosquía senquistoc cuali, huajca amo monectosquía
seyoc.
\v 8 Pero Toteco Dios iseltzi quiitac para masehualme catli
quipixtoyaj nopa achtihui camanal sencahuali, amo hueliyayaj
quichihuaj catli quiijtohua, huan yaya amo quipacti huan quiijto:
\q “Ajsis se tonali quema nijchihuas se yancuic camanal sencahuali
ica masehualme ipan tlali Israel huan ipan tlali Judá.
\q
\v 9 Amo elis quen nopa achtihui camanal sencahuali catli nijchijqui
ininhuaya ininhuejcapan tatahua quema niquinmatilanqui huan
niquintlayacancuili para ma quisaca ipan tlali Egipto.
\q Pampa inijuanti amo quichijque catli quiijto nopa achtihui
camanal sencahuali huan yeca niquintlalcahui.
\q
\v 10 Pero ya ni elis nopa yancuic camanal sencahuali catli
nijchihuas ica israelitame.
\q Ajsis tonali quema nijtlalis notlanahuatilhua ipan
inintlalnamiquilis para ma quimatica tlaque nijnequi ma quichihuaca.
\q Quena, niquijcuilos ipan ininyolo para ma quitlepanitaca.
\q Huan na nielis niininTeco huan inijuanti elise nomasehualhua.
\q
\v 11 Huan amo aqui monequisoc quiilhuis ihuampox o iicni para
monequi quiiximatis Tohueyiteco,
\q pampa nochi nechiximatise hasta catli más huejhueyi huan hasta
catli más tziquitetzitzi.
\q
\v 12 Na niquintlasojtlas huan niquintlapojpolhuis nopa tlaixpanoli
catli quichijtoque,
\q huan ayacmo quema niquelnamiquis inintlajtlacolhua.”
\m
\v 13 Quema Toteco camanaltic tlen se camanal sencahuali catli
yancuic, quiijtosnequi quichijqui para nopa achtihui camanal
sencahuali ma ayacmo quipiya itequi. Huan catli ayacmo quipiya
itequi sosolihuis huan teipa polihuis.
\c 9
\s Nopa tiopamitl tlen tlaltipactli huan nopa tlen ilhuicac
\p
\v 1 Ipan nopa achtihui camanal sencahuali oncayaya miyac
tlanahuatilme catli quinilhuiyaya masehualme quenicatza ma
quihueyichihuaca Toteco huan nojquiya oncayaya se tlatzejtzeloltijca
tiopamitl tlen cuetlaxtli nica ipan tlaltipactli.
\v 2 Nopa tiopamitl tlen cuetlaxtli quipixtoya ome cuartos. Nopa
achtihui cuarto quitocaxtiyayaj “Campa Tlatzejtzeloltic”, huan
nopona eltoya nopa tlahuil quetzali huan nopa mesa ica nopa pantzi
catli tlatzejtzeloltic.
\v 3 Huan teipa oncayaya se cortina huan ica iica eltoya nopa seyoc
cuarto catli quitocaxtiyayaj “Campa Más Tlatzejtzeloltic”.
\v 4 Huan nopona eltoya nopa tlaixpamitl tlen oro campa quitlatíaj
copali huan nopa caxa tlen cuahuitl catli quialtijtoyaj senquistoc
ica oro. Huan iijtic nopa caxa quipixtoya se xarro tlen oro ica
quentzi nopa pantzi catli huetzqui tlen ilhuicac catli itoca maná.
Huan nojquiya quipixqui icuatopil Aarón catli chamanqui. Huan
nojquiya quipixtoya nopa ome tepatlactli catli ipan quiijcuilojtoya
nopa majtlactli tlanahuatilme.
\v 5 Nojquiya, ipan itzajca nopa caxa quisencajtoque ome
iniixcopinca tlen se tlamantli itequihuajcahua Toteco catli inintoca
querubines. Huan nopa tlaixcopincayome catli quichijtoque, eltoya
tlaaltili ica oro. Catli nelnelía querubines tequihuajme itztoque
nepa campa itztoc Toteco huan campa nesi itlatlanex. Huan nopa
tlaixcopincayome tlen tequihuajme quipatlajtoyaj inieltlapal quen
para quiecahuilise itzajca nopa caxa. Huan nepa ipan itzajca nopa
caxa quimacaque Toteco estli catli quiixtzacuiliyaya
inintlajtlacolhua nopa masehualme. Pero ama amo nicaxilis para
nicamanaltis más tlen ni tlamantli.
\p
\v 6 Quema ya quicualtlalijtoyaj nochi nopa tlamantzitzi tiopan
calijtic, nopa israelita totajtzitzi tlatoctzitzi calaquiyayaj ipan
nopa achtihui cuarto para quichihuase inintequi iixpa Toteco.
\v 7 Pero ipan nopa cuarto catli más calijtic catli quitocaxtiyayaj
Campa Más Tlatzejtzeloltic, san hueliyaya calaquis nopa hueyi
israelita totajtzi sempatzi ipan se xihuitl. Huan quema calaquiyaya,
monequiyaya quihuicas ieso se tlapiyali para quimacas Toteco.
Achtihui quimacayaya estli por ya itlajtlacolhua huan teipa
quimacayaya por inintlajtlacolhua catli quichijque nochi masehualme
pampa amo quimatiyayaj sintla tlajtlacoli.
\v 8 Ica nochi ni tlanahuatilme, Itonal Toteco technextilía para
aqui hueli masehuali amo hueliyaya calaquis ipan nopa cuarto Campa
Más Tlatzejtzeloltic, quinequi quiijtos campa itztoc Toteco, quema
noja tequitiyaya nopa achtihui tiopan cuarto huan nopa israelita
totajtzitzi tlatoctzitzi quimacayayaj Toteco tlacajcahualistli.
\p
\v 9 Ni tlamantli technextilía quenicatza nochi mopatlatoc ama.
Pampa nopa tlacajcahualistli huan inieso tlapiyalme catli masehualme
quimacayayaj Toteco huejcajya, amo huelqui nelía quinyolpajpaca
tlen inintlajtlacolhua.
\v 10 Nojquiya nopa achtihui camanal sencahuali quipixqui miyac
tlanahuatilme catli quinilhuiyayaj masehualme tlaque hueliyaya
quicuase o quiijise. Huan nopa tlanahuatilme quinilhuiyayaj
quenicatza monequi momajtequise, maltise huan mopajpacase para
huelise quihueyimatise Toteco. Nochi ni tlamantli quipixqui
chicahualistli hasta oncac nopa yancuic camanal sencahuali.
\p
\v 11 Pero ama Cristo mochijtoc nopa Hueyi Totajtzi catli
techhualiquilía nochi nopa tlamantli catli cuali catli ama
tijpiyaj. Huan yaya amo calajqui Campa Más Tlatzejtzeloltic ipan se
tiopamitl catli tlamachijchihuali ipan ni tlaltipactli, pero
calajqui Campa Más Tlatzejtzeloltic nepa ilhuicac huan ya nopa más
cuali.
\v 12 Huan quema calajqui Campa Más Tlatzejtzeloltic ipan ilhuicac
amo quihuicac inieso chivojme o huacaxme quen quichihuayayaj
israelita totajtzitzi ipan tlaltipactli, pero quimacac Toteco catli
ya ieso. Huan Cristo calajqui sempatzi huan ayacmo más monejqui,
pampa ica ieso techmaquixti tlen totlajtlacolhua para nochipa.
\v 13 Achtihuiya nopa estli tlen chivojme huan torojme, huan
inincuanexo pilhuacaxtzitzi quipiyayaya chicahualistli para
quintlapajpacchihuas nopa masehualme catli mochijtoyaj amo
tlapajpacme iixpa Toteco.
\v 14 Pero miyac más hueli quichihua ieso Cristo, pampa ieso
quipiya chicahualistli para quitlapajpacchihuas tonemilis huan
toyolo tlen tlajtlacoli catli techhuicasquía campa miquilistli.
Huan techchihuas ma tijtequipanoca Toteco catli nelía itztoc.
Itonal Toteco catli itztoc para nochipa quipalehui Cristo catli amo
quipixqui niyon se itlajtlacol, para ma motemactili ica Toteco quen
se tlacajcahualistli catli senquistoc cuali para totlajtlacolhua.
\p
\v 15 Huajca yeca ama eltoc Cristo catli motlajcoquetza ica
masehualme huan Toteco Dios, huan yaya quisencajtoc nopa yancuic
camanal sencahuali. Yeca ama nochi tojuanti catli Toteco technotztoc
para ma tijneltocaca Cristo, huelis tijselise para nochipa nochi
nopa cuali tlamantli catli Toteco techtencahuilijtoc techmacas.
Tijselise nochi pampa Cristo techcojqui ica ieso quema mijqui por
tojuanti. Quena, ieso techtlapojpolhuía totlajtlacolhua catli
tijchijque quema noja quipiyayaya itequi nopa achtihui camanal
sencahuali.
\p
\v 16 Pero anquimatij sintla se tlacatl quichihua se amatl catli
quiijtohua ajqueya quiselis sesen tlamantli catli iaxca quema yaya
miquis, amo aqui huelis moaxcatis catli quitocaros hasta quema ya
mictos inon tlacatl.
\v 17 Pampa nopa amatl amo quipiyas chicahualistli hasta ya mictos
yaya catli quiijcuilo.
\v 18 Quej nopa elqui huejcajya ica nopa achtihui camanal
sencahuali, monequiyaya miquis se tlapiyali para pehuas itequiticayo
nopa camanal sencahuali.
\v 19 Moisés quinpohuili nopa israelitame nochi nopa tlanahuatilme.
Huan teipa quicuic borrego ichcatl catli chichiltic huan nopa
xihuitl itoca hisopo huan quixoloni ipan inieso torojme huan
chivojme catli quimanelojtoya ica atl. Huan teipa quiijtzelo nopa
estli ipan nochi nopa israelitame huan ipan nopa tlajcuiloli catli
quipixtoya nopa tlanahuatilme.
\v 20 Huan quema quiijtzelohuayaya nopa estli, Moisés quej ni
quinilhui nopa masehualme: “Ni estli quipehualtía itequi nopa
camanal sencahuali catli Toteco quichijtoc ica amojuanti.”
\v 21 Nojquiya Moisés quiijtzelo estli ipan nopa tiopamitl tlen
cuetlaxtli huan ipan nochi nopa tlamantzitzi catli quitequihuiyayaj
para quihueyichihuase Toteco tiopan calijtic.
\p
\v 22 Huajca hueli tiquijtose para ipan nopa achtihui camanal
sencahuali, quitlapajpacchihuayayaj nochi tlamantli ica estli. Huan
amo onca tlapojpolhuili sintla se amo quitoyahuas estli.
\s Itlacajcahualis Cristo techquixtilía totlajtlacolhua
\p
\v 23 Nopa tiopamitl tlen cuetlaxtli catli huejcajya oncac nica ipan
tlaltipactli ihuaya nochi nopa tlamantzitzi catli quitequihuijque
calijtic eltoya se iixcopinca tlen nopa catli nelnelía eltoc nepa
ilhuicac. Huan nojquiya Moisés monejqui quitequihui inieso
tlapiyalme para quitlapajpacchihuas nochi tlamantzitzi nopona, pero
nochi nopa tlamantzitzi catli onca nepa ilhuicac, Toteco
quintlapajpacchijqui ica se tlacajcahualistli catli más ipati.
\v 24 Pampa Cristo amo calajqui ipan nopa cuarto Campa Más
Tlatzejtzeloltic catli masehualme quichijchijtoque catli san
technextilía quenicatza eltoc nepa ilhuicac. ¡Amo! Cristo calajqui
nepa ilhuicac campa eltoc nopa tiopamitl catli nelnelía huan nopona
yaya itztoc iixpa Toteco para techpalehuis.
\v 25 Huan Cristo amo motemactili miyacpa quen nopa huejhueyi
israelita totajtzitzi calaquiyayaj sesen xihuitl Campa Más
Tlatzejtzeloltic para quimacase Toteco inieso tlapiyalme. ¡Amo!
\v 26 Sintla quej nopa monectosquía, Cristo monectosquía miquis
miyacpa tlen quema pejqui tlaltipactli. ¡Pero amo! Cristo monexti
ipan ni tlayacapan tonali huan motemactili sempatzi para miquis ipan
cuamapeli quen se tlacajcahualistli para quinquixtilis
inintlajtlacolhua nochi masehualme huan yeca ayacmo tleno monequi
más.
\v 27 Pampa Toteco Dios quitlalijtoc para monequi nochi masehualme
ma miquica san se huelta huan teipa monextise iixpa para ma
quintlajtolsencahuas.
\v 28 Huajca Cristo nojquiya mijqui san se huelta quema motemactili
quen se tlacajcahualistli para quintlajtlacolquixtis miyaqui
masehualme. Huan yaya sempa hualas, pero amo hualas para
tetlajtlacolquixtiqui. ¡Amo! Yaya hualas para quinmaquixtis para
nochipa nochi catli tlatoctzitzi quichixtoque para ma huala.
\c 10
\p
\v 1 Itlanahuatilhua Moisés huan nochi catli huejcajya
quinnahuatijque masehualme ma quichihuaca elqui san quen se
ecahuilotl catli technextiliyaya nopa miyac cuali tlamantli catli
teipa nelía melahuac hualasquía ica Cristo. Pero nopa
tlanahuatilme amo temacac catli melahuac. Huan masque masehualme
quimacayayaj Toteco tlacajcahualistli sesen xihuitl, nopa
tlacajcahualistli amo huelqui quinchihua xitlahuaque iixpa Toteco.
\v 2 Sintla quinchijtosquía nopa masehualme xitlahuaque huan nelía
quinyolpajpactosquía iixpa, amo monectosquía para tlatoctzitzi
quimacase Toteco más tlacajcahualistli, pampa ayacmo
quimachilijtosquíaj para noja quihuicaj tlajtlacoli iixpa.
\v 3 ¡Pero amo! Pampa quema inijuanti quihualicayayaj
tlacajcahualistli sesen xihuitl, nopa tlacajcahualistli
quinelnamiquiltiyaya tlen inintlajtlacolhua.
\v 4 Pampa inieso torojme huan chivojme amo hueli nelía
tetlajtlacolquixtilía.
\p
\v 5 Yeca Cristo, quema hualajqui ipan tlaltipactli, quiilhui Toteco
Dios:
\q “Nopa tlacajcahualistli huan inieso tlapiyalme amo elqui catli
nelía tijnequiyaya,
\q huajca tijsencajqui notlacayo para nitlacatis quen se masehuali
huan nimitzmacas nopa tlacajcahualistli catli melahuac quinamiqui.
\q
\v 6 Pampa masque masehualme quinmictiyayaj tlapiyalme huan
quintlatiyayaj nejmaxtique moixpa,
\q huan mitzmacayayaj sequinoc tlamantli tlacajcahualistli por
inintlajtlacolhua, amo tijcualitac.
\q
\v 7 Huajca na niquijtohua:
\q ‘Nica niitztoc noTeco.
\q Nijchihuas nochi mopaquilis pampa quej nopa ijcuilijtoc ipan nopa
Amatlapohuali para ma nijchihua.’ ”
\m
\v 8 Achtihui Cristo quiijto para Toteco amo quipactía
tlacajcahualistli, huan inieso tlapiyalme, huan tlapiyalme catli
quintlatiyayaj nejmaxtique ipan tlaixpamitl por inintlajtlacolhua
masque nochi ya nopa eltoya senquistoc catli quiijtojque
itlanahuatilhua Moisés para masehualme ma quimacaca Toteco.
\v 9 Huajca teipa Cristo quiilhui Toteco Dios: “Nica niitztoc
noTeco. Nihualajtoc para nijchihuas catli mopaquilis.” Huajca ica
ni quinextía para quitlamiltía nopa achtihui camanal sencahuali
huan quipehualtía seyoc catli más cuali.
\v 10 Huan ipaquilis Toteco elqui para Cristo ma
techtlatzejtzelolchihua para nochipa quema san se huelta motemactili
huan mijqui ipan cuamapeli.
\p
\v 11 Nochi nopa totajtzitzi tlen itlanahuatilhua Moisés mojmostla
quinmictiyayaj tlapiyalme huan quimacayayaj Toteco quen
tlacajcahualistli. Pero nopa tlacajcahualistli amo quema huelqui
tetlajtlacolquixtía.
\v 12 Pero Cristo motemacac para miquis san sempatzi por
totlajtlacolhua para nochipa, huan teipa yaya mosehui inejmac Toteco
Dios campa más onca tlatlepanitacayotl.
\v 13 Nopona Cristo quichiya hasta Toteco Dios quimacas nochi
icualancaitacahua para ma quinnahuati.
\v 14 Pampa ica setzi tlacajcahualistli catli temactili, techchijqui
tixitlahuaque iixpa Toteco nochi tojuanti catli techiyocacajtoya
para tiiaxcahua.
\p
\v 15 Tijmatij para melahuac ya ni, pampa Itonal Toteco techilhui
san se ipan Icamanal Toteco campa quiijtohua:
\q
\v 16 “Ya ni nopa yancuic camanal sencahuali catli nijchihuas ica
israelitame.
\q Nijtlalis notlanahuatil ipan ininyolo para ma quimatica tlaque
nijnequi ma quichihuaca,
\q Quena, niquijcuilos ipan inintlalnamiquilis para ma
quitlepanitaca.”
\m
\v 17 Huan nojquiya Toteco quiijto:
\q “Ayacmo quema niquelnamiquis inintlajtlacolhua huan
inintlaixpanolhua.”
\m Quej nopa quiijtohua Icamanal Toteco.
\p
\v 18 Huajca pampa Toteco ya techtlapojpolhuijtoc nochi
totlajtlacolhua huan quinelcajtoc para nochipa, ayacmo monequi
tijmacase tlacajcahualistli para ma techtlapojpolhui.
\s Ma timonechcahuica campa Toteco
\p
\v 19 Huajca ama noicnihua, nochi tojuanti huelis ticalaquise ica
temachili nopona Campa Más Tlatzejtzeloltic ipan ilhuicac campa
itztoc Toteco Dios, pampa Jesús quitoyajqui ieso por tojuanti.
\v 20 Quena, quema Jesús temactili itlacayo huan mijqui, quitlapo
nopa cortina catli quitzacuayaya Campa Más Tlatzejtzeloltic ipan
nopa hueyi tiopamitl huan techtlapoli se ojtli catli yancuic huan
catli temaca nemilistli.
\v 21 Huan pampa tijpiyaj tohueyi totajtzi, Jesucristo, catli
quipiya tlanahuatili ica nochi imasehualhua huan techpalehuía iixpa
Toteco,
\v 22 ma timonechcahuica campa Toteco Dios ica toyolo catli
xitlahuac iixpa huan ica miyac tlaneltoquili pampa tijmatij para
temachtli techselis. Eltoc quen Toteco quiijtzelojtoc toyolo catli
elqui fiero ica ieso Cristo para ma tielica titlapajpactique iixpa.
Nojquiya quipajpactoc totlacayohua ica atl catli senquistoc cuali.
\v 23 Huajca ma amo caxanis totlaneltoquilis, pero ma tijneltocaca
para temachtli tijselise nochi nopa tlatiochihualistli catli
tiquinilhuijtoque sequinoc para tijchiyaj tijselise, pampa Toteco
temachtli techmacas nochi catli techtencahuilijtoc.
\p
\v 24 Ma tijtemoca quenicatza timoyolchicahuase se ica seyoc para
más timoicnelise huan tijchihuase catli cuali.
\v 25 Ximomocuitlahuica para amo anquicahuase anmosentilise
ininhuaya sequinoc tlaneltocani. Amo xijchihuaca quen sequinoc catli
ayacmo mosentilíaj. Quinamiqui ximosentilica huan ximoyolchicahuaca
achi más ama pampa ya anquiitaj monechcahuía para sempa hualas
Jesucristo.
\p
\v 26 Sintla se masehuali tlajtlacolchihuas ica ipaquilis quema ya
quiiximajtoc catli melahuac, ayacmo oncas seyoc tlacajcahualistli
catli huelis quimacas Toteco por itlajtlacolhua.
\v 27 Quena, sintla quihuejcamajcahuas itlacajcahualis Cristo, san
hueli quichiyas ica tlamajmatili para Toteco quitlajtolsencahuas
huan quitlatzacuiltis ipan nopa hueyi tlitl catli quintzontlamiltis
icualancaitacahua Toteco.
\v 28 Huejcajya quema se masehuali quiixpano se itlanahuatil Moisés
huan ome o eyi masehualme quiitaque huan quitelhuijque, huajca nopa
tequitini tlanahuatijque ma quimictica, niyon ma amo quitlasojtlaca.
\v 29 Pero ama se masehuali catli quihuejcamajcahuas Icone Toteco,
monequi ma quiseli se tlatzacuiltili catli noja más hueyi. Quena,
Toteco tlahuel quitlatzacuiltis catli moilhuis amo tleno ipati catli
Cristo quichijqui quema quitoyajqui ieso para techtlapajpacchihuas
tlen totlajtlacolhua huan para quipehualtis nopa yancuic camanal
sencahuali ica Toteco. Nopa masehualme chicahuac quitlaijilhuíaj
Itonal Toteco catli technextilía quenicatza Toteco quipiya hueyi
iyolo ica tojuanti.
\v 30 Tojuanti tijmatij para Toteco Dios quiijto: “Na catli
nechnamiqui nitecuepilis catli amo cuali quichijtoque huan quena,
niquintlaxtlahuis.” Huan nojquiya ijcuilijtoc ipan Icamanal Toteco
campa quiijtohua: “Toteco quintlajtolsencahuas imasehualhua.”
\v 31 ¡Nelía temajmati elis para catli huetzis imaco Toteco catli
yoltoc para ma quitlatzacuilti!
\p
\v 32 Pero xiquelnamiquica nopa yejyectzi tonali quema anquicajque
icamanal Toteco. Masque sequinoc anmechtlaijiyohuiltiyayaj,
amojuanti anmocajque antemachme ipan Toteco.
\v 33 Quemantic masehualme anmechpinahualtiyayaj huan
anmechmaquiliyayaj tlamiyacapa. Huan quemantic anmechhuicaque para
xijtlachilica quema chicahuac quintlaijiyohuiltiyayaj sequinoc
amoicnihua.
\v 34 Quena, nojquiya antlaijiyohuijque ica nopa tlaneltocani catli
quintzactoyaj. Huan quema masehualme anmechquixtiliyayaj tlamantli
catli amoaxca, anpaquiyayaj pampa anquimatiyayaj para nepa ilhuicac
anmechchiyayaya miyac tlatiochihualistli catli más cuali huan catli
más ipati.
\v 35 Huajca xijsenhuiquilica ximotemachica ipan Toteco masque
antlaijiyohuíaj, pampa yaya anmechmacas se hueyi tlaxtlahuili nepa
ilhuicac.
\v 36 Pero ama, monequi xijpiyaca amoyolo huan xiquijiyohuica nochi
catli anmechpanotihuala, huan quema ya anquichijtose nochi ipaquilis
Toteco, yaya temachtli anmechmacas nochi catli anmechtencahuilijtoc.
\v 37 Pampa Icamanal Toteco quiijtohua:
\q “Ica se quentzi tonali hualas yaya catli quiijto tlajcuiloli
para hualasquía.
\q Yaya, amo huejcahuas.
\q
\v 38 Se catli itztoc xitlahuac iixpa Toteco,
\q itztos para nochipa pampa quineltoca.
\q Pero sintla se moicancuepas, amo nipaquis ihuaya.”
\m
\v 39 Pero tojuanti amo tiitztoque ininhuaya catli moicancuepaj ica
Toteco huan mopolose. ¡Amo! Tojuanti tiitztoque ininhuaya catli
quineltocaj Toteco para ma quinmaquixtilis inialma.
\c 11
\s Tlaneltoquili
\p
\v 1 ¿Tlaque quiijtosnequi tlaneltoquili? Quinequi quiijtos
tijneltocaj para temachtli panos nopa tlamantli catli Toteco
techtencahuilijtoc. Yeca senquistoc tijmatij para temachtli ya eltoc
nopa tlamantli catli ama niyon quentzi ayamo hueli tiquinitaj.
\p
\v 2 Huejcajya Toteco Dios tlahuel camanaltic cuali tlen tohuejcapan
tatahua pampa quineltocaque ica temachili.
\p
\v 3 Pampa tijneltocaj Icamanal Toteco, tijmatij para Toteco san
quiijto para ma onca tlaltipactli, ilhuicactli huan nochi tlamantli,
huan nochi nopa tlamantli oncac. Huan tijmatij nochi tlamantli catli
ama tiquitaj, Toteco quisencajqui tlen tlamantli catli amo aqui
huelqui quiitac.
\p
\v 4 Abel quineltocac para temachtli catli Toteco quiijto huan yeca
quimacac Toteco se tlacajcahualistli catli más cuali huan amo quen
itlacajcahualis Caín. Huan pampa quineltocac, Toteco quiijto para
Abel itztoya xitlahuac iixpa, huan quiijto para quicualitac
itlacajcahualis. Huan masque quipiya miyac xihuitl para mijqui Abel,
itlaneltoquilis eltoc se nemachiltili para tojuanti para noja ma
tijtoquilica.
\p
\v 5 Enoc quineltocac para temachtli catli Toteco quiijto, huan yeca
se tonal Toteco quihuicac ilhuicac noja yoltoc. Huan ayacmo aqui
quipanti itlacayo, pampa amo mijqui, Toteco san quihuicac. Pero
Toteco ya ipa quiijtojtoya para quipactiyaya inemilis Enoc.
\v 6 Pero se masehuali amo hueli quipactis Toteco sintla amo
quineltoca para temachtli catli Toteco quiijtohua. Pampa aqui hueli
catli quinequi monechcahuis campa Toteco, monequi quineltocas para
Toteco itztoc, huan para yaya quintlaxtlahuía masehualme catli
nelía quiyoltemohuaj ica cuali ininyolo.
\p
\v 7 Noé quineltocac para temachtli catli Toteco quiijto, huan yeca
quema Toteco quiyolmelajqui para hualasquía se tlahuelatl masque
amo huelqui quiita para hualayaya, Noé, ica majmajtli, nimantzi
pejqui quichijchihua nopa cuaacali quen quiilhui para ipan
momanahuisquíaj ya huan ichampoyohua. Huan pampa Noé quineltocac
Toteco, technextilía quenicatza nelía hueyi inintlajtlacol nopa
sequinoc masehualme catli amo quineltocaque catli Toteco quiijto.
Huan yeca Toteco quichijqui Noé xitlahuac iixpa pampa quineltocac.
\p
\v 8 Abraham quineltocac para temachtli catli quiijto Toteco. Yeca
quema Toteco quiilhui ma quisa ipan itlal huan ma yohui ipan se
tlali catli yaya quitencahuili para quimacas para iaxca, Abraham
quisqui. Quicajtejqui ichaj huan yajqui masque amo quimatiyaya
canque ajsiti o canque eltoya nopa tlali.
\v 9 Huan pampa Abraham quineltocac catli Toteco quiijto, yaya
ajsito ipan nopa tlali catli Toteco quitencahuilijtoya quimacas.
Huan nopona itztoya ipan yoyon calme quen se catli amo nepa ejquetl.
Huan teipa nojquiya san se quichijque Isaac huan Jacob pampa
quiselijque san se tlatencahuali tlen Toteco huan quineltocaque.
\v 10 Abraham mocajqui ipan yoyon calme huan quipixqui iyolo pampa
quineltocac para temachtli catli Toteco Dios quiilhuijtoya. Yaya
quichiyayaya para itztos ipan nopa altepetl nepa ilhuicac. Achtihui
Toteco monejnehuili quenicatza elis nopa altepetl huan teipa
quitamachijqui huan quisencajqui. Nopa altepetl quipiya cuali
itlatzinpehualtil huan huejcahuas para nochipa.
\p
\v 11 Nojquiya Sara, isihua Abraham, quineltocac para temachtli
catli Toteco quiijto, yeca masque amo hueliyaya conepiya, quiseli
chicahualistli para conecuis. Huan teipa quitlacatilti se icone
masque ya nanatzi. Quena, quineltocac para eliyaya temachtli Toteco
catli quitencahuilijtoya para quipiyas icone.
\v 12 Huan Abraham nojquiya quineltocac Toteco masque ya
huehuejtixtoya huan ya panotoya tonali para huelis quinpiyas
iconehua. Pero masque quej nopa elqui, quipixqui icone huan teipa
icone motlacachijqui huan quinpixqui iconehua. Huan ama iteipan
ixhuihua Abraham tlahuel momiyaquilijtoque hasta amo aqui hueli
quinpohuas. Itztoque quen imiyaca sitlalime huan quen imiyaca xali
iteno hueyi atl.
\p
\v 13 Nochi ni masehualme quineltocaque para temachtli catli Toteco
quiijto, pero quema mijque noja amo quiselijtoyaj catli Toteco
quintencahuilijtoya para quinmacas. Pero inijuanti ica paquilistli
quichiyayayaj pampa quimatiyayaj para Toteco temachtli
quinmacasquía. Yeca inijuanti quiijtojque para itztoyaj san seyoc
tlali ehuani huan san paxalohuani ipan ni tlaltipactli.
\p
\v 14 Huan quema inijuanti camanaltique quej nopa, tlanemijya nesi
para quitemohuayayaj se tlali catli nelía elisquía iniaxca.
\v 15 Pero amo moilhuiyayaj tlen nopa tlali campa quisque, pampa
sintla quej nopa elisquía, huajca hueltosquíaj mocueptosquíaj
nopona sintla quinectosquíaj.
\v 16 Pero inijuanti quinequiyayaj se tlali catli achi cuali,
quinequi quiijtos quinequiyayaj itztose nepa ilhuicac. Yeca Toteco
amo pinahua para motocaxtía ininDios, huan yaya ya
quinsencahuilijtoc se altepetl nepa ilhuicac.
\p
\v 17 Abraham quineltocac para temachtli catli Toteco quiijto, huan
yeca quema Toteco quiyejyeco huan quiilhui ma quimactili Isaac,
icone iyojtzi, quen se tlacajcahualistli, nimantzi mocualtlali para
quimictis masque Toteco quitencahuilijtoya para quimacasquía
iteipan ixhuihua ipan ya.
\v 18 Pampa Toteco ya quiilhuijtoya: “Ipan Isaac tijpiyas miyac
moteipan ixhuihua.”
\v 19 Quema Abraham itztoya para quimictis icone, quimatiyaya para
Toteco quipixqui chicahualistli para quiyolcuisquía Isaac masque
quimictisquía. Huan huelis tiquijtose para Toteco sempa quimacac
icone nemilistli quema ya mictoc pampa quema quiilhui ma amo
quimicti elqui nelnechca imiquilis.
\p
\v 20 Isaac quineltocac para temachtli catli Toteco quiijto, yeca
quintencahuili itelpocahua Jacob huan Esaú nopa tlatiochihualistli
catli quimatqui Toteco quinmacasquía teipa.
\p
\v 21 Jacob quineltocac para temachtli catli Toteco quiijto, yeca
quema ya itztoya para miquis, quitencahuili sesen itelpocahua José
quenicatza Toteco quintiochihuasquía teipa. Huan Jacob
quihueyichijqui Toteco quema quincamanalhui, momatlaquechijtoya ipan
icuatopil.
\p
\v 22 José quineltocac para temachtli catli Toteco quiijto. Yeca
quema nechca eliyaya para miquis, quinilhui nopa israelitame para
melahuac se tonal Toteco quinquixtisquía ipan nopa tlali Egipto
huan quinilhui ma quihuicase iomiyohua ininhuaya.
\p
\v 23 Inana huan itata Moisés quineltocaque para temachtli catli
Toteco quiijto. Huajca quema quiitaque para nelía yejyectzi nopa
pilconetzi catli Toteco quinmacatoya, quitlatijque para eyi metztli,
huan amo quiimacasiyayaj nopa tlanahuatijquetl catli tlanahuatijtoya
ma quinmictica nochi israelita oquichpilme.
\p
\v 24 Moisés quineltocac para temachtli catli Toteco quiijto. Yeca
quema motlacachijqui amo quinejqui motocaxtis icone iichpoca
Faraón.
\v 25 Quitlapejpeni para tlaijiyohuis ininhuaya imasehualhua Toteco.
Amo quinejqui mopaquilismacas ica tlajtlacoli catli san temaca
paquilistli para se tlatoctzi.
\v 26 Moisés achi más quipatiitac para tlaijiyohuis pampa iaxca
nopa Cristo catli hualasquía huan amo quen para quipiyas nochi nopa
tomi catli elqui iaxca ipan tlali Egipto, pampa ya quiitayaya nopa
tlaxtlahuili catli Toteco teipa quimacasquía.
\p
\v 27 Huan pampa Moisés quineltocac Toteco, yaya quisqui tlali
Egipto, niyon amo quiimacasiyaya icualancayo nopa tlanahuatijquetl,
pampa quimatiyaya para Toteco itztoya ihuaya masque amo hueliyaya
quiita.
\p
\v 28 Huan pampa quineltocac Toteco, Moisés quinilhui nopa
israelitame para ma quisencahuaca nopa Pascua tlacualistli, huan ma
quimictica se pilborregojtzi huan ma quiijtzeloca ieso ipan
inincaltencua para itequihua Toteco catli temictía, ma amo
quimictisquía iniachtihui ejca quema panosquía.
\p
\v 29 Moisés huan nochi nopa israelitame quineltocaque para
temachtli catli Toteco quiijto, yeca panoque ipan nopa Chichiltic
Hueyi Atl quen elisquía tlen hueli tlali catli huactoc. Pero quema
nopa egiptome quinejque panose, nopa atl quinatzonpolihuilti.
\p
\v 30 Nopa israelitame quineltocaque para temachtli catli Toteco
quiijto, yeca inijuanti quiyahualojtinenque nopa altepetl Jericó
para chicome tonali. Huan nopa hueyi tepantlatzactli catli
quiyahualtzactoya nopa altepetl, huetzqui.
\p
\v 31 Nopa sihuatl Rahab catli achtihuiya tlacanemiyaya quineltocac
Toteco huan yeca quinseli nopa achtihui israelitame catli hualajque
tlajtlachiyacoj quenicatza huelisquíaj quitlanisquíaj ialtepe.
Huan yeca Rahab amo mijqui ininhuaya nopa sequinoc Jericó ehuani
catli amo quitlepanitaque Toteco.
\p
\v 32 ¿Huan tlaque más monequi niquijtos? Amo nicaxilis para
nimechpohuilis quenicatza chicahuac quineltocaque Toteco nopa
tlacame quen Gedeón, Barac, Sansón, Jefté, David, Samuel huan
nochi nopa tlajtol pannextiani.
\v 33 Quena, nochi inijuanti quineltocaque para temachtli catli
Toteco quiijto huan yeca quintlanque tlanahuatiani huan
ininsoldados, tetlajtolsencajque xitlahuac, huan quiselijque catli
Toteco quintencahuilijtoya. Huan masque quintzajque sequin inijuanti
ininhuaya tecuanime, Toteco quincamatzajqui huan quinmanahui pampa
quineltocaque.
\v 34 Huan quema quinmictisnequiyayaj ipan tlitl xahuantoc, nopa
tlitl sehuiyaya. Quema nechca itztoyaj para miquise sequin ica
machete, Toteco quinmanahui. Quema ayacmo quipiyayayaj fuerza,
Toteco quinfuerzajmacac. Quipixque chicahualistli ipan
tlahuilancayotl huan tlatlanque, huan quintojtocaque miyac soldados
catli huejca ehuani.
\p
\v 35 Sequin sihuame quineltocaque Toteco huan yaya quinyolcuic
ininconehua o ininhuehuejhua catli ya mictoyaj.
\p Sequinoc tlaneltocani mijque pampa chicahuac
quintlaijiyohuiltiyayaj para ma quicahuasquíaj Toteco, pero amo
moselijque ma quinmaquixtise tlen nopa tlaijiyohuilistli, pampa
quinequiyayaj quiselise catli nelcuali teipa quema nochi masehualme
moyolcuise.
\p
\v 36 Sequin tlaneltocani quinpinahualtijque, sequin quinhuitejque
ica cuartas ica omitl, sequin quinilpijque ica tepos cadena ipan
tlatzacme catli fiero.
\v 37 Sequin tlaneltocani quinmictijque ica tetl, sequin
quinhuejhuelojque ica sierra, sequin quinmictijque ica machetes,
sequin quinyejyecojque ica miyac tlamantli para ma quitlahuelcahuaca
Toteco, pero amo quicajque. Sequinoc tlaneltocani nejnenque campa
hueli huan amo cana quipiyayayaj para mosiyajquetzase. San
quipiyayaya inincuetlaxo borregojme o chivojme para ininyoyo.
Eliyayaj tlahuel teicneltzitzi huan tlahuel mayanayayaj, huan
masehualme san quincualancaitayayaj huan tlen hueli
quinchihuiliyayaj.
\v 38 Nochi ni tlaneltocani nelía itztoyaj cuajcualme huan amo
quinamiquiyaya itztose ipan ni tlaltipactli. Motlatijtinenque campa
hueli ipan huactoc tlali, ipan tepeme, ipan tecacahuatl huan ipan
huejhueyi ostome ipan tlaltipactli.
\p
\v 39 Toteco quipacti catli quichijque nochi ni masehualme huan
camanaltic cuali tlen inijuanti pampa chicahuac quineltocaque, pero
quema mijque nopa masehualme, noja amo quiselijtoyaj nochi catli
Toteco quintencahuilijtoya quinmacas.
\v 40 Pampa Toteco quipixqui itlanejnehuilis catli achi cuali.
Quinejqui para inijuanti ma quichiyaca catli quintencahuilijtoya
hasta san sejco techchihuas tojuanti huan inijuanti senquistoc cuali
iixpa huan techmacas nochi catli quiijtojtoc techmacas.
\c 12
\s Ma timoilhuica tlen Jesús
\p
\v 1 Ama eltoc quen techyahualohuaj huan techyolchicahuaj nochi ni
masehualme catli quineltocaque Toteco huan quiijiyohuijque catli
quinpanotihualajqui. Huajca quen se motlalojquetl quichihua, ma
timoquixtilica nochi catli techtzacuilía huan ma tijtlahuelcahuaca
nopa tlajtlacoli catli más techxinepalohua. Ma timoyoltetilica huan
ma timotlaloca ipan nopa ojtli catli Toteco technextilijtoc.
\v 2 Ma tijpixtoca totlachiyalis ipan Jesús catli technextili
quenicatza ma tijneltocaca Toteco huan techpalehuía mojmostla más
ma tijneltocaca. Yaya quiijiyohui nopa hueyi pinahualistli para
miquis ipan cuamapeli pampa quimatiyaya nopa hueyi paquilistli catli
quichiyayaya teipa. Huan ama ya mosehuijtoc inejmac Toteco campa
más onca tlatlepanitacayotl.
\p
\v 3 Ximonejnehuilica tlen nochi catli Jesús quiijiyohui huan tlen
nochi nopa fiero tlamantli catli amo cuajcualme quichihuilijque para
amo anyamaniyase huan antlapolose.
\v 4 Hasta amantzi amo timictoque ipan nopa tlahuilancayotl ica nopa
tlajtlacolchijca tlacame catli techcualancaitaj.
\v 5 ¿Atlac ya anquielcajtoque catli Toteco techilhui tojuanti
tiiconehua?
\q Ijcuilijtoc ipan Icamanal Toteco campa yaya techilhuía:
\q “Noconehua, amo xicualanica quema na niamoTeco
nimechtlalnamictía,
\q niyon amo ximotzinquixtica quema nimechtlacahualtía.
\q
\v 6 Pampa nochi catli niquinicnelía,
\q niquintlalnamictía,
\q huan niquincuahuasashuía nochi catli niquinselía para elise
noconehua.”
\m
\v 7 Huajca xiquijiyohuica quema Toteco anmechtlalnamictía pampa
ica ya nopa anmechnextilía para nelía anitztoque aniconehua.
Quena, Toteco quichihua quen nochi tetajme catli quintlalnamictíaj
huan quinxitlahuaj ininconehua quema quichihuaj catli amo cuali para
quinnextilise quenicatza ma monejnemiltica cuali. ¿Atlac itztoc se
conetl catli itata amo quema quitlalnamictía?
\v 8 Sintla Toteco amo anmechtlalnamictía huan anmechxitlahua quema
anquichihuaj catli amo cuali, huajca amo nelía aniconehua. Amo
anitztoque ipan ifamilia huan yaya amo amoTata.
\v 9 Nojquiya quema tiitztoyaj ticoneme, tijpixtoyaj totatahua ipan
ni tlaltipactli catli techtlalnamictiyayaj huan techtlacahualtiyayaj
huan yeca tiquintlepanitayayaj. Huajca noja más monequi
tijtlepanitase Toteco Totata para huelis se tonal tiitztose ihuaya.
\v 10 Totatahua ipan ni tlaltipactli techtlalnamictijque huan
techtlacahualtijque para se ome xihuitl quen quiitaque para cuali
pampa quinequiyayaj ma timonejnemiltica xitlahuac. Pero quema Toteco
techtlalnamictía huan techxitlahua, yaya quimati catli senquistoc
cuali para ma techpalehuis tielise titlatzejtzeloltique quen yaya
tlatzejtzeloltic.
\v 11 Quema se techtlalnamictía o techxitlahua, amo quema
tijcualitaj ipan nopa tlatoctzi, pampa techcocohua. Pero sintla
tijchihuaj cuenta para tlen techxitlahua, teipa tiquitaj para nopa
tlatzacuiltili techpalehui miyac para tijchihuase catli xitlahuac
huan para ma tijpiyaca tlasehuilistli ipan toyolo.
\s Monequi tijchihuilise cuenta icamanal Toteco
\p
\v 12 Huajca ximoyolchicahuaca ipan Toteco amojuanti catli
ansiyahuij. Huan ximotetilica amojuanti catli anyamanixtoque ipan
amotlaneltoquilis.
\v 13 Xijtoquilica se ojtli catli xitlahuac. Quej nopa, nochi
masehualme catli yohuij amotepotzco masque pilquentzi quineltocaj
Toteco, amo motepotlamise, niyon amo huetzise. Inijuanti nejnemise
xitlahuac huan quipiyase chicahualistli.
\p
\v 14 Xijchihuaca campica xiitztoca ica yejyectzi ica nochi
masehualme huan xijpiyaca se nemilistli tlatzejtzeloltic, pampa
sintla amo anquipiyase se nemilistli tlatzejtzeloltic, huajca amo
huelis anquiitase Tohueyiteco.
\v 15 Hueyi iyolo Toteco ica tojuanti huan ximomocuitlahuica se ica
seyoc para amo aqui quielcahuas. Ma amo aqui moyolchichicachihua,
pampa sintla se cualantinemis, huelis quintlanahuis miyac toicnihua
huan huelis quintlahuisos ipan tlajtlacoli.
\v 16 Ximotlachilica para amo aqui ma quichihua tlamantli ica catli
amo inamic. Ma amo aqui quihuejcamajcahua catli Toteco techmacatoc
quen Esaú quichijqui. Yaya quitlahuelcajqui nochi nopa
tlatiochihualistli catli quitocarohuayaya quiselis pampa eliyaya
nopa achtihui ejquetl. Quena, nochi quinemaquilti iicni ica se plato
tlacuali quema mayanayaya.
\v 17 Huan tijmatij para teipa Esaú quinequiyaya quiselis
itlatiochihual itata, pero amo huelqui. Masque chocac miyac, ya
panotoya tonal para moyolcuepas huan para moaxcatis catli
quinemacatoya.
\p
\v 18 Amojuanti amo anmonechcahuíaj campa se tepetl catli hueli
anquiitzquise quen nopa israelitame quichijque huejcajya quema
Toteco quinmacac itlanahuatilhua. Inijuanti quinechcahuijque se
tepetl catli tlatlayaya, huan iniixpa monexti se hueyi
tzintlayohuilotl catli quinmajmati, huan quiitaque se hueyi
ajcomalacatl.
\v 19 Huan quicajque tlapitzali huan quicajque quenicatza chicahuac
Toteco quincamanalhuiyaya. Huan inijuanti tlahuel quiimacasque
icamanal huan yeca ica nochi ininyolo quitlajtlanijque Toteco para
ma ayacmo quincamanalhui.
\v 20 Toteco quinmacac se tlanahuatili para sintla catli hueli
masehuali o tlapiyali quinechcahuisquía nopa tepetl, monequi
quimictise ica tetl o ica cuatlamintli. Huajca inijuanti tlahuel
momajmatijque.
\v 21 Huan pampa tlahuel temajmati catli quiitaque ipan nopa tonal,
Moisés nojquiya quiijto: “Nelía nimajmahui huan nihuihuipica.”
\p
\v 22 Pero ica amojuanti amo quej nopa. Anajsitoque campa tepetl
Sion campa eltoc ialtepe Toteco catli yoltoc. Quena, anajsitoque
ipan altepetl Jerusalén catli eltoc nepa ilhuicac campa
mosentilijtoque onpano miyac miles tlen itequihuajcahua Toteco.
\v 23 Anajsitoque ipan nopa tlasentililistli tlen masehualme catli
temachtli quiselise itlatiochihualis Toteco pampa quipiyaj inintocax
ijcuilijtoc nepa ilhuicac. Quena, anajsitoque campa Toteco itztoc,
yaya catli quintlajtolsencahuas nochi masehualme. Nojquiya
anmosentilijtoque ininhuaya inintonaltzitzi cuajcuali masehualme
catli ama Toteco quinchijtoc senquistoc xitlahuaque iixpa.
\v 24 Anajsitoque campa Jesús catli quichijqui ni yancuic camanal
sencahuali ica Toteco huan masehualme. Anajsitoque campa eltoc ieso
ya catli tetlapojpolhuía. Huan ieso Jesús catli tetlapojpolhuía
eltoc más cuali que ieso Abel catli quinotzayaya Toteco para ma
tetlatzacuilti.
\p
\v 25 Huajca xijchihuaca campica para anquitlamichihuase catli
Toteco techilhuía. Huejcajya nopa israelitame catli itztoyaj ipan
ni tlaltipactli quiselijque se hueyi tlatzacuiltili pampa amo
quitlepanitaque icamanal Toteco catli Moisés quinpohuiliyaya.
Huajca achi más tojuanti tijselise se hueyi tlatzacuiltili sintla
amo tijchihuase cuenta catli techcamanalhuía tlen ilhuicac.
\v 26 Achtihuiya, quema Toteco quincamanalhui ipan nopa tepetl
Sinaí, itoscac quichijqui ma mojmolini tlali. Huan ama yaya
techtencahuilijtoc sempa mojmolinis pampa quiijtohua: “San se
huelta más nitecamanalhuis, huan sempa mojmolinis tlaltipactli.
Pero ama nojquiya mojmolinis ilhuicactli.”
\v 27 Quema yaya quiijto: “San se huelta más”, quiijtosnequi para
mojmolinis huan Toteco quiquixtis nochi tlamantli catli yaya
quichijtoc. Huan san mocahuas nopa tlamantli catli eltoc para
nochipa catli amo hueli mojmolinía.
\v 28 Huajca pampa tijselise se altepetl catli amo hueli
moojolinía, ma tijtlascamatica Toteco. Nojquiya ma tijtequipanoca
ica nochi toyolo, ma tijpaquilismacaca huan ma tijhueyichihuaca ica
miyac majmajtli huan tlatlepanitacayotl,
\v 29 pampa Toteco yaya temajmati quen se tlitl catli
quitlamitlatía nochi catli onca.
\c 13
\s Quenicatza monequi monejnemiltise tlaneltocani
\p
\v 1 Amo quema xijcahuaca ximoicnelica quen anicnime.
\v 2 Amo xiquelcahuaca para anquinselise ica cuali, nopa masehualme
catli huejca ehuani catli ajsij campa amochaj, pampa quej nopa
sequin quinselijtoque itequihuajcahua Toteco quen ininpaxalojcahua
masque amo quimatiyayaj.
\v 3 Amo xiquelcahuaca xiquinpalehuica catli tzactoque pampa
tlacamanalhuiyayaj icamanal Toteco. Ximonejnehuilica quen
tlaijiyohuíaj quen amojuanti anitztosquíaj ipan tlatzactli
ininhuaya. Nojquiya xiquinelnamiquica nopa sequinoc toicnihua catli
masehualme quinchihuilíaj catli fiero, pampa amojuanti nojquiya
anquipiyaj amotlacayo catli se tonal huelis tlaijiyohuis.
\p
\v 4 Nochi ma quitlepanitaca se tlacatl huan se sihuatl catli
monamictijtoque pampa tlapajpactic ininnemilis san sejco. Pero
Toteco Dios quintlatzacuiltis catli momecatíaj huan catli
quichihuaj tlamantli ica catli amo ininnamic.
\p
\v 5 Amo xiquixtocaca anquipiyase miyac tomi. Más cuali xipaquica
ica catli anquipiyaj pampa Toteco Dios quiijtojtoc: “Amo quema
nimechcajtehuas, nochipa niitztos amohuaya.”
\v 6 Huajca ica miyac paquilistli sesen tojuanti hueli quiijtos:
\q “Toteco nechpalehuía.
\q Amo niquimacasis catli masehualme huelise nechchihuilise.”
\p
\v 7 Xiquinelnamiquica amotlamachtijcahua catli anmechyacanque huan
anmechmachtijque Icamanal Toteco achtihui. Ximonejnehuilica tlen
nochi nopa tlatiochihualistli catli hualajqui tlen ininnemilis huan
xijchihuaca campica para cuali anquineltocase Toteco quen inijuanti
quineltocaj.
\p
\v 8 Jesucristo itztoc san se yalohuaya huan ama huan san se itztos
para nochipa.
\v 9 Ma amo aqui anmechcajcayahua ica miyac tlamantli
tlamachtilistli catli yancuic o catli amo quema anquicactoque.
Anquimatij para hueyi iyolo Toteco amohuaya huajca más cuali ma
tijcahuilica para ni tlalnamiquilistli ma techyolchicahuaca ipan
Toteco. Amo xijtemoca para anmofuerzajmacase iixpa Toteco por amo
anquicuaj sequin tlacualistli. Nopa piltlanahuatiltzitzi catli
masehualme quichijtoque amo quinpalehuijtoc catli quintoquilíaj.
\p
\v 10 Nopa totajtzitzi catli noja quimacaj Toteco tlacajcahualistli
para momaquixtise, amo quipiyaj parte ipan nopa tlacajcahualistli
catli tojuanti tijpiyaj. Pampa Jesucristo mijqui ipan icuamapel quen
totlacajcahualis ipan tlaixpamitl huan yaya catli nelía
tetlajtlacolquixtía.
\p
\v 11 Sesen xihuitl nopa hueyi israelita totajtzi quicui ieso nopa
tlapiyali catli quimictijque huan quihuica tiopan calijtic Campa
Más Tlatzejtzeloltic huan quitencahua quen se tlacajcahualistli
para quiixtzacuas tlajtlacoli. Huan teipa quicui itlacayo nopa
tlapiyali huan quisa tlen nopa altepetl huan nopona quitlatía.
\v 12 Huajca quej nopa nojquiya elqui ica Jesús. Quena, yaya
quisqui nopa altepetl huan nepa tlaijiyohui huan mijqui para
tetlapajpacchihuas ica ieso.
\v 13 Huajca ma tiquisaca nojquiya huan tiyase altepeteno campa yaya
itztoc campa onca pinahualistli, masque monequis titlaijiyohuise
pampa tiiaxcahua.
\v 14 Pampa nica ipan ni tlaltipactli amo onca se altepetl catli
huejcahuas para nochipa. ¡Amo! Tojuanti tijchiyaj nopa yancuic
altepetl nepa ilhuicac catli teipa oncas.
\p
\v 15 Ma nochipa tijtlascamatica Toteco ica itlapalehuil Jesucristo.
Ni tlascamatili eltoc nopa tlacajcahualistli catli ama quinamiqui
tijmacase Toteco. Huajca ica tocamac ma tijhueyichihuaca Toteco
tlatoctzitzi.
\v 16 Amo xiquelcahuaca para xijchihuaca catli cuali.
Xiquinpalehuica sequinoc catli amo tleno quipiyaj, pampa ya nopa
quicualita Toteco quen elisquía se tlacajcahualistli.
\p
\v 17 Xiquintlepanitaca amotlayacancahua ipan Toteco huan
xiquincahuilica ma quipiyaca tlanahuatili ica amojuanti, pampa
inijuanti quimocuitlahuíaj amoalma. Inijuanti quimatij para se
tonal monequi moquetzase iixpa Toteco huan quimacase cuenta tlen
nochi catli quichijtoque. Xiquincahuilica para ma quimacase cuenta
tlen amojuanti ica paquilistli iixpa huan amo ica cuesoli, pampa
sintla amo, huajca amojuanti nojquiya antlaijiyohuise.
\p
\v 18 Ximotlatlajtica ica Toteco por tojuanti. Tijmatij ipan toyolo
para tinemij xitlahuac iixpa huan quej nopa tijnequisquíaj
tijchihuase nochipa.
\v 19 Huan achi más nijnequi ximotlatlajtica ica Toteco ama para
amo huejcahuas niyas nimechitati.
\s Quintiochijqui huan quinnahuati
\p
\v 20 Ma anmechtiochihua Toteco Dios catli temaca tlasehuilistli
ipan teyolo huan catli quiyolcuic Tohueyiteco Jesucristo. Yaya nopa
hueyi tlamocuitlahuijquetl tlen imasehualhua. Huan yaya catli
quitoyajqui ieso para quipehualtis nopa yancuic camanal sencahuali
catli huejcahuas para nochipa.
\v 21 Ma anmechmaca nochi yajatili catli monequi para anquichihuase
nochi catli cuali catli ya ipaquilis. Toteco ica ichicahualis
Jesucristo ma quichihua ipan amojuanti nochi catli quipactía. Ma
tijhueyichihuaca para nochipa huan amo quema ma tijtlamiltise. Quej
nopa ma eli.
\p
\v 22 Noicnihua, ica nochi noyolo nimechtlajtlanía xijtlacaquilica
nochi catli nimechilhuía nica ipan ni amatlajcuiloli para
nimechyolchicahuas, pampa amo quipiya miyac camanali.
\p
\v 23 Nojquiya nijnequi xijmatica para ya quimajcajque toicni
Timoteo catli tzactoya. Huan sintla yaya nimantzi ajsis nica,
nijhuicas nohuaya quema nimechpaxaloti.
\p
\v 24 Xiquintlajpaloca nochi catli anmechyacanaj ipan Toteco huan
nojquiya nochi sequinoc itlatzejtzeloltijca masehualhua Toteco nepa.
Toicnihua ipan tlali Italia anmechontlajpalohuaj.
\p
\v 25 Toteco ma quipiya hueyi iyolo ica amojuanti. Quej nopa ma eli.