\id JAS
\h SANTIAGO
\mt Nopa Amatlajcuiloli catli Santiago Quiijcuilo
\c 1
\s Santiago quintlajcuilhui inijuanti catli quineltocaque Toteco
\p
\v 1 Na niSantiago. Na niinintequipanojca Toteco Dios huan Toteco
Jesucristo. Nimechtlajcuilhuía annoisraelita icnihua ipan Cristo
catli anitztoque ipan nopa doce huejhueyi familias tlen iteipan
ixhuihua Israel. Ama anmosemantoque campa hueli ipan tlaltipactli.
Nimechtlajpalohua.
\s Nopa tlalnamiquilistli catli Toteco temaca
\p
\v 2 Noicnihua, xiquitaca para se hueyi paquilistli quema
anmechpanotihuala tlaohuijcayotl.
\v 3 Anquimatij para tlaohuijcayotl quiyejyecohua amotlaneltoquilis
huan quichihua para más xijpiyaca amoyolo para antlaijiyohuise.
\v 4 Huajca xijpiyaca amoyolo para cuali xiquijiyohuica nochi catli
anmechpanotihuala para anelise quen catli moscaltijtoque huan
motlacachijtoque ipan Toteco. Huan anquipiyase senquistoc cuali
amotlalnamiquilis huan quej nopa amo tleno anmechpolos.
\p
\v 5 Sintla se tlen amojuanti quimonequilía más tlalnamiquilistli
pampa amo quimati tlaque ipaquilis Toteco ipan inemilis, ma
quitlajtlani Toteco huan yaya quimacas. Yaya catli temaca miyac
tlalnamiquilistli, huan amo quiajhuas pampa quitlajtlanía.
\v 6 Pero quema se quitlajtlanía Toteco, monequi quineltocas para
temachtli Toteco quipalehuis, huan quej nopa, quena, quipalehuis. Ma
amo moilhui: “Huelis Toteco nechpalehuis o huelis amo.” Pampa
catli moilhuía quej nopa itztoc quen nopa hueyi atl catli yohui
campa ajacatl quicuatopehua.
\v 7 Catli amo quineltoca para temachtli Toteco quipalehuis, ma amo
mochiya, pampa Toteco amo tleno quimacas.
\v 8 Nopa masehuali amo temachtli pampa quipiya ome itlalnamiquilis,
huan amo quema quimatis catli melahuac quichihuas ipan inemilis.
\p
\v 9 Ma paquica toicnihua ipan Cristo catli teicneltzitzi pampa
Toteco quinita para nelía hueyi ininpati iixpa.
\v 10 Huan toicnihua catli tominpiyaj ma paquica quema Toteco
quinechcapanojtoc iixpa. Monequi quimachilise para amo huejcahuase
ipan ni tlaltipactli ica inintomi. Itztoque san quen se xochitl
catli cahuantoc sacapetlapani huan nesi yejyectzi san se tlatoctzi.
\v 11 Pero quema pehua tona chicahuac, nopa sacatl huaqui. Huan nopa
xochitl nimantzi pilini huan huetzi, huan ayacmo nesi yejyectzi.
Quej ni itztoc se quentzi tonali se masehuali catli tominpiya huan
teipa quema moneltequihuía, tlatocmiquis.
\s Xiquijiyohui nochi catli mitzpanotihuala
\p
\v 12 Toteco quintiochihuas nopa masehualme catli quiijiyohuíaj
huan amo tlajtlacolchihuaj quema huala tlayejyecoli huan
tlaohuijcayotl. Toteco quinmacas se corona nepa ilhuicac. Quena,
quinmacas nemilistli para nochipa quen ya quintencahuilijtoc
quinmacas catli quiicnelíaj.
\v 13 Huan quema se tlajtlacoli mitzyoltilana xijchihua, amo
ximoilhui para yaya Toteco catli mitzyoltilana para
xitlajtlacolchihua. ¡Amo quema! Amo aqui hueli quiyoltilanas Toteco
ma tlajtlacolchihua huan yaya amo quema quinyoltilana masehualme ma
tlajtlacolchihuaca.
\v 14 Pero nopa tlamantli fiero catli se tlacatl o se sihuatl
tlahuel quinequi quichihuas ipan itlalnamiquilis, ya nopa
quiyoltilana.
\v 15 Huan pampa tlahuel quinequi quichihuas catli fiero, teipa
tlajtlacolchihua. Huan catli tlajtlacolchihua, teipa quipantis
miquilistli.
\p
\v 16 Xijtlacaquilica, noicnihua catli nimechicnelía. Amo
ximocajcayahuaca.
\v 17 Nochi catli yejyectzi huan catli cuali tijselíaj, techmaca
Toteco catli itztoc nepa huejcapa ipan ilhuicac. Yaya catli
quichijqui tonati, metztli huan nochi sitlalime. Yaya amo quema
mopatla. Niyon amo quema ajsis tonali quema techchihuilis catli amo
cuali.
\v 18 Yaya ica ipaquilis techtlacatilti para tiiconehua quema
tijneltocaque icamanal catli melahuac. Huan quichijqui para ma
tielica quen nopa achtihui nemachiltili tlen nochi masehualme catli
teipa elise iconehua.
\s Quenicatza se huelis quipactis Toteco
\p
\v 19 Huajca noicnihua catli nimechicnelía, nimantzi
xijtlacaquilica cuali quema seyoc anmechcamanalhuía. Pero quema
anquincamanalhuíaj sequinoc, xiquincamanalhuica ica yamactzi, huan
quema anquinequij ancualanise, achtihui ximoilhuica sintla cuali
ancualanise o amo.
\v 20 Pampa tocualancayo timasehualme amo techpalehuía ma
tijpactise Toteco, niyon amo techchihua tixitlahuaque iixpa Toteco.
\v 21 Huajca xijcajtehuaca nochi catli fiero huan nochi catli amo
cuali catli anquinequij anquichihuase. Ximoechcapanoca huan
xijselica nopa cuali camanali catli Toteco quitlalijtoc ipan
amoyolo, pampa nopa camanali quipiya chicahualistli para
anmechtlajtlacolquixtis.
\p
\v 22 Huan monequi xijchihuaca nochi catli anmechilhuía icamanal
Toteco. Amo ximoilhuica para cuali para anquicaquise Icamanal Toteco
pero amo monequi anquichihuase catli quiijtohua. Quej nopa san
anmocajcayahuaj amoseltzitzi.
\v 23 Catli quicaqui Icamanal Toteco huan amo quichihua, itztoc quen
se catli san motescaita,
\v 24 huan quema ya moitac, quistehua, huan nimantzi quielcahua
quenicatza fiero nesiyaya.
\v 25 Pampa itlanahuatilhua Toteco eltoque senquistoc cuali huan
techtojtomaj para hueli tiyohuij timajcajtoque. Huan sintla se
acajya quintlachilijtinemis itlanahuatilhua huan amo quielcahuas,
pero mojmostla quichijtinemis catli quiijtohuaj, Toteco
quitiochihuas nopa masehuali.
\p
\v 26 Sintla se acajya quiijtohua quineltoca Toteco, pero amo
momocuitlahuía ica catli quiijtohua; huan san tlen hueli camanalti,
huajca yaya san moyolcajcayahua. Amo tleno ipati itlaneltoquilis.
\v 27 Inijuanti catli nelía quitlepanitaj Toteco Dios huan quipiyaj
inintlaneltoquilis catli senquistoc cuali iixpa, quichihuaj ya ni:
quinpalehuíaj icnotzitzi huan cahual toahuihua catli
tlaijiyohuíaj, huan momocuitlahuíaj ica catli fiero ipan ni
tlaltipactli para amo quinyoltilanas ma tlajtlacolchihuaca.
\c 2
\s Ayacmo xiquinchicoicnelica masehualme
\p
\v 1 Noicnihua catli nimechicnelía. ¿Quenicatza huelis anquiijtose
para anquineltocatoque Tohueyiteco Jesucristo catli onpano hueyi,
huan noja anquinchicoicnelíaj masehualme?
\v 2-3 Quema ajsi se masehuali ipan amotlasentililis ica ianillo
tlen oro huan ica iyoyo catli cuali, anquiselíaj ica yejyectzi huan
anquiilhuíaj: “Ximosehui nica ipan ni cuali siyaj.” Pero quema
ajsis seyoc masehuali catli teicneltzi ica iyoyo catli sosoltzi,
anquiilhuíaj: “Ximoquetza nopona o ximosehui tlalchi.”
\v 4 ¿Amo anquiitaj para anquinchicoicnelíaj masehualme?
Anmochihuaj quen se tetlajtolsencajquetl catli quiijtohua ajqueya
cuali huan ajqueya amo cuali. Pero amo xitlahuac amotlalnamiquilis
pampa anquiicnelíaj se masehuali san por catli cuali motlalilía.
\p
\v 5 Xitlacaquica noicnihua catli nimechicnelía. Toteco
quintlapejpenijtoc inijuanti catli teicneltzitzi para achi más
nimantzi quineltocase. Huan inijuanti quiselise ininparte nepa campa
Toteco tlanahuatía, pampa quej nopa yaya techtencahuilijtoc nochi
tojuanti catli tiquicnelíaj.
\v 6 Pero amojuanti anquinpinahualtíaj catli teicneltzitzi. ¿Para
tlen? ¿Amo anquimachilíaj para itztoque nopa masehualme catli
tlapijpixtoque catli achi más anmechchihuilíaj catli amo cuali
huan achi más anmechhuahuatatzaj campa tequicali?
\v 7 Inijuanti catli tominpixtoque catli más quitlaijilhuíaj
itoca yejyectzi Tohueyiteco Jesucristo catli anmechaxcati nochi
amojuanti.
\p
\v 8 Nelía cuali sintla anquitoquilíaj nopa hueyi tlanahuatili
ipan Icamanal Toteco catli quiijtohua: “Xiquinicneli sequinoc quen
timoicnelía moseltzi.”
\v 9 Pero sintla anquintlapejpeníaj ajqueya anquinicnelise,
antlajtlacolchihuaj huan anquinixpanoj itlanahuatilhua Toteco, pampa
Toteco quinequi xiquinicnelica nochi masehualme.
\v 10 Sintla se masehuali quitoquilía nechca nochi catli
quiijtohuaj itlanahuatilhua Toteco, pero san se tlamantli catli
quiijtohuaj amo quichihua, huajca nopa masehuali san se quihuica
tlajtlacoli quen se catli quinixpanotoc nochi nopa tlanahuatilme.
\v 11 Pampa yaya Toteco catli quiijto ma amo timomecatica, nojquiya
quiijto ma amo timomictica. Yeca sintla amo timomecatijtoc, pero
titemictijtoc, titlaixpanoquetl. Huan tijhuica tlajtlacoli ica nochi
itlanahuatilhua Toteco.
\v 12 Huajca ica nochi catli anquiijtohuaj huan ica nochi catli
anquichihuaj, xiquelnamiquica ajsis se tonal quema Toteco
anmechtlajtolsencahuas. Quitlachilis sintla catli tijchijtoque
quiaxilía catli technahuatía ma tijchihuaca nopa tlanahuatili tlen
teicnelijcayotl. Huan nopa tlanahuatili tlen teicnelijcayotl
techtojtomas para huelis timocahuase timajcajtoque.
\v 13 Huan sintla amo anquintlasojtlaj sequinoc masehualme, huajca
Toteco amo anmechtlasojtlas quema anmechtlajtolsencahuas. Pero
sintla anquintlasojtlaj sequinoc, antlatlanise ipan nopa tonal quema
Toteco tetlajtolsencahuas.
\s Ajqueya quineltoca Toteco huan ajqueya quichihua catli cuali
\p
\v 14 Noicnihua, amo tleno ipati iixpa Toteco sintla se masehuali
san quiijtohua quineltoca Toteco, sintla amo quinpalehuía sequinoc
huan quej nopa quinextis para, quena, nelía quineltoca Toteco.
Toteco amo quitlajtlacolquixtía se catli quej nopa quineltoca, huan
amo tleno más quichihua.
\v 15 Sintla se toicni amo quipiya iyoyo o amo quipiya itechmonequi,
monequi tijpalehuise.
\v 16 Sintla san tiquilhuise: “Xiya ica paquilistli, xitlacua
cuali, huan ximopiqui cuali pampa tlaseseya”, pero amo tleno
tijpalehuíaj ica catli monequi para itlacayo, huajca san tlapic
tocamanal. Amo tleno quipalehuijtoc.
\v 17 Quej nopa nojquiya ica catli quiijtohua quineltoca Toteco,
sintla amo quichijtinemi tlamantli catli cuali, amo tleno ipati
itlaneltoquilis pampa mictoc huan amo hueli quipiya itlajca.
\p
\v 18 Sintla se quiijtos para sequin masehualme quipiyaj
tlaneltoquili huan sequinoc quichihuaj tlamantli catli cuali, huan
yaya se catli quipiya tlaneltoquili, huajca na niquijtos:
¿quenicatza hueli technextilis motlaneltoquilis huan amo tijchihua
tlamantli catli cuali? Pero ica na, quena, huelis nimitznextilis
nijneltoca Toteco, pampa huelis nimitznextilis nopa cuali tlamantli
catli nijchijtihuala.
\v 19 Anquiijtohuaj anquineltocaj para itztoc san setzi Dios.
Cualtitoc quej nopa. Pero nojquiya hasta iajacahua Amocualtlacatl
quimatij para itztoc san setzi Dios huan huihuipicaj iixpa ica
majmajtli.
\v 20 ¿Amo hueli anquimachilíaj? ¿Anhuihuitique? Sintla se
quiijtohua quineltoca Toteco huan amo quichihua tlamantli catli
cuali, huajca san tlapic icamanal pampa amo melahuac quineltoca
Toteco.
\v 21 ¿Amo anquielnamiquij para tohuejcapan tata Abraham mochijqui
xitlahuac iixpa Toteco pampa quichijqui catli Toteco quiilhui? Yaya
quineltocac hasta quimacatosquía icone, Isaac, quen se
tlacajcahualistli ipan tlaixpamitl quen Toteco quinahuatijtoya.
\v 22 Huajca Abraham quinexti para motemachiyaya ipan Toteco huan
nochi huelque quiitase, pampa quichihuayaya catli Toteco quiilhui
huan huajca quinexti para nelía ajsitoc itlaneltoquilis.
\v 23 Huajca quisqui melahuac campa ijcuilijtoc ipan Icamanal Toteco
campa quiijtohua para Abraham quineltocac Toteco, huan yeca Toteco
quiitac ya para itztoc xitlahuac iixpa. Huan sequinoc
quitocaxtlalijque Abraham “ihuampox Toteco”.
\p
\v 24 Xijmatica ya ni, Toteco quichihua se masehuali xitlahuac iixpa
sintla quichihuas catli cuali, huan ica ya nopa quinextía
itlaneltoquilis. Amo mochihua xitlahuac iixpa pampa san quiijtohua
quineltoca Toteco.
\v 25 Quej nopa nojquiya eltoya ica Rahab catli itztoya huejcajya
huan achtihuiya tlacanenqui. Toteco quichijqui xitlahuac iixpa por
catli cuali quichijqui catli quinextili itlaneltoquilis. Pampa Rahab
quinseli nopa israelitame catli yajque tlachiyatoj ipan itlal huan
ichtacatzi quintitlanqui ipan seyoc ojtli para quinmanahuis.
\v 26 Ya anquimatij sintla se masehuali amo quipiya itonal ipan
itlacayo, huajca ya mictoc. Huan se masehuali catli quiijtohua
quineltoca Toteco, pero amo quichihua tlamantli catli cuali, ya
mictoc itlaneltoquilis.
\c 3
\s Tonenepil
\p
\v 1 Noicnihua, amo cuali para miyaqui amojuanti anquinequise
anmochihuase tlamachtiani tlen Icamanal Toteco. Achi más monequi
para tojuanti catli titlamachtíaj Icamanal ma tijchihuaca catli
nelía cuali. Pampa Toteco ica achi más cuidado techtequitlachilis
titlamachtiani que sequinoc tlaneltocani.
\v 2 Nochi timasehualme quemantic timocuapolohuaj. Pero sintla se
masehuali hueli monahuatis para amo quema quiixpanos seyoc ica catli
quiijtohua, huajca yaya senquistoc se cuali masehuali huan nojquiya
cuali hueli quinahuatis itlacayo para amo tlajtlacolchihuas.
\v 3 Ica se cahuayo tijtlalilíaj se tepos camachali tziquitetzi
huan ica inon, nopa hueyi cahuayo techneltoquilía huan yohui campa
tijnequij ma yohui.
\v 4 Nojquiya ica huejhueyi cuaacalme ipan hueyi atl, masque
tlaajaca chicahuac huan nopa ajacatl quinequi quihuicas, nopa
cuaacali san yas campa iteco quinequi ma yohui, pampa iteco
quinahuatía ica nopa tepostli tziquitetzi catli eltoc itla nopa
cuaacali.
\v 5 Quej nopa nojquiya ica tonenepil, pampa masque tziquitetzi ipan
totlacayo, mohueyimati ica catli hueli quichihua. Ica tonenepil
huelis tiquijtose catli tlahuel quincocos sequinoc. Se
piltlilelemectzi catli pehua quentzi, huelis quiajsis se hueyi
cuatitlamitl, huan quintlamitlatis nopa cuame.
\v 6 Huan tonenepil eltoc quen nopa piltlilelemectzi. Masque
tziquitetzi tonenepil, catli tiquijtohuaj huelis quintlanahuis
miyaqui campa hueli. Huan masque tonenepil eltoc se parte tlen
totlacayo, nopa catli quiijtohua huelis quinenpolos nochi totlacayo.
Huan nopa Amocualtlacatl tlen nepa mictla techajcomana para ma
tiquijtoca tlen hueli, pampa quinequi ma titetlaijilhuica hasta ma
tijtlamisosoloca tonemilis.
\p
\v 7 Masehualme huelij quinmaxojtilíaj nochi tlamantli tlapiyalme
huan totome. Huan hasta quinmaxojtilijtoque nochi tlamantli cohuame
huan tlamantli catli itztoque ipan hueyi atl.
\v 8 Pero amo aqui hueltoc quimaxojtilía ininnenepil masehualme
huan nochi catli quiijtohuaj. Masehualme amo hueli quinahuatise
ininnenepil ma amo molini pampa tlahuel quinequij quiijtose miyac
tlamantli catli fiero. Eltoc quen se cohuatl catli temitoc ica
itencococa.
\v 9 Ica tonenepil tijhueyichihuaj Toteco Totata huan ya nopa nelía
cuali, pero nojquiya ica tonenepil tiquintelchihuaj sequinoc
masehualme catli Toteco quinchijchijtoc ica catli ya iixcopinca,
huan ya nopa fiero.
\v 10 Huajca ica san setzi tonenepil tiquijtohuaj tlamantli catli
cuali huan tlamantli catli fiero. Noicnihua, amo quinamiqui ya nopa.
\v 11 Ipan se ameli amo quisa cuali atl se tlatoctzi huan teipa
poyec atl.
\v 12 Noicnihua, se lalax cuahuitl amo hueli temaca mangos. Niyon se
xocomeca tzontli amo hueli temaca lalax. Campa meya poyec atl, amo
huelis meyas cuali atl. Huajca amo quinamiqui para tonenepil
quiijtos catli amo cuali.
\s Yaya catli nelía tlalnamiqui iixpa Toteco
\p
\v 13 Sintla nelía antlalnamiquij huan anquimachilíaj iojhui
Toteco, xijnextica para ancuajcualme huan xijchihuaca miyac
tlamantli catli cuali. Huan sintla nelía antlalnamiquij, amo
ximohueyimatica ica catli anquichihuaj. Quej nopa quena,
antenextilise nelía anquipiyaj amotlalnamiquilis.
\v 14 Pero sintla anquinchicoitaj sequinoc huan san anquinequij
anmohueyichihuase amoseltzitzi, huajca amo ximohueyimatica pampa amo
neli antlalnamiquij. San anmoistlacahuíaj sintla anmoilhuíaj
antlalnamiquij.
\v 15 Toteco catli itztoc ilhuicac amo anmechmacatoc se
tlalnamiquilistli quej nopa. ¡Amo! Nopa tlalnamiquilistli catli
fiero hualajqui ipan tlaltipactli. Quej nopa tlachihuaj masehualme
nica, pampa nopa Amocualtlacatl quinmaca nopa tlamantli
tlalnamiquilistli catli fiero.
\v 16 Pampa quema masehualme mochicoitaj huan san quinequij
mohueyitlalise ininseltzitzi, huajca amo tleno quisas cuali huan
oncas nochi tlamantli tlajtlacoli.
\p
\v 17 Pero nopa tlalnamiquilistli catli Toteco temaca amo quej nopa.
Masehualme catli quipiyaj nopa tlalnamiquilistli catli Toteco
temaca, quichihuaj catli senquistoc cuali. Tlayoltlalíaj huan
teicnelíaj. Quipiyaj ininyolo. Tetlasojtlaj huan techihuilíaj
catli cuali. Catli quipiyaj itlalnamiquilis Toteco, amo
quinchicoicnelíaj masehualme, niyon amo moijixpatlaj.
\v 18 Huan campa ni masehualme yohuij onca tlasehuilistli pampa
tlayoltlalíaj huan quichihuaj catli cuali.
\c 4
\s Amo xiquicnelica ni tlaltipactli
\p
\v 1 Anmonajnanquilíaj huan anmohuilanaj se ica seyoc, pero ¿para
tlen quej nopa? ¿Ica tlaque pehua? Anquichihuaj quej nopa, pampa
ipan amotlalnamiquilis anquinequij miyac tlamantli catli amo cuali.
\v 2 Anquinequij catli sequinoc quipiyaj huan quema amo anhuelij
anquicuij, huajca anquinmictíaj. Antlaixtocaj pampa sequinoc
tlapijpiyaj huan yeca pehua anquinnajnanquilíaj huan anmohuilanaj
se ica seyoc. Pero amo anquipiyaj inon catli anquinequij pampa amo
anquitlajtlanijtoque Toteco ma anmechmaca.
\v 3 Huan quemantic, masque anquitlajtlaníaj Toteco ma anmechmaca
se tlamantli, yaya amo anmechmaca pampa anquitlajtlaníaj ica se
amoyolo amo cuali, huan san anquinequij anquiahuilsosolose catli
anquitlajtlaníaj. San anquinequij anquitequihuise ica catli
anmechpactisquía.
\p
\v 4 Amojuanti ya anquicajtejtoque Toteco quen se tlacatl catli
quicahua isihua para momecatis. ¿Amo anquimatij, sintla
anmohuampoxchihuase ica catli eltoc ipan ni tlaltipactli, huajca
anmochihuase anicualancaitacahua Toteco? Sempa nimechilhuis, aqui
hueli catli quinequi mohuampoxchihuas ica ni tlaltipactli, mochijtoc
icualancaitaca Toteco.
\v 5 ¿Atlac anmoilhuíaj amo tleno quinequi quiijtos campa Icamanal
Toteco quiijtohua: “Itonal Toteco catli Toteco quitlalijtoc para ma
mocahua ipan toyolo techtlasomati huan quinequi ma amo tiquicnelica
seyoc, san Toteco”?
\v 6 Huan Toteco pampa hueyi iyolo ica tojuanti, tlatoctzitzi
techpalehuía ma amo tihuetzica. Huajca Icamanal Toteco quiijtohua:
“Toteco quincualancaita catli mohueyimatij, pero quipiya hueyi
iyolo ica inijuanti catli moechcapanohuaj iixpa.”
\v 7 Huajca ximoechcapanoca iixpa Toteco. Ximoquetzaca quen
antemachme iixpa Amocualtlacatl huan amo xijchihuaca catli quinequi
xijchihuaca, huan yaya anmechtlalcahuis.
\v 8 Ximonechcahuica campa Toteco huan yaya anmechnechcahuis. Cuali
xijmachilica para antlajtlacolchihuani huan xijcahuaca
amotlajtlacol. Anmoijixpatlani pampa nojquiya anquiicnelíaj ni
tlaltipactli, huajca ximoyolpajpacaca.
\v 9 Ximotequipachoca miyac huan xichocaca ica catli anquichihuaj.
Anpaquiyayaj ipan amotlajtlacolhua, pero ama ma mocuepa
amotlahuetzquilis ica choquistli. Huan amopaquilis ma mocuepa
tequipacholi por nopa tlajtlacoli catli anquichijtoque.
\v 10 Ximoechcapanoca iixpa Toteco huan yaya anmechhueyitlalis.
\s Amo xiquintlajtolsencahuaca amoicnihua
\p
\v 11 Noicnihua, amo ximotlaijilhuica se ica seyoc. Se acajya catli
quitlaijilhuía iicni ipan Cristo huan quiijtohua amo cuali,
quitlaijilhuía itlanahuatil Toteco catli techilhuía ma
timoicnelica, huan quiijtohua nopa tlanahuatili amo cuali. Pero amo
totequi para tijtlajtolsencahuase nopa tlanahuatili, huan tiquijtose
sintla cuali o amo cuali. Tojuanti totequi para ma tijneltocaca
catli nopa tlanahuatili technahuatía.
\v 12 Itztoc san setzi catli techmaca nopa tlanahuatili, yaya Toteco
Dios, huan san yaya quipiya tequiticayotl para tetlajtolsencahuas.
San ya hueli temaquixtis o tetzontlamiltis. Pero amojuanti, amo
anquipiyaj tequiticayotl para anquintlajtolsencahuase sequinoc.
\s Tojuanti amo tijmatij tlaque oncas mostla
\p
\v 13 Xijtlacaquilica noicnihua. Sequin amojuanti anquiijtohuaj:
“Ama o mostla tiyase campa nopa altepetl huan timocahuase nepa se
xihuitl. Tijpantise se tequitl huan tijtlanise cuali tomi.”
\v 14 Amo cuali ancamanaltij quej nopa. Amo anquimatij niyon quentzi
tlaque amopantis mostla. Amonemilis san huejcahuas se tlatoctzi.
Eltoc quen se ayahuitl catli nesi se tlatoctzi ica ijnaloc huan
nimantzi sempa quema tijtlachilis, ayacmo nesi.
\v 15 Huajca achi cuali anquiijtosquíaj: “Sintla Toteco quinequi,
huajca tiitztose huan titequitise, o tijchihuase ni tlamantli o nopa
tlamantli.”
\v 16 Pero ama, ancamanaltij quen catli nelía mohueyimatij, huan ya
nopa amo cuali.
\v 17 Huan xiquelnamiquica, sintla se acajya quimati catli xitlahuac
para quichihuas, pero amo quichihua, yaya tlajtlacolchihua.
\c 5
\s Santiago quinyolmelajqui catli tlapijpixtoyaj
\p
\v 1 Xijtlacaquilica antlapijpiyani. Xichocaca huan
xitlahuejchihuaca pampa anquimatij nopa tlaijiyohuilistli catli
anmechchiya.
\v 2 Ya palantinemi nochi nopa tlamantli catli anquipiyaj, huan
mejtolime quicuajtinemij nochi amoyoyo catli yejyectzi.
\v 3 Amotomi masque tlen oro huan tlen plata moxixtoc ipan bolsas,
huan ya nopa quinextía para amo anquinpalehuijtoque catli
teicneltzitzi. Yeca amotomi anmechpolos quen tlitl quitzontlamiltía
catli quitlatía. Quena, anquipiyaj miyac tlamantli catli cuali
nica, pero nopa miyac tlamantli anmechtelhuise ipan nopa tlayacapan
tonali para amo antepalehuijtoque.
\v 4 Xijtlacaquilica antlapijpiyani, amo ajsitoc
anquintlaxtlahuijtoque catli anmechpalehuiyayaj para xipixcaca ipan
amomil. San anquincajcayajtoque. Huajca ama inijuanti
anmechtelhuíaj iixpa Toteco Catli Quipiya Nochi Chicahualistli.
\v 5 Ipan nochi amonemilis ipan ni tlaltipactli, san
anquichihuayayaj catli anmechpactiyaya para ixhuis amotlanequilis.
Antlapijpiyani anitztoque quen pitzome catli quipiyaj miyac
tlacualistli mojmostla. Pero quej nopa eltoc para ma motomahuaca
para nopa tonal quema ininteco quinmictis.
\v 6 Anquintelhuijtoque huan anquinmictijtoque masehualme catli
cuajcualme catli amo tleno quichijtoque, niyon amo momanahuijtoque.
\s Xijpiyaca amoyolo huan ximotlatlajtica ipan Toteco
\p
\v 7 Pero amojuanti catli annoicnihua, xijpiyaca amoyolo ica nochi
catli antlaijiyohuíaj ipan ni tonali quema tijchiyaj ma sempa
hualas Tohueyiteco Jesucristo. Ximoilhuica quen se tojquetl catli
quitoca xinachtli ipan imil, huan quipiya iyolo hasta quema
tlaquiyahuis achtihui huan teipa. Huan teipa quichiya más tonali
para oncas pixquistli.
\v 8 Amojuanti nojquiya xijpiyaca amoyolo huan ximoyolchicahuaca
pampa amo huejcahuas para sempa hualas Toteco.
\v 9 Noicnihua, amo ximotlaijilhuica se ica seyoc para amo aqui
monequis anmechtlajtolsencahuas, pampa nopa tetlajtolsencajquetl amo
huejcahuas para ajsis. Ya monechcahuía campa puerta.
\v 10 Noicnihua, ximoilhuica tlen itlajtol pannextijcahua Toteco
catli huejcajya itztoyaj. Inijuanti tlayolmelahuayayaj catli Toteco
quinilhuiyaya huan quipixque ininyolo masque tlaijiyohuiyayaj.
\v 11 Tijmatij inijuanti ama nelía paquij pampa quiijiyohuijque
catli quinpanoc. Ya anquimatij quen Job tlaijiyohui. Huan anquimatij
teipa Toteco nelía quichihuili catli cuali pampa Toteco tlahuel
teicnelía huan tetlasojtla.
\p
\v 12 Pero noicnihua, seyoc camanali catli nelía ipati
nimechilhuía. Amo xitlatestigojquetzaca para sequinoc más ma
anmechneltocaca. Amo xijtestigojquetzaca ilhuicactli, niyon
tlaltipactli. Amo aqui xijtestigojquetzaca. ¡Amo! San xiquijtoca
“quena” quema anquinequij anquiijtose, “quena”. Huan xiquijtoca
“amo” quema anquinequij anquiijtose “amo”. Quej nopa Toteco amo
anmechtlatzacuiltis por amocamanal.
\p
\v 13 Sintla itztoc se campa amojuanti catli tlaijiyohuía, huajca
ma motlatlajti ipan Toteco. Catli paquij ipan Toteco, ma huicaca
huan ma quihueyichihuaca Toteco.
\v 14 Sintla itztoc se catli mococohua, ma quinnotzaca nopa huehue
tlacame catli tlayacanaj ipan amotiopa tlen tlaneltocani, huan ma
motlatlajtica ipan Toteco por catli mococohua. Huan ma quipoloca
aceite ipan itoca Tohueyiteco Jesucristo.
\v 15 Huan quema anmotlatlajtise ipan Toteco para ma quichicahua
nopa cocoxquetl, xijneltocaca para temachtli Toteco quichihuas, huan
quichicahuas. Quena, Toteco quitlananas nopa cocoxquetl. Huan sintla
nopa cocoxquetl tlajtlacolchijtoc, huajca Toteco quitlapojpolhuis.
\p
\v 16 Huajca ximopohuilica se ica seyoc tlaque tlaixpanoli
anquichijtoque. Huan se ica seyoc ximotlatlajtica ipan Toteco por
sesen amojuanti, huan Toteco anmechchicahuas. Quema se masehuali
catli itztoc xitlahuac iixpa Toteco quitlajtlanía Toteco chicahuac
para se tlamantli, huajca Toteco quichihuas.
\v 17 Elías, itlajtol pannextijca Toteco, nojquiya elqui se tlacatl
quen tojuanti huan quitlajtlani Toteco chicahuac para ma amo
tlaquiyahuis. Huan amo tlaquiyajqui ipan ni tlaltipactli para eyi
xihuitl huan tlajco.
\v 18 Huan teipa sempa quitlajtlani Toteco ma tlaquiyahuilti, huan
tlaquiyajqui chicahuac huan nochi tlatoctli sempa temacac itlajca.
\p
\v 19 Noicnihua, sintla se quicajtejtoc Icamanal Toteco catli
melahuac, huan seyoc quipalehuía ma mocuepa ica Toteco,
\v 20 huajca xijmatica para yaya catli quipalehuía nopa
tlajtlacolchijquetl para ma mocuepa huan ma quicajtehua iojhui catli
amo cuali, quimanahuijtoc ialma para amo quipantis miquilistli. Huan
nopa masehuali quipantis tlapojpolhuili pampa moyolpatlatoc.