\id ROM
\h Romanos
\toc1 Romanos
\mt SAN PABLO ITLATITLANIL IN DIOS OKINTLAJKUILILIJ IN TLANELTOKAKEJ DE ROMA
\c 1
\s Pablo okintlajkuililij in tiopantlaneltokakej de Roma
\p
\v 1 Nej niPablo, niitekipanoj in Jesucristo. Dios onechnotzke
para ma nieto niitlatitlanil. Onechpejpenke para ma
niktematilti in kuale tlajtole katlej temakixtia.
\p
\v 2 Desde ya wejkawitl, Dios okinkakitij in tlakaj de
Israel yon kuale tlajtole katlej temakixtia ika inten
in profetajtin katlej okijkuilojkej in tiotlajkuilole.
\v 3 Yon kuale tlajtole katlej temakixtia tlapoa de
yen toSeñor Jesucristo, iKone in toTajtzin Dios. Nijkuak
otlakatke, otlakatke kej se tlakatl katlej walajtok nelwatl
de yen rey David.
\v 4 Pero nijkuak omoyolkuik satepan de omikke, omoteititij
nik melawak Yej iKone in Dios katlej kipia weyi ipoder,
iwan noijki okipiaya in Espíritu Santo katlej chipawak
porke Yej Dios.
\v 5 Iwan por yen Jesucristo, Dios ika iteiknotlamachilis
onechtlalij ma nieto niitlatitlanil, para ma nikinmatilti
nochtin in tlaltikpaktlakaj de yen kuale tlajtole katlej
temakixtia, para ma kineltokakan iwan ma kitlakitakan
toTajtzin Dios, iwan ijkón nochtin ma kiweyikixtikan
toSeñor Jesucristo.
\v 6 Iwan namejwan noijki Dios oamechnotzke para xiekan
iaxkawan in Jesucristo.
\p
\v 7 Namechijkuililia yin amatlajkuilole aminochtin
namejwan katlej anchantij itech weyikan de Roma, katlej
Dios sa tekitl amechtlasojtla, iwan oamechnotzke para
xiekan anyolchipawakej inawak iwan xiekan de Yej iaxkawan.
ToPapan Dios iwan toSeñor Jesucristo ma amechmakakan
inteiknotlamachilis iwan inyolosewilis.
\s Pablo sa tekitl okinekke yas kintlajpaloti in tlaneltokakej katlej chantij itech weyikan de Roma
\p
\v 8 Axan, por yen tlan Jesucristo okichij por tejwan,
achtoj, nikneki nimotlasojkamatis inawak Dios por aminochtin
namejwan, porke ik nowian (nian nepa) yokimatkej nik
namejwan kuale antlaneltokaj inawak Dios.
\v 9 Iwan Dios, katlej ika nochi noyolo niktekipanoa
para niktematiltia in kuale tlajtole katlej temakixtia
de iKone, Yej kuale kimati nik nej nochipa namechelnamiki
nijkuak nimotiotzajtzilia.
\v 10 Iwan nochipa niktlatlawtia in toTajtzin Dios, Yej
ma kimonekilti xamo kualtis nias namechitati.
\v 11 Porke nikneki namechitas iwan nikneki namechpalewis
para namejwan xikpiakan poder katlej kitemaka in Espíritu
Santo para okachi kuale xiktekipanokan in toTajtzin
Dios, iwan para okachi kuale ximoyekketzakan itech namotlaneltokalis.
\v 12 Kijtosneki, ma timoyolojchikawakan se iwan oksé
ika totlaneltokalis katlej tikpiaj.
\p
\v 13 Nokniwan, nikneki xikmatikan nik ya miekpa nikneki
nias namechitati, pero asta axan mach niweli porke nechtzakuilijtiwitz
miek tlamantle. Nikneki nias namechitati para namechmachtis
xinejnemikan kuale ipan iojwi in Cristo, ijkón ken onikinmachtij
oksekimej tlaneltokakej katlej mach judiojtin.
\v 14 Nej nikpia de nikintlapowis nochtin, katlej tlapoaj
ika tlajtole griego iwan katlej mach tlapoaj ika griego,
katlej ixtlamatkej iwan katlej mach ixtlamatkej.
\v 15 Iwan por yonik, nej sa nikchixtok keman welis namechmatiltis
in kuale tlajtole katlej temakixtia namejwan noijki
katlej anchantij itech weyikan de Roma.
\s In kuale tlajtole katlej temakixtia kipia poder
\p
\v 16 Nej amo nipinawa de niktematiltis in kuale tlajtole
katlej temakixtia, porke kipia poder de Dios iwan weli
kinmakixtia nochtin akinmej kineltokaj. Achtoj yen judiojtin
okikakej itlajtol in Dios para ma momakixtikan, pero
axan katlej mach judiojtin noijki ya kikakij itlajtol
in Dios para ma momakixtikan noijki.
\v 17 Porke yin kuale tlajtole katlej temakixtia techititia
kenik in Dios techita tichipawakej de nochi totlajtlakol
nijkuak titlaneltokaj inawak. Dios ijkón techita san
yen tla titlaneltokaj inawak. Ken kijta in tiotlajkuilole:
“Akin kitlalis itlaneltokalis inawak Dios, in Dios kitas
ya chipawak de nochi itlajtlakol iwan ijkón welis kipias
nemilistle nochipa.”
\s Intlajtlakol in tlaltikpaktlakaj
\p
\v 18 ToTajtzin Dios katlej kajki ilwikak kiteititia
ikualanilis inpan nochtin in tlakaj katlej mach kualtin
iwan mach kitlakitaj in Dios. Iwan por yen tlajtlakole
katlej kichiwaj, kitzakuiliaj tlan melawak de Dios para
oksekimej amo ma kimatikan.
\v 19 Porke nochtin in tlaltikpaktlakaj kimatij nik
onkaj Dios, iwan por yen tlamantin katlej okinchij, ika
yon Yej moteititia.
\v 20 Maski amo se weli kita in toTajtzin Dios, pero
desde ijkuak opéj in tlaltikpak, nochi tlan Yej okichij
techititia nik in Yej onkaj iwan kipia weyi ipoder katlej
mach keman tlamis. Iwan por yonik mach akaj welis kijtos
nik mach kimati kox onkaj Dios.
\v 21 Iwan maski yejwan okimatiaj nik onkaj Dios, mach
okitlakitakej kej Dios iwan nion mach okitlasojkamachilijkej.
Sino yej opéj kiyejyekoaj miek tlamantle katlej mach
itlaj ipatij, iwan oyoltlakuawakej porke mach ok itlaj
welij kimomakaj kuenta.
\v 22 Yejwan momachiliaj wel ixtlamatkej, pero omokuepkej
okachi mach ajsitok intlalnamikilis.
\v 23 Porke ayakmo okiweyikixtijkej in Dios katlej kipia
imawisotlanex iwan mach keman miki. Yejwan yej opéj
kinweyikixtiaj in santojtin katlej tlachiwaltin. Yonmej
santojtin motaj ken tlakaj katlej mikij, o noso motaj
ken totomej, ken koamej o noso ken yolkamej katlej kipiaj
nawi inmikxiwan.
\p
\v 24 Por yonik, kiné, Dios okinkaj ma kichiwakan tlan
amo chipawak tlan kineki inmelewilis. Iwan ijkón se
iwan oksé opéj kichiwaj ika intlalnakayo miek tlamantle
biero iwan tepinatij.
\v 25 Porke okikajkej se lado katlej melawak tlan onkaj
de Dios, iwan opéj okachi kineltokaj in tlakajkayawalistle.
Iwan opéj kitlakitaj iwan kiweyikixtiaj tlan Dios okichij,
iwan amo yen Dios katlej moneki se kiweyikixtis nochipa.
Ijkón ma yeto.
\p
\v 26 Por yonik, kiné, Dios okinkaj ma kichiwakan tlan
amo kuale tlan kineki inmelewilis iwan tepinatij, iwan
asta insiwawan okikajkej de kochiskej inwan inmokichwan,
iwan yej opéj kochtinemij inwan insiwaikniwan.
\v 27 Ijkón noijki in tlakaj, okikajkej de kochiskej
inwan insiwawan iwan yej opéj totoniaj porke kinekij
kochiskej inwan inmokichikniwan (intlakaikniwan). Entre
tlakaj kichiwaj ika intlalnakayo tlan mach kuale katlej
tepinatij, iwan por yonik yejwan kiresibiroaj tlajyowilistle
ipan intlalnakayo ijkón ken moneki.
\p
\v 28 Komo yejwan mach okinekej okichijkej kuenta in
Dios, por yonik in Dios okinkaj. Okinkawilij kiné ma
kiyejyekokan tlan mach kuale, iwan por yonik opéj kichiwaj
tlan mach omonekia kichiwanij.
\v 29 Omomachtijkej kichiwaj miek tlamantle mach kuale.
Momekatiaj, mach kualtin, kinekij kipiaskej nochi tlan
kitaj, kitechiwiliaj tlan amo kuale. Tentokej de nexikolistle,
temiktijkej, tenonotzkej, tekajkayajkej iwan kiyejyekoaj
tlan mach kuale de oksekimej.
\v 30 Noijki tepojpojkej, kikokoliaj in Dios, moweyinekij
iwan mach tetlakitakej. Moweyimatij, kinextiaj itlaj
tlamantle mach kuale iwan mach kintlakitaj intajwan.
\v 31 Mach kimatij tlakakij, mach kichiwaj tlan kijtaj,
mach tetlasojtlakej, mach kimatij tetlapojpolwiaj, iwan
mach teiknomatkej.
\v 32 Yejwan kuale kimatij nik in Dios kijta ke nochtin
akinmej kichiwaj nochi yon tlamantle kipia de mikiskej
iktlanke (ik tlami). Pero maski ijkón, yejwan kiseguiroaj
kichiwaj, iwan asta kiwelitaj noijki nijkuak oksekimej
no ijkón kichiwaj.
\c 2
\s Dios kinmixkomakas (kintzonmanas) in tlaltikpaktlakaj ken moneki
\p
\v 1 Ijkón kiné, tej mach welis titlapojpolwilos tla
tikijta nik in yonmej tlakaj tlajtlakolejkej porke biero
kichiwaj. Dios mach mitzitas akin tej katlej ijkón tikijta.
Nijkuak tej tikijta ke akaj oksé tlakatl kipia tlajtlakole,
tej monewian timotlajtlakolmaka, porke tej noijki tikchiwa
ken yej.
\v 2 Tikmatij nik san yen Dios welis kijtos ke katlej
kichiwaj yon tlamantle biero kipiaj tlajtlakole. Iwan
noijki tikmatij nik in Dios kichiwas ken moneki nijkuak
kintlajyowiltis.
\v 3 Pero tla tej tikijta kej katlej kichiwaj yon tlamantle
biero kipiaj tlajtlakole, iwan tej no ijkón tikchiwa,
¿kox tikyejyekoa nik in Dios amo mitztlajyowiltis?
\v 4 Tej mach tikneki tikmomakas kuenta nik in Dios
mach san niman mitztlajyowiltia nijkuak titlajtlakoa
porke mitztlasojtla. Yej mitzxikoa ika itlasojtlalis
katlej mach keman tlami iwan kineki mitzpalewis para
ximoyolkuepa.
\v 5 Pero tej, komo wel tiyoltlakuawak iwan mach tikneki
timoyolkuepas inawak Dios, tej monewian tikmotetemilia
ikualanilis in Dios. Yon ikualanilis mopan witz itech
nekáj tonale nijkuak in Dios kiteititis ikualanilis,
iwan kinmixkomakas (kintzonmanas) nochtin in tlakaj
ken moneki.
\v 6 Ijkuakón Dios kitlaxtlawis kada se tlakatl según
tlan okichij.
\v 7 Dios kinmakas yankuik nemilistle katlej mach keman
tlamis, akinmej amo mosotlawaskej de kichijtoskej tlan
kuale iwan kitemojtoskej kenik welis kajsiskej inmawisotlanex
itech ilwikak, iwan noijki kenik welis kipiaskej tetlakitalistle
inawak Dios, iwan kenik welis kipiaskej yankuik nemilistle
katlej mach keman tlamis.
\v 8 Pero Dios kintlajyowiltis ika ikualanilis akinmej
moweyinekij iwan mach kichiwaj itlamachtil in Dios katlej
melawak, sino yej kichiwaj tlan amo kuale.
\v 9 Kipiaskej tlajyowilistle iwan tekokojkayotl nochtin
akinmej kichiwaj tlan amo kuale. Achtoj ijkón panoskej
in judiojtin iwan noijki ijkón panoskej katlej mach
judiojtin.
\v 10 Pero nochtin akinmej kichiwaj tlan kuale, kipiaskej
inmawisotlanex, kipiaskej tetlakitalistle iwan kipiaskej
yolosewilistle. Achtoj kipiaskej in judiojtin iwan noijki
kipiaskej katlej mach judiojtin.
\p
\v 11 Porke Dios mach kintlasojtla san sekimej iwan
oksekimej amo.
\v 12 Por yonik, nochtin in tlakaj katlej tlajtlakoaj
iwan amo kixmatij in tlanawatile de Moisés, in Dios kintlajtlakoltis,
maski amo ma kixmatikan yon tlanawatile. Iwan nochtin
katlej tlajtlakoaj maski kixmatij in tlanawatile de
Moisés, in Dios noijki kinmixkomakas (kintzonmanas) ijkón
ken kijta yon tlanawatile.
\v 13 Porke Dios mach kinmita in tlakaj nik ya chipawakej
de nochi intlajtlakol san kimatij itlanawatil, sino tla
melawak kichiwaj nochi tlan kijta itlanawatil.
\v 14 Pero katlej mach judiojtin katlej mach kipiaj
itlanawatil in Moisés, ipan inyolo kimatij tlan kuale
iwan tlan amo kuale, kej yeskia onkaj se tlanawatile
ipan inyolo katlej kinnawatia tlanon moneki kichiwaskej.
\v 15 Por yen tlan kichiwaj, kiteititiaj nik kipiaj yon
tlanawatile ipan inyolo katlej kinmilwia tlan kuale
iwan tlan amo kuale. Porke itech intlalnamikilis kimatij
nijkuak kichiwaj itlaj tlan kuale o noso tlan amo kuale.
\v 16 Ijkón tlapanos itech nekáj tonale nijkuak in Dios
kijtos akinmej tlajtlakolejkej, porke Yej kuale kimati
tlan kipiaj ipan inyolo de nochtin in tlakaj. In kuale
tlajtole katlej temakixtia katlej nej niktematiltia,
kijta nik in Dios kitlalis in Jesucristo para ma kinmixkomaka
nochtin in tlakaj.
\s In judiojtin iwan itlanawatil in Moisés
\p
\v 17 Tla tej tijudío iwan timokitzkia itech itlanawatil
in Moisés, iwan timoweyineki porke tikijta kuale tikaj
inawak Dios.
\v 18 Iwan kuale tikmati tlan Dios kineki xikchiwa, porke
timomachtia itlanawatil in Moisés iwan tikmati katlij
yen okachi kuale katlej moneki tikchiwas.
\v 19 Timomachilia nik tiwelis tikinyekanas katlej mach
kixmatij Dios katlej nemij kej yeskia mach tlachiaj.
Noijki timomachilia nik tiwelis tikintlawilis katlej
nemij ijtik tlatleyualotl.
\v 20 Tikyejyekoa nik tiwelis tikinmachtis katlej mach
itlaj kimatij, iwan nik welis tikinmachtis noijki katlej
katej kej konemej inawak Dios. Tikyejyekoa nik melajka
tikmati iwan noijki tikmati tlan melawak porke tikixmati
itlanawatil in Moisés.
\v 21 Ijkón kiné, tla tej tikinmachtia oksekimej tlanon
moneki kichiwaskej tlan kijta itlajtol in Dios, tonses
¿tlanik in tej amo tikchiwa tlan tikinmachtia? Tla tej
titetlapowia amo se ma tlachteki, tonses, ¿tlanik in tej
titlachteki?
\v 22 Tla tej tikijta amo se ma momekati, ¿tlanik in
tej timomekatia? Tla tej tikinkokolia in santojtin, ¿tlanik
kiné tikalaki tiopan iwan tikintlachtekia?
\v 23 Tej timoweyineki porke tikixmati itlanawatil in
Moisés, pero tikixpanawia in Dios porke mach tikchiwa
tlan kijta yon tlanawatile.
\v 24 Por yonik kijta in tiotlajkuilole: “Katlej mach
judiojtin tlapoaj biero de Dios por yen namejwan anjudiojtin
namotlajtlakol.”
\p
\v 25 Melawak, se tlakatl katlej mosirkunsidaroa iwan
kichiwa tlan kijta itlanawatil in Moisés, tonses yon
sirkunsisión kipalewia. Pero tla amo kichiwa tlan kijta
itlanawatil in Moisés, tonses yon kej yeskia mach yeni
sirkunsidado.
\v 26 Pero akin amo kajki sirkunsidado iwan kichiwa
tlan kijta yon tlanawatile, in toTajtzin Dios kita kej
yeskia sirkunsidado.
\v 27 Akin amo kajki sirkunsidado itech itlalnakayo,
pero kichiwa tlan kijta yon tlanawatile, kintlajtlakoltis
nekatej katlej mach kichiwaj tlan kijta yon tlanawatile
maski kimatij iwan maski katej sirkunsidadojtin.
\v 28 Se tlakatl mach melawak judío san por tlakati
itech se familia de judiojtin, iwan mach melawak kajki
sirkunsidado san por monakayoteki itech itlalnakayo.
\v 29 Katlej melawak judío yen katlej melawak kineki
kitlakitas in Dios ika nochi iyolo. Iwan katlej melawak
sirkunsisión yen nijkuak in Dios kisirkunsidaroa se
tlakatl ipan iyolo, porke ika nochi iyolo pewa kitemoa
in Dios iwan mach por yen tlanawatile kitoktia pewa
ma kitemo. Tonses, tla se tlakatl ijkón yetos, in Dios
kitas nik yolkuale, maski in tlakaj amo ijkón ma kitakan.
\c 3
\p
\v 1 Tonses, ¿tlanon kipalewia se tlakatl ma yeto judío?
¿O noso tlanon kipalewia tla se judío kajki sirkunsidado?
\v 2 Melawak, in judiojtin kinpalewia miek. Achtoj nikneki
namechilwis nik in Dios okinmakak in judiojtin itlanawatil
para ma kixmatikan iwan ma kichiwakan tlan kijta.
\v 3 Iwan melawak nik sekimej de yejwan mach kichiwaj
tlan kijta itlanawatil in Dios. Tonses, ¿kox in Dios
ayakmo kichiwas tlan yokijtoj?
\v 4 ¡Pues kichiwas! Porke Dios nochipa kijta tlan melawak,
maski nochtin in tlakaj ma yekan tekajkayajkej. Ken
kijta in tiotlajkuilole:
\q Tejwatzin Dios, tikmatij nik melawak nochi tlan tikijta,
\q iwan mach akaj welis kijtos nik mach melawak nijkuak
akaj kinekis mitzistlakawis de itlaj.
\p
\v 5 Pero tla tejwan nijkuak titlajtlakoaj tikteititiaj
nik in Dios Yej sa tekitl yolchipawak, ¿tlan welis tikijtoskej
kiné? ¿Tikijtoskej nik in Dios mach ijki tlan kichiwa
porke techtlajyowiltia? (Nitlapoa ken tlapoaj in tlakaj.)
\v 6 ¡Pues amo! Porke tla Dios mach ijki tlan kichiwani,
tonses, ¿kenik welis kinmixkomakas in tlaltikpaktlakaj?
\p
\v 7 Akaj tlakatl welis kiyejyekos ke nijkuak yej tlakajkayawa
ika yon kipalewia in Dios para miekej ma kiweyikixtikan,
iwan noijki kijtos ke ika itlakajkayawalis kiteititia
nik san yen Dios weli kichiwa tlan kijta. Iwan noijki
kimolwis, tonses, ¿tlanik in Dios ok kineki kitlajtlakoltis?
\v 8 Noijki akaj tlakatl welis kiyejyekos iwan kijtos:
“Ma tikchiwakan okachi tlan mach kuale para ma mota
nik in Dios Yej sa tekitl kuale”. Miekej techpojpoaj
iwan kijtaj nik in tejwan ijkón titlamachtijtinemij.
Pero Dios kintlajyowiltis ken moneki katlej ijkón kiyejyekoaj.
\s Tinochtin titlajtlakolejkej
\p
\v 9 ¿Tlan welis tikijtoskej kiné? ¿Tejwan katlej tijudiojtin
okachi tikualemej ke katlej mach judiojtin? ¡Pues amo!
Porke yotamechmatiltijkej nik in judiojtin iwan katlej
mach judiojtin, tinochtin tikpiaj tlajtlakole.
\v 10 In tiotlajkuilole kijta:
\q Mach onkaj nion se tlakatl katlej amo ma yeto tlajtlakolej,
mach onkaj nion se.
\q
\v 11 Mach onkaj nion se katlej ma kimomaka kuenta tlanon
Dios kineki,
\q mach onkaj nion se katlej melawak kitemoa Dios.
\q
\v 12 Nochtin okitzkijkej oksé ojtle mach kuale, iwan nochi
tlan kichiwaj mach itlaj ipatij.
\q Mach onkaj nion se tlakatl katlej ma kichiwa tlan kuale,
mach onkaj nion se.
\q
\v 13 Nijkuak kitlapoaj inten, tlapoaj biero ken nijkuak
kitlapoaj se mikkakuyoktle.
\q Ika innenepil tlakajkayajtinemij.
\q Ika intlajtol tekojkokoaj ken nijkuak se koatl tekua
iwan tekokoa.
\q
\v 14 Itech inten tentokej de tlawikaltilistle iwan yolchichikatlajtoaj
katlej ika tekojkokoaj.
\q
\v 15 Sa kinektokej temiktiskej.
\q
\v 16 San kanik yejwan yawij, tekojkokoaj iwan kikajtewaj
neyolkokole.
\q
\v 17 Mach kixmatij in yolosewilistle para yeskej ika
kuale.
\q
\v 18 Nion mach siera kelnamikij kox moneki kiimakasiskej
in toTajtzin Dios.
\p
\v 19 Tikmatij nik nochi yon tlan kijta itlanawatil
in Moisés, kinmilwijtok yejwan katlej kitlaliaj inyolo
itech yon tlanawatile. Mach ok akaj welis kijtos nik
mach tlajtlakolej nijkuak in Dios kixkomakas (kitzonmanas),
nijkuak nochtin in tlaltikpaktlakaj kitemakaskej kuenta
inawak Dios.
\v 20 Por yonik, mach akaj tlakatl welis yetos chipawak
de nochi itlajtlakol san por kichiwas tlan kijta in
tlanawatile. Porke Dios otechmakak yon tlanawatile para
ma tikmatikan nik titlajtlakolejkej.
\s Nijkuak titlanetokaj inawak Dios Yej techchipawa de nochi totlajtlakol
\p
\v 21 Pero axan, ma tiktlalikan se lado itlanawatil in
Moisés, axan Dios techititia kenik welis tieskej inawak
ya tichipawakej de nochi totlajtlakol, iwan mach por
se kichiwas tlan kijta itlanawatil in Moisés. Iwan yon
tiwelij tikmomakaj kuenta nijkuak tikleroaj tlan kijta
itlanawatil in Moisés iwan tlan okijkuilojkej in profetajtin.
\v 22 Nijkuak titlaneltokaj inawak Jesucristo ijkuakón
Dios ya techita tichipawakej de nochi totlajtlakol.
Dios ijkón kinmita nochtin akinmej kineltokaj, iwan amo
san sekimej iwan oksekimej amo.
\v 23 Porke nochtin tlakaj otlajtlakojkej iwan okimopolilijkej
de yaskej inawak Dios katlej kipia imawisotlanex.
\v 24 Pero Dios ika iteiknotlamachilis kinmita ya chipawakej
de nochi intlajtlakol nochtin akinmej kineltokaj. Yon
se tlatliokolile katlej Dios techmaka, iwan mach moneki
itlaj tiktlaxtlawaskej porke in Cristo Jesús Yej yokitlaxtlaj
para techmakixtis de totlajtlakol.
\v 25 Dios okichij in Cristo ma kinoki ieso nijkuak
omikke itech krus para ijkón welis kintlapojpolwis in
tlakaj de intlajtlakol nijkuak kineltokaskej. Dios okitemakak
in Jesucristo ma kimiktikan por tejwan, iwan ijkón Dios
techititia nik in Yej nochipa kichiwa tlan kuale. Porke
ya wejkawitl itech nekatej tonaltin Yej mach okinchiwilij
kuenta intlajtlakol in tlakaj porke sa tekitl okinxikoaya.
\v 26 Iwan axan itech yinmej tonaltin, noijki in Dios
techititia nik in Yej kichiwa tlan kuale, porke nijkuak
titlaneltokaj inawak Jesús, in Yej techita ya tichipawakej
de nochi totlajtlakol.
\p
\v 27 Tonses, mach akaj welis moweyinekis iwan kijtos
yochipawik de nochi itlajtlakol inawak Dios san por
kichiwa miek tlamantle kuale para ika momakixtis. Amo,
mach ijkón, mach por se kichiwas yon tlamantle. Sino
Dios techita tichipawakej de nochi totlajtlakol porke
titlaneltokaj inawak Jesucristo.
\v 28 Tikmomakaj kuenta kiné, nik in Dios techita ya
tichipawakej de nochi totlajtlakol nijkuak titlaneltokaj
inawak Jesucristo, iwan amo por se kichiwas tlan kijta
itlanawatil in Moisés.
\p
\v 29 ¿In toTajtzin Dios kox san yen judiojtin inDios?
¡Pues amo! Katlej mach judiojtin yejwan noijki no inDios.
\v 30 Porke onkaj san se Dios. Iwan Yej kinmitas kej
ya chipawakej de nochi intlajtlakol, nochtin in tlakaj
katlej tlaneltokaskej inawak Jesucristo, iwan mach kitas
kox judío o noso amo judío, kox sirkunsidado o noso amo
sirkunsidado.
\v 31 Tonses, tla Dios techmakixtia porke titlaneltokaj
inawak Jesucristo, ¿kox welis tikijtoskej kiné nik mach
ok moneki tiktlakitaskej itlanawatil in Moisés? Amo,
mach ijkón. Sino tikteititiaj nik in yon tlanawatile
sa tekitl moneki.
\c 4
\s Dios okitak in Abraham ya chipawak de nochi itlajtlakol por otlaneltokak
\p
\v 1 ¿Tlan welis tikijtoskej kiné de yen Abraham katlej
ya wejkawitl toweyitaj? ¿Tlan okichij para owelik ochipawik
de nochi itlajtlakol inawak Dios?
\v 2 Tla Dios kitani in Abraham kej chipawak de nochi
itlajtlakol san por okichij itlaj tlamantle kuale, tonses
Abraham kipiani tlan ika moweyinekini, pero amo inawak
Dios.
\v 3 Porke in tiotlajkuilole kijta: “Abraham okineltokak
tlan Dios okilwij, iwan por yonik in Dios okitak kej
se tlakatl chipawak kej yeskia mach keman otlajtlakoj.”
\v 4 Nijkuak se tlakatl tekipanoa, itlaxtlawil katlej
kimakaj mach kijtosneki kitliokoliaj, sino kijtosneki
yon itlaxtlawil yokimotlanilij.
\v 5 Pero tla se tlakatl mach kichiwa itlaj tlamantle
kuale para welis ika momakixtis, pero kineltoka in toTajtzin
Dios katlej kintlapojpolwia in tlajtlakolejkej, tonses
in Dios kita kej chipawak de nochi itlajtlakol porke
kineltoka.
\v 6 In rey David noijki okijtoj nik ma paki in tlakatl
katlej kineltoka tlan Dios kilwia, porke in Dios kita
ya chipawak de nochi itlajtlakol maski amo okichij itlaj
tlan kuale.
\v 7 In David okijtoj:
\q Ma pakikan in tlakaj katlej Dios kintlapojpolwia de
nochi intlajtlakol iwan mach ok kinmita kej yeskia ok
tlajtlakolejkej.
\q
\v 8 Ma pakikan in tlakaj nijkuak in Dios mach ok keman
kelnamikis de intlajtlakol.
\p
\v 9 ¿Yon pakilistle welis kipiaskej san yen judiojtin
katlej katej sirkunsidadojtin? ¡Amo! Yon pakilistle
noijki welis kipiaskej katlej mach judiojtin katlej
mach katej sirkunsidadojtin. Porke yonamechilwij tlan
kijta in tiotlajkuilole: “Abraham okineltokak tlan Dios
okilwij, iwan por yonik in Dios okitak kej se tlakatl
chipawak kej yeskia mach keman otlajtlakoj.”
\v 10 ¿Keman ijkón okitak in Dios in Abraham? ¿Nijkuak
yomosirkunsidaroj o noso ijkuak ayamo omosirkunsidaroaya?
Amo, Dios ijkón okitak in Abraham nijkuak ayamo omosirkunsidaroaya.
\v 11 Iwan satepan Dios okilwij in Abraham ma mosirkunsidaro
itech itlakayo para ma mota nik in Dios ya kita kej
chipawak de nochi itlajtlakol porke okineltokak nik
mochiwas tlan Dios okilwij. Iwan por yonik Abraham omochij
kej tetaj de nochtin tlakaj katlej kineltokaj tlan Dios
kinmilwia, maski amo ma yekan sirkunsidadojtin, porke
Dios ya kinmita yejwan noijki ya chipawakej de nochi
intlajtlakol.
\v 12 Abraham yej noijki kajki kej tetaj de nekatej
katlej katej sirkunsidadojtin itech intlakayo. Kijtosneki
amo san por katej sirkunsidadojtin itech intlakayo, sino
porke noijki kipiaj intlaneltokalis ijkón ken Abraham
okipixke nijkuak ayamo omosirkunsidaroaya itech itlakayo.
\s Dios okimakak in Abraham tlan okilwij porke okineltokak
\p
\v 13 Dios okilwij in Abraham iwan iwejkaixwiwan nik
kinmaxkatis nochi in tlaltikpak, pero Dios ijkón okilwij
in Abraham amo por okichij tlan kijta itlanawatil in
Moisés, sino porke okineltokak tlan Dios okilwij iwan
por yonik in Dios okitak kej yochipawik de itlajtlakol.
\v 14 Pero yejwan mach okimoaxkatijkej in tlaltikpak
por okichijkej tlan kijta itlanawatil in Moisés. Porke
tla ijkón yeni, tonses san tekitl tikneltokaj tlan Dios
kijta, iwan tlan Dios okilwij in Abraham yeskia mach
itlaj ipatij.
\v 15 Porke akinmej kipiaj yon tlanawatile de Moisés
iwan amo kichiwaj tlan kijta, in Dios kintlajyowiltia
ika ikualanilis. Pero tla amo onkaj itlaj tlanawatile
para se kichiwas, tonses mach akaj welis kitlajtlakoltiskej
porke mach onkaj itlaj tlanawatile.
\p
\v 16 Dios otechilwij tlanon tikresibiroskej tla titlaneltokaskej
inawak iwan san techtliokolis. Dios okinekia ke nochtin
iwejkaixwiwan in Abraham ma kiresibirokan tlan Yej yokinkakitij.
Dios amo okinekia ma kiresibirokan san yejwan katlej
okichiwayaj in tlanawatile de Moisés. Porke nochtin
in tlakaj judiojtin o noso amo judiojtin, nochtin katlej
kineltokaj nik melawak tlamochiwas tlan Dios kijta ijkón
ken Abraham okineltokak, tonses nochtin yonmej katej
kej yeskia iwejkaixwiwan Abraham.
\v 17 Ken kijta in tiotlajkuilole: “Onimitztalij titetaj
de miekej tlaltikpaktlakaj.” Abraham okineltokak tlan
Dios okilwij. Iwan inawak Dios, Abraham kajki kej tetaj
de nochtin katlej tlaneltokaj ken yej otlaneltokak.
Abraham otlaneltokak inawak Dios katlej weli kinyolitia
in mikkamej, iwan kichiwa ma yeto tlan ayamo onkaj.
\p
\v 18 Por yonik, nijkuak in Dios okilwij in Abraham:
“Sa tekitl miekej tikinpias mowejkaixwiwan”, ijkuakón
Abraham okineltokak, maski mach ok okichiaya kipiani
ikone. Iwan ijkón Abraham omochij kej tetaj de miekej
tlaltikpaktlakaj.
\v 19 Abraham mach okipoloj itlaneltokalis, maski okipiaya
kej se siento xiwitl. Yej iwan isiwa Sara okimomakayaj
kuenta nik mach ok yenij wejkawitl, iwan yoyekaj sa tekitl
ya tetajtzitzintin iwan mach ok okichiayaj kipiaskej
inkone, porke in Sara mach semi owelia okipiaya ikone.
\v 20 Abraham mach okimolwij kox melawak o noso amo
de tlan Dios okilwij kimakas, sino yej okachi omochikaj
itech itlaneltokalis iwan okiweyikixtij in toTajtzin
Dios.
\v 21 Abraham kuale okimatia nik in Dios kipia poder
para welis kichiwas tlan kijta.
\v 22 Por yonik in Dios okitak in Abraham kej yochipawik
de itlajtlakol porke okineltokak.
\p
\v 23 Nijkuak in tiotlajkuilole kijta nik in Dios okitak
in Abraham kej yochipawik de itlajtlakol por okineltokak,
mach tlapoa san de yen Abraham,
\v 24 sino noijki tlapoa de yen tejwan. Porke tejwan
noijki in Dios techita kej tichipawakej de totlajtlakol
nijkuak tikneltokaj tlan techilwia in toTajtzin Dios
katlej okiyolitij in toSeñor Jesús nijkuak omikke.
\v 25 Dios okitemakak in toSeñor Jesús para ma miki
por totlajtlakol. Iwan satepan omoyolkuik, para ijkón
Dios ya weli techita kej tichipawakej de totlajtlakol
nijkuak titlaneltokaj inawak.
\c 5
\s Tlan pewa tikitaj nijkuak Dios techita ya tichipawakej de totlajtlakol
\p
\v 1 Tonses ijkón, in toTajtzin Dios ya techita tichipawakej
de totlajtlakol porke tikneltokaj tlan Yej techilwia.
Axan, mach ok tikatej kej tiikontraswan in Dios, sino
in toSeñor Jesucristo Yej okichij ma timotlapojpolwikan
iwan Dios.
\v 2 Iwan por yen Cristo iwan porke tikneltokaj tlan
techilwia, axan tiwelij timijkuaniaj inawak Dios ika
iteiknotlamachilis maski mach totech opowia timijkuanianij
inawak, iwan axan ya timoyekketokej itech iteiknotlamachilis.
Iwan tipakij porke tikchiaj tikpiaskej parte itech imawisotlanex
in Dios.
\v 3 Iwan amo san yon, sino noijki tipakij nijkuak titlajyowiaj,
porke tikmatij nik in tlajyowilistle techpalewia para
tikxikoaj nochi tlan tipanoaj.
\v 4 Iwan nijkuak tikxikoaj in tlajyowilistle, tikitzkiaj
chikawalistle ipan toyolo. Iwan nijkuak yotikitzkijkej
chikawalistle ipan toyolo, tonses, okachi kuale tikmomakaj
kuenta de tlan tikchiaj inawak Dios.
\v 5 Iwan kuale tikmatij nik mach techpinatis tlan tikchiaj
inawak Dios. Porke Dios yotechtemitij ipan toyolo ika
itlasojtlalis iwan okichij ika iEspíritu Santo katlej
otechmakak.
\p
\v 6 Nijkuak tejwan mach otiweliaj otimomakixtiayaj
tonewian, oajsik tonale katlej Dios okitlalij iwan Cristo
omikiko por tejwan porke otiekaj titlajtlakolejkej.
\v 7 Mach akaj welis motekawilis ma kimiktikan ipatka
oksé tlakatl katlej kuale. Pero welis akaj tlakatl mixewis
mikis ipatka de se katlej sa tekitl kuale tlakatl.
\v 8 Pero Dios techititia nik sa tekitl techtlasojtla,
porke Cristo omikke por tejwan maski otiekaj ok titlajtlakolejkej.
\v 9 Iwan axan, tla Dios ya techita tichipawakej de totlajtlakol
por yen ieso in Cristo katlej okinokij nijkuak omikke,
tonses, axan okachi kuale tikmatij nik in Cristo techmakixtis
de itech ikualanilis in Dios.
\v 10 Iwan tla ijkuak otiekaj tiikontraswan in Dios,
iKone omikke por tejwan para okichij ayakmo ma tiekan
tiikontraswan, tonses axan okachi welis timomakixtiskej
porke axan tikpiaj inemilis in Cristo ipan toyolo, iwan
porke mach ok tiikontraswan in Dios.
\v 11 Iwan amo san yon, sino noijki tipakij inawak Dios
por tlan okichij in toSeñor Jesucristo por tejwan, iwan
por yen toSeñor Jesucristo axan yotimotlapojpolwijkej
iwan toTajtzin Dios.
\s Adán iwan Cristo
\p
\v 12 Nijkuak opéj in tlaltikpak Adán otlajtlakoj iwan
ijkón nik opéj in tlajtlakole ixko yin tlaltikpak, iwan
por yon tlajtlakole opéj in mikilistle. Iwan por yonik,
axan nochtin mikij porke nochtin tlajtlakolchiwaj.
\v 13 Nijkuak ayamo oyeka itlanawatil in Moisés, yoyeka
in tlajtlakole ixko yin tlaltikpak, maski in Dios mach
okintlajtlakoltij in tlakaj nijkuak ayamo oyeka yon
tlanawatile.
\v 14 Pero, nochtin in tlakaj katlej oyekaj nijkuak oyeka
in Adán iwan asta ijkuak oyeka in Moisés, nochtin omikkej
porke nochtin otlajtlakojkej, maski mach otlajtlakojkej
ken otlajtlakoj in Adán. Iwan Adán omotaya ken katlej
satepan owalaj.
\p
\v 15 Pero itlatliokolil in toTajtzin Dios mach welis
moparejaros iwan itlajtlakol in Adán. Porke por itlajtlakol
in Adán, axan nochtin mikij. Pero in tlatliokolile katlej
Dios techmaka itech Jesucristo por yen weyi iteiknotlamachilis
katlej kipia towan, yon okachi techpalewia iwan yon se
kuale para miekej tlakaj.
\v 16 Itlajtlakol in Adán mach welis moparejaros iwan
itlatliokolil in Dios katlej techmaka. San por se tlajtlakole,
owalaj in tlajyowilistle de Dios intech in tlakaj. Pero
maski in tlaltikpaktlakaj okichijkej miek tlajtlakole,
axan inawak Jesucristo in toTajtzin Dios techmaka se
tlatliokolile katlej kichiwa ma techita in Dios ya tichipawakej
de totlajtlakol.
\v 17 San por itlajtlakol se tlakatl itoka Adán, okichij
nochtin in tlakaj ma mikikan. Pero katlej yokiresibirojkej
in weyi iteiknotlamachilis in Dios, axan kipiaskej yankuik
nemilistle porke Dios ya kinmita nik ya chipawakej de
intlajtlakol, por yen tlan okichij se tlakatl itoka Jesucristo.
\p
\v 18 Iwan ijkón, san por se tlakatl itoka Adán otlajtlakoj
iwan otechwalkuilij tlajyowilistle de Dios, axan noijki
san por se tlakatl itoka Jesucristo katlej okichij tlan
melajka kuale, axan nochtin in tlakaj welis yeskej chipawakej
de intlajtlakol para welis kipiaskej yankuik nemilistle.
\v 19 Adán mach okichij tlan Dios okilwij iwan por yonik
nochtin omokuepkej tlajtlakolejkej. Pero Jesucristo
okichij tlan Dios okilwij iwan por yonik miekej tlakaj
yeskej chipawakej de intlajtlakol.
\p
\v 20 Dios otechmakak itlanawatil in Moisés para ma
tikmatikan nik sa tekitl miek tlajtlakole tikpiaj. Iwan
nijkuak tikmatij nik miek tlajtlakole tikpiaj, tonses
noijki tikmatij nik iteiknotlamachilis in Dios katlej
techmaka, yon sa tekitl okachi weyi iwan amo ken totlajtlakol.
\v 21 Iwan ijkón ken tlajtlakole okichij ma timikikan,
axan noijki iteiknotlamachilis in Dios kichiwa ma tiekan
tichipawakej de totlajtlakol iwan ma tikpiakan yankuik
nemilistle katlej mach keman tlamis, por yen tlan toSeñor
Jesucristo okichij por tejwan.
\c 6
\s Yotimikkej itech tlajtlakole pero tiyolitokej inawak Cristo
\p
\v 1 ¿Tlan welis tikijtoskej kiné? ¿Kox moneki okachi
ma titlajtlakokan para Dios okachi ma kipia weyi iteiknotlamachilis
towan?
\v 2 ¡Pues amo! In tlajtlakole mach ok weli technawatia
porke in tlajtlakole ya techita kej yotimikkej. Iwan
tla tejwan yotimikkej, tonses ¿kenik ok welis titlajtlakojtoskej
okachi?
\v 3 ¿Amo ankimatij nik tinochtin katlej timokuateekiaj
timochiwaj sa se iwan Cristo Jesús, iwan noijki timochiwaj
sa se itech imikilis?
\v 4 Nijkuak tejwan otimokuateekijkej, yon kej yeskia
otimikkej iwan otechtlaltokakej iwan Cristo. Iwan ijkón
ken Cristo omoyolkuik satepan de omikke ika weyi ipoder
in toPapan Dios, tejwan noijki otechyolitij para ma tikpiakan
yankuik nemilistle inawak.
\p
\v 5 Porke tla tejwan timochiwaj sa se iwan Cristo nijkuak
omikke, tonses axan tejwan noijki Iwan timochiwaj sa
se itech yankuik nemilistle ken Yej kipia porke Yej
omoyolkuik.
\v 6 Tikmatij nik in tonemilis katlej achtoj otikpiayaj
okimajmasoltijkej itech krus iwan Cristo, iwan ijkón
totlalnakayo katlej tlajtlakolej opojpoliwik. Para ijkón
in tlajtlakole ayakmo ma technawati ma tikchiwakan tlan
amo kuale.
\v 7 Porke akin yomikke, kijtosneki ayakmo kajki ilpitok
itech tlajtlakole.
\v 8 Tla tejwan yotimikkej iwan Cristo, noijki tikneltokaj
nik tiyolitoskej iwan Yej.
\v 9 Porke tikmatij nik in Cristo omoyolkuik satepan
de omikke iwan mach ok keman welis mikis porke in mikilistle
mach welis itlaj kitoktis.
\v 10 Cristo omikke para okitlanke in tlajtlakole para
iktlanke (ik tlami). Pero satepan Yej omoyolkuik, iwan
axan Yej yolitok para kichiwas tlan Dios kineki.
\v 11 Ijkón noijki namejwan, xikmatikan nik in tlajtlakole
mach ok welis amechnawatis porke in tlajtlakole amechita
kej ya anmikkej. Pero noijki xikmatikan nik namejwan
ya ankipiaj nemilistle iwan Cristo Jesús in toSeñor
para ankichiwaskej tlan Dios kineki.
\p
\v 12 Por yonik, amo ximotekawilikan ma amechnawati in
tlajtlakole ipan namotlalnakayo katlej mikis. Ayakmo
ma amechtokti xikchiwakan tlan amo kuale katlej kineki
kichiwas namotlalnakayo.
\v 13 Amo xiktemaktikan (xiktemaktilikan) namotlalnakayo
ipan tlajtlakole para ankichiwaskej tlan amo kuale.
Sino ximotemaktikan inawak Dios kej yeskia ya anmikkaj
iwan axan ya anmoyolkuikej oksemi. Xiktemaktikan namotlalnakayo
inawak Dios para welis ankichiwaskej tlan kuale.
\v 14 In tlajtlakole mach ok welis amechnawatis xikchiwakan
tlan amo kuale, porke mach ok technawatia itlanawatil
in Moisés, sino axan tejwan ya timokitzkiaj itech iteiknotlamachilis
in Dios.
\s Mach ok tikatej kej titlanamaktin para tiktekipanoskej in tlajtlakole
\p
\v 15 ¿Kenamij kiné? ¿Titlajtlakoskej okachi porke mach
ok tikatej itech itlanawatil in Moisés sino ya tikatej
itech iteiknotlamachilis in Dios? ¡Pues amo!
\v 16 Namejwan kuale ankimatij tla anmotemaktiskej (onmotemaktiliskej)
kej antlanamaktin inawak se amoteko para ankichiwaskej
tlan amechnawatis, tonses namejwan anyeskej kej antlanamaktin
de yon amoteko iwan ankichiwaskej nochi tlan amechnawatis.
Tla namejwan ankichiwaj tlan amechnawatia in tlajtlakole,
tonses yen mochiwaj kej amoteko katlej amechwalkuilia
mikilistle. Pero tla namejwan ankichiwaj tlan Dios amechnawatia,
tonses Yej mochiwa kej amoteko para ankichiwaskej tlan
kuale.
\v 17 Maski namejwan achtoj anmotemaktijkaj (onmotemaktilijkaj)
kej antlanamaktin para ankichiwayaj tlan oamechnawatiaya
in tlajtlakole, axan tiktlasojkamachiliaj in toTajtzin
Dios porke namejwan ankineltokakej ika nochi amoyolo
in tiotlamachtile katlej oamechmachtijkej.
\v 18 Dios oamechtotonke de itech tlajtlakole katlej
oyeka amoteko, iwan axan namejwan anmochijkej kej antlanamaktin
para nochipa welis ankichiwaskej tlan kuale.
\v 19 Namejwan namechtlapowia ijkín, ika yin ejemplo
de se tlakatl katlej kajki kej tlanamaktle, para okachi
kuale xikmomakakan kuenta. Achtoj namejwan anyekaj kej
antlanamaktin porke ankitemaktijkej (onkitemaktilijkej)
namotlalnakayo para ankichiwayaj miek tlamantle mach
kuale iwan biero. Iwan yon oamechtoktiaya okachi xitlajtlakokan,
pero axan namejwan xiktemakakan namotlalnakayo para
ma kichiwa tlan kuale iwan para xichipawkanemikan inawak
Dios.
\p
\v 20 Nijkuak amejwan ok oamechnawatiaya in tlajtlakole
kej antlanamaktin, namejwan mach anmotekipachoayaj para
ankichiwaskej tlan kuale.
\v 21 Iwan ¿tlan ankitlankej por ankichijkej tlan achtoj
ankichiwayaj iwan katlej axan ika anpinawaj? Porke nochi
yon tlamantle kiwalkui mikilistle.
\v 22 Pero axan, mach ok ankatej kej antlanamaktin para
ankitekipanoskej in tlajtlakole, sino namejwan axan ankatej
kej antlanamaktin para ankitekipanoskej in toTajtzin
Dios. Iwan yon kemaj amechpalewis para welis anchipawkanemiskej,
iwan satepan ankipiaskej in yankuik nemilistle katlej
mach keman tlamis.
\v 23 Porke in tlajtlakole tetlaxtlawia ika mikilistle,
pero Dios techmaka se tlatliokolile nijkuak tikneltokaj
in toSeñor Jesucristo, iwan yon tlatliokolile yen yankuik
nemilistle katlej mach keman tlamis.
\c 7
\s Ejemplo de se katlej tlanamiktile
\p
\v 1 Nokniwan, namejwan katlej kuale ankixmatij in tlanawatile,
kuale ankimatij nik in yon tlanawatile kipia poder itech
se tlakatl nijkuak ok onkaj.
\v 2 Ma tiktlalikan se ejemplo, se siwatl katlej kipia
iokich iwan mientras ok onkaj iokich, in tlanawatile
kijta nik kipia de yetos iwan iokich. Pero tla miki
iokich, tonses ya momakixtia de itech yon tlanawatile
katlej kijta kipia yetos iwan iokich.
\v 3 Por yonik, tla yon siwatl mosetilis iwan oksé tlakatl
iwan ok onkaj iokich, kijtosneki kimomekatia. Pero tla
miki iokich, tonses ya momakixtia de itech yon tlanawatile,
iwan welis monamiktis iwan oksé tlakatl iwan ijkón mach
kijtosneki kimomekatia.
\p
\v 4 Ijkón noijki namejwan, nokniwan, xikmomakakan kuenta
nik ya anmikkej itech krus iwan Cristo. Axan namejwan
ya anmakiskej de itech in tlanawatile katlej achtoj
oamechnawatiaya. Iwan ijkón ken nijkuak se siwatl miki
iokich iwan monamiktia iwan oksé, namejwan axan noijki
ya anmosetilijkej iwan oksé tlakatl katlej omoyolkuik
satepan de omikke. Para ijkón se welis kichiwas tlan
kuale ken Dios kineki.
\v 5 Achtoj in tlajtlakole otechnawatiaya iwan nijkuak
otikmatkej tlan kijta in tlanawatile, in totlalnakayo
okachi okinekia ma titlajtlakokan iwan yon tlajtlakole
san otechwalkuilij mikilistle.
\v 6 Pero axan yotimakiskej de imak yon tlanawatile
porke ya tikatej kej yeskia yotimikkej, iwan ayakmo technawatijtok.
Iwan axan ya tiwelij tiktekipanoaj in toTajtzin Dios
ika se yankuik nemilistle katlej techmaka in Espíritu
Santo, iwan mach ok moneki tiktekipanoskej in toTajtzin
Dios ken achtoj nijkuak otikchiwayaj miek tlamantle
katlej otechnawatiaya in tlanawatile ma tikchiwakan.
\s Tlajtlakole katlej kajki ipan toyolo
\p
\v 7 ¿Tlanon welis tikijtoskej kiné? ¿Tikijtoskej nik
in tlanawatile de Moisés mach kuale? ¡Amo, mach ijkón
ma tikyejyekokan! Tla amo por yen tlanawatile, nej mach
nikmatini tlanon tlajtlakole. Nej mach nikmatini kox
tlajtlakole tla nikixelewis itlaj tlamantle, tla yon
tlanawatile amo kijtoani: “Amo xikixelewi tlan iaxka
oksé tlakatl.”
\v 8 In tlanawatile onechmatiltij nik onikchijtoka miek
tlajtlakole, porke onikixelewiaya miek tlamantle. Porke
tla amo yeni in yon tlanawatile, mach nikmatini kox nitlajtlakojtok.
\v 9 Achtoj nijkuak ayamo onikmatia tlanon kijta in
tlanawatile, nej onikyejyekoaya kuale nikaj, pero nijkuak
onikmatke tlan kijta in tlanawatile, ijkuakón onikmomakak
kuenta nik nitlajtlakolej iwan nik nimikini iktlanke
(ik tlami).
\v 10 Iwan onikmatke nik in yon tlanawatile katlej omonekia
nechmakani nemilistle, yej onechtlajtlakoltij para ma
nimiki.
\v 11 In tlajtlakole katlej notech oyeka okitekipanoltij
in tlanawatile iwan ika onechkajkayaj iwan ika onechtlajtlakoltij
para ma nimiki.
\p
\v 12 Tikitaj kiné, nik in yon tlanawatile chipawak, melawak,
iwan kuale.
\v 13 Tonses, ¿kox kijtosneki in yon tlanawatile katlej
kuale onechtoktij ma nimiki? ¡Pues amo! Sino itech yon
tlanawatile katlej kuale, in tlajtlakole onechtoktij
ma nimiki, iwan ijkón in tlajtlakole omoteititij nik
ya nele tlajtlakole. Iwan ijkón noijki in tlanawatile
okiteititij nik in tlajtlakole sa tekitl mach kuale.
\p
\v 14 Tikmatij nik in tlanawatile melajka kuale porke
walajtok de Espíritu Santo. Pero nej komo nitlaltikpaktlakatl
nikchiwa tlan amo kuale iwan nikaj ya momati (kej yeskia)
onimonamakak para nikchiwas tlajtlakole.
\v 15 Mach nikmomaka kuenta tlan nikchiwa, porke mach
nikchiwa tlan nikneki, sino nikchiwa tlan nej nikkokolia.
\v 16 Iwan tla nikchiwa tlan amo kuale tlan amo nikneki
nikchiwas, tonses nikmomaka kuenta nik in tlanawatile
sa tekitl kuale.
\v 17 Tonses, mach ok yen nej nikchiwa tlan amo kuale,
sino yen tlajtlakole katlej kajki notech.
\v 18 Nikmati nik itech notlalnakayo mach onkaj itlaj
kuale, porke maski sa tekitl nikneki nikchiwas tlan kuale,
mach niweli nikchiwa.
\v 19 Mach nikchiwa tlan kuale tlan nikneki, sino ok
nikchiwa tlan amo kuale katlej mach nikneki.
\v 20 Iwan tla nikchiwa tlan nej amo nikneki nikchiwas,
tonses mach ok nej nikchiwa, sino yen tlajtlakole katlej
kajki notech.
\p
\v 21 Nikmomaka kuenta kiné, maski nej nikneki nikchiwas
tlan kuale, mach niweli por yen tlajtlakole katlej kajki
notech.
\v 22 Ipan noyolo nikwelita nikchiwas tlan kijta itlanawatil
in Dios.
\v 23 Iwan maski notlalnamikilis kineki kichiwas tlan
kijta itlanawatil in Dios, itech notlalnakayo onkaj oksé
tlanawatile katlej noijki kineki nechnawatis. Kijtosneki
in tlanawatile de yen tlajtlakole katlej kikokolia itlanawatil
in Dios. Yen yon itlanawatil in tlajtlakole katlej kajki
notech iwan nechpixtok kej yeskia niilpitok.
\p
\v 24 ¡Nilástima! ¿Akin welis nechmakixtis de itech
yin notlalnakayo katlej nechwika ijtik mikilistle?
\v 25 Nikmati nik yen Jesucristo nechmakixtis. Por yonik
niktlasojkamachilia in toTajtzin Dios.
\p Tonses, ika notlalnamikilis nikchiwa tlan kijta itlanawatil
in toTajtzin Dios, pero notlalnakayo kineki kichiwas
tlan kijta itlanawatil in tlajtlakole.
\c 8
\s Nemilistle katlej techmaka in Espíritu Santo
\p
\v 1 Axan kiné, in toTajtzin Dios mach ok kintlajyowiltis
katlej setitokej san se iwan Cristo Jesús, katlej kichiwaj
ken kineki in Espíritu Santo iwan amo ken kineki intlalnakayo.
\v 2 Porke ipoder in Espíritu Santo katlej kitemaka
yankuik nemilistle oamechmakixtij de itech ipoder in
tlajtlakole iwan de itech ipoder in mikilistle. Iwan
tejwan tikpiaj ipoder in Espíritu Santo porke tisetitokej
san se iwan Cristo Jesús.
\v 3 Itlanawatil in Moisés okipoloj ichikawalis porke
totlalnakayo mach owelik okichij tlan kijta. Por yonik
tlan amo owelik okichij in tlanawatile de Moisés, in
Dios Yej owelik okichij, nijkuak okualtitlanke iKone
katlej omochij tlakatl iwan okipixke itlalnakayo noijki
ken tejwan totlalnakayo katlej ika titlajtlakoaj. Dios
okitemakak iKone kej se tlamanale para ijkón ma kitlaxtlawa
totlajtlakol ika itlalnakayo, iwan ijkón noijki okipojpolilij
ipoder in tlajtlakole.
\v 4 Dios ijkón okichij para tejwan ma tiwelikan ma
tikchiwakan tlan kijta itlanawatil. Porke axan mach
ok tikchiwaj ken kineki in totlalnakayo, sino tikchiwaj
ken kineki in Espíritu Santo.
\p
\v 5 Katlej kichijtinemij tlan kineki intlalnakayo, san
yen yon kiyejyekojtokej kichiwaskej. Pero katlej kichiwaj
tlan kineki in Espíritu Santo, tonses yen yon kiyejyekoaj
kichiwaskej.
\v 6 Akin kitemoa kichiwas tlan kineki itlalnakayo, moixpolos.
Pero akin kitemoa kichiwas tlan kineki in Espíritu Santo,
kipias nemilistle iwan yolosewilistle.
\v 7 Porke akinmej kitemoaj kichiwaskej tlan kineki
intlalnakayo, mokuepaj ikontraswan Dios. Mach kinekij
kichiwaskej tlan kijta itlanawatil in Dios iwan nion
mach welij kichiwaj tlan kijta.
\v 8 Iwan akinmej kitemoaj kichiwaskej tlan kineki intlalnakayo,
mach welis kipaktiskej in Dios.
\p
\v 9 Pero namejwan mach ok amechyekana namotlalnakayo,
sino namejwan ya amechyekana in Espíritu Santo, porke
iEspíritu in toTajtzin Dios ya kajki ipan namoyolo.
Akin amo kipia iEspíritu in Cristo, kijtosneki mach iaxka
in Cristo.
\v 10 Tla Cristo kajki ipan namoyolo, tonses namoanima
kipia nemilistle porke Dios amechita ya anchipawakej
de amotlajtlakol, maski mikis namotlalnakayo por yen
tlajtlakole.
\v 11 Iwan tla iEspíritu in toTajtzin Dios katlej okiyolitij
in Jesús nijkuak omikke, kajki ipan namoyolo, tonses in
Espíritu katlej okiyolitij in Cristo nijkuak omikke,
noijki kiyolitis namotlalnakayo katlej miki, ika yen
Espíritu katlej kajki ipan namoyolo.
\p
\v 12 Por yonik nokniwan, moneki tikchiwaskej ken kineki
in Espíritu Santo, iwan amo ken kineki in totlalnakayo.
\v 13 Porke tla namejwan ankichiwaskej tlan kineki namotlalnakayo,
anmoixpoloskej. Pero tla ika ipoder in Espíritu Santo
ankipojpoloaj in tlajtlakole katlej ankichiwaj ika namotlalnakayo,
tonses ankipiaskej nemilistle.
\p
\v 14 Nochtin katlej kimokawiliaj ma kinyekana iEspíritu
in toTajtzin Dios, yonmej tekonewan de Dios.
\v 15 In Espíritu Santo katlej Dios oamechmakak mach
amechtoktia xiekan kej antlanamaktin para oksemi sa
ximomawtijtokan ken nijkuak anyekaj inawak se amoteko.
Sino Dios oamechmakak in Espíritu Santo katlej kichiwa
namejwan xiekan ya antekonewan de Dios. Iwan ika Espíritu
Santo tejwan ya tiwelij tikilwiaj in toTajtzin Dios:
“¡Abba!”, kijtosneki “¡Papan!”
\v 16 In Espíritu Santo techilwia ipan toyolo nik tejwan
ya tiikonewan Dios.
\v 17 Iwan tla tejwan tiikonewan Dios, tonses Dios techaxkatis
tlan yokijtoj techmakas. Dios techmakas san sekan iwan
Cristo tlan Yej yokijtoj. Tla titlajyowiskej iwan Cristo,
tonses satepan noijki Iwan tieskej itech imawisotlanex.
\p
\v 18 Kuale nikmati nik in tlajyowilistle katlej axan
tipanoaj, yon mach itlaj, tla tikparejaroskej iwan tomawisotlanex
kuakualtzin katlej tikpiaskej satepan.
\v 19 Porke nochi tlan Dios okichij itech ilwikak iwan
ixko yin tlaltikpak, sa kichixtokej iwan kinekiskiaj
ma ajsitiwetzi in tonale nijkuak in Dios kinnextis ikonewan.
\v 20 Nochi tlan Dios okichij oijtlakawik, pero mach
por yej inewian okinekke oijtlakawik, sino porke Dios
ijkón okimonekiltij. Pero maski oijtlakawik, ok kichia
\v 21 momakixtis se tonale nijkuak nochi tlan onkaj
ixko yin tlaltikpak mach ok keman ijtlakawis. Iwan ijkuakón
momakixtis ijkón ken momakixtiskej ikonewan Dios katlej
kipiaskej inmawisotlanex kuakualtzin.
\v 22 Tikmatij nik asta axan nochi tlan Dios okichij
tena iwan tlajyowia ken nijkuak se siwatl kitlakatilia
ikone.
\v 23 Iwan mach tlajyowia san yen tlan Dios okichij,
sino noijki tejwan titlajyowiaj katlej ya tikpiaj in
Espíritu Santo katlej Dios yotechmakak achi de tlan
satepan techmakas. Tejwan noijki sa tekitl titlajyowiaj,
iwan tikchiaj ma ajsitiwetzi in tonale nijkuak in Dios
techresibiros kej tiikonewan. Kijtosneki nijkuak Dios
techmakas oksé totlalnakayo yankuik, katlej mach ok keman
mokokos iwan nion mach ok keman mikis.
\v 24 Dios otechmakixtij nijkuak otitlaneltokakej inawak
Cristo porke tikchiaj mochiwas tlan Dios okijtoj. Pero
tla ya tikpianij nochi tlan yotechkakitij, tonses mach
ok monekiskia tikchianij okachi.
\v 25 Pero tejwan tikchixtokej tlan ayamo tikitaj, iwan
por yonik moneki tikxikoskej nochi tlan tipanoaj, iwan
ma tikchiakan ika pakilistle tlan satepan tikpiaskej.
\p
\v 26 Noijki in Espíritu Santo techpalewia ika tlan
tejwan mach tiwelij, porke tejwan mach tiwelij timotiotzajtziliaj
ken moneki. Pero inewian in Espíritu Santo kitlatlawtia
in toTajtzin Dios por tejwan, kej yeskia tena nik kitlatlawtia
tlan tejwan mach tiwelij tiktenkixtiaj ika totlajtol.
\v 27 Iwan Dios, katlej kixmati toyolo, kimati tlan kineki
kijtos in Espíritu Santo, porke in Espíritu Santo kitlatlawtia
por yen ikonewan Dios ijkón ken Dios kineki.
\s Tejwan titlatlanij por yen Cristo
\p
\v 28 Iwan tejwan katlej tiktlasojtlaj in Dios tikmatij
nik nochi tlan welis tipanoskej, kox kuale o noso amo
kuale, nochi yon tlamantle yetos se kuale para tejwan.
Tejwan katlej Dios otechnotzke para totech ma mochiwa
tlan Yej yokiyejyekoj kichiwas desde achtoj.
\v 29 Dios yokimatia akinmej kineltokaskej in Cristo
desde ijkuak ayamo oyeka in tlaltikpak. Iwan Dios okimonekiltij
ma tiekan ken iKone, iwan iKone ma yeto yen tetiachka
iwan tejwan ma tiekan tiikniwan katlej satepan tewaj.
\v 30 Dios okimonekiltij ma tiekan ken iKone, iwan por
yonik otechnotzke. Iwan tejwan katlej Dios otechnnotzke,
in Dios ya techita tichipawakej de totlajtlakol. Iwan
tejwan katlej Dios ya techita tichipawakej de totlajtlakol,
noijki otechmakak tomawisotlanex kuakualtzin ken Yej
kipia.
\p
\v 31 ¿Tlanon welis tikijtoskej kiné de nochi yin tlamantle?
Tla Dios towan kajki, ¿akin welis itlaj techtoktis?
\v 32 Dios mach oyáj tzotzokatl nijkuak okitemakak iKone
por tejwan, sino okitemakak ma miki por tinochtin tejwan.
Tonses, ¿tlanik amo ma techmaka san sekan iwan iKone
nochi in tlamantle tlan techilwia?
\v 33 ¿Akin welis techistlakawis tejwan katlej Dios
yotechpejpenke? Mach akaj, porke Dios Yej techita ya
tichipawakej de totlajtlakol.
\v 34 ¿Akin welis techtlajtlakoltis? Mach akaj, porke
Cristo Yej omikke por tejwan iwan omoyolkuik oksemi,
iwan noijki kajki ik iyekma in toTajtzin Dios kan motlatlawtijtok
por tejwan.
\v 35 Tonses, ¿akin welis techxelos de itech itlasojtlalis
in Cristo? Mach akaj. Nion tlajyowilistle, nion tekokojkayotl,
nion nijkuak techtlatlalochtiaj, nion apistle, nion nijkuak
amo tikpiaj totzotzol, nion nijkuak se kaj itenko mikilistle,
o noso nijkuak kinekij techmiktiskej.
\v 36 Ken kijta in tiotlajkuilole:
\q Por yen tejwatzin, in tlakaj nochipa kinekij techmiktiskej.
\q Techitaj kej tiichkamej iwan kinekij techmiktiskej.
\m
\v 37 Pero itech nochi in yin tlamantle, Cristo techmaka
chikawalistle para ma titlatlanikan itech nochi tlan
tipanoaj porke Yej techtlasojtla.
\v 38 Por yonik, kuale nikmati nik mach onkaj nion itlaj
tlan welis techxelos de itech itlasojtlalis in Dios.
Nion mikilistle, nion nemilistle, nion angelestin, nion
ejekamej mach kualtin katlej kipiaj tekiwajkayotl, nion
ejekamej katlej kipiaj poder, nion tlan axan onkaj iwan
nion tlan satepan yetos,
\v 39 nion tlan onkaj ajkopan iwan nion tlan onkaj tlatlampa,
nion itlaj oksé tlamantle katlej Dios okichij. Mach
itlaj welis techxelos de itech itlasojtlalis in Dios
porke tisetitokej san se iwan Cristo Jesús katlej toSeñor.
\c 9
\s Dios okinpejpenke in judiojtin
\p
\v 1 Melawak tlan nikijta porke nitlaneltoka inawak
Cristo. Mach nitlakajkayawa. In Espíritu Santo nechmatiltia
ipan notlalnamikilis nik melawak tlan nikijta.
\v 2 Sa tekitl nimoyolkokoa iwan mach keman tlami noneyolkokol.
\v 3 Iwan asta nej nonewian niknekiskia ma nimoxelo
de inawak Cristo maski amo ma nimomakixti, tla ijkón
weliskia nikinpalewiani ma momakixtikan nokniwan judiojtin,
katlej san se estle tikpiaj.
\v 4 In judiojtin yejwan tepilwan de yen ya wejkawitl
toweyitaj Israel, iwan Dios okinresibiroj in judiojtin
kej ikonewan. Dios oyeka inwan ika imawisotlanex, iwan
okichij se akuerdo inwan. Noijki okinmakak in tlanawatile
de Moisés, iwan okinmilwij kenik moneki kiweyikixtiskej,
iwan noijki okinmilwij tlanon kinmakas satepan.
\v 5 Yonmej judiojtin walajtokej nelwatl de yen ya wejkawitl
toweyitajwan. Cristo noijki walajtok nelwatl de itech
yonmej toweyitajwan nijkuak owalaj otlakatiko ixko yin
tlaltikpak. Iwan Cristo yen Dios katlej tlanawatia itech
nochi tlamantle, iwan katlej moneki ma tikweyikixtikan
nochipa. Ijkón ma yeto.
\p
\v 6 Pero amo kijtosneki ke mach omochij tlan Dios okijtoj,
porke mach nochtin katlej walajtokej nelwatl de Israel
melawak tekonewan de Dios.
\v 7 Iwan noijki mach nochtin katlej walajtokej nelwatl
de Abraham melawak tekonewan de Abraham. Porke Dios
ijkín okilwij in Abraham: “San yen ipilwan in mokone
Isaac, yejwan yeskej mowejkaixwiwan.”
\v 8 Kijtosneki, mach nochtin katlej iwejkaixwiwan in
Abraham melawak tekonewan de Dios, sino san yejwan katlej
tlakatij ijkón ken Dios okilwij in Abraham.
\v 9 Porke Dios ijkín okilwij in Abraham: “Nian se xiwitl,
niwitz, iwan Sara kitlakatilis se ikone.”
\p
\v 10 Iwan amo san yen yon. Noijki in Rebeca katlej
okinpixke omen ikonewan san se intaj okipixkej, yen ya
wejkawitl toweyitaj Isaac.
\v 11 Antes de tlakatinij in yonmej omen ikonewan koatzitzintin,
iwan nijkuak ayamo okichiwayaj tlan kuale o noso tlan
amo kuale, ijkuakón Dios okipejpenke se de yejwan para
kichiwas tlan Yej yokiyejyekoj desde ya wejkawitl. Tikmomakaj
kuenta kiné nik yen Dios kimati akin kipejpenas, iwan
akin kipejpena, kipejpena amo por okichij itlaj tlamantle
kuale, sino porke Yej kipejpena san akin Yej kineki.
\v 12 Dios okilwij in Rebeca: “Katlej tetiachka kitekipanos
in xokoyotl.”
\v 13 In tiotlajkuilole noijki kijta: “Oniktlasojtlak
in Jacob, pero mach oniktlasojtlak in Esaú.”
\p
\v 14 Tonses, ¿tlanon tikijtoskej? ¿Kox welis tikijtoskej
nik in Dios mach ijki tlan kichiwa? Amo, mach ijkón ma
tikyejyekokan.
\v 15 Porke Dios okilwij in Moisés: “Niktlasojtlas akin
Nej niknekis niktlasojtlas, iwan nikiknomatis akin Nej
niknekis nikiknomatis.”
\v 16 Tonses, mach por se kinekis o noso por se mochijchikawas
para Dios ma kiknomati. Sino yen Dios kimati akin kineki
kiknomatis.
\v 17 Itech in tiotlajkuilole ijkuilitok kan Dios okilwij
in Faraón in rey de Egipto: “Onimitztlalij xieto tirey
para motech nikteititis nopoder, iwan para ma kimatikan
itech nochi in tlaltikpak akin Nej.”
\v 18 Tonses, Dios kitlasojtla akin Yej kineki kitlasojtlas,
iwan noijki kiyoltlakuawa akin Yej kineki kiyoltlakuawas.
\p
\v 19 Pero welis akaj tlakatl ijkín nechilwis: “Tla
ijkón, tonses, ¿tlanik in Dios ok kintlajtlakoltia in
tlakaj por tlan kichiwaj? Porke mach akaj welis kitzakuilis
tlan Dios kineki kichiwas.”
\v 20 Yon tlakatl nej nikneki ijkín niknankilis: ¿Akin
tej para xikixnamiki in Dios? ¿Kox welis in xoktzin
kilwis in tlakatl katlej okichij: “¿tlanik ijkín nik
otinechchij?”
\v 21 Porke in xoktzinchij yej kichiwa tlan yej kineki
kichiwas ika tlale (barro). Yej welis kichiwas ika tlale
se xoktzin kuakualtzin iwan noijki welis kichiwas se
xoktzin mach kuakualtzin.
\p
\v 22 ToTajtzin Dios noijki kichiwa ken Yej kineki, ijkón
ken xoktzinchij noijki kichiwa ken yej kineki. Porke
Yej okinekia kinmititis ikualanilis iwan ipoder, iwan
por yonik in Yej sa tekitl kinxikojtok in tlakaj katlej
mach kualtin katlej intech powi para kintlajyowiltis.
\v 23 Ijkón okichij para kiteititis nik sa tekitl kipia
miek tlamantle kuale para kinmakas nochtin katlej Yej
yotechpejpenke ika iteiknotlamachilis. Iwan desde ijkuak
ayamo oyeka in tlaltikpak, in Dios yotechyektlalij para
ma tikpiakan nemilistle katlej mach keman tlamis itech
imawisotlanex.
\v 24 Dios mach otechnotzke san yen tejwan katlej tijudiojtin
para ma tiekan iaxkawan, sino noijki okinnotzke katlej
mach judiojtin.
\v 25 Ijkón ken kijta itlajkuilol in profeta Oseas, kan
kijta:
\q Katlej amo oyekaj nokonewan, nikinnotzas nokonewan.
\q Katlej amo onikintlasojtlaya, axan nikintlasojtlas.
\q
\v 26 Iwan kan achtoj onikinmilwij: “Namejwan mach annokonewan”,
\q axan ompa kinmilwiskej tekonewan de Dios katlej melawak
yolitok.
\m
\v 27 Isaías noijki okijtoj de yen judiojtin: “Maski
katlej walajtokej nelwatl de Israel sa tekitl miekej
ken xale katlej onkaj itempan atl, san sekimej de yejwan
momakixtiskej.
\v 28 Porke in toSeñor kichiwas ixko yin tlaltikpak
san totokatijkak tlan kijta itech itlajtol.”
\v 29 Ijkón ken ya wejkawitl okijtoj in Isaías:
\q Tla in toSeñor katlej kinyekana in soldadojtin de ilwikak
amo techinkawiliani sekimej de towejkaixwiwan,
\q yetoskia yotechixpoloj ijkón ken okinmixpoloj in tlakaj
de weyikan de Sodoma iwan de Gomorra.
\s In judiojtin mach kineltokaj in kuale tlajtole katlej temakixtia
\p
\v 30 ¿Tlan kijtosneki kiné nochi yin tlamantle? Kijtosneki
ke katlej mach judiojtin katlej mach okitemoayaj kenik
yeskej chipawakej de intlajtlakol, yejwan ochipawikej
de intlajtlakol porke okineltokakej itlajtol in Dios.
\v 31 Pero in judiojtin, katlej okinekiaj yeskej chipawakej
de intlajtlakol iwan okichiwayaj tlan kijta itlanawatil
in Moisés, mach owelikej omochipajkej de intlajtlakol.
\v 32 ¿Tlanik mach owelikej? Yejwan mach owelikej porke
mach okitlalijkej intlaneltokalis itech itlajtol in
Cristo para ijkón Dios welini kinmitani ya chipawakej
de intlajtlakol. Sino yejwan okinekiaj yeskej chipawakej
de intlajtlakol san por okichiwayaj itlaj tlamantle
kuale. Por yonik in yejwan omotepotlamijkej ika se tetl
katlej okachi weyikistok (weyititok), yon tetl yen Cristo.
\v 33 Ken kijta in tiotlajkuilole:
\q Xikitakan, Nej niktlalia itech weyikan de Sión se tlakatl
kej se tetl katlej ika motepotlamiskej, se tetl katlej
kintoktis ma wetzikan.
\q Iwan akin tlaneltokas inawak yon tetl mach semi mopinatis.
\c 10
\p
\v 1 Nokniwan, ika nochi noyolo niktlatlawtia in toTajtzin
Dios ma kinmakixti in judiojtin.
\v 2 Nej nikmati nik in yejwan sa tekitl kitemoaj in
Dios, pero mach ijkón ken Dios kineki ma kitemokan para
kuale ma kixmatikan.
\v 3 Porke in judiojtin mach kimomakaj kuenta kenik
in Dios weli techita tichipawakej de totlajtlakol. Sino
yejwan inselti kinekij mochipawaskej de intlajtlakol,
iwan amo ken Dios kineki. Mach kinekij kineltokaskej
tlan Dios yokijtoj de kenik kipia de yetos para welis
techitas tichipawakej de totlajtlakol.
\v 4 Porke itech Cristo omochiwako nochi tlan kijta
itlanawatil in Moisés. Iwan ijkón nochtin akinmej tlaneltokaj
inawak Cristo, in Dios kinmita ya chipawakej de intlajtlakol.
\p
\v 5 Moisés ya wejkawitl okijkuiloj kenik in Dios welis
kinmitas in tlakaj ya chipawakej de intlajtlakol tla
se kichiwas tlan kijta itlanawatil in Moisés. Ijkín
kijta: “Akin kichiwas nochi tlan kijta itlanawatil in
Moisés, kipias nemilistle katlej mach keman tlamis.”
\v 6 Pero Dios techita ya tichipawakej de totlajtlakol
porke titlaneltokaj inawak Cristo, porke in tiotlajkuilole
ijkín kijta: “Amo xikmolwi ipan moyolo, ¿kenik welis
nitlejkos ilwikak?” Yon kijtosneki kineki kiwaltemowis
in Cristo ixko yin tlaltikpak para ma kipalewi.
\v 7 Nion amo xikmolwi: “¿Kenik welis nitemos itlampa
tlale kan katej in mikkamej?” Yon kijtosneki kineki
kikixtiti in Cristo kan katej in mikkamej para ma moyolkui
iwan ma kipalewi.
\v 8 In tiotlajkuilole noijki kijta: “Itlajtol in Dios
kajki serka de tej, ijkón ken tikpia serka moten iwan
moyolo.” Yen yin kuale tlajtole katlej temakixtia katlej
tejwan tiktematiltiaj iwan katlej moneki kineltokaskej.
\v 9 Iwan tla ika moten tikijta nik in Jesús yen moSeñor,
iwan ipan moyolo tikneltoka nik in Dios okiyolitij satepan
de omikke, in Dios mitzmakixtis.
\v 10 Porke nijkuak se tlakatl tlaneltoka ika nochi
iyolo, tonses in Dios kita ya chipawak de itlajtlakol.
Iwan tla ika iten kitematiltia nik tlaneltoka inawak
Cristo, in Dios kimakixtis.
\p
\v 11 In tiotlajkuilole kijta: “Nochtin akinmej tlaneltokaskej
inawak Cristo mach keman mopinatiskej.”
\v 12 In tiotlajkuilole kijta “nochtin”, kijtosneki san
akin, porke in Dios mach techita kox tijudiojtin o noso
amo tijudiojtin. Porke tinochtin tikpiaj san se toSeñor.
Iwan Yej kipia miek tlamantle kuale para ika kinpalewis
nochtin akinmej kitlajtlaniliskej ma kinpalewi.
\v 13 Porke in tiotlajkuilole kijta: “Nochtin akinmej
kitlajtlaniliskej in toSeñor ma kintlapojpolwi, in toSeñor
kintlapojpolwis iwan kinmakixtis.”
\v 14 Pero, ¿kenik kitlajtlaniliskej in Señor ma kintlapojpolwi
tla ayamo kineltokaj? ¿Iwan kenik kineltokaskej tla
amo keman kikakij de Yej? ¿Iwan kenik kikakiskej tla
amakaj kintlapowia de Yej?
\v 15 ¿Iwan kenik tetlapowiskej de Yej tla amakaj kintitlani
ma tetlapowikan? Ken kijta in tiotlajkuilole: “Sa tekitl
kuakualtzin nijkuak ejkoj in tlakaj katlej kitematiltiaj
in kuale tlajtole katlej temakixtia, de kenik welis tieskej
kuale iwan Dios.”
\p
\v 16 Pero mach nochtin kineltokaj katlej kikakij in
kuale tlajtole katlej temakixtia. Ken kijta in Isaías:
“Señor, ¿akin yokineltokak in tlamachtile katlej tiktematiltiaj?”
\v 17 Por yonik, para se tlakatl tlaneltokas moneki kikakis
itlajtol in Dios. Iwan welis kikakis itlajtol in Dios
tla kitlapowiskej de itlajtol in Cristo.
\p
\v 18 Pero axan nej nitlajtlani: ¿Kox amo keman okikakej
in judiojtin in kuale tlajtole katlej temakixtia? ¡Kenik
amo ma kikakikan! Yejwan yokikakej. In tiotlajkuilole
kijta:
\q Intlajtol yomokakke itech nochi in tlaltikpak.
\q In kuale tlajtole katlej temakixtia yokitematiltijkej
ik nian nepa asta kan ontlantok in tlaltikpak.
\m
\v 19 Noijki nitlajtlani: ¿Amo okimomakakej kuenta in
judiojtin nik in Dios kinkawani se lado tla amo kineltokanij
in Cristo? Melawak, in judiojtin yejwan okimomakakej
kuenta. Por yonik in Moisés ya wejkawitl okijtoj:
\q Nikchiwas ma moxikokan in tlakaj de nopueblo por tlan
nikchiwas inwan tlakaj katlej mach de nopueblo katlej
mach onechixmatiaj.
\q Iwan katlej axan mach kimatij akin Nej, satepan kimatiskej
iwan por yonik in judiojtin kualaniskej.
\m
\v 20 Satepan, Isaías okijtoj ika ixchikawalistle:
\q Katlej achtoj mach onechtemoayaj, axan yonechajsikej.
\q Iwan katlej mach otlajtlaniaj por Nej, axan yonikinmonextilij.
\m
\v 21 Iwan Isaías noijki okijtoj de yen judiojtin: “Nochipa
nikinnotok in judiojtin katlej mach tetlakitakej iwan
mach kimatij tlakakij.”
\c 11
\s Omokajkej sa kanaj keskimej judiojtin katlej tlaneltokaj inawak Dios
\p
\v 1 Axan nej nitlajtlani: ¿Kox in Dios yokinkaj in
judiojtin katlej katej kej ikonewan? ¡Pues amo! Porke
nej noijki nijudío. Niwalajtok nelwatl de yen ya wejkawitl
toweyitaj Abraham iwan noijki niwalajtok de familia
de Benjamín katlej oyáj iwejkaixwi in Abraham.
\v 2 Dios mach kinkawa in judiojtin katlej okinpejpenke
desde ya wejkawitl nijkuak ayamo oyeka in tlaltikpak.
¿Amo ankimatij tlan kijta in tiotlajkuilole de yen Elías,
nijkuak omotiotzajtzilij iwan okinmistlakawij in judiojtin?
Okijtoj:
\v 3 “Señor, yokinmiktijkej motekipanojkawan katlej profetajtin,
iwan yokinxitinijkej moartalwan. Sa yen nej onimokaj,
iwan noijki kinekij nechmiktiskej.”
\v 4 Pero Dios okinankilij: “Nikinpia ok chikome mil
tlakaj katlej mach keman motlankuaketzaj inawak in dios
Baal.”
\v 5 Noijki ijkón axan. Katej kanaj keskimej judiojtin
katlej kineltokaj in Dios itlajtol, katlej Dios yokinpejpenke
ma yekan iaxkawan porke kipia sa tekitl weyi iteiknotlamachilis
por yejwan.
\v 6 Iwan tla Dios okinpejpenke sekimej judiojtin porke
kipia weyi iteiknotlamachilis por yejwan, tonses kijtosneki
mach okinpejpenke porke okichijkej itlaj kuale. Tla
Dios kinpejpenani porke okichijkej itlaj kuale, tonses
iteiknotlamachilis in Dios mach yeskia teiknotlamachilistle
sino yeskia kej se tlaxtlawile.
\p
\v 7 Ijkón kiné, in judiojtin mach okajsikej kenik yeskej
chipawakej de intlajtlakol maski okitemoayaj sa tekitl.
Pero katlej Dios okinpejpenke yejwan kemaj okajsikej
kenik yeskej chipawakej de intlajtlakol. Pero oksekimej
judiojtin oyoltlakuawakej.
\v 8 Ijkón ken kijta in tiotlajkuilole: “Dios okintlalnamikilispoloj.
Okintzakuilij inmixtololo para amo ma tlachiakan, iwan
okintzakuilij innakas para amo ma tlakakikan, iwan asta
axan ijkón nik katej.”
\v 9 In David noijki kijta:
\q Ma mopolokan ika inmilwitlakual iwan ma kintokti ma
kiyejyekokan nik katej kuale inawak Dios.
\q Ma mopolokan, iwan Dios ma kintlajyowilti.
\q
\v 10 Ma ixkokoxkatikan (ixpachitikan) iwan mach ok ma
tlachiakan, iwan nochipa ma panotokan tlajyowilistle.
\s Kenik in Dios kinmakixtia katlej mach judiojtin
\p
\v 11 Axan nej nitlajtlani: ¿In judiojtin owetzkej para
ma mopolokan iktlanke (ik tlami)? ¡Amo! Sino in judiojtin
komo amo okitlakitakej in Dios, axan katlej amo judiojtin
welij momakixtiaj. Para ijkón in judiojtin ma moxikokan
iwan ma kinekikan ma momakixtikan ken katlej mach judiojtin.
\v 12 Tonses, in judiojtin komo amo okitlakitakej in
Dios, axan nochtin in tlaltikpaktlakaj welis kipiaskej
tlatiochiwalistle katlej Dios kitemaka. Tlan yejwan
okimopolilijkej, tonses katlej mach judiojtin yejwan
okimokawijkej. Iwan tikmomakaj kuenta, nik yetos sa tekitl
weyi tlatiochiwalistle para nochtin tlaltikpaktlakaj
nijkuak nochtin in judiojtin tlaneltokaskej inawak Cristo.
\p
\v 13 Axan, nej nikpia se tlajtole katlej nikneki namechilwis
namejwan katlej mach anjudiojtin. Dios onechtlalij para
ma namechmatilti yin tlajtole namejwan katlej mach anjudiojtin.
Iwan yin tekitl katlej Dios onechmakak nikita nik sa
tekitl kipia miek ipatij.
\v 14 Nikneki ke sekimej judiojtin ken nej, ma moxikokan
por tlan Dios kichiwa innawak katlej mach judiojtin.
Para ijkón yejwan noijki ma kinekikan ma momakixtikan
ken katlej mach judiojtin.
\v 15 Tla ijkuak in judiojtin okikajkej in Dios, ijkuakón
in Dios okinkawilij in tlakaj katlej mach judiojtin
ma motlapojpolwikan iwan Yej, tonses tikmatij ke nijkuak
in judiojtin kineltokaskej in Cristo, yetos kej yeskia
yomikkaj iwan oksemi yomoyolkuikej.
\v 16 Tla akaj tlakatl kixpantilia in Dios in yakinika
pan katlej okikixtij de itech tixtle, tonses, kijtosneki
nochi in tixtle okixpantilij in Dios. O noso tla inelwayo
se kuawitl iaxka in Dios, tonses nochi imamayo in kuawitl
noijki iaxka. Kijtosneki tla in yakinika judiojtin oyekaj
iaxkawan Dios, tonses, katlej satepan tlakatij noijki
iaxkawan.
\p
\v 17 Pero sekin de imamayo in olivoskuawitl, kijtosneki
yen judiojtin, okinpopostekej iwan namejwan katlej mach
anjudiojtin oamechpepechojkej kan okinpopostekej imamayo
in olivoskuawitl. Axan namejwan ankipiaj in kuale nelwatl
de yen olivoskuawitl.
\v 18 Amo ximoweyinekikan. Amo xikyejyekokan nik namejwan
okachi ankualtin ke nekatej imamayowan katlej okinpopostekej.
Xikmatikan nik mach amejwan katlej ankiskaltiaj in nelwatl,
sino yen nelwatl amechiskaltia namejwan.
\p
\v 19 Namejwan welis ankijtoskej: “Tla okinpopostekej
imamayo in olivoskuawitl para tejwan ompa otechpepechojkej,
xamo por okachi tikualtin.”
\v 20 ¡Xikpiakan kuidado! Yejwan okinpopostekej porke
mach okineltokakej in Cristo. Iwan namejwan ompa oamechpepechojkej
porke oantlaneltokakej. Amo ximoweyinekikan, sino ximomawtijtokan
inawak Dios.
\v 21 Tla Dios amo okinmiknomatke iwan okipopostekke
in meroj yen imamayo in olivoskuawitl, namejwan noijki
no mach amechiknomatis iwan welis noijki amechpopostekis.
\v 22 Xikmomakakan kuenta kiné, nik in Dios kipia weyi
itlasojtlalis iwan noijki tetlajyowiltij. Kintlajyowiltia
katlej mach ok kineltokaj, pero kipia weyi itlasojtlalis
para amejwan katlej ankineltokaj. Iwan Yej nochipa kipias
weyi itlasojtlalis amowan tla namejwan antlaneltokatoskej
inawak. Iwan tla amo, tonses namejwan noijki amechpopostekis.
\v 23 Tla in judiojtin kineltokaskej in Cristo, Dios
oksemi kinpepechos itech olivoskuawitl. Porke Dios kipia
poder para welis oksemi kinpepechos.
\v 24 Namejwan, katlej mach anjudiojtin, oamechpopostekej
de itech se olivoskuawitl katlej oyeka ipan tepetl, iwan
oamechpepechojkej itech se olivoskuawitl katlej okitookakej
kan mach oamechtokaroaya anmoskaltianij. Tonses, in Dios
okachi mach owij oksemi kintlalis in judiojtin kan meroj
inmolivoskuawyo kan achtoj oyekaj, porke yejwan yonmej
katlej oyekaj imamayo in olivoskuawitl.
\s Satepan in judiojtin momakixtiskej
\p
\v 25 Nokniwan, nikneki namechilwis se tlamantle katlej
achtoj mach akaj okimatia. Nikneki xikmatikan para amo
ximoweyinekikan, iwan amo xikyejyekokan nik namejwan
okachi ankualtin iwan amo ken judiojtin. Sekimej judiojtin
oyoltlakuawakej, pero yejwan ijkón yoltlakuawatoskej
asta ijkuak ma ajsikan nochtin katlej mach judiojtin
katlej kipia de momakixtiskej.
\v 26 Nijkuak ijkón tlapanos, tonses nochtin in judiojtin
momakixtiskej. Ken kijta in tiotlajkuilole:
\q Se Temakixtij witz de Sión,
\q iwan kintlajtlakolkixtis nochtin iwejkaixwiwan in Jacob
nijkuak kineltokaskej.
\q
\v 27 Nej inwan nikchiwas se akuerdo,
\q iwan nikinmakixtis de intlajtlakol.
\p
\v 28 Axan sekimej judiojtin katej kej ikontraswan in
Dios porke mach kineltokaj in kuale tlajtole katlej
temakixtia, iwan yon namejwan katlej mach anjudiojtin
oamechpalewij porke ijkón nik owelik oamechiknomatke
in toTajtzin Dios para ximomakixtikan. Pero Dios okinpejpenke
in judiojtin, iwan por yonik ok kintlasojtla ijkón ken
okinmilwij in ya wejkawitl inweyitajwan nik kintlasojtlas
iwan kintiochiwas.
\v 29 Porke tlan Dios kitemaka, mach ok kitekixtilia.
Iwan Dios okinpejpenke in judiojtin para ma yekan iaxkawan
iwan mach keman kinkawas.
\v 30 Namejwan katlej mach anjudiojtin achtoj mach ankineltokayaj
in Dios, pero axan Dios ya amechiknomati porke in judiojtin
mach okineltokakej.
\v 31 Axan in judiojtin mach tlaneltokaj, iwan yon ijkón
tlamochiwa para ke se tonale in Dios noijki ma kinmiknomati
ijkón ken namejwan oamechiknomatke.
\v 32 Porke Dios okinkaj nochtin tlaltikpaktlakaj ma
tzaktokan ijtik tlajtlakole porke mach otlaneltokakej
inawak, para ijkón satepan welis oksemi kinmiknomatis
nochtin.
\p
\v 33 ¡In toTajtzin Dios sa tekitl kipia miek tlamantle
tlan kuale iwan mach keman tlamis! ¡Kipia miek ixtlamachilistle
iwan miek tlan Yej kimati! Mach akaj weli kimomaka kuenta
tlan Yej kiyejyekoa kichiwas, iwan nion mach akaj weli
kimomaka kuenta kenik kichiwa tlan Yej kijta.
\v 34 In tiotlajkuilole kijta: “¿Akin kimati tlan Dios
kiyejyekoa? O noso, ¿akin okilwij tlanon moneki kichiwas?
\v 35 ¿Kox itlaj okitlanetijkej in Dios para satepan
ma kikuepa?”
\v 36 Porke nochi tlan onkaj walajtok de Dios, iwan nochi
tlan onkaj, onkaj por Yej iwan para Yej. Ma tikweyikixtikan
toTajtzin Dios nochipa. Ijkón ma yeto.
\c 12
\s Kenik moneki se nemis inawak Dios
\p
\v 1 Nokniwan, toTajtzin Dios kipia weyi iteiknotlamachilis
towan. Iwan por yonik namechtlatlawtia ximotemaktikan
(ximotemaktilikan) inawak Dios kej se tlamanale katlej
yolitok iwan chipawak ijkón ken Yej kipaktia. Tla ijkón
ankichiwaskej, tonses kijtosneki yen yon weyikixtilistle
katlej toTajtzin Dios kipaktia.
\v 2 Ayakmo xikchiwakan ken tlan kichiwaj in tlaltikpaktlakaj.
Sino xikkawilikan in Dios ma amechyankuili itech namotlalnamikilis,
para ijkón ankimatiskej tlanon Dios kineki xikchiwakan,
iwan ankimatiskej tlan kuale, tlan Yej kipaktia iwan
katlej okachi kuale de nochi.
\p
\v 3 Dios okipixke weyi iteiknotlamachilis nowan iwan
onechmakak yin tekitl para ma namechilwi tlan moneki
ankichiwaskej. Por yonik namechilwia, amo xikyejyekokan
nik okachi ankualtin okachi de tlan moneki ankiyejyekoskej.
Sino okachi kuale xikyejyekokan nochi tlamantle ken
moneki ika kuale amotlalnamikilis. Para ijkón xikyejyekokan
nik welis ankichiwaskej in tekitl katlej Dios oamechmakak
para xikchiwakan kada se de amejwan porke namejwan antlaneltokaj
inawak.
\v 4 Porke in totlalnakayo kipia miek partes, iwan kada
se parte kichiwa tlatlamantle tekitl.
\v 5 Ijkón tejwan noijki, maski tikatej timiekej titlaneltokakej,
tinochtin timochiwaj sa se tlalnakatl itech Cristo.
Tinochtin tikchiwaj tlatlamantle tekitl, iwan tinochtin
timopalewiaj se iwan oksé ijkón ken Dios kineki.
\p
\v 6 Dios otechmakak ipoder para ma tikchiwakan tlatlamantle
tekitl. Dios otechmakak ika iteiknotlamachilis ijkón
ken Yej okinekke. Por yonik, tla Dios otechmakak poder
para ma tikijtokan itlaj tlajtole tlan Yej techmaka,
tonses ma tikijtokan kiné. Moneki ma tiktekipanoltikan
totlaneltokalis katlej Dios otechmakak.
\v 7 Tla Dios otechmakak poder para ma tikinpalewikan
oksekimej, tonses moneki ma tikinpalewikan. Tla Dios
otechmakak poder para ma titlamachtikan, tonses moneki
ma titlamachtikan.
\v 8 Tla Dios otechmakak poder para ma tikinyolojchikawakan
oksekimej, tonses moneki ma tikinyolojchikawakan. Tla
Dios otechmakak poder para ma tiktemakakan itlaj tlan
tikpiaj, tonses ma tiktemakakan ika kuale toyolo. Tla
Dios otechmakak poder para ma titlayekantokan itech
itlaj tekitl, tonses ma titlayekantokan iwan kuale ma
tikchiwakan totekiw. Tla Dios otechmakak poder para
ma tikinpalewikan katlej mach itlaj kipiaj, tonses moneki
ma tikinpalewikan ika pakilistle.
\s Kenik moneki yeskej in tlaneltokakej
\p
\v 9 Ximotlasojtlakan se iwan oksé ipan melajka. Xikchiwakan
tlan kuale, iwan xikkawakan tlan amo kuale.
\v 10 Ximotlasojtlakan se iwan oksé kej anmiknimej.
Moneki okachi xikinchiwakan kuenta in oksekimej iwan
ximotlakitakan se iwan oksé.
\p
\v 11 Ximochijchikawakan ika nochi amoyolo para ankitekipanoskej
in toSeñor iwan amo xitlatziwikan.
\p
\v 12 Nochipa xipaktokan por yen tlan techchia ompa
ilwikak. Xikmoxikoltikan nijkuak antlajyowiaj. Amo keman
xikkawakan de anmotiotzajtziliskej.
\p
\v 13 Xikinpalewikan ikonewan Dios nijkuak itlaj kinpoloa.
Xikinresibirokan ika kuale akinmej amechontlajpaloaj.
\p
\v 14 Xiktlajtlanilikan Dios ma kintiochiwa katlej kinekij
amechtoktiskej tlan amo kuale. Amo xiktlajtlanilikan
Dios ma kintlajyowilti, sino ma kintiochiwa.
\p
\v 15 Xipakikan inwan katlej pakij, iwan xichokakan inwan
katlej chokaj.
\p
\v 16 Xikpiakan san se amotlalnamikilis. Amo ximoweyinekikan,
sino kuale ximowikakan inwan katlej sensiyojtzitzintin.
Amo xikyejyekokan ke namejwan ankipiaj okachi ixtlamachilistle.
\p
\v 17 Amo xikinkuepaltikan katlej amechtoktiaj itlaj
amo kuale. Nochtin ma amechitakan nik ankichiwaj tlan
kuale.
\v 18 Xikchiwakan asta kan anwelij de xiekan ika kuale
inwan nochtin.
\v 19 Namejwan notetlasojkaikniwan, amo xikinkuepaltikan
akinmej amechtoktiaj tlan amo kuale, sino xikkawilikan
yen Dios ma kintlajyowilti. Porke in tiotlajkuilole
kijta: “Nej nikinkuepaltis akinmej kichiwaj tlan amo
kuale, yejwan nechtlaxtlawiliskej ken moneki.” Ijkón
kijta in toSeñor.
\v 20 Okachi kuale xikchiwakan ken kijta in tiotlajkuilole:
“Tla se tlakatl mitzkokolia iwan tiojsiwi, xiktlamaka,
iwan tla amiki xikatliti. Porke tla ijkón tikchiwas,
in yej sa tekitl pinawas.”
\v 21 Amo xikkawilikan ma amechtlani tlan amo kuale,
sino amejwan xiktlanikan tlan amo kuale ika tlan kuale.
\c 13
\s Ma se kintlakita katlej tlatlayekantokej
\p
\v 1 Nochtin moneki ma kintlakitakan in tekiwajkej de
gobierno. Porke yen Dios okinmakak in yon tekitl, iwan
katlej axan tlanawatijtokej, yen Dios okintlalij.
\v 2 Por yonik, akin amo kintlakita in yonmej tekiwajkej,
kijtosneki mach kitlakita tlan Dios okitlalij. Iwan
akinmej ijkón kichiwaj in Dios kintlajyowiltis.
\v 3 Porke in tekiwajkej mach katej para kinmajmawtiskej
katlej kichiwaj tlan kuale, sino katlej kichiwaj tlan
amo kuale. Tla amo tikneki ma mitzmajmawtikan in tekiwajkej,
tonses xikchiwa tlan kuale iwan in tekiwajkej mitztlakitaskej.
\v 4 Porke Dios okintlalij in tekiwajkej para mitzpalewiskej.
Pero tla tikchiwa tlan amo kuale, ijkuakón xikinmiimakasi
in tekiwajkej porke yejwan tlanawatiskej ma mitztlajyowiltikan.
In tekiwajkej katej kej itekipanojkawan in Dios para
kintlajyowiltiskej ken moneki akinmej kichiwaj tlan
amo kuale.
\v 5 Por yonik moneki se kintlakitas in tekiwajkej, amo
san para amo ma techtlajyowiltikan, sino porke ijkón
moneki se kichiwas.
\v 6 Iwan noijki por yonik namejwan ankitlaxtlawaj impuestos.
Porke in tekiwajkej moneki kitlaniskej intlaxtlawil
para welis tekipanoskej itech yon tekitl katlej Dios
okinmakak.
\p
\v 7 Xiktlaxtlawakan nochi tlan moneki ankitlaxtlawaskej.
Xiktlaxtlawakan impuestos iwan renta. Xiktlakitakan
akin moneki ankitlakitaskej, iwan xikweyimatikan akin
moneki ankiweyimatiskej.
\v 8 Amakaj itlaj xikwikilijtokan, sino moneki ximotlasojtlakan
se iwan oksé. Porke akin tetlasojtla kijtosneki kichiwa
nochi tlan kijta itlanawatil in Moisés.
\v 9 Porke itlanawatil in Moisés kijta: “Amo ximomekati,
amo xitemikti, amo xitlachteki, amo xitetlajtoltlatlalili,
amo xikixelewi tlan amo moaxka”. Yinmej iwan nochtin
oksekimej tlanawatiltin mochiwa sa se, kijtosneki: “Xiktlasojtla
in mokni ken tej timotlasojtla.”
\v 10 Akin tetlasojtla kijtosneki kitechiwilia tlan
kuale. Iwan akin ijkón kichiwa kijtosneki kichiwa nochi
tlan kijta itlanawatil in Moisés.
\p
\v 11 Tonses, moneki xikchiwakan nochi yin tlamantle
tlan namechilwia, porke ya ankimatij itech tlan tiempo
tikatej. Moneki xiijsatokan, porke ya ajsi tonale para
techmakixtis in Cristo, iwan amo ken nijkuak yakin otitlaneltokakej.
\v 12 Ya tlamiskej in tonaltin de tinemiskej ixko yin
tlaltikpak, iwan ya pewaskej in tonaltin de tinemiskej
iwan Dios. Por yonik ayakmo ma tikchiwakan tlan amo
kuale ken kichiwaj in tlakaj katlej katej ijtik tlatleyualotl,
sino ma tinemikan ijtik tlanextle para welis tiktlaniskej
tlan amo kuale, ijkón ken nijkuak se soldado nemi nijkuak
tlanestok para temagas.
\v 13 Moneki tinochtin ma tichipawkanemikan, ijkón ken
moneki tinemiskej ijtik tlanextle tinochtin tejwan katlej
titlaneltokakej. Amo ma tinemikan itech ilwimej mach
kualtin, iwan amo ma titlawantinemikan. Amo ma timomekatikan,
iwan amo ma tikchiwakan tlan amo kuale tlan kineki totlalnakayo.
Amo ma timokualanijtinemikan inwan oksekimej. Iwan amo
ma tikpiakan nexikolistle.
\v 14 Sino ma tiktlajtlanilikan toSeñor Jesucristo ma
techpalewi ma tinemikan ken Yej, iwan amo ma tikchiwakan
tlan amo kuale tlan kineki totlalnakayo.
\c 14
\s Ma se kinpalewi in tokniwan katlej mach chijchikawakej itech intlaneltokalis
\p
\v 1 Xikinyeknotzakan in tokniwan katlej mach ya kuale
kimomakaj kuenta in tlamachtile katlej tikneltokaj.
Pero amo inwan ximotlatlajtolkuepakan ika tlan yejwan
mach kimomakaj kuenta.
\v 2 Por ejemplo, katej sekimej tlaneltokakej katlej
kineltokaj welis kikuaskej de nochi tlamantle tlakuale,
pero katej sekimej tlaneltokakej katlej mach ya kuale
tlaneltokaj, katlej kiyejyekoaj moijtlakoskej inawak
Dios tla kikuaskej nakatl.
\v 3 In tlaneltokakej katlej kikuaj de nochi tlamantle
tlakuale, amo ma kiyejyekokan nik okachi kualtin ke katlej
mach kikuaj nakatl. Iwan tlaneltokakej katlej mach kikuaj
nakatl amo ma kinpojpoakan katlej kikuaj nakatl, porke
Dios parejo yoamechresibiroj kej anmikonewan.
\v 4 ¿Akin tej para xikijto kox kuale o noso amo kuale
tlan kichiwa itekipanoj de oksé tlakatl? San yen iteko
welis kijtos kox kuale o noso amo kuale tlan kichiwa.
Iwan toTeko kipia poder para kipalewis ma kichiwa tlan
kuale para ma moyekketza.
\p
\v 5 Katej sekimej tlaneltokakej katlej kiyejyekoaj
nik onkaj se tonale katlej okachi weyi tonale ke oksekimej
tonaltin. Pero katej oksekimej tlaneltokakej katlej
kijtaj nik nochtin tonaltin san se parejo. Kada se moneki
kuale ma kimati ipan iyolo de tlan kiyejyekoa.
\v 6 In tlaneltokakej katlej kitlakitaj se tonale okachi
ke oksekimej tonaltin, kitlakitaj yon tonale porke kinekij
kipaktiskej in toSeñor. In tlaneltokakej katlej kikuaj
de nochi tlamantle tlakuale, kikuaj de nochi porke kinekij
kipaktiskej in toSeñor porke kitlasojkamachiliaj in
toTajtzin Dios por nochi tlan kikuaj. Iwan tlaneltokakej
katlej mach kikuaj de nochi tlamantle tlakuale, mach
kikuaj porke kinekij kipaktiskej in toSeñor iwan yejwan
noijki kitlasojkamachiliaj in toTajtzin Dios por tlan
kikuaj.
\p
\v 7 Porke mach akaj katlej kineltoka Dios weli monawatia
iselti. Mach akaj tlakatl weli yolitok san por yej kineki
yolitos para mopaktis, iwan nion mach akaj tlakatl miki
san por yej kineki mikis.
\v 8 Pero tla tiyolitokej ixko yin tlaltikpak, tiyolitokej
para tiktekipanoskej in toSeñor, iwan nijkuak timikiskej,
timikiskej para yen toSeñor. Tla tiyolitoskej o noso
tla timikiskej, tejwan tiiaxkawan toTajtzin Dios.
\v 9 Por yonik in Cristo omikke iwan omoyolkuik oksemi
para yetos yen toSeñor maski timikiskej o noso tiyolitoskej.
\p
\v 10 Tonses, ¿tlanik tikpojpoa in mokni? O noso, ¿tlanik
tikyejyekoa nik in tej okachi tikuale ke yej? Tinochtin
tikpiaj de timoteixpantiskej inawak Cristo iwan Yej
kijtos kox titlajtlakolejkej o noso amo.
\v 11 Porke in tiotlajkuilole kijta:
\q Nej niyolitok, kijta in toSeñor, iwan nochtin tlakaj
motlankuaketzaskej noyakapan,
\q iwan nochtin kijtoskej teixpan nik melawak Nej niDios.
\m
\v 12 Tonses, kada se de tejwan tikpiaj de tiktemakaskej
kuenta inawak Dios de tlan tikchiwaj.
\s Amo xiktokti in mokni ma wetzi ipan tlajtlakole
\p
\v 13 Por yonik, mach ma tikinmitakan in tokniwan kox
kuale tlan kichiwaj o noso amo. Sino, xikpiakan kuidado
de amo ankichiwaskej itlaj tlamantle tlan ika welis
wetzis ipan tlajtlakole se amokni, iwan ijkón ankijtlakoliskej
itlaneltokalis.
\v 14 Nej komo nitlaneltokak inawak toSeñor Jesús, kuale
nikmati nik mach itlaj tlakuale welis techijtlakos inawak
Dios. Pero tla akaj kiyejyekoa nik tlajtlakos tla kikuas
itlaj tlakuale, tonses para yej tlajtlakole in tla kikuas.
\v 15 Iwan tla se mokni mitzita tikkua itlaj tlakuale
katlej para yej tlajtlakole se kikuas, tonses kijtosneki
mach tiktlasojtla in mokni por yen tlan tikchiwa. Amo
xikchiwa ma mopolo se mokni katlej Cristo omikke por
yej, san por yen tlakuale katlej tikkua.
\v 16 Tla ijkón tikchiwas, oksekimej welis kijtoskej
nik mach kuale tlan tikchiwa maski ma yeto kuale tlan
tikchiwa.
\v 17 Porke kan Dios tlanawatia mach importariwi tlan
tikuaj o noso tlan tikonij. Pero tla tejwan tichipawkanemij,
tla tikpiaj yolosewilistle, iwan tla tikpiaj pakilistle
katlej techmaka in Espíritu Santo, yon melawak okachi
importariwi.
\v 18 Akin ijkón kitekipanoa in Cristo, kipaktia in Dios
iwan welis kitlakitaskej nochtin tlakaj.
\p
\v 19 Por yonik, ma tikchiwakan tlan welis techmakas
yolosewilistle, iwan ma timopalewikan se iwan oksé para
okachi ma timochikawakan itech totlaneltokalis.
\v 20 Amo xikijtlakokan in tekitl de toTajtzin Dios
por itlaj tlakuale tlan ankikuaj. Melawak nik nochi
tlakuale welis se kikuas, pero mach kuale tla se kikuas
itlaj tlakuale katlej ika welis wetzis ipan tlajtlakole
se tokni.
\v 21 Okachi kuale mach ma se kikua nakatl iwan nion
mach ma se koni vino, iwan nion itlaj oksé tlamantle,
katlej ika welis wetzis ipan tlajtlakole se tokni.
\v 22 San tej xikmato tlan tikneltoka inawak Dios. Ma
paki akin kineltoka nik kuale tlan kichiwa iwan mach
kineltoka nik tlajtlakole.
\v 23 Pero akin kikua itlaj tlakuale iwan kimolwijtok
ipan iyolo kox kuale o noso amo kuale tlan kikua, tonses
kichiwa tlajtlakole. Porke mach kikua ika itlaneltokalis
de ke kichiwa tlan kuale. Iwan nochi tlamantle tla amo
se kichiwas ika tlaneltokalistle, yon tlajtlakole.
\c 15
\s Ma tikchiwakan tlan kinpaktis oksekimej
\p
\v 1 Tejwan katlej tichikawakej itech totlaneltokalis
moneki tikinpalewiskej katlej mach chikawakej itech
intlaneltokalis, iwan amo ma tikchiwakan san tlan tejwan
techpaktia.
\v 2 Kada se de tejwan moneki ma tikchiwakan tlan kuale
katlej welis kipaktis in tokni iwan katlej welis kipalewis
para okachi kuale ma tlaneltoka inawak Dios.
\v 3 Porke nion Cristo mach okichij itlaj tlamantle
san tlan Yej okipaktiaya. Porke in tiotlajkuilole kijta:
“In tlakaj katlej mitzwijwikaltiaj noijki Nej nechwijwikaltiaj.”
\v 4 Nochi tlan omijkuiloj ya wejkawitl, omijkuiloj para
tejwan ika ma timomachtikan. Iwan nijkuak timomachtiaj
in tiotlajkuilole, in Dios techpalewia para ma tikxikokan
nochi tlan tipanoaj. Iwan noijki techyolojchikawa para
ma tikchiakan nochi tlan yokijtoj techmakas.
\v 5 ToTajtzin Dios katlej techyolojchikawa iwan techpalewia
para ma tikxikokan tlan tipanoaj, ma amechpalewi para
xikpiakan san se namotlalnamikilis ijkón ken Cristo
Jesús kineki ma tikpiakan.
\v 6 Iwan ijkón, aminochtin ika san se tlalnamikilistle
xikweyikixtikan in toTajtzin Dios, iPapan in toSeñor
Jesucristo.
\s In kuale tlajtole katlej temakixtia kinmatiltiaj katlej mach judiojtin
\p
\v 7 Por yonik, ximoyeknotzakan se iwan oksé, ijkón ken
Cristo techyeknotok. Iwan ijkón welis tikweyikixtiskej
in toTajtzin Dios.
\v 8 Iwan namechilwia, nik in Cristo owalaj para kinpalewis
in judiojtin. Iwan ijkón Dios okiteititij nik melawak
nochi tlan okinmilwij in ya wejkawitl toweyitajwan, iwan
nik in Yej nochipa kichiwa tlan kijta.
\v 9 Cristo noijki owalaj para ke katlej mach judiojtin
ma kiweyikixtikan toTajtzin Dios por yen iteiknotlamachilis
katlej okipixke por yejwan katlej mach judiojtin, ken
kijta in tiotlajkuilole:
\q Por yonik in tlakaj katlej mach judiojtin mitzweyikixtiskej,
\q iwan nikintlakuikas tiotlakuikaltin para ika nimitzweyikixtis.
\m
\v 10 Iwan oksé lado itech in tiotlajkuilole noijki
kijta:
\q Namejwan katlej mach anjudiojtin, xipakikan inwan judiojtin
katlej iaxkawan in toTajtzin Dios.
\m
\v 11 Iwan oksé lado noijki kijta:
\q Aminochtin namejwan katlej mach anjudiojtin moneki
xikweyikixtikan toTajtzin Dios.
\q Ma kiweyikixtikan toTajtzin Dios nochtin tlaltikpaktlakaj.
\m
\v 12 Iwan Isaías noijki kijta:
\q Satepan tlakatis se iwejkaixwi in Isaí,
\q iwan yej yetos tlayekanke katlej kinnawatis nochtin
katlej mach judiojtin.
\q Iwan yejwan mochiaskej inawak para ma kinmakixti.
\p
\v 13 In Dios katlej inawak timochiaj ma amechmaka pakilistle,
iwan ma amechmaka yolosewilistle porke namejwan ankineltokaj.
Iwan ma amechpalewi in Espíritu Santo ika ipoder para
ma moweyili namotlaneltokalis para ijkón okachi welis
anmochiaskej inawak.
\p
\v 14 Nokniwan, nej kuale nikmati nik namejwan ankinekij
ankichiwaskej ika pakilistle tlan Dios kineki, iwan noijki
namejwan kuale ankimatij tlanon moneki ankichiwaskej
para ijkón welis anmonajnawatiskej se iwan oksé.
\v 15 Iwan itech yin amatlajkuilole namechilwia sekin
tlajtole ika chikawak para ika namechelnamiktia sekin
tlamantle. Ijkín namechilwia itech yin amatlajkuilole
porke Dios ika iteiknotlamachilis nechnawatia ijkón
ma nikchiwa.
\v 16 Nej niktekipanoa in toSeñor Jesucristo para nikinmatiltia
katlej mach judiojtin itlajtol in Dios katlej temakixtia.
Nikinmilwia kenik in Dios welis kinmakixtis de intlajtlakol
ijkón ken nijkuak se tiopixke kinmilwia. Iwan yon kej
yeskia nikmaka in Dios se tlamanale katlej Yej kiwelita,
iwan katlej yokichipaj in Espíritu Santo.
\p
\v 17 Por yonik, nej komo nitlaneltokak de Cristo Jesús,
sa tekitl nipaki por yen tekitl katlej nikchiwa inawak
Dios.
\v 18 Mach namechilwis itlaj oksé tlamantle, sino san
yen tlan Cristo okichij notech para owelik onikintlapowij
katlej mach judiojtin para yejwan noijki ma kineltokakan
in Dios. Yejwan okineltokakej Dios por yen tlan onikinmilwij,
iwan por yen tlan onikchij innawak,
\v 19 iwan noijki por yen señalestin iwan milagrostin
katlej onikinchij ika ipoder in Espíritu Santo. Iwan
ik nian nepa yoniktematiltij in kuale tlajtole katlej
temakixtia de Cristo, desde Jerusalén iwan asta itech
país de Ilírico.
\v 20 Nochipa onimochijchikawaya de niktematiltis in
kuale tlajtole katlej temakixtia kan mach ya keman okikakiaj
de Cristo. Ijkón onikchij para amo nitekipanos kan oksekimej
ya tekipanojtokej.
\v 21 Sino ken kijta in tiotlajkuilole:
\q Nekatej tlakaj katlej mach ya keman kinmilwiaj de itlajtol
in Dios, yejwan kikakiskej.
\q Iwan nekatej tlakaj katlej mach keman okikakiaj de
Yej, yejwan kimomakaskej kuenta.
\s Pablo okiyejyekoj yas Roma
\p
\v 22 Por yonik maski miekpa nikneki nias namechitati,
mach niweli.
\v 23 Pero axan yotlanke onitekipanoj itech yinmej regionmej,
iwan komo ya kipia miek xiwitl nikneki nias namechitati,
\v 24 axan nej nikyejyekoa welis namechitikisas nijkuak
nias España. Iwan nijkuak yonikpixke pakilistle de yonamechitak
kanaj keski tonale, satepan welis annechpalewiskej ika
tlan monekis para nias ipan noojwi.
\v 25 Pero axan niawi para Jerusalén para nikinpalewis
katlej iaxkawan Dios katlej ompa katej.
\v 26 Porke in tlaneltokakej de estado de Macedonia
iwan de Acaya, okijtojkej kololoskej itlaj tlan ika kinpalewiskej
in tokniwan tlaneltokakej katlej mach itlaj kipiaj katlej
katej Jerusalén.
\v 27 Yejwan, katlej mach judiojtin okijtojkej kinpalewiskej
in judiojtin katlej mach itlaj kipiaj. Porke yen judiojtin
katlej oyajkej okinmatiltitoj de itlajtol in Dios para
yejwan noijki ma momakixtikan. Axan yejwan noijki moneki
kinpalewiskej in judiojtin katlej mach itlaj kipiaj.
\v 28 Tonses, nijkuak niktlamis yin tekitl iwan nijkuak
yotlanke yoniktemaktij (yoniktemaktilij) tlan omololoj,
nias para España, iwan namechitikisas.
\v 29 Iwan nikmati ke nijkuak nias namechitati, najsiti
ika miek tlatiochiwalistle katlej Cristo kitemaka.
\p
\v 30 Nokniwan, sa tekitl namechtlatlawtia inawak toSeñor
Jesucristo iwan por yen tlasojtlalistle katlej techmaka
in Espíritu Santo, xinechpalewikan ximotiotzajtzilikan
inawak Dios por nej.
\v 31 Xiktlatlawtikan Dios ma nechmakixti de innawak
in tlakaj katlej mach tlaneltokakej katlej katej itech
estado de Judea. Iwan noijki xiktlatlawtikan para ke
in tokniwan yolchipawakej katlej katej Jerusalén ma
kiresibirokan ika pakilistle nijkuak nikinmakati tlan
omololoj.
\v 32 Iwan tla Dios kimonekiltis, ma nechkawili ma najsiti
amonawak ika miek pakilistle iwan ijkón welis nimosewis
amowan.
\v 33 ToTajtzin Dios katlej techmaka yolosewilistle
ipan toyolo, ma yeto amowan. Ijkón ma yeto.
\c 16
\s Pablo okonintlajpaloj iwan okoninnajnawatij
\p
\v 1 Nikneki xikixmatikan in tokni siwatl katlej itoka
Febe. Yej tekipanoa itech tiopan katlej kajki itech
weyikan de Cencrea.
\v 2 Nikneki kuale xikresibirokan ika itlasojtlalis
in toSeñor ijkón ken moneki tikinresibiroskej in tokniwan
tlaneltokakej. Xikpalewikan ika nochi tlan kinekis, porke
yej miekej yokinpalewij iwan asta nej noijki yonechpalewij.
\p
\v 3 Xikonintlajpalokan Priscila iwan Aquila katlej
nowan tekipanoaj itech itekiw in Cristo Jesús.
\v 4 Yejwan okimakixtijkej nonemilis maski yoyekaj itenko
mikilistle por nej. Iwan axan mach san yen nej nikintlasojkamachilia,
sino noijki kintlasojkamachiliaj nochtin in tiopantlaneltokakej
katlej mach judiojtin.
\v 5 Xikonintlajpalokan noijki in tiopantlaneltokakej
katlej mololoaj ichan Priscila iwan Aquila. Xikontlajpalokan
notetlasojkaikni Epeneto, katlej achtoj okineltokak in
Cristo itech estado de Acaya.
\v 6 Xikontlajpalokan in María, katlej chikawak tekipanoa
por amejwan.
\v 7 Xikonintlajpalokan noparienteswan Andrónico iwan
Junias, katlej nowan otzaktokaj telpiloyan. Nochtin katlej
itlatitlanilwan Dios sa tekitl kintlakitaj. Iwan noijki
yejwan achtoj okineltokakej in Cristo, okachi achtoj
ke nej.
\p
\v 8 Xikontlajpalokan in Amplias, katlej notetlasojkaikni
inawak toSeñor.
\v 9 Xikontlajpalokan in Urbano, katlej towan tekipanoa
itech itekiw in Cristo Jesús. Iwan noijki xikontlajpalokan
notetlasojkaikni Estaquis.
\v 10 Xikontlajpalokan in Apeles, katlej techititia nik
melawak tlaneltoka inawak Cristo maski panoa miek tlajyowilistle.
Xikonintlajpalokan noijki ifamilia in Aristóbulo.
\v 11 Xikontlajpalokan nopariente Herodión, iwan noijki
xikonintlajpalokan ifamilia in Narciso katlej tlaneltokaj
inawak toSeñor.
\v 12 Xikonintlajpalokan in Trifena iwan Trifosa katlej
tekipanoaj itech itekiw in toSeñor. Xikontlajpalokan
in totetlasojkaikni Pérsida, katlej sa tekitl tekipanojtiwitz
itech itekiw in toSeñor.
\v 13 Xikontlajpalokan in Rufo, katlej Dios okipejpenke
para kichiwas se weyi tekitl. Iwan noijki xikontlajpalokan
imaman in Rufo katlej kajki kej yeskia nej nomaman noijki.
\v 14 Xikonintlajpalokan in Asíncrito, Flegonte, Hermas,
Patrobas, Hermes iwan noijki xikonintlajpalokan in tokniwan
katlej inwan katej.
\v 15 Xikonintlajpalokan noijki in Filólogo iwan Julia,
noijki in Nereo iwan ikni siwatl Olimpas, iwan noijki
xikonintlajpalokan nochtin tokniwan tlaneltokakej katlej
inwan katej.
\p
\v 16 Ximotlajpalokan ika tlasojtlalistle se iwan oksé
ken Dios kineki. Amechontlajpaloaj nochtin in tiopantlaneltokakej
de Cristo.
\p
\v 17 Nokniwan, namechtlatlawtia kuale xikinmitakan akinmej
kinekij kinxeloskej in tokniwan iwan kinekij kinmijtlakoliskej
intlaneltokalis, porke yejwan mach kineltokaj in tlamachtile
katlej namejwan ya ankimatij. Amo inwan ximonelokan
\v 18 porke yejwan mach kitekipanoaj in toSeñor Jesucristo,
sino yejwan kichiwaj san tlan yejwan kineki. Yejwan
tlapoaj ika tlajtole kuakualtzin para ika kinkajkayawaj
ipan inyolo in tlakaj katlej mach ya kuale kimomakaj
kuenta de itlajtol in Dios.
\v 19 Nochtin kimatij nik namejwan ankichiwaj tlan Dios
kineki, iwan por yonik nej sa tekitl nipaki. Iwan nikneki
namejwan xiekan anlistojtin para ankichiwaskej tlan
kuale iwan amo para ankichiwaskej tlan amo kuale.
\v 20 Iwan toTajtzin Dios katlej techmaka yolosewilistle
ipan toyolo, mach ok wejkawas para kipojpolilis ipoder
in Satanás para ayakmo ma amechkuejso. In toSeñor Jesucristo
ma kipia weyi iteiknotlamachilis amowan.
\p
\v 21 Amechontlajpaloa in Timoteo, katlej nowan tekipanoa.
Noijki amechontlajpaloaj noparienteswan Lucio, Jasón
iwan Sosípater.
\p
\v 22 Nej, niTercio, katlej nikijkuilojtok in yin amatlajkuilole,
noijki namechontlajpaloa ika itlasojtlalis in toSeñor.
\p
\v 23 Amechontlajpaloa in Gayo, katlej ichan nikalotitok,
iwan katlej kitetlanetijtok ikal para ompa ma mololokan
nochtin in tiopantlaneltokakej. Amechontlajpaloa in
Erasto, katlej tesorero de itech yin weyikan, iwan noijki
amechontlajpaloa in Cuarto.
\p
\v 24 In toSeñor Jesucristo ma kipia weyi iteiknotlamachilis
amonawak. Ijkón ma yeto.
\s Ma tikweyikixtikan toTajtzin Dios
\p
\v 25 Axan, ma tikweyikixtikan toTajtzin Dios katlej
welis kichiwas para ximoyekketzakan itech namotlaneltokalis.
Dios welis amechchikawas itech itlajtol katlej temakixtia
de yen Jesucristo katlej nej niktematiltia. Yon kuale
tlajtole katlej temakixtia yen katlej ya wejkawitl mach
akaj okimatia porke Dios ayamo okinekia ma kimatikan.
\v 26 Pero axan yotechmatiltij por yen tlan okijkuilojkej
in profetajtin. Iwan Dios katlej yolitok nochipa, otlanawatij
ma kinmatiltikan nochtin tlaltikpaktlakaj yon kuale
tlajtole katlej temakixtia, para ma kineltokakan Dios
iwan ma kichiwakan tlan Yej kineki.
\p
\v 27 ¡ToTajtzin Dios, katlej san Yej kipia nochi ixtlamachilistle,
ma tikweyikixtikan nochipa por tlan Jesucristo kichiwa
towan! Ijkón ma yeto.