\id EPH
\h Efesios
\toc1 Efesios
\mt SAN PABLO ITLATITLANIL IN DIOS OKINTLAJKUILILIJ IN TLANELTOKAKEJ DE ÉFESO
\c 1
\s Pablo okintlajkuililij in tiopantlaneltokakej katlej katej itech weyikan de Éfeso
\p
\v 1 Nej niPablo, nitlatitlanile de Jesucristo porke
Dios ijkón okimonekiltij. Nej namechtlajkuililia namejwan
katlej ankatej itech weyikan de Éfeso, namejwan katlej
aniaxkawan in Dios iwan antlaneltokaj inawak Cristo
Jesús.
\v 2 ToPapan Dios iwan toSeñor Jesucristo ma amechmakakan
inteiknotlamachilis iwan inyolosewilis.
\s Dios techtiochiwa por medio de Cristo Jesús
\p
\v 3 Ma tikweyikixtikan toTajtzin Dios, iPapan in toSeñor
Jesucristo, porke otechmakak miek tlamantle de tlatiochiwalistle
de ilwikak ipan toanima porke tipowij inawak Cristo.
\v 4 Ya wejkawitl, antes de yeni in tlaltikpak, Dios otechpejpenke
para ma tiekan tiiaxkawan. Yej okichij ma tiekan tichipawakej
iwan amo ma tikpiakan nion itlaj tlajtlakole inawak.
\v 5 Ika itlasojtlalis, desde antes de yeni in tlaltikpak,
Dios okinekke techpias kej tiikonewan nijkuak okualtitlanke
in Jesucristo ma mikiki por tejwan, porke Dios ijkón
okimonekiltij kichiwas.
\v 6 Para ijkón nochtin ma kiweyikixtikan por yen weyi
iteiknotlamachilis katlej okipixke por tejwan nijkuak
okualtitlanke iKone katlej sa tekitl kitlasojtla.
\v 7 Cristo okitlaxtlaj ika ieso in totlajtlakol, iwan
axan Dios yotechtlapojpolwij ika weyi iteiknotlamachilis.
\v 8 Noijki okipixke weyi iteiknotlamachilis towan nijkuak
otechmakak nochi ixtlamachilistle iwan nochi tlalnamikilistle.
\v 9 Iwan Yej okimonekiltij otechmatiltij tlan achtoj
mach akaj okimatia. Otechmatiltij tlanon kichiwas por
medio de Cristo.
\v 10 Dios okijtoj nijkuak ajsis tonale, kinmololos nochtin
in tlakaj iwan nochi tlamantle inawak Cristo. Iwan Cristo
kinnawatis nochtin katlej katej itech ilwikak iwan katlej
katej ixko yin tlaltikpak.
\p
\v 11 Por yonik, komo tisetitokej iwan Cristo, in Dios
techmaka toherencia. Desde ijkuak in tlaltikpak ayamo
oyeka, Dios otechpejpenke para ma tiekan tiiaxkawan.
Yej kichiwa ke nochi tlan tlapanos ma mochiwa ijkón
ken Yej kimonekiltia.
\v 12 Ijkón okichij, para ijkón tejwan katlej achtoj
otikchiayaj in Cristo, ma tikweyikixtikan por yen wejweyin
tlamantin katlej kichiwa por tejwan.
\v 13 Noijki namejwan, nijkuak ankikakej in tlajtole
katlej melawak, kijtosneki yen itlajtol in Dios katlej
techmakixtia, iwan ankineltokakej in Cristo, ijkuakón
Dios oamechseyaroj ika iEspíritu Santo iwan anmochijkej
kej iaxkawan. Yon Espíritu Santo in Dios okiwaltitlanke
para ma yeto towan ijkón ken Yej otechkakitij kichiwas.
\v 14 Dios ika iEspíritu Santo kisentlalia towan nik
techaxkatis tlan Dios yokijtoj techmakas nijkuak tlamis
timakisaskej de itech nochi tlan amo kuale. Iwan ijkón
welis tikweyikixtiskej iweyilis in toTajtzin Dios.
\s Pablo okitlajtlanilij in Dios ma kinmaka ixtlamachilistle in tlaneltokakej
\p
\v 15 Por yonik, nijkuak nej onikmatke nik sa tekitl
kuale antlaneltokaj inawak in toSeñor Jesús, iwan de
kenik ankintlasojtlaj nochtin katlej iaxkawan in Dios,
\v 16 desde ijkuakón nej mach nikkawa de niktlasojkamachilia
in toTajtzin Dios nijkuak nimotiotzajtzilia por amejwan.
\v 17 Niktlajtlanilia in Dios de toSeñor Jesucristo,
in toweyi Papan, ika iEspíritu Santo ma amechmaka ixtlamachilistle
para xikmomakakan kuenta tlan Yej kineki amechnextilis
iwan para okachi kuale xikixmatikan.
\v 18 Niktlajtlanilia in Dios ma amechtlapoli namotlalnamikilis,
para xikmatikan tlanon tikchiaj inawak Dios katlej otechnotzke
para ma tiekan tiiaxkawan. Iwan ijkón xikmomakakan kuenta
nik sa tekitl weyi iwan kuakualtzin in herencia katlej
Dios kinmakas katlej Yej iaxkawan.
\v 19 Iwan noijki xikmomakakan kuenta nik sa tekitl
weyi ipoder katlej mach keman tlami. Yon ipoder tekipanoa
totech para techpalewia tejwan katlej titlaneltokaj
inawak. Iwan yon ipoder yen katlej okiteititij in Dios
ika miek poder
\v 20 nijkuak okiyolitij in Cristo oksemi de itech imikilis
iwan okitlalij ma ewato ik iyekma ompa ilwikak.
\v 21 Iwan Dios okimakak in Cristo weyi tekiwajkayotl
para ma kinnawati nochtin katlej tekiwajkej, nochtin
katlej tlatlayekantokej, nochtin katlej kipiaj poder
iwan nochtin katlej wejweyikistokej (wejweyititokej).
Cristo kipia yin weyi tekiwajkayotl amo san axan itech
yin tiempo, sino noijki itech nekáj tiempo katlej satepan
yetos.
\v 22 Dios yokimaktilij in Cristo nochi tlamantle para
ma kinawati, iwan noijki okitlalij in Cristo ma yeto
yen tlayekanke de tinochtin tejwan katlej titlaneltokaj
inawak iwan katlej tikatej kej itiopan.
\v 23 Iwan itlalnakayo in Cristo yen tejwan katlej tikatej
kej itiopan, iwan tikresibiroaj nochi tlan de Yej iaxka.
Tejwan tikajxitiaj in Cristo porke tikatej kej itlalnakayo,
iwan Cristo yen kajxitia nochi tlamantle tlan onkaj
itech ilwikak iwan ixko yin tlaltikpak.
\c 2
\s Dios techmakixtia porke techtlasojtla
\p
\v 1 Cristo oamechmakak nemilistle nijkuak namejwan
anyekaj kej anmikkamej, porke ankichiwayaj tlajtlakole
iwan ankichiwayaj oksekin tlamantle mach kuale.
\v 2 Namejwan ankichiwayaj ken oksekimej tlaltikpaktlakaj
kichiwaj. Ankichiwayaj tlan okinekia in Amo Kuale Tlakatl
katlej kinnawatia in ejekamej mach kualtin ixko ejekatl,
iwan katlej kinyekana katlej mach kinekij kikakiskej
in Dios.
\v 3 Tejwan tinochtin noijki otiekaj ken yejwan. Otikchiwayaj
biero tlan okelewiaya in totlalnakayo. Iwan noijki otikchiwayaj
miek tlamantle mach kuale tlan okinekia in totlalnakayo
iwan totlalnamikilis. Iwan por yonik, otechnamikia para
techtlajyowiltiani in Dios ika ikualanilis ijkón ken
oksekimej kintlajyowiltia katlej mach kineltokaj.
\v 4 Pero Dios kipia sa tekitl weyi iteiknotlamachilis,
iwan sa tekitl otechtlasojtlak.
\v 5 Iwan nijkuak otiekaj kej yeskia timikkamej por
yen totlajtlakol, Dios otechmakak nemilistle iwan Cristo.
Dios otechmakixtij porke kipia weyi iteiknotlamachilis
por tejwan.
\v 6 Dios otechyolitij kej yeskia otechkixtij de kan
otitoktokaj, ijkón ken okikixtij in Cristo. Iwan noijki
kej yeskia okichij ma timotlalikan iwan Cristo itech
ilwikak.
\v 7 Dios ijkón okichij para kiteititis nochipa nik
kipia sa tekitl weyi iteiknotlamachilis por tejwan, iwan
para kiteititis noijki nik kipia weyi itlasojtlalis
katlej techmaka inawak Cristo.
\v 8 Dios ika iteiknotlamachilis otechmakixtij de totlajtlakol
nijkuak tejwan otikneltokakej in Cristo. Yon mach de
tejwan okiske para otitlaneltokakej, sino yen Dios otechmakak
totlaneltokalis para ma titlaneltokakan inawak.
\v 9 Dios otechmakixtij mach por otikchijkej itlaj tlan
kuale para otikmotlanilijkej, para ijkón amakaj ma moweyineki.
\v 10 Tejwan titlachiwaltin de Dios. Dios otechchij
para ma tiekan de Cristo Jesús para ma tikchiwakan tlan
kuale. Dios ijkón okiyejyekoj okichij por tejwan.
\s Itech Cristo tikpiaj yolosewilistle
\p
\v 11 Ijkón kiné, namejwan katlej mach anjudiojtin, xikelnamikikan
kenamij anyekaj. Namejwan katlej mach anmonakayotekij,
amechtokaxtiaj mach ansirkunsidadojtin. Pero in judiojtin
monakayotekij, iwan por yonik motokaxtiaj sirkunsidadojtin.
\v 12 Achtoj namejwan mach ankixmatiaj in Cristo. Namejwan
mach anpowiaj inwan tlakaj de Israel. Iwan noijki mach
oamechtokaroaya ankipiaskej tlan Dios okijtoj kinmakas
in judiojtin de yen akuerdo katlej inwan okichij. Namejwan
mach ankichiayaj nion itlaj tlan kuale para amejwan,
porke mach ankipiayaj in Dios ipan namoyolo.
\v 13 Pero axan namejwan ya ansetitokej san se iwan
Cristo Jesús. Namejwan katlej achtoj anyekaj wejka de
Cristo, axan ya ankatej inawak, porke Yej okinokij ieso
iwan omikke por amejwan.
\v 14 Cristo otechwalkuilij yolosewilistle iwan tinochtin
otechsetilij san se, katlej judiojtin iwan katlej amo
judiojtin. Achtoj in judiojtin iwan katlej amo judiojtin
omokokoliayaj iwan oyekaj kej yeskia okintlajkoxeelojtoka
se tepamitl. Pero Cristo omikke para okixitinij in yon
tepamitl katlej okinxeelojtoka.
\v 15 Cristo omikke itech krus para ayakmo ma mokokolikan,
iwan okipojpoloj ipoder itlanawatil in Moisés iwan nochi
tlan otechnawatiaya ma tikchiwakan yon tlanawatile.
Iwan axan in judiojtin iwan katlej amo judiojtin nochtin
mochiwaj sa se tlakatl porke Cristo okichij ma tisetitokan
sa se inawak. Ijkón nik okichij ma yeto yolosewilistle.
\v 16 Cristo omikke itech krus para ma motlapojpolwikan
iwan Dios nochtin katlej judiojtin iwan katlej amo judiojtin,
iwan okichij ma yekan inawak kej yeskia sa se tlalnakatl.
Ijkón nik okipojpoloj in kualanilistle katlej okipiayaj
se iwan oksé.
\p
\v 17 Cristo owalaj iwan okitematiltij in kuale tlajtole
de yolosewilistle. Oamechmatiltij aminochtin namejwan
katlej mach anjudiojtin katlej anyekaj wejka de Dios
iwan noijki okinmatiltij in judiojtin katlej oyekaj
okachi serka de inawak Dios.
\v 18 Iwan por yen tlan okichij in Cristo por tejwan,
in judiojtin iwan katlej amo judiojtin, nochtin welij
mijkuaniaj inawak toPapan Dios ika san se Espíritu.
\v 19 Por yonik, namejwan katlej mach anjudiojtin, mach
ok ankatej ken tlakaj katlej chantij tepueblo, sino axan
namejwan noijki ya anpowij kej anchanejkej kan chantij
nochtin katlej Dios iaxkawan. Namejwan noijki ya anpowij
itech ifamilia in Dios.
\v 20 Namejwan ankatej kej se kale, iwan ankatej ipan
se cimiento katlej okichijkej in tlatitlaniltin iwan
profetajtin, iwan Jesucristo yen tetl katlej okachi kichikajtok
in kale.
\v 21 Iwan itech Yej, nochi in tepamitl moskaltijtiw
iwan moyektentiw para motlamis se tiopan chipawak para
yen toSeñor.
\v 22 Iwan ijkón, namejwan inwan judiojtin anmosetiliaj
para anmochiwaskej kej se kale para Dios chantis amotech
por medio de iEspíritu Santo.
\c 3
\s Dios okitlalij in Pablo para ma kintlapowi de itlajtol katlej amo judiojtin
\p
\v 1 Por yonik, nej niPablo, nitzaktok telpiloyan porke
namechtlapowia de itlajtol in Cristo namejwan katlej
amo anjudiojtin.
\v 2 Namejwan ya kuale ankimatij nik in Dios onechmakak
yin tekitl. Dios ika iteiknotlamachilis, onechmakak yin
tekitl para namechpalewis.
\v 3 Dios onechititij se tlamantle katlej miekej mach
kimatij, ijkón ken achtoj nej yonamechijkuililij kanaj
keski tlajtole.
\v 4 Nijkuak namejwan ankileroskej tlan onamechijkuililij,
namejwan ankimomakaskej kuenta nik in nej kuale nikmati
tlanon kijtosneki in yon tlamantle de Cristo katlej
miekej mach kimatij.
\v 5 Desde ya wejkawitl, in Dios mach akaj tlakatl okititiaya
in yon tlamantle, pero axan Dios yokinmititij in tlatitlaniltin
iwan profetajtin yolchipawakej ika iEspíritu Santo.
\v 6 Yon tlamantle katlej achtoj mach otikmatiaj, kijtosneki
in judiojtin iwan katlej amo judiojtin nochtin kipiaskej
herencia katlej Dios kinmakas. Iwan noijki san sekan
setitoskej itech itlalnakayo. Iwan kipiaskej parte katlej
Dios okinkakitij kinmakas in judiojtin, porke katlej
amo judiojtin noijki kineltokaj in kuale tlajtole katlej
temakixtia iwan kitlaliaj intlaneltokalis inawak Cristo
Jesús.
\p
\v 7 Dios ika iteiknotlamachilis, onechtlalij ma nieto
niitekipanoj. Iwan ika ipoder onechmakak yin notekiw
para ma niktematilti in kuale tlajtole katlej temakixtia.
\v 8 Maski nej okachi nitzikitzin de nochtin katlej
iaxkawan in Dios, Yej okipixke weyi iteiknotlamachilis
nowan para ma nikinmatilti katlej amo judiojtin, in kuale
tlajtole katlej temakixtia katlej techilwia nik sa tekitl
miek rikojyotl onkaj itech Cristo asta mach ok tlaixyejyekole.
\v 9 Iwan Dios, katlej okichij nochi tlan onkaj, noijki
onechtlalij para ma nikteititi tlan ya wejkawitl mach
akaj okimatia, nik in Yej kinmakixtis katlej amo judiojtin
por medio de Cristo.
\v 10 Ijkón omochij, para ken axan, nochtin katlej kipiaj
tekiwajkayotl iwan nochtin katlej tlatlayekantokej itech
ilwikak, ma kixmatikan por medio de yen tiopantlaneltokakej,
nik in Dios kipia miek ixtlamachilistle. Iwan yon ixtlamachilistle
tekipanoa de miek tlamantle.
\v 11 Dios ijkón okijtoj ma mochiwa desde ijkuak opéj
in tlaltikpak. Yej ijkón okichij por medio de toSeñor
Jesucristo.
\v 12 Iwan por yen totlaneltokalis katlej tikpiaj inawak
Cristo axan tikpiaj konfiansa para timijkuaniskej inawak
Dios.
\v 13 Por yonik, namechmolwilia, amo ximoyolotlamitikan
por yen axan nitlajyowia por amejwan. Sino yin tlajyowilistle
katlej nipanotok yon se kuale para amejwan.
\s Itlasojtlalis in Cristo
\p
\v 14 Por yonik kiné, nimotlankuaketza inawak toTajtzin
Dios, iPapan in toSeñor Jesucristo.
\v 15 Yen inPapan de nochtin katlej katej ilwikak iwan
ixko yin tlaltikpak katlej kineltokaj porke Yej okinchij
iwan okintokayotij.
\v 16 Niktlatlawtia in toPapan Dios, ke itech irikojyo
katlej sa tekitl miek kipia, ma amechmaka poder ika iEspíritu
para ximochikawakan ipan namoanima.
\v 17 Iwan niktlatlawtia in Dios ma chanti in Cristo
ipan namoyolo porke namejwan ankineltokaj. Iwan noijki
niktlatlawtia para namejwan ximochikawakan itech itlasojtlalis
ijkón ken se kuawitl mochikajtok itech inelwayo o noso
kej se kale mochikajtok ipan icimiento.
\v 18 Iwan ijkón namejwan xikmomakakan kuenta san sekan
inwan nochtin oksekimej katlej iaxkawan Dios, ke itlasojtlalis
in Cristo sa tekitl patlawak, weyak, wejkatlan iwan wejkapan.
\v 19 Niktlatlawtia in toTajtzin Dios para namejwan
xikixmatikan itlasojtlalis in Cristo, katlej sa tekitl
weyi iwan asta mach akaj weli kimomaka kuenta. Iwan
ijkón namejwan welis antentoskej de Dios ipan namoyolo.
\p
\v 20 Iwan axan, toTajtzin Dios katlej tekipanoa totech
ika ipoder, Yej welis kichiwas ika yon ipoder okachi
miek de tlan tejwan welis tiktlajtlaniliskej iwan asta
okachi de tlan welis tikyejyekoskej.
\v 21 Tejwan katlej tikneltokaj Dios tikatej kej itiopan
porke timochiwaj san se iwan Cristo Jesús. Ma tikweyikixtikan
toTajtzin Dios nochipa. Ijkón ma yeto.
\c 4
\s IEspíritu in toTajtzin Dios techsetilia
\p
\v 1 Nej, kiné, katlej nitzaktok telpiloyan porke niktekipanoa
in toSeñor, namechtlatlawtia xichipawkanemikan ijkón
ken Dios kineki, porke Dios oamechnotzke para xiekan
iaxkawan.
\v 2 Xiekan anpasensiajtin iwan xiekan ankualtin tlakaj.
Xikmatikan xikinxikokan oksekimej ika tlasojtlalistle.
\v 3 Xikchiwakan de xisetitokan san se ika itlapalewilis
in Espíritu Santo. Iwan ijkón ankipiaskej yolosewilistle
se iwan oksé.
\v 4 Porke tinochtin tejwan katlej tikneltokaj in Dios
tikatej kej san se tlakatl ika san se totlalnakayo inawak
Dios. Onkaj san se Espíritu katlej techsetilia. Onkaj
san se tlan tikchiaj katlej Dios otechkakitij nijkuak
otechnotzke.
\v 5 Onkaj san se toSeñor. Onkaj san se tlamachtile
katlej itech tiktlaliaj totlaneltokalis. Onkaj san se
tlakuateekilistle para nochtin.
\v 6 Onkaj san se Dios katlej yen toPapan de tinochtin
katlej tikneltokaj in Cristo. Yen tlanawatia ika ipoder
inpan nochtin, yen tekipanoa itech nochi tlan okichij,
iwan yen kajki ipan toyolo de tinochtin.
\p
\v 7 Cristo otechmakak kada se de tejwan ipoder kej
se tlatliokolile para ma tiwelikan ma tiktekipanokan,
ijkón ken Yej okixyejyekoj otechmakak.
\v 8 Por yonik in tiotlajkuilole kijta:
\q Nijkuak Yej otlejkok ilwikak, okinwikak ikontraswan
kej presojtin,
\q iwan okinmakatewak ipoder kej se tlatliokolile in tlakaj
katlej iaxkawan para ma welikan ma kitekipanokan.
\p
\v 9 ¿Iwan tlanon kijtosneki “otlejkok”? Kijtosneki
achtoj otemok asta kan okachi tlatlampa de ixko yin
tlaltikpak.
\v 10 Iwan katlej otemok no yen noijki katlej otlejkok
asta kan okachi ajkopan de itech ilwikak, para yen yetos
ika iEspíritu itech nochi in ilwikak iwan itech nochi
in tlaltikpak.
\v 11 Iwan okinmakak ipoder in tlakaj kej se tlatliokolile
para ma welikan ma kitekipanokan. Sekimej Yej inewian
okintlalij ma yekan tlatitlaniltin, sekimej okintlalij
ma yekan profetajtin, sekimej okintlalij ma yekan tetlapowijkej
de itlajtol katlej temakixtia, sekimej okintlalij ma
yekan pastortin iwan noijki sekimej okintlalij ma yekan
tlamachtijkej.
\v 12 Ijkón Yej okinyektlalij ma yekan moesojkej itech
kada tekitl nochtin katlej iaxkawan in Dios para kuale
ma welikan ma kitekipanokan, iwan para ma kiskaltikan
itlalnakayo in Cristo.
\v 13 Iwan moneki ma timopalewikan tinochtin asta ijkuak
tejwan katlej titlaneltokakej ma tisetitokan san se
itech tlan tikneltokaj iwan itech tlan tikmatij de yen
iKone in Dios. Iwan ijkón mach ok tieskej kej tikonemej,
sino tieskej kej titlakaj katlej ya tichijchikawakej,
timoskaltiskej iwan timotlamitiwej noijki ken Cristo.
\v 14 Iwan ijkón mach ok tikchiwaskej ken konemej katlej
niman kipatlaj intlayejyekol, para amo ma techwika itlaj
oksé tlamachtile ken nijkuak in tlajsole kitki in ejekatl.
Porke katej sekimej tlakaj katlej kitemoaj kenik kintlaneltokitiskej
in tlakaj ika intlamachtil katlej mach melawak, para
kinwikaskej ipan inmojwi mach kuale.
\v 15 Sino ma tikijtokan tlan melawak ika tlasojtlalistle.
Iwan ijkón ma timoskaltikan itech nochi tlamantle para
tieskej ken Cristo, porke Yej kajki kej itzontekon de
yen itlalnakayo.
\v 16 Iwan ijkón ken itlalnakayo se tlakatl weli tekipanoa
nochi in partes katlej kipia porke nochi setitok, ijkón
noijki in Cristo okintlalij nochtin tlaneltokakej kan
moneki yeskej, para ijkón nochtin welis mopalewiskej
se iwan oksé, para nochi itlalnakayo in Cristo kuale
ma tekipano iwan ma moskalti, iwan ma mochikawa ika tlasojtlalistle.
\s Cristo otechmakak yankuik nemilistle
\p
\v 17 Nikneki namechilwis ika itlanawatil in toSeñor
in yin tlamantle: ayakmo xinemikan ken oksekimej katlej
mach kixmatij Dios. Porke tlan yejwan kiyejyekoaj yon
mach itlaj ipatij.
\v 18 Nemij tlatleyualpan. Mach itlaj kimomakaj kuenta
porke ixtzajtzaktokej iwan mach kipiaj yankuik nemilistle
katlej Dios kitemaka. Porke yejwan mach kinekij kikakiskej
in Dios.
\v 19 Mach ok kimatij pinawaj, yokitzkijkej miek tlamantle
biero, iwan ika pakilistle kichiwaj nochi tlamantle bierotik.
\v 20 Pero namejwan mach oamechmachtijkej de Cristo
para xikchiwakan yon tlamantle biero,
\v 21 porke nej nikmati nik namejwan ankikakej iwan
oamechmachtijkej de tlan melawak katlej onkaj itech
Jesús.
\v 22 Namejwan ya ankimatij nik mach ok moneki annemiskej
ken achtoj nijkuak ayamo ankixmatiaj in Dios. Moneki
ankikawaskej yon nemilistle katlej oamechijtlakoaya
porke oamechkajkayawaya ika nochi tlamantle katlej oamechyoltilanaya.
\v 23 Namejwan moneki anmoyankuiliskej ipan namoyolo
iwan ipan namotlalnamikilis.
\v 24 Iwan ijkón ken se tlakatl nijkuak motzotzoltia
ika itzotzol yankuik, namejwan noijki ximotzotzoltikan
ika yankuik nemilistle para xinemikan ken Dios kineki.
Xiyolchipawkanemikan iwan ximelajkanemikan porke Dios
otechchij para ma tiekan ken Yej.
\p
\v 25 Por yonik, ayakmo xitlakajkayawakan, sino kada se
de amejwan xikijtokan tlan melawak inwan namokniwan.
Porke tinochtin tipowij san itech se tlalnakatl.
\p
\v 26 Tla ankualaniskej, amo xitlajtlakokan. Iwan nijkuak
ankualaniskej amo xikualantokan nochi in se tonale sino
niman ximotlapojpolwikan.
\v 27 Amo xikkawilikan in diablo ma amechkajkayawa para
xitlajtlakokan.
\p
\v 28 Akin tlachteki, ayakmo ijkón ma kichiwa iwan ma
pewa ma tekipano. Okachi kuale ma tekipano ika imawan
para ma kichiwa itlaj kuale tekitl, para ijkón welis
kipias tlanon kinmakas in tokniwan katlej mach itlaj
kipiaj.
\p
\v 29 Amo xikijtokan itlaj tlajtole biero, sino xikijtokan
itlaj kuale tlajtole katlej ika kinyolojchikawas iwan
kinpalewis katlej kikakiskej para okachi kuale ma tlaneltokakan
inawak Dios.
\v 30 Amo xikchiwakan de ma moyolkoko iEspíritu Santo
in toTajtzin Dios, porke ika iEspíritu namejwan anmokajkej
anseyadojtin (onmachiotitokej) para anyeskej kej iaxkawan
in Dios asta nekáj tonale nijkuak Yej amechwikas para
ilwikak.
\p
\v 31 Ayakmo xiyolchichikatentokan, amo sa xikualantinemikan,
amo san niman xikualantiwetzikan, amo xikuawtzajtzikan
nijkuak itlaj ankijtoskej, amo xitewikaltikan, iwan nion
amo xitetoktikan tlan amo kuale.
\v 32 Sino moneki xiekan ankualtin tlakaj se iwan oksé
iwan xikinchiwakan kuenta, iwan ximotlapojpolwikan se
iwan oksé ijkón ken Dios oamechtlapojpolwij inawak Cristo.
\c 5
\s Ma tinemikan ken Dios kineki
\p
\v 1 Namejwan xikchiwakan ken Dios kichiwa, porke namejwan
antepilwan de Dios, iwan amechtlasojtla.
\v 2 Ximotlasojtlakan ken Cristo techtlasojtla asta
omotemaktij (omotemaktilij) para ma kimiktikan por tejwan.
Yej omotemaktij kej se ichkatzin katlej okimiktijkej
iwan okimanilijkej in Dios kej se tlamanale katlej kuakualtzin
ajwiak.
\p
\v 3 Namejwan ya anteaxkawan de Dios, por yonik amo xikchiwakan
nion itlaj tlan amo kuale. Amo ximomekatikan, amo xikchiwakan
itlaj tlamantle biero iwan nion amo xikwelitakan ankipiaskej
miek tlamantle okachi de tlan ya ankipiaj.
\v 4 Amo xikijtokan itlaj tlajtole tepinatij, nion itlaj
tlajtole tontojyotl, iwan nion itlaj tlajtole kamanale.
Porke yon tlamantle mach ok technamiki para tikijtoskej,
okachi kuale ma tiktlasojkamachilikan in toTajtzin Dios
por tlan kichiwa por tejwan.
\v 5 Namejwan ya ankimatij ke tla akaj momekatis, o noso
kichiwas itlaj tlamantle biero o noso kiwelita kipias
miek tlamantle okachi de tlan ya kipia, yon kej yeskia
kinweyikixtia in santojtin, mach welis kalakis kan tlanawatia
in Cristo iwan toTajtzin Dios.
\v 6 Amakaj ma amechkajkayawa ika itlaj tlajtole katlej
mach melawak, katlej amechilwiaj mach itlaj anpanoskej
tla ankinchiwaskej in yonmej tlajtlakoltin. Porke Dios
kintlajyowiltis ika ikualanilis in yonmej katlej mach
kineltokaj iwan kinchiwaj in yonmej tlajtlakoltin.
\v 7 Por yonik, amo inwan ximonelokan.
\p
\v 8 Achtoj namejwan anyekaj ijtik tlatleyualotl, pero
axan, ya ankatej ijtik tlanextle porke ya ansetitokej
iwan toSeñor. Por yonik, xinemikan ijkón ken moneki nemiskej
katlej katej ijtik tlanextle.
\v 9 Porke akinmej katej ijtik tlanextle, yonmej yolkualemej,
kichiwaj tlan kuale iwan kijtaj tlan melawak.
\v 10 Nochipa xiktemokan tlanon kipaktia in toSeñor
para yen yon xikchiwakan.
\v 11 Amo xikchiwakan itlaj tlamantle katlej mach tepalewij
ken katlej kichiwaj in tlakaj katlej katej ijtik tlatleyualotl.
Okachi kuale xikinmilwikan nik mach kuale yon tlan kichiwaj.
\v 12 Porke asta tepinatij se kijtos tlan yejwan kichiwaj
ichtaka.
\v 13 Iwan nochi tlamantle tlan mochiwa kan onkaj tlanextle,
nochi weli mota.
\v 14 Por yonik in Dios kijta itech in tiotlajkuilole:
\q Xijsa tej katlej tikochi.
\q Ximewa tej katlej tikaj kej timikkatl por yen tlajtlakole
katlej tikchiwa,
\q iwan Cristo mitztlawilis ipan monemilis.
\p
\v 15 Por yonik, xikpiakan kuidado de kenamij nik anyeskej
itech namonemilis. Amo xiekan kej yeskia mach ajsitok
namotlalnamikilis sino xikpiakan kuale namotlalnamikilis.
\v 16 Amo xikpolojtokan tiempo, sino nochipa xikchiwakan
tlan kuale ken Dios kineki, porke ya tikatej ya itech
itlamian tonaltin iwan tlakaj kichiwaj miek tlamantle
mach kuale.
\v 17 Amo xiekan kej yeskia mach ajsitok namotlalnamikilis,
sino xikmomakakan kuenta tlanon kineki in toSeñor xikchiwakan.
\v 18 Amo xitlawantinemikan, porke yon welis amechixpolos.
Okachi kuale ximotemitikan de Espíritu Santo iwan xikkawilikan
Yej ma amechyekana.
\v 19 Ximoyolojchikawakan se iwan oksé ika salmos, ika
himnos iwan ika tlakuikale de weyikixtilistle para Dios.
Xiktlakuikilikan toTajtzin Dios iwan xikweyikixtikan
ika nochi namoyolo.
\v 20 Nochipa ximotlasojkamatikan inawak toPapan Dios
ika itoka in toSeñor Jesucristo por nochi tlan kichiwa
por tejwan.
\s Kenamij moneki nik tieskej itech tochan
\p
\v 21 Ximopalewikan se iwan oksé, para ijkón ankiteititiskej
nik ankitlakitaj in Dios.
\p
\v 22 Namejwan ansiwamej moneki ximotekawilikan ma amechyekanakan
namookichwan ijkón ken ankikawiliaj ma amechyekana toSeñor.
\v 23 Porke in tlakatl moneki yen kiyekanas isiwa, ijkón
ken Cristo yen techyekana tejwan katlej titlaneltokakej
iwan katlej tikatej kej itiopan. Cristo techmakixtia
iwan techyekana porke Yej kajki kej totzontekon iwan
tejwan tikatej kej itlalnakayo.
\v 24 Iwan ijkón ken tikkawiliaj in Cristo ma techyekana
tejwan katlej tikatej kej itiopan, ijkón noijki moneki
in siwamej ma kikawilikan inmokich ma kinyekana itech
nochi tlamantle.
\p
\v 25 Tlakajtin, xikintlasojtlakan namosiwawan, ijkón
ken Cristo otechtlasojtlak tejwan katlej tikatej kej
itiopan iwan omotemakak por tejwan tinochtin.
\v 26 Ijkón okichij para techchipawas iwan para ma tiekan
de Yej iaxkawan. Yej otechchipaj de totlajtlakol, iwan
kuale otechpajpakke nijkuak otikijtojkej nik tiktlaliaj
nochi in totlaneltokalis itech itlajtol.
\v 27 Iwan para tejwan, katlej tikatej kej itiopan, ma
timoketzakan ixpan kej se novia kuakualtzin chijchitok,
katlej mach sokíoj, mach xojxolochtik iwan nion mach
kipia itlaj oksé tlamantle mach kuale. Ijkón Yej kineki
ma tiekan tejwan katlej tikatej kej itiopan, kineki ma
tiekan tichipawakej iwan amo ma tikpiakan nion itlaj
tlajtlakole katlej ika welis techistlakawiskej.
\v 28 Ijkón ken tlakatl kitlasojtla itlalnakayo, ijkón
noijki moneki ma kitlasojtla isiwa. Akin kitlasojtla
isiwa motlasojtla yej inewian.
\v 29 Porke mach akaj tlakatl kikokolia itlalnakayo,
sino kitlamaka iwan kimalwia. Cristo no ijkón towan
kichiwa porke tejwan tikatej kej itiopan.
\v 30 Tejwan tipowij itech itlalnakayo, iwan inakayo
iwan iomiowan yon yen tejwan.
\v 31 Porke in tiotlajkuilole ijkín kijta: “Por yonik
se tlakatl kikajtewa ipapan iwan imaman para mosetilia
iwan isiwa, iwan de omen mochiwa sa se tlakatl.”
\v 32 Sa tekitl owij para se kimomakas kuenta in yin
tlamantle katlej miekej mach welij kimomakaj kuenta,
pero Dios techititia nik in tejwan katlej titlaneltokaj
inawak Cristo timochiwaj san se iwan Yej.
\v 33 Ijkón kiné, kada se tlakatl moneki ma kitlasojtla
isiwa ijkón ken yej motlasojtla, iwan kada se siwatl
moneki ma kitlakita iokich.
\c 6
\p
\v 1 Konemej, namejwan katlej antlaneltokaj inawak toSeñor,
moneki xikintlakitakan namotajwan, porke yon sa tekitl
kuale.
\v 2 In tiotlajkuilole kijta: “Xiktlakita mopapan iwan
momaman.” Iwan de yen majtlaktin tlanawatiltin, yen yin
achtoj tlanawatile kan noijki techilwia nik in Dios
techtiochiwas tla tikneltokaskej itlajtol.
\v 3 Ijkín kijta: “Ijkón xikchiwa para kuale tietos
iwan ijkón tikpias nemilistle wejkawitl ixko yin tlaltikpak.”
\p
\v 4 Namejwan antetajmej, amo xikinkualanikan namopilwan,
sino moneki kuale xikinyekanakan iwan kuale xikinmachtikan
itech itlajtol in toSeñor.
\p
\v 5 Namejwan katlej ankatej kej antlanamaktin, xikintlakitakan
namotekowan ixko yin tlaltikpak. Xikintlakitakan iwan
xikinmiimakasikan, iwan noijki xikintekipanokan ika nochi
amoyolo kej yeskia yen Cristo ankitekipanoaj.
\p
\v 6 Nochipa xitekipanokan kuale iwan amo san nijkuak
amechtlatok namoteko, para ma amechita nik kuale antekipanoaj.
Sino moneki xitekipanokan ijkón ken moneki tekipanoskej
itekipanojkawan in Cristo. Xikchiwakan ika nochi amoyolo
ken Dios kineki.
\v 7 Xitekipanokan ika pakilistle kej yeskia antekipanoaj
para yen toSeñor iwan amo para akaj oksé tlakatl.
\v 8 Namejwan kuale ya ankimatij ke kada se tlakatl,
kox tlanamaktle o noso amo tlanamaktle, in toSeñor kitlaxtlawis
tla kichiwas tlan kuale.
\p
\v 9 Iwan namejwan katlej antekomej, moneki noijki ijkón
xikchiwakan inwan namotekipanojkawan katlej ankinpiaj
kej tlanamaktin, iwan amo xikinmajmawtikan. Xikelnamikikan
nik namejwan iwan yejwan ankipiaj san se amoTeko ompa
ilwikak, porke Yej techita tinochtin san se parejo.
\s Dios techmaka tlan ika timopalewiskej
\p
\v 10 Iwan axan, nokniwan, ximochikawakan inawak toSeñor
ika ipoder, porke yon ipoder mach akaj welis kitlanis.
\v 11 Xiktekipanoltikan nochi tlan Dios amechmaka para
ika ximopalewikan, iwan ijkón ankitlaniskej in diablo
nijkuak kinekis amechmayawis ika itlakajkayawalis.
\v 12 Porke tejwan mach timomagaj inwan tlakaj katlej
kipiaj inmeso iwan innakayo ken tejwan. Tejwan timomagaj
(tikmomakaj) inwan ejekamej mach kualtin katlej kipiaj
tekiwajkayotl, katlej kipiaj chikawalistle, katlej tlatlayekantokej,
iwan katlej kipiaj poder ixko yin tlaltikpak ijtik tlatleyualotl.
Yonmej ejekamej mach kualtin kinyoltilanaj in tlakaj
para ma kichiwakan tlan amo kuale, iwan nemij ixko ejekatl.
\v 13 Por yonik, moneki xiktekipanoltikan nochi tlan
Dios techmaka para ika timopalewiskej, para ijkón welis
ankixikoskej nijkuak in yonmej ejekamej mach kualtin
kinekiskej amowan mokitzkiskej. Iwan nijkuak nochi ya
ankixikojkej, namejwan anmoyekketoskej.
\v 14 Moneki ximoyekketokan kiné, iwan ximotlajkoilpikan
ika tlan melawak ken se soldado motlajkoilpia nijkuak
yawi temagati (temakatij). Iwan xichipawkanemikan kej
yeskia ankonakiaj se tepostle namoelpan para ika anmotzakuiliskej
ken katlej konakia se soldado.
\v 15 Ximoyejyektlalikan para ankitematiltiskej in kuale
tlajtole katlej temakixtia katlej kitemaka yolosewilistle,
ijkón ken se soldado moyejyektlalia ika ikakuan para
yas temagati (temakatij).
\v 16 Iwan katlej okachi moneki, yen xikpiakan namotlaneltokalis
para ika ximopalewikan kej yeskia se tepostle patlawak,
ken katlej kipiaj in soldadojtin, para ika ximotzakuilikan
nijkuak in diablo amechmojmotlas ika iflechajwan tlikuitokej.
\v 17 Xikpiakan namonemakixtilis kej se kasko para ika
ximotzakuilikan itech namotzontekon, ijkón ken se soldado
motzakuilia itech itzontekon ika se kasko. Iwan noijki
xikpiakan itlajtol in Dios kej se espada katlej techmaka
in Espíritu Santo.
\v 18 Nochipa ximotiotzajtzilijtokan. Xiktlatlawtikan
iwan xiktlajtlanilikan in toTajtzin Dios nochi iEspíritu
Santo. Xiijsatokan iwan amo xikkawakan de ximotiotzajtzilikan
por nochtin katlej iaxkawan in Dios.
\v 19 Noijki ximotiotzajtzilikan por nej, para Dios ma
nechmaka tlajtole nijkuak nitlapoas, para ma nitlapoa
ika ixchikawalistle nijkuak niktematiltis in kuale tlajtole
katlej temakixtia katlej achtoj mach akaj okimatia.
\v 20 Dios onechtlalij kej nitlatitlanile para ma niktematilti
in yon kuale tlajtole. Iwan por yonik axan niijilpitok
ika kadena nian telpiloyan. Ximotiotzajtzilikan por
nej para ma nitetlapowi ika ixchikawalistle ijkón ken
moneki.
\s Pablo okonintlajpaloj in tokniwan
\p
\v 21 Tíquico, in totetlasojkaikni, yej amechmatiltis
nochi tlan nipanotiwitz iwan tlan axan nikchiwa. In
tokni Tíquico yej kitekipanoa in toTajtzin Dios iwan
nochipa kichiwa ken moneki.
\v 22 Por yonik niktitlani amonawak, para yej ma amechilwi
kenamij tikatej iwan ijkón ma amechyolojchikawa.
\p
\v 23 ToPapan Dios iwan toSeñor Jesucristo ma kinmakakan
in tokniwan yolosewilistle iwan tlasojtlalistle ika
tlaneltokalistle.
\v 24 Iwan ma Dios kintiochiwa nochtin katlej kitlasojtlaj
in toSeñor Jesucristo ika tlasojtlalistle katlej mach
keman mopatla. Ijkón ma yeto.