\id PHP
\h Filipenses
\toc1 Filipenses
\mt SAN PABLO ITLATITLANIL IN DIOS OKINTLAJKUILILIJ IN TLANELTOKAKEJ DE FILIPOS
\c 1
\s Nijkuak in Pablo otzaktoka telpiloyan okonintlajkuililij in tlaneltokakej de Filipos
\p
\v 1 Nej niPablo iwan tokni Timoteo katlej nowan kajki,
tiktekipanoaj in toTeko Jesucristo. Tamechontlajkuililiaj
aminochtin namejwan, iwan aminochtin katlej antlayekankej,
iwan aminochtin katlej antlapalewijkej itech tiopan,
katlej anchantij itech weyikan de Filipos, katlej Dios
amechpia kej iaxkawan porke ansetitokej san se iwan
Cristo Jesús.
\v 2 ToPapan Dios iwan toSeñor Jesucristo ma amechmakakan
inteiknotlamachilis iwan inyolosewilis.
\s Pablo omotiotzajtzilij por yen tlaneltokakej
\p
\v 3 Nochipa nijkuak namechelnamiki, nimotlasojkamati
inawak toTajtzin Dios.
\v 4 Iwan sa tekitl nipaki nijkuak nimotiotzajtzilia
inawak Dios por aminochtin namejwan.
\v 5 Porke desde ijkuak ankineltokakej in kuale tlajtole
katlej temakixtia iwan asta axan, namejwan antekipanojtiwitzej
nowan para ke oksekimej tlakaj ma kikakikan in yon kuale
tlajtole.
\v 6 Kuale nikmati nik in Dios, katlej opéj kichiwa kuale
tekitl ipan namoyolo nijkuak ankineltokakej, kiseguiros
ijkón kichijtos asta nekáj tonale nijkuak Jesucristo
witz.
\v 7 Ijkón nikyejyekoa de amejwan iwan nikita kuale
ijkón nikyejyejkos porke sa tekitl namechtlasojtla.
Porke namejwan iwan nej Dios techsepanmaka iteiknotlamachilis.
Maski nijkuak nitzaktok, o noso nijkuak nikaj inmixpan
tekiwajkej, namejwan annechpalewiaj para nikinmatiltia
in tlakaj nik melawak tlan kijta itlajtol in Dios.
\v 8 Dios kuale kimati nik in nej ipan melajka namechtlasojtla,
namechtlasojtla ika nochi in tlasojtlalistle katlej
Jesucristo nechmaka.
\v 9 Niktlajtlanilia in toTajtzin Dios xikpiakan okachi
miek tlasojtlalistle, iwan xikpiakan okachi miek ixtlamachilistle
iwan tlalnamikilistle.
\v 10 Para ijkón nochipa xikmatikan katlij yen kuale
katlej moneki ankichiwaskej, para xikpiakan namonemilis
chipawak iwan ijkón amakaj welis amechtlajtlakoltis
de itlaj itech nekáj tonale nijkuak in Cristo witz.
\v 11 Jesucristo amechpalewis para xikchiwakan miek
tlamantle tlan kuale. Ijkón nochtin kiweyikixtiskej
iwan tlapoaskej kuale de toTajtzin Dios.
\s Para nej mach nikpia nemilistle tla Cristo amo kajki nowan
\p
\v 12 Nokniwan, nikneki xikmatikan ke nochi yin tlajyowilistle
katlej nipanoa, kinpalewia miekej oksekimej katlej kikakij
iwan kineltokaj in kuale tlajtole katlej temakixtia.
\v 13 Nochtin in soldadojtin katlej katej itech ipalacio
in rey, iwan nochtin oksekimej kimatij nik nitzaktok
porke nikneltoka in Cristo.
\v 14 Iwan miekej tlaneltokakej okachi moyolojchikawaj
tlaneltokaj inawak Cristo porke nechitaj nitzaktok.
Iwan por yonik mach ok momawtiaj para kitematiltiskej
itlajtol in Dios.
\p
\v 15 Melawak, sekimej tetlapowiaj de Cristo porke notech
moxikoaj, iwan kinekij yejwan okachi ma kinchiwilikan
kuenta iwan nej amo. Pero oksekimej tetlapowiaj de itlajtol
in Dios ika kuale inyolo.
\v 16 Sekimej tetlapowiaj de Cristo porke melawak kitlasojtlaj
in toSeñor, kimatij nik in Dios okinekke nian ma nechtzakuakan
para welis nikinmilwis de itlajtol in Dios katlej nian
katej.
\v 17 Pero oksekimej tetlapowiaj de Cristo para moweyinekiskej.
Amo tetlapowia ika kuale inyolo. Kinekij okachi ma nitlajyowi
nian ijtik telpiloyan kan nitzaktok.
\v 18 Pero mach itlaj kijtosneki tla tetlapowiaj de
Cristo ika kuale inyolo o noso amo. Porke tla tetlapowiaj
de Cristo, yen yon tlan okachi nechpaktia.
\p Yen yon tlan okachi nechpaktijtos.
\v 19 Porke kuale nikmati nik nimakisas de tlan nipanoa
iwan nechkajkawaskej, porke namejwan anmotiotzajtziliaj
por nej iwan porke iEspíritu in Jesucristo nechpalewis.
\v 20 Tlan nej nikneki iwan tlan nej nikchia ika nochi
noyolo yen amo nikchiwas itlaj tlan ika welis nipinawas.
Yen yon tlan nej nikchia. Pero nikneki nitetlapowis
de Cristo ika ixchikawalistle ijkón ken nochipa nikchiwa
para notech ma kitakan iweyilis in Cristo, iwan mach
nitlanemilia tla nechmiktiskej o noso amo.
\v 21 Porke tla nej niyolitos, niyolitos para Cristo.
Iwan tla nimikis, sa tekitl miek niktlanis, porke nietos
iktlanke (ik tlami) iwan Cristo.
\v 22 Pero tla ok niyolitos itech yin notlalnakayo, nitekipanos
para Dios para okachi miekej ma kineltokakan. Tonses
mach nikmati kox nikneki niyolitos o noso kox nikneki
nimikis.
\v 23 Mach nikmati katlij yen nikneki. Kanaj niknekiskia
okachi kuale ma nimiki para nieti iwan Cristo, porke
yen yon tlan okachi kuale para nej.
\v 24 Pero para amejwan okachi kuale tla nej ok niyolitos.
\v 25 Nej nikmati nik yen yon okachi kuale para amejwan.
Nikmati nik ok nietos amowan para namechpalewis para
okachi ximoskaltikan iwan okachi xikpiakan pakilistle
itech namotlaneltokalis.
\v 26 Por yonik, nijkuak oksemi amowan nietos, namejwan
okachi ankiweyikixtiskej in Cristo Jesús, porke oksemi
amowan nietos.
\p
\v 27 Namejwan xiekan ijkón ken moneki yeskej katlej
yokineltokakej in kuale tlajtole katlej temakixtia.
Iwan tla nias namechitati o noso amo, nej nikneki nikmatis
nik namejwan kuale anmoyekketokej iwan ankipiaj san
se amoyolo. Iwan nikneki nikmatis nik ansepantekipanoaj
para oksekimej ma kineltokakan in kuale tlajtole katlej
temakixtia.
\v 28 Iwan nion amo ximotekawilikan ma amechmajmawtikan
katlej amechkokoliaj. Porke ijkón mota nik melawak yejwan
yawij kan tlaixpolojkan, pero namejwan Dios yoamechmakixtij
iwan yoamechmakak yankuik nemilistle, katlej Dios ijkón
okimonekiltij.
\v 29 Dios okimonekiltij namejwan xitlaneltokakan inawak
Cristo, iwan noijki okimonekiltij xitlajyowikan por Yej.
\v 30 Namejwan iwan nej parejo titlajyowiaj por Cristo.
Namejwan achtoj ya ankimomakakej kuenta kenik onitlajyowij
por Yej. Iwan asta axan nitlajyowijtok ijkón ken ya
ankimatkej.
\c 2
\s Jesús omoiknomatke iwan Dios okiweyijkatlalij
\p
\v 1 Ya ankimatij nik in Cristo amechyolojchikawa, iwan
itlasojtlalis amechyolalia. Iwan noijki ankimatij nik
in Espíritu Santo kajki amowan iwan noijki ankimatij
nik namejwan anmotlasojtlaj iwan anteiknomatij.
\v 2 Tonses, xikchiwakan de ma nikpia miek pakilistle.
Xikpiakan san se namotlalnamikilis iwan ximotlasojtlakan
se iwan oksé. Xikpiakan san se amoyolo iwan xiekan san
se tlajtole (de akuerdo).
\v 3 Amo xiktemokan para ankipiaskej tlan ankinekij
san para amejwan, iwan nion amo xikchiwakan itlaj tlan
ika amechweyikixtiskej in tlakaj por tlan ankichiwaj
para ika anmoweyinekiskej. Sino namejwan xikinmitakan
oksekimej nik okachi wejweyikistokej (wejweyititokej)
ke amejwan.
\v 4 Amo xikchiwakan tlan kuale san para amejwan, sino
noijki xikchiwakan tlan kuale para oksekimej.
\p
\v 5 Namejwan xikpiakan namotlayejyekolis ijkón ken
Jesucristo okipixke nijkuak owitza ixko yin tlaltikpak.
\v 6 Maski in Cristo Yej Dios, mach okinekke omoteititij
kej Dios ika ipoder para ma kitakan in tlakaj nik yen
Dios.
\v 7 Sino okikaj se lado iweyikixtilis iwan omochij
tlakatl ken tejwan. Omochij kej se tlakatl tepalewij,
iwan otlakatke itech se siwatl ijkón ken tejwan otitlakatkej.
\v 8 Iwan nijkuak oyeka kej se tlakatl, omoiknomatke
iwan okineltokilij tlan iPapan okilwij iwan asta omotemaktij
(omotemaktilij) para ma kimiktikan, iwan okimiktijkej
itech se krus.
\v 9 Por yonik toTajtzin Dios okiweyijkatlalij iwan
okimakak se itoka katlej okachi importante ke oksekimej
intoka. Kijtosneki Jesús yen okachi weyikistok (weyititok)
de nochtin.
\v 10 Para ijkón nochtin katlej katej ilwikak iwan katlej
katej ixko yin tlaltikpak, iwan noijki katlej katej itlampa
tlale, ma motlankuaketzakan iyakapan Jesús nijkuak kikakiskej
itoka.
\v 11 Iwan ijkón nochtin kijtoskej nik in Jesucristo
yen toweyiTlanawatij, iwan ijkón ma kiweyikixtikan toPapan
Dios.
\s In tlaneltokakej katej kej tlanextin ixko yin tlaltikpak
\p
\v 12 Ijkón kiné, notetlasojkaikniwan, namejwan nochipa
ankineltokayaj itlajtol in Dios nijkuak nej onieka amowan,
pero axan okachi moneki xikneltokakan porke axan nikaj
wejka de amejwan. Xikchiwakan nochi tlan Dios kineki
para ma mota nik melawak in Dios yoamechmakixtij. Iwan
xiktlakitakan in Dios ika nemawtile para amo ankichiwaskej
tlan amo kuale katlej Yej mach kiwelita.
\v 13 Dios tekipanoa ipan namoyolo para xiknekikan xikchiwakan
tlan kuale tlan Yej kineki. Noijki amechmaka chikawalistle
para kuale xikchiwakan tlan Yej kipaktia.
\p
\v 14 Nochi tlan ankichiwaj xikchiwakan ika kuale. Amo
ximoixtokakan por itlaj tlamantle tlan ankichiwaj.
\v 15 Para ijkón amakaj ma amechtlajtlakolti de itlaj,
porke namejwan anyolchipawakej ijkón ken moneki ma yekan
ikonewan in Dios. Moneki xiekan anchipawakej para ijkón
amakaj welis amechtlajtlakoltis maski ankatej inwan
tlakaj katlej mach kualtin iwan yolbierotikej. Iwan
ijkón namejwan anyeskej kej antlanextin inmixpan tlakaj
de yin tlaltikpak.
\v 16 Xikintlapowikan in tlakaj de itlajtol in Dios
katlej kitemaka yankuik nemilistle, iwan nijkuak in Cristo
walmokuepas, nipakis amonawak. Nipakis porke mach san
tekitl onamechmachtij de itlajtol in Dios, iwan nion
mach san tekitl onitekipanoj.
\v 17 Maski ma nechmiktikan por yen Cristo, porke namejwan
ankineltokakej nijkuak nej onamechtlapowij, nej sa tekitl
nipakis. Yon kej yeskia nimotemaktia (nimotemaktilia)
inawak Dios ipan artal kej se yolkatl katlej kimiktiaj
iwan toyawi ieso ipan se tlamantle katlej namejwan ankimakaj
in Dios, kijtosneki yen namotlaneltokalis katlej ankipiaj
inawak. Iwan por yonik, nej nikneki namejwan noijki nowan
xipakikan.
\v 18 Por yonik, kiné, xipakikan iwan nowan xikpiakan
pakilistle tla nechmiktiskej por yen Cristo.
\s Timoteo iwan Epafrodito
\p
\v 19 Tla toSeñor Jesús kimonekiltis, nikchia san niman
niktitlanis in Timoteo ma amechitati. Iwan ijkón nej
sa tekitl nipakis nijkuak yej mokuepati porke nechmatiltis
kenamij ankatej.
\v 20 Porke mach onkaj oksé, san yen Timoteo katlej kiyejyekoa
ijkón ken nej nikyejyekoa. Iwan ika nochi iyolo motekipachoa
por amejwan.
\v 21 Porke nochtin kintekipachoa itlaj tlan kuale san
para yejwan, iwan mach kintekipachoa itlaj tlan kuale
para Jesucristo.
\v 22 Pero namejwan ya ankixmatij in Timoteo iwan ya
ankimatij nik chipawkanemi. Yej nechpalewia para titetlapowiaj
de yen kuale tlajtole katlej temakixtia, yej nechpalewia
ijkón ken se tekone kipalewia ipapan.
\v 23 Ijkón kiné, nikneki san niman namechtitlanilis
in Timoteo nijkuak nej nikmatis tlanon kichiwaskej nowan
nian kan nitzaktok.
\v 24 Iwan nikmati ipan noyolo nik in Dios noijki nechkawilis
ma niwia ma namechitati san niman.
\p
\v 25 Pero axan nikmolwia moneki namechtitlanilis in
Epafrodito. Yej se nokni noijki tlaneltokak, yej iwan
nej san sekan tiktekipanoaj in Cristo, iwan san ken tomen
tipanoaj tlajyowilistle ken panoaj in soldadojtin. Namejwan
annechwaltitlanilijkej para ma nechpalewi itech tlan
omonekia nechpalewis.
\v 26 Pero axan yej kineki mokuepas amechitati aminochtin,
iwan sa tekitl tlanemilia porke namejwan ankimatkej
nik in yej omokokoaya.
\v 27 Iwan melawak nik in yej omokokoaya asta ya mikini.
Pero Dios okiknomatke, iwan amo san yen okiknomatke sino
nej noijki onechiknomatke, para amo ma nikpia okachi
neyolkokole de tlan ya nikpia.
\v 28 Por yonik, axan sa tekitl nikneki namechtitlanilis
para namejwan xipakikan nijkuak ankitaskej oksemi, iwan
para nej ayakmo ma nimoyolkoko okachi.
\v 29 Xikresibirokan ika miek pakilistle porke yej noijki
tokni inawak in toSeñor. Iwan nochipa xikintlakitakan
nochtin katlej kichiwaj ken Epafrodito.
\v 30 Porke yej ya meroj mikini porke kitekipanoa in
Cristo. Sa tekitl omokokoaya iwan ya ora mikini porke
onechpalewij ika tlan namejwan mach anwelikej annechpalewijkej.
\c 3
\s Moneki ma tikixmatikan in Cristo ipan melajka
\p
\v 1 Iwan axan nokniwan, xipakikan inawak toSeñor. Mach
nechtekimaka para oksemi namechilwis tlan yonamechijkuililij,
porke yon amechpalewis.
\v 2 Ximotlachilikan de yen tlakaj mach kualtin katlej
kichiwaj kej itzkuinmej. Porke yejwan tlamachtiaj iwan
kijtaj moneki anmosirkunsidaroskej para Dios welis amechmakixtis.
\v 3 Pero yen tejwan katlej melawak tikatej tisirkunsidadojtin
porke tiktekipanoaj in Dios ijkón ken Espíritu Santo
techititia ma tikchiwakan. Iwan sa tekitl tipakij inawak
Cristo Jesús, iwan amo tikchiaj timomakixtiskej ika tlan
tejwan welis tikchiwaskej.
\v 4 Iwan tla kualtini ijkón se momakixtiani, tonses
yen nej okachi nitlayekantoskia para nimomakixtis. Tla
akaj kiyejyekoa ijkón welis momakixtis, tonses nej okachi
kuale nikmatini nik melawak nimomakixtis.
\v 5 Porke nej onechsirkunsidarojkej nijkuak onikpiaya
chikome tonale de onitlakatke. Nej niwalajtok de familia
de Israel, iwan niwalajtok nelwatl de Benjamín. Nej onitlakatke
nihebreo porke notajwan noijki hebreos. Nej onieka nifariseo
katlej okachi chikawak kitlakitaj intlanawatil in judiojtin.
\v 6 Sa tekitl oniktlakitaya intlamachtil in fariseos
ika nochi noyolo iwan por yonik asta onikintlajyowiltiaya
in tlaneltokakej. Iwan amakaj owelia onechistlakawiaya
de itlaj, porke onikchiwaya nochi tlan kijta intlanawatil
in judiojtin.
\v 7 Pero nochi yon tlamantle katlej para nej achtoj
onikitaya okipiaya miek ipatij, satepan onikmomakak kuenta
nik mach itlaj ipatij nijkuak onikneltokak in Cristo.
\v 8 Nej nikita mach itlaj ipatij nochi yon tlamantle.
Katlej okachi moneki kijtosneki yen nikixmatis in Jesucristo
kej noSeñor. Por yen Cristo onikaj nochi yon tlamantle
iwan nikita kej itlaj tlajsole katlej mach ok itlaj
ipatij, para welis nikpias nochi tlan welis nechmakas
in Cristo.
\v 9 Nikneki in Dios ma nechita nik nisetitok san se
iwan Cristo. Nej nikaj nichipawak de notlajtlakol porke
onikneltokak in Cristo. Pero tla nikchiwaskia tlan kijta
itlanawatil in Moisés, in Dios mach nechitaskia kej nichipawak
de notlajtlakol.
\v 10 Nochipa nikneki okachi nikixmatis in Cristo ipan
noyolo. Nikneki nikmachilis ipoder katlej ika omoyolkuik.
Yej otlajyowij por nej iwan nej noijki nikneki nitlajyowis
por Yej. Nikneki nochipa nimotemaktis (nimotemaktilis)
inawak maski ma nimiki por Yej,
\v 11 porke nikneki nimoyolkuis (nimoyolitis) nijkuak
moyolkuiskej nochtin mikkamej.
\s Ma timochijchikawakan para tieskej ken Dios kineki
\p
\v 12 Amo kijtosneki ke ya nikpia nochi yon tlan nikijta.
¡Amo! Nion mach ya nikaj ken Dios kineki. Pero nimochikajtok
para welis nikmoaxkatis in yon nemilistle, ijkón ken
Cristo onechmoaxkatij.
\v 13 Nokniwan, mach ya nikpia nochi yon. Pero nikchiwa
de nikelkajtiw nochi tlan yopanok iwan nimochijchikawa
para nikajsis nochi tlan onkaj tlayakapan,
\v 14 para najsiti kan Dios kineki ma najsiti. Iwan
Dios nechmakas in tlatliokolile ompa ilwikak katlej
Yej yokijtoj techmakas tinochtin tejwan katlej yotechnotzke
por medio de Cristo Jesús.
\p
\v 15 Aminochtin namejwan katlej ya anchijchikawakej
itech namotlaneltokalis moneki xikyejyekokan noijki
ken nej nikyejyekoa. Iwan tla namejwan ayamo ijkón ankiyejyekoaj,
Dios amechititis para xikyejyekokan ken Yej kineki.
\v 16 Pero moneki nochipa ma tiekan ipan iojwi in toTajtzin
Dios katlej ya ipan tiwitzej, para amo tikkawaskej de
tikneltokaskej tlan yotikneltokakej.
\p
\v 17 Nokniwan, namejwan xikchiwakan ijkón ken nej nikchiwa.
Iwan xikinmitakan katlej nemij ijkón ken tejwan tinemij
para namejwan no ijkón xinemikan.
\v 18 Nej ya miekpa yonamechilwij, iwan axan oksemi namechilwia
asta nichoka, nik katej miekej tlakaj katlej nemij kej
ikontraswan in Cristo porke amo kineltokaj itlajtol
in Dios katlej kijta nik in Cristo omikke itech krus
por tejwan.
\v 19 Yonmej tlakaj ajsis tonale in Dios kinmixpolos.
Porke yejwan mach kiweyikixtiaj in Dios, sino kiyejyekoaj
ipan inyolo kenik kipaktiskej intlalnakayo. Moweyinekij
ika tlan mach kuale kichiwaj katlej moneki ika pinawaskej.
Yejwan kintekipachoa san yen tlamantin katlej onkaj
ixko yin tlaltikpak.
\v 20 Pero tejwan amo, tejwan tikpiaj tochan ompa ilwikak
kan ya ompa tipowij. Iwan axan sa tikchixtokej ma wiki
de ompa ilwikak in toSeñor Jesucristo in toTemakixtij.
\v 21 Yej techpatilis in totlalnakayo katlej mach chikawak
iwan miki, iwan techmakas se totlalnakayo yankuik ken
Yej itlalnakayo katlej kipia imawisotlanex. Iwan welis
techpatilis totlalnakayo ika ipoder katlej ika kinnawatijtok
nochtin tlamantin.
\c 4
\s Nochipa xipakikan inawak toSeñor
\p
\v 1 Por yonik, notetlasojkaikniwan, sa tekitl namechtlasojtla
iwan ika nochi noyolo nikneki namechitas. Nipaki por
amejwan, porke namejwan ankatej kej yeskia se korona
katlej Dios nechmaka. Ximoyekketokan kiné ipan iojwi
in toSeñor.
\p
\v 2 Nikintlatlawtia in siwamej Evodia iwan Síntique
ma yekan san se tlajtole (de akuerdo) nijkuak kitekipanoaj
in toSeñor.
\v 3 Iwan noijki nimitztlatlawtia tej nokni, katlej sa
tekitl kuale nowan titekipanoa, xikinpalewi in yonmej
siwamej. Porke yejwan sa tekitl onechpalewijkej, otekipanojkej
nowan para otiktematiltijkej in kuale tlajtole katlej
temakixtia ijkón ken Clemente iwan oksekimej onechpalewijkej.
Yejwan intoka ya kajki ijkuilitok itech libro kan ijkuilitok
intoka nochtin akinmej kipiaj yankuik nemilistle katlej
mach keman tlamis.
\p
\v 4 Xipakikan nochipa porke namejwan ya anpowij inawak
toSeñor. Oksemi namechilwia: ¡Xipakikan!
\v 5 Nochtin ma kitakan nik namejwan ankualtin tlakaj.
Ya ajsi tonale para witz in toSeñor.
\p
\v 6 Amo xitlanemilikan ika itlaj tlamantle, sino nochipa
ximotiotzajtzilikan inawak Dios por nochi tlan ankinekij.
Xiktlajtlanilikan iwan noijki ximotlasojkamatikan inawak.
\v 7 Iwan ijkón ankipiaskej yolosewilistle katlej witz
de Dios, katlej sa tekitl weyi iwan asta mach akaj tlakatl
weli kimomaka kuenta. Iwan yon yolosewilistle kimonekuitlawis
namoyolo iwan namotlalnamikilis porke ansetitokej san
se iwan Cristo Jesús.
\s Xitlayejyekokan itech tlan kuale
\p
\v 8 Iwan axan nokniwan, xikyejyekokan nochi tlan melawak,
nochi tlan moneki se kitlakitas, nochi tlan melajkayotl,
nochi tlan chipawak, nochi tlan kitemaka pakilistle, iwan
nochi tlan se weli kiyektenewa. Xikyejyekokan nochi
tlan kuale iwan nochi tlan moneki se tlapoas kuale de
itlaj tlamantle.
\p
\v 9 Xikchiwakan nochi tlan onamechmachtij, nochi tlan
onamechnajnawatij, nochi tlan annechkakilijkej, iwan nochi
tlan ankitakej onikchij. Iwan Dios katlej kitemaka yolosewilistle
amowan yetos.
\s Intlatliokolil in Filipenses katlej okimakakej in Pablo
\p
\v 10 Nej sa tekitl nipaki inawak toSeñor, porke namejwan
oksemi annechelnamikej iwan annechwaltitlanilijkej tlan
ika welis nimopanoltis. Yon mach kijtosneki ke namejwan
annechelkajkej para annechpalewiskej, sino porke namejwan
mach ankajsiaj kenik welis annechpalewiskej.
\v 11 Ijkín namechilwia amo porke nechpoloa tlan ika
nimopanoltis, porke nej yonimomatke nikaj ika pakilistle
ika tlan nikpia.
\v 12 Nikixmati kenamij nijkuak se amo kipia iwan nijkuak
se kipia. Nej yonimomatke nikaj ika pakilistle ika tlan
nikpia, nijkuak niixwitok iwan nijkuak nitiojsiwi, nijkuak
nechsobraroa iwan nijkuak mach itlaj nikpia.
\v 13 Nochi weli nikxikoa tlan nipanoa porke Cristo
nechpalewia.
\v 14 Pero namejwan kuale ankichijkej iwan annechpalewijkej
itech notlajyowilis katlej nipanotok.
\p
\v 15 Namejwan katlej anchantij itech weyikan de Filipos,
ankelnamikij nijkuak nej opéj nitetlapowia de yen kuale
tlajtole katlej temakixtia ompa itech estado de Macedonia.
Iwan nijkuak onikiske de Macedonia, san yen namejwan
annechpalewijkej tlan ika nimopanoltis.
\v 16 Iwan nijkuak ok onieka itech weyikan de Tesalónica,
kanaj keski buelta namejwan annechtitlanilijkej tlan
ika nimopanoltis.
\v 17 Mach kijtosneki niktemoa ma nechmakakan tlan ika
nimopanoltis, sino nej nikneki namejwan xikpiakan okachi
miek rikojyotl ompa ilwikak.
\v 18 Axan nikpia nochi tlan moneki iwan asta nechsobraroa
miek. Tlan namejwan annechwaltitlanilijkej por medio
de Epafrodito mach ok itlaj nechpoloa, iwan yon tlan
namejwan annechwaltitlanilijkej yon kej yeskia ankichichinojkej
kopale ajwiak para Dios, porke Dios kiwelita tlan namejwan
ankichiwaj.
\v 19 ToTajtzin Dios kipia weyi rikojyotl, iwan Yej amechmakas
nochi tlan amechpoloa por yen tlan Cristo Jesús okichij
por tejwan.
\v 20 Ma tikweyikixtikan toPapan Dios nochipa. Ijkón
ma yeto.
\s Pablo okonintlajpaloj
\p
\v 21 Ompa xikonintlajpalokan nochtin katlej iaxkawan
in Cristo Jesús. Tokniwan katlej nian katej nowan noijki
amechontlajpaloaj.
\v 22 Nochtin katlej iaxkawan in Dios katlej katej itech
yin weyikan, amechontlajpaloaj. Pero okachi amechontlajpaloaj
yejwan katlej tekipanoaj itech ipalacio in rey César.
\p
\v 23 ToSeñor Jesucristo ma kipia weyi iteiknotlamachilis
amonawak. Ijkón ma yeto.