\id COL
\h Colosenses
\toc1 Colosenses
\mt SAN PABLO ITLATITLANIL IN DIOS OKINTLAJKUILILIJ IN TLANELTOKAKEJ DE COLOSAS
\c 1
\s Pablo okintlajkuililij in tiopantlaneltokakej katlej katej itech weyikan de Colosas
\p
\v 1 Nej niPablo, nitlatitlanile de Jesucristo porke
Dios ijkón okimonekiltij. Nej iwan tokni Timoteo,
\v 2 namechijkuililia yin amatlajkuilole namejwan antokniwan
katlej anchantij itech weyikan de Colosas, namejwan katlej
ankatej anchipawakej inawak Dios iwan amo ankawaj de
antlaneltokaj inawak Cristo. ToPapan Dios ma kipia weyi
iteiknotlamachilis amonawak iwan ma amechmaka yolosewilistle.
\s Pablo omotiotzajtzilij por yen tlaneltokakej
\p
\v 3 Nochipa timotlasojkamatij inawak Dios, iPapan toSeñor
Jesucristo, nijkuak timotiotzajtziliaj por amejwan.
\v 4 Porke yotikmatkej nik kuale antlaneltokatokej inawak
Cristo Jesús, iwan nik kuale ankintlasojtlaj nochtin
katlej iaxkawan Dios.
\v 5 Porke namejwan ankichixtokej nekáj tonale nijkuak
Dios amechmakas ompa ilwikak tlan Yej kipixtok para
amejwan. Namejwan ya ankimatij tlan axan ankichiaj porke
ya ankikakej in melawak kuale tlajtole katlej temakixtia.
\v 6 Yon kuale tlajtole katlej temakixtia katlej amejwan
ankikakej, motematiltijtok itech nochi in tlaltikpak,
iwan kinyolpatlatok miekej tlakaj ijkón ken namejwan
oamechyolpatlak desde ijkuak ankikakej iwan ankimomakakej
kuenta katlej melawak iteiknotlamachilis in Dios.
\v 7 Yen yon tlan oamechmachtij in totetlasojkaikni
Epafras, katlej kitekipanoa in Dios ken nej, katlej tikmatij
nik kuale kitekipanoa in Cristo iwan katlej tekipanojtok
por amejwan.
\v 8 Yej otechilwij nik in Espíritu Santo oamechmakak
miek itlasojtlalis para ximotlasojtlakan se iwan oksé.
\p
\v 9 Por yonik tejwan desde nekáj tonale nijkuak otikmatkej
nik kuale antlaneltokatokej iwan anmotlasojtlaj, tejwan
mach tikkawaj de timotiotzajtziliaj por amejwan. Tiktlajtlaniliaj
in Dios ma amechpalewi para xikmatikan nochi tlan Yej
kineki iwan ma amechmaka ixtlamachilistle iwan tlalnamikilistle
katlej kitemaka in Espíritu Santo.
\v 10 Ijkón namejwan welis ankipaktiskej in Señor ika
namonemilis ijkón ken moneki yeskej nochtin katlej iaxkawan
Señor. Iwan welis ankichiwaskej nochi tlamantle tlan
kuale, iwan kada tonale okachi kuale ankiyekixmatiskej
in Dios.
\v 11 Dios kipia weyi ipoder iwan yon poder kipia weyikixtilistle,
iwan tiktlajtlaniliaj ma amechmaka chikawalistle ika
yon ipoder para ijkón welis ankixikoskej nochi tlajyowilistle
tlan anpanoskej iwan asta ankipiaskej pakilistle.
\v 12 Iwan xiktlasojkamachilikan in toPapan Dios, porke
okichij ma tiwelikan ma tikresibirokan tlan techtokaroa
inwan nochtin katlej iaxkawan in Dios, katlej katej ijtik
tlanextle kan Yej tlanawatia.
\v 13 Dios otechmakixtij de itech ipoder in tlatleyualotl
kan tlanawatia in Amo Kuale Tlakatl, iwan otechtlalij
kan tlanawatia iKone Jesús katlej toTajtzin Dios kitlasojtla.
\v 14 Iwan yen Jesús katlej otechkoj ika ieso para otechmakixtij
de itech ipoder in Amo Kuale Tlakatl, iwan otechtlapojpolwij
de nochi totlajtlakol.
\s Yotimotlapojpolwijkej iwan Dios ika Cristo imikilis
\p
\v 15 Mach akaj tlakatl weli kita in Dios iwan nion
mach akaj kixmati, pero Yej omoteititij por medio de
Cristo, iKone in toTajtzin Dios, katlej yoyeka desde ijkuak
Dios ayamo okichiwaya nochi tlan onkaj.
\v 16 Cristo Yej okichij nochi tlan onkaj itech ilwikak
iwan ixko yin tlaltikpak, katlej weli tikitaj iwan katlej
mach weli tikitaj. Noijki okintlalij in reytin, gobernadortin,
iwan katlej kipiaj tekiwajkayotl iwan poder itech ilwikak.
Nochi okichij in Cristo iwan nochi iaxka para ma kichiwakan
tlan Yej kineki.
\v 17 Cristo yoyeka desde ijkuak ayamo oyeka nochi tlamantle,
iwan ika ipoder nochi tlamantle kiseguiroa kuale yawi
asta axan.
\v 18 Tejwan tikmatij ke totzontekon yen kiyekana in
totlalnakayo. Cristo noijki kajki kej totzontekon katlej
techyekana tejwan titlaneltokakej iwan tikatej kej itlalnakayo.
Iwan yen tlayekanke de tiopan, kijtosneki nochtin katlej
kineltokaj. Itech Cristo opéj nochi in tlamantle, yen
achtoj omoyolkuik satepan de omikke, para yen okachi
weyikistos (weyititos) de nochi tlamantle.
\v 19 Porke in toPapan Dios okimonekiltij ke iKone Jesucristo
ma yeto ken Yej, iwan ma kipia nochi ipoder ken Yej kipia.
\v 20 Dios okimonekiltij noijki ke nochtin katlej katej
ixko yin tlaltikpak iwan katlej katej itech ilwikak,
ma motlapojpolwikan iwan Dios para ayakmo ma yekan kej
ikontraswan. Dios otechtlapojpolwij nijkuak Cristo omikke
iwan onokiwik ieso itech krus.
\p
\v 21 Namejwan achtoj mach ankixmatiaj in Dios, anyekaj
ankontrastin de Dios porke ankichiwayaj tlan amo kuale.
\v 22 Pero axan Dios yoamechtlapojpolwij por medio de
imikilis in Cristo nijkuak otlajyowij itech itlalnakayo.
Ijkón okichij para welis amechteixpantis inawak Dios
ya anyolchipawakej. Mach ok ankipiaskej nion itlaj tlajtlakole
iwan nion mach ok akaj welis amechistlakawis de itlaj
inawak Dios.
\v 23 Moneki kiné, ma titlaneltokakan ika nochi toyolo
iwan ma timoyekketokan itech totlaneltokalis. Amo semi
tikkawaskej in kuale tlajtole katlej temakixtia katlej
tikkaktokej iwan katlej techilwia nochi tlan kuale tlan
techchia ompa ilwikak. Yin kuale tlajtole katlej temakixtia
motematiltijtok itech nochi in tlaltikpak, iwan nej niPablo
noijki niktematiltia in yin kuale tlajtole.
\s Dios okitlalij in Pablo para ma kinpalewi in tlaneltokakej
\p
\v 24 Axan sa tekitl nipaki por yen tlajyowilistle katlej
nipanotok por amejwan. Nipanotok tlajyowilistle itech
notlalnakayo para nitlapalewis ma moajxiti de tlan poliwi
tlajyowis in Cristo itech itlalnakayo, itlalnakayo kijtosneki
yejwan tlaneltokakej.
\v 25 Dios onechtlalij ma nieto niitekipanoj para namechpalewis
namejwan, iwan para namechmatiltis nochi itlajtol in
Dios,
\v 26 kijtosneki, yen tlan achtoj in tlakaj mach okimatiaj
porke in Dios ayamo okinnextiliaya desde ijkuak opéj
in tlaltikpak. Pero axan Dios yokinnextilij nochtin
katlej iaxkawan.
\v 27 Dios okinekke ma kimatikan katlej iaxkawan katlej
achtoj mach akaj okimatia, de yen sa tekitl kuale tlamantle
iwan kuakualtzin katlej kinchiwilis katlej amo judiojtin.
Iwan yen yin katlej kineki nochtin ma kimatikan: ke
nijkuak kipiaskej in Cristo ipan inyolo, kuale ma kimatikan
nik kipiaskej parte itech imawisotlanex kan yetos in
Cristo.
\p
\v 28 Por yonik, san kan tiawij, tejwan titetlapowiaj
de Cristo. Tikinnajnawatiaj iwan tikinmachtiaj ika nochi
ixtlamachilistle katlej Dios techmaka, para ijkón welis
tikinteixpantiskej nochtin in tlakaj inawak Dios ya
chijchikawakej itech intlaneltokalis iwan ya setitokej
san se iwan Cristo Jesús.
\v 29 Por yonik nej noijki nitekipanoa chikawak ika
nochi chikawalistle katlej Cristo nechmaka ika ipoder.
\c 2
\p
\v 1 Nikneki xikmatikan nik in nej sa tekitl nimotekipachoa
nimotiotzajtzilia inawak Dios por amejwan, iwan por nochtin
in tlaneltokakej katlej katej itech weyikan Laodicea,
iwan noijki por nochtin oksekimej tlaneltokakej katlej
mach nechixmatij.
\v 2 Nimotekipachoa nimotiotzajtzilia inawak Dios porke
nikneki ximoyolojchikawakan, iwan ximosetilikan ika tlasojtlalistle,
para ijkón okachi xikweyilikan namotlalnamikilis, iwan
xikmatikan tlan ya wejkawitl in Dios mach okinnextiliaya
in tlakaj, kijtosneki yen Cristo.
\v 3 Porke itech Cristo kajki nochi in rikojyotl de
yen tlalnamikilistle iwan ixtlamachilistle.
\v 4 Ijkón namechilwia namejwan para amakaj ma amechkajkayawa
ika itlaj tlajtole kuakualtzin.
\v 5 Maski nej mach nikaj ompa amoyakapan, nej ompa nikaj
amowan ika noespíritu, iwan nipaki porke nikmati nik
kuale anmowikaj iwan anmoyekketokej itech namotlaneltokalis
inawak Cristo.
\p
\v 6 Por yonik, komo namejwan ya ankineltokakej in toSeñor
Jesucristo, axan xinemikan iwan Yej, ijkón ken Yej kineki.
\v 7 Ximonelwayotikan itech Yej ken se kuawitl monelwayotia
ijtik tlale. Iwan ximokitzkijtokan itech Yej ken se
tepamitl tlakitzkijtok ipan cimiento. Iwan ximochikawakan
okachi itech namotlaneltokalis ijkón ken oamechmachtijkej.
Iwan nochipa xikmakatokan tlasojkamachilistle in toTajtzin
Dios.
\s Yankuik nemilistle katlej onkaj itech Cristo
\p
\v 8 Namejwan xikpiakan kuidado para amakaj ma amechkajkayawa
ika tlamachtile iwan tlayejyekolistle katlej mach itlaj
inpatij iwan mach melawak. Porke yon tlamachtile kikixtiaj
de itech intlayejyekolis iwan de itech inkostumbre in
tlaltikpaktlakaj katlej tlanawatiaj ixko yin tlaltikpak,
iwan mach de itech itlamachtil in Cristo.
\p
\v 9 Porke Cristo kipia nochi tlan Dios kipia, maski
okipixke itlalnakayo ken tejwan nijkuak owitza ixko
yin tlaltikpak.
\v 10 Iwan namejwan mach itlaj amechpoloa tla ankatej
inawak Cristo, iwan tla se setitos iwan Yej, noijki se
tentos de Dios. Iwan Cristo kipia poder itech nochtin
tekiwajkamej iwan itech nochtin katlej kipia poder.
\v 11 Iwan namejwan por ansetitokej san se iwan Cristo,
kijtosneki namejwan ankiresibirojkej in sirkunsisión.
Pero amo yen sirkunsisión ken katlej kichiwaj in judiojtin
itech intlalnakayo, sino yin sirkunsisión yen katlej
Cristo okichij ipan toyolo. Katlej katej sirkunsidadojtin
ipan inyolo mach ok kichiwaj tlan amo kuale tlan kineki
kichiwas intlalnakayo.
\v 12 Nijkuak amejwan anmokuateekijkej, kijtosneki oamechtookakej
iwan Cristo, iwan noijki anmoyolkuikej iwan Yej. Porke
namejwan ankineltokakej in Dios katlej kipia poder katlej
okiyolitij in Cristo.
\v 13 Achtoj namejwan Dios amechitaya kej yeskia anmikkamej
por yen namotlajtlakol iwan por yen tlan amo kuale katlej
nochipa ankinekiaj ankichiwaskej ika namotlalnakayo.
Pero axan Dios yoamechyolitij iwan Cristo iwan yoamechtlapojpolwij
de nochi namotlajtlakol.
\v 14 Tejwan otiktewikiliayaj se kuenta, iwan mach otiweliaj
otiktlaxtlawayaj. Pero Dios yokipojpoloj yon kuenta.
Kej yeskia okiklabostookak itech krus ijkón ken Cristo
okiklabostookakej itech krus. Axan, yon kuenta mach ok
keman techtzakuilis porke mach ok tikpiaj.
\v 15 Dios otlatlanke de itech ipoder in Amo Kuale Tlakatl
iwan de itech inpoder in ejekamej mach kualtin. Iwan
okinpinatij inmixpan nochtin porke mach otlatlankej,
porke Cristo okintlanke nijkuak omikke itech krus.
\s Xiktemokan tlamantle de ilwikak
\p
\v 16 Por yonik, amo xikchiwakan kuenta tla akaj amechilwis
mach kuale tlan ankikuaj o noso tlan ankonij. Iwan noijki
amo xikchiwakan kuenta tla akaj amechixnamikis por amo
ankichiwaj ilwitl de yen judiojtin, ken nijkuak onkaj
selik metztle, o noso nijkuak mosewiaj in judiojtin itech
sábado.
\v 17 Nochi yon tlamantle okipiaya ipatij nijkuak ayamo
owalaya in Cristo, pero axan mach ok itlaj ipatij. Achtoj
otiekaj kej yeskia otiekaj itech se ekawitl, pero axan
ya tikatej itech Cristo de kan owalajtoka in yon ekawitl.
\v 18 Amo ximotekawilikan ma amechkixtilikan namotlatliokolil
nekatej katlej mochiwaj wel pasensiatzitzintin, kinweyikixtiaj
angelestin, nochipa kijtaj kitaj itlaj tlamantle kej
yeskia kiteemikij iwan kinekij nochtin ijkón ma kichiwakan.
Amo xikinneltokilikan iwan nion amo xikinkawilikan yejwan
ma amechilwikan tlanon moneki ankichiwaskej. Yejwan
moweyinekij itech se tlamantle katlej mach keman kitaj,
iwan kichiwaj san tlan yejwan kiyejyekoaj ipan intlalnamikilis.
\v 19 Pero yejwan mach mokitzkijtokej iwan Cristo, katlej
yen kajki kej itzontekon itlalnakayo. Pero tejwan tikatej
ken itlalnakayo iwan timokitzkijtokej iwan Yej, ijkón
ken totlalnakayo nochi mokikitzkijtok. Iwan yen Cristo
katlej techmaka chikawalistle para timoskaltiaj ijkón
ken Dios kineki.
\p
\v 20 Namejwan kuale xikmatikan nik ya anmikkej nijkuak
Cristo omikke, iwan ya anmakiskej de itech intlamachtil
iwan de itech inkostumbre in tlaltikpaktlakaj. ¿Tlanik
kiné ok ankichiwaj ken nekatej tlakaj katlej mach kixmatij
Dios? ¿Tlanik ankichiwaj tlan kijta intlanawatil,
\v 21 katlej kijta: “amo xikitzki yin tlamantle, amo
xikua yon tlamantle, amo xikmatoka nekáj tlamantle”?
\v 22 Nochi yon tlanawatile iwan tlamachtile kisa san
de itech intlayejyekolis in tlakaj, porke in tlakuale
omochij para se kikuas, iwan nijkuak se kikua ompa tlami.
\v 23 Yonmej tlanawatiltin motaj kej yeskia melawak
kualtin, porke akinmej kichiwaj yonmej tlanawatiltin,
sa tekitl motemaktiaj itech iwan kitlajyowiltiaj intlalnakayo
para mochikawaskej itech intlaneltokalis. Pero nochi
yon mach itlaj kinpalewia para ayakmo ma kinyoltilana
tlan kineki intlalnakayo.
\c 3
\p
\v 1 Ijkón kiné, tla namejwan Dios yoamechyolitij iwan
Cristo, xiktemokan ika nochi amoyolo tlan onkaj itech
ilwikak kan Cristo ewatok ik iyekma in toTajtzin Dios.
\v 2 Xiktlalikan namoyolo itech tlan onkaj ilwikak, amo
xiktlalikan namoyolo itech tlan onkaj ixko yin tlaltikpak.
\v 3 Para yen tlaltikpak namejwan ya ankatej kej yeskia
anmikkamej, iwan axan in yankuik namonemilis kajki tlatitok
inawak Cristo kan kajki in toTajtzin Dios.
\v 4 Itech nekáj tonale nijkuak monextis in Cristo katlej
otechyolitij ika inemilis, ijkuakón noijki namejwan anmonextiskej
iwan Yej itech imawisotlanex.
\s Katlej achtoj tonemilis iwan katlej yankuik tonemilis
\p
\v 5 Por yonik kiné, xikelkawakan nochi tlamantle tlan
amo kuale tlan onkaj itech namonemilis. Amakaj ma momekati,
amakaj ma kichijtinemi tlan amo chipawak, amo xikchiwakan
biero tlan kineki namotlalnakayo, amo xikkawilikan in
elewilistle ma amechyoltilana, amo xiknekikan ankipiaskej
okachi de tlan ya ankipiaj. Nochtin katlej kichiwaj
yon tlamantle, kikuepaj yen yon indios porke yen yon
tlan okachi kichiwaj.
\v 6 In tlakaj katlej kichiwaj in yonmej tlamantin bierotikej,
mach kineltokaj itlajtol in Dios, iwan por yonik in Dios
kintlajyowiltis chikawak ika ikualanilis.
\v 7 Achtoj namejwan noijki ankinchiwayaj nochi yon
tlamantle nijkuak anyekaj ken nekatej tlakaj katlej
ijkón kichiwaj.
\v 8 Pero axan namejwan mach ok ijkón xikchiwakan. Amo
xikualanikan, amo xitekokolikan, amo xitetoktikan tlan
amo kuale, amo xitlawikaltikan, iwan nion amo xikijtokan
itlaj tlajtole biero.
\v 9 Ayakmo xikmolwikan entre amejwan itlaj tlan amo
melawak. Porke ya ankikajkej namonemilis katlej achtoj
ankipiayaj katlej oamechtoktiaya xikchiwakan tlan amo
kuale.
\v 10 Pero axan Dios yoamechyankuilij ika se nemilistle
yankuik, katlej ika anmochijtiaskej okachi ken Yej. Ika
yin yankuik nemilistle namejwan okachi welis kuale ankixmatiskej
in Dios katlej otechchij.
\v 11 Dios mach ok techita kox tijudiojtin o noso amo
tijudiojtin, kox tisirkunsidadojtin o noso amo tisirkunsidadojtin.
Noijki in Dios mach kita kox se witz de oksekan, o noso
kox se amaixmaj, kox se tlanamaktle o noso amo. Sino
moneki ma se kineltoka in Cristo, porke Cristo yen kinyekana
nochtin katlej kipiaj yankuik nemilistle iwan kajki
itech nochtin katlej kineltokaj.
\p
\v 12 Dios amechtlasojtla iwan oamechpejpenke para xiekan
ikonewan. Por yonik, ika yon yankuik amonemilis namejwan
xiteiknomatikan. Xiktechiwilikan tlan kuale iwan amo
ximoweyinekikan. Amo niman xikualanikan iwan xikxikokan
tlan anpanoaj.
\v 13 Tla akaj itlaj oamechtoktij, xikxikokan iwan xiktlapojpolwikan,
ijkón ken namejwan oamechtlapojpolwij in Cristo, namejwan
no ijkón xikchiwakan.
\v 14 Iwan katlej okachi moneki, yen xikmatikan ximotlasojtlakan
se iwan oksé, porke in tlasojtlalistle yen kichiwa melajka
kuale xisetitokan aminochtin.
\v 15 Iwan xikkawilikan in yolosewilistle katlej Cristo
amechmaka ma amechyekana ipan namoyolo, porke por yonik
in Dios oamechnotzke para ximochiwakan sa se tlalnakatl.
Iwan xikmatikan ximotlasojkamatikan.
\p
\v 16 Xikkawilikan itlamachtil in Cristo ma tento ipan
namoyolo. Ximomachtikan iwan ximonajnawatikan se iwan
oksé ika tlalnamikilistle katlej Dios kitemaka. Xitlakuikakan
ika tlasojkamachilistle ipan namoyolo. Xikintlakuikakan
salmos, tlakuikaltin de weyikixtilistle iwan tlakuikaltin
katlej amechmaka in Espíritu Santo para ankiweyikixtiskej
in toTajtzin Dios.
\v 17 Iwan nochi tlan ankichiwaskej o noso tlan ankijtoskej,
xikchiwakan ijkón ken kipaktia in toSeñor Jesús. Iwan
xiktlasojkamachilikan in toPapan Dios por medio de yen
toSeñor Jesús.
\s Kenik moneki yeskej in tlaneltokakej
\p
\v 18 Siwamej, namejwan katlej antlanamiktiltin, moneki
ximotekawilikan ma amechyekanakan namookichwan ijkón
ken moneki ankichiwaskej porke namejwan ankineltokaj
in toSeñor.
\v 19 Okichtin, namejwan katlej antlanamiktiltin, moneki
xikintlasojtlakan namosiwawan iwan amo xikinnejnekilikan
(xikinmaltratarokan).
\v 20 Namejwan antepilwan, xikintlakitakan namopapanwan
itech nochi tlan yejwan amechnawatiaj, porke ijkón kipaktia
in toSeñor.
\v 21 Tetajmej, amo xikinkualankanotzakan namopilwan,
para amo ma moyolotlamitikan iwan amo ma kikawakan de
kichiwaskej tlan kuale.
\v 22 Tekipanojkej, xikchiwakan nochi tlan amechnawatiskej
namotekowan nian ixko yin tlaltikpak. Kuale xitekipanokan
amo san yej nijkuak ankatej ixpan namoteko para ma amechita
nik kuale antekipanoaj. Sino moneki xitekipanokan ika
kuale amoyolo para ijkón ankiteititiskej nik melawak
ankitlakitaj in toTajtzin Dios.
\v 23 Iwan nochi tlan ankichiwaskej, xikchiwakan ika
nochi amoyolo, kej yeskia ankichiwaj para yen toSeñor
iwan amo para akaj oksé tlakatl.
\v 24 Porke namejwan kuale ankimatij nik in toSeñor
ajsis tonale Yej amechtlaxtlawis, porke amechmakas in
herencia tlan amechtokaroa ompa ilwikak. Porke namejwan
ankitekipanoaj in Cristo katlej toTeko.
\v 25 Pero akin kichiwa tlan amo kuale kiresibiros itlaxtlawil
de yen tlan amo kuale katlej okichij, porke Dios techita
tinochtin san se parejo iwan mach kintlasojtla san sekimej
iwan oksekimej amo.
\c 4
\p
\v 1 Namejwan katlej antekomej, xikinchiwilikan tlan
kuale namotekipanojkawan. Ijkón ken tikchiwa iwan se,
no ijkón xikchiwa iwan oksé. Porke namejwan noijki kuale
ankimatij nik ankipiaj se amoTeko ompa ilwikak.
\p
\v 2 Amo semi xikkawakan de anmotiotzajtzilijtoskej
inawak Dios, iwan kuale xiijsatokan para ankimatiskej
tlanon nankitlajtlaniliskej, iwan xiktlasojkamachilikan
por nochi tlan kichiwa por amejwan.
\v 3 Noijki ximotiotzajtzilikan por tejwan. Para Dios
ma techititi kanin moneki titetlapowiskej de itlajtol.
Tiknekij tikintlapowiskej in tlakaj de itlajtol in Cristo
katlej ya wejkawitl mach ya akaj okikakia. Iwan por
yonik axan nej onechtzakej porke niktematiltia itlajtol
in Cristo.
\v 4 Ximotiotzajtzilikan inawak Dios para ma nechpalewi
kuale ma nitetlapowi de itlajtol in Cristo ken moneki
iwan kuale ma kimomakakan kuenta nochtin katlej kikakiskej.
\p
\v 5 Xikmatikan kenik annemiskej inwan katlej mach kixmatij
Dios, amo xikpolojtokan tiempo, sino xikintlapowikan de
itlajtol in Dios.
\v 6 Moneki in tlakaj ma amechwelitilikan namotlajtol
nijkuak antlapoaskej iwan amo ma kinkuejso. Iwan ijkón
namejwan anyeskej ken istatl katlej kiwelialtia in tlakuale.
Tla namejwan ijkón antlapoaskej, tonses namejwan ankimatiskej
kenik moneki ankinnankiliskej nochtin.
\s Pablo okonintlajpaloj
\p
\v 7 Tíquico, katlej totetlasojkaikni inawak Dios, yej
amechilwis nochi tlan nipanotok iwan kenamij nikaj.
Yej nochipa kuale kichiwa tlan Dios kineki iwan nowan
kitekipanoa in toTajtzin Dios.
\v 8 Yej niktitlani amonawak para ma amechilwi kenamij
tikatej iwan para ma amechyolojchikawa.
\v 9 Noijki kiwika in totetlasojkaikni Onésimo katlej
noijki nochipa kichiwa tlan Dios kineki iwan katlej
chanti ompa Colosas. Yejwan amechilwiskej nochi tlan
nian tlapanotok.
\p
\v 10 Amechontlajpaloa in Aristarco, katlej nian iwan
nitzaktok. Noijki amechontlajpaloa in Marcos, iprimo
in Bernabé. Namejwan yonamechilwij kenik moneki ankiresibiroskej
in Marcos tla yej yas amechitati, moneki xikresibirokan
ika kuale.
\v 11 Noijki amechontlajpaloa in Jesús, katlej noijki
itoka Justo. San yejwan yinmej judiojtin tlaneltokakej
katlej tekipanoaj nowan itech itekiw in Dios, iwan yejwan
sa tekitl nechyolojchikawaj.
\v 12 Noijki amechontlajpaloa in Epafras katlej itekipanoj
in Cristo iwan katlej noijki de ompa Colosas. Yej nochipa
motlatlawtijtok inawak Dios por amejwan para ximoyekketokan
iwan ximochikawakan itech namotlaneltokalis, para ijkón
kuale xikmatikan tlan Dios kineki xikchiwakan.
\v 13 Nej kuale nikmati nik Epafras sa tekitl motekipachoa
por amejwan, iwan noijki por nekatej tokniwan tlaneltokakej
katlej katej itech weyikan de Laodicea iwan itech weyikan
de Hierápolis.
\v 14 Lucas, in totetlasojkaikni tepajtij, amechontlajpaloa,
iwan noijki amechontlajpaloa in Demas.
\p
\v 15 Xikonintlajpalokan in tokniwan katlej katej itech
weyikan de Laodicea. Xikontlajpalokan noijki in tokni
siwatl Ninfas, iwan noijki xikonintlajpalokan in tokniwan
katlej mololoaj ompa ichan.
\v 16 Namejwan nijkuak antlamiskej ankileroskej yin
amatlajkuilole, xikintitlanilikan in tokniwan katlej
katej itech weyikan de Laodicea para yejwan noijki ma
kilerokan. Namejwan noijki xiklerokan in amatlajkuilole
katlej onikintitlanilij in tokniwan de Laodicea, katlej
yejwan amechwaltitlaniliskej.
\v 17 Xikilwikan in Arquipo amo ma kelkawa de ma kichiwa
in tekitl katlej in toSeñor okimakak.
\p
\v 18 Nej niPablo, namechijkuililia yin tlajpalolistle
ika noma. Xikelnamikikan nik nitzaktok. Ma Dios kipia
weyi iteiknotlamachilis amonawak. Ijkón ma yeto.