\id 1TH
\h 1 Tesalonicenses
\toc1 1 Tesalonicenses
\mt SAN PABLO ITLATITLANIL IN DIOS YAKINIKA OKINTLAJKUILILIJ IN TLANELTOKAKEJ DE TESALÓNICA
\c 1
\s Pablo iwan ikompañeroswan okintlajkuililijkej in tokniwan tlaneltokakej de Tesalónica
\p
\v 1 Nej niPablo. Nikaj iwan Silvano iwan Timoteo, nikijkuiloa
yin amatlajkuilole para amejwan antiopantlaneltokakej
de Tesalónica, katlej ankineltokaj in toPapan Dios iwan
toSeñor Jesucristo. Teiknotlamachilistle iwan yolosewilistle
de toPapan Dios iwan de toSeñor Jesucristo, ma yekan
amonawak.
\s In tlaneltokakej de Tesalónica oyekaj se ejemplo para oksekimej
\p
\v 2 Nochipa timotlasojkamatij inawak Dios por aminochtin
namejwan, iwan nochipa tamechelnamikij itech totiotzajtzilis.
\v 3 Tamechelnamikij inawak toPapan Dios porke tikmatij
ke ika namotlaneltokalis ankichiwaj miek tekitl, iwan
ika miek tlasojtlalistle ankitekipanoaj, iwan anmoyekketokej
ika nochi amoyolo ankichiaj ma wiki in toSeñor Jesucristo.
\v 4 Nokniwan, Dios amechtlasojtla namejwan, iwan tikmatij
nik in Yej oamechpejpenke.
\v 5 Porke nijkuak tejwan otamechtlapowijkej de yen
kuale tlajtole katlej temakixtia, amo otamechtlapowijkej
san ika tlajtole, sino noijki ika ipoder in Espíritu
Santo. Iwan noijki kuale ankimatij nik in yin tlamachtile
melawak. Namejwan kuale ankimatij kenik otimowikayaj
amowan. Tejwan ijkón otikchiwayaj porke yon se kuale
para amejwan.
\p
\v 6 Namejwan ankichijkej tlan ankitakej de tejwan toejemplo
iwan tlan ankikakej de yen iejemplo in toSeñor. Iwan
maski ankipixkej miek tlajyowilistle, namejwan ankiresibirojkej
itlajtol in Dios ika miek pakilistle katlej oamechmakak
in Espíritu Santo.
\v 7 Ijkón nik namejwan anmochijkej anmejemplojtin para
nochtin in tlaneltokakej de estado de Macedonia iwan
de estado de Acaya.
\v 8 Iwan yen namejwan anpejkej ankixoyawaj itlajtol
in toSeñor amo san itech estado de Macedonia iwan itech
estado de Acaya, sino noijki ik nowian (nian nepa) kimatij
de yen namotlaneltokalis katlej ankipiaj inawak Dios.
Asta mach ok moneki ok itlaj tikinmilwiskej de amejwan.
\v 9 Sino, nochtin innewian techmatiltiaj de tlan okikakej
otlapanok nijkuak otiwiaj otamechitatoj iwan de kenik
namejwan anmoyolkuepkej inawak Dios, iwan ayakmo ankinneltokaj
namosantojwan, iwan opéj ankitekipanoaj katlej melawak
Dios katlej yolitok.
\v 10 Noijki kijtaj kenik namejwan ankichiaj ma wiki
de ilwikak iKone in toTajtzin Dios, katlej okiyolitij
satepan de omikke. Yen Jesús, iKone in toTajtzin Dios,
katlej techmakixtia de itech ikualanilis in Dios katlej
kualkuis tlajyowilistle ixko yin tlaltikpak.
\c 2
\s Itekiw in Pablo itech weyikan de Tesalónica
\p
\v 1 Namejwan kuale ankimatij, nokniwan, nik mach san
otikpolotoj tiempo nijkuak otiwiaj otamechtlajpalotoj.
\v 2 Namejwan ya ankimatij nik achtoj otechwikaltijkej
iwan otechtlajyowiltijkej itech weyikan de Filipos.
Maski yejwan ijkón otechtoktijkej, Dios otechyolojchikawaya
para otamechmatiltijkej itlajtol katlej temakixtia, maski
otipanokej miek tlajyowilistle.
\v 3 Nijkuak tejwan otamechmatiltijkej itlajtol in Dios
amo otamechtlapowijkej ika itlaj tlan amo melawak, nion
amo otamechtlapowijkej ika toyolo mach kuale, nion amo
otamechtlapowijkej para tamechkajkayawaskej.
\v 4 Sino, otamechtlapowijkej ijkón ken Dios otechyolitak
iwan otechtlalij ma tiktematiltikan in kuale tlajtole
katlej temakixtia. Tejwan titlamachtiaj amo para tikinpaktiskej
in tlakaj, sino para tikpaktiskej in Dios katlej kixmati
in toyolo.
\v 5 Namejwan ankimatij nik mach semi otamechtlapowijkej
ika tlajtole kuakualtzin para ika otamechkajkayajkej,
nion amo otamechtlapowijkej ika itlaj tlajtole katlej
ika welis tiktlaniskej tomin. Dios kuale kimati de nochi
yon tlamantle.
\v 6 Tejwan mach otiknekej namejwan o noso oksekimej
xitechweyikixtikan, maski tejwan komo titlatitlaniltin
de Cristo welini tamechtlajtlanilianij sekin tlamantle.
\v 7 Sino tejwan otikchijkej amonawak tlan kuale para
tamechtlasojtlaskej ijkón ken se siwatl kintlasojtla
iwan kinmonekuitlawia ipilwan.
\v 8 Tejwan sa tekitl tamechtlasojtlaj iwan asta otiknekiaj
tamechmakanij, amo san yen kuale tlajtole katlej temakixtia,
sino asta tiktemakanij in tonemilis por yen tlasojtlalistle
katlej tikpiaj por amejwan.
\v 9 Nokniwan, namejwan ankelnamikij kenik otitekipanojkej
ika miek tlajyowilistle. Otitekipanojkej yuale tonale
porke amo otiknekej tiktekimakaskej akaj de amejwan,
mientras otamechtlapowiayaj de yen Dios itlajtol katlej
temakixtia.
\p
\v 10 Namejwan katlej antlaneltokakej kuale ankitakej
iwan Dios noijki, nik kuale otichipawkanenkej iwan otinenkej
ipan melajka amonawak, iwan mach akaj welis techtlajtlakoltis
de itlaj.
\v 11 Noijki ankimatij kenik otamechyolojchikajkej iwan
kenik otamechyolosewijkej kada se de amejwan, ijkón ken
se tetaj kichiwa iwan ipilwan.
\v 12 Tejwan otamechilwijkej xikchiwakan tlan kuale
ijkón ken moneki kichiwaskej ikonewan in Dios, katlej
Yej oamechnotzke para xikpiakan nemilistle itech imawisotlanex
kan Yej tlanawatia.
\p
\v 13 Por yonik tejwan noijki nochipa timotlasojkamatij
inawak Dios porke nijkuak namejwan ankikakej itlajtol
katlej tejwan otamechmatiltijkej, ankiresibirojkej kej
itlajtol in Dios iwan amo kej itlajtol akaj tlakatl.
Iwan melawak yen yon itlajtol in Dios. Iwan yon itlajtol
tekipanoa ipan namoyolo namejwan katlej antlaneltokaj.
\v 14 Nokniwan, nijkuak namejwan oamechtlatlalochtijkej
namopaisanoswan, anpanokej no ijkón ken opanokej in tiopantlaneltokakej
de Cristo Jesús, katlej katej itech estado de Judea, porke
yejwan noijki okintlatlalochtijkej inpaisanoswan in
judiojtin.
\v 15 Yonmej judiojtin okimiktijkej in toSeñor Jesús,
iwan noijki okinmiktijkej in profetajtin. In yonmej
judiojtin miekan lado otechkixtijkej. Dios mach kiwelita
tlan yejwan kichiwaj iwan yejwan noijki kinkokoliaj
nochtin in tlakaj.
\v 16 Porke yejwan mach techkawiliaj ma tikintlapowikan
katlej mach judiojtin para yejwan noijki ma momakixtikan.
Ijkón yejwan kimotetemiliaj okachi miek tlajtlakole.
Pero axan, ikualanilis in Dios yowalaj inpan.
\s Pablo oksemi okinekke yas kintlajpaloti in tlaneltokakej de Tesalónica
\p
\v 17 Nokniwan, kanaj keski tonale satepan de otikiskej
de amonawak, maski amo otamechitayaj, tejwan otamechelnamikiaj
iwan sa tekitl otiknekiaj tiaskej tamechitatiwej.
\v 18 Nochipa otiknekiaj tianij, nej niPablo miekpa oniknekia
niani, pero Satanás mach otechkawilij.
\v 19 Iwan, ¿tlanik tiknekij tamechitatiwej? Ma tamechilwikan
kiné por tlanik. Nijkuak witz in toSeñor Jesucristo,
tejwan tikchiaj ompa tamechitaskej iyakapan. Tejwan
tikpiaskej miek pakilistle por amejwan. Iwan por yen
namejwan Dios techmakas weyikixtilistle katlej yetos
kej se korona para tejwan.
\v 20 Melawak tipakij iwan timoweyinekij por yen namejwan.
\c 3
\p
\v 1 Por yonik, nijkuak mach ok otikxikojkej timochiaskej
okachi, tejwan otikijtojkej timokawaskej toselti nian
itech weyikan de Atenas,
\v 2 iwan otiktitlankej in tokni Timoteo ma amechitati,
porke yej kitekipanoa in toTajtzin Dios iwan tekipanoa
towan tlamachtia de yen kuale tlajtole katlej temakixtia
de Cristo. Otiktitlankej para ma amechyekketza iwan
ma amechyolojchikawa itech namotlaneltokalis,
\v 3 para amakaj ma motzinkixti itech tlajyowilistle.
Porke namejwan kuale ankimatij nik tikpiaj de tipanoskej
itech nochi yon tlajyowilistle.
\v 4 Nijkuak ok otiekaj amowan, otamechilwijkej nik tikpiaskej
miek tlajyowilistle. Iwan ijkón otlamochij ken namejwan
ya ankimatij.
\v 5 Por yonik in nej, komo mach ok onikxikoj okachi,
onitlatitlanke para nikmatis kenik ankatej namejwan
itech namotlaneltokalis. Porke nej onimomawtij tla nikmatis
nik in diablo yoamechmayaj ijtik tlajtlakole, iwan totekiw
san nenkaj (en vano) otikchijkej.
\p
\v 6 Pero axan in Timoteo yomokuepato de Tesalónica
kan namejwan ankatej, iwan techwalkuilia kuale tlajtole
(rason) de yen namotlaneltokalis iwan de yen namotlasojtlalis
katlej namejwan ankipiaj. Techilwia nik namejwan nochipa
antechelnamikij ika pakilistle, iwan nik sa tekitl ankinekij
antechitaskej, ijkón ken tejwan noijki tiknekij tamechitaskej.
\v 7 Por yonik, nokniwan, maski techtlajyowiltiaj iwan
techpanoltiaj tekokojkayotl, tejwan otimoyolosewijkej
miek nijkuak otikmatkej nik namejwan kuale anmoyekketokej
itech namotlaneltokalis.
\v 8 Axan tiyolitokej ika miek pakilistle porke tikmatij
nik namejwan kuale anmoyekketokej inawak toSeñor.
\v 9 ¿Kenik welis tikmakaskej sa tekitl miek tlasojkamachilistle
in toTajtzin Dios por yen namejwan iwan por yen miek
pakilistle katlej tikpiaj inawak Dios por amejwan?
\v 10 Yuale tonale tiktlatlawtijtokej in toTajtzin Dios
ma techkawili ma tamechitakan oksemi, iwan welis tikajxitiskej
tlan ok amechpoloa itech namotlaneltokalis.
\p
\v 11 Tiknekij yen toPapan Dios iwan toSeñor Jesucristo
ma techpalewi para ma weli ma tiwian ma tamechitatij.
\v 12 Iwan toSeñor ma amechiskalti okachi itech tlaneltokalistle
iwan itech tlasojtlalistle, para ma yeto tlasojtlalistle
entre amejwan iwan noijki inwan oksekimej, ijkón ken
tejwan tamechtlasojtlaj.
\v 13 Iwan toSeñor ma amechmaka chikawalistle ipan namoyolo,
para xiekan anyolchipawakej iwan amo xikpiakan nion
itlaj tlajtlakole inawak toPapan Dios, nijkuak witz in
toSeñor Jesús iwan nochtin katlej iaxkawan yolchipawakej.
\c 4
\s Kenik moneki se nemis para ma kipakti in toTajtzin Dios
\p
\v 1 Axan, nokniwan, tamechtlatlawtiaj miek iwan tamechtlajtlaniliaj
ika itoka in toSeñor Jesús, nik ijkón ken tejwan otamechititijkej
kenik moneki annemiskej para ankipaktiskej in toTajtzin
Dios, ijkón xikchijtokan okachi.
\p
\v 2 Namejwan ya ankinmatij in tlanawatiltin katlej
otamechmachtijkej katlej otechmakak in toSeñor Jesús.
\v 3 Dios kineki ximochipawakan inawak iwan amakaj ma
momekati.
\v 4 Sino kada se ma kimati kenik kipias isiwa ika chipawkanemilistle
iwan ika tetlakitalistle.
\v 5 Namejwan okichtin amo xikkawilikan namotlalnakayo
xikinmixelewikan in siwamej. Noijki namejwan siwamej
amo xikkawilikan namotlalnakayo xikinmixelewikan in
okichtin. Porke ijkón kichijtinemij katlej mach kixmatij
Dios.
\v 6 Amakaj ma kixelewili isiwa de se ikni tlaneltokak
para kitlankuamotlas, porke in toSeñor kikastigaros chikawak
akin ijkón kichiwas, ijkón ken tejwan yotamechilwijkej.
\v 7 Porke Dios mach otechnotzke para ma tikchiwakan
tlan amo kuale, sino Dios otechnotzke para ma timoyolchipawakan
inawak.
\v 8 Ijkón kiné, tla akaj amo kineki kineltokas in yin
tlanawatile, kijtosneki mach kineltoka in Dios. Porke
yin tlanawatile mach witz de akaj tlakatl, sino witz
de Dios, katlej techmaka iEspíritu Santo.
\p
\v 9 Axan, mach ok moneki tamechtlajkuililiskej okachi
de kenik moneki ankintlasojtlaskej in tokniwan, porke
Dios yoamechmachtij kenik moneki anmotlasojtlaskej entre
amejwan.
\v 10 Iwan melawak nik ankintlasojtlaj nochtin in tokniwan
katlej katej itech nochi in estado de Macedonia. Pero
sa tekitl tamechtlatlawtiaj, nokniwan, namotlasojtlalis
okachi ma moskalti.
\v 11 Xikchiwakan de xiekan ika yolosewilistle, iwan
xikchiwakan katlej de amejwan amotekiw iwan amo ximokalakikan
kan amo amotekiw. Amo xiekan antlatziwkej, sino xitekipanokan
ika namomawan ijkón ken tejwan yotamechnawatijkej.
\v 12 Ijkón xikchiwakan para ma amechtlakitakan katlej
mach kixmatij Dios, iwan ijkón mach ok monekis akaj ma
amechpalewi ika itlaj.
\s Oksemi witz in toSeñor Jesucristo
\p
\v 13 Nokniwan, tiknekij xikmatikan tlan panoskej katlej
kochij, kijtosneki yejwan tokniwan tlaneltokakej katlej
yomikkej. Para amo ximoyolkokokan ken oksekimej katlej
mach kichiaj in Cristo.
\v 14 Porke kuale tikneltokaj nik in Jesús omikke iwan
omoyolkuik, iwan noijki kuale tikneltokaj nik nekatej
katlej otlaneltokakej inawak Jesús iwan yomikkej, Dios
kinwikas iwan Jesús itech nekáj tonale nijkuak oksemi
witz in Jesús.
\p
\v 15 Por yonik, yin tlan otechilwij in toSeñor tejwan
noijki tamechilwiaj, nik in tejwan katlej ok tiyolitokej
iwan timokawaskej asta ijkuak witz in toSeñor, mach tejwan
achtoj techwikas ke nekatej katlej yomikkej.
\v 16 Porke in toSeñor waltemos de ilwikak iwan waltlajtos
chikawak kej se tekiwaj. Tlajtos kej se tlayekanke de
angelestin, iwan tikkakiskej se tlapitzalistle ika tlapitzale
de Dios. Ijkuakón katlej otlaneltokakej inawak Cristo
iwan yomikkej, yejwan achtoj moyolkuiskej (moyolitiskej).
\v 17 Satepan katlej ok timokawaskej tiyolitokej ixko
yin tlaltikpak, ijkuakón techwikaskej san sekan inwan
yejwan ijtik mixtle para tiknamikiskej ajkopan ijtik
ejekatl in toSeñor. Iwan ijkón tieskej iktlanke (ik
tlami) iwan toSeñor.
\v 18 Por yonik, ximoyolojchikawakan se iwan oksé ika
yin tlajtole.
\c 5
\p
\v 1 Nokniwan, mach moneki tamechijkuililiskej itech
tlan tonale o noso itech tlan ora nijkuak ijkón tlapanos.
\v 2 Porke namejwan kuale ya ankimatij nik itech nekáj
tonale nijkuak witz in toSeñor, witz nijkuak mach akaj
kichia, ijkón ken se ichtekke witz de yuak.
\v 3 Nijkuak in tlakaj kijtoskej: “Ya tikatej ika kuale
iwan ya tikpiaj yolosewilistle”, san niman ijkuakón inpan
walajtiwetzis tlaxixitinilistle. Yetos ijkón ken se
siwatl walijtikualotiwetzi para kitlakatilis ikone.
Iwan mach akaj welis cholos.
\v 4 Pero namejwan, nokniwan, mach ankatej ijtik tlatleyualotl.
Por yonik, itech nekáj tonale nijkuak witz in toSeñor,
mach welis amechkochwis (amechsorprenderos) ken kichiwa
se ichtekke.
\v 5 Porke nochtin namejwan ankipiaj in Dios ipan namoyolo
kej se tlanextle, iwan annemij kan tlanestok porke ankixmatij
in Dios. Tejwan katlej titlaneltokakej mach tikatej
ken nekatej katlej kipiaj tlatleyualotl ipan inyolo,
iwan nemij kej yeskia kan tlatleyua.
\v 6 Por yonik, amo ma tikochikan ken oksekimej, sino
ma tijsatokan ika kuale totlalnamikilis.
\v 7 Katlej kochij, kochij de yuak, iwan katlej tlawanaj,
tlawanaj de yuak.
\v 8 Pero tejwan katlej tinemij kan tlanestok, moneki
tieskej nochipa ika kuale totlalnamikilis. Ma timotzakuilikan
ika totlaneltokalis iwan ika totlasojtlalis ijkón ken
se soldado motzakuilia ielpan ika se tepostle tankachtik
itoka escudo. Iwan ma tikchiakan in tonale nijkuak techmakixtis
in Dios, iwan yon tonale katlej tikchiaj, tikpixtoskej
kej se casco de tepostle ken katlej kimotlalilia se
soldado.
\v 9 Porke Dios mach otechtlalij para topan kiwaltitlanis
ikualanilis, sino para techmakixtis inawak in toSeñor
Jesucristo.
\v 10 Jesucristo omikke por tejwan para nochipa ma tikpiakan
nemilistle inawak. Tejwan titlaneltokakej katlej tiyolitoskej
iwan nekatej tlaneltokakej katlej yomikkej, tinochtin
tieskej san sekan inawak Cristo nijkuak Yej walmuikas.
\v 11 Por yonik, ximoyolojchikawakan iwan ximochikawakan
se iwan oksé itech namotlaneltokalis, ijkón ken ya ankichijtokej.
\s Pablo okinnajnawatij in tokniwan tlaneltokakej
\p
\v 12 Nokniwan, tamechtlatlawtiaj xikintlakitakan katlej
tekipanoaj amonawak, katlej amechyekanaj iwan amechnajnawatiaj
kenik moneki anyeskej ken Dios kineki.
\v 13 Moneki kuale xikintlakitakan iwan kuale xikintlasojtlakan,
por yen tekitl katlej kichiwaj. Xiekan ika yolosewilistle
se iwan oksé.
\p
\v 14 Noijki tamechtlatlawtiaj, nokniwan, xikinnajnawatikan
ika chikawak katlej mach kinekij tekipanoskej, xikinyolojchikawakan
katlej mosotlawaj, xikinpalewikan katlej mach chijchikawakej
itech intlaneltokalis, iwan nochtin xikinpialikan pasensia.
\p
\v 15 Tla akaj amechtoktia itlaj amo kuale, xikpiakan
kuidado de amo xikkuepilikan ika tlan amo kuale, sino
nochipa xikchiwakan tlan kuale entre namejwan iwan noijki
inwan oksekimej.
\p
\v 16 Nochipa xiekan ika pakilistle.
\v 17 Nochipa ximotiotzajtzilikan.
\v 18 Ximotlasojkamatikan inawak Dios itech nochi tlamantle
tlan anpanoaj, porke yen yon tlan Dios kineki xikchiwakan
namejwan katlej ankatej inawak Cristo Jesús.
\p
\v 19 Amo xiktzakuilikan tlan kineki kichiwas in Espíritu
Santo, porke tla ijkón ankichiwaskej, tonses yon kej yeskia
ankisewiaj se tlitl.
\v 20 Amo xiktlalikan se lado tlan kijtaj in profetajtin.
\v 21 Moneki nochi xikprobarokan, iwan xikmokawikan san
yen tlan kuale.
\v 22 Xikkawakan se lado nochi tlamantle katlej mach
kuale.
\p
\v 23 Inewian Dios katlej techmaka yolosewilistle, kuale
ma amechyolchipawa. Iwan ma amechpia anchipawakej itech
namoespíritu, itech namoanima iwan itech namotlalnakayo,
para amo ankipiaskej itlaj tlan amo kuale nijkuak walmuikas
in toSeñor Jesucristo.
\v 24 ToTajtzin Dios katlej oamechnotzke para xitlaneltokakan
inawak Cristo, Yej kichiwas nochi tlan techilwia porke
Yej nochipa kichiwa tlan kijta.
\s Pablo okoninyolopachoj iwan okonintiochij nochtin tokniwan
\p
\v 25 Nokniwan, ximotiotzajtzilikan por tejwan.
\p
\v 26 Xikonintlajpalokan nochtin tokniwan ika tlasojtlalistle
ken Dios kineki.
\p
\v 27 Namechnawatia ika itlanawatil toSeñor, xikinlerwilikan
yin amatlajkuilole nochtin tokniwan.
\p
\v 28 In toSeñor Jesucristo ma kipia weyi iteiknotlamachilis
amonawak. Ijkón ma yeto.